محتوى القصة
شوفاتو ليها خلاوه تحس بتوثر وأنفاسهاا بدات تعلى وقلبها كان بحال شي بركان على وشك الإنفجار بقوة دقاتو لي كانو تيتسمعو ليها.. حاولات ماتبينش ليه توثرها وتأتير قربو ليها.. حاولات ترسم ابتسامة خفيفة على وجهها باش تكسر جو النظراات المتوثرة ونطقات بهدوء: واش محتاج شي حاجة؟
نوح:(حرك راسو ونطق بهدوء) كاس دلماا
حركات راسها وحطات الشي لي كان فيديها ومشات جهة الثلاجة جبدات قرعة دلماا باردة ورجعات شافت فيه:واش بغيتيهوم باردين بزاف؟؟
نوح:شوية
خدات كويس وكبات ليه لماا مخلطاهوم مع لعاديين عاد قربات جهتو ومدات ليه لكاااس وهي كاتشتت شوفاتها فبعيد.. تاحسات بيدو قاست صبعانها فلمسة خلات مشاعرها ينفاجرو كينبوووع وييسقيو روحها الدابلة.. بعدات بزربة وهي كاضور عينيها فلكوزينة وحناكها ولاو حمريين عكسو هو لي كان فقط واقف كيشوف فيها وشرب من لكاااس عاد رجع حطو فوق الطبلة ونطق بهدوء:شكرا
خرج من لكوزينة بلاحس كيف حضر ورحيل بقات حاطة يديها على قلبها لي كان يضرب ويضرررب.. مشات سدات باب الكوزينة وتكات عليه وبقات تاتشوف قدامها وهي ساهية فشي لي وقع.. موقف بسيط خلى أثر كبيررر فالداخل ديالها.. علاش هو بالضبط تتحس معاه هاكا واش حيت فيوم من الأيام مد يد المساعدة ليها بلامايعرف ولاحيت طلب يديها لزواج وبين ليها أنه باغيها تكون مرتو عليها حاسة بهاد المشاعر ولاحيت كاينة حاجة خرا.. نفضات راسها كأنها كتنفض دوك الأفكاار لي عارفة روحها غايبقاااو ياكلو فيهاا ويسيطرو عليها ومايخليوهاش بخاطرها داكشي علاش قررات تحبس التفكيررر فيه وفتصرفاتو لي لحد الساعة مكتفهم فيهوم والووو.. رجعات تاتكمل ديكور البسطيلة وخرجات لبرا لقاتهوم باقي مجمعين.. هاد لمرة مشافتش فيه جلسات جنب لبنات وجات عندها سيدرا وهمسات ليها فودنيها:مامي عطيني بسطيلتي
رحيل:جلسي هنا فالكرسي وماتبقايش غير غادة جاياا ماكليتي والو
سيدرا:(نفدات هضرتها وجلسات فالكرسي وقالت وهي تتشير لبيتزا) بغيت هاديك لبيتزا ديال لكفيتة تاهي
مدات ليها رحيل شنو بغات فطبسيل وحطات ليها لمشوار جنب عنقها باش ماتوسخش جلابتها وسيدرا تكونات تتاكل تاسمعات صوت نوح لي نطق وهو نايض:سي إدريس هادا هو لوقت لجامع
إدريس:(شاف فساعتو ونطق وهو نايض) واييه يالاه نلقاو لبلاصة فالصفوف الأمامية
ناضو الدراري كولهوم وإدريس شاف فرحيل: غاتمشي ابنتي لجامع؟
رحيل:(حركات راسها)اه ابابا نتوضى ونجي
إدريس:ماتعطليش ابنتي حيت غانمشيو على رجليناا
مشات رحيل لبيتها زولات العباية وهزات حوايج لداخل ومشات جددات وضؤها وخرجات لبسات عباية خرا كحلة ولاحت فولارها وهزات صلايتهاا ويالاه بغات تخرج من لبيت جات سيدرا لي نطقات:مامي بعيت نمشي معاك
رحيل:(حركات راسها) اجي توضااي بااش تانتي تصلي
داتها بزربة وضاتها ورجعاتها لبيت لبساتها تاهي عباية صغيرة كانت خداتها ليهاا ودارت ليها فولار على عنقها تاتوصل لجامع وتلبسو ونطقات بهدوء:هانتي امامي دابا نتي توضيتي باش نصليو عندك تحزقي حيت غاتبطلي لوضو ديالك
حركات سيدرا راسها باه ونزلات هازة تاهي صلايتها فرحانة.. رحيل بوحدها لي مشات معاهوم لجامع وتانيرت يادوب تاتصلي فالدار بلچلاااس وأسماء راه كونجي أما لبنات لخرين مكيصليوش تاراويح.. كان سابق نوح هو وإدريس مع زين العابدين عاد إسلام وريان ومحمد طه بقا مع رحيل تيهضروو.. الزنقة كانت خاوية ويادوب كاين فيها الناس لي غاديين لجامع والأجواء زوينة ومريحة.. وسيدرا شادة فإدريس وتاهي مجمعة معاهوم فرحانة.. ومع بداو كيقربو لجامع وبداو يبانو الناس لي جايين من الزناقي تاهوما يصليوو وغير قربو تفارقو مع رحيل وسيدرا لي مشاو جهة لعيالات ولخرين مشاو جهة الرجال.. لقات رحيل بلاصة وفرشات صلايتها هي وسيدرا لي عينيها لمبطنين كيضورو على الكم الهائل من لعيالات لي تم.. ضارت عند رحيل لي حلات القرآن تجبد فين وقف الفقيه فالصلاة باش تقرا معاه ونطقات:مامي فيا عطيشات
رحيل:(جبدات قرعة دلما وعطاتها ليها) مانشربيش بزاف باش ماتبغيش تمشي لطواليط
سيدرا:(تتشرب تاسالات) صافي باركة مامي
بقات معاها رحيل تاودن لعشا وموراها جلسو شوية عاد بداو صلاة لعشاء ورحيل موقفة جنبها سيدرا لي تتقلد ماماهاا وتصلي تاهي ومرة طلع راسهاا تاسالاو لعشاا وجلسو شوية باش يبداو التراويح وسيدرا قربات عند مها وهمسات ليها:مامي درت حزيقة
رحيل:(جاتها الضحكة) خسرتي لوضو
مامي:(مكمشة حجبانها) خرجات بوحديتها مامي
رحيل:(جراتها باستها تاضحك على هضورها) ههه صافي امامي
رجعو كيصليو التراويح ورحيل رادة بالها مع سيدرا لي جالسة مرة ساكتة مرة تجبد تلفون رحيل تلعب فيه ومرة تكى فوق الصلايا.. تاشافت العياالات ركعو وهي تركع تاهي ورحيل سمعاتها تاتهضر بخفوت:ياااربي بّا ديدي يشري ليا حويجات لي بغيت ومامي تخليني نقطع شعري شوية ياربي مودي يجيب ليا شكلاط لي بغيت صافي ياربي عفااك آمين
رحيل جاتها الضحكة وسط الصلاة وحبساتها بزز وهي تتسمع دعواتها البريئة..
سالاو الصلاة ورحيل ضارت جهة سيدرا لقاتها نعسات فوق الصلاية وشادة التلفون تبسمات ليها بحنية وهي تتفكر دعواتهاا لي خلاوها تبسم بحب.. ناضت جمعات صلايتهاا وهزات سيدرا وشافت فالسيدة لي جنبها ونطقات بصوت خافت:عفاك واخا تجمعي ليا الصلاياا حيت بنتي ناعسة؟
السيدة:اهاا واخا اختي مرحباا
جمعات ليها لمرا الصلايا وشكراتها رحيل وناضت هازة سيدرا وبلاستيكة فين دايرة الصلايات وغادة تتقلب على باهاا فين مولفين يتسناوهاا وبان ليها غير نوح لي واقف مع زين العابدين.. كمشات حجبانهاا وقربات جهتهوم ونوح كان مهبط راسو تايشوف فتلفونو تاحس بشي حد قدامو وهز راسوو فيهاا وهي نطقات:فين بابا والدراري؟
نوح:(بهدوء) مصليناش فنفس البلاصة (قرب جهتها تاولى فاصلهوم غير جسم سيدرا وحط يدو على جناب سيدرا وهزها عليها تاتحركات وحلات عينيها وهو تبسم ليها ورجع طبطب على ضهرها تارجعات حطات راسها على كتفوو.. هز نوح عينو فرحيل ونطق بخشونة) هاهوما جاو
رمشات بعويناتها فيه بحال شي قطة عاد ضارت تتشوف فباها لي كان جاي هو وإسلام وتبسمات لباها لي نطق:نعسات
رحيل:قبيلة هههه بقات تاتصلي وتقلد الناس تاعياات
إدريس:(مسح على ضهرها بحنية) نخشيشتي
نوح:فين ريان ومحمد طه؟؟
إدريس:ماعرفتش ايكونو باقي ماخرجوو
رحيل:علاش ماصليتوش مع بعضياتكوم؟
إدريس:لقينا الجامع مطرطق وتفرقنااا وهوما ماعرفناش اينا جيهة صلاوو فيها
رحيل:اه تاانا لقيت جهة لعيالات عامر اها هاهوما جااو
يالاه نمشيو
درع ريان رحيل من جيه ومحمد طه من جيه ومشااو سابقين تيهضرو ويعاود كيف موالفين تاوصلو لدار ومد نوح سيدرا لإدريس ونطق بالتقالة: سي إدريس الله يقبل والله يخلف تهلا فصحيحة تانتشاوفوو
إدريس:دخلوو نشربو كويس دأتاي؟
نوح:كااينة عندنا العائلة فالرياض ضروري تاهوما نعطيوهوم حقهووم لمهم تانعيط ليك واخاا الله يعاونكووم
سلم عليهوم وتمشى جهة طوموبيلتو هو وزين العابدين وقبل مايركب شاف فرحيل لي كانت تتهضر ضاحكة هي والدراري ومعاهوم إسلام عاد طلع لطوموبيل وتحرك..
تيدوزو ليام والكل كان منغامس فهاد الشهر فلعبادة والتقرب من الله عز وجل.. ونفس الروتين كيدوز عند الكل.. كانو مجموعين على الطبلة كيتسناو الأخبار باش يعرفو واش غايصومو باقي نهار ولا غدا غايكون لعيد..
ريان:أنا گلت غانصومو باقي ونتوما اش گلتو؟
رحيل:عندي إحساس غدا لعيد هه
أسماء:بحال رحيل
محمد طه:باغي نصوم غدا ياربي لعيد مايكون تال بعدو
رنيم:ههه ياربي غدا نعيدوو
ريان:(شاف فغزلان لي جالسة جنبهوم ساكتة وغمزها) ونتي اغيزو اش قلتي؟
غزلان:(تلبكات فاش شافت كل لعيون عليها) يمكن غدا نعيدو
ريان:فين لبخووشة نسولوها تاهي
رحيل:(تتفوه)مشات لطواليط
رجعات سيدرا تتجري عندهوم ومشات عند رحيل تكونات ونطقات بحماس:مامي غدا لعيد ياكا؟
رحيل:باقي ماعرفناش امامي نتسناو يقولوها فالأخباار
ريان:(قشع السينتة لي كدوز تحت التلفازة ونطق بسرعة كيقرا معاها ) حسب بلاغ وزارة الأوقاف والشؤون الإسلامية فإن فاتح شوال سيكون يوم لغد ** عيد مبارك سعيد كل عام وأنتم بألف خير
ضحكو لبنات بالجهد وريان قلب شفتوو مساخيش برمضان ومعاه تاطه ولبنات غير شافو لعيد غدا ناضو كل وحدة وشنو خاصها دير.. رحيل مشات تلبس حوايجها باش تمشي تجيب قفطانها لي خيطات هي ولبنات ونيت تشري لسيدرا كمالة لبسة دلعيد.. أما غزلان فمشات توجد لفطور دلعيد والدراري غادين يحسنو ويجيبو لي خاص لحاصول كل واحد نايض يقضي شغلو ومخلين غير تانيرت وغزلان فالدار.. والناس غير عرفو بلي غدا لعيد كل واحد خارج يتقضى والزحاام ولبنات شادين نوبة فصالونات وعند لخياط وشي كيشري لوليداتو وشي يتقضى اش خاصو مهم الأجواء دلعيد كانت حاضرة وبقوة.. وصلات الوحدة ونص عاد دخلو لبنات مع محمد طه وريان لي مشاو معاهوم وهوما مكيلين.. لقاو غزلان تباركالله عليها سالات لفطور وعاونانها تانيرت فداكشي لي قدات عليه وإدريس تقضى شنو خااص.. جلسو فالصالة كينهجو وجات تانيرت تبسمات:جبتو السوق معاكوم
رحيل:هاكي (مدات ليها ساشي) هادي أمانتك مع بليغة جبناها ليك وفولار
تانيرت:(شدات ساشي وتبسمات) شكرا اماما
رحيل:فين غزلان؟؟
تانيرت:فلكوزينة غزلاااااان غزلااااااان
غزلان:(من لكوزينة)نعاااااام
تانيرت:اجي ابنتي صااافي خلي داكشي
جات غزلان لي هاد الايام بقات معاهوم حيت أميمة مشات تعيد فدارهوم وتانيرت مبغاتهاش تبقا وحدها..
رحيل:(مدات ليها ساشي تاهي) نتمنى يعجبك دوقي
غزلان:(شداتها وهي مدعوقة ونطقات بخفوت) شكرا عدبتي راااسك
رحيل:مهم عيني ميزاني نتمنى تجيك هو هاداك
طلات غزلان ديك الساشي بان ليها توب فالباج وصندالة وهي تبسم من لجيست لي دارت معاها رحيل لي بقات تتفرق لخناشي على كل واحد وعطات تالباهاا لكادو لي جابت ليه ولي كانت جلابة سوسدية خيطاتها ليه وخدات عبارو من واحد الجلابة عندو.. تبسم ليها إدريس وعنقهاا وتاهي تبسمات فرحانة وكدعي الله هاد لفرحة دوووم..
حلات عينيها وهي حاسة براسها شبعات نعاااس وفيها واحد النشاط فشكااال.. كانت الستة ونص دالصباح ضارت جهة سيدرا ولقاتها ناعسة معنقة لخنيشة لي فيها حويجات لعيد وتبسمات ليها بحب عاد ناضت لحمام دارت روتينها الصباحي ونزلات لتحت لقات كلشي باقي مافاق ماعدى غزلان لي دارت لما يسخن باش تعمر أتاي..
رحيل:صباح لخير
غزلان:(بتبسيمة) صباح النور عواشرك مبروكة
رحيل:علينا وعليك
بدات رحيل تتعاونها وتحط فالطبيلة لفطور لي وجدات عاد طلعو يلبسو حوايجهوم دلعيد.. غزلان كانت جابت ليها رحيل قفطان واسع بحزامو ديال الدار شراتو ليها طالع زوين وسامبل وتوبو مبرد وجاا مع فصالتهاا مشطات شعرهاا وطلقاتو هاكا طبيعي بلاسشوار بلاوالو ودارت شوية دلمك اب ورشات ريحتها وخرجات لبرا وهي تسمع لحس وضارت بان ليها محمد طه نازل بسروال دجين جديد كحل مع شوميز نواغ وجابادور گرونة فصالة تتلبس بحال جيلي جاتو خطيرة وشعرو محسنوو ولحية مقادة وروايح تايتشمو من بعيد.. هز عينو فيها وحبس بلاصتو وبلامايحس طلعها بعينيه من رجليها لي ملبساهوم صنيديلة لقفطان لشعرها لوجهها وفاش عاق براسو تنحنح ونطق بهدوء:عواشرك مبروكة
غزلان:(بتوثر) علينا وعليك
محمد طه:مازال مافاق حد؟
غير قالها وهو يسمع صوت ريان لي نطق وراه بصوت مرح باين فيه لفرحة: هانا معجبتكش الخوو
ضار محمد طه كيشوف فريان لي كان لابس سروال قندريسي كحل مع جابادور مسدودة كحلة ومخيطة بلاغجونطي وتقاشر مع بليغة وشعرو هاد لمرة نقصو شوية من جناب ومخلي غير لفوق وطبعا سنسلة لي مكيزولهااش فعنفو جاا مفركس تاهوو بلبدي.. تبسم ليه محمد وقرب عندو تسالمو وعيدو لبعضياتهوم عاد شاف ريان فغزلان وصفر: الناس ولبلدي هههه
غزلان حشمات من شوفاتهوم ودارت السبة تمشي تجيب الصينية وخلاتهوم.. أما رحيل فكانت جالسة فوق النموسية تتمشط لسيدرا شعرها لي صاوباتو ليها لبارح وقطعاتو ليه شوية وقدات ليها لگصيصة تاهي.. كانت فرحانة بحويجات لعيد لي شراو ليها وضارت على راسها ونطقات بفرحة طفولية:مامي جيت زوينة ياكاا؟
رحيل:(باستها ونطقات بحب)جيتي فنة
كانت سيدرا لابسة شوميز بيضا مفخفخة من ليدين وجهة لمعصم مجموعة بحال وردة مع جيپ نواغ جلد فوق ركييات وعندها سميطات بحال سالوبيط وليبى نواغ وگااط.. وقفات رحيل قدام لمرايا وخدات كريم رطبات بيه وجهها ودارت آيلاينر راسمة بيه عينيها ومجبداهوم وريسيل مشطات بيه رموشها وبلاشر لحنيكات عاد عكر نيود قهوي. مكياج خفيف صباحي مناسب لعيد.. حيدات قفطانها من لعلاقة ولبساتو كان على فورمتها كيجي زوين وبنوتي توبو موسلين فلموڤ دارت ليه خياطة عادية حدها ركزات على ليدين لي جاوها مفخفخين وجهة الصدر فيه لعقااادي ودارت ليه الحزام تحت الصدر بنفس توب لقفطان.. لبسات صندالة لي خدات ليها سيدرا كاضوو ومشات حلات شعرها ومع إسلام مغايجيش حيت غايعيد فكازا مع مو وخوتو خدات راحتها.. كانت تاهي مصاوبة شعرها ونقصات منو شوية مع طواال بزاف وخلاتو فوق ترمتهاا كيلعب كيف شلال لعسل.. ولفخونش قطعاتها وبيناتها كيوووت وبرزات وجهها بشكل اخر على قبل.. رشات ريحتها وبدات تتلبس فليبيجو ديالها لخفافين زوج سنسلة فالعنق وحدة صغيرة ولخرا كبر منها وگرميط مع خاتم ديالو شافت فراسها وتبسماات وجبدات تلفونهاا دخلات لگالوري بالضبط واحد الضوسي عندها تم معمرها قاستو حلاتو وجبدات تصويرتها هي وجيداء لي كانو خداو فواحد لعيد كانو باقي صغارات شوية.. تبسمات تبسيمة حزينة وعينيها لمعو دموع وبدات تتفكر لحلمة لي شافت لبارح ولي كانت فيها جيداء.. معقلاتش عليها كيفاش ولكن عقلات على جيداء كانت مبسمة ليها..
رحيل:(بحزن)الله يرحمك وينور قبرك اختي
دعات ليها وطفات التلفون وبدات تتشوف فراسها وتبسمات عاد نزلات لتحت كان كلشي فايق ومأنتك ماعدى باها لي مشى يصلي صلاة لعيد.. أسماء كانت لابسة كندورة فالكحل منبتة بلعقيق فالدوغي وطالقة تاهي الشعر لي بوكلانو ومقادة وجهها كيف عادتهاا وضاربة غوج أليڤغ فلحمر وبدات تتصور.. أما رنيم فكانت تاهي بقفيطين فلحمر سامبل بنوتي بحال شكل ديال غزلان غير هو يديه شبكة.. وتانيرت متأنقة باللون الأزرق وتاهي طالقة شعرهاا ولحمالة غير مزيناتهاا وخلات السر يطيح عليها واكتفت غير بكحول بلدي صافي.. عيدات عليهوم رحيل لي كلهوم تغزلو بيها وبتقطيعة شعرها الجديدة وتاسيدرا ضور ضور وتبوسهاا.. جاا إدريس واكتملات طبلة العيد مع الأحباب والعائلة والضحك لي كانو مفتاقدينوو زمااان خصوصاً رحيل لي بانت ليه تغيرات على كيف كااانت.. فطرو وبقاو جالسين ولبنات يتسولفاو.. جلسو تاسمعو الدقان ورحيل مكانتش فالصالة حيت ناضت لكوزينة دير لغدا ومعاوناها غزلان.. كانو دايرين لموسيقي وغير سالات رحيل خلات غزلان تتوجد شلاظة باش تبرد حلات شعرها لي كانت جامعاه وقادات لگصيصة وخرجات لبرا باش تجلس معاهوم وماتجي عينيها غير فنوح لي كان واقف فلكولوار تيهضر فالتلفون هز عينو بلخف فيها ورجع حدرها ولكن دغيا رجعها عاود وبقا واقف فبلاصتو وعينوو عليهاا منزلهاش ولاتحرك بقا غير كيشوف فيها هي لي جمدات بالدعقة مخرجة عينيها فيه..
نوح:(سكاناها بعينيه بلامايشعر وبصوت خشن همس) ماشاء الله..
أطرافها تخدرو وعينيها خرجو من بلاصتهوم وهي تتشوفو قدامها واقف بجابادور فالبيض مع جلابة سوسدية مفصلة عليه ومبينة كتافو لعراااض.. لحيتو منقصها شوية على كيف كانت.. صدمتها خلاتها تجمد ومابقات عارفة فين تمشي ولاشنو دير أما نوح فمغضش البصر عليها وعينوو كانت تتسارا عليها بدون توقف.. مبهور بشوفتها وهي بهاد المنظر.. التلفون باقي فيديه وصوت واحد من لمعارف لي كيعيط ليه باش يبارك ليه لعيد كيتسمع وفين هو لعقل لي يرد ليه لبال وعقلو مع الفثنة لي كانت واقفة قداموو.. بخطوات بطيئة كان تيقرب جهتها وهي غير شافتوو توگضاااتو وضارت غاتمشي ساعة حسات بيديه شداتها فدراعهاا حابساهااا.. بقات رحيل تتنفس بالجهد وكاضور عينيها خايفة شي حد يجي ويلقاهوم وزيد على لوضع لي هي فيه والشعر لمعري ومفاتنها لي كيبانو لشخص ماشي من محارمهاا.. أما نوح بقا شاد دراعها وعينو على كتافها لي تيتهزو وشعرهاا لي كيف خيوط لحرير..
نوح:(همس ليها بنفس لخشونة) عواشرك مبروكة
رحيل:(شداتها التلفة ولخلعة ونطقات بسرعة باش تصدرو) مامشى مع باااس
خرجات عينيها فاش سمعات قهقة رجولية صدرات منوو وموراها فلتها وهي مشات تتجري لفوق ومعاوداتش ضارت وراهاا مخلية نووح تيضحك على هضرتها.. دخلات لبيتها وهي ممتيقاش شنو طرا وشوفتو ليها وهي هاكا وزيد هضرتها لي قالت وداك التصرف لي دار.. حسات بالحرارة طالعة معاها ومشات جلسات فوق النموسية وهي تاضور فعينيهاا تتحاول تهضم شي لي طرا قبل دقائق..
رحيل:(حطات راسها بين يديها ونطقات بسهو) هادشي لي كان خاص يطرا يشوفني بلاحجاااب (كمشات حجبانها فاش تفكرات شوفاتو) وزايدها كيتمنظر اوييييلي حااااي
تحل لباب عليها تاقفزات ودخلات أسماء لي نطقات:سيفطت لبرهوشة دبنتك باش تعلمك بلي ولد لحاج كاين باش ماتخرجيش بديك لحالة
رحيل:(هزات راسها وضحكات بلفقصة)خرجت ولي عطا الله عطاااه
أسماء:(خرجات عينيها) ياكماااا شافك المسخوووطة
شوفت رحيل ليها أو حالتها كانت كافية تكون جواب لأسماء لي طلقاتها بضحكة ديال الشيخاااات وهي تتخيل لمنظر ورحيل تاتشوف فيها بسخط ومكرهاتش تنوووض تنتفهاا وتهجر ليها ديك الضحكة..
رحيل:(تادوي وهي عاضة على سنيها) مالي كانعااااود ليك نووووكتة
أسماء:(تاتنهج وتنش على راسها) حگلى السيد داااخل مبسم ههههه قولي شااااف الزين وخضر لعويناااات هههههه
رحيل:أسمااااء لقريييينة
أسماء:(ربعات يديها) كولو من بنتك هي السباب وزعمة سيفطتها باش مايوقعش هادشي ههه ساعة لبرهوشة موصلاتش ليك لمساج ههه احم عاودي ليا اش وقع
رحيل:(قلبات عينيها) انا براسي ماعرفتش كيف طرا هادشي كلشي داز بالزربة (بدات تعاود ليها تاسالات وشافت فأسماء لي كانت شادة الضحكة تاولات حمرااا كي مطيشة ونطقات بغيض) غير طلقيهاا
رجعات أسماء تاضحك كثر من لول ونطقات بين ضحكاتها:هاااويلي على مامشى معاااااااك باااااس هههههههه ناااااري هربتيه ليااا ههههه
ضحكات تارحيل فاش تفكرات شنو قالت ليه ونطقات: هادشي لي خرج ليااا فمي اش ندير هو دعقني
أسماء:(حركات حجبانها بندالة) وبسيف شاااف المستوور والمخبي وغايكون ضرب على الطرررف تاااهو وزيد الشعورااات راه من حقوو يتمنظر ويشد ليدين
رحيل:أسمااااء
أسماء:مهم جيت نعلمك بلي حنا معروووضين عند ولد لحاج لغدااا هههه وجدي راسك
رحيل:(مخرجة عينيها) ماتقوليهااش
أسماء:والله تامعاااك بصح جاا يبارك لينا لعيد وعرض علينا فلول قال ليه بابا بلاش مرة خرا ولكن السيد أنسيستا ونتي عارفة بابا مايقدرش يرجعها فوجهوو
رحيل:سيرو نتوما أنا مغاداااش
أسماء:واتايخليك بابا تبقاي وحدك وديك الساعة دوي نمشي نوجد راااسي ونتأنتك يقدر نجيبو شي عريس من تريكتوو
رحيل:ياك درنا لغدااا؟؟
أسماء: ساهلة يولي عشااا والامكليناهش لعشاا نتغداو بيه غدااا
رحيل:(حكات راسها ونطقات)قولي ليهوم رحيل مغاداش حاسة بليسيني دلغيگل قربات تجيني
أسماء:(بسخرية) ياسلااااام عاد مشات هادي سيمانة نسيتي
رحيل:(هزات كتافها بلامبالاة) عادي مخربقة ليااا معمرها طرات ليك؟؟
أسماء:(ردات شعرها مور ودنيها وقالت بهدوء) لهرووب ماشي حل ارحيل (بغات تدوي رحيل وهي تقاطعها) لموقف لي طرا ليك شي عادي وممكن يطرا مع أي واحد صافي بلاماتبقاااي تخممي بزاااف وتهزيها ملين تقااالت
رحيل:(زيرات على سنيها ونطقات بإصرار) قلت ليك اأسماء مغانمشيش هي مغااااانمشيش ساليناااا
مركزة عينيها فالطريق والشارع لي كان خاوي وقليل فين تيبان شي حد خارج.. قبل ساعة كانت رافضة كلياً أنها تمشي وفاش أسماء قالتها ليهوم جاا إدريس عندها بنفسو وهضر معاها وكيف لعادة قدر يقنعهاا بلاتاشي مجهوود وزيد مكانش باغي يخليها وحدها حيت مكيتيقش تبقا بوحدهاا وبدر الدين يقدر يدير شي حاجة بالأخص سكاتو لي خلعوو وباين وراه شي مصيبة جايا فالطريق.. تنهدات رحيل وضارت شافت فأسماء لي كانت جنبها وهي لي كانت هازة سيدرا فوق ركابيها ونطقات بخفوت تتقلدها:مغانمشيش هي مغانمشيش سالينا نينيني هانتي دابا جيتي
رحيل:(بنفس لهمس) بزز
أسماء:طلقي البشااارة الزمر ونتي لي شافك يقول خاطفينك
تبسمات ليها رحيل وحركات راسها ورجعات تاتفرج فالشارع.. مسافة وكانو واصلين لحومة فين ساكن نوح وبان ليهوم لمحجوب لي ناض كيوريه فين يبلاصي مع هو لي مكلف بداك لكاختي ومقاد ليهوم نضام طوموبيلات.. بلاصا إدريس ونزل شاف فريان لي تاهو حط لموطور ونزل مع محمد طه بنفس لباس لي كانو لابسين.. حلات رحيل لباب ونزلات وهي تتقاد جلابتها لمخزانية لبلوغواا ولي جاها لون خطييير مع لون بشرتها الشهبة.. دارت معاها فولار فالرمادي حيت الجلابة مخيطة بالرمادي.. وصويك فالرمادي مع صندالة نيت لي خدات ليها سيدرا أو وجهها معاوداتش قاصتو خلات نفس لمك اب.. أما أسماء فلبسات لبيسة تتجي بحال جابادور طويلة فالغوز بب مع سروال دجين وصباط طالون وصويك ديالو ورنيم لبسات غير دجين مع شوميز نواغ ستان وصباط بلا وغزلان جلابتها القهوية لمخزانية..قربات رحيل جهة سيدرا بدات تتقاد ليها شعرها وتحنات عندها همسات ليها بجدية:ماديريش بسالات لداخل واخاا
سيدرا:(حركات راسها) صافي مامي مانديرش بيتيز بحال لي قال ليا بّا ديدي
رحيل:براافو امامي يالاه شدي فجدك
مشات سيدرا عند إدريس لي كانت تانيرت شادة فيه ولابسة جلابة فلكحل مع فولار حاطاه على عنقها وشعرها طالقاه شدات فيه وسبقو جهة الرياض والدراري موراهوم.. كانت رحيل تاضور عينيها تاقشعات نوح لي خرج من واحد لباب دلعوود لي كان محلول تبسم ليهوم وسلم مع إدريس وضور عينيها لعند رحيل.. ومرة خرا نزلها بشوفاتو من صبيعات رجليهاا واخد لخااطر تاااوصل لوجه وغير تلاقاو لعيووون وهو يغمزها بلخف وقلب عينو لعند إدريس تايدوي معاه.. لغمزة خلات قلب رحيل يضرب والصهدة طلع معاهاا.. قلبات عينيها وشافت فأسماء لي كانت متبعة ديكوور وشافت فيها بندالة وتاهي غمزاتها تاضحك.. رحب بيهووم ومع الدخلة دلباب لقاو زوج رجال واحد هاز طبق فيه كيسان لحليب والتاني طبق دالتمر بريستيج معمر بعمارت لگرگاع ولوز ومزوق بشكلاط بيض ومرشوش عليه لورد.. هز كل واحد كاس دلحيب وتمرة..
ريان:(تحنى جهة لبنات ونطق بهمس) شكون بحالنا مستقبلنا بالحليب والتمر
أسماء:(كاتلوح لمعاني لرحيل)بالسيف مايستقبلنا وحنا غالييين على قلبو
دخلو لداخل وعينين رحيل كايضورو فالريااض لي كان شكلو يبهر العين.. كبيرر ومتيسمع ووفيه الخصة لوسط تاتكب لماا وصوتها يريح لعقول ومزوقة بالورد وفالحنب جليسة دلقصب يتشهى لواحد يجلس فيهاا.. كان رياض عريييق بلمسة عصررية.. شافت رحيل فدوك زوج عيالات لي كانو واقفين وحدة عرفاتها هي ماين نوح كانت بگندوورة فالخضر وشعرها لكحل مطلوق ولايحة عليه شال حيت هي أصلا مامحجبااش مكحلة عسل عينيها والتانية مرا كبيرة فلعمر وبشوشة وباقي حروف الزين على وجهها لي فيه تكامش لي كيبينو تقدمها فلعمر.. وجنبهوم راجل كبير فلعمر واقف تيسلم مع باها ويهضر معاه.. قربات جهة لعيالات وتبسمات ليها رحمة وونطقات وهي تتسلم عليها بلوجه:مرحبا بيكوووم عندناا وعيد مبارك سعيد
رحيل:(تبسمات ليها بخجل) ترحب بيك الجنة ونعيمها احم علينا وعليك الالة
شافت جهة لمرا الثانية لي تبسمات ليها وتحنات عندها مع قصيورة وزاينة هزات يديها وعنقاتها بحال الاتتعرفها من زماان ورحيل استغربات ولكن بدلاتها لعنااق لي كان طالع من لقلب عاد بعدات ونطقات زاينة بالسوسية كيف عادتها: أكميحجب ربي أيلي ياجكم أيلواليداين نم "الله يحجبك ابنتي ويخليك لواليديك "
رحيل:(فهمات اش قالت ونطقات بهدوء)تانميرت نم "شكرا ليك"
زاينة:ايستسنت تاشلحيت "واش تتعرفي الشلحة"
رحيل:(بشلحتها القليلة)إيميك إيميك هه "شوية"
زاينة:برك دارناااغ أيلي "مرحبا بيك عندنا ابنتي"
تبسمات ليها رحيل وبعدااات مخلية لخرين يسلمو وفنفس لوقت تتشوف فزاينة عن قرب ودابا عاد عرفات نوح ملين ورث لون لعينين.. رجعات شافت فالراجل لي حدا باها ولي كان تيشبه ليه فلون لبشرة لي مايلة لسمورية وملامحوو لي مكتبانش فلول تاكدقق فيه.. رحبو بيهوم ترحيب من لقلب بحال إلا راهوم من العائلة ماشي غير معرفة نووح...ضار نوح شاف فزاينة وقرب جهتها درعها وباس ليها راسها ونطق بهمس:تاسانو تفجيجيت "كبيدة فرحانة"
زاينة:(حشمات وحنيكاتها حمارو ونطقات) يااه اق سمانغد كولو تاروانو تغاما غار عمتيك "معلوم وأنا جامعة ولادي لعندي وبقا غير عمتك"
نوح:اركودنا تساولتن سرس لكاميرة واخا "تالمن بعد وعيطي ليها أبيل فيديو واخا"
كانت رحيل غادة تابعاهوم وعينيها على نوح وجداها ولي باين من الشوفة بلي كيموت عليها..
تفرقو الرجال مع لعيالات فزوج صالات باش النسا ياخدو راحتهوم كثر وزيد عندهوم بعض الرجال فالعائلة شوية متدينين ومكيبغيوش التخلااط.. كانت رحيل تتشوف فلعيون لي كايشوفو فيهوم باستغراب وهوما داخلين وصوت لبراهش كيتسمع من بعيد..
رحمة:(تبسمات) هادو معارف ولدي نووح لالة تانيرت وبناتها
بدا كيتسمع غير "مرحبا" "متشرفين" زارتنا البراكة" "أهلا" وتانيرت تتسلم على المجمع وموراها لبنات.. جرات أسماء رحيل ونطقات بهمس:حناكي غايتسوطاو بقوة لبوسان
رحيل:تمررري الخراا
سلمو عليهوم وجلسو لبنات جنب بعض وتانيرت جنب زاينة لي نطقات بالسوسية: أفلام إيسرخو ربي "الله يفك وحايلك على خير"
تانيرت:آمين اخالتي ياجام الصاحة نم "الله يخلي ليك صحيحتك"
زاينة:ماني يگان دارون "فين بلادكوم؟"
تانيرت:تارودانت يات لبلاصة إيسماس أمسوزارت "واحد لبلاصة سميتها أمسوزارت"
زاينة:(شافت فيها ونطقات بتساؤل) دارناغ نيت أيااان إيليس ميت أتگيت "راه عندنا نيت بنت من"
تانيرت:(حسات براسها تزيرات فاش تفكرات باها) إيليس نلباشير (بدات تنعت ليها وتوريها دارهوم)
زاينة:(جراتها عندها وعنقاتها ونطقات بفرحة) ايييه سنغ إيناااام تعزااا داااري مانيك اتعدل استيرحم ربي "اييه كانعرف مك عزيزة عليا وضريفة الله يرحمها"
تانيرت:آمين ياربي
زاينة:ليغ تاهلاغ أشكيغد سفيييد كااغ گيس مانشك أيليغ صلحن تاروا عاد أدادووغ ستمازيرت "فاش تزوجت جيت لهنا وبقيت فيه شحال تاكبرو ولادي عاد رجعت لبلاد"
فالجانب الأخر كانت رحيل مجمعة هي ولبنات ومعاهوم خولة لي دغيا كادخل مع لواحد فلهضرة وتادير بلاصتهاا وباينة فيها إنسانة ضريفة ولي فقلبها فطرف لسانهاا..
خولة:(تبسمات) اوا بسلامتك راني والدة زوووج ولدي صفوان وبنتي رويدة والتالت جاي فالطريق هههه
رحيل:الله يتبت حملك ويخلي ليك وليداتك
خولة:آمين الزين واش نتوما خوتات بربعة؟ حيت مكتشابهووش لياا نتي ارحيل تتشبهي لماماك بزاااف لبنات لخرين لا
أسماء:(تتشرح ليها) خالتي تانيرت مرات بابا يعني رحيل ختي غير من بابا ورنيم وغزلان ماشي خوتاتناا ولكن راه نيت فمقام لخوتات
خولة:اااه عليها اوا اوا الله يخليكوم لبعضياتكوم
دخلات سيدرا تتجري لصالة وعينيها كيضورو على النسا تاقشعات مها ومشات عندها ونطقات بصوت هامس:مامي بغيت نمشي لطواليط؟؟
خولة:(شافت فرحيل بدهول) واش بنتك؟
رحيل:(تبسمات ليها) اه بنتي سيدرا (شافت فيها) سلمي على خالتو
سيدرا:(باست خولة ونطقات) شكون نتيا؟
خولة: أنا طاتي خولة ممات رويدة وصفوان
سيدرا:واش نتي ماميت داك لباسل لي تايبقا يعوت على لبنات
رحيل:(بجدية)سيدرا حشووومة هاد لهضرة
خولة:(ضحكات من لقلب )ايييه أنا مت داك لباسل هههه
سيدرا:مامي فيا پيپي يالاه سربي
جراتها ورحيل ناضت خارجة من الصالة تاضور راسها ومعرفاش لحمام فين ومكاين حد.. ضورات عينيها وقشعات البراهش تيلعبو حدا لخصة ومشات جهة لولد لكبير فيهوم ولي كان سميتو "عابد" ونطقات:عفاك اولدي فين لحمام
عابد:(شير ليها جهة لكولوار) لهيه
مشات رحيل متبعة النعت داخلة مع لكولوار وعينيها على الزليج لي فالحيوط والنقش لي فالگبص..مدات يديها حلات لولاني ولقاتو طواليط مزلجة تاهي زليح بلدي وفيها طواليط رومية دخلات وعاونات سيدرا باش تقضي حاجتها وغير سالات قادات ليها حوايجها وغسلات ليها يديها وخرجاتها تمشي ترجع تلعب وبيما أنها تاهي ناضت قضات حاجتها مع كانت مزيرة وغير سالات غسالات يديها وقادات فولارها فلمرايا عاد حلات لباب ومن زهرها لمكفس مايبان ليها غير نوح خارج من واحد لباب وطرقو عاد ضار جهتها.. رحيل ماعرفاتش دخل ولاتخرج بقات تادعي فسرها وتسب زهرها تاحساتو وقف جنبها ونطق بهدوء:واش محتاجة شي حاجة؟
رحيل:(حاولات تبع هضرة أسماء وماتبينش) احم لا شكرا
نوح:(خشى يديه فجياب الجلابة ونطق بصوت مبسم) عواشرك مبروكة
رحيل:(شافت فيه وفهمات هضرتو) علينا وعليك
نوح:(قرب بخطوة جهتها ونطق بصوت أجش) مبقاتش مامشى معاك باس؟
رحيل:(سرطات ريقها) أناا مكنتش
نوح:(زاد قرب خطوة خرا ونطق بنفس نبرة الصوت)نتي اش؟
رحيل:(رجعات ديك لخطوة لور وقالت بتلبك) مقصدتش
نوح:(قرب خطوة خرا ونطق بهمس) راني مكنعضش
رحيل:(حسات بضهرها تقاس مع لباب ديال لحمام وضورات وجهها فلكولوار لي مافيه حد من غيرهوم وقالت) خصني نمشي
بغات دوز من الجنب وهو يحط يديه حابس ليها الطريق ومع رجعات لجهة لخرا دار نفس الشي تاولات محاصرة بين يديه بلامايقيسها أو وجهو مبعد عليها ولكن أنفاسو الساخنة حاسة بيهوم كيضربو فوجهها.. هزات فيه عينيها وهو نطق بهمس خشن: رخي النفس الفثنة
بعد عليها مور مقال هضرتو وهي غير تحررات من بين يديه مشات تتجري وصوت صندالتها كيتسمع على الأرضية دالرخام.. تبسم نوح وبقا متبع ليها لعين تاغبرات عاد تمشى تاهو راجع لعند الرجال تاسمع صوت شيماء لي نطقات بنرة حاقدة وغيرانة: شفت دغيا جات لي تنسيك فيا..
وقفات رحيل حدا باب الصالة وحاسة بحناكها سخانين وقلبها تيضرب كلما تفكرات شنو طرا ليها قبل شوية وتصرف نوح الجريء معاهاا.. ولى كيدير شي تصرفات تيخليوها تلف وتحس بشي حاجة غريبة.. زفرات النفس وحاولات تكالمي راسها باش ماتبينش شي حاجة ودخلات لصالة مبسمة بزز ورجعات لبلاصتها وأسماء كانت تتشوف فيها بنظرات شك من حالتها لي جاتها فشكل على كيف مشات.. قربات جهتها ونطقات بصوت هامس: مالكي وليتي حمرا كيف شي مطيشة؟؟
رحيل:(تتهضر تاهي بشوية) من بعد اأسمااء
أسماء:(بندالة) همم شفتي ولد لحاج عوتاني اش قال ليك هاد لمرة؟
رحيل:عييقتي لا ماتندمينيش حيت قلت ليك اش طراا
أسماء:(ضحكات بشوية)ههه نتي قلتي وأنا شفتو غمزك قبيلة
رحيل:(ربعات يديها وتكات على لوسادة)تلاقيتو وأنا خارجة من لحمام (سرسبات ليها كلشي) تلفني مبقيتش عرفت اش نقول من غير نخليه
أسماء:(جاتها الضحكة ولكن جمعاتها باش ماتعصبهاش) هالي قلنا السيد عيى مايصبرر ونتي متتفهميش قااال اجي ندير خدمتي هه الله يجيب لي يقنتنا تاحنا ويغمزنا ههه
رحيل:(شافت فيها) سيري اختي شكون حبسك زعمة عمرك تقنتي الله يعطينا وجهك
أسماء:(قلبات عينيها) تقنات ولد لحاج اختي فشكل مهيييب هههه
رحيل:(قرصاتها ففخدها ونطقات بصوت ضاحك) الله يسمخك هه
----
ضار جهتها ولقاها واقفة جنب الكولوار ومربعة يديها كتشوف فيه بشوفات معصبة وحاقدة.. قربات جهتو تاوقفات قدامو ورجعات قالت بغيييرة: شكون هادي؟ وفين تتعرفهاا انوح؟
نوح:(هز فيهاا حاجبو وبصوت بارد قال) ماشي شغلك..
تخطاها باش يمشي وهي تشد يديه جراتو ونطقات بعصبية: شغلللي شغلللي نعرف شكووون هاااديك وعلاااش نتاا وياهاا كنتو واقفين هاكاك فين عمرررك كنتي قررريب لشي وحدة هاكاا أنااا لي كنت خطيبتك عمرك قربتي لياا بهاااد الشكل
نوح:(نثر يديه وخرج فيها عينيه ونطق مخيخ) ماشغلكش سمعتي وديك لخطبة لي فارعة بيها مخنا تفسخاااااات هادي كثر من عمااااين
شيماء:(حابسة لبكية بزز ولكن من صوتها كان باين فيها مقصحة) عماين وأنا كل نهار كانسول راسي نتا علاش فسختي لخطبة كنت غانحماااق ونتتسطى باااش نعرف ونتا مكمل حيااااتك عااادي (شافت فيه ودموعها نزلوو) قولي غير علااااش
نوح:(لعب بلسانو ففمو وقلب وجهو عليها مدة عاد رجع شاف فيها ودار يديه فجياب الجابادور ونطق بصوت بارد وهو هاز فيها حاجبو) ماتخمميش أنا غير غانتزوج بيه غانخليه خاتم فصباعي غانسيه فكلشي وغانخليه يدير لي بغيت تاخوتو غانلقى ليهوم شي تسربيكة وأصلا ختو حلها ساهل غانلقى ليها شي واحد يتزوج بيها ويطيرها أما داك المستهتر درؤوف أصلا علاقتو بخووه ماشي تال لهيه والافكرت فشي حل غانطيرو تاهووو بزربة وغايبقاا ليا هادشي كولو وقريب غانولي مرات ولد لحاج..
كاتسمع ليه وهي مصدومة وعينيها محلولين على الجهد وجهها صفااار والهضرة تلفات ليهاا.. لهضرة لي قال كانت نفس هضرتها لصاحبتها فالتلفون فاش كانو مخطوبين.. أما نوح رسم تبسيمة باردة على شفتو وهو كيشوف فوجهها ونطق بجدية واضحة فوجهوو: الابقيت ساكت غير حيت مباغيش نوض الفيتنة بين لخوووت ونوليو برااهش
شيماء:(بصوت مرتاجف) نوح أنااا مكنتش قاااصدة تيقني أناااا
نوح:(حبسها بيديه ونطق وهو باقي مكالمي راسو) غانقول ليك زوج كلمات طريقي بعدي منهااا ودوك لفعايل ديالك ماديريهومش معايا حيت بالرب لا عقلت عليك
خنزر فيها وخلاهاا واقفة تتغلي والصدمة فشلاتها.. مكانتش متوقعة يكون سمعها ويكون هادا هو سبب فسخ الخطوبة.. رجعات شعرها بيديها وهي غادة جايا وهضرتوو ومنظرو مع رحيل لي شافت خلاهاا تحس بدمها كيفوور.. بقات تما تاحسات براسها بردات عاد رجعات لعند لعيالات ومع دخلات عينيها مشات ديريكت لرحيل تاطلعها وتنزلها بشوفات حااااقدة.. جلسات فالسداري لي أونفاص معاهاا وعينيها منزلاتهومش عليها تاتشوف فشكلهاا وتتقول مع راسها أنا زوينة عليهاا أنا حسن منهاا أناا بنت الشرفة.. شنو لي عجبو فيها هي تاتصرف معاها بديك الطريقة وشنو بناتهوم تازعم عليها لديك الدرجة.. أما عند رحيل فهضرة خولة ولبنات نساتها لجيست لي وقع وخلاتها تندامج معاهوم بلهضرة خصوصا خولة لجلسة معاهاا مريحة بزاف ونشوطية.. هزات أسماء عينيها لي جات فشيماء لي كانت تتخنزر فرحيل وتشوف فيها بواحد الشوفاات يالطيف تقولي قاتلللة ليها شي حد.. هزات أسماء حاجبهاا ورجعات شعرها لور وكحازت جهة رحيل وعينيها باقي على شيماء لي شافت فيها تاهي وعطاتها أسماء شوفة قاصحة تاقلبات لخرى عينيها فاش حسات براسها عيقااات..
قربات سيدرا جهة لبنات لي كانو تيلعبو حدا لخصة فجيه والجهة لخرا كانو الدراري تاهوما كيلعبو بوحدهوم.. وقفات جنب لبنات ونطقات بحماس:نلعب معاكوم
شافو فيها لبنات ونطقات وحدة منهوم:شكون نتيا؟
سيدرا:(حطات يديها على صدرها) أنا سيدرا التجاني ونتي؟
لبنت:أنا مهى شنو داكشي لي عندك فودنيك هنا (أشارت ليها لپاراي)
سيدرا:(حطات يديها على لپاراي ونطقات) هادي تانسمع بيها
وجدان:(لبنت الثانية) واش نتي صمكة؟
مهى:(جرات لبنات بعيد على سيدرا وقالت وهي تتعوج شفايفها) حنا مكنلعبووش مع الصمكييين
خلاوها واقفة تتشوف فيهوم وهوما كيلعبوو بلمونيكات لي عندهوم وكانو تقريبا شي خمسة دلبنات ومعاهوم نيت رويدة بنت خولة.. دلات شنيفاتها وشافت جهة الدراري لي تيلعبو بلكرة وقربات عندهوم نطقات بخفوت:واخا نلعب معاكوم؟
صفوان:حنا مكنلعبووش مع لبنات
هبطات راسها وعطاتهوم بالضهر غادة بخطوات بطيئة تاحسات براسها دخلات فشي حد وهي تهز راسها لقاتو زين العابدين لي كان واقف بسروال دجين كحل مع تيشورت تاهي كحلة واسعة وشعرو كيف لعادة مبوكليه.. شافت فيه شوفات حزينة ورجعات نزلات راسها وكملات طريقها جهة الصالة دالرجال غادة عند إدريس لي كان فجنبو نوح ولحسن جدو كيهضرو مع بعضياتهوم.. قربات عندهوم وعينيها كيلمعو بالدموع ونطقات بصوت باكي: بّا ديدي
حدرات راسها وحطات يديها على وجهها وبدات تتبكي.. كمش إدريس عينيه وقرب جهتها بالزربة جلس على ركابيه باغي يزول ليها يديها لي على وجهها ونطق بحنية:مال نخشيشتي تتبكي
هزها إدريس ورجع جلس بلاصتو وهي تخشات فصدرو تتبكي.. قرب نوح جهتها محني لعندها ونطق بحنية وهو كيمشط شعرها بيديه: مال تاتبيرتينو شكون بكاها لياا؟
مد يديه وهزها من عند إدريس لي تشطن بالو معاها ومعرف سباب بكاها أما نوح تحنى جهتها تيبعد وجهها على صدرو باش يهضر معاهاا ويعرف مالها..
نوح:(محنية جهتها ونطق بهمس حنين) واش غوت عليك شي حد هممم قلقك شي واحد؟؟
سيدرا:(شافت فيه بعويناتها لمبطنين لي كانو منفوخين بلبكا وقالت بصوت خافت)مبغاوش يلعبو معايا
نوح:شكون؟
سيدرا:(مدلية شنيفاتها وعينيها باقي مغرغرين بالدموع) لبنات گالو ليا ماتانلعبوش مع الصمكييين
تنهد نوح وجرها عندو معنقهاا وهي بدات تبكي تاني.. جبد تلفون وسيفط مساج لشي حد ورجع حطو فجيبو وبقا يطبطب على ضهرها تابانو ليه الرجال لي داخلين جايبين الطبالي والكراسى باش يقادو الطبالي ويحطو لغدا.. ونفس الشي عند مجمع النسا لي دخلو عندهوم زوج عيالات مكلفين بيهوم تيقادو ليهوم لبلايص.. ناضت شيماء جهة الطبلة فين جالسة رحيل وجرات الكرسي جلسات معاهوم وعينيها غير على رحيل..
أسماء:(تحنات جهة رحيل ونطقات بهمس) هاد خيتي لي لابسة الغوز ولي جالسة قدامناا من الصباح وهي تشوف فيك شوفات ناقصة وتخنزر فيك واش تتعرفيها؟
قلبات رحيل عينيها بلافرطة جهة هاديك لي نعتات ليها أسماء ولي كانت شيماء ولقاتها بلفعل تتخنزر فيها وطلعها وتنزلها بشوفات غيرانة ورحيل جاتها عجب حيت عمرها شافتها وهادي أول مرة.. رجعات ضارت عند أسماء ونطقات بشوية:لا مكنعرفهاش يالاه دابا شتها
أسماء:ولعجب أنا قلت تتعرفيها داكشي علاش
رحيل:(حركات كتافها ونطقات ببرود) خليها تخنزر ماسوقيش فيهاا نشوف سيدرا واش عند بابا باش الامكانتش نجيبها تغدا معايا
جبدات تلفونها وسيفطات مساج لريان تتسول على سيدرا وقال ليها راه هي هنا ومعلمهاش بشنو طرا معاها باش مايخلعهاااش... رجعات رحيل تلفونها لصاكها وتقادات فالجلسة تتهضر مع لبنات تاجابو الپلا لول لي كانت صلاد رويال دايرينها فطباسل طوال ومزوقة بالكروڤيت ولفرماج حمر وطوماط سوغيز ومن شكلها بانت تتشهي..
خولة:(شافت فرحيل) بنتك فين هي جيبها تغدا
رحيل:(تتغرف راسها فطبسيل) مع جدها ههه فاش تيكون حاضر تتنساني أنا
خولة:ههه نيت تهناااي (خنزرات فرويدة لي تتجبد باغا تنزل) جلسي ارويدة تت راه غانضربك
رويدة:مابيتس ماما
خولة:(طلقاتها ونطقات) سيري عند باك يوكلك ممساليااش ليك (شافت فيهوم وضحكات) خليه تاااهو يجرب شوية ويعرف لمعاناة لي تاندوزو هههه
فخيتة:(مرات عم نوح) هههه واحنّا راه لولاد هاكا دايرين ضروري تعطيهوم لخاطر خصوصا فالماكلة
أسماء:(تتبنن ونطقات مشاركة معاهوم لموضوع واخا ماعندها علاقة بيهوم) ماشي كلشي اخالتي عندنا واحد لبزقولة فوقيتة دلماكلة تتكوًن بلاصتها
فخيتة:واش بنتك ابنتي؟
أسماء:ههه لا بنت ختي رحيل
فخيتة:(شافت فرحيل وقالت بتبسيمة) صلى عنبي مكيبانش فيك راك والدة ابنتي
رحيل:(تبسمات ليها بحرج)ههه ربي يخليك اخالتي
شيماء:(نزلاتها وهبطاتها وقالت بصوت حاقد)نتي مزووجة ؟
رحيل:(حسات براسها تزيرات من لموضوع ومع دلك تبسمات ونطقات بهدوء) مطلقة
شيماء:(هزات حاجبها ورجعات شعرها لور تتعوج) وعلاش طلقتي ونتي عندك بنت؟
رحيل:(شربات من كاس دلما ونطقات ببرود)كنظن هادو حوايج شخصية متعلقين بيا
خولة:(حسات بلجو ماشي تال لهيه خصوصا شيماء عارفة معدنها داكشي لاش ضحكات باش تزول داك توثر) هههه غايكون عبد الرحمان طلع ليه لخز مع رويدة حيت مفششة فماكلتهاا
رنيم:هههه خليه يجرب شوية ههه
كملو هضرتهوم ناسين كلام شيماء لي متسرطاتش ليها كيفاش نوح حاط عينو على وحدة مطلقة وعندها بنت من لفوق..
أما عند الرجال فكان جو آخر ولهضرة عندهوم غير على التجارة حيت أغلبية ديال عائلة نوح عمامو تجااار.. كانت سيدرا جالسة فوق ركاب نوح لي حاط ليها فطبسيلو الشلاظة باش تاكل على خاطرها وكل مرة يحط ليها ياهو ياإدريس ويسولوها اشنو باغاا تاكل وهي تادلع عليهوم.. وفنفس الطبلة كانو جالسين تامحمد طه وريان جنب بعض وحداهوم زين العابدين لي عينو على سيدرا لي جالسة عند باه لي كيبان مهمتم بيها وهي عاجبها لحال.. خنزر فسيدرا واحد تخنزيرة قاصحة وزير على يديه لي شاد بيها لفورشيط وهبط راسو مكالمي روحو بزز..
تهز لپلا لول وتحط الثاني لي كان لحم بالبرقوق ولمشماش ولوز..
نوح:(رجع تحنى عند سيدرا ونطق بهمس) بغيتي لحم؟
سيدرا:(شيرات ليه لواحد لمورسو ونطقات بصوت خافت) بعيت هاديك لي لطبة
إدريس:(تبسم وحطاها طرف من لحم لي تيكون فيها داك لجيلاتين لي تتكون رطبة) هههه اسيدي الامكانش لحم رطب متاكلوش ليك هههه
نوح:(ضحك بالتقالة) ههه بصحتهاا (هز عينو فولدو ولقاه جامع يديه مكياكلش ونطق بالإنجليزية موجه ليه هضرتو) علاش مكتاكلش؟
زين العابدين:(بهدوء) شبعت
نوح:(كمش فيه حجبانو ونطق بحنية) واش باغي تاكل شي حاجة خرا؟؟
زين العابدين:(حرك راسو بلا ورجع تكى على لكرسي مربع يدو) نو
سكت نوح وهو مكمش حجبانو وحاس بلي ولدو بيه شي حاجة.. وهاكا داز لغداا لي كان على حقو وطريقو ولخير شايط.. تهزو طبالي ولكراسى ورجعو رجال جالسين فوق السدادر تاجابو الرجال لي تيسربيو صينية كبيرة بالرجلين فيها لكيسان دأتاي حطوها حدا واحد لجليسة وجابو بوطة صغيرة وقوام أتااي..
سليمان:(عم نوح) يالاه ايبّا نوض عمر لينا أتاي
لحسن:(تايضحك) ههه أوهوووي هااا سي إدريس يعمروو ههه
إدريس:غير عفيني اسي لحسن
لحسن:(شاف فنوح) هانوح يعمر أتااي نيت شحال هادي ماشربناه من يديه نوووض أيوي "اولدي"
نوح:(تبسم وناض حاط سيدرا بلاصتو ونطق) هي لولة اتِيمَا "اجدي"
جلس فداك الجليسة وشعل لبوطة وحط عليها مقراج دلما وجابو ليه لبرارد لي غايعمر وريان كان أول مرة يحضر لشي عراضة فيها بحال هاكا يعمرو أتااي فلمجمع.. ناض جهة نوح تاوقف قدامو وهز فيه راسو وهو ينطق ريان:واخا ندير ليك شي فيديو ونتا تتعمر أتاي والامابغيتيش مانبينش ليك وجهك؟؟
نوح:(حرك راسو ونطق بهداوة) واخا
هز تلفونو وبدا كيفيلمي فيه ونوح تيعمر أتاي وتيخلفو فلكاس تاسالا وبدا كيكبو فلكيسان والسربايا تيفرقو على الرجال لي فلمجمع ويدوزو لحلوى لبلدية.. رجع تاني نوح عمر أتاي على قبل لعيالات وغير سالا هزو الصينية حاطين فيها لبرارد لحلو ولمسوس وداوهوم لعند النسا لي فرقو عليهوم لحلوى وهزو أتاي تيشربو فيه تاسمعات تانيرت تلغونها كان إدريس عالمها بلي قريب يتحركوو يمشيو.. أما ريان سيفط لرحيل مساج فيه "كيجاك أتاي أنا لي عمرتو"
رحيل "هههه ماشي نتاا أتاي ديالك تيكون خفيف وتتكتر ليه السكار"
ريان "زعمة هاد أتاي مكتيرش ليه السكار"
رحيل "لابلعكس هو هاداك عجبني"
تبسم ريان بندالة وسيفط ليها لفيديو مور ماوصل لشنو بغا وهي بدات تلشارجي فيه تبان ليها نوح وحبسات ليه الصوت عاد خدماتو وبدات تتشوف فيه وهو كيعمر فأتااي ومركز مع شنو كايدير.. كملات رحيل لفيديو وسيفطات ليه مساج "اجي البرهوش علاش مسيفط ليا لفيديو"
ريان "ههه نوريك لي معمرو"
رحيل "مصور السيد بلاخبارو؟ حشومة"
ريان "نو خديت منو الأوكي وراه سيفطتو ليه تاهو عجبوو"
رحيل(مغيرة سياق لموضوع) "سيدرا كلات مزيان"
ريان(ضحك وفهمها طايرة) " اه وكلها ولد لحاج "
رحيل "يالاه نخليك تال من بعد"
طفات لكونكسيون ورجعات تتفرج فداك لفيديو وهي ساهية تاسمعات صوت أسماء لي نطقات:رحيل يالاه غانمشيو
جمعات تلفونها وناضت هازة صاكها وبداو يسلمو تاني على لعيالات عاد خرجو ومعاهوم رحمة وزاينة ولقاو تانوح وجدو معاهوم توداعو مع بعض ورحيل حاولات تفادى نوح لي تاهو خلاهاا حيت فاهم علاش.. شدات رحيل فيد سيدرا ونوح طلع لفوق واحد الشوية عاد تم نازل لتحت وهو هاز كرطونة كبيرة وقرب جهة سيدرا وجلس على قفازي ونطق بحنية: تاتبيرتينو هاكاظو ديالك
سيدرا:(تبسمات بفرحة)شنو فيها
قالتها وهي تتحل فلكاضو وكلشي تيشوف فيها تامن دوك لبراهش لي مكانوش باغين يلعبو معاها.. كانت فيها نونوس كبير فالبيض حمق سيدرا وعنقات نوح ونطقات بفرحة:زوين بزاف ماي بلو آيز
رحيل:(نطقات بهدوء)شكانقولو اسيدرا؟
سيدرا:شكرا
نوح:بصحة (قرصها فنيفها)
وقف جنب رحيل لي عجبها لجيست لي دار ولكادو لي عطا لسيدرا لي هازاه وهي فرحانة وكبير عليها.. هزو عليها ريان باش مايتوسخش ليها وشد فيديها.. وتمشاو جهة لباب وقبل ماتخرج رحيل حسات بأنفاس ساخنة كيضربو فجهة حنكها وصوت نوح لي همس ليها بحنية:تهلاي ليا فراسك الفثنة..
ملي رجعو لرياض وكل واحد مشى لبيتو ينعس حيت فاقو بكري وعياااو وزيد لعشية دلعيد تاتكون مملة ومافيها مايدار.. كانت هي لوحيدة لي مناعساش وغير جالسة فنموسيتها وجنبها سيدرا لي كانت معنقة دبدوبها وناعسة عليه.. مدات يديها تتمشط ليها شعرها بحنية..وتنهدات وهي تتغكر تصرف نوح مع سيدرا ليوم كيفاش فرحها بداك نونوس لي الطريق كولو وهي فرحانة بيه.. سيدرا ماشي بالسهولة تتعلق بأي واحد هي طبعها هاكاك داير من الصغر.. والناس لعزازين عليها معدودين على رؤوس الأصابع ونوح واحد منهوم.. داك لخاطر لي كيعيطيها وداك لحنان تيخليوها نهار على نهار تعلق بيها وهاد التعلق كيخلي رحيل تخاااف حيت هي عارفة بلي تاحاجة مغاتربطهوم بيه.. داكشي علاش مبغاتش بنتها تزيد تعلق بيه كثر من هاكاا حيت أكيد هو غايكمل حياتو ويتزوج مغايبقاش بلازواج حياتو كلها.. عند هاد النقطة حسات رحيل بلمرار فحلقها وقلبها تزير عليها.. الاكانت هي رفضاتو ومبغاتش تزوج بيه فهو مغايبقاش تابعها أكيد غايمل فيوم من الأيام وغاينساحب.. هي فدواخلها بغاتو يبقا متشبت بيها بغاتو حيت حسات معاه بحوايج لي عمرها حساتهوم فحياتها.. ولكن متخوفة أنهاا تعطي نيتها ليه وفلخر تعاود نفس التجربة لفاااشلة لي لحد الآن تتعاني منهاا.. هي عارفة الطبيبة عندها الحق وماشي حيت عاشت واحد لحاجة فحياتها فهادشي كيعني أنها غاتعاود تعيشها وماشي حيت عاصم ماصدقش كيف هي بغاتو وعرفاتو فهادا كيعني تانوح نغس الشي.. ولكن التخوف لي عندها شي طبيعي بعد داكشي لي شافت يمكن عائلتها عارفينها تعدبات وقاسات حيت تاهوما وصلهوم صهد عاصم ولكن تاحد فيهوم معارفش بالتحديد العداب النفسي لي عاشت ولي أثارو باقي لحد الآن.. تاهي مكرهاتش تكمل حياتها عادي وماتبقاش عايشة فخووف ورعب.. ترجع حرة كيف كانت بلاقيووود الماضي لي باقي تتحس بيهوم رابطينهاا..
---
ليوم كانت العودة لعمل مبعد ماجلسو يوماين دلعيد كانت رحيل خدامة غير هي وياسر حيت رجاء خرجات كونجي ونيت تتوجد لعرسها لي غايكون نهار السبت.. مكرهاتش رحيل تاهي تشد شي كونجي ترتاح وتسافر.. كاتسنى غير ترجع رجاء باش دفع لكونجي تاهي شي سيمانة ولاكثر.. كان تيتسمع غير الصوت دلكلاڤي وهي كطابي فيها.. غير سالات ناضت جهة فوطوكوبي لي عندهوم فلبيرو باش دير فوطوكوبي لدوك لوراق وتنزلهوم لمحمد طه باش يعطيهوم لنوح.. سالات وخدات ملف قاداتهوم فيه ونزلات لتحت ديريكت لبيرو محمد طه لقاتو تاهو غارق.. مبقاتش بزاف غير عطاتو الوراق ومشات لماشين دلقهوة تاخد ليها واحد لكويس.. بقات واقفة تاسمعات لحس وهي ضور لقاتو سعيد لي كان جاي تاهو ياخد لقهوة.. مهضراتوش رجعات تاتشوف قدامها تاخدات الطاس تتخلطو وبغات تمشي وهي تسمع صوتو لي نطق بسخرية: تتحسي براسك مرتاحة دابا ياك؟
رحيل:(هزات حاجبها فيه بلاماتهضر)
سعيد:بالسيف ماتكوني مرتاحة ونتي ضايرة على الراس لكبيرة صراحة مكنتش متوقعهاا من وحدة بحالك
رحيل:(خنزرات فيه) نتا لي مريض فدماغك وداك لحفرة لي كنتي حافر لغيرك صدقتي نتا لي طايح فيهاا
سعيد:دخلتيه بدخلة ديال النقاب والاحترام وغير شفتي راسك بديتي دگي لوتاد قلتي اجي نحيد النقاااب باش نزيد نتبتوو
رحيل:(حسات براسها تتغلي من هضرتو ونطقات بصوت عصبي) نتااااا ماعندكش لحق تهضر علياا سمعتي أنا بزااااف عليك المريييض
سعيد:(خنزر فيها وطلعها ونزلها باشمئزاز) نتي أصلا مكتسواااي والو عندي وتيقيني مغانتهنى تانطيرك من هنا نتي وداك خووووك ونرجع لبلاصتي لي أناااا بوحدي لي كنستاهلها
رحيل:(هزات صبعها وأشارت ليه) شتي نتااا غاتبقااا هاكاااا تاتلقى راسك برااا الحسد والغيرة تياكلو فيك ونقص شوية من داك سم دلعيااااالاااات لي فيك وحمد الله حيت باقي فخدمتك واخا درتي لي درتي هو حن فيك ومجرااااش عليك حيت هو عارف لخييير ماشي بحاااالك وجه الجوووووع (خنزرات فيه) صباحتو الله
عطاتو بالضهر ومشات لبيروها وهي حاسة براسها تتغلي من داك بنادم لي معرفاش فين تصنفوو من نهار لول وهو محاملهاش واخا عمرها دارت ليه شي حاجة ودابا مكملها بهضرتو لموووسخة ولمسمومة ولكن هي مغاتسكتش ليه حيت بنادم كلما سكتي كلما كيطلع فضهرك والخدمة ولابد ماتشوف فيها أنواع وأشكال وكل واحد فهاد الدنيا كيضرب غير على راسو وبلاصتو باش ماتزعزعش ونوع سعيد هاكا دااااير.. كانت واقفة فالكولوار وهي تتنهج ومن زهرها نوح ليوم مكاينش فلميزون دوڤواتيغ نيت هي هادشي لي باغاا ضاهريا تبعد عليها ودير واحد الحدود بناتهوم..
كانت واقفة مع شي بنات خدامين معاهاا تيهضرو تاوقف عليها كريم كيف قباض الرواح ونطق:أسماء صافا
شافت فيه أسماء وقلبات عينيها بملل.. من نهار تشاوفو وهي تتفادى تلاقى معاه وتاهضرتها تاتنقطها حيت طلع ليها فالدماااغ وبغات تسوسو ساعة هاد النوع مكيتساش وكيبقا لاصق..
كريم:زيدي نمشيو لشي كافي خصنا ندويو
أسماء:ممسالياش غير سير دابا
كريم:تانعيط ليك وقليل فين تتجاوبي وتامن لواتس تاتهضري مرة مرة اش واقع اأسماء؟؟
أسماء:(شافت فلبنات وتبسمات تبسيمة صفرا) نتشاوفو غدا بسلامة
سبقاتو وهو تابعهااا تاوقفات جنب طوموبيلتو ونطقات ببرود:كانسمعك لي عندك قولو ليا هنا ممسالياش ليك
كريم:(هز حجبانو مستغرب من هضرتها) ممسالياش لياا مالكي تادوي معايا بهاد لافاصون واش درت ليك شي حاجة بلامانعرف؟
أسماء:(فنفسها) ياربي على لصقة (تنهدات ونطقات بهدوء) كريم أنا تخطبت
كريم:(خرج عينيه ونطق بصدمة) كيفاااش وأنا ياك قلت ليك ناوي معاك لمعقول ونتي قلتي نتعارفو
أسماء:(لينات وجهها ونطقات بهدوء) اه مانكرش ولكن كلشي جا بزربة وأنا دابا مغانقدرش نكمل معاك من الأحسن نحبسو هناا
كريم:أسماء واش داوية بصح وشكون هادا؟؟
أسماء:(تاضور عينيها وتاتعطيه فلكدوب) ولد عمي هضر مع بابا وطلب يدي لزواج وبابا وافق حيت ولد خووه وكيعرفو ومغانلقاش ماحسن منو وكيف كيقولو خيرنا مايديه غيرنا وأنا مقدرتش نقول لبابا لا
كريم:(حرك راسو بلا) وهاد ولد عمك فين كان عاد دابا بان
أسماء:(مصبرة راسها بزز) وراه قلت ليك اكريم أنا مقدرتش نقول لا وزايدون حنا كنا يالاه تانتعارفو عتابر بلي متوافقنااش وصاف ونتا الله يسهل ليك بشي بنت الناس
أسماااااء
ضارو بزوج جهة إسلام كان نازل من طوموبيلتو وجاي جهتهوم.. وغير شافتو أسماء وهي تكحل بلعمى.. قرب عندهوم وهو كيشوف فيهوم بزوج وكريم نطق:شكون نتا؟
أسماء:(نطقات بسرعة وهي شادة فيد إسلام)هادا ولد عمي وخطيبي (شافت فإسلام لي هاز حجبانو وهي تبسمات ليه بزز) هادا سي كريم خدام معايا مهم بسلامة عليك اسي كريم وشكرا
جرات إسلام لي مانطقش حدو ساكت ومبسم بسخرية تاوصلو جهة طوموبيلتو ونطق ببرود: دابا صدقت ولد عمك وخطيبك
أسماء:(ضارت تشوف واش مشى كريم وفاش بان ليها مشى ضارت جهة إسلام ونطقات ببرود تاهي) شكون بحالك طلعنا ليك الشان شوية
إسلام:(تحنى جهتها وقال باستفزاز) ماشي هاداك هو صحيبك لي كنتي معاه فلكافي وخلاك بنتي ليا دغيا طلع ليك فالراس وبغيتي تسوسيه
أسماء:(هزات كتافها) تباركالله عليك عقلتي عليه
إسلام:(تبسم ليه) حيت مانسيتش تصرفيقتك وباقي غانردها ليك
أسماء:(قلبات عينيها)واخا إن شاء الله أنا كنتسناك اخطيبي ههههههههه
إسلام:(جرها من كتفها وقال بعصبية)الاشفتيني سكت فهادشي مكيعنيش طغاااي وضسري جمعي كر*ك شووية وماتبقايش دخليني فوسخك..
تخطاها وتمشى جهة لبنكة لي كانت حدا الشركة فين خدامة مخليها تتشوف فيه وهي محسرة سيفتها..
---
وصل نهار السبت وكانو لبنات مجموعين فبيت رحيل لي كانت تتوجد راسها على قبل لعرس درجاء لي غاتمشي ليه هي ومحمد طه..كانت جالسة بالبينوار ومغمضة عينيها مخلية أسماء تفنن ليها بلمكياج لي ختارت ميكونش أوڤر وفنفس لوقت يكون شيك..
رنيم:اينا لون اتصبغي بيه ضفارك ارحيل
رحيل:(تتهضر وهي مغمضة عينيها) شي لون فاتح بحال لبااج ولا لون لحم مهم مايكونش معيق
رنيم:(ختارت لگرونة ونطقات وهي تتغمز أسماء وغزلان) واخاا لي بغيتي
ربعات فالأرض وبدات تصبغ ليها ضفار رجليها وغزلان تاتوجد ليها حوايجها والصاك اش غادير فيه تادخلات عندهوم سيدرا هازة إيڤانا لي تنفخات ودغيا بان فيها لخير ونطقات: ساليتي مامي
رحيل:باقي امامي
جلسات مركنة وإيڤانا مبرعة فوق ركابيها تاتمخشش فيها.. كانت خدمت أسماء نقية وزيد هي تتحماق على هادشي داكشي علاش تتعطي فيه.. رشات لفيكساتور كآخر لمسة ونطقات:ضربي جيبك وأراي واحد لألف درهم ههه
حلات رحيل عينيها وشافت فالمرايا وكانت بالفعل زوينة ومك اب ديالها واعر خلى عينيها يزيد لونهوم يتبرز وداك لفغاپوپيغ لي كيلمع ولعكر لغوز بارد نيود بلارسمة لعين لي بيناتها فشكل اخر..
رحيل:تباركالله عليك عجبني (تحنات جهة رنيم وهي تشهق) هاويلي ياك قلت ليك لون بارد
رنيم:(بلاماتسوق)لگرونة جاااك خطيررر وحسن
أسماء:(شافت فالساعة) زيدي لبسي حوايجك باش تخلي صباغة الضفار ديديك هي اللخرة باش ماتجلخش
ناضت رحيل جهة الحوايج هزاتهوم ومع ديجا كانت لابسة سليب مع سوتيان وضوني حدها لبسات كولون قصير وجابت ليها أسماء التكشيطة لي كانت فلبلوغوا عاوناتها تالبساتها وجاتها زوينة خصوصا لون فخم وزيد الحجار باش منبتة تيبريو.. خدات أسماء لمضمة وحزمات ليها عاد هزات رحيل الأطراف ديال التكشيطة وكفضاتهوم باش تحرك أليز ومشات لبسات فولارها لي كان مناسب لون لحجيرات لي منبتة بيهوم تكشيطة ولبساتو بطريقة جديدة.. عاد رجعات شافت فمضهرها النهائي بابتسامة راضية..
خدات ليبيجو من الصنيديقة تتلبسهوم ونطقات وهي حادرة راسها:مامي سيدرا شوفي محمد واش سالا..
مشات سيدرا تاطير ورحيل جلسات عاطية يديها لرنيم تصبغ ليها.. تارجعات سيدرا ونطقات:سالا مامي
سالات رحيل وبقات تانشفات صباغتها ورشات ريحتها عاد ناضت قادات تكشيطتها ولبسات صندالة عالية وهزات صويك ديال صندالة شيك ونزلات لتحت فين كان ريان ومحمد طه وباها ومها.. تبسمو ليها ورحيل نطقات بضحك:كيف جيت ههه أسماء هي لي قدات ليا كمارتي
تانيرت:صلى عنبي عليك ابنتي الله يحفظك من لعين
رحيل:آمين (شافت فمحمد طه لي كان لابس سروال توب بلوماغين وشوميز بلوسيال مع ڤيست بلوماغين جا أنيق بلكلاس) حبيبي يلاه نمشيوو
محمد طه:(ناض) يالاه احنا مشينا بسلامة
إدريس:ردو لبال لراسكوم
خرجو بزوج ركبو فطوموبيل إدريس وشدو طريق لقاعة فين دايرين لعرس ولي كانت شوية بعيدة.. مسافة الطريق كانو وصلو وبلاصا طوموبيل ونزلات رحيل وهي تتشوف الناس لي على برا وكثرة الطوموبيلات.. شدات فمحمد طه ودخلو لقاعة لي كان ديكورها زوين والشعبي مطلوق ولبنات نايضين يشطحو.. كانت رحيل تاضور عينيه تبانت ليها ممات رجاء لي ديجا شافتها نهار مشات عندها ودات ليها لكادو.. سلمات عليهوم أو وصلاتهوم لطبلة لي مخصصينها لي خدامين مع رجاء وكان ديجا جالس فيها ياسر ومرتو أو ولدو .. جلسو حداهوم ورحيل تعرفات على مرت ياسر جاتها ضريفة.. بدات تتصور وتسيفط لبنات باش تعيشهوم فقلب الحدث ومرة ضور تهضر مع محمد طه.. كانو كل طبلة دايرين فيها لمملاحات ورحيل تتنقب وتفرج فلبنات لي كيشطحو الشعبي.. بقات تتحرك كتافها ومحمد طه مرة يتحنى يوشوش ليها تاهزات عينيها فباب لقاعة وبان ليها نوح داخل ومعاه بيسان شادة فيه تاهي بتكشيطة فلبونكاسي وطالقة شعرها.. ونوح كان لابس طقم أسود كامل تامن لاشوميز..سلمو على واليدين رجاء لي وصلوهوم لجهة الطبلة فين جالسة رحيل لي حاولات تصرف بشكل طبيعي وماتبين تاشي حاجة.. ناض محمد طه سلم عليه ومد يدو سلم على بيسان لي قربات جهة رحيل مسلمة عليها بلوجه وهي مبسمة.. بعدات عليها رحيل ومدات يديها لنوح لي شدهاا وزير عليها تاهزات فيه عينيها وتبسم ليها بهدوء عاد جلس جنب محمد طه وأونفاص رحيل أما بيسان جات تكونات حدا رحيل وبدات تتجمع معاهاا..
بيسان:شحال هادي ماحضرت لشي عراسية مغربية ههه
رحيل:ههه بحالك بيني وبينهوم سنين
بيسان:صدفة زوينة أننا تلاقينا هنا اجي كيبقات ماماك شوية
رحيل:صافا حمدلله هاهي مقاتلة مع لوحم ولحمالة ههه
بيسان:(رجعات شعرها لور وضحكات) ههه شكون بحالكوم غايتزد عندكوم برهيش فالعائلة
رحيل:(شربات من ماس دلما) أصلا عندنا سيدرا فالدار وفيها لكفاية
بيسان:سيدرا بنتك؟؟
رحيل:وي بنتي
بيسان:الله يخليها ليك
رحيل: آمين (ضارت جهة محمد طه لي نغزها ونطق بهمس) أنمشي لحمام
حركات ليه راسها وهو ناض غادي لجهة لحمامات ورحيل رجعات تاتهضر مع بيسان وهي حاسة بعينين نوح عليها.. تاصونى تلفونها وكانت أسماء ومع الصداع مكانتش تتسمع ليها داكشي علاش ناضت من مور مقالتها لبيسان باش الاجا محمد طه ميقلبش عليها وهزات جلايل تكشيطتها غادة لبرا تهضر بخاطرهاا.. كانو عيون حاضينها من الصباح وغير شافوها ناضت تبعوها بلاماتحس.. حدا باب القاعة كانت واقفة رحيل تاتهضر مع سيدرا لي دغيا توحشاتها ورحيل عطياها لخاطر وفنفس الوقت حاضية جنابها لايوقف عليها شي حد وغير سالات ضارت تمشي وهو يبان ليها واحد خونا متتعرفوش نطق وهو كيطلع وينزل فيها:مانتعارفوش الزين؟
رحيل:(خنزرات فيه) هاد التبرهيش ماعنديش معاه
جات تمشي وهو يحبس عليها الطريق تاهزات راسها ونطق تيتزلل عليها:مال الزين معصب وقفي غير ندويو معاااك
رحيل:(غوتات فوجهو) غاتبعد ولاماغايعجبك حاااال
دفعات يديه لي حابس بيها الطريق وجات تمشي وهي تحس بيه جرها بالجهد تاشهقات ولصقها معاه وريحة الحشيش عاطية منو: فين غادة القطيطة..
فلداخل كان كيشوف فساعتو ويهز عينو جهة الباب وفاش شافها تعطلات ناض وضار جهة بيسان:هاني جاااي
كمل طريقو خارج لبرا تيقلب عليها حيت شافها تعطلات تابانت ليه تترطى بين يدين داك خونا لي شادها صحة.. المنظر لي شاف قدامو خلى لعافية تشعل فيه وماحس براسو غير وهو مندافع لجهتهوووم جاار لاخر من شوميز لي لابس ودخل فيه بروسية تادوخو وبلامايعيطه فرصة نزل عليه بلكروشيات مغدد عليه ورحيل تاتغووت فاش شافت داك لمنظر تاجاو شي رجال وبداو يفرقو فيهوم ومبعد عليه تاشافو سخف وغييب أو وجهو كولو دمايات قاد لافيست لي لابس وعاد ضار جهتها وشاف فيها بشوفة مظلمة خلات داتها ترعد عليهاا وقلبها يضرب بلخوف حيت أول مرة تشوفو معصب لهاد الدرجة وكرد فعل تلقائي رجعات بخطوة لور وغير شافتو رمى لخطوة جهتها وهي تغوت وهزات جلايل تكشيطتها وبدات تتجري مخلية لقاعة ومحمد طه وكلشي مفكرات فوالو من غير تهرب من شوفاتو.. أما هو زير على فكوو تاتطراسى وتبعها مخلي دوك الرجال كيفيقو فداك خوناا.. كانت لقاعة فبلاصة خاوية ماحداها حد من غير لغابة.. تاتجري بديك الصندالة تاشوية حسات بخطوات قرابين ليها وقبل ماتكسيري يديه تلوات على نصها وضهرها لصق مع صدرو وهو هازها لفوق تابدات ضرب برجليها فالريح ونطق ليها بصوت خشن قاصح:فين هاربة الفثنة..
صوتو خلى التبوريشة تسرى معاهاا وعينيها خارجين من بلاصتهوم وصوت دقات قلبها كيتسمع فودنيها.. كانت باقي مهزوزة بين يديه وضهرها لاصق مع صدرو.. كمشات حجبانها وبدات تترطى بين يديه ونطقات بتوثر:نزلني
نوح:(مكمش حجبانو ونطق بخشونة) باش تعاودي تهربي الفثنة
قال كلامو وقلب الضورة راجع ولكن ماشي لقاعة إنما جهة الطوموبيلات ليي مبلاصين بعيد شوية على لقاعة.. ومع وصل جهة طوموبيلتو نزلهاا وهي بعدات عليه تتقاد فتكشيطتها وتتمسحها من لتحت.. حسات بلكياس دخل ليها فالصندالة وماعندها كيدير باش تزولهاا وتمسحها.. هزات راسها ولقاتو كيشوف فيها ونطقات وهي مكمشة حجبانها:مالك؟
نوح:(تكى بيديه بزوج على الطوموبيل وهي جات لوسط ونطق مغدد) فين كنتي هاربة همم
رحيل:(أنفاسو تتحس بيهوم كيضربو فوجهها عوجات وجهها جنب) حيت نتا تبعتيني؟
نوح:(عوح راسو جهتها ونطق ببرود) تبعتك باش نحبسك ماعرفتش داك الدماغ عندك اش كان تيقول ليك
رحيل:(مبغاتش تبين ليه أنها غلطات ونطقات ببرود) بيني وبينو ونتا اش مشى ليك
دفعات يديه باش دوز وهو بقاا واقف ماتزعزعش كيشوف فيها وهو عاقد حجبانو وباين فيه كاعي بالمعقول..
رحيل:نحي يديك باغا ندوز
مجاوبهااش هزات عينيها فيه لقاتو كيخنزر فيها.. سرطات ريقها وهو حنى وجهو جهتها وقال بهمس خافت: واش مخفتيش على راسك فاش خرجتي لبرا دلقاعة ونتي عارفاها جات فوسط لخلى
رحيل:(قلبات عينيها ونطقات بهدوء) كنت تانهضر فالتلفون وزايدون مابعدتش وقفت غير لهيه
سكتات وهي مكمشة حجبانها ومعرفات علاش أصلا تتشرح ليه اشنو بينو وبينها باش تبرر ليه اش كاااين.. أما نوح تبسم تبسيمة يادوب بانت على شفتو ومد صبعو دخل ليها شعرها لي كان باين شوية جهة حنكها ورحيل غير حسات بصبعو البارد على حنكها السخون بحال الاضربها الضووو.. أما هو دخل ليها شعرها باش مايبانش ونطق بصوت صارم: داك ال(لعب بلسانو ففمو قبل مايكمل) المكروب واش دار ليك شي حاجة
رحيل:(تصرفاتو كيتلفوهاا وفضلات تسكت)
نوح:(شاف فعينيها نيشان ونطق بصوت قاصح) شنو قال ليك؟
رحيل:(حدرات عينيها ولقات لسانها كيسرسب ليه شنو طرا) كان باغي يهضرني بزز وفاش مبغيتش شدني من يدي
عض على شفتو وقلب وجهو كيبرد روحو وهي هزات عينيها تتشوف فيه تاضار جهتها على غفلة ونطق بهدوء: سيري دخلي
بعد عليها وهي حنات عينيها جهة رجليها ورجعات شافت فيه:بغيت كلينيكس؟
نوح:(دار يديه فجيابو وجبد لكونطاكط وحل لباب دالطوموبيل ونطق) خوديه من لباكية
طلعات رحيل جلسات فالطوموبيل وجبدات كلينيكس وهو شعل ليها الضو وبعد مخليها.. زولات صندالتها وقلبات رجليها تتشوف لتحت عامر تراب كمشات حجبانها قلة عقلها ديما كاديرها ليهاا معرفاتش فاش كانت تتفكر ملي هربات وفين كانت غادة فداك لخلى.. حبسات شنو كانت تادير وعقلها سرح لنهار الغابة والرعب لي عااشت ديك الليلة سرطات ريقها وهزات راسها يمين وشمال تتسوس ديك الدكرى الكحلة لي زارتهاا ولي مبغاتش تفكر فيها وخصوصا فهاد لوقت.. رجعات تتمسح رجليها وفاش شافت داكشي مكيتنقاش هزات القرعة دلما وفزگات شوية كلينيكس عاد بدات تتمسح بيه ولي وتوسخ تتلوحو.. نقات رجليها ومسحات تاصندالة من التراب.. عاد شافت فالمرايا وقادات فولارها ونزلات من الطوموبيل تضور عينيها تتقلب عليه تبان ليها واقف بعيد على الطوموبيل شوية وهاز گارو كيكميه ودخااان طاير جنبو.. كمشات رحيل عينيها فيه وكانت هادي أول مرة تشوفو كيكمي.. أما نوح فغير سالى داك الگارو لاحوو وعفس عليه وهز عينو لقاها واقف تتشوف فيه.. قرب جهتها وهي ضربها ريحة لگارو لي مخلطة مع ريحة برفانو..
نوح:(نزل عينيه لرجليها ومع كانت هازة تكشيطة بانو صبيعاتها لمصبوغين بلگرونة ورجع شاف فيها ونطق بهدوء) مزيان دابا؟
رحيل:(بنفس لهدوء)وي
قرب جهتها تاوقف قدامها ومد يديه سد باب الطوموبيل لي خلات محلول ورجع شاف فيها:خلينا ندخلو
ضارت رحيل باش تسبقو وهي تفكر واحد لحاجة ورجعات بخطوات لور تاوصلات جهة نوح لي كان محني على التلفون تيطاپي فيه تاحس بيها وقفات جنبو وهو يهز عينو فيها وهي تنطق وعينيها كيضورو فبلاصتهوم وتترمش بحال شي مونيكة: مهم شكرا
نوح:(رجع تلفونو لجيب لڤيست ونطق وهو هاز حاجبو فيها)لعفو الفثنة
قلبات وجهها وهي عاضة على شفتها وسبقاتو وهو وراها متبعة بشوفتو.. دخلات لداخل وبان ليها محمد طه جالس شاد تلفونو ونفس الشي عند بيسان لي كانت تتصور.. جلسات فبلاصتها ومحمد طه تحنى عندها ونطق:فين كنتي خرجت سولت عليك قالت ليا راه جاتك آبيل وخرجتي على برا أو ولد لحاج معاك
رحيل:(تاهي تاتوشوش ليه حدا ودنيه مع لموسيقى مجهدة) عيطات لسيدرا وخرجت نهضر معاها وفاش كنت راجعة وقع ليا مشكيل واحد لحمار كان تيتبسل عليا
محمد طه:(قاطعها وهو مكمش حجبانو ومعصب)شكوون هاد الزا*مل لي سخن عليه كر*
رحيل:(تتهدن فيه) ماتشغلش بالك تحل لموضوع
محمد طه:(كمش فيها حجبانو ونطق بتأنيب) تانتي لاش خارجة بوحدك وهاد لخرا جات جهة لغابة واش مخممتيش بلي يقدر داك المريض يكون تابعناا
سكت محمد طه وهو معصب دبصح أما رحيل تكونات فبلاصتها وهضرة محمد طه خلاتها تزير وتفكر فصاحب دعوتها ولي منغص عليها لعيشة.. بدر الدين
متكية على لمخدة ولايحة عينيها لتلفازة ولكن عقلها كان غايب كيف عادتها.. صوت مها واصل عندها وهي تتهضر مع واحد من ولادها.. جالسة وغير تتنهد وتتفكر لابيل دمحمد طه لي صونى عليها فالصبااح كيسول فيها.. حسات بلمرار فحلقها فاش سرحات تتفكر يامات زمااان ملي كانت مرات إدريس وملي كانو عايشين تحت سقف واحد كيفاش كانت حياتهوم واخا كان الجفا والبرود بناتهوم الاأن العيشة جنبو كانت كافية.. تنهدات مرة خرا فاش تفكرااات أسماء لي مبقاتش تتعيط ليها نهائيا تامن لعيد مباركاتش ليها.. علاقتها معاها بردات من نهار طلقات مبقاتش تتسول فيها وقليل فين تتعيط وتامن لفلوس مكتسيفطهومش ليها بزاف مرة فشحال عكس محمد طه لي كل شهر يسيفط ليها شي باركة.. مع لعلم أسماء كانت مقربة ليها كثرر من محمد طه وكانت تتسمع لهضرتهاا ولكن هادشي مبقاااش..
إيطو:(مكمشة فيها حجبانها) وااااديك اااااه من الصباح وأنا نعيييط وتي باركة تبحلقي ليا فداك القزديييرة ولعقل غااايب تي فين سارحة عجوووول
كلثوم:(عاد ردات لبال لمها وطلعات النفس بزز وجاوباتها) والو امي مسارحة فين
إيطو: علياا اناااو تي ماعرفت مالك مبقيتي تجمعي مابقيتي تجلسي فاش سايرة تخممي؟
كلثوم:(تنهدات وكانت على سبة) فاش غانخمم من غير مشاكيلي لي مالقيت ليهوم حل
إيطو:(مكمشة حجبانها)ااااجي مسولتكشاي اش درتي باقي مع لفقيه لي گولت ليك مشيتي عندوو؟
هزات فيها كلثوم لعين تتشوف فيها وتتفكر لفقصة لي تفقصات نهار مشات عند لفقيه والشفار لي شفرهاا.. فاش رجعات مقالت لمها والو ومن زهرها مكانتش فالدار داك النهار ومشات عند خوها لكبير باتت عندو داكشي علاش معرفاتش إيطو بالشمتة لي تشمتات كلثوم..
كلثوم:(خنزرات فمها) لاش تفكريني فيه بحرااا مانسيت الشمتة لي تشمت والدهب لي مشى
إيطو:(خرجات فيها عينيها ومع وحدة من عينيها ديجا خارجة ولات تتخلع)تي اشمن دهب مشى دووووي ابتلحرام اش درتي
كلثوم:(تتعاود بلفقصة) مشيت متبعة نعتك لي عطيتيني ومن زهري لمخري وقف عليا شفار وگريساني ودى ليا الدهب لي نكساااب ورجعت من تم ومبقيت مشيت لاعند فقيه ولافقيهة
إيطو:(ضربات فخاضها بلفقصة ونطقات بصوت عالي) ويلي على بتلحراااااام كان عندها الدهب وخباتو علياا صافي تهنيتي هانتي جليتي الدهب واش تي ساايرة ضحكي علياااو دايا الدهب كولو اش بغيتي يديرو لك يزغرتووو ليك وزايدها بالسكاااات هااااكي(صبعات ليها وكملات بفقصة) هادوك غي دنوبي نهار سولتك على الدهب قلتي معنديشااااي غي واحد دمليج
كلثوم:(تعصبات) نتي السباب قلت ليك يالاه معايا وتي مبغيتيش كون مشيتي معايا كون قضيت غراضي وماوقعش لي وقع دابا بلاماتبقاااي تعصبي فياا
إيطو:(تاضور راسها يمين وشمال) گالت ليك اتسحررر ليها أنا بان ليها هو لي سحررر ليك تاوليتي تهتهتي بيه ليل وصباااح هاهي دااااتو لالك لفاهيمة ولي عارفة شغالها كيتك نتي البهلة غي حالة فمك والدهب تاهو خوروك فيه
كلثوم:ماتزيديشاااي عليا راني نتفرگع ليك هنا
إيطو:(ناضت من بلاصتها هازة عكازها) راجل مشى ولولاد مشاو وها الذهب لي تكسابي مشى تاهو وبقاي نتي جالسة ليا على گلببي وفقصي ليا مرارتي..
مشات إيطو وكلثوم تجمعو عليها لفقايص ماحيلتها لإدريس ماحيلتها لولادها لي قليل فين مفكرينها ماحيلتها لمها لي ضل تنگر عليها وماحيلتها لي دهبها لي مشى ليهاا..
---
فبيت إدريس وتانيرت مور ماتعشاو كانو مخشين بلاصتهوم وإدريس حاط يدو على كرش تانيرت لي تباركالله بدات تكبر ونطق بتبسيمة: نخمم لنهار يتزاد هادشي لي فكرشك كيف غانخليو سيدرا تبغيه وماتغيرش منو
تانيرت:(ضحكات) ههههه يعلم الله اش غادير غير قبيلة قالت ليا تانيرت إينو داك مومو خايب تيدير لبيتيز هههه
إدريس:(عينيه لمعو بحنية) هاديك النخشيشة صعيب توالف هي وياه
ومع دكرها تحل لباب ودخلات سيدرا ببجامتها الصيفية وشعرها مطلوق جايا جهتهوم وإدريس تبسم ليها وهي طالعة لنموسية تتحبو تاوصلات جهتهوم ونطقات وهي مگلوبة بالنعاس:بّا ديدي نيني حداك أنا
بعدات تانيرت شوية تادخلات وسطهوم وحطات راسها على إدريس لي بدا يطبطب على ضهرها وهي دغيا نعسات.. قادها إدريس فبلاصتها وتانيرت نطقات وهي مبسمة: دابا كاينة سيدرا لي مشاركاني فيك وقريب يجي تاهاد لبزقول وماغتبقاش مسالي ليا هههه
إدريس:(تحنى جهتها وشد وجهها ونطق بهمس) عمر شي حد غايقدر ياخد بلاصتك عندي تانيرت إينو
مخشية أسماء فبلاصتها وقدامها جالسة غزلان وجنبها رنيم.. كانت تتعاود ليهوم أسماء على كريم وبلانو مع مجابتهاش لوقت.. كانت رنيم مكرشخة بالضحك وغزلان تتشوف فيها معجبة..
أسماء:(كتافو كيتهزو بالضحك) هههههه كيسيفط ليا فالواتساب باغيني نفسخ الخطبة
رنيم:(تاتلوى بلاصتها وتموت بالضحك) تانتخيل كمارة إسلام ونتي تتقولي ليه خطيبي ههههه أتكوني صدمتيه مسكين ههههه
أسماء:(عوجات شفتها)يعاودها لكر*و جا فطريقي وانا بروفيطيت فيه هههه
غزلان:(نطقات بهدوء)واش نتي مخيفاش؟
أسماء:(هزات حاجبها) منااااش غانخاف؟
غزلان:هاداك لي قلتي عليه مخفتيش يتحلفها فيك شحال من بنت كنشوفها تاتصاحب مع شي حد وفاش تتبغي تفارق معاه تيتحلفها فيها
أسماء:اش فجهدووو مايدير گاااااع حدو عارف سميتي وتاحاجة خرا مكيعرفها وزايدووون مافيدوووش داك النوع فيه غير الشفاوي
رنيم:(حطات يديها على حنكها) أنا مزعوطة البنات فواحد الكليان تيجي عندنا لكابيني ناااري تيهبل ولمشكيل مبقا ليه والو ويسالي معاناا
أسماء:ياك لكوغدوني لي تادخلو تيكونو فيهوم النمرة ساهلة خوديها وسيفطي ليه مساج قولي ليه أنا رنيم المعشوقة فيك ههههههههههههههه
ضحكات تاغزلان ورنيم بقات تاتشوف فيه وتنفخ من نيتها متبعة معاهاا تالقاتها تاضحك عليها هههه.. تيكركرو تاسمعو صوت الدقان فالباب وريان لي طل عليهوم براسو ونطق:باقي مانعستووش
أسماء:(بمزاح)كانتسناوهوم يدوزو لعشااا ههه
ريان:(قرب عندهوم وجلس فوق الكرسي ونطق بملل)الخوادري مشى وديك السليعفانة دسيدرا بقات معايا متفرجة تاناضت مشات تنعس وبقيت بوحدي
رنيم:(تكسلات) غايكونو منشطين لجووو اجي نعيطو ليهوم أبيل فيديو؟؟
ريان:(جبد تلفونو) هي لولة
دوز لابيل لمحمد طه ولكن مكيجاوبش عاد دوز الخط لرحيل مدة عاد جوباتو وبانت ليهوم جالسة فالكرسي وصوت الموسيقى دالشعبي واصلة عندهوم.. هزات كاس دأتاي وراتو ليهوم وقلبات الكام تتصور ليه بلاطو دلحلوى لي مسبقين ليهوم ولمملاحات..
ريان:(عض على شفتو)ياجدك جبتي ليا الجووووع
أسماء:(تاطل فوق راس ريان) ونااااري داكشي تيبان زوووين فيييييييييين محمد طه
رحيل:(تاتشير لجهة ودنيها ونطقات وهي مقربة التلفون عندها)مكنسمعكووووومش
ريان:(تايضحك) كااااين شي طروووقة تم
مكانتش تتسمع ليهوم وبقات غير حاطة التلفون وجرات جهتها محمد طه لي شير ليهوم وغمزهوم بمعنى اش تم؟؟
ريان:واسعداتك الخووو مبرع ليا مع رساااتك
ناضت أسماء حزمات وبدات تتشطح مع لموسيقى لي واصلة عندهوم وريان متكي على لكادر دالنموسية وجنبو رنيم لي متكية على كتفو وجنبها غزلان.. أما رحيل فكانت تتوريهوم كولشي تاشوية قلبات التلفون باش توريهوم لحيحة لي نايضة وهي تبان ليهوم بيسان جالسة جنب رحيل
رنيم:(كمشات حجبانها ونطقات بالجهد)شكون هاديك؟؟
رحيل:(فربات التلفون جهة ودنيها)شنو؟
رنيم:هاااديك شكووون
رحيل:(نغزات بيسان تشافت فيهوم) هادي بيسان
شيرات ليهوم بيسان وهي مبسمة وكمشات حجبانها تتشوف فريان لي تايدير ليها باي باي.. ضحكات فاش تفكرات بلانها معاه لي لحد الآن تاحد فيهوم مقالها لشي واحد خر.. هزات بيسان عينيها فنوح لي كان جالس وكاس دأتاي بين يديه وباين فيه ساهي.. سرطات ريقها وهي تتخيل ردة فعلو ملي يسيق لخبار.. هز عينو جهتها وهي غير شافتو تبسمات بخووف وهو حرك ليها راسو بمعنى "مالك" حركات راسها بلا مغمضة عينيها "مماليش أنا بخير"
تبسم ليها وضور عينو جهة رحيل لي مشغولة مع لابيل عاد حدر الشوفة ورجع ساهي كيف كان... أما عوينات الجلبانة فكانت خالقاها مع الكليكة ومحمد طه معاهوم تاهوو تاحبسات الموسيقى وتسمع صوت النگافات تيصليو عنبي وكلشي ناض من بلاصتو وتارحيل لي هزات التلفون وقالب الكام ليهوم باش يشوفو الدخلة دلعروسة.. نطقات بهمس وهي تتشير لهيه:محمد طه غانمشي نوقف لهيه واخا
محمد طه:واخا زيدي
جرات معاها بيسان ومشاو بتلاتة مخلين نوح بوحدو فالطبلة مكتافي أنه يشوف كلشي من التلفازة لي فلقاعة وزيد داك الزحام ماعندوش معاه.. وقفات رحيل جنب بيسان تيغينو مع الدقة العساوية ومحمد طه راد ليهوم لبال.. كانت رجاء مبدلة بلمك اب لي دايرة وجات زوينة طلعو فلعمارية وهي تتشير ليهوم تاقشعات رحيل وشيرات ليها وبداو الرجال كيلعبو بيها فلعمارية ورحيل قطعات لابيل وبدات تتشطح مع بيسان تاحسات بشي حد نغزها وضارت مالقات حد وتامحمد طه كان بعيد عليهوم شوية مع هوما تخشاو جهة لبنات.. ماخداتش أهمية ورجعات تاتشطح تاني مع بيسان تاكمشات بيسان حجبانها وتحنات جهة رحيل نطقات ليها:شوفي ورايا واش واقف شي حد حاسة بشي واحد بحال الاكينغزني من جنابي
رحيل:تاأناا
دخلهوم الشك مع كيضورو مكايلقاو حد ويرجعو يشطحو تايحسو بشي حد ناغزهوم.. تكونات رحيل بلاصتها رادة لبال لشكون هادا لي تيدير هاكا تاقشعات واحد من الدراري واقف حدا بيسان وهي تجرهاا جهتها وخنزرات فهاداك الدري لي تبسم ليها غامزها.. قلبات وجهها تتقلب على محمد طه باش يجي عندهوم ساعة مبانش ليها مع الزحام وكلشي مجموع يشوف لعروسة ويصور.. شدات يد بيسان باش ترجع لبلاصتها حسن ليها تاقرب نوح جهتهوم مكمش حجبانو وماهضرش حدو وقف وراهوم وربع يديه وعينو على داك الدري مخنزر فيه تخنزيرة قاصحة..
رجعات رحيل وقفات بلاصتها تاتصفق وبيسان شدات فيد نوح وتكات على كتفو ونطقات تتوشوش ليه: لجو زوين هناا مكرهتش كون كان جا داك بوراص دزين
نوح:(درعها بيديه ونطق تاهو جنب ودنيها) ماعندوش مع هاد لبلايص
بيسان:(شافت فرحيل وعيطات ليها) رحييييل اجي وقفي حدانا؟
رحيل:(ضارت باش تشوف فيها ساعة عينيها هربو جهة نوح ونطقات بتبسيمة) تاهنا مزيااان هه
بيسان:تما الزحام والدراري كيداحسو اجي هنا
كحزات رحيل بشوية اوقفات جنب نوح وبيناتهوم واحد لمسافة لابأس بيها.. تارجعو سمعو صوت بيسان لي نطقات:فين خوووك؟؟
رحيل: ماعرفتش كان واقف لهيه ودابا غبر
ضور نوح عينو على لجهة لي كاين فيها الدراري ومبانش ليه ورجع شاف فيهوم ونطق بخشونة: رجعو لبلايصكوم أنا غانشوف فين كاين
مشاو لبنات لطبلة يجلسو ونوح مشى جهة برا كيقلب عليه ولقى شي دراري كيكميو ويتحششو ماتسوقش ليهوم ضور عينو على لبلاصة وفاش مبانش ليه رجع لداخل لقى الجوق تفرق وكل واحد رجع لبلاصتو من غير مقربين لعروسة لي مشاو جهتها باش يتصورو معاهاا.. ضرب على طبلة لي حالسين فيها لبنات وبان ليه جالس معاهوم.. رجع جهتهوم وجر الكرسي جالس جنبو ونطق:فين كنتي؟
محمد طه:كنت فالحمام
حرك ليه نوح راسو تجات جهتهوم ممات رجاء وتحنات جهة لبنات ونطقات:نوضو البنات تحنيو ديرو لعادة
بيسان:(ضحكات)واخا
رحيل:(مدات لمحمد طه تلفونها ونطقات) غانمشيو نحنيو
مشاو لبنات جهة الجلسة فين كانت النقاشة دارت شوية دلعادة لرجاء.. سلمات عليها رحيل وجلسات جنبها ومدات يديها لنقاشة لي دارت ليها غير خلخال فوق ليد واخا كانت باغا دير تالداخل مي مبغاتش تعيق.. ونفس الشي دارت بيسان وريدة خفيفة وتصورو مع رجاء ونزلو راجعين بلاصتهوم.. الشعبي طلوق ولبنات نايضين يشطحوو مع الداري والرجال جالسين مجمعين وشي يتصور وكل واحد شنو كايدير.. تاناضت لعروسة باش تبدل لبسة الثانية باش غاتعشى.. ورحيل صورات يديها وسيفطاتها لأسماء وبقات جالسة تاحسات بيها نشفات وتفرتات ليها وناضت لحمام ومعاها بيسان زولوهاا وتباركالله دغيا شدات فيهوم خصوصا رحيل جاتها غزالة مع الصباغة گرونة.. رجعو لبلاصتهوم لقاو السربايا تيقادو الطبلة باش يحطو لعشاا.. وبان ليها محمد طه جالس فكرسي بيسان وخلى كرسي جنبو خاوي عاد لكرسي فين جالس نوح ولي حداه خاوي تاهو.. مشات بيسان جلسات جنبو وبقا غير لكرسي لي جا بين محمد ونوح جلسات فيه رحيل..
محمد طه:(تحنى جهتها) مرتاحة فبلاصتك ؟
رحيل:اه (وراتو لحنة) كيجاتني؟
محمد طه:بالصحة جاتك زوينة
رحيل:(بقات تتشوف فيديها ونطقات بضحك) تشوفني سيدرا تحيح عليا حيت حنيت بلابيهاا ههه
جابو لپلا لول لي كانت بسطيلة دلحوث وبدااو يقطعو ليهوم ويعطيو لكل واحد حقو.. وكان السرباي واقف بين رحيل ومحمد طه.. تجنبات باش دير ليه بلاصة تاحسات بكرسيها تجر جهة نوح وضارت لقاتو هو لي جرها لعندو ونطق بتبسيمة: بصحتك الحناني الفثنة
داز لعشا فجوو زويين ورحيل حاولات أنها ماتشوفش جهة نوح واخا هي حاسة بعينو عليها.. مور ماتعشاو ناضو لبنات لحمام يقادو حالتهوم ولغوج أليڤغ لي خسر بسباب الماكلة.. رشات رحيل ريحتها من جديد وخشات كلشي فصاكها وشافت فبيسان لي تاتعكر بالحمر ونطقات:ساليتي؟
بيسان:وي غانمشي لطواليط باش بلامانبقا نايضة
رحيل:نتسناك برا حدا لباب واخا
بيسان: أوكي
خرجات رحيل لبرا مع لحمام كان مطرطق وكلشي جاي يقاد حالتو داكشي علاش.. كانت الدخلة ديال حمام الرجال أونفاص مع الدخلة ديال العيالات وتاهي عامرة.. تكات على لحيط جابدة تلفونها تتخربق فيه تاسمعات سميتها وهي تهز راسها بان ليها محمد طه لي شير ليها تجي عندو.. تبسمات ليه وهو كمش حجبانو ونطق:اش كاتسناي؟
رحيل:بيسان لداخل
محمد طه:كون غير تسنيتيها لداخل حيت هنا مخلط
رحيل:(هزات كتافها مامسوقاش)وأنا مالي
محمد طه:قبل مانسى راه مغانتسناوش تايسالي لعرس شوية ونمشيو
رحيل:يالاه غايبداا الزدوح وزايدون بغيت نشوفها بلاغوب
محمد طه:(مسح وجهو ونطق) وهالوحلة نبقاو مرهونين تال السبعة دالصباح ياك
رحيل:وااامحمد طه راه شحال هادي ماحضرنا لشي عرس خلينا نستمتعو
محمد طه:ولي باغي ينعس اش يدير
رحيل:(ضحكات بالجهد) ههههخ يشرب قهوة كحلة باش يسهر ههههه
محمد طه:(جرها لعندو تاهبط ليها راسها ونطق بمزاح) شتي نتي ديلمك خاصك العصاا
رحيل:(تاضرب فيه) والخراا غادي تخسر لياا فولااري
محمد طه:(طلقها وبدا يضحك) ههه سيري تقاديه
رحيل:(كمشات فيه حجبانو معصبة) مغاتبقاااش فيك
دخلات تاني لحمام على سعدها وعدها لقات بيسان مجمعة مع شي بنات وقفات حداهوم تتقاد فولارها وسالات وهي تنطق رحيل:أنا نتسنى في برا ونتي مجمعة ليا هنا
بيسان:سولاتني على ليلونتي لي دايرة قلت ليها راه هادا لون عينيا (شافت فلبنت) يالاه بسلامة عليك
خرجو لبنات ولقاو محمد طه باقي كيتسنى فيهوم قلبات رحيل عينيها عليه وهو تبسم ومشى جرها مدرعها تايحزر فيهاا وهي غير شادة فيه وجامعة الضحكة..
محمد طه:(همس ليها)على وجه روح مودي
رحيل:على وجه سيدرا
جلسو فبلايصهوم مكملين العرس لي داز زووين والحيحة ناااضت ومكينش لي مناضش يشطح ويخرج هوايشو سوى بنات سوى دراري.. ومع وصلات وقت لغوب تجمعو العائلة ولحباب عند رجاء وراجلها وقطعات لگاطو وفرقوه على الحضور عاد بدات لقاعة تتخوى.. زول محمد طه لاڤيست ديالو ملبسها لرحيل لي جاتها التبوريشة غير خرجو من لقاعة ومع الجوو كان بدا يصبح لحال كان شوية مبرد.. ضار محمد طه كيقلب على نوح لي مكانش معاهوم ولكن ختو كانت..
محمد طه:(شاف فبيسان) معرفتيش فين مشى ولد لحاج؟
بيسان:(تتصوني ليه) لا ماعرفتش فينو وطوموبيلتو راهي واقفة لهيه
رحيل:(ضورات عينيها تتقلب عليه تبان ليها جاااي جهتهوم مكمش حجبانو وهي تنطق) هاهو
ضارو جهتو وبيسان نطقات بسرعة:فين كنتي؟؟
نوح:(بصوت مبحبح) يالاه نتحركو
محمد طه:(سلم عليه ونطق) يالاه طريق السلامة تانتشاوفو
نوح:(شاف فرحيل ورجع شاف فمحمد طه) الله يعاون
شد فبيسان لي تبسمات لرحيل وكانت ديجا سلمات عليها وتبادلو قبل النوامر.. كل واحد ركب فطوموبيلتو ورحيل تشطن بالها ملي شافت ملامح نوح لي كان بااين فيه ماشي على برجوو.. كان محمد طه هو لي سابق وموراه نوح لي ضوبلاه مخرج يديه من الشرجم طوموبيل والگارو مشعول ودخانو تيتبخر فالسمااا.. زادت رحيل كمشات حجبانها وتكات راسها مع لكرسي وهي متبعة طوموبيلتو لي مكسيرية تاغبرات قدامهاا.. ليوم عرفات حاجة جديدة عليه ولي مكانتش متوقعاهاا حيت مباينش فيه كيكمي نهائيااا.. تنهدات وغمضات عينيها وهي مكمشة فلاڤيست دمحمد تاسمعاتو كيعيط ليها وهي تحل عينيها كانو وصلو.. نزلو وهوما دايخين بالنعاس ودخلو لدار لي كان كلشي ناعس.. طلعو لبيوتة ديالهوم ومحمد طه هز يديه بمعنى تصبحي على خير ودخل لبيتو ونغس الشي رحيل لي دخلات وهي باغا غير تنعس..زولات فولارها والتكشيطة وعلقاتها باش تهوى قبل ماتردها لمولانها.. عاد جبدات ديماكيون وكوطون ديسك تتسمح لمك اب وتفوه والتبوريشة حاسة بيها.. وغير زولاتو مشات لحمام غسلات بلغاسول تانقات وجهها وحسات براسها خفافت وهي ترجع لبيت وكيف طااحت نعسات..
على يدين سيدرا لي كانو تيقيصو وجهها حلات رحيل عينيها وهي مگلوبة بالنعاس وزيد عضامها لي حاسة بيهوم كيضروهاا.. بدات تحل عينيها وتسدها بزز وهي تتفوه وسيدرا تحنات طبعات بوسة على حنكها ونطقات بحماس:مامي توحشتك أنا فيقي
رحيل:(توگضات) هاني أمامي حبيبة (جراتها تتبوس فيها) توحشتك تاأنا
سيدرا:(هزات راسها وسط حظن مها ونطقات ببرائة) مامي كنت تانفيق فيك قبيلة ونتي نيني مابغيتيش تفيقي
رحيل:(تتكح) فاق محمد طه
سيدرا:فيقتو قبيلة مامي
رحيا:(ناضت تاتكسل وتنين) ااااي اعضاامي اااي
سيدرا:(شدات وجهها ونطقات بحنية) مالكي مامي
رحيل:(حطات راسها على كتف سيدرا ونطقات بتعب)عييت امامي عيييت
سيدرا:تاتانيرت إينو عيييات ليوم مامي وتقياات قبيلة
عرفات رحيل بلي لوحم هو سباب مها.. ناضت من بلاصتها وسيدرا تابعاها وشادة ليها فبجامتها.. غسلات وجهها ونشفاتو ونزلات لتحت وهي باقا مبوقة بالنعاس.. لقاتهوم كلهوم كاينين وتامحمد طه لي باين فيه شبع نعااس وراحة.. تمشات رحيل جهة إدريس وجلسات جنبو وهي متكية على كتفو ونطقات بهدوء:فيا الجوووع
إدريس:(مد يدو تايقيس وجهها بحنية) وجهك سخووون
رحيل:حاسة بداتي تاضرني كلها
أسماء:لبروك دلعرس هههه
ريان:فين حقنا فالحلوى ولبسطيلة واللحم (وبهمس سمعو غير محمد) والطروفة هه
رحيل:(هزات عينيها فيه) مجبنا والو لي تحط كليناه
ريان:مابلانش اعوينات الجلبانة
سيدرا:(مشات جهة ريان وحطات يديها على نصها ونطقات وهي تتعوج) هي عوينات جلبانتي أنااا مامي ديالي
ريان:(دفعها بالضحك) سيري تكمشي ونتي تاتفرگعي كيف لگلية
سيدرا:(ميقاتو ونطقات) سير السالوبااال
هنا كلشي تكرشخ بالضحك وتارياان لي جرها عندوو باعز ليها حنوكهاا تابغات تهباااال وهي تتبعد عليه وهو جكارة فيه شادها صحة..
تانيرت:(شافت فرحيل)درتو شي تصاور؟
محمد طه:رحيل لي صورات
رحيل:(حلات تلفونها ومداتو لمها) هانتي دخلي شوفيهوم
جرّات سيدرا عند تانيرت جلسات تاهي تشوف التصاور ولبنات تاهو ناضو يشوفو.. كانو تصاور ليها هي وتصاور لعرس وتصاورها تامع بيسان..
تانيرت:واش تابيسان خت ولد لحاج مشات؟
محمد طه:اه جات مع ولد لحاج
تانيرت:تباركالله لون عينيها زوينين كيف لون لبحر
سيدرا:شكون هادي مامي؟
أسماء:هاديك خت ماي بلو آيز ديالك
بداو يدوزو فتصاور تانطقات سيدرا بصوت عالي:ماي بلو آييز تانيرت إينوو
رحيل كانت مغمضة عينيها ومرخية فوق كتف باها تاسمعات هضرة سيدرا وهي تحل عينيها مكمشة حجبانهاا.. وطلعات راسها جالسة جنبهوم تاتشوف التصويرة لي كانت سيلفي ليها هي وبيسان فاش كانو تيشطحو ونوح وراهوم قالب وجهو لجهة لخرا وعاقد حجبانو.. رجعات لبلاصتها ساكتة ولبنات ومها كملو التصاور ولفيديوات تاسالاو وهي تنطق تانيرت:بصحتكوم فوجتو بعدا وبدلتو لجوو
رحيل:اه واخا عييناا
أسماء:باين بايتة تاتركزي داكشي علاش تسخسختي ههههه
رحيل:(تاضحك)هههههه درنا شوية دلبراكة وصاااف
إدريس:(شاف فغزلان) سيري ابنتي حطي ليهوم لكاسكروط
غزلان:واخا اعمي
إدريس:أسماء رنيم تحركو عاونوهاا
ناضو لبنات لكوزينة يوجدو لكاسكروط ورحيل بقات متكية وإدريس تايدوز على ضهرها بحنان..
سيدرا:(جرات ريان ونطقات)يالاه رياني نشري شيبش
ريان:مافيا لي يخرج اسيدرا
سيدرا:ويالاه رياني ياالاه
تتجر فيه وهو متقل راسو بلعاني وسيدرا فاش شافتو هاكاك طلقات منو ومشات عند إدريس مكمشة حجبانها كيف شي قطة:بّا ديدي رياني مبغاش يمشي معايا
شاف فيه إدريس بلامايهضر وريان تبسم وناض وسيدرا بقات تتحرك ليه حجبانها تانطق ريان وهو ضاحك:فين فلوسك؟
سيدرا:(بندالة)هاء ونتا شري ليا شيبش نتا عندك فليسات بزاف
ريان:(هزها وركبها فوق كتافو ونطق تيضحك) شوف التحرميااات
سيدرا:(حاطة يديها على راسو تاضحك) هههه مامي وليت طوووويلة أنا هههه
تبسمات رحيل وهزات راسها من كتف إدريس ونطقات:مبقا والو لعطلة تسالي خصنا نشوفو ليها شي مدرسة نقيدوها فيها
إدريس:نشوفو شي وحدة مزيانة ونقيدوها فيها ونيت ماتكونش بعيد
رحيل:مغانديروش ليها طرونسبور نوصلوها حنا بيدينا هاكا حسن
إدريس:(فهم اش تتقصد ونطق بهدوء) ماتشغليش بالك نتي أنا نتكلف
رحيل:(حركات راسها)ملي غاترجع لبنت لي تزوجات من لكونجي غاندفع تاأنا كونحي
إدريس:علاش؟
رحيل:مليت من روتين لخدمة ومكرهتش نبدل لجو ونسافرو لشي بلاصة
إدريس:(تقاد فجلستو ونطق باهتمام) وطبيبة ديالك وقتاش غاتمشي عندها؟
رحيل:هاد السيمانة عندي معاها حصة واحتمال تكون اخر حصة
إدريس:(كمش حجبانو) واش هي قالتها ليك؟
رحيل:لا ولكن أنا لي غانحبس حالياا
إدريس:شنو السبب
رحيل:(شافت فباها بهدوء) حيت مغانبقاش حياتي كلها وأنا متبعة معاهاا بصح هي نفعاتني فواحد لفترة ومغانكرش أن كل حصة تادوز تاتخليني نحس براسي خفافيت شوية ولكن هادشي مكيعنيش أنني نسيت اش واقع باقا مانسيتش ومغانقدرش نسى ابابا (حدرات راسها ونطقات بخفوت) دوك ليام لي دوزت تم وداكشي لي عشت وشفت باقي هنا (حطات يديها على راسها)
إدريس:(شد يديها ونطق بحنية)نتي معمرك غاتقدري تنساي الابقيتي تتفكري فداكشي لي دوزتي وماحدك ماحاولتيش ديري هاد لخطوة باش تنساااي تيقيني ابنتي عمرك غاترتاحي..
فاش كاتجيك نصيحة من عند باك ولامك فتتكون بحال شي كنز لقيتيه ومكتبغيش ضيعوو..لواليدين لي كيكونو عارفين بحق الزماان ومدوزين تجارب بزاف فالحياة.. بحال إدريس لي كانو التجارب خلاوه يزيد يعرف شلى حوايج من طبعو مكيدويش بزاف ومكيبززش على ولادو شي حاجة ومكيدخلش تاكيشوف بلي خاصو يدخل.. وفحالة رحيل مغاينكرش بلي فرق كبير بين رحيل ديال دابا وهاديك لي كانت قبل خمسنين.. وهادشي مفرحو ولكن فرحتو مغاتكمل تايشوفها بدات حياة خرا ودارت دارهاا او وليداتهاا وديك الساعة هو عاد غايرتاح وماشي غير هي إنما تاولادو كاملين وبالأخص محمد طه لي كيبان ليه تاهو باقي متأثر بدكشي لي طرا معاه تاهوو.. تنهد وسكت فاش بانت ليه سيدرا رجعات هي وريان لي هاز كارطونة دالشيبس وسيدرا تتبان فرحانة بحال الاشدات شي كنز..
سيدرا:(قربات جهة مها) مامي شريت بزاف ديال الشيبشاااات
ريان:(حط لكرطونة فوق الطبلة ونطق) هانتي شبعي الشيبس وماتعاوديش تفرعي ليا مخي بشري ليا
رحيل:(خرجات فيه عينيها)ونتا من نيتك شاري ليهاا هااادشي كااامل
ريان:خليهاا ماتبقااش مبرزطاني
سيدرا:(حلات لكرطونة وجبدات شيبس ديال تلاتة دراهم) مامي اناكل دابا ديال الحار
رحيل:(ناضت جهة الكرطونة ولقاتو مخلط ليها النكهات وهزات ليها لكرطونة والشيبس ونطقات بجدية) تاكلي كاسكروط هو لول عاد تاكليها
سيدرا:(شادة فبيجامة رحيل تتغبن)وراه كليت مامي عطيني شيبش عطيني
إدريس:(هضر بجدية)سيدرا (شافت فيه وهو طبطب على السداري جهتو) جلسي هناا
مشات سيدرا عندو تاتشتف وهي مدلية شنافتها ومغبونة.. أما رحيل هزات لكرطونة مشات تخبيها عليها وخلات ليها غير هاديك لي غتاكل..
---
فالچليسة دلقصب لي كاينة فالرياض جالسين العائلة مجموعة من غير شيماء لي رجعات لفاس هي وخولة فثاني عيد وبقات غير سناء خت رحمة لي غاطول عندهوم كيف ديما.. مجمعين على بريق لقهوة ولحلوى لبلدية.. تاجات السعدية جايبة ليهوم طبسيل دلمملحات حطاتو فالطبلة وشافت فرحمة:لالة بغيتو حاجة خرا؟
رحمة:لا اسعدية غير سيري
زاينة:(شافت فنوح لي كان هاز طاس دلقهوة ساكت) مانيغ نداغ تسهيت أيوي "فين سهيتي تاني أولدي"
بيسان:(تتفوه) غايكون غير عياا حيت لبارح سهرنا فالعرس
سناء:(تبسمات ونطقات وعينيها على نوح) توحشنا لعراسات فالعائلة
بيسان:(ضحكات)ههه بعدا أنا غيرر ضربو عليا باقا مباغاش نتزوج هههه
سناء:(جغمات من طاس لقهوة) اوا نشوفو ولد لحاج يزعم ويتزووج (شافت فيه) ولعروسة موجودة
سكتات بيسان فاش فهمات خالتها اش قصدات أما نوح نطق ببرود وعينو على طاس دلقهوة:الاكانت موجودة زوجيها لشي حد من ولاد خوتك
حط طاس دلقهوة وناض غادي جهة جناحو تاسمع الدقان ومشات السعدية تحل ورجعات تتجري أو وجهها مخطوف:ولد لحاج لبببوليس برا باغيينك
ناضو كاملين من بلاصتهوم وباين فيهوم مخلوعين ومعرفينش اش كاين عكسو هو لي قلب الضورة مبرد غادي جهة البببوليس لي واقف حدا لباب ونطق:نعام؟
بوليسي:سي نوح السليماني غايخصك تجي معانا لكوميسارية
رحمة:(قلبها رجف وقالت بخوف)علاش اش واقع؟
بوليسي:حيت ترفعات ضدو شكاية التهجم والضرب..
يتبع...
التعليقات
لا توجد تعليقات بعد، كن أول من يعلق.