الجوهر الحر الجزء 49

الليل كولو وهو فايق وراد ليها لبال وهي ناعسة مسهوتة ودغيا بان فيها لمرض.. بدات تاتحرك فبلاصتها وتاتكسل وعضامها بحال لادازت عليها دكاكة.. عضات على شفايفها وحلات عينيها وشافت فنوح لي كان حالس جنبها وحاط لبيسي على حجرو ولابس نضاضر دلبروطيكسيون.. ضار جهتها ومد يديه قاس حنكها ونطق بهدوء:شوية دابا

رحيل:(بصوت مبحوح)شوية (بدات تاتكحب) حلقي كيضرني

نوح:بالسيف حيت كنتي فالدار سخونة وفاش خرجتي ضريك لبرد ودار ليك هاد لحالة

رحيل:(ناضت تاتكسل ونطقات بخمول) مقدراش نتحرك

نوح:(حط لبيسي ونضاضرو فوق لكومودينو وتخدر عندها جارها عندو ونطق بهمس)نعسي وارتاحي ليا باقي لحاال

تحدر باغي يبوسها فشفايفها وهي تحط يديه على شفتو وبعدات راسها ونطقات بصوت خافت:غنعاديك

نوح:(خنزر فيها وزول ليها يديه وهز ليها راسها من دقنها وقال بجدية) مانبغيكش تعاوديها سمعتي وداك التخربيق ماديريهش فبالك (باسها بالجهد)

رحيل:(تبسمات ليه وقالت بعيون نعسانة) غير مابغيتش نعاديك وصاف وتمرض ونتا خدام

نوح:(حك نيفو مع نيفها وقال بهدوء) وأنا باغيك تعاديني

رجع باسهاا مرة خرى وناض من بلاصتو وتاهي ناضت باش تمشي طرف حالتها.. دخلات لحمام تاتشوف فحالتها وخدات غسلات سنانها وتوضات باش تصلي.. لبسات إسدالها وصلات غير فلبيت وفاش سالات هزات تلفونها وسيفطات مساج لغزلان طلبات منها تجيب ليها سيدرا حيت مغاتقدرش تمشي تجيبها هي مع عيانة.. لبسات بيجامتها وفوق منها بينوار طويل وفولار وماعندها خاطر لوالو بزز باش نزلات لتحت وكل مرة تكح وتشمر نيفها لي تيسيل.. فطرو وهي غير دارت الصواب وصاف مع حلقها تيضرها لماكلة ماعندها تاشي مداق بالنسبة ليها..

رحيل:(شافت فنوح وبصوت باح)مخدامش

نوح:مايصلاحش ليا نخليك ونتي مريضة

تبسمات لكلامو وهزات راسها فرحمة لي نطقات بصوت باين فيه الخوف:سناء من لبارح غابرة ومكتجاوبش على تلفونها وعفاف عيطات ليا وقالت ليا راه وصلاتها خبار بلي ليازيد غايخطب وخرجات من الدار أنا خايفة لاتكون وقعات ليها شي حاجة..

نوح:(جبد تلفونو ودوز ليها لخط وقبل مايقطع تفتح لخط ونطق بصوتو لحرش)فينك؟

سناء:(بهدوء)قول ليهوم مايعيطوش ليا مباغا نهضر مع حد ولانشوف حد هاد الساعة باغا نبقا بوحدي

نوح:(لعب بلسانو ففمو وقال بهدوء) نتي مزيان بعدا ؟

سناء: متخافاش أنا بخير نخليك دابا

قطعات لخط وهو شاف فمو لي كانت تاتسنى تسمع جوابو بلهفة وقال بجدية:خليو السيدة ترتاح ومتبقاوش تحكرو عليها

رحمة:ولكن اولدي

نوح:(بجدية)يمّا سناء ماشي بنت صغيرة وعارفة اش كادير ولابغات ترتاح خليوهاا

تنهدات رحمة ورحيل سكتات غير تاتسمع ليهوم ومابغاتش تدخل بناتهوم.. ناض نوح لبيروه عندو شي خدمة ورحمة طلعات لجناحها وعقلها مشطون مع ختها وتارحيل طلعات ترتاح أصلا مافيها لي يبقا جالسة باغا غير تكى..

--

نزلات غزلان من الطاكسي وهي شادة يد سيدرا لي تااتجر فيها باش دخل لرياض.. خلصات مول الطاكسي ومشات دقات لباب وحلات ليها السعدية وهي تاترحب بيها.. كانت غزلان باغا غير توصل سيدرا وترجع ولكن رحيل مخلاتهاش تمشي تاتغدات معاهوم عاد رجعات لدار..

سيدرا:(تاتقيس حنك مها وتبوسها)مامي مسكينة مريضة

رحيل:(حطات راسها على صدر سيدرا) اه امامي مريضة بزاف

سيدرا:(نطقات ببرائة)نبوسك امامي ومتبقايش مريضة

باستها ورحيل بقات معنقاها تادوي معاها وتسولها على لبارح شنو دارت بلابيها وهي تتجاوب وتعاود ليها شنو جاب ليها إدريس وشنو طيبات ليها تانيرت وعاودات ليها بلي نعسات مع محمد طه مهم كيف ديما حطات ليها التقرير بدون زيادة ولانقصاان.. كانت رحيل باغا تنعس وفنفس لوقت مباغاش تخلي بنتها ساعة النعاس غفلها.. فاش شافتها سيدرا هاكاك خلاتها وخرجات من جناح مها كاضور فالرياض.. بدا الظلام يطيح وجاها لملل وباغا مع من تلعب.. تبسمات فاش تفكرات زين العابدين وقلبات الضورة لبيتو.. وكيف عادتهاا دخلات بلاماتدق لباب.. كانت داخلة لبيت مبسمة ولكن مجرد مالمحاتو طايح فالأرض كولو تيڤيبري فواحد لمنظر عمرها مشافتو فيه قلبها رجف وبسرعة خرجات من لبيت تاتجري وتغوووت..

قلبها الصغير كان تيرجف بخوف وصوت غواتها تسمع فگاع الريااض.. وبالضبط عند نوح لي كان طالع مع الدروج بشوية عليه وباين فيه عيان.. ولكن غوات سيدرا خلاه ينقز تلاتة درجات وهو كيطلع بزربة تبانت ليه جايا تاتجري وتغوت

سيدرا:(بصوت بااكي)ماي بلو آيز زينبيدين

نوح:(شاف فيها بجدية)مالو واش دار ليك شي حاجة؟

سيدرا:(صدرها تايطلع وينزل) لا هو لهيه ماي بلو آيز طاايح لهيه

خرج عينيه ومشى كيجري وهي تابعاه ورحمة تاهي خرجات من جناحها ملي سمعات الصداع وتامن رحيل لي كانت فاقت ومع سمعات غوات بنتها خرجاات بقلب ملهوف وخاايف تبانت ليها سيدرا بخير وغادة جهة بيت زين العابدين وتاهي مشات تشوف اش واقع..

دخل نوح بزربة وقرب جهة زين العابدين لي كان طايح فالأرض وهو كولو تيرجف تحدر جهتو وهز راسو بشوية حاطو فوق ركبتو.. كانت رحيل حالة فمها مصدوومة وسيدرا تاهي لي عمرها فحياتها شافت بحال هاد لمنظر لي قدامها.. ثواني مرات وبدا جسد زين العابدين كيهدا ونوح كايدوز يدز على راسو ويقرا عليه قرآن..

نوح:(تحدر جهتو كيدوي معاه بالخاطر)زين كاتسمعني اولدي

زين العابدين:(بصوت خافت)اه

عاونو تاانض وجلس تكى على النموسية ونوح تيقلب فيه بقلب ملهوف.. قربات جهتو رحمة ونطقات بحنية وهي جالسة قفازي جنبو تاتقيس حناكو:لحبيب ديالي واش كاضرك شي حاجة

حرك زين العابدين راسو بلا وناض غادي لحمام ونوح تابعو دخل معاه لاتجيه كريز خرى...

رحيل:(قربات جهة رحمة ونطقات بتساؤل وخوف)مالو اش وقع ليه

رحمة:(تنهدات)جاتو نوبة دالصرع

رحيل:(بنبرة مصدومة) الصرع

خرجات رحمة وعقلها تشطن مع حفيدها أما رحيل فبقات غير ساكتة تابان ليها خرجو وقرب جهة النموسية جلس ونوح جلس جنبو ونطق بهدوء:مزيان دابا؟

زين العابدين:(بالإنجليزية) غانعس شوية

تكى مغمض عينيه ونوح بدا كيغطيه وتحدر باسو فجبهتو بالجهد ومسح على شعرو وخلاه يرتاح.. قرب جهة رحيل وشدها من خصرها وقال بهدوء:نجلسو فالصالة

سيدرا:(شدات يديه نوح وقالت ببرائة) ماي بلو آيز أنا نتيتي حداا زينبيدين لهيه باش نرد ليه لبال

نوح:(تحدر باسها فجبهتها) واخا

خرجو بزوج من لبيت مخلين سيدرا غادة جهة زين العابدين لي ساد عينيه ولكن مناعسش.. جلسات فداك لكرسي لي عندو تم حدى النموسية وحطات يديها على حناكها رادة ليه لبااال..

فالصالة لي متواجدة فجناح زين كان جالس نوح هو ورحيل لي باقي منظر زين العابدين بين عينيها..

رحيل:(بهدوء)قالت ليا خالتي رحمة بلي جاتو كريز دالصرع واش هو ديما كيكون هاكا؟

نوح:(تنهد ورجع راسو لور متكيه وقال بهدوء)لا ماشي ديما قليل فين كاتجيه

رحيل:صعيب بزاف خصوصا لجاتو كريز فالزنقة

نوح:(مكمش حجبانو)ماشي غير الزنقة تافالدار راه غيسكي عليه يقدر يضرب راسو

رحيل:(بقا فيها زين وبصوت حنين)الله يشافيه غانوض نصاوب ليه شي حاجة ياكلها

نوح:(شد يديها وباسها من لداخل)نتي مريضة خلي لبنات يوجدوه

رحيل:(تبسمات ليه) لا أنا بخير وقادرة نطيب ماتهزش لياا لهم

خلاتو جالس فبلاصتو مرجع راسو لور كيتنهد.. ماشي أول مرة يحضر لولدو فاش تاتجيه كريز ولكن كل مرة تاطرا ليه تيبقاا يهز ليه لهم.. زين العابدين ماشي من النوع لي تاتجيه لكريز بشكل تكراري.. حيت كاين نوع من الأشخاص لي تاتجيهوم نوبات دالصرع بشكل متكرر وهادوك ولابد مايستعملو دواء مضاد لنوبات باش يسيطرو عليها.. ناض بخطوات متباطئة جهة البيت دولدو وحلو وبانت ليه سيدرا جالسة فبلاصتها وحاضياه وهو نعس... تبسم بخفوت وقرب جهتها وهي شافت فيه وهضرات بشوية باش مديرش الصداع: هو مفاقش ماي بلو آيز بقا ناعس

نوح:(حط يديه على راسها وقال تاهو بخفوت)صافي مزيان

---

فلتحت نزلات رحيل لكوزينة وغير شافوها لبنات بداو يسولو ياكما خصها شي حاجة وهي تبسمات ليهوم وقالت:زين العابدين شنو كيعجبو ياكل؟

السعدية:بسطيلة لحوت ولباط بصوص بلونش ولاغرتان وهو أكثرية تايعجبو لحوت

رحيل:(بهمس)لحوت (صوت عالي)مكاينش لحوت عندنا

السعدية:كاين كونجلي الطري لا

رحيل:نعديو بلكونجلي

مشات حلات لفريگو ولقات تما لحوت لبيض ولكلمار ولكروڤيت لكبير والصغير داكشي كولشي كونجلي.. هزاتو وخلاتو يتطلق ومشات تاتشوف واش كاين شومبينيو نواغ باغا دير سوب دلحوت.. عاونوها لبنات حطو ليها لي بغات وهي شمرات على دراعها وبدات تاطيب واخا باقي عيانة ولكن باغا دير ليه مياكل واحد لحاجة غريبة تحركات فيها من جهتو ماعرفاتش اشنو هي..علاقتها معاه حدودية بزااااف وهو أصلا من نوع لحدودي ماشي بحال سيدرا لي تاتجمع وتادير بلاصتها هو لا لواحد مكيضسرش عليه.. تامن بيسان ورؤوف مكيجمعش معاهوم بزاف وبيسان لي تاتبقا تجبدو وتهضرو بزز منوو.. باغا تحيد داك لحواجز بينها وبينو ويعتابرها بحال ختو لكبيرة على الأقل.. حيت دابا غايبقاو ساكنين ديما مع بعض وهي باغا دير لي عليها واخا كيبان ليها زين العابدين صعيييب تكسبيه..

ريحة لاسوب عطات فالكوزينة وتارحيل وجدات كمية كبيرة.. ملي طابت غرفات ليه زلافة وحطاتها فبلاطو مع كاس دلما ومعلقة وسغڤيت..

رحيل:ديك لاسوب لي بقات تاتحطوها فلعشا

خرجات غادة لبيت زين العابدين وديك الطلعة فالدروج جاتها بعيدة ومع عضامها كيضروها راه بزز باش كبرات..

دخلات لبيت لقات نوح جالس فالكرسي وسيدرا مخشية فيه وحاضين بزوج زين العابدين..

رحيل:فيقو باش يتعشى ماحد لاسوب سخونة

نوح:(قرب جهتو وقاسو فشعرو تاحل زين العابدين عينيه ونطق) نوض تعشى ورجع نعس فخطرة

ناض لايح عليه لغطا ورحيل قربات ليه لبلاطو ونطقات بتبسيمة خفيفة: بالصحة والراحة

زين العابدين:(بهدوء)شكرا

جلس تايشربها وسيدرا بقات ساكتة وعينيها كيضورو تاشوية قربات جهة زين العابدين ونطقات وهي تاتسبل عويناتها:زينبيدين دوقني شوية..

رحيل:راه درت بزاف امامي تالعشا ونشربوها

سيدرا:(شافت فيها وقالت ببرائة)بغيت يدوقني غير شوية

رحيل:أنا نجيب ليك زلافة ديالك اجي معايا

نوح:(شد يد رحيل لي كانت باغا تنوض ونطق بهدوء)غير خليها دابا يدوقها

ماعندو كانة فديك اللحظة كان باغي غير يتعشى ويرجع نعس.. بقا تايشوف فمعلقتو وهو مكمش عينو.. هو من النوع لي كيتيعيف ومكياكلش من شي معلقة دشي حد كيفما بغا يكون.. عمرها ليها وهي تحدرات شربات شوية وقالت:سخوونة (بدات تاتسوط عليها عاد شرباتها) بنينة عطيني شوية مزال

زين العابدين:شبعت

مبقاش باغي ياكل ومد لبلاطو لنوح لي هز فيه حاجبو وقال بهدوء:كملها

عض على شفتو بنابو وهز معلقة بزز باش شربها مور ماشربات منها سيدرا.. بقات واقفة عليه مرة يعطيها مرة يشرب وكون ماباه والله لاكملها.. ومغاينكرش بلي لاسوب جات بنينة وعجباتو.. كملها كلها وطبعا تاسيدرا شربات معاه وناض لحمام قضى حاجتو وغسل سنانو وخرج لقى غير نوح لي كايتسناه باغي يطمن عليه أما رحيل وسيدرا خرجو..

نوح:(قاس وجهو وقال بحنية)نبات معاك ليوم

زين العابدين:نو أنا بخير غانعس دابا

نوح:واخا (باسو فجبهتو وضرب على كتفو) يالاه سير ترتاح اولدي

خلاه ونزل لتحت حيت وقيتة دلعشا تعشاو مجموعين موراها كل واحد مشى لبيتو ينعس..

----

كان محمد طه مكسل فبيتو مور ماتعشى وعينو على شاشة لبيسي لي حاط قدامو كيشوف ديكورات ديال بيوتة دالنعاس.. كانو أشكال وأنواع وحدة تنسيك فلخرى.. وحدة لي عجباتو ولكن معرفش واش غاتعجبها هي ولا لا.. حك راسو وهز بيسيه وخرج من بيتو غادي لبيتها هي وغزلان.. دق لباب تاتحل وشافت فيه رنيم:محتاج شي حاجة؟

محمد طه:كلمي ليا غزلان

دخلات لداخل وثواني وكانت غزلان خارجة لعندو وعلى وجهها علامات التساؤل..

محمد طه:اجي معايا

سبقها وهي بقات تابعاه تانزلو لصالة لوسطانية وحط لبيسي فوق الطبلة وقال بهدوء:ختاري شكون لي عجباتك

جلسات غزلان تاتشوف اش كيقصد وغير شافت لبيوتة وهي تحماار.. مشى من بالها شنو تابعها ولايمكن كانت تاتناسى باش ماتبقاش تفكر فداكشي بزاف ولكن لإمتى.. تنهدات وبدات تادوز التصاور وهو جالس جنبها تايشوف معاهاا.. ليوم هضر هو وباه وعلمو بلي غايبدل لبيت وإدريس طبعا قال ليه يشوف هي اش باغا وداكشي على حسابو مي محمد طه مبغااش وقال ليه بلي هادشي غايتكلف بيه ولاخصاتو شي حاجة يزيدها ليه.. دخل لواحد لكاطالوغ دكيطيا لي حاطين مأخرا يشوف لي عجبو عاد يمشي عندهوم.. عجباتها واحد البيت ديكورها زوين وغالب فيه لون الباج والرمادي بااارد وقفات ديك لافوطو وبقات كتأمل فيه وتتقول مع راسها واش هاكا غاتكون بيتي أنا ويااه.. قريب غانتجمعو أنا وياه تحت سقف واحد وغايتسد علينا باب واحد.. معرفاش هاد الزواج كيفاش غايكون وكيفاش غادي يتعاملو بزوج مع بعضياتهوم وهي عارفاه مزوج بيها غير على قبل لمشكيل لي طرا.. طاح عليها الضيم وضارت جهتو بهدوء:هادا زوين

محمد طه:(كايشوف فالتصويرة لي كانت نفس الديكور لي عجبو تاهو) مزيان غدا ملي نخرج من لخدمة نعيط ليك ونمشيو نشوفوه

غزلان:واخا

محمد طه:بداي تاخدي من دابا داكشي لي غاتحتاجيه أنا غدا غانجيب ليك شي براكة بااش تشري بيهاا لي خصاتك تاتمشي مع لبنات يعاونوك

غزلان:(تنهدات) واخا

محمد طه:(خنزر فيها) ماعندكش من غير ديك لكلمة

غزلان:شنو بغيتي نقول لا

محمد طه:جاوبي دوي مكانهضرش بوحدي مع لحييط

غزلان:(بينها وبين نفسها)هاهو جاتو لحالة تاني (وجهات ليه لكلام) راه جاوبتك

محمد طه:(ناض معاجبو حال) لواحد مايدويش معاك ويهني مخو حسن

غزلان:(عصبها)بنتي ليااا باغي غير داابز معايا وصاااف

محمد طه:علاش غاندااابز معااك مثلا بنت ليك حمق

غزلان:والله تاأنا لي حمقة دايرة فيك عقلي

بغات تمشي وهو يشدها من دراعها مخرج فيها عينو: هاد لهضرة متتعجبنيش سمعتي لاعندك شي حاجة قوليهاا نيشان

غزلان:(حيدات يديه عليها وقالت بتبسيمة)هاد لهضرة راه عليك نتا لي غير هاز شوكتك ومعرفت مااالك

خنزر فيها وعينو عليهاا غياكلوها هي لي ربعات يديها... عصبها فاش تاتشوفو كيبقا يجبد ليها شي مشكيل من والو.. أما هو فكلامها معاه بحال إلاكتستافزو بيه واخا هو جواب عادي.. ولكن بسبب الحساسية لي بناتهوم أي كلمة منها ولاأي تصرف تياخدو بحساسية.. مكانش باقي باغي يجاوبها وفضل ينساحب حيت حس براسو عيق وزطماتو فكلامها لخر.. هز لبيسي ومشى بلاميحاشيها ليهاا.. أما هي تنهدات وجلسات فوق السداري تاتنهد على هاد الزهر لي طيحهاا فمحمد طه لي حال وحوال ماشي غير دابا إنما من نهار شافتو أول مرة وهو ديما هاز شوكتو.. فاش تاتجلس مع لبنات وتاتسمعهوم كيهضرو على يامات زمان ومواقف محمد طه مع رحيل وأسماء تاتستغرب وتاتقول واش بصح تايدويو على محمد طه لي كنعرف ولاغير تشابه الأسماء.. حيت راه لاعلاقة داكشي لي تاتسمع وداكشي لي تاتشوفو منو.. مبقاتش باغا تفكر فهادشي وتمرض تاني رااسها وهي يالاه ولات بخير وقدرات أنها ترجع كيف كاانت واخا لخاطر تزعزع وتغير ولكن ماشي بحال يامات لولة دلمشكيل.. ناضت طالعة تاهي لفوق ومشات ديريكت لبيتها لقات رنيم فايقة تاتسناهاا تجي

رنيم:شنو بغااا منك مودي (بندالة) گررري ياالاه

غزلان:غير وراني بيوتة دالنعاس وصاف

رنيم:ههه سيد زربان باغي يأتت دغيا بيتكوم

غزلان:(تاتسرط ريقها) اويلي سكتي

رنيم:مالي كدبت أصلا خص تبداو من دابا توجدو لعرس مبقا والو على لقرايا

غزلان:يكون خير يالاه بونوي

نعسات كل وحدة عاطية ضهرها لخرى وكل وحدة بالها فين تيخمم..

----

ليوم نهار كان طووويل عندو وهو خداام ماهزش الراس نهائيا وتامن لغدا مكلاهش.. كان باغي غير ينعس وصاف تامن أسماء مكانش مسالي يعيط ليها ويدوي معاها.. ركب فطوموبيلتو وهو تيحرك راسو يمين وشمال وعنقو مكوااانسي عليه.. شد طريقو نيشان لباخطمون وهو باغي غير يدوش وينعس.. مسافة الطريق وكاان وصل بلاصا طوموبيلو ونزل بخطوات تقيلة غادي جهة لسونسور.. وصل لطاج وجبد سوارتو دخل وسمع صوت مو تادوي فالتلفون.. طل عليها فالصالة وهز يدو وهي تاتحرك راسها ومكملة حديتها.. مشى لبيتو خدا حوايجو ودخل دووش وحيد عليه لعياا عاد خرج تسطح فبيتو باش ينعس.. يالاه غمض عينيه وهو يتحل عليه لباب.. شاف فمو بعيون شبه مسدودة وقال بهدوء:لواليدة مباغي ناكل ماوالو باغي غير نعس عياان

مو: لخباار لي جايبة ليك حسن من لمااكلة ياولدي نووض تگعد وعطيني ودنيك

إسلام:اش تم؟

مو:دوويت مع خوتك كاملين وقلت ليهوم يجيو غداا لهنا

إسلام:(تهز من بلاصتو)يجيو علاااش ياك لباااس

مو:اوا هانا جاايا ليك لهضرة قبيلة قبل مادخل عيطاات لياا تانيرت وقالت ليا جواااب لبنت

إسلام:(تحلو عينيه وقال)أمدرا؟

مو:(غرتاااات وهي فرحانة)لبنت موااافقة وغير يجيو خوتك نمشيو نخطبوهااا ليك اولدي..

زغرتات مو تاني بقوة الفرحة لي حسات بيها ملي عرفات بلي أسماء وافقات وبلي ولدها غايتزوج.. هاداك هو النهار لكبير عندها نهار تشوفو مزوج ومستاقر فدارو مع مرتو.. أما إسلام فالعياا والنعاس طار ملي سمع اش قالت مو.. ممتيقش بلي راها وافقات عليه.. أسماء لي شادة الضد ديما معاه وكتبين ليه بلي مكتحملوش وافقات تزوج بيه..

مو:(حطات يديها على ركبتو وقالت بصوت حنين) ملي غايجيو خوتك غانمشيو لعند لبنت ونطلبوها من عند واليديها وغاتاففو نتا وياها على عرسكوم وشنو باغيين ديرو فيه وتفاهمو بيناتكوم وأنا غانوقف على عرسكووم بيدي ومغانرتاح لداري تانتهنى عليك نتا ومرتك

إسلام:(شاف فيها)فين غاترجعي؟

مو:ياويلي ياوليدي راه واقيلا نسيتي بلي خليت داري فكازا ولابدما خصني نرجع ليها

إسلام:مغاترجعي فين نتي غاتبقاي هنا الواليدة ومغاتمشي فين

مو:(باعتراض)لا اوليدي مغانبقاش هنا ديما أنا جيت باش نونسك شوية وندوز معاك وقيتة وصاف أما هاديك هي داري وتما فين غانبقا عايشة اوليدي ونتا ومرتك وقتما جيتو مرحبا بيكوم هاديك راه داار بااك وداارك بحالك بحال خوتك (طبطبات على يديه)ودابا رتاح ليك شوية ونعس تايوجد لعشا ونفيقك اولدي خليت ليك الراحة

خرجات من بيتو مخلياه كيتنهد..رجع تكى بلاصتو وهو حال عينو فالسقف كيخمم.. فكرة أنه غايخوض تجربة الزواج مرة خرى خلاتو يحس بالخوف.. الخوف أنه يعاود نفس التجربة لي عاش.. تجربة لي خرج منها بأضرار وخيمة هلكات صحتو ونفسيتو.. خلاتو شخص آخر هو بنفسو معرفووش وماباغيهش.. والأهم مباغيش دوك الأفكار لي تيطيحو فبالو دابا ينغصو عليه داك الشعور بالفرحة والراحة لي حس بيه ملي عرفها وافقات.. اه فرح وارتاح حيت موافقتها بينات ليه أنها كاتحس بشي حاجة من جهتو.. هو عارف أسماء كون مكانتش بصح باغاه وباغا تزوح بيه مغاتوافقش.. ومغاينكرش أنه تاهو كيحس بمشاعر من جهتها لي مقدرش يصنفهوم فالخانة المناسبة.. واش إعجاب؟ ولاحب؟ هو براسو ميقدرش يحدد دابا ولكن لي متأكد منو دابا هو أن هاد الزواااج هو القرار الصح ولي كان خصو يتخاد من مدة.. هز تلفونو كيشوف فنمرتهاا بااغي يهضر معاها ولكن فنفس الوقت باغي يخليها على راحتها داكشي علاش حط تلفون وغمض عينو ينعس ويرتاح ونيت يستف أفكارو..

---

أيام وهي تاتفكر فالموضوع بعقلانية وبدون عناد.. وفاش جلسات معاه ديك لجلسة لي هضرو فيها على أمورهوم حسات بالراحة وزادت عوناتها ديك لجليسة على اتخاد قرارها النهائي.. وبعد تفكير طويل خرجات بلموافقة وهي براسها معرفاش علاش وافقات.. كون جاا هاد لعرض شحال هادي كانت متيقنة بلي غاترفضو بدون تاماتفكر ولكن دابا الوضع مختالف.. مشاعرها لي ولات تاتحس بيهوم معاه ولاو كيغلبوها وكيتحكمو فيها.. وهادشي لي خلاها تأكد بلي داك الشخص بدا كياخد مكانة فقلبهاا..

جالسة فبيتها وتلفونها فيديها تاتصوني لرحيل باش تعلمها بآخر الأخبار.. واخا مشى لحال ولكن هي باغا تقول ليها وتفضفض عليها..

فديك الأثناء كانت رحيل ناعسة ويدين نوح معنقينها وهي مخشية فيه كعادتها تاسمعات تلفونها كيصوني مفيقها من نومها.. تحرك تانوح لي حل عين وحدة وزول يديه على خصرها.. ناضت من بلاصتها وهزات تلفون شافت نمرة أسماء وهي تكمش حجبانها وضارت جهة نوح لي كان فايق ونطقات بهمس: هادي أسماء غير رجع نعس أنا غانجاوبها برا

حرك راسو باه ونعس على كرشو وهي ناضت لبسات بنوارها فوق الشوميز دونوي لي لابسة وخرجات لصالة.. كان التلفون تقطع وعاودات صونات عليها وجوباتها أسماء فالبلاصة

أسماء: ياكما فيقتك؟

رحيل:(تتفوه)همم كنت ناعسة مي ماعليش ياك لباس بعدا

أسماء:أنا وافقت على إسلام

رحيل:(توگضات وبدات تاتحك عينيها) وايلي

أسماء:اه ليوم عطيت جوابي لماما تانيرت باش تعيط لمو وتقولها ليه

رحيل:باش تاتحسي دابا؟

أسماء:نكدب عليك ماعرفتش تانحس براسي مرتاحة وفرحانة وخصوصا أنني مدة وأنا كنفكر ومازربتش داكشي علاش

رحيل:وهادشي لي خص يكون أصلا تكوني فرحانة ومرتاحة لامكانوش هاد زوج عرفي راسك راه هاد الزواج مصالحش

أسماء:وي مهم على ماسمعت غايجيو فهاد الأيام هو وخوتو ومو كانت ماما تانيرت باغا تعلمك ساعة مشى لحال وخافتك تكوني ناعسة عليها خلاتها تال غدا ولكن أنا ماقدرتش نصبر حسيت راسي باغا ندوي مع شي حد ومالقيت من غيرك نتي لي عارفة عليا كلشي

رحيل:وقتما احتاجيتيني أنا موجودة (بجدية)أسماء بيما أننا كاندويو على علاقتك بإسلام فخص من دابا نعلمك قوة الدراري لي تادوي معاهوم فلواتس وداكشي ديال شحال هادي ميبقااش.. ومن الأحسن ديري حدود بينك وبين بنادم باش ماتلقايش مشكيل فالمستقبل..

أسماء:عارفة هادشي وأصلا هوما غير دزامي وصافي وبناتنا غير سلام

رحيل:واخا يكونو دزامي أي راجل مغايبغيش مرتو يكون عندها صديق ونتي عارفة إسلام الحساسية لي عندو فهاد لبلان عليها من الأفضل لك تجنبيه باش تعيشي مرتاحة أنا كنصحك حيت نتي ختي وعزبزة عليا وحيت أنا أكثر وحدة عارفة إسلام ومنااش داز هو الله يعمرها دار وراجل تعولي عليه صراحة فرحت بزاف حيت نتي وياه غاتزوجو..

كملو هضرتهوم على داك لمنوال ورحيل تنصح فيها وأسماء تسمع لنصيحة وتنوطي فعقلهاا.. خوات عليها لمزيودة ديك الليلة وشي سعتاين وهوما كيدويو عاد قطعو واتافقو يتلاقاو غدا ويكملو حديثهوم فاص افاص رجعات رحيل لبيت بشوية بلامادير لحس وعينيها على نوح لي شاد النموسية كلها وناعس على كرشو.. مشات لحمام قضات حاجتهاا وغسلات وجهها حيت حسات بالصهد عاد خرجات عندو وهي تاتزول لبنوار وبقات بشوميز دونوي قصير غير تحنى كيبان السليب لي لابسة.. طلعات لنموسية وهو غير حس بيها جرها لعندو تاطاحت حدااه ونطق بهمس مبحوح:سعتاين كلها ونتوما كاتهضرو

رحيل:(تاتلعب بلحيتو وتتجاوبو تاهي بلهمس) فخبارك أسماء وإسلام غايتزوجو(حل نوح عينو معسلين بالنعاس وشاف فيها وهي تاتكمل كلامها) عيطات ليا باش تعلمني بلي غايجي هو وعائلتو باش يخطبوها فهاد الأيام (تبسمات بفرحة)الله تابعينا زوج عراسيات وحدة دمحمد طه وغزلان وحدة دأسماء وإسلام وكلهوم عزيزين عليا وقراب ليا

زادت ديك تكميشة دلحجبان بانت فاش سمع كلامها وهز راسو من لمخدة محني جهتها وقال بهمس كالفحيح: كيفااش بلان هاد قرابين ليا الفثنة

شافت فيه فاش سمعات كلامو وعاد عاقت براسها شنو قالت واخاا كلامها عادي ولكن عندو معاديش وغيرتوو عليهاا من إسلام كانت قوى من أي حاجة خرى.. هو هاكا داير تقدر تقول عليه معقد ولامشكااك وهادشي لي عطاا الله..

رحيل:(ضارت لجهتو) قرابين ليا حيت هادوك كلهوم خووتي لي غايتزوجوو وتاإسلام منهوم داكشي علاش

نوح:(عض على شنافتو بنابو وهمه وهو معاجبو حال) همم

رحيل:(يديها سرحات فوجهو ولحيتو وبصوت خافت قالت) مقلق مني؟

نوح:(هز حاجبو)اش درتي باش نتقلق

رحيل:يمكن كلامي معجبك

نوح:(تحدر جهة عنقها وطبع قبلة تاتهرات وقال بخفوت) الفثنة ديالي كلها تاتعجبني

تبسمات وهي تاتسمع كلامو وتاتحس بقبلاتو السخان كيطبعو فوق نحرها مخلينها ترخى ويديه تسللات بشقاوة لبين فخاضها كايلمسها بلمساتو الخشنة مخليها تبورش وتهز بين يديه.. نحرها البيض زينو ليها بقبلاتو وخلاه ليها كولو مزوق.. تاتحس بيه كيطيبها بلمهل ببوساتو وحركاتو على سائر جسمها لي عرااه ليهاا وبدا كيتمنظر فيه بشوفاتو المعسلين.. كانت تاتحس بيه كيطبع قبلات على كرشها تاكتهز ودخلها لداخل ويطلع بقبلاتو تايكيوصل نهديهاا ويدير عليهوم طقووسو الخاصة.. وصوتها المبحوح الهامس كان بحال شي معزوفة كتراقص حروفها بين الألف والحااء.. خلى جسمها يترووض تحت رجولتوو لي سيطرات عليه وخلاتهاا بلاعقل.. جراتو من عنقو وهي مبقاتش قادة تصبر على مداعبتو ليها هاد لمرة لي خلاتها تجن.. حطات شفايفها على ديالو كاتبوسهوم بطريقتهاا هي.. كيف تعودات معااه وهو مخليهاا تعطي ماعندهاا وتجاوب معااه بلاماتكون الحشمة فلموضوع.. وغير حس بيها رخفات من الشدة لي دارت ليه وقبل ماتبعد شفايفها كان هو سابقها وخداهوم بين شفايفو الكبار كيعلمها فنون التقبيل.. معرفااتش شحال دلوقت وهي بين يديه ولكن لي عرفات هو أنه ماطلق منها تاخلاه كاتنهج وركابيها فاشلين عليهاا.. بعد عليها لثواني قلال ناض غايدي لحمام وهي تاتنهج وعينيها بداو يتسدو باغا غير تنعس.. سمعات حسو وضارت شافت فيه جاي جهتها بكالصو.. حنيكاتها حمارو فاش شافت ديك لقمشة لي دارت ليه فعنقو وحشماات.. تبسم ليها بمكر وتحدر جهتها هازها من خصرها بزوج بحال شي بنيتة صغيرة وهي لوااات رجليها على خصروو بزووج وشعرها غطى ضهرها لعريان.. صدرها كان محطوط على صدروه ويديه كانت كيف عادتها مزگيااش وتاتلمس فمحرماتها وهي دافنة راسها فعنقو.. وقف بيهاا تحت الرشاش دلماا لي بدا كينزل على أجسامهوم بزووج

نوح:(بهمس خشن)شوفي فيا (هزات عينيها فيه وهو تبسم ليهاا ونطق بجدية) باقي هاد لحشمة مبغاتش تمشي الفثنة

مجاوباتوش حيت هي براسها ماعندها جواب.. دوش ليها تحت مداعباتو ليها لي خلاوها تزيد ترخى عاد خرجو من لحمام ولبس عليه غير شورط وهي كانت جابدة بيجامة باغا تلبسها

نوح:(قرب جهتها زول ليها لبيجامة وقال مكمش حجبانو)بلاش منها

رحيل:(باستغراب)وشنو غانلبس؟

ضار جهة المجر لي فيه دوبياس ديالها مستفين وبقا واقف تايشوف فيهوم وهو عاض على شفتو بنابو تاهز واحد السوتيان هو شبكة ومافيهش لبونج.. قرب جهتها وزول ليها لبينوار بلخف تاطاح بين رجليهاا ولبسو ليها وهي تاضور عينيها.. هز السليب ديالو تاهو نفس الشكل شبكة وتحدر قفازي باش يلبسو ليه وهي حشمانة واخا فلفراش تاتنسى راسها وتسيح ولكن راه باقي تاتحشم منو وخصوصا دابا السيد جالس كيتمنظر وهو كيلبسهوم ليها.. طلعو ليها بلمهل وغير سالى وقف كيشوف فيها.. كان لون دوبياس فالأزرق ملكي ومع شبكة كلشي كيبان ولحلمات ديال نهديها باينين واقفين.. قرب جهتها وحط يديه على أنوثتها كيتحسسها فوق ديك الشبيكة ونطق بهمس محموم: هالمحني..

فبيت لبنات كانت رنيم سارحة عجول وناعسة عكس غزلان لي جالسة وسط الظلام تاتفكر فالخرجة لي خرجاتها هي ومحمد طه..

🔙🔙

سيفط ليها مساج علمها بلي قريب يخرج وتافقو يتلاقاو حدا طاكسيات باش يشدو طريق لكيطيا يشوفو فراش البيت دالنعاس.. كانت لابسة سروال توب مطراسي ليها ليهونش ولفخاد ومن لتحت مرخوف مع واحد البودي قصير شوية وحيت كان شوية دلبرد هزات جاكيط دجين طويلة معاها باش لابردات تلبسها.. شعرها كانت مخلياه منفووش ودايرة مك اب نو مك اب يعني خفيف ورشات ريحتها وخرجات من لبيت تاتخشى تلفونها فصاكهاا.. نزلات لتحت وعلمات تانيرت بلي غاتلاقى مع محمد طه وخرجات شادة طريق عندو.. ضربات مسافة شوية طويلة على رجليها تابان ليها واقف بطولتو الرجولية لابس شوميز نواغ مع سروال دجين نفس اللون.. بقات غادة لجهتو وهي تادقق فيه وسمحات لعينيها تشوف وتسرح تاوصلات لعندو وهو يضور جهتها وشاف فيها شوفة كاملة وهو عاقد حجبانو ونطق بعصبية:اش هادشي لابسة؟

غزلان:(بسخرية)واعليكوم السلام

محمد طه:(جرها من لبودي منرفز) سولتك از*ي اش هاد لق*وي لابسة

غزلان:(خنزرات فيه) صلح فمك وماتبقاش تخسر قدامي لهضرة وزايدون اش هاد الشدة داير ليا ياك لباااس

محمد طه:(باين فيه معصب ونطق بعصبية وصوت عالي تاضارو شي ناااس) وماتحمقينيش المرررض سوولتك جااااوبي

مرگات غزلان وحشمات من صوتو وشوفة الناس ليهوم ونطقات بعصبية موركة على سنانها:شوهتيني وكرهتيني فشي خرووج

ضارت غادة وهو مع ضارت شاف السروال كيف جااهاا وهو يزيد يتعصب كثر فاش شافها مشات ونخلاتو.. تبعها بزربة وشدها من دراعها غادي بيها جهة واحد الزنيقة تما ممسوق لتاشي واحد وهي مبغاتش تغوت ودير الشوهة باركة غير شوفات الناس ليها وهو جارها هاكاك.. دخل لديك الزنيقة ودفعها على لحيط وضربو بيديه وقال بمنيرڤي:خارررجة ديلمك مع ديووووووثي هاااا اش هاد التقح*بين لابسة واااش باغاني نمد يدي عليك ونكواااانسيك من شي قنت

تاتشوف فيه وهي حالة فمها مصدومة من غواتو وشكلو وهو معصب وجهو حمر أو واحد لعرق بان ليها كيضرب فجبهتو.. تخلعات ماشي منو إنما عليه ومع هو أصلا دار أوبغاسيون على راسو العصبية ممزياناش ليه..

غزلان:(بصوت هادئ)صافي تهدن أنا جايبة معايا جاكيط غانلبسهاا

محمد طه:(قرب جهتها بحاال الاغاينطحها وقال) وعلاش مالبستيهااش من لول هااا ضروري ماتخلي جد مي نصعر عليك

غزلان:حيت الصهد عليهاا (تاتلبسها وهي باغا غير السلاكة معااه خافت لايوقع ليه شي حاجة بسبابها) هانا لبستهاا

بعد وبدا كيشوف فالجاكيط وضورها تاشافها مغطية قاعها عاد برد وتكالمى.. بدا كيمسح وجهو ويزفر النفس وهي غير حاضياه تاسمعاتو نطق بهدوء:خلينا نتحركو من هنا

شد يديها بالجهد وخرجو من تم وهو مكمش حجبانو وتايشوف غير قدامو.. أما هي عينيها تايشوفو فيديهوم لمشابكين وقلبها حاسة بيه شوية ويطير من بلاصتو.. إحساس جميل دغدغها وخلاها تفرح فاش شافت غيرتو عليهاا.. هي مولفة تاتلبس لقصير وعادي عندها داكشي علاش مافكراتش فالموضوع ومشى من بالها وماشي دارتها جكارة فيه.. وصل عند واحد لبقال تم وخدا قرعة دلما نزل عليها دقة وحدة حيت شحف بقوة لغوات عاد شدو طاكسي لفين غادين واحد مكيدوي مع لاخر.. هو باقي هاز شوكتو عليها وهي ساكتة كاطلب السلاك وهاد لخرجة دوز على خير.. وصلو بعد مسافة طريق ونزلو بزوج ومرة خرى شد يديها وتمو داخلين لداخل.. عينين غزلان كانو كيضورو هنا ولهيه وهو غير غادي معاها.. وفلحظة نساو لخصام لي طرا وماعرفو امتى بداو يدويو عادي كأن شيئا لم يكن..

غزلان:عندهوم شحال من حاجة زوينة هناا

محمد طه:لاعجباتك شي حاجة خرى من غير هاديك لي شفنا فالكطالوغ نبدلوها

غزلان:نشوفو بعدا الأثمنة

ضارو تما كيقلبو ويشوفو وكل واحد كيعطي رأيو وشنو عاجبو وشنو معاجبوش.. مدة طويلة تاختارو الشومبر لي بغاو بزووج ولي عجباتهوم ديكورها بسيط وزوين ورومي.. خرجو من تما مور ماتافقو معاهوم على وقتاش يجيبوها باش تركب.. طاح الظلام والجو كان زوين ومراكش يالاه عمرات فالليل والناس خارجين تيسرحو رجليهوم.. شدو طريق لواحد لقهوة وجلس محمد طه أونفاص مع غزلان وشاف فيها بهدوء:اش غاتاخدي

غزلان:فيا الجوع

جر لموني من الطبلة لي حداهوم وعطاه ليها تشوفو وهي بدات تاتقلب وتعزل وتخير وفالأخير خدات لكريب بالشكلاط وحليب بالشكلاط وهو خدا غير قهوة مافيه مياكل..

محمد طه:دابا غايخص نبداو فتوجاد لعرس

غزلان:(وحلات ليها لعضة وبدات تكح) احمم ياك قلنا نديرو غير عراضة فالدار وصاف

محمد طه:(تكى على الطبلة وقال مكمش حجبانو) علاش مباغاش لعرس؟؟

سؤال طرحو وكان باغي يتأكد منها مرة خرى علاش مباغاش تعرس.. باغيها تعطيه جواب لي يبرد قلبو..

غزلان:(تنهدات وبعدات عينيها على عينيه) لعرس أصلا فيه غير الضياع بلاش منو

محمد طه:(جوابها نيرڤاه ضرب الطبلة بيديه تاتهزات والناس بداو يشوفو ونطق كارز على سنيه)ماتهزي لهم لوالو لفلوس وداك تخربيق أنا نتكلف بيه واش نتي باغاه اغزلان؟

غزلان:(بصوت مبحوح)لا

بقا تيشوف فيها مدة بشوفات خلاوها تهبط عينيها لطبسيلها وتزير على يديها.. أما هو فمعاودش نطق باقي حدو رجع لور وتكى وضور وجهو كيشوف بعيد.. فاش بينات رفضها باش دير لعرس هو زاد تأكد أنها مباغااش هاد الزواج وغير مجبورة عليه وصااف وهي مباغاهش بحالو هو لي بدا كينسى وتيتأقلم مع الوضع عادي.. الزواج غايربطهوم مع بعضياتهوم مدى لحياة وأكيد مغايبقاوش حياتهوم كلها عايشين بحال هاكا.. كلما تايدير خطوة تايلقى الصد من طرفها.. تخسر ليه لمود ومبقااش نطق حدو تايشرب من ديك لقهوة لي بردات ليها.. أما عندها هي فكانت غير تاتلعب بلفرشيط ديالها فداك لكريب لي مبقااش باغي يدوز ليهاا..عينيها تغرغرو وهي حادرة راسها وتاتسول بينها وبين نفسها أنا علاش غاندير لعرس وعائلتي مغاتحضرش كلها تحت التراب ميمتي وبويا لي نتعنى بيهوم وسط حبابي وناسي مكينينش.. واليديا لي يفرحو لياا وأنا عروسة راهوم تحت الترااب أما خويا هاني گاعما تانهمو وعمرو سول فياا بحال الاماعندوش ختو.. عائلة بااا عمرها حشاتها لياا ولاقالت نشوفو بنت خوناا كيف عايشة واش حية ولاميتة أما خوالها هادوك من نهار مااتت مها مبانوش فحياتها وعمرها شافتهووم وغير جداها لي كانت تتعاود ليها عليهوم وصاف.. العائلة لي خص توقف معااك نهار فرحك وتفرح معاك هي ماعندهاش إذا علاش غادير هاد لعرس والناس لي غايجيو من طرفها معدودين على رؤوس الأصااابع.. هبطات ليها دمعة وطاحت نيشان فوق الطبلة ناضت وهي حادرة راسها وهزات صاكها ونطقات بخفوت:غانمشي لحمام

مشات بلاماتسنى جوابو وهو بقا متبع ليها الشوفة كيتنهد.. دقائق وكانت راجعة لجهتو وعينيها حمرين عرفها كانت تاتبكي وهو عند بالو حيت تفكرات داك لمشكيل عليها ساعة معارفش هي اااش بيهاا وبلي وجع فراق العائلة واليتم لي حاسة بيه هو لي مخلي خاطرها يتغيير.. خلص وناض خارج وهي تابعاه وعكس كيف جاو هاد لمرة كان كل واحد كايتمشى بعيد شوية على لاخر.. شدو طاكسي وحطهوم حدا لحومة ونزلو تاني فالسكات وغزلان كل مرة تشوف فيه بجنب عينيها تاتلاقاه عاقد حجبانو..

🔜🔜

تنهدات فاش تفكرات الخرجة لي بدات بصداع وسالات بالخصومة.. فكل مرة تاتجمع هي وياه فشي بلاصة ولابد مايطرا شي سوء تفاهم بناتهوم يخليهوم يتخاصمو ويتغاوتو.. قلبها تايضرها من هاد لمشاكيل لي بادين فعلاقتهوم وهوما يالاه مخطوبين.. لخطوبة لي تاتكون بحال تعارف بين الراجل ولمرا وكل واحد كيعرف تاني وتيزيد يفهمو وهوما راه واحد معارف لاخر يمكن حيت البداية كانت مختالفة على الناس لعادية ويمكن حيت بزوج بيهوم مراضينش يقولو مشاعرهوم وباش كيحسو ومخلين داك سوء التفاهم لي بناتهوم يزيد يكبر..

----

الجرئة ديالو فلكلام وفلفعال تاتجيب ليها التمام وتاتخليها تبفي تحفر الأرض وتخشى فيه بقوة الحشمة لي لاإراديا تاتكون حاضرة بيناتهوم..

مقدراش تشوف فيه وهي حاسة بعينيه عليها كيف النسر وأنفاسو السخان كيضربو فوجهها مخلين حناكها يزيدو يحمارو.. أما يديه لي كان حاطها على أنوثها كانت تاتحرك بلمهل مخليااها تعض شنايفها وقلبها كيضرب.. كانت واقفة قدامو بداك الدوبياس لي اختار ليها كولو شبكة ومامغطي تاحاجة بحال إلا ملابسا والو.. ولهمس ديالو بديك الكلمة خلاها تحماار كي مطيشة..

رحيل:(بخجل قالت وهي تاتلف لهضرة) مشى لحاال

جرات لبنوار باغا تلبسو وهو يحيدو ليها ونطق ببرود: مكاين لاش تلبسيه وهو أصلا غايتحيد

سكتها ومالقات ماتقول وعقلها تيقول ليها سيري تخشاي فبلاصتك وتغطااي ولكن فكرة تمشى قدامو هاكاك خلاتها تجمد بلاصتهاا تاتسناه يسبق باش تبعو

نوح:(هاز حاجبو وهو عارف اش كايضور فعقلها ونطق بخشونة)غانبقاو هنا الفثنة ديالي يالاه خلينا نمشيو نعسو

رحيل:(سرطات ريقها)واخا

نوح:يالاه قدامي

عضات على شفتها وتمشات سابقاه وهي حاسة بشوفاتو كيحرقوهاا وهو غادي تابعها وطلعها بعويناتو الزرقين من گديماتهاا لحمرين لسيقانها ولفخااد تايطلعها ويعبرها ومع السليب كان رقيق بحال السترينغ يادوب مغطي شقة مؤخرتها وماتبقى راه قدام أنظارو لي غياكلوهاا.. تيحك فلحيتو وحس براسو تزير وهي كاتمشى قدامو بداك لمنظر لي حرك رجولتو..

نوح:(حك لحيتو وهمس بالسوسية) تامخيرت نربي "لخير دسيدي ربي"

دازو يوماين طايرين غير فتوجاد لعراضة بحكم إسلام وعائلتو غايجيو عندهوم هاد الليلة.. كانت رحيل نهار كولو وهي فدار واليديها تتعاونهوم وهي لي طيبات ليهوم الدجااج تعاونات مع غزلان وگفضو دراعهوم متفننين فالعشاا.. دخل محمد طه هو وريان لي فكل مناسبة تايكونو هوما الراعي الرسمي لتسخاار..

ريان:وابربي تاشحفتوناا كل مرة معيطين لينا نجيبو شي حاجة

رحيل:اوا تانتا غاتجي نوبتك وغانخدمو معااك ماتنسااش

ريان:فاش غاتجي نوبتي راه غانمشيو عند الناس ماشي هوما لي غايجيو

غزلان:ههه غايجيو يخطبوك

ريان:(لاح عليها تفاحة)سيري الله يغصبك البرهووشة تگادو لكتااف

غزلان:ااااي حرام عليك

ريان:(شاف فمحمد طع وقال بضحك)دوي مع مرتك اصاحبي

محمد طه:(خنزر فيها)غانمشي ندوش

خرج مخلي ريان تايشوف فغزلان ورحيل وهو هاز حاجبو..

رحيل:سير دوش تانتا ولبس حوايجك

ريان:واخا

خرج من لكوزينة ودوز لخط لبيسان لقى تلفونها طافي شي لي خلاه يكمش حجبانو ويتشطن عليهاا.. ماشي من عوايدها تطفي تلفون هاكاك وفاش تتكون عندها شي أوبغاصيون راه تاتعلمو هو لول باش مايتشطنش عليها.. خلى ليها مسااج 📩"مون دكتوغ لاشفتي لابيل ديالي جاوبيني وماتخلينيش مشطون عليك"

وجدو لبنات گاع داكشي لي خاص من الضيافة وخلاوه فالكوزينة وطلعو لبيوتة يبدلو عليهوم حيت الضياف قراب يجيو..

كانت أسماء فالبيت بقفطان جوهارة فلبلوسيل مخلياه مطلوق بلاماتحزمو وشعرها جمعاتو كوت شوفال ودارت مك اب خفيف.. كانت تاتشوف فرحيل لي لابسة كولون ودباردور ونطقات بهدوء: رحيل غلاظتي تباركالله

رحيل:(شافت فيها بضحك)وايلي ههه

أسماء:والله ربيتي لهونش اصاحبتي على كيف كنتي

رحيل:فخبارك تانفكر ندير لاصاال

أسماء:فورمتك غزالة بلا لصال واخا عندك شوية دلكريشة مي جااتك زوينة

رحيل:اوا انا كيبان ليا عادي

أسماء:أنا لي شحال هادي ماشفتك بان ليا لفرق

لبسات عليها عباية مودرن زوينة واسعة مع فولار ديالها وصندالة ودارت شوية دلمك اب ممكتراهش وشافت فساعتها:شفت نوح معيطش ليا يكون باقي مجاا

أسماء:عيطي ليه نتي (كمشات عينيها)صوت الصدااع واقيلا جااو

مشات تاتجري جهة الشرجم ولقات ربعة طوموبيلات واقفين وحدة دإسلام ولخرين معارفاش ديالمن.. بان ليها لبشاار كثير وخرجات عينيها وشافت فرحيل:اويلي هادا جايب تريكتو كاااملة باش يطلب يدي لزواج

رحيل:هادوك خوتو ولخرين ماعرفتش شكون

أسماء:حمدلله درنا لعشا بالزايد أما كون مشينا على داكشي لي قال كون تشوهنااا الزا*مل ماعلمنيش گاااع

مشات سيفطات ليه مساج وهي معصبة منو مع متافقين غايجيو غير خوتو ومو صاف ولكن دابا جاب بزاف ومعلمهومش

أسماء 📩 "علاش ماقلتيش ليا بلي غاتجيب تريكتك كولها وكون مادرنااش بحسابهوم شنو كان غايطرا من دابا بدينا لفعااايل دوالو"

رحيل:صافي تانتي لخير موجود والايادلي خصات شي حاجة نجيبوها واجدة

أسماء:ولو يعلم اصاحبتي ونكونو عارفين

حدرات راسها تاتشوف مساج ديالو لي وصلها

إسلام 📩 "بلاماتزيدي تفرعي ليا تانتي ك*ي باركة هاد لقلا*ي لي منيرڤيني"

أسماء:(مدات تلفونها لرحيل)هانتي قرااي

رحيل قرات داكشي ونطقات بهدوء:صافي سايسي تانتي وخلي الليلة دوز على خير أنا غانزل لتحت نستقبلهوم ونتي بقاي تانجي عندك

نزلات رحيل ومع قربات بدات تاتسمع صوت الهضرة بزاف.. لقاتهوم باقي تايتسالمو وسلمات مع لعيالات بلوجه كاينين عريسات خوتو عرفاتهوم وخوتاتو وشي عيالات لا.. أما رجال غير حركات راسها من بعيد مكتسلمش من نهار نوح هضر ليها على السلام وهي متجنباه أو واخدة راحتها حسن ليها أما إسلام غير حركات ليه راسها من بعيد وهو تبسم ليها واخا باين فيه معصب.. استقبلو الرجال فالصالة الكبيرة لتحت ولعيالات فالصالة لي حداهاا باش ياخدو راحتهوم ونيت الغاشي كثير ونوح لاجا مغايبغيش داك تخالط.. جلسات معاهوم رحيل تاتسولهوم على التسافيرة كيف دازت والهضرة كثيرة دايزة بناتهوم..

بانت ليها سيدرا واقفة مع وحدة من بنات خوتو وهي تشير ليها تاجات عندها وقالت بهدوء:سيري جيبي تلفوني راه فبيت أسماء

سيدرا:واخا مامي

مشات طيارة ورحيل رجعات تاتجمع وعقلها مشطون مع نوح لي فآخر مرة هضرات معاه علمها بلي غايجي بكري ولكن دابا تعطل.. جابت ليها تلفونها وحلاتو مالقات تامساج ولاأبيل منو..

رحيل:(كتبات ليه مساج) 📩" نوح فينك تعطلتي والناس جاو ياكما طارية شي حاجة؟"

بقات تاتسنى يجاوبها ساعة والو وهنا غير مزاد بالها تشطن.. بغاو يشوفو العيالات أسماء وهي مشات تجيبهاا.. كانت نيت تاتسناها نزلو بزوجات وأسماء دازت من الصالة درجال وقالت السلام من بعيد وشافت فإسلام لي كان تيشوف فيها تاهو بهدوء.. خلاتهوم ومشات لداخل عند لعيالات وناضت مو تاتسلم معاها وتعرفها على عيالات خوها خوال إسلام وهي فرحانة وأسماء دايرة الصواب معاهوم واخا معجبهاش لبلان لي دارو وكيفاش جا البشار بزاف وهوما معالمينهومش..

مرات خال إسلام:(قالت وعينيها على أسماء) مزيناتها عروستك زوينة ومكتشبهش لمرات إسلام لولانية

كلام مرات خالو خلى أسماء تحس براسها معصبة كثر ماهي معصبة أصلا.. كانت باغا تجاوبها بجواب تسكتها ولكن فضلات تسكت حيت لعيون عليها وزيد هوما جاايين لشوفتها مبغاش دير شي حاجة تخليهوم يدويو خايب عليها وعلى عائلتها..

م.إسلام:(معاجبها حال) دكرنا السمن والعسل افاضيلة اش هاد لكلام تتقوليه تانتي واش جاب هاد لهضرة لكلامناا

فاضيلة:اوا غير دويت وصاف مقصدتشاي شي حاجة خرى

م.إسلام:صافي خليونا نسدو هاد لهضرة وبلاماتعاوديها راه لاسمعك ولدي يقربلها علينا

تانيرت:(تبسمات بهدوء)اوا كيف داير لجو فكازا

بداو تاني كيهضرو وأسماء شافت فرحيل لي غمضات ليها عينيها بمعنى سايسي ورجعات شافت جهة رنيم لي كانت باينة فيها تاهي معاحبها حاال.. محملاش راسها حيت هاديك لي تجبدات ختهاا ومكرهاتش كون كاان عندها شي حل باش تقطع العلاقة بينها وبين ميس من الجدر.. واخا هي راه مبقاتش تاتهضر معاها ونساتها ولكن مغاتنكرش بلي جامعهوم نفس الدم ونفس الكنية لي وسخووهاا بسباب فعايلهوم.. ناضت من الصالة غادة لفوق وهي محملاش تبقا جالسة تما وهي كاتشوف عينين فاضيلة عليها.. متأكدة بلي عرفاتها مع سبق وشافوها وأكيد كاتسائل هي اش كادير هناا.. بدات تتقاد فداك لبتي فور فالبلاطو وعقلها غاايب وتيفكرها فحوايج واخا تبغي تنساهوم ولابد ماغايجي شي حد ويفكرها فيهوم..

فلتحت كانو لعيالات كايهضرو بناتهوم وأسماء تاهي تادوي مع عيالات خوتو وخوتاتو وتتبسم ليهوم تبسيمة صفراا.. أما رحيل فكانت جالسة بعقل مرفوع وكل مرة تشوف تلفونها وفاش مكتلقاش جوابو تتزيد تخلع وعقلها تايحبك سيناريوهات لي تايخليو الخوف يتملكهاا..

---

كانت بيسان واقفة تاتلبس حوايجها والتعب مرسوم على ملامح وجهها الصفريين.. تحل لباب ودخل نوح لي كان مكمش حجبانو وقرب جهتها وتحدر باس راسها ونطق بحنية:شوية دابا

بيسان:(بصوت متعب)وي أنا بخير اخويا

نوح:لاكنتي واجدة خلينا نمشيو

بيسان:أنا غانقدر نسوگ نتا غير سير راه تعطلتي على رحيل

نوح:(بجدية)نوصلك لرياض ونتحرك لعندهوم

شدها من يديها وهي تكات عليه وتمو خارجين من الشومبر.. وغادين فالكولوار تاسمعات بيسان صوت صاحبتها نسرين تاتعيط ليهاا وجاية جهتها تاتجري..

نسرين:بيسان كيف بقيتي دابا مزيان؟

بيسان:وي حمدلله

نسرين:ملي قالو ليا سخفتي فلبلوك وسط لوبغاصيون تخلعت بزااف عليك شنو السباب تاسخفتي

بيسان:ماعرفتش كنت عادي تابديت تانحس بالظلام فعيني ويدي بدات تاترعد ومقدرتش نقرب لمريض ومن زهري دكتوغ السفياني كان معايا فلبلوك دخل وأنا ماحسيت بتاحاجة مزال من غير الظلام لي ضاير بيا وسخفت وفاش فقت لقيت راسي فالشومبر معلقين ليا السيروم ودارو ليا تحاليل ديال الدم باقي ماخرجوو

نسرين:غايكون لعياا هو السباب حيت هاد السيمانة شديتي لگاغد فالليل ومكترتاحيش اصاحبتي المهم سيري لدار ورتاحي إلا ساليت ندوز عندك

بيسان:داكوغ ماشيغي تهلاي

حركات نسرين راسها وانساحبات غادة لخدمتها ونوح وبيسان كملو طريقهوم لبرا.. ركبات فطوموبيل خوها وهي مغمضة عينيها.. جهدات على راسها فهاد السيمانة ومكاتنعسش بزاف وتالماكلة ولات عندها مخربقة.. وليوم طاح ليها الطونسيو وهو السباب.. ركب نوح جنبها وشاف فيها بهدوء:مزيان دابا

بيسان:اه

شد الطريق لرياض ومرة مرة يضور يشوف فيها وهي مغمضة عينيها.. كان فالمحال الجديد تايشوف أمور السلعة مع رؤوف تاعيطو ليه فالسبيطار وعلموه بلي سخفاات وخرج طاير عندها بلامايعلم حد من غير رؤوف لي كان باغي يجي معاه ساعة ماقدرش يخلي المحاال والسلعة لي جات.. صحتها على قد الحاال والإنسان من لحم ودم ضروري مايجي نهار ويعيى ونوح فاش شافها هاكاك تخلع عليها حيت بيسان ماشي غير ختو هي راه بنتو.. مد يديه وحطها على حنكها وهي حلات عينيها الزرقين دابلين وتبسماات ليه ورجعات سدات عينيهاا.. وصل لرياض ونزلو بزوج وهو مسندها عليه ومع وقيتة دلعشا لقى كلشي كاين ورحمة غير شافت بنتها كيفاش وجهها صفر وتتبان مقتولة ومريضة وهي تخلع عليهاا وقربات جهتها بقلب ملهووف ونطقات بخوف:بيسان ماالكي ابنتي اشواقع ليك؟

نوح:وصليها ايمّا لبيتها وماتخليهاش تنعس تتاكل

رحمة:اش وقع ليهاا مالها؟

نوح:سخفات فالخدمة (شاف فساعتو لقى بلي مشى لحال)لمهم أنا غاادي ردو ليها لباال واخاا (شد وجه بيسان ونطق بحنية) سيري ترتاحي ابابا واخا

تبسمات ليه وعنقااتو بحب قبل ماتمشي مع مها لي معنقاها تتبوس فيهاا وهو شاف فزين العابدين وجرو من قرفادتو ونطق بهدوء:يالاه تمشي معايا

زين العابدين:بلاش

نوح:(بجدية)تحرررك

معاودش معاه لهضرة ركب معاه ونوح شد تلفونو وشاف فمساج رحيل لي سيفطات ليه وقبل مايدماري جاوبهاا 📩"أنا جااي"

تحرك نيشان لدار إدريس وزين العابدين جنبو مافيه لي يمشي.. مكيحملش التجمعات العائلية وديما باه كيديه بزز منو باغيه يتعاشر مع لفاميلا وميبقاش غير منعاازل بوحدو..

وصلو بعد مسافة الطريق وكمش نوح حجبانو فاش شاف دوك الطوموبيلات لي واقفين جنب الدار.. تحرك شوية لقدام تما فين لقى بلاصة ونزل مدرع ولدو وقصدو الباب دقو وبقا واقف تاتسمع صوت سيدرا وهي تاتغووت بالجهد: أنا نحل لبااااب ماااامي

حلات لباب وغير شافت نوح وهي تلاح عليه بحمااس:ماي بلو آيز جيتي

هزها نوح وباسها فحنكها وقال بتبسيمة خفيفة:جيت الفاارة

هز عينو فرحيل لي كانت واقفة تاتشوف فيه بتبسيمة..عاد ارتاحت فاش شافتو واخا سيفط ليها مساج ولكن بقا بالها مشطون.. دخلو لعندها وهو كيشوف فيها من لفوق لتحت بابتسامة راضية تماما وقرب جهتها بااس جبهتها بالجهد ونطق بصوت خشن:الله يرضي عليك

رحيل:فين تعطلتي؟

نوح:لهضرة طويلة تال من بعد ونقول ليك

رحيل:واخا راه الرجال فالصالة هنا

نوح:فين غادة؟

سيدرا:(نقزات بزربة) مامي هي لي مطيبة لينا دجيجات ماي بلو آيز وتاشلاظة

نوح:(شاف فسيدرا وجرها من نيفها بلطف) ماماك حادگة

سيدرا:ديما ههه

غمز رحيل ودخل لعند الرجال وسيدرا باقي معلقة فيه وزين العابدين موراهوم أما رحيل طلعات لفوق لقات رنيم موجدة لعاصير ولبتي فور..

رحيل:صافاا شوية؟

رنيم:(بتفاجأ) اااء

رحيل:عارفة بلي بقا فيك لحال ملي تجبدات سميتهاا مانبغيش تقلقي وتهزي فخاطرك شي حاجة ارنيم ومتنسايش هوما ماشي بحاالك واخا

رنيم:واخا

رحيل:مزيان وجدتي هادشي غايخص يجيو الدراري باش يهبطو لرجاال وحنا غانديو لعيالات فين غزلان؟

غزلان:(تمات داخلة)هاني جييت

رحيل:ماعرفتش هادشي واش غايقد ولا لا

غزلان:أكيد غايقد راه تاهوما جابو شي حاجة

رنيم:داكشي لي جابو خلطتو مع داكشي ديالنا

رحيل:(سيفطات لمحمد طه) 📩 "طلع نتا وريان لعندي"

دقائق وجاو الدراري هزو صينية دلعصير ولبتي فور وغزلان ورنيم نزلوه لعيالات... أما رحيل فكانت تاتأكد من لعشا حيت مغايعطلوهش.. الأجواء كانت عادية عند الرجال عكس لعيالات لي صوتهوم كيتسمع لعندهوم والبراهش تيلعبو وسيدرا تاهي تاتلعب معاهوم فرحاانة..

نطق خاال إسلام:اوا اسي إدريس نتا عارف سباب مجيتنا لعندك ليوم.. ومغانهضروش على ولدنا إسلام حيت نتوما كاتعرفوه كثر منا ههه السيد ناوي المعقول مع بنتكووم وحنا جينا طالبين وراغبين يد بنتكوم لولدنا

إدريس:مرحبا بيكوم اسي عباس وهادا نهار كبير عندنا إسلام كيف قلتي راه منا وفينا وماشي شي حد برااني علينا وأنا من عندي الله يكمل عليهوم بالخييير

إسلام:عمي إدريس نقدر نهضر مع أسماء بوحدنا

إدريس:اييه اولدي تقدر (شاف فريان)كلم ختك

ناض إسلام من وسطهوم وعينو على أسماء لي خرجات من عند لعيالات حادرة راسها ودازت جنب الرجال لي رجعو مكملين كلامهوم وهوما طلعو لفوق فالصالة لوسطانية.. غير تأكدات أسماء بلي راه مكاين حد وهي تشوف فيه هازة حاجبهاا:علاش معلمتينيش بلي غاتيجيب هاد لبشار كولو؟؟

إسلام:(جلس وساط معصب) كون كنت عارف هادشي كامل غايجي كون علمتك أنا برااسي كنت داير بحساب خوتي وخاالي تاجااو لخرين ومالقيت ماندير حطوووني أمام الأمر الواقع

أسماء:من دابا بدينا هاكا

إسلام:خلينا منهوم دابا واجي نهضرو علينا حناا

أسماء:هضرنا على لخدمة وتافقنا بلي غانكمل فيها

إسلام:هادشي تافقنا عليه وعطيتك كلمة دابا غانتافقو على لخطوبة ولعرس

أسماء:(شافت فيه بجدية) أنا مباغاش خطوبة

إسلام:(بعدم فهم)كيفااش مباغاش خطووبة مافهمتش

أسماء:هااء كيفاش مافهمتيش كلامي واضح مباغاش ندير لخطبة

إسلام:(باين فيه تعصب)وعلااااش؟

أسماء:بالنسبة ليا أنا مباغاش وكنفضل ندير عرس كبير ونجمع فيه كلشي بلاصة مانبقا ندير كل مناسبة بوحدها نجمعها فعرس ونهني مخي

إسلام:(اقتانع نوعاً ما بكلامها) إلا كان على هاد لحساب راه العرس مغانأجلوهش بزااف

أسماء:بينك وبين بابا تافقو على لعرس والنهار لمهم عندي تعلموني قبل باش ندفع ليهوم فالخدمة وناخد كونجي ديالي نوجد فيه راسي

إسلام:ضروري مانعلمك (هز فيها عينو) قبل مانسى العرس غانديروه فكازا

أسماء:(هزات حاجبها)فكازا علاش؟

إسلام:العائلة عندي كثيرة وأغلبية مغايقدرش يحضر لادرناه هنا عليها غانديروه فكازا فين قريب لكلشي باش يحضر

أسماء:(ضحكات بفقصة)واش تادوي من نيتك ولاتاتفلى

إسلام:(خنزر فيها)أسماء

أسماء:(ناضت من بلاصتها ونطقات بانفعال)لخرا هادا ماشي أسماء واش عندك شي عقل ولامكتكسابوش قالك نديرو عرس فكازا باش تريكتو كلها تحضر أنا نهز عائلتي ونتجرجر وأنا عروسة على ود تريكتك

إسلام:(ناض تاهو معصب)مغاتجرجري ماوالو غانكري ليكوم أبارطمون وتبقاو فيهاا تانهار لعرس وندوزوه وديك الساعة نشدو طريقنا والله يعاوون

أسماء:لا هي لا مغاندوزش عرسي فكازا باغي تريكتك تحضر مرحبا بيهاا مغانسد الباب على حد ولكن باش نمشي أنا ونتعدب ونعدب عائلتي بااش عائلتك تكون مرتاحة هاديك هي لي مغاتكونش

صوتهوم كان عالي أو وصل لعند رحيل لي كانت فالكوزينة هي ولبنات كيشوفو فبعضياتهوم.. مباغينش يدخلو ولكن رحيل عارفة علاقة أسماء وإسلام كيف دايرة عليها قربات لصالة ونطقات بهدوء:مالكوم تاتغاوتو ياك لبااس؟

شاف فيها إسلام وهو مخنزر وأسماء حطات يديها على نصها وقالت: جابك الله تسمعي لهاد لكلام لي تيقول (شافت فإسلام) قال ليك الالة لعرس غانديروه عندو فكازا باش عائلتو كلها تحضر وأنا وعائلتي وحبابي لهلا يقلب جد بوناا

إسلام:ماتبقااايش تفسري لكلام بطريقتك أنا ماقصدتش هادشي (شاف فرحيل وحاول ماأمكن يتكالمى) قصدت بلي عائلتي كثيرة بزااف راه شايفة على عينيك كلشي ارحيل غير جنازة المرحوم وشفتي شحال دلبشار ماشي بحالكوم نتوما مكتارينش بزااف وأنا أصلا غانكري أبارطمون وغاتكونو فيها مريحين ولي خصاتكوم غاتوصل عندكوم

أسماء:شوف باش بلامانبقااو فهاد شد ليا نقطع ليك أنا مباغاش وعرسي غانديرو فمراكش بغيتي مرحبا مابغيتيش باقي لحال نزلو ونفرتكو هاد لمنامة

رحيل:أسمااء تهدني شوووية ونتا اإسلام متفهماك اش قصدتي ولكن سمحليا نتا غاالط ماشي حيت أسماء ختي وكانجي من صفها ولكن راه العروسة من مراكش ونوغمالمو عائلة لعريس تاتمشي عند لعروسة ماشي لعكس كون قلتي كل واحد دار عرسو واه هادي نتافق معاك مي نتوما غاديرو عرس واحد فمجاتش وزيد عائلتك لابغات تحضر ليك راه واخا تكون فقندهار غاتحضر وحنا غير فمراكش وراه مبعيداش على كازا بزاااف

أسماء:الله يجيب لي يقول الحق هانتا سمعتي كلامهاا اوا شد وسمع كلامي تاأناا نهار وافقت وقبلت بهاد الزواااج اإسلام حيت بغيت نعطيو لراسنا فرصة خرى وداك لغنان وشد ليا نقطع ليك مبقيتش باغاه ولايحساب ليك فاش قلت لا باش نفقصك راك غااالط ونتا باقي مكتعرفني مزيااان

رحيل:سمع اإسلام نتا ماعليك والو نهار تافقو على لادات ديال لعرس علمهوم بغاو يحضرو مرحبا مبغاوش مرحباا عااادي مافيها إشكااال ماتبقااش هاز لهم لغيرك ولمهم أنا غانرجع لشغالي ونتوما تافقو بناتكوم وسمحوليا لادخلت فشي حاجة مكتخصنيش..

ردات الباب دالصالة عليهوم وأسماء رجعات جلسات بلاصتها وتاهو جلس.. هو عارف كلام رحيل على حق ولكن فكر لعائلتو ولمو حيت عارفها غاتبغي تحضر خوتها وعمامو وكلشي وقال نديرو فكازا حيت أغلبية ساكن تم وتا لي ساكن بعيد راه غايجي يبقا عندهوم فالداار ولكن دابا كلام أسماء ورحيل خلاه يعاود حسباتو ويلقى بلي ماقالو عييب وبالصح لي بغا يحضر معاك راه غايحضر فيما كنتي..

إسلام:(شاف فيها) نتي كلمة زووج نفكو هاد لمنامة مالنا لاعبين

أسماء:ماحدنا باقي مدايرين فالطاجين مايتحرق نفكوهاا بأقل الأضرار

إسلام:الالة ماغانفكوهااش نتي قلتي اااه وغانتزووج بيك وبلاتخربيق وفريع لك*ر

أسماء:وبلاتخسار لهصرة المرض (ضرباتو بالمخدة)

إسلام:(شدها وتكى عليها وقال بتبسيمة خفيفة) غزاالي اجي جلسي حدايا ونتي مبعدة عليا خايفة ناكلك

أسماء:مرتاحة هاكا شكرا

إسلام: غزالي حشمااانة كيف طرا وجرى

أسماء:(قلبات عينيها مجاوباتوش)

إسلام:اه قبل مانسى لواليدة راه مغاتعيشش معانا هضرة معاها فهاد لموضوع وهي قالت بلي غاترجع لدارهاا

أسماء:تادار ولدها راه دارها وماماك مرحبا بيها فأي وقت ولكن (هزات حاجبها)شي قمقوم آخر لاسخن عليه راسو وبغا يجي لعندي يعلم وزيد قوة البشااار وتخيااام عندي مكنحملوش نقولها من داباا كل واحد يتكمشى فمحالو

إسلام:الله يمسخك راه هاديك عائلتي واقيلا بغيتي نسد عليها لباب

أسماء:ماتسدش ولكن بلقيااس نهار يوماين اه ماشي يجيو بالشهورة

إسلام:(ساط النفس) تاتسيفطي ليا لغيب ديال باش نڤيرسي ليك صداقك لاخصك شي حاجة تشريها من دابا

أسماء:واخا

إسلام:واقيلا تافقنا على كلشي

أسماء:لي عندي قلتو لاتفكرت حاجة خرى غااانسيفط ليك فلواتس

ناض جهتها وهي بقات واقفة وتحدر لعندها باغي يبوسهاا وهي تبعد ونطقات مكمشة حجبانها:جمع شلاقمك عندك الأخ شفتك ولفتي نهار تعقد علياا دير لي بغيتي داباا أوهو..

تقاد فوقفتو وتبسيمة على شفايفو وخرج من تم مخليها جالسة تاتسوط.. هي من نوع لي تتحط كلشي فوق الطابلة وفاش شافت لفعلة دعائلتو لي جاو بلامايعلمهوم عرفات نوعهوم عليها تافقات معااه باش نهار يطرا شي حاجة تفكرو فيهاا وتقول ليه راه سبق وعلمتك.. ناضت تاهي غادة لكوزينة لقات لبنات تيقادو زوج طباسل خرى ديال شلاظة ومن زهرهوم كانو مطيبين بالكثرة..

أسماء:نعاونكوم؟

رحيل:نزلي لتحت عند ناسك حنا غانتكلفو

أسماء:(هزات واحد داند فومي وخشاتو ففمها) غانزل وديك مرات خالو لقالت شي كلمة غانصدق مقوداها معاااها

رنيم: وأنا نجي نعاونك هههه

غزلان:هههه الله يدوز هاد الليلة على خير وصاف

تمتمو بآمين ونزلات أسماء عند لعيالات ولبنات كملو توجاد لعشا حيت غايتسربى داابا.. كان كلشي هو هداك ورحيل واقفة على شغالهاا بيديهاا.. ودراري كايسربيو الرجاال ولبنات لعيالات.. تعشااو النااس وكلاو وتجمعو لمواعن وتحط الديسير وغير كلاو ناضت رحيل باش تعمر أتاي ويحطو لحلوى البلدية..

رحيل:(سيفطات مساج لنوح) 📩 "واخا طلع عندي لطبقة لوسطانية؟"

مكملاتش خمسة الدقايق سمعات صوتو كيعيط ليهاا... خرجات عندو ولقاتو واقف حدا باب الطبقة وقال مكمش حجبانو:مالك بيك شي حاجة؟

رحيل:(شدات يديه وجراتو لكوزينة وقالت تادلع) بغيت تعمر ليا أتااي نتاا تاتعرف ليه

نوح:(هز حاجبو وشدها من خصرها) ممحتاجاانيش فحاجة خرى

رحيل:(ضحكات بخجل)نوح دابا يجي شي حد

نوح:(كمش حجبانو بجدية وقال بصوت حرش)راك مرتي الشريفة وتاحد مايسالني شي حاجة

نزل جمع ليها شفتها ببوسة قاااصحة وبعد عليها تيوجد البرارد لي غايعمر وهي مشات تاتستف الحلوى..

عمر ربعة دلبرارد قدهوم قد السخط وحطهوم فالصينية..وضار شاف فيها هي لي ستفات زوج طباسل دلحلوى والفاكية

نوح:(بجدية) هادشي مغاتقديش تهبطي تقيل

رحيل:انعيط لمحمد طه وريان

نوح:(هز صينية)أنا نهبط هادي

هبط لتحت وهي وراه بالطبسيل مدخلاتش بقات واقفة فالباب تارجع وخدا من عندها الطبسيل وهي طلع لفوق ومحمد طه تابعها ينزل ليها صينية دالنسا.. تجمعو على داك لكويس مكملين كلامهوم تاوصلات لوقيتة وناضو باش يتحركو..تسالمو بناتهوم وأسماء باقي لدابا عاطياهوم صوابهوم.. وصوت لهضرة كثيرة براا دالرجال مخلطة مع النساا

فاضيلة:(تحدرات جهة مت إسلام وقالت بهمس)اجي فين هو راجل رحيل ؟

م.إسلام:(تادوي بشوية) هاهو واقف مع عبااس

فاضيلة:(طلعاتو ونزلاتو) اتباركالله

مشاو الضياف ورحيل فاش عرفات مكاين تاشي راجل زولات زيفها ونطقات بتعب:ياربي شحال دلمواعن تابعيناا

أسماء:أنا نكمل مع لبنات غاتكوني عيتي (عنقاتها)شكراا ليك

رحيل:حماارة لاش تاتشكريني نتي راه ختي وهادشي لواجب ديالي الله يكمل عليكوم بلخير ويبعد عليكوم ولاد لحرام

كانو دراري منشورين عياو من التسخار وسيدرا نعسات فوق السداري تاتشخر.. قربات رحيل جهة نوح وجلسات جنبو وقالت بخفوت:علاش تعطلتي ليوم ياكما كاين باس؟

نوح:بيسان سخفات فالخدمة ومشيت لعندها داكشي علاش تعطلت

شهقات رحيل بصوت عالي تاشافو فيها كاملين ونطقات بخوف:هي بخير بعداا دابا يااك؟

نوح:(غمض عينيه) مزيانة دابا راه فالرياض

إدريس:ياك لباس؟

رحيل:غير بيسان ابابا سخفات فالخدمة (شافت فنوح) بالسيف وهي مسكينة مكتجلسش خصوصاً هاد السيماانة عطات الجهد

كان ريان جالس تايسمع مكمش حجباانو وكيرعد فرجليه.. كان حاس بلي واقعة ليها شي حاجة حيت غبورها جااه عجب وهي مولفة تاتعلمو.. ناض من بلاصتو طالع لفوق باغي يهضر معاهاا.. جبد تلفونو وصونى عليها ولقى تلفونها باقي طافي.. تهول عليها وفهاد اللحظة باغي يشوفهاا وربي كبير.. نزل لتحت وتلاقى برحيل لي شافت فيه مكمشة حجبانها:مالك

ريان:غانمشي لريااض نشوف بيسان

رحيل:(خرجات عينيها وجراتو جهة الباب دبرا)واش هبلتي باغي نووح يعرف اش بينك وبينها باااش ترون

ريان:(مخرج عينيه) والاعرف گااع اش غايوقع أنا باغيهاا ومكنتفلااش عليها

رحيل:(مخرجة عينيها تاهي) ولاباغيها قصد باب دارهوم نتا معارفش لاسااق لخباار اش غايطراا دنيا غاتقرب عليناا وأنا مباغاش مشاكيل ارياان

ريان:متخافيش أنا عارف اش كاندير ماتهزيش ليا لهم

رحيل:نتا غير تتخربق أنا راه خايفة عليك نتاا راك خويااا

ريان:وباغاني نبقاا جالس هاكا مربع يدي ارحيل راه قلت ليك نتي مادخليش حيت مباغيش نجيب ليك لمشاكيل

رحيل:غاتكمش وراك سمعتي كلشي على ودنيك

سكت ريان وهو مخنزر ومعصب ورحيل تاتشوف فيه عارفة بلي هو ملي كيتعصب فهادشي كايعني بلي شي حاجة كبيرة واقعة مع هو مولف الضحك وتقشااب ولكن فالمواقف الجدية كيقلب الڤيستة تامكتبقاش عارفو شكون..

رحيل:(تنهدات)دير فبالك لاوقع شي مشكيل أنا غانعرف نحلو لرااسي

تسمع صوت نوح لي نطق وهو واقف تايشوف فرحيل بشوفات فشكل وبصوت قاصح نطق:اشمن مشكيل؟؟

ضارو بزوج بيهوم وهوما كيشوفو فنوح لي واقف عليهوم بدوك الشوفات القاصحين وعينو فقلب عين رحيل لي كانت الخلعة شداهاا والخوف من أنه يكون سمع كلامهوم ويكون عرف بعلاقة ريان وبيسان ركبها.. سرطات ريقها ورجعات شافت فرياان لي كان ناوي يدوي ويقول اش كاين وربي كبير.. هو مخايفش ومستاعد يتقبل أي كلام وأي تصرف من نوح.. قرب جهة نوح ناوي يدوي وهي تشدو رحيل وشافت فيه مخرجة عينيها:صافي اريان نتا سير أناا جاياا

ريان:(شاف فيها)رحييييييل

رحيل:دوووويت طلع

زفر النفس ومشى وهو محاملش راسو ومحاملش يكون سبب فمشكيل ختو مع راجلها.. أما رحيل فكانت تاتشوف فنوح لي مربع يديه كيتسناها تدوي.. تصرفها وكلامها مع ريان جاب ليه الشك..

نوح:(بجدة وصوت خافت وقاصح) اشنو مخبية عليا امدام؟

رحيل:(سرطات ريقها والخوف تمكن منها وحاولات ماأمكن تسيطر عليه قدامو) أنا ممخبية والو

نوح:(قرب جهتها وتحدر تاولى وجهو فاص مع وجهها)متأكدة حيت ماشي هادشي لي كيباان لياا

زيرات على يديها لي شاديين لعابية لي لابسة وهي تاتكب فيها داك التوثر لي كاتحس بيه.. هي مباغاش تخبي عليه شي حاجة ولكن مغاتقدرش تقول ليه شنو كااين حيت الموضوع متعلق بخوها وهي يستحيل تخيب صورة خوهاا قدام نوح وهي عارفاه مغايعجبووش الحال نهار يعرف بعلاقة ختو بيسان مع ريان..

رحيل:(بجدية) إلا كانت شي حاجة تتخصني فتيق بيا نتا أول واحد غاتعرف بيها ولكن الموضوع كيخص ريان عندو واحد لمشكيل وماباغيش يعرفو تاشي حد من العائلة خصوصا بابا ويشطنو معاه وقالها ليا أنا باغي نعاونو هادشي لي كااين (شافت فيه بنظرة خاطفة)تيق بيا

كلامها خلاه يقتانع نوعاً ما ولكن واخا هاكاك شك بلي كاينة شي حاجة مخبياه عليه بسباب خوفها لي باين فوجها

نوح:(شاف فيها بهدوء ونبرتو جادة)لكان هاكا واخا ولكن ارحييل ديري فباالك بلي مغايعجبنيش لحاال لاسقت الخبار بلي نتي مخبية عليا شي حاجة كاتخصك نتي مرتي وأناا عندي لحق نعرف قبل من أي واحد ومانبغيش نسمع شي حاجة عليك من لبراني حيت ديك السااعة تصرفي مغايعجبكش

رحيل:(حركات راسها بخوف) واخاا

نوح:(شاف فساعتو) خلينا نمشيو راه مشى لحال

رحيل:واحد شوية ونتحركو غانمشي دابا نعاون لبنات حيت الدنيا مرونة

نوح:ماتعطليش بزااف

رجع لداخل وهي بقات واقفة بلاصتها وتأنيب الضمير بدا كيزورهاا.. حاسة براسها واقفة بين نارين بين خوها وراجلها.. ماتقدرش تقول ليه شنو كااين حيت غاتنوض مشكيل بين العائلات بزوج.. طلعات لفوق وهي معصبة وسيفطات لريان يتبعها..

كانت غادة جايا فبيتها تاتحل لباب ودخل ريان وهي غير شافتو جراتو وسدات لباب وقالت بجدية: سمع اريان نتا خويا ولكن هادشي لي كادير فيه معاجبنيش على شوية كان نوح غايعرف كلشي وديك الساعة غاتشوف لمشكيل لي غاينوض والزمر لي غايطرى

ريان:(شاف فيها وقال بجدية مماثلة) وعند بالك أنا مباغيش لحل راه علاقتي ببيسان ماشي نزوة ولاتصاحيب وصاف أنا باغيها لمعقول

رحيل:ولابغيتيها لمعقول علاش ماهضرتيش مع بابا يخطبها ليك

ريان:خص هي توافق ماشي نهز لعائلة ونمشي وأنا معارفش واش بغاني ولا لا راه ماشي غير تسمعيني بلي كاندوي معاها يسحاب ليك كاين داك تخربيق لي تاتكون فالمصاحبة راه كاندويو عادي بحاال صحااب ولابغيتي نوريك لهضرة نوريها لك عمري غلطت معااها فشي كلمة حيت ديك بنت النااس باغيهاا (مسح على وجهو ورجع شاف فيهاا بجدية) تيقي بيا نهار نحس بيها تاهي بغاني أول حاجة غاندير هي غانمشي لعند خوها ونطلب يديها لزواج ولكن خصني نتأكد ارحيل نتأكد هو لول

سكتات رحيل تاتسمع لكلامو ومغاتكدبش لاقالت ماتيقاتوش حيت تيقاتو وعارفة خوها لاقال باغيها يعني باغيها ولكن بيسان معرفاش هي مشاعرها وماتقدرش تحكم عليها وهي معرفاش السيدة فاش تتفكر..

ريان:(حط يديه على كتفهاا باسها فراسها ونطق بصدق)تيقيني ارحيل أخر حاجة نبغيها هي نكون سباب مشاكيلك مع نوح نتي خوي دماغك من هادشي واخا وفكري غير فراجلك وحياتك معااه ولاجاب الله وقع شي مشكيل أنا قاد عليه نتي رجعي لور وأنا غانتحمل مسؤوليتي..

مجمعين البنات فالكوزينة وكل وحدة شنو كادير دخلات عندهوم رحيل لي شمرات تاهي على دراعها معاوناهوم..

أسماء:نسيت ماقلتش ليكوم بلي مغانديرش خطبة البنات

شافو فيها بتفاجأ ونطقات رحيل بتساؤل:علاش؟

أسماء:مابغيتش داكشي فيه غير الروينة والصداع ومع عائلتو كبيرة غير غانزيد تمارة علينا

رنيم:واهي عائلتو كبيرة وكلها غاتبغي تحضر شوفي غير دابا شحال جاو

غزلان:ولكن ضروري ديري لخطبة اأسماء واخا غير بناتنا

أسماء:لا لا أنا عارفة ديك بناتنا بشحال غاتقام علينا هوما فاش غايعرفو راه غايجيو وأكيد هو مغايقول والو بحال دابا راه كان عوال غير على خالو وخوتو صدقو جاو لخرين معاهوم

رحيل:اييه الامكانتش الخطبة هي غاديرو عرس كبير؟

أسماء:وي هادشي لي قلت صراحة ندير عرس نجمع فيه كلشي ونهني مخي دابا راه إسلام غايدوي مع بابا ويتافقو حيت قال ليا مغاديش نعطلوه بيما أنه مغاتكونش خطبة

رنيم:ديروه نتي وغزلان فنفس النهار اش بان ليكوم؟

غزلان:(بتفاجأ)لا لا مغاديش ندير عرس أنا غاندير غير حفلة خفيفة وصاف

رحيل:واهي لاجيتي تشوفي رنيم عندها الحق جمعو عرسكوم بزوح فنهار واحد ونيت نتهناو دقة وحدة

أسماء:لابغا محمد طه وغزلان مرحبا أنا ماعنديش مشكيل والله

غزلان:لا البناات ويلي ديري عرسك اصاحبتي وفرحي لراسك

أسماء:وعلاش نتي مغاتفرحيش فعرسك هبيلة وعرفتي لهضرة ماشي معاك غانزل لعند بابا ونقولها ليه

نزلات أسماء وغزلان تاتعيط ليها وتابعاها ولبنات تاهوما نزلو كاملين لتحت.. كانو جالسين مجمعين إدريس ونوح لي كايتسنى رحيل باش يتحركو..

أسماء:(تبسمات بهدوء وحشمات حيت نوح كاين ولكن ضروري ماتهضر)بابا عرفتي اخر الأخبار؟

إدريس:لا ابنتي شنو كاين

أسماء:تافقت مع إسلام بلي غانديرو عرس بلاخطبة بلاوالو

إدريس:علاش مباغاش ابنتي لخطبة؟

أسماء:بغيت نجمع كلشي دقة وحدة بحال كيف دارت رحيل وراه إسلام غايهضر معاك تافقو نتا ويااه ابابا على هادشي وتكلف نتا

إدريس:لي بغيتي ابنتي المهم عندي هو راحتك ولي بغيتي ديريه

أسماء:يخليك ليا ابابا احم وقلت مع راسي بيما أنني غاندير عرس فالقاعة علاش مانجمعش عرسي أنا ومحمد طه ونديروه دقة وحدة

محمد طه:(شاف فغزلان ورجع شاف فيها) مكاين لاش غزلان مباغاش دير عرس

أسماء:(فقصوها وكانت باغا تعرعر ساعة باها ونوح محترماهوم وقالت بضحك)غزلان موافقة بقيتي غير نتا توافق

كلام أسماء كان بحسن نية حيت هي عارفة غزلان غاتقصح راسها ومغاتبغيش دير لعرس وفاش اقتارحات رنيم الفكرة عجباتها وهي عندها عادي جدا وعجباتها الفكرة داكشي علاش قالت كلامها لمحمد طه لي فهمو عوح ولي عصبو خصوصاً أنه مدازش مدة طويلة على سؤالو ليها على نفس الموضوع وهي رفضات ودابا وافقات.. علاش ؟ معصب حيت كيشوفها تاتسمع لهضرة من عند لغير وهو فاش تيدوي معاها مكتعبروش ومتتعطيهش قيمة واعتباار..

محمد طه:(زير على يديه وقال بهدوء عكس العاصفة لي نايضة عندو لداخل)لي بغيتو ماعنديش مشكيل

أسماء:(فرحات) صافي مزيان

إدريس: إسلام فخبارو؟

رحيل:لا يالاه اقتارحات رنيم هاد لفكرة عليها

إدريس:(شاف فأسماء بجدية)اوا علميه ابنتي هو لول راه يقدر مايبغيش

أسماء:لا غايبغي غير تهنى ابابا

نوح:(شاف فإدريس بهدوء)سي إدريس الله يهنيك

إدريس:باتو عندنا اليوم

نوح:مرة خرى إن شاء الله

تحدر هز سيدرا لي كانت تاتشخر وحالة فمهاا وشاف فرحيل بمعنى يالاه.. ودعهوم ومشاو ومحمد طه طلع لبيتو وهو محاملش يبقا مزال ويشوف فيها حيت معصب منهاا.. ولاجاب الله هضرات غايتفرگع عليها وخصوصاً أعصابو دابا على شفى الإنهيار.. طلع لبيتو وسد لباب ومشى نيشان جهة الشرجم تايطل مخلي الريح يضرب فوجهو عالله يبردو..ويقدر ينسى شوية الفقصة لي شداه عليهاا..

عند أسماء لي دخلات تاهي لبيتها وجبدات تلفونها سيفطات مساج لإسلام فيه لغيب ديال لكونط باش يسيفط ليها صداقها وفنفس الوقت باغا يدوي معاها باش تعلمو بلي كاين.. مشات بدلات عليها ببيجامة خرى دالنعاس وغسلات سنانها وجات باش تنعس ولقات تلفونها فيه لزابيل ديالو.. يالاه بغات تعيط ليه وهو يصوني تاني وجوباتو بهدوء:ألو

إسلام:(كيتسمع الصداع عندو شوية)وي غزالي باقي مانعستي؟

أسماء:نو باقي عندك الصداع بزاف

إسلام:لاحقااش كلشي جاا يبات هنا من غير خويا ومرتو ولادو شدو طريق نيشان لكازا

أسماء:اه كنت باغا ندوي معاك فواحد لموضوع

إسلام:ياك لباس؟

أسماء:لباس لباس غير دويت مع بابا على لعرس وقال ليا نتفاهم معاك هو لول

إسلام:اه راه دويت مع الواليدة تاهي وقالت ليا لي بغات بنت الناس ديرو

أسماء:مهم أنا قلت بيما أن محمد طه وغزلان غايديرو العرس تاهو علاش مانجمعوش عرسنا معاهوم فنهار واحد؟؟

إسلام:(حك وجهو ونطق بهدوء) ماعرفتش

أسماء:هوما أصلا ماعندهومش عائلة بزاف وغزلان راه عارف واليديها ميتين مسكينة عليها بغيت نديرو عرس بزوج ونيت العائلة تفرح ليها تاهي

إسلام:(قنعاتو بكلامها وتبسم بهدوء)غزالي طلعتي حنينة

أسماء:(ميقات ونطقات بتبعكيك) أصلا أنا ضريفة نتا مكتعرفنيش

إسلام:دابا نعرفوووك نيت مابقا قد مافاات وديك الساعة كلام خر

أسماء:(ضحكات بالجهد فاش فهمات كلامو) اوا تال تما ويحن مولانا

إسلام:زيدي اغزالي تقلي لحسااب راه مانسيتش ليك فعايلك معايا وداك لكلام لي كنتي تاتقوليه

أسماء:اوا نتا مكنتيش تاتسرط ليا

إسلام:(بخبث) ودابا كانتسرط

أسماء:واحل فلقرجوطة ههههههه سير خليني نعس راه عييت غدا وسيفط ليا رزقي نمشي نتسخر من دابا وهضر نتا وبابا تافقو بناتكوم على لعرس وشنو غاديرو فيه

إسلام:(ضحك من كلام ونطق بحنية)واخا ردي لبال لراسك اغزالي تانشوفك

قطعات معاه وهي مبسمة وحاسة بالفرحة.. ممتيقاش بلي هي غاتزوج بإسلام الشخص لي مكانتش تاتعرفو گااع وكون ماالمشكيل لي جمعو مع عائلتها مكانتش گاع غاتعرف عليه وتشبك بناتهوم باش فاللخر يتزوجو..أما عند إسلام فمغاينكرش الراحة لي حس بيها دابا.. كان ديما متخوف من الزواج ورافضو ومباغيش ديك التجربة تعاود ولكن دابا هو باغي غير وقتاش يتزوج بيها وتولي مرتو.. تنهد وهو غادي ينعس ففراسو ونطق بخفوت:اياي اغزاالي اش درتي فياا..

----

هضر إسلام مع مو وعلمها باقتراح أسماء باش يديرو عرس مع ومحمد طه مجموعين وهي مقالت والو وأصلا هي ماشي من النوع لي تايتحكم ومسالمة وأهم حاجة عندها ولدها قبل يتزوج مرة خرى.. وتاهو رأي مو مهم بزاف وهي لي بقات ليه وعزيزة عليه ومباغيش يدير شي حاجة بلامايشاورها.. اتافقو هو وإدريس ومحمد طه على لعرس وشنو غايديرو فيه والناس لي غايعلمو أما لقاعة فضروري مايكونو البنات حاضرات باش تاهوما يعطيو رأيهوم حيت عرسهوم..

كانت واقفة رحيل فالدريسينغ وسيدرا غادة جايا عليهاا وتاتعاود ليها على نهارها لي دوزات فالمحال مع جدها

سيدرا:عرفتي مامي صاوبنا طوموبيل أنا وبّاديدي وخدمات

رحيل:اييه هي دابا تاتعرفي تصاوبي طوموبيلات

سيدرا:(ببرائة تاتحرك راسها)غير شوية.. مامي شنو تاديري علاش تاتجمعي حويجات

رحيل:تانخمل امامي ونقي هناا با مايتغبرش

سيدرا:(طلات عليها براسها تاتسبل عويناتها)نعاونك؟

رحيل:هاكي خرجي هاد لحوايج وحطيهوم فوق النموسية

نفدات طلبها ورحيل خوات گاع جهتها وجابت مشوار نقي دارتو فلما وبدات تاتمسح دوك الرفوف وهي واقفة فوق كرسي.. مسحات كلشي وخلات داكشي ينشف باش ترجع ليه لحوايج.. سيدرا بقات معاها شوية وفاش ملات مشات لبيتها تاني تلعب..

رجعات لبيت وبدات تاتهز حوايجها وأغلبية باقي بتيكي ملابساهش.. رجعات تاتستف كلشي تاسلات ودازت لبلاصة نوح.. عينيها على لكوستومات ديالو لي مستفين وسراول توب ولشوميز كلهوم الوان غامقة.. بدات تاني تاتهز على سعدها وعدها باش تنِطواي تابلاصتو.. انغامسات فخدمتها وبدات تاضور فدريسينغ غير ببيجامة قصيرة وشعرها جامعاه بقراصة ودايرة ليزيات مونسة بيهوم.. خدات كرسي وقداتو باش توقف عليه وتمسح الرف لفوقاني وهي تحس بشي حاجة بحال لكتاب.. جراتو ومع كان تقيل طاح ليها الأرض وهي خرجات عينيها ونزلات بزرية تاتشوف فداك لألبوم ديال التصاور.. كان محلول على نص ومع هزاتو عينيها لمحات تصويرة طايحة الأرض على وجهها وغاتكون طاحت منو.. هزاتها وقلباتها وعينيها لحضرين مركزين فدوك زوج أشخاص لي كان واحد منهوم نوح لي كان تيبان صغير بزاف وغايكون تقريبا فعمر زين العابدين.. كان ضاحك تاعينيه تسدو ومبقاوش تيبانو ويديه كان معنق بيها شخص آخر لي كان تيبان كبير عليه بسنوات وملامحو تيشبهو ملامح رحمة وشعرو شهب تاهو ضاحك لكاميرة.. كان تيبان فيهوم فرحانين والضحكة طالعة من لقلب.. بقات تاتشوف فالتصويرة وهي تاتسأل شكون هادا لي معاه؟ كانت ساهية لدرجة محساش بنوح لي دخل لعندها وعينو عليها.. وقف جنبها ونزل عينو لديك التصويرة لي بين يديها وهي غير حسات بأنفاسو ضارت عندو بزربة مخلوعة على لفغلة لي غفلها..

رحيل:(بخفوت)أنا كنت تانقاد بلاصة حوايجك وطاح هادا من لفوق (شافت فالتصويرة ورجعات شافت فيه)شكون هادا لي معاك؟

نوح:(نظراتو متعلقين فالتصويرة وبنبرة غريبة نطق) ناصر (شاف فيها) خويا لكبير

خرجات عينيها بعدم تصديق وهي كاتشوف فملامح وجهو لهادية.. بحال لاكبيتي عليها سطل دلما باارد خلاها تجمد وكلامو تيتعاود فودنيها "خويا لكبير" واش هو عندو خووه إذا فين هوو؟؟ وعلاش عمرهوم هضرو عليه وجبدوه فحديثهوم؟؟

مد نوح يديه وخدا من بين يديها داك الألبوم وخرج من الدريسينغ مخليها واقغة بلاصتها وهي باقي كتحاول تسرط داكشي لي سمعات من عندو.. نزلات تاني عينيها كاتشوف فوجه الشخص وهي تادقق فملامحو وتاتفليهوم نيت.. كاين شبه بينو وبين نوح غير هو لاخر عينيه مازرقينش بحال نوح وبيسان ورؤوف كانو قهويين.. خرجات من الدريسينغ وعينيها جات على نوح لي جالس فوق النموسية وكان حال داك الألبوم كيشوف فيه بهدوء.. واحد لهدوء غريب دخل ليها الشك.. مشات جلسات جنبو ونزلات شوفتها لداك الألبوم وبالضبط لديك التصويرة لي كان تيشوف فيها نوح.. صورة العائلة ديالو.. كانت جالسة رحمة فواحد الفوطوي وهي لابسة واحد لقميص وشعرها مجموع كانت ضاحكة وهي هازة واحد تريبية بين يديها وفجنبها جالس راجل ملامحو حرشين وكيبان فيه قاصح من الشوفة تيشبه لجدو لحسن بزااف وفيه شوية من نوح.. حاط يدو على كتف رحمة ويادوب مبسم تبسيمة خفيفة ومجلس فوق حجرو بنت صغيرة عندها عماين طالقة شعرها لقصير ولابسة كسيوة بيضا وكاتبكي.. فجنب رحمة كاان جالس نفس الشخص لي مصور مع نوح "ناصر" كان صغير فهاد لافوطو مبسم تاهو وجنب الراجل لكبير كان جالس نوح لي كان كبر من سيدرا بشي أعوام هاز حجبانو وضارب تاهو الطم بحال باه.. عينيها سهاو فديك لفوطو كاتشوف فلوجوه لي فيها..

نوح:(بصوت غارق نطق وهو حاط صبعو على داك الراجل)هذا الحاج إسماعيل الواليد الله يرحمو وهادي يمّا هازة رؤوف (حط صبعو على وجه خوه وحركو بهدوء)وهذا ناصر

كانت تاتسمع ليه رحيل ونبرة صوتو كانت غريبة وعمرو هضر بهاد النبرة لي خلاتها تهز عينيها وهي تاتشوف ملامح وجهو لي كان عاطيها بالجنب وماقدراتش تدقق فيهوم ولكن عقلها أوطوماتيكمو فكرها بنهار تضرب بالموس فاش طااح فيديها خاتمو لي كايلبس ديما.. كان الخاتم فيه سمية "ناصر" زعمة يكون خاتموو.. نزلات عينيها جهة يديه ليسرية تاتشوف فصبعو لي فيه لخاتم ونطقات بصوت خافت:وفين هو؟

كلامها خلاه يطلق تنهيدة طالعة من أعماقو وعينو تسهى فوجه خوه وعقلو مشى بعيد..

🔙🔙

بدجين مرخزف وتيشورت بيضاا كان واقف قدام محال دمول النقرة لي كان صغير ومن ديكورو تيبان فيه قديم ودايز عليه سنوات طويلة.. دخل لداك لمحال الصغير وغير شافو مول المحال وهو يضحك ببشاشة وزول نضاضرو لي على عينيه وقال بضحك:امرحبا بالگاوري ديالنا

تبسم ليه نوح تاتسدو عينيه ونطق بضحك:الله يكبر بيك الحاج أمدرا الأمانة ديالي وجداات؟

م.لمحال:واجدة وكاتسناك تجي ليها (تحدر جهة لڤيترينة دالزاج لي عندو وجبد بواطة كحلة وحطها فوق لڤيترينة ونطق ببشاشة)هانتا شوف ليا واش داكشي كيف بغيتيه

مد نوح يديه وحل لبواطة وعينو كيشوفو الخاتم دالنقرة الرجولي لي كان فيه نقوش وجوهارة فالوهلة لولة تتبان كحلة ولكن فاش تاتنعاكس كيبان لونها الزرق وسمية لي محفورة فيها "ناصر" تبسم نوح حيت كيف طلب منو خرج لخاتم وهز عينو فيه ضاحك: وامخيير گااع (جبد من جيبو لفلوس وخلصو) شكرا الحااج وتهلا فرااسك

م.لمحال:تهلا تانتا وماتغبرش وسلم ليا على لحاج إسماعيل

نوح:مرحبا بسلامك

خرج من لمحال وهو غادي فالدروبة ديال مراكش وعينو على الرواج لي كاين تم.. وصل لشارع وشد طاكسي غادي لريااض وكل مرة يشوف فالبواطة دلخاتم ويضحك بوحدو.. وصل لحومة ونزل نيشان لدار ومع حل لباب سمع صوت لغوات درؤوف.. كمش حجبانو وقرب لعند الصالة فين كانت جالسة مو كيف عادتها بلبدي وشعر كيتسرسب ورى ضهرها... شافتو وهي تبسم وقربات جهتو:المرضي ديالي فين كنتي؟

نوح:(شاف فرؤوف بملل)واش هاد لبرهوش غايبقا غير يبكي

رحمة:واخوك صغير اولدي

نوح:اشمن صغير راه لبراهش قدو تايلعبو لكورة فلحومة ونتي مفششاه راه ايمّا غاتخرجي عليه

رحمة:(بعدم اهتمام) غير خليه يتفشش باقي صغير

حرك نوح راسو وتخطاها طالع لفوق حيت عارف واخا يقول لي قال تادير لي فراسها ورؤوف مفششاه.. طلع لفوق وبانت ليه بيسان ببيجامتها لبنوتية جايا لعندو لابسة نضاضر دالشوف.. تبسم ليها وتاهي تبسمات بخجل ليه.. كانت عكس رؤوف كالم ودرويشة مكتسوق لوالو من غير قرايتهاا..

نوح:(باسها فحنكها)فين كنتي

بيسان:(بصوت حشمان)سقيت لوريدات اخويا لي فالسطح

خربق ليها نوح شعرها وهي غادة بينما هو كمل طريقو تاوصل قدام باب بيت خوه.. دق زوج دقات وماسمعش لحس ودخل وعينو كيقلبو عليه.. وفاش ماسمعش حسو عرفو مكاينش يالاه نوى يخرج وهو يتلاقى بيه داخل.. حريفاتو الشهبين بانت فيهوم الفرحة فاش شاف نوح لي نطق بضحك:فين كنتي داايع ابّا ناصر

ناصر:(بصوت عيان نطق وهو داخل)كنت دايع فالمحال مع باك

تبعو نوح ولقاه تيزول فلاشوميز ونطق بجدية:مابقا قدما فات ونجي نهز معاك لحمل وماتبقاش وحدك (جبد من جيبو لبواطة ومدها ليه بتبسيمة حنينة) عيد ميلاد سعيد اخويا...

حل ناصر عينيه وفمو وهو كيشوف فلبواطة بعدم تصديق وكلام نوح فكرو بلي ليوم عيد ميلادو لي كان نساه مع الخدمة وتمارة لي ضرب ليوم مشى من بالو.. ضحك ناصر وجرو عندو معنقو وتانوح تايعنق فيه عنااق رجولي أخوي.. بقاو مدة معانقين تابعد ناصر تايمسح عينيه عاد هز لبواطة وحلها ولقى داك لخاتم لي عجبو بزااف.. لبسو ورجع شاف فنوح وقال بحنية:عمرو غايتحيد من صبعي

نوح:(قرب جهتو وهز ليه يديه مضورها جهة الشعى لي داخل من الشرجم وقال بتبسيمة) قرا ليا اش تم ههه

عاد انتابه ناصر لسميتو لي كانت محفورة تم مع مكيبانش من غير لاحركتيه وبان لون الجوهارة.. درعو ناصر وشاف فيه بضحك:اوا مبقا والو وتسالي لعطلة وتهز تاني بكاجك

نوح:(حك شعرو)وي مبقا والو

ناصر:قبل مانسى مقلتيش لخوك مبرووك ههه

نوح:(كمش حجبانو)مبروك علياااش؟

ناصر:(ضحك بفرحة وراحة)صااافي خوك راه نوى يكمل دينوو

نوح:(هز حواجبو ممتيقش)حلف ههههه ماتقولش ليا ديك لبنت نيت لي عاودتي ليا عليهاا؟؟

ناصر:هي اولد بويا ومي (تنهد) هي لي دات قلب خوووك هههه

نوح:(عنقو تاني) الله يكمل عليكوم بالخير وفرحاان حيت غاتزوج بيهاا

ناصر:(غمزو)عقبااالك تانتا

نوح:(حرك راسو)همم نخليك تحمحم نمشي نجلس شوية مع يمّا

خرج نوح وناصر هز حوايجو من لبلاكار باش يدوش وهو يسمع تلفونو كيصوني.. غير شاف النمرة وهو يتبسم تابانت غمازتو لي فحنكو وجاوبها بصوت حنين:لكبيدة ديالي

...(بصوت خافت حشمان)لباس عليك

ناصر:ملي سمعت صوت الكبيدة وليت أنفورم ازين ديالي

تبسم فاش سمع ضحكاتها الخجولة ولي خلاتو تاهو يضحك ونطق بخفوت:ليوم غاندوي مع لحاج علينا وإن شاء الله نجيو عندكوم باش نخطبوك رسمي (مجاوباتوش ولكن صوت أنفاسها كانو كافين يخليوه يرتااح وكمل هضرتو بحب) نخليك دابا وردي بال لتلفونك باشما كان غانعلمك

قطع معاها ومشى يدوش وهو كيتسنى غير وقتاش يجي لوقت لي يرجع باه باش يفاتحو فالموضوع.. وصل الليل واتجمعو كاملين على لعشا بحضور الحاج إسماعيل لي فاش تيكون كلشي كيضرب طم عندو هيبة خطيرة وقااصح شوية عكس باه لحاج لحسن.. تعشاو وناضت رحمة دات رؤوف ينعس حيت مولفة كاتنعسو هي واخا راه يقدر ينعس لراسو مي خرجات عليه ومع هو آخر العنقود كملات.. بقاو غير هوما بتلاتة الحاج إسماعيل ونوح وناصر لي هو ونوح تايهضرو غير بلعينين..

ح.إسماعيل:(بصوت قوي وجه كلامو لنوح)وقتااش غاترجع لسويسرا

نوح:(ربع يديه وقال باحترام) ملي غاتقرب القرايا تبدا بواحد السيمانة الحاج

ح.إسماعيل:(حرك راسو وقال بجدية) دير فبالك غير غتسالي قرايتك تم غاترجع لبلادك الله يرضي على ولدي

حرك ليه نوح راسو باحترام وناض باس ليه راسو ورجع جلس بينما ناصر بقا تيحك فيديه وبصوت هادئ قال:الحاج باغي ندوي معاك فواحد الموضوع؟

ح.إسماعيل:ياك لباس؟

ناصر:كل خير الحاج أنا ناوي نكمل ديني وبغيتك تمشي معايا نتا والواليدة نخطبو بنت الناس من دارهوم

ح.إسماعيل:(شاف فيه بجدية)بنت من؟

ناصر:(توثر)هي بنت با سعيد شفتها معاه واحد لمرة فاش جا لعندنا لمحال وعجباتني وبانت ليا بنت الناس وتا باسعيد عارفينو داكشي علاش جيت ندوي معاك فهاد لموضوع

ح.إسماعيل:واخا دابا نشوف

ملامح ناصر لي كانو متوثرين ارتاحو وتبسمو وشاف فنوح لي غمزو بندالة وكان شاد الضحكة فاش شاف خوه الكبير متوثر بديك الطريقة.. كملو جلستهوم مع باهوم لي ناض يمشي ينعس وبقاو لخوت بزوج الراس فالراس..

نوح:(ضحك)ههه واكون شفتي وجهك ونتا تادوي معاه كيف كنتي هههه مايمكنش

ناصر:(ضربو بالمخدة)تاضحك على خوك لكبير واعقل عليها تاتجي نوبتك ونشوفو اش غادير معاه (هز فيه حاجبو) نفكرررررك

نوح:(جمع الضحكة وقال بهدوء) صافي هنينا تانتاا وزايدون الهضرة عليك نتا اجي ماقلتيش الحاج شكوون فيهوم لايمشي يخطب ليك شي وحدة من خوتاتها ههه

ناصر:ماتخممش هي لي باقا بلازواج فدار باها وخوتاتها بتلاتة مزوجات

نوح:ولكااان هاكا مزيااان

ناصر:تسنى نصوني ليهاا (دوز ليها لابيل مدة تجاوباتو بخفوت) ألو ناصر

ناصر:(نطق بتبسيمة)زين دناصر راه دويت مع الحاج وراه غايهضر مع باك وجدي لياا راسك

ضحكات بخفوت ونطقات بصوت فرحان:فرحانة بزاف والله ياربي تكمل لينا على خير ياربي

ناصر: آمين يالاه نخليك دابا وردي ليا لبااال لراسك انور الهدى

ساقو لعائلة خبار بلي ناصر غايتزوج وفرحات رحمة وعائلتها ونفس الشي عند عائلة لحاج إسماعيل.. كان هضر الحاج مع بات البنت بحكم تايعرفو وتافقو يمشيو عندهوم باش يطلبوها.. مشاو غير الناس الكبار منهوم الحاج إسماعيل ورحمة والحاج لحسن وزاينة وناصر ونوح طبعا لي مايقدرش مايمشيش مع خوه..وصلو لحي لي كان شعبي ونزلو منزلين كرطونة دالسكاار وداكشي لي جايبين ودخلو لدار لعائلة لي رحبو بيهوم.. الجلسة دازت زوينة وتعارفو العائلة بزوج وجا وقيتة يشوفو لعروسة لي دخلات بقميص عادي ولابسة زيف وملامحها السود زوينين وتتبان حشومية.. جلسات جنب رحمة لي تاتشوف فيها بتبسيمة فرحانة لولدها البكر لي غايتزوج ومغاتنكرش بلي عجباتها لبنت.. أما ناصر ملي دخلات وهو حاضيها وكيتفكر أول مرة شافها فالمحال مع باها دخلات قلبو بلامايحس ومع كانت تاتجي مع باها كل مرة شافها تايبغي يدوي معاها ولكن تيخاف من ردة فعلها تانهار زعم وجاها نيشان وطلب منها تعطيه نمرتها ساعة مكانش عندها تلفون.. شرى ليها تلفون ونهار جات مع باها عطاه ليها بتخبية ومن تما وهو كيهضر معاها وكيزيد يطيح فغرامهاا وليوم هاهو جالس فصالتهوم تيقراو الفاتحة.. مكانش غير ناصر لي فرحان إنما تانوح مشاركو فرحتو حيت هو على علم بكل شي..

جالسين فصالة بوحدهوم وهي كانت غاتخشى فوسط السداري بقوة الحشمة..

ناصر:نور الهدى شوفي فياا

هزات عينيها لي كانو كحلين بحال الليل تاتشوف فيه مكانت دايرة تانقطة دلمكياج طبيعية وزينها هو لي طيحو النهار لول..قرب جهتها وجلس جنبها شاد يديها ونطق بصوت صادق:من نهار شفتك فالمحال وأنا كانتسنى هاد النهار يوصل وتكوني فيه حلالي وأم ولادي.. ربي شاهد على بلاصتك فقلبي وبلي كانتسنى غير وقتااش نتكاتبو ونديك لداري ونخبيك فقلبي مايشوفك تاشي رعواني..(باسها فيديها تاترعدات حشمانة) نعطي عاهد الله بلي عمر الدمعة تنزل من عينيك بسبابي وبلي غانخليك فرحاانة حياتك كلهاا وأي حاجة بغيتيهاا غانجيبهاا ليك ومانخليك مخصوصة من والو(تبسم ونطق بضحك)قولي شي حاجة وسمعيني صوتك واش نتي فرحانة

نور الهدى:(تغرغرو عينيها بالدموع وقالت بخفوت) بزاف اناصر فرحتي مانقدرش نوصفها كنت كل ليلة ندعي ربي يجمعني بيك وهاربي حقق ليا دعوتي

ناصر:(باسها فيديها مرة خرى)الله يخليك انور عيني

فالصالة كان نوح جالس تيسمع لكلام الرجال ومبسم بشوية كلما تفكر ضحكة خوه وفرحتو.. سمع تلفونو ڤيبرى ولقاه مساج غير قراه تكمشو حجبانو ورجعو لجيبو.. دازت مدة ورجعات نور الهدي هي وناصر وكملو كلامهم واتافقو على العقد يكون فهاد الشهر حيت نوح غايرجع لسويسرا وغاتبدا لقرايا وهو باغي يحضر لخوه.. ودعهوم وخرجو راكبين فالطوموبيلات خارجين من لحومة تحت نظرات شخص لي كان واقف مكمش عينو وشاف جهة صاحبو ونطق بنبرة مبحوحة بلگاارو:شكوون هادوك لي خرجو من دار سعيد؟

صاحبو:لخطاب على مفخبااركش نور الهدي جاو فيها لخطاب

خرج لاخر عينيه وهز ديك القرعة دلماحيا ضرب بيها الارض تاتهرسات ونقزو لمشاش لي كانو تايضورو تما ورجع شاف فباب دارهوم وهو كولو تيترعد ونطق بصوت مبحوح وفمو خانز بالحشيش ولماحيا:بربي لاتزوجاات بشي قوو*د ياأناا يالموووت

---

حددو نهار العقد ورحمة وخوتاتها دايرين الواجب فشنو غايديو لعروسة كلشي كان محمس لعرس ناصر لي هو ونوح كيف لعادة دايرين الراس على بعض.. وصل ليوم لموعود عند ناصر ونور الهدي لي دايرين حفلة فدار لبنت حيت تما فين غايعقدو والعرس راه غايديرو لعريس.. كان كلشي مأنتك بلبدي ولعريس كيبان فرحان تقولي ليه السلام يقول تانبغيك.. شدو طريق لدار لعروسة وهاد لمرة مشات لعائلة نيت معاهوم ولحومة كلشي كيطل ويبرگگ كيف لعادة وعيوون حاقدة تاتشوف فناصر وهي ناوية على خزيت.. دخلو لعائلة كاملين لدار لي فيها عائلة لعروسة تاهوما فرحانين ومأنتكين بلبلدي تايرحبو بالعائلة وعاطينهوم صوابهوم.. جلسو فالصالة الكبيرة ونوح مامخليش خوه ناصر بحكم هو الوزير ديالو كل مرة يشد فيه وناصر يضحك ويتبسم ليه.. جا العدول وتكتب كتاب ناصر ونور الهدى وتطلقات زغاريت دلعيالات لي فرحانين.. وبداو تيباركو لعريس ولعيالات تيباركو لعروسة لي لابسة تكشيطتها ودايرة لكحول فعينيها لي برز جماليتهوم بحكم أول مرة غاديرو.. كلشي تيبارك ونوح تيصور اللحظاات تاجا لوقت لي غايدخل عندها باش يشوفها بحكم كتبو كتابهوم وهي جلسات عند النسا مدخلوهاش لعند الرجال يادوب لعدول لي دخل سولها.. ضرب على صدرو تيتأكد واش الخواتم عندو ساعة مالقاهومش تحدر عند نوح ونطق بهمس:لخواتم فين هوما؟

نوح:(كمش حجبانو)ياكما نسيتيهوم فالطوموبيل تسنى نمشي نجيبهوم

ناصر:لا غير خليك أنا نمشي

خرج ناصر لحومة لي كانت خاوية بحكم الليل وكلشي مخشي فدارو.. حل لباب ديال طوموبيلتو وبانو ليه لخوتم محطوطين فوق الباربريز هزهوم ومع سد الباب وضار تضرب مع واحد وقبل مايفقه حس بشي حاجة تخشات ليه فكرشو مخلياه يخرج عينو وصوت داك الشمكار لي همس ليه:نور الهدى ديالي ومايحلم بيها تاقو*د

خرج داك لموس وعاود ضربو لمرة الثانية والثالتة وبعد كيشوف فيه كيفاش طايح الأرض والقاميجة لبيضا ولات حمرا بدمو لي نزل ليه تامن فمو وطاح مجبد فالأرض ولاخر واقف تيشوف فيه بعينيه لحمرين ولموس بين يديه عامر بدم ناصر لي تغدر..

فلداخل كان نوح جالس تيشوف فساعتو وفاش بان ليه خوه تعطل قرر يمشي يشوفو بنفسوو.. خرج من الصالة غادي فجهة الباب ومع خرج عينو جات فداك المنظر لي كان صدمة ليه وخلى يديه يترعدو عليه.. خوه طاااايح فالأرض وغارق فدمو أو واحد واقف عليه وهاز لمووس لي تايقطر بالدم..

نوح:(غووت غوتة عااالية تاصوتو تبح)ناااااااااصر

غواتو وصل لعندهم لداخل وخلى كلشي مخلوع..أما هو تمشى بزربة وتحدر جهة نااصر ممسوقش لاخر لي ضربو ولي بدا تايرجع بلور وتيمسح لموس بحوايجو وخشاه عندو وهرب فاش شاف لقضية ترونات..

نوح:(حاط يديه على وجه خوه لي كيكحك الدم من فمو وعينو بدات كاتسد)ناااااصر شد راااااسك اخويااا شد راسسسك

كلشي تجمع عليهوم فديك الساع ورحمة طاحت مغيبة وصوت لغوات خلى نور الهدى تخرج تاهي بتكشيطتها ومع شاافت المنظر قلبهاا تهز ومشات تاتجري جهتو طاحت على ركابيها وهزااات راسو دايراه فحجرهاا وعينيها تايتسقطرو بالدموووع

ناصر:(بصوت ضعيف قال وهو تايحل عينو ويسدها)نور قلبي سم حيليا أناا

كحب الدم وكلشي تايشوف وشي يبكي شي مصدوم والحاج إسماعيل كيعيط لبوليس ولومبلونص يجيو يعتقو ولدو وعقلو غااايخرج..

ناصر:(سرط لمرارة فحلقو وقال بصوت خافت) وأخي را ولي تي حلا لي (شاف فنوح ونطق وهو صاف بدا كيغيب)هي أم انتك اخويا

غييب ليهوم ونور الهدى تاتغوووت وتحرك فيه وكلشي تجمع عليها والحيحة والناس تايشوفو وكلشي مصدوم كيفااش الفرح فلحظة تحول لقرح.. عينيهوم على لعريس لي كان طاايح وغارق فدمو والعروسة حاطة راسو على حجرها وتكشيتها كلها ولات عامرة بدمو واحد المنظر كيجيب التبوريشة.. نوح هز راسو وناض غادي كيجري باش يشد مول لفعلة قبل مايهرب.. كان تيجري ويضور راسو يمين وشمااال فلحومة تاخرج لشانطي وهو يقشعو هارب ومع لاخر سكران ومبوق كان مبطئ الحركة.. بدا نوح تيجري وراااه ونطق بصووووت عااالي:غاااااانشدك اولد لق*بة

لاخر غير سمع كلامو وضاار شافو تابعو وبدا كيجري.. كلشي تايشوف اش واقع تم ونوح بين عينو منظر خووه وهو فديك الحااالة وكلاموو وتيزيد يصعر باااغي يشدو ومايفلتتوش حيت لامشى تافلت صعيب يلقاوه.. وصل ليه وشدو شنق عليه ولاخر تايحاول يفلث.. شبكات بنااتهوم ولاخر فغفلة جبد لموس ناوي يهبط عليه ودفع نوح بالجهد تاجاا طااح على ضهرو فالأرض لي كانت مهرسة فيه واحد لقرعة دالزاااج.. ماتسوقش لرااسو وناااض واخا حس بضهرو تجرح ولكن هادشي ماهموش حيت لاخر غايهرب وهو خصو يشدو.. كيجري وكيعرج تابعو والناس تاحد مادخل وأصلا البشار قليل فديك الوقيتة.. بان ليه قطع لجهة لخرى وتاهو قطع بلاعقل وبلامايشوف فالشانطي والطوموبيل لي كانت جايا ومجات فين تحبس تكانت ضربات نووح بالجهد وطيحاتو فوق الشانطي طايح على ضهرو ومعاودش تحرك والناس تجمعات عليه..

🔜🔜

كانو دموعها نازلين كيف الشتاا وهي تاتسمع ليه وهو كيعاود على خوه لكبير.. ناصر لي من داكشي لي سمعات منو عرفات بلي هو وياه كاانو متعلقين ببعض وعلاقتهوم كانت قوية فكراتها فعلاقتها مع جيداء.. حسات بغصة فحلقها وقلبها ضرهاا وعينيها كيشوفو ملامح وجهو لي كانو كالم ولكن صوتو كان كافي يبين ليها شحال هو مقصح ومضرور.. ضور وجهو جهتها وعينو الزورق ولاو حمررين وشعيرات دموية تكون فالبيض ديالهوم تمبقاتش تتبان زروقيتهوم..

رحيل:(شدات يديه وقاالت بصوت خافت حزين)وشنو وقع لخووك؟

نوح:(تنهد بهدوء ونطق)ربع شهور دخلت فيهوم كومة وملي فقت عرفتو مات..

يتبع...