محتوى القصة
الدقة خلات دماغها يتزعزع من بلاصتوو وبانت الضبابة فعينيها.. قرب جهتها ريان لي كان قريب ليها شدها من كتافها وإدريس قرب جهتها ونطق بصوت متلهف:واش نتي بخير؟؟
رحيل:(شادة راسهاا وحاسة بالدوخة ونطقات بصوت خافت) أنا بخير
خرجات من الصالة شادة راسها وغادة لبيتها أما نوح فقلب وجهو وتبسيمة خفيفة بانت على شفتو وسيدرا بين يديه باقا معنقااه.. بعدات عليه وتبسمات ليه وهي هازة القطة:غانمشي نعطيها حليبات..
مشات تتجري ونوح جلس فوق السداري وقرب جهتو ريان لي نطق بهدوء: واش هادشي علاش طلبتي نسيفط ليك تصويرة لقطة؟
🔙🔙
كان واقف كيشوف فإدريس كيسلم مع الرجال وضور عينو جهة ريان لي كان واقف متبت تاهو.. قرب جهتو نوح وريان تبسم ليه ونطق بهدوء:صافي غاتمشي
نوح:هادا لوقت (حط يدو على كتفو وقال بهدوء) نسولك عندك شي تصويرة لقطة دسيدرا؟؟
ريان:(كمش حجبانو) اه علااش؟
نوح:واخا تسيفطها ليا
ريان:ايييه واخاا (جبد تلفونو وسيفط ليه تصويرة دلقطة كان مصورهاا متكية فوق السداري ورجع نطق بهدوء) راه سيفطتها ليك
نوح:(شاف فالتصويرة) لهضرة تبقا بناتناا هنا ماتقولها لحد واخا
ريان:واخاا
سلم عليه وخلاه واقف مفاهم والو ولكن ماحكرش ودغيا نسى لبلان أما نوح غير وصل لرياض وطلع لبيتو تمشى ديريكت لفوق لفوطوي وجلس وجبد تلفونو وبقا تيدقق فديك التصويرة تبانت ليه ديك السنسلة لي دايرة ليهاا عاد رجع عيط لواحد النمرة وبقات مدة عاد جاوب بصوتو لمراكشي لبشوش:افين اولد لحااج
نوح:(بابتسامة هادئة) مبااارك لباااس عليك اش خبااارك
مبارك:لهناوات امضراا السنسلة لي وجدت ليك عجبات لبنيتة؟؟
نوح:اييه داكشي كيف بغيتو لمهم باغيك فواحد لبلان؟؟
مبارك:اما هو؟؟
نوح:غانسيفط ليك واحد التصويرة بغيتك تصاوب ليا خت ديك السنسلة
مبارك:اييه نتا غير سيفط وكون هاني اولد لحاج
نوح: غدا وتكون واجدة مع لعشية
مبارك:(بالسوسية) اشور اوااا شور "بشوية عليك" اشمن غدا واش بيتي تهبلني
نوح:(ناض داخل لبيتو ونطق بصوت مازح) نووض سهر عليها ومايكونش فيك لعگز
مبارك:اودي سيفط بعدا نشوفهاا كي دايرة
نوح:واخا
قطع عليه وسيفطها لو فلواتس وفلحين جاوبو مبارك أوديو "عندك الزهر السنسلة مافيهاش لخدمة بزااااف لمهم غانشوف كيندير نوجدها لك لغداا والله يسمح ليك اولد لحاج درتي ليا خدمة فهاد ليل"
نوح:(ضحك) هههه سير عالله غدا وندوز عندك تبات فراحة الله..
قطع نوح معااه ودخل لدووش ياخد ليه حمام باش يرتاااح..
🔜🔜
نوح:(حرك راسو ونطق بهدوء) اوا لقطة مشيت عند واحد السيد مربيهوم ولقيت عندو وحدة بحالهاا وفنفس المواصفات ديالها
إدريس: صراحة كنت كنفكر نجيب ليها وحدة خرا
نوح:واخا غاتجيبها هي ولفات قطتها وزيد المنظر لي شافت غايبقا فدماغها..
تانيرت:(دخلات هازة صينية دأتاي ونطقات بترحيب) مرحبا بيك عندنا
نوح:(حط يديه على صدرو) الله يكبر بيك
مشات تجيب لحلوى ولكيكة لي كانت صاوبات وريان خرج وطلع لبيتوو وبرونشى تلفونو فالشارج.. مد يديه مكروازيهوم وزول التريكو لي كان لابس تبان صدرو لمعضل ولمبرووونزي.. قرب جهة لبلاكار جبد تيشورت لبسهاا ويالاه بدا يحل السمطة دالسروال وهو يسمع تلفونو كيصوني.. مع قرب ليه طلعات ليه سمية "نور" لبنت لي خدامة معاه..
ريان:(جاوب بصوت هادئ) توتوز ديالي لباس
نور:(نطقات بتحلوين) حبيبي ميس يووو بزاااف
ريان:عاد شفتيني قبيلة
نور:(نطقات بزعل مصطنع) ونتا معايا كنتوحشك حبيبي
ريان:(تلاح على نموسيتو وعض على شفتوو) شنو زعمة كاتسكتي فيا على بلان قبيلة
نور:(قالت باندفااع) بيب نتااا عارف كون دخل شي حد وشافناا فداك لمنظر اااش غايطرررااا
ريان:(حك شعروو وقلب عينيه) مالي كنت تنحو*ي فيك راه غي بسناااااك
نور: دابا صااافي ماتقلقش تت نسيتيني شنو كنت باغا نقول ليك
ريان:كانسمع؟؟
نور:صاحبتي دايرة بارتي فلبار دعيد ميلادهاا ليوم وعرضات عليا اش بان ليك نمشيو أونصومبل؟؟
ريان:(تقاد فجلستو) معاياش؟؟
نور:مع الثمنية تبدا لبارتي تمشي معاياا
ريان:(بقا ساكت تيفكر مدة..صراحة شحال هادي مامشى لبار وفوووج فيه وحقيقةً توحش لجوو وداك الرووينة لي تتكون تم) صافي نمشيووو
نور:حبيبي نمووت فيك مهم مع الثمنية دوز لعندي واخاا
ريان:واخا باااي
قطع عليهاا ونااااض جهة لبلاكاار تيشوف اش يلبس.. لجوو فالليل كيبرد داكشي علاش ختااار سروال دجين نواغ مع تيشورت نواغ وجاكيط گرونة وسبرديلة بيضاا حط مسائلو فوق النموسية وشاف فالساعة كانت الستة ونص تبسم وهز لفوطة لايحها على كتفو ونطق بهمس:اااح غانجربوو لمطريال هاد الليلة واش خدام..
ناعسة فوق نموسيتهاا وشعرها لقهوي مفرش تحتهاا.. كانت لابسة بيجامة خفيفة ولمك اب مزول فوجهها وبانت التصرفيقة لي بدات تزراق جهة ودنيهاا.. هي مانساتش الضربة وباقي غاترضهاا ولكن دابا فضلات تحبس وترجع لووور وتفكر فشي ضربة لي ترجع بيها دقتهاا ليه.. كان تتفكر فأول أيامهوم فاش جاو لمراكش وكيفااش كانت صعيبة عليهوم يتأقلموو مع العيشة هناا حيت عمرهووم كولو وهوما فالربااط وباش تبدل السكنة بين ليلة ونهار كان صعيييب.. ليام لولة دازت بواحد لوثيرة بطيئة ولكن بعدهاا بشوية بداو يتأقلمو وسيدرا كانت خالقة ليهوم جووو خلاهوم ينساو شوية اش دازو منوو.. تانهااار جا إسلام عندهوم لداار ملي عرف اش طرا لرحيل ولحقيقة لي تكشفات ولي صدماتو.. تعامل رحيل معاه كان عادي بحال تانيرت ولكل كانو كيعاملوه مزيااان ونهار عرفات اش وقع ليه للحظة ماقدراااتش تيق لهضرة حيت من وجهة نظرها شي غريب أن واحد مناسب ناس معارفش أصلهوم داكشي علاش هي ديما فاش كان يجي تبين ليه أنها محملاهش وتتعامل معاه ببرود وهو مكانش كيدي ويجيب حيت ممسوقش ولكن فلمرات لي هضرات فيهوم معاااه وبان سبب لمشكيل وعرفوو تما فهم هو علاش هي هاكاك معاه وشرح ليها ولكن أسمااء مبغااتش تيق وتفهم بلي تاهو ضحية.. تنهدات وناضت من نموسيتهااا حاسة بالملل.. خرجات من بيتها غادة لبيت رحيل فين كاانت رحيل جالسة هي ورنيم.. مع دخلات شهقات فاش شافت جبهة رحيل تنفخات مع الدقة لي كلات بحاشية لباب جاتها فحاجبها وعلى شوية كانت اضرب تاعينيها غير ربي لطف..
أسماء:مااالك؟
رحيل:(تفكرات لبلان وجاتها الضحة)سلمت مع لحيط ههههههه
أسماء:تت كضرك؟؟
رحيل:شوية وصااااف (تنهدات) تشووووهت قدام ولد لحاااج
أسماء:(ضحكات تادمعو عينيها) ماتقوليش كاااان حاضر
رحيل:معلوووم يعلم الله اش غايقول علياا باركة غير الردان لي رديتو عليه
رنيم وأسماء:(هضرو دقة وحدة) اااايمتاااا؟؟
قلبات رحيل عينيها فاش تفكرات لبلاان وتكات على لكادر ديال النموسية وبدات تتعاود ليهوم گاع الطرائف لي وقعوو ليها معاااه.. قررات تعاود وتهضر حيت بصح كانت محتاجة لمن تعاود من غير طبيبتهااا.. سالات هضرتها وشافت فلبنات لي وحدة تشوف فلخرة وفلخر طلقوهاااا بضحكة دالشيخاااات تايخراااو بالضحك ورحيل كانت عارفة بلي هادي هي ردة فعلهووم حيت بصح هادشي تيضحك..
أسماء:هااااااويلي ازغبية السيد غايقووول هادي هبيلة
رنيم:(شادة كرشها) ههههه ولكن أقوووود بلان هو ديال الرداااان هههههه نااااري تخيلت لبلاااان قدام عيني هههههههه مسكين
أسماء:دابااا تالاكان السيد معجب بيك بهاد لفعاااايل غايقلب الطريق
كمشات رحيل حجبااانها وتقادات فجلستهاا ونطقات بانفعال:ماشي لخاطري راااه بلامانشعر كانلقى راسي طحت فمشكيل معاااه كيحشم عند باااالك كانديرهاا لخاطري راه كانشوفوو كانتفافااا أقسم بالله شي حاجة فيه تاتخليني نشوه راااسي معاه
رنيم:السيد كيبان شارب عقلو شوفي غير ولدو قدااااش يعني اتلقايه فأواخر الثلاتينات هادي الامكانش عندو كثر
أسماء:(حركات راسها بلا) تت مكنظنش كثررر غايكون يا 38 يا 39
رنيم:ولكن لبرهوووش كبير
أسماء:يقدر يكووون ولدو وهو صغيير (شافت فرحيل) معرفاااش واش مزوووج؟؟
رحيل:باااش غانعرف سحاب ليك تانجمع معااااه تت دابا سمعوني ونصحوني اش نديررر؟؟
أسماء:من وجهة نظري أناا تصرفي عااادي وماتصطانعيش يمكن بصح دوك المواقف خلاوك تحاشمي معاااه ولكن نتي ماعندك ماديري أهم حاجة نتي تصرفي عااادي كرحيل لي كنعرف ولي متتسكتش على حقهاا ولي حقانية وفليفلة بعض الأوقات
رنيم:سومة عندها لحق نتي نساااي هادشي وحيديه من بااالك حيت كلما فكرتي فيه كلماا زدتي زبلتيهااا معاااه وهو أكيد مغاديش ياخد تصرفاتك بشي نظرة خايبة
أسماء:(كمشات حجبانهاا فيها) رحيل واش نتي معجبة بيه؟؟
رحيل:(حلات عينيها من سؤالها لمفاجئ وبدااات تتفرك يديها بتوثر وتتسرط ريقهاا وهادشي مخفاش على لبنات..وبصوت هادئ) فاش كيكون حدايا ولاكنشوفو كنحس معاه بالراحة مكنبقااش مخلوووعة كيف ديماا وخصوصا بعد شي لي وقع لياا.. معرفتش واش حيت عتقني من يدين داك لحيوووان داكشي علاش ولا...
سكتات رحيل وهي معارفاااش بصح واش معجبة بيه ولا غير حيت عاونها كيف قالت ليهوم داكشي علاش هي تترتاح ليه.. تنهدات رحيل ولبنات شافو فبعض ومزادوووش هضرو على لموضوع تاقالت أسماء:رنيم سمحيليا على هضرتي دلبارح مكنتش قاصدة نتعصب عليك
رنيم:(تنهدات وحركات كتافها) عادي أصلا قلتي غي الصح
أسماء:(عنقاتها جنب وقالت بهدوء) نتي بحال ختي ومبغاكش تقلقي مني داكشي علاش كنطلب السماحة
رحيل:(ربعات يديها) اوا ملي طلبتي السماحة منها طلبيها تامن إسلام لي ضرتي فيه ديك الضووورة وجرحتيه بهضرتك
أسماء:(كشرات على ملامحها ونطقات ببرود) يقوووووود رنيم لي كتهمني راه طلبت منها السماحة وهو يعاودها لكروووو
رش ريحتووو وشاف فانعكاسو فلمرايااا كان بستيل سپور وسنسلة لي عمروو ماتحيدات من عنقووو ولي زادت عطاتو ستااايل يليق بيه.. شعروو دارو كورلي ولايحوو شوية على جبهتوو.. هز بزطامو وتأكد واش فيه لكارط ولفلوووس وخرج لبرااا ونزل لتحت لقى نوح مشى وغير إدريس وتانيرت لي جالسين متفرجين وسيدرا معاهووم ومنعسة لقطة حداااهاا.. هز إدريس راسو فيه وتانيرت قالت بتساؤل:فين غادي فهاد الليل
ريان:(حك شعرو) صحابي عارضين علياا نسهروو ونبدلو لجو
إدريس:(شاف فيه ونطق بجدية) فين غاتسهرووو؟؟
ريان:(حس براسو تزير حيت فاهم إدريس اش باغي يقول) فلبااار
إدريس:(سكت مدة قبل ماينطق بصوت جدي) سيير ورد لبااااااال
ديك رد لباااال كانت هازة شحال من معنى وريان فهموو حرك ليه راسو وإدريس رجع قال بهدوء:سوارت طوموبيل غاتلقاهوم لهيه فلعلاقة لي حدا لباب
سيدرا:نمشي معاك رياني
ريان:(تحنى باسها فشفايفها وقال بابتسامة) مرة خرا اشنيولة ونخرجك يالاه الله يعاون
خلاهوم ومشى هز لكونطاكط عاد خرج حرك طوموبيل وشد الطريق لدار نور لي كانت جايا فسيكتور هاي كلاس شوووية لقاهاا تتسناهاا حيت عيط ليها خرجات عندو بكسيوة فلكحل قصيرة مع ليباا موووس كحلة تاهي وكتبان هازة وخصوصا لكسوة مزيرة ومبينة الطرف لي عندهااا وجاكيط دودون قصيرة وشعرها كان مااايل لزعر ودايرة مك اب أوفر شوووية.. قربات جهتوو وركبات وغير سدات لباب وهي ضور جهتو وتحنات تاطبعات بوسة على شفتو ونطقات بابتسامة: صافا
ريان:(طلعها ونزلها) سووبر اتوتوز ديالي فين غادين
نور:ل *****
شد ريان الطريق لبار لي قالت ليه وغير وصلو وبلاصا طوموبيل وخرج بانت ليه الدنيا زاهية تم وعطى الله بنااادم.. شد فنور ودخلو لداخل فين كانت الزدحة والإضاءة خافتة بقات تتقلب بعينيها تابانت ليها لكليكة فين كاينة ومشاو عندهوم كانت الدعوة مخلطة بين لولاد ولبنات وريان غير تيحرك راسو ويتبسم ليهوم.. عرفاتو عليهوم وشدوو بلاصتهوم ڤي أي پي والطبلة عامرة قراعي شراااب وكوكتيل والباكية دلگارررو والطفااية.. جلس ريان ونور جنبو تتلوح شعرها لورا ضهرها وجالسة تتهضر وريان تايدوز يدو على ضهرها.. ويضور وجهو جهة الجوو لي تووحش تاجاا السرباااي وخدا غير كوكتيل بلاكحووول ونور تاهي بحالو..
نور:(ضارت عندو ونطقات بصوت عالي على حسب الموسيقى) نشطحوووو
ريان:خليك غير هنااااا وشطحي
نور:تت الجوووو زوين ليووووم
ريان:(حرك ليها راسو وجغم من كاسو)
ناضو لخرين يشطحوو وبقا غير ريان ونور لي ضارت شافت فيه كان ساهي عضات على شفتهاا وتهزات من بلاصتها تاجات جالسة فوق رجليه على غفلة منو هو لي شاااف فيهاا وهي محنية عليه ومرجعة شعرهاا لجهة وحدة ونطقااات بصوت هامس:حبيبي توحشتك
تحنات كثر تاحطات شفايفها على دياولو وبدات تتبوس فيه وريان غادي معاها فلخط ويديه كتلمس جنابها ومؤخرتهااا.. واخدين راحتهوم وأصلا تاحد مامسوق ليهوم حيت كل واحد دايها فراسو وشي يحشش وشي يتدروگاا وشي يشطح مهم كل واحد وشنو يدير.. بعدات نور وقااالت بصوت هادئ:تمشي معايا لدار
ريان:(هز حاجبو ونطق بهدوء) نمشيو دابا؟؟
نور:تت تاتسالي لحفلة
ريان:هممم
جرها تاني من قرفادتها دامج شفايفو مع دياولهاا مخليهاا تسكر غير بشفايفو خصوصا السيد مووولف لبوووس وعااارف كيفاش يخليهااا دايبة معاه ومتبعاااه.. بعدات عليه وهي تتنفس بالجهد وبدات تتقاد شعرها وقالات بهدوء:نمشي لحمام ونرجع
حرك راسو وهي مشات أما ريان شد الكاااس وبدا يشرب فيه تاجاا واحد من دوك لي معااه جلس حداه وجبد خنيشة فيها لكوووك وضار جهة ريان:تجرب؟؟
عيون ريان على ديك لخنيشة لي عارف اش فيهاا ورجع شاف فداك الدري ونطق ببرود:بالصحة
قلب وجهوو وهو مزير على يديه مباااغيش داك الإحساس لي جاااه يسيطر عليه ويتبع طريق لي عارف نهايتهاااا.. مسح على وجهوو وبدا يضور عينو على لبلاصة تاعينو لمحو واحد الديكور ديال واحد لبنت واقفة بسروال دجين وبودي ميني ڤونط طويلة وشعرها قهووي مسرسب على ضهرها.. جنبها واحد خونا باين لعمى راه تيتبسل عليها خصوصا حركاتها كانت تتبان فيها راه معجبهاا حال وتتبعد عليه.. جغم من كاسو مراقب الديكوور تاشافو حط يديه على ترمتهاا وعجنها ليهاا وزيرها جهتوو وهي بدات دفع فيه بيديها ولكن حد مادخل حيت أصلا ممسوقينش ليهاا.. كمش ريان حجبانو وجغم داكشي لي بقا فكااسو وناض جهتهوم ونطق بصوت بارد: حيد يديك عليها از*بي
ضار الشخص جهتو كان مدخم ومفزرمي وفمو زرگ بلگاروو وداير موسطاااش بحال دزماگرية خنزر فريان وقال بصوت مبحوح:قووود من هنا از*بي لانصدق مندمك
زير ريان على يديه وهز رجلو خشاها ليه فصدرو تارجع لاخر لور مطيح الطبلة لي فيها لكيسان وتسمع الصداع وكلشي كيشوف فيهوم ولبنت شهقاات أما ريان عوج راسو وقال بصوت قوي: اجي ندمني
ناض لاخر وهو مخنزر فيه وقلب يدو جهة الجيب لوراني دالسروال وجبد موس كيتطوى حلوو وقال بصوت مدعدع: ضبرررتي عليهاااا اولد لقح*بة ليلة ليلتك...
زير على يديه وعينوو ظلاموو من ديك لكلمة لي نطق لااااخر.. دابا مبقااتش لقضية فيها يدافع على لبنت دابا راه خصو يندمو على هضرتو.. مد يديه وزول الجاكيط لي لابس لايحها فالأرض بإهمال تابقا غير بتيشورت بوحدها ونطق بصوت قاصح: مي خط حمرر ولي حل فموو عليها نحوو*يه
قرب لاخر جهتو منيش بداك لموس تاغفلو ريان فاش خوا ليه وجاا طااايح على واحد الطبلة مشتت دووك الكيسان لي فيها وطباس لقطعة.. تاحد مادخل بيناتهووم وكلشي مفرج فيهوم مولفين الدبااز فبحال هاد لبلايص داكشي باش جاهوم هادشي عادي.. خرجات نور من لحمام ناوية ترجع لبلاصتها ساااعة الجوقة لي بانت ليها جدبات انتباهها وخلاتها تمشي جهتهاا وتخشات بينهوم تادخلااات وهي تشهق فاش بان ليها داك خونا كاينيش بلمووس جهة ريااان لي كيتفاداااه.. غوتااات بالجهد:رياااااااااان عندااااك
لغوتة ديالها شتات انتباه ريااان وداك خونا استاغل الوقت وضربوو ضربة فدراعو تازير على سنيه مقصح.. ولاخر ضحك بسخرية وقاال ليه باستفزاز: مالك از*بي ضربة قصحااااتك وحنا يالاه بدينا زيد نووووريك دخل سوق كر*ك
جمع ريان يديه وعطاااه كروشي لوجه غافلو تالاخر رجع لور ومكانش شاد التوازن جااا طااايح على قفاااه ولمووس طاااح منوو وريان تحدر عندو شادوو من كوول تيشورت وبدا يخشي فيه لكرووووشيات واحد مور خوه مدوخووو وممخلي ليه تافين يستوووعب.. جعر عليه جعرة وحدة محاااسش بدموو لي كاان نااازل من كتفووو سخووون ومن الدقة لي كتوزوز ليه.. كيضرب فيه تاحس بشي حد جااارو من لور بالجهد تاطاح على ضهروو وشاف فشكون لقاه واحد من لكليكة ديال داك خوناااا.. تحنى جهتو هازوو من لكوول تاوقفوو وعط لريان كروشي جنب فموو تادماااه وطاح ريان عاد مشى داك خونا لعند لاخر لي طايح أو وجهو مخسر ونطق بصوت عالي:جلااااال فيق اصاااحبي..
ناض ريان من الارض ومسح فموو بضهر يديه وشاف فهداك لي محني على جلال كيفيقو وزير على يديه ومشى جهتتو هز رجليه ضاربو فضهرو تازعزعو من بلاصتو.. من طبع ريان ضحوكي وضارب الدنياا وبيس اند لوڤ ولكن فاش كيجعر تيقلب ستة تسعووود.. ناض لاخر كيشوف فريان لي مخنزر فيه ولعرق بدا يضرب فجبهتوو بالأعصاااب وعينيه حمرررين.. قرب لاخر جهتو وضربو كرووشي تضار وجه ريااان وفلبلاصة ردها ليه تاهووو وناضت الريگاطة بناتهوووم وجلال باقي مغيب مع كان أصلا سكراان ومع الدق جاب التمام..
بعد ريان عليه وبدا كيضووور راسو يمين وشمااال تاقشع واحد لكرررسي وهو يهزووو ورجع ديريكت لعندو ضاربو بيه على ضهرو تاطاااح لاخر تايتوووجع..
بقا ريان واقف وهو هاز لكرسي ورجليه مهازينووش حيت كلاها تاهو غير صابر.. ناض ليه داك خونا تاني ورجع ريان هز لكورسي باش يضربو بيه ساعة شدوو ليه وجرووو وريان هز رجليه ضربوو ففخدوو ولاخر ديك الضربة خلاتوو يخنزر فيه ويشوف فيه شوووفة قاصحة.. لاح لكورسي وهز يديه ضاربو تارجع ريان خطوة وبدات لكومباا تاني بناتهوووم دقة فلاخر ودقة فريان لي نيفووو وفمووو كيرعفوو ومع ذلك ماحبسش ومهربش ونور غير تاتشووووف مرعووودة ودوك لكليكة لي معاها تاحد مقدر يدخل كل واحد خاف على راسو...
كان طايح ريان الأرض ولاخر شانق عليه ومع هز يديه باش يخشيها ليه فوجهو حس بضووو ضربوو فرااااسو بسباب ديك لقرعة دالشراب لي تهرسااااات فوق منووو ودموو بداا ينزل تايتسقطر والضبابة جااااتو تاطااح كينهج.. مد ريان يديه ومسح نيفوو من الدم وبدا كينوض وهو حاس برااااسو واكلها دبصح وهز عينوو فهاااديك لي كانت واقفة وهي تترعد وعينيها الزرقين عااامرين دموووع.. تحنات جهتو تجات جالسة حداه تتشوف فالجرحة لي فدراعو أو وجهو لي كان حالتوو بالدم وضربة عندو فحاجبوو تفلحااات ونطقات بصوت خائف:واش نتاااا بخيررر
ريان:(حرك راسو باه ونطق بصوت مألم)همم
ضارت وراهاا تتشوف فهاداك لي ضربات كان مغمض عينيه والدم نازل ليه من راسو بسباب الضربة ورجعات شافت فريان وفضربة لي فدراعو: دراعك واااش كاتوجعك
ضور ريان راسو وشاف فالدقة لي مبقاتش باينة مع الدم لي كينزل ومع بغا يجاوبها جات نور جهتو ودفعة لخرة تاطاحت على قاعها وجلسات بلاصتها وشدات وجه ريان وقالت بخوف:حبيبي وااش نتا بخير هاااا
ناض ريان بلاميجاوبهاا غادي كيعرج جهة الجاكيط هزهاا وضار شاف فالبنت لي كانت جالسة تاهي تتشوف فيه وكمش حجبانو.. وجهها مألوف وديجا شايفها فشي بلاصة ولكن فين؟ قرب جهتهاا تاوقف قدامها ومد يدو تاحطاات كفها بين يديه وجرها بالجهد تاناضت وتضربات معاه.. وجاههوم قراب لبعضياتهووم لدرجة نيفها تيقيس نيفو وعينيه قلب عينيها كيشوف فيها وبصوت هامس نطق:أنا شايفك فشي بلاصة؟؟
هضرتو لي قاال خلاتها تكمش حجبانها تاهي تاتشوف فوجهوو تاحلات عينيهاا فااش عرفاااتو شكووون.. بسباب الخلعة ولموقف لي تحطات فيه مكانش عندها لوقت دقق فيه ولكن داابا فاش ركزات فملامح وجهو وفاش سمعات اش قال عقلات عليه ونطقات تاهي بصوت هامس: الضربة لي فدراعك خصها تعقم باش ماتلوتش
تبسم ريان فاش استعقلها غير من هضرتها أو وضاحت ليه الصوورة وعرفهاا.. وقال بصوت مازح: هادي خدمتك مون دكتووغ..
كانت يديه باقي على خصرها محاوطهاا وهي حاطة يديها على كتافو بزووج.. نزلات عينيها جهة الجرحة ورجعات شافت فيه ونطقات بهدوء:غايخصك تمشي معايا لوبيطال
قبل مايجاوبها ريان حس بشي خيال واقف جنبهوم وشاف فيه لقاهاا نور لي كانت حاطة يديها على نصها تتشوف فالديكور قدامها وهي تتغدد... الاشفتيهوم من بعيد غاتقول هادو زوج تيتحابوو وزيد تاتصرف لي دار فاش نخلها ومشى جهة بيسان خلاتها تحس بالغيرة وتعصب.. بعد ريان خطوة لور وحط يدو على حاجبو لي تفلح وقال بهدوء: غانمشي دابا
نور:واخا ديني معاك
بيسان:(نطقات بسرعة) ولكن غايخصك تداوي الضربة لي فدراعك وحاجبك؟؟
نور:(شدات فريان ونطقات بابتسامة صفرا) أنا غانداويها ليه ازين (شافت فريان) ياك احبيبي
بيسان:(ربعات يديها ونطقات ببرود) الضرابي احبيبة غايخص الطبيب يداويها ليهوم ماشي لي كااان حيت غايخصهوم يتخيطووو
نور:(خنزرات فيها) غانديه لطبيب وبلامادخلي باركة غير لمشكيل لي نااااض بمسبتك
بيسان:(هزات حاجبها) مكاين لاش تعدبي راسك حيت انا دكتووغ وعارفة خدمتي (شافت فريان) الاسمحتي خليني نديك بااش نداوي ليك الجرووح
ريان:(حرك راسو باه وشاف فنور) خلي شي واحد من الدراري يوصلك
قال هضرتوو وخرج تابع بيسان لي سبقاتوو مخلي نور غاتمووووت بلفقصة.. كانت باغا تسهر معاه ساعة كلشي تضرب ليها فالزيرو.. ضربات برجليها مع الأرض ومشات جهة الكليكة تكمل سهرتهاا..
وقفات بيسان قدام الرانج روڤر ديالها فالبيض وشافت فريان لي جاي كيعرج وحاط يديه على كتفوو وعاد بدا يطلع معاه لحريق ونطقات بصوت هادئ حنين: واش كاضرك بزاااف؟
ريان:(تبسم ليها بزز) شوية وصاف
بيسان:طلع نمشيو لسبيطار
ريان:غير سيري انتبعك بالطوموبيل
بيسان:مغاتقدرش تسوگ غير طلع وطوموبيلتك خليها هنا تال غداا ويجي شي حد ياخدهاا..
حرك ليها راسو باه وهي حلات ليه لباب لي جنبها تاطلع وضرباتو ريحة برفانهاا وهو يغمض عينو وعض على سنيه كيتوجع.. ركبات فجنبو وقادات السمطة وقلعات فاتجاه لوبيطال فين خدامة وكل مرة تشوف فيه هو لي مغمض عينوو كينسي لحريق لي فدراعو.. مسافة الطريق وكانت الرانج ديالها قدام الباب ديال لوبيطال.. نزلات بيسان وقربات جهتوو حلات عليه لباب ونطقات بهدوء:وصلنا
حل عينيه ونزل وهي عاوناتو تانزل وشافت فالسكوريتي: بلااصيها معاك
دخلو لسبيطار وريان شاد دراعو وتابعها تاوصلات لواحد الشومبر محلولة فيها بياص ونطقات بهدوء: جلس
نفد هضرتها وجلس وهي مشات جهة باكية ديال لگوانتي جبدات زوج لبساتهوم وجرات واحد الطبيلة متنقلة فيهاا أدوات طبية وخدات مقص قطعات ليه تيشورت تاطلعاتها ليه لكتفوو وخدات قطن دارت فيه معقم وبدات تتمسح ليه الدم وهو كرز على سنيه فاش حس بالحريق ولسعة ديال لالكول.. مسحات ليه الدم ولاحت لقطن لي توسخ وعاد بانت ليها الجرحة مزيان.. مكانتش غارقة وغير خفيفة وماتحتاجش تخيط.. بدات تداويها ليها وهو قالب وجهو لجهة لخرى والسكاات عندهوم ومكيتسمع غير صوت أنفاسهوم ولاصوتها فاش تتاخد شي حاجة من ديك الطبيلة.. ضورات على دراعو البوصموون ومدات يديها تاضور وجهوو لعندهاا وهي عينيها كانو على الضربة دلحااجب.. أما ريان فعينيه السوود كانو كيدققو فملامحها عن قرب.. عيونهاا زرقين بااردين ماشي بحال لون نووح لي غاامق هي لونهوم بحال سماا الصافية.. وبشرتها بيضاا وفيها شوية دالنمش فوق نيفهاا وجهة حنوكهااا مباينش تاكدقق فيهاا.. شعرها قهووي رطب بحال لحرير وملامحها كيبانو طفولين ولي شافها مغايقولش راه طبيبة..عض على شفتو فاش حس بحاجبو لي كيتغرز وسمع صوتها لي نطق بهدوء وتركيز: الضربة لي فحاجبك محلولة ولابد ماخصها تغرز واحد ثلاتة دلغرزات
ريان:(بهدوء) عنداك ديري ليا لخياطة ديال التكاشط
بيسان:(تبسمات بخفوت) ماتخافش
غرزات ليه الجرحة ودارت ليها فاصمة وبدات تعقم لجروح لخرين تاسالات وبدات تتزول فالگوانتي وهي تنطق بهدوء:غانعطيك كالمون على قبل الجرحة لي فدراعك وفالليل يقدر طلع ليك السخانة بسباب الضربة..(كتبات ليه لوغدونونص ومداتها ليه) مرة خراا سمحليا
ريان:(شد لوغدونوص ونطق بخفوت) هو لي قلب عليها
ناض من بلاصتو وخدا الجاكيط باغي يلبسها ساعة ماقدرش يضور يديه وهي تقرب جهتو وبدات تتعاون فيه وقالت بابتسامة:خليني نوصلك
خرجات سابقه وهو وراهاا تاسمعو صوت الفرملية لي نطقات بصوت عالي: دكتووغ بيسان
ضارت جهتها وقالت بهدوء:وي؟
لفرملية:مزيان جيتي كنت غانعيط عليك كاينة واحد لُكَا أوغجون تحضري ليها
ريان:(نطق بهدوء) لعمل ينادي بااي
تخطاها وهي شافت فيه قبل ماتقلب الضورة وتبع لفرملية.. شد طاكسي وبعد مدة وصل خلصو ونزل كان السكات وأصلا كانت لحداش ونص حل لباب ودخل بلامايدير لحس تبان ليه إدريس جالس فالصالة وباين كان يتسناه.. غير شافو وضرب وعلى وجهو ولفاصمة فوق حاجبو وهو ينوص بخطوات مزروبة ونطق وهو مكمش حجبانو: مالك ؟
ريان:(حك شعرو ونطق بخفوت) غير تشاديت مع واحد وصاف ماديرش فبالك الواليد
إدريس:(حرك راسو ونطق بجدية) طلع لبيتك ترتاح وغدا لينا كلام..
وقفات الطاكسي ونزلات رحيل بعبااية طويلة واسعة فلكحل مع نيقابها فلباج ضارت جهة إدريس لي نطق بهدوء وهو باقي فبلاصتو:ملي تسالي عيطي ليا نجي نديك واخا
رحيل:(تبسمات ليه تاتسدو عينيها ونطقات بحب) واخا ابابا بسلامة
سدات لباب والطاكسي تحركات غادة لبار باش يجيب طوموبيلتو لي خلى ريان تم.. أما رحيل كملات طريقها جهة الباب لكبير ودفعاتو ودخلات بهدوء.. تاوصلات لبيرووها ولقات غير لبنت لي معاهاا هي لي كاينة..
رحيل:صباح لخير رجاء
رجاء:صباح لخير صافا
رحيل: حمد لله ونتي
رجاء:بخير غير زولي نقابك راه ياسر مكاينش ليوم
رحيل:(هزات النقاب وبدات تتهوي بيديها) علاش مالو؟
رجاء:ماتت ليه شي وحدة من لعائلة داكشي علاش
رحيل:اه اوا الله يرحمهاا
رجاء:(كمشات عينيها بفضول)اجي ماعرفتيش شكون سد عليك داك لنهار ؟؟
رحيل:(سرطات ريقها ونطقات بخفوت) لا
رجاء:(قلبات شنايفها) لعجب نوغمالمو ديك لبلاصة مكيقرب ليها حد من غير سعيد هو لي كيعطيناا لي خاصنا عمري دخلت ليها تانشوفهاا كيف دايرة ماعرفتش كيفااش خلاك دخلي
رحيل:(كمشات حجبانها بشك) علاش واش فاش تيخصوكوم لپاپي ولاتيسالي طونير متتاخدوهش تم
رجاء:تت هو كيعطيه ليناا
سكتات رحيل وهي مكمشة حجبانها وساهية فالبيسي قدامهااا.. علاش هي عطاهاا الساروت زعمة يكون هو بلعاني دارها باش يسد عليها تم؟ أصلا من نهار لول وهو كيبين ليها بلي مباغيهاش تخدم هناا وفيما تتجيه الفرصة يسمعها هضرة.. رجعات طرحات سؤال على نفسها هو علاش أصلا غايديرها اشنو بينو وبينهاا؟؟؟ حركات راسها يمين وشمال تتسوس الأفكار لي طاحو ليها فراسهاا ورجعات مركزة فخدمتها وحيت مكاينش ياسر لخدمة شوية كانت كثيرة عليهووم وزيد لخر دالشهر داكشي علاش لقضية مزيرة.. صونى تلفون رحيل ولقاتو إسلام تبسمات وجوباتو بهدوء: أهلا صافا
إسلام:حمدلله ونتي بخير واحد لخنفوسة توحشتهاا
رحيل:ههه لباس عليها تاهي توحشااتك بزاف
إسلام:كيبقات من لبلان لي طراا
رحيل:(عضات شفتها فاش تفكرات لجيست دنوح وتبسمات) صافا حمدلله ونتا علاش مجيتيش لبارح عندنا
إسلام:(بصوت بارد) من الأحسن هاد ليامات مانجيش
رحيل:(فهمات ونطقات بهدوء) أودي ماعرفتش اش غانقول صدمتوني صراحة وماتوقعتش منك داك التصرف
قالت لكلام لخر بصوت جدي حيت واخا عارفة أسماء تستاهل شنو طرا ليها ولكن مبغاتوش يضربها حيت تتبقا ختهاا..أما إسلام مسح على وجهو وسكت الطوموبيل مبعد مبلاصااها جنب الطريق ونطق بصوت منفاعل:فنظاارك هي متستاهلش على هضرتهاا راه تحمد الله جات غي فتصرفيقة أيما هاديك راه الدبيييجة دايزة فيها
رحيل:(كطقطق ستيلوها فوق لبيرو) ماتهزش عليها يديك كاينة واحد لحاجة سميتهاا الحوار
إسلام:(ضحك بسخرية)هه واش ارحيل داوية من نيتك هاديك راه متتعرفش اشنو هو لحوار أصلا تت دابا خليناا من هادشي واش سيدرا فالدار؟
رحيل:اه مع ماما علاش؟
إسلام:باغي نخرجها
رحيل:سير لدار وغي تهنى مكيناش أسماء
إسلام:الله يحفظك مهم نخليك تكملي خدمتك الله يعاون
رحيل:باي
حطات تلفون ورجعات تتكمل أمورها تاصونى لفيكس وهي تجاوب رجاء حيت كان حداهاا.. هزات عينيها فرحيل ونطقات بصوت هادئ:وي موسيو السليماني كاينة؟؟ (سكتات تتسمع ليه) واخا أنا غانقولها ليها (حطات لفيكس وشافت فرحيل لي تاهي تتشوف فيها) موسيو السليماني بغاك تمشي عندو
رحيل:(بتوثر) مقالش ليك علاش؟
رجاء:نوو
تنفسات الصعداء وهبطات نقابها خارجة من لبيرو وغادة عندو.. وتتحاول تبع هضرة لبنات لي قالو ليها تصرف على طبيعتها ومن لداخل تدعي الله دوز هاد الساعة على خير وماديرش شي كارثة تااني لي تزاااد مع لكوارث لي قبل.. دقات لباب وغير سمعات صوت وهي تحل وشافت فيه كان جالس فكرسيه ومتكي عليه بشوميز نواغ كولها قصير وساد ليها الصدايف تال لفوق جاتو زوينة وشعروو كان منقصو شوية من الجناب ومرجعو لور كيف لعادة ولحيتو مقادة..كان كيشوف فيها تاهوو بنظرات ماتعرفش اش تحت راسو وبصوت هادئ نطق:تفضلي جلسي
جلسات رحيل قدامو ونطقات بهدوء:وي موسيو السليماني
نوح:(بدون مقدمات قلب ليها لبيسي) هاشكون سد عليك لباب
حولات رحيل عينيها لشاشة تتشوف لفيديو تاسالا وهزات عينيها فيه وقالت بهدوء:لفام دميناج؟
نوح:فاش دويت معاها قالت بلي مكانتش عارفك تم وزيد ليزيات لي دايرة ماخلاوهاش تسمعك ونتي تتعيطي
رحيل:(بهدوء) ماشي مشيكل تتوقع
سكتات وهي تتشوف الأمر من منظور اخر..كون مكانش طرا ليها لمشكيل قبل مكانتش ردة فعلها ديك النهار تكون بديك الحدة وتحول لهلع.. وزيد لفيديو وضح أنها مدارتهاش بلعاني والسيدة كانت تادير خدمتها.. عينو كانو حاضين تصرفاتها وسهوتهاا وعيونها لي منزلاهوم الأرض وهي تتخمم.. شاف فيديها لي كانت حاطة فحجرها وكانت تتحك فيهوم بلاماتحس تارجعو حمرين ورجع شاف فرجليها لي كانت تتهزها بحركات سراع دليل أنها متوثرة.. هادشي هي مرضاتش ليه لبال ولكن هووو شافوو دقائق وهوما ساكتين..هي كانت تتفكر وهو كاان مراقبهاا بنظرااات مبهمة.. تنهدات رحيل ومدات يديها دخلاتها تحت النقاب شمرات بنيفهاا تاسمعات صوتو لي نطق بنبرة باردة وبدون مقدمات: شنو بينك وبين إسلام؟؟
متكي فبيتو كيف عادتو من نهار خرج من السبيطار.. حاس بالملل ولعياا مع هو ممولفش الجلاس بزاف داكشي علاش جاتو شوية قاصحة يبقا غير فالدار.. تنهد وضار جهة تلغونو لي كان يصوني وكانت كلثوم هي لي تتعيط ليه.. تقاد فجلستو ودوز لابيل وجاه صوت مو لي نطقات بلهفة:ولدي كيف بقيتي لباااس
محمد طه:(بهدوء) حمدلله ونتي وجدة ومالين الدار بخير
كلثوم:اوا هاحنا نعديو (نطقات بفضول) وباك لباس عليه
محمد طه:(فهم هضرتهاا ونطق بجدية) كولنا بخير هاد الساعة
كلثوم:(بصوت مغبون) هادا هو خيري اولد كرشي قلبي مهوول عليك ونتا تتصدرني
محمد طه:(تنهد) مكنصدركش الواليدة سولتيني جاوبتك
كلثوم:(بحقد) بان لياا بلي الشلحة دات ليكوم لعقل لانتا ولاختك ونسيتوو مكووم وشنو ضربات على قبلكووم من تمااارة
محمد طه:(زفر بعصبية من هضرتها لي فكل مرة تجبد ليه تانيرت.. نطق باندفااع) هي ماعندها تاشي دنب الواليدة وعمرها ماهضرات عليك بلخااايب راه نتي لي نسيتي اش درتي فيناا
كلثوم:(تعصبات من هضرتو وبصوت عالي) ياااك اولد كرشي وليتي تعاااايرني فوجهي هاا هادشي لي نسوى عندك
محمد طه:(مسح على وجهو ونطق بقلة صبر) معايرتكش قلت لي كاااين الاكنا أنا وأسماء باقي كاندويو معاك فحيت نتي منَااا وعندك حق علينا فمتلوميش غيرك على فعايلك
كلثوم:(كتغدد من لداخل وعينيها كيبخوو الدم وكون كانت تانيرت قدامها كون شربات من دمهاا ضحكات بسخرية) ايييه زيد خوي لمزيودة وزيد شوووف اشنوو نسيتي وماقلتيهش ليااا (كملات بحرقة) هادشي كولوو لي درت على قبلكوووم نتوماا مبغيتش باكوووم يبعد عليكوون وترباو بلابيه ولكن هادا مانسوى عندك
محمد طه:(بنبرة حزينة) هادشي مكيغفرش ليك بلي نتي خبيتي عليه ولدوو وبلي كنتي السباب تاخالتي تانيرت بعدات على بنتهااا حنا كبرنا معاك ومع بانا ولكن ريان مكبرش معاه ورحيل مكبراتش مع مهاا وبلاماندووي على شنو كنتي تاديري فيها فاش كانت صغيرة (سكت مدة قبل ماينطق بهدوء) غايخصني نقطع دابا كيعيطو ليا نهضرو من بعد
قطع بلا مايتسنى جوابهاا وباين فوجهو بلي مغير ومعصب.. ولي معصبو هو مو لي مباغاااش تعتاارف بلي هي غلطااات وبلي ريباات عائلة وفرقاتهوم على بعض وتعدات على يتيمة ودارت حوايج لي هو مباغيهومش ومراضيش عليهوووم وكون كان حد اخر كون ضرب عليه بخطرة ولكن هي تتبقى موو.. هو عاش هاد السنين مع تانيرت وشاف كيفاش تتعاملوو لاهو ولاأسماء وعمرها بينات ليه بلي هوو ولد راجلها بلعكس دايراهوم بحال ولادهاا وكثررر ومغاينكرش أن دوك لخمس سنين لي دوز عرف فيهوم معنى العائلة لحقيقي وحس براااسو وسط دفئ عائلة ماشي بحال قبل كان تيحس دائما بواحد الفجووة أو واحد النقص كاين فعائلتو.. وهادشي راجع لعلاقة لواليدين لي ديما مكتأثر على لولاد.. فاش تيكونو لواليدين بناتهوم المفاهمة والإحترام ولحب فتأكد بلي لولاد غاتكون نفسيتهوم مزيانة ماشي بحال فاش كيكونو الخلافات والصداع لي تيأثرو على نفسيتهوووم.. ناض من بلاصتوو غادي جهة لمراايا تايشوف فالكاسك لمشبك لي باقي على راسو.. مل من منظرو ومكرهش يزولو ولكن الطبيب قال ليه باقي حيت الجرح مابراااش وغايخصوو وقت هز طاگية لبسهاا ونزل لتحت فين كانت تانيرت جالسة فالصالة تتمشط لسيدرا لي ملبساهاا مونطو على شكل ڤيست فلكاشيري مع بودي بيض فلداخل وسروال دجين نواغ.. هزات سيدرا راسها فمحمد طه لي تبسم ليها ونطق بهدوء:فين غادة اروح مودي
سيدرا:(بفرحة وحماس) غانخرج مع إسلامي
تانيرت:عيط ليا إسلام باغي يخرجهاا
محمد طه:مزيان تفوج شوية أصلا الدار تتعيى
تانيرت:(تبسمات) هه واييه كطلع فالراس
سيدرا:تانيرت إينو ماتجمعيهش ليا بغيتو مطلوق ونقسمو بحال هاكا (بدات تتقسم شعرها فالجنب وخلات جهة كبر من لخرا) صافي هاكا زوين
تانيرت:(تنهدات) لبسي سبرديلتك (شافت تلفونها كيصوني بنمرة إسلام) سربي راه إسلام كيتسناك
مشات سيدرا بحماس تتلبس وقبل ماتمشي قربات عند محمد طه باستو ففمو وباست تانيرت لي مشات معاها تال لباب لقات إسلام واقف وخاشي يديه فجياب لمونطو تبسم وقرب جهتهوم وتحنى هز سيدرا لي تعلقات فيه وباستو فحنكو وهو شاف فتانيرت ونطق بابتسامة:لباس
تانيرت:حمدلله نتا فين غبرتي
إسلام:مع لخدمة وصاف هه
تانيرت:اوا ملي ترجع سيدرا عول تعشى معاناا
إسلام:(حرك راسو) يكون خير مهم احنا مشينا سلمي على محمد طه
تانيرت:مرحبا بسلامك
سدات لباب ورجعات لصالة لقات محمد طه جالس تبسمات ليه وقالت:ياكما فيك الجوع ؟
محمد طه:لواليد مغايتغداش معانا
تانيرت:لا عندو لخدمة فلگاراج غانتغداو غير أنا وياك؟
محمد طه:صافي واخا
مشات جهة لكوزينة تسخن لغدا وهي تكمش حجبانها فاش حسات بوجع فكرشهاا.. مدات يديها وبدات تتمسد كرشهاا وجلسات على لكرسي تاتستارح ولوجع كيمشي ويجي.. عضات على شفتهاا تاسمعات صوت محمد طه لي كان جاي جهتها ونطق بتساؤل:واش نتي بخيررر؟؟
تانيرت:(زيرات على عينيها) اه بخير
كان باين فوجهها راه مقصحة وغير صابر.. تخلع عليها ونطق بصوت جدي:غانعيط لواليد يجي
تانيرت:بلاش أنا بخير
محمد طه:نتي ماشي بخيرر تسناي أنا جااي
خرج غادي يجيب تلفونو وهي تكات راسها على طبلة ويديها على كرشهاا باقي تتمسد فيها..
"شنو بينك وبين إسلام؟"
سؤال خلى رحيل تهز راسهاا بسرعة وعينيها فقلب عينيه لي كانو كيشوفو فيها بنظرات هادئة.. وشوفاتو وملامحوو لي كانو عاديين دخلو ليها التنااااوي فدماغهاا.. واش هي سمعاتوو قال شنو بينك وبين إسلام؟؟ ولاغير كانت ساهية وجاب ليهاا الله؟؟ سكتات مدة تتشوف فيه قبل ماتنطق بهدوء:مافهمتش؟
نوح:( تقاد فجلستو وشبك يديه فوق لبيرو وقال ببرود) كنظن سؤالي واااضح شنو بينك وبين إسلام؟
سكتااات رحيل وعينيها عليه مفهمااتش هو علاش سولهاا هاد السؤال ؟؟
رحيل:(تقادات تاهي فجلستها وقالت بجدية) ممكن نعرف نتا علاش تتسول؟؟
نوح:(هز شفتو بضحكة ساخرة قبل ماينطق بنفس لبرود) الاجاوبتي غاتعرفي علاش؟
رحيل:(كمشات حجبانها ونطقات بصوت هادئ) من العائلة وبحال خويا
نطقات هضرتهاا وهي معرفااش علاش كتبرر ليه أما نووح فنطق بجدية وعينو فعينيهاا: بحاال خوك يعني هو ماشي من لمحارم ديالك باش نتي تبين ليه وجهك ونتي منقبة ولا أنا غالط؟
حلات رحيل عينيها فيه او وجهها لي كان مغطي بالنقاب رجع كيف شي مطيشة بلحمورية فاش سمعات هضرتووو ولسانها تربط تابااش تجاوبو ماقدراتش أما هوو كمل هضرتوو بنفس الجدية ونفس النبرة التقيلة لي تتخليك بلاهوااك تركز معاااه: قال الله عز وجل في كتابه الحكيم.. بسم الله الرحمان الرحيم {قُلْ لِلْمُؤْمِنينَ يَغُضُّوا مِنْ أَبْصَارِهِمْ وَيَحْفَظُوا فُرُوجَهُمْ ذَلِكَ أَزْكَى لَهُمْ إِنَّ الله خَبِيرٌ بِمَا يَصْنَعُونْ {30} وَقُلْ لِلْمُؤْمِنَاتِ يَغْضُضْنَ مِنْ أَبْصَارِهِنَّ وَيَحْفِظْنَ فُرُوجَهُنَّ وَلاَيُبْدينَ زِينَتَهُنَّ إلاَّ مَاظَهَرَ مِنْهَا وَلْيِضْرِبْنَ بِخُمُرِهِنَّ عَلَى جُيُوبِهِنَّ وَلاَيُبْدِيِنَ زِينَتَهُنَّ إِلاَّ لِبُعُولَتِهِنَّ أَوْ آبَائِهِنَّ أَوْ آبَاءِ بُعُولَتِهِنَّ أَوْ أَبْنَائِهِنَّ أَوْ أَبْنَاءِ بُعُولَتِهِنَّ أَوْ إخْوَانِهِنَّ أَوْ بَنِي إخٍوَانِهِنَّ أَوْ بَنِي أَخَوَاتِهِنَّ أَوْ نِسَائِهِنَّ أَوْ مَامَلَكَتْ أَيْمَانُهُنَّ أَوْ التَّابِعِينَ غَيْرِ أُولِي إِلارْبَةِ مِنَ الرِّجَالِ أَوْ الطِّفْلِ الَّذِينَ لَمْ يَظْهَرُوا عَلَى عَوْرَاتِ النِّسَاءِ وَلاَيَضْرِبْنَ بِأَرْجُلِهَنَّ لِيُعْلَمَ مَايُخْفِينَ مِنْ زِينَتِهُنَّ وَتُوبُوا إِلى الله جَميعاّ أَيُّهَ المُؤْمِنُونَ لَعَلَّكُمْ تُفْلِحُونَ {31} سورة النور } نتي قارية أو واعية وغاتكوني فهمتي معنى الآية وبيما أنك دايرة النقاب فمن لواجب تحافظي على شروطو كما هي وماشي ديري لي نتي كيبان ليك وتقولي هاداك بحال خويا حيت هاد لكلمة ماعندها معنى.. زائد لباسك لي أحياانا كنشوفو مكيناسبش النقاب لي على وجهك حيت النقاب الشرعي لي كااين فالإسلام راه باين شكلوو يعني الاكنتي نتي دايراه عن اقتناااع فخصك تنفدي شروطوو كما هي بلحرف أما الاكنتي دايراه فقط من باب الستيل فمن الأفضل ليك تراجعي حسابك امدموزيل..
عينيها جمدو عليه وخيط دلعرق نازل ليها مع ضهرهاا واحد كمية الإحراج حسات بيها فهاد اللحظة عمرهاا حساتهاا فحياتهاا.. الطريقة باش هضر معاها والآية لي قال ليها هي عارفة المعنى لي كان باين ولي خلاهاا تغرق فحوايجهاا.. ومرضااتش كيفااش هو هضر ليها على لبسهاا وكيفااش قمعها بالفن.. خجلها وصمتها تحول لعصبية بانت على عينيها لخضرين لي كانو لامعين بدموع لحرج ولغضب ونطقات بصوت حاد: واكنظن هادشي ماشي سوقك فيه اولا شكووون نتااا باااش توريني فلبسي وفتصرفاتي هااا
صدرها كيطلع وينزل بلعصبية لي كانت قناااع باش تخفي بيهاا خجلهاا.. هي فالداخل ديالهاا تتأيدو على هضرتوو ولكن مبغااتش تبين ليه ولدلك هاجت عليه بهاد الطريقة.. أما نوح هزز حاجبو فيهاا ونظرتو كانو صارمين ونطق بصوت جدي: فاش كاتشوف شي حد كيغلط قدام عينيك فلابد ماتنصحوو
رحيل:(قطعاتو بانفعال) ماتنصحني اسيدي مانصحك ماشي درية صغيرة بااش توريني اش كاندير
نوح:(حط يديه على راسو وقال ببرود) الإنسان فاش كيعرف راسو غالط ومكيرضاش يعتارف كينفاعل ويتعصب بحالك تماماً
ناضت رحيل من بلاصتها كلها تترعد ومعصبة ومرضاتش كلشي تجمع عليها فهاد الساعة ولكن مبغاتش تبين ليه: ممعصباااش علاش غانتعصب مثلااا هاا
نوح:(ناض تاهو من بلاصتو ونطق نبرة باردة وفنفس لوقت صارمة ) صوتك مايعلاااش علياا أنا نصحتك والانتي مباغاش تسمعي النصيحة شغلك هاداااك تاحد مغايبزز عليك شي حاجة
رحيل:(ربعات يديها) هانتا قلتيها شغلي هادا يعني مادخلش فشغالي
نوح:(جلس بلاصتوو ببرود وسخرية باينة فنبرة صوتو) وهاد شغلك مقالش ليك حرام تعنقي واحد مكيجيك تاشي حاجة امدموزيل..
داخل لبيت وهي بين يديه تتبان صفراا وعيااانة تمشى بيها جهة النموسية وحطهاا بهدوء خايف عليهاا وهي تقدات فبلاصتها وحطات يديها على كرشهاا.. تنهد إدريس وجلس حداهاا كيقس وجهها بحركات حنانين ونطق بصوت هادئ:سمعتي الطبيبة اش قاالت؟
تانيرت:(بتعب)همم
إدريس:(تحنى جهتها ونطق بجدية) من ليوم مكاين غير الراحة وشغال دار ماتقربيش ليهوم سمعتي
تانيرت:(شدات يديه) نتا عارفني مغانقدرش نجلس بلامانتحرك حيت غانمل اإدريس
إدريس:ونسي لوقت بالتلفازة ولاتلفون ولالبيسي عطى الله شنو ديري ماشي ضروري تنوضي تشقاااي راه دابا مبقيتيش ديال راااسك اتانيرت إينو
تانيرت:(حطات يديها على كرشها) غانحاول
إدريس:صحتك مهمة عندي وحاولي ماتعصبيش الطبيبة قالت ليك الحمل باقي فالبداية وماحدو ماتبت نتي خصك تعطي الراحة لراسك لايوقع ليك كيف ماوقع ليوم وكون مامحمد طه لي عيط لياا يعلم الله اشنو كان غايطرا
تانيرت:خصو يتغدا باش ياخد دواه
تبسم ليها إدريس فااش شافها كيفاش باقاا تتفكر فمحمد طه واخاا هادشي كولو.. تحنى باسها فشفايفهاا بوسة سطحية ونطق بهدوء:غانمشي نسخن لغدا ونجيب ليك تانتي تغداي باش تشربي دواك واخا
حركات ليه راسها وهو خرج من لبيت ونزل لتحت فين كان محمد طه جااالس تبسم ليه إدريس ونطق بهدوء:مبقاتش تتجيك الدوخة؟
محمد طه:لا احم كيف بقات خالتي تانيرت
إدريس: مزيان الطبيبة عطاتها الراحة على قبل داكشي لي فكرشها باقي ماتبت
محمد طه:اه راه ريان هضر معايا فاش كنتو تماا وقلت ليه شنو كاين؟؟
إدريس:(بجدية) هاداك باقي عندي معاااه هضررة
مشى لكوزينة سخن لغدا وحط لمحمد طه ياكل وهز حق تانيرت داه ليها لبيت وماخرجش منها تااخلاها تاكل مزيان وتشرب دواهاا وتنعس باش ترتاح عاد طمن عليهاا ونزل وصى محمد طه الاكانت شي حاجة يعلمو ورجع لگاراج يكمل خدمتو لي كتسناااه..
----
جملتو لي قال كانت هي النقطة لي فيضات كاس رحيل لي كانت فقمة أعصابهاا.. لطالما هي كانت من نوع لي تيتحكم فراسو وفأعصابو ولكن هادشي كان قبل ماتعرض لديك لفترة والأزمة لي خلات نفسيتها تدهورر ولي خلات تاشخصيتهاا تولي مزاجية..
رحيل:(قربات جهتو بخطوات بسيطة تاوقفات حدا لبيرو وحطات يديها عليه وكمشات عينيها وهي تتشوف فملامح وجهو الهادئة.. وبصوت ساخر تاهي نطقات) أي وحدة كانت فديك لحالة لي كنت فيها كان ممكن تصرف نفس تصرفي يعني أنا مكنتش معشووقة فسياتكووم بااش نعنقك والانتا شفتي داك التصرف بطريقة خرا فهادي مشكيلتك
ربع نوح يديه وهو كيشوف فيهاا وتبسم تبسيمة خفيفة ونطق بصوت هادئ: مزيان
كلمة وحدة.. قال كلمة وحدة خلات رحيل تجن وحسات بيه بحال الاكيطنز عليهاا.. زيرات على سنيهاا وتقدات فوقفتها وقالت بصوتها الرقيوق لمنفاعل: واش نتا دابا كطنز عليااا ولاكيفاااش؟؟
نوح:(هز كتافو) حاشا امدموزيل الاكنتي نتي تتشوفي هضرتي طنز فهادي مشكيلتك
جاوبها بخوو جوابها وعينو فقلب عينيها كيشوف فيها بهدوء عكسها هي لي تعصبات واش جاا ماسكتهاا ورجعهاا كيف كانت.. حركات راسها ورجعات قالت بصوت حاد: علاش كادير معاياا هاكاا؟
نوح:(كمش حجبانو) اش كاندير؟
رحيل:(تتهضر وتعبر بيديها) هضرتك داباا لي قلتي على لبسي وعلى تصرفااااتي بغيت نعرف نتااا شنوو كيهمك فهادشي كااامل
نوح:(ربع يديه وقال بتبات) نصحتك نصيحة وبان ليا بلي نتي متقبلتيهااش
رحيل:(هزات حاجبها ونطقات بسخرية) ونصائحك واش كاتعطيهوم غير لياا ولاگاع لموظفين عندك؟
نوح:(حط يديه على دقنو وكمش فيها حجبانو) فاش كانشوف شي حد محتاج نصيحتي مكنبخلش عليه
رحيل:(وقفات بتبات ونطقات ببرود) وأنا ممحتاجاش نصائحك موسيو السليماني والاكنتي باغي تنصح شي حد نصح راسك والناس لي قرابين ليك
نوح:(شاف فيها بهدوء وقال)واخا تقدري ترجعي امدموزيل لخدمتك
خنزرات فيه رحيل وعطاتو بالضهر غادة لباب لي كانت محلول وخرجات زادحاها وراهاا تاخلاتو يكمش حجبااانو ونطق بصوت هامس بالسوسية: إيقور أوگايونس "راسها قاسح"
خارجة من عندو وهي معصبة وباغا غي فيمن تكب جنونهاا.. مشات لبيرو ولقات رجاء تتجمع مسائلها وشافت فرحيل ونطقات بصوت سريع: رحيل عندي غونديفو مع دونتيست ومغانرجعش تقدي تكملي لخدمة بوحدك؟
رحيل:(حركات راسها بلاماتهضر)
مشات رجاء ورحيل هزات نقابهاا وبان وجهها لي كان حمر بقوة الأعصاب والحشمة.. جلسات فكرسي دبيروها وعطات بضهرها لباب لي كان محلول.. جالسة مع راسها تاتسترجع الحوار من لول مور مابدات تبرد شوية بشوية.. سؤالو على إسلام مافهماتش سبابو بيما أنه باغي يعطيها نصيحة كان يمكن ليه يعطيها ليها بلامايهضر على إسلام ومايجبدش حسوو گاع زائد هي معرفااش علاش هضر عليه وشنو شاااف تاخلاه يقول ديك لهضرة.. مكمشة حجبانهاا وكتعاود السينتة فدماغها ديال لقاءات نوح مع العائلة وكتشوف هي اشمن تصرف دارت؟؟.. حطات يديها على جبهتها تتمسدهاا ومحملاش راسها فهاد الساعة والطريقة باش جوباتوو جاتها ناقصة وماشي من شيمها كرحيل بنت إدريس..رحيل لمرزنة ولي عارفة كيفاش تحتارم غيرها وفاش شي حد كيقلل أدبو عليها تتجاوبو بلبااقة وبطريقة تتخليه يندم على هضرتوو.. هي علاش ماجوباتووش جواب دبلوماسي وسدات السوجي وهنات راسها؟؟ علاش تعصبات وبينات نرفزتهاا ليه؟؟ غير مع راسها كانت تطرح هاد الأسئلة وتتحاول تلقى ليهوم جواااب..
هي بصح مكتغطااش لإسلام حيت كتعتابرو بحال خوها وتتصرف معاه بطبيعتهاا وبالنسبة ليها بحالو بحال ريان ومحمد طه ولكن منطقياا هي منقبة وفالإسلام هو ماشي من محارمهااا ومخصهااش تبان قداموو بوجهها وهناا رجعات لهضرتو لي قااال ليهاا ولي كانت صحيحة.. ولكن هي مبغاتش هاد النصيحة منو حيت حسساتها بالإحراج خصوصا هي لقاءتها معاه مكانووش عادين بالنسبة ليها وكانت ديما تادير شي حاجة لي تخليها تحاشم معاه بدووون ماتحس داكشي علاش انفاعلات وطرا لي طراا.. ربعات يديها وتكات راسها على لحيط ولخاطر دلخدمة مبقاااش عندهاا..
حاليا هي عايشة واحد الصراع مابين عقلهاا وقلبهاا ومابين لحق ولغلط وداك الصراع مخليها تبرزط ويطيح عليها الضيم وتحس بواحد النغصة فصدرها خنقاتهاا.. مدات يديها تتمسد صدرها وعينيها لخضرين بدا بريق الدموع يبان فيهوم وصدرها تهز بشهقة بلاماتحس..
حسات براسها باغا تبكي داكشي علاش ماحبساتش دموعهاا فالداخل ديالها كيف كادير ديماا.. بقات على ديك لحالة ومرة مرة كتافها يتهزو وتشمر بنيفهاا تاحسات بشي ظل واقف عليها ويد تمدات لجهتهاا عطياهااا كلينيكس.. بقات تتشوف فيديه تاسمعات صوتو لي نطق بهدوء ونبرة حنينة: يمكن نتي فهمتي هضرتي فشكل وفالحقيقة نصيحتي مكانتش كتقليل ليك
رحيل:(شدات كلينيكس تتمسح دموعها ونطقات تاهي بصوت هادئ) لواحد فاش كيبغي ينصح شي حد كينصحو بطريقة لبقة
نوح:(حاط يديه فجياب سروالو وقلب وجهو لجهة لخرا مبسم بهدوء) ولواحد فاش تتعطى ليه شي نصيحة واخا معجباتوش مكيتصرفش بنفس تصرفك
رحيل:(قادات نقابها وضارت جهتو كان واقف بعيد عليها.. كمشات حجبانها) حيت نتا بديتي بلغلط عليها تصرفي كان هاكاك معاك
نوح:(شاف فيها وعينيه على عويناتها لي كانو حمرين ورموشهوم فازگين وبقا ساكت مدة قبل ماينطق بصوت هامس حنين) سمحيليا..
قال كلامو وضار خارج من لبيرو بهدوء كيف دخل مخليها غير تتشوف فيه ومفاهمة تاحاجة.. اعتدارو خربقهاا وخلاهاا تحس بتأنيب الضمير بدا كيزورها على هضرتها تاهي لي قالت ليه.. حكات يديها بزوج بتوتر وساست راسها من الأفكار لي هلكوها على لموضوع وقررات تكمل خدمتها وتلهي راسها حسن ليهاا من تخمام الزايد.. أما نوح فملي خرج من عندها رجع لبيرو هز مسائلو ونزل لتحت مضور عينو على لخدامة تالمح ربيعة لي كانت تتمسح الأرض وحادرة راسها كمش فيها حجبااانو قبل مايخرج ويمشي بحالو..
سالات خدمتها وهزات صاكها خارجة بهدوء وتلغون فيديها تاتهضر مع ريان لي كان يتسناهاا لتحت.. بقات تاتكتب فالمساج تاسمعات صوت بهيجة لي كانت تتعيط ليهاا.. ضارت رحيل جهتها وغير شافتها عرفاتها.. وقفات قدامها بهيجة ونطقات بهدوء:بغيت نطلب السماحة داك النهار سديت عليك لباب ومكنتش عارفاك تم سمحيلياا الالة
رحيل:(تنهدات وتبسمات ليهاا بهدوء) ماعليش لغلط كيوقع
بهيجة:شكرا ليك بزااف أنا سميتي بهيجة والاحتاجيتي أي حاجة مرحباا
رحيل:متشرفين أنا رحيل (تبسمات تاني) الله يعاون
خلاتها رحيل وخرجات لبرا لقات ريان مربع يديه وعاقد حجبانوو أو وجهوو بحال شي خريطة تحت عينيه زرااق وجنب فموو تاهو وفاصمة على حاجبوو لي تغرز ليه وبلا لطراس ديديه لي لعضومة ديالهاا تجرحوو بقوة لكروشيات.. حركات راسها بهدوء وقربات جهتو تاوقفات حداها وقالت:كيبقيتي؟
ريان:صافا
رحيل:باقي لدابا مافهمتش كيفااش طرا ليك كنتي غادي تفوح وصدقتي راااجع بهاد لحالة؟؟
ريان:(ضرب برجليه الكياس لي فالأرض وقال) والو شي وحدين بغاااو يترباو وعاودنا ليهوم الترابي
رحيل:(جراتو من يديه لي مكضروش) زيد او وجد راسك لهضرة لي تابعااك
ريان:(شاف فيها) نسيت مقلت ليك لواليدة مشات لسبيطار
رحيل:(وقفات شافت فيه وعينيها خارجين) اويلي مااالها؟
ريان:محمد طه قال ليا جاها شي وجع وعيط لبابا وداها لسبيطار
رحيل:وهي بخير دابا ياك
ريان:اه رجعو ماتخمميش غير خلينا نمشيو دابا
شدو طاكسي لي وصلاتهوم تال لباب ديال الدار وبانت ليهوم طوموبيل ديال إسلام تم.. نزلو ولقاو إدريس ومحمد طه جالسين فالصالة مع إسلام.. قرب ريان كيسلم ورحيل هزات نقابها وقربات تاهي سلمات عليه ونسات لهضرة لي تقالت ليها قبل..
إسلام:(كمش حجبانو فريان) مالك اصاحبي فوجهك ياك لباس؟
ريان:(حط يديه على وجهو وعينيه هربو جهة باه) احم غي واحد لمشكيل بسيط
محمد طه:(ضحك) وجهك رجع خريطة وتتقول مشكيل بسيط ههه
ريان:(خنزر فيه ونطق بسرعة) غانمشي نشوف مي كي بقات
ناض طلع لفوق عند تانيرت لي كانت جالسة مع رحيل لي طلعات عندها قبيلة.. كان وجهها صفر وباين فيها عيانة وعينيها ذابلين ولكن غير شافت وجه ريان وهي تگعد من بلاصتها وخرجات عينيهاا فيه مخلوعة مع لبارح مكانتش شافتو فالليل وليوم الصباح مناضتش بكري وكان هو مشى لخدمتوو
تانيرت:(شفايفها بياضو) اويلي مااالك فوجهك ؟
ريان:(قرب جهتهاا وتنهد) ماواقع والو بلاماتخلعي علياا غير تناقشت مع واحد خونا وصااف
تانيرت:(تتقيس وجهو) كيفاش مانخاافش أو وجهك حالتو هااا
ريان:(تبسم ليها) وصافي عارفة ولدك مكتهدو تاحاجة بلاماتشطني لياا راسك ازين ديالي
رحيل:(حطات يديها على حنك مها ونطقات بحنية) دابا شوية؟
تانيرت:(تبسمات ليها بتعب) حمدلله ابنتي
ريان:(باسها فحنكها تاتسمعات لبوسة وقال بحب) هاد لبرهووش كيعدبك ليناا بزااف
تانيرت:(تبسمات ليه وجراتو تاحط راسو على صدرها وجرات تارحيل ونطقات بهدوء) بحال تانتا فاش كنت حاملة بيك تعدبت ماشي بحال رحيل حمالتهاا دازت عادية
رحيل:(تبسمات) شتي من صغري وأنا درويشة ماشي بحال هاد السالوبار هههه
تحل لباب ودخلات سيدرا وطلعات فوق النموسية تاوقفات قدامهوم وحطات يديها على خصرها ونطقات بغضب طفولي:علاش معنقاهوم وأنا لا
تانيرت:(ضحكات) اجي عندي اشميشتي
سيدرا:(جلسات جنب رحيل وحطات يديها على كرش تانيرت ونطقات ببرائة) واش كاين هنا مومو
رحيل:(تدوز يديها على شعرها)اه مومو صغير وزوين بحالك
سيدرا:(شافت فتانيرت وخرجات عينيها) واش نتي ميميته اتانيرت إينووو؟؟
تكرشخ ريان بالضحك ورحيل تاهي وعينيها على سيدرا لي تتشوف فيهوم بعويناتها لمبطنين أما تانيرت فحناكهاا حمارو بالحشمة وسؤال سيدرا البريء لي خلاهاا ضحك تاهي.. دخل إدريس لي جا يطمن على تانيرت وغير شاف فالديكور وهو يتبسم وسيدرا ناضت جهتو تاهزها وتعلقات فيه: بّا ديدي تانيرت إينو ميمات مومو فكريشة..
تبسم إدريس وهز عينو فتانيرت لي حركات راسها وحنيكاتها تزنگو.. رجع شاف فسيدرا لي معلقة فيه ونطق بهدوء:مكلاتووش ابابا هوو مومو كيكبر فكريشة بحالك نتي فاش كنتي صغيرة كبرتي فلكريشة دماماك
سيدرا:(شافت فرحيل) مامي تاأنا كنت فكريشتك
رحيل:(تبسمات بحزن) اه امامي
إدريس:قبل مانسى راه ولد لحاج غايجي يتعشى معانا ليوم
رحيل:(تقادات فجلستها وكمشات حجبانها) علاش ؟
إدريس:(حرك راسو كيشوف فيها بنظرات هادئة) شنو لي علاش السيد عرضت عليه فيها شي حاجة؟؟
رحيل:(تبسمات بزز فاش عاقت براسها ونطقات بهدوء) لا غير قلت ياكما كاينة شي حاجة وصاف احم مهم شنو غانديرو لعشا باش نوجدوو
إدريس:شوفي نتي لي بغيتي وقولي ليا الاخصاتك شي حاحة نتقداها (شاف فريان) ونتا أجي باغي ندوي معاك
حط سيدرا فالأرض ومشى وريان ناض تيحك راسو وعارف اش تابعوو..لقاه سبقو لبيتو وجالس فوق النموسية كيتسناه.. سد لباب ومشى جهة باه لي ضرب فالبلاصة لي حداه تاسمع صوت إدريس قال بجدية: لبارح مادويتش معاك ولكن هادشي مكيعنيش راني غانميك على لي وقع.. أنا داير فيك التقة لانتاا ولاخوتك وكنتمنى ديك التقة لي داير فيكووم ماتهرسش حيت كون على بال الامشات تاتهرسات عمرها غاترجع كيف كانت
ريان:وأناا واعدتك ابابا بلي عمري غااانخون تقتك عارف بلي شحال هادي كنت طايش وغلطت ولكن هادشي مغايتعاودش دابا
إدريس:(حط يديه على فخدو) واخاا لمرة الجايا ماتبقاااش تلوح راسك فلمشاكيل رد لبااال
ناض إدريس خرج وريان تلاح فوق النموسية وتنهد تنهيدة طويلة وحط يديه على حاجبو لي فيه لفوصمون وغمض عينوو..
---
كانت فالكوزينة تتصاوب لعشاا ورنيم وأسماء معاونينها وريحة الدجاج محمر عاطية فالدار.. كانت تتقاد الشلاظة لي غاترافق الدجاج تاسمعات صوت الباب وقوة لهضرة.. كمشات رحيل حجبانها وقربات جهة لكوزينة واقفة وهي تلقط ودنيها صوتوو وهو كيهضر مع باها.. عضات على شفايفها فاش تفكرات لبلان لي طرا معاه هاد النهار ورجعات تكمل شغالهاا.. أما فالصالة فدخل نوح لقى محمد طه وريان وإسلام حاضرين.. سلم عليهوم وجلس بلاصتو وهي تجي سيدرا لعندو هزها وجلسها فوق ركابيها وهي شدات وجهو ومشات جهة ودنيه تتهضر معاه بشوية:عرفتي مامي دايرة لينا دجيجات
نوح:(ضحك تاتغمضو عينيه وقال تاهو بهمس) بصاح
سيدرا:(حركات حجبانها)اه مامي تاتعرف طيب زوين
دوز يدو على شعرها مبسم وهز راسو فاش سمع صوت إدريس لي نطق: سي لحسن لباس عليه؟
نوح:رجعو لبلاد عندهوم شي مشاكيل فواحد لرض شراهاا
إدريس:اييه لواحد خصو يرد لبال فبحال دوك الأمور
نوح:واييه داكشي ممعاهش مزاح (شاف فريان) ياك لباس مالك فوجهك؟
ريان:(ضحك) غير واحد لمشكيل وصاف
نوح:رد لبال
هضرة تجبد هضرة والكل كان مرتاح فالجلسة ولبنات قايمين بلواجب كيوجدو لعشاا أما تانيرت فمهبطاتش حيت خصها الراحة.. دخلات أسماء لي لقات التحية على نوح لي جاوبها بلامايشوف فيها وبدات تتحط فالطباسل هي ورنيم وريان معاونهوم.. تجمعو الرجال على لعشا وسيدرا جالسة بين نوح وإدريس كل مرة يمد ليها شي واحد شي حاجة تاكلهاا.. ولهضرة ضايرة بناتهوم وغير تعشااو وجمعو مواعن لعشا تحطات صينية دأتاي ودوازو وجلسو تاني مجمعين ونوح محاسش بلوقت نهائيا تاهز عينو وشاف فساعتو لي فيديه كانت طناش ونص.. حط لكاس دأتاي وتبسم:سي إدريس هاد لوقت
إدريس:خليك مزال لحال
نوح:الله يخلف يالاه الله يعاون
سلمو معاه أو وصلو إدريس تال لباب ودعو وسد لباب ونوح تمشى جهة طوموبيلتو وجبد من جيبو لكونطاكط ومع حل الطوموبيل سمع صوت عيط ليه: ولد لحاج
ضار نوح وعينو كيشوفو فهاداك لي جاي جهتو بكاسيطة وقبية مكيبانش وجهو مزيان.. كمش حجبانو كيشوف شكون هادا لي كيعرفو وهو لا.. أما الشخص قرب جهتو تاوقف قداموو ورجع يديه مور ضهرو جبد واحد لمضاا وحط ليد لخرى على كتف نوح ونطق بصوت محلف:هادي على قبل خويا لي دخلتيه لحبببس
مع قالها مع خشى فيه داك لمضى فكرشوو تاكمش نوح عينو بألم وحط يديه على كتف لاخر لي تبسم بحقد وقلب لمضا فحركة زادت وجعات نوح وخلاتو يغمض عينوو ويشهق فاش جر داك لمضاا بزربة..
بعد عليه الشخص بخطوة لور وعينو كيشوفو فيه بحقد وشماتة.. هز راسو وشاف يمين وشماال قبل مايخشي ديك لمضاا ورى ضهرو مخبيها وشاف فيه الشوفة لخرة قبل مايعطي رجلو لريح هاااارب.. أما نوح فلحريق لي حس بيه فكرشوو كان فضيع.. رجليه مبقاوش هازينو تكى على طوموبيلتوو كيتنفس بالجهد وحط يدو على الدقة عاض على شفتوو تااخواو بيه رجليه وطاح فالأرض حدا طوموبيل لي كان بابها باقي محلول.. ناعس على ضهرو وصدرو كيطلع ويهبط بالجهد والضبابة بدات تبان ليه.. وتاباش يجبد تلفونو ويطلب لعوين ماقدرش.. وشوية بشوية بدا يسد عينيه..
طالعة لبيتها وحاسة براسها عيات ملي دخلات من لخدمة وهي فلكوزينة تتوجد فلعشاا وعاد دابا جاها العفو تمشي ترتاح.. حلات لباب وتمشات جهة الطابل دونوي حطات فيها تلفونها وشافت فانعكاسها فلمراياا كانت بفولار وبيجامة فوق منها بنوار وعينيها حمرين بقوة لعياا.. مدات يديها باش تزول لفولار وهي تشوف جهة لبالكون لي كاان مسدود ولقطة لي كان صوتها كيتسمع خافت.. كمشات حجبانها ومشات بخطوات سريعة حلات لباب تاضربها الريح فوجهها وحدرات عينيها جهة لقطة لي كانت تتمخشش فيهاا.. تبسمات وحنات هزاتهاا تتبوسهاا وتتخشيها فصدرها باش دفى حيت باين تحبسات تما مدة ولجو بارد شوية.. بقات واقفة فلبالكوو وهازة راسها لسما لي كانت صافية ولگمرة باينة فيهاا صفراا والنجوووم مستفين فمنظر مريح لعين.. بقات ساهية تتفكر فهضرة نوح واعتدارو لي همس بيه وتبسيمة خفيفة على شفتهاا.. تنهدات وجات دخل ولكن عينيها لمحوو طوموبيلتوو.. كمشات حجبانهاا وبقات تتشوف فيها ونزلات لقطة بزربة وحطات يديها على السطارة دلبالكوو وتعلات شوية على صباعهااا تاطل وبانت ليها غير يديه حيت داتو مغطياها الطوموبيل.. حلات عينيها وبصوت خافت قالت:نوووح
رجعات لداخل بزربة وعقلهاا غايخرج من بلاصتوو حلات لباب دبيتها ونزلات تادردب فالدروووج تادازت من حدا الصالة فين كاين إدريس لي جالس مع إسلام وريان ومحمد طه وغير شافها إدريس ناض طافج من بلاصتو تابعها ماعرفش مالهاا وكلهوم تبعوهاا أما هي حلات لباب ديال الدار وخرجااات تتجري جهة طوموبيل ومع ضارت بان ليهاا جسمو لي كان طايح حدا الطوموبيل مغمض عينوو وحال فمو شوووية شهقات رحيل بصدمة وعينيها عمروو دمووع وتحدرات عندووو بسرعة وبصوت خائف:نووووح
وقف إدريس وعينيه خارجين كيشوووف فيه بعدم تصديق.. يالاه كاان معاهوم صحة سلام اش وقع ليه.. حدرات رحيل عينيها وشهقات تاني فاش بان ليها الدم نازل منوو جهة كرشوو وغوتات بفزع:بابااااا الدددددم
تحنى حداهااا وغير شاف الضربة وهو يهز راسو جهة إسلام غوت بالجهد:عيط لومبيلووووونص ولبوللليس
أماا نوح فكان شبه مغيب وصوتهاا جاه غاااااارق ومخلط مع أصواتهوووم لي مقادرش يفرز اش تيقولو.. بدا كيحرك جفونووو تاحل عينووو الدابلين على وجهها لي كانت محنية جهتوو تتقيس حنكووو وتتفيق فيه.. كانت الشوفة مضببة بالنسبة ليه أما رحيل فاش شافتو حل عينيه تبسمات وشافت فباهاا:حل عينيه
قرب إدريس لعندو وحط يديه على حنك نوح ونطق بصوت باين فيه خاايف ومتوثر: ولد لحاااج صبررر معاناا وماتغيبش
كان تيهز يدو باغي يتحرك ولكن حس براسو بحاال الاتشلل والحررريق ديال الضررربة بدا كيطلع معاااه.. كيسرط ريقووو بزز وتيغمض عينوو ويرجع يحلهااا.. أما رحيل فدموعهاا نزلوو مسرسبين على خدودها وقلبها حسات بيه غايخرج من بلاصتووو وماشي غير هي تالخرين كلهووم تخلعوو ومعرفوووش مالوو وكيفاش طرا هادشي.. النااس بدات تجمع عليهوم مع لغواااات وشي كيشوف فشي ويسول.. أما رحيل مدات يديها لي تيترعدو جهة الضربة باغا تقيسهاا ساعة إدريس شد يديها وقال بجدية: ماتقيسيهاااش باش ماتلوتش
حركات راسها وهي لخلعة شداهااا وكل مرة تهز راسها فإسلام تسولو على لومبيلونص ولبوليس لي باقي مجااااو.. رجعات نزلات راسها جهتوو وشادة وجهووو وبدات تتعيط ليه: نووووح تتسمعني حل عينيك
حل عينووو بشوووية وصوتهاا بداا كيغرااااق كثر وكثر وهي حركات راسهااا بهدوء وهمسات ليه: ماتخافش أناا معاك..
كانت نفس لهمسة لي همس ليها نهار لغابة.. لهمسة لي خلاتها تحس بالراحة وتعطيه لماااان أما هو على ديك لهمسة غمض عينوو ويديه لي كان هاااز طاااحت بالجهد ومبقاااش تحرك.. رحيل غير شافتو هاكاك وهي تغوووووت وشافت فإدريس:بااااابااااا
صوت لومبيلونص والسطافيط دلبوليس بدااا يتسمع كاسر داك الغوات ولهضرة والناس كاملين خارجين كيتفرجو وشي كيطل من الشرجم وشي واقف حدا باب داروو ولبوليس نزلوو وبداو يديرو الطريق لومبيلونص لي نزلو جايبين بياااص تاحطوووه فجنبووو وإدريس نوض رحيل وبعدها عليه مخليهوم يديرو خدمتهووم هزوه بشوية ودارو ليه السماطي متبتينوو وهزو لبياص غادين بيه بالزربة باش يديرو ليه الإسعافات الأولية.. رحيل بلاماتحس لقات راسها تابعاهوووم تاوقفات حداا لومبيلونص ونطقات بصوت مبحووح:غانمشي معاه
إدريس:(تبعها وقال بجدية) سيري معاه هاحنا غانتبعوكوووم واخا
حركات راسها باه وطلعات جلسات فالجنب وتسدو بيبان لومبيلونص لي بدات تحرك طالقة داك الصوت لي كيبورش ورحيل عينيها غير على نوح لي كان مغيب ومحاسش بلي ضاير بيه..
هادي هي الدنيا تاحد معارف اش مخبية ليه وشنو غايدوز فيها.. الدنيا لي مرة تبكينا ومرة تفرحنا ولي فكل حاجة كطرا لينا تتخلينا ناخدو واحد الدرس أو واحد لعبرة لي تتبقى معاناا وتنزيدوها فرصيد المعرفي ديالناا.. كاينين نااس لي وجودهوم فحياتناا تيأزمها وكاين لي وجودهوم بحال شي بلسم لجروحنااا.. وربي كيحطهوم فطريقناا باش ينسيونا لعداب لي دزنا منووو.. دخل لحياتهاا بدون سابق إندار وعتقهاا واخا مكيعرفهااش ربي حطو فطريقها ديك الليلة باش يفكها من يدين بدر الدين.. ومن داك النهار والصدف جمعاتهووم مع بعضياتهوووم وجمعوهوم مواقف لي كانت تتخلي رحيل تحس بالحشمة من جهتوو.. ولكن فنفس لوقت كانت تتحس بالراحة معاه بحال الاكتعرفو من شحال هادي.. وتصرفاتو معاهاا كانو كيزيدو يخليوو دوك المشاعر دالأمان والراحة فحضورو يتوغلو داخلهاا.. عينيها لخضرين كاانو مفيكسين على وجهوو لي كان مغمض عينيه بحال الاغير ناعس وقناع الأوكسيجين على نيفووو.. فاش شافتو فداك لمنظر تخلعات وقلبها تهز وسط صدرهاا ومعرفاااتش علاش.. نزلات عويناتها ليديه لي فيها لخاتم ولي كانت طايح جنب ولي كان فيها الدم.. مدات يديها لي تترعش وشداتهاا وزيرات عليهاا.. وبدات تادوز يديهاا على لخاتم لي ديما لابسووو..كانت تتصرف بناءا على قلبها وشنو كيملي عليهاا.. الطريق كانت طووويلة بالنسبة ليها ودوك لفرملين ديجا هضرو مع السبيطار لي موجدين لبلوك على قبل حالتوو.. الدم ماحبسش من الضربة لي رحيل ماقدراتش تشوف فيهاا حدها تتشوف فوجهوو ويديه تاوصلو قدام السبيطاار أو وقفوو ولباب دلومبيلونص تحل ونزلوو لفرملين جارين لبيااص ورحيل نزلات معاهوم وتابعاااهوووم وفنفس اللحظة وقف إسلام طوموبيلتو ونزل هو وإدريس وريان وأسماء لي جاااو تابعينهووم.. دخلوه لبلوك ورحيل ضارت جهة باهاا ومشات عنقاتوو بالجهد تتبكي.. درعها إدريس بيديه وتاهو مخلوع على شنووو وقع..
أسماء:(كمشات حجبانها) كيفاااش وقع هادشي وشكووون ضربو
ريان:(شاف فيها) شكون عرف يقدر شي حد كان باغي يگريسيه؟؟
أسماء:(شافت فرحيل لي مخشية فإدريس تتبكي) تت لمشاكيل عمرناا مغانتهناو منهوووم (سكتات مدة قبل ماتنطق بخفوت) زعمة مايكووونش داك لحيوان هو مولاهاا؟؟
صوتها وصل مسامع رحيل لي زيرات على إدريس لي خنزر فأسماء وهي ضربات الطم.. هي مقصداتش شي حاجة فهضرتها ولكن رحيل عقلهاا بدا يفصل ويخيط هي عارفة بدر الدين حاضيهااا وعارف تحركاتهاا والدليل هو لكلي لي سيفط ولغعلة لي دار فلقطة دسيدرا.. زعمة يكووون هوو لي دارهاا حيت عارفها خدامة عندوو؟؟ حركات راسها مباغاش تفكر فالموضوع ومباغااش يكون بدر مول لفعلة حيت ماتقدرش تحمل باركة غير لي هادوك لي تأداوو بسبابها مبغاش تزيد تانوووح وأشخاص خرين ماعندهووم دنب من غير أنهم كيعاونوهاا..
خرجات لفرملية جايبة ليهوم تلفونو وبزطامو وساعتوو وگاع داكشي لي كان لابس مداتوو ليهوم ورحيل هي لي شداتو مع كانت قريبة ليهاا وإدريس نطق:هو بخير طمنينا عليه ابنتي
لفرملية:مانقدرش نعطيكوم تاشي خبار عليه داباا سمحوليا
مشات لفرملية ورحيل نزلات عينيها لتلفونو لي شعل كيصوني.. جبداتو من ديك لبلاستيك فين داروه وبانت ليها الشاشة لي منوورة بسمية "يمّا" بدات تترعد وشافت فإدريس لي تاهوو كان تيشوف فشكون تيعيط.. نطق يهدوء:جاوبيها ابنتي
دوزات رحيل لخط وحطات تلفونو على ودنيها وجاها صوت رحمة لي كان رقيق وحنين:لمرضي ديالي فينك عييت مانصوني ومكتجاوبش
رحيل:(عضات على شفتها ونطقات بخفوت)ألو
رحمة:(كمشات حجبانها وزولات تلفون من ودنيها تتأكد ياكما غلطات فالنمرة وفاش تأكدت رجعات التلفون وقالت بتساؤل) شكون نتي وفين ولدي؟
رحيل:(حاسة بلخنقة ) هو احم (غمضات عينيها ونطقات بسرعة) ولدك فالسبيطار
رحمة:(بصدمة) كيفاااش ووولدي (غوتات بالجهد) ولددددددددددددددددددددددي
غضمات رحيل عينيها وهي تتسمع غوااات رحمة لي كان تيصمك الودنين ولي خلى تبوريشة طلع معاهاا وعينيها رجعو يدمعوو.. كانت تاتسمع غير لغوات ولهضرة لكثيررررة تاوصلهاا صوت بيسان لي نطق بخوووف واضح من نبرة صوتها:شكوون معاياا وخويا فين هوو؟؟
رحيل:(بخفوت) هو ف*** دخلوه لبلووك
بيسان:(شهقات وبدات دخل وتخرج فلهضرة) مالو اش وقع ليه علاش هوو خويااا
تقطع لخط على رحيل لي هزات راسها فإدريس لي جالس حداها وحاط يدو على كتفهاا.. أما هي شدات راسهاا بين يديها وسكتات.. كان لوقت تايدوز تقيل وإدريس غادي جااي وبالو مشطوون مع نوح لي معتابرو من عائلتوو.. وإسلام وريان واقفين فالجنب تاهوما كيتسناو شي خبار.. كانت تاتشوف فديك لخنيشة فين دايرين مسائلو لي حيدو ليه وحلاتها بهدوء جبدات منها لخاتم لي كايدير ديماا.. بقات تتشوف فيه وفديك لجوهارة لكحلة ومع حركاتو بين يديها ردات ليها لبال فلونهاا أنها ماشي كحلة إنما زرق غاااامق ومع الضوو عاد بان ليهاا داخل ديك لجوهارة مكتوبة سمية "ناصر"
بقات تتلمس فيه تاسمعااااات غواااات رحمة لي كااانت جاياا بجلابة فلكحل ولايحة على راسها فولار تايزلق ومبين شعرها لكحل وعينيها حمرررين ودموعهااا كايطيحووو مسرسبين كيف حبات الرمااان فوق حناكهاا وبصوت محروووق:ولدي فيييين ولدي المرضي ديااااالي فينوووو
رجليها مبقاوش هازينها وطاحت الارض على ركابيها تاتسمع صوت الطيحة وضربات فخادها بكل جهدها وبقوة لحر لي حسات بيه هبطااات حناكها كلهوم بلقميش وغوتات تاتبح صوتهاا: واااااااااعبااااااد الله رزااااااوني فووووووولدي وااااااع
كانت بيسان محنية على مها تااتنوض فيها وهي بحال الاغيبات على لواقع.. ملي جات سولات فلغسيبسيون عليه وقالو ليها راه تضرب بموس وهو فلبلووك حسات بروحها بغااات تخرج من بلاصتهاا.. رحيل كانوو عينيها معلقين على ديك الأم لي قلبها محرووق على كبدتهاا وناضت جهتهاا تحنات تاهي تتعاون بيسان تانوضوهاا وهي صافي فشلات.. جلسوها فالكراسى وبيسان بدات تتحك ليها يديهاا وعينيها تاهي منفوخين بالدموووع أو وجهها صفر بالخلعة: مامااااا عفااااك توگضي معاااايااا امامااا
رحمة كااانو عينيها حمرين ومحلولين وشفايفهاا بياااضوو.. شافت فبيساااان ونطقات بصوت خافت: بغاااو يرزيووووني فكبدتي بغاااو يرزيووووووني فخووووك (ضربات صدرهاا ونطقات بحرقة) بغاااو يشويوني فكبدتي وياااااربي
دموع بيسان نزلوو وشهقاااتها بداو يتسمعو.. بصح هي طبيبة وبحال هاد لحالات تتشوفهوم فالسبيطار وراه تتشوف ماكفس ولكن فاش الأمر كيتعلق بحد من المقرابين ديااالك وبالناس لي كاتبغي فضروري مكتنهاار بحالها هي..
رحيل:(شدات يد رحمة ونطقات بصوت خافت) إن شاء الله غايكون بخير
بيسان:(شافت فيهاا ونطقات بتساؤل) شنو وقع ليه وشكووون ضربو؟؟
رحيل:ماعرفتش (بدات تتعاود اش وقع وبيسان مكمشة حجبانهاا.. مدات ليها رحيل لبلاستيكة فين كاين مسائلو من غير الخاتم لي خدات) هادو دياولو
شداتهوم بيسان وحركات راسهاا وشافت فرحيل:عفاك بقاي معاها أنا جاية
ناضت بيسان غادة تسول على خوهاا وفنفس لوقت تتصوني لرؤوف لي مكانش تيجااوب.. ضربات يديها مع لحيط ونطقات بعصبية:علااااش فاااش كانبغيوووك وكنحتاااجوووك مكنلقاوكش معاناا علاااش اااااع
كانت رحيل مع رحمة حضياهاا وهي غير تتنهد وتردد ولدي رزاوني فولدي.. أما أسماء جاتها عجب كيفااش غير مو وختو لي جاااو واش ماعندوووش باه وماعندووش لعائلة؟؟ بقات تتشوف فرحمة وتدقق فيهاا جاتها صغيرة على أنها تكووون ممات نوووح وكون مكانتش تتعرف كون قالت راه ختوو لكبيرة وماشي مووو.. قلبات أسماء وجهها وشافت جهة ريان وإسلام لي تاهوو شاف فيها وهز حاجبوو أما هي خنزرات فيه وقلبات عليه وجهها.. باقا مانساتش ليه التصرفيقة وباقا تتسنى لوقت لي تردها ليه.. أما هو حرك راسو ببرود ورجع شاف فرحيل وهو يكمش حجباانو يالااه رد لبال أنها خرجات بلانقابهاا.. تمشى جهتها تاوقف حداهاا وقال:رحيل
رحيل:(شافت فيه) نعام
إسلام:نقابك؟؟
رحيل:(مدات يديها وغير قاست وجهها وهي تشهق بحال الايالاه توگضااات وعاقت بلي ملبساتوش حيت بقوة لخلعة وشنو طراا نسات ديروو) نسيتوو
قرب جهتهوم إدريس لي سمع هضرتهوم ونطق بهدوء:ماعليش تاتوقع ابنتي
سكتات رحيل وهي تتفكر فلهضرة لي كان قال ليها نوح على النقاب هي بصح دارتو حيت باغاه ولكن لقات راسها أنهاا مادايراش بشروطو كما يجيب ودابا گاع نسات مدارتووش.. حطات يديها على راسها تتقاد فولارهاا ورجعات شافت فرحمة لي باقي على حالهااا.. أما بيساان فمشات سولات ولقاتو باقي فلبلووك حالتو صعيبة حيت الدقة قاست الأعضاء الداخلية ونزف الدم بزاااف.. وخصو ضروري لي يتبرع ليه حيت باقي محتاج يعوض الدم لي خسر
طلعات بيسان عندهوم وشافت فيهوم بهدوء مزيف تتحاول تغطي بيه داك الانهيار لي حاسة بيه: شكون فيكوم لي زمرة دموو O-
شافو فيها جميع وقرب ريان جهتهاا ونطق بهدوء: أنااا
بيسان:واخا تجي معاياا عفاااك
حرك راسو باه ومشى معاهاا لفين غايتبرع.. وصلاتو بيسان وشافت فلممرضة:هاهو لي غايتبرع
جلس ريان وبدا كيطلع كمام يديه ونطقات لفرملية تتسولو:واش عندك شي مرض ؟ ولاتتاخد شي دواا
ريان:لا
حركاات راسها وبدات تتاخد ليه الدم.. شافت فيه بيسان ونطقات بهدوء:شكرا
خرجات من تما راجعة تاني تشوف حالة خوها.. ركبات فلاسونسور باش تهبط لتحت وبالها ساهي تادخل واحد لابس قبية وكاسكيط.. تحل لسونسور وخرجات بيسان وموراها داك الشخص لي عينو كيضورو فلكولوار لي كان خااوي مع جهة لبلوك مكيكون فيه حد زرب فخطواتو تاشدها من يديها وهي خرجات فيه عينيها بلخلعة.. دفعها على لحيط لي وراهااا ومد يدو لشفايفهاا حابس فيها النفس وهي دموعها عمروووو عينيها بدات تتقاومو ولكن مقاومتها بأت بالفشل مجرد ماحسات بشي حاجة باردة تحطات فوق من عنقهااا..
االخوف كان باين من عينيها لي محلولين على جهدهوووم ويديها لي بدات تاترعد.. كاتشوف فهاداك لي حاط لموس على رقبتهاا وكايشوف فيهاا شوفات شرانية وناوي ليهاا على خزيت.. قلبها كان يضرب يضرب وكأنها فشي سباااق.. أما لاخر زاد زير على لموس لي على عنقهاا ونطق بصوت هامس كالفحيح: خوووك مشى ودابا جات نوبتك
بيسان:(بخووف) شكوووون نتاا وشنو باغي مناا
عينيه ظلاموو وتبسيمة خفيفة على شفتوو: أناا هو لي غانشتت شمل عائلتكوووم كيما خوك شتت شملنااا
بيسان:(سرطات ريقها وباقا لحد الآن معرفاهش شكون هو وشنو باغي منهوم.. نطقات وعينيها الزرقين عامرين بالدموع) مكنعرفش شكووون نتا باش نشتتو ليكوم شملكووووم اااااااي
غوتات بيسان فاش حسات بيه ورك على لموووس جهة عنقهااا تاحسات بشي حاجة سخووونة نازلة منهااا.. عضات على شفتهاا ولاخر كرز على سنيه ونطق بصووووت قاصح: غاتحركي قدااامي والافكرتي ديري شي حركة ماهيااااش لموووس لي على رقبتك غايتخشى فيك وتبعي خووووك
بيسان:(كانت خايفة وكلها تتترعد وبدات تتبكي) عفااااك خليني نمشي هء هء
حمر فيها الشوفة: قتلتي منّا وخووووك دخل ليا خويا لحبس ولكن برب لبقاااات فيكووم (نهض فيها) تحركي قدامي
عينين بيسان الدامعين تحلوووو على جهدهووم ملي سمعات هضرتوو لي خلات قلبهاا يضرب وعقلهاا يفكرهاا فشنوو وقع.. حركات راسها مقدراش تيق لي سمعات تارجع ورك عليهااا وجرها معاه وهي عقلها مرفوووع وحاجة وحدة لي كانت تتفكر فيهاا هي خوها لي بين لحياة ولموت بسبابها هي.. كان مضور يديه على خصرها ومقربها ليه وشادها بين يديه بالجهد مامخلي ليهااا فين تحرك ولموس كان خاشيه فكم يديه باش ميبان حاطوو ليها على جنبها بحال الاشادها وغادي بيها جهة برااا.. معرفاش علياش ناوي ولكن دارتها فيد الله ومشات معاه وعينيها كيضوروو وكتمنى تشوف شي حد لي يقدر يعتقها ساعة تاواحد مداها فيها.. عضات على شغتها ودمعتها نازلة كتسرسب على حنكهاا..
كانت رحيل باقا جالسة جنب رحمة لي على حالهاا ومرة مرة تهز راسها جهة الكولوار تتسنى بيسان تجي.. رجعات شافت فرحمة وناضت من حداهاا غادة عند أسماء لي كانت جالسة أونفاص معاهاا ونطقات بهدوء:خليك معاهاا انمشي نشوف ريان
أسماء:واخاا
مشات رحيل وهي مكمشة فلبينوار وعينيها كيقلبوو على ريان تاوقفات واحد لفرملية سولاتها وهي تنعت ليها لبلاصة فين كاين ومشات عندووو.. كان متكي كيشرب لعصير لي جابت ليه لفرملية باش مايدوخش وغير تحل لباب وهو يهز راسو وبانت ليه رحيل لي قربات جهتو ونطقات بهدوء: ياكما حاس براسك دايخ
ريان:لااا جابو ليا لعصير وزايدون ماخداوش مني دم بزاااف
رحيل:(تبسمات ليه) واخا زيد نرجعوو لفوق
شدات فيه وهو درعهاا بين يديه ونطق بهدوء:خرجتي بلانقابك
رحيل:(تنهدات) بقوة التلفة نسيتو
ريان:(كمش حجبانها) صراحة معرفتش علاش درتيه ارحيل
رحيل:(وقفات تتشوف فيه) فاش شفتو فلمانكان حبيت نجربو وحسيت بلي باغا تاأنا نديروو وفاش لبستو أول نهار حسيت بالراحة فيه
ريان:(حط يدو على حنكها وقال بحنية) عادي تتوقع
هزات رحيل راسها ومع جات تنطق بانت ليها بيسان لي دايزة من بعيد مع داك الشخص غاديين لبرا السبيطار.. كمشات حجبانها ونطقات بتساؤل:هااء واش هاديك ماشي خت نوح
قالتها وهي تتشير عليها وريان ضار شاف الديكوور وجاهوم فشكل: اه هي بيسان
تبعوها بزووج وبداو كيزربو فخطواتهووم باش يلحقوو عليهووم وهي تنطق رحيل بصوووت مرتافع:بيسااااااااااان
صوتها وصل لمسامع بيسان والشخص لي غادي معاهاا ولي زاااد ورك ليها على لمووس لي فجنبهااا تاكمشات حجبانها وهو نطق بصووووت قاصح:تحررركي وماتلفتيش وراااك
بقاو مكملين على مشيتهوووم ورحيل وريان طاح ليهوم لعجب وهاد لمرة ريااان هو لي عيييط ليها بصوووت عالي:بييييييييسان
وصلو جهة طوموبيلتهاا وقبل ماتحلهاا ضارت بيسان على غفلة من هاداك الشخص وشافت فيهوووم وغوتاااااات بصوت بااااكي:عتقوووووووووني
صوتها خلى الناس لي تمااا يتجمعووو في سااااع وداك خونا زير عليهاا فالشدة وجبد ديك لمضااا وحطها ليها على عنقهااا وهو شادهاا تاعوووج ليها راسهاا ونطق بصووت عالي:يقررررب شي زاااا*مل نحرهااااا شهقات رحيل وهي حاطة يديها على فمهااا والكل كان متفاااجئ من الشي لي وقع بزربة وكاين لي جابد التلفووووون كيصوور فالحدث وكأنهوم كيتفرجو فشي فيلم.. الجوووقة تجمعااات ولاخر يضور هنا ولهيه ومزير على لموووس لي فعنقهااا تابدات ترجف ولخلعة شدااااهاا وكرشهاا تتعصر عليهاا.. عمرها تحطات فبحال هاد لموووقف وعمرها حسات بلخووووف بحاال لي حساااتو فهاد لمرة هادي.. قرب ريااان شوية جهتتو تاحس بيد رحيل شاداااه وهي خايفة عليه وعينيهااا خارجين وهو غمض عينوو ليها كيطمنهاا ورحع شاف فلاخر ونطق:هببببط داكشي لي فيديك وخلينااا نتفاااهمو بلعقللل
ضحك لااااخر ضحكة عالية بحاااال شي مسطي وقاااال بصراااخ: لمفاااهمة خليتهاا ليكوووم اولاد لقح*ااااب بررررب ويقرب شي حد يتااااانقتلهااا ونتبعهااا لخوووووهااا
شهقات رحيل فاش سمعاتووو اش قااال وفهمات بلي هو لي ضرب نوووح.. من ناحية قلبها رتااح أنها مكانتش السبب الرئيسي فحالتو ومن نااااحية اخرى خافت على بيسان لي حالتها حالة.. رحيل بوحدها لي عارفة شنووو هو إحساس بيسااان فهاد اللحظة حيت هيي عاشتوو قبل منهااا.. زيرات رحيل على يديهاا وصدرها كيطلع وينزززلل وبين عينيهاا كانت تتشوف غير بدر الدين نهاااار كان باغي يغتاااصبهاا وهزاااات لموووس وخشاتوو فيه بلارحمة.. حطااات يديها على ودنيهاا وبدات تتبكي أما ريان فكاان مبعد عليها شوية ومشفاهااش وبالوو مع بيسااان لي لاخر نسى راسو وبدا يورك على لموووس تادمهاا سااال..
ريااان:(خنزر فيه) اااش دارت ليك بااش تستقوى عليهاا
زير لاخر على لموس وعينو خارجين فريان وبدا يغوووت: هاااااد ولاد لقح*اب گزااااارة تيگزرووو فعباااد الله.. مي كااااانت صحة سلاااام تجاااات لسبيطاااار وهوووومااا قتلوووهاا وهي مابيهااا واااالوووو زوا*مل داااايرين رااااسهووم طبة وهووووما غير لگزاااار على خووووه تجي عندهوووم بصحتتتك ويخرجووووك معطووب ولااااميت رزااااوني فمي وجاااات نووووبة خويااا تاااهو دخلووووه ليا لحبس برب لاتفاكيت معاااااهوم وليووووم نطيح الروووووووح ونووووريكووووم كيفاااش تستقوووواو على الدراااااوش
كيهضر وينهج وعقلووو خااارج من بلاصتووو ومردش لبااااال لهاااداااك لي كاااان جااااي ورااااه بخطوااات بطيئة وعينووو على داااك ليد لي هااااز بيهاا ديك لمضااا وكيشالي بيهاااا.. كان مقرب جهتوووو تافلحظة نقز عليه وشد ليه يديه منزلها ليه ولاخرررر طلق من بيسان ودفعهاا تجاااات طااايحة فالأرض مقصحةة وريااان قرب عندهاا كينووووض فيهاا وهز عينووو كيشوووف فإسلام لي كاااان مشاد مع لاخر وشي دراري تاهووو دخلوووو وشدوووه كيتسناااو لبوللليس يجيو ولاخر كيطرطى بين يديهوووم... نهار ماتت مووو وخوه دخل لحبس بسبب تهجموو على بيساان عينيه ظلااامت وحقد ومبقاا تيشوف تاحاجة قدااامو من غير يندم لي كااانو السباب.. ديك لفترة كلها وهو حاااضي نوح فالدخلة ولخرجة ليه تاااجاا لوقت فين يرد ليه الدقةة لي حاسفهاا فيه وبغاا يكمل تابختووو لي كااانت السباب ساعة مصدقااااتش ليه.. صوت الصطافيط دلبوليس كانو مسمعو ونزل منهااا الشااااف ديالهوم ولبوليسين لي شدوووه مينوطاااوه وداااوه.. قرب إسلام من عند ريان لي كان تينوض بيسان لي فشلااات حيت عمرهاا طاااحت فبحال هاد لمووقف وجاتهاا قاصحة داكشي علاااش فشلات ليهوووم.. تعاونوو عليها تانوضوهاا وجهها صفر وعينيها الزرقين منفوخين بلبكاا أما عنقهاا كان مجروح والدم نازل ليهاا شدووهاا غادين بيها لداخل تاعااق ريااان بلي رحيل مكيناش معاهوم وهو يخرج عينوو وطلق يديه من بيسان لي كانت غاطيح كون ماإسلام لي شدهاا ونطق بصووووت عالي وهو راجع لبراااا:رحيييييييييييل
كان إسلام باقي شاد بيسان لي لاحت تقلها عليه.. بالو مع ريان ولهضرة لي قااال.. هز عينوو بانت ليه واحد لفرملية وهو يعيط ليها تجات حداه ونطق بهدوء:عندهاا واحد لجرحة فعنقهاا
لفرملية:مالها شنو طرا ليها
إسلام:(طلق من بيسان لي شداتها لفرملية وقال بجدية) هادي خدمتك الأخت
تمشى باش يخرج وهوو يسمع أسماء لي كانت تتعيط ليه.. ضار شاف فيها هاز حاجبو وهي عينيها كانت على بيسان لي داتها لفرملية.. رجعات شافت فإسلام وقالت ببرود:مال هاديك شواقع ليها؟
إسلام:ماعرفتش
جااا يمشي وهي تشد ليه فدراعو تضار شاف فيها وقال بعصبية:اش باغااا؟؟
أسماء؛مشيتي تشوف رحيل وريان فين هوماا؟؟
إسلام:(مسح على شعروو وقال بقلة حيلة) وقع مشكيل كبير ورحيل معرفنااش فين هي
أسماء:(خرجااات عينيها فيه) هااااويلي من نيتك
إسلام خنزر فيها وخرج وهي تابعاه تتجري تاخرجو من السبيطار وهوما يبان ليهوم ريان واقف كي شي مسطي كيضووور هنا ولهيه ويمسح على شعرووو.. وقفو حداه ونطقات أسماء بصراخ:فييييييين رحيل شنو طرااا ليهاا
ريان:(تاالف وحاس بلخلعة) كانت هناا معاياا ماعرفتش فين مشاااات
إسلام:(شدو من كتفوو) تبت دابااا وسمعني سير نتاا لديك الجيه قلب عليهاا ونتي (شاف فأسماء) رجعي لسبيطار وشوفي ياكما رجعااات وأنا غانمشي من الجيهة لخرا لي لقاهااا يعيط لاخررر وااخاا
حركوو راسهوم بالإيجاب وكل واحد مشى يقلب عليهاا.. ريان كان غادي تيجري ومع الجهد لي دار والدم لي سحبوو منوو حس بالدوخة ومع دلك بقا مكااابر حيت الهم ديالو هو يلقى رحيل حالياا وديك الساعة لي بغا يوقع يوقع.. خااايف يكون بدر غفلهووم ورجع داهاا معااه ومبغااش يكون هو السبب أن ختوو رجعات لداك الجحيم لي كانت فيه.. وقف وسط الطريق ونطق بصووت خااايف مدمر:رحييييل فينك
رجليها غاديين بيهاا ويديها على ودنيهاا وكلهاا تترعد.. معرفاتش علاش تفكرااات بدر وشنوو طراا معااهاا ديك الليلة مجرد مشافت بيسان وحالتهاا.. قلبها غايخرج بلاصتوو وعينيها عامرين دموووع.. معرفاااتش فين غادة وإيناا طريق سلكااات تاوقفات حداا واحد الشجرة وهي تكى عليهاا وحضنااات راسهاا بيديهاا وبقات تاضوور راسها يمين وشمال بحال شي بنت صغيييرة.. تاعينيهاا لمحوو طوموبيل كحلة فجنب الطريق وبعيدة عليها شوية.. قلب قفز من وسط ضلوعها ملي هبط الزااج وبان ليهاا وجه بدر الدين لي كاااان تيشوف فيهاا بنظراااتو لمراااضين.. كااانت حالة عينيها والنفس حسات بيه ضياااق فريتهاا شوفتووو وفهاد لحااالة لي هي فيها زادت ريبااات داك لجدار لي كانت تتبنيه هاد السنين كلهااا من نهار بدات علاجهااا.. كانت تاطيح وتنووض فكل مرة ولكن دابااا شوفتوو رجعااات زرعات لخوف داخلهاا.. كانت تتشوف بين عينيهاا غير دوووك الشهور لي دوزات فالداخلة ولي كااانوو أكفس أيام حياتهااا... لحبس لي كان تيحبسها عاصم وحقيقتو لي صدمها بيها نهار زواجها بيه ولعداب لي شافت وهي باقاا حية.. كلشي تفكرااااتو وبقااات وااقفة جااامدة والدم هرب من وجهها وشفايفهاا أما هوو شوفتها نعشات روحووو وخلات عينوو يراقبو كل تفاصيل وجهها لي مشتاق ليهوووم.. كاان بحال شي واحد مبلي بلكوكاااين فااش تياخد الجرعة تايحس براسو طاير السماا نفس حالتوو فاش شافهاا.. مانزلش عندهاا وماقربش ليها مع العلم بإمكانو يستاغل الفرصة ويرجعهاا معاه ولكن مدارهااش فقط بقاا مراقبهااا تابداا يطلع الزااااااج لي خلى وجهوو يغبر على عينيهاا والطوموبيل تحركااات ومشات فلحظة لي حساات رحيل بيد تحطااات على كتفهاا قفزاتهاا.. كان إسلام لي فاش قشعها بدا يعيط ليهاا وهي والو بحال شي تمثال جمد على نفس لحركة تاقاسهاا عاد شافت فيه.. بدات تتحرك راسها ورجعات شافت فلبلاصة فين كانت طوموبيل وهي ممتيقاااش واش شافت بدر.. أكيد هي غير تخيلااااتو حيت كون شافها مكانش أيخليهاا.. زعمة واش غاتكووون تسوطات فعقلهاا تابدااات تتشوفو ولا بصح نيت شافتوو.. بقات تتحرك راسها بلا وهي حادرة راسهاا وبكاهاا بدا يتسمع مجهد تاخلعااات إسلام لي معرفش اش وقع ليهاا قرب باش يهدنهاا ولكن نفورها منوو خلاه يوقف بعيد عيط لريان علمو فين هووو ورجع كيشوف فيهاا ويهضر بشوية كيهدن فيها: رحييييل واااش نتي بخيرررر
مكتحاوبوش بقات غير تتبكي تاااجاا ريان وجهو مخطوف غير شافهاا هاكا قرب جهتها عنقهاا وهي بدات تتكبي وتشهق فصدرووو تاحس بيها هدااات ونطقات بصوت خافت: عيييييييييت أنااا عييييييييت
ريان:(كيمسح على راسها وضهرها) أنا معاااك كلنااا معاااك نتي غير صبرررري على قبلنااا
رحيل:(شهقات فوسط صدروو وقالت بصوت غادي وكيقل) ياااااااااااربي خوووود روووحي وهنيني من هاااد لعداااااب ياااااااربي هء هء
بقاو معاااها إسلام ورياان كيهدنوو فيهاا وحالتها وهضرتهاا خلاتهوم يسكتوو ويحسوو بقلبهوم تزير عليهوم.. هدنوووهاا عاد جرها ريان وهو باقي معنقهاا وموراه إسلام لي كان داير يديه فجيابو كيشوف فيهاا بحزن.. هو اكثر وحد يقدر يفهم حالتهاا حيت تاهو بحالهاا.. باقي ديك النقطة لكحلة لي فداخلهووم ماتمحاتش واخا دازو عليهاا الاعواام كيف هو باقي ماتقبلش موووت بنتوو وتخطاه هي باقاا ماتخطاتش موت جيداء لي لحد الآن عمرهاا ممشات لقبرهاا تزورو وعمرها هضرات عليهاا من غير حوارها لي ضار بينها وبين محمد طه فداك النهااار.. وزيد السبب دلمشكيل باقي حررر طليق وهي فيما تتقول خطات خطوة لقدام غير شوفتو تاتخليها ترجع عشرة لوووور.. عيااات وجهدهاا بداا يقلال ومع دلك باقا متشبتة بإيمانها بلي غايجي النهار لي غاتشرق فيه شمس حياااتهااا وغايمشي الظلام لي داخلهاا.. داها ريان تغسل وجهها وجاب ليهاا إسلام عصير باش توگض تاشافوهاا توگضات عاد رجعوهاا لبلاصة فين كاااانوو باقيين كايتسنااو خبار على نوح لي حد مطمنهوووم.. إدريس غي ضرب على وجه رحيل عرف بيها شي حاجة قرب جهتهاا شدها من كتافهاا وقااال بصوت هادئ:واش نتي بخير كضرك شي حاجة؟؟
رحيل:(خشات نص وجهها فصدرو ونطقات بصوت مبحوح) أناا بخيررر
كيف عادتهاا مكتخرجش لي فقلبها وتتبقاا تتخبيه.. واخا إدريس حس بلي شي حاجة كاينة لكن ماابغااش يضغط عليها وخلاهاا على راحتهااا تاوكااان تبرد وديك الساعة هضرة خرى.. جلسات فالكراسى وتكات راسهاا على كتف باها لي جلس حداهاا وشافت فبيسان لي جالسة جنب مهاا وعنقهاا ملوي بفااااصمة وتاهي حالتها مكانتش حسن من رحيل.. أما رحمة فكاان عقلهاا غااايب وممعاهااش وقلبها باغي غي يطمن على ولدها لمرضي ديالهاا..
"الوااااليدة"
ضااارو جميع لشخص لي كان جاااي جهتهوووم وأسمااء بقات تتشوف فيه ومصغرة عينيها تتحاول تستعقل هااد خوناا فين شافتو.. أما هو قرب جهة رحمة وجلس قفازي وشد يديها وقال بصوت هادئ:الواليدة نتي بخير؟
بيسان:(ببرود) عاد طفات عليك الشمعة؟؟ فين كنتي ملي كنت تنعيط ليك ونسيفط ليا فلمساجات
رؤوف:(خنزر فيها) مامساليش لمحضراااتك
بيسان:(هزات حاجبهاا) حيت تنقوووول لحق ياااك؟؟
سكت رؤوف وعينوو كيشوفو فيهاا وهو مخنزر مبغاش يجاوبهاا وتاموو شافها ماشي فمود لهضرة عليهاا ناض وقف وتكى على لحيط... بقاا ساكت وعين أسماء عليه تاتشوف ودقق وجهو مخافيش عليهاا سبق وشافتو ولكن فين هادي هي لمشكلة.. بقات مدةة تتحنزز فيه تاضور وجهوو وشاف فيها تاهووو.. شوفاتهووم خلات إسلام يهز حاحبوو ويحضيهوووم بعيووون متسائلة.. أماا أسماء عاد دارت طق فراااسها وعرفات بلي هاداا هوو لي كان غايضريها بالطوموبيل داك النهار وتاشدات معاه بلهضررة واخا كان داير النضاضر الاأنها قلعاتو من لحيتووو وشعروو.. رؤوف ماتسوقش ليها وقلب وجهوو وكل واحد فين ساهي وشنو كايدير..
---
فالدار إدريس النعاس مزارش لارنيم ولاامحمد طه لي بقا غادي جااي فبلاصتوو وبالو مشطوون مع نووح.. أما رنيم شافت فيه ونطقات بصوت خافت:درتي ليا الدوخة جلس
محمد طه:(هز فيها حاجبو) شكوون غايكون مولاها زعمة يكووون داك الزااا*مل دعمك
رنيم:(زفرات بغيض) ماشي عمي تت ماعرفتش بحالي بحاااالك
محمد طه:(جلس فالسداري لي جنبها وربع يديه) هو بوحدوو لي عندووو لقتيللللة ماشية فالدم
رنيم:(بقات تاتمسح على جبهتها) الاكان هو مولاها راه غايتعاقب
محمد طه:(ضحك ببرود) كيف تعاقب فالجرااائم لي سبق ياااك (خنزر فيهاا) على من تاضحكي نتي هاا أناا وياك عارفين بلي داااك زاااا*مل مشيها كيف بااااغي ولكن نهار يطيح فيدي بربببي مغانرحمممووو وغانرد حق ختتتي والنااس لي أداهوووم..
قال كلامو وخلاهاا غادي لبيتوو وحاس براسو عاطيه لحريق.. دخل جبد الدووا هز كينة شربها ونعس فوق النموسية باش يرتااح..
----
باقي على جلستهوم شي يشوف فشي وشي يدعي فخاطروو يسمعوو خباار زوينة.. رحيل باقي على جلستهاا ويديها فجياب لبينوار فين كانت حاطة خاتموو تاتحسسو بهدووء وفداخلهاا تادعي معاااه ربي يحفظو ويرجعوو لولدو ولمو ولخوتوو وگاع حبابوو.. بقاو هاكا تاقربات عندهووم الفرملية لي وصاتها بيسان على باش تجيب ليها لخبار وغير شافتها ناضت عندها وشدات فيديها وبلهفة قالت: امدرا سالات لوبغاسيون خوياا بخير يااك؟
لفرملية:(سرطات ريقها ونطقات بصوت خافت) لمريض توقف قلبو..
رجليها مبقاوش هازينها ويديها لي كانت شادة بيها لفرملية طلقاتهاا وعينيها عمرو دموووع.. الهضرة لي كانت بناتهوم ماسمعهاا حد ولكن الكل كان متبع معااهوم العين ورؤوف غير شاف بيسان هاكاك عرف شي حاجة واقعة.. قرب جهتها شدها وقال:شكاين
لفرملية:لمريض توقف قلبو وخليت الأطباء كيديرو ليه انعاش القلب
غير نطقاتها بيسان طلقات من رؤوف ومشات تتجري وعقلها غايخرج من بلاصتوو.. وفكرة أن قلبو وقف خلى الدم يجمد فعروقهاا.. وصلات لطاج فين كاين لبلوك وشافت لفرملية لي تم ونطقات بجدية تتحاول تبت راسها: المريض لي جاا مضروب بلموس فكرشو شنوو حالتو؟
لفرملية:(حركات راسها) وقف قلبوو فوسط لعملية ولكن قدرو يرجعوه مرة خرا والأطباء كيكملو لوبغاسيون
بيسان رجليها فشلو عليها وجات طايحة الأرض وهي تتبكي.. فهاد الساعة حاسة راسها ضعيفة بزاااف.. فاش الممرضة قالت ليها وقف قلبو حسات بلي هي لي قلبها وقف.. وفهاد الساعة حسات براسها ضعيفة بزااااف... بقات على حالها والفرملية واقفة جنبهاا تاتحل لباب دلبلووك وخرجو زوج أطباء لي غير شافتهوم بيسان ناضت وقربات عندهوم: دكتوووغ طمني
د1: العملية كانت معقدة الضربة قاست الطحال وسببات ليه نزيف داخلي لي قدرنا نوقفوه بصعوبة واستئصلنا ليه الطحال زائد قلبو توقف وسط لعملية ولله الحمد الدكتوغ الوالي كان حاضر ودار ليه انعاش لقلب(كمل بجدية) نتي دكتوغ وأنا غانهضر معاك بصراحة الخطر مزالش كليا على حياتو وجسموو حاليا ضعيف لذلك غانقلوه لغرفة الإنعااش فين غايبقا هاد 48 ساعة ونشوفوو استجابتوو ورااا العملية
بيسان:(زيرات على يديها ونطقات بصوت باااح) نقدر نشوفووو؟؟
د.1: غايخرجووه دابا باش يديوه لإنعاش تقدري تمشي تشوفيه وطمني عليه ادكتووغ السليماااني
بيسان:(مدات يديها سلمات عليهووم) شكراا بزااف
خلاوهاا وهي بقات واقفة تبانوو ليها مخرجينوو غاديين بيه لغرفة الإنعاش.. قربات جهتوو مور مدارت البافيط ولبسات لبااس لواقي كيف الفرمليين ومشات معاهوم فلسونسور الخااص بنقل المرضى.. عينيها عليه هو لي ناااعس فوق لبياااص مغطي بليزااار بيض والاوكسيجين على نيفوو... شوفتوو فهاد لحالة هرساتهاا هي لي لطالماا كانت تتشوفوو سندهاا وأخ وأب ليهاا ليوم هاهو مدد قدامها لاحول له ولاقوة والسبب الرئيسي فحالتوو هي.. دخلووه الإنعاش وهي معاااهوم وعينيها غير عليه.. قادوه فوق السرير الطبي لي فالإنعاش وربطو مع جسموو الأجهزة وخرجوو لفرملين لي تمااا مخلينها غيررر هي بوحدهاا معااه.. قربات جهتوو وشدات فيديه لي كاانو دايرين ليهاا السيروووم تحنات باستهاا ودموعهاا نزلووو من أول وجديد.. عضات على شفتها لي تترعد وجلسات على ركابيهاا وهي شادة يديه تتشوف فيه نااعس مكيتحركش من غيرر صوووت الألات دلقلب والاوكسيجين لي كتبقبق كلما طلع النفس..
بيسان:(بدات تتلمس يديه ونطقات بصوت خافت) نهار مات بابا حسيت براسي تيتمة وبقيت وحدي.. الضهر لي كنت تانتسند عليه وقت الشدة والصدر لي كنت نتخبى فيه وقت لخوووف مشى.. ديك الساعة حسيت براااسي تهرست ومقدرتش نصبر وتمنيت ربي ياخدني عندووو.. (هزات عينيها وشافت فيه ببكاء) عقلتي نتا شنو كنتي قلتي لياا ديك الساااع قلتي أناا خووك وبااك أناا هوو الضهرر لي غاتبقااااي متكية عليييه وأنا هي ديك ليد لي غاتبقا طبطب عليك وأناا هو داااك الصدرر لي فيماا تحتاااجيه غاتلقاااايه حااضر باااش يدفيييك (سكتات ومسحااات دموعهاا) وبصح كنتي لياا هادشي كااامل كنتي خوياا وبابا وصاحبي وحبيبي عمرررك ماخسرتي لياا خاااطري وكنت أنا لمفششة عندددك.. وكنت فيما نغلط تجي تهضر معاياا بالخاااطر وتشرح لياا غلطي تاكندم عليه.. ونهار شديت لباااك عقلتي ههه نهار فرحتيني وقلتي لياا بلي غانكمل قرايتي براا لبلاد وغانقرا التخصص لي كنت ديما نموووت عليه "الطب" ديك السااااعة فرحت بزاااف حيت حلمي لي كنت نتمناه ديما غايتحقق ونتا لي عاونتيني وساندتيني تاحققتو أو وليت دكتووغ بيسان السليمااني متخصصة فأمراض القلب والشرايين... ودابا واخا كبرت أو وليت طبيبة باقي تانحس براسي ديك لبنت الصغيرة لي محتاااجة خوهاا وباهاا يكوون معاهاا.. (سكتات تاني وهي تتسمع غير صوت الالات ونطقات بألم وهي تتبكي) سبق لياا خسرت ناااس عزاز ماتخلينيش نخسرك تانتا أخويا عفااااك على قبلي وقبل النااس لي كيبغيووك قااااوم عفااااك أخويااا أنا مابغيتش نرجع يتيمة مرة خراا
يتبع...
التعليقات
لا توجد تعليقات بعد، كن أول من يعلق.