محتوى القصة
واقف قدام داك لبروجي لي
باقي ماكملش حيت لخدامة حبسو وخلاوه فنص الطريق...تيشوف فيه بحرقة ومحاملش هادشي لي وصل ليه...داك الحلم وديك الرغبة لي كان عندو باش يولي عندو بروجي خااص بيه ويكون تاهو عندو مدخول ماكملش وحبس فالربع إيما تانص ماوصلش ليه...كان تيظن لاكسب الأرض وخداها راه غايطفرو ساعة معارفش بلي ديك الأرض لاماكنتيش سيدي ومولاي والله لاطلعتيهااا... فلول كان مشي الأمور والفلوس راه مسلفهوم من لبانكة ومن شي معارف ولكن دوك لفلوس مقضى بيهوم والو وبلعكس تزير فلفلوس كتر ولمشكيل مايقدرش ياخد تاني كريدي حيت باقي خصو يفك لي خدا وزيد ناس لي كل مرة تجي وطلب منو يرجع ليها رزقهاا بلا لمصاريف ديال لولاد والدار...حس براسو شوية ويتقج مكانش عارف بلي هاد لمجال لي دخل ليه صعيب وخصو واحد يكون بحال لمنشار طالع واكل هابط واكل يكون حافظ صواريه وعارف فين تيحط رجليه ماشي خبز ربي فطبگو... وبلفعل هو مكانش عندو خبرة غير تيسمع بفلان دار بروجي فلان شرى الأرض وبناها ومعارفش ديك الأرض شحال دلحوايج دازت منها باش ترجع بروجي... كان هضر مع لخدامة باش يكملو الخدمة تايساليو ويخلصهوم ساعة مابغاوش ومن حقهوم لواحد راه باغي رزقو ومايمكنش يخدمو بلافلوس وزيد تالسلعة ناقصة بزاف... تنهد ومبقا عارف مايدير مرتو لي كان حاط فيها الأمل باش تعاونو بدهبها راه مسحات فيه يديها ومبغاتش تعطيه وباه مكانش راضي يمشي عندو ولكن دابا مابقا عندو كيف يدير من غير يمشي يشوف باه واش يقدر يسلفوو باش يكمل...ركب فطوموبيلتو شاد طريق لدار واليديه تاوصل ونزل ومع دخل وشافتو مو وهي تبسم فرجانة بمجيتوو حيت شحال هادي مشافتو...
بقا مجمع مع مو تانزل باه لي شافو واستغرب حيت شحال هادي مجاا وماهضرش معاه فالتلفون ومع دلك فرح حيت شافو..
سليمان:اهلا اهلا زارتنا لبراكة
عادل:لواليد لباس عليك؟
سليمان:الحمدلله كيف طرا وتفكرتيناا اولدي حيت شتك غبرتي من نهار دفنوه مازاروه
عادل:(حك لحيتو وقال) لواليد جيت قاصدك على قبل شي حاجة ومحتاج تعاوني
سليمان:الله يسمعنا خبار لخير اولدي
عادل:بغيت شي فلوس ضروري على قبل الأرض لي كانبني درت السلف فالبانكة وباقي خاصني فلوس
سليمان:(بجدية)شتي اولدي اش كنت تانگول ليك راه ماشي غير جي وبني راه هادشي فيه بزاف دلمصاريف
عادل:(زفر بغيض) ومالي معارفش الواليد وزايدون راه تسلفت ولكن الفلوس باقي خاصيني
سليمان:راه بالسيف مايخصوك ونتا داكشي لي باغي ديرو راه تيبغي إقاريضن "لفلوس" ويكون جيبك عامر
عادل:دابا واش غاتسلفني؟
سليمان:شحال خاصك؟
عادل:شي عشرين مليون
سليمان:(تنهد) عشرين ايس لبااس "ياك لباس" تت راه اولدي ماعنديش دوك لفلوس لابغيتي تلاتة دلمليون هي لي كاينة عندي
عادل:(كمش حجبانو) تلاتة الواليد اش غاندير بيها مافيها لاخلاص الخدامة لاالسلعة لاهم يحزنون
سليمان:اوا هادشي لي كاين اولدي ماخبيتش عليك كون كان عندي ماكتر نعطيك
عادل:(زفر النفس وناض مراضيش)كنت عارف مغاتعطينيش تت
خرج مخلي باه غير تيشوف فيه ويحرك راسو ومو نقزات فلبلاصة:علاش ماتعطيه اش بغا وهاداك ولدك ياحسرة
سليمان:(خنزر فيها) واش من نيتك راه ماخبيتش عليه ماعنديش وزايدون ولدك ماتفكرني تاوحل عاد جاا فين كان ملين تانعيط ليه تال لعيد ماقد يهز تلفونو ويباركو لياا (ناض ونطق بحسرة) ولدت وربيت وكبرت وفلخر هاشنو لقيت لخليفة عالله
لحل لي كان عندو ولباب لوحيد تسد فوجهو وهاهو ماعندو فين يجيب لفلوس مزال... جلس تيفكر يام وليالي باغي شي حل ساعة مالقااهش والمشكيل مالين لفلوس باغين رزقهوم... عيى مايكابر وفلخر هبط الراس وقرر يقلب على شي شاري لي يشري داك الأرض وتافق مع سمسار على تمان لي بغاا وخلاه يقلب على الشاري...تحسر بزاف على لبروجي ديالو لي كان باغيه يكمل ولكن هاد هو الرزق ولحاجة لي تتخاد بلغش عمرها تكمل وديك الأرض خداها لجدو ولوى ليه يدو وهو فعز ضعفو عند بالو راه غايدير شي حاجة فيها ساعة دنوب جدو خرجو فيه... أيام اخرى دازو والسمسار وأخيراً لقى الشاري لي مشى شاف الأرض هي لولة وداكشي لي تبنى فيها عاد وافق يشريها وليوم كان موعد لقاءو مع عادل باش يعيطه فلوسو ويتكاتبوو...
جالس فالقهوة والسمسار جنبو طبخ ليه راسو بلهضرة وعادل كل مرة يزفر ويشوف فساعتو تاسمع السمسار قال:هاا الشاري
هز عادل وجهو وعينو خرجو فنوح لي كان جاي بخطوات رزينة جهتو تاوقف عليهوم وقال ببرود:سلام أوعليكوم
جلس قدام عادل لي باقي الصدمة شاداه وسمسار تيهضر ويشرح ونوح عينو غير على عادل لي بعد مدة من الاستيعاب نطق بحقد وغل:فرحان حيت وصلتي لداكشي لي باغي؟ (مسح على وجهو) هالأرض رجعات ليك خصك تفرح
نوح:(بنبرة كالصقيع وبسخرية نطق) شربنا من العين منين كان الما زين وملي كترو اليدين درناها لغسيل الرجلين اولد لعم
هادشي لي مكانش باغيه عادل ومكانش راضي يجلس هاد لجلسة قدام نوح... ويبين ليه ضعفو...
حاس بواحد الشمتة خايبة حيت كان باغي يدير لراسو بروجي باش يسكت العائلة ويبين ليهوم بلي تاهو يقدر يدير شي حاجة... وخصوصا أن عائلة السليماني اغلبيتهوم تجار وعندهوم خيرهوم وتاعادل راه مامخصوصش ولكن باغي يكون هو طوب مايكونش شي حد فالعائلة حسن منو... وهادشي ماشي غير دابا إنما تافاش كان صغير وكانت ديما مو تاتبقا تعمر ليه راسو تازرعات فيه داك لحقد وداك حب الدات تابينو وبين خوتو فباغي يكون هو حسن منهوم... ومسؤولية الغلط فهادشي كاتهزو مو لي داك لحقد لي فيها زرعاتو فيه تاخرجات عليه ورداتو بحال هاكا مايسوى مايصلاح...
مكانش كيظن بلي الشاري غايكون نفسو الشخص لي مكيحملوش وتيحقد عليه ويحسدو على داكشي لي عند ولد عمو... كان مزير على يديه وحاس براسو تزير قدامو ومرضاااش وهو لي كيتعنى بالأرض لي ولات ديالو وبداكشي لي كان باغي يدير فيهاا ساعة ربي ماكتبهاش ليه حيت نيتو كانت خايبة وكون كان واحد مزياان وقلبو بيض كان ربي غايسهل ليه فكلشي...
داك السمسار كان حاس بلي الجو مكهرب وفاش نطق نوح بديك الكلمة لي قال وعرفو ولد عمو سكت وضرب الطم وبقا غير يشوف لمهم عندو البيعة وشرياا تكمل حيت غايشد فيها لبااي ديالو
عادل:خلينا اسيمحمد بوحدنا
السمسار:وداكشي لي تافقنا عليه
عادل:(خنزر فيه)صافي دوينااا سير ريح برا تانعيط ليك
ناض سمسار هاز كاس دلقهوة وخرج برا يكملهاا مخلي عادل لي مربع يديه فوق الطبلة وعينو على نوح لي جالس مبرد كيف التلج...
عادل:(بسخرية) لهاد الدرجة اولد لعم ماقبلتيش الشمتة دالأرض لي خديت من جدي
نوح:(بسخرية) هانتا خديتيها واش طفرتي فيها شي حاجة؟ مكملاتش عندك عام وصدقتي باغي تبيعها
عادل:(خنزر) وشكون لي قال ليك باقي باغي نبيع ؟
نوح:(تحدر لقدام حاط يديه تاهو فوق الطبلة وقال بتبسيمة باردة) نتا لي خاسر لامبعتيهاش وماخلصتيش فلوس السلف دلبانكة والناس لي باغيين رزقهوم أما أنا من عندي مشات أرض تجي أرض ماشي شي حاجة صعيبة
عادل:هادي هي طبيعتك اولد لحاج عزيز عليك تاخد كلشي وتاحد مايدوي معاك واخا دير لي بغيتي
نوح:كون نقيتي قلبك ومعمرتيهش بالسم الخاوي وكنتي سيدي ومولاي تجيبها من فم السبع وماتديها فحد كنتي غاطفرو اولد لعم بلاصة ماتبقا مگابلني ومگابل غيرك ربي فرق على كل واحد رزقو ونتا مارضيتيش بيه وبغيتي ماكتر وطمع لي فيك خلاك طفي دمااغك تاوصلتي لهاد لمواصل
عادل:كلشي بسبابك من ديما كنتي نتا العزيز عندهوم وجدك واخا هاد لحفايد لي عندو كنتي نتا مومو عينيه يعطيك من مالو وحنااا (ضحك بسخرية)لينا الله
نوح:(جبد باكية دلگارو وخدا واحد منها وشعلو ونطق بخشونة) هالي گلناا بلاصة ماتشوف راسك وتفكر فمصلاحتك بقيتي مگابل الناس اش دارو حياتك كلها ونتا عايش حاضي الناس واش ماعيتيش ؟
عادل: (تكى على لكرسي ونطق باستفزاز) لمهم مدرتش حاجة حرام
نوح:(بصرامة خنزر فيه ونطق بصوت قاصح) لابغيتي يخرجوك من هنا بالميسان كمل كلامك
عادل:(حرك راسو وهز يديه بزوج باستسلام) مهاضرش غير تهنى ولكن اولد لحاج خصك تكون متصالح مع داتك وتقبل كلام الناااس
نوح:(بخشونة) سمع ابنادم داكشي لي كيضور فداك الراس راني عارفو بلاماتلعب لعب نتا ماشي گدوو حيت غاتجيبها غير فصحتك
رجع السمسار قاطع عليهوم داك الكلام لي كان غادي فمنحى اخر لي مغايعجبش كلى الطرفين... جلس السمسار لي شاف فيهوم وقال:اوا اسيادنا تافقتو ؟
عادل:(شاف فنوح) أنا موافق على لبيع ولكن عندي واحد شرط؟
السمسار:(كمش حجبانو) اشمن شرط اسي عادل ياك تافقناا على كلشي ؟؟
عادل:(خنزر فيه) الأرض أرضي ومن حقي نطلب لي بغيت وزايدون نتا دير خدمتك وهنينااا (شاف فنوح) داك التمان لي تافقنا عليه فلول مابقاش عاجبني وباغي ماكتر
السمسار:شحال غاتزيد؟
عادل:باغي نزيد على التمن لي عاطي عشرين مليون هادا هو شرطي فلبيع وتباركالله راه الأرض جات فبلاصة زوينة وتستاهل كتر من داك التمااان (بسخرية شاف فنوح لي مربع يديه متبعو بنظرات هادية) ونتا وجودك اولد لحاج...
الطمع طاعون وعادل حلف بحلوفو مايبيع الأرض تايستافد منو وخاصة أنه عارف قيمة الأرض عند نوح شحال تتسوى داكشي علاش باغي يلوي ليه يديه... خرج السمسار عينيه فكلام عادل تيشوف فالسيد هتر مكفاهش التمان دلبيع بغا يزيد عشرين مليون شكون هاد لحمق لي غايشري بهاد التمااان أكيد مكاين تاواحد وفالفترة لي كان تيقلب ليه على الشاري لي سمع التمان تيرجع لور حيت كان طالع وبزز باش لقى لي باغي يشري ودابا باغي يجري عليه...
كان جالس تيسمع لداك لكلام ببرود وغير كمل عادل هضرتو وهو يشوف فيه شوفة مطولة قبل مايهز تلفونو لي فوق الطبلة ويخشيه فجيبو وجبد بزطام خدا مية الدرهم وشير لسرباي لي جاا باش يتخلص... ملي سالى شاف فالسمسار ونطق بنبرة هادية: سيمحمد نمرتي عندك ملي تلقى تاني شي هوتة علمني (شاف فعادل وكمل بسخرية) لامابغيتيش تبيع مكاين مشكيل فلخر نتا لخااسر أما أنا فلوسي فجيبي
غمزو وناض خارج مخليه مخرج عينو مكانش متوقع أنه مغايقبلش گال مع راسو الأرض باغيها واخا نزيد غايقبل ساعة مع من هو... حط عادل يديه على راسو وسمع السمسار لي قال:داك التمان لي باغي مغاتلگى حد يعطيه ليك راه يام وأنا نقلب وبزز باش لگيتو وفلخر ضيعتيه
عادل:(غوت عليه) هنينا ابنااادم ضريتيني فراسي
سمسار:گلت لحق لمهم من هادشي كامل فلوسي يتحطو
خرج من القهوة مخلي السمسار تايشوف فيه ويسب فيه على العكس لي وكيفاش ضيع عليه أفير كان غايربح وراها فلوس...
***
اليوم كان عرس أميمة والدرك دلخدمة كولو هزاتو غزلان لي كانت فلمحال هازة تلفونها تتشوف فالتكشيطة لي صورات ليها رنيم باش تكريها ليهاا...
رنيم:(سجلات ليها أوديو) لاعجباتك ناخدها ليك وراه غاتجي قداك وزوينة بزاف حمقاتني يقدر فالتصويرة ماتبانش ليك مزيان
غزلان:(جوباتها) صافي خوديها ماعندي تاشي خيار اخر اجي مغاتمشيش معايا تونسيني أسماء مغاداش حيت تقلات ورحيل مخلاهاش ولد لحاج...نمشي بوحدي
رنيم:غير عفيني ازين والله تالخدمة عياتني ومافياا لي يمشي يسهر ونصبح خدامة مع نبوري وزايدون راه ريان يوصلك ويجيبك ماتخافيش ماتبقايش بوحدك
غزلان:صافي صافي مهم جيبيها معاك هي ولمسائل ديالها لدار أسماء حيت تما فين غانلبس ونيت تقاد ليا لمكياج
رنيم:أوكي
كملات خدمتها وسدات بكري على غير لعادة حيت بيما أن أميمة مكايناش فهي لمسؤولة وضروري وحدة فيهوم تكون فلمحال... شدات طاكسي نيشان لدار أسماء فين كانت رنيم جايبة ليها تكشيطة وحوايج دلداخل حيت غادوش هنا... دخلات غزلان لحمام وبقات أسماء جالسة تتوجد لمك اب وتشوف فتلفون اش من ستيل دير ليها تاخرجات غزلان وشعرها دايرة ليه فوطة..
أسماء:بصحة والله ماكرهت نمشي معاك مي ليوم حاسة براسي مسخسخة
رنيم:زيديني عليك لغيگل قربات تجي مرضاتني ولخدمة تاهي ااوووف عيييت
أسماء:الصبر وصاف اجي نبداو ليك لوجه
تكات غزلان على لوسادة وغمضات عينيها مخليا أسماء تفنن ليها وهي تايقة فيها وعارفاها غاتصاوب ليها شي حاجة ناضية...
رنيم:(صونى تلفونها بنمرة رؤوف) هيلوو
رؤوف:كبيدة لبااس
رنيم:صافا ونتاا (غمزات لبنات وناضت تهضر بخاطرهاا)
أسماء:(قالت بضحك) يامات التصاحيب حلوة
غزلان:عمري جربتو صراحة
أسماء:حسن ليك والله بعد لمرات تانگول ياريت كون ماتصاحبتش (ضحكات بسخرية فاش تفكرات يامات آدم أو وليد) شفتي لاطحتي فولاد لقح*اب مغايفكك منهوم حد
تبسمات ليها غزلان وأسماء بدات تكمل خدمتها تاسالات وشافت فيها وقالت بتبسيمة:هاي هاي هاي جيتي زينة ياختي
غزلان:(تتشوف راسها فلمرايا بإعجاب) ناري حمقني لوك تالغوج أليفغ غزال
أسماء:اييه نوضي لبسي تكشيطة راه ريان شوية وتلقايه واقف عليك..
ناضت غزلان لبسات عليها تكشيطة لي كانت نواغ جاتها زوينة ومع فصالتها... وجلسات تاني باش تصاوب ليها أسماء شعرها ودارتو ليها بوكل وخلاتو مطلوق مع بدا يطوال ليها... وجدات راسها وجات رنيم جلسات معاهوم مجمعين تاسمعو الباب تحل بالساروت وصوت إسلام لي كان تيهضر مع شي حد... تادخل لعندهوم إسلام لصالة وموراه محمد طه لي غير شافتو غزلان وهي تخرج عينيها مصدومة أما هو عينو تفيكسات عليهاا كيطلعها وينزلها بنظرات اعجاب واضحة من عينيه لخضرين لي شوية وياكلوهاا..
أسماء:مودي جيتي مرحبا
محمد طه:(سلم عليها بلابيز وقال)جيت باش ندي غزلان
غزلان:على فين ريان؟؟
محمد طه:(ببرود) ماعندك ماديري بريان يالاه خلينا نمشيو (قرص أسماء فحنكها) زين أنا مشيت تانتقاشعو رنيم زيدي نوصلوك فطريقنا
ناضت غزلان على مضض سلمات على أسماء وشكراتها ومشات هي ورنيم لتحت لقاوه جاب طوموبيلت باه ركبو فصمت وصل رنيم لباب الدار عاد شد طريق القاعة وغزلان ساطت تتشوف قدامها تاسمعاتو قال بهدوء:جيتي زوينة
غزلان:شكرا
محمد طه:(تنهد)بدلي داك لعكر دالشيخات راه كيأتيري (خنزر) وغايخلي الزو*مل يشوفو فيك
غزلان:عمي ليه عينيهوم وتهنى
محمد طه:ماكرهتش ونبقا نشوفك غير بوحدي...
مجاوباتوش وفضلات أنها تبقا ساكتة وتسد عليه داك لباب لي غايحل ليه داك لمجال أنه يبقا يتحكم فيها... تنهد وكمل طريقو ساكت وغزلان تتشوف فيه بنص عين وعاد ردات لبال ليه لابس سروال توب رمادي مع شوميز كحلة وشعرو ردو لور جااه زوين وأنيق..
وصلو لقدام لقاعة وقبل ماتنزل غزلان هزات مرايتها تاتشوف راسها واش مقادة عاد حلات لباب ونزلات وهو جنبها.. حط يديه على خصرها وهي هزات فيه عينيها وقالت بجدية:كانعرف نتمشى بوحدي مكاين لاش تشدني
محمد طه:زيدي تمشااي بلاكترة لكلام
غزلان:(زفرات النفس)واش غادخل معايا؟
محمد طه: وشنو تتسناي نوصلك ونمشي باش نخلي ولاد لقح*اب يتزللو عليك زيدي رجلي على رجلك داكشي لي بقاا نخلي التويشية ديالي باش يضسرو ليا عليها
غزلان:كيفاش التويشية ديالي واش من نيتك
محمد طه:(قرصها فنيفها) تويشية ديال محمد طه مزياان هااكا يالاه ندخلو
حركات راسها بلاحول ودخلو وهو عينو غير على الجنس الدكوري لاشاف فيها شي واحد يحمر فيه الشوفة ويخنزر ومن زهر محمد طه وسوء حظ غزلان طوابل كانو جالسين فيهوم الرجال ونسا مخلطين الدعوة... مشاو لطبلة كانت باقي خاوية جر ليها كرسي تاجلسات وجلس جنبها خلاها غير تتسوط... ضورات راسها يمين وشمال تاقشعات مت أميمة وهي تبسم ليها وبغات تنوض باش تسلم معاها وهو ينطق محمد:فين غادة؟؟
غزلان:ماشغلكش
ناضت مخلياه متبعها تاشاف فين مشات عاد رجع كيشوف قدامو ساكت... وهي معاودش رجعات وبقات واقفة مع مت أميمة تاتهضر معاها وناس كيجيو ويسلمو عليها ومعاها غزلان لي تاتسقبلهوم بتبسيمة... تاجا وقف حداها ولد خالة أميمة وكيهضر مع خالتو... ضار محمد طه يشوف واش سالات وغير شافو وهو يعقد حجبانو وناض ديك الساعة غادي عندهوم...
محمد طه: غزلان (شدها ) اجي ريحي
غزلان:(تاتهضر بخفوت) واش حماقيتي لاش تابعني
محمد طه:(بخفوت) حاضي رزقي مامنحقيش يالاه دوزي تجلسي وماتبقايش تحاكي ليا مع الرجال ونتي عرفاني راه مغانصبرش وغانصدق قالبة هاد لعرس جنازة
غزلان:ياربي واش باغي تحمقني السيد واقف مع خالتو اش دخلني
محمد طه:نتي واقفة مع خالتو وهو واقف حداكوم وأنا مباغيش هادشي
ساطت النفس ومشات معصبة محاملاش هاد الزيار لي داير ليها.. وصلات لعروسة وناض كلشي يستاقبلها من غير لبعض...ناضت غزلان دير واجبها مع أميمة لي واخا دارت معاها غلط إلا أنها غادير لي عليها... شافتها أميمة وتبسمات ليها باغا تصلح لعلاقة ولكن لعيب خرج والخواطر تزعزعو واخا ترجع العلاقة ولكن مغاتكونش كيف قبل...
قشع محمد طه نوح لي كان يالاه جاااي بوحدو وناض لعندو سلم عليه...
نوح: العائلة مزيان
محمد طه:حمدلله مجاتش رحيل؟
نوح:(بهدوء) لا
بقا واقف معاه شوية مشى لعند عتمان باش يبارك ليه...
نوح:الله يجعل كلشي مبارك ومسعود ادا عتمان يالاه تهلا فصحيحة
عتمان:مغاتجلسش؟؟
نوح:تت غادي نتا عارفني ماعنديش مع هادشي لمخلط وزيد عندي مايدار
عتمان:شكرا على لمجية وتهلا فالصحيحة
نوح:(ضربو على كتفو) تلاااح
ودعو وشاف فمحمد طه لي كان جالس هز ليه يديه بمعنى الله يعاون وخرج غادي لدار عند رحييل لي ماخلاهاش تجي معاه حيت عارف دعوة مخلطة وزيد توينز باقي صغار ومجاتش تخليهوم بوحدهوم... وأصلا المجية ديالو كانت غير باش يبارك ليه ويدير لواجب حيت عتمان ماشي شي واحد لي رخيص...
العرس كولو ومحمد طه حاط عينو غير على غزلان لي فيما تنوض يسولها فين غادة ويبقا تابعها بعيونو داير ليها لحصاار...
كاتاكل بشوية عليها ومع جالسة مع لبراني فالطبلة مواخداش راحتها...
محمد طه:(مد ليها طرف دلبسطيلة وقال بهدوء)كولي وباركة من تبعكيك
غزلان:مكانتبعككش وزايدون كول غير نتا
محمد طه:(تياكل ممسوقش) انا تناكل
كملو لعشا وموراها لبسات لعروسة لبستها لبيضاا لي كاتعني بلي العرس قرب يسالي... قطعات لگاطو ودعات النااس ومشات هي وتامحمد طه وغزلان ركبو فطوموبيل غادين لدار فسكات...
***
دق باب جناحها ودخل تيقلب عليها هي لي كانت جالسة تتشوف ألبوم التصاور مشتاقة لدوك ليام يرجعو...تبسم ليها رؤوف وقال:صباح لخير
رحمة:(تبسمات ليه)صباح الخير اولدي
رؤوف:كيبقيتي شوية ؟
رحمة:ماحد خوك مارجعش لرياض مغانكونش بخير
رؤوف:نوح لقى راحتو تما الواليدة خصك تفرحي ليه
رحمة:راحتو فوسط عائلتو والرياض لي خوا بلابيه (بحسرة وحزن) وهاختك تاهي غاتزوج وتمشي وغانبقا بوحدي
رؤوف:(تبسم)شكون لي گال ليك اتبقااي هاأنا كاين وغانجيب تالي يونسك الالة
رحمة:(باستغراب)كيفااش؟
رؤوف: انا ناوي نخطب الواليدة
رحمة:(هزات حجبانها)تخطب وشكون هادي واش كاتعرف شي وحدة؟
رؤوف:اه كانعرف وكاندوي معاها وتانتي تتعرفيهاا مزيان وماشي برانية من لعائلة
رحمة:(تبسمات)شكون ياكما بنت خالك وفاء
رؤوف:(حرك راسو) اشمن وفاء ديك خيتي فيها لعياقة بلاقيااس أنا داوي ليك على رنيم
رحمة:شكون رنيم؟
رؤوف:رنيم لي من عائلة سي إدريس بات رحيل مرات خويا
قال كلامو وهو مبسم تيشوف فيه وعارف مو غاتفرح ليه بزاف ملي تعرفو بلي ناوي يكمل دينو... رؤوف لي دار عقلو ورجع لطريق لي كانت جاراه فواحد الهاوية لي كانت غاتخرج ليه على حياتو ولكن الدرس لي تعلم خلاه يحل عينو على شلى حوايج مكانش شايفهوم قبل... كان عايش لراسو وباغي غير يزهى ويخسر فلوس باه على لخوا لخاوي يتصاحب مع لي عشقات عينو ويبان على صحابو باش يوريهوم بلي مكاين ماحسن منو ويخلص عليهوم... وفلخر دوك الصحاب هوما لي غدروه فأول فرصة ليه ولاحوه مبعد ماقضاو فيه لغراض... صحابو لي كانو يعمرو ليه راسو على خوه وفلخر مالقي غير خوه هو لي وقف معاه وهو لي عاونو باش يشد طريقو لي كانت تالفة ليه... من نهار خدم معاه فلمحال وهو حاس براسو تبدل ولاشخص لي عندو كلمة وعارف راسو اش تايدير فحياتو معايشش غير هاكا بدون مخطط هو دابا مركز على اش باغي يدير...
ونهار شاف رنيم مكانش مسوق ليها وجاتو عادية وبلعكس مكانش عندو معاها وكاتجيه باسلة بزاف ولكن من بعد لقى راسو بلامايشعر متبع معاها تيشوف فيها شوفات ماشي بحال قبل جدباتو بشي حاجة لي هو معارفهاش... ومرة على مرة لقى راسو معجب بيهاا تااجا نهار لي قرر يحل معاها السوجي ويشوف واش تاهي تاتحس بنفس الشي جهتو ولاغير هو لي مدرم أو واكل الدق... علاقتهوم بدات بطريقة عادية كلام عادي بحال شي صحاب شوية بشوية وتطورات الأمور بناتهوم تاوصلو لفين هوما فيه دابا... وهاد القرار ديال الزواج خداه مبعد تفكير طويل لي خلاه يفكر ويطرح بزاف ديال التساؤلات فراسو...واش هو بصح قد مسؤولية الزواج ومشاكيلها... واش قادر يهز لحمل كيف كيشوف خوه هازو... وملي لقى السؤال هو اه جا قصد نيشان مو باش يتشاور معاهاا ويعلمها...
جالس قبالتهاا تيشوف فيهاا وتيتسنى ردة فعلها وهو متوقعها غاتوافق تاكاتصدمو فاش نطقات وهي معصبة وعاقدة حجبانها:كيفااااش رنيم لي ساكنة مع سي إدريس واااااش نتا كادوي بنيتك؟؟؟
رؤوف:(بعدم فهم) اه الواليدة رنيم أنا باغيها لزواج
رحمة:(بفقصة) وباقي تيعاود لي فيهاااا واش باغيين تخرجو لي عقلي من بين بنات الناااس كاملين بانت ليك غير هي
رؤوف:الواليدة اش هاد لكلام تتگولي وديك لبنت ماشي بنت الناااس؟
رحمة:ونتا مالقيتيش من غيرها؟
رؤوف:هي لي عجباتني وبغيتهاا داكشي علاش جيت لعندك باش تخطبيها ليااا
رحمة:وأنا مابغيتهاااش ليك معجبااانيش (خرجات عينيها) شوف غيرها ونمشي نخطبها ليك ليوم قبل غدا
رؤوف:بغيت غير نعرف اشمن مشكيل عندك معاها (بجدية) واش شفتي فيها شي حاجة ماعجاتكش گالت ليك شي حاجة ولادارت معاك شي بلان؟؟
رحمة:(تاتسوط طالع ليها الدم) معاجبانيش ومكانعرفهاش مزيااان وزايدون علاش هي عايشة معاهوم وفين واليديها؟؟
رؤوف:واليديها ميتين وسي إدريس من عائلتها عليها هي معاهوم
رحمة:(قلبات وجهها) أنا ماقابلاش بيهااا بلاماتعيى راسك معاياا (خنزرات) صمتي تاصمتي وفطرتي ببصلة هادي هي ديالك اولد كرشي
رؤوف:(ناض معاجبوش لحاال) علاش مباغااش ياك نهار جاا خويا وگالك غايتزوج قبلتي ليه
رحمة:(بمرارة) على هو جااا شاورني كون دارها كون گاعما وصلت لي أنا فيه دابا كون راه زوجتو لي تستاهلو ماشي وحدة دخلات كي السوسة وتلوات ليا عليه
رؤوف:هاديك مرات ولدك واش عمرها قالت ليك شي حاجة خايبة من نهار خويا تزوج بيها وعمري شفت شي حاجة ناقصة فيهاا الله يعمر ليها الدار داخلة سوق راسهااا وزايدون نتي عارف نوح وقاعدتو (ساط بعصبية) كان عليا واقيلا ندير بحالو ولكن أنا جيت شاورتك
رحمة:بزز منك تجي تشاور راه مك مع من تتهضر ماشي صاحبتك (بسخرية) هاي هاي گال ليك مايشاورش ضسرتو كبرتو وربيتو لكتاف وليتو باغيين ديرو مابغيتو
رؤوف: دابا شنو مغاتمشيش معايا نخطبوهاا
رحمة:(بفقصة ) مغاتخطبهاااش هاديك مغانقبلش بيها ولي عندي راه گلتو ولابغيتي تفقص مك وتخليها غضبانة عليك سير طلبها لزواج
قلبات وجهها عليه خلاتو غير تيشوف معرفش هاد العدوانية فلكلام وهاد الانفعال لاش؟؟ واش رنيم دارت معاها شي حاجة ولاشافت فيهاا شي بلان معجبهاااش؟ بقا تيشوف تاعيى ومشى فحالو معصب من هضرة مو لي نرفزاتو.... وبلعاني ماگالش ليها على واليديها حيت داكشي متعلق بيها هي... وهاديك عائلتهاا وهي ماعندها تاشي مسؤولية عليهوم وهو متفهمها... خرج غادي لخدمة وهو مخنزر ماحاامل يدوي مع حد...وفيما يتفكر هضرة مو ورفضهااا القاطع تايخليه يزيد يتعصب...صونى تلفونو وشاف نمرة رنيم وطلق تنهيدة عالية قبل مايلوح تلفونو فلكرسي لي حداه بدون مايجاوبها...
خلاها تترعد فبلاصتها بهاد لخبار لي سمعات على الصباااح ولي نرفزوها وخلاوها تزيد تعصب... باقي ماسرطات زواج بيسان بريان كملها رؤوف تاهو بهاد الهضرة الخاوية ديالو على قولتها...ماعرفاتش اش هاد الزهر عندها تاولاد التجاني كاملين ضارو بولادهااا... هزات تلفونها تادوز نمرة سناء واخا باقي لحال بكري ولكن ماقدراتش تسنى وبغات على من تخوي هادشي لي هازة فخاطرها وعفاف عرفاهاا مغاتفهمهاش وغاتقصح معاهاا ماشي بحال سناء لي كلها أدان صاغية...
رحمة:(مع تفتح لخط نطقات)عتقيني اسناااء عقلي غايمشي لي بهاد لخبااار
سناء:(بخوف) ياك لباااس مالك اش طاري ليك؟
رحمة:رؤوف گالك باغي يخطب رنيم لي ساكنة عند بات رحيل
سناء:هاااء وراه هاااد لخبار خصها تفرحك ولادك باغيين يتزوجو ويعمرو ليك الريااض بلحفااايد
رحمة:واش نتي معرفاااش مالي اسنااء بحال لاماگلتش ليك اش كاين
سناء:عوتاني نفس لموال ارحمة واش ماعيتيش
رحمة:واش أنااا نشكي ليك بلعگر ونتي تگولي لي اش خبار الدراري
سناء:نتي باغا تعصبي راسك وتنرفزي بوحدك رخفي شوية راسك
رحمة:(شادة على راسها لي حاسة بيه غايتفرگع) ماعرفتش اش من دعوة خرجات فيااا گاع ولادي داتهوم ديك لعائلة وهارؤوف لي بقاا تاهو گالك غايتزوج وهو لي حياتو كلها وهو عمرو جبد هاد السيرة
سناء:وراه راجل اصاحبتي واش غايبقا صايم حياتو كلهااا ضروري مايبغي يدير دارو تاهو أو وليداتو
رحمة:ماگلتش مايتزوجش (زفرات بغيض) تت مغاتفهمينيش اسنااء
قطعات عليها ومبقاتش بغات تزيد تشرح ليها ولاتزيد طول معاها فلكلام حيت مباغاش تسمع الهضرة دالصح لي غاتگول ليهاا... لاحت تلفونهاا وشافت فداك لالبوم لي محلول على تصويرة ديال ولادهاا بربعة وهوما باقيين صغاار...
رحمة:(كادوي مع راسها) حياتي كلها وأنا معاكوم ونهار باكوم مااات واخا جاوني بزاف دالرجال بغاو يتزوجو بيا رفضتهوم كلهوم حيت ماقدرتش نتزوج مور باكوم وماقدرتش ندخل عليكوم راجل غريبب... هزيت همكوم فصغركووم وتافكبركوم واخا وليتو رجاال تباركالله ولكن خاطري مكيهناااش من جهتكووم تاكانشوفكوم قدامي... عشت شلى حوايج فحياتي على قبلكوم نتوما صبرت وصبرت (نزلات ليها دمعة) واش أنا أنانية حيت بغيت مصلاحتهوم واش أنا أنانية حيت بغيت نخلي ولادي جنبي...هوما أصلا كانو جنبي ولكن من نهار هي دخلات لدارنا وكلشي تقلب فيها ولادي كاملين وليت تانحس بيهوم تايضيعو من بين يدي (حطات يديها على صورة نوح لي واقف جنب ناصر مبسمين) دات ليا ولدي لي هز مسؤوليتي ومسؤولية خوتو وبقا معايا هاد السنين كلهااا داير ليا خاطري... ولدي لي كانتعنى بيه قدام العادي والبادي ولي هاز بياا قدام العائلة وداير لقيمة ليا ولخوتو داتو ليا وخلاتني نتحرق بلابيه... (شدات راسها) الرياض خواا ولي كان معمرو مابقاش وبسبابها هي علاش تاحد مكيشوفش هادشي وكولهوم تيلومو فيا وحد محاااس بشنو حاسة أناا... تاحد معارف أنا اش هازة فقلبي والحرقة لي شاعلة فيه.... أنا ماظلمتهااش أنا قلت لي كاين هي دات ليا ولدي وها خوها تاهو دا ليا بنتي وكملاتها تاهاديك لي باغي يجيبها ليا رؤوف ياااربي اش هاد الزهر عندي واش أنااا مغانتهنااش من ديك العائلة تگول ساحررين لولادي (بسخرية) وشكون عرف هاد الحالة لي طارية معجبااانيش وهاد الزعطة لي تزعطو ولادي بتريكة التجاااني مكاتبشرش بالخير (حركات راسها وهي مزولة الغطا عليها) مغانبقاااش مربعة يدي وساكتة على هاد الحالة لا لا هادشي مامولفاااهش ارحمة مايمكنش تهبطي الراااس وتسكتي ضروري ماااديري شي حل لولادك لابقيتي ساكتة ومربعة يديك راه غايهزك المااا واخرتك تبقاااي بوحدك لاحنين لارحيم كل واحد غايدير دارو أو ولادو ونتي ليك الله....
هاز قريعة دالريحة تايرشها عليه وهو واقف قدام لمرايا... قاد شعرو وهز تلفونو خارج من بيتو...مكان حد فالدار من غيرو هو لي خارج دابا غادي يقضي واحد لغراض قبل مايمشي لكافي يتلاقى مع بيسان... شد طاكسي وعطاه لعنوان وخدا تلفونو كيتميساجى مع بيسان ورحيل فنفس الوقت... تاوصل قدام لميزون دڤواتيغ دنوح ونزل داخل وعينو تيقلبو على محمد طه ساعة مبانش ليه... بانت ليه واحد لبنت جايا جهتو عند بالها راه كليان وتبسمات ليه بعملية:مرحبا سيدي اش حب لخاطر
ريان:كاين محمد طه؟؟
لبنت:سي كاين فلبيرو ديالو
ريان:فين جااا الله يحفظك
لبنت:نقدر نعرف شكون نتا اسيدي؟؟
ريان:خوه
لبنت:اه سمحلي تفضل معايا
وصلات لبيرو محمد طه ومشات دير خدمتها وريان حل لباب ودخل مدرم بحال لاداخل لدار باه...هز محمد راسو ونطق باستغراب:واش أنا خليتك فالدار ونتا تابعني لهنا
ريان:اوا هادشي لي عطا الله اجي ولد لحاج كاين؟؟
محمد طه:تت باقي ماجا ليوم ويقدر مايجيش گااع
ريان:تت دوماج كنت باغيه فواحد لحاجة مي ماعليش ناخد فكرة بعدا
محمد طه: اش باغي ؟
ريان:(تايفرنس) غانشري حديدة
محمد طه:وايلي وعلاش لمك ماگلتيهاش ليا
ريان:نتا تالت واحد يعرف
محمد طه:(ربع يديه)شكون لول والتاني؟؟
ريان:باك ولواليدة
محمد طه:اه اوا لاهاكاك هانيااا اوا اشمن حديدة اتاخد فبالك شي فكرة
ريان:واهو باغي شي وحدة تكون مزيانة باش تنصحني
محمد طه:كلشي مزيااان راه لاضربتي ضورة وشفتي غاتعرف بلي حنا عندنا غير الحاجة لمزيانة
ريان:وراني خوك ماشي كليااان بلاصبااغة
محمد طه:نوض تهز نوريك
خرجو بزوج غادي بيه جهة طوموبيلات لي تم كيوريه وريان عينو على لزوبسيون لي فكل وحدة وطبعا ضروري مايشوف الشكل الخارجي والداخلي ديالهاا أو وراه موديلات خرين فلبيسي وريان داخ ولكن فالاخير عجباتو واحد الطوموبيل وقرر ياخدهاا مي قبل يشوف باه ورأيو تاهو صورها وناض خارج مخلي محمد طه يكمل خدمتو...
وصل لكافي ودخل كان باقي لحال على لوقيتة لي متافق يشوف فيها بيسان... شد بلاصة وطلب قهوة على ماتجي وبقا جالس كايتلف لوقت تاشافها داخلة ولابسة سروال دجين مع شوميز غوز ستان ولابسة صندالة بلا كاتمشى عادي...تبسم ليها وتاهي تبسمات بشوفتو وجلسات قبالتو..
ريان:على سلامتك مون دكتوغ
بيسان:الله يسلمك صافا
ريان:بشوفتك شنو تشربي؟
بيسان:كوكتيل بارد (حطات تلفونها) اوف الطريق كانت عامرة بزاف
ريان:وقتاش غاترجعي لخدمة؟
بيسان:باقي سرتيفيكا فيها عشرين يوم واخا راه وليت بخير وساليت الترويض ولحمدلله رجعت كيف قبل مي طبيبة قالت ليا نرتاح
ريان:مزيااان ونيت نستاغلو هاد يامات ونديرو لخطبة اش بان ليك؟
بيسان: فالحقيقة ماعرفتش واش غايقدنا لوقت
ريان:ياك لخطبة غاتكون عائلية يعني عائلتكوم المقربة وحنا وصاف
بيسان:والله ماعرفت خصني نشوف مع ماما راك عارف وتاخويا ونشوف اش كاين
ريان:تشاوري مي فنظري نديرو خطبة كيف قلت بيناتنا وعاد لعرس يكون كبير جامع كلشي
بيسان:ولعرس ضروري يكون كبير جامع كلشي واخا مانبغيهش مي ماما يستحيل تقبل راك عارف
ريان:تاأنا لواليدة باغا دير عرس كبير گالت ليك أول تزويجة (غمزها) لمهم عندي هو نعقد عليك ابنت الناس باش نقدر ندير لي بغيت بضمير مرتااح
بيسان:(ضورات عينيها حشمانة) تت واباااز مكاتحشمش
ريان:(قهقة بالجهد) ههههه مون دكتوغ راه ماشي داكشي لي قصدت مي تاهادشي لي فكرتي فيه عجبني
بيسان:وصافي وااه تت راه غاتوض نخليك
ريان:(بجدية تگولي ماشي هو لي كان مقشب) مهم دابا باش نكون مفاهم معاك راه مغانصبرش بزاف لخطبة ولعرس مغايكونش بناتهوم وقت بزاف ولي نطولوه نقصروه سيري ليوم هضري مع مك أو ولد لحاج وردي عليا باش نعلم دار تاهوما الله يجعل البراكة صبرت وراه صبري تقادا...
***
كانت بوحدها فالدار هي وتوينز كيف عادتهاا...حاطهوم فوق الزربية مور مافرشات ليهوم مزيان وخلاتهوم يتبردو حيت الصهد ومشات تقضي شغالهاا...كاضور غير بواحد لگندورة قصيرة لابساها مع السليب وسوتيان فقط وشعرها جامعاه شفينجة لفوق... كاتستف المواعن فلماشين باش تغسلهوم... كملات داكشي لي تادير ومشات لعند ولادها جلسات معاهوم شوية تتلعب معاهوم وتبوس فيهوم...
رحيل:(تاضحك لإسماعيل) امامي لغزااال ااااح على ريحة (تتشم فيه) ريحة لمسك فولدي الله الله بغيتي ترضع همم بغيتي نم نم
رضعاتو هو وخوه وحطاتهوم تاني مع قوة لهزان تيولفوه وزيد الصهد مباغاش تخنقهوم بزاف... تفوهات فيها النعاس مع ناضت تكى فوق السداري سمعات دقان فلباب خلاها تكمش حجبانها باستغراب شكون غايكون جاا؟؟...مشات تشوف شكون ومع طلات من ديك لعين السحرية وهي تكمش حجبانهاا بعدم تصديق وحلات لباب وعينيها على رحمة لي كانت واقفة تتشوف فيها... كانت بكامل أناقتها كيف مولفاهاا رحيل ودايرة نضاضر دالشمش فوق راسها...
رحمة:(كسرات الصمت لي بناتهوم) غاتخليني واقفة فلباب....
واقفة فلكوزينة تتصاوب لقهوة وبالها مع رحمة لي فالصالة مع توينز... مجيتها جاتها فشكل وماتوقعاتهااش ومعرفاش شنو سبابهاا... تنهدات مباغاش تعمر عقلها بهادشي وتحمق راسها هي غادير واجبها معاها المهم ماتكونش هي لغالطة ولمظلومة... وجدات لحلوى فطبسيل غادة بيها لصالة ومع دخلات بانت ليها رحمة هازة إسماعيل تتبوس فيه وتضحك ليه... حطات الطبسيل ومشات تجيب بلاطو لي وجداتو فيه القهوة ولي طاس ديالهوم ...
جلسات فوق السداري وكبات ليها طاس دلقهوة حيت عرفاهاا تتشرب لقهوة وعزيزة عليها...
رحمة:(حطات إسماعيل وشافت فرحيل بهدوء) لباس عليك؟
رحيل:حمدلله ونتي ؟
رحمة:هاحناا (تبسمات لإسحاق لي جنبها ) كبرو تبارك الله على اخر مرة شفتهوم
رحيل:اه قربو يكملو ربعين يوم
رحمة:ماشاء الله على حبايب جداهوم (شافت فرحيل) تمنيت يكبرو وهوما قدام عيني
رحيل:دابا نيت راه تيكبرو وهوما قدام عينيك
رحمة :ماشي بحال قبل كنت تانشوفهوم ديما وعايشين معايا
رحيل:(فهمات اش بغات تقصد وتاهي جاتها نيشان) تاحد معارف الدنيا اش مخبية ليه اخالتي كنا عايشين فالرياض مجموعين ولكن لوقت خلات كل واحد فينا يسكن بوحدو
رحمة:ولادي مولفاهوم ديما جنبي ملين مات باهوم وهوما معايا (تنهدات) هوما لي صبروني على فراق ناصر وإسماعيل الله يرحمهوم عمرو ليا الرياض ونساوني فهمي
رحيل:تادابا راه هوما معاك ومتأكدة هوما عمرهوم يخليوك بوحدك وغايبقاو ديما جنبك وقتما حتاجيتيهوم غاتلقايهوم
رحمة:ماشي بحال لاكانو عايشين معايا نتي راه أم وأكيد غاتفهمي كلامي
رحيل:ماكدبتيش ولكن عارفة ولادي لاوصلو لواحد لاج غايجي رزقهوم ومغايبقاوش تحت جناحي يقدر غاتجيني فلول صعيبة ولكن غانفرح ليهوم
رحمة:(ربعات يديها) هاد لكلام تتقوليه حيت باقي ماتحطيتيش فلموقف باش تحكمي نتي كاتقولي هادي لي جالسة قدامي راه زادت فيه ولكن نهار تحطي بلاصتي غاتعرفي معنى كلامي
رحيل:مكانلومكش (بصراحة) ولكن لي مابغاش يتفهم ليا هو علاش نتي مبغانيش من نهار لول ؟
رحمة:(ببرود) حيت كانشوف ولدي يستاهل ماحسن
رحيل:(ضحكات ببرود تاهي واخا هضرتها ماعجباتهااش ولكن مابيناتهاش) علاش شنو ناقصني متلا تكاتشوفيني مكانستاهلش نوح ؟؟ لاكان على واليديا حمدلله عندهوم خيرهوم غير حنا مكانبغيوش نبااانو بيه قدام الناس ولاواقيلا حيت أنا مطلقة وعندي بنت؟
رحمة:اه مانكدبش عليك ونافقك ولكن ولدي كنت باغا ليه وحدة عزبة
رحيل:وهاد لوحدة هي بنت خوك شيماء يااكي (كمشات حجبانها) ولانور الهدى مرات لمرحوم ؟
رحمة:هاديك أمانة ولدي وكون نوح بغا يتزوح بيها وقبلها كون ارتاحيت ولكن هو مبغاش حيت هاديك مرات خوه (تنهدات) وشيماء بصح كنت بغيتها ليه ولكن عقلها صغير وماشي كيف كنت تانظن
رحيل:نتي عندك مشكيل مع لمرة لمطلقة وكنظن تاختك سناء كانت مطلقة (هزات حاجبها) علاش هي كنتي ديما تنصحيها باش تشوف حياتها شنو لفرق بيني وبينها مع لعلم بزوجنا مطلقااات ولاهاديك ختك وأنا بنت برانية
رحمة:(حركات راسها) مكانعرفكش ومعارفاش السباب تاطلقتي وزيدي نهار دخلتي لعندنا أو ولدي مبدل علياا كيف بغيتيني نقبل بيك
رحيل:نتي معاشرتينيش وحكمتي عليا وزايدون اشمن حاجة تبدلات فنووح وأنا كيف عرفتو نهاار لول وهو باقي وهادشي نتي خصك تعرفيه حيت هو ولدك وربيتيه على يدك
رحمة:هاد لكلام مبقاش يفيد حيت ولدي خرج من الرياض وشكون السباب نتي؟؟
رحيل:سمحيليا ولكن السبب دخروج نوح هو نتي (بجدية) نهار جيت لعندك وأنا واحلة فروحي جريتي علياا ومع دلك سكت وماقلت ليه والو واخا ديما كانتفكر كلامك لي قلتيه ليا ولي عمري نساااه نهار رجع وجيت معاااه واخا مكنتش حاملة ندخل لداك الرياض لي جريتي عليا منو ولكن درتهاا على قبلو هوو باش مانبينش ليه شنو طاري ونهار السبيطار تاهو جيتي عندي وهاجمتيني وقللتي من خويا مع العلم مكتعرفيهش حكمتي عليه وماقبلتيش بعلاقتو مع بيساان... علاش عزيز عليك تنقصي من لواحد؟ تبغي شي حد ينقص من واحد فولادك اكيد لا وراه نفس الشي لولاد النااس ولاكنتي كاظني راني ديك لعروسة لي تتعمر ولدك راكي غالطة اخالتي حيت اخر همي هو ندير الصداع بيناتكوم وزيد ولدك راه رااااجل وغير لافكرت نجبد سيرتك بالخايب غايندمني عليها وماشي غير هاكا أنا حمدلله قلبي ماكحلش باش ندير الفتنة بين النااس عارفة بلي هاد لكلام مغاتيقيهش وهادا ختيارك نتي ولكن ديري فبالك لابقيتي تتفكري بهاد التفكير راه غاتخسري ولادك كاملين وغاتخليهوم يبعدو عليك أنا براسي نهار نوح قال ليا غانسكنو بوحدنا مابغيتش ولكن ماعندي ماندير وتبعت راجلي حيت هو لي دايم لياا ودايم الله
سكتو بزوجات فاش سمعو لباب تحل شوية تم داخل نوح لي كان تايلعب فسوارتو بيديه... وقف وعينو عليهوم بزوجات قبل ماينطق بهدوء:السلام أوعليكوم
ردو عليه السلام ورحمة نطقات باشتياق:ولدي توحشتك (عنقاتو) ضعافيتي احبيب ديالي
طلعات رحيل حاجبها وضحكات ببرود على اخر كلمة قالت رحمة ولي عارفة بلي بغات تحشي ليها الهضرة بطريقة غير مباشرة ولي فيها مامهنيهاا... معرفاتش هاد السيدة مالها معاها حيت بزاف على الكره وهي عمرها دارت معاها شي عييب ولكن لمشكيل ماشي فيها لمشكيل فعقلية رحمة وتفكيرها لعووج والمنطق لي واخداه بلعكسي... بعد نوح على مو ونطق ببرود: غير كيبان ليك ايمّاا
رحمة:(تتقيس وجهو) توحشتك اولدي من نهار خويتي الريااض ونتا غابر علياا
نوح:غير مع لخدمة وصاف وزايدون راه كنت ناوي نجي لرياض
تخطاهاا ومشى لجهة رحيل باسهاا فوق راسها وهي تبسمات ليه بحب قبل مايمشي يهز وليداتو لي ناعسين مخلي رحمة غادة وراه تاهي جلسات فبلاصتها..
رحمة:(فرحات بكلامو) هي ناوي ترجع
نوح:(بهدوء) كنت جااي باش ندويو على زواج بيسان وريان (غمز رحيل) كبي ليا قهوة
تكى على لمخدة ناشر يديه فوق لوسادة ديماه ورحيل مدات ليه القهوة كحلة بلاسكار ورجعات جلسات بلاصتها دايرة رجل فوق رجل وسيگان باينين وضفار مصبوغين بلحمر خلاوه يطلع شوفاتو فيهاا متبعهاا بعينيه تاوصل لوجهها وهو يعض على شفتو وشاف فيها بنظرة فهماتهاا مزياان...
رحمة:( لهضرة خارجة فوق قلبها وبزز عليها) ديرو خطبة هو لول يعرفو بعضياتهوم مزيان واحد لعام عاماين وديك الساعة يديرو لعرس
نوح:(شاف فمو وقال بجدية) داك تطوووال ماعنديش معااه لادارو لخطبة موراه لعرس نيشاان وماشي شي براني باش يتعارفو
رحمة:ولكن اولدي راه خص لوقت راك عارف لعرس مغايجيش غير هاكاك وتابعنا بزاف دلحوايج
نوح:تريتوور قاضي لغراض هوما غير يحددو نهار ولباقي علياا وداكشي لاخر تكلفو بيه نتوما النساا لي كاتفهمو فيه
رحمة:اه والسكنة واش وجدوهاا نتا عارف هادشي كياخد وقت باش يلقاو الدار ويفرشوهاا
نوح:داكشي بينو وبينها (شاف فيها) هي لي غاتدوي معاه فلموضوع ماشي أنا
رحمة:(ماعجبهاش لحال) ولكن اولدي راه ضروري ماخصنا نشوفو تاحنا واش هادشي واجد راه بنت وحدة لي عندي وراني باغا نطمن عليهاا
نوح:(حط طاس دلقهوة وقال بجدية) وعند بالك أنا مكاتهمنيش ومهازش همهاا ايمّااا؟؟
رحمة:(بتلعتم)لا اولدي ماقصدتش هادشي راه غير بغيت نعرف وصاف
نوح: غير هني بالك ايمّا وماتبقاايش تفكري بزااف وتمرضي صحتك راني عارف اش تاندير (شاف فرحيل) اجي ارحيل واحد الدقيقة
ناض مخلي رحمة تاضور فعينيها ماشي هادشي لي بغات هي جات باش تقنعو يرجع مي بهضرتها غاتخليه غير يكفر ومايبغيش يرجع...
سبقها لكوزينة وتبعاتو تادخلات وردات لباب وراها وشافت فيه بهدوء:نعام؟
نوح:(تكى على البوطاجي) اجي
مشات لعندو رحيل وشدها من خصرها وتحدر باس أرنبة نيفها وقال بهدوء:گالت ليك يمّا شي حاجة قبل مانجي
رحيل:(تبسمات) لا مگالت ماتهزش لهم انوحينوو (باستو فدقنوو) شنو بان ليك بيما أن ماماك هنا نعيطو لرؤوف ولبيسان يجيو يتعشاو معانا؟؟ (بتدكر) اه تاخالتي عفاف وجدك تاهو
نوح:(تايطلع يديه مع ضهرها وينزلهاا بحركات بورشاتها) لي بان ليك الفتنة ديالي
رحيل:(بخفوت مبورشة) نووحينووو
تحدر خاشي راسو فعنقها وطبع بوسة خلاتها تغمض عينيها وتعوج راسهاا... بقا تيحرك دقنو على نحرها مخليها تهرب راسهاا حيت هرهاا وقالت بضحك:وراه كتهرني
نوح:(شاف فيها) كلك تتهري
رحيل:لا كانتهر غير فعنقي
نوح:(قرصها فوق أنوثها وقالك بمكر) ونسيتي هنااا
رحيل:(عضات على شفتها) هههه تما خط حمر
نوح:(هز حاجبو)وايلي نسيتي بلي هادا دماليه (رجع قرصها تاني) غير بلاتي نشدو وتشوفي اش ندير فيه
رحيل:(تعلقات فيه) اوا مابقا قدما فات
نوح:شاد لحساب غير تهناااي (باسها فشفتها) يالاه سيري رجعي لداخل نعيط لسيد لي غايوجد لينا لعشاا
رحيل:واخا انوحينو
سيفطات ليه بوسة ومشات راجعة عند رحمة وهو تكلف عيط لسيد لي مولف فكل عراضة تايوجدها ليهوم...
***
كانت هاديك أول عراضة ديرها رحيل فدارها الجديدة وطبعا واليديها خلاتهوم تال نهار اخر باش تاخد راحتها معااهوم وبلعاني بغات تجمع غير عائلتو هو... لابسة قفطان مع فولار وجالسين فالصالة مجمعين مع بعضياتهوم ورؤوف ساكت وغير تيشوف وفيما رحمة تشوف فيه يقلب عينو عليها واخد موقف منهاا...
نوح:(تحدر جهتو وقال بهدوء) فكها شوية
رؤوف:ماعرفت اش غاندير معاها تت
نوح:(ببرود) دويناا فلبلان وگلت ليك خلي تانزوجو ختك وديك الساعة نمشيو ونخطبوها ليك (هز حاجبو) عارفني لاعطيت الكلمة راه كانوفي بيها
ارتاح رؤوف وهو عارف خوه غايگد بلكلمة لي عطاه وهو أصلا لي كيعرف لمو وعارف بلي مغاتگولش ليه لا... هز تلفون سيفط ليها مساج حيت هاد نهار ماهضرش معاها واخا صونات ليه زوج دلمرات ولكن مجاوبهاش حيت بالو بقا مشطون مع داك لكلام لي گالت ليه مو...
دازت نص ساعة وهو كيتسناها تجاوبو وفاش مالقى منها جواب ناض غادي يصوني ليها...خرج لبرا وركب فطوموبيلتو ودوز نمرتها مرة وزوج مجاوباتش تال تالتة وهي تجاوبو بهدوء ونوعا ما من لبرود:الو
رؤوف:كبيدة ديالي توحشتك
رنيم:يتوحشك الخير
رؤوف:(كمش حجبانو) مالكي كاتهضري معايا بالنفخة؟؟
رنيمة:ماماليش
رؤوف:رنيم بلامرض عوتاني اش كاين
رنيم:شوف نتا اش كاين مصونياا عليك زوج دلمرات مجاوبتينيش وگلت ماعليش يقدر يكون عندو خدمة مي بااش تبقا نهار كامل متصونيش علياا وماتسيفط تامسااااج ونتاا داخل مكونكطي فهنا عرف لمشكيل فيك نتااا ماشي فيااا وشوف نتا لي مااالك
رؤوف:(ساط النفس) ماجاوبتكش حيت وقع واحد لبلان مرضني فصحتي هادشي علاش
رنيم:صافي تادابا مزيااان سير ديها فبلانك تاوكان تسالي ولكن دير فبالك راه مغاتلقانيش تانتسنى فيك
رؤوف:(كمش حجبانو) اش دانا لهاد لهضرة ارنيم
رنيم:شوف ارؤوف نجيك نيشان بحال هاد لبلانات مكيعجبونيش ولاكنتي نتا مولف هادشي أنا ممولفاهش وأنا مباغاش نبقاا نمرض راسي معاك
رؤوف:دابا وليتي تتمرضي راسك معايا يعني أنا كانمرضك
رنيم:فهم كيما بغيتي مغانحمقش راسي وقبل ماتجي تنفخ سير شوف راسك اش درتي بسلامة
قطعات عليه مخلياه غير كيشوف فالتلفون ماتوقعش غاتهز فخاطرها حيت مجاوبهاش وعندها لحق ولكن هو ديك الساعة كان مهموم وكان باغي يلقى حل لداكشي لي باغي وكون ماخوه لي ريحو وعطاه لكلمة ملي مشا عندو لمحال كوون راه باقي تايفكر فشي حل لي يخليه يقنع مو... ديك الراحة لي كان حاس بيها طارت مع هادشي لي طرا بينو وبين رنيم...سيفط ليها مساج تيحاول يشرح ليها ساعة مجاوباتوش وتاهو خلاها براحتها تاتبرد...عاد دخل تاني عندهوم...
****
وقفات رحيل طوموبيلتها قدام دار باها ونزلات بكسيوة بيضاا مع فولار غووز وصويك صغير فنفس لون وصندالة صيفية مبينة ضفار مصبوغين وقوة لخواتم فيديها مع خاتم الزواج... نزلات سيدرا هازة نوسيد ومشات باش دق لباب تاخرج ريان لي سلم على رحيل وعاونها تادخلات توينز لدار...
رحيل:هاحنا جينا اجدة
تانيرت:مرحبا والف مرحبا ابنتي اراي ليا حفااايدي لغزالين (هزات إسحاق) الصلاة عن النبي بحفاايدي
رحيل:اوا الالة هاهوما جبتهوم تگابليهوم وراه لحليب كاين فشكارتهوم تاديريه فتلاجة
تانيرت:غير تهناااي انتهلا فيهوم
رحيل:عارفة يالاه انا مشيت باش مانتعطلش على أسماء بيزووو سيدرا لبيتيز لااا
سيدرا:صافي مامي
خرجات رحيل غادة لعند أسماء لي كانت تتسناها ومع وصلات نزلات عندها وركبو بزوجات غاديين لعند طبيبة دأسماء حيت إسلام كان عندو غيونيون ضروري وماقدرش يمشي معاها عليها مشات رحيل بلاصتو...
أسماء:فخبارك كملت سبع شهور لبارح
رحيل:حلفي ياختي ياختي لخنفوشة قربات تجي لدنيااا وجدتي ليها بعدا لحوايج
أسماء:ويلي وتشوفي اش شريت وإسلام تاهو وجد ليها لاشومبغ (بحمااس) كانتسنى غير وقتاش نهزها بين يدي ارحيل عرفتي حاسة بواحد الشعور زوين
رحيل:إن شاء الله تهزيها وتفرحي بيهاا (بمزاح) وراني خطبتهاا لواحد من ولادي باش نعلمك
أسماء:ههههه غايكوون بناتهوم شحال دلفرق
رحيل:ربعين يوم (ضحكات فاش تفكرات نوح) ههههه ليوم كملتها
أسماء:(غمزاتها) ديك الضحكة وراها شي حاجة غير گري
رحيل:ملي نخرجو من عند الطبيبة تمشي معايا نتقدا شي لعيبات بغيتهوم
أسماء:هممم لعيباااات ههههه
ضحكو بزوجات والطريق كولهوم هوما تايهضرو ويتعاودو تاوصلو قدام لكابيني ورحيل مالقات فين تبلاصي...نزلات أسماء هي لولة وبقات تسناها تالقات بلاصة مي فالصف لاخر دالشانطي... لحقات عليها رحيل ودخلو لداخل كيتسناو نوبتهوم... تفكرات رحيل ياماتها تاهي وصراحة بحال هاد الأيام مكاتعوضش... وصلات نوبة أسماء ودخلات باش طمن على لكتكوتة لي كانت بصحة مزياانة لاهي لامهااا مي واخا هاكاك كتبات ليها طبيبة ڤيتاميناان على قبل صحتهاا...
خرجو من عندها وأسماء مشات لعند السكرتيرة باش تاخد تاني غونديڤو لمرة الجايا
رحيل:أنا سبقتك لتحت
بقات اسماء تاتهضر مع سكرتيرة تاعطاتها لادات وديك الساعة...كانت مبسمة وهي خارجة من لكابيني مور ماطمنات على صحة الجنين ويديها على كرشها لمنفوخة... غادة باش تقطع شانطي لعند رحيل وهي ممنتابهاش لطوموبيل لي كانت جايا بواحد تهور قاصداها وجات فين ترجع لور باش تجنب ليها تاكانت ضرباتها تاطاحت فالشانطي على ضهرها ودمها دغيا نزل منها وهي حالة عينيها نص حلة تاشوية بدات تسدهوم تاغيبات...
هاد لمدة كلها وهي مراقباهوم فصمت وبدون ماتلفت الانتباه من اخر بلان طرا ليها فالسبوع ولحصلة لي كانت غاتحصل... لابسة نيقابها كيف العادة ومغطية كلشي تامن عينيها باش مايعيق بيها حد ويعرفهااا...ملي خرجات رحيل من دار وهي تابعاهاا تاوصلو لعند الطبيبة هي وأسماء وجلسات تاتسنى فيهوم وفجنبها صاحبتها تاهي لي ولات شريكة معاهاا بلاماتحس تاهي لابسة نقاب... ساكتة وغير تتشوف فميس لي كل مرة تهز ساعتها وتشوف فيها وتحرك فبلاصتها بحال لاراه جالسة على الشوك...
ص:دابا شنو غانديرو؟واش غانبقاو غير جالسين هنا وتابعينهوم
ميس:(بسهو)گلت ليك النهار لول لابغيتي تعاونيني ديري لي غانگول ليك عليه بلاكترة لهضرة
ص:وراه معاوناااك ولكن باغا نعرف اش فبااالك
ميس:(ضحكات بمكر) فبالي شلى حاجات نتي غير تفرجي وشوفي حقي غاناخدوو منهوم جميع ومانتهنى تانشتت ليهوم الشمل
ص:اوووف هاد الزمر صهدني ماكرهتش نحيدو
ميس:لاحيدتيه غادي تجبدي علينا النحل
سكتو فاش بانت ليهوم رحيل خارجة وغادة جهة طوموبيلتها حلاتها وطلعات جالسة... بقات ميس تاتشوف فيهاا تابانت ليها أسمااء نازلة وفديك الساعة ديمارت طوموبيلتهااا وقلعات بواحد السرعة خلات صاحبتها غير تتشوف فيها ومع جات تسولهاا شنو باغا دير كانت ميس ضربات أسماء بطوموبيل وطيحاتها فالأرض وخلاتها غارقة فدمهااا...ماوقفاتش طوموبيل وبقات غادة مخليا صاحبتها تتشوف فيها وهي مصدومة وحالة فمهاا وبصراخ قالت:واش حمااااقيتي اشنوو درتي
ميس:(بابتسامة مريضة مخبية تحت النقاب نطقات) درت لي خاصو يداار
ص:(شادة راسها باغا تهباال) لا لا لا متافقناااش على هادشي متافقنااااش اميس نتي ماقلتيش لياااا غاااتقتليهاا اصاحبتي ماقلتيهاااش
ميس:(ببرود نطقات مكملة سوگانها) مالكي مخلوعة وشوية وتبولي فحوايجك
ص:واش عارفة اش درتي نتي راااه قتلتي زوج روااااح
ميس:عارفة (شافت فيها بجنب عينيها)وهادشي لي باغااا (زيرات على لڤولون)ماخصوش يفرح بيهااا ويكمل حياااتو
ص:(تاتعض ضفرانها تحت النقاب ولهضرة تلفات ليها) بغيت نزل وقفي اميس باغاا نزل مابقيتش باغا نكمل فهادشي صافي تال هنا وباركة (خنزرات فيها)مابغيتش نرجع لحبببس لي خرجت منو بستة وستين تكشيفة لا لا مغانرجعش لداااك تمااارة مبعد ماخرجت منهاا
ميس:(ببرود) ماعندك فين تمشي نتي صافي وليتي شريكة معاياا غير تهنااي وارتاحي حيت هادشي لي وصلنا ليه وصلناه بزوووج (هزات كتافهااا مامسوقاش) ولامشيت فيها غانمشيو فيها بزوج
سكتات صاحبتها وهي غير تتشوف فيها فلول مكانتش عارفة بلي ميس هادي هي نيتهاا ومعرفااش بلي غاتوصل لهاد لمواااصل واخا كانت تتعاونها ولكن فاش شافتها كيفاش ضربات أسمااء وهي حاملة تماا تصدمااات ولي صدمها كتر هو برودهاا بحال الامدايرة والو...سكتات وهي تتسرط ريقها على هاد المشكيل لي دخلات فيه راسهاا وربطات راسها بيه...
***
كلشي داز قدام عينيها بسرعة لبرق وهي جالسة فطومبيل تاتسناها وهازة تلفونها تاتهضر مع نوح تاشوية لكلام وحل فحلقها وعينيها تحلو على جهدهوم ممتيقااش شنو شافت يديها كاانت تترعد عليها وعينيها على أسماء لي طايحة فدمهاا تااغوتااات بسميتهاا على جهدهاا
رحيل:أسماااااااااء
طاحت ليها تلفون ونزلات بزربة تاترعد غادة لعندها مخليا تلفون طايح فطوموبيلتهاا ونوح حلقوو غايخرج بقوة الغوات وهو تيعيط ليهااا ومامن مجيب... حيت هي فديك لوقيتة كانت جالسة حدا أسماء لي غيبات تتقيس فيهاا وتتغوت بسميتها وتعيط ليهاا...
رحيل:(هزات عينيها جهة الناااس وغوتات تاصوتها تبح) عيطوووو لومبيلووووونص ختي تتمووت عيطوووو ليهوم (تاتقيس وجهها وتتشوف دم نازل منهاا خلعاتها) أسماااااااء أسمااااااء لا عفااااك فيقي شوفي فياااا
عقلها غايخرج تاتغوت باغاا تحماااق وهي حاطة راس أسماء على ركابيهاا وناس تيشوفو ولكلام كتير وشي تيعيط لومبيلونص ولحالة نايضة كلشي بقات فيهوم وهوما كيشوفو فيهاا حاملة....
لوقت تايفوت ولومبيلونص وأخيراً وصلات ورحيل ناضت بعقل خارج وكسوتها لبيضاا طبعات بددم أسماء لي هزوها أوغجووون ومع بغات تركب معاهاا ماخلاوهاااش...قربات واحد لمرا جهة رحيل وشداتها فيديها وقالت: ختي زيدي نوصلك ونمشي معاااك
رحيل:(تاتشوف فلومبيلونص لي سدو بابهاا وقالت بعقل غايخرج)ختي خصني نمشي معاااهاا أنا مانقدرش نخليهااا
عاوناتها السيدة وهي عارفة بلي رحيل فحالة الصدمة لي بصح خلاتهاا تادخل وتخرج فلهضرة ممتيقاااش داكشي لي طاري...نطق واحد السيد لي كان شاف رحيل فاش نزلات من طوموبيلتهاا:راه طوموبيلهاا لهيه اختي
داتها ديك السيدة وعاوناتها تاركبات وهي تركب بلاصة الشيفور وصاگت بيهاا ورحيل تتبكي وتشهق فيما تشوف فدم أسماء لي فكسوتها تاتبغي تحمااق...
يديها تاهوما عامرين بالدددم وهادشي كيخليها تفكر شي حوايج لي واخا دازو عليهوم سنين الاأنه محفورين فدماغهااا... تتمسح يديها بهسترية فكسوتهاا والسيدة تتشوف فيها بشفقة متفهمة وضعها تابان ليها تلفون رحيل طايح هزاتو لقات لابيل باقي داايزة مع نوح لي خرج من الخدمة بزربة معارفش اش طاري ولي زاد مخليه يتشطن هو لابيل دايزة ماتقطعااتش ولكن هي مكاتجاوبش خاف عليها ومالقى تاشي حل من غير يمشي لعند طبيبة لي كانت نفسها طبيبة درحييل وكان عارف لادريس ديالهااا...
شدات ديك السيدة تلفون وحطاتو على ودنيها وقالت بهدوء: السلام أوعليكوم
نوح:(نطق بخشونة) شكوون معااايااا؟وفين رحييل ؟؟
س:واحد السيدة حاملة ضرباتها طوموبيل وراه جات لومبيلونص وداتها والسيدة لي معاهاا راه حدايا غادية بيها لسبيطار حيت ماتقدش تصوگ وحالتها تتبان ليا ماشي تال لهيه
نوح:دوزيها لياا الله يحفظك
مدات تلفون لرحيل لي شافت فيها وهزاتو وبصوت باكي نطقات:نووووح أسماااء كاتمووووت نزل منهااا دم بزاااف ختي كااااتموت انوووح....
نوح:(بصوت خافت وهامس نطق) رحييل سمعيني مغايووقع لختك تاحااجة تهدني داااباا الله يرضي عليك
رحيل:(بهسترية تاتحرك راسهااا يمين وشمال)هي مكاتحركش أنااا شفتهاااا ماتحركاااتش ودمهاا نااازل بزااااف
طيحات تلفون وغطات وجهها بيديها وبدات تبكي وتشهق والسيدة هزات تلفون ونطقات بهدوء:حنا غاديين ل****
نوح:(بخشونة) الله يسهل عليك ردي ليها لبااال تانجي وماتخليهاااش بوحدهاا الله يحن عليك
س:واخا اسيدي كون هاااني
قطع معاهااا وعين فطريق وعين فتلفون تايقلب على نمرة إسلام باش يعلموو تالقااهاا وصونى عليه وبقا يتسنى يجاوبو ولكن ديك الساعة هو كان فلغيونيو وحابس الصوت لتلفونو... قلب نوح الطريق غادي لگاراج عند إدريس وهو معارفش كيفاش غايوصل ليه الخبار...وقف طوموبيلتو ونزل بخطوات تقيلة داخل لگاراج وإدريس غير شافو وهو يتبسم وقال ببشاشة: وأنا تانگول مااال الگاراج منور گول بمجيتك اولد لحاااج
نوح:(بهدوء) الله يكبر بيك اسي إدريس
إدريس:جلس (شاف فدري لي خدام عندو) سير جيب لينا براد دأتاي بلا سكار
نوح:تت مكاين لاش أنا مابغيت والو سي إدريس(قرب جهتو وشد فكتفو ونطق بصوت هادئ) سي إدريس كاينة واحد لحاجة نتا خصك تعرفهاا
إدريس:(قلبو حسسو بلي شي حاجة كاينة) الله يسمعنا خبار لخير اش كاين
نوح:بنتك أسمااء دارت كسيدة
زير إدريس على يدو وحنى راسو لقدام وقلبو حس بيه كيضرب بالجهد شوية ويسكت ليه... شد فيه نوح لي نطق بهدووء:سي إدريس نتاا بخير؟؟
إدريس:(شاف فيه) اش وقع ياك هي كانت بخير كيفاااش دارت كسيدة
نوح:معرفتش هوما دابا داوهاا لسبيطار خلينا نمشيو عندهاا
لاح داك الزيف باش كيمسح وماتسناش يزول لكومبين مشى بيها ونوح غادي جنبو وحاضيه تاطلعو فطوموبيل وقلعو غاديين لسبيطار لي فداك الأثنااء كانت لومبيلونص وصلات ونزلو بأسمااء غاديين بيها لبلوك حيت حالتها كانت أوغجووون... وبعد دقائق وصلات تارحيل لي نزلات بلاعقل مامسوقااا لالطوموبيل لالصاكها لاتاشي حاجة وعقلها غير مع ختها ومن زهرها ربي طيحها فالسيدة لي كانت بنت الناااس أو وقفات معااه رادة لبااال لحاجتهاا... دخلات تاتقلب عليها تالقات واحد لانفغميغ وقالت بزربة:ختي فين هي؟؟
م:(باستغراب)شكوون ختك الالة ؟
س:(من وراهاا) السيدة لي جابت لومبيلونص عاد دابا راه حاملة ودارت كسيدة؟؟
م:اااه راه نزلوهاا لبلوووك
رحيل:بغيييت نشوفهااا
م:مايمكنش ليك السيدة حالتها گغااف وراه هي فلبلوك دابااا تسناوهاا تاتخرج طبيبة لمكلفة على حالتها
خلاتها تاتشوى ورجلين باااش توقف مابقاوش هازينهاا وماحسات السيدة تاسمعات صوت زادددف دطيحة درحيل لي طاحت على ركابيها وعينيها سهااو فلعدم ومنظر أسماء وهي غارقة فدمهاا وكيفااش الطوموبيل ضرباتهاا بين عينيهاا ماقاداااش تنساااه...
لوقت داز أو وصل نوح مع إدريس لسبيطاار ودخلو تايقلبو عليهوم تاقشع نوح رحيل باقي جالسة فالأرض ماتحركاتش من تم واخا حاولات السيدة معاهاا وتگول واش داتها فيها...جرى نوح جهتها ونزل جالس على ركابيه وعينو عليها وعلى كسوتها لي فيها الدم... حط يديه على حنكهاا وضور وجهها جهتو وقال بصوت خشن حنين:رحييل شوفي فياا
رحيل:(شافت فيه بسهو وقالت بخفوت عقلها مرفوع) ختي كاتموت ختي غاتمشي وتخليني كيف خلاتني جيدااء..
جرها لعندو معنقهاا بالجهد وهي مدارت تارد فعل ويديها مزيرة عليهوم فحجرهاا وعينيها تايشوفو غير قدامهاا بحال لاترفعاات وهادشي خلى نوح يخاااف عليهااا... كلشي ساق لخباار وعرفو بداكشي لي طراا وجااو تايجريوو لسبيطاار فين كانت رحيل جالسة فوق الكرسي وساكتة ماتتبكي ماتتهضر ماتادير تاشي رد فعل حدها تاتشوف قدامهاا... إدريس ساكت وحاط راسو بين يديه كل مرة يطلق تنهيدة مخنوقة وقلبو واكلو على بنتو لي باقي ماعارف عليها تاشي خباار... جالسة جنبو تانيرت لي عينيها حمرين بقوة الدموع لي بكات وريان ومحمد طه غاديين جااايين حمات فيهوم لبيضااا...
فبرا كان نوح تايجرب نمرة إسلام لي هاد لمرة شداات وجاوبو بصوت هادئ ومستغرب نوعا ما:ولد لحاج لباااس عليك
نوح:ولله لحمد ونتا؟
إسلام:مزياان يسول فيك لخير
نوح:فينك؟
إسلام:أناا يالاه ساليت خدمتي وغادي لعند عمي إدريس ياك الأمور هانياا
نوح:اجي ل**** أنا كانتسناااك
إسلام:(زاد استغرب) ياك لباااس شكون لي فالسبيطار؟؟
نوح:اجي اإسلام وماتعطلش
قطع عليه وفضل مايگول ليه والو وهو عارفو غايسوگ ويقدر توقع ليه شي حاجة... أما إسلام استغرب من اتصاال نوح لي بيناتهوم حساسية وكيفااش هو باغي يهضر معااه... حك لحيتو وهز تلفونو تايصوني على أسماء لي تلفونها طافي...جاه بيزاغ أنها طفات تلفونهاا دخل لواتساب لقاها مسيفطة ليه تصويرة سونار ديال لكتكوتة ومع شافها عيونو لمعو... بقا تايشوف فيها ويكبر وقلبو تايضرب بسرعة وداك الإحساس لي حس بيه ماليه مثيل... حس براسو مالك الدنياا وهو كيشوف فتصويرة بنتو لي باقي ماتزادت ومشتااق أنها تزاد ويهزها بين يديه ويعوض بيهااا داك النقص وداك الفقد لي حاس بيه... يعمر داك لفرااغ لي حاس بيه من نهار ماتت ليليااان... تبسم وباس ديك التصويرة ورجع قرا مساج أسماء لي كتبات ليه "بنتناا راه بخير وطبيبة قالت ليا بلي كلشي هو هداك وراه كملت السبع شهور وراني خارجة من عند طبيبة وغانمشي لدارنا ملي تشوف لمساج صوني علياا اوكي بيزووو"
إسلام:(جاوبها) غزااالي أنا ساليت صونيت عليك مي تلفونك طافي لاجاب الله شعلتيه صوني علياا اوكي
قلع غادي لبلاصة فين متافق مع نوح يتلاقاو وغير وصل بان ليه واقف متكي على طوموبيلتو كيكمي...نزل إسلام لي شاف فيه بتبسيمة ونوح قابل تبسيمتو بنظرة مامفهومااش...
إسلام:ولد لحاج ياكما تعطلت عليك (شاف فباب السبيطار) ياك لباس شكون كاين هنا؟
نوح:(نطق برزانة) ليوم فاش كانت رحييل وأسماء خارجين من عند الطبيبة واحد الطوموبيل ضربات مرتك وجبناها لهناا
ديك الضحكة لي كانت على وجه إسلام بدات تتمحى شوية بشوية وهو تيسمع كلام نوح لي كان بحال السم على قلبو...
إسلام:(حرك راسو ونطق بعدم فهم) كيفااش ضرباتها طوموبيل تاضحك معايا يااك ههه أسماء راه يالاه صيفطاات ليا تصويرة دبنتي وقالت لياا راه خرجات من عند طبيبة (شد فيه ونطق بترجي) ولد لحاج الله يحن عليك گول ليا بلي هادشي مكاينش
نوح:(حط يديه على كتفو وقال بصوت خشن) حاول تبت راسك اإسلام
حرك راسو بلا حااس بالخنقة ومع كان لابس گرافاط بدا تيحلها عالله يتنفس ونوح كيشوف فيه...بقا فيه وعارف بلي لموقف لي هو فيه صعيييب وبزاااف راه مرتو لي فلداخل وكبدتو تاهي شعور صعيب يتوصف... مسح اسلام على وجهو وشاف فيه:فين هي بغيت نشوفهااا؟
نوح:فلبلوك خلينا ندخلوو
دخلو بزوج وإسلام قلبو واكلو على أسماء وهادشي لي مكانش يطيح على لبااال...ليوم فالصبااح كانت معاه ضاحكة وفرحانة حيت غاتمشي لعند طبيبة وتمناتو يكوون معاها وفاش عرفاتو مايقدرش بدات تنگر عليه ودير ليه تأنيب الضمير وفاش شافتو كان غايأنولي الخدمة ضحكات فوجهو وقالت ليه ماعليش ندوزها ليك... قبل ساعات قليلة هي كانت بخير وداباا هي فلبلوك وتاحد معارف حالتهااا... والحياة هاكا دايرة تاحد فينا معارف اش مخبية ليه تقدر تكون بخير ومابيك والو وفدقيقة تبدل حيااتك...
كلشي كان تيتسنى شي خبار وإسلام واقف بعيد فعينيه دموع مباغينش ينزلو وشحال صعيب داك الانتظاار لي تاتحس بيه تيحرق فدمك... هز تلفونو وجبد صورة السونار تايشوف فيه وعض على شفتو وبصوت خافت نطق:يااااربي ماتحرمتيش منهووم ياااربي مقاادرش نعااود نعيش نفس الحاااجة ياااربي هوما بين يديك حميهوم ليااا
زير على تلفونو وبدا تايسوط النفس لي خانقو...
بانت ليهوم واحد لفرملية جايا جهتهوم تاوقفات قدامهوم ونطقات بهدوء: نتوما هوما عائلة السيدة لي حاملة ودارت كسيدة؟؟
إسلام:(نقز جهتهاا بزربة وقال بلهفة)اااه أنا راجلهاا مرتي كيف بقااات؟
لفرملية:خسرااات بزاف ديال الدم وخص لي يتبرع ليها زمرة دمها A+
محمد طه:أناا نتبرع ليها
لفرملية:واخا زيد معايا
إسلام:(شدها من يديها وقال بسرعة)مرتي واش بخير
لفرملية:جاتها إيموغاجي وكانحاولو نوقفو النزيف ونعتقو لبيبي ولامامون بزوج حيت وضعهوم خطير..
صوت بكاا توينز كاسر الدنيا وغزلان هازة إسحااق وتتحاول تسكت فيه وتحرك فإسماعيل على ماتجي رنيم وتجيب الرضاعاات... واخيرا بانت ليها داخلة تاتحرك فيهوم ومدات ليها وحدة وهزات هي إسماعيل وبدات تعطيه يرضع...
غزلان:مساكن حلقهوم خرج بقوة البكااا
رنيم:فاش تيجيهوم الجوع هاكا تيكونو
غزلان:(بحزن)بالي مع أسمااء ماعرفت كيف بقااات وتالخرين ملي مشاو ماعيطو
رنيم:(بحزن) هادشي لي مكانش يطيح على لباال قلبي ضارني عليهاا وماكرهتش نمشي عندها مي مانقدرش نخلي توينز وخالتي أمناتنا عليهوم
غزلان:كيفاش ضرباتها طوموبيل عقلي ماتقبلهااش وكيفاش طراا هادشي
رنيم:تاأناا ماعرفتش رحيل هي لي كانت معاهاا تت تاهي يعلم الله حالتها كيف غاتكون
غزلان:الله يدير تاويل دلخير وصاف جربي صوني لريان ولامحمد طه وسوليهوم
رنيم:بلاتي نسالي مع إسماعيل ونصوني ليهوم
رضعاتو مزيان وگرعاتو بحال كيف تاتشوف تانيرت تادير ليهوم عاد حطاتو مور مدارت ليه لهاية وهو بدا تيشوف وساكت... هزات تلفونها وصونات لرياان لي كان تيصوني تلفونو وهو مكيجاوبش عياات ماتجرب ساعة والو وتامحمد طه نفس الشي وهنااا بالها تشطن...
رنيم:مكيجاوبوووش اغزلان (بخوف) ياكما تكون وقعات ليها شي حاجة
غزلان:(حركات راسهاا كاترعد تاهي وقالت) لا لا ماتگوليهااش (حطات إسحاق) عاودي جربي صوني
نفس الشي التلفون كيصوني وحد مكيجاوب سكتو لبنات ولخلعة ركباتهوم وغير سمعو الدقان فلباب مشات غزلان تتجري حلات لباب ولقات بيسان تاهي واقفة بوجه مخطوف دخلات وقالت بسرعة:تانصوني لرياان مكيجاوبنيش تافقناا نتلاقااو ليوم مي مجااش واش كاين هنا فالدار
غزلان:(حركات راسها) مافخبااركش أسماء ضرباتها طوموبيل وكلشي مشى لسبيطار
بيسان:(بصدمة)اويلي وقتاااش وشنو وقع
رنيم:ماعرفناش كنا جالسين تاااصونى ولد لحاج على محمد طه وعلمو وكلشي مشى وبقينا أنا وغزلان حاضيين توينز وسيدرا لي فلفوووق تتلعب ومعرفااش اش طااري
بيسان:(تاتحك جبهتهاا ) تت انصوني لخويا ونشوف
دوزات ليه لخط بعد مدة جاوبها بصوت خشن مبحوح:بيسان
بيسان:خوياا عرفت بشنو وقع لأسماء وأنا مع لبنات فدار عمي إدريس كيف بقات أسمااء ولبيبي تاهي
نوح:باقي فلبلوك
بيسان:أنا غانجي عندك عطيني لادغيس
قطعات معاه وضارت عند لبنات گالت ليهوم لي كااين وغير مزادو تشطنوو خلاص...
بيسان:مهم أنا غانمشي وباشماا كان نعلمكووم واخا
رنيم:هالعار ماتخليناش بحال لحنش لمقطوع ليه الرااس راه تانصوني لرياان ومحمد ومكيجاوبوش
بيسان:كوني هاانيااا أنا مشيت
خرجات بيسان بعقل مشطون وركبات طوموبيلتهاا وقبل ماديماري صونات لمهاا لي جاوباتها بنفخة:دابا عاد تفكرتي تعيطي لياا ملي قلت ليك ماتخرجييش ماسمعتيش كلامي ومشيتي مخلياني تاندوي وحدي بحال لحمقة
بيسان:(مكمشة حجبانها) ماما أسمااء دارت كسيدة
رحمة:شكون أسمااء؟؟
بيسان:وأسماء خت رحيل وأنا غادة لسبيطاار ندوز عندك باش تمشي معايا؟؟
رحمة:الله أكبر وكيف بقااات ؟؟ أنا مشيت عند سنااء نتي صيفطي ليا لادريس ونجي أنا وياهاا
بيسان:أوكي
حركات طوموبيلتها وفنفس الوقت تاتكتب لمها لادريس... كانت حاسة بلي شي حاجة طارية حيت مايمكنش ريان مايجاوبهاش على تلفون ومايجيش لعندهاا... وصلات ونزلات بسرعة داخلة تتقلب عليهوم وفاش مالقاتهومش مشات سولات فلغيسيبسيون وعطاوها فين كاينين عاد مشات لعندهوم لقات حالتهوم حالة وكل واحد فين جالس وساهي...قربات جهة نوح وعنقاتو:خوياا واش باقي ماخرجوها من لبلوك؟
نوح:(درعها) باقي
بيسان:ماسولتووش وقتاش نزلوهاا ؟
نوح:جات لفرملية ودات محمد طه باش يتبرع ليها حيت خسرات دم
بيسان:أنا غانمشي نشوف واخا
قبل ماتمشي شافت فريان لي كان واقف حدا إسلام ولي مشافهااش...تنهدات ومشات تسول وتشوف اش كاين تلاقات تما بواحد طبيبة كانت خدامة معاهاا مي تحولات لهنا وبقات شادة معاها لكلام ودخلاتها بلهضرة تاوصلات ليهاا لي كاين وطلبات منها تشوف ليها حالة لمريضة لي باقي فلبلوك وماعندهوم عليها تاشي خباار...
خداو منو الدم لي يحتاجو وعطاوه عصير وخلاوه جالس يرتااح وهو بالو غير مع ختو لي خايف عليها... ارتاح وناض خارج من تم تاوصل لحدا الكراسى لي كاينين تما وهو يجلس جبد تلفونو لقى رنيم صونات عليه رجع صونى عليها وعلمها بلي كاين وسمع صوت غزلان لي كانت تتسولها وتهضر معاهاا وقال بهدوء:گولي ليها لاكاان شي جديد غانعلمك يالاه نقطع دابا تال من بعد
رجع عندهوم وقرب جهة رحيل جلس جنبها وعنقهاا بدراعو وهي غير ساكتة تتشوف...
رجعات الطبيبة لي كانت تاتسناها بيسان على أحر من الجمر قربات جهتها وشداتهاا من دراعها وقاالت بصوت هادئ:مشيت سولت ليك المريضة باقي فلبلوك وجاتها إيموغااجي تيحاولو يحبسو النزيف وغايديرو ليها ولادة مبكرة باش يعتقو لبيبي وكاين احتمال كبير لاماقدروش يحبسو النزيف غادي يستأصلو ليها الرحم
الأرض داخت بيها على ماگالت ليها صاحبتهاا والهضرة تلفت ليها وماقدراتش تخيلها... أي مرا ماتقدرش تقبل لاسمعات بحال هاد الخبااار... استأصال الرحم كيعني أنها مغاتكونش أم مرة خراا وهادشي قااصح على أي مراا وتاعلى أسمااء...
بيسان:(حطات يديها على راسها وقالت) خصهوم يديرو مافجهدهوم امنال راه راجلها وعائلتها غايحمااقو بهاد لخبااار
منال:مكاين مانخبي عليك ابيسااان لي عرفتو گلتو ليك
بيسان:شكرا بززااف على هاد لجيست عمري نساه
منال:مابيناتنااش المهم نخليك دابا نمشي لخدمتي تانتشاوفوو من بعد اوكي
بقات بيسان واقفة فبلاصتهاا معارفة مادير ماتقدرش تمشي وتگول ليهوم هاد لهضرة حيت غاتزيد تخلعهوم...زفرات النفس ونقزات من بلاصتها فاش حسات بيد نوح لي حطها على كتفها وضارت عندو قالت بتبسيمة:خويا خلعتيني
نوح:أمدرا
بيسان:غايديرو ليها ولادة مبكرة حيت لبيبي فخطاار وتاأسمااء عندها إموغااجي ولاماحبسوهااش غايضطرو يستاصلو الرحم (بترجي) مابغيتش نگولها ليهوم حيت غانشطنهوم نتمنااو يدير ربي تاويل دلخير ولبيبي واسماء يكونو بخير
حرك ليها نوح راسو بهدوء ورجعو لعند البقية وريان عاد شافها وقرب جهتهاا ناطق بهدوء:بيسان
انساحب نوح غادي عند رحيل لي كانت حاطة راسها على كتف محمد طه لي غير شافو وهو ينووض مخليه مع مرتوو...
نوح:(شد وجهها بين يديه وباسهاا فجبهتها وقال بهدوء)نديك لدااار؟؟
رحيل:(حطات يديها على يديه وقالت ببرود وخفوت)لا
تنهد وجرها لعندو مدرعهاا بيديه ومخليهاا تخشى فصدرو وتغمض عينيهاا متمنية تكون هادي حلمة وماشي بصح... زيرات على قميجتو ودموعها نزلوو وهي تتشهق وترعد بين يديه وهو كيطبطب عليها بحنية...
رحيل:قدام عيني ضرباتهاا طوموبيل وأنا ماقدرت ندير والو (شهقات بصوت عالي) تمنيت كون كنت بلاصتهااا تمنيت كون ضرباتني أنا بلاصتهاا (هزات راسها وشافت فيه بعيون محمرة وقالت) الطوموبيل كانت قصداهاا أناا شفتهاا كانت قاطعة الشاانطي لعندي وطوموبيل كاانت جاياا بزربة جهتهااا
نوح:(كمش حجبانو) ماعقلتيش على لماطريكول ديالها؟
رحيل:(بسهو) لا ماعقلتش (شدات راسها) معااقلااش
نوح:(شد يديهاا وقال بهدوء)ششش صاافي ماعليش ارحييل شوفي فياا (شافت فيه وكمل كلامو بجدية) أناا غاندير مافجهدي ونجبد لي ضربهاا وغانخليه يخلص
حركات راسها باه ورجعات حدراتو وهي تاتنخصص... داز لوقت وجات الطبيبة لمكلفة بحالة أسماء قربات عندهوم أو وقفات قدامهووم وقالت بهدوء:نتوما عائلة أسماء عاليات ؟
ناض إسلام قرب جهتها وقال بصوت مبحوح وعينو حمررين: أنا راجلها كيف بقات هي وبنتي
طبيبة:لاكسيدون لي دارت كانت خطيرة ونزفات بزاف ديال الدم لي حاولنا نعوضوه ليها واضطرينا أننا نولدوهاا على السبع شهور ولبيبي حاليا فالحاضنة باش تكمل نمو ديالهاا وتبقا تحت المراقبة ديالناا أما بالنسبة لامامون فراه نقلناهاا لإنعااش مبعد ماقدرنا نحبسو بصعوبة النزيف ونسيطرو على لوضع وغاتبقا تحت العناية هاد 24 ساعة الله يجيب الشفااء
زفر إسلام النفس لي كان حابس وصدرو تايتهز ويتحط... عنقو ريان وهو حابس الدمعة ماتنزلش وبالو غير مع أسماء وبنتو لي تزادت فظروف لي تاحد مكان متوقعهااا... كلشي مشى يشوف لبنينة من غير إسلام لي مشى يشوف مامااهاا...
دخل عندها مبعد مالبس حوايج الإنعاش وعينو عليها وهي محاطة بدوك الأجهزة ودوك السلوك... جلس على ركابيه وشد فيديها ودموعو نزلو بلامايحبسهووم... مقادرش يتخيل بلي غايخسرهاا حيت مغايقدرش يتحمل وهو لي جرب لخساارة قبل وكيفااش كان لوجع ديالهاا... لخسارة لي خلاتو سنين وهو كيعااني ومرض فصحتو ونفسيتوو وبزز بااش رجع كيف كاان معاهاا هي لي دخلات لحياتو بحال الزوبعة قلباتها سفاها على علاهااا...شكون كان يقول غايجي نهار ويتزوج بيهاا وهي وياه مكانوش يحملو بعضياتهوم أو بالأحرى هي لي كانت ديما تلوح عليه بديك الهضرة الخاوية وتعصبوو وهو تايسكت ليهاا ويدير بوجه العائلة ساعة لسانها مبري منهاا...شوية بشوية تالقى راسو غارق فيها وباغيهاا واخاا مكيبينش ولكن بصح كانت تتهمو... هز يديها وباسهاا ورجع شاف فيهاا وقال بصوت خافت:ماتخلينيش تانتي وتمشي اغزالي (حط يديها على حنكو وهمس بحزن) نتي لي عوضتيني على كلشي ومعاك رجعت إسلام لي كنت قبل..إسلام لي مات مع السُكرة ديالو هو رجع حيى معاااك نتي اغزالي...
وافقين قدام الحاضنة كيشوفو فلبنيتة الصغيرة لي تزادت وانضمات لعائلة التجاني لي بدات تكبر شوية بشوية ... كانت صغيرة وگليولة حيت تزادت قبل وقتهاا وحيت اصلا وزنها صغير فكرش مها...
بعد محمد طه عليهوم وجبد تلفونو ودوز لابيل لغزلان لي جاوباتو فلبلاصة وقالت بسرعة ولهفة:أمدراا كيف بقااات أسماء
محمد طه:ولدوهاا وهي دابا فالانعااش ولبنيتة راهاا فالحاضنة
غزلان:وأسمااء واش هي بخير ياااك؟؟
محمد طه:دابا لوضع ديالها مستاقر نتسناو تفوت ربعة وعشرين ساعة ونشوفو اش كاين
غزلان:تت كنت باغا نجي ولكن مانقدرش مهم باشما كان علمنا واخا
محمد طه:واخاا
غزلان:(بتردد)ونتا واش بخير؟؟
محمد طه:(تنهد ونطق بصوت هادئ) ماعرفتش مهم نخليك دابا
قطع عليهاا ورجع وقف جنب رياان تيشوفو فلبنيتة...جات رحمة مع سنااء دايرة لواجب معاهووم وجلسات جنب تانيرت تتصبر فيها... أما رحيل فكانت حاسة بصدرها محجر حيت مارضعاتش ولادهاا عليهاا اضطرات ترجع لدار باها وصلهاا نوح لعند توينز ولقات لبنات تايتسناوهاا وغير شافو حالتها ماقدوش يسولوهاا... هزات ولادها وطلعات لبيتهاا لقديمة وبدلات عليهاا ودارت مسااج لصدرهاا عاد هزات ولادها ترضعهووم وعقلها ساهي فداكشي لي طراا ليوم...
***
مور ماحطهاا فدار إدريس شد طريق نيشاان لكافي لي داير يتلاقى فيها هو وصابر لي كان تيتسناااه... دخل نوح بوجه متجهم جر لكرسي ونطق بصوت خشن: فين وصلتي فداكشي لي گلت ليك؟؟
صابر:(تنهد) داكشي مكافيش اولد لحااج وماشي دليل قوي بلي ديك خيتي مولات هادشي
نوح:(خنزر فيه وقال بصوت قوي) من نيتك تادوي نتسناها تادير شي كارتة خراا فلول دخلات تال وسط لقاعة وكانت ناوية تسمم ولادي وداباا ضاربة السيدة بطوموبيل وهي واحلة فروحهاا
صابر:فاهمك اولد لحاج ولكن خصك تعرف بلي الفيديو لي جبتي لياا فيه سيدة منقبة يعني مبينااش واش هي وتا لكسيدة لي طراات راه حد مشاااف شكون هادي والطوموبيل مكانش فيها لماتريكوول وهنا فين زمطاتنا راه هادي عارفة اش تادير
نوح:(بسخرية) دابا بغيتي نبقا مربع يدي نتسناهاا دير شي كارتة خراا ياك
صابر:لا ولكن حنا راه على لقرص لاكان دليل عليها ليوم قبل غدا نشدوهاا ولكن بيما أنه مكاينش دليل فبحال لاتنصيدوو الحوت فالرملة عارف بلي نتا دابا معصب بسباب هاد التريكة لي باقي تابعااك ولكن خصك اولد لحاج تعرف بلي حنا كانديرو غير لي مطلوب مناا
نوح:(تحدر جهتو ونطق بصوت قاصح) هاديك خيتي لاماشديتوهااش نتوماا أنا نتولاهاا ولاماطاحتش فالشبكة راني ماشي ولد لحااج (ناض خنزر فيه) مابقيتش محتاااجك غير سير گابل خدمتك
خلاه وخرج وهو معصب دبصح من هاد لكلام لي استافزوو... نهار وصلو لونڤلوب فيه تصاور رحيل وإسلام كان شاك بلي شي حد ماعندوش مع رحيل هو لي دار هاد لبلان وفاش طلع لديك لبوسطة لي جابت ليه لونڤلوب حط فلوس صحيحة بااش يعرف شكوون سيفطو وفاش عرف سكت ومگال والو وماقلبش على هاديك باش يعرفها ونهار السبووع ملي طرات ديك لقضية وجات ميس تال عندهوم بكل وقااحة ودارت داااك البلان تماا صعر وماتسنااش دقيقة وحدة هز دااك الفيديو وعطاه لصابر ومع الأسف لفيديو كانت تتبان فيه منقبة يعني مبينش وجهها وتازين العابدين لي شافهاا شهادتو مغاديش ياخدوهاا بعين الاعتبااار وخص دليل ملموووس باش يقدرو. يشدوهاا...
جلس فطوموبيلتو عاقد ربعة فلعشرة وعقلو استرجع حديتو مع ديك السيدة لي رفقات رحييل...
~~ نوح:شكرا ليك الالة
س:ماتگولش هاكا اسيدي أنا درت لي علياا ملي شفت لكسيدة لي وقعات وشفت حالة مراتك بقات فيا وقفت معاهاا حيت درتها بحال نفسي وعارفة فبحال هاد لمواقف بنادم تيدوخ
نوح:شفتي لكسيدة ؟؟ واش شفتي طوموبيل لي ضرباتهاا ولماطريكوول ديالها؟؟
س:اه شفتهاا ولكن مافيهاش لماطريكوول طوموبيل رمادية وتالي صايگها ماشفتووش حيت كانت غادة بواحد السرعة وكانت باينة قاصدة ديك السيدة ضرباتها وهرباات
نوح:(حرك راسو بتفهم)واخا الله يجازيك بلخير~~
طوموبيل مافيهاش لماطريكول وتانهار زين العابدين تبعهاا مكانش فيهاا لماطريكول وفاش سول رحيل تاهي نفس الشي لي گالت وهادشي كيوضح حاجة وحدة بلي لي ضرب أسماء هو ميس وبلي نفسها مولات تصاور ولمشكيل أنها ماشي بوحدها ومعاهاا لي تيعاونها على ماگال زين العابدين وأكيد لي كيعاونها هو نفسو السيدة لي سيفطات ليه تصاووور وتما وضااح كلشي ليه...
نوح:(هاز حاجبو لسماا وببرود نطق)كيف تهنيت من ولد لقح*بة دعمك غانتهنى منك تانتي...
وأخيرا ارتاحو من حهة التربية واخا أسماء باقي حالتها فشك...كان بالنسبة ليهوم يوم مشؤم على الشي لي طاري معاهوم... تانيرت وإسلام وإدريس بقاو فالسبيطار... ملي خرج عندها من الإنعاش توجه نيشان لحاضنة باش يشوف بنتوو لي تزادت قبل وقتها... كان متشوق أنه يدوز داك الشهراين لي بقااو ليهاا باش تولد بزربة ولكن مشيئة الله كانت أقوى من كلشي... بخطوات سريعة قرب جهة الزاج لي كيبين دوك لوليدات الصغار لي تزادو تاهوما قبل وقتهوم بحال بنتو... كان تيقلب عليها بين دوك لبيبي الصغاار ومعارفش فين هي تاابانت ليه واحد لفرملية وقفهاا ونطق بصوت باين فيه لهفة:عفاااك بنتي تزادت ليووم قبل وقتها وماعرفتش فين هي؟؟
لفرملية:شنو سمية لامامون؟؟
إسلام:أسماء عالياات
لفرملية: تسنى هنا واحد دقيقة
دخلات لعندهوم وبدات تتقلب فيدين لبيبي فين كاينة واحد لبانضة مكتوبة عليها سمية الأم وقتاش تزادو ونهاار...وصلات عند لبنيتة ومع شافت سمية أسماء وهي تشير ليه بيديها بمعنى هاهي التربية... لصق إسلام على الزاج تيشوف فيها وعينو تغرغرو بالدموع لي ماقدرش يحبسهوم تانزلو على حناكوو بلامايشعر من الإحساس لي تملكو فديك اللحظة... العوض لي جاه من عند سيدي ربي.. سبق وجرب إحساس الأبوة مع ليليااان لي كبرهاا بنفسوو وعاش معاها كل خطوة من حياتها وعمرو فرقهاا... رباهاا وعوضها على ديك الأم لي حاشا واش تستاهل هاد لكلمة... من نهاار تزادت وهو مكرس ليها حياتو لدرجة أنه الخروج مع صحابو كيف كان قبل ماتزاد مابقااش حيت مكيقدرش يفارقهااا... ونهار ماتت مات معاها وبقا جسد عايش فقط بدون حيوية وبدون مشاعر فقط عايش... ودابا بشوفة هاد الصغيرة هو رجع عاش ورجعو أحاسيسو عاشو ودقات قلبو حاس بيهوم متسارعين بحال الاكان تيجري فلمراطوون... حلقو نشف عليه ومتشوق وملهوف أنه يهزها بين يديه ويحظنها لقلبوو...
كان عايش كومة من المشاعر لدرجة أنه ماحسش بإدريس لي كان واقف جنبو تيشوف فحفيدتو الصغيرة لي انظماات لعائلتو لي كانت صغيرة... عائلتو لي بداها هو وتانيرت وهاهي دابا فين وصلات... ولى جد للمرة التالتة وفكل مرة تيحس بلي بحال الايالاه غايولي جد...
إدريس:(بصوت هادئ) ربي كبير عمرك تقنط من رحمة دسيدي ربي
إسلام:(ضار جهتو متفاجأ وبتبسيمة حزينة نطق) كون كانت باقا عايشة كون فرحات بشوفة ختها الصغيرة
إدريس: ربي بغاهاا وراها طير من طيور الجنة
إسلام:كيتهاا فقلبي عمرهاا تنسى بااقي لداباا مشوي عليها هي تغدرات (نزلات ليه دمعة ومسحها بزربة)
إدريس:(تنهد) عارف بلي صعيب تنسى تاأنا أب بحالك وفاش واحد من ولادي تتوقع ليهوم شي حاجة قلبي تايحرقني عليهوم ومكيهنى لياا بال تاكانشوف كل واحد بخير وعايش حياتو كيف بغى.. (شاف فيه) داكشي لي عشتيه عارف بلي صعيب عليك تنسااه وأي واحد بلاصتك مكانش غايقدر ينسى ولكن نتاا خصك تعرف بلي حنا عبد ضعيف ومسيرين من عند الله سبحانه وتعالى وكل واحد فينا تايعيش داكشي لي مكتب ليه يعيشوو نتاا مكتب ليك أنك تفقد بنتك ولي خصك تعرفو بلي يقدر كون كاانت عايشة ليومنا هاادا مكانتش غاتكون مرتاحة ويمكن كانت غاتعدب فحياتهاا
إسلام:(حدر راسو وقال بحزن)عارف اعمي ولكن فراقها كان صعيييب
إدريس:(حط يديه على كتفو وقال برزانة) وربي نعم عليناا بقدرة الصبر.. الصبر لي صبرتيه هاد لمدة كلهاا من نهار ماتت ليلياان ونتاا مكمل حياتك وصابر واخاا القلب ربي عالم بيه ولكن قدرتي تكمل حياتك وموقفتيش غير فنفس النقطة كاتفكر فالأطلال والماضي لي غير غايحل عليك بيبان الجرااح لي باقي مدمييين... قدرتي تكمل حياتك وتزووج مرة خرا واخا عشتي تجربة خايبة فزواجك لول ولكن ماستسلمتيش وهادشي كافي يبين ليك بلي نتاا درتي خطووة مهمة وهاربي عوضك ببنتك لي جات بااش تنسيك فلي عشتي..
إسلام:(شاف فبنتو ونطق بعيون لامعة باشتياق وحب) الحمدلله على لعوض دالله
إدريس:(تبسم ونطق بمزاح) اوا وجد راسك لسبوع إن شاء الله مور ماتفيق أسماء وتبراا وترجع ليناا هي ولكتكوتة إن شاء الله
إسلام:گول ليهاا غير تفيق بخير وعلى خير وترجع هي وبنتنا ليا وندير ليها أحسن سبوووع
إدريس:إن شاء الله يكون خير ربي كبير وكيرحم عبااادو الضعيف واجي دابا نمشيو نتعشاو
إسلام: غير سيرو نتوما أناا مافياش
إدريس:(جرو وقال بجدية) زيد گدامي راه خصك تانتاا تاكل باش تقدر توقف على رجليك واش بغيتي تزيدنا همك على هم أسماء؟؟
مزادش معاه إسلام لهضرة وتمشى معاه بإنصيااع تاوصلو عند تانيرت لقاوها تاتسناهوم ومشاو بتلاتة يتعشاو باش يقدرو يدوزو ديك ليلة ولغد ليه تاهو لي ماتعرف اش مخبي ليهوم...
واقفة فلكوزينة تاطيب لعشاا وطالقة موسيقى غربية تاتشطح معاهاا وعايشة حياااتهاا بحاال الا ماشي هيي لي ضربات انسانة هازة فكرشها روح بكل دم بااارد بلاماتسوق ليهاا... كانت فقط عايشة لحظة ومستمتعة بداك الانجااز لي دارت وكلما تفكرات شنو وقع تاتحس بنشوة غريبة كاتسرى معااهاا... حيت هادشي لي دارت بالنسبة ليها مهم وهي عارفة بلي رمات ليهوم لملح على لجرح... دخلات صاحبتها ولقاتها واقفة فبلاصتهاا تاتشطح وضحك وهي تهز حجبانهاا معجبة فهاد السيدة لي قدامهاا... نهار لول عاودات ليها كانت تتشوفهاا ضحية وبقات فيها وتافاش قررات تعاونهاا فنيتها كانت باش تخليها ترجع حقهاا من الناس لي أداوها ولكن بانت ليها بدات تتخرج على السطر وداك الانتقام عمى ليها لعين لدرجة ولات تادير تصرفات لي هي ماتقدرش تقبلهووم.. بحال ليوم فاش طرات لكسيدة تصدماات ومكانتش متوقعاها غانوصل لداك لطاااب.. قربات جهة التلاجة حلاتها وميس فديك الساعة حسات بيها وضارت شافت فيها بتبسيمة:دايرة سباغيتي بالكفتة ولفرمااج تتشهي صبري نحطها ونتعشااو
ص:عندك لخاطر تعشاااي مور داكشي لي درتي؟؟
ميس:(ببرود) علاش اش درت؟؟
ص:والو مادرتي والو أنا لي درت (ربعات يديها) واش تاطنزي ضاربة السيدة بطوموبيل وهي حاملة وتتگولي اش درت ؟
ميس:(هزات حاجبها) هادشي كيف والو مقارنة بداكشي لي دارو ليااا ولعائلتي
ص:واخا يديرو لي بغاو مكيعطيكش لحق ديري نتي ديك لفعلة اميس واش مافكرتيش فشنو غايطرااا لاعلمو لبوليييس؟؟؟ راه غانمشيو فيها وغانعاودو نعيشو ديك لعيشة لمزفتة تم واش نسيتي اش داز علينااا ؟؟
ميس:(غوتات بجنون) مكايهمنيش سمعتي نرجع لحبببس المهم ندير لي بغيت ونشتت شملهوم كاملين حيت هوما سبابي (خرجات عينيها وقربات جهتها) هو تزوووج وكمل حياتو عااادي وأناا باقي فبلاصتي (ضحكت ضحكة مريضة) هادشي لي طاري ليهوم يستاهلوه كاملين وأنا ماكرهتش نشوفهوم تيموووتوو قدام عيني وقبل بغيتهوم يتعدبووو كاملين قدام عيني وعاد غانقدر نشوف حياتي ونعيش مرتاحة (تبسمات ليهاا وهي حاطة يديها على كتفها وقالت بتهديد واضح) دابا نتي وليتي مشاركة معاياا واخا تبغي تأنولي هادشي إلا أنك غرقتي معااياا وماعليك غير تكملي معايااا وماتخافيش مغاديش نساااك واخاا (ضارت غادة جهة البوطاحي وقالت) السباغيتي وجدات سيري سبقيني نجيبهااا
بقات غير تتشوف فيها صاحبتهاا بتعجب قبل ماتخرج لصالة وهي ساكتة... ماعندها مادير دابا حيت بصح ولات شريكة معاهاا ولاجاب الله تشدات ميس راه غاتجرها معاهاا زفرات النفس وسكتات تتشوف اخرة هادشي فين غايوصل...
***
جالسين بربعة فالصالة لتحت وكل واحد فين تيشوف ساقلين والنعاس هرب عليهوم ومرة مرة تاتسمع تنهيدات شي واحد فيهوم... تنهدات رنيم وشافت فيهوم بهدوء: هاد طوموبيل لي ضرباتها واش مكاينش شي واحد لي شافها فالنااس لي كانو حاضرين؟؟
ريان:(تنهد) ديك لمرا لي كاانت مع رحيل ملي سولهاا ولد لحاج گالت ليه بلي طوموبيل مافيهاش لماطريكوول
محمد طه:فين سمعتيها؟؟
ريان:بالصدفة سمعتهوم فاش كنت غادي لحمااام
غزلان:واش كاين شي طوموبيل مافيهاش لماطريكول؟؟
محمد طه:(كمش حجبانو وشاف فريان) كيفاش هاد لبلان عوتاااااني
ريان:وزيدك سمعتها قالت ليه بلي الطوموييل كانت قاصدة أسماء يعني بلعربية تاعرابت شي حد حالفها فيهاا ولكن شكون ماعرفتش؟؟
محمد طه:(خنزر) ياكما داك ولد لقح*بة ديااال وليد هو السباب حيت رجعات لإسلاااام
ريان:(حك شعرو) مافكرتش فيهاا زعمة يكون هو
محمد طه:وشكووون فنظااارك غايكووون هو بوحدو لي بان ليا حيت من داك المشكيل لي طرا وهو غابر وعمرو قرب ليها مزااال
ريان:ولكن هو كان باغيهاا اصاحبي مغايديرهاااش
غزلان:ريان غايكون عندو لحق مايمكنش يكون هو سباب
محمد طه:اهاا وشكون غايكون مولاها
رنيم:(بسهو) زعمة تكون هي؟؟
گالو كاملبن دقة وحدة: شكون؟
رنيم:ميس
ريان:(كمش حجبانو) شكوون گالها ليك ؟ واش عارفة شي حاجة؟
رنيم:(تنهدات وبدات تعاود ليهوم على لبلان لي طرا فالسبوع) هي سبق وجات لسبوع وكانت نيتها تأدي ولاد رحيل غير ربي لطف وسيدرا كانت حاضرة عتقات لموقف وهي فاش خافت يشوفها شي حد هرباات وماقدروش يشدوها وتازين العابدين شافهاا ومكانتش بوحدها كانت معاهاا شي مرا وهادشي ماگلناهش غير على قبل رحيل حيت ولد لحاج وصانا
قبل ما ينطق شي حد فيهوم سمعو صوت رحيل لي قالت بغضب:كيفااش ديك لمريضة كاانت باغا تأدي ولاددي وحد مگالهاا ليااا ؟؟
نعسات ولادها وتكات حداهوم باااش تنعس وترتاح شوية ولكن وتگول واش غمضات ليها لعين..كلما تاتسد عينيها تاتجي صورة أسماء فاش ضرباتها طوموبيل بين عيونهاا تاتخليها تقفز من بلاصتهاا... عياات ماتقلب وفلخر ناضت باش تنزل لتحت تشم شوية دلهواا وتشوف واش خوتها نعسو ولا لا... مع حطات رجليها لتحت وصل لمسامعها كلام رنيم لي خلاها تحل عينيها مامصدقااش داكشي لي تتسمع... كيفاش نهار السبوع ميس دخلات لقاعة وكانت باغا تأدي ولادهاا؟؟ ملي كانت هي فرحانة ومدوزة نهارها ديك لفعة كانت باغا ترزيها فرحتها؟؟ تدفق لغضب فعروقها وحسات بالجنون تايشطحو فوق راسها فاش سمعات ديك لهضرة وماحسات براسها تااتفرگعات عليهوم خلعاهوم من ديك الدخلة لي دارت ليهوم... رنيم كانت تتشوف فيها ومن لداخل ديالها كانت تاتسب راسها على هاد لسان لي خرج عليها ولي خلاهاا تخرج هاد الهضرة لي وصاوهاا عليها..
رحيل:(قربات جهتهوم مخرجة عينيها فرنيم) كيفاااش هادشي وقع وحد مگالهااا ليااا؟؟
رنيم:(وقفات قدامها وقالت بصوت خافت) ولد لحاج مكانش باغيك تشطني وتخلعي على والو داكشي علاش خبيناا عليك
رحيل:نتخلع على والوو واش نتي تتگولي ديك لحمقة جات تال تم وكانت نيتها تأدي لياا ولادي وگلتي نتخلع على والو ؟؟ من نيتك ارنيم
ريان:رحيل تهدني داباا هادشي لي طرا فات ولحمدلله ماوقع ولو
رحيل:اييه ماوقع والو وداباا شنوو ؟؟ (شافت فيهوم) ملي ماصدقاتش ليها معايا أنا دازت لأسمااء وشوية غادوز ليك نتا وهي غادة؟؟؟ واش هاد خيتي مغاتهدش وتعطينا بالتيساااع ؟؟(خنزرات باشمئزاز) مكفاااش اش دار داك لحيواان دعمها وخوهاا فيناا بغات تاهي تزيدنااا ؟؟
محمد طه:(كاعي) هاديك راه خص مهااا لإعد ام بااش يالاه نرتااحو من خليقة جدهاا تفووو على قح*بة كون غير طاحت فيدي وتشوف اش ندير فيهاا
ريان: توسخ يديك على قح*بة مريضة فكرررهاا واش من نيتك هاديك رااه اخرتها ترجع لحببس لي خرجات منو ولاسبيطار لحماااق
رحيل:هاديك اخرتهاا على يدي عل ماباان لياا (مغددة) اش بغات منا ماعرفتش... ماخلات مادرات فإسلام خانتو مع صاحبو وزادت قتلااات ليه بنتوو هاديك راه ماعندهاش لقلب ومريضة
رنيم:هي مباغاااش تقبل بلي راها غالطة عند بالهاا كلنا غالطين وهي لي على صح حنننا الظالمين وهي لمظلومة (تنهدات بأسف) ماعرفتش كيفااش تتفكر وشنو باغاا ياك خرجات من لحببس علاش ماتكملش حياتهااا فشي حاجة تفيدها؟؟؟ (شدات راسها) واش ضروري تمشي فنفس طريق هادووك لي مرضوناا واش ضروري تزيد تكرهني فيهااا (بعيون باكية) كرهتهاا أقسم بالله تاكرهتهاا لاهي ولا تريكتهااا كاملة كرهتهووم وكرهت كنيتهوم لي وسخوهاا بفعايلهووم.. كنية باابا لي بقاات ليا منو ولي تاهو خداوه مني كوون كان عااايش كون هادشي كولو مكانش غايطرااا كووون وقفهوم على حدهوم من لول (بدات تتبكي بألم) بابا حقاااني ومكيبغيش الظلم ولكن هوما رزاوني فيه غير حيت كاان باغي مصلاحتهوم وكان بااغي فلوسو يكونوو حلال (حركات راسها بلا) عمروو كان يرضى بدرهم دلحرااام هوو شررريف وماات وهو شريف وخلى وراه شياطين مافقلبهوم رحمة
ريان:(بحزن عليها) رنيم نتي ماعندك تاشي دنب ماتلوميش رااسك
رنيم:(بانهياار)واخاا نديرو لي درناا اريااان مغانكرووش بلي هوما من دمي دم لي ماكرهتش نرجعو ماا... نتوما واخا ماتگولو والو ولكن أناا عارفة بلي تاتشوفو فياا شوفة نااقصة أي واحد لامشيت وعاودت ليه عليهوم ضروري مغاادي يشوف فيا شوفة شفقة ولاعدم تقة حيت أنا دمهوم يقدر نكوون بحالهوم ياااااك
رحيل:(قربات جهتهاا وهزات يديها عطاتها واحد االصقلة دوخاتها وشدات فيديها وقالت بصوت قوي صارم) كون كنتي بحالهوم كون گاعما حلينااا ليك بابنا هاد السنين كلهااا ودرنااك منااا.. كون كنا تانشوفو فيك شوفة ناقصة كوون گاعما گلسنا معاك وعاودنا قدامك أسرارنا وگلنا لي كااااين...كون كنااا شاكين ومباغينكش والله لاعتبتيهاا وسطنااا نتي ارنيم ماااشي بحالهوم هوماا لي المرض والحرااام والقتيييلة جاري فدمهوم نتي عكسهوم قلبك بيض بحال بااك لي تغدر... ماخصكش تحشمي وتهبطي رااسك نتي خصك تعليه وتفتاااخري حيت قدرتي تخرجي وسط عائلة مريضة نفسيااا وعايشة عيشة دليهوووود بشخصية مزيااانة وقلب كبير وحنين مكيعرفش يحسد ولايحقد... إيمانك بالله وروحك النقية خلاتك تكسبي عائلة خراا داروك منهوم وفيهوم نتي ماشي غريبة عليناا نتي ختناا وهاد لهضرة مانعاودش نسمعهاا حيت غاتشوفي تصرف خااايب مني سمعتي...اخر مرة تعاوديها وهاديك لمريضة لي باغا تأديناا أكيد مغاتنجحش حيت حناا غانوقفو فوجهها ومانخليوهاش توصل لداكشي لي ناوية عليها...
حلات عينيها على صوت تلفونها كيصوني وبتعب مدات يديها وهزاتو لقات نمرة نووح... تفوهات وشافت فالساعة كانت لعشرة دالصباح... تكات على لكادر دالنموسية وجاوباتو بصوت مبحوح بنعاس:ألو
نوح:( بخشونة)الفتنة صباح الخير
رحيل:صباح النور
نوح:ياكما فيقتك؟
رحيل:أصلا يالاه نعست قبيلة مع ديك السبعة ونص
نوح:(كمش حجبانو وقال بصوت خشن)اش مسهرك تال ديك لوقيتة؟
رحيل:مجانيش نعاس (تنهدات فاش تفكرات داكشي لي عرفات وفضلات أنها ماتگول ليه والو وماتجبدش صدااع على حاجة فاات وقتهاا.. وتلومو حيت فكر فراحتهاا) نتا باقي فالدار؟
نوح:تت غادي لسبيطار ؟
رحيل:تاانا غانجي واحد الشوية غير نتوگض ونرضع دراري
نوح:ملي تسالي عيطي ليا نجيبك
رحيل:داكوغ يالاه بيزو
لاحت تلفونها وتنهدات تاتفكر فهادشي لي تيعيشوه...فيما تيگولو بلي حياتهوم تسگدات وبياضت ورجعو لمياه لمجاريهاا تاتجي شي موجة تتقلب ليهوم الزمر كامل... ماعرفاتش لامتى غايبقى هادشي ولكن خص يكون ليه حل حيت الأمور بدات تتفقد السيطرة... رجعات تنهدات وهي تاتفكر غير فحالة أسماء لي تادعي من قلبها تفيق وترجع لبنتهاا... مسحات وجهها وناضت بشوية عليها مباغاش تفيق توينز لي ناعسين... هزات حوايجها وخرجات لحمام على برا باش طرف وهي تلقى الددم مشات منهاا وتصفاات... واضظرات دووش وتوضى وتنقى بااش تصلي الصلاة لي شحال هادي ماصلاتهااا...
لابسة إسدالهاا ومقابلة مع القبلة تتصلي بخشووع تاتحل لباب ودخلات سيدرا لي كانت ناعسة فبيت إدريس وتانيرت... بعويناتها لمبطنين المنفوخين بالنعااس وبيجامتها الخفيفة وشعرها لمنكوش قربات جهة التوينز جلسات حداهوم غير تتشوف فيهوم ومرة تشوف فرحيل لي تتصلي تابانت ليها جالسة تادعي وخدات وقتها فدعاء عاد ناضت تجمع صلايتها ومع ضارت لقات سيدرا تاتبسم ليهاا...
رحيل:صباح الخير امامي فقتي
سيدرا:اه مامي فقت فين بّاديدي وتانيرت إينو مجاوش عندي
رحيل:(قربات جهتها وجلسات حداهاا وقالت بهدوء) هوما بقاو فالسبيطاار مع سومة
سيدرا:وعلاش سومة فالسبيطار واش مريضة مامي؟
رحيل:شوية (تبسمات)لبارح سومة ولدات لفنيكشة الصغيرة لي كنتي تتسنايهاا باش تسميها وتلعبي معاها
سيدرا:(بحماس) واش بصح امامي؟
رحيل:اه بصح
سيدرا:(بدات تكركر وتنقز بحماس)ياي ايكون عندي صاحبتي نلعب معاهاا نمشيو نشوفوهاا امامي عفاااك
رحيل:غانمشيو ولكن نفطرو ونلبسو هو لول (تنهدات) ولكن مغاتقدريش تهزيها حيت باقي صغيرة وخصها تبقى تما عندهوم تاتكبر شوية ولكن غانشوفوها من الزاااج
سيدرا:واخا مامي ونديو لورد لسومة ياكا؟
رحيل:(تنهدات بحزن) لا مغانقدروش نديوه حيت سومة مريضة شوية وماتقدرش تشوفنا تاهي امامي يالاه نوضي لبسي حوايجك ونزلي لتحت سبقيني
مشات سيدرا تتجري محمسة تشوف العضو الجديد لي غاينظم لعائلة ولي كانت تاتسنااه بفارغ الصبر وخصوصا فاش عرفاتها بنت وهي لي غاتسميهاا لحماس ضاااعف...أما رحيل فكانت تاترضع ولادها عاد سيفطات مساج لنوح علماتو بلي غاادي تلبس باش يجي... ناضت تلبس عليها عبايتهاا وفولار لاحتو عليها مع نضاضر دالشمش وصندالة ونزلات لتحت لقات غير غزلان لي كاينة ولبقية كلشي خدام... جلسات تتفطر بزز على قبل الرضااعة وصاف وخاطرها هرب عليها حالياا وعقلها غير مع ختها...صونى نوح علمها بلي وصل وخرجات مور ماودعات غزلان وخلات ليها توينز... كاان جالس فالطوموبيل لابس كلشي كحل ونضاضر دالشمس تاهوما كحلين...حلات لباب لسيدرا لي طلعات لور وعنقاتو بيديها بايسااه فحنكو:بايانو توحشتك
نوح:تاأناا اباباا ديالي
طلعات حداه رحيل وقالت بهدوء:سلام
نوح:(شاف فيه من تحت نضاضرو وقال بهدوء) واعليكوم السلام لباس؟
رحيل:صافا
قلع من تم غادي لسبيطار وسيدرا تتهضر بحماس وتعاود ورحيل غير تتحرك راسها بزز وتجاوبها مرة مرة بشي كلمة تاوصلو ونزلو بتلاتة داخلين لداخل... سيدرا غير شافت جدها وجداها مشات تتجري عندهوم تتعنق فيهوم تتبوس
رحيل:كيصبحتو؟؟
تانيرت:لحمدلله ونتي ابنتي
رحيل:شوية وصاف (شافت فنواحي) فين إسلام؟
إدريس:مشى يشوف أسماء
رحيل:(حركات راسها باه وشدات يد سيدرا) غانديها تشوف لبنت
مشات معاها غير هي مخليا نوح جالس جنب إدريس وعينو عليهاا حاس بلي بيها شي حاجة مي ماعرفش اش هي ومابغااش يحكر ويسول وعطاهاا الوقت...
وصلو لحاضنة وتحدرات رحيل هازة سيدرا وتبسمات ليها:هاهي لهيه
سيدرا:(حلات عوينات لبابوشة تاتشوف فلبنت وقالت بحماس) صغيرة ماامي
رحيل:(تنهدات) تانتي كنتي صغيرة بحالهاا امامي
بقات سيدرا تتشوف فيها ودقق فلبنت ورحيل تاهي مبسمة لديك الضيفة الصغيرة تانزلاتها ورجعو لعند لخرين ولقاو إسلام جالس معاهوم وساكت..جرات عندو سيدرا وقالت بحماس:إسلامي أنا لقيت سمية لمومويا
إسلام:(بابتسامة متعبة) وشنو غاتسميها؟
سيدرا:غانسميها روفيدا
يتبع...
التعليقات
لا توجد تعليقات بعد، كن أول من يعلق.