الجوهر الحر الجزء 54

لحنيكات حمارو ولعينين تبسمو بالفرحة من كلامو لي حسسها بأنوثها وفكل مرة يتغزل فيها تاتحس براسها كأنها أول مرة.. حطات راسها على لكرسي وعينيها على الزاج تاتشوف فالطريق تاتفكرات شي حاجة وهي ضور عندو..

رحيل:نسيت ماسولتكش على لمحال فين وصلتي فيه؟

نوح:هاد الساعة خوي راسك من الخدمة ولمحاال ارحييل وديها فصحتك هي لولة الخدمة مغاتهربش

رحيل:وي عارفة ولكن ضروري ماخصني نوقف على لمحال باش نحلو وندير ليه العباسية ديالو تاهو واش غانبقا ساداه هاكا ونضيعو

نوح:(تبسم ليها)تباركالله على مرات ولد لحاج ماشية ليها التجارة فالدم

رحيل:ههه اوا شنو راجلي ماشاء الله عليه منشار فالتجارة وضروري مامرتو خصها تكون بحالو

نوح:(حرك راسو) عارف مرتي كبابل وقادة بشغلها ولكن ارحييل صحتك أهم عندي من لخدمة سمعتي الطبيبة اش قالت ليك الراحة والابديتي دابا راه غاتعياي حيت ضروري مغايخصك فالبداية توقفي على شغلك وتحضري ليه

رحيل:متخااافش مغاديش نعيي راسي والاحسيت بالعيا بطبيعة لحال غانشد الأرض

نوح:(تنهد)واخا ولكن خليها تاتفوت واحد الخمسطاش ليوم ونديرو الالة ليك العباسية لي باغا

رحيل:(بحماس)اتكووون بالدقايقية ياااك؟

نوح:(هز فيها حاجبو) الشيخات لا

رحيل:هههه ماكرهتش ههه (شافتو خنزر فيها وهي ضحك)ههههه غير ضاحكة مي الدقايقية ضروري واخا

نوح:إن شاء الله

حطات رحيل يديها على فمها وتگرعات مطلعة لمرار فحلقها تاكمشات حجبانها ونوح ضار شاف فيها وقال بهدوء وتساؤل:مالك

رحيل:تانحس بالمرورية

خسرات سيفتها وهو شاف فالمرايات وطلق السينيال مجنب عاد حيد لسانتوع ونزل غادي لجهتها وحل عليها لباب معاونها تانزلات وهي مشات بدات تاترد غير لمرار وصاف لي مولفة كاتردو بعض المرات وتيسحاب ليها راه بسباب المعدة ساعة راه لحمل السباب.. جاب ليها قريعة وحلها ليها تاشللات فمها وشربات وهو شدها ونطق بحنية كيتلمس وجهها:شوية دابا

رحيل:(بخفوت) اممم ماعليش هادشي طبيعي خصني نولف عليه

نوح:(عاونها تاركبات وبقا واقف جنبها)العسيلات غايتعداو ليا على نحيلة ديالي

رحيل:ههه اوا شتي قلتي باغي تزيد مزال

نوح:(تبسم)نزيدو مي ماشي دابا...شوية صافي نمشيو..

رحيل:اه غير يالاه

ركب وشدو طريق لرياض وكل مرة يسولها تاوصلو وغير دخلو لقاو سيدرا تاتسنى مها مكمشة حجبانها والسخانة طالعة ليه تاتكحب...ورحيل ماگدها فيل زادوها فيلة ومكان عندها كيف دير وهي عارفة سيدرا فاش تتمرض تاتولي حالتها وكاتعطيها غير لتهرنين والخاطر مكايبقااش..طمن عليها نوح وطلع لعند زين العابدين لي كان ناعس...حط يديه على راسو وهو يحل عينيه

نوح:(بتبسيمة حنينة)حفيد لحااج مزيان دابا

حرك زين العابدين راسو باه وهو باقي ناعس فبلاصتو

نوح:خليك ترتاح كثر والقراية راه دفعت ليك سرتيفيكا عندك فيها خمسطاش ليوم واخا ابابا

زين العابدين:(ببحة)واخا

نوح:أنا غانمشي لخدمة غانوصيهوم يطلعو ليك غداك تغدا وشرب دوااك وعنداك تعكس راسك تاني عليه...

بقا معاه شوية عاد خرج مشى عند رحيل طمن تاعلى سيدرا وبقا تيوصي فرحيل ترد لبال لراسها عاد تيسر لخدمتو...

أما رحيل فبدلات حوايجها وبقات مع سيدرا تانعسات عاد نزلات لتحت لقاتهوم كيوجدو لغدا.. حسات بمعدتها تقلبات أو وصات السعدية تقاد ليها بلاطو دلماكلة وغير وجداتو طلعات لفوق وتوجهات لبيت زين العابدين...دقات ودخلات وهي موجدة راسها لأي تصرف يقدر يصدر من زين العابدين... لقاتو متكي فوق النموسية وتلفازة خدامة ولكن ممتفرحش فيها حيت عينيه كاضرو..ملي هز وجهو وشاف فيها حسات بتبوريشة فاش شافت ديك لعين لي خلاتها دمع لاإراديا..

رحيل:(تبسمات)جبت ليك الغدا خصك تاكل بااش تشرب دواك

حطاتو فوق الطبلة وجلسات جنبو تابعد فحركة واضحة وهي كملات كلامها:كيف بقيتي دابا (مدات يديها وقاست عينو ونطقات بخفوت) تت عينيك كاضرك بزاف

زين العابدين:(بعد وجهو شوية )لا

رحيل:(تنهدات)هانتا كول دابا نمشي نشوف سيدرا حيت تاهي مريضة ونرجع عندك واخا

ناضت مبعد ماتبسمات ليه ومشات وهو بقا فبلاصتو كيشوف بعيون باردة فداك لبلاطو لي فيه الماكلة..

---

وصل نوح لميزون ودخل لبيرو جالس تيشوف ضواسا ولي خصو يتسنى يسنيه وسعيد واقف حدا راسو..صونى تلفونو وهزو لقاه ولد عمتو لي كيصوني.. مجاوبوش فاللول وخلاه تاقطع ورجع صونى تاني ونوح شاف فسعيد وقال:سير تانعاود نعيط ليك

نوح:(جاوبو بهدوء)سلام أوعليكوم

...ولد لحاج اش خبارك بخير

نوح:ولله لحمد ونتا العائلة كلشي مزيان

...هاد الساعة لحمدلله عيط ليك باش نعلمك بلي كاين حيت جدي محال واش قالها ليك

نوح:(بترقب)خبار الخير

....عادل ناوي يدعيييك

بالنسبة لنوح هاد لهضرة لي قال ليه ولد عمتو شي حاجة لي كان متوقعها غاطرا..حيت عارف درجة كره عادل ليه وأكيد غايستاغل هاد المشكيل باش يزيد يبين سمو ليه..هو أصلا اخر حاجة لي غايخليها تعصبو دابا وتشغل بالو هو هاد التبرهيش دعادل حاليا مباغي تاحاجة تعكر ليه الراحة والفرحة باش حاس..

نوح:(تكى على لكرسي براحة وقال بصوت بارد)لاباغي يدعي غير يدعي اسي محمد ولاگاع باغي نسيفطو عند من يدعي مرحباا مكاين مشكيل

سي محمد:(ضحك)ههه والله تاغاتعبر عليه هادشي لي خصو باش يزير راسو شوية اوو الناس كاملين داخلين سوق راسهوم الإهو خارج لينا من الجنب

نوح:(بنبرة خشنة)هداك راه تايقلب نسيفطو لروضة عاد يتهنى

سي محمد:نتا ماتسوقش ليه داباا وخليه يعوم بحرو راه مكاين لي يشهد معاه كلشي مزرف منو ولحاج وخالي تاهو راه ضدو المهم نخليك دابا تانعاود نعيط ليك تهلا فراسك وسلم على العائلة

نوح:الله يهنيك

قطع معاه ولاح تلفون فوق البيرو وباين من وجهو بلي هاد لخبر ماتسوقش ليهوم.. عند بال عادل راه دار مزية وهو معارفش بلي هاد التصرفات غير مكيخليو نوح يجمع ليه لحساب حيت باقي مابرد من جهتو وباقي حالف فيه حيت عيااا مايميك وينعل الشيطان ساعة عادل صدق هو الشيطان..رجع هز تلفونو ودوز نمرة رحيل باش يسول عليها..

رحيل:(بصوت خافت)ألو نوح

نوح:(تبسم بهدوء)الفتنة ديالو كيف بقات سيدرا دابا؟

رحيل:راه ناعسة باقي مافاقت

نوح:باقي فيها السخانة

رحيل:لانزلات ليها دابا

نوح:شنو كاديري؟

رحيل:والو كنت باغا ندوش

نوح:تغديتي؟

رحيل:لامافياش الجوع

نوح:(كمش حجبانو وقال بجدية) كيفاش مفيكش الجوع؟ واش باغا تهلكي صحتك ارحييل

رحيل:(بتعب) ومافياش الجووع انوح وأصلا ملي يجيني الجوع غاناكل تغديتي نتا بعدا؟؟

نوح:باقي

رحيل:هاااء وعلاش؟

نوح:غانزل لمحاال تما فين غانتغدا مع عثماان

رحيل:(بضحكة)هه باش غاتغداو؟؟

نوح:ماعرفتش عثمان اش موجد لينا ليوم

رحيل:هههه اوا بصحتك مسبقاا (بمزاح)وجيب ليا حقي معااك ماتنسانيش

نوح:اش باغا نجيب ليك؟

رحيل:حقي فداكشي لي كليتي ههه أه نسيت حقنا حنا بتلاتة ههههه

نوح:(عض على شفتو بنابو وقال بحنية)حقك نتي ولعسيلات واخا هي لولة (شاف فساعتو) غانخليك دابا نكمل لخدمة من بعد ونعاود نعييط ليك ردي لبال لتلفونك واخاا

رحيل:صافي واخاا تانتا رد لبال لراسك

نوح:السلام أو عليكوم

حط تلفونو وكمل دوك الضواسى كيسنيهوم غير سالى ناض هز جاكيط ديالو وخرج من لميزون دڤواتيغ غادي لمحاال يدير تم ضويرة ونيت يتغدا تم..

أما عند رحيل غير قطعات تلفون وناضت تتوجد حوايجها لي غاتحتاج باش دوش ودخلات تحمحماات نيت وعاطية لخاطر لراسها.. هزات ريحتها وغير رشاتها وهي تكمش حجبانهاا ونطقات بخفوت:يييع خانزة

حطاتها بلاصتها بزعاف وخرجات عند سيدرا باش تفيقها تاكل تاهي حيت النهار كولو وهي ناعسة..

رحيل:سيدرا مامي يااالاه نوضي ناكلو أنا وياااك

تاتقيسها فراسها ودوز يديها على شعرها وتحدر تبوسهاا.. تاتحركات سيدرا وهي تاتحك عويناتها وتنين بحال شي قطة..

سيدرا:(بصوت متعب قالت)مامي بغيت نمشي لطواليط

رحيل: يالاه نوضي امامي

نوضاتها وداتها لحمام قضات حاجتها وبدات تاطرف ليها مع وجهها باقي دايرة لفاصمة لنيف مقاصتوش ليها هو وشعرها.. غير سالات خرجات لبساتها حوايجها لي جابت ليها من بيتها وخرجات معاهاا باش ينزلو لتحت يتغداو.. لقات سناء هي بوحدها لي جالسة تم والسعدية تاتحط لغدا..

رحيل:سلام أوعليكوم

سناء:واعليكوم السلام (شافت فسيدرا) باقي تايضرك نيفك

سيدرا:(كمشات شنافتها)اه تايضرني بزاف أنا

سناء:(تبسمات ليه بشوية)دابا تبرااي

رحيل:واش خالتي رحمة مغاتغدااش؟

سناء:تت طلع ليها الطونسيو راه متكية فبيتها

مع قالتها ناضت رحيل بسرعة تمشي طل عليها.. فواحد اللحظة نسات راسها راه حاملة وبدات تاطلع فالدروح بزربة تاوعات وتفركات لي كاين عاد بطأت الحركة.. وصلات لقدام باب جناحها ودقات لباب عاد دخلات وهي تاتقلب عليها بعويناتها.. لقاتها متكية فوق نموسيتها وحاطة راسها على لكادر دنموسية وشعرها لكحل مطلوق ومفرش ورى ضهرها مسبسب وطويل.. مغمضة عينيها وباين فوجهها لعياا.. و لكومودينو لي حدا راسها فيه كاس دلعصير منقص منو شوية وباكية ديال الدوا ديالها وكاس دلماا..

رحيل:خالتي واش نتي بخير؟

رحمة:(حلات عينيها ونطقات بعياء)بخير فين نوح؟

رحيل:مشى لخدمة علاش واش محتاجااه؟

رحمة:(حطات يديها على راسها ونطقات بتعب)علاش مقالهاش لياا علاش؟

رحيل:شنو واقع (جلسات جنبها تاتقيس كتفها بشوية) خالتي مالك؟

رحمة:(تتحك جبهتها بتعب) والو مواقع والو بلاماتشغلي باالك ارحيل

سكتات رحيل وهي تاتشوف حالتها كيف دايرة وهضرتها لي جابت ليها الشك ودخلات ليها التناوي فدماغها.. سكتات وبقات معاها شوية تاطمنات عليها عاد خرجات من عندها ونزلات لتحت عند سناء لي نطقات:كيف بقات؟

رحيل:شوية وصاف

سناء:(بعفوية) تت اووف مشاكيل تاداك المرض دعادل مقصح راسو وقالك غايمشي يدعي ولد لحاج حيت كان غايزهق روحو..

مع لپوز دلغدا كلشي مشى يتغدا من غيرو هو لي بقا جالس فالبوسط ديالو ساكت وداير ليزيات فودنيه كيخمم..من نهار لعرس معاود هضر معاها ولاجاوبها على مساجاتها تامبقاتش كاتسيفط ليه مزال.. هو دابا حاس براسو مخربق حيت معارفش هي اش باغا.. ولمشكيل لعويص هو عارف بينو وبين نفسو بلي كيبغيهاا وهادشي لي معصبو.. ريان لي عمرو بغا نهار بغا طاح فوحدة لي معارفش واش تاهي باغاه ولا لا.. وحدة لي مرة تتبين مشاعرها ليه وتخليه يزيد يتعلق بيها ومرة تصرف معاه ببرود وبعدم اهتمام تاكاتخليه يقول مع راسو واش هي نفس الشخص.. رجع لراسو لور متكيه على لكرسي ومغمض عينيه تاحبسات الأغنية لي كايسمع ليها وصونى تلفونو.. حل عينو وشاف نمرتها منورة الشاشة يالاه كان تيفكر فيها هاهي عمرها طوييل صونات عليه.. استغرب حيت صونات وهي يوماين معاوداات سيفطات ليه ولاصونات..

ريان:(جاوبها بهدوء) ألو

بيسان:(جوباتو بداك الصوت الرقيوق عندها)ريان صافا

ريان:حمدلله ونتي؟

بيسان:صاماغش احم واش نتا فالخدمة؟

ريان:وي

بيسان:(معجباتهاش برودتو فالهضرة معاها) بغيت نشوفك أنا حدا خدمتك تقدر تنزل عندي

ريان:(تقاد فجلستو ونطق مكمش حجبانو)نتي هنااا

بيسان:أنا كانتسناك

قطعات لابيل وخلاتو كيشوف فالشاشة دالتلفون باستفراب مفاهم والو.. هي اش كدير هنا وعلاش جاات.. ناض من بلاصتو نازل لتحت وعينو تيقلبو عليها تاقشع طوموبيلتها من بعيد رانج روڤر بيضاا كاتبري.. تمشى لجهتها وكل ماكان تيقرب كان قلبها هي كيدق بسرعة.. توحشاتو فهاد الفترة القليلة وتوحشات كلامو معاهاا وتعاملو لفريد لي مخليها تعلق بيه ففترة قصيرة .. وصل وحل لباب بلامايطلع ونطق بهدوء:وي

بيسان:غاندويو هنااا طلع نتحركو لشي كافي

ريان:(هو حجبانو ببرود)ممساليش لي عندك قوليه أنا كانسمعك ابيسان

بيسان:واخا غير طلع جلس باش ناخدو راحتنا كثر

نفد كلامها على مضض وهي توثرات ولكن شجعات راسها ودارت لي جات عليه حيت عارفة راسها غلطات معاه..

بيسان:شوف اريان أنا عارفاك مقلق مني على داك لجيست لي طرا فالعرس ولكن نتا راه خصك تفهمني أنا تصرفت هاكاك بعفوية ومكنتش باغا سناء تعرف هادشي لي كاين

ريان:(ضار شاف فيها)وعلاش مكنتيش باغا تعرف مراضياااش بيا ولاكيفاااش؟

بيسان:(حركات راسها بسرعة)لا لا اويلي واش من نيتك أنا قصدت بلي باغا العلاقة تبقا بيني وبينك وصاف

كلامها بلاصة مايخليه يبرد زاد خلاه يشعل ويتعصب وبانت فوجهو وكلامو لي كان قاصح:بيناتنااا يعني داكشي لي كنت تانخبر عليك ابنت الناااس كولو مشى باااح (ساس يديه بزووج) وااش أنا تانگول ليك نجي ندوي مع خووك ونخطبك ونسميو هاد لق*وي لي بناتناا ونتي تتگولي لياا بناتناا لعب لبرااااهش دابا كاااانديرو نتلاقااااو بتخبية ومصاحبين بحااال لاحنا فليسي هادشي گاعما درتو مع ك*ي فااااش كنت تانقرااا فبراااا وبااااقي برهوش ونديرو دابااااا ملي وليت بعقلي..

سكت وهو كينهج وبيسان سرطات ريقها حيت ممولفاهش يخسر لهضرة معاهااا وزيد فاش على صوتو خلعهاا وهي مولفاه بوجه حنين ودابا مبين ليها وجه ااخر.. أما هو راه وصل لطوب ديال العصبية حيت بصح هضرتها حسساتو بلي هو باغي يلعب ويتفلى وهو ماشي نيتو هادي..

بيسان:رياااان

ريان:(شاف فيهاا وقال بجدية)سمعي ابيسان هاااد لمرض طلع لي فصحتي أناا لابغيت نتصااااحب راه عطاااا الله بناااات الق*اب لي ندوز معاااهوم لوقت ونزهى مع ك*ي وندير لي بغيت معاااهوم مكاااين لي يقول لياا لا ولكن أناا مباغيش حيت هادشي عياااني أنا باغي المعقووول والصح ابنت الناااس وحيت نتي من عائلة ختي وكانعرفك جيتك من الباااااب بااش ماتقوليش هدا باغي يتفلى لا أنا راه تفلية خطيااااني لاكنتي باغا تصاحبي وتعيشي لحياااة بتخبية مكاين لاش من هاد النم ونفرقووو حناا هاد لحزااااق من لول باااش لانتي تعدبي لاأناا نمرض فصحتي ولاكنتي باغااا المعقووول مرحبااا من غدا نجيب لواليد والواليدة ونجيو نخطبوك وديك السااااعة نقدروو ناخدو راحتناا وتاالاخرجناا وتسارينا وتقهوينااا ماتبقااايش خايفة وكل مرة لاخويا يشوفني لاهداك نعرفووو حيت هادشي مباغيهش أنا راه مكنسرررقش بااااش نتخبى (حل لباب وقبل ماينزل قال) داباا كلشي عليك ابنت الحااااج..

نزل وسد لباب تاقفزات من بلاصتهاا بالجهد وهي متبعاه غادي وباين فيه كاااعي وغير غبر وهي تنهد.. هضرتو بقد مكانت قاصحة عليها بقد مكانت معقولة حيت مقااال تاعيييب هو جااها من لخر... هي تاتشوف من منظور اخر وفكرة لي فبالها سيطرات عليها ومع كاين مثال اليازيد وسناء لي من العائلة ومصدقاتش ليهوم قالت يمكن تاأنا ونسات بلي راه كلشي أرزاق واخا يتزوجو ويطلقوو راااه المكتاب والعائلة ماعندها مادير ولكن بيسان مكتفكرش هااكاا وتفكيرها عكس ريان وهنا فين لقااو أول مشكل فعلاقتهوم لي يالاه فبدايتهاا.. المشاكيل لي تيكونو فكل علاقاات ولي تيخص الأطراف بزوج يعرفو كيفاش يفكوهوم وهوما لي كيبينو واااش دوك الأطراف بزوج بيهوم صبارين وبزوج بيهوم عندهوم نفس الهدف فالعلاقة ولا لعكس..

رجليها مبقاوش هازينها وجرات أقرب كرسي جلسات عليه وأوطوماتيكمو حطات يديها على كرشهاا وعينيها خارجين فسناء مكانتش عايقة براااسها اش خرجات من فمهاا..

رحيل:(فمها صفاار)كيفاااش غايدعيه اش تاتقولي

سناء:(خرجات عينيها وقالت بتلعثم)هااء لا راه غير احم غانمشي نشوف ختي

رحيل:(شداتها وقالت بصوت عالي) شنوو طاااري كيفااش غايديه وشكون هادا؟؟

سناء:(ساطت النفس وقالت بجدية)صافي ماتغوووتيش أنا غانقول ليك شنو كاين تت عادل ولد عم ولد لحااج مهم لهضرة سمعناهاا غير من عند مو لي عيطات لرحمة تتخاصم عليها وقالت ليها لبارح ولد لحاج كان غايزهق روح ولدهاا كون ماربي لطف دابزو وماعرفتش اش وقع بناتهوم وأصلا هاد عادل واحد لمسمووووم منو مكااان فيه سم وحسد لعيااالات ومن ديما مكيحملش ولد لحاج حيت ربي عاطيه الخييير وهو لا شحال هادي قبل مايشري ولد لحاج الفيرمة كان جدهوم جامعهوم باش يعلمهوم حيت هو لي شافها قبل وحد من حفايدو مازعم من غير نوح وملي خدم عليها وخسر فيها بزبابل دلفلوس ورجعها كيف تاتشوفيها دابا جاتو لغيرة وخلاص فاش شاف نوح كيفاش استاغلهاا ودار فيها لسباس دلخيل وجنانات كان غايموت تت ولكن ربي كيعطي لكل واحد على قد نينو وهو عمرو غايطفرو بهاد السم لي فيه..

رحيل:(عقلها غير مع لكلام لول لي قالت ليه والخلعة لعبات عليها تاحسات بالدوخة جاتها وقلبها تايضرب بالجهد) هو مقال ليا والو

شافت فيها سناء وغير ضربات على وجهها صفر وشفايفها لبويض وهي تخلع.. هاد لهضرة أصلا مقالوهاش الرجاال وحد معاودها لمرتو حيت طبيعتهوم هاكا دايرة لكلام لي تيتقال فمجمع الرجاال تيبقاا تم وتاهاد المشكيل بقا تم ولكن مت عادل فاش عرفات وشافت حالة ولدها لي داوه لسبيطاار وداك الدم لي مجلخ وجهو وطباعي ديال الكرشيات لي مخلي ليه فوجهو ولطراس دصباع نوح لي كانو على عنقو خلاوها تجعر لاهي لامرتوو وأراك لهضرة وعيطو لرحمة وماخلاو ماقالو ليهااا وهي صافي فاش عرفات طاح ليها طونسيون وسنااء راه بقفوزيتهاا تاهي بلزاتها وقالتها لرحيل لي أصلا على سبة ودابا مع الحمل خلاص كملات القضية..

سناء:سعدييييية سعدييييية جيبي لماااا دالسكاااااار

جات السعدية تاتجري جايبة لمااا وسيدرا تاتشوف بخوف فمهاا وعينيها مدمعين وأصلا المرض هلكهاا.. شربوها الماء والسكار وعاد بدات شوية تعقل وتحل عينيها وعاونوهاا تانعسوها فالسداري وسناء راه لخلعة شداتهااا..

سناء:رحييل واش تاتسمعيني شوية دابا

رحيل:(مغمضة عينيها بتعب)نوووح فين نوووح

سعدية:نعيطو على ولد لحاج

سناء:(خافت من حالة رحيل وقالت بسرعة)جيبي ليا تلفوووني بزربة (جابت ليها السعدية تلفونو وهي دوزات لخط تاتقفقف عارفة اش تابعها وبلي مغاااديش يدوزها ليها واخا خالتو وكبيرة عليها بسنوات قليلة ولكن تاتخاف منو وتتحتارمو..غير تفتح لخط وهي تنطق بصوت متوثر) ولد لحاااج احم لباس

نوح:(بجدية)حمدلله اش كاين؟

سناء:(سرطات ريقها) واش نتا جااي لدااار؟؟

نوح:(بخشونة)سنااااء جيني من لخر اش تم

سناء:رحيل سخفااات

قالتها بزربة وغمضات عينيها وهي خايفة من ردة فعلو لاعرفها هي السباب واخا مكانتش قصداهاا..

قطع معااها وهي بقات مع رحيل لي واخا حالة عينيها ولكن الضبابة باقي عليهوم وحلقها ناااشف..

سيدرا:(بصوت باكي وهي جايا عند مها)مامي

رحيل:(ضورات راسها واخا باقي تاتشوف الضبابة الاأنها مباغاش تخلعها)هانا أمامي ماتخافيش

مشات سيدرا نعسات على صدرها ورحيل تاتمشط على شعرها وهاد لحالة أول مرة توقع ليها مولفة تاتغيب وتفيق عاادي ولكن دابا راه شوفة نقص ليهاا بحال لاحاطين فوق عينيها ميكة دلبلاستيك وهي براسها تخلعااات.. بقات شوية تابدات تاتصفى ليها الشوفة وقدرات أنها تشوف سيدرا لي باقي متكية على صدرها نوضاتها وناضت تاهي جلسات وسيدرا مخشية فيها مبغاتش تفرقهاا.. مدازش وقت طويل كان صوت نوح القوي كيتسمع فالرياض وهو كيسول السعدية وغير دخل لصالة قرب بزربة وتحدر شاد وجهها بين يديه وقال بصوت متهدج:ماااالك كاضرك شي حاجة؟؟

هو عند بالو الحمل السباب ومعارفش شنو طاري..شافت فيه رحيل وعضات على شغتها حابسة البكية لي جاتهاا وقالت بصوت خافت:أنا بخير

نوح:نديك لطبيبة؟؟

رحيل:(شافت فسيدرا ونطقات بتبسيمة باش ماتخلعهاش)صافي امامي أنا بخير سير مع السعدية توكلك باش تشربي دواك يالاه

مشات سيدرا غير بزز وغير غبرات وهي تشوف رحيل فنوح لي باقي جاالس قدامها وشاد يديها.. دموعها كانو على سبة وقالت بصوت مرتاجف:علاش ماقلتيش ليا داكشي لي وقع معاك لبارح

نوح:(هز حاجبو وفهم اش كاين ونطق بجدية)شكوون گالها ليك؟

سناء:ممات عادل عيطات على رحمة وقالتها ليها وماخلات مانسااات فيها راه تاهي طاح ليها الطونسيو وأنا بلامانقصد قلتها لرحيل

نوح:(خنزر فيهاا وقال بجدية) فين يمّا؟

سناء:فبيتهااا

نوح:(شاف فرحيل)أنا راجع

رحيل:(ناضت من بلاصتها ونطقات بعصبية ودموعها نازلين) علاااش فكل مرة كاتهرب من لكلام انوح الانتا مخااايفش على راااسك أنا خايفة عليك..

داك لبرود لي حسات بيه كيدوي بيه وكيفاش كيتعامل مع الموضوع كأنه ماشي شي حاجة مهمة عصباتها... هي غير سمعات غايديعيه والخلعة لعبات عليها ومقدراتش تحكم باقي فراسها وترزوني هضرتها... أما نوح فهادشي لي مكانش باغي تسيق هي ومو لخبار حيت عارف كيفاش غيتعاملو مع الوضع وبلي غايخافو عليه.. محملش يشوفها تتبكي بسبابو واخا ماشي هو لي بكاها ولكن الأمر متعلق بيه هو..

نوح:(قرب جهتها وقال بهدوء) رحييل بلابكاا

رحيل:(مقدراتش تحكم فدموعها وكملات كلامها) علاااش ضربتيه واااش مفكرتيش فيناا حنا اش غانديرو لاوقع ليك شي حاااجة نتا علاش أناااني تاتفكر غير فراااسك انوووح كوووون قتلتيه داباا فين كنااا غانوليوو

نوح:(كمش حجبانو) مكااين لاش تهزي لهم

رحيل:(قطعاتو بانفعال)كيفاااش مانهزش الهمم وهو باااااغي يدعيك واااش نتااا عارف الجدية ديااال هادشي لي حناا فيه راااه القضية فيهاا الحبببس انووووح الحبس واااش عارف اشناهو الحبس

كاتهضر وكلها تاترعد وهي فكرة وحدة فبالها هو غايدخل الحببس وهادشي غير مزاد لعب عليها وخلعها وزيد لهرمونات المخربقين... ونوح فهاد اللحظة ماهمو لاحبس لاهم يحزنون همو غير دموعها لي عصبوه حيت مكيحملش تنزلهوم سوى بسبابو سوى بسباب غيرو وخوفها عليه خلاها تبقا فيه.. قرب جهتها بلامايهضر عنقهاا لصدرو بالجهد خاشيهاا فيه وهي زادت وتيرة بكاهاا وسناء واقفة تاتشوف فيهوم بهدوء وحزن.. بقات فيها رحيل فديك اللحظة وعزات عليها بزااف..

نوح:(همس ليها فودنيها بصوت هامس)ششش بلابكاا ارحييل إينوو

رحيل:(حركات راسهاا وبعدات عليه وهي تاتمسح دموعها)حشوومة عليك

مشات مور ماهمسات ليه بديك الكلمة لي خلاتو غير كيتنهد وتعصب على عادل لي كون كان دابا قدامو كون دخلو لقبرو نيشان على هاد لفعاايل لي كيدير والمشكيل لي ناض بسبابو.. مسح على وجهو وبقا واقف مدة عاطي بالضهر لسنااء لي نطقات بهدوء:سمحليا اولد لحاج مكنتش قاصدة نقولها ليها لكلام زهق من فمي

ضار شاف فيها نوح وحرك راسو بلامايهضر معاها وخلاها غادي يشوف مو لي عارف تاهي غاتكون تخلعات.. طلع لجناحها ودق قبل مايدخل وهي غير شافتو داخل عندها بديك الكسدة وهي تنوض من بلاصتها بزربة غادة عندو عنقاااتو تاهي وبدات تاتبكي وهو تايسكت فيهاا ويطبطب على ضهرها بحنية..

نوح:(بهدوء)يمّا

رحمة:(زولات وجهها من صدرو وقالت ببكا)علاش ماقلتيهااش ليناا وعلاااش أصلا ضربتيه انوووح اش قربك ليه

نوح:(كمش حجبانو وقال بخشونة)ملي ماسيفطتوش لعند لي خلقو يحمد الله ويشكرو ايمّا

رحمة:(بخوف نطقات) واش انووح باغي تخرج على رااسك االمرضي ديالي معارفش بلي لادرتيها كلناا غانمشيو فيها نتاا لي عندي بعد الله ومانقدرش نخلي شي حاجة خايبة تطرا ليك..

نوح:(باس جبهتها وقال بجدية)لاكانت مكتابة ايمّا ماعندنا كيف نديرو ليهاا

رحمة:(نطقات بصوت باكي حزين) واش بغيتي ترزيني فيك أناا ترزيت فخووك اولدي مشى لياا ولدي الكبير وتشوات كبدتي عليه (نزلو دموعها مسرسبين) كنت تانقول غايجي النهار لي غانفرح فيه بخووك وغانشوفوو عريس هوماا داوه لياا وخلاوني بلابيه حرررموني من كبدتي وشواوني فيهااا بلاصة مااانشوفو عريس شفتوو مكفن أناا لي كنت ندعي ربي ياخد روحي قبل من راجلي أو ولادي حضرت لجنازة ولدي الكبير لي قتلوه لياا ولدي لي مكاان عندو تادنب ومشى ضحية رزاوني فيه انوح ومبغيتش نترزى فيك تانتا هو مشى وباك مشى وبقيتي لياا نتا وخوتك لي مخليني نصببر على فرااقهووم..

حطات راسها على صدرو وهي تبكي وتشهق ونوح فديك اللحظة كاان مكمش حجباانو وعااض على شفتو بنااابو تاقرب يدميهاا.. هضرتو قلبات عليه موااجيع وشي حوايج لي بقااو لداخل وعمرو بااح بيهوم لشي حد.. من ديما ضرو لحاجة تايخليها لداخل ديالو عمرو يقولها.. عادر خوف مو عليه حيت من حقها أم لي سبق ليها وفقدات واحد من ولادها بطريقة خايبة بزاف بسيف ماتأتر وتخاف على ولادها لخرين.. مساهلاش على أم تشوف ولدها مرمي فالأرض ودمو ناازل وفنهار عقد القران ديالو.. نهار لي كانو ناووين يفرحو بيه تقلب عليهوم بصدمة موتو لي تاحد مكان داير ليها حساااب.. باقي لدابا غصة ناااصر فحلقوو مقادرش ينساها واخا دازو عليه سنين طويلة إلا أنه عمرو غاايقدر ينسى موت خوه لي تغدر وينسى بلي هو تدفن بلامايشوفوو... ديك الغضة لي وحلات ليه داباا وهو كيسمع لبكاا موو لي ماقدرش يسكتها حيت من حقهاا.. بقا معاهاا تايطمن فيهاا وتيحاول معاهاا تابردات شوية أو ولات حسن من لول عاد خرج من عندها وهو تيطرطق عنقو وحاس براسو عياان نفسياً

وصل لجناحو ودخل تيزول الجاكيط لي لابس ويقلب عليها بعينيه.. مكانش تيسمع لحس ديالها وبدا تيقلب عليها فالجناح كامل.. سبق الصالة وبيت الصلاة عاد دخل لبيت النعاس ومشى تايقلب عليها فالدريسينغ مبانتش ليه كمش حجبانو وتمشى جهة الحمام ومع حط يديه على لبواني وهو يلقاه مسدود

نوح:(دق عليها ونطق بهدوء)رحييل(بدا كيتسمع صوت بكاها)رحييل ممزيانش تبكي فالطواليط دابا يصليها معاك شي جن..

كانت جالسة فوق لشاس وهازة فيديها كلينيكس كل مرة تشمر بيه نيفها وتمسحو.. عصبها كيفاش كيتعامل مع لموضوع بلبارد تقولي ماشي هو لي طايح فمشكيل كبير.. فشات قلبها بلبكاا وبقات تماا تاسمعات صوتو ولكلمة لي قال ليها ولي خلاتها تقفز من بلاصتهاا.. ناضت جهة لاڤابو وبدات تاتغسل وجهها تاحسات براسها شوية ومسحاتو عاد خرجات لعندو ولقاتو واقف تيطوي فكمايم الشوميز مبين دراعو والعروق لمنفوخين فيها.. شاف فيها وبقا متبع الشوفة لملامح وجهها الباكية لعوينات منفوخين وحمرين النيف كيسيل وحمر تاهو وفمها شبعات فيه عضاان.. فديك اللحظة أتيراتو وخلاتو يتشهاهاا.. لعب بلسانو ففمو وقرب جهتها بخطوات تقيلة وهي واقفة بلاصتها ومحطاش عينيها فيه.. وصل عندها ومد يديه كيزول ليها الفولار تاحيدو كولو وحل ليها ديك القراصة مخلي شلال لعسل ينزل فوق كتافهاا.. قرب جهتها كثر ودفن راسو فشعرها كيشم ريحتو لي تاتسلب ليه لعقل... ضور يديه على خصرهاا وجرها ليه تاتسطحات مع صدرو وبلاماتشعر طلقات واحد الاااه ملحنااهاا بصوتهاا الخافت... يديه لي كان حاط على جنابهاا كان تينزلهوم ويطلعهوم بلمهل.. بدا كيطلع ليها ديك الگندورة لي لابسة بيديه وفنفس الوقت كيطبع قبلات على عنقهاا خلاوهاا تستكين فضهرو وتغمض عينيها.. طلع ليها لگندورة لي كانت لابسااها على لحم وتحت منها غير دوبياس فقط.. قااس لحمهاا الرطب والسخووون بيديه الخشنة تاحس بيها ترعدات بين يديه..

نوح:(بصوت مبحوح همس ليها فودنيها) باغا تسكتي ليا لقلب الفتنة ديالي

رحيل:(همسات تاهي بخفوت) نتا لي بغيتي تسكت قلبي بقصوحية راسك انووح

نوح:(هز راسو تيشوف فيها وقال بهدوء)رحييل خوي راسك من هادشي وماتهزي هم والو

رحيل:(شافت فيه بعتاب) كيفاش مانهزش الهم واش سهلتي الموضوع

نوح:(شد وجهها بين يديه وبلل شفايفو بلسانو)كاتيقي فيا الفتنة ديالي؟

رحيل:(حركات راسها باه)بزااف

نوح:(تبسم وحك نيفو مع نيفها) راجلك عارف شغالو نتي خوي ليا دماغك من هاد التخربيق

رحيل:(كمشات حجبانها)كنت تانقول لمن كيشبه زين العابدين وديك العصبية وقصوحية الراس ملين جايبها صدق وارثها منك

نوح:(لعب بلسانو ففمو وقال بمزاح)لحاجة لي ماتشبه مولاها حرام

رحيل:(حركات راسها وقالت بعياء)اييه باااين غير الله يستر لايشبهولك تاهادو لي فكرشي فالعصبية ديالك

نوح:(تبسم تاتغمضو عينيه وحط يديه على كرشها) لعسيلات ديالي ضروري مايشبهو لباهوم ومهوم

بكلامو عرف كيفاش يخليهاا تنسى شوية المشكيل وتندامج معاه فهضرتو لحلوة لي مكتسخااش بيها.. أما نوح تحدر باسها جنب فمهاا وبدا تينزل بقبلاتو جهة عنقهاا تيطبع فيه بوسات دلغدايد تاكيخلي طبعة تبان فالبلاصة.. بعد وهز ليها ديك الگندورة تازولها ليها مخليها بدوبياس ورحيل شوية وتخشى فالأرض بالحشمة... كانت لابسة دوبياس فالموڤ وسوتيان فيه خيوط ضامين نهديها بحميمية والفرقة دالصدر باينة والكرش شوية خارجة... كان تيشوف فيها واخد راحتو فحلالو ورزقو وهي باغا تلوح عليها شي بنوار حيت بصح حشمات..

رحيل:(ضورات عينيها)احم فيا لبرد

نوح:(غمزها بخفة)لبيت فيه لكليما رحييل إينو

قرب جهتها وقبل ماتجاوبو كاان سارط كلامها بشفايفو لي ضمو شفايفها فقبلة فرنسية مخلين الألسنة هي لي تحاور مع بعض.. ثغرها كان بحلاوة العسل الحر لي مخليه يزيد يبغي يغرق فحلاوتو.. مضورة يديها على عنقو وشعرها طايح مغطي ضهرها وكتافهاا وهو يديه هزاتها بالخف تاضورات رجليها على عنقو وضار غادي بيها جهة النموسية... حطها بشوية عاطيها لخاطر على قبل راسها وعلى قبل حملهاا.. فرق شفايفو على شفايفها وخيط الريق بيناتهوم.. بدا كيحل صدايف الشوميز وزولها تبان صدرو وتحدر جهتها تيوزع قبلاتو على سائر جسمها وممخلي تامكاان سالم...حط يديه على أنوثها لي كانت مغطية بداك الشبيكة... تاحلات عينيها تاتشوف فيه وهو ينطق بصوت باااح مفعم بالمشاعر:هالمحني

ضحكات رحيل وغطات وجهها بيديها وهو تبسم وبدا كيحل السمطة ديال السروال وزولو تابقا بلبوكسور ونزل تاني عندهاا يكمل مابدااه.. عطااها واحد لخاااطر وكل مرة يسولها ياك ماضرهاا ياكماا توجعات وراد لبااال لأدق التفاصيل... عيشها فوق السحااب وعاش معاها لحظات حميمية عمرها تكرر... فكل مرة تيعاشرها فيها تيحس بلي أول مرة وهي كدلك.. بقوة ماكايخليها تعيش اللحظة مكتسخاااس بيه كيف تاهو مكيسخاااش... وفكل مرة لابدما يخليها تكتاشف شي سر من أسرار المعاشرة ويخليها تجرب شي حاجة جديدة عليها وطريقة جديدة

جرات عليها لغطا وهي تاطلع النفس وكلها عرقااانة.. مد ليها كاس دلماا نزلات عليه كامل عاد حطات راسها وهو بدا كيمسح ليها فالعرق على جبهتها وعنقهااا..

رحيل:(تفوهات)عيت بغيت نعس

نوح:(تحدر باسها فأرنبة نيفها)نعسي وارتاحي ليا تاتفيقي ودوشي

غمضات عينيها ونعسات وهو ناض غادي يدوش وناشط.. غير سالى دوش وخرج لبس عليه سروال توب وشوميز نوااغ فوق منهاا مونطو رجااالي نواغ تاهو..صونى تلفونو بنمرة جدو..

ح.لحسن:(بجدية)اجي لدار عمك دابا..

وصل نوح لدار عمو سليمااان وغير دخل مشى نيشان لصالة فين كان جالس جدو مع عمو وعادل لي كان وجهو خريطة بضرابي... ولطراس دصبعان نوح باينين فعنقوو.. دخل نوح وشاف فجدو وقرب جهتو باس ليه راسو باحترام ونطق بجدية:لحاج لابااس

ح.لحسن:حمدلله اولدي جلس

سلم مع عمو تاهو وماعبرش نهائيا عادل ولاشاف فيه دارو بحال لامكاينش وجلس فوق السداري بكل رجولة وهادشي غير مزاد خلى عااادل يحقد عليه.. كيشوفو كيفاش مبرد وهو هادشي محاملوووش..

ح.لحسن:واش عارف علاش جامعكوم بزوج هنااا

قال هضرتو وشاف فحفادو بزوج.. أما سليمان فهو أصلا من طبعو حنين ومسالم عكس خوه لمرحوم إسماعيل بات نوح لي كان قاصح وجدي..

ح.لحسن:(هضر برزاتة ووقار)ماعرفتش شنو لمشكيل لي وقع بناتكوم بزوج ولكن لي خصكوم تعرفوه وعمركوم تنساوه هو نتوماا بزوج بيكوم ولاد لعمااام هاازين دم السليمااني وخوووت.. ماخصكومش تخليوو المشاكيل دخل بناتكووم وتعطيوها كثر من قيمتها اولادي

سليمان:(بهدوء) كيفما عادل ولدي من لحمي ودمي تانتا اولد لحاج راه ولد لمرحووم وقيمة لمرحووم عندي عالية وبلاصتو مايجي فيهااا حد ونتاا اولد لحاج من ديما عمري شفت عيبك وعمري سمعت عليك كلام ناقص حيت رااااجل ولد رااجل عارف لي عليك ولي ليك وعمرك تحگر لواحد.. وعارف بلي عادل هو لي سبق لعييب وراه دوينا معاه وهو مغايدعيكش حيت هادشي ماشي من شيم عائلة السليماااني..

كان عادل جالس كيسمع ولداخل ديالو تايغلي.. هضرة بااه حقداتو وهو كيسمع ليه وكيشوف كيفاااش عاطي قيمة لولد خووه أو وهو لي ولدو لا.. وجدو تاهوو لي سمعهوم ليه قبل مايجي نووح وخاصم عليه وحلف عليه حلفة دالرجااال لامشى تاعتب الكوميسارية ورفع عليه دعووة غايتبراااه وغايحرمو من كلشي وباااه ساندو وتاهو وقف مع جدو.. وهادشي لي خلاه يتعصب حيت حرمو عليه اللحظة لي ياخد فيها حقو من نوح ناسي بلي بصح هو لي سبق لعيب وهو لي جبدو بكلامو لي نطق بيه واستفزوو.. عاطيه التقاار وعمرو قرب ليه واخا عارفو اش كيسوى ولكن عادل لا كيحفر ليه وتايقلب عليه باغي يجبدو بأي طريقة وعرف كيفاش يجبدو ديك الليلة ودليل هو هيجاااان وهمجية ولد لحاج معاااه... هو تيشوف نوح واخد كلشي حب باه واحترام گاع لي فالعائلة وزيد جدو لي مومو عينيه هو نوح ناااسي بلي تاهوو كون كاان قلبو معامرش بالحسد والحقد كان غايفهم بلي نوح دار بلاصتو حيت احتارم راسو شي لي خلى الناس يحتارموووه... عاطي لراسو قيمة هادشي علاش نااس عطاوها ليه وزيد هو كيتعامل مع النااس مزيان والجوهر الحر ديالو نقي وناس لي عاشروه عارفين هادشي عليها بلاصة ولد لحاج عالية عليه..

نوح:(تقاد فجلستو ونطق بجدية وصوت خشن) سمع لحاج نتا عارفني على قد مامزيااان على قدماا خااايب موقر البشاار حيت ماعنديش مع لعب لبراااهش ولكن لي قلب على عيبي رااه غايلقاااه حاااضر.. حقي راه مكنسكتش عليه ولي جبد فاميلتي ولاشي حد من الناااس لعزاز عندي راه مغانرحموووش (شاف فعمو أو وجه ليه هضرتو) ولدك عمرري قربت ليه وعمري حاشيتهاا ليه ودوك لفعاايل لي فيه هوما سبابو وقرتو يوقرني مايبقاااش يحفر حيت غايلقى غير لي مايعجبوووش ليوووم جيت على قبلكووم بزوح حيت محتارمكوووم ماشي على شي حاجة خراا والاكان عند بالو راه غايخلعني بالشكااية لي ناااوي يدير فراااه غالط حيت هادشي مغايزعزعنيش وماحرك فياا تااشعرة وقدااامكووم بزووج غانقولهاا ليه طريييقي يبعد منهااا ولاسخن عليه راااسو مرة خرى ونوى يدير شي بلان ماهواااش فديك الساعة راه مغانتعاتقش معاااااه ومغانرحموووش واخا نعرف ندخل عليه لحببببس...

الكلام حبس تما وكل واحد تيسر لطريقو والمشكيل تسد عند كلشي من غير عادل لي باقي مبغات تسرط ليه لاتصرف جدو وباه ولاكلام نوح.. داز داك النهار ودازت وراه سيمانة كاتجري ورحيل قررات أنها دير العباسية لمحالهاا.. واخا نوح كان باغيها تزيد ترتاح ولكن هي مبغاتش ومتحمسة وتاهو دار ليها خاطرهاا..

كانت واقفة فالدريسينغ تاتلبس عليها عبايتها لي كانت من تصميمهاا ولي كانت جايا واسعة ومن تحت وفيها زوج طبقات من لتحت وجهة الصدر فيها سميطة بتوب على شكل بابيون ويديها مجموعين دارت معاها فولار مناسب وصندالة ميني طالون..دخل نوح لي كان مأنتك بلكلاص وكيف ديما لابدما يدير توش خاصة بيه بحال دابا ملابسش گراڤاط حدو لابس ڤيست مع شوميز فنواغ.. قرب جهتها وعنقها من لور ونطق وعينو تايشوف فانعكاسهوم فالمرايا: واجدة؟

رحيل:(بحماس)اه متشوقة نشوف المحال وسميتو ههه

نوح:يالاه زيدي نمشيو

رحيل:(كمشات حجبانها)درتي ريحتك؟

نوح:اه علاش؟؟

رحيل:خانزة اااوف حيد لهيه

سبقاتو هازة صاكها وتاتنش فوجهها وهو تابعها هاز حاحبو مفاهمش مالها..خرجو من الرياض حيت كانو بوحدهوم لي بقااو وكلشي سبق.. ركبات وهي سادة نيفهاا وحالة الشرجم بااش تنفس ريحتو روعاتها..شدو طريق نيشان لمحال وتلفون رحيل خدام كل مرة يعيط ليها شي واحد... وصلو بعيد شوية على لمحال وسطاسيونا ورحيل حاسة براسها متوثرة.. نزلو بزوج وشد ليها نوح يديها وهي كمشات حجبانها وقلبات عليه وجهها وهو مفاهمش مالها تقلبات واخا هاكا مقال والو وسكت.. وصلو لمحال فين كانو الدقايقية لي مجرد ماوصلو بداو يلعبو ويغنيو وكلشي واقف العائلة القريبة كلها حاضرة وتامن أميمة صاحبة غزلان.. الناس واقفين كيتفرجو وشي كيصور ونوح جر رحيل وغطاهاا باش ماتبانش وهي عينيها على لوگو دالمحال لي كان من اختار سيدرا.. لافتة كحلة ومنقوش فيها بالدهبي "Sizin Shop" وفجنب مانكان مرا لابسة كسوة.. تبسمات رحيل ومشات تاتسلم مع خوتها وباها وگاع لي جاو يشاركو معاها فرحتها.. شد نوح يد رحيل وقربو جهة الباب لي داير ليه لبوند فلحمر وعطاتها أسماء مخيدة فيها مقص هزاتها رحيل وقربات جهة لابوند وقطعات شريط تحت تصفيقات الكل.. دخلو لداخل وتما رحيل عيونها لمعو بفرحة وهي كاتشوف فالمحال لي كان مستف بطريقة تتجدب العين.. كلشي كان خطير والديزاين كان حسن من لي تخيلات والإضاءة لعبات دور.. كانو لبنات لي غايخدمو لابسين تيشورت فيها سمية لمحال فلور كبيرة وفلقدام جنب صغيرة.. كانو مستفين طبسيل طاوس دالتمر وبلاطو لحليب ولي دخل يهزو وتاناس برانين دخلو ونوح جاب سكوريتي بحكم أنه عارف دنيا غاتكون مخلطة فخصهوم يردو لبال.. فرحة الأسمراني لفرحة بنتو كانت ضاهرة على ملامحو وهو واقف مع نوح تيهضرو.. كانت سيدرا تاضور هنا ولهيه ودايرة فاصمة صغيرة على نيفها.. جا عندها أمين وسلم عليها وتاهي بدات تاتهضر معاه تاشافت زين العابدين لي جاي تاهو عينو تفشات واخا باقي فيه لطراس مي حسن من قبل.. خنزرات فيه وخلات أمين لي بدا يضحك حيت عارف لي كاين..

العباسية كانت حاجة زوينة ورحيل مكانتش متوقعاها حيت تخيلاتها فشكل وطلعات فشكل اخر.. كلشي كان هو هداك والمحال حمقها وتامن بيروها زوين وديكورو فيه لمسة أنثوية وهادشي كولو هي ماحضراتش ليه غير قالتو لنوح فاش كانت تتعاود ليه وهو طبقو ليهاا.. دازت الساعات زوينة ولي زاد فرحة رحيل هو فاش جات أول كليانة لي بصدفة دخلات تحضر لعباسية وعجباتها واحد لكسوة وخداتهاا... ورحيل عجبها لحال حيت دايك لكسوة هي لي صمماتهاا وفرحات حيت نالت إعجاب النااس.. دازو دوك الساعات الزوينة فجو ضحك ونشااط وموراها كلشي مشى لرياض فين داير ليهوم نوح صدقة باش ربي يسر ليها فمشروعهاا..

---

بدلات رحيل حوايجها بقفطين عادي ديال الدار ونزلات لتحت فين كاينين العائلة.. كانت رحيل باغا تنفارد بمها باش تقول ليها على لحمل وتفرحها.. وفنفس الوقت كانت تاتسنى لفرصة لي يخبرو بيها زين العابدين وسيدرا.. صونى تلفون رحيل بنمرة وداد وعلماتها بلي هي فالحومة.. خرجات رحيل عندها ولقاتها جايا مع زكرياء لي وصلها..تعاملات معاه عادي سلام من بعيد ودخلات وداد ومع جات رحيل دخل سمعاتو نطق:رحيل واخا ناخد من وقتك واحد الدقيقة

رحيل:(شافت فيه بجدية) كنظن مكاين تاشي حاجة لي نهضرو فيها؟

زكرياء:(بخجل) لاكاين احم من ديما كنت تانتسنى الفرصة باش نطلب منك السماحة

رحيل:السماحة؟

زكرياء:تيقي بيا كنت مجبور باش ندير بهضرتو هددني بواليديا لي عندي وماقدرتش نرفض عمري كنت باغي نأديك ولكن نفدت هضرتو أو بديت كاندي ليه خبارك ارحيل

رحيل:(بخوف)شكوون؟

زكرياء:بدر الدين الجوهري هو شدني من ليد لي كاتوجعني ولكن حمدلله ربي لطف وبعد شرو علينا وهادشي راجع لولد لحاج لي عرف كيف يهنينا منو وحمااك وماخلاهش يأديك...

مجرد ماتدكرات سمية بدر الدين الجوهري حسات برجفة سرات مع جسمها وعينيها الحضرين تحلو بصدمة وخوف.. لطالما كانت سميتو بالنسبة ليها عبارة على فوبيا ومشكلة ليها عقدة لي كرفصاتها فسنين من حياتها.. السمية لي بسبابها فقدات أعز صديقة ليها وأخت لي حرقتها باقي ليومنا هدا مابغات تنسى ليها.. بسباب عائلة الجوهري هي تدمرات نفسيتها وتكسرات من لداخل ديالهاا وباش ترمم داك الكسر خدات وقت طويل وسنين ومع دلك داك الكسر باقي لدابا ماترممش كليا.. باقي نفسيتها كاتأثر فاش كاتسمع شي حاجة متعلقة بماضيها..

أما زكرياء فكان تيحس بتأنيب الضمير ومن نهار شافها فاش جات لدارو وهو باغي فرصة فين يطلب منها السماحة واخا سبق لنوح وحدرو يبعدها عليها ولكن هو كان مُصر يطلب السماحة ويخلي ضميرو يرتااح..

زكرياء:(كمل كلامو وهو حادر راسو) نتي عزيزة عندي ارحيل وعمري كنت باغي نأديك ولكن بزز مني اظطريت نفد ليه كلامو وهو كل مرة يشوفني غفلت على شي حاجة يهددني بواليديا وهوما لي عندي ولكن هادشي ماطولش حيت ولد لحاج وقف ليه فطريقو وخسر ليه گاع داكشي لي كان كيخطط ليه ولي كان ناوي يديرو معااك... عتقك منو وهناني من تهديداتو وبسباب ولد لحاج بدر الدين الجوهري مبقاش فحياتنا وتهنينا منو (شاف فيها وكمل كلامو بحزن)عفااك سمحيليا ارحيل وتيقيني عمري كنت باغي نأديك..سمحيليا بزااااف

كانو عيونها باقي محلولين بالصدمة اوجهها صفر وفديك اللحظة هي ترفعاات...مشى زكرياء مور ملاح ليها ديك الهضرة لي كانت بحال شي قنبووولة وتفرگعات فوجهها...

لبرد كان تيضرب فيها وهي واقفة قدام باب الرياض بداك لقفطان الخفيف.. مقدراتش باقي تحرك حيت حاسة برجليها جمدو فالأرض... وعينيها تعلقو بالفراغ لي قدامها وكلام زكرياء تيتعاود فدماغهاا وبالضبط ديك الجملة "ولد لحاج لي عرف كيف يهنينا منو وحمااك وماخلاهش يأديك" كانت كافية توضح ليها وتبين ليها بلي هو كان عارف كلشي..عرف بماضيها لي كانت تتخجل منو وتيشكل ليها نقطة سوداء فحياتها..

صوت السعدية لي كانت حداهاا فيقها من ديك السهوة ديالها ضورات وجهها وشافت فيها بهدوء وملامح ممحية..

السعدية:(باستغراب) ختي رحيل واش نتي بخير ؟ من الصباح وأنا كنعيط ليك كلشي كيسول عليك لداخل

رمشات بعويناتها وحركات ليها راسها باه وتخطاتها داخلة لداخل ورجليها حاسة بيهوم مهازينهاش توجهات نيشان لكوزينة جرات كرسي وجلسات فيه وبدات تاتحل فشالها لي لابسة حيت حسات براسها تخنقاات.. تبعاتها السعدية وغير شافتها هاكا تخلعات عليها وخافت لايوقع ليهت بحال ديك لمرة.. عطاتها كاس دلماا وبأيادي مرتاجفة شداتو من عندها رحيل وبللات بيه حلقها لي نشف ليها... عيات ماتسول فيها السعدية وتقول واش حلات فمها وقالت شي حرف.. باركة غير داك الطوفان لي نايض لداخل ديالها مخلي مشاعرها عبارة عند زوبعة.. بقات جالسة تما شوية عاد ناضت وهي تاتحاول تسيطر على مشاعرها فهاد اللحظة وكيف عادتها مبغات تخلي حد يعرف اش بيهاا.. وبتسيمة صفرا دخلات لصالة لي فيها لعيالات وجلسات معاهوم واخا ربي لي عالم على حالتها ومشاعرها دابا ولكن هادي هي رحيل واخا تكون تاتموت يستحيل تبين لي قدامها بشنو تاتحس وهاد الصفة ورتاها من باها.. معرفاتش كيفاش دازت ديك الصدقة بقوة مكانت ساهية...كلشي كان ناشط وتيضحك من غيرها هي لي عيونها كانو تيشوفو فيهوم بسكات وفيما يسولوها مالها تقول ليهوم غير عييت وصااف.. قدرات تخلي كلشي يتيقها وهي هادشي لي بغات.. مشاو كاملين وتامها ولبنات لي ودعاتهوم بعقل مرفوع ومشات معاهوم سيدرا لي لصقات فجدها.. وهي مجرد ماالصالة خوات ناضت بخطوات تقيلة طالعة لجناحها وكلام زكرياء كانت تيتعاود ومعاه تيرجعو گاع لحظات لي هي كانت مستغفلاهوم.. دخلات وزولات درتها وبكل برود جلسات فوق النموسية وهي كاتسترجع لحظاتها معاه من أول لقاء ليهوم فالغابة نهار عتقها ونهار قالتها ليه هو كيفاش خبرها بلي كان عارفها.. وفديك الدقيقة بداو جميع لحظاتهوم تيتكبو عليها بحال الشتا وعاد قدرات أنها تفهم وتستوعب حوايج كانت غافلة عليهوم..

تحل باب الجناح ودخل منو نوح لي كان هاز واحد لبواطة كحلة بين يديه.. سول عليها فلتحت وقالو ليه راه طلعات عليها جا يشوفها ويعطيها كادو بمناسبة افتتاح المحال ديالها... عيونو الزرقين لمحوها جالسة فوق النموسية وعاطياه بالضهر.. عض على شفتو بنابو وقرب جهتها بخطوات بسيطة تاوقف جنبهاا وهي محساتش بيه بقوة مكانت ساهية..

نوح:(حط يديه على كتفها) رحييل

ضورات وجهها جهتو وشافت فيه بشوفة باردة وغريبة خلاتو يستغرب من حالتها..

نوح:(كمش حجبانو وجلس جنبها ناطق بصوت جدي وعيونو كيجوبو ملامح وجهها)رحييل واش نتي بخير؟

رحيل:(بصوت بارد كالصقيع نطقات وهي تاتشوف فقلب عينيه) دابا عاد فهمت نتا علاش قبلتي تزوج بيا واخا سبق ورفضتك (ضحكات بسخرية)هه حيت نتا كنتي عارف ببلان عاصم وعمو معايا...

فداك لوقت لقليل لي جلسات فيه بوحدها استرجعات فيه جُل لحظاتها معااه.. وعقلها يالاه بدا يفهم كلشي.. حسات بغصة فحلقها وقلبها حاسة بيه تهرس من لداخل.. مشاعرها فهاد لحظة كانو على شفى الانهيار وبصمود مزيف قدرات تنطق بكلامها وهي تاتشوف فعينيه... عينيه لي كانو أول حاجة شافتها فيه نهار لغابة ولي تحفرو فدماعها لدرجة أنها رسماتهوم.. شوفاتو القاصحة والحنينة فنفس الوقت مخلينها طيح فبحر غرامو وتغرق..

الشوفة لي كانت تاتشوف فيه كانت غريبة بزاف ماشي شوفتها لي مولف من عويناتها لي كيسلبوه.. ديك الشوفة كانت باردة يحال الثلج... كمش حجبانو وعينو فقلب عينيها وبصوت خشن جااد قال: شكون قالها ليك؟؟

كلامو كانت النقطة لي خلات كااسها لي عمار يفيض.. فشلات أنها تبقا صامدة قدامو حيت أحاسيسها المرهفة فديك اللحظة نهاارو.. ناضت من بلاصتها بزربة تاوقفات قبالتو وبصوت مخنووق قاالت: شكوون قالها لياا ( دموعها نزلو على حنكها) هاادشي لي كيهمك ياااك شكوون قالها لياا وحل ليااا عيني مبعد مااكنت معمية خلاننني نشوف شحااال من حاجة أنا كنت غااافلة عليهاا (بصوت خافت كملات) نهار جيت عندك لبيرو وعاودت ليك على طلاقي نتا كنتي عارف وماقلتي لياا والو بقيتي سااااكت تاتسمع وماقدرتي تنطق بتاشي كلمة حيت داكشي لي قلتو نتا أصلا كنتي عارفو ياااك (حركات راسها) اااه عارفو عليها نتاا قبلتي تزووج بياا حيت بقيت فيك مور ماعرفتي شنو دااااز علياا هادشي علاااش بقيتي مُصر تزوج بياا حيت أنا بقييت فيك واخا جرحتك وهنتك فرجولتك...

تاتهضر ودموعها نازلين كيف الشلال على حناكهاا..مع كل كلمة نطقات بيها وخرجات من فمها كانت تاتحس بقلبها كايتكمش وسط صدرها...

أما نوح فكان تيسمع لكلامها وعينيه مزاحهومش من على وجهها كل دمعة نزلاتها كانت تاتخليه يتزير ويحس بالأعصاب ديال الدنيا والدين راكبينو... وقف وقرب جهتها بخطوة تقيلة وبصوت حنين همس ليهاا:رحييل تهدني وخلينا ندويو بالعقل هاد لهضرة لي قلتي كلها مكيناااش أناا عمري شفقت عليك واخا كنت عااارف گاع داكشي لي وقع معاك (برك هلغى لكلمة) عمري شفقت عليك

رحيل:(دموعها حلفو لاحبسو وبصوت مخنوق) علاش داك نهار ماقلتيهاش ليااا ملي جلست قدااامك وعاودت ليك علااااش ماقلتيش ليااا رحيل أنا كنت عاااارف كلشي (غوتات بانفعال وااااضح)علاااااااش سكتي انوووح ومقلتيهاااش

الخوف ديالو عليها كان واضح من وجهو لي تزير خصوصا فاش شافها كاتغوت.... هو عارف حساسيتها من لموضوع وعارف بلي شحال من مرة انهارت بسبب هاد لموضوع وهادشي مباغيهش يوقع معاهاا دابا وخصوصا أنها فبداية حملها... هي معصبة داباا وحالتها ماشي ديال النقااش عليهاا نطق بصوت هادئ خاتر:رحييل تهدني داباا وهاد لموضوع ندويو فيه من بعد واخاا

رحيل:(الانفعال كان واضح على ملامح وجهها وهي مخرجة عينيها وهرموناتها المخربقين لاعبين دوور فتقلب مزاجها) لاااا غاندويوووو داباااا وليوم غاااانفريو هاد المناااامة ليوم انوح سمعتي ليوووووم

حرك راسو يمين وشمال ومن وجهو باين فيه بدا يتعصب هو مباغيش يتناقش معاها وهي فهاد الحالة الشبه منهارة حيت عارف اخرتها شنو غايوقع هي معصبة دابا إذا هو خصو يكون مبرد ومكالمي.... مايمكنش يكونو بزوج معصبين حيت فديك الساعة النقااااش غايولي عقييم وغايوقعو حوايج هو مباغيهووومش

نوح:(شاف فيها بجدية وبنبرة صارمة) ملي تكالماااي ديك الساعة ندويو ارحييل

تحرك عاطيها بالضهر باغي يخوي البلاصة ونيت يخليها ترتاح وتكالمى خوف عليها وعلى صحة التوينز لي فكرشها ورحيل فديك اللحظة فاش شافتو عاطيها بالضهر تعصباات من برودو وعدم اهتمام وبعصبية هزات واحد لڤاز ديال الزاج ضربات فيه الأرض تاتشخش...

هزات داك الڤاز وضربات بيه فالارض تاتشخشخ وطلقات واحد لغوتة خلاتو يضور بالزربة جهتهاا وعيونو على وجهها لي كان حمر بالأعصاب... فاش شافتو مشى وخلاها تعصبات وعند بالها هو معاطيش لموضوع أهمية وأصلا هي فهاد اللحظة مقدراش تخدم عقلها أولا حيت شي لي سمعات شوكاها وتانيا حيت هرموناتها لمخربقين كانو لاعبين دور مهم... المرا الحاملة فهاد الفترة كاتولي حساسة وأي مشكيل ولاأي تصرف فشكل لي يقدر يديرو الطرف لاخر معاهاا تايخليها تفهمو غالط... رحيل لي بقا فيها هو علاش مصارحهااش ومقالش ليها راه عارف... وفاش هي عاودات ليه نهار لبيرو ونهار صرحاتو بلي هي لي عتق فالغابة ونهار عاودات ليه على علاقتها بجيداء وموتهااا كان بإمكانو يقول ليها شنو عرف... ولكن هو مقالش حيت كان باغي الخطوة تجي منها وأيضا مكانش باغيها تحشم منو ومحتارم قرارها حيت هاداك ماضيهااا...وكون مكانش الموضوع خطير مكانش غايدخل فيه نهائيا ولكن فاش عاود ليه إدريس وعرف بخطورة بدر الدين على حياتهااا وحياة عائلتها ضطر أنه يدخل ويحط ليه حد بحكم يديه واصلة وعندو معارف ماشي بحال إدريس لي مكيعرف حد هنا... من حقها تعصب منو وتفهم الموضوع بطريقتها مكيلومهااش بلعكس متفهمهاا ولكن هي معرفاش هادشي حيت الفكرة لوحيدة لي سيطرات عليها دابا هو أنه تزوج بيها حيت بقات فيه صافي هاادشي لي لصق فدماغهااا وحلف لازااال...

قرب جهتها بخطوات سريعة عاافس على داك الزااج بصباطو ممسوقش ليه وشدها فكتافها ونطق بحنية وخوف باينين فصوتو الخشن:رحييل تهدني عفاااك ماتنسااايش راااكي حاملة والأعصاب مامزيانينش ليك

رحيل:(شدات فشوميز ديالو ونطقات بعتاااب)علاش مصارحتينيش داك النهاار علاش بقيتي ساااكت انوووح علاااش

نوح:(لعب بلسانو ففمو وقال بجدية) حيت عارف الموضوع حساس عندك عليها سكت وخليتك نتي تعاودي ليا كلشي

رحيل:(شمرات بنيفها ودموع وديان فوق حنكها) شكووون قالها ليك نتااا كيفاش عرفتي حيت تاحد مكاان عاارف بداكشي لي دوزت من غير عائلتي و(تفكرات نهار سمعات سميتو من فم رحمة وقالت بهدوء وبرود)هووو قالها ليك يااااك نهااار جاا هنااا قالهاا ليك أنااا سمعت ماماك نهار قااالت سميتو فاش كانت تادوي هي وسناء....

نوح:(عض على حنكو من لداخل كاب فيه عصبيتو وقال بخشونة) كنت باغي نحميك منووو ماشي باااش نشفق عليك حيت عااارفو مرييييض فك*رو وقاااادر يدير كلشي كنت باغي نحميك حيت مبااااغي تاحاجة خايبة توقع ليك ارحييل إينوو (شد وجهها بين يديه وهمس ليها بخشونة) عمررري شفت فيك بشي شوفة دالشفقة واااخا كنت عااارف كلشي عمر شوفتي ليك تزعزعااات

رحيل:(كمشات حجبانها وزولات يديه بنثرة مبعدة عليه وببرود قالت) شكوون قالهاا ليك انوووح وبلاكدووب عااافاااك

نوح:(مسح على وجههو وساط النفس وبهدوء نطق ) سي إدريس وأنا لي بززت عليه يقول ليا اش وقع نهار نتي رفضتيني ومعطيتيني تاشي سبب...

حركااات راسها بلا ودموعها نزلو من جديد فاش سمعات هضرتوو حسات براسها مستحمرينهاا وهي معارفة والو... ضرها خاطرها فاش عرفات بلي باهاا لي قالها ليه...

رحيل:(شافت فيه وقالت بصوت ساخر وهي كاتشير راسها بصبعها) صافي نتااا عارف كلشي عااارف بلي داك الشمااااتة لي تزوجت بيه وعند بالي راه راجل كان أسوء مخلوق شفتو فحياتي ورااااني لوجه الزووين لي كان مخبي بيه سيفتو لي تاتخلع ديب نهش ليااا لحمي بلامايحن فياااا كااااان غايقتل ليااا بابا وماما بدم باااارد غير باش يوصل لشنوو بغاااا...(عضات على شفتها وگاع داكشي لي مقدراتش تقولو شحاال هادي باااحت بيه ليووم وعرات عليه قدامو ) تكرررررفض علياااا ومكفااااهش داكشي لي عيشني فيه باااااعني لداك لمررريض دعمو لي كرهني فحيياااااتي عموووو لي طممع فيااا ومقااالش لاحشووومة وعيييب وهادشي حرااام... عموووو لي كااااان أقبح منووو ولي كااان السباب تاترزيت فصاااحبتي جيداااء (ضربات صدرهاا وغوتات تاصوتها مشى)جيداااااء لي دبحوهاااا لياا بسباااابي قتلوووهاا ليا عيشت سنين فمرررض وخووووف بسباااابهوووم مبقيتش رحييل لي كانعرف (غوتاااات على جهدهاا) بسبااااابهوم درت حواااااايج عمري تخيلت نديرها كنت غانسمح فبنتي كبددددتي بيدي هادوو لحتهاا فالزنقة حيت هااااازة دمهوووم وكلشي بسبااابهوم واخااا ماتو باااقي سيرتهوووم تاتمرض لياااا صحتي الله يااااخد فيهوووم الحق

قرب جهتها نوح بزربة وغواتها وهضرتها لي نطقات بيها من فمهاا هرساتو من لداخل سبق وسمع هادشي من عند إدريس ورنيم ولكن من عندها كان غيير حيت الحرقة لي فصوتها لخصات ليه كلشي... عنقهاا بالجهد وزير عليها فحظنو وهي فديك اللحظة قواهاا تلاشاات وغمضات عينيها مغيبة بين يديه...

كان غادي جاي فالكولوار دلكلينيك بعقل مشطوون وقلب خايف.. كيفاش ترخات بين يديه وغيبات أو وجهها لي صفاار خلعو.. داك الانهيار لي وقع ليها هو لي كان خايف منو ملي بداو الهضرة.. داكشي علاش كان باغي ينساحب ويخليهاا تاتبرد ويهضر معاها بالخاطر ويعاود ليها كلشي.. ولكن تمشي الرياح بما لاتشتهي السفن.. باقي لدابا صوتها وهي تتعاود ليه شنو طرا بين ودنيه كيفاش هضرات بحرقة مجرد ماتفكرات داك الماضي لي مكانش ساهل عليهاا..رجع شاف فساعتو مرة خرى وزفر النفس بعصبية.. ساعة وهوما مدخلينهاا وتاحد ماعطاه راس لخيط وهادشي غير مزاد خلاه يتوثر ويتعصب.. خايف عليها وخايف تاعلى لتوينز لي فكرشهاا.. صونى تلفونو وكان عارف بلي مو هاديك بحكم فاش نزل رحيل وهي غايبة بين يديه شافتو رحمة وسناء تاهي.. ماعندو خاطر يهضر دابا ماحدو ماطمنش عليها.. مسح على وجهو متكي على لحييط كايتسنى خبارها تابانت ليه طبيبة لي دوزات عندها رحيل لحمل عندها كابيني ديالها خاصة وفنفس الوقت خدامة فهاد الكلينيك..

طبيبة:(نطقات بجدية)تفضل معايا لبيرو ديالي موسيو السليماني

سبقاتو وهو وراها وغير دخلو لبيرو وهي تشير بيديها بلباقة لكراسى لي قدامو تاجلسو وهي تجمع يديها فوق البيرو ونطقات بعملية:لمرا ففترة الحمل كاتكون حساسة بزاف ونفسيتها دغيا كتزعزع وأي سوء تفاهم يطرا ليها مع شي حد كيخليها تقلق وتعصب عليها حنا تانصحو المرا الحامل أنها تبعد على أي حاجة تستريسيها سوى فالخدمة سوى لمشاكيل ديال الدار وخصوصا فبداية الحمل ديالها حيت تيكون خطورة على الجنين وفبعض الحلاات الاماقلناش فالأغلب تيوقع معاها إجهاض وتفقد الجنين ديالها ومدام رحيل وقع معاها انهيار عصبي لي حنا عارفين لخطورة ديالو عليها وعلى الأجنة ولولا لطف الله كان ممكن يوقع معاها كورطاج خصوصا هي فأسبوعها السابع والأجنة باقي صغاار بزااف ومتابتينش..

نوح:(قاطعها بجدية وصوت خشن) وهي كيف بقات دابا؟؟

طبيبة:(قدات نضاضرها)هي دابا مزيان وحنا عطيناها كالمون على حساب حالتهاا ولكن خصها من هنا لقدام ترد لبال كثر بصحتها ولحملهاا وفهاد لفترة بلخصوص ممنوع عليها لمشي بزاف و طلوع والنزول فالدروج كيف قلت ليكوم قبل من الأفضل حاليا تبقا غير فبيتها تايتحسن وضعها وأيضا الأجنة حيت كيف قلت هي فبداية حملها وأي انهيار اخر يقدر يوصلنا لشي حوايج حنا مباغينهوش...لدلك هي خصها الراحة النفسية والجسدية وخصوصا أنه سبق قالت بلي عندها مشكيل الأعصاب فلمعدة وكانت كاطريطا عليهوم هادشي علاش نفسيتها ماخصش تأثر من هنا لقدام وترتااح تاتكمل شهورة دلحمااالة وتولد إن شاء الله..وحتي الماكلة ديالها خص يكون فيها نضام وتكون صحية حيت تاهي كاتلعب دور فنمو الأجنة وأيضا فالصحة دلمامون..

نوح:(حرك راسو وقال بهدوء)أنا لي كيهمني دابا هو صحتها وصحة لي فكرشها

طبيبة:(تبسمات ليه)الاتبعتي هاد النصائح إن شاء الله كلشي غايكون هو هداك..

كمل معاها الكلام وغير سالى ناض غادي عند رحيل لي كانت ناعسة فالشومبر.. حل لباب ودخل بهدوء وعينو متلهفة لشوفتهاا..بانت ليه ناعسة فوق البياص الطبي ومغطية بإزار بيض ودايرين ليها شوكة دسيروم فيديهاا.. غير وصل لعندها وهو يتحدر جهتها وباسها فجبهتهاا مدة طويلة عاد بعد كيشوف فوجهها وديك الصفورية لي فيه.. يديه الخشنة كاتلمس حناكهاا الرطبين ولي كانو باردين... تلفون لي كيصوني فجيبو درونجااه ومخلاهش ياخد راحتو معاهاا... كان مو هي لي صونات تاني..

نوح:(بصوت هادئ مبحوح جاوبها)وي يمّا

رحمة:(بلهفة) الله ياولدي علاش مكتجاوبش شطنتيني عليك كيف بقا رحيل وشنو وقع معاهاا؟

نوح:(عينو على رحيل لي ناعسة محساش بلي ضاير بيها) ماتشطنيش بالك ايمّا ملي نجي وندويو واخا

رحمة:(بتفهم)واخا اولدي واش غاتجيو دابا

نوح:لا تال غدا

رحمة:تبغي نجيو أنا وسناء ؟

نوح:مكاينش لاااش ايمّا

رحمة:مهم باشما كان عاود عييط ليا واخا

قطع معاهاا ودوز نمرة إدريس باش يعلمو بلي كااين وعطاه لادريسة ديال لكلينيك...

**

عند إدريس لي غير ساق لخبااار بلي رحيل فالكلينيك قلبو قفز بخوف..يالاه خلاها صحة سلام اش طرا معاهاا؟؟ وماشي غير هو تامن تانيرت والبقية كلهوم تشطنو وخافو عليها ولكن حاولو ماأمكن مايبينوش الخوف ديالهوم قدام سيدرا باش ماتخلعش على ماماها.. كلهوم مشاو يشوفو رحيل من غير رنيم وغزلان لي خلاوهوم مع سيدرا باش يردو ليها لبال..

فالكوزينة جالسة غزلان بعقل مشطون وكاتسنى فمحمد طه يعيط ليها ويطمنها على رحيل.. حاطة يديها على حنكها واليد الثانية كاضور بيها التلفون تاسمعات صوت سيدرا لي كانت جايا تاتجر فبانطوفة جدها كبر منها..

سيدرا:غيزووو فين مشى مودي؟؟

غزلان:(بتبسيمة خفيفة)مشى هو وريان يتسخرو شي حاجة

سيدرا:(قربات جهتها تاتقيس فشعر غزلان) وبّا ديدي وتانيرت إينو تاهوما مشاو يتسخروو؟

غزلان:لا هوما مشاو عند أسماء وإسلام غايبقاو عندهوم ليوم

سيدرا:(خنزرات وقالت بتدمر طفولي)علاش مداونيش معاهوم تاأنا بغيت نمشي عند سومة وإسلامي

غير بلاصا إدريس طوموبيلتو وخرج بزربة وموراه تانيرت داخلين لكلينيك وكان معاهوم تاريان ومحمد طه..وصلو قدام لباب ومع نوح سبق ونعث ليهوم الشومبر ديالها فين جاات.. دق إدريس عاد دخل ونوح نااض من حدا رحيل لي باقي ناعسة بسباب لكالمون.. قربو جهتها بلهفة وعيون خايفة كل واحد تيسول اش طاري معاهاا وشنو واقع ليهاا.. هاد النعسة ديالها فلكلينيك فكراتهوم فلماضي الأسود لي دوزات فالسبيطار بسبب الانهيارات لي كيجيوها.. مبعد ماطمنو عليها خرج إدريس هو ونوح لبرا مخلين لبقية معاهاا

إدريس:شنو وقع معاهاا ؟

نوح:(شاف فيه بجدية) رحييل ساقت الخبار بلي أنا كنت عارف ببلان بدر الدين

إدريس:(شاف فيه بصدمة)كيفاااش شكووون گالها ليها ياك أنا ونتا لي كنا عارفين ورنيم وبطبيعة لحال رنيم مغاديرهاااش

نوح:(قلب وجهو لجهة لخرا ونطق وهو بارك على سنيه)ماعرفتش شكوون ولكن لي دارها مغانحننش فيه

إدريس:(تنهد بتعب)واخا داك لحيوووان ماات باقي مشاكيلو حاااضرين

نوح:(بهدوء وجدية) لي مهم دابا هو صحة رحييل وصحة لي فكرشها (تبسم بحنية وعيون لامعة وهو كيشوف فوجه إدريس لمصدوم) وجد راسك اسي إدريس حيت غاتولي جد مرة خرى

إدريس:(تبسيمة بانت على وجهو لي مزين بتكميشات الزمان وقااال بفرحة) حمدتك وشكرتك ياسيدي ربي حيت عيشتيني هاد الفرحة

نوح:(حط يديه على كتف إدريس) راه خصك توجد راسك من داباا تربي حفااادك ولاحفيداتك بزوج

إدريس:(مافهمش لمقصد ديالو وبتبسيمة خفيفة)هههه سيدرا مولفها هههه نشوفو الحفيد الجديد

نوح:هه ماشي غير حفيد جديد زوووج حفااايد رحييل حاملة بتواام

هنا إدريس تصدم بصح وبانت فمعالم وجهو لي كيشوف فنوح بجمود وسرعان ماتقلب الجمود لفرحة وتبسيمة وهو كيعنق فنوح عنااق رجووولي أبوي.. فرحاان لخبار لي سمع وفرحتو مايعطيها لحد.. هادو لحفايد ومعزتهوم من معزة لولاد سبق وعندو حفيدة لولة لمفششة ودابا جايين حفايد خريين والعائلة ديالو غاتكبر ديك لعائلة لي تحرم منها فصغرو مور موت واليديه هاهي دابااا كبراات وبناتو تزوجووو وتاولدو وعقباال مايزوج ولدو لي بقااا ويفرح بيه تاهو..

ساقت تانيرت تاهي لخبار وتاهي فرحتها ترجماتها دموووع بقوة الفرحة لي حسات بيهاا.. أما ريان ومحمد طه هادوك خلاص ولفو يكونو خواااال ولكن تحمسو حيت غايجيو توينز لي باقي معارفين جنسهوم واش بنات بزوج ولا ولاد ولابنت أو ولد...

بعد محمد طه وجبد تلفونو دوز لخط لغزلان لي كانت تاطيب لعشا لسيدرا باش تنعسها وترتااح.. غير شافت النمرة جاوبات بزربة وقالت:وي محمد رحيل كيف بقات

محمد طه:مزيان راه بخير دابا غاتبقا هاد ليلة هنا وغدا غاتخرج

غزلان:اوووف لحمدلله ولكن شنو وقع ليهاا ياك كانت بخيرر

محمد طه:تانجي ونهضرو سيدرا معارفة والو ياك ماقلتو شي حاجة قدامها

غزلان:لا قلت ليها نتا وريان مشيتو تسخرو وخالتي وعمي مشاو عند أسماء

محمد طه:مزيان حنا شوية ونجيوو

غزلان:صافي واخاا أنا نيت تانوجد لعشاا

محمد طه:واخا (نطق بهدوء واهتمام) محتاجة شي حاجة نجيبها ليك؟؟

غزلان:(بدات تاضور عينيها)احم لا غير اجي

محمد طه:باي

قطعات وهي كلها حمرة وعقلها خدام عوتاني.. حاسة براسها مخربقة بعض لمرات تاتحس بيه كيهتم ليها سوى تصرفاتو سوى كلامو معاها وبعض المرات تاتحس بيه كيعاملها ببرود غريب معرفات ماتشد فيه...عقلها فكر فواحد الحوار داز بيناتهوم أول ليلة ليهوم بزوج...

🔙🔙

فاقت غزلان هي لولة وعينيها جات على وجه محمد طه لي كان ناعس وحال فموو باين فيه عياان.. بقات تاتفكر فشنو وقع بناتهوم وتعاملو معاها فلفراش وتبسيمة خفيفة على وجهها.. ناضت بشوية مغطية داتها بليزار وضورات وجهها تاتقلب على لبنوار بان ليها مليوح لهيه وحيت ناعس ناضت بزربة تاتجري ولبساتو ومع ضارت لقاتو كيحنزز فيهاا بدوك لعوينات لخضرين لمبوقين بالنعااس.. مرگاات واخا سبق وعاشرها ولكن تمشى قدامو عريانة ويبرع عينيه حشمات..

غزلان:احم صباح الخير

محمد طه:(بصوت تقيل)صباح لخير

هزات لبرودويات ديالها ومشات نيشان لحمام دخلات وسدات لباب وهي تاتنهج..زولات داك لبنوار ومشات دوشات وتوضاات ولاحت عليها بنوار دلحمام عاد خرجات عندو لقاتو كيضور بلكالصو والخير ديالو كيبااان خلاها تسرط ريقهاا وتهبط راسها ومشات تاتجبد حوايجها وهو دخل يدوش ويتوضى.. لبسات عليها بزربة ونقات تما ماخلات تاحاجة..خرج لابس حوايجو وصلى عاد طلبو لفطور وفاش كانو تيفطرو تفكرات غزلان واحد لحاجة مهمة ونطقات بصوت هادئ:محمد

محمد طه:(شاف فيها بلامايدوي)

غزلان:كنت باغا ندوي معاك على واحد لحاجة احم نتا عارف بلي أنا باقي تانقرا فلفااك وإن شاء الله حلمي نشد لاليسونس ونكمل لماستر وعلاش لاندير الدكتورة وزيد غانخدم مع رحيل فلمحاال ونتا لبارح قلتي هاد الزواج غايكون حقيقي وأنا فكرت وقلت علاش مانمشيش عند طبيبة وتعطيني لبيلول ونبقا نشربو فهاد الفترة تانقاد أموري ونرصيهاا وديك الساعة نحبسو؟؟

كانت تاتنطق بديك لهضرة وقلبها كيضرب بالجهد معرفاش هو كيفاش غايتعامل مع لموضوع وكيف غايفهم شنو بغات تقصد واش غايتقبلو ولا لا... أما هي فهاد لموضوع كان مهم عندها بحكم هوما يالاه تزوجو دابا وزيد عندها واحد ضغوطات فالقرايا ولخدمة فمغاتجيش وتحمل وتزيد واحد لمسؤولية وخصوصا وهوما يالاه قالو بسم الله فزواجهوم.. شافت فيه لقاتو ساكت تيشوف فيهاا ومركز الشوفة وقالت مع دماغها دابا ينوض يقلب عليا الطبلة..

محمد طه:واخا ملي نرجعو نديك عند طبيبة ولكن (بجدية) ماتولفيهش عوتاااني غتاخديه غير فالبدية وغير تقادي أمورك غاتحيديه

غزلان:(تنهدات براحة)وي بطبيبعة لحال

تحبسات لهضرة تما وكملو فطورهوم فسكووون وهدوء..

🔜🔜

من زهرها ماتعكسش ومشى معاها لطبيبة دوزات وعطاتها لبيلول.. تنهدات ورجعات تتكمل لعشا وغير سالات دات حق سيدرا لصالة عطاتها تاكل وجلسات جنب رنيم كيوشوشو بيناتهوم وسيدرا كل مرة تشوف فيهوم مكمشة حجبانها وهوما يسكتو وترجع تاكل وتشوف.. لبرهوشة كاتلقطها فالسمااا ومكتفلت والو.. غير تعشات بقات تاتفرج تانعسات وهزاتها رنيم منعساهاا فبيت معاهاا...

---

فالكلينيك علمهوم نوح بلي سيدرا خصها ماتسيقش خباار تايقولها ليها هو ورحيل وتاهوما تفهمو حيت سبق وشافو ردة فعلها على حمل تانيرت... ريان ومحمد طه شدو طريق لدار وتانيرت وإدريس نزلو لكافي لتحت مخلين نوح مع رحيل...

جالس جنبها وشاد يديها بين يديه وعينو على وجهها كيف ناعسة مرتاحة.. معارفش كيفاش غاتصرف معاه ملي تفيق ولكن لي عارف هو خصو ضروري يجبد منها شكون قالها ليهاا وشكون كان عارف من غيرهوم.. مد يديه لكريشتها تلمسها بحنية وتحدر باسهاا فيها ونطق بهمس مخاطب ولادو:لعسيلات ديال باهوم ماتعدبوووش ليا النحيلة ديالي

رجع شاف فيها وقرب جهة شفايفها طابع قبلة عليها مساخيش بيهاا ولخلعة لي تخلع عليها عمرو ينساهاا..

طلعات الشيمشة والجو ليوم كان مشمش وزوين.. بدات رحيل تاتحل عينيها بتعب وداتها كيف ديما حاسة بيها كاضرهاا.. حسات بشي حاجة سخونة شادة يديها ومع حلاتهوم وشافت جهة يديها بان ليها نوح لي كان مبسم ليها بحنية.. كمشات حجبانها وزولات يديها من بين يديه فحركة كانت مفروشة وهو لاحظها وماخفاتش عليه ومع دلك ميك حيت عارف الوضع وكلام طبيبة لي قالت وبالنسبة ليه أهم حاجة هي صحتها وراااحتهاا..

نوح:(بهدوء وحنية)الفتنة ديالي شوية داباا؟؟

رحيل:(قالبة وجهها لجهة لخرى وقالت ببرود) غاتكون عارف بلي هادشي دوزتو شحال من مرة أو ولفتو

فهم هضرتهاا مزيان وشنو قصدات بيها ونغس الشي دار ميك وقال بهدوء:طبيية قاالت بلي خصك الراحة (تحدر شد ليها وجهها بين يديه وقال بهمس خشن)شنو بان ليك نبدلو لجوو أنا وياك ونمشيو لفيرمة

رحيل:(حطات يديها فوق يديه وزولاتهوم وقالت بهدوء)بغيت بابا

نوح:سي إدريس راه برا أنا نعيط ليه

ناض هو مكمش حجبانو وحل لباب لقاهوم جالسين برا بزوج علمهوم بلي فاقت ودخلو يطمنو عليهاا وهي تاتصرف بواحد لبرود غرييب.. بقات غير هي وإدريس فوسط الشومبر وإدريس كان عارف هي اش غاتقول..

رحيل:(بعتاب)علاش ابابا خبيتي علياا بلي نتا قلتي لنوح كلشي ؟

إدريس:(بهدوء وحنية)أنا درت هادشي لمصلاحتك ابنتي

رحيل:(دموعها نازلين)مصلاحتي كنتي تعلمني وتقولها ليا تصارحني بلي نتا قلتي ليه كلشي ابابا ماشي نبقا فدار غفلووون واش عارف بااش كانحس دابا (حركات راسها ويديها تاتمسح دموعها) كنت باغا أنا نقولها ليه يعرف مني أناا كنت عواااالة نهااار لي نهضر يسمع مني أناا ابابا

إدريس:(حرك راسو وقرب جهتها) ولد لحاج نهار رفضتيه جاا عندي وطلب مني نعاود ليه حيت كاان شاريك ابنتي وباااغيك وهو السباب تاقطعناا ديك السوسة من الجدر وكون ماهووو كون كنتي باااقي لدابااا كاتعاااني ابنتي (باسها فجبهتهاا ونطق بحنية) ولد لحاج مكانش باغي نقول ليك والو حيت مكانش باغيك تقلقي منو وسكت حيت كان محتااارم الرغبة ديااالك ابنتي سكت حيت عارف نفسك حااارة وحيت بااغيك ليه ومبغااش يخسرك عليها بقا ساااكت وكان تيتسنى منك نتي تقوليها ليه

رحيل:(عضات على شفتهاا تادماتهاا) كون علمتوني كان غايكووون خير نسمعها من لبراني (شافت فيه بعتاااب)كلشي عااارف يااك بوحدي لي مكنتش عارفة وسطكوم

إدريس:(حرك راسو بلا)تاحد ماعرف من غيري أنا ولد لحاج ورنيم ابنتي (بتساؤل)شكون هاد البراني لي قالها ليك

رحيل:(ضحكات بسخرية)ههه تاهي عارفة وسكتات هه (شمرات نيفها) مكيهمش شكووون ابابا مكيهمش

رجعات راسها لور ساكتة وإدريس تنهد وتاهو سكت..عارف بلي واخا دابا مقلقة غير غاتجلس مع راسها وتبرد غاتعرف بلي هوما شافو مصلاحتها وغاتفهمهوم.. جات الطبيبة شافت حالتها وعطاتها نصائح وهضرات معاهاا شوية عاد مشات مور ماعطاتها الأوكي تخرج.. جاب ليها نوح حوايج دافيين وعاوناتها تانيرت تالبساات عاد خرجات معاهاا..

نوح:(قرب جهتها وقال بهدوء)فين باغغ نمشيو لرياض ولالفيرمة؟

رحيل:(شافت فنوح ونطقات ببرود)مكاين لاش أنا غانمشي مع بابا لدارنا..

هادشي لي مكانش هو باغي ومكانش ضارب ليه حساب... طريقة باش هضرات وقالت ليه شنو بغات كانت باردة وكانت باينة فيها واخدة قرار وغير علماتو بيه.. قرب جهتها كتر تاولاو أنفاسو كيضربو فوجهها وعينو كيدققو فملامحهاا وكيفاش كانت باينة فيها راه مدرونجية من هاد لوقفة عكس شحال هادي فاش تيقرب منها كاتبان فعينيها لفرحة والراحة..

نوح:(بصوت تقيل وكالم نطق)رحييل من الأحسن نمشيو لفيرمة باش نتي تلقااي راحتك كثر

رحيل:(كمشات حجبانها وشافت فيه)وأنا قلت ليك غانمشي لدارنا واش مامنحقيش؟؟

نوح:(عض على حنكو من لداخل ونطق بهدوء)من حقك (حرك راسو) من حقك لابغيتي تبقااي عندهوم هاد النهار وترتاحي وغدا نجي نجيبك

رحيل:(تنهدات بتعب)أنا باغا نبقا فدارنا واحد لفترة

نوح:(هز عاجبو وبانت فيه بلي معجبو حال) اشمن فترة؟ (بجدية كمل) عندك نهار غادوزيه معاهوم وغدا غانجي نديك لفيرمة لي كالم وغاتلقاي فيها راحتك

كمشات رحيل حجبانها ومجاوباتوش حيت مافيها مايجاوب وهي راه لي فبالها غاديرو.. تخطاتو مكملة طريقها وهو دوز لسانو على سنانو وباين فيه تعصب وغير شاد راسو بزز على قبلها وقبل نفسيتهاا وصحتها.. خرجو لبرا فين كانت تانيرت وإدريس كايتستاو جنب الطوموبيل دنوح.. ركبات رحيل وتانيرت لور وشد نوح بلاصتو فسكاات.. غادي وكيخمم فهاد لمشكيل لي خرج ليه من الجنب ولمشكيل لكبير هو باقي معارفش شكون هادا لي دوى وقالها ليها.. هز عينو فالمرايا بانت ليه متكية راسها على كتف تانيرت وكاتشوف بهدوء جهة الزنقة.. مسافة طريق وكانو وصلو لدار إدريس ونزلات تانيرت شادة فيد رحيل لي دخلات بدون ماتهضر مع نوح ولاتشوف فيه.. فهاد لحظة بغات تبقا بوحدها وتفكر فهادشي لي عرفاتو ولي خربقهاا وزعزعها من لداخل عليها محتاجة واحد لهدنة تصفي فيها دماغهااا... مع دخلة جات سيدرا تاتجري وعنقات رحيل لي تبسمات ليها بتعب وبدات تادوز يديها على شعرهاا

سيدرا:(بحماس)مامي توحشتك بزاااف

رحيل:(بحنية)تاأنا امامي

إدريس:سيدرا خلي ماماك طلع لبيت ترتاح راه مريضة شوية

سيدرا:(شافت فيها بخوف وعيونها عمرو دموع)مالكي مامي

رحيل:ماتخافيش امامي غير راسي تيضرني شوية يالاه نطلعو لفوق

شدات يديها وطلعات هي وياها وإدريس أصر على نوح يدخل واخا كان باغي يمشي لرياض ساعة إدريس حلف عليه باش يبقا ويتغدا معاهوم..

فبيت رحيل لي بدلات عليها وزولات الفولار ديالها باش تنفس كثر..واخا لبرد هي حاسة براسها صهدات ولبسات غير بيجامة خفيفة من هادوك لي باقا مخلية فبيتهاا وأول حاجة دارتها هي توضاات باش تصلي...

رحيل:(شافت فسيدرا لي جالسة فوق النموسية) سيدرا سيري جيبي ليا لماا نشرب

سيدرا:واخا مامي

مشات سيدرا ورحيل بدات صلاتها وهي مخشعة وكل ركعة تاتاخد فيها وقتهاا.. صلات ودعاات عاد ناضت تاتجمع صلايتها ومع غاضور غايبان ليها واقف جنب لباب متكي عليه وكيشوف فيها بهدوء.. طوات الصلاية وحطاتها فبلاصتهاا وبدات تاتزول فالإسدال تابقات فالبيجامة وقربات جهة النموسية وجلسات... قرب تاهو وجلس حداهاا وعينو كيتفحصو كل إنش منها بشوق...

نوح:(بصوت خشن) خصنا نقولو لسيدرا على توينز

رحيل:(بهدوء) كنت أصلا ناوية نقولها ليها

نوح:(هز حاجبو) نقولوهاا ليهاا ارحييل

رحيل:(تأففات) صافي هي هاديك تت

دخلات سيدرا وقطعات عليهوم كلامهوم وهي جايبة قريعة دلماا لرحيل..عيونها المبطنين كانو تايضورو بين نوح وماماها وهي حاسة بلي شي حاجة كاينة واخا هي باقي صغيرة ولكن مكتخفاش عليها لحاجة وكتنتابه وترد لبال.. شدات من عندها رحيل لقرعة وشربات منهاا ونوح شد سيدرا أو وقفها قدامو وهي بقات تاتشوف فيه بهدوء..

نوح:(بهدوء وبصوت حنين) تاتبيرت إينو أنا وماماك جايبين ليك واحد لكادو زوين غايعجبك

سيدرا:(حلات عينيها ونطقات بفرحة) بصح نشووفوو؟

نوح:(شاف فرحيل لي تاهي كانت تاتشوف وقال بتبسيمة خفيفة) لكادو مغانعطيوهش ليك دابا حيت غايخص يعطيوه ليك هوما

سيدرا:(دلات شنيفاتها)هااء وشكون واااش بّاديدي وتانيرت إينو؟؟

نوح:(حرك راسو بلا)لا (شد يد سيدرا وكحزهاا جهة رحيل وحطها ليها فوق كرشهاا ونطق بصوت أجش) مومويات لي هنا هوما لي غايعطيوها ليك

شافت فيه سيدرا ورجعات شافت فرحيل لي كانت مبسمة غير بزز وخايفة من ردة فعلها كيف غاتكون حيت سبق أو وقعات نفس الحاجة مع تانيرت.. ومن غير هادشي سيدرا مولفة مهاا ليها بوحدهاا.. وشي لي خافت منو رحيل هو لي وقع فاش حسات بسيدرا نثرات يديها لي على كرشها ولي كان شادها ليها نوح ونطقات وهي شادة لبكية بزز: لا مبغيتش مامي ديالي بوحديتي

نوح:(كان حاط هاد الاحتمال فبالو وبلخاطر شد سيدرا وقربها جهتو) علاش مبغيتهومش اسيدرا؟

سيدرا:(حركات كتافها بعدم مبالاة) مابغيتهومش أنا

نوح:(غادي معاها على قد عقلها) مابغيتيش مع من تلعبي فاش يجيو ويبقاو يقولو ليك ختيتو الكبيرة ويبغيوك وتبقاي تنعسيهوم حداك وتعطيهوم لماكلة وتفرجي معاهوم فالرسووم ونبقا نديكوم بتلاتة تلعبو

سيدرا:(شافت فرحيل وقالت بانزعاج طفولي)لا مابغيتش

شحال من وليد صفير تايلقاو معاه واليديه صعوبة باش يخبروه بلي غايولي أخ ولاأخت.. مكيبغيش يتقبل فكرة أنه غايجي واحد الطرف آخر وغايشاركو فواليديه حيت من نهار حل عينو وسطهوم وهو لوحيد ليهوم وفكرة اخ جديد مكيبغيوهاش حيت عند بالهوم غاياخد ليه بلاصتو...واليديه...الحب... والاهتمام...الدلع... وهنا فين كتولد الغيرة بين الخوت وتيولي لحقد من الصغر... ولكن كاين واحد نوع من الاباء لي واخا كيواجهو صعوبة فلبداية الاأنه كيحاولو ماأمكن يصلحو الوضع ويخليو داك لوليد ولالبنيتة يتقبل داك لبيبي لي غايجي... وهنا كيجي دور الواليدين لي مخصش يديرو تمييز بين ولادهوم... فحالة سيدرا من نهار وعاات وبدات تكبر وهي عايشة مع رحيل وعرفاهاا مها ديالها بوحدها مكيشاركهااش فيها تاحد.. وهي مباغاش لي يجي ياخد يلاصتها عند مها وعند العائلة ككل وسبق جربو هاد لمعاناة معاها فحمل تانيرت.. كان نوح عارف هادي غاتكون ردة فعلهاا وطبيعي جدا وعارف بلي واخا تعياا ماتقول مابغيتوش نهار تشوفهوم غاتبغيهوم حيت سيدرا ماشي محقادة وغير لاعرفتي كيف ترضيها غاتجي وتعطيها لخاطر فكون على يقين أنك غاتكسبهاا.. حيت هي من صغرها شخصية اجتماعية تادير بلاصتها عند لواحد.. كيف طرا ليه هو نهار لول شافها وبكلامها ولخاطر لي عطاها وسمع ليها كسبها وهي هادشي لي باغاا..

نوح:(هزها وجلسها فوق ركبتو ونطق بهدوء) الانتي مبغيتيهومش هوما غايتقلقو منك وغايبقا فيهوم لحال بزااف وتاماماك وأنا غايبقا فينا لحاال

بدات تاتشوف فيه وتشوف فرحيل بحزن ونطقات بخفوت:غايولي عزيز عليكوم كثر مني

نوح:(كمش حجبانو) وشكون قال ليك غايولي عزيز علينا كثر منك (شاف فرحيل ونطق) غاتولي تبغيه كثر من سيدرا؟؟

رحيل:(شدات يد سيدرا وباستها) لا امامي كولكوم غاتوليو عزيزين عليا وتاهوما غايوليو عزيزين عليك وغاتبغيهوم كثر مني أناا (حطات رحيل يديها على كرشها وقالت بحنية)هاهوما تيسمعوك وتيقولو ليك ختيتو نتي عزيزة علينا يزااااف

سيدرا:(بقات تاضور عينيها وتاتحك يديها وقالت وعينيها على رحيل)مامي واش هو الاتقلق مني غايمشي بحال مومو ديال تانيرت إينو ؟؟

عقلها الصغير بقا عاقل على نهار علماتها مها بلي البيبي دتانيرت مشى عند الله وهي فسرات الأمر على أنه حيت مبغاتوش عليها مشى وتقلق منهاا..

رحيل:(لمسات حنكها بحنية) هوما باغينك نتي باغياهوم؟

سيدرا:(حركات راسها باه)اه ولكن مامي ماتبغيهومش كثر مني وتانتا ماي بلو آيز

نوح:(تبسم ليها وباسها فحنكها)غير تهنااي غاتبقاي نتي لمفششة ديالناا

تبسمات سيدرا وهادشي هي لي باغا تسمعو من لول.. تعرف راسها هي لي عزيزة عندهوم وماياخد ليها تاحد بلاصتهاا وهوما متأكدين أن نهار يجيو التوينز غاتولي هي تعطيهوم حاجتها وتبغيهوم وتفششهوم وغايعجبها لحال حيت غاتلقى مع من توانس..

رحيل:(حسات بهم وانزاح فوق كتافها)هانتي دابا مومويات فرحانين

سيدرا:(عاد انتبهات وقالن بتساؤل) مومويات علاش مامي مومويات واش بزااف

رحيل:(ضحكات)كاين زوج مومويات هناا

سيدرا:(بتفاجأ وببرائة)هاااء وعلاش زوووج مامي ياك تانيرت إينو كان عندها غير مومو واحيد؟؟

نوح:اوا الالة ماماك عندها زوج فكرشهاا

سيدرا:(نزلات من عند نوح وحطات يديها على كرش رحيل وقالت بتساؤل)مامي هوما تيسمعوني

رحيل:اه وكيحسو بيك

سيدرا:وقتاش غادي يجيو ويجيبو ليا كادو؟

نوح:(ضحك بتقالة)ههه لكادو هو لي شاغل بالك اتاتبيرت إينو يااك

حركات ليه راسها باه تاضحك بمكر طفولي وفنفس لوقت يديها كاتحسس كرش ماماهاا.. دوزو وقيتة قصيرة ولكن كانت زوينة وكلها مشاعر ودفئ مسخاش بيها نوح.. سمعو دقان فلباب ومشات سيدرا تاتجري حلات لقات غزلان لي تبسمات بحرج:احم لغدا واجد نزلو تفداو

رحيل:شنو كاين لغدا؟

غزلان:شلاظة ودجاج بدغميرة

حركات رحيل راسها وهي مكمشة حجبانهاا ونزلات هي لولة وموراها نوح دخلو لصالة فين كانو مالين دار مجموعين.. ورحيل مبغاتش تفك ديك التكميشة تحطات شلاظة وكلات فيها داكشي لي قدات عليه وغير تحط طبسيل دجاج وهي تخسر سيفتها وحطات يديها على فمهاا نايضة بزربة ترد داكشي لي كلاات... ريحة لمرقة روعاتها وقلبات معدتهاا.. حط نوح سغڤيت وناض تبعهاا لحمام لقاهاا تاترد فلشاس وقف حداهاا شادهاا ومخليها ترد براحتهاا تاحسات بالسخفة.. عاونها تاوصلات قدام لاڤابو ومد يديه تايغسل ليها وجهها وعطاها لماا بيديه تاشللات فمها ومسح ليها وهي تاتسوط النفس..

نوح:مزيان داباا

رحيل:(كمشات حجبانها)همم غانطلع لفوق

يالاه رمات لخطوة لولة وهي تحس براسها مهزوزة بين يديه مطلعها فالدروج وهي ساكتة مقالت والو.. وصلها لبيتها وحطها فوق النموسية ترتاح عاد تقاد فوقفتو وقال بهدوء:مشهية شي حاجة نجيبها ليك

رحيل:تت لا

نوح:(تحدر جهتها وقاس حنكهاا ونطق بصوت دافئ)تمشي معايا

رحيل:(حطات يديها على نيفها وقالت بانزعاج)ييع ريحتك خانزة بحال زفورية الدجاج بعد لهيه

هز حاجبو باستغراب وتحدر كيشم ريحتو جاتو عادي ريحة برفااان رجولي قاصح..

عند سناء لي كانت واقفة قدام نموسيتها تاتشوف فداك لعرام دلحوايج لي لايحة تم ومن صباح تقيس هادي وتشوف هادي ولحد الآن باقي ماقررات اش غاتلبس.. زفرات النفس ومشات تاتقلب تاني فالبلاكار وشي لباسي عندها باقي بتيكي ماقنعوهااش.

سناء:(بتدمر)اوووف خصني ندير شوبينغ ونشري لحوايج حيت مبقاوش عندي

لي سمعها يقول السيدة مسكين ماعندها ماتلبس وهي لبلاكار تيغوت بلحوايح... وبعد عناء طويل لقات وأخيراً شنو بغات.. لبسات واحد الكومبين فالخضر غامق كلاص مع مونطو نواغ وبوط كحل وشعرها طلقاتو وضربات واحد تكحيلة لعينين وعكر فالحمر باااااين من بعيد كيشع.. خرجات وهي تاتقرقب بطالون دياال البوط وهازة فيديها بوشيط وريحتها فيما دازت تاتخليهاا وراهاا.. نزلات لتحت لقات رحمة جالسة تاتشرب قهوتهاا وشافت فيها بنظرات تساؤل وقبل ماتنطق سبقاتهاا لخرى..

سناء:خارجة ندور شوية مليت من لجلسة هنا بوحدي

رحمة:وهاد الزوااق كولو غير لضوران؟؟

سناء:اشمن زواق نتي عرفاااني مانقدرش نخرج لاماكنتش قانعة برااسي زعمة راكي بنت لقااع ولباااع وعارفة النغزة لي فينااا حنا لفاسى

رحمة:اييه مانكرتش ولكن مكيبانش ليك بلي راه تاضربي على الشعى كثر من لقياس جيني من لخر اش كيضور فداك الراس

سناء: غياااان ألوغ نخليك دابا

رحمة:اجي بلاتي (شافت فيها سناء) شيماء عيطات لياا وقالت ليا راه مكتجاوبيهاش

سناء:وهي شنو بغااات؟

رحمة:(جغمات من كاسها دلقهوة)على مافهمت كااضور عليا باغاا نجيبها تاني لهنااا

سناء:واش ديك لبنت مافيها نفس والله تابعض لمرات تانشك بلي من دمنا حيت بزاااف على الدل اوو السيد جرى عليهاا وحلف عليها لاعاود عتبات هنا وهي باغاا ترجع لاحول ولاقوة إلا بالله

رحمة:تاأنا عطيتها جوابها بالنسبة ليا كلمة ولدي عمرها تنزل الأرض ونهار تبرى منهاا هي ماسمعاتش لكلام اوا تشد دابا الأرض (تنهدات) كانعاود نقول كون غير ماخطبتهاش ليه كوون راه ماوقعوش هاد لمشاكيل كلهاا

سناء:تانتي ماتهزيش لهم بزاف وأصلا هي لي باغا تهبااال اه فلول كانت تاتبقا فيا وتانقول بنت خويا مي سمحيلي دارت شي حوايج لي أنا معجبونيش ولحاااصول لاعاود عيطات ماتجاوبيهااش باش تفهم لي كاين

رحمة:مهم هضرة معاهاا دابا وجيتها من لخر (شافت فساعتها)ماعرفتش وقتاش غايجي نوح تعطل

سناء:ورحيل مغاتجيش معاه؟

رحمة:نو غاتبقا ليوم فدارهوم غايجي غير هوو قالها لياا حيت سولت عليها

سناء:علاش مشات لدارهوم واش مخاصمين؟؟

رحمة:نو مكنظنش مي غير يمكن بغات تبقا معاهوم نوح قال ليا عندو شي خباار ليناا وأنا من الصباح كانتسنى فيه

سناء:اينا خبار؟

رحمة: كون كنت عارفة كون قلتها

سناء: مهم نخليك نمشي دابا ولي كان علميني بيه باااي

خرجات كاتمختر وركبات طوموبيلتها غادة وكاتفكر فداكشي لي فبالها واش غاتنفدو ولا لا... شحال وهي كاتفكر فهاد الخطوة وشنو هوما لعواقب ديالها وبعض لمرات تاتراجع وتاتلغي ديك لفكرة وهاد لمدة كلها عاشت فصرااع بينها وبين عقلها وقلبهاا وكرامتهاا وفلخر قررات أنها تفكر بمنطق وأنا تحيد لكرامة فجنب وتبع لي تيقول عليه عقلها... وقفات طوموبيلتهاا قدام واحد لكافي تتبان كلاص ودولوكس من برا وديكور نااضي ..نزلات ودخلات وعينيها كانو تيقلبو عليه تبان ليها جالس فواحد طبيلة جاية شوية بعيد على الناس وحادر راسو على شي وراق تايشوفهوم... مكانش صعيب عليها تجيب عنوان دلكافي لي ولى فيها شريك هو واحد صاحبو.. دخل معاه بنص حيت داك صاحبو كان عندو مشكيل وكان غايبيع لكافي ساعة ليازيد اقتارح عليه يدخل معاه شريك وكلشي يكون نص بنص وهو طبعا وافق...

قربات جهتو وهي غادة لعندو او واحد لجانب كيلومها على مجيتها ولجانب الاخر تيقول ليها سيري وتيشجعهاا... وصلات قدامو وهو غير حس بشي خيال واقف قدامو هز راسو وكمش حجبانو متفاجأ ومستغرب من شوفتهااا

اليازيد:سنااااء اش كاديري هنااا؟

سناء:(جرات كرسي وجلسات ونطقات بصوت هادئ) هادي هي مرحبا تفضلي شنو باغا تشربي (نطقات بسخرية) ماحدك كاتكبر فلعمر والصواب كينقص عندك

اليازيد:(جمع دوك لوراق وقال ببرود) خلينا ليك الصواب امولاتو شنو تشربي

سناء:كابوتشينو

اليازيد:(شير لسرباي وعطاه شنو يجيب ورجع شاف شاف فيها) مغانسولش كيفاش عرفتيني هنا ولكن غانسولك علاش جيتي؟؟

سناء:(تنهدات وشافت فيه بهدوء)جيت حيت عندي بزاف دلهضرة باغا نقولها ليك واخا دازت عليها السنين

اليازيد:(بعتاب) ماشي تعطلتي بزاف اسناااء

سناء:تعطلت ولكن فلخر جيت

اليازيد:شفتي عنادك فين وصلنااا شحال من مرة جيت وطلبت السماحة منك اسناء.. دوك السنين كلها وأنا كانطلب فيك تسمحي ليا حيت عرفت الغلطة ديالي وندمت عليهاا وكنت باااغي نرجعو كيف كناا حيت عمري قدرت نساك اسنااء واخا خطبت واخااا كنت باغي نتزوج كنتي ديما فبااالي...

سناء: تاأنا عمري نسيتك وهاد لمدة كلها وأنا كانحاول نكرهك ولكن مقدرتش (عينيها عمرو دموع) عارفة غلطت نهار قررت داك لقرار ولكن الخيانة دياالك اليازيد هرساااتني...

مكانش ساهل على سناء دير هاد لخطوة وتصرح بمشاعرها وتقول داكشي لي كانت كابتاه هاد السنين كلها... غرورها كمرا تجرح نهار هو خانها وشافت تصويرتو مع ديك لي كانت صاحبتها فيوم من ليام...

فديك لفترة هي مقدراتش تقبل أنها تاتشوف فيه أو أنها تفكر منطقيا وتشوف بلي تاهي غلطات معاه حيت خيانتو كانت قاصحة تقبلها... وبالنسبة ليها هاداك ماشي سبب لي يخليه يخونها واخا مكانتش خيانة كاملة ولكن راه تاتسمى خيانة...

سناء:(قوات راسها واخا داخليا راه تاتحس براسها ضعيفة) لاكنت غلطت فحقك كنتي تجي وتقولها شتي كون غوتي عليا سبيتيني وضربتيني كاانت رحم من أنني نشوف ديك التصويرة لي دمراتني

اليازيد:(تكى بيديه فوق الطبلة وقرر تاهو يقول لي عندو) ربي شاهد بلي من نهار شفتك نتي أسناء وقلبي تحرك من جهتك عمر بنت لمرا حلات ليا باقي حيت نتي عمرتي عيني وقلبي (ضحك بسخرية) داك اليازيد لي كان زهواني لي ماخلى تاشي بنت وماتصاحبش معاهاا وعرفهاا ولي القصاير ماشية ليه فالدم نهارر بغااااك نتي تااب وعمرو باقي دار حاجة بلارضاااك حيت مبغيتش نخسرك..

سناء:(حركات راسها بهدوء) وعلاش ديك الساعة درتيها علاش فاش شفتيني غلطت فحقك ماجيتيش وصارحتيني اليازيد علاااش

اليازيد:(تنهد وقال بصراحة) فديك الساعة كنت معصب نهار قلت ليك باغي لولاد لقيتك خديتي قرارك بلي مباغاش فكرتي فراسك وفخدمتك ومافكرتيش فياا خليتيني أناا اخر حاجة لي تهزي ليها لهم اسناااء كون كنت أنا بلاصتك وكون خديت شي قرار بحال هادا كنتي نتي غاتفكري بعقلك وغاتجي لعندي وتقولي لي كاين تت متأكد بلي كنتي تانتي غاتعصبي وغاديري رد فعل اخر حيت ديك الساعة غاتحسي بداكشي لي حسيت بيه

سناء:(شافت فيه وببرود قالت)وكون خنتك نتا غاتحس بلي حسيت بيه..

زير على يديه وبانت فيه بلي تعصب وتزير من هضرتها.. مقادرش يتخيل الفكرة أصلا حيت عقلو مباغيش يخليه يتخيلهاا.. وفهاد اللحظة بالضبط تفكر نهار سمعها غاتخطب من بدر الدين وداك الإحساس لي حس بيه وهو فالغربة ماقادر تايجي يحبسهاا... حس براسو فديك الساعة مربووط ومعارف مايدير وعقلو غايخرج من بلاصتو... قلب وجهو لجهة لخرى وهي متبعة ليه الشوفة وعارفة بلي هضرتها سمماتو واخا هي ماقصداتش تسممو إنما قاصدة تخليه يحس بشنو حسات مجرد مايحط راسو بلاصتها..

سناء:داكشي لي تاتحس بيه دابا هو لي حسيت بيه هاد لمدة كلهااا (كمشات حجبانها) قلبك كيضرك وحاس بيه غايخرج من بلاصتو.. معصب وكاره راسك ياااك (نطقات بانفعال) هادشي لي كنت تانحس بيه من داك نهاررر وباقاا لدابااا كانحس بيها وديمااا كانقوول علاش اليازيد دار فيا هاكاا حسيت براااسي نااقصة وشكيت فراااسي واش عارف شنو كيعني هادشي؟؟ ملي توصل بيك تنقص من راااسك بينك وبين نفسك وقدام الناااس خصك تبااان مابيك والو باش مايشمتوووش فيك لعديااان

اليازيد: سناء

سناء:(هزات صبعها فوجهو وقالت بجدية)غاتسكت وغاتسمعني نتاا فاااش طلقتي ومشيتي لبراا أنا راه هنا كنت تااانشوف لويل بااا لي هو عمك كل مرة مسمعني الهضرة ومك لي كنت محترماهاا وعمري نقصت منها هي نقصاات مني وفيما تشوفني تجلس علياا بولدي تغرب وبعد عليا والله ياخد الحق فلي كان السباب ونسات ولدها اش دار فياا وبالسيف ماتجي من جهتو.. وعيااالات خوتي فيما يشوفوني يتغامزو عليااا ويبقاو يلوحو فلمعااني عند بالك غير جيت وهزيت بگاجي وبقيت فداار ختي(بسخرية) هههه عند بالك غير جيت لمراكش بااش نشط ونبدل لجووو لا اسيدي راك غاااالط انا خويت دارنااا ومدينتي على قبل راحتي وحيت عائلتي والناس لقريبة لياا نهار طلقت شمتو فياا ماشي بحاااالك نتا لي جااو فصفك واخاا عارفينك اش درتي ملاموكش عرفتي علاش حيت نتااا راااجل وأنا مراا وديما لمرااا هي لي منها العييب واخا تكوون هي الضحية المرااا هي لي ممزياناش عندهوم وهي السباب دلمشاكيل وهي لي خرجات على زواجهااا حيت مصبرااااتش (بصوت مخنوق كملات) نهار طحت تاحد مجاا وقف معاياا من غير ختي رحمة أو ولد لحاااج تاابّا جااا من صفك نتاااا ونهاار بغيت نبدااا حياااني ونقلب على فرحتي هو ماوقفش معاااياا واااش عارف شنو هي باااك لي خصو يكون ديما فجنبك جاا من جهة ولد خوووه وخلى بنتوو (حركات راسهاا) عرفتي فواحد اللحظة حقدت عليك وكرهتك حيت شفت كلشي تقلب عليا بسبااابك نتااا...

مكانش كيظن بلي هادشي كولو وقع معاهاا..ملي سمعها تاتهضر وتعاود بقات فيه وحس براسو مكيسواش حيت هو سبابها ومغاينكرش.. هو عارف عمو وطبيعتو وبلي من لول كان باغيه لبنتو واخا عرفو غلط ولكن عمو كان غادي على منطق دولد عمها حسن ليها من لبراني.. ومعرفش راه جرح بنتو لي كان عليه يوقف معااهاا.. أما مو عارفها ديرها وتفوتها حيت دابا نيت تاتقولها ليه وتلوح ليه لمعاني واخا تيميك عليها ومكيبغيش يجرحها ويعصبها ولكن تاتزيد فيه تاهي.. شاف فيها شوفة ندامة وعينو على دموعها لي نزلو حيت مقدراتش تحبسهوم فديك اللحظة صافي عييات وبغات تفش لي فقلبها عالله ترتاح ولو غير شوية..

حدرات راسها تاتمسح عينيها وهو عزات عليه فديك اللحظة وقرب يديه حطها على يديها تاهزات راسها وشافت فيه ونطق بصوت هادئ ونبرة ندم باينة فيه:مكنتش باغي نوصلو لهاد لمواصل اسنااء تيقيني عمري نبغي نشوف دموعك حيت هوما غاليين علياا نتي معرفاش اسنااء بلي كانبغيك وحياتي بلا بيك مكتسوى والو شوفي واش عند بالك تاأنا عشت مرتااح راه ربي لي عارف اش دوزت فالغربة وفاش بعدت ماشي باش نرتاااح تت بعدت حيت مقدرتش نبقاا فنفس البلاصة معاك ونتي بعيدة علياا فكرة أنك مبقيتيش مرتي كانت تاتقتلني وااااش عرفتي نهااار سقت لخبااار بلي غاتخطبي باااش حسيت وكيف كنت (خنزر ونطق بانفعال) كانت فكرة وحدة كاضور فباااالي نجي ونقتل داك ولد لق*بة لي كان بااااغي ياخدك مني وكون ماولد لحاااج لي كاان تيكالميني كون درت شي موصيبة لي تخرج ليا على حيااتي..

سناء:عليها مشيتي خطبتي ودرتيها عناد فيا

اليازيد:ماشي عننناد فكري شحال وأنا كانحاول معاااك باااش تسمحيليا ونتي مقصحة راااسك ومغانكدبش عليك حسيت براسي بردت وقلت نشوف تاأنا حياااتي

سناء:(ضحكان بسخرية)يعني فكرتي بأنانية ههه كون مارفضاتكش غزلان كون راك خااطبهاا دابا ياااك ولامزوج بلعروسة لي هربااات وخلاتك

اليازيد:سناااء راه نتي براسك درتيها ودرتيها عناااد فيااا وبس بلاماتخليني نتعصب نسيتي داك الشماتة لي جايبة لينااا باااش تزوجي بيه (تنهد)من هادشي كولو بزوجنا غلطنا فحق بعضياتنااا وفحق ريوسنااا اسناء وخصنا نعتارفو بهادشي...نتي وأنا كنا سبب هاد لمشكيل لي خلانا نضيعو سبع سنين من حياتنااا غير هاكا

سناء:خسرنا دوك السنين ولكن فنفس الوقت تعلمنا منهوم بزاف دلحوااايح اليازيد ودوك لحوايج هوما لي خلاونا نبدلو شحال من حاجة فلداخل ديالنااا أنا من ديما كنت تانفكر غير فرااسي واهتماماتي أولى من كلشي.. وكانخدم أنانيتي لي خرجات عليا فلحظة وخلاتني نخسر واحد لجو زوين كنت عايشة فيه

اليازيد:تاأنا بسباب العصبية ديالي ولغلطة ديالي طحت فواحد لمشكيل لي خلاني نخسر لمرا لي كانبغي ونهدم داري بيدي.. خسرت لمرا لي رجعاتني لطريقي ولي قاداتني وخلاتني نعيش واحد لحوايج عمري عشتهووم...

الاعتراف لي كان بيناتهوم خلى كل واحد فيهوم يشوف غلطو ويقولو فالعلن... سناء لي عمرها رضات تبين هاهي ليوم تاتقول بفمها اش دارت واليازيد لي سنين وهو كيعاني هاهو ليوم تيسمع ليهاا وهي تاتقول لحوايج لي مكانش عارفهوم ولي خلاوه يدير إعادة النظر فبزاف دلحوااايح.. تحدر جهتها ومد يديه حاطها فوق الطبلة وعيونو فعيون سنااء لي كحولها سااح شوية جنب عويناتها عاطيها منظر زوين كيعشقوو من ديماا.. ونطق بهدوء وحب:تبغي نبداو من جديد نسااو لي فات ونبداو حياة جديدة؟؟

يتبع...