محتوى القصة
رجعو لبنات لطبلة لي كانو السربايا حاطين فيها لعشا لي اختاروه وكايتسناوهوم.. جلسات رحيل بلاصتها وشافت جهة سيدرا لي قلبات بلاصتها جهة نوح.. خلاتها على خاطرها وشافت فلپلا ديالها وبدات تتاكل بشوية عليها تاسمعات صوت إسلام لي نطق: ماعجبكش لپلا؟
رحيل:(شافت فيه)لا زوين عجبني
إسلام:ريان هو لي ختارو ههه
رحيل:هو عارف اش كيعجبني داكشي علاش مانخافش عليه هه
رجعات تتاكل حادرة راسهاا وحاولات ماأمكن ماتشوفش جهة نوح واخا عينيها بعض لمرات تيهربو لعندو ولكن تبتات راسها باش ماتخليش لعين عليهاا وكلشي يعرف اش طاري.. تعشاو وطلبو الديسير وإسلام تحنى جهة ريان قال ليه شي حاجة وناضو بزوج.. وبقا غير محمد طه مع نوح لي شاف فزين العابدين وقال بلإنجليزية:راجع غدا؟
زين العابدين:وي أمين باغي يمشي يشوف عائلتو فالجزائر عاد يرجع تاني هنا
نوح:صافي نشدو الطريق غدا فالعشية
محمد طه:حنا نيت راجعيين غدا
أسماء:(شافت فساعتها) فين مشى ريان؟
محمد طه:ماعرفتش؟
كانو طالقين موسيقى كالم أو واحد لكوبل گاوري نايضين كيشطحو فالوسط وأسماء تبسمات ونطقات:كون كان السالوبار هنا كون شطحت معاه ههه
أمين:(ناض تيقاد فلاشوميز ونطق مبسمة)ماتخمميش الزين وأنا هنا
مد يديه ليها وهي ناضت معاه غادين لوسط يشطحو ورحيل تبسمات وتكات على محمد طه لي قال:برب تاهاد لبنت خصها لعقل
رحيل:خليها تفوج
سيدرا:(شافت فنوح)تاانا بيت نشطح ماي بلو آيز
نوح:شطحي هنا
سيدرا:(حركات راسها بعناد) همم بيت نشطح لهيه
نوح:(شاف فزين العابدين وغمزو)نوض معاهاا
زين العابدين:(هز حاجبو وخسر سيفتو)واات؟
حرك ليه نوح راسو بمعنى نوض وزين العابدين زفر النفس وقلب وجهو تايكالمي روحو عاد ناض وقرب جهة سيدرا لي ناضت شدات فسروالو وتمشاو لوسط كان طوييل عليهاا بزاف وتتبان قد النملة ضارت جهة أسماء تاتشوف فيها كيفاش كاتشطح ورجعات شافت فزين العابدين وهي مكمشة حجبانها:هزني عندك
زين العابدين:(شد يديها مزير عليهوم وبدا كيحركها وقال ببرود) مايبغيش صوتك نسمعو أنا
سيدرا:(مكمشة شنايفها) ااااي ضريتيني فيديداتي بشوية علياا اراس الكبالة
ماتسوقش ليها أصلا محاملش ينوض معاهاا وغير دار لخاطر لباه ومبغاش يقول ليه لا وسيدرا كانت حاسة بيديها كاضرها مع قبضة يدو الكبيرة مقارنة مع يديها الصغار ومع دلك مهضراتش وبقاات تتحرك شوية تاسمعو لموسيقى سالات وهو يطلقها راجع بلاصتو وسيدرا مشات جهة أسماء لي تحنات هزاتها باستهاا ونطقات ليها سيدرا فودنيها:عندي ااي فيديداتي سومة
وراتهوم ليها كانو حمرين وأسماء قالت بهدوء:دابا يبراو احبيبتي يالاه نجلسو ونكملو لگلاص ديالنا..
فنفس الغيسطو فالطبقة التحتانية لي كانت عبارة عن ميني بار والجو فيه ناايض وزدوح عكس الفوق لي كان كالم.. فالكراسى لي كانو حدا لبارمان جالس إسلام وهو عاطي بضهرو لديك لحيحة لي نايضة والكاس دالشراب قدامو فيه لگلاصمونو ولقطعة فالطباسل وريان جالس جنبو بلعكس ومتكي بضهرو لكونطوار وفيدو كويس كوكتيل كيجغم منو..
ريان:(شاف فإسلام وقال) تقلتي اصااحبي خلينا نتحركو
إسلام:(جغم من كاسو) باغي تمشي سير أنا باقي مطول
ريان:(خنزر فيه) سولتينا از*ي واش كاينة بلاصة فين تشرب وجبناك ليها ماتندمناش عاود
إسلام:قووووود عليااا فرعتي ليااا ك*ي
ريان:هانتا على دير لخير يرجع ليك بومزوي واااسي راااه عينيك بداو يتعسلووو شوية وطفى ليا هنا خلينا نتحركوو ونكملو لقصارة بخيييير يرضي عليك
بزز نوضو وخلص ريان وخرجو من داك لهراج وإسلام كانو عينيه حمرين ومعسلين بالشراب لي بدا كيشد فيه..
وصلو لفوق فين كانو لخرين باقي جالسين مع بعضياتهوم.. جلس إسلام فبلاصتو ورحيل عاقت بيه وماشي غير هي كاملين عاقو بيه
أسماء:(بهمس)السكااايري
جا السرباي ياخد لخلاص ومد ليه نوح كارت گيشي ونطق ريان بسرعة:لا اولد لحاج أنا نخلص؟
نوح:ماعليش مرة خراا
خشى لكارت فبزطامو ودارو فجيب اللوراني وبلغلط ضرب يديه لي مضروبة مع لحاشية ديال الطبلة.. عض على سنيه وشاف فالفاصمة لي بانت فيها نقيطة دم وجمع يديه خارج هو لول وموراه لخرين..ريان غير شاد فإسلام لي واخا سكر إلا أنه باقي موگض شوية.. وقفو فبرا وإسلام نطق:خود لكونطاكط وسوگ بلاصتي
جبد ريان من جيبو لكونطاك وشاف فمحمد طه لي جا شد إسلام ونطق مخسر سيفتو:تتهلك راسك اصااحبي
خرجو الطوموبيلات لشارع فين كانو واقفين ورحيل شادة يد سيدرا لي كانت تتهضر معاها وتتسمع ليهاا تاسمعو لكلاكصون وبانت ليهوم طوموبيلة نوح لي ساگها بنفسو ركب فيها زين العابدين وأمين وطلعو ليها إسلام ومحمد طه.. وريان تكلف بطوموييلة إسلام وشاف فلبنات ونطق:قطعو لجيهة لخرا هنا ماعندي فين نبلاصي
بقا نوح فبلاصتو راد معاهوم لبال حيت كانو غير لبنات بوحدهوم ورحيل مدات يديها تتقلب على تلفونها وهي تشوف فأسماء ونطقات:شدي سيدرا نسيت تلفوني لداخل
رجعات تتجري وطقطق بطالونها ونوح عينو عليها أما لبنات مشاو ركبو كيتسناوها تبانت ليهوم خارجة تتخشي تلفونها فصاكها وهي قاطعة الطريق لعند ريان تاتسمع صوووت لفرااان ديال واحد الطوموبيلة كانت جايا فالشارع بزربة ومجات فين تحبس تكانت ضربات رحيل بالجهد وجابتها طايحة على كرشها ودم نازل منها..
كلشي داز بزربة قدام عينيهووم منظرها فاش ضرباتها الطومويبل وكيفاش جات طايحة فالأرض خلاهوم يجمدو ممتيقينش اش وقع.. حل نوح باب الطوموبيل ومشى جهتها كيجري وعينو على جسدها الملقى بإهمال فوسط الشارع.. عينيها لي شبه مسدودين وفولارها لي زهق شوية مبين ليها شعرهاا.. مد يديه لمضروبة وحطها على حنكهاا ونطق بصوت ملهوف:رحييييل كاتسمعيني؟
آنين.. صوتها كان عبارة عن آنين خلاه يهز عينو فمحمد طه لي جالس حداه وريان لي واقف جاامد.. وهو يغووت بصوت مبحوح:عيطووو لومبيلوووونص
الناس بدات تتجمع عليهوم وصوت الهضرة كثارة رنيم غير واقفة تتبكي وأسماء مانزلاتش من الطوموييل حيت معاها سيدرا ومخلاتهاااش باش ماتشوفش مها فديك الحالة واخا هي باغا تنزل ولكن أسماء زيرات عليها وعقلها غير مع رحيل.. وبرا كانت الروينة نااايضة وبالهوم وعينيهوم غير مع رحيل لي صوتها مبقاش يتسمع وغيبات فخطرة.. مكانوش باغيين يقيسوها حيت يقدر تكون تهرسات من شي بلاصة وأصلا أي حركة فحالتها مخاصش تكووون.. بعد مدة كسرات صوت لومبيلونص داك الصداع دالهضرة وديك الجوقة.. وقفات لومبيلونص جنبهوم مبعد مدارو ليها بلاصة ونزلو منها لفرملين هازين بياااص طبي ونووح ومحمد طه بعدو مخليين ليهوم لبلاصة باش يفحصوها الفحص الأولي عاد هزوها مكايسين عليها ونعسوها فداك لبياص ونص وجهها مغطي بالدم لي مخلي ملامحها تمحى.. دارو ليها بانضة فعنقهاا ودارو ليها السماطي باش يتبتو جسمها عاد هزوها بشوية غاديين بيها لومبيلونص وريان تابعهوم وركب معاهاا... محمد طه وإسلام مشاو كيجريو لطوموبيلتو ركبو وتبعو لومبيلونص ونوح بقا واقف مدة قبل مايسمع صوت زين العابدين لي نطق بالإنجليزية:لواليد يالاه
بخطوات مزروبين رجع لطوموبيل وركب وركبو معاه زين العابدين وأمين.. كانت الجوقة باقا ضرب كلاكصونا تابداااو يبعدو ليه على الطريق وقلب الطوموبيل بواااحد لغفلة كون ماكانو الدراري متبتين راسهوم كون خرجو من الزاااج.. ومكانش عندو الصبر باش يضرب الضورة عاد يشد الطريق لجهة الثانية.. وغير شد الطريق وهو يجبد تلفونو مدوز لخط لإدريس باش يعلموو..
---
ناعسين مبعد ليلة حميمية قضاوها مع بعض وفرغو فيها شوقهوم.. مرتاحين فحظن بعد والهدوء لي ضاير بيهوم كسرو صوت التلفون دإدريس لي كان تيصوني وبعيون نعسانة مد يديه وغير شاف سمية "ولد لحاج" وهو يتوگض وناض بشوية مبعد عليه تانيرت لي ضارة لجهة لخراا تكمل نعاسهاا..
إدريس:(بصوت هامس)ولد لحاج ياكما كاين باس؟
نوح:(نطق بصوت تقيل) رحيييل دارت كسيدة
إدريس:(خرج عينو ونطق بصوت ملهوف وخايف) كيغاااش شنو وقع وفين نتا ومااال رحيييل؟
على صوتو لي كان مسموع فاقت تانيرت وهي تتفوه ونطقات:مالك مع من تتهضر؟
مكانش إدريس تيسمع ليهاا وبالو وتركيزو مع نوح وغير سالى معاه قطع لابيل وناض بزربة تيجبد حوايجوو ونطق:رحيييل دارت كسيدة
تانيرت:(خرجات عينيها وغوتات بخووف)هااااويلي كيفاااااش مال بنتي اإدريس
إدريس:ماشي وقت لهضرة دابا لبسي حوايجك نمشيو لكلينيك لي داوها ليها سرررربي اتاااانيرت
رجليها فشلو عليهاا وفمها بياض بلخعة وإدريس غير انتابه ليها وهو يقرب يزربة ونطق بنبرة خايفة:تانيرت نتي بخييير؟؟
تانيرت:(دموعها نزلو)بنتي اإدريس هء هء مااال بنتي
إدريس:(تايهدن فيها واخا قلبو مزير عليه وهو براسو خاص لي يهدنو) ماتخلعييش داباا وتوگضي معايا واخا
تانيرت:(حركات راسها باه)واخا واخا
عاونها تالبسات جلابتها وخرجو من الدار ومن زهرهوم الطوموبيل ديالو مداوهاش.. شد الطريق ورجع عييط لنوح لي عطاه لادريس..
وقفات لومبيلونص عند باب الكلينيك ونزلو رحيل لي كانت مغيبة وونزل معاها ريان لي تدعق وغير ساكت وحدو تابع لبياص تاحبسوه حيت غاينزلوها لبلووك وهو بقا واقف تيشوف فلعدم.. دخل محمد طه كيجري وغير قرب عند ريان وهو ينطق بلهفة:فين هي؟
ريان:(بكالم)داوها لهيه
محمد طه:(شد ليه فراسو ونطق مخرج فيه عينيه) ريااان اصاااحبي فيق معانااا
سيدرا:(شادة فيد أسماء ونطقات وعينيها كيقلبو على مها)فين مامي علاش حنا هنايا سومة؟
إسلام:(قرب جهتها وتحنى هزها ونطق بهدوء) ماماك عيانة شوية اخنفوستي
سيدرا:(شافت فيه بعيون خايفة) مال مامي؟
إسلام:(خشى ليها راسها فصدرو ونطق بهمس)هي بخير بلاماتخااافي
محمد طه:(عاد تفكر باه ونطق)خصنا نعييطو لواليد ونعلموه
بان ليهوم نوح جاي جهتهوم ومعاه زين وأمين..قرب عندهوم ونطق وهو مكمش حجبانو:شنو قالو ليكوم؟؟
ريان:دخلوها لبلوك
بعد محمد طه عليهوم وجبد تلفونو عيط لإدريس ولقاه عارف وجاااي لعندهوم.. عاد مشى يعمر الضوسي ديالها ولخرين بقاو واقفين كيتسناو شي خبار عليها لي طمن قلبهوم..
وصل إدريس لكلينيك متبع النعث ديال نوح لي عطاه..لقاهوم جالسين كيتسناو شي خبار عليها وغير وقف عليهوم وهو ينطق وعينو على محمد طه:فين بنتي؟؟
محمد طه:باقي مقالو لينا والو ملي دخلوها لبلوك
جلسات تانيرت جنب أسماء ورنيم وإدريس شاف فإسلام لي متكلف بسيدرا لي كل مرة تسول على مها.. ضور عينيه ورجع شاف فمحمد طه:فين ولد لحاج؟
محمد طه:كان هنا ماعرفتش فين مشى؟؟
جلس إدريس بحالهوم كيتسنى تاهو شي حد يجي يطمنهوم تابان ليه نوح راجع لعندهوم.. داير يديه فجياب السروال التوب لي لابس وملامح وجهو هادية ومع مجيتو خرج الطبيب لعندهوم وقرب جهتهوم ناطق: نتوما عائلة لمريضة؟
إدريس:اه بنتي كيف بقات؟
الطبيب:الوضع دابا تحت السيطرة عندها كسر فدراعها ليسرية وبعض لجروح فجسمها وعوضنا ليها الدم لي خسراتو..غانقلوها لشومبر العادية فين غاتبقااا وتقدرو تشوفوهاا على سلامتها
خلاهوم كيزفرو النفس وقلبهوم تفاجى بالخبار لي سمعوو والحمدلله ربي لطف ونجاهاا.. جات عندهوم لفرملية لي علماتهوم اينا شومبر نقلوها ليهاا..
ناعسة فوق البياض الطبي وفاصمة كبيرة مغطية حنكها ليسر لي طاحت بيه.. ملبسينها بوني طبي لشعرها ولبسة ديال لكلينيك ومغطية بإيزار ييض.. عنقها دايرين ليه بانضة ودراعها تاهو مگبص.. كانت لفرملية تتقاد ليها السيروم تاتحل لباب ودخل إدريس وتانيرت هوما لولين باش يطمنو عليها.. ملي وصلاتو خبارها بلي دارت كسيدة قلبو تزير عليه وخاف عليهاا.. كان تيدوز يديه على شعرها وتانيرت عينيها مدمعين وتنخصيصة شاداهاا.. ماشي هادي لمرة لولة لي كادخل فيها رحيل لسبيطار وهاد الخمسنين لي دازت تعوودو أنهوم يشوفوها وهي ناعسة فوق هاد السرير الطبي أو واخا هاكا قلبهوم مكيقدرش يصبر على شوفتها وهي هاكا..
فبرا كانو البقية واقفين كيتسناو تاهوما نوبتهوم يدخلو يشوفوهاا.. حلات سيدرا عينيها المبطنين وشافت فإسلام لي كان هازها ونطقات بصوت نعسان:مامي
إسلام:(كيطبطب على ضهرها بحنية)هي هنايا غير نعسي
قلبات سيدرا شوفتها وبان ليها نوح لي واقف بعيد شوية عليهوم ونطقات وهي تتجبد يديها عندو:ماي بلو آيزز
هز راسو جهتها وتبسم ليها بحنية وإسلام نزلها الأرض ومشات عندو وهي تتحك عينيها تاوقفات قدامو وتحنى هزها لعندو ونطق بهمس:فيك النعاس؟
سيدرا:(حطات راسها على كتفو وتاهي همسات ليه) بغيت نشوف مامي
نوح:(تبسم ليها)ماماك دابا ناعسة تال غدا ونشوفوها واخا
سيدرا:(دلات شنيفاتها) وعلاش هي نينات هنا
نوح:(كيشرح ليها وعاطيها لخاطر)حيت عيانة شوية داكشي علاش
سيدرا:(قلبات عينيها وقربات جهة ودنيه)بيت نمشي طواليط
تحرك بيها غادي جهة لحمامات لي فنفس الكولوار او وقف قدا لباب دحمام النسا وحطها باش دخل وهي نطقات:حل ليا هادي
أشارت ليه لديك السمطة دالسروال وهو تبسم وتحنى جالس قفازي قدامها وحلها ليها عاد دخلات لداخل وهو بقا برا كيتسناها.. ماتعطلاتش بزاف وخرجات عندو وهي هازة يديها ونطقات:بيت نغسل يديداااتي ماي بلو آيز
نوح:(تحنى كيقاد ليها السمطة ونطق بتبسيمة)واخا زيدي
حل لباب لي مقابل مع حمام النسا ولي كان دالرجال تأكد بلي مكاين تاشي واحد تم راجع هزها وداها جهة لاڤابو غسلات يديها ونشفاتهوم عاد خرجو وسيدرا نطقات وهي شادة ليه فيديه:علاش عندك اي هناا
تتوريه يديه لخرا لي فيها لفاصمة تقاست ليه بالدم وهو خشى يدو فجيب السروال ونطق بهدوء:تضربت فيها
سيدرا:(تاتسول فيه ببرائة)واش طحتي على يدياتك بحالي أنا فاش تانطيح تاتكون عندي اي ومامي تادير ليها دواا
نوح:اه
رجع عندهوم لقا غير زين العابدين وأمين وسيدرا شافت فلكولوار ونطقات مكمشة حجبانها:فين سومة ورياني ومودي وإسلامي؟
زين العابدين:(هز عينو فباه ونطق بالإنجليزية وهو مكمش حجبانو) دخلو لداخل
نوح:(حرك راسو) سيرو نتوما لوطيل مكاين لاش تبقاااو هنا
زين العابدين:(عينو على يد سيدرا لي شادة فيد باه ونطق وهو مزير على يديه)لا غانبقا
أمين:ماعليش عمي نبقاو هنا ونستناو معاكوم
نوح:لي بان ليكوم
تحل لباب وخرج إدريس وسيدرا عيطات ليه:بّا ديدي
جا جهتها هزهاا وهي عنقااتو تتبوس فيه وإدريس شاف فنوح ونطق:عند بالي باقي مطووول
نوح:(ربع يديه وتكى على لحيط)ساليت شغالي ورجعت
إدريس:يدك كيف بقات ؟
نوح:(بعدم اهتمام)صافا
إدريس:لفاصمة فيها الدم غايكونو لغراز تحلو ليك
زين العابدين:(فهم هضرتهوم وقرب جهة باه ونطق بدارجتو)تمشي يشوف الطبيب نتايا
نوح:اه
زين العابدين:يمشي معاك أنا
نوح:(تبسم وجرو من قرفادتو كيف مولف معاه)زيد تحرك
مشى نوح وزين العابدين وبقا غير أمين لي تبسم لسيدرا لي نطقات ليه:علاش نتا متتهضرش بحالو
أمين:(غمزها)شكون ؟
سيدرا:(هزات كتيفاتها)راس الكبالة
أمين:(ضحك وجرها عندو جلسو فالكراسى)علاش تقول ليه راس الكبالة؟
سيدرا:(تاتشرح ليه)حيت متيمشطش شعروو
تبسم إدريس لي كان متبع هضرتهوم.. جالسة معاه تتهضر هي وياه عاطيها الخاطر تارجع نوح مع زين العابدين لي ضرب عليهوم وهو يهز حاجبو وقرب جهة أمين ضربو فكتفو ونطق بالإنجليزية بصوت بارد: مكنتش عارف عندك خاطر دلبراهش
أمين:(غمزو) نتا عارفني خاطري واسع ماشي بحالك العشير
زين العابدين:(زير ليه على كتفو تاعوج أمين عنقو ضاحك ونطق بنبرة تحديرية)كحلوش
أمين:صاااي راني برك نحب نمزح معاك لعشير
تتحرك جفونها وتسرط فريقها وهي حاسة بداتها عاطياهاا الحريق خصوصاً جنبها ليسر كولو وكتفهاا.. حلات عينيها وهي تتنين وراسها مقدراتش تقلبو حيت عنقها شادينو ليها بلبانضةة.. مدات يديها لي فيها السيروم وحطاتها على عنقها تتقلب فديك البانضة وتسرط ريقهاا وهي تتسترجع الأحداث لي جرات معاها والطوموبيل لي ضرباتهاا..تحل لباب ودخلات أسماء مبسمة وقربات جهتها:على سلامتك خلعتينا عليك؟؟
رحيل:(بصوت خافت )ش نو و قع
أسماء:كنتي غاتمشي فيها
رحيل:(ريقها ناشف)لما
خدات أسماء لقرعة لي عندها تم وحلاتها وحلات لپايل لي حاطينو ليها فكاغيط ديالو وقربات تتشربها ورحيل بزز باش تيدوزو ليها... تكات وهي تتنهج وقالت:سيدرا؟
أسماء:راها فلكافيتيريا مع بابا أو ولد لحاج كتفطر
كمشات رحيل حجبانها وتفكرات لبارح فاش ضرباتها طوموبيل قبل ماتغييب سمعااات صوتوو وهو كيعيط ليهاا.. كان صوتو ملهوف وباين فيه خايف عليه.. وأسماء غير شافت ملامح وجهها وعرفاتها فاش تتفكر وقالت:كاضرك شي حاجة؟
رحيل:(حاطة يديها ليمنية على كتفها وغمضات عينيها)كتفي عاطيني لحريق امممم
أسماء:بالسيف راه عندك كسر فكتفك نتي غير ريحي راسك وماتحركيش باش ماتزيديش توجعي كثر أنا غانعيط ليهوم ونعلمهوم بلي فقتي
خرجات أسماء ورحيل بقات بلاصتها مغمضة عينيها تاتسنط لعضامها لي ضارينهاا تاتحل لباب ودخلات تانيرت هي لولة وموراها إدريس وريان ومحمد طه..
تانيرت:(تاتقيس وجهها ونطقات بحنية)اماما ديالي خلعتينا عليك
رحيل:(تبسمات ليها بزز بوجه شاحب)أنا بخير ماتشطنيش عليا
إدريس:باش تاتحسي ابنتي
رحيل:(غمضات عينيها)تانحس بالحريق فكتفي وداتي وجعاني
ريان:(شد فيديها لي مكضرهاش وقال بصوت مضيوم) خفت عليك بزاف
رحيل:لحبيب ديالي أنا بخير
محمد طه:(باسها فجبهتها وتبسم ليها) مكيجيش معاك لمرض صحي لينا دغياا
تبسمات ليهوم وقلبات عينيها عليهوم عاد قالت:فين بنتي؟؟
إدريس:راها برا دابا ندخلوها عندك ليل كولو وهي تتسول فيك
رحيل:جيبها ليا عفاك ابابا
أسماء:يالاه نخرجو حنا لبرا بلامانتعرمو عليك هناياا
دخلات سيدراا تتجري جهتها وغير شافت حالتها ولفاصمة لي على وجهها وكمشات حجبانها وعينيها دمعو وهي تنطق:مامي مالكي؟
رحيل:(تبسمات ليها باش ماتخلعهاش ومدات ليها يديها) اجي امامي عندي ماتخافيش
سيدرا:(دموعها نزلو وقربات جهتها وإدريس واقف جنبها وقالت بصوت باكي) وعلاش عندك أيات هناا بزاف
تاتشير ليها لبلاصة ديال لفاصمة ورحيل شافت فباها لي قرب طلع سيدرا عند مها وهي حطات راسها على صدرها تتبكي ورحيل تاتلمس شعرها وعارفاها تخلعات داكشي علاش..
فبرا كانت جايا أسماء هازة گوبلي دلقهوة سخوون ومع الضورة تسطحات مع إسلام وتكبات عليها لقهوة فصدرها وهي تشهق وعينيها خرجوو وغوتات عليه:واش عوووور مكتشوفش حرقتيني ازمر
إسلام:(هز فيها حاجبو ونطق باستفزاز) تانتي فواحد النهار حرقتني تعقلي
أسماء:(تاتبعد الكسوة على صدرها لي حاسة بيه تشوط ونطقات وهي عاضة على سنيها) زااا*مل والله لبقات فيك
إسلام:(قرب جهتها وخنزر فيها)باقي لدابا شاد يدي عندي وداير بحساب العشرة ولكن مانظمنش ليك صبري عليها عرفي اش تتخرجي من فمك
خنزر فيها وخلاه باغا تاكل جنابها وقلبات طريقها لحمام تشوف حالتها..
---
واقفة الفرملية تتقاد ليها الجلسة باش ترتاح وغير سالات شكراتها رحيل وبقات جالسة تتنهد وتفكر فبكا سيدرا لي قطع ليها قلبهاا.. حدرات راسها وهي تتشوف فيديها لمگبصة لي كانت مجروحة وساهية.. ملي فاقت جاو كاملين عندها سولو فيها تامن أمين وزين العابدين دخلو عندها من غيرو هوو.. حاسة بطعم الصدا متكون فحلقها لي نشف وتاباش تمد يديها تاخد قرعة دلما ماتقدرش.. هزات عينيها فلباب لي تحل عند بالها لفرملية ساعة كان هو لي داخل عندها.. قلبها ضرب وسط صدرها وعينيها تعلقات فيه وهو متقدم جهتها بخطواتو التقال وبصوت أجش نطق:على سلامتك
رحيل:(تبسمات بخفوت)الله يسلمك شكرا
نوح:(عينو على وجهها الشاحب وشفايفها لبيضين وبصوت هادئ قال) ردي لبال مرة خرا ماشي ديما كادوز طريفة وتقدري تنجاي منها
رحيل:(هبطات عينيها وقالت بهمس) نجيت من ماكثر (شافت فيه وسرطات ريقها) عارفة بلي باقي هاز فخاطرك من جيهتي على هضرتي لي قلت وأنا حشمانة منك بزااف تيقني مكنتش قاصداهاا سمحليا
نوح:(قرب جهتها كثر وتكى بيديه على النموسية ونطق بنفس لهمس وعينو فقلب عينيها) بعض لمرات السماحة مكيكون عندها فايدة ملي الهضرة تتجرح
رحيل:(شمرات بنيفها ونطقات بحزن)عارفة ومغانلومكش حيت هادا حقك ولكن تانتمنى خاطرك يصفى من جيهتي وماتاخدش مني موقف وتقلق
نوح:(كمش حجبانو وزاد قرب ليها كثر تاحسات بأنفاسو كيضربو فوجهها ونطق بنبرتو التقيلة الخشنة) نتي بغيتي لبعاد وهاأنا عطيتو ليك ابنت الناس..
كلامو كان بحال لمواس لي كيتغرسو فقلبهاا.. بصح هي هادشي لي كانت باغاا ضاهريا ولكن فالداخل ديالها مكانتش باغياه يبعد عليها وكانت باغا يبقا متشبت بيهاا واخا هي رفضاتو.. تعودات على قربو وعلى كلامو وتصرفاتو معاهاا.. حسات بيه قدر يعمر واحد لفراغ لي كانت تتحس بيه فهاد السنين كلها قدر يلمس واحد لحاجة كانت هي مخبياها فالداخل ديالها.. كاتعتارف بلي هو شخص ماشي كيف لي قبل منو هو ماشي ياسين وماشي عاصم وماشي بدر الدين.. هادا نوح مكاينش شي واحد لي كيشبه ليه.. كانت تتحاول تحبس دموعها ومباغاش تبين ليه بلي هضرتو أثرات فيها..بعدات شوفتها عليه ونطقاات بهدوء: أنا عارفة راسي غلطت فكلامي معاك عليها كنعتادر منك
نوح:(بعد عليها شوية ونطق بخشونة) الله يسامح
رحيل:(شافت فيه وقالت بعدم تصديق)من قلبك؟
نوح:(قلب عينيه ونطق بصوت ساخر)من ريتي (رجع شاف فيها وقال بجدية) رديتينا دابا برااهش؟
رحيل:(نطقات بزربة)لا لا ماقصدتش غير بغيت نتأكد (تقادات فبلاصتها وهي تغمض عينيها فاش حسات بكتفهاا وجعهاا)هممم
نوح:(قرب جهتها كيشوف فيها بجدية)مالك؟
رحيل:(مكمشة حجبانها) كتفي ضارني
نوح:مخاصكش تفورصي عليه عطيه الراحة
رحيل:(حطات يديها على عنقها ونطقات وهي باين فيها مدرونجية) واخا تقول ليهوم يحيدو ليا هادي خنقااااتني وتاهادي (أشارت لفاصمة لي فوجهها) محملتهاش
نوح:(هز فيها حاجبو)اااااالشريييفة راك درتي كسيدة تركني بلاصتك تاتصحي ويزولو ليك داكشي
رحيل:(قلبات عينيها بحال شي مونيكة ونطقات ببرود) اممم عارفة شكراا
نوح:(شاف فيهاا بشوفة قاصحة وهو مكمش حجبانو وهمس بصوت خافت) ياااصبر أيوب
تمشى جهة الباب غادي ورحيل متبعة ليه الشوفة تاحل لباب وهي تنطق بسرعة:نووح
كانت هاديك أول مرة تعيط ليه بسميتو وهو ضار جهتها وبقا واقف كيشوف فيها وكيتسناها تهضر وهي زيرات بيديها على ليزار وقالت بهدوء:واخا تمد ليا القرعة دلما احم؟
رجع جهتها وهز لقرعة دلما حلها ليها وعطاها ليها ورحيل مقدراتش طلع راسها وتشرب حيت لبانضة لي فعنقها ممخلياهاش تحرك براحتهاا.. قرب جهتها وحيد ليها لقرعة وحط ليها لپااايل فيها وقرب تاني عندهاا شادها ليها وهي تتشرب ومهبطة عينيها عليه تاشربات مزيان ونطقات بتبسيمة خفيفة:شكراا
نوح:(بهدوء)لعفوو
حط لقرعة وتمشى بهدوء جهة الباب حلو وخرج وهي تنهدات وحاسة بالضيم طايح عليها..
غادي فلكولوار جابد تلفونو كيصوني على زين العابدين تابان ليه إسلام جاي لجهتو وتبسم ليه:غادي؟
نوح:(حرك راسو بهدوء) اه شفتي زين العابدين
إسلام:كنت شفتو برا هو وصاحبو واقفين مع ريان واش نتا كنتي عند رحيل؟؟
نوح:(هز فيه حاجبو ونطق ببرود)همم
إسلام:ياكما ناعسة حيت باغي نشوفها قبل مانرجع لمراكش
نوح:(لعب بلسانو ففمو) امم نعسااات
إسلام:(شاف فساعتو ونطق)دوماج غايخصني نتحرك دابا حيت عندي مايدار المهم تانعييط ليها يالاه تهلا اولد لحاج تانتشاوفو
نوح:(تبسم ليه)طريق السلامة
تحرك إسلام وتبعو نوح خارجين لبرا لقاو زين العابدين جالس فوق الكابو دطوموبيل باه وأمين متكي جنبو وريان واقف قدامهوم.. كان تيبان ريان مندامج معاهوم حيت تفكيرهوم شوية قريب لبعض بحكم عاشو فلغربة كاملين وكبرو فنفس السيستيم دلقرايا غير لفرق ريان وأمين كيعرفو يهضرو بلغتهوم عكس زين العابدين لي العربية عندو واكلة لعصا... قرب جهتهوم نوح ونطق بتبسيمة:نتحركو؟
زين العابدين:نبغي ياخد أنا دوش
ريان:(تكرشخ بالضحك ونطق وهو ضارب على فخد زين العابدين) وناري عربيتك واكلة الدق اصااحبي هههه (شاف فنوح)ولد لحاج خصك تلقى ليه لحل ههه
نوح:(تبسم وقرب لعند ولدو لي قلب وجهو معاجبو حال)ماعليش دابا يسرح لسانو مع مدة
ريان:إن شاء الله (شاف فإسلام) صافي غادي؟
إسلام:اه تانرجع تاني
ريان:وابلاتي راه تاأسماء ورنيم ومحمد طه غاديين ديهوم معاك
إسلام:ونتا مغاديش
ريان:(هز كتافو بلامبالاة)تت غانبقا هنا عييط ليهوم وعلمتهوم بلي مغانجيش وعندي ضرووف واحد ليوماين ونتبعكووم
إسلام:واعييط ليهوم يخرجو لهنا أنا فالطوموبيل كانتسناهوم
ريان:سير عالله
أمين:(شاف فنوح)صاااي راح نمشيو تاحنا؟
نوح:غانمشيو لوطيل يالاه ركبو (ضرب على كتف ريان ونطق) نتشاوفو من بعد
ريان:بسلامة وشكرا على وقفتكوم معانا
نوح:الله ياودي مرحبا
ركب نوح مع الدراري وتحرك غادي لوطيل وريان طرطق عضامو ودخل لداخل كيصوني على محمد طه وفطريقو تلاقاهوم خارجين وأسماء معاحبها حال وباين فيها غادة غير بزز منها.. توادعو معاه وهوما مشاو عند إسلام لغير قشع أسماء وهو يقلب عينيه وهي خنزرات فيه وركبات لور مع رنيم وسدات لباب بالجهد تاضار شاف فيها مخنزر:هرسيه حسن
أسماء:(ببرود) هو تزدح وزايدون ماتسدش مزيان
عاودات حلاتو وسداتو بالجهد وإسلام باغي يطير عليها وعارفها تاديريها بلعاني وباغا ترجع ليه ديال القهوة لي كب عليها..أما هي ربعات يديها وهزات حاجبها بمعنى هانتا قرب لاكنتي راااجل.. قلب وجهو ومحمد طه كان داير ليزيات مراشقاش ليه ورنيم غير تتقلب عينيها عليهوم مفاهمة والو.. تحرك إسلام ورنيم تحنات جهة أسماء ونطقات بهمس:كيف بقات لحرقة دصدرك؟
أسماء:(جاوباتها بهمس) شافتها الطبيبة وقالت ليا لحرقة ماشي شي حاجة ومع الدوا غاتحيد
رنيم:هاكا حسن ماتبقاش لطاش ديالها
أسماء:(كاتشوف فإسلام ونطقات يهمس حاقد) كون بقات كوون ندمتو على نهار عرفني فيه..
---
جالسة كيف عادتها فجناحها بگندورة صيفية وشعرها الكحل الطوويل مطلوق على راحتو.. هازة واحد لمجلة دالازياء التقليدية كاتفرج فيها وقدامها فالطبيلة صينية فيها كويس دلقهوة لبخار كيطلع منهاا.. سمعات الدقان ونطقات بلاماتهز راسها:دخل
دخلات لعندها سناء لي كانت بسروال توب مع شوميز ستان فالكحل.. جلسات قدام رحمة حاطة رجل على رجل وضهرها مستقيم بنخوة..
رحمة:(شافت فيها وهي مبسمة)فين كنتي؟
سناء:(حاطة يد على يد ونطقات)مشيت لصالون برعت راسي شوية
رحمة:(تبسمات ليها)هه هادشي كولو على قبلو؟
سناء:(قلبات عينيها مبسمة) بصحتي شنو منستاهلش نبرع راسي وزايدون باقي مغايجي
رحمة:تستاهلي الالة صراحة مكرهتش كون جاا بابا تااهو وحضر
سناء:(قلبات عينيها وقالت ببرود) نتي عارفة بابا باقي عندو أمل أنني نرجع مع ليازيد
رحمة:(تنهدات وحطات لمجلة فوق الطبيلة وقالت بجدية) تاأنا مغانكرش بلي باقي باغاك تعاودي تفكري وترجعي ليه ليازيد بصح طبعو قاصح ولكن شااريك اسناء
سناء:(ضحكات بسخرية وقلبات عينيها)لي شاريك مكيخونكش اختي والانتي ربي لقاااك مع لحاج الله يرحمو وكان راجل معاك فماشي كلشي بحالو
رحمة:(لمعة دلحزن بانت فعسليتها) عليها كانقول ليك ماضيعيش ليازيد وتصدقي نادمة عليه شوفي غير أنا دازت لعوام على موت لمرحوم وباقي مانسيتوش
حبسات هضرتها وصوتها تخنق بالدموع لي حاولات ماتنزلهومش.. وسناء كمشات حجبانها برأفة لحالة ختها لي باقي لحد الآن عايشة فحزنهاا لي مكتبينو لحد.. ناضت لعندها سناء وشدات فيديها وهيا كاتشوف فيها بحزن: مكانتش نيتي نفتح ليك جرح الماضي تيقيني مقصدتش
رحمة:(تبسمات ليها) هو أصلا عمرو غاب على بالي باش تفكريني فيه اسناء (تنهدات وعينيها على تصويرة لي كانت معلقة فالحيط) هو خلى بلاصتو وعمر شي حد غايقدر يعمرها
سناء:هاولادو معمرينهاا عليك وممخلينكش بوحدك اجي نوح باقي مناويش يرجع؟
رحمة:(تبسمات) هضرت معاه قبيلة هو فأگادير فهاد ليام غايجي
سناء:ماحاولتيش تدوي معاه على شيماء وتعرفي اش تحت راسو
رحمة:(تنهدات)شوفي اسناء نتي عارفة نوح ماشي من طبعو يجي ويقول باش كيحس ولافاش تيفكر نتي عارفاه بير غااارق والاعرفتي شي حاجة عندك الزهر (تبسمات) يشبه لباه بزااف تاهو كان بحالو
سناء:اييه مانكرووش ولكن سكاتو طووول واش بين ليلة ونهار فسخ لخطبة بلامايعطينا تاشي تبرير ومخلي لبنت غاتحماق ولدابا عندها أمل ترجع هي وياه وصراحة تاأنا باغاها ليه بنت خالو وتربيتنا ومنا كنعرفوها مزيان واش نتي غاتسنايه تايصدق جايب شي وحدة مامعروفش أصلها
رحمة:(قلبات عينيها) كي شتي راه لقاهاا وطلبها لزواااج واش اسناء تاضحكي عليا
سناء:(هزات حاجبها) وشكون عرف تلقايه حاط عينو على شي وحدة وحنا معارفينش
رحمة:(تقادات فبلاصتها وتبسمات ليها)خلينا من ولدي واجي ندويو عليك نتي امولات لعقل لي باغا تزوجي مرة خرا
سناء:(هزات فيها حاجبها)مال الزواج حرام وزايدون أنا باقا صغيرة وباغا نعيش حياتي ماشي نضيعها على واحد لي عينو زاغت وشافت فبرا
رحمة:(رجعات شعرها لور ونطقات بلهداوة)ياك طلب السماحة وخلى العائلة دخل بخيط بيض علاش مابغيتيش نتي تسمحي ليه
سناء:(ناضت غادة جايا وصوت طالونها كيتسمع على الأرضية دالرخام وبانفعال واضح عليها) شتي واخا يبوس رجلي مغانرجعش ليه ارحمة واحد مدارش ليا اعتبار وشاف فغيري ماعندي ماندير بيه وزايدون اش خصني وشنو لي خلاه يشوف فبراا هاااء
رحمة:(ضحكات)ههه زعمة نتي مكنتيشاي عارفة ليازيد زهواني نهار تزوجتي بيه
سناء:اوا صافي غلطنا وهاحنا صححنا لغالاط وكل واحد شد طريقو يشوف حياتو وتاأنا نشوف حياتي وإلا لحاج عند بالو غانرجع ليه راهو غالط لمهم نخليك دابا
خرجات من عندها تتمشى بنخوة والراس ديما لفوق هي الصغيرة فخوتاتها وتفكيرها عكس تفكير لعائلة.. دخلات لجناحها ولقات تلفونها كيصوني غير شافت النمرة وهي تقلب عينيها وخلاتو تم كيصوني مامرة مازوج وهي ممسوقاش ليه.. عارفة غاتكون وصلاتو لخبار من باها وعارفاه غايحماااق ملي يعرف وهي هادشي لي باغا تبين ليه أنها نساتو وكيف هو عفط عليها وماتسوقش تاهي رداتها ليه.. باغا تبين ليه بلي الدنيا موقفاش عليه وكيق درقها بخيط هي درقاتو بحيط.. مع حبس التلفون هزاتو فساعتو ودوزات لخط لخياطة تاتهضر معاها وفنفس لوقت تلفونها كيصوني بدوزيام أبيل ولي عارفة بلي غايكون غير هوو.. ليازيد..
فالشومبر دلوطيل ورا ماخدا ليه دوش يصحصح بيه ويتوگض.. جالس فلاتيراس وعينو على لابيسين لي عامر بالناس وطبيلة قدامو فيها لفطور لي نقب منو شي حاجة واكتافى غير بلكافي.. كان خدام فالبيسي ديالو كيشوف لايميلات ولكاطالوغ لي وصلو دطوموبيلات تاصونى تلفونو لي حاط جنبو وطلعات ليه نمرة "ليازيد" كمش حجبانو ودوز لخط وطلق لاوت باغلوغ او وصلو صوت رجولي قاصح ومن نبرتو باين فيه معصب: مااااتقولش لياااا غاتخليهاا دير لي فباااالها انوووح
نوح:(نطق بنبرة باردة عكس داك لبركان لي تايدوي معاه) حياتها هاديك ماعندي ماندير ليك
ليازيد:ماتصعرننننيش از*ي راه لي فيااا كافيني وراني كانغلي وكون كانت قدامي كون طحنت مهاااا
نوح:(كمش حجبانو ونطق بصوت مدعدع) ماتفرعش ليا كر*ي بمشاكيلكوم نتااا طلقتيها اش باغي منها دابا
ليازيد:(مسح على وجهو ونطق بصوت مهدن) نتا عارفني باغيهاا ولي طرا زمان غلطة وندمنا عليهاا اولد لحاج
نوح:(ضحك بسخرية) هه وشباغي ندير ليك أنا ياك لحاج بنفسو وماردعهااش اش غاندير ليك
ليازيد:(ضحك بالجهد) وانتا فييين تبااان لحاااج بلاماتبوهل عليا اصاحبي عند بالك معارفكش لاقلتي لهضرة ديرها واخا طيح فيها الرررروح بالرجووولة دخل لينا بخيط بيض معاهاا وخليها تقاااد معاناا وتحيد ديك لفكرة من بالها حيت برب لاكانت ليهاا واخا نعرف نشد طياااارة تال عندها
نوح:(مسح لحيتو ونطق بهدوء)ونتا مناويش ترجع ؟
ليازيد:فهاد الشهر غانرجع ونيت نكون رصيت أموري باش مانعاودش نجي هناا راك عااارف يدي مربوطة دابا ومقدرش نخلي هاد الزمر قبل مانتهنى
نوح:لقيتي الشاري؟
ليازيد:هاد الساعة كاين هاداك لي شريك معايا فلغيسطو ولكن الاكان ماحسن منو غانبيع ليه ونفك الشركة ونجي لتم ندير ريسطو ديالي مايدخل معايا فيه حد ولكن لي عندي مهم دابا هي خالتك تحبس هاد لعب ديال الدراري الصغااار اصاحبي وترجع نديرو وليداتنا ماحد باقي فينا الجهد شوف غير نتا عندك ولد تباركالله شوية ونسمعووه تزووج وحنا باقي لازواح مسگد ولاولاد نفرحو بيهوم
نوح:(ضحك بالتقالة وكتافو يتهزو ويتحطو ونطق) ههه حاسدني اليازيد
ليازيد:(تنهد) هاد الساعة باغي غير تستاقر حياتي كيف كااانت مع لي هلكات ليا صحتي
نوح:(لعب بلسانو ففمو) يصاوب الله
ليازيد:بناتنا التلفون نتسنى منك شي خبااار
قطع معاه ونوح تنهد ورجع ضهروو لور متكيه على لكرسي تيفكر فحريرة سناء وليازيد لي خرجات ليه من الجنب.. عاقل على نهار طلاقهوم كيفاش لعائلة كلها مكانتش باغا ومنهوم جدو بحكم ليازيد ولد خوه وهو ولد عم مو وسناء.. وقف ضدها ولكن هي قالت غاطلق وبلفعل طلقاتو ومن داك النهار وهو مغرب فليونان ودخل شريك فواحد لغيسطو تم ومع دلك باقي خبار سناء تيوصلوه من عند لفاميلة وملي ساق خبار أنها ناوية تزوج مرة خرا بغا يهبااال وماباغيش يفكر مجرد تفكير بلي هي غاتكون لواحد خر غيروو.. ياهو يالمووت هادا هو تفكيرر ليازيد وحيت ماعندو كيف يدير ينزل لمغرب وسناء مكتحاوبوش ومباغاش تحاشيها ليه قرر يلجأ لنوح لي هو وياه عشرة قديمة وصحاب نيت..
نوح:(تبسم بسخريو وهمس)نتوما غير خوروووهاا وخليو ولد لحاج هو لي يفكهااا تت
---
فشومبر رحيل لي كانت مغمضة عينيها وناعسة جالس ريان فوق الفوطوي لي جنبها تيخربق فتلفونو تاسمع تلفون رحيل كيصوني وناض يشوف شكون وطلعات ليه سمية "بيسان" تبسم وهز تلفون وخرج لبرا باش مايدرونجيها ودوز لخط وقبل مايهضر وصلو صوتها الرقيوق لي قالت بلهفة:ماشيغي كيف بقيتي ملي سقت خبار بلي درتي أكسيدون تخلعت عليك بزاااف
ريان:(نطق بصوت مبسم) مون دكتوغ صافا
بيسان:(زولات تلفونها من ودنيها بدات تتشوف فالنمرة وتأكد واش نيت نمرة رحيل ولاغلطات رجعات التلفون وقالت بهدوء)شكون نتا؟
ريان:(هز حاجبو)وايلي على شكون نتا نسيتي شكون كيعيط ليك بمون دكتوغ؟؟
بيسان:(قلبات عينيها) اه نتا هادا علاش مجاوب على تلفون ماشي ديالك ؟
ريان:(باستفزاز)واقيلا تلفون ختي هادا وطبيعي نجاوب بلاصتها
بيسان:مهم ملي تفيق قول ليها تعيط ليا
ريان:ابلااااتي ماتقطعيش شنو زعمة الامكانتش رحيل حنا مقاضينش لغرااض ولا؟؟
بيسان:(تبسمات) بحال الاعلمك الله ماعندي بيك غراض وختك لي تتهمني
ريان:(عاجبو لحال) ماشي حشومة عليك مون دكتوغ دغيا نسيتي لوقفة لي وقفتها معاك وكيفاش فكيتك من داك الزا*مل لي كان تيتحرش بيك اجي بعدا ولد لحاج فخبااارو ؟
بيسان:(بدات تسرط ريقها وضور عينيها) ونتا مالك فيا عاونتيني شكرناك وسدينا السوجي تم
ريان: يعني مافخباروش نقولها ليه؟
مباغاش تفرط راسها وتبين ليه بلي نوح مفخباروش وزيد خايفة لايصدق بصاح قايلها ليه خصوصا أن خوها تم فأگادير بدات تاضور عينيها ونطقات بسرعة: هو فخبارو وزيد هادشي متعلق بيا ونتا حسن ليك تديهاا فشغالك وحبيبتك وباركة ماتبقا حاضي غيييرك
قطعات عليهاا وريان بقا كيشوف فالشاشة مبسم ونطق بينو وبين نفسو: تيقناك هه
رجع لشومبر رحيل لي بدات تحرك يديها وتنين وهو قرب جهتها تاوقف قدامها ونطق بحنية:رحييل كاضرك شي حاجة؟
رحيل:(حلات عينيها وبدات تترمش باش تحيد ضبابة دالنعاس) همم احم غير داتي كتوعتني فاش تانتحرك وصاف
ريان:ماعليش دابا تبرااي غير شوية دالصبر وصاف
تبسمات ليه وهو حط تلفونها ونطق:عيطات ليك خت ولد لحاج وجاوبتها
رحيل:تانعاود ليها لابيل من بعد
جلس جنبها وبدا يهضر معاه ويونسها وتاهي تاتجاوب بشوية تاجات مها وباها وسيدرا وتجمعو عندها وسيدرا تتهضر معاها وتقيس فوجهها بشوية تالليل ورجع نوح لعندهوم جايب ليهوم لعشاا وجلس جنب إدريس فبرا ونطق بهدوء:غانتحرك فالليل حيت ولابدما غايخصني نرجع لمراكش على قبل لخدمة
إدريس:ماعليش حنا غانبقاو هنا تايعطيونا لوطوغيزاسيون دخروجها ونرجعو تاحنا
نوح:(مسح على لحيتو ونطق بلهداوة)صافي مزيان مهم بيناتنا التلفون واخا (ناض سلم عليه)
إدريس:ماتخممش تهلا وطريق السلامة
خرجات سيدرا عندهوم وقربات لعند نوح لي تبسم ليها وجرها باسها وقال بحنية: يالاه بسلامة اتاتبيرت إينو تهلا فراسك تاترجعي لمراكش واخا
سيدرا:فين غادي؟
نوح:غانمشي لمراكش
سيدرا:(مدلية شنيفاتها) بقا معايا هنايا؟
نوح:(جرها لعندو ونطق بلهداوة) تمشي معايا نتي؟
سيدرا:(شافت فإدريس ورجعات شافت فيه)مامي وبّا ديدي هنا مبغيتش نخليهوم بوحديتهوم
نوح:اوا بقاي معاهوم تاتجيو كلكوم واخاا
حركات راسها وهو باسها فجبهتها وتوادع مع إدريس وخرج لبرا عند االدراري لي خلاهوم فالطوموبيل.. أما سيدرا وإدريس رجعو لداخل وسيدرا نطقات وهي غادة عند تانيرت:ماي بلو آيز مشى تانيرت إينو
تانيرت:واش رجع لمراكش
سيدرا:همم
كانت متكية ومغمضة عينيها تتسمع ليهوم وبالها معاه هو وتخمم فأخر هضرة ضارت بناتهوم ومغاتنكرش أنها مرتاحة حيت سمح ليها على كلامها لي قالت ليه ومبقاش هاز من جهتها..
سيمانة دازت عليها بالمهل وهي فالسبيطار وليوم وصل نهار خروجها ورجوعها لمراكش.. معاها تانيرت وإدريس وسيدرا أما ريان رجع فتاني يوم لمراكش حيت عيطو ليه أوغجون فالخدمة.. كانت خارجة بسورال توني وقبية طويلة وفولارها وفاصمة صغيرة على جبهتها وجبيرة فيديها ليسر.. شادة فيها تانيرت وإدريس وسيدرا سابقينهوم تاخرجو وركبو جميع فالطوموبيل وشدو طريق لمراكش.. وسيدرا متكية ليها على ركابيها تاتهضر معاها.. تاوصلو لواحد الاستراحة اوقفو استارحو شوية وكلاو عاد كملو طريقهوم وغير دخلو لمراكش ورحيل زفرات النفس وهي حاسة براسها مرتاحة وقلبها تفاجى.. لقاتهوم مستنينها فالدار وكانت تاغزلان.. سلمات عليهوم وجلسات وسط ناسها وحبابها فرحانة وبرا كان جالس علي فالطوموبيل ونطق بهدوء:رجعو وراهوم فالدار
بدر الدين:عيينيك ماتزولهاش عليها
علي:مغاتحتاجنيش ليوم؟؟
بدر الدين:(ببرود)نتا بقا تم وأي حاجة طرات تكون فخباري
قطع عليه وعلي ربع يديه ونطق ببرود:نشوف اش تحت داك الراااس
---
كانت نازلة رحمة من الدروج بگندورة فالباج منبتة بلعقيق وشعرها مطلوق على راحتو وعينيها على لبنات لي غاديين جايين تايتجاراو مع لوقت.. مشات طمنات على الأمور واش كلشي هو هاداك ورجعات لعند سناء لي كانت جالسة قدام الطابل دونوي تاتلبس لي بوكل ديالها وكانت موجدة راسها ولابسة قفطان جوهرة فالبلوسيال بالراندة وشعرها جامعاه ومك اب خفيف على وجهها.. تبسمات ليها رحمة ونطقات:متأكدة بلي باغا ديري هاد لخطوة
سناء:(بلامبالاة)وي تاأنا باغا نعيش حياتي
رحمة:تعيشي حياتك ولاتبيني ليازيد راك نسيتيه
سناء:صباحتو الله واش باغا تعصبيني فنهاري ارحمة
رحمة:مباغاكش تندمي اسناء عارفة طبعك اختي وبلي هادشي كاديريه ضد فيه هو
سناء:(شافت فتلفونها لي رن بمساج ونطقات مبسمة) راه جاو
خرجات من عندها معاجبها حال وغير دايرة ليها لخاطر وصاف.. دازت لعند نوح دقات عليه وعلماتو بلي الناس قربو يجيو ونزلات لتحت فين كانت بيسان ولحسن وزاينة حاضرين بلاصة عائلة سناء لي تاحد فيهوم مبغاش يحضر ومموافقينش ليها على هاد الخطوة.. دقائق وكان نازل نوح كيف لعادة بسروال توب كحل وشوميز نواغ ولايح عليه جابادوز نواغ بحال جيلي وشعرو رادو لور وروايح كيتشمشو من بعيد.. سمعو الدقان ومشات السعدية حلات لباب وهوما خرجو باش يستاقبلوهوم.. كان داخل بخطوات واتقة وهو هاز البوكي دلورد لابس سروال توب كحل مع شوميز كحلة وڤيست فنفس اللون وملامحو كانو قاصحين وفجنبو كان إلياس هاز لكادويات لي جايبين.. قرب بخطوات واتقة وعينو على نوح لي كان خاشي يديه فجياب السروال تيشوف فيهوم وجنبو رحمة لي مبسمة بزز مع بقية العائلة..
قرب جهة نوح لي كان واقف قدامو نيشان ونطق بلهداوة وملامح هادية:مرحبا بيكوم معاك نوح السليماني
مد ليه نوح يديه وتاهو مد يدو ونطق بصوت واتق وعينو السود فقلب عينين نوح: بدر الدين الجوهري
نطق سميتو وعينو السود فقلب عينين نوح لي كان تيشوف فيه بشوفة هادية وتبسيمة خفيفة على شفتو.. كانو واقفين قدام بعضياتهوم ويديهوم فيد بعض مدة قبل مايهز نوح حاجبو فيه فاش بان ليه طول معاه السلام وبدر الدين حرك راسو ليه وزول يديه مرجعها لجيب السروال قلب نوح وجهو وشاف فرحمة لي واقفة ومبسمة غير بزز منهاا.. مموافقاش على هادشي من الأساس وديجا حاولات أنها ترجع لختها عقلها ولكن الغالب الله وتلاقات مع سناء لي تاهي معكسة..
نوح:(درع رحمة لي بانت كيف لكميشة بين يديه ونطق بصوتو الجوهري) يمّا رحمة خت سناء
بدر الدين:(حرك ليها راسو ونطق بصوت واتق) متشرفين الالة رحمة
نوح:(أشار لجدو لحسن وجداه لي واقفة جنبو لابسة قميص ديال الدار ودايرة زيفها الطويلة وقال) جدي لحسن السليماني وجداتي زاينة
قرب بدر الدين جهتهوم ومد يدو جهة لحسن سلم عليه عاد ضار جهة زاينة وقرب باس ليها راسها وضار جهة بيسان لي تبسمات ليه ومدات يديهاا: بيسان خت نوح
بدر الدين:(شد يديها وشاف فيها بشوفة خبيثة وتبسيمة خفيفة على شفتو)متشرفين مادموزيل (شاف جهة إلياس لي كان واقف وراه وقال) هاد إلياس خدام معايا وكنعتابرو واحد من العائلة
نوح:(بصوت تقيل نطق)مرحبا خليونا ندخلو لداخل
سبق لحسن ورقية هوما لولين وراهوم بيسان هي ورحمة عاد نوح لي كان جنبو بدر الدين لي عيونو كانو كيضور فالرياض بمكر وتبسيمة راضية على شفتوو.. وغير دخلو لصالة تبسيمتو تمحات ورجعو ملامحو هاديين.. جلس فالسداري وجنبو إلياس لي حط لكادويات فوق الطبلة وعينو على بيسان لي كانت بكسيوة حد الركبة مبردة وطالقة شعرهاا ومك اب خفيف على وجهها.. طلعهاا إلياااس ونزلها بشوفاااتو وهو عاض على شغتو..قطع شوفاتو السعدية لي كانت داخلة بصينية ديال أتاي حطاتها فوق الطبلة جهة لحسن لي نطق وهو كيرحب بيهوم:مرحبا بيكوم اولدي
بدر الدين:(حاط يديه على صدرو ونطق بصوتو المدعدع)الله يكبر بيك الحاج
نوح:(متكي ضهرو على لمخدة وجالس جلسة رجولية وعينو على بدر الدين وبصوت هادئ نطق) نتا مستاقر هنا فمراكش حيت لهجة ديالك مختالفة على ديالنا؟
بدر الدين:(تبسم تبسيمة جنب وعينو على نوح ونطق بصوت مريح واخد راحتو) لا أنا مستاقر فالداخلة تما فين كاينة دار لعائلة وخدمتي وكانجي لهنا مرة مرة نبدل لجو ولكن مأخرا وليت نفكر أنني نستاقر فمراكش حيت صراحة لجو زوين هناا ودنيا مروجة
لحسن:والجو هنا مخييير واخا فالصيف تايكون الصهد بزاف ولكن الرواج لي هنا زوين
بدر الدين:عندك الصح الحاج
نوح:(تبسم بخفوت وعينو على كويس دأتاي لي بين يديه) غاتجيك قاصحة تحول خدمتك من الداخلة لهنا وتبدا ازيرو
بدر الدين:(لعب بلسانو ففمو)أصلا خدام فالبيع والشرا وعندي محالات فالرباط والداخلة يعني مغاتجينيش صعيبة نبدا فمدينة خرا بلعكس غاتكون فرصة زوينة أنني نكبر خدمتي وندير محالات فمدن كثيرة (وبكلام عندو معنى) ونيت هاد لمدينة فيها ناس عزاز عليا
رحمة:وعائلتك واش تاهي مستاقرة فالداخلة؟
بدر الدين:واليديا ماتو ملي كنت صغير وخويا لي عندب تاهو مات
رحمة:الله يرحمهوم (شافت فبيسان ونطقات بهدوء) سيري ابنتي كلمي خالتك
حركات بيسان راسها وناضت بشوية عليها غادة عند سناء وعينين إلياس طلعاتها ونزلاتها من ساسها لراسها.. قلب وجهو وفلحظة تلقاو عينيه فعينين نوح ودغيا قلب إلياس وجهو ومطولش فيه الشوفة..
قدام مرايتها كانت جالسة تتشوف فانعكاسهاا كانت زوينة بقفطانها الجوهارة ومك اب خفيف مزين وجهها.. شوفاتها كانو مطفيين عكس نهار خطبتها هي وليازيد..نزلات عينيها جهة يديها تتشوف لخاتم لي هازة ديال الزواج لي كان لبس ليها ليازيد.. واخا طلقو إلا أنها باقا محتافظة بيه ليومنا هادا واخا داز على طلاقهوم ست سنين..
ضارت جهة تلفونها لي كان تيصوني وناضت بخطوات تقيلة جهة النموسية فين كان محطوط وصوت طالونها كيتسمع على الأرضية دالرخام.. تحنات هازة تلفونها لي كان شاعل ونمرة ليازيد مزينة الشاشة.. قلبها بدا يضرب وداك لعناد لي فيها تبخر كولو فاش وصلات لوقيتة ديال الجد ولمعقول لقات راسها مترددة.. زفرات النفس ولاحت التلفون بإهمال فوق النموسية قبل ماتسمع الدقان فالباب لي تحل وصوت بيسان لي نطقات:خالتو واجدة
سناء:(تبسمات باش ماتبينش ليها) شكون جاا؟؟
بيسان:بدر الدين لعريس أو معاه واحد اخر صافي
سناء:اه قولي ليا الأجواء لتحت كي دايرة؟؟
بيسان:(جلسات فوق الكرسي حاطة رجل فوق ختها)عادي هوما كيسولو فيه وهو كيجاوب
سناء:ماقلتيش ليا كيف جاك بدر زوين؟
بيسان:(كمشات شنايفها)ماعرفتش صراحة ملامحو قاصحة بلاقيااااس وماعجبنيش ليازيد حسن منو..
سناء:(زفرات بعصبية)واش هاد ليازيد داير ليكوم لقبوول فيما ندوي مع شي واحد يجبدو ليا
بيسان:حيت هادي هي لحقيقة اخالتو ونتي عارفاها ومباغاش تعتارفي دابا بيني وبينك واش نتي من نيتك غاتزوجي هاداك لي لتحت وغاتقدري تنساي ياماتك مع ليازيد؟
سناء:(هزات راسها لسما بكبرياء) لي خلق ليازيد خلق غيروو وكيف هو مداارش بحسابي تاأنا مغانديرش بحسابو وغانضرب عليه بمرة وغانتزوج غيرو..
سكتات بيسان وهي تتشوف فسناء لي من لداخل ديالها كانت رافضة لكلام لي قالت.. مغاتنكرش أنها عمرها تخيلات راسها تكون مع شي حد خر من غير ليازيد حب حياتها لي كان ولد عمها وفكل مرة كانت تتشوفو كانت تتحس بقلبها كيضرب ليه.. كان معروف عليه عينو زايغة وزهواني دلعائلة ومع دلك بغاتو ومع مدة لاحظات بلي تاهو كان كيبين ليها إعجابو فكل مرة كيشوفها تاصدق باغيها دلمعقول وقرر يصارحها بداكشي لي حاس بيه وهاداك كان هو نهار لكبير عندهاا.. طلب يديها لزواج ولعائلة كلها مكانتش متيقة بلي ليازيد دار عقلو وقرر يتزوج ويدير تاهو دارو.. فاقت من تفكيرها على صوت بيسان لي واقفة جنب لباب تتشوف فيها: خلينا نمشيو راه غايكون كيتسناونا لتحت
شافت مرة أخيرة فلمرايا قبل ماتنزل وهي شادة فبيسان وعينيها كيضور فبلاصتهوم تادخلات لصالة ولكل هز عينو جهتها بما فيهوم بدر الدين لي ناض وهو هاز لبوكي وقرب جهتها مد يديه وهي تبسمات حشمانة ومدات يديها ومحسات براسها غير وهي مجرورة وحنكو كيلامس حنكها.. بعد ومد ليها لبوكي وهي تمشات جهة رحمة وجلسات جنبها..
كمش نوح حجبانو فاش حس بتلفون كيڤيبري فجيبو.. جبدو من الجيب وبانت ليه نمرة ليازيد وهو ينوض من بلاصتو خارج من الصالة ومع فتح لابيل وصلو صوت ليازيد لي تيغوت:فيييين هي ديك خيييتي وعلاااش مكتجاوبنيش
نوح:(نطق ببرود) جالسة مع خطيبها ياكما بغيتي نكلمها ليك؟
ليازيد:(زاد تعصب من لبرود لي كيهضر بيه نوح)وااااااش نتا باغي تحمق جد مي فهاااد النهاار هاااا والقل**ي ياااااك قلتي لياا غاتشوف كيف دير تمنع هاد لخراااا وترجع لديك خالتك عقلها لرااااسها قبل ماندير فيها يدي ونطلع روحها لي خلقها
نوح:(حك جبهتو بتعب وقال بصوت تقيل صارم) ديرها اش كاتسنى ونيت تهنيوني من فريع الرااس ومشاكيلكوووم لي طلعو ليا فصحتي (كمل بانفعال واضح فصوتو) ملي نتا باغيها اش داك تخونها ودير مشكيل لراسك ولينا هااا كنتي ترجل معانا شوية اليااازيد
ليازيد:(تنهد واحد تنهيدة عميقة ونطق بصوت هامس)ندمت اولد لحاج و هاد الست سنين كلها وأنا عايش فلعداب لي هلك ليا صحتي ونفسيتي لحياة بلابيها راه مكتسوى عندي والو عليها باغيك تعاوني حيت عارفاهاا تتسمع ليك وبلي نتا لاقلتي لحاجة ديرها ومكاين لي يهبط ليك الراس ولايخلي كلمتك تبدل (تنهد مرة خرا) واشوف كيف دير يرحم يمّاك راه مبقا ليا والو ونزل لمغرب ونستاقر فيه بمرة ونبغي ملي نجي نفك حريرتي معاها
نوح:(سكت مدة قبل ماينطق بهدوء)يكون خير
ليازيد:نتسنى تلفونك واخا تهلا فراسك وسلم على لعائلة
نوح:مرحبا بسلامك
رجع نوح وجلس فبلاصتو وشاف فبدر الدين وتبسم ليه:فين خليناها اسي الجوهري
بدر الدين:(تبسم ليه)كنا داويين على لخدمة (تقاد فجلستو وجمع يديه قدامو وعينو تركزات على نوح)ولكن بما أنك جيتي وكلكوم حاضرين فأنا باغي نطلب يد بنتكوم سناء ليا على سنة الله ورسوله..
نوح:(هز عينو وشاف فسناء قبل مايرجع يشوف فبدر الدين وقال بصوت رجولي وهو جالس بأريحية) الزواج كيبغي الرضى دالواليدين وغاتكون سناء قالت ليك بلي لحاج باها مموافقش..
هزات فيه سناء راسها بزربة وهي مخرجة عينيها فاش سمعات هضرتو وكيفاش حطها بوجهها قدام بدر.. أما رحمة فكانت ساكتة مخلية ولدها وشيخها هوما يدوي حيت داخليا هي رافضة هاد الزواج ومكرهاتش ختها تاهي تحبس هادشي ولكن ماعندها مادير قدام إصرار سناء.. تبسمات بيسان بخفوت من كلام خوها ومع هي أصلا عزيز عليها ليازيد وكاتشوف بلي هو المناسب لخالتهاا خصوصا أنها شافت كيفاش هو باغيها واخا لغلطة لي دار ولي كانت سباب فراقهوم إلا أنها مغاتنكرش أن ليازيد ندم وشافت محاولاتو لي دار باش يرجعها وتسمح ليه ساعة هي حلفات لاحنات ولاهبطات الراس ليه.. زير بدر الدين على يديه وتبسم واحد تبسيمة مخبي بيها شلى حوايج وشاف فنوح لي كان كيتسنى جوابو على كلامو:بطبيعة لحال حنا باغين الرضى دكلشي ونهار هضرة مع سناء على الزواج وضحت ليها كلشي وتاهي قالت لي كاين وحيت باغيها لمعقول جيت لهنا باش نطلبها منكوم
نوح:(حك لحيتو) هاد هو لمضمون اسي الجوهري لواحد لي معقول راه كيجي من لباب ماشي من الشرجم وحيت نتا قلتي اش عندك تاأنا مخبيتش عليك وصارحتك بشنو كاين وكيف تتعرف لابدما خص تكون لموافقة دلحاج باش الأمور تكمل كيف بغيتو
بدر الدين:ماقلتي عييب وسناء مقامها عالي وغالية عليا (شاف فيها وتبسم ورجع شاف فنوح) داكشي علاش قلت لي نطولوه نقصروه ونجي قاصدكوم
نوح:يكون خيرر
بدر الدين:المهم أنا غانمشي دابا حيت باقي تبعاني الطريق لداخلة شكرا على الضيافة اولد لحاج (ناض وفنفس لوقت ناض تانوح وكمل بدر هضرتو بالألغاز) وأكيد هادي ماشي آخر مرة غانتشاوفو فيها بما أننا غانوليو عائلة
نوح:(سلم عليها ونطق بصوت تقيل خاتر) مرحبا ونهار كبير هاد اسي الجوهري
سلمو على بعضياتهوم والعائلة كلها ناضت رفقاتهوم تالسطوان.. تبسم ليهوم بدر الدين ومع ضار عطاهوم بالضهر تبسيمتو تمحات وشوفتو تقتمات ويديه لي حاط فجيب سروالو كان مزيرها تابياضت ليه وغير خرجو من الرياض وتسد لباب وهي ضور سناء جهة نوح ونطقات بصوت معصب:اش ديك لهضرة قايل ليه واش بعقلك
نوح:(خنزر فيها) شكون تايدوي على لعقل (قرب جهتها تاوقف قدامها ونطق بنبرة صارمة)هاد لهبال ديالك غاتساليه قبل ماندير شي حاجة ماتعجبكش
سناء:(خفضات صوتها ونطقات بهدوء) مكانش عليك تحطني بوجهي وي عارفة بابا مموافقش وقلتها ليه ولكن ماشي بهاد الطريقة تتقال وزايدون أنا ماشي بنت صغيرة باش تمشيوني كيف باغيين
نوح:(هز حاجبو ونطق بسخرية)ماعنديش مع لبرطوكولات لخاويين ولي كاين قلناه ولهضرة معاك من بعد اسناااء(هز فيها حاجبو) من بعد
تخطاها راجع لبيتو وهي زفرات بغيض وضارت جهة رحمة وقالت:عاجبك لحال ياااك
رحمة:نوح قال ليك لحق شنو بغيتينا نعطيو لأوكي لسيد من دابا وحنا باقي ماعرفناهش مزيان وزيدي بابا لي مموافقش على هادشي أصلا وقبيلة عيط ليا وماخلى غير لي نسى فيا وفيك
سناء:(بلاامبالاة)ولو قولو ليه نفكرو عطينا وقت ماشي هاكا ارحمة وبابا نتي عارفاه يموت على ولد خوه
رحمة:خلينا من هادشي وقولي ليا نتي كيفاش تعرفتي عليه بضبط عمرك عاودتي لياا حدك قلتي تتعرفي واحد وباغي يتزوج بيك وماعطيتيناش تفاصيل
سناء:(تنهدات)خلينا ندخلو لصالة ونعاود ليك (رفعات صوتها) السعددددية جيبي لينا واحد البريق دلقهوة معطرة..
متكية فالصالة وسيدرا جالسة حدا راسها وتتلعب ليها بشعرها بحنية تابدات تغمض عينيها وهي تجي جهتها تانيرت لي نطقات: كون غير طلعتي اماما لبيتك باش تنعسي وترتاحي ليك
رحيل:(مغمضة عينيها ومرخية مع لمسات سيدرا ليها)تاهنا اماما مزيااان
تانيرت:ياكما فيك الجوع نطيب ليك شي حاجة
سيدرا:(كمشات حجبانها) وعلاش ماسولتينيش أنا تانيرت إينوو راه فيا جويعات
تانيرت:اش بغيتي نطيب ليك
سيدرا:(بدات تاضور عينيها)امممم بيت ندومي
رحيل:(حلات عينيها)عوتاني إندومي كولي شي حاجة فيها نفع ونتي تابعة ليا غير لباط تاوليتي مصفرطة
سيدرا:(بعناد)لاااءح بيت ندومي مامي
تانيرت:صافي نطيبوهااا ليك الالة ومورا ماتاكلي دخلي دوشي واخا
سيدرا:وندوش تالإيڤاناا
رحيل:فين مشاو لبنات؟
تانيرت:غزلان مشات تشوف صاحبتها وأسماء راه يالاه طليت عليها لقيتها نعسات هلكها تاهي لوجع
رحيل:بلاماتفكريني تاأنا قربات تجيني
سيدرا:(تحنات لوجه رحيل ونطقات ببرائتها)شكون هادي لي غاتجي مامي؟
رحيل:(ضحكات وهي تتوجع ونطقات) واحد لحاجة امامي تاتكبري وتعرفيها ههه
تانيرت:باباك غايكون لقى الروينة فالگاراج والخدمة تتسناه عليها تعطل
سمعو لباب تحل وسيدرا ناضت تتجري تشوف شكون تابانت ليهوم رنيم داخلة هي وإدريس جايبين معاهوم التقدية وسيدرا كاضور بجناب إدريس ونطقات بحماس:بّا ديدي جبتي لياا حليوات
إدريس:(حط التقدية وكمش حجبانو)تت نسيتهوم دابا نخرج نجيبهوم ليك عاود
سيدرا:(تاتجبد لعندو تاتحنى هزها وهي تعنقو ونطقات بخفوت)صافي ماشي مشكيل بّا ديدي والله
تبسم إدريس وزيرها عندو ورنيم مشات لبيت دأسماء حلات لباب بشوية باش ماتفيقهاش ساعة سمعاتها نطقات بهمس:غير شعلي الضوو
رنيم:(قربات جهتها)كيف بقيتي شوية؟
أسماء:(جلسات تتجمع شعرها وكانت كلها عرقانة)لهلا يوريك حالتي اوووف كانتوجعو فابور كون غير ولدنا بعدا وربحنا
رنيم:(ضحكات)اوا اختي الله يكون فلعون أنا حمدلله مكتجينيش قاصحة بحالك نتي ورحيل أوو راه لموت
أسماء:ههه حمدي الله احنينتي (زولات عليها لغطا)نمشي نبدل عليا اووف كرهت حالتي
خدات من لبلاكار بيجامة خرا فلقهوي مع حوايج لداخل وأولويز وخرجات لحمام ورنيم مشات جبدات تاهي بيجامتها وبدات تبدل تاسمعات تلفونها لي صونى بنغمة رسالة.. هزاتو ودخلات لمساج لي مكتوب فيه "ماتنسايش لي تافقنا عليه"
----
كانت رحمة جالسة هي وبيسان وزاينة كيسمعو لسناء لي بدات تتعاود ليهوم على لقاءها ببدر الدين لي كان بالنسبة ليها صدفة..
🔙🔙
سايگة طوموبيلتها وطالقة لملحون تاتسنط ليه وتونس بيه طريقها تاوقفات فلفوغوج وهي تحس بطوموبيل لي وراها تزدحات مع طوموبيلتها تامشات وجات فبلاصتها وهي تكمش حجبانها مخنزرة.. زولات نضاضها دالشمش لي كانت لابسة وحلات لباب نازلة تشوف الدقة وتفاهم مع مول الطوموبيل لي دخل فيها.. وغير شافت الضربة شهقات وهزات راسها جهة باب الطوموبيل لي تحل ونزل منو بدر الدين بخطوات واتقة وكتافو تيتحركو مع لمشية وعينو السود عليها.. وقف قدامها ونطق بصوت لمدعدع:مادموزيل نتي بخير؟
سناء:(وقفتو وملامحو القاصحة خلاوها تسرط كلامها ونطقات بصوت معصب) واش مكتشوفش كيف رديتي ليا طوموبيلتي
بدر الدين:(قلب عينيه جهة الطوموبيل بدون مايعير ليها اهتمام وقال) ماعليش غلط وكنعتادر عليه امادموزيل وأنا غانتكلف بطوموبيلتك تاترجع كيف كانت وحسن كنعتادر منك على لي طرا
سناء:(مكمشة حجبانها وقالت بهدوء)لمرة الجايا رد لبال
بدر الدين:(تبسم ليها)أكيد (سمع صوت لكلاكصون مع الطريق تحلات وضار جهة الطوموبيل حرك يديه باش تزيد عاد رجع شاف فيها ومد يديه) معاك بدر الدين
سناء:(مدات تاهي يديها سلمات عليه)سناء
بدر الدين:(بابتسامة خبيثة) متشرفين مادموزيل سناء..
كانو ساكتات جميع كيسمعو ليها بتركيز وهي تتعاود ليهوم..
سناء: اوا موراها تبادلنا نوامر على قبل طوموبيل لي أصر أنه يصاوبهاا ومن تما بدينا ندويو وخرجنا درنا كافي أونصومبل ومغانكرش بلي عجبني تفكير وشكلوو وماعرفتش كيفاش تالقيتو كيطلب مني الزواج وأنا وافقت
رحمة:دابا نتي غير فهاد الشهورة القليلة عرفتيه أو وافقتي تزوجي بيه واش اسناااء من نيتك
سناء:وشنو فيها شحال من وحدة تعرفات على شي واحد ومكملوش عام صحيح وتزوجو مالي أنا أول وحدة؟
رحمة:نتي دابا مقتانعة بيه ياك لنفرض بابا وافق عليه واش كاتخيلي راسك مزوجة بيه ودايرة معاه لولاد؟؟
سناء:(بقات تتشوف فيها مدة قبل ماتقول بهدوء) اه
رحمة:(شافت فيها بجدية)نتي راه غير تتكدبي على راسك وعارفة بلي هاد السيد دايراه طريق باش تنساي ليازيد
سناء:(خنزرات)واش كلمة زوج تجبدوه لياا وااااه عيقتووو والله مبقيت فهمت فيكوم والو كلكوم جايين فصفو بحال الإ أنا لي خنتو ماشي هو..
ناضت معصبة مخليا رحمة غير تاتشوف قدامها وبيسان لي نطقات:غير خليها اماما دير لي بغات حيت باين هاد الزواج مغايكملش
رحمة:وباش عرفتيه نتي مغايكملش؟؟
بيسان:(ناضت تاهي)حيت ولد لحاج فالدمة ههه
مشات بيسان وبقات غير رحمة هي وزاينة لي قالت:أيهدو ربي مايخلق "الله يهدي ماخلق"
رحمة:آمين اخالتي آمين..
---
يوم جديد وصباح جديد شرقات فيه شميشة على سماا مراكش.. ومع ليوم الأحد كانت لحركة شوية قليلة بحكم الموظفين مخدامينش ولعطلة الصيفية بدات عند لوليدات الصغار.. كان راجع من لمخبازة جايب معاه الباگيط وكرواصة وحلوى دلكريم لسيدرا.. داير يديه فجيبو وحادر راسو وكيف عادتو ليزيات فودنيه مونس بيهوم لوقت تاهز عينو وبانت ليه غزلان جاية من الشارع لاخر.. تلاقاو قدام باب الدار وغزلان تبسمات ليه ونطقات:صباح لخير
محمد طه:صباح لخير
حل لباب ودخلو بزوج لقاو كلشي فايق مع ليوم سيدرا باغا تمشي لفيرمة على قبل ركوب لخيل وتارحيل غادة معاها.. تجمعو على لفطور وغزلان مشات بدلات حوايجها حيت لبارح باتت مع صاحبتها.. فطرو بزربة وناض إدريس هو وتانيرت لي تاهي باغا تمشي تفوج وتبدل لجو وتحرك شوية مع لحمل بدات تتقل.. ركبو بربعة فطوموبيل إدريس وشدو طريق لفيرمة وسيدرا شافت فرحيل ونطقات وعينيها كيلمعو بلفرحة:عرفتي مامي توحشت سيديل بزااااف
رحيل:(تبسمات)تاهو غايكون توحشك
سيدرا:غير غانشوفو غانبوسو مامي
رحيل:وأنا مغاتبوسينيش
تحنات سيدرا باستها ففمها وجلسات جنبها تتجمع وتعاود ليها على شنو باغا دير ملي تشوف سيديل.. طريق كلها وهي مسكتاتش ومرة مرة يشارك إدريس وتاانيرت لهضرة معاها تاوصلو ومع بلاصا طوموبيل حلات سيدرا لباب ونزلات تتجري وشعرها لقهوي تيلعب وراهاا.. نزلات رحيل تتقاد لبانظة ديال اليد وتبعاتها وهي تتمشى بشوية مع باقي مقصحة ولكن ماشي بحال قبل.. كانت الدنيا عامرة ليوم قربات رحيل لجهة المدربة لي كانت تاتهضر مع سيدرا وسلمات عليها وداتها باش توجدها لحصة لي عندها.. أما رحيل بقات متكية تاتفرج قدامها تاجا إدريس وتانيرت لي قابطة فيه وتتمشى بحال شي بطريقة مع لحمل..
تانيرت:الله شحال لجو زويين هنا فكرني غير فلبلاد اإدريس
إدريس:(قلب عينو على لبلاصة) تباركالله لخضورية هنا تتريح
رحيل:(شافت فيهوم)أنا غانمشي نحرك رجلي شوية لهيه واخا
إدريس:ردي لبال لراسك ابابا
رحيل:واخا ملي تخرج سيدرا عيطو ليا
دارت يديها لي مكضرهاش فجيب السروال دالسرڤيت لي لابسة وبقات غادة كاتمشى وتستنشق لهواا لي كان يريح.. عينيها على ديك لخضورية لي كاتبان ليها من بعيد ورجليها غادية بيها فين ماعرفاتش.. كان عقلها سارح كيفكرها فمول دعوتها لي هادي أيام مشافتوش ولاسمعات خبارو.. فهاد ليام حسات بواحد الضياع خصوصا ملي تتفكر كلامو لخر ليها وكيفاش هو قرر يبعد بمرة.. عند هاد النقطة حسات بالضيم طاح عليها.. علات عينيها تتشوف فين وصلات لقات راسها واقفة فواحد لبلاصة أول مرة تجي ليهاا.. وصوت لماا كيتسمع ليها قريب بقات ضور راسها يمين وشمال تتقلب على الرجعة ومع حدرات راسها بانو ليها سيور سبرديلتها تفكو.. زفرات النفس وماعندها كيف دير باش تربطهوم مع يديها مگبصة.. رجعات تتشوف فطريقها ودوك الشجاري لعالين لي حاجبين عليها أشعة الشمس..تمشات حدا واحد الشجرة وتحنات تادابز مع سيورها باش تسدو بيد وحدة مركزة فشنو كادير تاسمعات صوت لخطاوي ديال لخيل جايين جهتها هزات راسها بالزربة تتشوف فيه وراكب فوق حصانو ومع قرب جهتها شد لجامو تاوقف لحصان على رجليه لورانين كيصهل ورحيل قلبها بدا يضرب بسرعة خيالية وعينيها تفيكسات عليه وعلى منظرو وهو راكب لخيل.. هبط من فوق الخيل لي خلاه بلاميربطو حيت عارفو مغايمشي فين وقرب جهتها تاوقف قدامها واستنشقات عطرو الرجولي لقوي.. كيشوف فيها بشوفاتو المظلمين لي ماتعرفيش اش كيقصد بيهوم.. سرطات ريقها ومع بغات تهضر بان ليها تحنى وجلس قدامها قفازي كيربط ليها السيور وهي تحل عينيها على جهدهوم من الحركة لي دار وقبل ماتستوعب سمعاتو نطق بصوتو الخشن: كنتي تتقلبي عليا؟؟
قبل دقائق كانت تتفكر فيه ودابا هاهو قدامها جالس كيصاوب ليها السيور السبرديلة.. تصرف لي خلى رحيل تجمد وعينيها يتفيكساو عليه ولي زاد على مابيها هو كلامو لي نطق بيه ولي كان الحقيقة لي بينها وبين نفسها معتارفة بيهااا.. قبل ماتجي لهنا كانت تتمنى تشوفو حيت حسات بالحنين ليه ولكلاموو.. ولكن طبعا مغاتقدرش تعتارف ليه وتقولها ليه حيت كرامتها مغاتسمحش ليها.. فاقت من سهوتها على حركتو ملي ناض او وقف قدامهاا وهو داير يديه فجياب سروال التوني لي لابس.. وعينو عليها هي لي رمشات بعويناتها عدة مرات قبل ماتقول بصوت حاولات ماأمكن تخليه يبان طبيعي:أنا كنت غير تانتمشى ونسرح رجلي وماعرفت كيف طرا تاوصلت لهنا
نوح:(قاد لكاسكيط لي كان لابس ونطق بهدوء) هاد لبلاصة بعيدة على بلاصة التدريب وحد مكيوصل ليها
رحيل:(هزات راسها بكبرياء فاش حسات بالقمعة من كلامو ونطقات بجدية)سمحلي مكنتش عارفة
(سكتات ملي سمعات تلفونها صونى بنمرة إدريس وجوباتو فلبلاصة) ألو بابا
إدريس:فينك ابنتي
رحيل:أنا غير هناا واش سيدرا خرجات؟
إدريس:اه راه بدات تدريبهاا
رحيل:واخا أنا جايا
قطعات معاه وهزات عينيها فنوح لي كان قلب وجهو جنب وقالت:غايخصني نمشي شكرا
ضارت تمشي وهي تسمعو نطق بصوتو الخشن:تسنااااي
شافت فيه رحيل وهي هازة حاجبها وقلبها كيدق بسرعة متلهفة تعرف اش غايقول ليها وعلاش موقفها..
نوح:(بجدية)كاين طريق مختاصرة
رحيل:(بتساؤل)ملين؟؟
نوح:(تمشى جهة لخيل ديالو لي بقا فبلاصتو وشد لجامو ونطق بالتقالة)اجي تركبي
حلات عينيها من كلامو وعقلها فكرها فنهار زغبها الله وركبات فيه داك لخيل وديك الشوهة لي تشوهات معاه ونطقات بسرعة:لا لا بلاش غانمشي على رجلي حسن غير سير
نوح:(ببرود) لي بان ليك
ركب فوق لخيل باحترافية ورحيل غير متبعة ليه لعين وهو شاد ليه لجام وبدا كيحك ليه عنقو.. قبل ماينطالق بيه مخلي وراه رحيل لي فمها مترع من الصدمة.. متوقعاتوش يخليها ويمشي وكانت تاتسناه يزيد يحزرها ولا على الأقل يبين ليها أنه مهتم بيها كيف كان كيدير قبل.. ضورات راسها يمين وشمال كاتشوف راسها واقفة وسط أرض خضراااا ودوك الشجاري لعالين وهي معارفة فين تزيد والطريق الرجعة تنسى ليها مع كانت ساهية.. حكات راسها ونطقات بصوت هامس:كيفاش غانرجع أنا داباا
زفرات النفس ومع جات تحرك سمعات صوت لخيل وبان ليها نوح راجع جهتها ومع وصل خلى لخيل يخفف الحركة ويتمشى غير بشوية وسبقها وهي فاش شافت حركتو فهمات بلي دار هادشي باش تبعو يوريها الطريق وبيما أنها مبغاتش تركب فهو احتارم قرارها.. بقات غادة وعينيها عليه وعلى كتافو لواسعين لي تيتحركو مع حركة لخيل لي كان باين فيه مربي مع مولاه.. مدة وهوما غاديين فديك الطريق لمختاصرة ولي مكانتش بعيدة على بلاصة التدريب وغير وصلو نوح تحرك بلخيل جهة الإسطبل ورحيل رجعات لبلاصة فين خلات مها وباها لقاتهوم جالسين فدوك لكراسى دلخشب وسيدرا باقا تادرب.. تبسمات ليهوم رحيل وجلسات جنب إدريس لي نطق:تعطلتي فين كنتي
رحيل:كنت غير كانسرح رجلي ابابا (شافت فسيدرا لي شادة فلجام دسيديل وتتبسم بفرحة وحماس) بدات تتولف على لول
إدريس:ماشتيهاش قبيلة تحركات بيه بلا ماتكون المدربة معاها
رحيل:(شافت فيه)وايلي ماخافتش؟
تانيرت:(ضحات)الله يجيبك على خير كانت تاتموت بالضحك راه باباك دار ليها فيديو
مد ليها تلفون لي فيه فيديو لسيدرا وهي راكبة على الخيل لي غادي بيها بشوية وهي شادة لجامو والمدربة مكانتش مرفقاها كيف عادتها.. كاضور على البلاصة فين كايدربو تاشوية الخيل زرب فمشيتو وسيدرا بدات طلع وتنقز فوق ضهرو وصوت ضحكاتها تيتسمعو مجهدين..
تبسمات رحيل وعينيها على لفيديو لي كان زوين وعفوووي ولي زاد زينو ضحكات سيدرا لي كانو بحال شي دوا ليها هي.. تقطع لفيديو ورحيل شافت فمها:هههه طلعات بنتي زعايمية ههه
تانيرت:بزاااف گااااع تتشبه لواحد السيد كانعرفو تاهو من صغرو وهو زعايمي ومكيعرفش لخووف
قالتها وهي تتشوف فإدريس لي تبسم ونطق:معلوم راه نخشيشتي هاديك وضروري تكون تشبه لياا هه
رحيل:هاديك هي الدنيا ومافيها الاكانت بنتي تتشبه لجدهاا فحنانتو وفقلبو لكبير وزعايمية بحالو
تانيرت:(حطات يديها على كرشها وقالت) نتمنى حتى هادشي لي فكرشي يكون تيشبه ليه
إدريس:إن شاء الله
داخلة لإسطبل وهي شادة لجام سيديل لي كان غادي مع خطواتها والمدربة جنبها رادة لبال معاهاا.. وصلو لبلاصة فين تيبقا وحلات المدربة لباب ودخلاتو مور مازولات ليه السرج ولجام وخرجات سادة لباب وشافت فسيدرا لي نطقات:واخا نبقا معاه شوية؟
المدربة:(تبسمات ليها)واخا ولكن ردي لبال صافي وماتعطلييش
سيدرا:(حركات ليها راسها)واخا
مشات لمدربة وسيدرا جرات واحد الصندوق وقفات عليه تاتقادات الخيل لي مخرج راسو جهتها ومدات يديها تاتلمس جبهتو وهو مهبط راسو مع حركاتها لحنانين.. نطقات سيدرا بهمس تتوشوش ليها جنب ودنيه:واش عرفتي اسيديل نتا عزيز عليا بزاف وبغيت نديك لدار وتبقا تنيني حدايا ولكن نتا كبير بزاااااف ماشي بحال إيڤاانا صغيرة هي (حك راسو مع جنب وجهها وهي تبسمات) ولكن غانبقا نجي ديما نشوفك واخا ونجيب ليك ماكلتك ونبقا نبوسك ونعنقك
ضورات يديها على عنقو تاحط راسو على كتفها وبقات معنقاه ومخيفاااش منو نهائيا..
كان واقف بعيد ويديه فجياب الشورط السپور لي لابس ولكاسك على عنقو.. شعرو القهوي كيف لعادة مكربي ومخليه على راحتو ولابس تيشورت واسعة فلكحل.. عينو كانو كيشوفو فداك لمنظر لي قدامو بنظراتو لباردة ويديه مزير عليهوم.. نهار لول شاف فيه داك لخيل وهو مقرر يخليه ليه وتانوح وافق وبحكم أنه كيسافر بزاف ومكيجيش ديما لمغرب فنوح قرر يخلي داك لخيل من ظمن الخيول لي غايدربو بيهوم وهادشي كان عارفو زين العابدين وماعتارضش عليه ولكن شوفة سيدرا وهي معنقاه بهاد الطريقة ومقربة ليه وهو باين فيه متعود عليها خلات دمو يغلي.. قرب جهتها بخطوات سريعة وجرها بالجهد تابعد لخيل وبدا يصهل وسيدرا شافت فيه مخلوعة وغير شافت شكون وهي دير يديها على نصها وبدات تعوج ونطقات بغرور كبر من سنها:راس لكبالة علاش جريتيني
كان فاهم كلامها داكشي باش نطق بإنجليزيتو المتقونة:اش كاديري هناا وعلاش حاطة يديك لموسخين على حصاني
سيدرا:(حركات كتيفاتها ونطقات ببرائة)هااء ماعرفتش نتا اش تتقول
زين العابدين:(قرب جهتها وجرها من لفخونش تاهبط ليها راسها كيف دار معاها النهار لول ملي دخلات عليه لحمام وقال بصوت تقيل بالإنجليزية)اخر مرة تحطي يديك على حاجتي
قصحها عليها بدات تاضرب فيه ساعة ماتحركش وبقا تيشوف فيها وهي تاتقاتل معاه بحال شي قطيطة ونطقات بصوت عالي:اااااي قصحتيني بعد ليا من شعري مااااامي
طلق منها زين العابدين وهي طلعات راسها وعينيها تغرغرو بالدموع ولكن مانزلاتهومش وبدات تتشوف فيه وهي جامعة شفايفها قدامهاا تاهزات عينيها وراه وهي تنطق بصوت باااكي:ماي بلو آيز
تخطات زين العابدين ومشات تتجري جهة نوح لي كان داخل كيقلب على ولدو وغير شاف سيدرا جايا قبالتو وهي مكمشة دوك الشنايف او وجهها حمر وهو يتحنى لعندها حال يديه تاجات تلاحت عليه وهزها عندو وهي عنقاتو وبدات تبكي.. بدا يدوز يديه على شعرها وضهرها بحنية وعينو على ولدو لي ضار كيشوف فيه وهو مخنزر دوك لحجبان ومن وجهو باين معصب.. هز فيه نوح حجبانو ونطق بصوت حنين لسيدرا لي بين يديه:ششش مال تاتبيرت إينو تتبكي
سيدرا:(تاتهضر ونص كلامها ممفهومش مع لبكية)جرررني من شعري وغووت عليا ماي بلو آيز هء هء
قرب نوح جهة زين العابدين لي باقي واقف فبلاصتو وقال بجدية باينة فصوتو:اش درتي لبنت تابكيتيها؟؟
زين العابدين:(نطق بهدوء وعينو فعين باه) هي قربات لحاجتي
نوح:(كمش حجبانو)حاجتك؟؟
زين العابدين:لخيل ديالي لي نتا مخليهوم يدربو عليه وبيما أنني رجعت دابا فمغايبقاش يخرج لتدريب حيت مولاه رجع
مكانتش سيدرا عارفة اش كيقولو حيت تايدوي بلونغلي.. هزات راسها من عنق نوح وخناينها دايزين وعينيها حمرين بلبكاا.. تتشوف فزين العابدين وتخنزر فيه وهو بدرور خنزر فيها ورجع شاف فنوح لي قال بصوتو الخشن:لخيل ديالك مولفها حيت هي كادرب عليه وعزيز عليها كنتي تهضر بلخاطر معاها ماشي تمد يديك عليها وتبكيها
زين العابدين:(زير على يديه وقال ببرود)تستاهل
قال كلامو وخرج من الإسبطل مخلي نوح متبع ليه الشوفة وسيدرا تاهي لي نطقات:ماعزيزش عليه هو خايب
نوح:(تبسم ليه بحنية) وعلاش؟
سيدرا:(تاتشرح ليه وهي مكمشة حجبانها)حيت ديما تيغوت عليا ومتيعرفش يهضر بلعربية هو كسوول
نوح:(ضحك بخفوت) فين جدك؟
سيدرا:بّا ديدي لهيه هو ومامي وتانيرت إينو
تحرك بيها من تم غاديين لفين جالس إدريس مع رحيل وتانيرت مجمعين تانطقات سيدرا:مااامي
إدريس:(ناض سلم على نوح)ولد لحاج اش خبارك
نوح:الحمدلله اسي إدريس ونتا؟
إدريس:ولله الحمد
نوح:(وجه كلامو لرحيل وتانيرت)السلام أوعليكوم
تانيرت:وعليكوم السلام
جلسات سيدرا جنب رحيل لي ركزات فوجه بنتها وعينيها لي شفارهوم باقي فازگين ونطقات وهي مكمشة حجبانها:كنتي تتبكي اسيدرا؟
سيدرا:مامي هاداك غوت عليا
رحيل:(كمشات حجبانها) شكون؟
سيدرا:راس لكبالة مامي
هزات رحيل عينيها فنوح لي كان بدورو كيشوف فيها ورجعات شافت فسيدرا:وعلاش غوت عليك؟
سيدرا:(حركات كتافها ببرائة)ماعرفتش مامي أنا مادرت ليه والو والله
رحيل:(قالت وهي معاجبها حال)الامادرتي ليه والو علاش يغوت عليك؟؟
كلامها والطريقة باش قالتها كان باين بلي معجبهاش لحال.. وهادشي حس بيه نوح لي هز حاجبو ونطق بصوتو التقيل: سوء تفاهم وراني دويت معاه
إدريس:(تبسم) هادو هوما لولاد ضروري مايكون بناتهوم لمشاكيل والصداع
تانيرت:على سهلتي هاد لبخوشة راه تاهي مساهلاش ههه
سيدرا:(مكمشة حجبانها) مادرت والو تانيرت إينو
تانيرت:صافي تيقناك
نوح:سي إدريس خليونا نمشيو لدار حسن من لجلسة هنا
إدريس:خصنا نمشيو مرة خرا إن شاء الله
نوح:(حط يديه على كتفو ونطق بجدية)زيد اسي إدريس وباركة من لفشوش
إدريس:(تبسم)ههه اوا سير عالله (شاف فرحيل وتانيرت) يالاهو
ناضت رحيل شادة يد سيدرا وقربات عند مها لي تاتمشى بشوية عليها وتابعييين إدريس ونوح لي سبقوهوم شوية كايهضرو بناتهوم.. تاوصلو لحدا طوموبيل إدريس ومد لكونطاكط لنوح لي ركب بلاصتو ولخرين لور وتحرك جهة الفيرمة لداخل لبلاصة لي عمر رحيل وصلات ليها.. كانت المسافة بيناتهوم لابأس بها حيت بلاصة التدريب خارجة على برا والفيرمة لداخل.. وصلو لباب دلحديد لي كان مسدود وكلاكصونا نوح لعساس لي جا كيجري حل لباب ورحيل عينيها متبعين ديك الطريق لي دخلو منها ولي كانت فالجنب الخضورية والشجر ولورد مزروع وباين فيه الإهتمام.. وقفات الطوموبيل ونزلات رحيل لي مقدراتش تخبي انبهارها من لمنظر دلفيرمة لي كاتشوفها أول مرة.. جا لعساس لي مد ليه نوح الكونطاكط باش يدي الطوموبيل يبلاصيها وشاف فإدريس مبسم:مرحبا بيكوم
إدريس:(كيشوف تاهو فالبلاصة)ماشاء الله تبدلات على اخر مرة جيت ليها
نوح:(تبسم بخفوت) لورد والشاريج لي تصلح خلاوها تبان مختالفة خليونا ندخلو لداخل
إدريس:بسم الله
طلعو فواحد ثلاتة ديال الدريجات عاد وصلو لباب لكبير ديال الدار وحلو نوح ودخلو.. كانت تتبان بحال شي دار الضيافة وفيها تاهي الخصة فالوسط كاتنزل لماااء والطابع البلدي غالب عليها.. جات جهتو مرا كبيرة فالعمر ونطقات:ولد لحاج الكاسكروط واجد
نوح:واخا امي جميعة
تحركو جهة الصالة لي كانت مفرشة باخر مكاين فالطلامط والتريات دلفريع وفيها تلاتة طبالي كبار وحدة عامرة بلكاسكروط.. جلسو فوق السدادر وجميعة جابت صينية دأتاي حطاتها قدام نوح ومشات تجيب لقهوة
نوح:(شاف سيدرا)تشربي أتااي ولابغيتي حاجة خرا
سيدرا:بغيت عصييير
نوح:(شاف فجميعة لي جابت صينية دلقهوة ونطق)مي جميعة جيبي لعصير لي باغيه واجي نتي وبّا سالم تاكلو معانا
جميعة:واخا اولدي
سيدرا:شكون هادي؟
نوح:هادي مرات بّا سالم داك الراجل لكبير لي خلينا مع الخيول
سيدرا:اه عرفتو ضريف وعزيز عليا بزاف
إدريس:يالاه جيتي ليوم ؟
نوح: فالصباح جيت أنا وزين العابدين نبدلو لجو شوية
إدريس:هي غاتباتو هنا؟
نوح:على حساب زين وشنو باغي
مع دكرو دخل زين العابدين ولي نطق:سلام
الكل: وعليكوم السلام
خنزرات فيه سيدرا لي بداات تتاكل فالكيكة دالشكلاط وهو جلس جنب نوح لي شاف فيه وقال بهدوء:شنو تبغي تشرب؟
زين العابدين:كافي
----
فالرياض كانت سناء فبيتها والسعدية معاها تاتستف ليها الحوايج وهي جالسة فوق الفوطوي تاتهضر أبيل مع بدر الدين..
بدر الدين:حبيبة صافا
سناء:وي ونتا راك هنا ولارجعتي لداخلة
بدر الدين:(بهدوء)صافا وي راني رجعت لبارح حيت عندي شي خدمة وكان حضوري ضروري
سناء:اه مزيان نيت أنا غانرجع فهاد ليامات لفاس
بدر الدين:غاتهضري مع باباك؟؟
سناء:وي ضروري ماخصني ندوي معاه ونحاول نقنعو بزواجنا
بدر الدين:(عينو مركزة فداكشي لي قدامو) الابغيتي نقدر نمشي معاك وندويو معاه بزوج احبيبة
سناء:نو بلاش نشوفو بعدا أنا وديك الساعة نشوف اش غايقول
بدر الدين:واخا نتي ردي لبال لراسك احبيبة ديالي والاحتاجيتي شي حاجة أنا هنا
سناء:(تبسمات) داكوغ تهلا فراسك نكملو من بعد
مع قطع لخط حرك قطعة الشطرنج وهز عينو فإلياس لي نطق بهدوء:لحد الساعة مافهمتش علاش ناوي
بدر الدين:ملي تكون تتلعب الشطرنج خص عقلك يكون حاضر باش ماتخليش لي قدامك يربحك اإلياس
إلياس:مقلتيش شنو غادير دابا واش نتا غاتزوج بيهاا؟
بدر الدين:(تبسم تبسيمة مريضة ونطق بنبرة باردة) واش أنا ديال الزواج اإليااس
إلياس:(تبسم تبسيمة دات معنى) نتا والزواج مكتفاهموش الشاااف ولكن نتا علياش عوال
بدر الدين:(ضور عينو جهة لبيسي لي كان محطوط جنبو ومحلول على تصاور رحيل ونطق بهمس كالفحيح معوج راسو) كل خييييير..
متكية فوق داك السداري لي شوية ويتحفر بقوة جلاسها ونعاسها فيه.. لايحة عينيها فداك التلفازة لي مربعة وباين فيها واكلة الدق وقديمة.. ساهية ومكيناش فهاد لعالم وعقلها مرجعها ليامات لعز لي كانت عايشة فيه وكيف كانت وكيف دابا ولات.. وقفات البنت لي معاها قدام باب البيت تتشوف فيها كيفاش مكيناش فهاد لعالم وقربات جهتها ونطقات:فين سارحة عجوووول
مجوباتهااش حيت أصلا مسمعاتش ليها وعقلها طااير وممعاهاش.. حركاتها لبنت تاشافت فيها وقالت:كاندوي معاك فين سهيتي؟
ميس:(كمشات حجبانها) فحالتي كيف وليت بحال شي شمكارة
قلبات لخرى عينيها: حمدي الله وشكريه خرجتي من دوك ربعة دلحيووووط هاداك هو الأهم
ميس:(قالت بسخرية) خرجت من لحبس وراني محبوسة فهاد الدار لاخروج لادخوووول
هزات فيها حجبانها وقالت:حيت نتي مباغاش تخرجي وتخدمي وتحركي شوية مالي يانا خرجت وهاني كانصوڤي راسي فلمينااااج ديري بحالي
ميس:(خرجات فيها عينيها)ههه أنا نخدم فلميناااج واش من نيتك أنا عمري حطيت يدي فشغالات الدار والناس هي لي مولفة تخدمني ماشي نخدمها
طبطات ليها على فخدها وقالت بجدية:فيقي احبيبة من دوك أحلام اليقضة دياااالك داكشي لي كنتي فيه مبقااااش باااااح مشى والاباغااا تعيشي خصك تخدمي دوك لفلوس لي عندك راه بديتي تخسريهوم وشوية غاتلقاي يدك والريح باااش غاتعيشي فنظاااارك هاااا كيف أنا كانضرب الكرفي تانتي ضربيه معااايااا وخلينا نتعاونو على الزمان
ميس:(قلبات عينيها)الاكان على لفلوس ماتخافيش غادي نعطيك فلوسك ولكن باش نخدم ونوسخ يدي هي لي عمرها تكوووون
ناضت من حداها وقالت:لي عندي قلتو اميس نوضي بدلي عليك هاد لعگز لي نتي فيه شوفي غير حالتك كيف وليتي بحال شي وحدة نايضة من لقبر
خلاتها فبلاصتها وكلامها يضور فدماغها شوية ناضت غادة جهة الطواليط ودخلات تتشوف فديك لمرايا لي معلقة تمااا.. فرق كبير بين ملي خرجات من لحبس ودابااا كانت غادة وتتضعاف وتحت عينيها زراااق وكحاااال بقوة السهيييير.. أما واحد الشعر ففقد لمعانو بقوة مابقاتش تادير ليه لسوان لي مولفة وتتهتم بيه.. وكلكوم كم وديك السكتريس لي مشوهة ليها وجهها فكم اااااخر.. تنهدات وقلبات الطريق خارجة من تم غادة لبيت لي تتنعس فيها جبدات جلابة لبساتها ولبسات زيف على شعرها وكيف عادتها لواتو على جهة حنكها مغطية بيه ديك الضربة.. مشات لجهة الصاك حلاتو وشافت فلفلوس لي عطاها علي ولي قربو يساليو وهي تنهد وخدات ميتين درهم ولي بقا رجعاتو بلاصتو ولبسات عليها صندالة وخرجات من الدار غادة جهة الشانطي باش تشد طاكسي.. شيرات لواحد الطاكسي وركبات فيه مور ماوراتو فين غاتمشي وقلبات عينيها تتشوف فالطريق مدة وهي على حالها تانطق مول الطاكسي:وصلنا اختي
خلصاتو ونزلات تتشوف فالحومة وبالضبط باب دار عائلة إسلام لي كان مسدود.. بقات كاضور راسها هنا ولهيه وهي غادة لجهة باب الدار تاوقفات قدامو وهي تصوني فالسرسار.. كانت حاسة بواحد التوثر رهييب وكانت موجدة نفسيتها لقاءها بيه مرة خراا وهاد لخطوة كانت تتفكر فيها من شحال هادي وكانت باغاا ديرها.. سمعات صوت لخطوات وشوية تحل لباب وبانت ليها هاجر مرات خو إسلام..
هاجر:(حلات فيها عينيها ونطقات بعصبية)نتي اش جااايا دييري هنا اقليلة العفة
ميس:(شافت فيها ببرود)باغا نشوف إسلام
هاجر:(حطات يد على يد وقالت ممتيقاش) واباااز اختي على برودة دمك وعلى قصوحية فگورتك جاياا بلاحشما بلاحيااا تاتقلبي على السيد ونسيتي اش درتي فيه وشنو دوز بسبابك (حمرات فيها الشوفة)اوا الله يمسخك الموووسخة درقي عليا كمارتك قبل ماندير فيك شرع يدي
ردات لباب باش تسدو وهي تحبسها يد ميس لي شافت فيها وهي مكمشة حجبانها:هادشي بيني وبين إسلام نتي مادخليش فيه ودابا سيري كلميه ليااا قولي ليه ميس باغا تشوفك
هاجر:(ضحكات من نيتها وطلعاتها ونزلاتها) نسيتي نهار جنازة لمرحوم اش دار ملي شافك الانسيتي نفكرك بلي كان غايطيح الروح داك النهار كون ماربي لطف والرجال حبسوه بنتي ليا واقيلا باقي عايشة فالأحلام ديالك ويسحاب ليك راه إسلام باقي هو هاداك لي تتعرفي انوووضي احنينتي راه السيد ضرب عليك بكروة حمراا باركة حياتو لي خرجتي عليها وبنتو لي قتلتيهاا اعدوة الله
مكانتش باغا تقبل كلام هاجر لي كان صحيح ومكانتش باغا تعتارف بلي إسلام لي كان يموت عليها نساها وكرهها.. كانت عارفة راسها أنها خسرات كلشي وخسرات الحياة لي كانت عايشاهاا.. حياة العز والفشوش لي كانت متعودة عليها من نهار موت باها ومشات عاشت مع بدر الدين من تما وهي فالعز تانهار زغبها راسها وتبعات شيطانها لي زين ليها حياتها مع عدنان وخلاها تعمى وماتشوفش بلي الرااجل دلمعقول هو راجلها لي سمحات فيه وسمحات فبنتها وفلخر هاهي كاتحصد اش زرعات..
ميس:(نطقات بكبرياء كلام لي كاتحاول تقنع بيه روحها) إسلام كيبغيني ولانتي ولاغيرك غاتقدرو تفرقوني على راجلي
هاجر:(طلعاتها ونزلاتها بشوفات ناقصة )نبگ لي تيبغيك السيد نسااااااك وبداا حيااااتو مع لي تستاهلو ونتي بقاي تكدبي على راسك نيت الكدوب ماشي ليكوم فالدم يخليها تريكة..
سدات لباب فوجهها مخلياه تتشوف قدامها ساهية فكلام هاجر لي رجعها لنهار الجنازة والمنظر لي كانت شافت دإسلام ورحيل مع بعض وكيفاش كان مرتاح معاهاا ومعاهوم تابنت خوهاا.. إذا إحساسها كان صادق وإسلام ورحيل بناتهوم شي حاجة لي كلشي عارفهاا... زيرات على يديهاا وقلبات طريقها وهي مكتشوفش قدامها بقوة الأعصاب لي ركبوها وبصوت محلف قالت:والله لكانت ليكووووم وليك نتي اللفعة لي خرجات لينا على حياتنا وعائلتنا..
----
ملي كلاو الكاسكروط ناض نوح هو وإدريس ومعاهوم سيدرا خارجين يتمشاو فالجنان وتانيرت بقات متكية مع عيات بلمشي وبقات معاه رحيل تاهي لي كانت متكية جنبها تتخربق فتلفونها مدة عاد ضارت جهة مها لقاتها نعسات.. ناضت من بلاصتها وعينيها كيضورو هنا ولهيه تابانت ليها جميعة خارجة من واحد لباب وهي تبسم ليها رحيل ونطقات:ماشفتيش بابا؟
جميعة:غايكون ابنيتي فالجنان
رحيل:فين واش بعاديين؟
جميعة:لا ضوري غير على الدار وزيدي شوية غاتلقايهوم تم
رحيل:واخا شكراا
خلاتها رحيل وخرجات من لباب ديال الدار ولهواء بارد كيضرب فوجهها وزيفها كان الجو مبرد ليوم وتاشميشة مبقاتش.. تبعات النعت لي عطاتها جميعة وفنفس لوقت تاتخضر عويناتها بالمناظر الطبيعية تاوصلات لجنان لي كان حاجة خرااا بالخضورية ودوك الشجاري وداكشي لي زارعين.. تبسمات رحيل فاش سمعات صوت سيدرا لي كان عالي وباين فيها فرحانة ومرتاحة.. تبعات الصوت تاوصلات عندهوم وبان ليها إدريس جالس فداك الربيع ونوح هاز سيدرا فوق كتافو باش تقطف الليمون.. مع قربات جهتهوم ضار عندها إدريس لي تبسم:اجي ابنتي
رحيل:(مشات عندو وجلسات حداه ونطقات بتبسيمة) شكاديرو
سيدرا:(نطقات بفرحة)ماااامي شوفيني أنا وليت طوووويلة ههه
رحيل:(هزات فيهوم لعين وماتجي غير فنوح وتبسمات ليه بخفوت) اه امامي ردي لبال
نزلها نوح وهي قربات تتجري عند رحيل تلاحت فحجرها ونطقات تتنهج:مامي جبت فريزات وتوتاااات بزاااااف وتاليمونات
رحيل:اييه وفينهوم؟
سيدرا:عند بّا ديدي قال ليا يغسلهوم عاد نميميهوم مامي
رحيل:واخا
ضارت عند نوح لقاتو جالس أونفاص معاها مزول لكاسكيط وبدا كيرجع شعروو لور ونطق بهدوء:كيف جاتك البلاصة اسي إدريس
إدريس:مخيييرة الطبيعة زوينة
نوح:(أشار ليه لواحد لبلاصة)باقي نمشيو لهيه تشوف الشاريج لي تصاوب
إدريس:إن شاء الله (شاف فرحيل)فين خليتي ماماك
رحيل:ناعسة
إدريس:(شاف فساعتو)واحد الشوية ونتحركو من هنا
نوح:(حك لحيتو ونطق بخشونة)خليك تاتعشى وسير
إدريس:الله يجعل البراكة اولد لحاج وزيد خلينا الدراري فالدار بوحدهوم
نوح:(ربع يديه وتكى على واحد الشجرة)عيط ليهوم يجيو اسي إدريس ولعشاا راه دايرين بحسابكوووم
سيدرا:(شافت فإدريس)وصافي بّا ديدي نبقاو هنايااا وناكلو فريزات وتوتاااات ونمشيو لهيه نشوفو المااا
نوح:(تبسم ليها)اجي اتاتبيرت إينو عندي
ناضت سيدرا عندو ورحيل غير كاتشوف وهي ساكتة.. وقتاش بنتها تعلقااات بيه وبغاتو لهاد الدرجة وهي من النوع لي مكيتعلقش فالناااس وحدودية وماشي لي جاا وضحك ليها غاتبغيه لا بلعكس هي والله وماكنتي نيتك صافية وحنين وقلبك بيض لا بغاتك.. حطات راسها على كتف باها وعينيها عليهوم.. كانت سيدرا جالسة ليه فحجرو تتمد ليه الفلايل لي دايرة فالجيب وهو مكمش حجبانو كيقاد ليها شعرها وباين فيه مركز فشنو كيدير.. تبسمات رحيل وماقال ليها راسها تصور داك الديكور لي عجبها.. هزات تلفونها بلاماتفرط راسها وبدات تصور وإدريس كيشوف فيها جنب عينيه ولكن مانطقش.. مدة وهي تصور فيهوم تاسمعات إدريس نطق:غانمشي نعيط لمحمد طه
رحيل :واخا
ناض مخليهوم على جلستهوم وسيدرا شافت فرحيل وبدات تاضور راسها ونطقات بفرحة:مامي شوفي ماي بلو آيز صاوب ليا شعري جيت زوينة ياكاااا
رحيل:اه اماما جيتي فنة
سيدرا:(عنقات نوح وحطات حنكها على حنكو ونطقات بحب)نتا زوين بزاف ماي بلو آيز وعزيز عليا بزااااف
نوح:(عنقها بيد وحدة وقال بتبسيمة) تانتي زوينة بزاف وعزيزة عليا
سيدرا:(شافت فيه)قداش؟
نوح:(تحنى جهتها هامس ليها بخشونة)قد السماا
سيدرا:(ضارت جهة رحيل وقالت)ومامي واش عزيزة عليك تاهي؟
لهضرة دسيدرا كانت عفوية ولكن بالنسبة لرحيل كانت هضرة لي خلات جميع حواسها ينتابهو ليه وفداخلها كانت متحمسة تعرف جوابو ليها.. هزات عينيها كاتشوف فيه وتسناه يهضر ويقول لي عندو وفالمقابل تاهو هز عينو فيها وفديك اللحظة ماهبطاتش عينيها بقات مفيكسياهوم وتاهو سكت وبقا غير كيشوف فيهاا.. ضورات سيدرا راسها جهة رحيل ورجعات شافت فنوح ومدات يديها مضورة ليه وجهو باش يشوف فيها ونطقات مكمشة حجبانها:ماي بلو آيز مجاوبتينيش أناا واش مامي تاهي عزيزة عليك؟
نوح:(تبسم ليها وجر نيفها بصباعو تاتعوجات تاضحك ونطق بصوت خشن)نتي لي عزيزة عليا
مكانش الجواب لي كاتسنى تسمعو شي لي خلاها تضور وجهها وهي معاجبها حال وتاتقلب فعينيها بحال شي مونيكة وتسرط فالقمعة لي عطاها بطريقة غير مباشرة..
سيدرا:(شدات يديه ونطقات بتساؤل)وعلاش مامي ماعزيزاش عليك ماي بلو آيز؟
نوح:(شاف فرحيل لي ودنيها معاهوم واخا قالبة وجهها تاتشوف فالخضورية ولعب بلسانو ففمو قبل مايشوف فسيدرا وينطق بالتقالة)حيت فيها لبسالات
شهقات رحيل وهي تتشوف فيه ومخرجة عينيها على جهدهوم من كلامو أما سيدرا فبدات تاضحك وشافت فمها وقالت وهي تدافع عليهاا:لااا مامي مكديرش بيتيز ماي بلو آيز مامي زوووينة شوف
قلبات ليه وجهو تاني جهة رحيل باش يشوفها ورحيل هزات فيه حجبانو وقلبات وجهها عليها وهي مرضياش بكلامو لي قال ليهاا وباغا تجاوبو غير شادة راسها بزز قدام سيدرا..
نوح:(شاف فسيدرا ونطق بهدوء)يالاه نمشيو نشوفو لما لي كاين لهيه
سيدرا:(ناضت ومشات عند رحيل ونطقات بحماس) مامي يالاه نمشيو
رحيل:(مشافتش فنوح وقالت بهدوء)تايجي جدك باش ميقلبش علينااا
سيدرا:هااا بّا ديدي جاااا (مشات تتجري لعندو تاهزها ونطقات)فين كنتي بّا ديدي؟؟
إدريس:مشيت نهضر مع محمد طه
سيدرا:(حنات وجهها جهتو )غايجيو بّا ديدي؟
إدريس:اه غايجيو
نوح:(قرب جهتهوم وقال وهو كيقاد فالكاسكيط لي لابس)خلينا نمشيو نشوفو الشاريج لي لهيه
إدريس: اييه واخا (شاف فرحيل لي باقي فبلاصتها)زيدي ابنتي
رحيل:(شافت فنوح لي كان عاطيها بالضهر ونطقات بالنفخة)لاغير سيروو أنا غانبقا هناا
إدريس:واخا لي بان ليك
سيدرا:مامي مغاتمشيش معانااا
رحيل:لا امامي غير سيري نتي وجدك وردي لبااال واخاا
سيدرا:واخا مامي
تحرك نوح هو لول سابقهوم عاد تبعو إدريس لي هاز سيدرا ورحيل بقات تتشوف فيهوم وفيه هو بالخصوص وكيفاش ماشافش فيها وماتسوق گاع ليهاا وزيد لكلام لي قال قبل شوية ولي خلى مزاجها يتقلب وعقلها يسرح فشنو قااال.. حطات راسها على ديك الشجرة لي متكية عليها وجبدات تلفونها مدوزة لخط لأسماء لي بعد زوج رنات جوباتهاا:هيلووو
رحيل:فينكوم؟
أسماء:لقيتينا كنلبسو حوايجنا باش نجيو عندكوووم
رحيل:واش كلكوم جايين
أسماء:اه وتاداك خونا حيت هو لي غايوصلنااا
رحيل:(مكمشة حجبانها)شكووون واااش إسلام؟
أسماء:هممم شكون من غيرو ولى مداحس معانا بحاال الإ مخليه لينا جدي فلورث
رحيل:(تبسمات)هههه مفهمتكش أنا علاش مكتحمليهش وديما مدابزين
أسماء:ماعنديش معااااه مكيتسرطش لياا تقيل على لقلب اوووف
رحيل:واسمعي جيبي معاك شارجوري راه التلفون شوية ويطفى واخا
أسماء:صافي تبغي حاجة خرا؟؟
رحيل:لاهاد الساعة جيبي ليا غير الشارجور وصاف اااه نسيت دوايا مجبتوووش حيت مكنتش دايرة بحسابي
أسماء:هزيتو وحطيتو فصاكي غير تهنااي
رحيل:يحفظك يالاه باي تاتجيو
قطعات معاها ومشات لفايس بدات كاطلع وتنزل فيه وتفرج فلفيديوات تاجاتها فكرة وقررات طبقهاا.. مشات جهة الغوشيغش وهي تكتب "نوح السليماني" ولكن مطلعش ليهاا داكشي علاش كتباتها بلفرونسي ونفس الشي مطلعش ليها تاكونط بداك السمية.. كمشات شفايفها مستغربة كيفاش ماعندوش كونط فايسبوك.. رجعات تاتفرح فواحد لفيديو ديال الرسم ساهية فيه تاسمعات صوت شي حد كيلهث بالجهد وهي ضور جنبها وبان ليها واحد لكلب قدو قدااااش فلكحل كيشبه لكلاب لبوليييس لايح لسانوو وكيلهث وكيشوف فيها.. سرطات رحيل ريقهاا وقلبها رجع يضرب وعينيها مفيكسياهوم عليه.. مدات يديها وبشوية ناضت تاوقفات وهو ينبح ليها وكحز جهتها وهي غير شافتو كحز طلقاتها بغوووتة كاتصمك وضااارت تتجري وتغوت ولكلب وراها كيجري وينبح.. تتجري بلاعقل وحلقها خارج بلغوااات معارفة فين تصد وفين تمشي غير غادة عالله فولارها بقوة الجرى تحل وبيدها صحيحة بدات تتصاوبو وهي باقا تتجري ومع دلك شعرها خارج من جناب.. ضارت براسها وشافت فلكلب لي قريب ليها وزادت غوتات وكسيرات تاحسات براسها مجرورة من يديهاا وقبل ماتهز راسها وتشوف شكون يد خرا تمدات وجراتها من قرفادتها خاشية ليها راسها فصدر دافئ..
يتبع...
التعليقات
لا توجد تعليقات بعد، كن أول من يعلق.