محتوى القصة
غير نطق بكلامو وهو يتسمع صوت الزغاريت لي طلقات تانيرت وأسماء أما لخرين كان شي يشوف فشي مصدوومين ولكن دغياا توگضو وبانت فرحتهوم فوجاههوم وهوما كيسولو وقتاااش طلب عاود يديها لزواااج من غيرها هي.. كلثوم لي كانو عينيها خارجين والعافية شاعلة فالداخل ديالهاا.. ناضت من بلاصتها وهي تشوفها أسماء لي نطقات:فين غادة اماما
كلثوم:(تبسمات بهدوء)غانمشي نشرب دواياا ابنتي ونرجع
غير خرجات من الصالة وهي تزرب فخطاويها غادة لبيت ومع دخلات طرقاتو وهزات التلفون ومشات لجهة الشرجم حلاتوو ودوزات نمرة بدر الدين لي كان تيصوني تاقطع.. رجعات تاتصوني عليه وهي معصبة وباغا تقول ليه لخباار لي سمعات ساعة مكيجااوبوش.. زفرات بعصبية ونطقات:جاوب الخراا جاااوب
بقات غادة جايا فبيتها والعافية نايضة فيها على ماسمعات.. صونى تلفونها ولقاتو هو وجوباتو بزربة بصوت هامس منفاعل:مااااالك مكتجاوبنيش من صباح كنصوني باش نقول ليك اش كاين
بدر الدين:(ببرود)طلقيني اش باغا
كلثوم:ولد لحاج غايجي غدا باش يطلب رحيل لزواج
السكات.. كان تيتسمع غير السكاات من طرف بدر الدين شي لي خلاهاا تكمش حجبانها وترجع تعيط ليه:ألو بدر بدر
تقطع لخط وبقات تاتشوف وهي مفاهمة والو ومعرفااش اش غايدير..مسحات لابيل كيف لعادة ومشات شربات الدوا ونزلات لتحت باش ماتخليهومش يشكوو فيها وعقلها كيخمم فردة فعل بدر الدين الغريبة..
----
صوت أنفااس عالية كيتسمعو وسط داك البيرو.. عينيه حمرين كيف نقطة الدم ويديه لي شاد بيها التلفون كان مزير عليه تابياااضت ليه.. وكلام لي نطقات كلثوم بدا يتعاود فدماغو مخلي لجنون يسيطر عليه فهاد اللحظة.. هز يديه تال سماا زاف بالتلفووون تاتضرب مع لحيط لي قبالتو.. رجع ضرب يديه على لبيرو تاتشتت داكشي لي فوق منو وهزوو قلبوو وبدا يضور راسو بحال شي حمق وسط داك البيرو.. وأي حاجة شافها قدامو كااان تايضربهااا تادخل إلياس وهو كيشوف فيه كيضووور وسط دااك لبيرو بحال شي ثور هااايج كولو ولاحمرر والحالة دلبيرو كافية تخليه يعرف بلي سباب غضبو وهي شي حاجة عندها علاقة برحيل داكشي علاش مادخلش.. وقرر يبعد عليه ويخليه بوحدو حيت هو أكثر واحد عارف بدر فاش كيتعصب...
البيرو كان بحال شي ساحة حر'ب كلشي فيها مدمر.. الزاج مهرس فالأرض والبيرو مقلوب ورجليه لفوق والكرسي مهرس ومخلي طاش فالحيط لي ضربو بيه.. وداكشي لي كان فوق البيرو كولو تشتت فالأرض وتامن الريدوات محيدين من بلاصتهوم.. كان جالس وسط ديك الفوضى لي دار قبل دقائق معدودة وصدرو كيطلع وينزل والعرق نازل ليه من جبهتو لعنقو لي تنفخو فيه العرووق.. أما وجهو كانو ملامحو تيخلعوو وشوفة عينيه لمريضة كانت كافية تبين شنو كايضور فبااالو.. عوج راسو وعينو على يديه لي تجرحاات كيشوف فيها ونطق بنبرة صوت تتخلع: نتااا لعبتي مع واااحد مكتعرفوووش اولد لحاج ملي قربتي لعمووو ديالي درتي واحد لغلاااط لي غاتندم عليه حياااتك كلهااا (تبسم تبسيمة مريضة) ونتي اعموو غلطتي بزااااف معاياا وباقي تتغلطي ولكن نهار غاتخلصيهوم تاحد مغايفكك مني.. نتي معرفاااش اعمووو بلي نقتلللك بيدي ومانخليكش تكوني بعيدة علياا.. نتوما فرحو ونشطو وديرو فبالكوم بلي هادي هي أخررر فرحة ليكوووووم..
----
نزلات رحيل لتحت وغير دخلات لصالة وهي تزغرت أسمااء ولبنات بداو يصليو على النبي وتانيرت معاهوم أما كلثوم غير تاتبسم بلخف باش ماتبينش اااش كاين.. حشموهاا تاولات حمراا ودخلات وهي عاضة على شفتهاا والإحراج لي حسات بيه لايوصف خصوصا باها كاين تاهو معاهوم.. جلسات جنب أسماء وطلعاتها معاها بواحد لقرصة ونطقات بخفوت:مغاتبقاااش فيك
ريان:(نطق بضحك)عوينات الجلبانة طاااح عليك سر لعرااايس هههه
محمد طه:(غمزها)نااااس خبااو عليناا اسيدي وخلاونا اخر من يعلم
ريان:بنااادم خااايب العشير شتي
محمد طه:وايييه هانية كلشي يفوت
ريان:وتبقاا غير لافووووت هههههه
رحيل:(ضرباتهوم بمخدة) هيهيهي هنيونا
أسماء:بابا قلتي غدا غايجيو فالليل وحنا باقي موجدنا تاشي حاجة
هنا قلبها كان تيڤيبري فاش سمعات لكلامها حيت مكانتش عارفة بلي غايجيو غدا وبهاد الزربة..
إدريس:(بجدية) مكاين ماتوجدو الماكلة غاتجي من برا وغايجي لي يتكلف بيها نتوما غير وجدو راسكوم وصاااف
تانيرت:فكرو غير فشنو غاتلبسوو وشنو غاتلبس بنتي لحبيبة
غزلان:لالة لعروسة خصهاا تكووون مميزة غداا
سيدرا:(شافت فيها وهي مفاهمااش)شكون لعروسة؟
غزلان:ماماك
سيدرا:(قربات جهتها ونطقات ببرائة)مامي علاش نتي عرووسة؟
أسماء:حيت ماميك غاتزووج
سيدرا:(نقزات فرحانة)واش امامي غاتلبسي لاغوب بحال لبخانسيس
رحيل:(تبسمات ليها)نتي هي لبخانسيس ديالي
سيدرا:(عنقاتها) يعني مامي نتي غاتكوني بحال لكوين ولكن شكون هو لكينغ؟
أسماء:(غمزات رحيل)ماي بلو آيز هههه
دازت الليلة وهوما يخططو ويفصلو شنو غايديرو غدا وشنو غايلبسو وكلشي فرحاان وناشط.. صبح الصبااح والشميشة شرقات سماهاا مخلياها تنوور.. تاوحدة فالبنات ممشات لخدمتهاا وغير فاقو فطروو ومشات أسماء تاتوجد لحمام لرحيل حيت عارفااها ماغاتبغيش تمشي لديال الزنقة.. وجداتو ليهاا وحطات ليها لبرودويات والتبريمة ديال الدات وخرجات لعندها لقاتها جالسة فالكرسي وشعرها دايرة ليه مسك ديال اوراق السدر وغير وصلات لوقيتة دخلات لحمام ومعاها أسماء باش تغسل ليها شعرها وتعاونها.. اهتمات بيها وخلاتها ترخى وسط داك لبخاار ويدين أسماء لي كيديرو ليها مساج لراااسها.. خدات وقت كاافي وغير سالات خرجات مخلياها تشلل وتوضى.. ملوية فالبينوار ولحنيكات شوية ويطرطقو بالسخونية.. وغادة لبيتها لقات أسماء موجدة ليها لأونصومبل لي غاتلبس لداخل ولگام دلبرودويات ديال الدات فوق النموسية.. عطرات جسمهاا وشعرهاا تاخلات روايح يتشمو منهاا.. لبسات غير دوبياس وفوق منو بنوار قصير فالغوز بارد.. وجلسات تنشف شعرها وعينيها على لمكانة لي كانت الستة دلعشية.. كلما قرب لوقت تتحس بقلبها تيزيدو دقاتو يتعلاو.. سمعات الدقان ومشات تاتمختر حلات لباب لقاتها تانيرت جايبة بواطة دلبيتزا وموناضة ليها ونطقات بتبسيمة:بصحة اماما لحمام هاكي كولي ومتبقايش بجوع راه باباك لي جابها ليك
رحيل:(عنقاتها)ماما أنا خايفة
تانيرت:(عنقاتها بحنية) حاولي اماما مانخليش المشاعر السلبية تسيطر عليك وماعمرك تقارني الماضي بشي لي كاتعيشيه داباا سمعتي استمتعي بهاد ليام حيت عمرها مغاتعاود وكنعيشوها مرة وحدة
رحيل:(حركات راسها باه)واش وجدتو كلشي
تانيرت: السربايا تايستفو الطبااسل والماكلة غاتجي ملي يقربو الناس ياكلو باش تبقا سخونة ماتخمميش فهادشي وكولي باش تجي أسماء تقادك راه خليتها تتوجد راسها ولبنات باش تبقاي نتي لخرة حيت هوما غايجيو مور صلاة العشاا
تبسمات ليها رحيل ومشات تانيرت تكمل شغالها وهي جلسات تتاكل تاجات عندها سيدرا لقاتها تاهي دوشات ليها غزلان وكلاتها ولبساتها كسيوة باش تهنى منها ومشطات ليها شعرها وبوكلاتو ليها ودارت ليها شوية دلمكياج دايرة ليها خاطرها وسيدرا غاتموت بالفرحة وغير سالات وهي تبوسها ومشات تنشر زينها على محمد طه وريان وجدها طبعا.. خرجات رحيل من لبيت مشات لحمام غسلات سنانها وفطريقها تلاقات كلثوم لي طلعاتها ونزلاتها بعينيها وهي تتشوفها بداك لبنوار لقصير وشعرها لمطلوق وباقي سارد ونطقات مبسمة ليها:الله يكمل عليك بالخير ابنتي
رحيل:آمين اخالتي
رجعات لبيتها وكلثوم محيداتش عينيها عليها تاتشوفها غلاظت على كيف كااانت وفورمتها زادت برزاات.. عوجات شفايفها ونطقات بخفوت:شلااا
جات أسماء هازة ماطريالها وكانت مصايبة وجهها ديجاا بمكياج خفيف وشعرها بوكلاتو لتحت..
رحيل:(متكية راسها على لكرسي)بغيت داكشي خفيف بحالك
أسماء:(تتقاد لمطريال)هنينا وسكتي
دارت ليها كريم مرطب هو لول عاد مشطات ليها حجبانها ودارت ليها برايمر عاد بدات لخدمة دلمعقول ورحيل مغمضة ليها عينيها مخلياهاا تفنن.. كانت أسماء مركزة ولحق يتقال تاتصرع لمك اب.. تفننات ليها فوجهها بمك اب ترابي مخليا خضورية عينيها تبرز كثرر ورموشها طلعاتهوم ليهاا مزيان وعكر نيوود فالقهوي.. شافت رحيل راسها جات زوينة وداكشي كيف بغاتو خلاتها تصاوب ليها شعرهاا وأسماء كمشات حجبانها:كون غير نقصتيه شوية؟
رحيل:وي غانقصو ولى تيمحني فلغسيل والابغيت نصاوبو يدي كيطيحو
أسماء:ضربي ليه شي تقطيعة مقووودة
رحيل:ضروري
قداتها وسالات ومشات تلبس حوايجها حيت قربو يجيو مخلياها تاهي تلبس وتكمل لي بقاا.. اختيارها وقع على واحد لقفطان دأسماء فالخضر ملكي توبو ستان.. كيجي محلول من الصدر بقصة مربعة وفيه لحزام ويديه محلولين ومفرفين.. لبساتو ومع هي وافية شوية على أسماء جاها فن مبين فورمتها كثر.. لبسات فولار مناسب ليه ودارت ليه شدة جديدة ورشات ريحتها ولبسات خاتمها ديال الدهب مع گرميط فقط وصندالة بلاطالون بحكم هي غير فالدار.. شافت راسها فالمرايا الطويلة كانت إطلالتها بسيطة محتشمة وزوينة.. حطات يديها على قلبهاا ونطقات بصوت هامس: ياربي دير شي تاويل دلخيرر
فلتحت كان إدريس بإطلالتو البلدية ودبك الجلابة السوسدية لي جاتو على فصالتو..وتانيرت كانت جنبو بفراشة فالزرق بارد تاهي مقادة ودايرة مك اب مناسب سنها وشعرها مطلوق عادي.. كانو واقفين على الشغل والسربايا تاصونى تلفون إدريس بنمرة نوح وهو يخرج باش يجاوبو.. أما كلثوم كانت تاهي بقفطان جالسة غير تاتحنزز محاملاش تشوف الفرحة فوجههوم.. رجع إدريس لي نطق بتبسيمة:عيط ليا ولد لحاج راه جايين ولكن هو مغايجيش معاهوم غايتعطل شوية حيت عندو شي غراااض يقضيه..
كان إسلام جالس فالصالة بسروال دجين وشوميز وجنبو سيدرا لي تاتصور بتلفونو وتبوزا وهو مبسم تبانت ليه أسماء جاية بسروال الدجين مع جابادور فلفوق تاتجي محلولة وشعر مصاوب.. طلعها ونزلها وهي جايا تشعل لمبيخرة لي فالصالة.. بقا متبع ليها لعين تاشافت فيه وهي هازة حاجبها وهو ينطق بخفوت: مالك اغزالي
خنزرات فيه أسماء ومعبراتووش وأصلا محملاش وجودو هناا.. أما هو عرف راسو عصبها وهادشي لي باغي.. طلقها بضحكة عالية وهي غادة تسب فيه تانطقات سيدرا:علاش تاضحك إسلامي
إسلام:والو اخنفوستي اجي نتصورو أنا وياك
هزها عندو كيتصور معاها وهي تتبسم وتبوزا مخلياه يتبسم بحنية ليها... دازت وقيتة لي وجدو فيها كلشي ورحيل كانت فبيت غزلان باش طل عليهوم من الشرجم حيت هي فبيتها لبالكون كيطل على الشارع لاخر.. طافية الضو او واقفة وسط الظلام وعينيها على الطوموبيلات لي كانو جايين وحدة عرفاتها دبيسان والثانية لا.. بلاصاو قدام الباب وتحل لباب نزل رؤوف كيف لعادة لابس لبيض وفنفس الطوموبيل نزل الحاج لحسن بجلابتو ومشى حل لباب لزاينة لي نزلات تاهي بجلابة دوبياس وبزيفها.. عاد نزلات رحمة بجلابة مخزانية فالبااج وشعرها كحل طويل لايحة عليه الشاال وهازة راسها بكبريااء ونخووة وبوشيط فيديهاا.. أما طوموبيل بيسان نزلات منها هي بفيست فالأزرق مع سروال توب كحل وسناء بكسيوة طويلة كحلة واخر شخص نزل كااان زين العابدين بسبور كيف عادتو.. عيون رحيل كانت تاتقلب عليه وسطهوم وقلبها متلهف بشوفتو.. بانو ليها تيهزو شي حاجة من لكوفر دطوموبيلات وداخلين لدار عاد دوزات الريدو ومشات تجلس وهي مكمشة حجبانها وتتسائل علاش مجاش معاهوم..
فلتحت كان إدريس تيستقبلهوم بتبسيمة على شفتو وجنبو تانيرت.. كانو مستقبلينهوم بالحليب والتمر وهادشي خلى رحمة تبسم بهدوء.. دخلو لصالة الجديدة المفرشة وكل واحد شد بلاصتو وحطو شنو جابو فوق الطبالي.. وكلثوم غير تتشوف فداكشي ولِمارك لي جايبين ليهاا ومبسمة زعمة راه فرحانة وهي لفعة تتسنى وقتاش تبخ سمها..
الحاج لحسن:ولدي نوح كان غايجي معانا ساعة خرجات ليه واحد لخدمة مقدرش يأجلهاا عليها سبقناه تايلحق علينا
إدريس:اه راه علمني الحاج ماعليش تانتوما راه فيكوم الكفاية مرحبا بيكوم
الحاح لحسن:الله يكبر بيك اسي إدريس
زاينة:(شافت فتانيرت) مانزاكمين أيلي مانيك أنتگيت "اش خبارك ابنتي كيف بقيتي"
تانيرت:لحمدلله اخالتي هاياغ ارنتسلاك " هاحنا اخالتي تنعديو"
هضرة تجبد هضرة والسربايا قايمين بالواجب ومكبرين بالضياف وسناء غير تاتشوف وتنوطي عندها وعقلها غايبة مع شيمااء.. أما رؤوف فادغيا نساجم مع ريان ومحمد طه مخلين لكبار يدويو فخاطرهوم ونفس الشي عند بيسان ولبناات.. كان زين العابدين مكمش حجبانو وباين فيه محاملش لمجية وغير بزز عليه باش جاا.. انساحبات أسماء غادة طل على رحيل لي كانت غادة جايا فالبيت عياات ماتصوني لبنات وتقول شي وحدة جوباتها.. مع تحل لباب وهي تنطق بعصبية:عاام باااش تجي
أسماء:(رمشات فيها)مالكي معصبة
رحيل:علااش هو مجاش معاهوم
أسماء:تهدني السيد خرجات ليه خدمة مهمة عليها جات عائلتو وهو غايلحق عليهوم
رحيل:(جلسات تتحرك رجليها بتوثر) أسماء أنا ممرتاحاااش قلبي مقبوووط علياا
أسماء:(عنقاتها ونطقات بخفوت) زولي دوك لوساويس لي فبااالك واراي تلفونك
جبدات ليها من غوغل سورة البقرة بصوت العجمي ونطقات:خليها مشعولة أنا غانزل لتحت واخا
طلقات القرآن ومشات ورحيل غير سمعات ليه وهي تحس بواحد التبوريشة طالعة معااها ويديها على قلبها لي مزير عليها والسبب معرفاتوش؟؟
دازت سعتاين لي تقدم فيها لعصير والحلوي والهضرة دايزة فالمجمع وكل مرة واحد فيهوم يشوف فساعتو ناض إدريس باش يصوني عليه كان تيصوني ولكن مكيجاوبش كمش حجبانو ورجع عندهوم وعقلو بدا يتشطن مع ولد لحاج.. أما بيسان كانت تاهي جالسة مع لبنات وفنفس الوقت تتصوني عليه بلاماتبين والو ساعة نفس الشي.. كتبات مساح لرؤوف "خويا مكيجاوبش جرب صوني عليه"
هز رؤوف عينو فيها فاش قرا لمساج ونطق موجه كلامو لمحمد طه:واخا توريني لحمام فين
نطقات غزلان لي كانت جالسة جنبهوم وسمعاتو:اجي معايا
هز فيها محمد طه حاجبو ورؤوف تبسم ليها وناض تبعها وغير دخل لحمام وهو يدوز لخط لخوه وكيف طراا مع لخرين تيصوني ومكيجاوبش.. كان جالس فوق لاشاس وباقي تيصوني مرة زوج تاكيرجع لخط وفلمرة اللخرة فاش صونى لقى تلفون طافي وشداتو لعلبة الصوتية..
باقي جالس فوق لاشاس كيعاود يصوني واخا التلفون طافي ولكن هو عندو أمل يلقاه شعلو عليها ماملش من التعيااط ولكن كيلقى نفس النتيجة داكشي علاش بدا يتشطن عليه.. ماخرجش فديك الساعة كيفكر تاطاح فبالو عثمان داكشي علاش دوز ليه لخط وغير جاوبو نطق بزربة:نوح معاك؟
عثمان:(مكمش حجبانو) لا هادي شي ساعة ونص باش تفارقت معاه علاش واش باقي ماوصل عندكوم
رؤوف:تت لا وتاتلفونو مكيجاوبش عليه ودابا طافي
عثمان:(حك لحيتو ونطق باهتمام) واهداا علياا أنا حدي قضيت معاه الشغل وتفارقنا
قطع عليه رؤوف وبدا يطلع معاه الزايد ملي عرف بلي ساعة ونص باش تفارق هو وعثمان.. ناض غادي جهة لاڤابو غسل يديه وعاد خرج من تم راجع عندهوم وبيسان غير شافت وجهو لي باين فيه ماشي تال لهيه وهي تحدر على التلفون مسيفطة ليه مساج "أمدرا؟"
رؤوف � مكيجاوبش ودابا تلفونو طافي
بيسان � تعطل بزاااف
رؤوف � بلاماتشطني بالك دابا يجي
شاف فيها رؤوف وغمض عينيه بمعنى بلاماتخافي وكيطمنها واخا هو براسو ممطمنش..رجع كيدوي مع الدراري بعقل مرفوع.. وماشي غير هو لي كان بالو مشطون إنما تاإدريس لي واخا جالس مع الجماعة تايهضر إلاأنه ممرتاحش..
ريح خفيفة داخلة من الشرجم مخلية الخوامي يتحركو ببطء.. ظلام فالبيت من غير نور الگمرة لي مضوي جزء من لبيت.. جالسة فوق النموسية بقفطانها وجامعة رجليها عندهاا وحاطة دقنها فوق ركابيها وعينيها ساهيين فالفراغ.. كان القرآن باقي مطلوووق فالتلفون مخلي أنفاسها تهدى وديك لعقدة لي فالداخل ديالها بدات تاتحل شوية بشوية كلما سمعات كلمات الله عز وجل لي تايتسربو من التلفون وتاتخليها تفاجى.. هزات راسها وضوراتو جهة التلفون أو وذنيها لقطو ليها واحد الآية.. بسم الله الرحمان الرحيم {" قَالَ لَا تَخَافَا ۖ إِنَّنِي مَعَكُمَا أَسْمَعُ وَأَرَىٰ "(46) سورة طه}.. عند هاد الأية دموعها نزلو.. كانت بحال شي رسالة وصلاتها فالوقت المناسب.. ناضت ببطء شديد وقفطانها الأخضر الملكي الطويل كيتجرجر فالأرض.. غادة جهة الشرجم وزولات الخامية وهزات عينيها فسمااء لي كانت صافية ومنورة بنجوم ولگمرة.. بقات ساكتة تاتشوف فيها بواحد لهدوء غريب تاتسمعات صوت الطوموبيل وهي تهبط عينيهاا وماتجي غير فالجيپ ديال نوح لي كانت داخلة من لحومة.. قلبها كان بحال شي بركان على وشك الانفجاار ملي شافتو وتبسيمة خفيفة زينات شفايفهاا وهي حاطة يديها على صدرهاا تاتنفس بالراحة وبينها وبين نفسها تاتنطق "الحمدلله" وقفات الطوموبيل بعيد شوية على الدار وسكتها برك على بطون مطلع الزاج عاد حل لباب ونزل بطولو الفارع.. كان بستيل كلاسيكي أنيق خلى عيون رحيل تعلق عليه.. سروال توب فالرماادي غامق مع شوميز بيضاا وفوق منها جيلي فالرمااادي فيها واحد سنسلة معلقة بطريقة كلاسيكية عاد لاڤيست فوق منهوم وفجيبها منديل بيض وداير گغافااط كحلة مخططة بالبيض.. شعرو كان ضاربو فالجنااب ومنقص اللحية.. كان جاي بخطوات تقيلة ويديه ليسرية فجيب سروال.. كل خطوة كيخطيها كانت رحيل تتحس بأنفاسها تتزيد تعلى.. وقبل مايوصل لباب هز راسو بالخطف جهتها وهي غير شافتو رجعات خطوة لور وهي مخرجة عينيها وحنوكها تزنگو من لحصلة لي حصلها أما نوح فحدر راسو وحركو بلاحول وتبسيمة خفيفة على شفتو يادوب بانت
وهو مكمل طريقو لجهة لباب.. صونى فالسرسار وبقا واقف تاتحل لباب وبان ليه إدريس لي تبسم ونطق بمزاح:اش هاد التعطيلة امولاي السلطان
نوح:(دخل وهو ناطق بتبسيمة) سموحات النسيب
تسالمو سلام رجولي ودخلو مع بعض والبقية غير شافو نوح الروح رجعات فيهوم وأسماء مشات تاطير عند رحيل تعلمها وطمنها ومعرفااش بلي هي أول وحدة شافتو.. جلس جنب جدو وهو باقي خاشي يديه ليسرية فجيبو وسيدرا غير شافتو جرات جهتو تاوقفات بين رجليه ونطقات بحماس: ماي بلو آيز توحشتك
دفنات راسها فصدرو مضورة يديها بزوج ورا ضهرو وهو تبسم وبادلها تعنيقة بيد وحدة.. كان زين العابدين متبع المنظر بعيون شرسة ونظرات الكره موجهة لسيدرا.. تاهبط عينيها وهو يقشع ديك لفاصمة لي كاتبان فيد نوح لي خاشيها فالجيب وشوفاتو تبدلو باهتمام واضح وبصوت عالي نطق بالإنجليزية:الواليد مالك داير لفاصمة ليديك..
الكل انتابه لصوت زين العابدين لي كان مرتافع مع كان السكات فالصالة وأول وحدة نقزات نايضة من بلاصتها هي رحمة لي قربات جهتو وفعينيها الخوف وجلسات جنبو ونطقات وهي تاتشوف فيديه ونطقات بخوف:ولدي مااالك انشوف
جرات يديه بشوية باش تبان ليها كلها ملوية بالفاصمة والصباع بوحدهوم لي كيبانو.. شداتها بشوية خايفة توعتو وقلبهاا قفز من بلاصتو وعينيها تغرغرو بالدموع:مال يديك
نوح:(كمش حجبانو بجدية وقرب جهتها وهو بايسها فجبهتها)يمّا ماوقع والو
رحمة:(مقدراش تخبي خوفها)كيغاش ماوقع والو ويديك كلها فاصمة؟؟
إدريس:(بجدية)ياك لباااس اولد لحاج
رحمة:واش هادشي علاش تعطلتي
نوح:(حك لحيتو ونطق بصوتو الخشن) ملي كنت جاي واحد زوج سخن عليهوم راسهوم باغيين يگريسيوني وأنا تفاهمت معاهوم..
رحمة:(حطات يديها على قلبها أو وجهها صفار) ياربي السلامة نتا بخير دابا
نوح:(درعها عندو خاشيها فيه وهي حاطة راسها على صدرو مخشية فيه ونطق وهو كيبوس ليها راسها) يمّا أنا بخير
تانيرت:الوقت خايبة وخصوصا الليل الحمدلله اولدي على سلامتك
إدريس:(تنهد) الحمدلله ملي خرجات على خير
نوح:(تبسم ليه بالخف) هادا مكان اسي إدريس
فجنب الصالة كانت سناء جالسة متبعة كلامهوم وشوفاتها باردين.. وهازة راسها لسماا وكل مرة تفرفر بعويناتها وتعوج.. همسات بصوت ساخر ماسمعو حد: همم باين لعروسة داخلة بفال زوين من دابا بداو لمشاكيل
أما كلثوم فكانت مركنة وغير حاضية بعينيها وبالها مشطون مع بدر لي حسو تقطع ومعرفااش هو علاش ناووي..
---
كانت جالسة رحيل فالكرسي وأسماء تتقاد ليها الروتوش دلمك اب مع فاش بكات خسرات عويناتهاا.. تقادات أسماء فالوقفة ونطقات بجدية:عاوت ليك العينين من لول وجبدت ليك الآيلاينر..
رحيل:(شافت راسها فلمرايا)صافي دابا مزيان
أسماء:صافي مهم غانزل نتي قادي عاود درتك وريحتك رشيها وديري فبالك بلي واحد شوية غانزلوك لتحت
سرطات رحيل ريقها وبدات تاضور عينيها وأسماء هازة فيها لحاجب:مالك سرطتي لسانك
رحيل:كون غير ساعفتوني بلامانزل
أسماء:(ضحكات بالجهد)ههههه من نيتك اوا هوما لاش جايين؟؟
رحيل:(بان فيها التوثر) هوما كيعرفوني ماشي شي وحدة غريبة وهادشي ماعندو تاشي معنى
أسماء:(بمكر)هي نشد بلاصتك
رحيل:(هزات فيها حاجبها ونطقات بتقة) هو أصلا مغايديهاش فيك غير تهناااي ابب
أسماء:(تكرشخات بالضحك)هههه هاي هاي على لحلوفة مالي اختي تاميديهاش فياا ناقصاني يد ولارجل
رحيل:(تكات على لكرسي بغرور وهي مبتسمة) تت ناقصك تكوني عوينات الجلبانة ههههه
أسماء:(تكات على الطابل دونوي ونطقات مبسمة) فهادي مكدبتيش السيد طيحوه لعوينات الالة هههه
رحيل:(رداتها ليها فالبلاصة)وإسلام طيحاتو لبوسة يالالة
قندشات أسماء وخنزرات فيها ورحيل طلقاتها بضحكة عالية مخلياهاا تتسب وتنگر:تفوو دكرنا السمن ولعسل لاش جابداه ليا أنا لاش؟؟
رحيل:(دارت كروة فوق الطابلة) نبصم ليك عليهاا بلي هو لي غاتدي مزاال وهاأنا هانتي
أسماء:(ميقات)تديه لموووت اختي مهم غانزل لتحت (وصلات لباب وحلاتو) نمشي نخضر عويناتي فولد لحاج يااختي هههه
سدات لباب بالزربة فاش بانت ليها رحيل هازة ريحة ومشات تاتضحك ورحيل تبسمات على هبال أسماء وعرفاهاا تتمازح معاها.. تنهدات وهزات فولارها تقادو والخلعة بدات تاطلع معاها فاش قرب لوقيتة دنزلولها..
الكلام مكيساليش وجميع المواضيع تفتحو وكلشي كيشارك من غير زين العابدين وسناء وكلثوم.. حك نوح لحيتو وضار جهة جدو شاف فيه بشوفة هو فهمها مزيااان داكشي علاش تقاد فالجلسة وتنحنح وكلشي انتابه ليه وهو مبسم ببشاشة ونطق بصوت رزين: بيما أن كلشي مجموع هنا (ضار جهة نوح وتبسم ليه بحنية وحط يدو على فخدو) ومولاي السلطان جاا ندخلو فالموضوع علياش جينا هاد الليلة.. كيف تتعرف اسي إدريس هادي مدة قليلة باش العائلات عرفو بعضياتهوم شفنا لمعدن والجوهر الحر ديالكوم وهادشي لي خلاناا نجيو قاصدينكوم وقصدنا شريف باش نطلبو يد بنتكوم رحيل لولدنا نوح على سنة الله ورسوله..
كانت أسماء تتفيلمي اللحظة بلامايعيق بيها تاشي حد باش تحتافض بيها رحيل حيت هاد النهار مميز ومغايتكررش..
إدريس:(تبسم ليه) الله يكبر بيك الحاج لحسن كلامك على راس ولعين ومن عندي أنا الله يجعل كلشي مبارك ومسعود ولكن كيف تتعرف الكلمة لخرة تتبقا دلبنت..
لحسن:مقلتي عيب اسي إدريس وحنا نيت باغيين نسمعو الجواب منهاا
حرك إدريس راسو لتانيرت لي فهماتو وناضت غادة لفوق.. ومع حلات لباب رحيل قفزات لاإراديا من بلاصتها وهي تتشوف فمها جايا عندها مبسمة ونطقات بحنان وهي حاطة يديها على وجهها:صلى عن النبي عليك ابنتي الله يحجبك من لعين ويبعد عليك ولاد لحر'ام ويخلي يامك كلها صفى وحلوة بحال لعسل الحر (شدات فيديها ونطقات بهدوء) خلينا ابنتي نزلو لتحت كلشي كيتسنااك..
رحيل:(شادة يديها وبصوت مرتاجف نطقات) قلبي كيضرب بالجهد..
شدات فيها تانيرت وشافت فيها بعيون كاتفيض بالحنية مخلياها ترتاح نسبياا... خرجو من البيت ورحيل كانت تتحس بخطواتها تقاال.. وكل درجة نزلات منها كانت تتحس بنسبة الأدرينالين غادة وكاترتافع فدمها.. أو واحد زوبعة نايضة فالداخل ديالها ربي لي عالم بيها.. كانت فرحانة وخايفة فنفس الوقت.. فرحانة حيت غاتجمع مع الشخص لي دق ليه قلبها وخايفة من رائحة الماضي.. ماحدها تاتنزل ماحد صوتهوم كيوصل لمسامعها ومع وقفات قدام الدخلة دالطبقة ودنيها لقطو صوتو الرجولي الخشن لي غير مزاد خلاهاا تلبك وتوثر.. زيرات على يد مهاا لي شافت فيها وتبسمات ليها:سمي الله ودخلي ابنتي
رحيل:(بصوت هامس)بسم الله
رمات لخطوة وغير دخلات لصالة كلشي سكت ولعيون تعلقات عليهاا.. أما هي فمكانتش قادرة تهز راسها وبقات حادراها وشادة فمها بالجهد وقلبها تيضرب فاش حسات بالأنضار متوجهة ليهاا.. دخلات لصالة وبداك الشوية دلعقل لي بقا عندها تمتمات بصوت يادوب كيتسمع: السلام أوعليكوم
ردو السلام عليها وهي ماعرفاتش واش غادي تمشي تجلس ولاتسلم داخت وكون ماصوت مها لي عتقاتها كون بقات مبندة فبلاصتهاا..
تانيرت:سلمي ابنتي على جداك زاينة
كانت زاينة هي لي فجنب الصالة على يديها ليمن وقفات ليها زاينة ومع هي قصيرة شوية على رحيل
شي لي خلاها تحنى وتعنقها زاينة بواحد لحظن دافئ ونطقات بصوت حنين:أكميحفظ ربي ايلي إيكملاون سلخير "الله يحفظك ابنتي ويكمل عليكوم بالخير"
رحيل:(بخفوت)آمين
دازت لجدو وتحنات باست ليه راسو ويديه احتراما وهو كيرضي عليها وتيشوف فيها مبسم وفرحان.. هزات عينيها وماتجي غير فعينيه الزرقين لي كيشوفو فيها بنظرة حنينة خلات قلبها يقفز من بلاصتو.. حدرات راسها وتخطاتو بلاماتسلم عليه غادة لعند رحمة مخلياه تيحك لحيتو وتيلعب بلسانو ففمو.. ناضت رحمة جهتها تاتشوف فيها ومغاتنكرش أنها عجباتها وزينها جاها طبيعي والشوفة فوجهها كيريح.. تبسمات ليها بهدوء وسلمات عليها بلابيز ناطقة بالرزانة: لباس عليك
رحيل: حمدالله
كملات رحيل سلامها مع بيسان وسناء أما رؤوف مامداتش ليه يديها وتاهو مامدش يدو.. تمشات بهدوء جهة إدريس لي طبطب على لبلاصة جنبو وتكونات حداه.. نقزات سيدرا بمرج كاسرة داك السكون لي حل فجأة:ماااامي جيتي زوينة بحااال لبخااانسيس ياك ماي بلو آيز ؟
سرطات رحيل ريقها وزادت غرقات فحوايجها أما نوح فكان مفيكسي عينو فيها ومانزلهااش ملي دخلات.. متكي على المخدة وطالق يديه ورا ضهر جدو..
إدريس:(شد يديها ونطق بهدوء)بنتي الناس باغيين يسمعو الموافقة ديالك
كانت تاتغرس ضغارها فيد باها بلاماتحس ولسانها تسرط..مهبطة راسها وبالها مايفكرها غير فنهار جا عاصم وطلب يديها.. رجفة سرات فداتها وحلات عينيها باغا تنفض ديك الدكرى السوداء وماتخليهاش تعكر مشاعر الفرحة لي تتحس بيهوم..وبصوت مرعود وخافت نطقات:مو موافقة
زعرتات أسمااء وتانيرت وتبسيمة ترسمات على وجه إدريس وهو جارها لعندو معنقها وبايسها على راسها وهي عينيها تغرغرو وتشبتات فحظن باهاا..
لحسن:(ضار جهة نوح وتبسم ليه بحنية)الله يجعل كلشي مبارك أو مسعود اولدي ودابا عاد غانرتااح
نوح:(باس راسو ونطق بصوت مبحوح)الله يخليك لينا الحااج ويطول فعمرك
كلشي فرح وناض يبارك ونوح هز عينو جهة زين العابدين لي كان تيشوف فيه بهدوء وغير جات شوفتو فعين باه وهو يحدر راسو مخلي نوح يتنهد بهدوء..
إدريس:اوا ملي سمعنا الموافقة نخليو لعرسان يجلسو بوحدهوم (شاف فرحيل)يالاه ابنتي نوضي دي ولد لحاج لصالة لي لفوق باش تقدرو تاخدو راحتكوم فالهضرة
ناض نوح هو لول كيقاد لاڤيست لي لابس غادي سابقها وهي ناضت تابعاه.. مضارش جهتها سابقها طالع فالدروج بخطوات تقيلة وهي موراه قلبها شوية ويسكت.. وصلو لطبقة الثانية ودخل نوح لصالة لي مكانتش مفرشة واخد راحتو وغادي جهة الشرجم لي كان محلول ورحيل قربات لعندو وهي تتلوي قفطانها بين يديها تاتحاول تحيد ستريس.. وقفات جنبو وبان فارق الطول بناتهوم مع مكانتش لابسة الطالون.. بقات ساكتة تاضور عينيها تاحسات بيه دار جهتها وتكى على الشرجم بالكود وخاشي يد فجيب السروال وكيشوف فيها وفرموشها الطوالين مروراً بحنيكاتها لمزنگيين واستقرو فشفايفها لي كانت تاتتعضهوم.. سهى فيهوم لمدة ونطق بصوت هادئ مناسب داك الهدوء لي محيط بيهوم: تكايسي عليهوم
رحيل:(سرطات ريقها ونطقات بلا ماتشوف فيهوم) شكون؟
نوح:(تحنى جهتها مقصر المسافة ونطق بصوت خشن) حبات الرمان
هزات فيه رحيل عينيها بنظرة خلاتو يسهى فيهوم كيف هي سهات فملامح وجهو الرجولية.. نظراتهوم كانت بحال شي مغناطيس كيجرهوم لبعضياتهوم.. رمشات رحيل بعويناتهاا والهضرة تلفات ليها ومبغاتش تكسر داك لجو لي خلى فرشات طير فمعدتها.. نظراتو ليها ربكوهاا وريحتو خلاتها تستنشق قدر كافي منها وتعبئ ريتها منهاا..
نوح:(نطق بنبرة خشنة مركز فيها الشوفة ساهي فخضورية عينيهاا) تكايسي علينا الفثنة
تبسمات بخفوت وهي مزولة عينيها على وجهو ورجعات تتشوف قدامها فلحومة لي كانت خاوية وحس لبشار مقطوع .. سكت تاهو ولكن مانزلش عينو عليها واخد راحتو ومخلي عينو يتمتعو بزينهاا السوسي.. هزات رحيل عينيها وماتجي غير فيديه لي فيها فاصمة ومع قوة التلفة والتحشيمة ترفعات ومرداتش ليه لبال.. كمشات حجبانها ونطقات بصوت باين فيه الاهتمام والخوف:مال يديك؟
نوح:(داك لخوف لي شاف فعينيها خلاه يتبسم بالخف وينطق بصوت هادئ حنين) ماتشطنيش بالك ماشي شي حاجة كبيرة
رحيل:(عينيها على يديه) مكضركش
نوح:(بصوت هامس)تت
رحيل:(بدون شعور نطقات) رد لبال لراسك مرة خرا
نوح:(باقي مبسم بلهداوة) هي لولة الفثنة
رجعات رحيل سكتات وهي تتشوف فالزنقة ورجع هو مراقبها بدون ملل تانطق بعد مدة..
نوح:(تنحنح ونطق بجدية) غانبقاو ساكتين؟
رحيل:(سرطات ريقها فاش سمعات نبرتو الجدية ونطقات بخفوت) شنو
نوح:(تقاد فوقفتو ونطق بخشونة) باغي نسمع شروطك
رحيل:(شجعات راسها وتاهي تقابلات معاه هازة فيه لعين وقالت بهدوء) مغاديش نجلس من خدمتي مور الزواج (قلبها دق من هاد لكلمة) وعائلتي غانبقا نجي عندهوم وقتما بغيت (وشافت فيه بنظرات جدية) وأهم حاجة بنتي غاتبقا ديما معايا
كان عاض على شفتو بنابو كيسمع لكلامهاا وشروطهاا بتركيز وجدية واضحة على ملامح وجهو.. وكل كلمة قالتها وخرجاتها من شفايفها نوطاها عندوو..
نوح:(حك لحيتو وشاف فيها بهدوء) خدمتك ماعمري غانحبسك عليها حيت أنا ممزوجش بيك باش نچلسك فالدار وبالنسبة لعائلتك تقدري تجي وقتما بغيتي ولكن قبل تعلميني (هز فيها حاجبو ونطق بصوت خشن جدي)ونهار لول فاش جيت لداركوم كنت عارفك ببنتك وقااابل بيك ببنتك وكيف عندي ولد مغانبغيهش يتفارق علياا تانتي عندك بنتك وأنا عمري غانفرقك عليهاا وغانعاملها بحال بنتي وكثر ونتمنى هاد لهضرة تسد هنا
جديتو فالموضوع خلاها تحس بالراحة هي عارفة مغايفرقهاش على سيدرا ولكن كان ضروري تزيد تأكدها ليه.. حركات راسها بهدوء وشافت فيه وهي ناطقة بخفوت:وشروطك؟
نوح:(تبسم ليها بالخف ونطق بهدوء) شروطي مكيتقالوش كيطبقو ديريكت
غمزها بالخف مخليها باغا تغرق فحوايجهاا وحاسة حناكها شوية ويطرطقو بالسخونية لي مجموعة فيهوم أما قلبها فكان تيشطح السالسا فهاد الساااعة.. رجعات شافت قدامهاا وهو هز عينو فساعتو ونطق بهدوء:خلينا نزلو
سبقها تاني نازل لتحت وهي بقات واقفة تاتنفس بالجهد.. وبدات تتنش على حنوكهاا تابردات عاد نزلات لتحت لقاتو رجع لبلاصتو حدا جدو.. تمشات جنب لبنات وجلسات حداهوم وهوما تيوشوشو ليها ويشدو فيها خلاوهاا تبغي طج بقوة الحشمة..
وصلات وقيتة دلعشا وناضو جميع لصالة فين كانو موجدين الطبالي بزوج بيان بخزونطي وداكشي دولوكس.. جلسو رجال بوحدهوم فطبلة ومن ندالة أسماء خلات لرحيل لكرسي لي جا قبالة نوح.. جلسات رحيل على مضض وهي مهبطة راسها وفالداخل ديالها تتحلف عليها غير تسالي وتبالي بيها.. تحطو لبلا يشهيو وسيدرا مخشية جنب جدها ونوح ونسات مها فديك الساعة.. كلاو من غير رحيل لي كانت كل دغمة تاتحس بيها تقيلة ففمها.. وهي حاسة بعينيه عليهاا.. تعشاو وناضو لصالة يشربو أتاي والكلام مكيساليش وتبسيمة إدريس مزينة شفايفو وهو جالس جنب نوح والحاج لحسن تيدويو.. تاوصلات لوقيتة وناض نوح كيشوف فإدريس ومد ليه يديه سلم عليه ونطق بمزاح:النسيب تهلاا فراسك والله يقوي الخير
إدريس:(عنقو) مرحبا بمولاي السلطاان تهلا تانتا فراسك
ناضو كيتسالمو البقية مع بعض ورحمة تبسمات لرحيل ونطقات بهدوء:تهلاي فراسك واخا
رحيل:(تبسمات ليها تاهي)تانتي تهلاي فراسك
وصلو معاهوم لباب ودعوهوم وسيدرا تادير باي باي لنوح لي كيردها ليها وقبل مايركب هز عينو فرحيل لي حاطة يديها على كتاف سيدرا وغمزها بالخف عاد ركب ومشى مخليها مبسمة وراحة غريبة حسات بيها..
----
فالخرجة دمراكش كان علي موقف طوموبيلتو فجنب الطريق وعينو على الطريق لي قليل فين كيدوزو فيها الطوموبيلات فداك لوقت المتأخر.. متكي على لكابو ديال الطوموبيل وبين يديه گارو تايسفو مخلي الدخان يتشكل فوق راسو بحال شي كثلة.. لاح ديك لبوينتة حدا خوتاتها فالأرض وهز عينو تيشوف فساعتوو.. مدة طويلة وهو على ديك لوقفة تابانت ليه طوموبيل مرسيديس لي من الشوفة عرفها شي لي خلاه يتقاد فالوقفة.. متبعها بعينو تاوقفات قدامو ونزل منهاا بهدوء كيقاد الجاكيط لي لابس مع الصباح بدا يطلع تحرك شوية دلبرد.. وتمشى بخطوات واتقة وعينو على علي لي كيشوف فيه بدورو تاوصل حداه بلاماينطق تكى جنبو على لكابو وهو باقي خاشي يديه فجياب الجاكيط ساكت وعاقد حجبانو..
علي:(تنهد ونطق وهو راجع لوضعيتو لولة) ملي شفتك تعطلتي قلت مبقيتيش غاتجي اولد لحاج
واقفة فالبالكون ببيجامة ستان وشعرها الطويل لي كان مصاوب تيلعب مع نسمات الريح ويغطي ملامحها لمبتاسمة.. حاضنة جسمها بيديها بزوج وعينيها كانو على السماا الصافية.. ملي صلاة الفجر والنعاس مبغاش يزور جفونها..كانت باقي متأثرة بسحر الليلة لي دازت ولي كانت بالنسبة ليها بحال شي حلمة لي مباغاش تفيق منها.. باقي بينها وبين نفسها ممتيقاش بلي هي غاتولي مرتو.. قلبها خفق بجنون ومشاعرها رجعات هاجت مرة خرا وحاسة بجسمها منمل عليها بحاال لاشي سرب دالنمل طالع معاها..ديك كلمة مرتو رجعات قلبات موازينها وخلاتها تبسم وتخاف...خوفها كان ولابد منو حيت المرحلة لي هي داخلة ليها سبق وعاشتها بأسواء أحداثها وتأزمات فيها نفسيتها وفقدات فيها شي حوايج مستحيل يرجعو.. تبدلات شخصيتها من ديك رحيل لي كانت تتعرف لوحدة أكثر نضج.. زفرات النفس وغمضات عينيها باغا تحبس عقلها من التفكير لي غادي ليها لداك الماضي لكحل..ديك النقطة لكحلة لي باغاا تمحيهااا بمرة وتعيش حياة عادية كيف هي باغاا ومع الشخص لي قلبها دق ليه وبغاااه.. الشخص لي من أول نهار شافتو فيه حسات بالأمان معااه.. مواقفو الرجولية وكلامو ليها كلشي فيه خلاها تعلق بيه بلاماتحس وقلبها ينجااارف ويخونهاا كلما شافتو تحس بلي داك لقلب مبقاش ليها إنما ليه.. تبسمات وهي عاضة على شنافتها تتفكر دوك الدقائق القليلة لي هضرو فيها مع بعض ولي كانو بالنسبة ليها كنز ثمين.. الفثنة تنهدات من داك اللقب لي توحشات تسمعو منو هو ولي كيخلي غرورها الأنثوي يرضى.. تنهدات ودخلات لبيت وغير شافت سيدرا لي ناعسة وهي تبسم بحب.. النعاس طاار والجوع هلك معدتها مع متعشاتش مزيان.. هزات فولارها لبساتو هو ولبنوار سترات بيه مفتنها لي باينين من لبيجامة حيت إسلام بايت هنا.. خرجات بهدوء نازلة لطبقة الثانية ومع قربات جهة الكوزينة كمشات عينيها فاش شافت الضوو مشعول.. شكون فايق فهاد لوقت؟ قربات بشوية ومع وقفات فالعتبة دلباب بان ليها إسلام جالس فالكرسي بشورط كحل مع بيل سماطي وشعرو مخربق.. وشاد بين يديه كاس دلماا وباين فيه ساهي ومن ملامح وجهو الحزينة قدرات تخمن مالو.. دخلات ومع سمع لحس هز عينو وتبسم ليها تبسيمة خفيفة ونطق بهدوء:منعستيش؟
رحيل:(جرات الكرسي قدامو ونطقات بهدوء)تت جاني الجوع وجيت نقلب على مناكل
إسلام:(بمزاح) هاديك غير الفرحة لي ماخلاتكش تنعسي
رحيل: ونتا علاش باقي فايق؟
إسلام:(حك لحيتو) مقدرتش نعس وصاف (كمل كلامو بصدق)فرحت ليك بزاف ارحيل بهاد الخطوة لي درتي ولد لحاج الله يعمر ليه الدار إنسان قد المسؤولية وراجل تعولي عليه بصح مكنعرفوش مزيااان ولكن المرات لي شفتو فيها خلاوني نشوف الجوهر الحر ديالو
رحيل:(تبسمات بخفوت)عارفة (تنهدات ورجعات شافت فوجهو ونطقات بهدوء)ونتا اإسلام وقتاش غادير هاد لخطوة؟
إسلام:(كمش حجبانو)مافهمتش؟ إينا خطوة؟
رحيل:(بجدية)نتا عارف أنا اش كنقصد واش نتا عاجباك حالتك هاكا؟
إسلام:(ببرود)مالها حالتي حمدلله أنا بخير
رحيل:نتا ماشي بخير نتا كتوهم راسك راك بخير باش تخفي داكشي لي فالداخل ديالك (سرطات ريقها) كاتبسم لناس وفقلبك عافية صعيب طفى.. كاتقول راك بخير ونتا من لداخل مدمر وربي لي عالم بحالك.. كل ليلة تتحط راسك فالمخدة تفكر شنو قاسيتي ودوزتي.. (حركات راسها باه) هادشي كولو أنا عايشاااه وتانتا عايشو حيت بزوجنا مرينا بواحد لحاجة لي دمراتنا من لداخل..
إسلام:(حس براسو تزير) واخا يدوزو عوام خرين عمري غانسى (صوتو تخنق) صورتها بين عيني ارحيل كل ليلة تانحط راسي على لمخدة كانشوف ضحكتها أو عينيها وهوما مبسمين لياا كانسمع صوتها فودني وهي تتعيط ليا بابا وريحتها باقي لاصقة فنيفي
هبط إسلام راسو عاض على شفتو مخرج فيه لحر وديك الدمعة لي كانت فعينو طاحت بالخف مخليا دموع رحيل يتجمعو فعينيها.. عارفة شعورو حيت تتعيش نفس الشي.. تاهي كل مرة تغمض فيها عينيها تاتشوف صورة جيداء مرسومة قبالتها.. يمكن هي تقدر تنسى كلشي ولكن عمرها مغاتقدر تنسى جيداء وبلي هي سبب تامشات من هاد الدنيا.. تزيرات رحيل من هاد لموضوع لي تفتح وبصوت مألم نطقات: عارفة عمرك غاتقدر تنساه كيف عمري مقادرة تاأنا نسى (سكتات تتسرط ديك لغصة لي فحلقها) ولكن اإسلام نتا خصك تكمل حياتك ومتبقاش حابس فبلاصة وحدة.. تكملها على قبل الناس لي كيبغيوك ولي هازين ليك لهم.. ماماك وخوتك وحنا..
إسلام:(حرك راسو بهدوء وناض من بلاصتو) تصبحي على خير
خرج وهو مقدرش يبقا ويكمل داك لحوار لي عارف بلي كولو صحيح وبلي كلامها على حق.. هو مبقاش عارف راسو شكون.. دقة الخيانة من الإنسانة لي كان عاطيها قيمة وباغيها ودقة موت ليليان خلاوه يتبدل.. وصل لفوق وهو واقف مزير على يديه كيتنفس بالجهد وحاس براسو تخنق من الموضوع لي كيحاول ينساه.. زفر النفس وتحرك غادي لبيت ريان تاسمع لباب تحل وضار بانت ليه أسماء خارجة من لحمام مكمشة حجبانها.. طلعها بديك لبيجامة بشورط وشعرها لي كان مخربق ورجع شاف فوجهها لي بان ليه صفر وهو يقرب جهتها ونطق بهمس:مال غزالي..
هزات راسها ملي سمعات كلامو وعاد انتبهات ليه.. مكانش عندها لونڤي تجاوبو ومهتماتش لداك لقب دغزالي لي ولى كيعيط ليها بيه.. باركة غير داك لوجع لي كيضرب فكرشها مخلي مزاجها يخسر.. ماتسوقاتش ليه وجات تخطاه ترجع لبيت وهو يحبسها ملي شدها من يديها كيشوف فوجهها ونطق بتبسيمة مستفزة: مال حسك مافيكش الصواب
أسماء:(نطقات بصوت هامس باش ماتفيق حد) طلق مني وفرقني عليك حيت مرشقاش ليا
إسلام:(جرها ليه وشدها مزير عليها وهي تاضرب فيه ونطق بهدوء) مال غزالي معصبة
أسماء:(لوجع مرضها وكلامو فقصها وخصوصا هاد الجرأة لي ولات فيه كمشات حجبانها) واش نتا مافيك نفس الخراا وغاتبقا حياتك كلها مدلول و
قبل ماتكملها كان شاد بيدو الثانية فكها مزير عليها لدرجة حسات بفكها غايتهرس وخرج فيها عينو ودغيا تسيفتو تبدلات وبصوت هامس كالفحيح نطق أو وجهو جنب وجهها:قسما بالله وتعاودي تخرجي هاد لكلام من فمك اأغزالي شي لي غانديرو فيك عمرو يطيح ليك فالباال سمعتي
كانت تتحرك بين يديه وقصوحية الشدة خلات عينيها يعمرو بدموع ومانزلاتهومش بل بقات تتشوف فيه بشوفات نااارية وهو تبسم بخفوت مكمل كلامو: سكت ليك بزااف ولكن ديري فبالك بلي ديك الضسارة دشحال هادي وقلة الأداب ديالك أنا لي غانربيك عليهوم
طلق من فكها وعينو كيشوفو فداك لطراس دصبعانو لي طلعو ففكها ورجع شاف فيها ببرود قبل مايطلقها وهي مخنزرة فيه ونطقات بكره:الله يعطيك لهرس فدوك ليدين اولد لقح*بة
مرمقها معاها على غفلة مخليها تشهق وعينيها عمرو دمووع أما هو خنزر فيها تخنزيرة قاصحة..هزات فيه لعين ودفلات على وجهو قبل ماتمشي لبيتها وهي معصبة منو ومن خوفها لي حسات بيه من كلامو.. بصح هي كادفع الجبهة وفيها لهضرة ولكن قدامو تتحس براسها ضعيفة.. وهادي لمرة الثالتة يهز يدو عليها وهادشي غير مكيزيد يحقدها عليه وحلفات بحلوفها بلي كل تصرفيقة عطاها غاترضها ليه بدوبل.. يمكن هو استاغل تواجدو فالدار ولكن غير بلاتي مغاتكونش هي أسماء الامارجعاتش حقهاا.. أما عند إسلام فبقا واقف فبلاصتو كيشوف فاليد لي ضرباتها وهو محاملش راسو.. ماشي من طبعو يهز يدو علي شي مرا ولكن هي راه تتصعرو وكلامها تايخليه يجن.. قلة الأدب لي فيها تاتخليه باغي يربيها.. زفر بعصبية وقلب طريقو لبيت ريان وهو باقي عاقد حجبانو..
---
تحل لباب دالرياض ودخل نوح بخطوات تقيلة ويديه فجيب الجاكيط لي لابس.. غادي بهدوء مدايرش لحس تاوصل لباب الجناح ديالو وهو يحلو ودخل وبلامايشعل الضو كمل طريقو وهو كيزول جاكيطو تاوصل لباب دشومبر وحلو داخل لبيت.. مد يديه لسااقطة ديال الضو وشعل إضاءة خفيفة منورة الشومبر...حرك راسو يمين وشمال مطرطقو ومشى جهة الدريسينغ روم علق جاكيطو فبلاصتها عاد خرج وهو كيحل صدايف لاشوميز غادي لحمام.. مخداش وقت بزاف كان خارح ملوي عليه فوطة فنصو التحتاني ورجع لدريسنغ لبس عليه شورط كحل قصير فقط ومع خرج من الدريسينغ عينو جات فشيماء لي كانت جالسة فالنموسية بشوميز دونوي فالحمر وفوق منو بنوار ستان فنفس اللون.. طالقة شعرها ودايرة مك اب جريء.. قلب وجهو فالخطفة لولة ممطولش فيها الشوفة وحجبانو تعقدو ونطق بصوتو الخشن وبنبرة صارمة:خرجي
هزات فيه عينيها لحمرين تتشوف فصدرو لعرياان ودوك لزايدو لي مرسومين وكتافو لعراض مرورا بعنقو لي كيبان ليها لعروق واقفين منفوخين.. ناضت من بلاصتها وقربات جهتو ومزولاتش عينيها عليه بينما هو مشافش فيهاا حدو مزير على يديه وفكوو لي بان مطراسي.. تاوقفات قدامو ونطقات بصوت باكي: لهاد الدرجة مقدرش تشوف فيااا
نوح:(نطق بصوت قوي صارم) ماتزيدش طيحي من قيمتك وخرجي من هناا
شيماء:(شهقات ببكاء) نوح أنا
خنزر وبعد عليها محاملش هاد لموقف لي حطاتو فيه.. غادي جهة الباب دشومبر حلو ولعب بلسانو ففمو بنبرة خلاتهاا ترعش: غدا فالصباح نفيق مانلقاكش هنا براااا
نقزات من بلاصتها فاش سمعات كلمتو لخرة لي كانت بصوت مجهد ومشات تتجري خارجة من لبيت ومعرفات عقلها فين كان ملي جات عندو فهاد لوقت وبديك الحالة.. أما هو رد لباب بالجهد تاتسمع صوتو فالجناح ومسح على لحيتو ونطق بصوت هامس:استغفر الله العلي العظيم
بقا تيرددها وهو غادي جهة النموسية جرر داك الكوفرلي بنثرة لايحو الأرض وهو مخنزر ومشى هز واحد جديد فرشو عاد تخشى بلاصتو وخدا تلفونو عمر لغڤي عاد حط راسو فوق المخدة مغمض عينو باش ينعس..
--
غادة جايا فبيتها تاترعد وعقلها غايخرج وسناء جالسة فالنموسية ببنوارها وعينيها منفوخين بالنعاس وحلاهوم بصدمة باقا ممتيقاش اش سمعات من شيماء لي قربات جهتها وجلسات حداها ونطقات تتبكي:مابغيتش نمشي باغااا نبقا حدااااه اسناء
سناء:(خنزرات فيها) واش عندك شي عقل واش عرفتي رااسك اش درتي حمدي الله مخرجكش فهاد لوقت وخلاك تال الصباااح
شيماء:أنا
سناء:(قطعاتها بعصبية)نتي اااش الحمااارة عارفة نووح متشدد فهاد القضية واش بنات عائلتو مكيهزش فيهوم الشوفة وتاسلام مكيسلمش مع النساا ونتي ماشية عندو بهاد لحالة بحال شي قح*بة تتقول ليه اجي ح*يني تستاهلي مقال ليك حوو فيك حيت لخفة لي فيك هي السباب وهانتي شدي فلبولة تسعين دابااا (خنزرات فيها)مكلخة
ناضت تمشي وشداتها شيماء تترغب فيها ونطقات بصوت باكي: ماباغااش نمشي هء هء عفااك عاونيني
سناء:ماعندي ماندير ليك هو قال كلمتو ونتي عارفة كلمتو متتنزلش الأرض..
ملي شيماء سمعات لخباار بلي نوح غايخطب حسات براسها جناات وحماقت ومبقات عارفة شنو دير.. خصوصا ملي عرفات شكون هي البنت لي اختار.. تما صافي باغا تهبل ونهارت وانهيارها خلى سناء تشعر بالشفقة عليها وتبقا فيها حال بنت خوها.. حظناتها وطبطات عليها وهي مباغاش تقبل اش عرفات.. حبسات راسها فالبيت وحاولات تدوي معاه ساعة مكانش تيبات فالرياض وهادشي غير مزاد جننها.. طلبات سناء تعاونها وهي وافقات حيت سناء كاتشوف بلي أن أنسب وحدة لنوح هي شيماء لي منهوم وفيهوم وهازة دمهوم.. هادشي كولو خلى سناء تعاون شيماء وتحاول تعطيها نصائح باش تحاول تقربهوم وهي لي اقترحات عليها تجي تسكن معاهوم باش تبقا قريبة ليه.. ودابا هاهي خربات اخر خيط يقدر يجمعها معاه بغباءها.. هي عارفة نوح ماعندوش مع الضسارة وجدي وبحال هاد لفعايل مكيدوزهومش بالساهل وبالفعل هانتيجة ديالها بانت ملي جرا عليها من الرياض.. خلاتها سناء ورجعات لبيتها ومبقاتش باغا تفكر فتاشي حاجة.. هي حاولات دخل وتصلح لي غايتصلح واخا مكانتش عارفة دوافع شيماء الحقيقية فاللول.. بغات تعاونها ولكن دابا هي غسلات يديها منها وخلاتها تعوم بحرها حيت هي بنفسها محملاتش داكشي لي دارت وكيفاش هبطات من قيمتهاا.. غمضات عينيها ونعسات بينما فالمقابل كانت شيماء جالسة كيف خلاتها سناء ساكتة وبين عينيه صورة رحيل لي غير ماخلات داك لحقد لي من جهتها يكبر..
---
حلات عينيها على صوت سيدرا لي جاي من برا وشافت فساعتها كانت العشرة.. ليوم مخداماش حيت نوح عطاها هاد اليوماين ترتاح فيهوم كيف خبرها بااهاا.. تبسمات بخفوت وناضت تتكسل وبكل نشاط بدات تتجمع بيتها وتهويه.. خدات بيجامة جديدة ومستلزماتها مع فوطة نقية وحلات لباب بشوية بانت ليها سيدرا تاتجري وإيڤانا تابعاهاا.. غلاظت بزاف وتهلو دسيدرا بان فيها.. تبسمات رحيل لسيدرا لي جات عنقاتها ونطقات بهدوء: إسلام كاين
سيدرا:لامامي مشى
حركات راسها ومشات لحمام تاخد دوش خفيف ومقاستش شعرها.. تعطرات كيف لعادة وخدات وقتها عاد خرجات ببجامة قصيرة مبينة سقانها لبيضين ولي كيبانو كيلمعو.. نزلات لتحت باش تفطر لقات باها كاين وجالس هو وكلثوم وتانيرت وغزلان وريان كيفطرو.. رحيل:صباح لخير (شافت فريان)مخدامش نتا؟
ريان:تت واخد راحة ليوم الالة لعروسة
تبسمات ليه رحيل وبدات تتفطر وعينين كلثوم عليهاا.. صونى تلفون إدريس وهو يجاوب بتبسيمة:ولد لحاج لباس
هزات رحيل راسها بزربة جهة باها فاش سمعاتو وبلاماتشعر ودنيها وحواسها كاملين نتابهو ليه وخصوصا فاش ناض هابط لتحت.. كمشات حجبانها وبقات تتسائل شنو كاين تابان ليها باها رجع وهو مبسم ونطق بهدوء:فرحتي اللولة سيري لوحي عليك شي عباية وفولارك ونزلي
ناضت رحيل تنفد كلام باها ومعرفاش لاش بغاهاا.. هبطات عندو وهو شد فيديها ونزلو لتحت وريان ولبقية تابعينهوم باغين يعرفو اش كاين.. حل إدريس لباب دبرا وخرج ورحيل موراه مفاهمة والو ومع قلبات راسها عينيها تحلو على جهدهوم وهي تتشوف فديك الطوموبيل لي كانت واقفة قدام الباب.. ولي زاد خلاها تصدم هو فاش شافت الطوموبيل لي كانت نفسها لي شافت فلميزون دڤواتيغ وعجباتها.. حلات فمها مصدومة وإدريس قرب جهتها ومد ليها واحد لبواطة فالكحل دلمليفة ونطق مبسم: هادا كادو دلخطبة من ولد لحاج
هزات عينيها فباها ممتيقااش اش تتسمع ورجعات شافت فالطوموبيل وقلبها بدا يخفق بسرعة من كلام باها..
ريان:(صفر)شكون بحالك اعوينات الجلبانة "Volkswagen Tiguan" دقة وحدة هههه
تانيرت:(فرحانة)بصحتك ابنتي
غزلان:(عنقات رحيل) سعداااتك هه
رحيل:(تبسمات وشدات البواطة من عند باها)شكرا
حلات لبواطة وبان ليها لكونطاكط ولحد الآن باقا ممتيقاش بلي ولات عندها طوموبيل خاصة بيها ديالها.. ولي زاد خلاها تفرح هو أنها نفس النوع لي بغات.. مشات جهتها وحلاتها تاتسمع صوتها لي خلى لبسمة تزيد توساع على شفتها وحلات لباب تتشوف فالكراسى لمغلفين ببلاستيكة.. جلسات فالكرسي وهي شادة لڤولون وفرحتها لمعات فعينيها.. كلشي فرح لتبسيمتها لي طالعة من لقلب خصوصاً إدريس وتانيرت وريان لي عرفوها مناش دازت.. من غير كلثوم لي هادشي لي كتشوف قدامها معجبهاش وماشي داكشي لي باغا تشوف.. مكمشة حجبانها ومستغربة من سكات بدر لحد الساعة..
----
جالس فالبيرو متكي ضهرو على لكرسي وكيضور التلفون فيديه وكيف عادتو ساكت كيخمم.. لعب بلسانو ففمو ورجع راسو لور متكيه على الكرسي وغمض عينوو..
🔙🔙
علي:(تنهد ونطق وهو راجع لوضعيتو لولة) ملي شفتك تعطلتي قلت مبقيتيش غاتجي اولد لحاج (جبد تاني من بكيتو گارو ومد لباكية لنوح لي خدا واحد وشعلو تاهو ونطق علي) داكشي لي قلتي ليا تأكدت منو؟
نوح:(هز فيه عينو وسف من داك لگارو قبل ماينطق بنبرتو الخشنة) شنو؟
علي:(حك حاجبو) كيف توقعتي اولد لحاج
نوح:(لعب بلسانو ففمو كيفكر عاد لاح لگارو لي باقي فيه نصو عفس عليه ونطق ببرود) مانحتاجش نقول ليك خدمتك
علي:(شاف فيه بهدوء محرك ليه راسو) نعس على جنب الراحة اولد لحاج
نوح:(تقاد فوقفتو كيقاد الجاكيط ونطق وهو غادي بنبرة جدية) هاحنا غانشوفو
🔜🔜
ريحة القهوة لمعطرة لي جايبة السعدية فصينية مالية الدنيا.. حطاتها فوق فالطبيلة وتحنات بيسان واخدة طويس ليها وغمضات عينيها كتستنشق ريحتها تاسمعات صوت رحمة لي نطقات بهدوء:باقي لدابا ممتيقاش بلي شيماء رجعات لفاس بلاماتسلم علينا ولاتودعنا
بيسان:(ببرود) غاتلقايها فهمات راسها مامتي ومشات
رحمة:(بجدية) كونتي تحشمي راه هاديك بنت خالك
بيسان:راه هي اماما لي مكتبغيش تحشم وزيدي دابا خويا راه غايتزوج يعني من الأحسن هي تفهم راسها وتمشي من هنا
سناء:(خنزرات فيهاا) هاديك لي تادوي عليها بديك الطريقة فواحد النهار كانت غاتكون مرات خوك
بيسان:(متكية على الكرسي) كاااانت اخالتو وماتنسايش بلي هاديك نتوما لي خطبتوها ليه نتي وماما ومشيتو عند خالو وهو گاعما مشى معاكووم وبقا مبعد عليهاا وعمرو هضرها ولاحاشاها ليهاا وفاش قرب وقت لعرس فسخ الزمر كولو وهادشي كافي يخليكوم تحيدوو من بالكوم بلي شيماء غاتكون عروسة خويااا
سناء:(نطقات بانفعال) بيسان عرفي اش تتخرجي من فمك وشيماااء تتبغي نوح ماشتيش حالتها ملي عرفاات وكيفاااش انهاارت من لخبااار أنا لي شفت دموعهاا وغواتهاا وحالتهاا وبقات فيا حيت هي مكتستاهلش هادشي
رحمة:(تنهدات) داكشي علاش قلت ليك ماتبقااايش تعطيها أمل وتخلي لبنت تبقا تحلم باش فلخر تصدم شفتي اش كنت تانقول ليك هانتي شوفي دابا اش طراا
سناء:(سرطات الفعلة لي دارت شيماء لبارح ونطقات ببرود)كنت تنقول واخا فسخ لخطبة فلخر غايرجع ليها ساعة غلطت وتأكدت ملي مشى خطب هاديك لبنت
بيسان:(هزات حجبانها)هاديك لبنت سميتها رحيل وقريب غاتكون مرات ولد لحاج وغاتهز سميتو اخالتو
سناء:(قلبات عينيها) هممم مالقى شكون يخطب وحدة مطلقة وعندها بنت مخلي بنت خالو لعزبة وغادي لهاديك وزعمة نتي ارحمة موافقة عليهاا بااز
رحمة:(زفرات بعصبية) شنو بغيتي ندير مثلا نقول لا وزايدون أنا لي كيهمني من هادشي كولو هو راحة ولدي وشنو باغي
سناء:اييه عرفناا ولكن كنتي تقولي ليه لا ماعجباتنيش عطيه تبريرات باش هوو ميخطبهااش
🔙🔙
كانت جالسة رحمة فجناحها تتمشط شعرها وتبخروو تاسمعات الدقان فلباب وبعدها بان ليها نوح لي كان جاي جهتها بخطوات تقيلة.. تحنى باسها فراسها وهي تنطق بحب:ولدي شحال هادي ماجيتي لريااض توحشتك (ضارت عندو وشدات يديه) نقول لسعدية توجد ليك متاكل
نوح:(نطق بجدية) زربان ايمّا جيت غير باش نعلمك ديري بحسابك هاد ليلة غانمشيو لعند سي إدريس باش نطلب يد بنتو رحيييل لزواج
رحمة:(حلات عينيها وفمها ونطقات بعدم تصديق) ولكن اولدي كيفاش اتخطب بنتو ياك هي عندها بنت و
نوح:(هز فيها حاجبو وبنفس النبرة الجدية نطق مقاطعها) يمّا بلاكثرة لغى لي ماعندها فايدة (شاف فيها بشوفة خلاتها ضرب طم) نتي تكلفي بشنو غانديو معاناا مانبغي تاحاجة ناقصة واخا
حركات رحمة راسها باه وهي ساكتة وهو تحنى باسها فراسها ونطق بتبسيمة خفيفة: غانمشي دابا لعشية ونتشاوفو
خرج من لجناح مخليها بلاصتها يابسة من الخبار لي جاا لاحهوم فوجهها.. تنهدات وشافت فساعتها قبل ماتخرج من جناحها غادة تعلم سناء وتفكر شنو غايدوي..
🔜🔜
رحمة:(تبسمات بسخرية)على هو خلاني نطق راه تنقول لك اختي نتي باقاا مخدوعة فيه ومكتعرفيش ولد لحاج ملي كيتسيف
بيسان:(كانت ساكتة ولكن مقدراتش تحبسها مزال ونطقات بجدية)نتي اخالتو لي تتقولي عليها مطلقة مال لمطلقة ماعندهاش لحق تكمل حياتها ولاشنو جوبونص نتي أكثر وحدة مخصش تقولي ديك لكلمة
سناء:(خرجات عينيها فيها) وليتي دابا كتعايريني ابنت ختي فوجهي ولاكيفاااش (ضارت عند رحمة) شتي تربيتك وفشوشك ولات بنتك تعايرني بطلاقي
بيسان:(بجدية)حاشا معايرتكش بلعكس أنا عمري نعاير شي مرا..نتي حكمتي على رحييل بلاماتعرفيها ولاتعاشريهاا اه هي مطلقة والطلاق ماشي عييب ونتي عارفة بلي لمرا مكتختارش الطلاق الاوهي وصلات لواحد لحد لي مبقاا الصبر ينفع (بدات تتعبر بيديها منفاعلة) الاجينا نفكرو بهاد التفكير راه تاشي وحدة مطلقة ولاميت ليها راجل غاتقدر تبدا من أزيغو ترضاااي نتي عائلة خطيبك يقولو عليك مطلقة نوو حيت أصلا هو ماعندوش عائلة وكون كانت كون حسيتي بمرارة هاد لكلمة لي نعتي بيها غيرك اخالتو
هزات تلفونها وناضت معصبة مخليا سناء تتغلي فبلاصتهاا ملي عرات ليها واحد لحقيقة لي هي تغاظت عليها..ديك الحقيقة لي مبغاتش تسرط ليهاا..
جالسة هي ولبنات فبيتهاا وتبسيمة مفارقاتش وجهها نهار كولو والسر طايح عليهاا.. كانو قدامها دوك لكادويات لي جابو ليها يالاه جات لوقت تحلهوم وتشوف اش فيهوم.. انظمات ليهوم تانيرت وتاكلثوم باش كولهوم يشوفو لكادويات عاد قربات أسماء ونطقات بحماااس:نحلهووم أناا
غزلان:تي خلي لبنت تحلهوم لراسها ههههه
سيدرا:(تتسبل عينيها)مامي نحلهوم أناا
رحيل:(عنقاتها)نحلوهوم كاملين
هزات رحيل واحد لبواطة مستطيلة مغلفة بواحد الشريط على شكل بابيون.. حلاتو وحلات ديك لبواط لي كانت بحال شي مجر وبان ليها توب دلحرير فالازرق ملكي حطات يديها عليه تتلمس فيها وهي مبسمة.. مداتو لبنات تاهوما يشوفوه وهزات تاني بواطة بحالها ولي غالبا غاتلقى فيه شي توب تاني وبالغعل مع حلاتها بان ليها توب جوهارة دلعريسات فالبيض والذهبي.. كانت تتحل لبواطات وتبسيمة على شفتها گاع داكشي لي جابو ليها كان دلفريع وغير لمارك.. جابو ليها أونصومبل سباط وصاك وأنصومبل ديال الذهب فيه سنسلة وخاتم وحويلقات وكرميط على ستيلها هي.. كان كلشي فرحان بلكادويات لي جابو ليها.. وكلثوم غير تتبسم زعمة تاهي فرحانة وعينيها على شنو جابو ولحسد كياكل فيها لداخل.. ناضت غادة لبيت أسماء دايرة السبة بالدواا ودخلات مطرقة لباب وجبدات تلفونها ودوزات لخط لبدر لقات تلفونو طافي من لبارح وهو على نفس لحاال وهادشي شككها ومعرفاتش اش كيضور فدماغو.. بقات جالسة تتخمم وتفصل وتخييط تاصونى تليفونها بنمرة مكتعرفهاش.. دوزات لخط وهي تسمع صوت إلياس لي نطق ببرود: اشنو لجديد تم؟
كلثوم:(تادوي بشوية)فين هو بدر وعلاش طافي التلفون واش مغايديرش شي حاجة باش يحبس هاد الزواااج زعمة صافي غايخليها تزووج
إلياااس:(كرر سؤالو بجدية)شنو لجديد؟؟
كلثوم:والو لبارح جااو طلبو يديها وهي وافقات وليوم جايب ليها طوموبيل كادو من زيناتهاا
إلياس: فخباري جاب ليها كادو نتي دابا لي عليك ديريه تردي لبال وماتخلي تاحاجة تفلت ليك سمعتي ولي كاين قوليه ليا أنااا
كلثوم:فين بدر؟
قطع عليها بلامايجاوبها مخليها غير تاضور عينيها وتسول فخاطرها شنو واقع ليه واش تحت داك الراس عندوو.. عضات على شفتها ونطقات بهمس:هادا بان ليا مغايتحركش وغير زرفت راسي ملي درت يدي فيديه..
---
كان خارج من جناحو بشورط فالكحل مع بيل سماطي تاهي كحلة وسبادري فلبيض.. غادي جهة جناح زين العابدين ودخل بلامايدق لقى الظلام.. كمش حجبانو وهو كيشوف فالساعة لي كانت الستة دلعشية او ولدو باقي ناعس تال دابا.. دخل لشومبر وعينو طاحت على جسم زين العابدين لي كان ناعس فالنموسية ومغطي بإيزار كحل وكيف عادتو ملابسش التيشورت.. غارق فنعاسو وهو خاشي راسو فالمخدة وشعرو القهوي مغطي وجهو ومخربق.. ومشى جهة البالكون لي مدوز بلخوامي وحلو تادخل الشعى ديال الشمس لي بدات تغرب.. حلو ومع لهوا لي دخل وداك الشعى خلى زين العابدين يحرك راسو ويمسح وجهو فالمخدة قبل مايحل عينيه لمبوقين بالنعااس ولمفوخين كيشوف فنوح لي واقف قبالتو مربع يديه وهاز فيه حاجبو.. تقاد زين العابدين فالجلسة تايمسح عينيه بيديه ويردو لور وهو ساكت
نوح:(شاف فساعتو ونطق بنبرة غير قابلة لنقاش بداك الصوت الخشن)عندك عشرة دقايق نلقاك لتحت فصال دسپور
لاح ليه لهضرة وخرج مخلي زين كيستوعب كلامو قبل مايزول لغطا بالزربة عليه وينوض بلحفى جهة الحمام ياخد دوش.. أما نوح نزل لتحت لقى السكات حيت سناء ورحمة خرجو أما بيسان فهي فالسبيطار حيت ليوم عندها ليل ورؤوف راه فالمگازان.. تمشى بخطوات تقيلة جهة لكولوار فين كاين بيروه تاوصل لأخر باب فداك لكولوار لي كان بالكل وتيتجر لجنب.. جرو ودخل لصال دسپور ومد يديه شعل الإضاءة لي بدات تتشعل تابانت الصالة مضوية.. فواحد الجهة كاينة واحد الحلبة دلملاكمة مضورة بالخيوط والارضية ديالها كحلة.. وفالقدام كاين حيط كولو مراياات وفجنب التاني كاينين لماشين دسپور.. تمشى جهة واحد البلاكار تما فيه قفازات ديال الملاكمة جبد زوج واحد فالكحل وتاني فالزرق حطهوم فوق الكرسي وزول ساعتو حاطها فداك لبلاكار.. سمع لحس وضار بان ليه زين العابدين جاي جهتو بشورط تاهو كحل وسبرديلة فقط وشعرو باقي سارد ومرولي.. سد لباب وقرب جهة نوح لي ربع يديه ونطق بهدوء:نبداو بالتسخينات هي لولة
حرك زين العابدين راسو ومشى باش يبدا بالتسخينات وتانوح دار نفس الشي.. كان تيتسمع فداك الصال غير السكات وصوت أنفاسهوم وهوما كيلهثو.. مبعد ماسالاو التسخينات هز نوح قفاز زرق لاحو لزين لعابدين وخدا واحد لبانضة وقرب جهة ولدو شد يديه وبدا كيلويها عليه قبل مايعاونو يلبس لقفازات وتاهو دار لبانضة عاد لبسهوم وسدهوم بفمو عاد تمشاو جهة حلبة الملاكمة وبداو لكومبة بناتهوم.. ماشي أول مرة يدير هو وياه شي كومبة ومولف كل مرة يكون عندو وقت تيتريني معااه وتيدربو ملي كان صغير.. كانو بزوج بيهوم عاقدين حجبانهوم ومركزين فلكومبة تاضرب نوح زين العابدين فحنكو بالجهد تارجع لور..
نوح:(واقف كيتنفس بالجهد وبصوت قوي نطق كاسر داك السكات) هادو هوما التدريبات لي فارع بيهوم مخناا (هز يديه وخرج فيه عينو) اش هادشي اسي زين العابدين غفلنا عليك يامات لقيناك ترخيتي
زين العابدين:(كان مهبط راسو تيسمع لهضرة باه وهو ساكت)
نوح:(زاد جهد صوتو) هز راسك وشوف فيااا ملي نكون تاندوي معاك
زين العابدين:(شاف فيه)
نوح:(حل لگوانتي بسنانو وزولهوم وشاف فيه بجدية) سير دير 50 طراكسيون
حدر زين العابدين راسو ومشى ينفد شنو تقال ليه ونوح نزل جلس فداك لكرسي وعينو على زين العابدين كيحسب ليه تاسالا ديك لخمسين لي گال ليه وهو ينطق بجدية: هز لحبل 50 مرة
مشى زين العابدين جهة دوك زوج حبولة وهز كل واحد فيدو وبدا كيضرب بيهوم بحركات متوازنة وعينو مخنزرين ولعرق تايتكب من جبهتو.. تاسالى وهو يشوف فباه وصدرو كيطلع وينزل.. كان تدريب قاااسي لي خلاه يتهد واخا لبنية لجسمانية ديالو مولفة بتداريب بحالو ولكن هاد لمرة باه قصح معاه.. كان ناعس فوق الأرضية لي كانت كلها كحلة تينهج وكولو عرقااان.. لايح يديه بتعب حداها وعينو على سقف الصال لي كان تاهوو كولو مرايات.. تيشوف انعكااسو تاتسمع ليه حس لخطاوي دباه لي قرب جهتو وجلس قفازي ومد يدو كيمسح ليه لعرق بفوطة نقية.. عاونو تاجلس وهو باقي تيلهث ومد ليه قرعة دلماا وزين العابدين شربها كولها وحاس براسو عطشان بزااف.. هز ليه نوح راسو تاشاف فيه ونطق بنبرة جدية: لكوتش ديالك عيط ليا غاتبدا تاني معاه هاد الايام لي بقات قبل ماتبدا قرايتك ودابا سير دوش وكول شي حاجة
ناض نوح من بلاصتو باش يمشي وهو يحس بيد زين العابدين شاداه ضار تيشوف فيه بلامايدوي وزين العابدين هز فيه عينيه لقهويين لي كانو مايلين لكحل ونطق بالإنجليزية بصوت باين فيه الندم: سمحليا الواليد لكلام لي قلت مكنتش قاااصدو أنا غلطت سمحليا
هبط نوح جلس جنبو قفازي وكمش حجبانو فيه وهو شادو من قرفادتو كيف مولف وداير فيه شوفة خلاتو يهبط راسو ندماان:شوف فياا (هز فيه زين العين وكمل نوح بنبرة خشنة) الاعند بالك لهضرة لي قلتي لبارح غاتنسى بهاد كلمة سمحليا راك غااالط أولدي
زين العابدين:(شد يديه وقال بهدوء) مكنتش قااصد أنا غلطت
نوح:(حرك ليه راسو باه ونطق بجدية) مزيان لواحد يعرف غلطو ويعتارف بيه ودابا نوض دوش وسير تاكل
خرج نوح من عندو مخليه جالس فبلاصتو وهضرة باه كانت واضحة أنه واخد فخاطرو منو ومن لكلام لي قال ليه لبارح.. مسح على وجهو وناض بخطوات تقيلة خارج من لصال غادي لجناحو..
---
لايحة سيدرا رجليها على وجه ريان لي كان مكسل فوق السداري وكل مرة تيكمش حجبانو ويبعد وجهو وهي تاتقرب ليه بلعاني وتحطهوم لي فكمارتو.. تاعصباتو ودفع رجليها ونطق مخنزر فيها: عوريني وتهنااااي نتي
سيدرا:(كمشات فيه حجبانها)علاش تتغوت عليا
ريان:حيت ولاو فيك لبسالات بزااف
سيدرا:(تقلقات ونزلات راسها) أنا مخاصمة معاك اريان
نزلات من بلاصتها غادة تتجري مخليا ريان تيحك شعرو محاملش راسو حيت تعصب عليهاا وقلقهاا ولي خلاه يزيد يعرف راه مقلقة هو كيفاش عيطات ليه ريان بلا ماتقول رياني كيف مولفة من الصغر.. أما سيدرا وصلات لبيت ودخلات وغير بانت ليها رحيل جالسة فوق النموسية تاترسم وهي تقرب جهتها ودموعها نزلو:مامي
رحيل:(شافت فيها بخوف)مالكي امامي علاش تتبكي
سيدرا:(تخشات فيها ونطقات ببكاء)ريان غوت عليا
رحيل:(معنقاها تتبوس فيهاا ونطقات بخفوت)صافي امامي خالو ريان غايكون غير معصب ومقصدش يغوت عليك
سيدرا:(ربعات يديها ومدات شنايفها)أناا مخاصمة معاااه صافي مابقيتش غانهضر معاه يالاااه
رحيل:(تتسايسهاا)صافي واخاا يالاه مسحي دميعااتك امامي ديالي (تحنااات باستها فحنكهاا بالجهد)اااااح على حنيكاات بنتي وريحة بنتي ااااااحيييه ناكلهااا أنا ناكلهااا
تتبوس فيها بالجهد مغددة عليها وسيدرا تاتحرك راسها وتاهي تاضحك وتبوس فيها.. فدقيقة نساتهاا تقليقتها وبكاهاا بقات رحيل معاها تايدويو وتجاوبها على أسئلتها البريئة وعاطياها خاطرهاا تاوصلات وقيتة دالنعاس وهي تعاونها تبدل حوايجها ببيجامة دالنعاس وغسلات سنانها ونعسو فحظن بعض وسيدرا لايحة عليها رجيلاتها ونطقات بهمس وهي تتحرك يديها على حنك رحيل:مامي جوطيم بوكو
رحيل:(تبسمات بحب) ومامي كاتحمااااق عليك
بقات تتمشط ليها رحيل شعرها تاغفات سيدرا وهي تتشوف فيها بشوفات حنان مشعين بالحب تاسمعات تلفونها كيصوني وهي ضور جهة لطابل هزاتو وشافت فالنمرة لي ممقيداش عندها قلبها خفق وتقدات فجلستهاا وهي تتسرط ريقهاا وقلبها كان تيضرب بخوف لايكون بدر هو لي تيعيط حيت سبق ليه ودارها.. كانت مترددة واش تجاوبو ولاتقطع ولكن دارتها فيد الله ودوزات لابيل بيدين كيرجفو ونطقات بخفوت:ألو
تسمع صوتو الرجولي الخشن وهو كينطق بهمس: الفثنة
ملي سمعات صوتو حسات بالراحة وگاع داك لخوف لي حسات بيه تبخر ورجعو مشاعرها لي تتحسهوم معاه ينبضوو بجنون داخلهاا... أنفاسها كان صوتهوم مسموع وعيونها كيضورو هنا ولهيه متلبكة او لسانها عقااد معارفة ماتقول.. بقات تتلعب بلكوڤرلي تارجعات سمعات صوتو الخش وهو كينطق بهدوء..
نوح:وصلاتك الأمانة لي سيفطت ليك؟
رحيل:(سرطات ريقها فاش فهماتو قصد الطوموبيل ونطقات بهدوء)اه شكرا
نوح:(بنفس الهدوء)العفو بالصحة والراحة
رحيل:(عاضة على شفتها)يعطيك الصحة
نوح:(همس ليها بخشونة)تباتي فراحة الله
تقطعات لابيل وهي باقا دايرة تلفون على ودنيها.. تابدات تكمش حجبانها وشافت فلابيل لي مكملاتش خمسة الدقايق.. ولي خلات واحد الزوبعة من المشاعر الجميلة تحرك داخلها... دخلات نمرتو وأونغوجيستخاتها عندها .. وفديك الساعة طاح عليها واحد التبرگيگ باغا تشوف اش داير فلبخوفيل دلواتس.. دخلات ليه وبركات عليها وبدات تتلشارجي تبانت ليها داير تصويرة زين العابدين فإحدى لكومبات لي دوز فوسط حلبة لكلاكمة ولحكم هاز ليه يديه...بدات تاتزومي لفوطو وتاتشوف فوجه زين العابدين لي كان عامر ضرابي وهي مكمشة حجبانهاا... بقات تادقق فملامحو وكتقارنها مع صورة نوح لي فبالهاا وداك الاختلاف الوااضح بيناتهوم.. بحالها هي وسيدرا لي مكتشبهش ليها وكاتشبه لجدها.. ولكن زين العابدين عندو واحد الشبه بينو وبين باه لي تيبان فاش كدقق فيه.. تنهدات وخرجات من الواتس طافية لويفي وتكات راسها على لكادر والنعاس هرب من عينيها تاني..وعقلها مكيلقا وقتاش يبلاني ويخمم غير فوقيتة دالنعاس.. ولكن بززات على راسها تنعس حيت غدا خدامة.. جرات سيدرا لحظنها وبقات تاتلعب ليها بشعرها تاغفات جنبهاا..
---
ببنوار دلحمام ولفوطة فشعرها واقفة رحيل قدام لبلاكار ديالها تتشوف اش غاتلبس.. الكساوي معلقين ولشوميز والسراول دجين مطوين لتحت مع لبوديات دلخروج.. وجهة فيها لفولار مطويين.. عرام دلحوايج نصهوم باقي ماملبوسش وهي مالقات ماتلبس.. تاحاجة مارضات دوقهاا بدات تتقلب بين لكساوي ومعرفاش واش تلبس كسوة ولادجين تلفات.. بغات شي حاجة تبينها مميزة ماشي شي حاجة عادية كيف مولفة.. لوقت تيفوت ولالة رحيل باقا واحلة فلباس.. تاتحل لباب ودخلات أسماء بكسيوة فالبيض قصيرة وشعر مصاوب بوكلي ولمك اب مبين لعويناات القهويين.. قربات جهة رحيل ونطقات وهي مكمشة حجبانها بصوت خافت باش ماتفيقش سيدرا:باقي مالبستيش مشى لحال اصاحبتي
رحيل:(زفرات)ماعرفت مانلبس اصاحبتي
أسماء:(طلات على بلاكارها ونطقات بسخرية) هاد لكم الهائل من الحوايج وماعرفتيش اش تلبسي؟
رحيل:(هزات فيها حاجبها) هادشي كولو لبستو
أسماء:اش لبستي باقي كساوي وحوايج بتيكي ديالهوم حيدي حيدي نشوف ليك شي لعيبة تلبسيها
مشات رحيل تنشف شعرها واسماء بدات تاتقلب تاختارت ليها واحد سروال توب تايجي واسع وطويل فالباج مع بودي خضر وڤيست ديالو تاهي توب بااج وفولار فلون لبودي.. اختارت صندالة طالون ليها وصاك وحطاتهوم فوق لفوطوي:هانتي عمرك لبستيهاا
نشفات شعرها وجمعاتو ودارت مرطب لوجهها وإيكخون فقط عاد قادات عينيها بأيلاينر وطلعات رميشاتها ودارت بلاشر لحنيكات وعكر نيود غوز غامق ومشات تلبس شنو ختارت ليها أسماء.. دغيا زربات على فولارها فاش شافت مشى لحال وهزات الصاك وخرجات من لبيت مور مباست سيدرا ونزلات لتحت تفطر..
كان ريان ورنيم سبقو مشاو لخدمة ومحمد طه جالس مكتفي بكافي ورحيل تاتفطر مع أسماء ويهضرو وغزلان تاتقاد لكريب لسيدرا باش تفطر بيهوم ملي تفيق..
رحيل:غزلان غير سيري كملي نعاسك راه سيدرا مغاتفيق عاود تال لحداش
غزلان:(شافت فالساعة) أصلا غانمشي لفااك عليها بغيت نوجدهوم قبل باش ملي تفيق تلقاهوم
أسماء:علاش ماتقلبيش على شي خديمة اغزلان وتحركي فيها بلاصة لجلسة فالدار؟
غزلان:كنت باغا نقلب مي خالتي تانيرت باقي عيانة وماتقدرش على شغال الدار عليها أجلتها تاتبرا نيت مزيان
أسماء:فاليديتي هاد لعام كولو فلفاك
غزلان:بقا ليا واحد لمودول هو لي تابعني أما كلشي تفكيت منو
رحيل:(تتجغم من قهوتها)توحشت يامات لفاك وليسطيا ولحفاظة ياك امودي
محمد طه: واييه ايام عندها لحلاوة
أسماء:عندكوم نتوما أما انا حمدلله تهنيت منها
رحيل:حيت مطفرتيهش فيها ههههه
أسماء:شلى نتوما لي مطفرينو اجي عندك الصولد ارحيل نصوني لبنت لي معايا نسولها واش داك خونا جا ولاباقي
عطاتها رحيل التلفون ورجعات تاتدوي مع غزلان ومحمد طه على لقرايا وياماتها وأسماء بدات طابي النمرة وهضرات مع لبنت تاسالات وهي تقطع.. كمشات حجبانها ملي شافت فأخر ابيل لي كانت قبل من هاديك لي دارت هي وعينيها على السمية باااش داخلة استغربات وشكات فمولاها وفلحظة هزات عينيها فرحيل ونطقات بهدوء: رحييل شكووون النمرة لي عيطات ليك لبارح ومدخلاهاا ب" راحة روحي "
سرطات رحيل ريقها وخطفات ليها التلفون وهي مكمشة حجبانها ونطقات بهدوء:لاساليتو خليونا نمشيو
ردة فعلها خلات شك أسماء يتحول ليقين فاش عرفات بلي ولد لحاج هو مول النمرة.. تبسمات وهي نايضة تابعة رحيل لي نزلات لتحت مع محمد طه ونطقات:غاتدي طوموبيلتك؟
رحيل:لا
أسماء:(كمشات حجبانها) وعلاش لا اصاحبتي
رحيل:حيت حاليا حتى واحد معارف بلي كاين فلخدمة والاديتها هوما غايشكو ومن الأحسن بلاش
أسماء:هاااء يقووودوو مالك نتي فيهوم
رحيل: أنا لي عارفة اش كاين مهم خليونا نمشيو
محمد طه:يالاه تحركو راه تعطلنا
---
واقف متردد قدام باب الجناح دباه كيتفكر كلامو لي قال ليه لبارح وكيزيد يزير على يديه.. محاملش هاد لوضع لي عمرو تحط فيه.. حك شعرو لكورلي وقلب وجهو ساهي فلعدم..
🔙🔙
قدام كيس دلملاكمة لي معلق فالقنت فبيتو كان زين العابدين واقف بشورط قصير تايضرب فيه ويتريني تاسمع صوت باه لي خلاه يتقاد فلوقة ويتبسم ليه.. دخل لعندو نوح مبادلو تبسيمة حنينة ومكمش فيه حجبانو
نوح:حفيد الحاج اجي باغي ندوي معاك
قرب جهتو زين العابدين وجلس جنب الفوطوي فين طبطب ليه نوح لي كان جالس وحاط يديه على ركابيه مشبكهوم قدامو ومحني شوية لقدام.. شاف فزين العابدين بنظرات جدية ونطق بصوتو الخشن: ليوم فليل غانمشيو لعند سي إدريس داك الراجل لي مشينا عندو نهار الصدقة عقلتي (حرك زين العابدين راسو وحجبانو مكمشين ونوح كمل بنفس النبرة) غانطلب يد بنتو لزواج رحيل ممات سيدرا
كان تيسمع لباه وغير كمل كلامو وهو يخنزر من الخبر لي سمع.. زواج باه من ممات سيدرا...ديك لبنت لي فيما كيشوفهاا كاتقرب من باه كيزيد يحقد عليها وهو كيشوف حنية باه عليهاا.. زير على يديه وناض من بلاصتو ناطق بالإنجليزية وبنبرة صوت معصبة:مموافقش
نوح:(هز فيه حاجبو ونطق ببرود)مجاايش ناخد الإذن ديالك جيت نعلمك باش توجد راسك حيت تانتا غادي معانا
زين العابدين:(بانفعاال) مغاااديش ومبااااغيش تزووج بيها نتااا علاااش غاتزوووج أصلا
نوح:(ناض جهتو ضارب فيه تخنزيرة قاصحة وبنبرة صارمة نطق) صوتك مايعلااش عليا سمعتي وماشي نتااا لي غاتوريني اش ندير راني باااك الانسيتي وكلامي قلتو ومانعاودوش
زين العابدين:(تيشوف فيه بشوفة فشكل) أنا مغانمشيش معاااك ومموافقش على الزواااج مبغيتش هاديك لمرا وبنتها يجيو لهناا
نوح:(جرو من قرفادتو كيف مولف ونطق وهو مخنزر فيه) هاديك لمراا غاتحتارمهاا والاقللتي عليها أدبك ولاعليتي صوتك عليها سوى فحضوري ولاغيبتي مغايعجبكش حااال وبنتهاا تاهي غاتحتارمهاا وغاتعاملهاا بحال ختك تفاهمناا
زين العابدين:(خنزر ونطق بحقد باين فصوتو)هي مااااشي ختي مااااشي ختي وماااشي بنتك أنااا لي ولدك ماااشي هي
نوح:(حط جبهتو على جبهة زين العابدين ونطق بنبرة خشنة) نتاا ولدي عمرك تنسى هادشي وتنسى بلي نتا حفيد الحااج ولكلام لي تقااال هنااا غادخلوو لدماااغك وبلاقصوحية الراااس ازين العابدين (شاف فيه ونطق بجدية) نلقاك وجدتي راسك وكلامي مغانعاودوش
🔜🔜
تحل لباب دالجناح وخرج نوح كيف لعادة سروال توب بلوماغين مع شوميز كحلة كولها قصير.. هاز شكارة دلبيسي بين يديه وخاشي الثانية فالجيب السروال.. هز حاحبو فولدو لي كان واقف قدامو وغير من الشوفة عرفو علاش جاااي.. قرب جهتو زين العابدين ونطق بهدوء:بغيت ندوي معاك
نوح:(شاف فساعتو ونطق ببحة صوت خشنة) كانسمعك
زين العابدين:(شاف فوجه باه ونطق) عارف نتا معصب عليا حيت هزيت صوتي عليك وحيت قلت ليك ديك لهضرة أنا غلطت الواليد ومبغيتكش تبقا هاز فخاطرك من جيهتي مكنبغيش نقلقك ولانخليك تعصب
هز فيه زين العابدين لعين كيتسناه يدوي.. عارف باه أعدى حاجة عندو هي يهز صوتو عليه ويقصح راسو.. ومع الأسف هو دارهوم نهار دوى مع باه بديك الطريقة ولي زاد قصحو هو كلامو ليه لبارح ولي خلاه ليل كولو وهو فايق.. علاقة زين العابدين مع باه فشكل مكيحملش نوح يتعصب عليه ولايشوف فيه شي شوفة ماهياااش.. من الصغر وهو كيحتارمو وكيسمع لكلامو واخا يكون راسو حجرة تايجي تال عند باه وكيلين.. أما نوح فبقا واقف كيشوف فيه بنظرات هادئة ولكن صارمة.. قرب جهتو زين العابدين وباس ليه راسو ونوح جرو جهتو معنقو عندو ومزير عليه ونطق بخشونة: هاد لمرة غانميك ولكن لمرة الجايا يتعاود نفس لبلان غايكون حديث خر سمعتي
حرك راسو باه وهو باقي معنق نوح لي باسو فراسو وبعدو عليه ونطق يجدية:سير وجد راسك مع العشرة تمشي لعند لكوتش ديالك
زين العابدين:واخا
كمل نوح طريقو لتحت وزين العابدين عاد قدر يرتاح ملي باه سمح ليه..
سايگة طوموبيلتها غادة لمول دير شوبينغ وتبدل لجو ديال الرياض لي ملات فيه.. حاولات مع رحمة تمشي معاها ساعة مبغاتش واظطرات تمشي بوحدها.. غادية تاسمعات تلفونها كيصوني بنمرة بدر وهي تسرط ريقها وبدات تاضور عينيها وهي تتفكر بلي هاد لأيام كلها مكتجاوبووش فيها.. وأكيد غايكون تشطن داكشي علاش قررات تجاوبو وبصوت هادئ نطقات:ألو
بدر الدين:(بنبرة باردة) علاش مكاتجاوبيش على لزابيل ديالي
سناء:(نبرتو خلعاتها) مكنتش مسالية وصاااف
بدر الدين:على بالسلامة شنو كادير باش ماتساليش تجاوبي
سناء:(كمشات حجبانها) بدر أنا
بدر الدين:(بنبرة قاصحة)هاد لمرة الامجاوبتيش غايكون ليا كلام خر معااك وديري فبالك هاد الأيام غانمشيو لفاس باش ندوي مع باك هاد لحالة مبقاتش عجباااني
سناء:(وقفات جنب الطريق فاش سمعات شنو قال) ولكن بابا مغايبغيش يشوفك وهو
بدر الدين:(قاطعها)أنا عارف اش غاندير نتي غير وجدي راسك ليا احبيبة
لكلام لي قال خلاها تسرط ريقهاا.. تقطعات لابيل وهي باقا ساكتة وساهية تتفكر فكلامو لي كانت نساااتو.. دارت السبة بباها وهي أصلا مبقاتش باغاه وبغات تفك منو ولكن هو بان ليها مُصر ودابا حطها أمام الأمر الواقع.. حركات طوموبيلتها مكملة طريقهاا تاوصلات لمول ونزلات بلاخااطر وعقلها مشطون تيخمم ويفكر.. تاحسات بشي يد موقفاها ومع ضارت بان ليها ليازيد لي كان مكمش حجبانو وقال:من الصباح وأنا كنعيط ليك
سناء:(تعصبات فاش شافتو ونطقات بانفعال) واش نتا تابعني ولاكيفاش
ليازيد:(بهدوء)اه تابعك باغي نهضرو بزوج اسناء ونحلو لمشكيل لي بناتنا
سناء:(ضحكات بفقصة)مشكيل لي بناتنا هههه واش من نيتك تادوي
ليازيد:سناء خلينا نتحركو لشي بلاصة كالم ونهضرو راه هاد لقصوحية دالراس مغاتفيدنا بوالو واش نتي مرتاحة دابا هاكا هاا اه معتارف غلطت وندمت وهاأنا كنخلص.. ست سنين وأنا عايش ومعايشش بلابيك مغرب فبلاد النااس ومبعد عليك واش نتي محساش بيا
سناء:(هازة راسها بكبرياء) تستاهل نتا لي خنتيني مع ديك لقح*بة وبعتي الغالي وشريتي الرخيض هانتا دابا تتخلص
ليازيد:(شدها من دراعها ونطق بعصبية) غالط وندمت ولكن نتي محساااش براسك غلطتي فحقي همم محاسااش بلي تانتي عندك يد فلي طراا
سناء:(تعصبات) زيد لوح لومة عليااا هادي هي فعااياك أصلا ماشي أنا لي قلت ليك رجع لزبلك لي كنتي عايش فيه وماشي أنا لي قلت ليك خووني مع ديك لكلبة
ليازيد:(بانفعال) مانكرتش ولكن تانتي ماتنكريش غلاطك فحقي وبلي من نهار تزوجتك وأنا ديما معاك وعمري درت شي حاجة تعصبك كنت ندير كلشي باش نتي ترتاحي ليا ولكن نتي كنني ديما تتفكري غير فروحك عمرك فكرتي فياا أنا.. تتفكري غير فنفسك وبس وليازيد اخر تفكيرك تامن قرار لولاد خديتيه بلااماتشاوري معايا قررتي وجيتي تحطيني أمام الأمر الواقع اه غلطت حيت خليت الشيطان يوسوس لياا وحيت عطيت لديك لقح*بة دصاحبتك فرصة ولكن تاااانتي ماتنكررريش غلطك
كانت تتغلي من كلامو وكيفاش باغي يقلب القفة عليهاا.. نثرات يديها من يديه ونطقات بانفعال مخرجة تاهي عينيها فيه: غلطي هو تزوجت واحد بحااالك زهواني وعينو زااايغة.. كان عليا نسمع كلام لعائلة لي نصحوني ولكن أناا درتها بيدي وهاني كنخلص.. (لاحت كلامها كيف شي قنبو*لة فوجهو) ولكن غانصحح غلطي وغانتزوج راااجل لي يستاهلني ويبغيني ونتا خليك مع ندامتك
دارت بالناقص من شي شوبينغ ورجعات فحالها مخليا ليازيد بلاصتو جامد وكلامها تيطلع وينزل فيه مخلياه مزير على يديه وملامح وجهو بادرة..
---
فالگاراج كان إدريس بلكومبين ونضاضر دالشوف فعينو مركز فداك لموطور لي قدامو.. يديه كلها عامرة بلاگريس وهو محني تايصاوب فيه تاسالى وناض مخدمو وغير تأكد أنه تصاوب بعد وهز الزيف كيمسح يديه من لاگريس وتمشى جهة لاڤابو لي عندو تما بدا يغسل يديه تانقاهوم ومسح بزيف نقي ورجع مزول نضاضرو كيشوف فالدراري لي معاه ولي كل واحد وشنو كيدير.. جلس فالبيرو الصغير وجبد داك لكناش وكالكولاتريس وستيلو كيحسب مع لخر دالشهر خصو يقاد لحساب ديال الضو ولماا ويوجد لرشيد وسفيان خلاصهوم.. حل لمجر يشوف فلوسو وبدا تيوجدهوم لدراري باش يعطيهوم رزقهم وماياكل حد فحقو.. قاد جوايات ديالهوم كاتب عليهوم سميات وحطهوم فالمجر تاليل ويعطيهوم.. حط تاديال الما والضو فجوا ولي بقا غايجيب بيه لحوايج لي خاصين هنا..
وقفات الچيب دنوح قدام باب لگاراج ونزل تيقاد كمام لاشوميز النواغ لي لابس غادي جهة لگاراح ومع دخل هز إدريس عينو فيه وتبسم ليه بهدوء:ولد لحاج مرحبا
نوح:(جر لكرسي وجلس ونطق تاهو مبسم بلخف) ترحب بيك الجنة
شاف فالدراري ورجع شاف فإدريس بشوفة لي فهمهاا فالبلاصة نطق:رشيد سفيان سيرو تغداو
رشيد:باقي المعلم ماكملتش الطوموبيل
إدريس:مور لغدا وكملها
نقاو الدراري حالتهوم وخرجو وإدريس ناض سد الباب من لداخل ورجع جلس فالكرسي قدامو ونطق بجدية:خبار لخير؟
نوح:(مسح على لحيتو وتبسيمة سخرية بانت فشفتو ونطق بنبرة خشنة) الفار بدا كيطيح فالمصيدة اسي إدريس..
🔙🔙
"أنا مانصلاحش ليك"
متكي على الكرسي ورجع راسو لور ساهي وفعقلو غير ديك الكلمة لي قالت ليه فاش سولها على سبب رفضها ليه.. سبب لي مقنعوش نهائيا حيت كون كان عارفها مغاتصلاحش ليه مكانش غايمشي لعند باها ويطلبها لزواح.. عارفها مطلقة وعمرو أصلا ماجاه فضول يعرف شنو سبب طلاقها حيت داكشي شخصي ومتعلق بجزء من الماضي ديالها وهو ماعندو حق فيه.. زفر النفس بالجهد ورجع يكمل خدمتو لي عندو تاوصلات لوقيتة وخرج من خدمتو غادي لمگازان يطل على الأمور تم ويقاد حساباتو.. تاطاح الظلام عاد ناض من بلاصتو هاز تلفونو وسوارتو وخرج من لبيرو قاصد الگاراج عند إدريس.. مدة طويلة ديال الطريق وكان موقف طوموبيلتو قدام الباب دلگراج ونزل بخطوات تقيلة عاقدة حجبانو وضارب تخنزيرة قاصحة.. دخل ومن زهرو كان غير إدريس بوحدو والدراري مشاو حيت فاتت لوقيتة.. ونيت إدريس كان ناوي يرجع لدار ولكن غير شافو وهو يتبسم كيف عادتو: اش خبارك اولد لحاج
نوح:(حط سوارتو فوق البيرو هوما والتلفون وجلس فالكرسي ونطق بجدية) الحمد الله اسي إدريس
إدريس:كون تعطلتي كنتي غاتلقاني مشيت يالاه نضت باش نسد
نوح:(حك لحيتو وباقي عاقد حجبانو ونطق بصوت قوي داخل فالموضوع نيشان) سي إدريس باغي نعرف بنتك علاش رفضات الزواج ؟؟
إدريس:(قرب جهتو وجلس قدامو وتنهد) قلت ليك بنتي سبق عاشت تجربة الزواج لولة فاشلة داكشي علاش مباغاش تعاود نفس التجربة
مسح نوح على لحيتو عدة مرات وهو قالب وجهو وإدريس جالس كيتنهد.. هو براسو مكانش راضي على جواب بنتو وكان كيتمناها توافق ولكن ماعندو مايدير ومايقدرش يبزز عليها وحاول معاها تبدل رأيها وخلى تانيرت دخل ساعة هي قررات وهو كان عارف السبب ومالمهااش.. داكشي علاش جوابها كيف هو وصلو لنوح لي جا عندو نهار الصدقة لي دار على قبل محمد طه طلبها من عندو وخلاه مصدوم ومكانش متوقعهاا...فرح حيت كايشوف بلي نوح هو الشخص لي يناسب بنتو وعارف معدنو وعاشرو داكشي علااش وافق بينو وبين نفسو.. ودابا واخا بنتو رفضاتو هو جاا عندو باش يسولو على السبب لي مكرهش يقولو ولكن احتارم قرار بنتو وحياتها عليها فضل يسلك القضية ولكن نوح كان ليه رأي خر.. ضار جهتو وشاف فيه بملامح جدية وعينو فقلب عين إدريس ونطق بصوتو الخشن الصارم ونبنرة قاصحة..
نوح:سي إدريس مجيتي لعندك ليوم باش نسولك رحييل علاش رفضات الزواج.. باغي نعرف هي اش دوزات فزواجها لولاني وعلاش هي خايفة انها تعاود تزوج..
كلام نوح خلى إدريس يزيد يحتارم هاد السيد لي جالس قدامو ويكبر فعينيه.. واخا رفضات هو باقي مصر يعرف السبب إصرار نوح خلاه يقرر قرار أنه يعاود ليه كلشي.. تال إمتى غايبقا ساكت وبنتو غاتبقا هازة فقلبها تتمرض راسها وتهلك صحتهاا.. هو مدايمش ليهاا ومعارفش واش غايعيش كثر ملي عاش وربي وحدو لي عاارف.. ناض إدريس سد لباب دلگاراج ورجع جلس قدام نوح وتنهد تنهيدة هااازة جبااال من لهموم.. مسح وجهو ونطق بهدوء: فرحتي اللولة ولحنينة ديالي تعدبات فحياتها بزااف وباقي لدابا كتعدب وصابرة (زير على يديه) كنا ديك الساعة باقي عايشين فالربااط فواحد النهار كنت خدام تادخل لعندي واحد تيسولني واش أنا هو إدريس التحاني ملي جاوبتو باه دخل فالموضوع نيشان وقال ليا بلي هو شاف بنتي رحيل وعجباتو وفاش سول عليها لقاها بنت النااس داكشي علااش جاا عندي باش يطلبها من عندي.. مغانكرش عجبني كيفااش قصد لباب وباين فيه راجل مزيان قلت نشوف لبنت اش غاتقول.. سولتها على رأيها وعطيتها وقت تفكر بيما أنا سولت عليه حيت هو عطاني سميتو وكنيتو وتالبلاصة فين خدام الشماااتة(نطق بحقد) عاصم الجوهري مشيت سولت والناس كلها تشكر فيه وتاكلمة لعيب مقالوها عليه.. قلت مع راسي نخلي رحيل تشوفو وتهضر معاه وهادشي لي كان (نطق بنبرة صوت نادمة) وكان هاداك أكبر غلط درتو فحياتي.. مور ماتشاوفو وهضرو رجعات وأنا سولتها على رأيها ولقيتها موافقة صافي قلت بيما أنه عجبها ورتاحت ليه إذا نتوكلو عالله وعلمتو والسيد قرر يجيب عائلتو باش يطلبوها رسمي وداكشي لي كان.. جاب مو وزوج خوتاتو منهوم رنيم لبنت لي معانا فالدار والتانية كانت مرات إسلام.. شفناهوم وتعرفنا عليهوم كيبانو ناس بحالنا عاديين تافقنا وملي شفت بنتي باغاه درنا ليهوم تركاب لخواتم وتقرر نهار العرس وقبل السيد قال ليا راه غايسكنها فدارو فحي الرياااض عندو أباخطمون تم وزيد عندو محال ديال الديكورات قلنا بسم الله المهم عندي بنتي تعيش مرتاحة هي هاديك داز لوقت ودرنا لعرس وكلشي كان عادي (سكت ساهي مكمش حجباانو تيتفكر نهار عنق بنتو رحيل قبل ماتمشي مع راجلها نهاار عنقها عنااق لوادع) مشات معاه وراك تتعرف لعرسان ضروري يسافرو ويفوجوو.. مشات وخلات الدار خاوية بلابيهاا وخوتها ومها وصاحبتها كلشي طاح عليه الضيم.. ومن داك النهار ولمشاكيل كايجيو وحدة ورا ختهاا.. ملي مشات بنتي وحنا كنعيطو ليها فالتلفون وكنسولو فيها حيت كانت مسافرة مع راجلها (شاف فنوح ونطق كلامو بهدوء) فديك لفترة وقعات كسيدة لتانيرت ودخلات كومة وكلشي تقلب ديك السااع حيت حالتها كانت خطيرة..
إدريس:(تنهد) كانت رحيل تتعيط ليا وتسول فينا ومراات نعيط ليها أناا كنت مباغيش نقول ليها على حالة مهاا ونخليها دوز عطلتها مع راجلهاا وديك الساعة يكون خير..تشطنت مع تانيرت تاخرج ليا مشكيل ريان من الجنب (زفر النفس بالجهد) لقيتوو كيتدرووك وخدا أوڤر دوز كانت غاتقتلوو غير ربي لطف..ملي دازو شي يامات قررت نخلي رحيل ترجع لعندي وتشوف مها داكشي علاش خليت راجلها يسيفطها وتافقناا بلي غايسيفطها فلكار وعطاني لوقيتة لي غايخرج من القامرة دطنجة باش نكونو حنا دايرين حسابنا وكنتسناو فالقامرة دالرباط... كلفت محمد طه باش هو يجيبها وفاش وصلات لوقيتة دلكار لي جاا من طنجة مبانتش ليه بقا محمد طه تيقلب ودوك زوج لكيران لي جايين من طنجة كلهوم دخلو لرباط ولكن هي مكانت فتاواحد فيهوم.. عيط ليه محمد طه سولو لقاه معارف والو وبلي مسيفطها وفاش محمد طه شاف لقضية صعابت عيط ليا وهنا حسيت بشي حاجة ماهيااش وملي عيطنا لداك الشماتة كنتأكدو تاني على لكار وعلى لوقيتة ياكما كاين شي غلااط قال لينا راه ماتحرك من لقامرة تاخرج لكااار وهادشي خلانا نتأكدو بلي بنتي طارية ليها شي حاجة وقلبي حسسني هادشي (مسح على وجهو وزفر النفس)سولنا عليها وتاحد مشافها..داكشي علاش مشينا لعند لبولييس باش نقدمو شكاية الاختفاء ديالهاا.. وخلينا لبوليس يقلبو عليها (سرط ريقو وقال بمرارة)كل نهار كيدوز كنت تنحس بالدنيا كظلام فوجهي... دازت ستة شهور وماسمعنا عليها تاشي جديد وهاد الستة الشهور كلها وداك عدو الله معانا تيقلب تاهو ويمشي يسول عند لبوليس.. ستة شهور دازت حسيت بيهوم بحال ست سنين.. كنت باغي غير نعرف بنتي واش حية ولاميتة (زير إدريس على يديه) تال واحد النهار عيطات ليا واحد نمرة بريڤي وفاش جاوبت لقيتها هي فرحتي لولة كاتبكي وحالتها حالة.. ديك الساعة حسيت بلفرحة ملي سمعت صوتها وطمنت راها بخير.. علماتني السيدة لي معاها بلي هي حاملة وبلي دارت كسيدة وراه غادين بيها لسبيطار حيت غاتولد وبلي هوما فالداخلة..(سكت وهو مرجع راسو لور كيستارح وحس بلي هاد لكلام رجع تاني استنزف طاقتو.. مدة ساكت تاكمل بصوت غارق) ربي حط فطريقها ناس لخير الله يسهل عليهوم فيما كانو.. داروها بحال بنتهوم وردو ليها لبال تاوصلت عندهوم.. (تبسم بحنية) لقيت نخشيشتي جات لهاد الدنيا قبل وقتها.. كانت صغيرة وزوينة بزاف دخلات لقلبي بحال نقطة لعسل..
هز إدريس عينو فنوح لي كان لجلسة كلها وهو ساكت وجالس جلستو الرجولية ومربع يديه وعينيه على إدريس بشوفات ممفهومينش..
إدريس:(تنهد وكمل كلامو) ملي طاحت عيني على بنتي حسيت بشي حاجة لداخل ديالي تهرسات.. فدوك الشهورة لقليلة ضعافت ودبالت وشوفات عينيها طفااو ومبقاتش رحيل لي كنعرف ولي الضحكة ديما مرسومة على وجهها.. كانت بحال شي وحدة ميتة.. كانو عندي بزاف دالأسئلة فين كانت أو وقتاش حملات والأهم اش كادير فالداخلة؟.. دوك الأسئلة قبل مانطق بيهوم هي جوباتني عليهوم وخلاتني نعرف اش طاري (ضحك بواحد ضحكة دلفقصة) داك الشماتة وعيفة الرجاال طلع كادب علينا طلع ديب وبنتي طاحت بين يديه ضحية.. طلع بزناز وعايش فالتخلويض لاهو لاتريكتو.. تخيل معايا اولد لحاج شعل فالگاراج ديالي لعافية وأنا فيه وكون مالطف ربي كون راني دابا بين يد الرحماان غير بااش يبين لينا بلي راه ولد الناس باش يزيد يتبتها ويتبتنا كاملين باش يتزوجهاا وفاش تزوجاات بيه داها لداخلة وحبسها تم بحال شي كلبة وبدا هو وعائلتو كيحگرو عليها مرضوها فصحتهاا وباش ماتعلمنااش لوى ليها دراعها بينا حناا ولكسيدة ديال تانيرت كان هو سبابهاا.. وكل مرة كان تايهددها بينا وهي خافت علينا وحيت عارف نقطة ضعفها استاغلهاا ومكفاااش هادشي كولو جاا داك الشيطاان دعموو لي كان كثر من عاصم كان هو مول الشي وعاصم كان غير خدام عندو فتبزنيز.. (سكت وصدرو كيطلع وينزل بالأعصاب) حط عينو على مرات ولد خوه وشراها من عند راجلهاا وداك لكلب باعهاا ليه بحاال الاراه شي شرويطة شااايطة عليه (رفع إدريس صوتو ومبقااش قادر يكونطرولي على راسو) بنتي أنااا تباااااعت لداك الشيطااان وراجلهاا لي باعها ليه على قبل الفلوووس داك الزا*مل خلاها ليه وتافق هو وياااه باش يوهمونا بلي لبنت غبراات وهوماا أصلا مخبينهاا تماا فالداخلة فين تاحد مايقدر يلقاهاا.. كااان داك الز*امل تيشوف فعيني بلاحشمة بلاحياااا وداير راسو خااايف عليهاا مشى معانا لعند لبولييس بحال الامداير والو (سكت تاينهج أو وجهو حمااار بالأعصاب وكمل بصوت هادئ) ولكن ربي فاللخر فضحوو نهار رحيل طاح فيديها تلفون داك الشيطان وعيطات لصاحبتها جيداء وعلماتها بلي كان ساعة داك لحيوان شافها وقرر يهربها
إدريس:من تم باش مانلقاوهاش وتماا هي وياه دارو كسيدة وقدرات تفك منوو.. ولكن هو ماتهنااش حيت فاش حصلها تتهضر مع جيداء سيفط ليها داك الشماتة باش يسكتهااا (سكت تيحك جبهتو وبين عينيه صورة جيداء ولغصة حس بيها فحلقو من جهة صاحبة بنتو لي كان كيعتابرها بحال بنتو وعزيزة عليها) قتتتتلهاا باش يسكتهاا هو دبح'هاا وخلى واليديها يترزاو فيها غير باش ماتفضحهومش..
السكات عم فالمكان كاسرو صوت أنفاس إدريس لي كان حاس بالضيم طايح عليهاا من هاد لموضوع لي تفتح.. ديك لمعاناة لي دوزو قبل سنين وداك لعداب لي عاشوه مكانش ساهل عليهوم وعلى رحيل بالخصوص حيت هي لي كانت الضحية الكبرى.. ضحية لي خسرااات فيها نفسها وخسرات راحة بالها وخسرات تقتها وخسرات صاحبتها وشحال من حوايج لي لدابا تتعاني منهوم.. وفالمقابل نوح لي كان جاالس وهو ساكت وكل كلمة خرجات من فم إدريس راه دخلات لدماغو وبقاات تم.. مسح على لحيتوو ونطق أخيراً بصوتو الخشن كاسر داك السكات: وشنو وقع من بعد؟
إدريس:(تنهد وشاف فيه) تيقولو الروح عزيزة عند مولاها ملي ماتت جيداء لبوليس خداو تلفونها ولقاو كانت مسيفطة لمحمد طه مساج تتعلمو بلخبار لي قفالت ليها رحيل وزيد لقاو فلواتساب ديالها واحد لوديو لي كان هو الدليل الثاني سجلاتو وتسمع فيه صوت داك الشماتة.. ديك الساعة لبوليس شدوه قبل مايهرب.. وأنا بقيت فالداخلة راد لبال لصحة بنتي لي مكانش فخبارها موت صاحبتها.. بقيت راد لبال ليها ولسيدرا لي مكانتش رحيل فلول متقبلاهاا ومكانتش باغياهاا.. كانت رافضة تشوفهاا ونفسيتها كانت مهلوكة.. لبوليس بداو يقلبو على داك الشيطان حيت رفعت عليه دعوة والبوليسي لي كان واقف معانا فالرباط تعاون معايا وتواصل مع معارفو فالداخلة وبداو البحث باش يقلبو عليه وأصلا هو كان مولف بلحباسات وهادشي كان عادي عند واحد بحال داك الشيطان (نطق سميتو بحقد)بدر الدين الجوهري.. خدمتو أصلا كلها حر'ام فحر'ام مغرق راسو فيه.. ملي رجعت لرباط خليت لبوليسي لي تم يتكلف والاكان شي جديد راه غايعلموني ورجعت مع بنتي وحفيدتي.. بنتي لي كانت غادة معايا بحال شي كسدة مافيها روح دمرو نفسيتها.. مكنتش عارفة كلشي بلديطااي ولكن حالتها خلاتني نعرف بلي دوزات حوايج فدوك الشهور كانو كبارين عليهاا.. رجعنا لحومة وأنا كنت تنفكر غير فنفسيتها كيف غاتكون ملي غاتعرف بموت صاحبتها.. كنت عارف بلي هاديك غاتكون هي الضربة لي غاتهرسهاا خصوصا أن جيداء الله يرحمها مكانتش شي وحدة عادية كانت صاحبتها وختها ملي كانو صغيرات وهوما كابرين مع بعض كانت جيداء كبر من رحيل وكانت بحال شي ختها كبيرة.. ديما مع بعض ومكيتفارقوش تاكيبغيو ينعسو.. الاتلفات ليك شي وحدة فيهوم سير غير عند الثانية وغاتلقاهاا.. كبرو مع بعضياتهوم وتعلقو فبعضياتهوم بزااااف اولد لحاج.. كنت تانعتابرها بحال بنتي عزيزة عليا كانت ضحوكية ونية وقلبها بيض كانت بحال الدواا لي تتحط على جرووحك (سرط ريقو) ديك لبنت كان فراقها قااصح علينااا كاملين.. وداكشي لي خفت منو هو لي وقع ومها فاش شافت رحيل رجعات عليها لومة ولاحت ليها لخبااار فوجهها شي لي خلاها تصدم وماتقبلش شنو سمعات وفلخر جاها انهيااار عصبي ودخلناها لسبيطار.. من تما ورحيل غير ساكتة مكدوي مع حد غير ساهية وتامن بنتها عمرها شافت فيها بسبابهوم هي كرهات بنتهاا ومبغاااتش تحظنهاا.. كرهاتها حيت بنتو هو لدرجة واحد ليلة خرجات بيها من الدار باش تلوحها فالزنقة..(كمش حجبانو) تما تأكدت بلي بنتي صافي كضيع مني وبلي خصني ضروري ندّخل ونجيب ليها طبيب نفسي حيت حالتها مبقاتش عجباااني.. خفتها دير شي حاجة فراسها حيت عارفهاا مبقااتش تتفكر بدماغها وعقلها ترفع.. دوزنا يامات قاصحين بزاف هلكو صحتناا وصحة بنتي وزدنا عرفنا بلي سيدرا تزادت مع مشكيل فقدان السمع وبلي ضروري مادير لباراي باش تقدر تسمع.. لخبار ضرونا ولكن هوما السباب لي خلاو رحيل تفيق من داك الصدمة وتحظن على بنتهاا نهار شفتها منعساها معاها حسيت بالراحة من جهتها وحيت هي تقبلات بنتها لي ماعندها تاشي دنب.. وباش بنتي تزيد تعيش مرتاحة قررت نخويو المدينة ونجيو لبلاصة خراا يمكن الابدلو لمدينة يقدر كل واحد فيهوم ينسى اش دوز ونيت نفسية رحيل ترتاح شوية واخا عارفها عمرها مغاترتااح مور داكشي لي عاشت.. جينا هنا لمراكش وبدينا حياة خرا زوينة وكالم عشنا هاد لخمسنين مزيان ولي زين حياتنا هي نخشيشتي ونقيطة دلعسل لي حلات يامناا.. كنت تنشوف رحيل تتحسن شوية بشوية وتاأنها قبلات تمشي عند الطبيبة النفسية وهادي كانت خطوة مهمة فرحاتنا.. ولكن ديك لفرحة مكملاتش فاش رجع داك الشيطاان دبدر ولقى بنتي..
إدريس: لقى بنتي لي يالاه كانت تتبدا حياتها من لول رجع تاني وميرداهاا وخلاهاا تخاف وطيح لينا عاود بكريز.. مريض فمخو وباغي يمرضها معااه ورجعات تاني تعيش فداك لخوف لي يالاه قلناا نساتو.. مكتقدرش تخرج بوحدها حيت هو حاضيها ولابد ما خصنا نكونو معاهاا ورجعنا تاني كنعيشو نفس لكابوس لي عشناا قبل ومشيت عند لبوليس رفعت عليه شكاية ساعة باقي لدابا مالقاو ليه حل.. حيت ولد لحرا'م كيعرف كيفااش يضرب ضربتو ومايخليش وراااه شي أثااار وزيد عندو معارف ومحرك لقضية بلفلوووس الحاصول هو حافض صواااريه (قرب إدريس جهة نوح وحط يديه على فخدو وزيرها ونطق بجدية)سمع اولد لحاج نهار شفتك حسيت بيك ولد الناس ورتاحيت ليك وملي عاشرتك زدت عرفت لمعدن ديالك.. نهار الصدقة ملي جيتي طلبتي يد بنتي وافقت بيني وبين نفسي حيت مغانلقاااش بحااالك يكون راجل بنتي لي تعول عليه وتحط راسها على كتفوو..نهار قلت ليك هي مطلقة معاودتش ليك تاشي حاجة عليها وتانتا ماسولتينيش ولكن ليوم فاااش جيتي عندي شفت فعينيك واحد الشوفة خلاتني نرتاح وأنا كنعاود ليك باش تعرف بنتي اش عاشت وعلاش رفضااتك..
نوح:(تحنى جهتو وحط يديه على يد إدريس لي فوق فخدو ونطق بجدية عاقد حجبانو) ولدابا باقي عند كلمتي ورفض بنتك مغاناخدوش جواب نهائي (نطق بنبرة جدية لانقاش فيها وهو نايض) وبنتك غانتزوج بيهاا..
تبسم ليه إدريس وهو متبع ليه لعين تامشى وحس براسو خفاف مور معاود ليه.. شحال كان هاز فقلبو وكان صابر ومتحمل ودابا ملي رجعو تفتحو الضواسى لقدام وتعرى تاني داك لماضي حس إدريس بالراحة وكلام نوح خلاه يزيد يتأكد بلي هو منادمش على قرارو فأنه عاود ليه.. جمع مسائلو وخرج تاهو من لگاراج غادي لدار..
فالجيپ دنوح كان سايگ ويد مخرجها من الشرجم والثانية تيسوگ بيها.. حجبانو معقودين هز عينو فالكراسى لورانين بنظرة غااامضة ورجع مكمل طريقو غادي لفيرمة.. لبلاصة لي كيبغي يمشي ليها باش يرتاح فيها ويتكوانى مع خاطر خاطرو.. وصل فنصاصات الليل ودخل الطوموبيل لداخل وبخطوات تقيلة خرج غادي لباب دخلاني دلفيرمة.. حلو ودخل كان السكات وأصلا بّا سالم ومرتو راه عندهوم دار جنب الفيرمة ديالهوم وغير فلوقيتة لي تيعرفوه غايجي كاتجي مرتو تنقيها وتوجد ليه لماكلة.. وصل لبيتو ودخل وهو مهدود من طريق لي شد وليوم نهار كولو وهو خدام.. أول حاجة دارها خدا ليه دووش ريح بيه عضاامو ومشى صلى ليه واحد زوج ركعااات عاد خرج لبالكوون وهو هاز طويس ديال القهوووة فيدوو معصرة كيف كيبغيها وبلعشوب.. الريح كان خفيف مخلي الجوو مريح بالنسبة ليه.. عيونو على لفيرمة والماا لي كيرش فداك الربيع.. ساهي كيشرب قهوتو وعقلو كيفكرو فيها هي.. لكلام لي سمع من إدريس خلاها تكبر فعينو وحدة مدوزة داك العداب كولو وباقي عايشة ومكملة حياتهاا راه تستاهل لبونجور من عندو.. هادشي زاد خلاه يصر على زواج بيهاا ويعطيها عدر على رفضها ليه.. من حقها لي عاشت مساهلش.. كيخمم تاتسمع صوت الأدان دصلاة الفجر لي تسمع من تلفونو مخليه يتنهد وينوض يجدد وضوءو ويفرش صلايتو فاتجاه لقبلة وبصوت خشن جوهري بدا صلاتو وهو مخشع تاسالى ودعى عاد ناض جامع صلايتو ومشى ديريكت جهة تلفونو هزو وخرج تاني لبالكون ودوز لخط لإدريس لي بعد رنات قليلة جاوبو بهدوء: ولد لحاج ياك لباس؟
نوح:(نطق بجدية وعينو قبالتو بنظرة غااامضة) غدا فالصباح أجي عندي لفيرمة وجيب معاك رنيم..
يتبع..
التعليقات
لا توجد تعليقات بعد، كن أول من يعلق.