محتوى القصة
فغرفة خرى فنفس لكولوار وبالضبط فجناح رحمة لي كانت جالسة فوق الفوطوي وبين يديها تصويرة ديال ولدها "ناصر" الفرحة اللولة ديالها والبكر ديالها هي والحاج إسماعيل.. كاتشوف فيها ودموعها عمرو عينيها العسلين لي كان الألم والحسرة عنوانهوم.. واخا دازو سنين طويلة على موتو إلاأنها عمرها قدرات تنسااه.. وكيفاش غاتنسى كيتو لي تاتگدي قلبها كل نهار.. جالسة نفس جلستها لي مولفاها كل ليلة فاش تاتنعازل بوحدها وتاتسد عليها باب جناحها وتتغرق وسط مواج أحزانها.. كانت يديها تتلمس صورتو وهي تاترجف وعينيها على تبسيمتو لي كانت طالعة من لقلب.. كان هو لي تيشبهها فولادها واخد حريفاتها ولون عينيها واخا شهب.. رزاوها فكبدتها وقتلوه فعز شبابو تغدر وهو باقي يالاه بدا حياتو.. وشحال قاصحة عليها تشوف تصويرتو وماتقدرش تعنقو تلمح تبسيمتو وتسمعها بودنيهاا.. توحشااتو وتوحشات تسمع صوتو كيعيط ليها الواليدة.. توحشات ريحتو وتعنيقتو ليها وديك لبوسة لي تيبوسها فوق راسها كلما جاا من لخدمة.. مشى هو وخلى دكرياتو عالقين فدماغاهاا.. عمر حد قدر يجبد سميتو سوى فالعائلة الكبيرة ولاهنا فالرياض حيت عارفين الكية لي حاسين بيها وخصوصا أن موتو مكانش يطيح فلبال.. كان صعيب يعاودو يحلو الجرح واخا هو عمرو تسد وبرى..
رحمة:(بصوت باكي وعينيها على ملامح وجهو لمبتاسمة) رزاوني فيك اكبدتي وغصبوك فشبابك
صوتها تخنق بالدموع وهزات ديك التصويرة وحطاتها على صدرها معنقاهاا وهي تاتبكي بكاا تيقطع فالقلب.. هادي هي حالتها كل ليلة تتبكي تاكيبغي قلبها يسكت وكاتنعس كل ليلة والدمعة فعينيها وفالصباح تاتفيق بحاال الامابيها والو.. حطات راسها على لفوطوي وهي باقا حاطة تصويرتو على صدرها ومزيرة عليها بحال إلا معنقااه هوو نيت وتمتم بين شفايفها بحرقة "الله يرحمك اكبدتي"..
---
مكانتش متوقعة أنه يكون ماات واخا راه باينة ولكن كان عندها أمل بسيط بلي هو باقي عايش.. ولكن الدنيا غدارة وماشي گاع الناس لي كانبغيوهوم تايبقاو معانا.. دموعها راه ماحبسوش وهي تاتسمع ليه وخلاص فاش عرفاتو مات قلبها حسات بيه تزير.. بقا فيها حيت مات مغدور وحيت تقتل فنهار فرحو وبقات فيها عروستو لي ترملات.. هزات عينيها فنوح لي نااض من بلاصتو وحط داك الألبوم فوق النموسية ومشى جهة لحمام بخطوات تقيلة وهي متبعة ليه الشوفة وسكاتو شطنها..
دخل لحمام وسد الباب وهو حاس براسو مخنوق.. بدا كيحل الصدايف ديال لاشوميز لي لابس تازولها ولاحها فالأرض بإهمااال.. تيحل فالسمطة دالسروال وصدرو كيطلع وينزل بالجهد.. حط يديه على الرخامة دلحمام وحنى راسو وهو تيتنفس بالجهد.. حاس بواحد الغصة فحلقو مقدراش تخليه يتنفس براحتو.. الغصة ديال أن خوه مات وهو ماحضرش لجنازتو.. داكشي لي عاود لرحيل خلاه يتغكر دكرياتو مع خوه لكبير لي عمرهوم تنساو ليه.. خوه لي كان صاحبو وكان متعلق بيه لواحد الدرجة كبيرة.. وفيما يكونو مجموعين فشي مجمع شحال هادي تاتلقاهوم بزوج مكيتفارقوش واخا نوح تيقرا برا المغرب ولكن مجرد مكاتجيه فرصة ينزل لمراكش تايجي بزربة يستاغل وقيتو مع خوه وعائلتو..
فبرا كانت رحيل جالسة وعينيها على باب دلحمام وعقلها معاه.. فاش سمعات حسو تقطع تشطنات عليه وناضت بزربة جهة لباب دلحمام وبدون تردد حلاتو.. كان عاطي بضهرو جهة الباب ومهبط راسو وصدرو كيطلع وينزل.. عضات على شفايفها وعينيها على دوك لطاش لي دابا عرفات شنو سبابهوم.. سدات الباب وقربات جهتو مضورة يديها على كرشو وحطات حنكها على ضهرو معنقاه.. ماهضراتش حيت لكلام مغاديش ينفع فهاد اللحظة وفضلات أنها تعنفو وتعبر ليه على وقفتها معاه من خلال هاد التعنيقة.. هي مجربة حر لفراق وعارفة باش كيحس حيت هي عاشتو وشحال تعدبات تاهي فديك الوقيتة وباقي لدابا كتعدب.. طبعات بوسة على ضهرو وهو حط يديه على يديها لي فوق كرشو وزير عليها.. حسات بيه تقاد فوقفتو وتاهي تقدات وهزات راسها وهي تاتشوف فوجهو فاش ضار عندها.. عينيه كانو كيف الجغمة ديال الدم لدرجة ديك الزروقية مبقاتش تتبان ليها ولون عينيه كحال.. حطات يديها على حنكو وهي تاتحركها بحنية وماحسات براسها غير وهو معنقها بالجهد واحد التعنيقة حسات بعضامها ضروها بقوة مازير عليها.. ودفن راسو فتجويف عنقها كيتنفس بالجهد.. ضورات يديها على عنقو وتعلات بصبيعاتها باش تجي قدو.. تاحسات بيه هزها من خصرها وحطها فوق ديك الرخاامة وتخشى بين رجليها وهو باقي معنقهاا.. بدات تاتمشط بصباعهاا شعرو ومخليااه على راحتو.. مدة طويلة وهوما على ديك لحال تاحسات بيه هز راسو من عنقها وهي تبسمات ليه بحنية وقربات لجهة حنكو باستو..
رحيل:(بحنية)مزيان دابا؟ (حرك راسو بهدوء ووهي كملات كلامها بخفوت) خود ليك دووش باش ترتاح وأنا غانقول ليهوم يطلعو لينا لعشاا هناا واخا
نوح:(بصوت مبحوح)خليك ماتمشيش..
عند بيسان لي مكانتش خدامة ليوم حيت باقي مسالاتش الكونجي ديالها.. جالسة فبيتها ومعاها سيدرا متفرجين فالرسوم.. هازة تلفونها مكونكيطة مع ريان..
كيف عادتها الأخيرة.. مبسمة مع التلفون وكلما تفكرات كلامو ليها داك النهار لي مرضات وسخفات فالسبيطار والخوف ديالو عليها تاتزيد تبسم وقلبها تاتحس بيه تايرفرف وسط صدرها.. قدر يدير بلاصتو فحياتها ويونسها وسط وحدتها ويغير ليها روتينها لي ولفات دلخدمة..
ريان � "شنو دابا مانسمعش صوتك؟"
بيسان � "راه قلت ليك معايا سيدرا وماعندي كيف ندير؟"
ريان � "ديك الفارة اش كادير عندك؟"
بيسان � "جاها الملال وجات عندي ونيت تاأنا بغيت لوناسة"
ريان � "هانتي بديتي تخسري لهضرة دابا واش أنا كاين هنا وتاتقلبي على لوناسة؟"
بيسان �"هههه اوا نتا بعيد شنو ندير ليك أنا"
ريان � "دابا تاتقولي بعيد ملي تانبغي نشوفك تاتبقاي عليا بمانقدرش مانصيبش ولكن هاد لمرة مغانتفاكش معااك وديري فبالك غدا باغي نشوفك حيت عندي مانقول ليك امون دكتوغ"
بيسان � "ماتقدرش تقول لي عندك هنا؟"
ريان � "هاد لكلام تيخصني نقولو وعيني فعينيك مهم غدا ملي نخرج من لخدمة غانسيفط ليك نتلاقاو فشي كافي"
بيسان � "اممم غانشوف"
ريان � "مكاين لاغاتشوفي لاوالو كاينة اييه واخاا غانتلاقاو"
بيسان � "صافي ولكن ماتقدرش تلمح ليا على شنو باغي تهضر معايا"
ريان � "ملي نشوفك وتعرفي"
ضارت سيدرا جهتها ونطقات وهي تتحرك فيها:شوفي بيسو هاديك تاتشبه ليك
هزات بيسان عينيها تاتشوف فداك الرسوم وهاديك لي تاتوريها وتبسمات حيت تاهي عينيها زرقين..
سيدرا:(نطقات بحماس) ياك تاتشبه ليك؟
بيسان:(دايرة ليها لخاطر)اه تاتشبه ليا وهاديك لبنيتة الصغيرة تاتشبه ليك نتي
سيدرا:(حركات راسها بغرور طفولي)لا أنا متيشبه ليا حد
بيسان:(ضحكات ونطقات وهي تاتلمس شعرها) علاش تاواحد مكيشبه ليك؟
سيدرا:(تاتحرك فحجبانها وتاتكركر) حيت أنا زوينة بزااف وديما تيگولها ليا بّاديدي ههه
باستها بيسان تاضحك تاهي عاجبها لكلام مع سيدار وجاتها على لگانة وخصوصاً كلام هاد النخشيشة حلو ودغيا كدير بلاصتهاا.. تاتشوف فيها ودقق فعويناتها الكحلين لي فكروها برياان..
بيسان:(تبسمات وبدون ماتشعر نطقات) عويناتك تيشبهو لخاالك ريان
سيدرا:(كمشات حجبانها)رياني وبّا ديدي تاهو بحالي شوفي
قربات سيدرا جهتها حالة عينيها على جهدهوم زعمة كاتوريها لونهوم.. عاد رجعات شافت فيها ونطقات بدكاء: علاش مگلتيش ليا تانشبه تاال بّا ديدي؟
سكتات بيسان وهي معرفاش تجاوبها حيت بصح مالقات باش تجاوب.. أما سيدرا فالاقلتي لكلام عندها هي راه تاتعيق ومكتفلتش ولمعرفاتش الحاجة تاتبقا تسول ومكترتاح تاكترضي فضولها الطفولي..
بيسان:(نطقات وهي باغا تلفها)هه شوفي هاديك الميكية تاتشبه لماماك ههه
سيدرا:(كمشات حجبانها وقالت باعتراض مكمشة دوك لحجبان)لا لا هادي خايبة ومامي زوينة هي دايرة بحال ربونزل ماشي هادي
بيسان:(ارتاحت فاش تلفات ليها داكشي لي كانت باغا تقول) شوف تاهاديك عندها قطيطة بحاالك
سيدرا:(كركرات وبدات تاتشير بصباعها)ههه تاهداك عندو شعكاكة بحاال زيبيدين هههههه
كان تيبان فيه عياان وهادشي حساتو غير من صوتو الغارق وشوفة عينيه.. نفدات طلبو بكل خضوع وهي مبسمة ليه وعينيها فقلب عينيه ونطقات بدون تفكير: ندوش ليك؟
هز فيها نوح حجبانو بزووج وقرب راسو تاحط جبهتو على جبهتها ونطق ببحة وصوت كالم:ماكرهتش الفثنة ديالي
رحيل:(حطات يديها على صدرو) واخا اجي معايا
نزلها من فوق الرخامة وهي شدات يديه وخرجاتو من الحمام وهو ساكت.. جلساتو فوق النموسية ونطقات بهدوء:خليك هنا
رجعات تاتجري لحمام بينما هو تكى فوق النموسية على ضهرو مغمض عينيه عياان ولكن ماشي العياا الجسدي إنما النفسي.. أما رحيل مع دخلات مشات جهة الجاكوزي وسداتو وبدات تاتعمرو بالماا دافي.. وتوجهات لجهة البلاكار فين كاين البرودويات دلحمام وخدات واحد لكبسولات تايديرو الرغوة والريحة.. عزلات لي فيها ريحة خشب الصندل مع الياسمين وحطاتها ولاحتها فالجاكوزي لي عمر بلماا ومشات هزات شميعات فيهوم الريحة تاهوما كاينين تم.. حطات زوج جنب البنوار وشعلات غير الضواو دالجناب لي كانو خفافين.. ستفات داك لبرودويات ديالو وشعلات الشميعات وخرجات لعندو لقاتو على نعستو مغمض عينيه.. للحظة ظناتو نعس ولكن هو غير حس بيها حل عينيه وتقاد فجلستو ونطق وهو مبسم بالخف:اش كنتي تتصنعي لداخل ؟
رحيل:(تبسمات) اجي تشوف
سبقاتو وهو غادي وراها ودخل كيشوف فدوك الأجواء البسيطة لي دارت ليه.. تبسم وعجبو لحال فاش شاف اهتمامها بيه.. جرها عندو وتحدر جهة شفايفهاا باسها بالجهد تاحسات شفايفها تايوزوزو وهو ينطق بهدوء:شغاندير فيك دابا؟
تبسمات بخجل ومجاوباتوش وتاهو محرجهااش زول السروال تابقا بكالصو ورحيل مرگاات وحشمات وتاتسب راسها وتقول باشمن عقل قلت ليه ندوش ليك.. سرطات ريقهاا فاش شافتو ضار جهتها كيشوف فيها..
نوح:(هز حاجبو)غانبقاو هنا يالاه اجي (وتمتم بمكر)دوشي ليا
نبرتو الماكرة خلات الريق يوحل فحلقهاا..حكات شعرها وقربات جهتو وهو راه تخشى وسط الجاكوزي وعينو عليها هي لي جلسات فالجنب وهزات الشومبوان
نوح:(عوج راسو ونطق ببرود)اش كاديري؟
رحيل:نغسل ليك شعرك
نوح:هاكا غاتغسليه؟
مفهماتش اش قصد وبقات تاتشوف فيه وكتسناه يشرح ليها وتاهو معطلعهاش شدها من خصرها وحطها فوق ركابيه ومع ديك الغفلة لي دار وهي شهقات وخرجات عينيها كيف البومة فيه..
نوح:(حط يديه على فخدها السخون ونطق بهمس كالفحيح) هاكا كيدوشو الناس الفثنة
تاضور عينيها هنا ولهيه مهم ماتشوفش فيه حيت مرگات.. هزات يديها وخدات شومبوان وبدات تاتغسل ليه شعرو وهو حاضيها.. انغمسات فشنو كادير ونسات راسها.. غسلات ليه شعرو مزيان وخدات الليفة دارت فيها باندوش وبدات تادوزها ليه على صدرو وضهرو غير من لفوق مانزلاتش لتحت..
شد يديها وبدا كينزلها بشوية تاوصلها لتحت ونطق بهمس:هنا نسيتيه الفثنة
رحيل:(هربات يديها وبدات تاتمتم)سيدرا تاتعيط ليا
معطاتوش وقت وناضت من عندو غادة وهي كلها تاتقطر ولبيجامة لصقات عليها تابينات تفاصيل جسمهاا
نوح:(بجدية)سيري شلللي هو لول عاد خرجي
حركات راسها باه ودخلات شللات وخرجات بلاماتشوف فيه خارجة من لحمام وهي تاتمتم بينها وبين نفسها: حماارة ارحيل حمارة فين عقلك ملي قلتي ليه ندوش ليك اووف
لبسات عليها بيجامة خرى وطلقات شعرها لي مقاصتوش.. بدات تاترجع حوايج نوح لي كانو تم وتستف تبان ليها خرج ملوي الفوطة على نصو.. مشافتش فيه وخرجات من تم تابان ليها خرج لبس عليه شورط عاد رجعات تكمل شغالاها.. أما هو نعس على كرشو وغمض عينيه ونطق بصوت خافت:رحيييل
قربات جهتو تاوقفات جنبو ونطقات بخوف:مااالك واش كاضرك شي حاجة؟
نوح:(ماهزش راسو من المخدة وقال بنفس الخفوت) ديري ليا مساج..
كان تيبان ليها عيان داكشي علاش مشات نيشان لحمام تجيب دوك الزيوت لي عندها تم فلبلاكار.. هزات واحد ريحتو زوينة وخفيفة ورجعات لعندو لقاتو كيف خلاتو.. ناعس على كرشو وخاشي وجهو فالمخدة ومغطي غير نصو تحتاني بليزار.. طلعات من الجهة لخرى وجلسات جنبو باش تبدا ليه لمساج.. كبات شوية ديال الزيت دلمساج وبدات تاتحكها مع يديها عاد بدات تتماصي ليه ضهرو والجلسة لي جالسة معدبة مصلحاش
نوح:(بصوت تقيل)طلعي جلسي
رحيل:فين غانجلس
نوح:(بسخرية)فوق راسي فين (هز راسو وشاف فيه بعيون نعسانة) جلسي على ضهري
رحيل:(خرجات عينيها)لاهاكا مزيان
نوح:طلعي باركة من لهضرة زايدة
رجع خشى وجهو فالمخدة وهي ميقات بعينيها وتزنگات.. فرقات رجيلاتها وطلعات جلسات فوق ضهرو وبدات تتماصي ليه فلول كانت تاتقيسو غير بصبيعاتها تاسمعات صوتو
نوح:(بخفوت وهو خاشي وجهو فالمخدة) ماصي مزياان ارحييل
حركات راسها باه بحال لاتيشوف فيها وبدات تتماصي كيف الناس وغير اندمجات وهي تسمع صوتو وهو تيطلق تنهيدات ديال الراحة.. سخفاات وعياات وضهرو عريض تباركالله ويديها كتبان كيف النملة وسطو.. باغا غير يقول ليها تحبس حيت يديها عيااو ساعة السيد استحلاها وعجبو لحاال
نوح:(طلق يديه بزووج) ماصيهوم تاهوما
دلات شفايفها وبدات تاني على وعدها وسعدها تاتماصي ليه يديه وتستارح وترجع تااني تمااصي تحدرات جهتو شوية وبدات تاتماصي بصبيعاتهاا عنقو تاسالات وناضت عليه وهو هز راسو وطرطق عنقو تاكمشات حجبانها.. تقلب وجا ناعس على ضهرو وهي كانت تاتسد داك الزيت عند بالها سالات ساعة صدمها فاش سمعاتو نطق..
نوح:(مغمض عينيه وحط يديه على كتافو) ماصي ليا هنا تاهو
رحيل: واخاا
جابها فوق كرشو مجلسها وهي تاتسربي باش تسالي حيت الجلسة وتراتها وخلاص فاش حل عينيه وبقا تيشوف فيها كملاات.. مقدراتش تاخد راحتها بحال قبل وحاولات تزرب.. حط يديه على فخيداتها تايتلمس فيهوم وتايجمع لحمها بين يديه تاكيتعصر ويطلقو عجباتو الرطوبية ديالهوم.. بدا كيطلع ليها داك لبيجامة ورحيل ناقوس الخطر تيدق عندهاا..
نوح:(قال وهو مكمش حجبانو)هادي لاش لبساهاا همم
رحيل:(بخفوت)حيت فيا لبرد
نوح:لكليما كاينة
زولها ليها ولاحها فالأرض وبدا كيمتع عينيه بشوفتها قدامو وهي وبداك دوبياس لي فلكحل وداك السوتيان لي كان ضام نهديها بحميمية.. نزلو عينو على كروشتها لي بانت ليه خرجات شوية وقرصها تاتهزات من فوقو
نوح:(نطق منيم فيها عينيو) هاكا حسن
رحيل:ساليت
جات بغات تنوض وهو يحبسها فاش شدها من فخادها وقال بهدوء:خليك
رحيل:مافيكش الجوع؟
نوح:(هرها فكرشها) هاد لخير كولو گدامي ويجيني الجوع (قاص شعرها بصبيعاتو وبقا تيقادو فوق كتافها) شعرك طوال تبارك الله
رحيل:حيت مقطعتوش من ديك لمرة (شدات الأطراف ونطقات)خصني نقطعو تاني على قبل لبوانت
نوح:(كمش حجبانو) مغاتقطعيهش
رحيل:راه لبوانت لي غايتنقصو باش يطوال مزياان شوف (تاتوريه وتاتهضر بلافرانات)راه لتحت واكل لعصا غانمشي لصالون لي نعتات ليا أسماء حيت قطعاتو فيه واحد السيد يدو زوينة وشعر دغيا كيكبر
نوح:(هز حجبانو تال سماا وعينو عطاوها واحد الشوفة خلات الما يجمد ليها فالركابي وخلاص فاش سمعات نبرة صوتو القاصحة وهو تيطرح سؤالو) عاودي اش قلتي؟
رحيل:(تلبكات فاش عاقت براسها) راه داك الصالون مخلط فيه عيالات ورجال خدامين
يديه لي زيرات على خصرها ونوضة لي نااض خلاتها تسكت خصوصا فاش شافتو خنزر فيها..
نوح:(قرب وجهو لوجهها مخرج فيها عينيه)ونتي اش وصلك لصالون فيه رجااال (غوت تاقفزها)وتاتعري ليااا شعرك قداااام زوا*مل ارحييل
رحيل:(مع سمعاتو خسر لهضرة عرفات بلي بصح جعر عليها ونطقات بتبرير)لا والله ماعمري مشيت ليه أسماء هي لي مشات وقالتها ليا أنا كنصاوب عند لعيااالات والله
نوح:(ديك لفكرة لصقات فدمااغو وشك خلاه يتعصب ونطق بحدة) من ليوم مابقيتيش غاتعتبيها فشي صااالون كيفما بغا يكووون سمعتي..
كلامها شعل فيه العافية ولغيرة خلاتو ينوض ليها نوضة وحدة ويتعصب..فكرة أن شي راجل اخر غايشوفها بشعرها صعراتو ديال بصح.. ممتخيلهااش تابضحك أن شي راجل يشوف شعرها كيف تايشوفو هو دابا ويقيس فيه كيف تيقيسو.. هاد الفكرة شعلاتو وخلاتو يتعصب وجنون يشطحو الرگادة فوق راسو.. سيفتو دغيا تقلبات ودوك لحجبان كيف تلاقاو معاودوش تفارقو بسباب ديك التخنزيرة لي ضارب فيها..
خرجات فيه عينيها ومكانتش متوقعة بلي غايحرم عليها الصالونات.. هي هضرتها كانت عفوية وأصلا عمرها قطعات ولاصاوبات شعرها عند شي راجل واخا تاتمشي بعض لمرات لصالونات فيهوم الرجال ولكن تيصاوبو ليها لبنات وفبلاصة مايشوفها فيها حد..
رحيل:(خرجات عينيها)ولكن علاااش مانمشيش راه قلت ليك عمري صاوبتو عند شي راجل واش متيقتينيش؟
نوح:(جاوبها منيرڤي) كلامي قلتو ارحييل
رحيل:(تعصبات ونطقات وهي تاتعبر بيديها وحاولات ماأمكن ماترفعش صوتها) علااش آخر مرة واااش نتا مكتيقش فياا انوووح حلفت ليك بالله بلي عمري صاوبت شعري عند شي راجل ونتا ممتيقنيش (حسات بلبكية وناضت من فوقو وقالت بصوت مخنوق) أنا دويت معاك بنيتي ونتا هجرتيه ليااا
مشات ولبكية واصلة ليها لحلق تقولي ليها مالك تفرگع عليك.. لاحت عليها بنوار ستاان وصدرها يطلع وينزل تمبقاتش قدرات تحبسها وهي تجلس فوق الكرسي وبدات تاتبكي وتنخصص بلاصوت..
كان جالس مغمض عينيو تايستغفر مولاه.. لموضوع مامتعلقش بالتقة إنما متعلق بالغيرة لي حس بيها فاش قالت هضرتها.. يقدر يكون زاد فيه ولكن غيرتو قاصحة وهكا دايرة وهو أصلا هاكا داير كالم ومرزن ويدوي معاك بالخاطر ويعطيك وقت تهضري فيه وميقمعكش ولكن فاش تاتشعل ليه البولة الحمرا صافي قلب الطريق حيت مكيبقا عاقل لاعلى رزانة ولا لهداوة وهو ماشي من نوع المتعصب لي ديما هاز شوكتو وهو بالضبط كينطابق عليه مثل دوز على لواد لهرهور ومدوزش على الواد السكوتي.. ملي حس براسو برد شوية نزل من بلاصتو وهو باقي عاقدهوم وغادي يشوف فين تخشات.. وصل دريسينغ وهي تبان ليه جالسة تاتبكي.. زفر بعصبية وهادشي لي مكيبغيش يبكيهاا.. ديما فاش تيتعصب كيتفادى يتحك بيها باش مايبكيهاش.. قرب جهتها وجلس قفازي وهي قلبات وجهها عليه ودموعها مسرسبين.. مد يديه كيمسحهوم ويمسح ليها تانيفها لي بدا يسيل وهي مضارتش عندو.. بقا فيها لحال حيت متيقهاش ومعرفاش بلي الغيرة هي السباب..
نوح:(نطق بهدوء)شووفي فياا (شافت فيه وعينيها حمارو وهو زاد تعصب من راسو وشد وجهها بين يديه وتعلى باسها فجبهتهاا ونطق وهو باقي حاط شفايفو السخان على جبهتها) كون مكنتش تانتيق فيك مغاندخلكش لداري ونعطيك سميتي (بعد عليها وشاف فيها بشوفة حنينة عكس نبرة صوتو الجدية) خصك تعرفي بلي أنا هاكا داير ملي كانتعصب كانولي خاايب جلاخة وخصك تولفي عليا وكلامك لي قلتيه نتي عندك عادي ولكن أنا معاديش حيت مانبغي تاااشي قو*اد يشوف ليا فشعر مرتي ولايشوف فيها أصلا حيت غانتقب ليه عينيه خصك تعرفي بلي حاجتي راه نقتل على ودها
رحيل:(نطقات وهي تاتشوف فيه بعتاب) بقا فيا لحال حيت واخا حلفت ليك بقيتي مصر على كلامك وحسيت بيك بحال لامتيقتينيش
نوح:(دوز لسانو على سنانو) دوينا فموضوع التقة ارحييل راه تقة لي داير فيك ماليها حد عمررك تنساي هادشي
رحيل:(ضورات عينيها ونطقات بتردد) وغانمشي لصالونات يااك؟
نوح:(تنهد وناض من بلاصتو عاقد حجبانو وهز صباعو تيهضر بحدية) الصالونات لي فيهوم الرعوانين بربي لاعتبتيهوم ولاعرفتك مشيتي لشي واحد ديك الساعة كلام اخر تفاهمناا
رحيل:(ناضت من بلاصتها وعنقاتو وهي حاطة وجهها على صدرو) صافي واخا
نوح:(جرها عندو ونطق تيحرك راسو) البكااية هادشي كولو غير حيت قلنا ليك الصالون لا
رحيل:(تخشات فيه كثر)تت حيت سحاب ليا ماتقتيش فيا عليهاا
نوح:(هزها من خصرها وهي تعلقات فعنقو ونطق)اجي نتفاهمو بعدا هو لول
ضحكات فاش فهمات اش قصدو وهو وصلها لنموسية وحطها وخنزر فيها وهو كيفتح ليها سمطة دلبنوار:ياك قلنا هادشي بلاش منو علاش مكتسمعيش لكلام..
زولو ليهاا وحطها فالنموسية وضور راسو تبانت ليه لقرعة ديال الزيت دلمساج وشدها وقال بهدوء:أجي نوريوك امدام الناس كيفاش تيديرو المساج
رحيل:(ضحكات بالجهد)ولكن عضامي مكيضرونيش
نوح:(غمزها ونطق بمكر)دابا يضروك الفثنة ديالي
كب داك الزيت فيديه ومسدهوم مع بعض قبل مايحط يديه على كرشها وبدا كيماصيها ليها وهي تبوريشة طالعة معاها.. يديه غادة لجنابها وتيطلعها بشوية تاكتلوى ليه وضحك حيت تيهرها.. زول ليها السوتيان وهي غرقات فديك لمخدة وهي كاتشوف فعينيه لي غياكلوها وهو عاض على شفتو بنابو.. طلع بيديه من كرشها تاوصل نهديها وبقا تيماصيهوم ليها وهي دابت واستحلاتهاا.. كان تيقتلها بلمهل وتيخليها عطشانة لحركاتو ليها.. تايخليها طلق تنهيدات ديال الراحة وصوتها الهامس غير مخلاه يجعر عليها وصبرو يتبخر ومحسات براسها غير وهو واخد ليها شفايفها فقبلة قوية وعنيفة وجسمو كيتحاك مع جسمهاا.. غارقين بزوج بيهوم فبعض هو أستاد وهي تلميدة عندو كتعلم معاه أبجدية الحلال..
صباح جديد والجو كان مبرد شوية وهاد الأيام كلها أصلا بدا الجو تيتغير.. وقف ريان مطور ديالو قدام لكافي ونزل وهو تيزول لكاسك.. كان شعرو كبر شوية ورجعو لور كحل وقوي.. سد لمطور وهز معاه لكاسك ودار يديه فجيب الجاكيط وتم داخل وعينيه تايقلبو عليهاا.. توجه لواحد الطابل جات حدا الزاج وجلس حاط لكاسك فوق الطبلة.. هز تلفونو وسيفط ليها مساج � "أنا وصلت فينك"
حط التلفون فوق الطبلة وربع يديه كيشوف فالشارع من داك الزاج تاوقف عليه السرباي باش ياخد لكونسوماسيون ساعة صدرو تاتجي بيسان وياخدو لي بغاو.. جالس مركن وساهي تاحس بالكرسي تجر وضار مبسم عند بالو بيسان ساعة تبسيمتو تجمعات ملي بانت ليه نور هي لي جالسة..
ريان:(بجدية)نتي اش كديري هنا؟
نور: شفتك جالس بوحدك وجيت نونسك (نطقات بتحلوين) ماتوحشتينيش حيت أنا توحشتك بزااف
ريان:(ببرود) سبق ودوينا واقيلا وسالينا داكشي لي كان بناتناا
نور:نتا ساليتيه ولكن أنا باقي اريان علاقتنا راه خص نكونو بزوج تانتحكمو فيها ماشي غير نتاا
ريان:(بدا يطلع ليه لخز لراس)اشمن علاقة واش مريضة فك*رك أنا ونتي عارفين اش كااين بلاماتبقاي تيقي راسك وديري دور الضحية كلامي لي عندي قلتو ليك ديك النهار فالسبيطار وسدينا لموضوع ودابا بلاتفلسيف نوضي تقوودي عليا
نور:كنتي غادي معايا بخير وعمرك بينتي ليا لفراق تال نهار بانت ديك خيتي لي عاونتي فلبار من تما تقلبتي عليااا (خنزرات فيها)كلشي على قبلها هي لي بدلاتك وخلاتك تسمح فيااا
ريان:(برك على سنيه)واش ابناادمة كدبتي الكدبة وتيقتيها اشمن سمحت فيك مالي حاا*ك ومامخلصكش ونوووضي عليا راه بديتي طلعي ليا لمرض لراااس ابنادمة
قدام الكافي وقفات الرانج روڤر ديال بيسان وقبل ماتنزل ضورات لمرايا جهتها وخدات لگلوز زادتو على شفايفها وتأكدت من مظهرها قبل ماتحل لباب وتخرج وهي هازة صويكهاا.. كانت متأنقة بلكلاس سروال توب فلبيض مع شوميز ستان فالبلوسياال وڤيست بيضا لايحاها على كتافهاا بلاماتلبسها... صوت طالونها كيتسمع وهي داخلة تاتقلب عليه تابان ليها جالس مع شي وحدة وباين فيه معصب.. شافت فلخرى من ضهرها وتاتقول فعقلها شكون هادي فورمتها ماشي ديال أسماء وماشي دغزلان ورنيم.. وقفات عليهوم فلحظة لي سكتو بزوج وهزو فيها عينيهوم وريان بان فيه مراضيش..أما نور فغير شافتها عقلات عليها وكيفاش أصلا غاتنساها ومن نهار عاونها فلبار وهو مبدل عليها تااتفارق معاهاا..
نور:(ضحكات بسخرية)ههه كنت عارفة على قبل هااد خيتي نتا سمحتي فياا (كملات بغل) هو مكيبغيكش سمعتي هو غير تايضحك عليك وكيبغيني أناا ونهار ياخد داكشي لي باغي غايلووحك كيف الكلبة
ريان:(ناض من بلاصتو معصب وغوت تاناس ضارو تيشوفو فيهوم)برب وتعاوديهاا ياتاانقتتتل زا*مل بووك وندفنك فأرضك باااقي متااقي فيك وجه الله وداير بحساب العشرة لي متستاهليهااش ويااك طوفي باقي جهتي حيت لاشفتك مغايعجبكش تصررفي
هز لكاسك وتلفونو وشد يد بيسان لي واقفة وهي جامدة من ورى الكلام لي تقال.. خرجها من تم وهي غادة وراه تاوصلو لبرا وهي تنثر يديها ونطقات بجدية:شكون هاااديك ونتا فين تاتعرفهاا؟
ريان:هاديك هي لي كنت معاها فالبار نهار تلاقيتك كنا بزوج ومن بعد كل واحد مشى فحاالو
بيسان:(بعدم تصديق) لاكان كل واحد مشى فحالو علاش كنتي جالس معاها لداخل؟
ريان:كنت جالس كانتسناك تالقيتها جالسة قدامي وبدات تاتخور فلهضرة هداك مكاان (مسح وجهو ونطق بهدوء) خلينا نغيرو لبلاصة ونهضرو أليز
بيسان:(ببرود)واخا
مشات جهة طوموبيلتها ركبات وهو بقا واقف تيشوف فيها قبل مايركب فمطورو ويتحركو من تم.. كان غادي وراها هي لي سبقاتو تاوصلو لواحد لكافي ودخلو بزوج بيهوم.. جلسات بيسان وهي مكمشة حجبانها وكلام نور خربقهاا..
ريان:(شاف فيها ونطق بهدوء)مون دكتوغ واش غاتبقاي ساكتة؟
بيسان:شنو بغيتيني نگول؟
ريان:(شد يديها وزير عليها) عطا الله مايتگال مون دكتوغ
بيسان:(جرات يديها وقالت بهدوء) قلتي باغي دوي معايا فموضوع مهم ؟؟
ريان:همم شنو تشربي؟
بيسان:كافي نواغ
ريان:(ضحك) نواغ كاع امون دكتوغ ههه (جا السرباي) كافي نواغ وجو دوغونج عفاك (ربع يديه) اوا رتاحيتي شوية؟
بيسان:وي ارتاحيت حسن من لول
ريان:(بجدية) خصك تكايسي شوية على راسك وماتبقايش تهلكي صحتك فالخدمة
حطو ليهوم الكونسوماسيون وريان خدا لعصير وحطو ليها وخدا هو لكافي ونطق:شربي لعصير حسن ليك
بيسان:شكرا
ريان:بيسان أنت عارفة بلي ماشي مدة كثيرة هادي باش بدينا تاندويو أنا وياك عارف لبداية كانت مفشكلة ولكن هادشي مكيهمش دابا.. لي بغيتك تعرفيه وديريه فبالك هو أنا نيتي معاك معقولة ومباغيش نتفلى وزيد مباغيش علاقتنا تبقا بتخبية هاكا بحال لاكنشفرو.. (شد يديها ونطق بجدية وهو كيشوف فعينيها) أنا باغي علاقتنا طور كثر على هاكا امون دكتوغ ومانبقاوش مخبين باغي كلشي يعرف بلي حنا بزوج شبان ليك؟
بيسان:(نطقات بسرعة) لا..
ديك لا خلاتو يهز فيها حجبانو وبلامايشعر يديه طلقو يديها لي كان شاد.. بقا مفيكسي فيها عينيه بنظرات غريبة تايحاول يتأكد واش سمع لا من فمها ولاودنيه غلطو..
ريان:(حرك راسو)كيفاش لا ؟
بيسان:(نطقات بتبرير) كانشوف بلي من الأحسن نعطيو وقت لراسنا مزال اريان ونعرفو بعضياتنا كثر
ريان:(مسح على وجهو وضحك باستهزاء)علااه لاكنا مخطوبين مغاديش نعرفو بعض بحال دابا (مال بجسمو جهتها ونطق مكمش حجبانو)ملي قلت بلي باغي كلشي يعرف علاقتنا قصدت بلي نجي لداركووم ونعطيو سمية لهادشي لي بناتناا حيت مباغيش نتفلاا ابيسان واش نتي مباغاش؟
كرر سؤالو ليها بطريقة خرى عند بالو راه فهمات كلامو عوج داكشي علاش..
بيسان:(حكات يديها بزوج) فنظري ماخصنااش نزربو اريان وكيف قلت قبل من الأحسن نعطيو وقت لراسنا عاد ديك الساعة ويكون كلام آخر
ريان:(مافهمهاش حس براسو ترون من كلامها) كيفااش مانزربووش واش نتي عجباك هاد لحالة ندويو بتخبية ونتشاوفو بتخبية الانتي عجباك أنا معاجبانيش
بيسان: سبق وقلت ليك قبل الخروج بزاف بلاش منو من الأحسن نبقاو كيف كنا قبل ونهضرو غير فالتلفون ونيت أنا مايصلاحش ليا لخروج بزاااف اريان
ريان:واخا لي بان ليك
سكت وربع يديه كيشرب من لقهوة وتاهي سكتات.. اه بصح كترتاح ليه وفاش تيدوي معاها وكاتشوف اهتمامو كيعجبها لحال وتتعاود ليه ورغم هادشي كولو هي باقي معرفاش راسها واش تاتبغيه ولا لا.. وفاش طلبات منو يبقاو على هاد لحال باش تزيد تعرفو كثر.. هي هاكا تفكيرها داير معزيزش عليها تزرب فقراراتها وكاتبغي تاخدهوم بتفكير باش ماتندمش من بعد.. داكشي علاش فضلات الأمور تمشي كما هي عليه بلازربة..
بيسان:(داك السكات لي بيناتهوم درونجاها وقالت كتلطف الجو) خرجتي بكري ليوم؟
ريان:ساليت بكري
بيسان:مزيان أنا باقي ليا واحد تخوا جوغ ونبدا خدمتي إن شاء الله صراحة توحشت لوبيطاال وحسيت بلقنط فهاد ليامات
ريان:بنادم لي مولف يتحرك تايجيه صعيب يجلس فالدار
بيسان:وي قالت ليا رحيل بلي أسماء وغزلان غايديرو عرس فنهار واحد واش حددو النهار
ريان:ماعرفتش
بيسان:صراحة شي نهار خصنا نديرو كافي مجموعين ولاشي خريجة اش بان ليك
ريان:خص يكون غير لوقت
بيسان:دابا نشوف مع لبنااات
كملو كلامهوم عادي وهو كان باين فيه تغيير غير من كلامو لي بارد وجوابو لي على قد السؤال وهي لاحظات هادشي ومحكراتش.. جلسو شي ساعة تاصونى تلفون ريان كانت تانيرت تاتسول فيه حيت تعطل..قطع معاها وشافت فيه بيسان بهدوء:نتحركو؟
خلص وخرجو بزوج وريان نطق بنبرة باردة وهو راكب فوق مطورو:بسلامة
حرك لموطور ومشى وبيسان بقات واقفة بلاصتها كاتشوف فيه وهو منير غاادي.. تنهدات ومعجبهاش لحاال حيت ماشي هاكا كانت باغا لخرجة ديالها معاه.. مولفة فيه الضحك والتقشاب والكلام وفاش ضرب طم وتقلب جاها فشكل.. ركبات طوموبيلتها وتاهي تحركات غادة لرياض وهي تاتنهد وتاتفكر فكلامو وكلام نور لي قالت.. هي معقلاتش عليها ماشي بحال نور لي منساتهااش.. كان عندها فضول تعرف علاقتو معاها كيف كانت؟ وعلاش نور قالت ليها ديك لهضرة زعمة يكون ضحك عليها ولاكيفاش؟ جاها لوسواس وبدات تتسول راسها وتجاوب فنفس الوقت بحال شي هبيلة.. ماتهنات تاوقفات قدام الرياض عاد عقلها رتاح ودار سطوب.. نزلات داخلة لدار وهي تاتقلب على مها لي مبانتش ليها عرفاتها غاتكون فجناحهاا.. دخلات لبيت وبدات تاتزلو حوايجها ومشات خدات دوش وخرجات دارت روتينها ورى الدوش وهزات تلفونها باغا تشوف واش سيفط ليها مساج كيف مولف ساعة لقاتو مسيفط والو وعضات على شفايفها وكتبات ليه هي 📩 "وصلتي لدار؟"
عندو هو لي كان مدابز مع المطور تيدخلو لگراج وهو عاقد تغوبيشة.. سد الباب دلگاراج وحس بلڤيبرور فجيبو ومع هزو قرا مساجها ورجعو لجيبو بلاميجاوبها.. خسرات ليه لمود بهضرتها لي قالت ليه وخلات عقلو يتشغل.. دخل لدار وطلع لطبقة لوسطانية حيت تما فين كيجلسو وصوت سيدرا وصل لعندو وهي تاتغني بالجهد وتنقز فالصالة.. دخل وغير شافتو جات تاتجري عندو ونقزات عليه تاهزها ونطقات بصوت مرتفع:رياااااني توحشتك
ريان:البخووشة مشيتي ونسيتيني
سيدرا:لا رياني أنا أصلا غانيني عندك ليوووم
خرجات تانيرت من الكوزينة وهي مبسمة بشوفتو:جيتي اولدي؟
ريان:اه فين رحيل؟
تانيرت:يالاه عاد دابا مشات غاتكونو تخالفتو فالطريق جات طلات عليا وخلات سيدرا تبات عندنا ليوم
ريان: مكاين حد؟
تانيرت:مشاو يشوفو واحد لقاعة على قبل لعرس وباك راه فلگاراج باقي مسالى
ريان:أنا غانطلع لفوق نتكى شوية بلاماتفيقوني
تانيرت:ياك اولدي مامريض (تاتقيس جبهتو)
ريان:لا لا غير عيااان وصاف (نزل سيدرا)مهم أنا فبيتي
طلع لبيتو ومشى بدل عليه وتكى فوق نموسيتو وهو حال عينيه فالسقف وكلامها كيتعاود فودنيه مخليه يدرونجاا والشك يدخل لقلبو ويخليه يطرح سؤال لي كان تيتهرب منو ديما..واش قصة محمد طه مع جيداء غاتعاود معاه تاهو؟؟
خارجين بربعة بيهوم من القاعة لي اتافقو يمشيو يشوفوها.. لبنات كانو سابقات ومشاديين كيهضرو وموراهوم محمد طه وإسلام لي غير تيسووط..
إسلام:دابا شنو واش عجباتكووم؟
أسماء:لا معجباااتنيش مازوينااش وصغيرة بزاااف
إسلام:اهااا وشنو نديرو حنا نبقاو مدابزين غير مع لقاااعة
أسماء:وراااه هي الساااس ابنادم
كانت غزلان ساكتة غير تاتسمع لكلام ومعاها تامحمد طه لي مدخلوش حيت أصلا هوما مكانوش باغيين عرس وغير إصرار أسماء لي خلاهوم يوافقو..
محمد طه:ماعليش نشوفو شي وحدة خرى
إسلام:اشمن وحدة خرى هادي راه تاحاجة مامعمرة عينيها
بغات تجاوبو تاني وتعرعر عليه ساعة لابيل لي جاتها من رحيل سكتاتها:وي زين صافا
رحيل:حمدلله امدرا لقيتو شي قاعة؟
أسماء:هاديك لي شفنا مازويناش وصغيرة
رحيل:اه وشنو لمعمول شوفي هاديك لي كنا مشينا ليها أنا ومحمد طه لي دوزات فيها رجاء لعرس ديك لي كانت خدامة معايا فلميزون دڤواتيغ
أسماء:بلاتي (شافت فمحمد طه)ديك لقاعة لي كنتو حضرتو فيها نتا ورحيل لعرس ديك لي خدامة معاكوم فين جاات
محمد طه:اه بعيدة شوية على هنا
أسماء:نمشيو ليها نشوفوها واش زوينة بعدا وكبيرة؟
محمد طه:اه زوينة وغاتعجبكوم ونيت ديكور تايلعب دور
أسماء:(جاوبات رحيل)غانمشيو ليهاا ونشوفوهاا
رحيل:غاتلقايها مسدودة خصك تاخدي نمرة وتعيطي ليه
أسماء:نمشيو ونشوفو راك عارفة عشرين يوم مغاتقدناتاش
رحيل:اوا سيرو ليها وباشما كان عيطو لياا
قطعات معاها وشدو الطريق لديك القاعة ومحمد طه هو لي نعث لإسلام لي كان صايگ.. وصلو بعد مدة ولقاو لباب دلقاعة محلول وشي رجال كيدخلو لمطريال لداخل.. نزلو غادين لجهة الباب وقربو عند السيد لي تم ونطق إسلام:السلام أو عليكوم
س:وعليكوم السلام
إسلام:لكان ممكن باغيين نمرة دمول لقاعة
س:راه كاين هنا نيت لداخل تسناو نعيط ليه
مشى السيد وهوما بقاو واقفين ومن زهرهوم تلاقاو مع القاعة فيها مناسبة.. خرج عندهوم مول لقاعة وسلام عليهوم وبعد سلام وكلام قالو ليه على العرس لي عندهوم وبغاو يشوفو القاعة وبلفعل دخلهوم واخا كانت فيها الروينة ولكن كانت باينة متيسعة وكبيرة.. عجبات أسماء واتافقو معاه على لوقت لي غادي يكون عندهوم عرس وثمان طبعا ودارو معاه نهار اخر يرجعو باش يتافقو على الديكور والماكلة وگاع داكشي لي غايديرو فلعرس...
كانت أسماء تاتكتب المساج لرحيل وتاتعلمها بلي كاين.. تحدر إسلام جهة ودنيها ونطق بهدوء:تهنيتي دابااا اغزالي
أسماء:(شافت فيه بنص عين) اوا من حقي العرس كنديروه مرة فحياتنا وضروري يكون كلشي فيه على حقو وطريقو وراه نتاا غاتهنى كيتي أنا لي تابعني مزال الجرا
إسلام:اوا داكشي ديالكوم مغاندخلش فيه
أسماء:نيت مخصكش دخل ههه
إسلام:بااااز
عند محمد طه وغزلان لي كانو غادين جنب بعض وساكتين كل واحد فين قالب وجهو على الثاني.. هو منفخ عليها حيت نهار سولها على لعرس رفضات وملي قالتها ليها أسماء وافقات ومع أصلا الحساسية لي بناتهوم خلات الشرخ لي فعلاقتهوم يزيد يكبر ولاهو دار خطوة باش يمنع داك الشرخ ولاهي دارتهاا وكل واحد هاز تيفو لسماا كيتسنى التاني يهبط الراس.. وصلهوم إسلام لدار وتحرك هو لاباخطمون ديالو.. ولبنات غير دخلو بداو يعاودو لتانيرت اش دارو..
---
كان داخل لدار مبعد مادوز نهار عامر تماارة طلع لجناحو وعينو تيقلبو على الفثنة ومبانتش ليه.. دوش وبدل عليه بحوايج الدار ونزل لعندهوم كانو جالسين كاملين من غير رحيل وبيسان.. جلس جنب مو لي تبسمات ليه وتاهو درعها بيديه وجرها عندو بايس ليها راسهاا
رحمة:(بحنية كطبطب على صدرو)مبقيتش كانشوفك اولدي
نوح:غير مع الخدمة وصاف هادا ماكاان
رحمة:اوا الله يسهل عليك المرضي ديالي (تنهدات) سناء عييت مانعيط ليها وهي باقا طافية تلفونها صراحة شطنااتني عليها بزاف
نوح:خليوها ترتاح ايمّا هي ماشي بنت صغيرة وعارفة اش كدير
رحمة:عفاف كانت غاتجي لهنا دوك ليامات ولكن بابا ماخلاهاش وقال ليها تبقا تايطلعو مجموعين فالخطبة داليازيد
نوح:مزيان مرحبا بيهوم
ح.لحسن:أشنو درتي باقي اولدي فديك الأرض لي قلتي ليا عليها
نوح:(تبسم ليه بالخف)اش كاتعرف عليا الحاج
ح.لحسن:(ضحك ونطق برزانة) مغاتفلتهااش
رحمة:اشمن أرض؟؟
نوح:واحد الأرض شفناها أنا ولحاج ناوي إن شاء الله نبنبيها وندير فيها بارطمات ونبيعهوم
رحمة:(تبسمات بافتخار) الله يسهل عليك اولدي ويبعد عليك ولاد لحرام
نوح:آمين
دخلات رحيل لي كانت لابسة إسدال الصلاة مع فولار مبسمة وجنبها بيسان..
رحيل:(شافت فنوح ونطقات بتبسيمة)السلام أوعليكوم
ردو عليها السلام ونوح غمزها بلخف واتجمعو كاملين كيف ديما قبل لعشا ضروري من جليسة مع بعض يتعاودو فيها.. تاسمعو صوت الطالون لي جاي من على برا وشوية بانت ليهوم سناء لي كانت داخلة فكامل أناقتها كيف ديما وضاربة عكر حمر ولعوينات مكحلين..
رحمة:(ناضت من بلاصتها ونطقات وهي غادة عندها)سناء توحشتك..
من الشوفة كيبان فيها راه بخير ومابيها والو.. عنقاتها رحمة وهي موحشاها وخصوصا أن سناء أغلبية دلوقت تاتبقاه فالرياض عند ختها عليها مولفاها بزااف.. سلمات عليهوم سناء وجلسات بهدوء وكيف عادتها مكتبينش اش بيها باش مايتشمت فيها حد.. تجمعو على لعشا وتاواحد ماجبد ليها موضوع اليازيد وعلاش مشات وغير تعشاو ناضت سناء لبيتها ومشات معاها رحمة..
غير دخلو لبيت وهي تنطق رحمة بعتاب:ماشي حشومة عليك خليتيني مخلوعة عليك هاد ليام كلها
سناء:(شافت فيها بنظرة عتاب تاهي)علاش غاتخلعي عليا؟
رحمة:خفت تكون طرات ليك شي حاجة خايبة ومكنتي تتجاوبي على حد من غير نوح وموراها طفيتي داك لمشقوف ومافكرتيش فيا وفبابا ولعائلة لي مشطونة عليك
سناء:بابا والعائلة هه هادوك لي ضوروني وسطهوم ورضوني ضحكة بناتهوم (تنرفزات) بابا لي نهار مشيت عندو باش نعلمو بلي غايجيو لخطاب فيا ردني فالبلاصة ومبقاش بغا يدوي معايا هز شوكتو علياا لاهو لاخوتي وخوتاتي تاحد فيهوم محاشاها ليا ونهار ولد خوه نوى يخطب كلشي فرح ليه وبغاهاا ليه
رحمة: سناء خصك تعرفي بلي بابا باغي مصلاحتك كيف كلنا باغيينها ولي كانشوفوها مع اليازيد
سناء:ههه (حابسة البكية بزز) مصلاحتي علاش نهار نويت نبدا حيااتي من بدا وجديد تاحد ماوقف معايا عطااوني بالضهر بحال لاأنا عدوتهووم وهو كلشي فرح ليه واش ماعرفتيش بلي عيالات خوووتك رضوني مسكة تايلويوها ففمهوم ويتغامزو عليااا وموو ههه جااات قدامي تاتحشي ليا فلكلام باش نسمع واااش أنا عمري أديتهووم هوماا ياك ديما شادة تقاااري بعيد عليهوم عمري هضرة على عيالات خوتك ولاجبدتهوم بلعيب ومو عمرها مشافت عيبي ملي كنت مرات ولدها ودابا نيت عمري قللت الاحترام عليها وهي شنو دارت جالسة تبين ليا بلي ولدها راه غايبدا حيااااتو مع وحدة خرررى ههههه زعمة بلعربية تاعرابت ولدي نسااااك
رحمة:أنا مكنتش باغا نقولها ليك حيت عارفاك باقي تاتبغيه واخا لعناد لي تتعانديه تيقيني بحالي بحال نهار عرفت لغد ليه مشينا معاه مقدرناش نخليوه وهو جاا عندناا
سناء:(تاتمسح دموعها لي نزلو بلا ماتحس وقالت بصوت مبحوح)لي بقااا فياا هو بابا لي دار لفرزيات هاداك ولد خوووه ولكن أنا راه بنتو علااش هو من حقو يبدا حياتو وأنا لا نبقا واقفة بلاصتي
رحمة:نتي عارفة بابا باغيك ليه داكشي علاش (داخلة بخيط بيض)ماتهزيش فخااطرك عليه
سناء:واخا تقولي لي قلتي هاازة ارحمة فخاطري من جهتو بزااااف حيت داكشي لي شفت وسمعت كافي يخليني نهزز شفتي كون دارها لبرااني نسرطهاا ولكن هو لا
سكتات رحمة ومالقات ماتقول حيت بصح سناء عندها الحق فهاد الكلام لي قالت.. اه هي طلقات بليازيد وبصح اليازيد دار لي فجهدو باش يخليها تسمح ليه وتنسى غلطو وسنين وهو تابعها باش تسامح وهادشي رحمة مغاتنكروش ولكن باها قصح مع سناء نهار مشات باش تعلمو بلي كاين واحد باغي يخطبها وهو قال لا ومغاتخطبيش ومغايجيش لداااري وناض سكونداال وهو بقاا شااد فريوو وتاهي قصحات راسها وناض مشكيل من والو.. اش فيها لاخلاه يجي لدار وتما يشوفو ولامعجبوش يرفضو علاش قصح معاهاا...
طبطبات على كتف سناء لي نطقات بصوت خافت:عييت باغا نعس
رحمة:واخا نعسي ورتاحي تال غدا ونهضر
خلاتها وسناء غير بقات بوحدها سمحات لدموعها ينزلو تاااني.. باقي مقدراش تقبل بلي هو غايبدا حياة جديدة مع وحدة حرى من غيرها وبلي نساها.. هاد ليام كلها وهي تاتفكر فيه واخا كانت باغا تصفي دهنها ولكن كان هو محتل تركيزهاا ومخليهاا تفكر غير فيه هو.. معرفاش كيفاش غادير وتشوفو مع وحدة خرى من غيرها كيفاش غاتصبر ولكن لي عارفة هي أنها ضيعاااتو بسباب الأنانية ديالها وقصوحية راسها وماعندها مادير من غير تقبل الواقع..
----
أصبحنا وأصبح الملك لله.. نهار جديد وصبااح مشتي على غير لعادة.. كانت رحيل واقفة تاتشوف فالشتاا لي كاضرب فالزاج دالشرجم وكتنزل دايرة خط طويل تال لتحت.. تايحمقهاا فصل الشتااء وريحة التراب لي تاتكون مسقية بالشتااء ياسلام.. ضارت جهة نوح لي بان ليها خارج تايسد سمطة دالسروال وقربات جهتو ناطقة بحمااس: ماشاء الله شتااء مجهدة براا
نوح:(جرها عندو وباسها فتجويف عنقها تاتعوجات ونطق بهمس) لبسي حوايجك
رحيل:علاش فين غانمشيو؟
نوح:سمعي لكلام وسيري لبسي حوايحك (باس شغتها ملذذ) وعنداك تخففي لبسك لايضربك لبرد تاني
رحيل:واخا
مشات تلبس عليها وهو جلس تايتسناهاا وشاد التلفون كيهضر على لخدمة.. مايمكنش شي نهار يجلس مرتاح ويطفي تلفون ويعول لخدمة تمشي بلابيه يستحيل ضروري مايعيط ليه شي حد يتشاور معاه ولايسقسيه مهم مكيخليوهش يرتاح..خرجات عندو رحيل لابسة سروال دجين نواغ مع بودي نوااغ وجاكيط من لفوق طويل وسبادري بيضا وفولار نواغ.. اكتفت بمسكارا وجلوس وريحتهاا.. خشى تلفونو فجيب الجاكيط وناض تيشوف فيها وفلبسها تالقى كلشي هو هداك هاد شدها من يديها ونزلو لتحت.. كانت رحمة جالسة تادوي هي وزاينة بالشلحة تاشافهوم جايين وهي تنطق رحمة:ولدي نوح يالاه عيطات ليا عمتي وقالت بلي حددو نهار الخطبة داليازيد وغايديروها سيمانة الجايا..
كان ديجا عارف حيت اليازيد علمو وقالها ليه بحكم علاقتو القوية معاه.. داكشي علاش حرك راسو بهدوء لمو ونطق بخشونة:الله يكمل بالخير
رحمة:واش نتوما خارجين؟
نوح:اه غير تغداو وماديروش بحسابناا
حركات رحمة راسها وهي معاجبها حال عكس رحيل لي تبسمات ليهاا.. خرجو بزوج وركبو فطوموبيل لي كانت واقفة قدام باب الرياض.. كانت الشتاا المجهدة حبسات ولكن باقا تاتنقط نقيطات صغار.. شدو بلايصهوم ورحيل بدات دير فلسانتوغ ونطقات بتبسيمة: هاد الشهر غير دلعراسات سعداتنا غانشبعو الزرادي ههه
نوح:(شاف فيها وغمزها) بدينا ليهوم الفثنة
رحيل:(ضحكات وتكات راسها على لكوسان) كانو على سبة ههه
دمارا الطوموبيل خارحبن من لحومة ورحيل بدات تاتفوه..
نوح:(شاف فيها بالخف)فيك النعااس؟
رحيل:ليوم حاسة براسي عگزانة ماعرفتش واقيلا حيت لجوو مبدل
نوح:(جر يديها وشبكها مع يديه) وليتي معگازة الفثنة
رحيل:هههه والله تابصح ولى فيا لعگز هههه
نوح:داك لعگز غايتحيد فااش غاتبداي خدمتك راه لمحال مابقا ليه والو ويساليو الإصلاحات ديالو باقي غاندير معاك جلسة ندويو فالخدمة ونشوفو باش غاتعمري داك لمحاال
رحيل:صافي واخا احم نوح باغا نتشاور معاك فواحد لموضوع؟
حرك ليها راسو بمعني كانسمع وتاهي تقادات فجلستها ونطقات:بيما أن البنات غايديرو عرس لي طبعا غايكون مختلط ولي مغاناخدوش فيه راحتنا قلت مع راسي علاش مانديرش ليهوم شي حفلة بناتنا حنا لبنات ولعيالات ونشطو فيهاا على خاطرنا حيت مغايكون تاشي رااجل اش بان ليك
نوح:فين غاديريها؟
رحيل:غير فدارناا
نوح:(شاف فيه)ديريها فالريااض لابغيتي
رحيل:(تفكرات رحمة يقدر ماتبغيش وتبسمات بهدوء باش ماتبينش ليه)لا لا بلاش دارنا كافية وأصلا مكاينش البشار كثير وزيد غانكونو غير حنا العائلة لقريبة وصاف ندير ليهوم عشيوة ونشطوو ولموسيقى المهم نفرح بيهوم
نوح:صافي واخا شوفي شنو غايخصك وعلميني
رحيل:غانشوف مع التريتور يتكلف ليا بالماكلة (تاتبلاني فعقلها شنو غادير ونطقات) غانديرها نهار قبل لعرس بحال ليلة لحنا واخا مافيها لاحنة لاوالو
كان تيسمع ليهاا وهي تاتعاود ليه وتقول اش باغا دير فالماكلة وهو تيحرك غير راسو ورحيل فبالها بلان باغا ديرو ولكن مقالتوش ليه وخلاتو بينها وبين نفسهاا.. مدة وهوما شادين الطريق ورحيل عاد ردات الباال لطريق لي سلك وسكتات تاتشوف بعينيها تاوقف فواحد لحي فيها ديور مباعدين وكاين لي باقي بقع وكاين لي يالاه كيتبناو.. نزل نوح وتبعاتو وهي مكمشة حجبانها.. ضار جهتها ومد يديه ليها تاجات وشدات فدراعو وتمشاو جهة واحد الدار كانت جايا فالفرصادة وشادة لوجهات بزوج كبيرة ومفينية من برا.. وقفو حدا بابها لكحل وجبد نوح السوارت مدهوم ليها..
نوح:(بخشونة)حلي باب دارك الفثنة
تبسمات رحيل تاتسدو عينيها من كلامو وهزات الساروت وحلات لباب ودخلات مسبقة رجيلها ليمن.. ضرباتها ريحة الصبااغة لي مخلطة مع لبخودوي دمنااج.. عينيها على داك الزليج لي فالأرض كان تيبري ولمرايا لي كانت جنب الباب كبيرة.. تمشات رحيل هي لولة وسبقات الطبقة لثحتانية لي فيها زوج صالونات محلولين على بعضياتهوم قدهوم قدااش.. والصباغة فلحيوط اخر مكاين والچبص مزين السقف وكلشي كان مفيني.. تاتقلب هنا ولهيه ودخل من هنا وتخرج من لهيه تاتكتاشف دارها وهي ميتة بالفرحة.. سبق وقال ليها عندي دار كتبنى وهي دارك ولكن باش تشوف دارها فأرض الواقع كانت شي حاجة بحلاوتهاا.. كلشي كان زوين وفيها تلاتة طبقات وسطح بحال دار واليديها غير هادي كانت كبيرة عليها فالمساحة.. تاتقلب هنا ولهيه وأهم حاجة وعشق أي مرا هي لكوزينة.. دخلات ليها تاتشوفها قدها قداش كبيرة وفيها لبلاكارت دلخشب المتين وفيها بالكو..
رحيل:(تاتعلى بصبيعات رجليها باش تحل لبلاكارت)عاليين بزاف عليا
نوح:(جا معنقها من لور وهمس ليها بخفوت)نهزوك الفثنة ديالي تاتشوفيهوم
رحيل:(جايبة فشوشها عليه)اوا هزني
تاهو ماعطلهااش نزل هزها فوق كتافو تاجاات جالسة وهي غوتات حيت خافت طيح.. كان مجلسها بحال شي درية صغيرة لي تايهزها باباها فوق كتافو..
نوح:(شادها من فخادها)مزيان دابا؟
رحيل:(عجبها الحاال ونطقات وهي تاتحل البلاكارات)اه
حلات بلاكار ببلاكار تاتقلب وتبقشش وتبلاني شنو تحط فيهوم وشنو دير.. تحدر تاخرجها لبالكون وهي شادة فيه ونطق وهو مقربها لسطارة:نلوحك دابا
رحيل:(شداات شعرو بالجهد ومعدتها ترونات فاش شافت لعلو ونطقات بخوف)لا لا
نوح:(كمش حجبانو) الشريفة راه شعري هاداك
رحيل:نزلني غانرد انووح (تاضرب برجليها) غانتقيا عليك
نزلها وهي حطات يديها على صدرها وقلبها غايخرج مشات لحمام ردات ديك لكشكوشة وهو تابعها وتيتبسم:أودي ياودي الفثنة عولنا عليك بكري
رحيل:(مضمضات فمها وقالت بعبوس)ونتا كنتي باغي تلوحني تم
نوح:(فك ليها داك لفولار تاحيدو وشدو بيديه وتحدر طبع بوسة فالعرق ناابض ونطق بصوت خشن حنين) على أنا نسخى بالفثنة ديالي..
معاه كاتحس بأنوثها ومعاه كاترضي غرورها الأنثوي لاي وحدة فينا تيعجبها الحال فاش كاتلقى الاهتمام من لي كاتبغي.. اهتمامو ليها بأدق تفاصيلها وكل ماهو خاص بيها كايخليها تزيد تعشقو وتبغيه.. نهار سماتو راحة روحي ماشي من فراغ وحيت بصح هذا لي واقف قدامها هو الراحة لروحها لي ربي حطو فطريقهاا باش يعوضها.. ربي لقاهوم وجمعهوم عندو فالسماا قبل مايتجمعو فالأرض..
تخشات فيه وهو كيبووس عنقهاا ويلعب بلحيتو تما وهي غير تاضحك.. ختمها ببوسة فشفايفهاا جمع فيهاا الشفايف بزووج وخلاهوم تايوزوزو..
رحيل:فيا الجوع
نوح:(شاف فساعتو)يالاه نمشيو نتغداو
حركات راسها وبدات تتصاوب فولارها وهو حاضيها تاسالات وخرجو بزوج والضحكة درحيل مرسومة على شفايفها..
---
أيام الله كادوز بزربة ومعاها العمر تاهو كيمشي.. ليوم كانت لخطبة ديال اليازيد لي غايديروها فدار لعروسة.. جاو واليديه وعمو وخوتو كاملين وتاخوت رحمة وعيالاتهوم لي جاو يديو لخبار ويشوفو لعروسة شكون هي وكيفاش دايرة.. الرياض كاينغل ثاني بالعائلة لي فيما تكون شي مناسبة تايجيو.. من غير واليدين اليازيد مشاو لدارو والبقية راه فالرياض..
جالسة جليلة وسعيدة عيالات خوت رحمة لي مكبرة بيهوم كيف مولفة بالأداب والصواب والتااوييل.. ملي دخلو وطباسل يتحطو ويتهزو قايمين بالضيافة كما هي..
جليلة:(تاضور عينيها)اوا فين هي سناء شفت حسها مقطوع ملي دخلنا وهي سادة على راسها مباغاش تشوفنا
رحمة:(تبسمات ببرود) راسها ضارها هادا مكاان
سعيدة:اوا خلااص ارحمة مكاين لاش تخبي علينا وحنا زعمة عائلة عارفين لي كاين
رحمة:مافهمتش اش كانخبي
سعيدة:(طالقة سمها)عارفين بلي هي مباغاش هادشي وبقا فيها لحاال نهار قالتها ليها خالتي طامو وهي غابرة مكاتجاوب حد مكاتدوي مع حد قطعانة ياك اختي لباس وحنا مدرنا ليها والو وقلبات علينا وجهها..
دخلات رحيل على كلامها وهي لابسة گندورة وزيفها فوق راسهاا.. لقات السلام وجلسات جنبهوم وسعيدة تقول واش حشمات كملات هضرتهاا وهي تاتشرب فداك الكويس لي شادة..
سعيدة:اوا هي لي فرطات السيد من زيناتو مافيه مايتعاااب ولد عمها مكاين لي يصونها ويبغيها حسن من لعائلة وراجل اش دار گاع راه رجااال كاملين مسگين بمغرفة وحدة ولكن المرا لي مرا هي لي تعرف تحظن راجلها عندها وماتخليه يشوف فتاشي قنت وهي من لمشكيل لول طلقاتو وهاهي جات عزبة باقا صغيرة غاتديه ليهااا وهي تبقا مطلقة تاحد مغايحاشيها ليها
رحيل:(تبسمات ببرود ونطقات وهي حاطة رجل على رجل)على ماال المطلقة اخالتي ياكما ناقصاها يد ولارجل باش ميحاشيها ليها حد كيف ربي حلل الزواج حلل معاه تاطلاق.. والطلاق ماشي عييب ولمرا الاطلبات الطلاق هادشي كيعني بلي مابقا حل بينها وبين الراجل والأرزاق فيد الله تاحد مايقنط من رحمة سيدي ربي..
لكلام استفزها وخصوصاً أنه خرج من فم مرا.. وكيف تيقولو عدو المرأة هو المرأة وهاد لكلام بالضبط مقدراتش تسكت عليه حيت هي مرا وعارفة بلي تاوحدة ماتقبل تخرب دارها وگاع لابغات طلق يحتارموهاا وهوما كيهضرو فيها بحال الاماشي هي من لعائلة وخت راجلها..
سعيدة:(مرضاتش)اوا حنا باغيين غير مصلاحتها وقلنا لي كااين هاهي سبع سنين وهي مطلقة مكاين لي دق باب دارهوم وتبقا هاكا تاتبور (شافت فرحمة) شوفي غير بنت رقية هاهي دارت ربعين عام وباقي ماتزوجاات
رحيل:(مكرهاتش طير عليها ولكن برزانة جوباتها وبنظرة واتقة) راه الزواج رزق وكاين شحال من وحدة كيتعطل رزقها كاينة لي تاتزوح على تمنطاش لعام وقل ومكضرب عماين مسگدين وتاطلق وكاينة لي تاتزوج على تلاتينات ولاربعيناات وربي كيسخر ليها راه ماشي لعمر هو كلشي ولمهم لمرا هي تلقى راجل لي يصونها ويبغيها ويخاف الله فيهاا ماشي غبر تزوج باش تسمى مزوجة باش ناااس ماتقولش عليها هاديك "بايرة" هاد لكلمة راه مكينااااش گااع فالقامووس
سعيدة: اوا نتي معرفااش هاد الدنيا كيف دايرة وبلي كلام ناااس مكيخليش لواحد يرتااح (تادوي بحال الاماشي هي لي قالت ديك لهضرة) حنا من عائلتها وباغيين ليها غير لخير
رحمة:(ماعجبهاش كلام سعيدة وقالت ببرود) هي عارفة مصلاحتهاا
معاودوش جبدو داك لموضوع مزال وكملو هضرتهوم على لحوااايج لي غايلبسو وشنو شرات طامو لعروستهاا ويتعاودو وماردوش لباال لسناء لي كانت نازلة وجايا باش تجلس معاهوم وماتبينش اش كااين حيت عارفة عيالات خوتها كيف دايرين وبلي كايتسناو غير الغفلة فين يجبدوك فكلامهوم.. كلشي سمعاتو وتاكلام رحيل لي خلاها ضرب طم وتقلب طريقها راجعة لبيتها ومن زهرها مكانتش لابسة طالون كيف عادتها.. دخلات لباب وطرقات وكلامهوم تيتعاود ليها مع كلام رحيل وكيفاش هضرات بلحق ودفعات عليها وتفكرات هي كيفاش كانت تادوي عليها بلخايب من نهار قال ليهوم نوح غانتزوج بيهاا وعرفاتهت راه مطلقة ببنت.. لأول مرة تحس براسها ممزياناش وخايبة وبلي گاع داكشي لي تايطرا ليها تستاهلو.. هي مكتعرفش رحيل وعمرها فتحات معاهاا موضوع باش تعرف ديك السيدة كيف دايرة و هي حكمات عليها بكل برود وهضرات فيها بلخاايب فغيبتها بينما رحيل دفعات عليها..
الإنسان عمرو يحكم على شي واحد وهو مكيعرفوش وعمرو يسبق لعيب حيت غايجي نهار ويندم عليه.. شحاال من واحد تلقايه مكيعرفكش گاع وشابع فيك نميمة ويقول لي فيك ولي مافيكش ونتا عمرك ماأديتيه.. مثال سناء كاين فالدنيا وعطاه الله.. نهار لول شافت رحيل مبغاتهاش حيت بغات بنت خوها ليه داكشي علاش ماخلاتش راسها تعرف عليها.. وملي عرفاتها مطلقة وبنت معجبهاش لحال ونسات راسها بلي تاهي مطلقة وهاا الزمااان دار عليها وكيف هي دوات على رحيل وعيراتها بطلاقها مرات خوها تاهي دارت نفس الشي والإنسانة لي شبعات فيها لهضرة بلخايب هي نفسها لي دفعات عليها.. ودنيا دوارة وغدارة عمرك تقول راه أنا واعر وأنا مكاينش بحالي وتهز شوكتك فالسماا وتنسى بلي رب العباد هو شايف وعارف لي فنفوس عبادو وكيعطي كل واحد على قد نيتو..
**
قدام مرايتها تاتشوف فانعكاسها وصوت ضميرها كايهضر معاهاا ويأنبها على كلامها لي خرجات فحق ديك السيدة..
"هانتي اسناء شفتي هاديك لي كنتي ظلي تعايري فيها هاهي ليوم هي لي دفعات عليك ونتي محضرااش.. عقلتي نهار قلتي عليها مطلقة وبديتي تعيبي فيها وتعمري راس ختك ضدها وهي معمرها أداتك ونتي ظليتي تخسري صورتهاا.. هي باش أدااتك وفين تاتعرفيهاا باش تحكمي عليها.. غلطتي اسنااء وغلطك صعيب يتصح.. ونتيجة غلطك هانتي تاتشوفيه بعينيك وماعند لميت مايدير قدام غسالو.."
رجعات جلسات فوق النموسية وهي ساكتة وتاتفكر وتخيط فبالها وفالأخير تنهدات وناضت لحمام وقلبها مقبوض عليها كلما تفكرات بلي هو غايخطب ليوم..
---
طاح الظلام وكلشي فالرياض كان تيوجد راسو على قبل الخطبة.. فجناح رحيل ونوح لي كان يالاه جاي من خدمتو لقى الفثنة ديالو موجدة ليه الحمام.. دخل نيشان حيت تعطلو وهي مشات تكمل تجهيزاتهاا.. بحكم لخطبة غاتكون فدار مبغاتش تكتر وزيد نوح أصلا مكيحملش المك اب بزاف عليها دارت داكشي خفيف بألوان ترابية وخط آيلاينر من لخر جبدات بيه عينيها وعكر نيود مبين انتفاخت شفايفهاا.. مشات جهة العلاقة باش تلبس داك لقفطاان لي كان معلق فاللون الأسود سيد الألوان.. لبساتو وجاها زوين وفجهة لعنق طالع شوية ومخيط بالذهبي.. على قد مابسيط على قد مازوين وعاطي لعين.. سمعات صوت لحس وضارت لقاتو نوح جاي تايمسح شعرو.. وقف تيشوف فيها وهي بديك الإطلالة البلدية كيف جاها القفطاان.. قشر شفتو بنابو وهو غادي جهتها وشدها من خصرها ونطق بإعجاب واضح فعينيه..
نوح:(بخشونة) ماشاء الله (قاس حنكها ونطق بخفوت) فين نخبيك الفثنة ومانخلي حد يشوفك ليا
رحيل:(نطقات وهي تاتقيس لحيتو وهي مبسمة) عجبك لقفطان؟
نوح:(بعد شوية وضورها تايشوف فيها بعيون شوية وتاكلها) هو هداك (تحدر باس شفتها) هاكا نبغيك تسمعي كلامي المرضية
رحيل:(نطقات تاتفشش)يالاه لبس تانتا ختاريت ليك كوستوم فالنواغ بغيتك تلبس بحالي
نوح:بان ليا هاد الساعة نديرو بناقص من شي خطبة
ضحكات ونطقات وهي تاتجرو من دراعو:لبس يالاه تعطلنا ههههه
حرك ليها راسو كيتحلف فيها ومشى هز كالصو ولبسو قدامها وكمل لبسو وتاهو تأنق بلكلاص لي تيحمقها خصوصا فاش تايلبس لكوستوم تايجي خطير وكتافو مفصلين غير ليه.. مدارش كراڤاط وخلى زوج صدايف محلولين مشط شعرو ورش ريحتو وحل المجر ديال المواگن تايشوف اش غايلبس بينما هي كانت تاتلبس فولارها وغير سالات لبسات صباط طالون ولاحت كاب فوق القفطان سخوون حيت ليل تايتحرك لبرد والجو أصلا بدا يتبدل.. لبس مونطو كلاص فلكحل تاهو وشد فيديها وهي هازة لبوشيط..
نوح:سيدرا لبسات حوايجها؟
رحيل:وي لبستها هي لولة باش نتهنى
دازو على بيت سيدرا لي كانت لابسة كسيوة سخونة فالبلو غوا مع جاكيط نواغ وبوط وشعرها طالقاه ودايراه ليها بابيليز.. غير شافتهوم وهي تمشي تاتجري تلاحت على نوح تاهزها وباسهاا فحنكهاا وهي نطقات تاتوريه شعرها:ملي بلو آيز شوف شعري صاوباتو ليا مامي
نوح:(تايدوز يديه بحنية على شعرها) جاك زوين ابابا
باستو سيدرا فغمو وهو طبطب على ضهرها وخرجو دايزين على بيت زين العابدين لي تاهو كان لابس سروال توب رمادي مع شوميز نواغ وجاكيط كوير وبرودكان وشعرو مخليه كيف هو وداير نضيضرات دالشوف.. ضرب نوح على كتفو ونطق بهدوء:فين غبرتي ليوم
زين العابدين:(عربيتو بدات تاتسگد حيت السونطر)كنت خارح مع أمين
كملو طريقهوم لتحت وسيدرا نزلات من عند نوح ومشات لعند زين العابدين شدات يديه تاشاف فيها ونطقات تاتحرك راسها:ماي بلو آيز قال ليا شدي يد زينبيدين
نثر يديه من يديها الصغيرة وسبقها وهي مخنزرة فيه.. أما رحيل فكانت شادة فدراع نوح وغادين جهة الصالة فين كاينين البقية كلشي مأنتك بالبلدي.. كلشي كان تيشوف فنوح ورحيل لي كانو داخلين ليد فاليد وداك الإنسجام لي باين أو واضح بيناتهوم مخلي العين تنجادب لجهتهوم..
كلشي كان حاضر كايتسناو غير فنوح ورحيل حيت هوما اخر وحدين وغير بانو ليهوم ناضو باش يتحركو
ح.الوزاني:(سابقهوم وهو لابس جلابة سخونة وكرشو سابقاه)اييه زيدو زيدو راه ولد خويا من الصباح وهو يتسنى
مع خرج من الصالة وهو يتلاقى بسناء جايا تاتمختر بديك التكشيطة لي لابسة فلورونج بارد كلها منبتة وجايا عليها عبااار.. جامعة شعرها الكحل بمشيطة خفيفة مع مك اب مكانش كثير بزاف ودايرة عكر غوز خفيف.. ودبوكل طوالين وهازة بوشيط ديالها.. كلشي تعجب فيها ومظنش أنها غاتكون جريئة لدرجة غاتمشي لخطبتو.. باها حرك راسو وسبق وهو معاجبو حال ورحمة تبسمات وشدات فيديها وسناء محشاتها لحد من غير نوح لي غمض ليها عينيه بلخف وتاهي تبسمات ليه والغريب أنها تبسمات تالرحيل لي رجعات ليها الابتسامة.. تحركو وكل واحد شد بلاصتو فطوموبيل غادين لباخطمون دليازيد باش يتحركو جميع دقة وحدة..
---
جالس فوق نموسيتو بڤيست بااج مع جيلي ديالها وشوميز بيضا وشعرو مرجعو لور ولحية مطولها شوية.. كان كل مرة يتنهد من الصباح وهو مامرتاحش ونفسو ضيقة ومعارفش شنو سبابها.. كان واجد ولابس كايتسنى غير لخرين يجيو باش يمشيو لعند لعروسة لي من نهار الشوفة ماهضرش معاهاا ومشافهاش باقي وغير صاحبو لي عيط ليه علمو بلي هي موافقة وحددو نهار لخطبة.. دخلات عندو مو وهي تاتجر فتكشيطتها وكلها مزررة بالذهب غير تهز يديها وتسمعي تخشيخيش ديال دبالج.. قربات جهتو وجلسات وهو شاف فيها وتبسم
طامو: راه عمك أو ولد لحاج جايين فطريقهوم شوية ونتحركو اجي تشوف معايا داكشي لي غانديو معانا
اليازيد:نتا فيك البراكة امي (باس يديها) لي درتيها موافق عليها
مبغاتش تحكر عليه وتبسمات ليه وناضت غادة لبرا تشوف ياكما نسات شي حاجة أما هو غرق فتفكيرو وبلامايشعر تفكر نهار خطبتو بسناء كيف كاان فرحان والأرض مهازاهش.. شنو واقع ليه ياك هو لي باغي يبني حياتو بعيد عليها وقلبو جفى ومل من قصوحية قلبها وأنانيتها علاش دابا كيفكر فيهاا.. وديك بنت الناس اش دنبهاا..
خرج لبرا لقى لكادوات لي غايديو محطوطين فوق الطبلة ومكاين غير سمية دلمارك لغالين والبلاطوات دالتمر بريستيج وشكلاط والحناا والورد ماخلات مو تاحاجة ومجابتها مكبرة بولدها وعروستها لي متلهفة تشوفها..
جالسة فطوموبيلة رؤوف لي مسكتها وعينيها على باب لعمارة لي تايخرجو دراري منو داكشي لي غايديو وقلبها فيه غصة قوية باغا تبكي ولكن كرامتها مخلاتهاش تنزل تادمعة وتخلي الناس يتشفاو فيهاا.. وخلاص ملي بان ليها نازل مقاد ومحلق قلبها راه قفز من وسط صدرها وزيرات على يديها تبياضت وعضات على شفتها حابسة البكية.. كاتشوفو واقف مع نوح كيهضرو وهو لحد الآن مشافهاش وماعرفش راه جاات وأصلا مغاطيحش فبالو بلي غاتجي.. ضور عينو على طوموبيلات تالمحها مع كانت مهبطة الزاج.. شافها وعينو جمدو عليها كيف تاهي جمدات وبقاو تيشوفو فبعضياتهوم.. لكلام لي مقدروش يقولوه لبعض بلفم قالوه لعيوون لي حضناات بعضهاا.. قلبات وجهها عليه وهي مقدراش تصبر تشوف فيه مزال حيت غاتبكي.. زفر النفس وكل واحد تخشى فطوموبيل وااليازيد صافي فاش شافها زاد نفسو ضياق عليه كثر.. شدو طريق لدار لعروسة لي تاهوما موجدين الصالات بزوج ودايرين تريتور وكلشي مأنتك.. ولعائلة حاضرة وكيتسناو لعريس يوصل..
وقفو طوموبيلات ونزلو جميع وطامو شادة يد اليازيد لي كان واقف هاز الورد وهي هازة معاه صنديقة ليه فيها الدهب ولخواتم تاتبسم.. كلشي كان هاز شي حاجة ورحيل عطاها نوح بلاطو تمر باش مايتقلش عليها وهوما تكلفو بلحاجة الصحيحة.. داخلين وصلى وسلام على فم خوتات وبنات العائلة دلعروسة وطامو تاضور عينيها وتشوف عجباتها دار والاستقبال خلاص حيت كبرو بيها وهي هادشي لي كتموت عليه.. كلشي داخل مبسم الا وحدة لي حاسة براسها غاتحضر لجنازتهاا.. ولكن ممبينااش واقفة بشموخ وياجبل مايهزك ريح.. جلسوهوم فطوابل وكلشي مخلط حيت الجلسة دايرينها مخلطة ورحيل شدات بلاصة جنب نوح لي جلس هو وجدو والعائلة ومعاهوم سناء لي جات أونفاص مع لبرزة.. تاتشوف اليازيد جالس متبت تاشوية سمعو تعاشق وضارو يشوفو لعروسة لي داخلة بتكشيطة فالخضر بارد مع مشيطة دلعرايس وتاج ولفوال على راسها.. ناض اليازيد وشد يديها مقربين لجلسة وسناء بقوة مازيرات على يديها وعتاتها.. وقفو جنب البرزة وهز ليها لفوال كيشوف فملامحها لي مزينين بلمكياج وعاد قدر يشوفها ومغاينكرش بلي زوينة وعجباتو.. تحدر طبع بوسة فجبهتهاا وأنضار لكل عليهوم ومن بينهوم نظرات أنثى عاشقة كبريائها تهرس قدام عينيها.. جلسو بزوج واليازيد بلامايحس هز عينو جهة سناء وشاف فيها واحد الشوفة كافية تكمل على مابيها..
طامو كانت غير تاتزغرت وتصفق بيديها وخلاص ملي شافت لعروسة زوينة وصغيرة وعاطية لعيين سيدة زادت گرااد.. أما سناء فنار الغيرة كانت تتاكل فيها من لداخل وهي تاتشوف فيه جالس فالبرزة مع وحدة خرى من غيرها.. لي غتولي مرتو وغتاخد بلاصتها لي كانت ملكها فيوم من ليام.. غايتبسم ليها كيف كان تايتبسم ليها هي وغايبوسها كيف كان تيبوسها وغايعاشرها فالفراش كيف كان تيعاشرها هي.. هادشي كولو غير ماخلى ديك الناار تشعل واجا ماطفاها.. مرات تاتقول كون غير ماجيتش نشوف هاد المنظر لي تيحرق الدم...
فنفس الطبلة كان جالس نوح وهو عاقد حجبانو وهاد لجو ديال تخلاط مكيحملوش.. شافت فيه رحيل وتحدرات جهتو ناطقة بهمس:مالك مقلق؟
نوح:(قرب لعندها متكي بيديه على كرسيها) لا علاش غانتقلق
رحيل:ماعرفتش شفتك عاقد حجبانك وقلت ياكما واقعة شي حاجة؟
نوح:(قرصها فحنكها بالخف ونطق بهمس)مكاين والو الفتنة
كانت سيدرا مركنة فكرسي جنب رحيل وعينيها تايستكشفو المكاان ومن طبعها لبلايص لي كاتمشي ليهوم أول مرة تاتبقا مركنة ومكاتنوضش من بلاصتها ومكتزعمش على لبراني.. ضارت جهة مها لقاتها تادوي مع نوح وناضت من بلاصتها غادة جهة نوح.. وقفات حداه ونطقات:مامي حيدي ليا جاكيط راه فيا الصهودات
رحيل:(زولاتها ليها وقالت) ماتخرجيش برا باش مايضربكش لبرد
نوح:(هزها وجلسها فوق ركبتو وقال بتبسيمة خفيفة)هنا كاين صهودات وبرا كاين لبرودات
سيدرا:(ضحكات) ماي بلو آيز شكون هادوك (تاتشير لعرسان)
نوح:(بلامايشوف فيهوم)هداك ليازيد ومرتو
سيدرا:(جمعات شنوفتها)بحالك نتا ومامي ياكا
نوح:(تبسم لشطارتها) اييه بحالي أنا وماماك
سيدرا:(تخشات فيه)ولكن لعريس عندو شيباات هنا (تاتوريه شعرها ودقنها)شااارف
رحيل:(حمرات فيها)حشووومة
سيدرا:(تاتحرك كتيفاتها)مقلتش لحشومة مامي (شافت فنوح تاتفشش تاني وتسبل لعويناات) ياك اماي بلو آيز هو كبير
نوح:(حرك راسو ونطق بهدوء) اه كبير ابابا ولكن مانقولوش شارف حيت عيب
سيدرا:صافي واخاا (ضورات راسها تابان ليها زين العابدين جالس فالكرسي لي جنب رؤوف وعيطات ليه)زينبيدين اااجي تيتي هناا
دار راسو ماسمعهاش ومع جالس حدا رؤوف دار راسو كيدوي معاه باش مايعيقش بيه باه.. أما سيدرا دلات شنايغها ومعاجبها حاال.. زين العابدين كايعجبها تحاك معاه حيت معتابراه بحال ريان ومحمد طه.. وفاش مكيعطيهاش وجه صافي كاتقلق وهي أصلا مولفة لي مشات عندو يعيطها لخاطر ويدير بكلامها وتفشش على كلشي وهو مكتلقاش عندو هادشي..
أما رحيل كانت تاتسيلفا وتسيفط لبنات فلگروب لي دايرة تايشوفو الإطلالة ديالها معيشاهوم معاها بحال لاتاهوما حاضرين.. حطات سطوري فواتساب فيه نص وجهها مبسم ودايرة يديها على فولارها مبينة خاتم دلمريااج.. بدات تاتشوف فيها وهي عاجبها لحاال ودغيا دخلو يشوفو لكونطاكط لي عندها.. ضارت جهة نوح بان ليها تايهضر مع سيدرا وهي تخطف ليه يديه تاشاف فيها بمعنى "اش كاين" وهي تبسم ليه وبدات تاتصور يديهوم مع بعض وحطاتها ولتحت حاطة قليب حمر..
لموسيقى مطلوقة وشي بنات لعائلة نايضين يشطحو وخوت رحمة عندهوم عادي مولفين لعرايض يكونو مخلطين عندهوم ماشي بحال نوح لي قلب الكرسي شوية عاطيهوم بالضهر ورحيل راه تبسيمتها شاقة وجهها.. تاتعجبها هاد النقطة فيه كيفاش مكيسلمش مع لعيالات ومكيعجبوش الإختلاط على قبل هاد لبلانات.. أما لعرسان فكانو غير تيشوفو قدامهوم واليازيد يتبسم بزز ليهوم وتيحاول ماأمكن مايشوفش جهة سناء حيت كلما شافها كلما حس براسو ضعيف بزااف.. يكدب الا قال مبقيتش تانبغيها هو باغيها ولكن قلبو عيى مايبقا تابعها وتانفسو طاابت وخنازت تاعطات الريحة.. جات جهتو مو مبسمة وعاد جاتها لفرصة تسلم على عروستها لي كانت مستكينة بلاصتها..
طامو:(تاتشوف فيها وتبسم)تباارك الله وصلى عن النبي على عروستي من زيناتها وشحال فنة الله يعجبك ويبعد عليك ولاد لحراام والله يكمل عليكوم بالخير
مريم:(بصوت خافت)شكرا
ضار اليازيد متفاجأ وهو هاز حاجبو وعلى سلامتو ملي سمعها دوات.. فلول راه شك السيدة بلي مكتهضرش حيت نهار هضر معاها مقالت والو ولكن دابا ارتااح وهنى بالو واستنتج بلي لحشمة هي السباب..
جلسات طامو تاتصور معاهوم وجا راجلها تاهو وخوه بات سناء جلس تايتصورو...
سناء حسات براسها تزيرات ومقدراتش مزال تصبر وهي تاتشوف ديك الجلسة العائلية وديك الغريبة لي وسطهوم ولي مكبرين بيها.. دفعات لكرسي بشوية وناضت بزربة خارجة من الصالة ورحيل كانت متبعة ليها لعين وديك لمعة ديال دموع شافتها وخلاتها تعرف بلي هي مجروحة وبلاشعور ناضت باش تبعها وهو يشدها نوح من يديها ونطق بجدية:فين غادة؟
رحيل: لحمام
مشات تاتزرب تاهي تبعاتها ولقاتها واقفة برا ديال الدار والزنقة خاوية.. الريح كان تيدخل مع لعظام ولكن هي محساتش بيه حيت داخلها محروق وريحة الشياط خارجة منو.. قربات جهتها رحيل بتردد وحطات يديها على كتف سناء لي حدرات راسها وعينيها كيطيحو دموع لي مقدراتش تحبسهوم.. عاضة على شفتها وبصوت مألم قالت: أناا السباب أنا لي فرطت فيه..
الإنسان واخا يكون جبل ضروري ماكتجي حاجة وتهدو وسناء واخا كتبان صامدة وقوية ومكتسوقش الاأنه فالاخير تاتبقى أنثى لي هي كائن حساس..قلبها ضرها من شوفتو مع غيرها اه غالطة حيت هي سباب هادشي لي وصلو ليه فاش قصحات الراس ولكن راه تاهو غلط وبزوج بيهوم عندهوم يد فشي لي وقع..
مقدراتش تكبح دموعها لي نزلو مسرسبين قدام رحيل لي ضرها خاطرها عليها.. عنقاتها وسناء ماتردداتش باش تضور يديها وتعنقها وتبكي.. منظرها فكرها فياماتها نهار عرفات بلي ياسين تزوج.. ديك الساعة كانت تاظن أنها تاتبغيه ولكن كانت غالطة وهي عمرها بغات ياسين وهو كان غير ولف بالنسبة ليها وديك الساعة هي حسات بالشمتة من شنو دار فيها ولكن سناء راه تاتبغيه وباين غير من عينيها ولكلام لي تاتنطق بيه وكيفاش تتلوم راسها بلي هي السباب.. بكات تاعياات وفالأخير بعدات عليها تاتمسح دموعها ورحيل دخلات بزربة عند نوح وتحدرات جهة ودنيه:عطيني لكونطاكط ديالك
نوح:(شاف فوجهها) محتاجة شي حاجة نجيبها ليك
رحيل:(بإصرار)غير اراى انوح
عطاهوم ليها وهو مكمش حجبانو وغير خرجات مشى تبعها تابانت ليه هي وسناء عاد فهم لبلان.. وقف قدام لباب وجبد باكية دلگارو يكمي واحد ومنها نيت يرد ليهوم لبال بحكم الزنقة خاوية وهوما عيالات ومقدات والوقت خيابت.. جلسو فلقدام ورحيل مدات ليها قرعة دلما مسدودة وشداتها من عندها وقالت بخفوت:شكرا
رحيل حركات راسها وشافت فنوح لي واقف قدام لباب وتنهدات عارفاه غايبقا واقف تم ومغايتحركش ويخليهوم.. رجعات شافت فسناء ونطقات بهدوء:مزيان دابا
سناء:(عينيها تايشوفو فبرا وبصوت مألم نطقات) عمري ظنيت بلي غانتحط فهاد الموقف ونشوفو وهو كيخطب وحدة خرى من غيري.. كلشي فرحان ليه ولكن أنا مافرحاناش ليه ومباغاهش يكمل حياتو معاها (عضات على شفايفها) هو ماخصو يبغي تاوحدة من غيري ديما كيقول ليا نتي بوحدك اسناء لي كانبغي علاش دابا غايتزوج بهاديك علاش (وبسخرية تمتمات) ولعائلة كلشي مساندو وكلشي باغيها ليه وأنا نهار بغيت نبدا حياتي وقفو ليا شوكة فحلقي وبا لي خصو يوقف معايا عطاني بالضهر ومبغاش يشوف شنو بغيت وهو غير قال ليهوم غانخطب كلهوم بغاو وسناء لا خصها تبقا حياتها كلها وهي بوحدها الامكاينش اليازيد مايكون حد اخر غيرو
كانت تاتسمع ليها مقطعاتهاش وخلاتها تخوي شنو لي فقلبها وتقول باش تاتحس وفلحقيقة هي حسات بالشفقة من جهتها على داكشي لي سمعات
رحيل:(بهدوء) علاش ماحبستيش هاد لخطبة
سناء:(حركات راسها وشافت فيها) تعطلت بزاف أنا لي فرطت فيه حيت هو دار كلما فجهدو باش يخليني نسى مافات ويصالحني ولكن أنا قصحت معاه قصحت تامشى من بين يدي
رحيل:(سكتات رحيل تاتفكر فكلامها وتاتفكر فديك لعروسة لي لداخل تاهي اش دنبها تزوج بواحد فقلبو وحدة خرى) ماتمشي غير فيما مشاك الله وماتعرفي الدنيا اشنو مخبية ليكوم بزوج يقدر هادشي لي كيوقع خير ليكوم نتوما بزوج
سكتات سنااء وهي تاتفكر فكلامها أما رحيل كملات بتبسيمة خفيفة:الا وليتي مزيان دابا خلينا ندخلو حيت ولد لحاج راه واقف لينا كيف السكوريتي حاضينا ههه
سناء:(عاد انتبهات ليه ونطقات بإيجاب)اه ندير غير روتوش على لمك اب ديالي
رحيل:خودي راحتك
نزلاات خلاتها تتقاد راسها باش مايعيق بيها حد وهي تمشات جهة نوح وغير شمات ريحة لگارو وهي تكمش حجبانها: ريحة لگارو مجهدة
نوح:(جرها لجهتو وباس جبهتها) كنت محتاج ليه
رحيل:مكيعجبنيش نشوفك تاتكمي داك الزمر غير مرض وصاف لانتا ولابابا ماعرفت اش كيعجبكوم فيه
نوح:(قاس حنكها وعينو على شفايفها مكرهش يشدها يبوسهاا وعقلو واهلي اش باغي) البلية الفتنة (قربات جهتهوم سناء وشاف فيها نوح بجدية) شوية دابا
حركات راسها وسبقاتهوم ورحيل تنهدات:مسكينة بقات فيا
نوح:(كمش حجبانو وشد فيها داخلين)بزوج راسهوم قاصح
دخلو لداخل فين كان النشاط والضيافة على حقها وطريقها كانو قراب يلبسو الخواتم ومريم كل مرة تهز لعين وتشوف فخوتها وفواليديها.. بانت ليها ختها وهي تجي جهتها ونطقات ليها بهمس:بغيت نمشي لطواليط
ختها:صبري تاتتلبسو لخواتم
مريم:فيا لدياغي
هي عارفة ختها فاش تاتخلع ولاتستريسى تاتوجعها
كرشها وتاتجيها لدياغي نوضاتها وكلشي تايشوف فيها واليازيد نطق بهدوء:فين غاتمشي؟
مريم:(بخفوت)لحمام
حرك راسو وداتها ختها وكلشي رجع تايدوي وياكلو من الضيافة.. كانت ختها واقفة فباب لحمام تاتسناها تخرج تابان ليها ولدها صغير هاابط من الدروح وطاح ومشات تاتجري باش تسكتو حيت بدا يبكي.. دخلاتو لعند جداه باش يسكت حيت مولفها وكلشي تايسول مالو اش واقع ليه.. تشطنو وتشغلو معاه تاعاقت ختها ومشات تاتجري باش تشوف مريم واش سالات ساعة لقات لحمام خاوي مشات لبيتها ونفس الشي هنا تزاد معاها الزايد وبدات تاتقلب فلبيوت وصالات وعيطات لخوتاتها وخوها لي جاي تاهو يقلب فالزنقة والو تقول الأرض تشقات وبلعاتها..
ختها:(ضربات على فخادها مخرجة عينيها وقالت بصوت مرعود)اويلي المسخوطة هرباات...
هادي هي لي مكانتش طيح ليهوم على لبال ومكانوش يتوقعوها.. خوتاتها فشلو ليهوم الركابي أما خوهاا راه جعر وصعر وخرج تاني باش يقلب فالزنقة..
خ1: أويلي اش غانديرو داباا اعباد الله تشوهنا
خ2:(تاضرب فصدرها)أنا سباب خليتها وماحضيتهااش البرهوشة غاتشوهنا مع الناااس
جواد:(رجع وهو مكشكش ونطق مخرج عينيه)لقح*بة الاشديتها غانقتلهااا
خ3:اش غانديرو مع الناس وشنو غانقولو ليهوم
واقغين تايشوفو فبعضياتهوم ويفكرو فالشوهة لي تابعاهوم فاش العريس يعرف عروستو هربات أما جواد هاداك غير تايتحلف ويسب الالقاها يشرب من دمهااا..
فلداخل الموسيقى مطلوقة على الجهد وكل واحد مع من شاد لهضرة تايتعاود.. سناء لي ملي بكات وفشات خاطرها وهضرات حسات براسها شوية ارتاحت واخا الحقيقة مغاتنكرش بلي قلبها ضرهاا.. أما اليازيد كان كل مرة يشوف فساعتو ويكمش حجبانو جاتو عجب السيدة تعطلات وهي مشات غير لحمام.. هز راسو كيشوف جهة باب الصالة وكمش حجبانو فاش قشع جواد واقف تايدوي بشوية ويهز فيديه.. ماعرفش مع من كيهضر ولكن حس بلي شي حاجة ماهياش وخصوصا فاش جات ختها وجها صفر وتاتبسم بشوية ومشات جهة مها وشوشات ليها ونوضاتها خارجين لبرا.. ضار شاف جهة العائلة وعينيه هربات بلاحس جهة سناء لي جالسة تاتخربق فتلفونهاا.. مجيتها خربقاتو ومكانش دايرها فبالو.. تنهد ورجع تايشوف فساعتو وكلما دازو دقايق كلما حس بلي إن فالموضوع.. ناض من بلاصتو تيقاد لڤيست لي لابس وخرج من الصالة مخلي لعينين متبعينو.. خرج لبرا وغير شافوه سقلو وبداو يضورو فعينيه ولكن منظر مها لي جالسة فالدروج وشادة راسها تاتبكي أو جاههوم الصفرين خلاه يزيد يتأكد من شكو
اليازيد:(قرب جهة جواد ونطق بصوت جدي)اش واااقع هنا اجواااد
جواد:(دوز لسانو على شفايفو لي نشفو وقال بهدوء مزيف)والو اخاااي غير تاندويو وصااف هادا مكاان
اليازيد:(هز حواجبو بزوج وقال) كيفااش ماواقع والو ومك مالها جااالسة تاتبكي (كمش حجبانو)جواااد غانسولك لاخر مرة اش واااقع ومريم فين هي؟
جواد:(زير على يديه)عياات شوية طاح ليها السكار بالخلعة وراه فلبيت كاتستارح هادا مكاان
اليازيد:خلينا نجيبو ليها الطبيب (جبد تلفونو) نعيط لبنت بنت عمي راه طبيبة تجي وتشوفها
جواد:(خطف ليه التلفون وقال بخفة) ابلاش اصاحبي راه عطاوها لبنات الما والسكر وكلوها التمر راه تاتستارح داكشي علاش غير دخل ريح وغير تولي لاباس غانزلوها (ضحك بزز) عارف لبنات والخلعة وداكشي السيدة تخلعات وصاف
اليازيد:(حاول يتيقو) صافي نشوفها ونتأكد بعيني
جواد:(درعو وزرب عليه) لادخلتي وشفتيها غير غانديوها لإنعاش بقوة الخلعة ههههه
دخلو لصالة وجلسو بلاصتو وضرب على كتفو تايضحك ويغمز فيه وهو مباغيش يعيق بلي كاين.. خلاه وخرج لبرا وشاف فخوتاتو مخنزر ونطق بارك على سنيه:دخلو وتهلاو فالناس بالضيافة ونشطو لجوو شوية ونتي امي مسحي دموعك او وگضي راااسك شوية أنا غادي نسول ولاد لحومة واش شافوها ونقلب باينة مغاتبعدش بزااف نتوما غير ماتبينو والو
خرج لبرا وهو تايجري مخلي لبنات دايرين بهضرتو ومو واخا رجليها فشلو عليها سمعات كلام ولدها.. دخلو بوجه مغير واخا حاولو يضحكو ويتبسمو الناس عاقت ومع لعروسة لي غبرات زادو الشكوك طاحو فبالهوم ولهضرة وتوشويش كثر..
رحيل:(تحنات لجهة نوح وقالت بخفوت)ماعرفت فين هي لعروسة حاسة بلي شي حاجة طارية
نوح:(ضار شاف فاليازيد لقاه مكمشهوم وقال) دابا نشوف( ناض غادي جهة اليازيد وجلس جنبو فالبرزة ونطق بهدوء) اش تم؟
اليازيد:(عاود ليه لهضرة دجواد) ماعرفتش جاني شي حاجة ماشي تم اولد لحاج
نوح:(حك لحيتو) خلينا نتسناو تانشوفو اش غايطرا من بعد (صونى تلفونو كانت بيسان)ألو
بيسان:خويا واش سالات لخطبة؟
نوح:لاباقي فينك نتي؟
بيسان:غانخرج من الرياض ونجي عندكوم سيفط ليا لادغيس
نوح:ف**** (كمل بحنية)ردي لبال لراسك وملي توصلي عيطي ليا نخرج عندك
بيسان:واخا احبيبي
نوح:(رجع تلفونو لجيب لاڤيست وقال بجدية) طلق لبشارة شوية
ناض مخليه جالس تيحرك فرجليه ويشوف فساعتو.. دازت مدة وجات بيسان وخرج عندها نوح تادخلها وجات مبسمة وفرحات حيت باقي مادارو تركاب الخواتم..
جلسات فكرسي سيدرا لي جلسها نوح عندو.. طامو كانت ساكتة ومركنة تادوي مع مت مريم لي قالت ليها راه بنتها عيات وكاتستارح شوية حيت سولات عليها.. جلس اليازيد تاعيى كايتسنى السيدة تنزل وصاحبو غبر صاف عرف بلي القضية مافيهاش السخفة وطاح السكاار وبلي واقعة شي حاجة كبر.. جبد تلفونو دوز لخط لجواد لي قطع عليه وهنا زاد أكد ليه شكو.. ناض بزربة خرج لبرا وتبعاتو خت مريم وشافت فيه بتبسيمة صفرا:نعام اخويا
اليازيد:(بدون مقدمات)فين بيت مريم؟
ختها:(كاضور عينيها)هااء دابا تنزل نتا غير دخل لداخل
اليازيد:(طلعها وهبطها بشوفاتو) لاغير وصليني عندها باغي نشوفها كيف بقات
وحلات وماعرفاتش ماتقول وسكتات تاتسمع صوت جواد لي كان داخل ومع اليازيد واقف جنب لحيط مقشعوش شاف غير ختو ونطق بعصبية مغلغل:مالقيتهااش لكلبة ماعرفت فين مشات..
مكانش راد لبال ليازيد ملي قال كلامو عند بالو راه غير ختو لي واقفة بوحدها ولكن مجرد ماخطى الخطوة جهتها قشعو واقف تايشوف فيه مخنزر.. جواد فديك اللحظة راه بحال لاكبيتي عليه سطل ديال التلج جمدو بلاصتو
اليازيد:كيفااش مالقيتيهااش (خنزر فيه) اش كااااااين اجواااد (سكات صاحبو خلاه يهز صوتو وينطق بلغوات)واسولتك القلا*ي اااااااش طااااري وفين هي مريم
صوت اليازيد وصل لعندهوم فالصالة وخصوصا فاش تقطعات لموسيقى..أول واحد ناض هو نوح لي عارف شي حاجة واقع وفاش سمع غوات اليازيد صافي تما تأكد.. تبعوه الرجال أما النسا كل وحدة تشوف فالثانية ورحيل شدات عندها سيدرا وناضو تاهوما يشوفو اش طاري..
نوح:(قرب جهة اليازيد لقاه شاعل ونطق بهدوء) اش كاين؟
اليازيد:(تايغوت ويهلل)قاااالك ملقاهاااش وماعرفش فين مشااااات (ضار جهة جواد) وااااش تاتحمااق علياا سولتك الخرااا هضر
جواد:(هو أصلا شاعل ومعصب)ديك الكلبة هرباااااات
شهقو لعيالات ومها صافي طاحت الأرض تاتبكي وخوتاتها تاهوما مرضاوش أما باها قندش وشاف فجواد وقرب جهتو:كيفااااش هرباااات
جواد:(ماعندو مايدير من غير يقول لي كاين) ماعرفتش كيف دارت ليها ولكن الواليد مشات قلبت برا وسولت الدراري مشافوهاااش
اليازيد:(قرب جهة جواد بحال لاغاينطحو وقال بغوات)واش تتريگل عليا هناااا از*ي ولاشنووو كيفاااش هرباااات وعلااااش غاتهرب
جواد:(تايهز فيديه ويغوت) وراه قلنااا ليك المرض ماااعرفتش وأناا مالي
شنق عليه اليازيد ودفعو مع الحيط والعيالات شهقو والخلعة ركباتهوم أما رحيل كانت هازة سيدرا ومعنقاهاا باش ماتشوفش داكشي...
اليازيد:(عاض على شفتو وقال بصراخ)كاتساحمرررني اولد لقح*ة فااااش سولتك قبيلة جالس عليا بطاح ليها السكاار وهي أصلا هربااات مرجعني كااامبو ولاكيفاااش
جواد:(تاهو شانق عليه) واطلق اصاااحبي لانغلط فيك
اليازيد:(خرج فيه عينيه) أنا لي غانغلط فيك دابا نيت
تشانقو بزوج وتباركالله كل واحد فيهوم صحيح وطويل والأهم أن بزوج معصبين.. دخل نوح بناتهوم هو ورؤوف تايفكوهوم حيت ماشي وقت لمدابزة هادي وسوغتو لعيالات حاضرات.. دفع نوح اليازيد لي تاينتر فلڤيست ومشربن وشاف فجواد لي تاهو ماشي قل منو
نوح:(نطق بصوت حاد كيخنزر فيهوم) لاباغين دابزو خرجو لزنقة وقتلو بعضياتكوووم گاااع نتوما..هنا راه كاينين النسااا شوية دالاحترااام (شاف فاليازيد وهز حاجبو حيت عارفو مزيان وحافضو)هنينااا ابناااادم (ضار جهة جواد مخنزر وقال بجدية) الدرية علاش هربااات واش مبززين عليها هادشي ولاكاينة حاجة خرا؟
جواد:(تيقاد فلكول دلاشوميز ونطق وهو تايشوف فباه لي شاد راسو) مابززنا عليها والو كلشي بإرادتهااا
نوح:(هز حاجبو)ياااك الشريف لاكان كلشي بإرادتها كيف تتقول فينها دابا وعلاش غاتهرب؟ (قرب جهتو ونطق بحدة) ماتريگلش عليااا الأخ وقول اش كاااين ؟
جواد:(بدا يغوت ويهز يديه فوجهو) ومالك ابنااادم مكتفهمش وقلنااااالك مامبززينش عليهاااا
نوح:(عض على شفتو مغدد وماحس براسو تاجرو من لكوول ونطق بصوت قاااصح مكيسمعو غير جواد) سمع ااالشريف داك الهزااااان لي تاتهز ماديروش عليا حيت غانصدق مقودهااا معاااك بلبيااان ولاشفتيني مكالمي حيت داير اعتباار لدار لي أنا فيها وناسها ولابغيتي نخرجو لعيب مرحباا تبعني لزنقة وديك الساعة نتفاهمو مزياااان
طلقو نوح مخنزر وضار جهة باها وقصدو حيت بالنسبة ليه جواد ماشي ديال الهضرة كلمة زوج يتهز.. وقف قدامو ونطق بهدوء وجدية:سمع اسي لحاج حناا جيناا عندكوم وقصدناا باب داركوم ونيتنا فلحلال هضرنا وتعارفناا ورصيناا الأمور معاكوم تال هنا مزيااان ولكن دابا هادشي لي واقع راه مكيدخلش لعقل عليها غانسولك حيت نتا باهاا واش الدرية بززتو عليها هاد الزواااااج؟
لسانهوم عقاااد ولخوتات كيبكيو وكيفيقو فمهوم لي صافي غيبااات مع لغواات لي طاري والمدابزة لي دابز ولدهاا أما باها لوجه لي يشوف فالناس مبقااش عندو.. مساهلش بنتك تهرب وسط فرحها وتهبط ليك راسك الأرض.. بدا كيحك فصدرو وهز عينو فنوح حشمااان ومزنگ.. ويالاه بغا يهضر ويقول اش كاااين وهو يسبقو جوااد لي قرب جهة نوح ودفعو من كتفوو ونطق مغوت فوجهو تايخسر فلهضرة ومبقا احتارم لانسا لارجال كبااار ولاضيااف:وماااالك القلا*ي مكتفهمش لعربية هضرت معاااك هضرة وحدة فهمهاا بلاهاد التقح*بين ديال ز*
عطاه نوح واحد الشوفة قاصحة مجاوبوش ديك الساعة حدو بعد وزول لاڤيست لي لابس ولاحها الأرض وبدا يطوي فيد لاشوميز وهز عينو فجواد ونطق بصووت قااصح:تبعني نجاااوبك
كلامو وتصرفو خلاهوم يفهمو اش واقع وليازيد تاهو زول لاڤيست ورماها على سناء لي كانت واقفة جنبو وخرج ومعاهوم جواد وتبعو رؤوف وزين العابدين لي تاهو عوال على خزيت مزول نضاضرو.. رحيل شداتها الخلعة ورجليها مبقاوش هازينها مدات سيدرا لأقرب وحدة كانت جنبها وهي بيسان وخرجات تابعااه ولقاتهوم برا بلاعقل قربات جهتو وعنقاتو ونطقات ببكاء:عفاااك انوح يالاااااه نمشيووو
نوح:(شدها من كتافها ونطق بصوت قاصح وعينو فعينيها)دخلي لداخل وماتخرجيش ارحيل
حركات راسها بلا ودموعها نزلو من لخلعة وهي عارفاه فاش تيشعل مكيطفااش بزربة.. شدات فيديه مباغاش طلقو وخرجو ولاد لعائلة وبات جواد تاهو لي باركة الشوهة لي تشوه مع عائلتو والناس ويزيدها تاجيران لي بداو بعضهوم يطلو.. قرب جهة نوح لي واقف تايقشر ففمو مغدد باااغيها دخل باش هو يتفاهم معاه بطريقة خرى.. فلول هضر باحترام ودار قيمة ليهوم واحتارم النسا ولكن جواد غير مزاد فيه وشرك كلشي وبدا يخسر فلهضرة وماحتارم لاكبير لاصغير ولاعيالات لانساا..
بات مريم:(شاف فنوح واليازيد لي شاعلين وقال بصوت تقيل حشمان)نتوما ولاد لاصل ودار لكبيرة ماشفنا فيكوم تاعييب وأنا دابا واقف قدامكوم حشمان من هادشي لي وقع وكون عرفتو غايطرا كون ماخليتش خوها يبزز عليها هاد الزوااج
اليازيد:(مع سمعو اش قاال وهو يدمااري وعينو فعين صاحبو)نهااار قلتيها ليا بضحك سولتك وقلت ليك وااااش ختك ماعندها حد فحياتها وغاتبغي قلتي اااه وبديتي عليا بداك الديسك الخاااوي وتيقتك وجيت وكبرت بيك وبيهاا ونتااا كاتستحمر فيااا هادي هي الصحبة (حس براسو تشمت من عند صاحبو) تاتكدب فوجهي واخا كلشي بااااين وأنا تيقتك حيت عااارفك صاااحبي وعشيري (شنق عليها مغدد وغوت)علاااش كادب علياا ومبزز على لبنت هااا وأنا تانقول مالها مكتشوفش فياا وفاش دويتها مباغاش تجاوبني حيت هي مباغانيش ونتاا سباااااب ابنااادم ومن ليوم عمرك تعرفني مزاااال سمعتي من ليوم مانتا صاحبي ماأنا صاااحبك وطريق لي لقاااتنااا تفرقناا والله ينعل بوهااا صحبة لاكااانت بحال هاااكااا (جمع الدفلة ودفلها فالأرض وعطاه بوكس وقرب جهة نوح منيرفي) خلينااا نقووودووو من هنااا اولد لحاج
نوح:(كانت رحيل باقا شادة فيه باش مايمشيش يضربو نطق بهدوء) زيدي نمشيو
رحيل:(حركات راسها)اااه يالاه
وصلها لطوموبيل مركبها فلقدام ومع سد لباب طرقو بلكونطاكط وهي غير سمعاتو طرق وهي تخرج عينيها فاش قشعاتو راجع لعندهوم وعرفاتو عليااش ناوي.. دازت مابين الكراسى تاجلسات لور تاتشوف فالزااج دلور وضرب فيه تاتغوت بسميتو:نوووووووح نوووووح
رجع عندو نوح وهو مشربن منو.. مامسوقوش لبلان حيت ممتعلقش بيه ولكن لي عصبو ونرفزو هو داك خونا كيفاش تصرف معاه وتهز عليه.. وهو أعدى حاجة عندو يتهز عليه شي واحد خصوصا أنه ماخرجش معاه لعيب عكس لاخر لي غير شاااعل بوحدو وفمو خانز مكيعرفش يدوي..
وصل عند جواد لي واقف معصب مراضيش وشنق عليه على غفلة وعطاه بوكس لوجه ومجاا لاخر فين يوعى تازادو الثاني والتاالت وهنا شبكات بناتهوم.. اليازيد عارف نوح محملش تصرف جواد معاه وقرب جهتو وتاولاد لعائلة قربو باغيين يفكوو ساعة اش غايفكوو.. الجيران كيطلو والعيالات كيسمعو لغوات درجال عرفوها ترونات ومشاو كيطلو من الشراجم مخرجين عينيهوم ورحمة راه شداتها القفقافة وهي تاتشوف ولادها مدابزين وصورة ناااصر جاات فبالهاا ديك الساع.. طاحت الأرض وبدات تاتغوت وضرب فوجهها:غايقتلوووهوم ليااا ولادي غايموتو ليااا بحاااال ناااصر
نزلات سناء تاتسكتها وسعيدة وجليلة تاهوما وطامو كاتولول والروينة ناضت فلداخل أما على براا كيتسمع غير تخسار لهضرة على الجهد..مع لاخر مكيكونطروليش فمو مكاين غير تخساار.. أما نوح مكيهضرش كيطبق وهادي قاعدة فيه لاصعر راه مكيهضرررش كيطبق.. احتاارمو وهضر معاه بالأداب ولكن فاش شافو بدا يترطى قال ليه اجي نوريك..
شانقين على بعضياتهوم وزين العابدين فيما يضور يركل جواد ومخرج فيه عينيه وكيدافع على باه.. وهاد الخصلة مشاركينها الأب أو ولدو فاش تيشعلو مكيعقلو على حد.. بات مريم حاط يديه على راسو والشوهة لي تشوهها ليوم عمرها تنسى ليه تايدفنوه.. أما رحيل لي كانت تاتشوف فالمنظر مع مبقاش بان ليها نوح صافي صعرااات وبدات تادابز مع باب طوموبيل بااااش تحلو وتاضرب الزااااج وتغوووت:حلوووو عليااااا نوووووووح
كانت منهااارة وغواتهوم وصل عندها وهي باغا غير يحلو عليها لباب وقلبها غايخرج خصوصاً فاش مبااانش ليها صااافي تماا عرفاتها ترونات ديال بصح.. كانو جايين ناشطين باش يخطبو صدقو دابا مدابزين ورواااح غايطيحوو.. كان طايح جواد الأرض ونوح متكي عليه تايضرب فوجهو لي كولو مدمي حكموو مزيااان وداك الأعصاب كبهوم فيه.. ماطلقو تارشقاات ليه وتحدر جهتو نااطق بهمس كالفحيح:حمد ربك حيت دزتي فوجه بااك يماا نوريك لهزاان وقلة لإحترام بشحال يتقاام..
ناض من فوق ولاشوميز تشرگات ليه مع لمدابزة.. دفل فالأرض وقاص حاجبو لي تفلح ليه بواحد الضربة عطاها ليه جوااد مع لابس بخاتم.. وشاف فخوه أو ولدو واليازيد ونطق بصوت قاصح:خليونا نتحركوو
تفكر رحيل لي سد عليها الطوموبيل وزرب فمشيتو تاصل لباب لقدامي مبانتش ليه ورجع لباب لوراني ومع حلو مالت لعندو رحيل لي كانت مغيبة..
مور الروينة لي طرات دخل اليازيد وعلمهوم بلي غايتحركو..خرجو كاملين مخرجين معاهوم داكشي لي جابو وطامو حلفات لاخلاات شي حاجة وتامن التمر هزااتو.. خارجة وهي معصبة على شنو طاري ولموقف لي تحط فيه ولدها ومرضااتش خصوصا عارفة بلي هادشي غاينتاشر فالعائلة عند لكبير والصغير.. كانت فرحانة وقالت هنيا ولدي غايدير دارو ساعة هجراتو بهادشي لي طرا ولعروسة لي هربات.. قشعات سناء لي كانت واقفة وهازة ڤيست اليازيد ومشات جهتهاا وهي هازة داك الصندوق لي فيه الدهب ولخواتم
طامو:(مدات يديها باغا تاخد ڤيست ولدها)عطيني لڤيستا دولدي
سناء:(ببرود رجعات يديها لور)ولدك هو لي عطاها ليا وهو لي غاياخدها من عندي..
طامو:(نطقات بغل)فرحاانة ياااك حيت نهار ولدي خسر
سناء:(ببرود)نتي عرفاني ماعنديش مع النفاق (باستفزاز)فرحت وغانطير بلفرحة حيت كيفما أنا وقفتو ليا كيف لعصا فالرويضة تاهو تخربات ليه ليلتو واشدي دابا
مشات مخلياها تاتغدد وتفقص على كلامها أما سناء قشعاتو واقف تايستف داكشي فلكوفر بزعاف وهي توقف عليه تاهز عينو وشاف فيها مخنزر عكسها هي لي ملامح وجهها باردين..
سناء:(مدات ليه لافيست ونطقات ببرود)كنت باغا نقول ليك الله يجعل كلشي مبارك ومسعود ساعة راك شايف كلشي بعينيك
اليازيد:(عض على حنكو من لداخل وقال بصوت متهدج)كاتشمتي فياا؟
سناء:(هزات حجبانها)هاااء شوية وصااف
اليازيد:(الشمتة دصاحبو باقي طلع وتنزل فيه وزادتو هي بكلامها نطق ببرود مكيشوفش فيها) لابااين
سناء:(تحدرات جهتو تاوصلات حدا ودنيه وهمسات ليه بسخرية) تستاهل حيت نتا لي غادي لبنت صغيرة فايتها بعوااام بغيت غير نعرف عقلك اش كان تيقول ليك ديك الساعة ولااا خديتيها بلعاني صغيرة باااش تبقا تبان فيها وسط العائلة (ضحكات تاتشفى)هههه اوا هانتا شد لعروسة طجات وهربات وحگلا ماتهرب مسكينة وهي تاتشوف لعريس شااارف
اليازيد:(شاف فيها مخنزر وهضرتها غير مكاتزيد تشعلو) طفرنااهاا مع لي بعقلهوم وكبااار
سناء:(عرفاتو معنى عليها وجوباتو ببرود) خليك فتزهوانيت ديالك أما الزواج مصالحش ليك
اليازيد:(خنزر فيها ونطق بصوت معصب)سناااء قووودي علياا حيت مرشقاااش لياا عليك
سناء:(رمشات بعويناتها)مالي قلت لي كاين مي بان ليا نتا مراضيش ماعليش (طبطبات على كتفو) عليك العوض ياااروح أمك هههههه
مشات تاتمختر والضحكة مرسومة على شفتها وعلاش لا وهي تاتشوف خطبتو لي تفسخات قدام عينيها.. قلبها لي كانت شاعلة فيه نار لغيرة بررد والدموع لي كانو فعينيها مشاو.. شافت فطامو لي كانت تاتشوف الديكور وغمزاتها بندالة قبل ماطلع فطوموبيل رؤوف وهي مرتاحة..
جات طامو لجهة ولدها وهي مغددة ومعصبة من الشوهة لي تشوهو وزيد دابا ديكور لي شافت أو تبسيمة دسناء لي كاتشمت فيها..
طامو:(حطات الصندوق فلكوفر وقالت مخنزرة)اش كاانت تاتقول ليك ديك خيتي؟؟
اليازيد:(سد لكوفر ونطق ببرود) ركبو مع بيسان أنا مغاديش لدار
طامو:(شدات فيديه وقالت)سولتك علاش ديك خيتي كانت تادوي معااك وضحك
اليازيد:(منرفز) مقااالت والو غير تهناااي وسيرو ركبو عند بيسان أنا غادي
طامو:فين غادي اولدي
اليازيد:(حيد يديها وقال مخنزر)لجااايحة الكحلة الواليدة
خلاها تابعاه وهو ركب ودمارا غادي ماتسناهومش.. معصب حيت صاحبو ضحك عليه وشمتو.. وبسبابو مريم هربات وطاح فهاد الموقف لي تاواحد مغايرضاها على راسو.. العروسة تهرب نهار خطبتهاا راه شي حاجة لي صعيبة.. مرضااش نهائيا على هاد الشوهة لي تشوه قدام العائلة من لكبير لصغير.. تيقول مع راسو كون غير قالتها ليه نهار هضر معاها بوحدهوم كان غايرفض ومستحيل يتزوجها وهو عارفها مباغاهش ولكن عادرها حيت هي مكتعرفوش وحيت هو صاحب خوها عند بالها غايوصل ليه لكلام.. هي ماليها تاشي دنب وهروبها مجاا تاشافت عائلتها مبززين عليها..
سايگ وهو كيفكر فهاد الزهر لي عندو كيف عوح فلول خطب غزلان ورفضاتو ودابا مريم لي هربات فنهار خطبتهوم.. هو باغي يبدا حياة جديدة ولكن على مباان ليه بلي صعيب يبداهاا.. تفكر سناء وشوفاتها فاش كان جالس فالبرزة وكلامها لي قالت ليه دابا وهو يخنزر ونطق بصوت هامس: كاتشمتي فياا اسناااء واخااا شمتي مزيااان..
كالاهاا بجسمو قبل ماطيح ورجع تكاها فالكرسي وتحدر جهتها عاقد حجبانو كيضرب فوجهها بشوية ويعيط بسميتهاا:رحييل رحييل
سد لباب وضار لجهة لخرى فين كاينة قرعة دلما خداها ورجع حل لباب وكب شوية دلما فيديه ورشها وعاودها مرة خرى بانت ليه بدات تاتحرك جفونها.. مسح ليها وجهها بلماا ومشى لبواط أگون حلها وخدا قريعة صغيرة دالريحة ديما تتكون عندو تم وشكلاطة.. حل ديك الريحة لي كانت بحال لقلم فشكلها وصغيرة.. غلاقتها فيها عود خداه ودوزو تحت نيفها تابدات تكمش حجبانها من الريحة لمجهدة لي استنشقاتها.. وحلات عينيها وهي تاتشوف الضبابة قدام عينيها.. حل الشكلاطة وعطاها ليهاا ونطق بصوت هادئ:حلي فمك
وكلها ليها وهي بدات تحل عينيها تابدات تبانت ليها الدنيا وبدات تسترجع اش وقع.. تسمع صوت رحمة لي جايا تاتجري جهتهوم وعينيها على نوح لي تقاد فوقفتو تايشوف فحالة مو وبكاها.. وقفات قدامو تاتشوف فيه بلهفة وقلب أم خايفة ومرعوبة على ولدهاا.. حطات يديها على حناكو ودموعها مسرسبين ونطقات بصوت باكي: ولدي مااابيك والو ياااك مكاضرك تاحاااجة (قاست حاجبو ونطقات بخوف)علاش دم عندك هناا واش كيضرك
نوح:(تنهد ومحاملش يشوف دموع مو وتاهو شد وجهها وباسها فراسها)يمّا ماتهزيش لياا لهم أنا بخير (باسها تاني فراسها)
رحمة:(ببكاء تخشات فيه) خفت عليك اولدي خفت بزااف
نوح:(تنهد ونطق عاطيها لخاطر) ماتشطنيش باالك ايمّا وطلعي ركبي..
رحمة:واخا نمشي نجيب ليك مونطوك لبرد عليك
مشات بزربة وهو تحدر جهة رحيل لي حلات عينيها ومحنية لقدام شادة راسهاا لي حسات بيه غايتشق.. الخلعة لعبات عليها خصوصا فاش شافتو دخل وسط ديك الروينة وغبر وزيد السدان دالطوموبيل لي حسات بيه خنقهاا وهي أصلا مكتستحملش الأماكن المغلقة وتتخنق منهوم.. حسات بيديه تحطات على دراعهاا وصوتو لي نطق بهدوء:مزياان داباا؟
حيدات يديه لي على دراعهاا ونطقات بلاماتشوف فيه:بغيت بنتي فين هي سيدرا
كان واقف حدا الباب محني تيدوي معاها وفاش شافها دارت داك رد الفعل خشى راسو فداخل طوموبيل وتكى على لكوسان بيديه ونطق بصوت جدي:شووفي فياا (مضارتش جهتو وهادشي عصبو ونطق بصوت قاصح) شووووفي فيااا ارحييل
ضارت لعندو وعينيها حمرين باين فيها حابسة البكية بزز لعكر مشى ولمك اب دعينيها تجلخ.. مجرد مالمحات حاجبو وديك التفليحة لي فيه والدم وهي تحس بقلبها ضرب بخوف ودموعها نزلو ونطقات بصوت خافت:حاجبك فيه دم
نوح:(كيشوف فيها مخنزر ومعصب وبحدة قال) اش خرجك لبرااا وسط الرجااااااال خليتك لدااخل مع النساا لاش خاااارجة هااا واش كلامي عندك زااايد ناااقص (سمع صوت مو ونطق بجدية) هضرتنا نكملوها فالدار دابا مزيااان شوية باقي فيك الدوخة
حركات رحيل راسها بلا وهو شاف فيها مدة قبل مايسد الباب.. تكات على لكوسان ومدات يديها حلات الشرجم حيت حسات براسها تخنقاات.. يديها كيترعدو عليها وباقي لخلعة لاعبة عليها.. فاش شافتو رجع لداخل وغبر وسط المطايفة تخلعات عليه وخافت لايطرا ليه شي حاجة.. سبق وحضرات لمطايفات فحومتهوم وكانت تاتشوف اش كايطرا فيهوم.. حطات راسها على زاج مغمضة عينيها.. أما هو قرب جهة مو وخدا لاڤيست لبسها حيت لاشوميز تشقات ليه..
نوح:(ماعندو خاطر)فين جدة ؟
رحمة:هاهي جايا
نوح:طلعي ايمّا
جات جداه لعندو وباس ليها راسها وحل ليها لباب لقدامي حيت شاف جدو ركب مع رؤوف.. جلسها وقاد ليها لسانتوغ حيت مكتعرفش تصاوبهاا.. هز عينو فرحيل لقاها مغمضة عينيها وجهها صغر... كمش حجبانو وسد لباب ومشى تايقلب على سيدرا لي متأكد غاتكون خايفة دابا.. بانت ليه خارجة مع بيسان لي شادة فيديها وهازة كاب رحيل وبوشيطة ديالهاا.. سيدرا غير شافتو وهي طلق من يد بيسان ومشات تاتجري عندو تاتحدر وجلس قفازي وحل يديه عنقها وخشاهاا فيه كيطبطب على ضهرها
سيدرا:(خرجات من حظنو وشافت فحاجبو لي تاينزف بخوف)ماي بلو آيييز فيك ديدي هناا
نوح:(شد يديها وباسها وتبسم ليها بحنية)ماشي شي حاجة ابابا
سيدرا: أنا خفت بزاف ماي بلو آيييز هادوك كانو تيغوتو ويبكيو
نوح: ماواقع والو دابا يالاه نمشيو عند ماماك
سيدرا:اه نمشيو عند مامي
نوح:(وقف وشد فيديها وشاف فبيسان) ركبي فطوموبيلتك خلينا نتحركو
بيسان:واخا ولكن حاجبك
نوح:(قاطعها بجدية)يالاه ابيساان
مشات تاتزرب ركبات فطوموبيلتها وماتحرك تاشاف كلشي شد بلاصتو عاد مشى جهة طوموبيلتو حل لباب لوراني لقا زين العابدين جالس جنب رحمة..مد لرحيل سيدرا لي عنقاتها وتارحيل زيرات عليها تاتبوس راسهاا وتهمس ليهاا.. سد لباب عاد شد بلاصتو وتحرك ولخرين تابعينوو مخلين وراهوم عائلة جواد لي الروينة نايضة عندهوم.. طريق كولو وحد ماهضر.. ونوح مرة مرة يهز عينو فالمرايا جهتها ويطمن عليها بعينيه واخا معصب منها ولكن مغاينكرش بلي خاف عليها فاش لقاهاا سخفاات..وصلو لريااض ورحيل مشات نيشان لبيت سيدرا بدلات ليها حوايجها ونعسات جنبها مباغاش تمشي لعندو وتشوفو فهاد الساعة حيت مقلقة منو..
يتبع...
التعليقات
لا توجد تعليقات بعد، كن أول من يعلق.