الجوهر الحر الجزء 56

"إسلام"

صوتها وهي تاتنطق بسميتو خلى جميع دكرياتو الكحلة يتكبو عليه بحال الشتاا... ومنظر السُكرة ديالو وهي ناعسة فوق داك البيااص بدون حرااك تصور قدام عينيه... صوتها وهي كاتعيط ليه بابا تسمع فودنيه بحال الاراه بصح مرفوق مع صوت الطبيب لي قال بنبرتو الباردة "البراكة فراسك".. فلحظة ترفع ومبقااش حاس بشنو ضاير بيه...كان عايش فزوبعة المااضي والدكريات لي كانت تتجرو ليها بدون رحمة...

واقفة وراه وعينيها عليه متلهفة أن يضور ويشوف فيهاا.. من نهار لعرس وهي متبعة خطاويهوم وكانت بحال ضلهوم تبعاهوم فيما مشاو... ملي بان ليها خارج بوحدو بدون تفكير خرجات لجهتو غادة عندو بلاماتفكر فعواقب فعلتها وتفكر فأخر مرة شافها هو كيفاش تصرف معاهاا.. مكانش كيهمها هادشي كثر مكيهمها أنها ترجعو ليهاا ناسية راسها بلي دارت جري'مة فحقو وفحق رااسها وبنتهااا... عند بالها راه إسلام بااقي هو نفسو إسلام لي تزوج بيها ولي كانت تاتعرف ناسية بلي المصيبة لي دارت فحقو خلات داك إسلام يولي واحد اخر والرابط الوحيد بينو وبين إسلام دقبل هي السمية أما شخصيتو كلها تغيررات.. زعمات وقربات كثر جهتو كاسرة لحدود لي بناتهوم ومدات يديها حاطاها على ضهرو وهاد لحركة بالضبط كانت كافية ترجعو لواقع ويضور بزربة جهتها وقبل ماتحل فمها وتهضر كااان مزير على عنقهاا بيديه وقااالبهاا لجهة الطوموبيل تاحسات بضهرها تهرس بزدحة ويديه زيرو على عنقهااا وبصوت حااقد نطق:جيتي لمووت برجليك ابنت لق*بة ليووم نقتللك ونخلي لكلااااب ينهشووو لحمك لموووسخة

ميس:(كانت تاتحس براسها مخنوقة ويديه شادين عنقهاا بالجهد.. حلات فمهاا وقالت بصوت متقطع)إسلااام عف ااك سمع ني

إسلام:(تجنن ولى كيشوف قدامو غير صورة بنتو فلكفن) كنت دااايرك كيف لمااا لقليل عمرررري خليتك تخصي من الحاااجة كلشي محضروو ليك ونتي الق*بة ااش درتي مشييتي خنتيني مع دااك الز*مل لي كنت دااايرو صاااحبي تقتتت فيك وعمررري شكيت فيك ونتي لقيتي فرصة تلعببي ورى ضهررري ورديتيني دمدوومة (خرج فيها عينيها وغوووت مكره) ملي ياااادلي مباغااانيش علاش ماتقووودتيش وتغبري كمااارتك علياا هاا علاااش ماطلبيش الطلاااق وتخرجي من حياااتي علااااش خرجتي لياا على حيااااتي وقتلتي لياااا بنتي علاااااش اش دااارت ليك (وجهو ولى حمر) بنتك قتلتيهاااا بيديك المريييضة رزيتيني فيهاا وأنااا غانرزيك فحياااااتك وغاندمك على النهار خرجتي من لحبببس غااانتهنى منك بيدي الموووسخة..

كانت تاتجيف ومقدااش تنفس.. حاسة براااسها شوية وتمووت وكلامو ليهاا مكانتش تاتسمعو حيت كانت تاتفكر غير كيفااش تفك راسهاا بين يديه.. مكانش إسلام لي كاتعرف ولي تعيى ماتهضر وتغوت وهو كيدوزها ليهاا ويسمح ليهاا..

كان العساس دايز من تماا داير خدمتو وكيجي يتفقد الطوموبيلات دمالين لموبل تبان ليه داك ديكور قدام عينيه وصوت إسلام لي تيغوت.. مشى كيجري جهتو مع كيعرفوو حط يديه على يد إسلام ونطق بصوت مجهد:سي إسلاام نعل الشيطااان

جرو بالجهد تاطلقها تاترجع النفس وهي تاتنهج وحالتها حالة... دموعها نازلين جنب عينيها وكلها تاترعد وبزربة مشات تاتجري بالجهد جهة طوموبيلتها وإسلام تاااايغوووت ويسب بصوت مجهد:هررررربي ابنت الق*بة وبررررب ونعااااود نشوفك يااااتاندخلك لحببببس لي خرجتي منووو الله ينعل أصل مك فهاد النهاااااار الق*بة تفوووو

دفل فالارض وعينيو على طوموبيلتها لي تحركات غادة مكسيرية هاربة منو ومن البركاان الهااايج لي خلات وراهااا... أما إسلام مكان مسوق لا لجيران ولالصداع لي دار حيت عقلو فيه غير الشمتة لي شمتاااتو ولي عمرها بغاات تنسى ليه فهاد السنين كلها وليومنا هادا باااقي لداباا تيتفكرهاا وباقي لدابا محررة عليه عيشتووو.. الجيران لبعض منهوم بدا يطل يشوف اش واقع ومنهوم تاأسماء لي كانت فبيت الضياااف شرجمها محلول على الزنقة ومع السكاات وصوتو كان عالي.. وصل عندها وناضت تاطل لقاتو واقف والعساس كاان تيهدن فيه وهو تقولي فيه حريق لبوول غادي جااي بلاصتوو ومغدد عليهاا وغير زهرها جا لعساس أما كان يقتلها ومايشوفها حد.. خرجات عينيها وهزات جاكيط لاحتو عليها وبزربة خرجات من الدار مور ماخدات ساروت ونزلات تادردب فالدروح وعقلها معاه اش طاري ليه وعلاش خرج والأهم مالو تيغوت.. لقاتو باقي برا قربات جهتو ولعساس غير شافها مشى..

أسماء:مالك علاش خارج تاتغووت

إسلام:(شاف فيها ونطق بعصبية) بنت لق*بة غانقتلهاا بربي تغانقتلهااا

أسماء:(بخوف)شكون؟؟

إسلام:عند بالها راه خرجات من لحببس صافي تهناات أنا نوريهاا وبربي تاندمهاا ونحرقهاا كيف حرقاات ليا قلبي

أسماء:(فهمات هضرتو وقربات جهتو شادة فيه)زيد نطلعوو الناس متفرجين فيناا

جراتو وطلعو لدار وهو باقي لداباا مخرج عينيه معصب من شوفتها بحال شي ثور فاش كيشوف لحمر هكاك كان... دخلو لدار وجلساتو فوق النموسية وجلسات جنبو وهو ينطق بصوت خافت مدمر: مكفاهااش قتلات ليا بنتي جايا واقفة قدامي بلاحشما بلاحيا

لمرار لي كان فصوتو خلاها تنهد ويبقا فيهاا فديك اللحظة..نسات بلي راه عصبها ونسات راه غلط فحقهاا... شدات فيديه ونطقات بصوت خافت:بنتك دابا راه فبلاصة حسن من هادي

إسلام:(شاف فأسماء وعينيه بانت فيهوم لمعة دموع) هي بااش أداتهاا ملي مبغاتهاش تعطيها ليا أنا بغيتها

نزلو دموعها ومقدراتش تحبسهوم باقي وهي كاتشوفو فواحد الحالة أول مرة تشوفو فيهاا.. كان ضعيف ومدمر فلداخل ديالوو.. تلقى زوج ضربات لي مقدرش لحد الآن يتخطاهوم وينساهوم باقيين واقفين ليه فطريقو بحااال شي حيط مانعين عليه يزيد لگدام فيما كيبغي يريب داك الحيط تاتجي حاجة توقفو فبلاصتو ومكيدير والو... بسبابها بعد على ميمتو وباه بدل لمدينة كاره لبلاصة لي كان فيهاا ولي كانت جامعاه بيهاا... بسبابها ولى السيد كيسكررر وهو عمرو حطو ففمو شحال هادي ولكن باش ينسى خدا القرعة والكاس ونيس ليه فدوك الأيام الاولى.. بسبابها هو تبدل مبقاش إسلام لي كاان حنين وتيسمع ليك ومسالم..رجع واحد اخر مشكاك وغير معصب وشااعل ومكيتيقش حيت الشك تربى فيه بسباب الخيانة ديالها لي عمرو كان يتوقعهاا.. كون جات وطلبات الطلاق كان غايطلقهاا ومغايخسر عليها من غير كلمة راك مطلقة ولكن هي حرقاتو فكبدتو وخلات ليه دكرى عمرو ينساااهاا تانهار يتردم عليه التراب... كحزاات أسماء جهتو وعنقاتو بهدوء مخلياه تاهو يبادلها العنااق لي كان محتاجو فهاد اللحظة..

----

ليوم كان أهم يوم بالنسبة لسيدرا لي كانت فايقة ناشطة ومتحمسة تمشي لمدرسة... فاقت معاها رحيل واخا صبحات مهلوكة مع لوحم لي ماخلاهاش تنعس ليل كولو وهي تاترد وجنابها ضارينهاا.. كانت دابلة وباين فيه راها ماشي تال لهيه... لبساتها ليبى سخونة مع صاية دجلد كحلة وشوميز بيضا وجيلي دالصوف بيضا تاهي.. جلسات تاتضفر ليها شعرها وسيدرا تاتنگر باغا طلقو

رحيل:(مكمشة حجبانها)زگاااي راه غانضربك على الصبااح

سيدرا:(بتدمر طفولي)وامامي بغيت نطلق شعررري مبغيتش ضفيرة

رحيل:(باقي تاضفر ليها)هنينا تت

سكتات سيدرا وهي مادة شنوفتها مقلقة ورحيل كملات ليهاا الضفيرة لي جاتها تاتحمق مع دارت ليها هاديك لي تاتقسمي فيها الشعر وجمعاتو ليها زوين وزيد شعر سيدرا رطب ولونو تيبري..

رحيل:يالاه نزلي تفطري باش نمشيو

نزلات سيدرا ورحيل ناضت تاتلبس عليها.. كون مكانش أول نهار كون خلات باها يديهاا وأصلا راه دايرة ليها طرونسبور كيجي تال لباب يوصلها ويديها.. لبسات عليها تاهي صاية كحلة وغير سداتها من الجناب وهي ضور مجنبة وحطات يديها على كرشها لي كانت منفوخة شوية وتبسمات تبسيمة طالعة من لقلب وهي كاتحسس الأجنة لي كانو تيكبرو فداخل ديالها نهار على نهار..لبسات جاكيط سخونة بيضاا كاتسد بصدايف.. وشافت فوجهها كانت صفرا قدات عويناتها فمك اب صباحي خفيف ودارت واحد لبستيك نيود كيف عادتها.. صوبات فولارها وهزات صاك فيه مسائلها وجلسات تلبس لبوط ديالها وقبل ماتخرج من لبيت هزات شكارة سيدرا ونزلات لتحت لقات تانيرت وجدات لفطور وجالسين كاملين تيفطرو

رحيل:صباح الخير ههه شفتكوم فايقين كاملين

محمد طه:ضروري روح مودي غاتمشي لمدرسة خصنا نفيقو ونشجعوها

رحيل:اوا سعداتها اسيدي

تانيرت:جلسي اماما وفطري

رحيل:(خسرات سيفتها)لا لا مافياش معدتي مقلوبة عليا

إدريس:مشهية ابنتي شي حاجة نجيبها ليك؟

رحيل:لا ابابا

تانيرت:هاكي شربي غير عصير بعدا وكولي شي تميرات يعطوك لقوة ابنتي

خدات داك لكاس دلعصير وشرباتو كان مطحون ديال الدار كلشي طبيعي وكلات واحد تمرة بزز وشوية دلوز.. شافت فريان لقاتو ساكت على غير عادتو ونغزاتو:مالك ساكت وساهي

ريان:ساهي غير مع لخدمة وصااف (شاف فساعتو)هادي هي لوقيتة غانمشي سيدرا (باسها فحنكها)كوغااج الفاارة وردي لبال لراسك

كتاكل خبيز بشكلاط وتاتحرك راسها باه وهي ناشطة..

إدريس:هز سوارت طوموبيل وديها بلاماتخرج لمطور راه شتاا ليوم

تانيرت:أنا كون سعفني يبيع لمطور ويشري طوموبيل حسن ليه

ريان:هانا مشيييت

خرج ريان والبقية غير فطرو تبعوه ومعاهوم محمد طه لي باقي ماسالاش ليه كونجي لي شد.. بقات غير غزلان فدار وكلشي ركب فطوموبيل رحيل.. كان إدريس جالس جنبها ولور تانيرت وسيدرا ومحمد طه ورنيم لي غايوصلها تال شاريع باش تشد تاهي طاكسي.. تحركات رحيل مركزة فطريق والشتا مجهدة والجو زوين.. وصلات رنيم هي لولة لي شدات طاكسي وهوما كملو لمدرسة وسيدرا مجمعة مع محمد طه وتانيرت ومرة مرة طل بين الكراسة على مها وجدهاا..

تانيرت:الخير ديال سيدي ربي الله ينفعناا من عندو

إدريس:آمين

مسافة طريق وكانو وصلو قدام المدرسة بلاصات رحيل طوموبيلتها وحيدات لسانتوغ نازلة والكل نزل ومنهوم سيدرا لي مع حطات رجليها فالأرض وهزات راسها فالجهة المقابلة ليها وهي طلق من تانيرت لي شداها وغوتات بصوت عاالي:مااااي بلو آيز..

هزو راسهوم كاملين متبعين الشوفة لسيدرا لي سمحات فيهوم ومشات تاتجري غادة لعند نوح لي كان واقف جنب طوموبيلتو خاشي يديه فجيب المونطو لكلاس لي لابس.. تحدر فاش وصلات عندو وهزها كيف لكمشة وهي عنقاتو بيدياتها بزووج... رحيل غير شافتو وهي تسوط قاالبة وجهها وبلاماتسنى دخلات لطوموبيل سادة الباب بالجهد تاتسمع صوتو عندو هو لي كان حاضيها ملي نزلات وعينو كيشوفو فيها بواحد الشووق... طلعها من رجليها تال راسها فدوك الدقايق وشاف فأدق تفاصيلهاا لي بالنسبة ليه دايرين بحااال التعويدة كيخليو مسحور بيها... لعب بلسانو فغمو ورجع شاف فسيدرا لي نطقات بحمااس:تانتا جيتي بااش دخلني لمدرسة

نوح:(قاس حنكهاا الرطيطب)شنو قلت ليك أنا داك نهاريات

سيدرا:قلتي ليا غاتمشي معاياا (حطات حنكها على حنكو) حبيبي ماي بلو آيز

كمشها عندو وشاف فإدريس ومحمد طه لي قربو جهتو وسلمو عليه

إدريس:اش خبار مالين دار

نوح:(تبسم بتقالة) لحمدلله اسي إدريس

تحل لباب ديال طوموبيل نوح ونزل منها زين العابدين لي كان لابس كلشي كحل وشعرو كيف لعادة مبوكلي ومخربق.. سلم عليهوم وسيدرا غير شافتو وهي تكمش حجبانها وخرجات فيه عوينات البوبشة وهي معنقة نووح بالجهد وباقي حاطة حنكها على حنكو.. قلب وجهو عليها ماعبرهاش عكسها هي لي تاتشوف فيه وباقي مانسات ليه الضربة لي عطاهاا...

نوح:(شاف فساعتو) يالاه وصلات لوقيتة دخلي ابابا

نزلها الأرض وتحدر جهتها إدريس بايسها ونطق بحنية:يالاه انخشيشتي سيري تقرااي وردي لبال لراااسك واخاا

سيدرا:واخا بّا ديدي

محمد طه:(باسها فحنوكها بالجهد) روح مووودي قرااي مزياان بااش لانجحتي نجيب ليك كااادو زوين

حركات راسها باه ومشات تاتجري لجهة الطوموبيل ورحيل غير شافتها نزلات تاني هازة ليها الشكارة.. باستها تانيرت وبقات تاتهمس ليها وسيدرا تاتعنق تاهي وغير سالات شدات فيد رحيل لي قربات جهة باب المدرسة وسيدرا شافت فنوح ومدات ليه يديها زعمة ااجي معاياا.. قرب لعندها ورحيل شوية ديال الصبر لي عندها طاار وهي كاتشوفو جاي كيتعنكز عليهاا وريحتو وااصلاها قبل گاعما يقرب جهتهاا.. قلبات عينيها وخسرات سيفتهاا وهي تاتعض على شفايفهااا باغا غير تغوووت عليه... كانت مهنية فاش مشافتش كمارتو من نهار غوت وصعر عليهااا.. شد نوح يد سيدرا لي نطقات بحماس:صورني ماي بلو آيز أنا وياك ومامي

نوح:(متبع بعينيه تفاصيل وجه رحيل وبصوت هادئ قال) واخاا هي لولة

جبد تلفونو وتحدر هز سيدرا لي ضورات يديها على عنقو وشافت فرحيل:مامي اجي نتصوورو

ضارت رحيل وشافت فيها وهي عاقدة حجبانهاا ودارت فيه واحد الشوفة ديال الكررره وتاهو ماحكرش حيت عارف لي كاين بحكم شرح ليه إدريس وقدر يفهم الوضع لي هوما فيه...كانت سيدرا حاطة يديها على عنق كل واحد فيهوم ورحيل راه شادة التبويعة غير بزز صور نوح تصويرة وهي مخنزرة فيها تقولي واكلين ليها حقها فلورث.. وغير سالاو بعدات شوية عليه وشدات فسيدرا وهو رجع تلفون ودخلو لداخل باش يوصلوها لقسمهاا.. جات لمطغيز وهضرات معاها رحيل وقبل ماتمشي سيدرا تحدرات عندها رحيل وباااستها بحب فحناكها: ماديريش لبسالات امامي ولاجاك الجوع كولي من الماكلة لي دارت ليك جداك فالشكارة واخاا ردي لباال لرااسك (رجعات باستها وسيدرا غير تتحرك راسها باه.. كمشات رحيل حجباانها وقالت)ييع لصق فيك ريحتو

سمعها نوح لي كان واقف وراها ومجاوبهااش.. مشات سيدرا أو تقدات رحيل فوقفتهاا تاتشوف فيها تاغبرات عاد ضارت جهة نوح خنزرات فيه وسبقااتو وهي غادة وهو وراهاا وقبل مايخرجو من لباب ضارت شافت فيه ونطقات بانفعااال:واش نتا مغاتبعدش مني غاتبقااا تابعني ومرضني فحيااااتي مغاتفرقنيش عليك

نوح:(بهدوء) غير تهناااي الفتنة ديالي لفراق هو لي عمرك تشوفيه من عندي

رحيل:(ضربات برجليها الأرض ناسية راسها حاملة) وافرقني عليك اعبااااد الله كرهتك ومبقيتش حملاااك

نوح:(حك لحيتو وقال بنفس الهدوء) مخليك فدار بااك باش ترتااحي تايفووتك لوحم ولكن مااتولفيش الفتنة راه اخرتك اترجعي لداارك وليا

رحيل:(كلها تاتغلي وهضرنو غير مزادت عصباتها)هه والله لكااانت ليك شفتي وجهي هوو لي معمرك تشوفو مزااال والرجوع غير حلم بيه

خلاتو ونزلات وهي تاتغزل ومعدتها ترونات وقبل ماتوصل عندهوم طلعات ليها تبويعة وتجنبات لواحد لبلاصة شوية خاوية وبدات تاتقي غير لعصير لي شربات والتمر فقط.. أما النعمة مطاحتش فكرشهاا قرب جهتها نوح كيطبطب على ضهرها وشادها فاش شافها غاطيح وهي تاتبعد يديها منو وتاتزيد تقيى غير المرار.. ريحتو ماحدها كاتشم ليها ماحدها كاترد لاإراديااا.. جاب ليها محمد طه لقرعة دلما وعطاها لنوح ورجع بحالو مخليهوم..ونوح حلها وشربها ليهاا وهي شللات فمها هو لول عاد شربات وكلها تاترعد...

نوح:(بخوف واهتمام واضح قاس وجهها)واش تاتحسي براسك مزيان دابا؟

رحيل:(حيدات يديه بعصبية ونطقات) ماحدي كانشوفك عمري غانكون مزيان

نوح:(قرب جهتها ونطق بصوتو الخشن الدافئ) وغاتلقاي راحتك فبعادي الفتنة؟؟

لو جااها فوقت اخر قبل ماتحمل وسولها هاد السؤال كان جوابها غايكون باين أو وااضح.. أكيد راحتها معاه ومن نهار عرفاتو ولقلب ولعقل ارتاح ليه وبغاوه.. كان هو راحة روحها لي فاش تاتغيب خاطرها تايتغير ويتزير عليها الحاال.. ولكن كلشي تقلب داباا والراحة لي كانت تاتلقاها معاه ولات تاتهجرها فاش تاتشوفو.. ماشي لخاطرها أو وحامها جاها صعيب بزاف وهي براسها تاتصرف تصرفات خارج إرادتهاا.. خاطرها نافر منو حيت وحمها جاا عليه هو بالضبط والشوفة فيه تاتعصبها ومكتحملش سيفتو.. أما ريحتو تاتجيها خانزة واخا يظل يدوش ويبات فدوش هي غاتبقا تشم ريحتو خانزة.. بعدات يديه لي شادينها ونطقات ببرود وهي مكتشوفش فيه..

رحيل:اه

بقا تيشوف فيها مدة طويلة وتنهد تنهيدة طالعة من لقلب قبل مايضور جهة إدريس وأشار ليه بيديه بمعنى أجي ورجع شاف فرحيل ونطق بهدوء: وراحتك بالنسبة ليا مهمة عندي..

مع سالى كلامو كان إدريس وصل لعندهوم ونوح بهدوء انساحب مخليهاا عاطياه بالضهر وماخسرات عليه تاشوفة وحدة.. ودع محمد طه وتانيرت وطلع ركب فطوموبيلتو هو وزين العابدين.. وقبل مايدماري الطوموبيل شاف فيها مرة خرى كانت واقفة مع إدريس وتانيرت ومعاهوم تامحمد طه.. شاف فيها مزيان وهو مساخيش يبعد عليها ويمشي.. مولفها حداه ديما فجنبو من نهار تزوجو عمرو دوز نهار بلابيهاا.. بصح كان عارف أن الوحم هو لي مخليها فهاد الحالة ولكن جاتو صعيبة يتقبلهاا.. يشوفها قريبة ليه ومايعنقهااش ومايبوسهااش.. هاز فوق طاقتو ومع دلك راه صابر تايدير ربي تاويل.. تنهد وشاف فيها بنظرة أخيرة قبل مايدماري ويتحرك من تم غادي يوصل زين العابدين لي كان تاهو داخل يقراا.. كان السكات فالطوموبيل ونوح راه بالو باين بمن مشطون.. أما زين العابدين مكتعرفوش فاش كيخمم.. وصلو وقبل ماينزل زين العابدين نطق نوح بصوت هادئ:رد لبااال لرااسك ودير عقلك الله يرضي عليك اولدي

زين العابدين:(حرك راسو باه)

نوح:(جرو وباسو فجبهتو ونطق بصوت حنين)بونكووغاااج ابابا

زين العابدين: شكرا

نزل زين العابدين ونوح تبع ليه لعين تادخل عاد تحرك غادي لشغالو..

مدرسة جديدة..وجوه جداد..أساتدة جدادين...كانت بالنسبة لزين العابدين عداب بحكم مولف القرايا دبرا وتما كان هو وأمين مع بعض ماشي بحال دابا.. أول حاجة دارها هي مشى الإدارة وعطى سميتو لحارس العام لي ناض باش يوصلو لقسم ديالو.. وقفو حدا الباب دلكلاس وخرج البروف لي شاف فزين العابدين وعطاه الأوكي يدخل.. كان داخل وهو مكيشوف فحد غادي نيشان لبلاصة لي بانت ليه خاوية.. كانت الطاولة لخرة وجلس بوحدو كيف عادتو تيلقى راحتو فالوحدة...

كانت حالة فمهاا وعينيها القهويين تابعينو تاجلس لور وضارت جهة صاحبتها ونطقات بصوت خافت وعينيها شوية ويخرجو لقلوبة:ماتقوووليش لياا داك التيتيز غايقرااا معاناا

صاحبتها:الابغيتي ههه

رجعات شافت فيه وقالت بإعجاب:الله العام غايدوز زااااهي اوجدان

وجدان:(كاتمدغ فالمسكة) زاهي تيتيز ولكن ضروري ماخصنا نزيرو راسنا راه الباك هادا اإلهام

إلهام:تانتي الباك راه سااهل وماتخافيش بابا داير ليا أصلا حصص إضافية سوو ماعندي مناش نخاااف

سكتو فاش دخل البروف لي شاف فيهوم وأشار جهة زين العابدين:اجي أولدي لهناا

ناض زين العابدين وهو محاملش راسو.. عدوه يكون محط الأنضار وكلشي يتفرج فيه.. وقف جنبو والبروف بدا يقدمو ليهوم:هدا صديقكوم الجديد (شاف فيه) إسمك؟

زين العابدين:(ببرودو المعتاد)زين العابدين السليماني

البروف: ألووغ تاتاخد من عند لكوليغ ديالك داكشي لي درنا فهاد السيمانة وتكتبو فدفتاارك واخا

حرك ليه زين راسو باه ورجع لبلاصتو ولبروف رجع تاهو يكمل الحصة ديالو.. الملل باش كان تيحس والسيستيم دلقرايا مبداااال على لي كان تيقرااه راه مايمكنش حاس براسو بحال لاجااي من كوكب آخر.. كملو حصتهوم لولة وكلشي ناض باش يخرج ومنهوم هو لي هز شكارتو ومع وقف وقفات عليه إلهام لي تبسمات وبدات تاتسبل فعويناتهاا

إلهام:(مدات يديها)سلام أنا سميتي إلهام مرحبا بيك معانا مهم الابغيتي نعطيك دروس أنا نعطيهوم ليك راه كاتبة كلشي

كانت بحال لا سارطة كاسيطة درونجااتو وهي دارتها سبة باش تفتح معاه مجاال وعلاش لا تصاحب معاه حيت عجبهاا.. أما هو كثرة البشار ماعندوش معاه حدو حرك ليها راسو وتخطاهاا غادي مخليها تاتشوف فيه بإعجاب وتتقول واش هادا ولد قسمي..

نزل زين العابدين لتحت ومع لبووز جلس فواحد لقنيت وعينو على الدراري والبنات لي كل واحد غادي مع لكوليغ ديالو الاهو داير بحال ليتيم.. هز ليزياات ودارهوم وطلق موسيقى غربية ومع الشتاا دار القب وبقا جااالس فبلاصتو ممسوق لحد وعايش فعااالمو الخاص بيه ولي تايلقى فيه رااحتو..

ملي فاقت الصباح وبالهاا مشطون مع الكلام لي سمعات من إسلام.. رجووع ميس ومجيتها لهناا مكانتش طيح فلبااال.. سبق وقالت ليها رحيل راه جاات نهار جنازة باه بحكم مكانتش هي ومغاتنكرش بلي تصدمات كيفاش السيدة دارت لي دارت وباقي عندها لوجه توقف قدامو وتجي عندو.. معرفاتش علاش تاتقلب ولكن باين رجوعها مافيه خير.. وجدات ليه لفطور وقهوة كحلة باش يالاه يصحصح وداتها ليه لصاالة فين كان جالس مكمش عينيها وباين فيه ماشي على برجوو.. حطات ليه لقهوة ونطقات بهدوء:ليوم نهار لول لسيدرا فالمدرسة ضروري مغايخصني نمشي لداارنا

إسلام:(مشات من بالو)وايلي علاش ماقلتيهاش ليا

أسماء:كنتي ناعس عليها مافيقتكش ومع الضياف تشغلت..

إسلام:صاافي سيري أنا نوصلك وفلعشية نجي ونيت نجيب ليها كادو

حركات راسها باه ومشات تلبس حوايجها.. بصح هي وساتو او وقفات حداه ملي هضر معاها وجبد موضوع بنتو ولكن راه منساتش ليه شنو دار فخصوص الضياف وتصرفو.. لبسات عليها حوايجها وهزات مونطوهاا وخرجات لجهتو كاطقطق بطالون بوطها على الأرضية وغير شافها واجدة ولابسة ناض لبس مونطو فوق التوني لي لابس وخرجو من دار بزوج.. فطريقها خدات شي حوايج لسيدرا وشي حاجة لرحيل عاد كملو طريق وغير وصل لحومة نزلات وهو رجع لدار وماعندوش لگانة لتاشي حاجة وتاهي ماحكراتش عليه.. حلات ليها غزلان وغير شافتها تعانقو ولي شافهوم يقول راه مدة وهوما مشايفينش بعضياتهوم...

غزلان:لالة لعروسة على سلامتك ههه

أسماء:الله يسلمك الالة العروسة هههه

تانيرت:بنتي أسماء لبااس

سلمات عليها أسماء:حمدلله اماما تانيرت ونتي لبااس وبابا توحشتكوم

تانيرت:تاحنا توحشناك خليتي بلاصتك

أسماء:فين رحيل ماتقولوش ليا ناعسة

تانيرت:لا راه غير متكية ملي رجعات وهي تاترد حطات معدتها كلها حاشاك وتاماكلة صحيحة مبقات ليها فكرشهاا

أسماء:واش ماخرجاتش ليها طبيبة شي دواا

تانيرت:يهديك الله ابنتي واش داكشي عندو دواا راه يدوز وقتو ويمشي بحال الاعمرو مكااان

أسماء:وباقي عندها مشكيل مع ولد لحاج

تانيرت:بلاماتجبديه ليهاا غير غاتنوض تااااني وتصدق مفقوصة ليوم شافتو فالمدرسة راه شوية وتشير عليه بلحجر

أسماء:انمشي نشوفها

طلعات أسماء لعند رحيل لي كانت متكية فبلاصتهاا على جنبهاا ومغمضة عينيها ولكن مناعساش..

أسماء:(بخفوت) رحيل

رحيل:(حلات عينيها)جيتي

أسماء:صافا كيف بقيتي

رحيل:(بتعب)شوفي غير حالتي غاتعرفي كيف بقيت راسي غايتشق ومقادرة نشرب تاكينة

أسماء:طلعات لحمالة صعيبة؟

رحيل:هادي غير لبدية بااقي تبعني سبع شهووور

أسماء:كملتي شهراين؟

رحيل:واعلى كلام طبيبة راني فالسيمانة التامنة

أسماء:اش بان ليك نزلو لتحت وتبدلي لجو دلبيت شوية ولاتشهيتي شي حاجة نوجدها ليك

رحيل:(تاتلبس بانطوفتها)تشهيت هاد الساعة الروز باللبن اااااح (مسحات شنوفتها) ياااربي مداقو ففمي

مشات لطواليط دفلات ونزلات لتحت وغير سمعاتها تانيرت ناضت تدير الروز يطيب وأسماء مشات تحيب لبن.. وهادي هي لموحمة فدار واليديها كيديرو ليها لخاطر ولي بغات تاتحضر... وجداتو ليها ورحيل غير شافتو طاحت عمية تتاكلو وشحال مداقو بنين ضربات تلانة دزلافات ورجعات تكااات ونطقات بهدوء:الله شحاااال بنين

تانيرت:كولي اماما ولاابغيتي حاجة خرا قوليهاا

رحيل:صافي باركة (هزات تلفونها شافو الساعة)سيدرا باقي ماخرجات

غزلان:مشى يجيبها محمد طه

رحيل:اه اوا صاااف حيت قال ليا بابا نمشي نجيبهاا

غزلان:لا عيط ليه عمي عندو لگاراج عاامر ومشى محمد

جلسو بقاو مجمعين وأسماء تتعاود ليهوم على ماجرا ليها مع ضياف الويل على قولتهااا تاجاا محمد طه لي شافتو رحيل داخل بوحدو.. كمشات حجبانها وقااالت:فين سيدرا؟؟

محمد طه:(حك عنقو بتوثر) داها ولد لحاج تبات عندو ليوم

رحيل:(ناضت بزربة ونطقات بعصبية)كيفاااش داهااا وعلاش خليتيهااا ليه أصلا يديهاا

تانيرت:يهديك الله ابنتي خلي السيد يدي لبنت عندو ياك هي باغاا

رحيل:(دمعو عينيها)وأناااا بغييييت بنتي

محمد طه:(قرب عنقها ونطق بحنية)هانتي غدا غايجيبهاا غير خليها معاه وهي براسها مشات بلاماتسناااني نقول ليها اه (تايسايس معاها حيت عارف اش كاين) وصااافي غدا نجيبهاا من عندو

سكتات رحيل تنخصص وغير مقال ليها راسها.. شبعات لبكاا تقولي عندهوم جناازة وداك الروز لي كلاتو راه رداتو تاااني وراسها غايتفرع بالشقيقة..

----

داخلين بتلاتة لريااض وسيدرا هازها نوح لي كان هاز بيد لخرى لكارطابل ديالهاا.. تبسمات ليهوم رحمة وشافت فسيدرا: شكون جاا عندنا ليووم لبااس

سيدرا:اه لبااس أناا

رحمة:(شافت فزين العابدين)حفيدي كيف دوزتي نهارك لول ولفتي شوية؟؟

زين العابدين:امم

نوح:سير لبيتك بدل عليك وارتاااح تانديرو لكاسكروط (حط سيدرا وشاف فيها)شنو غانديرو دابا؟

سيدرا:انبدل حويجااتي ونغسل يديداتي ونجي نميمي حيت فيا جويعات

مشات تاتجري وموراه زين العابدين لي غادي بشوية عليه وعينو عليها وهي تاتنقز دريجات وديك صاية تاطلع وتبين اش لابسة لداخل..

خارج محمد طه من لحمام مبعد ماضرب واحد تدويشة فاعلة تاركة سخن فيها عضيماااتو صلى وناض تايجمع الصلايا تاتحل لباب ودخلات غزلان.. ضار شاف فيها لقى بيجامتها فيها واحد طبعة صفرااا جهة الصدر والكرش.. كمش حجبانو وتبعها بعينيه وهي غادة جهة البلاكار حلاتو وخدات بيجامة جديدة وحوايج لداخل وبنوار..

محمد طه:اش داكشي؟

غزلان:كنت تانصب لعشا حيت غايجي إسلام يتعشى درت دجاج ومع جيت نقلبو ترشات عليا لمرقة تت

محمد طه:مكينااش الطبلية عندكووم

غزلان:مكاتعجبنيش نديرها بزاااف اووف عالله تحيد طبعة فيها كاتعجبني هاد لبيجامة

محمد طه:لامشات بيجامة نجيبو بيجامة خرررى

سكتات غزلان وهي ملاهية مع لحوايح وقلبها تايشطح الرگادة من هضرتو لي قااال ولي لمسات قلبها مباشرة..

محمد طه:قاريا غدااا؟؟

غزلان:لا تال الإثنين عاد غانقرا عندي غير تلتيام فالسيمانة

محمد طه:مزيااان وجدي راسك نطلعو لأگادير واحد ليوماين نبدلو لجوو ماحدي باقي كونحي

غزلان:واش بصح؟؟

محمد طه:مالي كانكدب جمعي حوايحك وماتكتريش عاود وجمعي لياا معاك تاأنا حوايجي

غزلان:صافي واخا نمشي ندوش دابا وملي نسالي لعشاا نجي نجمعهوم

جات بغات تمشي وهو يشدها من يديها تاضارت عندو وشافت فيه بتساؤل بدون ماتهضر.. شوفاتوو ربكوها وخلاوهاا تسرط ريقها وقلبها حاسة بيه شوية ويوقف بقوة ماكيضرب.. يديه لي شادة يديها تجرأت وخدات خصررهاا مقربها ليه كثر... وليد لخرى رجع ليها دوك زغيبااات لي على عينيهاا تابانو عويناتها لقهوين مشفرين أو وجهها لمزنگ مع لحرارة دلبوطة وشفايفهاا لامعين بريقها.. تحدر جهتهاا وشد وجههاا بيد وتحدر بايسها فشفتها وهي غمضات عينيها ومخلية شفايفهاا يستاجبو مع شفايفو لي كاانو تيبوسو فيها بلهفة... من شفايفها نزل لعنقها تيبوس وهي لاحت لحوايح لي هازة ونسات أصلا شنو كانت باغا دير.. حسات بيه كيطلع ليها لبيجامة باش يحيدها وهي تبعد شوية ونطقات بتوثر:خصني ندووووش ح

محمد طه:(حط صباعو على شفايفها ونطق وعينو معسلين عليهاا)شووو

زول ليها لبيجامة بدون أي اعتراض تاباقات بدباردور وبان لحمها لي كااان كيف الجبينة.. نزل تيبوس كتافهاا وفنفس الوقت غادي بيها جهة النموسية تاحسات بالحافة ديالها وجلسات وهو متكي عليها تانعسهاا بالخاطر.. غرق فعنقها وماخلاش من جهدو فيه كلاه ليهااا وهي كانت غادة معاه تاتفركات الكينة وهي تنطق بصووت خافت:محمد الكينة

فعز غرقوو فيها حبساتو وهز راسو شاف فيها وهو مزير:فين هي؟

غزلان:لهيه فالمجر

جابها ليها مع لماا لي محطوط تماا شربات وغير طلقات لقرعة والسيد شدها وماعاودش طلقهااا.. هي عياات وهو تقول واش عيى فيما تقول ساليت غاانوض ندوش يجي تاني ويبدا معاااه من لول...

كلها تاتنهج وحمرااا ولحمها مع بيضاا دغيا بانو فيه طباايعوو.. جلسات وبدات تاتستر داتها بليزار لي مغطين بيه على ماتلبس باش تمشي دووش.. وهو كان متكي جنبهاا كيشوف فيها وهي مع بغات تنوض حط يدو على ليزار ونطق بصوت مبحبح: بلاااش منوو

غزلان:(شافت فيه وهي حشمانة) احم خصني نلبس باش ندوش

محمد طه:(أشار لحوايجها لي مشتتين فالأرض) هاحوايحك لبسيهوم (بغات تنوض وهو يحبسها) ماتغطااايش سيري هاكاك ولبسيهووم

من صغرها مولفة النقاا وماعزيزش عليها لوسخ والعفن.. غير طلعات لبيتها مشات لحمام غسلات يديداتها وخرجات غادة لدريسينغ فين مستفين حوايحها لي أغلبيتهوم مالابساهومش وباقي بالتيكي... وقفات فوق الكريسي لي دايرين ليها تماا وبشوية عليها خدات بيجامة ومشات زولات حوايج دبرا حطاتهوم فالسلة ولبسات بيجامتها مع تقيشرتت جداد.. مولفة ليها رحيل تبدل لراسها وتقضي أمورها لراسها باش تعتامد على نفسهاا.. طلع ليها نوح شكارة لبيت وغير شافها لابسة حوايجها وهو يتبسم وتحدر باسها فجبهتها:يالاه ابابا نزلي تاكلي وملي تسااالي نجي ندير معاك التمارين ديالك واخاا

حركات راسها ونزلات لتحت لقات السعدية حطات لگوتي ورحمة تاتشرب قهوتها هي وسناء وزاينة تاهي كاينة تم.. كلات وغير سالات مشات دير لي قال ليهاا.. مشات عندو لجناح وحلات لباب بلامادق وغير وصلات لبيت نعاس لقات لباب مسدود بالساروت..

سيدرا:(تاتحرك فلبواني)مااي بلو آيييز

تحل لباب وهزات عينيها فنوح لي كان مبدل عليه بحوايح الدار مريحة...

نوح:(هز حجبانو بجدية) شنو قلنا داك النهار على الباب؟؟

سيدرا:(بدات تاتحك يديداتها مع بعض) نبقا ندقو لباب ؟

نوح:ونتي شنو درتي؟

سيدرا:(حركات راسها)مادقيتوش (قربات جهتها وحلات يديها باش يهزها)سمحليا ماي بلو آيز

نوح:(تحدر هزها وباسها فحنكها وبجدية) اخررر مرة تعاود ولالمرة الجايا ندير ليك بينيسيون "عقوبة"

داها لبيتها وفالبيرو الصغير لي داير ليها جلسو وبدا تيحفضها داكشي لي كان ساااهل وتاهي راسها خفيف دغيا تاتشد.. سالى معاها وخلاها تفرج ونزل لتحت باش يشوف شي خدمة تبعاه يساليها وهي بقات مكسلة فوق النموسية تتاكل فالمسيكة لي لقات تما مخبياها فالمجر..

عند زين العابدين لي تاهو بدل عليه وراجع دروسو وغير سالى شاف فساعتو كان قرب وقت لعشااء باش يتحط.. حل لباب ونزل لتحت ومن زهرو لعوج كان أول واحد ينزل.. جلس فالصالة وحاس براسو عياان باغي غير ينعس وكون معارفش باه مغايخليهش ينعس بلاعشا كون دارها.. قاد لمخدة وتكى عليها لايح عينيه فالتلفازة وماحس براسو وقتااس غمض عينيه ونعس...

عيات من التفرااج وقررات تنزل لتحت كانت هابطة ببيجامتها وديك البانطوفة لغوزة وشعرها باقي جامعاه ضفيرة.. دخلات لصالة وبان ليها زين العابدين مكسل بديك الكسدة ديالو فوق السداري.. بدات تاضور عينيها كيف القطة وبلاحس تمشات تاوقفات حداه ولقاتو نااعس.. كمشات فيه حجبانها وفيما تشوفو تفكر الدقة لي منساتهاش ليه.. بدات تاتمضغ فمسكتها وشوية طاحت فبالها خطة جهنمية خدات ديك لمسكة وضارت تاتشوف وراها ياكما جا شي حد وغير لقات الدنيا خاوية وهي تلصقها ليه فشعرو لقدامي لي تيلوحو فوق جبهتو بشوية بلامادير الحس ولاتفيقو..لصقاتها نيت وغير سالات وهي تمشي تاتجري قبل مايفيق ليها...

غادة تاتجري جهة الكوزينة بالزربة هاربة منو تاحسات براسها تضربات مع شي حد فرجليه وهي ترجع بلور كانت غاطيح على قزيبتها غير شدات راسها فأخر لحظة وشعرها تشعكك والضفيرة تحلات تقولي كانت تتحارب بيها.. طلعات راسها بلعرض لبطيء جهة الشخص لي تضربات معاه وهي تلقاه اليازيد لي كان جااي باغي يشوف سناء ونيت يهضر مع نوح..

سيدرا:(نطقات وهي تاترجع زغيبات شعرها بيدياتها) هااء الشاارف جيتي ؟

بقا تيشوف فيها والضحكة جاتو فاش سمعها اش قالت وديك لكلمة ماتفكرو غير فسناء..

اليازيد:(جلس قفازي وشدها من يديها جارها لعندو وقال بضحكة) اه جيت (جر نيفها) سميتك سيدرا ياك؟

سيدرا:(حركات راسها باه) سيدرا التجاني

اليازيد:(ضحك)ههه متشرفين أنا اليازيد

سيدرا:(حركات راسها) قالها ليا ماي بلو آيز ديك النهاريات

اليازيد:اوا علاش تتقولي ليا شارف؟

سيدرا:(مدات يديه وقاست لحيتو)حيت شعرك بيض هنا بحال بّاديدي

اليازيد:هي بّاك ديديك شارف

سيدرا:(حركات راسها بانزعاج)تت بّاديدي الأسمراني تاع قلبي مشارفش هو

اليازيد:همم وراه تاماي بلو آيز ديالك راه عندو الشييب

سيدرا:(حركات كتيفاتها) هو زويون بزاف وتاعينيه زوينين وماي بلو آيز حبيبي ديالي

جابت ليه الضحك بكلامهاا لي جاه على گانتو.. ولي ضحكو هوما أجوبتها لي دغيا كاتلقاهوم..

سيدرا:فين عروستك نتا؟

سؤالها خلاه يجمع الضحكة وديك الشمتة لي كان قال راه بدا ينساها رجعات وهنا ضربها بسكتة وسيدرا واقفة تاتشوف فيه وهي تاتسناه يجاوبها حيت عقلها صغير معرفاش اش واقع.. صوت الطالون هو لي خلاه يفيق من داك الأفكار وداك لغضب لي رجع حس بيه من ديك الفعلة لي دار معاه صاحبو أو نقولو لي كان صاحبو بحكم من داك النهار قطع معاه العلاقة من الجدر...

شاف فسناء لي كانت جايا كيف عادتها مأنتكة واخا غير فدار ضروري ماتقاد وتاطالون مكتفرقوش تقول فاطمينها عليه.. قربات جهتهوم فلوقت لي هو قاد وقفتو كيشوف فيها بتبسيمة وعينيه غارقين فيها نييت.. دغيا نسى الشمتة والعصبية لي تعصب فاش شافها وتفكر بلي كون ماوقعش هاد لبلان مكانش دابا واقف هاد لوقفة ومبتاسم ليهاا كيف هي مبتاسمة ليه.. كون راه كل واحد باقي هاز شوكتو على لاخر وهو كون تزوج بمريم كون راه دابا عايش فصداع ومغايرتاحش معاهاا وفالأخير الخير فيما اختاره الله ولواحد معارفش ربي اش مخبي ليه..

سناء:(قربات جهتو وقالت بتبسيمة)شنو كاديرو هنا؟

اليازيد:كنت غير تانتعرف على لالة سيدرا التجاني

سيدرا:(ببرائة)سميتي غير سيدرا التجاني ماشي لالة سيدرا التجاني

اليازيد:(ضحك بالجهد) والله تاهاد البنت نمرة مايمكنش هضرتها شحال حلوة (تحدر جمع ليها لحنااك ببوسة مجهدة)

سناء:(ربعات يديها وقالت)اممم هي تبوسها وأناا بايتة معاك

اليازيد:(غمزهاا)وماكرهتش كون كنتي بصح بايتة

سناء:بااااز والله

اليازيد:نتي بوستك غيير (غمزها)

سناء:اوا زيد دخل لداخل ماتبقاش واقف هنا

اليازيد:ولد لحاج كاين ؟

سناء:وي كاين غالبا مغاتلقاه فالبيرو ديالو

وصلات عليهوم رحمة لي نزلات وسلمات على اليازيد ودخلو لصالة وسيدرا راه غادة جنبهوم وبعيون الببوشة تاطل على زين العابدين لي باقي ناعس فبلاصتو كما لقاتو وخلاتو.. قربات جهتو رحمة باش تفيقو ومع حطات يديها على راسو بان ليها شعرو معلك كمشات حجبانها وتحدرات جهتو تاتعيط ليه وتشوف اش داكشي لي فشعرو وهو غير فاق وحس بيها تاتقيس شعرو وهو يبعد راسو.. مكايحملش لي يقيسو فشعروو من غير باه فقط هو لي مسموح ليه.. ناض تايحك عينيه وسمع رحمة قالت:شعرك شنو فيه اولدي

مد يديه تايقيس ولقى داكشي معلك تاهو وناض بزربة غادي لحمام.. مع دخل لحمام قرب جهة المرايا تايقلب فشعرو وبان ليه فيه لمسكة.. تايزيد يقلب كازر على سنيه وبعصبية ضرب لافابو تاسمعو تزعزع وتقول واش تقصح.. حل لباب ومع غايخرج تلقى بنوح لي شاف فيه وبالضبط شعرو وقال بتساؤل:مالك؟؟

وقف زين العابدين وشاف فنوح لي مد يديه وقاس شعرو وبجدية نطق:اش هادشي كيفاش وصلات لمسكة لشعرك؟؟

زين العابدين:(كرز على سنيه وقال بنبرة مبحوحة) راه باين شكون

نوح:(فهم كلامو وقال بجدية) اجي معايا

داه لبيرو وجلسو فوق الكرسي وخدا المقص حيد ليه ديك لمسكة والشعر فاش كانت شادة وبقا شعرو هاكا ديگرادي معيق..

نوح:سير عند لحسان يقاد ليك التحسينة

ناض زين العابدين ومعاودش لهضرة مشى ونوح تاهو مشى لصالة ودخل بانت ليه سيدرا جالسة حدا اليازيد..

نوح:(بهدوء)سيدرا اجي ابابا

ناضت عندو بهدوء تاشد يديها وخرجو لجهة لجلسة لي بالقصب.. جلس وجلسها فوق حجرو وقال بهدوء: واش نتي لي درتي لزين العابدين لمسكة فشعرو؟

سيدرا:(شافت فيه بعويناتها لمبطنة وقالت ببرائة) هو ضربني هنا (أشارت لنيفها) وأنا درت ليه مسكة فشعرو ماي بلو آيز...

هادشي لي كان نوح خايف منو ومباغيش يكون حساسية بين سيدرا وزين العابدين.. حيت المشكيل أنهوم غايبقاو عايشين مع بعضياتهوم ولابد ماخص لعلاقة تقاد وكل واحد فيهوم يتقبل الآخر ولانقولو يخلي ولدو يتقبل سيدرا أما هي عارفهاا متقبلاه ولكن ولدو عارفو كيف داير.. صراحتها من ديما تاتعجبو واخا باقي صغيرة مكتكدبش ولي كاين تقولو وهادشي عاجبو كيف تازين العابدين عندو نفس الخصلة.. ولي عاحبو كثر هو أنه ماسمحاتش فدقتها وفداتها فيه..

نوح:(تنهد) هادشي مانبغيهش يوقع مرة خرا لادار ليك زين العابدين شي حاجة اجي عندي قوليها ليا (كرر كلامو بصيغة خرا)شنو قلت عاد دابا؟

سيدرا:(دلات شنيفاتها) ولكن هو متايحملنيش ماي بلو آيز وديما تيغوت عليا ومكيلعبش معايا

نوح:(مشط شعرها بيدو وقال بحنية) هو كيحملك ونتي عزيزة عليه ومكيلعبش معاك حيت هو كبير

سيدرا:(ببرائة)وعلاش هو كيبقا يدير هاكا(كمشات حجبانها تتقلد زين العابدين) ديما

هنا نوح ضحك تاتهزو كتافو فاش قلدات ليه زين كيف تايدير.. تبسمات تاسيدرا لي عجبها لحال..

نوح:(باسها فجبهتها وقال بجدية) اخر مرة تعاودي بحال هاد التصرف تافقناا

سيدرا:صافي واخا ماي بلو آيز

هزها وناض غادي لصالة فين مجمعين لخرين وجلس مجمع معاهوم تابان ليه زين العابدين رجع.. شافو فيه كاملين وفالتحسينة لي دار ولي جاتو خطيرة مبينة ملامح وجهو لحااادة.. حجبانو لقهوين لي كان عااقدهوم وعينو لي مفيكسين فسيدرا لي جالسة جنب نوح مخشية فيه وجامعة شنافتها تاتشوف فيه تاهي...

سناء:بصحة جاااتك التحسينة ناضية

رحمة:ترتاح شوية من داااك التغوفيل اولدي

مجاوب تاوحدة فيهوم جلس بلاصتو وكان باين فيه محاملش راسو وتانوح عاق بيه.. تحط لعشا وكلاو جميع وموراها ناض نوح وعيط لسيدرا وزين العابدين ومشى لبيرو.. دخل وجلسهوم فالكراسى لي قدامو مقابلين مع بعض وهو جلس فبلاصتو..

نوح:(شاف فزين العابدين وقال بصوت جدي ونبرة صارمة) تصرف لي درتي داك لمرة باقي مانسيتو ليك واخا تعاقبتي عليه حيت تصرف غااالط وماخصوش يكوون ومانبغيهش يعاود يتكرر مرة خرى عصباتك سير بدل الساعة بخرى ولانزل لصااال هنا وكب جنونك فالسپور لمهم يدك ماتحطش عليها سمعتيني

حرك زين العابدين راسو باه ونوح معاودش هضر معاه حيت عارفو تعلم من التصرف ومغايعاودهاش ولكن ضروري ماخص تكون واحد قرصة أدن..

نوح:(ضار شاف فسيدرا لي كانت مركنة بلاصتهاا وقال بنفس الجدية والصرامة) سيدرا (شافت فيه وكمل) هاد لهضرة ليك تانتي مانبغيش ديري شي حاجة بحال هادي لي درتي قبيلة اخر مرة واضح كلامي

حركات راسها بزربة وهي خايفة من تسيفتو حيت مكانش تيضحك بلعكس كاان قااصح معاهوم باش هوما يتعلمو وباش ميعاودوش نفس الغلط وكل مرة ينوضو الريگاطة بناتهوم.. مرة هو عاطبها مرة هي رادة دقتها ولعكس صحيح.. خص يكون واحد السلام بناتهوم والرااحة بااش كل واحد فيهوم مايلقاش مشكيل من هنا لقدام ونوح براسو مباغيش المشاكيل ديالهوم تأثر على جو الأسرة لي هوما عايشين فيه.. الأسرة لي غاتكبر بقدوم توأم ديالو وإن شاء الله وليدات خرين وباش هوما يعيشو مرتاحين مخاصش زين العابدين وسيدرا يبقاو على خلاف باش ميتأثروش تاخوتهوم وهوما بنفسهوم...

نوح:(شاف فيهوم بزوج وقناع الجدية والصرامة باقي مرسوم على وجهو) يالاه طلبو السماحة من بعضياتكوم

رجع ضهرو لور وجلس براحة وعينو عليهوم تايشوف فيهوم..

ضار زين العابدين لعند سيدرا لي كانت تاتشوف فيه جامعة شنوفتها مقلقة ونطق بصوت هادئ:سمحيليا

سيدرا:(ببرائة)سمحليا

نوح:يالاه نوضو سلمو على بعضياتكوم

ناضو بزوح وزين راه محاملش هادشي لي تايدير مي بزز عليه.. وقف قدامها وبانت قدامو كيف لمشة مد يديه وتاهي مدات يديها وتسالمو عاد جاهوم لفرج فااش قال ليهوم نوح يمشيو لبيوتة ديالهوم باش ينعسو حيت غدا قااريين بكري...

سيدرا:(شافت فيه)ماي بلو آيز نيني حداك

نوح:سيري لبيتك غسلي سنانك وتخشااي فبلاصتك أنا جاي

غير سدو لباب وهو يرجع راسو لور حااس بيه غايتشق بقوة الصدااع وقلة النعااس.. مغمض عينيه مستمتع بداك لكالم لي كان محتاج ليه..مدة عاد حل عينيه وتقاد فبلاصتو وشعل لبيسي ومع خدم بانت فيه تصويرة درحيل لي كانت خداتها فليلة لحناا ديالهاا بقفطانها لبيض وشعرها لي طالقاه وزينتها لي مخلياهاا تبان عروسة أنيقة.. ولي زاد خلى الصورة تحلى هي تبسيمة لي مرسومة على شفايفها.. كان ساهي فدوك تفاصيل لي حافضهوم عن ضهر قلب تااسمع لباب تحل ودخل اليازيد لي قاطع عليه الخلوة ديالو مع صورة الفتنة..

نوح:(ببرود)داك لباب دار باش دق فيه قبل مادخل

اليازيد:(ضحك) اهانية اولد لحاج راك غير بوحدك

نوح:(رجع بضهرو لور) لمرة الجايا نطرقو وشوف فين دخل

اليازيد:اودي عارفني محتاجك وخصك تسمعني بااش تعاوني

نوح:اش تم؟؟

اليازيد:(تنهد بقلة حيلة)الواليدة مبغانيش نرجع نتزوح بسنااء..

🔙🔙

لأول مرة وبعد سبع سنين دازت من حياتو يحس اليازيد بالرااحة.. داك النهار كان أسعد نهار بالنسبة ليه ولي مامخليهش يسخى بيه... ملي وصلها قدام الريااض ماسخااش يخليها وتاهي بانت بلي مسخاتش بيه ومكرهش فديك اللحظة أنه يديها معاه لدارو ويسد عليها تم ويشبع منهاا ساعة الله غالب وكيف صبر هاد السنين يصبر مزاال.. نزلات سناء وهو عينو عليها تابانت ليه وصلات حدا لباب وهي توقف وضارت دارت ليه باي باي ودخلات وهو يالاه تحرك من تم غادي لدارو وطالق الموسيقى مزك.. وكل مرة يتبسم بحال شي واحد هبيل.. وصل لدار ودخل ومع مشى لحال باه ومو عارفهوم غايكونو نعسو.. صونى على سناء وفاش مجاوباتوش تخلع وسحاب ليه راه تنادم معاها لحال...بقا كيصوني تامل وحطو غادي يدوش وعقلو مشطون عليها.. ماهداش ليه لبال تاهضر معاها وعرف اش كاين عاد ارتااح نسبياً.. وعقلو رجع كيفكر فمو كيفااش غاتكون ردة فعلها ملي تعرف بلي هو وسناء رجعو.. داكشي لي عاودات ليه سناء على مو مغاينكرش بلي معجبووش نهائيا ااه عارفهاا كيف دايرة ولكن مكانش تيظن غادير داك التصرفات معاها.. بقا فيه لحاال على معاودات ليه سناء وداكشي لي دازت منو تاهي.. ولكن هادشي مكيهمش لي كيهم دابا هوما غايرجعو وهادشي لي مفرحوو ومخليه يرتاااح..

دوز ديك الليلة وعقلو كيرسم ليه فمخيلتو راسو هو وياها فدار وحدة وبلي دارو وليدات وعايشين بخير.. فاق نااشط وصابح مبكر دار روتينو الصبااحي وخرج يجيب لفطور.. قاد كلشي واخا مو كاينة ولكن مع كبيرة مكتشقاش بزاااف.. بان ليه باه وهي خارجين جااين يفطرو وهو يتبسم وفمو كياكلو باغي يلوح ليهوم لخبار ساعة شد لجام لسانو وجلسو فطرو وطامو فيما تهز يديها تسمع داك صوت ديال تستيفة دبالج دهب.. واخا فدار تاديرهوم.. فطرو وجات السيدة لي تادير لميناح وتنقي الدار خلاوها مع طامو لي تاتقول ليها اش دير لغدا وشنو تجمع وشنو تقااد واليازيد كل مرة يشوف فالساعة يتسناها تجي.. مدة عاد جاه الفرج وبانت ليه جايا تاتبطرق بديك المشية كيف شي بطريق.. جلسات جنب باه لي متفرج فااتلفازة ماعلابالوش

اليازيد:(بدون مقدمات قال) أنا وسناء رجعنا لبعضياتنا

سكت باه الحس دالتلفازة وشاف فولدو ومو حلات عينيها على جهدهوم تاتشوف فيه مصدومة..

باه:اش تتگول اولدي؟؟

اليازيد:كيف سمعتي الواليد أنا وسناء صفينا الخواطر وقررنا نعطيو لراسنا فرصة خرى

طامو:(تفرگعات عليه بحال لبوطة) كيفااش صفينا الخواطر ويمتا اولد كرشي درتيها ومفخباااريش هااا

اليازيد:لبارح الواليدة

طامو:(قطعاتو) اييه سبع سنين ونتا تابعهاا بحااال لكلب وعمرها داتها فيك ونتا تهتهت بيها بحااال لمسحوور وتگول لياا صفينا لخواااطر اشمن خواطر كيتصفااو فنهاار ادووووي

اليازيد:(بانفعال)لواليدة أناا عارف اش كااين والسيدة باغي نرجع ليها عمري نسيتها أصلا حيت ديك السيدة معششة ليا هناا (ضرب صدرو جهة قلبو)

طامو:(خرجات فيه عينيها) ملي كنتي نتاا باغي ترجعها هي جالسة تكبر عليك وكاانت غاتزوج ونتاا واخا عرفتيها بااعتك بالرخيص بقيتي شاااد فيهاا علاااش مالها هي لي مرا فالدنياا هااا البنااات عطاهوم الله الزينة على ختهاا نتااا غير شير وأنا نجيبها ليك عزية مقاصتها يد مشافتها عين

اليازيد:(ناض من بلاصتو وقال بعصبية)اشمن يد ولاعين وااااش شاري سلعة أنااا يهديك الله الواليدة أنااا مباغي لاعزبة لابگرة أنا باغي سناااء ومنها نخلااااق

باه:(شاف فمرتو)يهديك الله اطامو اش هاد لهضرة تگولي لولد باغي يرجع لمرتو الله يعاونو مغايلقى ماحسن منها بنت عمو ومن دمو

طامو:(ضارت فراجلها)اسيدي بعد من دمك لايطليك اااش درنااا ملي تزوجوو لا ولاد جابتهوم ليه لازواااج سگدااتو معاه

اليازيد:داكشي بيني وبينها نتوما معارفينش اش طااري بيناتناا راه أناا غلطت معاااه ولي دارتو نستاااهلو

طامو:(ضربات فوق فخادها وقالت وهي تاتغدد) اويلي اغدااايدي لولد باغي يخرج لياا عقلي اسمع نگول ليك قدام بااااك راه هاديك هي لي ماتكووونش عروستي سمعي مبغيتهاااشااي سمعتي الابغيتي نسخط عليك جيبهاا لدااار وتزوجهاا

باه:لاحول ولاقوة الا بالله العلي العظيم يهديك الله اهاد لمرة

طامو:(بحدة)لي عندي گلتو ديك خيتي هي لي ماترجعش معااه ومادخلشاااي لداري

اليازيد:(بعناد) اوا منها نخلاااق سنااء هي لي غاتكون لي مراا والامكااانتش مغاتكون تاوحدة

بدات تاتضرب فخادها تاتغدد باغا تسطى من الخبار لي سمعاااات.. ضارت جهة راجلها لي كان ساكت وخرجات فيه عصبيتها:ساكت وعاجبك لحاال ياك مادويش مع ولدك وتنصحو

باه:ولدي راه راجل كبير مايحتاجش ندوي هو عارف مصلاحتو

طامو:(تفقصات وشافت فاليازيد لي واقف وقالت بعصبية)لا لا هاااد قصووحية الراس معجبانيشاااي (خرجات عينيها) اجي ياك ماتكوون ساحرة ليك..

أغلبية الناس فاش تيشوفو المرا وراجلها مفاهمين وكيبغيها ويحماق عليها تيقولو ليك راه ساحرة ليه...راه السيد ماشي نوغمال وهي دارت وفعلات ليه... بلامايشوفو شنو تيوقع بيناتهوم وديك لمرا علاااش راجلها كيبغيها...راه ماشي ضروري كلشي بالسحور والشعودة وتعصي ربك على قبل واحد.. راه لمرا لي دكية تاتعرف كيفاش تخلي الراجل يبغيها ويحماق عليها..تتعرف ساروتو واخا يكون الراجل كيفما بغا يكون ... حيت المرا هي ليكاتعرف تشدو ليها بالتحلوين وتاتعرف النقط الضعف ديالو وكاتبقا تلعب عليهوم...تتبقا تخدم عقلها وجميع الأساليب باش تخليه ليها وهوما مكيشوفوش هادشي.. بحال طامو لي من نهار ولدها قرر يتزوج بسناء وهي تاتشوفو مبدل عليها ومبدل على كيف كاان..وخلاص فاش طلقو وبقا مُصر باش يرجعها وبقا تابعها دوك السنين كلها هناك استغرباات ومبغاتش ولانقولو مرضاتش تشوف ولدها وهو تابع مراا حيت هاداك ولدها وكون اختلافات الأدوار وكانت بنتها لي تابعها راجلها غايعجبها لحااال...وهناا غانرجعو لتفكير ديالها لقديم لي تيهمش المرا ولي مكيعطيهاش قيمة...

كلامها لي قالت فاش سمعو اليازيد زاد تعصب كثر مكان معصب... مفاهمش هاد التفكير لي عند مو ولي مخالف تماما لتفكيرو...

اليازيد:(بانفعال) وااااش من نيتك الواليدة اشمن سحور ولازمر واااش هي مسالية ليا باش تسحرررني تانتي الله يهديك

طامو:(خرجات عينيها تتجابه معاه) ومالهاا ماديرهاااش حگرتيهاا هاديك أنا لي عارفاااه راه لفعة تاضرب بسمها غير من تحت لتحت ونتا كيف لهبيل باغي ترجعهاا على زيناتهاا لاولاد دارتهوم ليك لادااار حافضات عليهااا هاهي غير دايعة فدار ختها ومخلية دار باااها بلعواام يعلم الله اش تادير هنااا

اليازيد:(كولو تايترعد من هضرتها لي شعلاتو) اااش دارت ليك تامابقيتي تحملي فيها الشعرة باااش أداتك وااش هي ديما موقراك وزايدون أنا عارفها اش تتسوى ومغااديش دير حاجة بحال هادي جاهلة

طامو:گالك جاهلة راه جهل هو لي فيك نتا لي تابعها لياا ومباغيش تفرق عليهاا اااش عطااااتك غااار گول ليااا اش عطاتك عااام فرتكتيها نتا وياهااا

باه:واااش نتي عارفة بين الراجل ومرتوو وادخلي سوووق راسك ياااهاد المراا ولدك راااه شيباتو طالعين وعارف اش يدير لابغاااهاا الله يسهل عليهوم ماتوقفيش فطريقهوم وتلوحي لعصااا فالروويضة

طامو:(بدات تشالي بدوك دبالج وقالت منرفزة) وتاأنا لي عندي قلتو هاديك هي لي مغاتكوونش مرتو ولابغا يتزوج بيها ينسى بلي أنا مووو

مشات طامو تاتجر فرجليها مخلية ليازيد كيشوف فياه وتايسوط معصب.. هاد المشكيل هو لي ناقصو يالاه حمد الله وشكرو حيت رجع مع سناء وغايقدرو يعوضو السنين لي دوزو بعاد على بعضهوم ودابا هاهي مو خراجات ليه من الجنب اوقفات ليه فطريقو هو وسناء... تنهد وشاف فبااه لي حرك ليه راسو بلاحول عاد خرج من دار وهو زعفااان وطالع ليه الدم..

🔜🔜

كان تيعاود وكل مرة يتنهد فيما يتفكر الغضبة لي دارت ليه مو وكيفااش مبقاتش تادوي معاه وهازة عليه خنافرها... فيما يجي يفتح معاها الموضوع تنوض وتخليه بوحدو كي لحمق.. زعمة باغا تخليه يزول لفكرة لي فدماغو ملي يشوفها مقلقة منو وهي معرفاش بلي واخا يحطو على رقبتوو مووس مغايفرقهااش...عارف بلي هي غاتبقا دير هاكا وتاباه ماعندو كيف يدير ليها حيت هي لاقالت لكلمة ديرها.. ماعرف مايدير من غير يفضفض لنوح ويقول ليه شنو طاري باش يعاونو...

وفالمقابل كاان نوح متكي كيتسنط ليه وأي كلمة خرج من فمو وأي تصرف دارو وهو كيعاود ماغفلش عليه... سالى اليازيد وشاف فنووح بديك الشوفة ديال عطيني رأيك وعاوني..

نوح:(تكى على لبيرو وجمع يديه فوق الطابل وعينو على ليازيد وبكل هدوء وتقالة نطق) هادشي لي طاري كنتي تعول عليه حيت نهار تزوجتو نتا وياها راه تالعائلات بزوج تجمعو ماشي غير نتا وسناء وأي مشكيل راه كيأتر عليكوم كاملين وتالعائلة تادخل...نهار وقع لخصام بناتكوم راه العائلة كلها دخلات ولخبار فراسك...مك مشكيلتها أنها شافت شنو طرا معاك ومبغاتش يتكرر الأمر مرة خرى داكشي علاش واقفة ليكوم فطريقكوم

اليازيد:وشنو لحل راه عاودت ليك كلشي تانبغي ندوي معاها تاتنوض تخليني عييت معاها وتالواليد مبغاتش تسمع ليه

نوح:(بجدية) دابا نتا باغي ترجعها يااك (حرك ليازيد راسو باه) اوا هنااا فين خصك تبين ليهوم بلي نتا باغيها دير لحل لراسك واعتابر هادا أول مشكيل لي غاتواجهوه بزوج فبدايتكوم الجديدة...

كلام نوح كان واضح وباين بزااف ليازيد لي فهم اش قصد ليه.. هوما بصح اتفارقو سنين ولكن اكتاب ليهوم يرجعو مع بعضياتهوم واخا كاين عائق وهو خصو يزول داك لعائق بنفسو ماشي شي حد لي يزولو ليه.. ومنها يبين ليهوم بلي الاختيار دالرجووع هو راضي عليه مية فالمية ..كملو كلامهوم فمواضيع أخرى عاد ناض اليازيد غادي لدار ونوح طلع لبيت سيدرا لي كانت باقي كاتسناه واخا ميتة بالنعاااس..

نوح:(تبسم ليها بحنية) تاتبيرت إينو باقي مانعستيش؟

سيدرا:(تاتفوه) فيا نعااس ماي بلو آيز

نوح:تعطلت عليك ابابا (تكى جنبها وهي تخشات فيه ونطقات بصوت نعسان) بغيت نهضر مع مامي

جبد تلفونو وشاف فساعتو عاد دوز لخط لرحيل لي كانت يالاه تعشات تاهي وطلعات لبيتها تنعس وترتاح مور مامشات أسماء هي وإسلام.. هزات تلفون وغير شافت نمرتو وهي تسووط بالجهد ومع أكسبتات لابيل وكانت ناوي تبدا تاني تسمع صوت سيدرا فمسامعها وهي تاتهضر بحماس: مامي نينيتي

رحيل:(نطقات بحنية) مامي ديالي مشيتي ليوم وخليتيني بوحدي

سيدرا:(ببرائة)لا مامي ياك عندك مومويات فكريشة نتي ماشي بوحديتك

رحيل:واخا معايا خص تاختهوم تكون (تنهدات) تعشيتي؟؟

سيدرا:اه مامي دابا انيني مع ماي بلو آيز

رحيل:(ميقات) اممم ماتعطليش بزااف باش تفيقي غدا بكري واخاا

سيدرا:واخا مامي تيمنسيوين "تصبحي على خير " هاكي ماي بلو آيز

مع قالتها ليها قطعات رحيل لابيل وخلات نوح شاد تلفونو كيشوف فيه وضحكة دلفقصة شاداه...

نعسات سيدرا فور ماحطات راسها على صدر نوح لي بقا يطبطب عليها بحنية وبالو خدام كيف ديما... ملي تأكد بلي نعاسهاا تقال ناض وقادها فبلاصتهاا مغطيها وخرج غادي يرتااح حيت عيى... خدا دوش أول حاجة ولبس عليه حوايج النعاس مريحين... قرب جهة النموسية وتخشى بلاصتو وتنهد ملي بانت ليه بلاصتها خاوية... ولفها لدرجة كبيرة وهاد الأيام لقلال لي دازو وهي فدار باها حس بيهوم تقاال وماليهوم مدااق... مولف ملي يجي من لخدمة يلقاها تاتسناه.. وفوقت النعاس تكون جنبو معنقها وخاشيهاا فيه يشم ريحتها وينغس فوق شعرها لي تيجيب ليه التمام... أول مرة شافها بلادرة فنهار العيد صورتها ترسمات فداكرتو وماقدرش ينساهاا نهائيا... كان أصلا مسلوب بيها وملي زاد شافها تسلب كثر.. ساط النفس بالجهد ووفبالو كيسول واش غادي يقدر يصبر على هاد الجفاا تاتولد ولا لا؟؟جر مخدتها لي مبدلش ليها لغطاا من اخر نهار نعسات عليها وعنق ديك لمخدة لي ريحتها باقا فيها وغمض عينيه ينعس...

----

أصبحنا وأصبح الملك لله... حلات رحيل عويناتها وهي شابعة النعاس...دارت روتينها الصباحي وصلات ولبسات عليها حوايجهاا دلخروج.. هزات صاكها ولكونطاكط ديالها ونزلات لتحت وغير شافتها تانيرت وهي تهز حجبانها بتساؤل:صباح الخير ابنتي شفتك بكرتي؟؟

رحيل:(جلسات تاتسترح) صباح النور غانمشي لمحال ملي تحل عمري مشيت ليه وراك عارفة ضروري مانشوف الخدمة تم ولي خدامين معايا تاهوما مكنعرفهومش

تانيرت:اييه عارفين ولكن راه خصك ترتاحي اماما

رحيل:راني مرتاحة وشبعت نعاااس ليوم وفيا واحد لنرجي خطيرررة

تانيرت:اوا الله يخليك ديما هاكا اماما

فطرو بزوجات مجمعين وغير سالات ودعاتها وناضت غادة لمحاال بطونوبيلتها...طلقات موسيقى وبقات تاتمزك وتغني معاهاا وباين فيها ناشطة ومرتاحة...وصلات لمحال وبلاصات طوموبيلتها بعيد حيت لقات السطاسيون تما عامر.. لقات سكوريتي لي حدر راسو وهو كيرد عليها السلام ودخلات لمحال لي كانو فيه بعض لكليانات...عويناتها تبسمو وهي كاتشوف فالسيدة لي كانت تاتقلب فالكساوي لي خيطات وتاتسول على لطاي ولون...لقات السلام على غزلان لي كانت ليوم خدامة...

غزلان:هيلوو صافا

رحيل:حمدلله أمدرا كيف غاديية لخدمة؟

غزلان:مزيان درنا كلياناات فهاد الأيام لقليلة

رحيل:مزيان غانطلع لفوق واخا

مشات رحيل طالعة لفوق والبنات لي خدامين عندها حاضينها مع شافوها مرة وحدة معارفينش هي كيفاش دايرة فتعامل ديالها...

دخلات رحيل لبيروها لي بلمسة أنثوية فيه كلشي لي تحتاج وبلاصة تافين تجلس وتنعس لاعياات...فكر ليها فكلشي وماخلاش تاحاجة تخصها.. جلسات فكرسيها المريح وهي مبتاسمة تاتشوف فلبيسي وديك لامبخيمونت أو أقلام الرسم ولوراق دالرسم.. جبدات ورقة وزولات فولارها وقررات ترسم شي ستيل تاني جديد غير من عقلها...بقات مدة كاتفنن تاجابت ليها غزلان عصير وخلاتها تكمل وهي سرحاات...مدة طويلة ماحسات بيها مع لبيرو كالم خلاها تنغامس فشغالها...ملي لقات وقت لغدا فاات قررات تنوض تغدى حيت خصها تشرب دوا وزيد فيها السخفة دالجووع.. ناضت خارجة من لمحال مور ماخلات غزلان تما ومشات فاتجاه طوموبيلتهاا لي كانت فالصف لاخر...قطعات الشاانطي ومع وصلات لجهة طوموبيلتها وتحدرات تجبد لكونطاكط تسمع صوت لموطور مجهد وشي يد جرات ليها الصاك بالجهد على غفلة منهاا خلاتها ترجع لقدام بالجهد وكردة فعل تلقائية حطات يديها على كرشها وغوتات بالجهد...

مكانتش عارفة اش طاري حدها سمعات صوت لموطور وحسات بشي حد جر ليها صاكها وحيت مكانتش شادة التوازن وداك الجهد باش تجرات هي رجعات لقدام وكردة فعل تلقائية حطات يديها على كرشها وقبل ماتخبط مع الأرض حسات بجسد ضخم حاوطها من لور ويدين ضارو على خصرها شادينها بالجهد... كلشي داز بزربة وهي مقدراتش تستوعب تاشكون معنقها حيت عقلها فديك الساعة غير مع داكشي لي فكرشها... الجوقة تجمعات وكلشي وقف تيتفرج مول لموطور وصاحبو لي راكب وراه علقو دايين معاهوم الصاك لي نصو تزلع فالأرض.. ومن زهرها تلفونها دارتو فجيب جاكيط...

نوح:(بصوت عالي وقاااصح) لي عندو شي محاااال يتحرك ليه ماعنديش الحلقة هنااا الشرررفة

كلشي تشتت وهو راه حجبانو عاقدهوم وباين فيه معصب.. كان باقي شادها حيت رمات عليه تقلهاا وهي بقوة الخلعة جاتها السخفة.. سندها عليه وتمشى جهة طوموبيلتو لي كانت تم حلها وعاونها تاجلسات فالقدام داير ليها سانتوغ وعينو تايشوفو فوجهها لي كاان صفر.. مد ليها القرعة دلماا وشربات منهاا شوية والدوخة شداها مخلياهاا تولي بحال شي شرويطة.. جا السكوريتي لي جايب ليه داكشي لي تزلع ليها ونوح شد من عندو داكشي حاطو تما مامسوقش ليه حيت بالو معاها هي لي مغمضة عينيها ومرجعة راسها لور...

فالمحال كانت غزلان واقفة فلاكيس تاجات عندها واحد لبنت من لي خدامات معاهاا ونطقات بزربة:عتقو عتقوو مولات المحال تگريساااات

مجات فين تكمل هضرتها كانت غزلان طارت من جنبها غادة تشوف اش واقع... بانت ليها طوموبيل نوح وهو واقف عاطي ليها بضهرو وقطعات الشانطي تاتجري تاوصلات جهتهوم وقالت بسرعة ولهفة:رحيل واش نتي بخير؟

ضار نوح جهتها وغير شافها نطق بجدية:سيري جيبي ليها كاس دلما فيه السكاار..

حركات غزلان راسها باه ومشات بزربة تجيب اش قال مع فالمحال عندهوم بلاصة فين تايتغداو لبنات.. جابت لكاس فيه لما والسكار ورجعات عندو تاتجري.. مداتو ليه وهو شدو من عندها وتحدر جهة رحيل هز ليها راسها وعطاها شربات منو شوية وغير شافها بدات توگض وهو يرجع لكاس لغزلان وركب فالطوموبيل غادي بيها لعند الطبيبة ديالها يطمن عليها.. وهوما غادين فالطريق تسمع صوتها وهي قايلة بخفووت:وقف هنااا

ضار شاف فيها لقاها شادة فمهاا باغا ترد.. حبس الطوموبيل وحلات لباب وقبل ماتنزل طلعات ليها التبويعة وردات فالأرض وهي باقي فالطوموبيل..نزل وهز قرعة وكلينيكس وجاا لجهتها كيشوف فيها هي لي محنية ترد والطوموبيل جنابها توسخ بردانها...

نوح:(مد ليها قرعة دلماا ونطق بصوت هادئ)هاكي شللي فمك

رحيل:(رجعات لور كاترد النفس وقالت بصوت خافت وباين فيها كاعية) كلشي بسباااابك

نوح:(هز حاجبو ونطق ببرود) خودي لماا شربي والاحسيتي براسك مزيان نمشيو لعند طبيبة

رحيل:(شافت فيه مخنزرة)باغا نمشي فحااالي وزايدون مباغاش نركب معاك ولانشوووف خليقتك

نوح:(باقي كيسايس معاها وعاطي الخاطر) واخا غمضي عينيك واعتاابريني مكاينش حداك

رحيل:(بسخرية) واخا نسد عيني (خنزرات فيه) ريحتك عااااطية بحال لاناااعس فصندوق لحووووت اييييف واش ماعندكووومش المااا فداركووم

مجاوبهاش حيت عارف اش طاري معاهاا داكشي باش خلاها على خاطرها وتاهي هزات لقرعة شللات فمهاا ونقات ديك البلاصة لي وسخات فطوموبيل عاد سد لباب وركب بلاصتو وهو يسمع صوتها لي قالت بجفاااء:ديني لداااارنااا

ديمارا الطوموبيل ودار ليها لخاطر ورحيل بحال لاجالسة على الجمر...

سادة نيفها وكل مرة طلع ليها ترويعة وترجعها وهاكاك كملات طريقها تاوصلات قدام باب الدار وغير حبس وهي تحل الباب ونزلات بلاماتهضرو ولاضور تشوف فيه تاشوفة.. كملات طريقها لباب دار وغير تحل لباب وهي دخل مخلياه باقي جالس فطوموبيل متبع ليها الشوفة بهدوء وتعب...

فكافي كالم كاانت جالسة سناء هي واليازيد لي شاد فيديها بحال لاخايفها تهرب ليه... جالسين فالفوطوي وخاشيهاا فيه وكل مرة يبوس راسها ويضور يشم ريحتهاا.. كانو جالسين فواحد الجو زوين كالم ومريح...

سناء:(نطقات بهدوء) شنو قالت ليك مك؟

اليازيد:(تنهد) باقي على نفس الكلام مبغاتش تهبط الرااس

سناء:(ميقات بعينيها) تت وأكيد مغاديش تبغي حيت عارفاها محاملانيش ومستحيل تخليك تعاود ترجعني واش هي عاد ماتهنات مني تبغي ترجعني ليها

اليازيد:(كمش حجبانو) هادي غير هضرة خاوية ماديريش فبالك نتي أنا غانحل الموضوع

سناء:(هزات راسها وشافت فيه) اها وشنو نديرو نبقاو نتلاقاو هاكا بحال شي مراهقين ونصبرو تامك تحن عليناا

اليازيد: سنااء راه شايفة كلشي بعينيك وااش أنا قصرت فشي حاجة راه الحلول لي بانو لي درتهوم

سناء:حطها قدام الأمر الواقع وشوف الاماقبلاتش

اليازيد:هههه من نيتك سنااء راه هاديك مي وأنا خصني نحاول معاها تااتبغي وديك الساعة راه مغانضيعوش الوقت

سناء:(تقادات فجلستها) واخا وشحااال غانصبرو ونتسنااو عام عماااين بااش الواليدة ديالك تعفينااا وطلق سراحناا

اليازيد:(كمش حجبانها)بلاطنز

سناء:مكانطنزش حيت هادشي لي كااين مك هي مغاتقبلش بياا واش ملي طلقناا أنا وياك ماخلاات ماقالت فياااا ونهار خطبات ليك تقول شدات نجمة من السماا ماقداتها فرحة وماخلات لمن قالتهاا وبدات تفووح بعروستها ودهزاتها وفيما ضور تبقا تحشي فلهضرة وفلخر تقووول غاتبغي

اليازيد:(ساط النفس) اوووف مشاكيل كنتي نتي وياها سمن على عسل اش طرى؟؟

سناء:مك تسيفااات عند بالها عدبت ليها ولدها ومرمدتو وهو تلقااايه شابع بنات فاليونااان مونس بيهوم لوقت ومزهي مخوو

اليازيد:(جرها من دراعها وقال بتبسيمة) ههه باغا تجري ليا لساااني مابيل

سناء:(شافت فيه ببرود) أنا عارفاااك غاتكون زهيتي مع رااسك تم وهنا كاتبين ليهوم بلي راك مجروح أو واكل الدق من جهتي

اليازيد:(جابت ليه الضحكة)ههه كظلميني مابيل واااش أناا عقلي كان غير معااك نتي باغي نعرف اش كاطبخي ونتي تاتقولي لياا زهيتي اشمن زهوو الله يهديك هو لي بقا ليا ديك الساااع

سنااء:(شافت فيه بجدية)اوا بناتناا داباا ملي طلقناا زعمة مادرتيش شي غولاصيون مع شي وحدة؟؟

اليازيد: وتقوول من بعدك مبقاات تاتحلى ليا تامراا

سناء:والله ماتيقتك عقلي تيقول غاتكون خلطتيهاا لهيه عليها سكنتي تم وماهبطتيش لهنا

اليازيد:لا بقيت تم حيت ماقدرتش نكون هناا فنفس البلاصة لي نتي فيهاا بلامانشوفك وتكوني معاياا داكشي علاش بعدت وزيد كون كنت باغي ندير شي حاجة مالي انخبيهاا راه غانقولها نيشاان حيت ديك الساعة كنااا مطلقين ولكن أنا قلبي وعقلي ديتيه نتي

سناء:(ضحكات)ههههه بقات لياا غير روحك نديها ههه

اليازيد:ههه وراه ديتيها تاهي على عاجبك حالتي ديك الساعة كيف كنت

سناء: عليها بغيتي تزوج ومشيتي خطبتي

اليازيد:ماخليتي ليا تاحل عييت مانبقا تابعك تاخليتيني ندير بناقص ونشوف حياتي واخا حياتي بلا بيك ماتسوى والو

سناء:المهم دابا داكشي فااات وحنا بدينا من جديد غير هو خصك دير حل مع ماماك حيت لابقينا تابعينهاا راه غانبقاو بلازواج

اليازيد:ليوم غانحاول معاهاا تاااني (باسها فجبهتهاا) كوني هانيا مابيل

رجعات حطات راسها على كتفو مكملين كلامها ومخشعين مع بعضياتهوم تاهزات سناء عينيها وهي تقشع وااحد لبنت لي كانت جالسة قدامها وفنفسها تاتقول بلي شايفاهاا فشي بلاصة ومع هزات لبنت راسها وهي تهز حجبانهاا بزوح ونطقات بصوت متسائل:هاديك واش ماشي هي لبنت لي كنتي خاااطب؟

مع قالت هضرتها عينيه مشات نيشان لبلاصة لي كانت تاتشوف فيها سناء.. وهي تباان ليه مريم جالسة فالطبلة لي قدامهوم طالقة شعرها ومن حوايجها وحالتها كاتبان راه مابيها والو.. غير شافها وهو يتفكر الشوهة لي شوهااتو مع العائلة.. بلامايشعر ناض من بلاصتو مخلي سناء كاتشوف فيه وهي هازة حاجبهاا.. أما هو تقدم جهة مريم لي كانت محنية على التلفون كاتشوف فيه شي حاجة وهو مع وقف عليها قشع الخاتم دالزواج لي فيديها..

ظلو خلاهاا تهز راسها وغير شافتو وهي تخرج عينيها وبان فيها تلبكااات.. أما اليازيد بدون استأدان جر الكرسي وجلس قدامها ونطق بصوت ساخر:مالكي تصدمتي مكنتيش دايرة فبالك غاتشوفيني هناا

مريم:(بقات غير تاتشوف وعينيها مصدومين)

اليازيد:غاتبقااي ساكتة اااه نسيت هادشي لي مولفة ديريه السكاااات (تحدر لقدام وقاال بعصبية ضاهرة فصوتو) نهار جيت ابنت النااس وسولتك واش مرتاحة علاش بقيتي ساكتة ومادويتيش علااش ماقلتيش لياا افلان راني مباغاش نتزووج وعيب وعاار علياا ابنت النااس الاكملت معاك

مريم:(بصوت خافت قالت)سمحليا أنا ماكنتش قااصدة

اليازيد:ياااك اختي ههه واااش تاضحكي علياا ولاشنوو؟؟ واش داكشي كامل لي درتيه عند بااالك غانساه بسمحلياا راه مبقااش فيا الحااال حيت هربتي وخليتيني رااه معصب على الشوهة لي شوهتيني مع الفاميلة الالة

مريم:(تنهدات)نتا معارف والو أنا راه ماكنتش باغا ندير هادشي ولكن كنت مضطرة نهار جاا خويا وعلمني بلي غايجي صاحبو يخطبني قلت ليه لاا مابغيتش ومقابلاش ولكن هو بزز عليا وماخلى ليا تاحل آخر وضربني على قبلك وديك الساعة مالقيت ماندير من غير نسكت

اليازيد:(عقد حجبانو) وملي هو دار هادشي علاش ماقلتيش لياا بيني وبينك اش كاين كنت أنا غانرفضك وبهاكا مغاتجيش منك نتي ولكن نتي سكتي تانهار الخطبة وهربتي

مريم:فاش شفت راسي غانتربط مع واحد مكانبغيهش وقلبي ماشي معاه قررت نهرب عارفة بلي واخا نبرر ونعتادر مغانقدرش نخليك تسمحليا ولكن حط راسك بلاصتي أنا كنت مخطوبة بواحد كانبغيه وكيبغيني ولكن ماكملناش حيت هو خرج من لخدمة وخويا مبقاش عاحبو وقال ليا مغانزوجكش لواحد ماخدامش عليهاا فسخنااا واخا قلبي كان معاااه هو وبقيت على تواصل معاه بلامايعرفو دارناا ونهار خطبتيني وهو عرف اقتارح عليا نهربو بزوج واخا مكنتش متقبلة لفكرة مي فاش شفت راااسي غانضيع مع واحد مكانبغيهش قررت نهرب معااااه وتكاتبناا وسكنا مع دارهوم وهو دابا راه لقى خدمة

اليازيد:(نوعا ما تفهمهاا حيت تاهو مجرب) وداركوم شنو درتي معاهوم

مريم:(بحزن) مشيت معاه بااش نطلبو منهوم السماحة ولكن خويا جرى عليناا وبابا مبغاش يشوف وجهي كان خويا غايق'تل راجلي غير ربي لطف وجراو عليا مبغاوش باقي يشوفوني لاخويا لابا أما مي وخوتاتي راه حنو فياا وراني على توااصل معاهوم..

اليازيد:كان عليك تقوليها لياا أنا غاندير ليك حل ولكن نتي درتي لي فعقلك

مريم:خفت نقولها ليك وتعلم خويا ماكنتش عارفة كيف داير ومع عرفتك صاحبو قلت غاتوصل ليه لهضرة داكشي علاش سكتت وماقلت والو خويا واحد صعيب بزاف ولاقال لهضرة خص كلشي يديرهاا تامن بّا كايتحكم فيه (تنهدات)الله يسمح ليه هو السباب دهادشي لي حنا فيه

اليازيد:مغانلومكش ولكن المرة الجايا عمرك تهربي ابنت الناس واجهي حيت لهروب راه مغاديش يفيدك لانتي ولاغيرك (تبسم بهدوء) المهم الله يسامح مغاديش نحقد عليك حيت ملي سمعت قصتك عدرتك الله يسهل عليك لانتي ولا راجلك أو واليديك حاولي معاهوم دابا يسمحو ليك راك تتبقاي بنتهوم...

قال هضرتو وخلاها جالسة والحزن خيم عليها فاش تفكرات علاقتها مع باها لي مبغاش يشوفهاا أكيد من حقو وهي مشوهة بيه وجايبة ليه الدل والعااار.. الأب لي كبرها وقراها وكساها تاولات فهاد العمر وفلخر هاهي طعناتو فضهرو ومرمدات كرامتو فالأرض...يقدر خوها غلط ولكن أبدا واش كان لهروب حل وأي بنت كانت فبلاصتها ماخصش تهرب حيت الراجل واخا يكون تيحماق عليك أونفوا تقللي من قيمتك وقيمة عائلتك قدامو غايولي يجبدها ليك فيما يوقع ليك مشكيل وباش تفادااي هاادشي عطي العز لراسك وكبري بواليديك واخا يكونو كيفما بغاو يكونو..

وصل اليازيد لبلاصة فين كان جالس هو وسناء ولقاها خاوية مافيها حد وتامن صاكها مكاينش شي لي خلاه يعرف بلي راه مشات.. خلص لكونسوماسيون وخرج تايصوني عليها ولكن مكتجاوبش..

كيف عادتو جالس فبلاصة مبعدة على لبشاار داير ليزياتو وطالق أغنية كااالم.. لايح عليه لقب دلقبية لي لابس وداير يديه فجياب القبية وعينو على الشتاا لي نازلة تاتسقي الأرض..فالجانب المقابل كانت واقفة وجدان هي وصاحبتها إلهام هاد الأخيرة لي كانت حاضياه مع جاا أونفااص معااها مانزلاتش عينيها من عليه شوية وتاكلو بشوفاتهاا..

وجدان:عيقتي اصاحبتي

إلهام:(شافت فيها ببرود) مااالكي تانتي اصاحبتي واش مانشوفش؟؟

وجدان: راه كلشي غايعيق بيك ونتي تظلي مقابلاه فالقسم تاتحنزي فيه وهنا تاهوو بزاااف

إلهام:عاجبني ونتي ماااالك شوفي الزين يااختي وديك التغوبيشة تاتجي معاااه وخلاص فااش حسن راه بااان قتااال واخاا مكيهضر مع حد وديما عاازل راسو

وجدان:هداك راه بان ليا فيه التوحد ههههه بزز باش كيهضر

إلهام:ماضحكيش ليا على حبيبي

وجدان:حبيبك خريتي لاااا هه قالت ليك حبيبي والله تاهبيلة السيد گاعما محاشيها ليها وهي تاتقول ليك حبيبي

إلهام:غايحاشيهااا ليااا وهانتي غاتشوفي

وجدان:يالاه وريني حنة يديك

إلهام:(بإصرار)عطيني من هنااا لدورة لولة الاماخليتوووش يتصاحب معايا راني ماشي إلهااام

وجدان:(مدات يديها وسلمات عليها)داكوغ تافقناا والاربحتي غانعطيك ديك لكسوة ديالي لي عجباااتك

إلهام:(سلمات عليها تاهي)مشاااات

ناضت من بلاصتها وخلات وجدان متبعة ليها الشوفة بانت ليها غادة عندو.. ركزات معااهاا مباغا تفلت تالقطة ولخرى وصلات لعند زين العابدين لي كان باقي على جلستو مع لبوز داستراحة كايتسنى غير يسالي لحصة لي عندو مور هادي باش يتحرك لاصااال حيت فهاد الشهر عندو كومباا غايلعبهاا وخصو يتريني عليها.. وقفات قدامو ونطقات بتبسيمة:زين علاش جالس هناااا

ماتحركش من بلاصتو وماهز گاع تاراسو باش يشوف فيها بحال لامكاينااش وهي فاش شافتو هاكا مدات يديها بزعامة باغا طير ليه لكيت باش يسمعها ساعة يدو سبقات وشدات يديها بالجهد فالمعصم ديالها وزير عليها ونطق بصوت باارد:ماتعاوديهاااش

نثرات يديها وهي حاسة بيها كاضرها حيت زير عليها وسرطات ريقها من تسيفتو.. بلاماتسنى عطاتو بالضهر ومشات راجعة لعند وجدان لي شافت الديكور بدون صوت... جلسات حداهاا إلهاام تاتحك المعصم ديال يديها

وجدان:شنو طرا اش قااال ليك وعلاش شد يديك

إلهام:كنت باغا نحيد ليه ليزيات ساعة شدني ااااي ضراتني يدي

وراتها لمعصم ديديها لي تصورو فيه صباعو أو وجدان قالت ببرود:من الأفضل تحيديه من بالك حيت هادا لولد باان ليا مختالف على دوك البراهش دليسي لي مولفة بيهوم

إلهام:دخل لياا لراسي وياأنا ياهووو

تسمع الجرس وناضو كل واحد لكلاص ديالو ومنهوم زين العابدين لي ناض لبس شكارتو غادي يدخل ومع قرب لدروج باش يطلع حس بشي حد دخل فيه بكتفو ومع شاف فالشخص بانو ليه زوح دراري تيقراو نيت معاه فالكلاص حااسين بجنابهووم والعياقة على لخوى.. شاف فيهوم زين العابدين بشوفة باااردة وكمل طريقو تادخلو لكلاص وكيف عادتو جلس فالطاولة ماقبل الأخيرة بوحدوو مامعاه حد.. عكس لي تايقراو معاه كل واحد جالس مع صاحبو مونسين ومجمعين بالهضرة...

جبد الدفتار وحيد ليزيات والتلفون فاش بان ليه البروف دخل..

البروف:كنت عطيتكوم واحد التمرين تخدموه حطو دفاتركوم ندوز نشوفهوم

بدا تايضور عليهوم تاوصل لزين العابدين والبروف غير شاف التخراج بدا واقف تايقرا

البروف:عاونك شي حد فالتمرين؟؟

زين العابدين:لا

البروف:بغاڤووو

ضار عليهوم تاسالى ونطق وعينو على زين:السليماني اجي باش تصحح ليهوم التمرين

ناض زين العابدين بزز منو وخدا لماخكوغ وبدا كيصحح.. خطو زوين أو واضح خلى إلهام تزيد تزعط فيه.. سالى ورجع لبلاصتو والبروف بدا يشرح ليهوم ويصحح معاهوم عاد بداو الدرس لي داز بزربة أو وصل وقت لخروج.. جمع مسائلو ومع غايخرج سمع صوت داك زوح الدراري لي دفعوه قبيلة واحد فيهوم قال:دااااير فيها راااسو عميق هههه

دري2: اشمن عميق راااه بنادم معقد وبااغي يتعقد علينا هنااا

زير على يديه ناوي يوريه العميق اشنو هي ساااعة تفكر هضرة باااه لي قااال ليه "دير عقلك اولدي" عض على شفتو بنابو وكمل طريقو وهو عارف الارجع ليهوم غايرونها وهو هادشي لي مباغيش...

كلشي ساق لخبار فالدار لداكشي لي طرا مع رحيل.. تامن أسماء لي جااات تاتجري باش طمن عليهاا.. كانو جالسات فالصالة ورحيل مصيفة فعز البرد والشتاا لابسة بيجامة طويلة مع شورط ودباردو.. كانت مكسلة فوق السداري وحداهاا طبلة فيها تقاوت وكاس لعصير طبيعي...

أسماء:أودي هاد لگريساج عطاه الله لواحد خصو غير يرد لبااال وربي يلطف وصاف

تانيرت:واييه ابنتي مبقااوش كيحشمو ولاو كيسرقو عين باااين

غزلان:أنا ماشفتش اش طرى حيت كنت لداخل تاجات لبنت تاتجري وقالتها ليا تخلعت والله

أسماء:اوا حمدلله دازت خفيفة والتلفون لي عليه لعمدة ممشاش هو ولبزطااام ههه ناري على شمتة صدقو شافرين الصاااك خاوي

رحيل:وماشفرو غير الصاك لي جبتي ليااا كادو لي فيه لباج والقهوي

أسماء:حللللفي ويييلي ولاد لحرااام الله يعطيهوم موصيبة شريتو بزبالة دلفلوووس راااه ماركة

رنيم:هههه عليك العوض ياروح أمك

أسماء:ويلي ويلي وبقااا فيا الحااال

ضحكو لبنات وتانيرت على أسماء وقلبوها ضحك تاسمعو صوت الكلاكسون وعرفو الطرونسبور ديال سيدرا هو لي جااا.. ناضت غزلان حلات ليها ومع دخلات تسمع صوتها وهي تاتعيط لرحيل لي تقادات فجلستهااا باش تستقبلهااا بتعنيقة.. جات نيشان عندها وتلاحت عليها معنقاهااا ورحيل تاتبوووس فيها تقولي عام مشافتهااا وهي غير لبارح..

تانيرت:وحنااا بتنا معاك الضرة

سيدرا:توحشت مامي تانيرت إينو

أسماء:وأنا ماتوحشتينيش

سيدرا: تانتي سومة

مشات تاتسلم عليهوم وهي باقا بشكارتها تاسالات ورجعات عند رحيل لي زولاتها ليها وحيدات ليها الجاكيط لي لابسة..تابقات بتريكو دالصوف مع دجين نواااغ..

رحيل:شكون جمع ليك شعرك؟؟

سيدرا:ماي بلو آيز هو لي دار لياا شفينجة مامي ومشط ليا شعري وگاعما قصحني

أسماء:(بضحك)هههه السيد بروفيسيونيل فكولشي هههه

رحيل:(ساطت)ااااوف غزلان جيبي ليها عصير عفااك فيك الجوع امامي

سيدرا:لاكليت فلكول ماي بلو آيز عطاني غداتي فيه كفيتة وباط بنينة مامي

فيما تسولها شي سؤال ضروري مادكرو ليها ورحيل غير تاتسوط.. دخلو ومحمد طه وريان لي جا من لخدمة أما طه باقي كونجي لي قرب يسالي

ريان:سلاام أو عليكوم

محمد طه:روح مودي جيتي

هزها وباسها وهي تاتعنق فيهوم بزوح وتبوسهوم.. كان جالس محمد طه حدا رحيل لي كمشات نيفها وقاالت بانزعاج:واااش مسلطكوووم عليا شي حد اش هاد الروااايح اوووف حلي الشرجم اغزلاان اوووف خنقتوني

ناضت من حداه غادة جهة الشرجم وخدات كلينيكس سدات بيه نيفهااا..

محمد طه:وايلي تاأنا بنت ليك فلبلان

رحيل:روايحكوم خانزين اش ندير ليكوووم

محمد طه:راه دوك ريا وسكينة لي فكرشك لي منهوم لمشكيل ههههه

رحيل:بزاااف عليك هادو راه لعسيلات ديالي

ريان:اييييه عسيلات غير جاااو وهوما يحرموها على ولد لحاااج

رحيل:الحلااااقم نتا وياااااه بعدوو مني

تانيرت:بديتو تاني

ريان:ههه مالنا كدبناااا ااااه نسيت أنا معروض لعرس ازين تمشي معايا

رحيل:عرس من؟

ريان:واحد خونا معايا فالخدمة عرض عليا دايرو الالة فكازا تمشي

رحيل:نمشي نيت نفوج مليت هنا

سيدرا:نمشي تاأنااا مامي

رحيل:لاكنتي قارية لا امامي

تانيرت:سولي راجلك هو لول ابنتي

رحيل:(بانزعاج) مامسولة حد راني ماشي بنت صغيرة نبقا نتشاور تت

ناضت رحيل طالعة لبيتها وأسماء ضحكات وقالت: هاد لوحم مغايسالي تايسالي معاه ولد لحاج ههه

ريان:وتاأنا قالت ليا ريحتك خانزة ودابا محمد شوية غاضور لواليد أنا بانو ليا دوك التواام إخوانين ماعندهومش مع الرجااااال ههههههه

محمد طه:(ضحك)هههه هنينا المرررض راه داكشي مغاتفهمش فيه خليه لماليه

ريان:اوا عقبااال ليك تانتا تخرجها منك غزلان هههه

حمارت غزلان ومحمد طه بدا كيشوف فيها وبهدوء قال:إن شاء الله

----

كانت جايا رحيل بتبسيمة خفيفة على شفايفها وعينيها على دربهوم القديم لي كانو ساكنين فيه فالرباط.. باقي الديور كما هوما ولبراهش تيلعبو فالحومة ولعيالات راه مجمعات مع بعض حدا الديور والبقااال مستف السلعة ومعلق لكراطن دشيبس ودراري مصافين تايتقداو من عندو.. تخطاتهوم وكملات طريقهاا تاوصلات لجهة دارهوم لقديمة وهي تلمح جسد بنت جالسة فالعتبة وحادرة راسها على ركابيها وشعرها مغطي وجهها وصوت بكاها مسموع.. كمشات رحيل عينيها وقربات جهتها وجلسات قفازي ومدات يديها وبهدوء قالت:ختي مااالك علاش كاتبكي؟؟

هزات البنت راسهاا أو وضاحت الصورة لرحيل لي تاتشوف قدامها وجه صاحبتها "جيداء" لي كان وجهها باين فيه لحزن ودموعها نازلين..

رحيل:(بتساؤل وخوف)جيداء علاش تتبكي مالك؟

جيداء:(بصوت حزين) مابقيتيش تاتسولي فيااا دغياا نسيتيني ارحييل

على كلامهاا حلات رحيل عينيهاا لي كانو دايزين بالدموع وحلقها نشف.. وصوت أنفاسها كايتسمعو مجهدين بحال لاكانت تاتجري...

ماقدراتش مزال ترجع تنعس حيت دماغها خدام بديك الحلمة لي شافت ولي ماعرفاش تفسيرهاا.. أدن الفجر وناضت من بلاصتها محيدة عليها لعگز وتوضات ومع خرجات من لحمام وهي تلاقى بمحمد طه فاايق تاهو يتوضى.. كانو عينيه مبوقين بالنعاس شافها ونطق بصوت مبحوح بالنعاس:صباح الخير اش مفيقك؟

رحيل:(بهدوء)واحد الحلمة شفتها درونجاتني

محمد طه:(بتساؤل)مالك ياك لباس؟

رحيل:والو ماتشغلش باالك مهم غانمشي نصلي

كانت باغا تقول ليه الحلمة ولكن تراجعات فأخر المطاف حيت عارفة لامشات تاجبدات سمية جيداء هو غايتشغل تاني بالتفكير معاهاا وهي مباغاش هادشي خصوصا دابا الوضع مختالف وهو مزووج وزيد هي عارفة خلفية الزواح بغزلان ومباغاش شي حاجة تأثر عليهوم وهوما يالاه فبداية الزواج... عليها فضلات تسكت ونيت مباغاش تشطنوو معاهاا.. صلات صلاتهاا ومع النعاس طار ليها وهي تنزل لكوزينة تشهات لكريب وبلاعگز عليها جبدات داكشي لي غاتحتااج وبدات تصاوب فيهوم ونيت تفطر بيهوم سيدرا... وجدات لفطور داكشي خفيف وعمرات أتاي ولقهوة وهي دخل تانيرت خاشية يديها فواحد لبنوار سخوون وباقي فيها نعاس فايقة غير بزز تصاوب ليهوم لفطور..

تانيرت:(بتفاجأ شافت فيها)بنتي علاش فايقة بكري ؟

رحيل:صليت الفجر وموراها مجانيش النعاس وقلت نجي ندير لكريب حيت تشهيتهوم..

تانيرت:كون فيقتيني نصاوبهوم ليك

رحيل:لا مكاينش لاش احم ماما بغيت نسولك

تانيرت:سولي ابنتي

رحيل:فليل حلمت بجيداء فحومتنا لقديمة لي فالرباط كانت جالسة حدا لعتبة دلباب تاتبكي وقالت ليا "مابقيتيش تاتسولي فيااا دغياا نسيتيني ارحييل" وموراها فقت وصراحة ماعرفتش شنو المعنى ديالهاا ومانكدبش عليك عقلي تشطن مع هاد لحلمة..

تانيرت:(كمشات حجبانها وقالت بهدوء) اش غانقول ليك ابنتي أنا مكانفهمش فهادشي ولكن لي غانقول ليك هو صدقي عليها

رحيل: فكرت فيها كنت أصلا باغا نصدق على قبلها ساعة ماتيسراتش مي غانديرها غدا..ندير صدقة ونعيطو لعائلة لقريبة اش بان ليك اماما؟

تانيرت:لي بغيتي ابنتي شوفي نتي

رحيل:(بتفكير)صااافي غانديرها غدا نقول لبابا يجيب ليا السخرة ونطيب لرااسي باغاا نطيب صدقتها بيدي

تانيرت:واخا ابنتي لي بان ليك

حبسو لهضرة عند هاد النقطة ورحيل طلعات لفوق عند بيت ريان فين ناعسة سيدرا ودقات لباب بشوية ودخلات لبيت لي كانت مظلمة ولقات سيدرا ناعسة جنب من ريان لي مفطح تاهو فوق النموسية بواحد النعسة فشكل... تبسمات بلخف وقربات جهتهوم باش تفيق سيدرا لي بدات تاتحرك بانزعاج مافيها لي ينوض حيت سهرات مع ريان فالتلفون.. بزز باش نوضاتها رحيل وهي باغا تكمل نعااس وريان مع ماخدامش جر المخدة وحطها فوق راسو ورحيل خرجات سيدرا لحمام باش تقضي حاجتها وعطاتها تغسل وجهها وسنانها ويديها ورجعاتها لبيت جبدات ليها حوايح سخونين حيت كاين لبرد مجهد...لبساتها وخلات ليها شعرها مطلوق ونزلاتها باش تفطر قبل مايجي الطرونسبور يديها.. كلشي كان باقي ناعس وتاحد باقي مافاق من غير تانيرت ورحيل وسيدرا لي تاتفطر وهي مفمضة عينيها

رحيل:سيدرا فيقي وحلي عينييك ويلي

تانيرت:وزعمة نعسات فلوقت

رحيل:شكون عرف اتلقايها هي وريان سهرو على التلفون مع ماخدامش

سيدرا:(شافت فرحيل)اه تفرجنا فتلفون مامي

رحيل:ها لي قلت فاش تاتنعس بكري راه مكاتلقاش مشكيل فلفياااق يالاه كملي فطورك راه قرب يجي طرونسبور يديك..

فطراتها بزربة وغير سالات عطاتها غداها وخرجاتها لبرا فين كان طرونسبور ركبات وجلسات فبلاصتها تادير باي باي تامشات وهي دخل رحيل ملوي فبنوارها..

رحيل:(تفوهات) ماما غانطلع نعس لافاق بابا علميه على الصدقة لي غاندير والتقدية أنا نعطيه لفلوس قوليها ليه بغيت نصدق عليها أنا

تانيرت:إن شاء الله ابنتي

رحيل:وسيري كملي نعاسك راه باقي لحااال

طلعات رحيل وعينيها تايتسدو مع فاقت بكري تخشات بلاصتها وهزات تلفونها طلات فلواتساب هو لول وجوبات بيسان لي مسيفطة ليها مساج لقاتها أونلاين وجاوباتها فالبلاصة بأوديو وصوتها باين فيه عيااان..

بيسان:سلام رحيل صافا عليك كيف غادة مع لحمالة مزيااان

استغربات رحيل من صوتها لي كيبان مطفي على غير العادة وجاوباتها تاهي بأوديو:صافا ونتي مال صوتك عياان واش مريضة

بيسان:(تتجاوبها فالبلاصة) شوية وصاف غير مانعساتش مزيان مع ليل عندي لگارد وراني دابا غادة لدار عرفتي كتبان ليا زوج زوج من لحاجة

رحيل:(دوزات ليها لابيل فلواتساب) هيلو

بيسان:هاااي

رحيل:فين باقا فطريق ولاوصلتي؟

بيسان:باقي واحلة غير فالطريق مع الموظفين ولوليدات صغار داخلين فهاد لوقيتة عرفتي الطريق عامرة وزيد النعاس لي فياا عرفتي عيني تايتسدو

رحيل:ردي لبااال لراسك فالطريق اصاحبتي وسيري ترتاحي

بيسان:داكشي لي غاندير

وقبل ماتكمل كلامها تسمع صوووت الفراان الصييك لي تضرب مجهد ممزوج بصوت بيسان لي طلقات غوتة وموراها تقطعات لابيل..

ملي تقطعات لابيل رحيل تخلعات ودغيا دوزات ابيل عادية ساعة مكتجاوبش وهنا جمد ليها الماا فالركابي والخلعة دارت خدمتها.. أما عند بيسان كانت باقا تاتستوعب ديك لغفلة لي غفلها واحد مول الطاكسي لي ماعرفاتو ملين خرج ليهاا وكانت غادخل فيه كون مادركاتش لوضع وبلاماتشعر طلقات واحد لغوتة وعينيها خارجين تاتشوف فديك الروينة لي دار داك خينا لي مشى وصوت لكلاكسون فرع ليها راسهاا... بدات تاترجع النفس قبل ماتكمل طريقها وتلفون كيصوني ومع طاح ليها لتحت ماقدراتش تجبدو وهي تاتسوگ.. كملات طريق بزز تاوصلات لرياض وهي تحبس وهزات تلفونها دوزات لخط لرحيل لي جاوباتها بزربة وباين فيها تخلعاات عليها

رحيل:واااش نتي بخير اش وقع ليك؟

بيسان:(سدات طوموبيلتها وكملات طريقها لداخل) أودي لهلا يوريك واحد لحماار مول الطاكسي ماعرفتش ملين خرج لياا كنت غاندير كسيدة غير ربي لطف وصااف

رحي:خلعتيني عليك فاش سمعتك غوتي وتقطعات لابيل قلت هادي غاتكون وقعات ليها شي حاجة خايبة

بيسان:انا بخير غير سمحيليا ماقدرتش نجاوبك حيت تلفون طاح ليا لتحت ومع صوگان ماقدرتش نجبدوو

رحيل:اوووف هانيا حمدلله بعدا مابيك والو

بيسان:ربي يخليك ازين دياالي غير سمحيليا وصاااف وتهلاي فراسك تانجي ونشوفك

رحيل:قبل مانسى غدا غاندير صدقة تاتحي لعندنا واخا راه ملي نفيق غانعيط لخالتي تاهي نقولها ليها

بيسان: ديالمن الصدقة؟؟

رحيل:صدقة على روح لمرحومة صاحبتي المهم غدا ونشوفك تهلاي

بيسان: داكوغ ارحيل تهلاي تانتي

قطعات لخط وعينيها على نوح لي كان تايشوف فيها بجدية مجرد ماسمع سميتها حواسو كلهوم اشتاغلو مع ختو مركز فيها..

بيسان:صباح الخير احبيبي

نوح:صافا

بيسان:حمدلله يالاه قطعت مع رحيل قالت ليا بلي غدا غادير صدقة على قبل صاحبتها الله يرحمها

حرك نوح راسو بهدوء وتفكر نهار كانت قالتها ليه ساعة مكتابش ديرها مزاال هنا... تنهد بتعب وحك لحيتو وبيسان كانت مراقباه بهدوء وحزن.. كيبان ليها عياان وهي عارفة خوها بلي واخا يكون تيموت مغايقولش اش بيه..

بيسان:غادي لخدمة؟؟

نوح:طالع لفيرمة وغانبقا تم شي يامات ردو لبال لراسكوم ولاخصات شي حاجة صونيو علياا الله يعاون

خلاها متبعة ليه لعين وهي تاتحسر على خوها لي كيبان ليها مهموم..

----

من لبارح وهو تيصوني عليها وهي مكاتجاوبوش عياا مايسيفط فلمساجات وتقول واش عبراتو ولاحشاتها ليه.. ومع تشطن معاها نسى يهضر مع مو تاني على موضوعو هو وسناء.. أما هي فكانت مفقوصة على ولدهاا لي تاتشوفو واخد قرار لارجعة فيه.. عارفة اليازيد كيف داير وهي هادشي مباغاهاش.. شافت تمارة دولدها دوك السنين وكيفاش تغرب مباغاش يتكرر تاني نفس السيناريو عليهاا أصرات على قرارها.. أما راجلها ماحاشاهاش ليها باقي وهو أصلا راه علم خوه بات سناء باخر المستجدات وبان فيه فرح وعجبو لحاال..

خرج اليازيد من بيتو وروايح تابعينو وتلفون فيديها.. داز جنب الصالة فين جالسة طامو لي غير شافتو خاشي راسو فالتلفون وهي تبرگم: بدات من دابا تجرو تاني ليها اللفعة

اليازيد:(نطق بصوت عالي حيت كان واقف جنب الباب)أنا غادي واش خاص شي حاجة

طامو:(جاوباتو بالتفخة)لا

عند بالها لاجاوباتو منفخة غايرجع ويسولها مالك الواليدة اش بيك و و ساعة صدمها ملي سمعات صوت الباب تسد وتما عرفاتو مشى.. بقات غير كاتبلق عينيها وتاتغدد من لداخل ديالها على ولدها لي تابع ليها لمراا.. أما هو راه ركب فطوموبيلتو غادي عندها لرياض وعارف بلي يالاه الصباح ويقدر تكون باقي مافاقت ولكن لي فرااسو فراسو باغي يعرف علاش خلاتو فلكافي ومكاتجاوبوش فالتلفون... صونى تلفونو وهزو بلهفة عند بالو هي ساعة كان غير لجيغون ديال الكافي مجاوبوش.. كمل الطريق تاوصل لحومة وهي تبان ليه طوموبيلتها خارجة من الحومة ومع قشعها تبعهاا وعينو عليهاا تايصوني ليها ومكاتجاوبش.. كلاكصونا عليها مع كان وراها وخرج يديه وهي قشعاتو من لمرايا لقدامية وحبسات الطوموبيل جنب طريق وتاهو دار نفس الشي.. نزل بزربة غادي لعندها هي لي بقات جالسة فبلاصتها ومع وقف عليها قالت ببرود: وليتي حاضيني فالدخلة ولخرجة

اليازيد: علاااش مكاتجاوبيش فتلفونك عييت مانصوني عليك

سناء:حيت مابغيتش نجاوبك

اليازيد:(حل لباب لقدامي وجلس جنبها وقال) علاش مابغيتيش؟؟

سناء:(ضارت شافت فيه وقالت بعصبية) شوف نتا اش درتي

اليازيد:اش درت گولي لياا باش نعرف

سناء: زعمة معارفش گاااع وبااااز (تفرگعات عليه) كون كنت جالسة معاك فكافي وشفت هاداك لي كان خاطبني ومشيت عندو بلامانعبرك اش كنتي غادير وباااش كنتي غاااتحس اسي ؟

اليازيد:(ساط النفس فحال شي ثور وقااال بعصبية)علاش باااغا تعصبيني وجابدة لياا هاد لخرى تاني

سناء: يااك اسي لبارح فاش خليتيني ومشيت عند ديك خيتي بلا ماتحاشيها لياا ماشفتيهااش ياااك اوا باااز والله تاباااز

اليازيد:سناء يهديك الله واش نتي مكاتجاوبينيش ومنفخة علياا بسباب هاد المشكيل لتافه..

طلعات حجبانها لسماا وضحكات بفقصة وبعصبية قالت:تااافه بالنسبة ليك نتا هاد لمشكيل تااافه ياك اسيدي اوا ملي تشوفني نضت غادة عند شي رااجل بلامانعبرك وتعصب ديك الساعة نفكرك فالتفااهة دبصح

اليازيد: سناااء ماتبقايش تقارني بناتنااا

سناء:واااش من نيتك كيفااش مانقاارنش نتا ماعطيتينيش اعتبااار وماخديتيش تالإذن ديالي جيتي درمتي ومشيتي عندهاا بحال إلا أنا مكايناش فين هو احترامي اسي اليازيد

اليازيد:أنا ماقصدتش هاكا ملي مشيت عندها قلت نشولها ونعرف منها هي علاش هربات

سناء:(قاطعاتو)اااااه قول بقا فيك لحال حيت هربات وخلاتك ياااك

اليازيد:(عض على شفت مفقوص) واش من نيتك علاش غايبقا فيا لحاال أنا راه تعصبت حيت حسيت بالشمتة والشوهة قدام لفاميلة أما هي مكاتهمنيش گاع وزايدون راه تزوجات بلي تاتبغي والله يسهل عليهاا

سناء: واخا يوقع لي يوقع ماديرش داك التصرف لي يقلل مني حيت كيفما نتا ماتبغينيش نقلل منك راه نفس الشي

اليازيد:(شدها من وجهها متبتو قدامو وقال بهدوء) ماقصدتش نجرحك ونقلقك نتي عرفااني كانبغيك نتي اسناء سمحيليا

سناء:(بهدوء مماثل) كانتمنى بحال هادشي مايتكررش مرة خرى حيت تصرفي مغايعحبكش اليازيد لاكنتي نتا مكترضاهاش على راسك راني كثر منك

اليازيد:(باسها فجبهتها وقال بجب)صافي نواعدك اخر مرة

سناء:امم ودابا خليني نمشي فحالي راه تعطلت

اليازيد:فين غادة؟

سناء:عند دونتيست باغا نعمر واحد الضرسة

اليازيد:واخا نمشي معاك ماعندي مايدار

سناء:ولخدمة؟

اليازيد:فاش تاتحضري نتي كاترفع لخدمة مابيل..

----

تكلف إدريس بالسخرة لي قالت ليه رحيل وقررات دير الصدقة بيديها.. ملي فاقت الصباح وسيفطات سيدرا لمدرسة وهي تاتوجد وتاتانيرت وغزلان وأسماء عاونوهاا.. هي لي شرملات الدجاااج ونقات الخضرة ديال كسكسو.. كانت لكوزينة خارجة منها ريحة الماكلة وهي واقفة وسادة نيفها بالشااال باش ماتشمش الريحة مع المرقة كاتروعها وقبيلة نيت ردات لي فمعدتها ومع دلك ماستسلماتش وكملات.. الدجاج كيطيب وكسكسو راه تفور زوح تفويرات والبلول تاهو راه تيطيب وماتبقى مكلفين بيه البقية... عيطو غير لمقربين وبعض الجيران.. مكانوش النااس بزااف حيت دارو فالمجموع ربعة دطبالي..

كانت سيدرا جالسة تاتلعب مع إيڤانا لي تقلات تاهي أصلا غليضة ومع حاملة زاد تنفخااات وسيدرا مفششاهاا بالحليب والفرماح ولكخوكيت تاتشري ليها غير داكشي لغالي..هزاتها سيدرا وحطاتها فوق حجرها تادوز يديها على ضهرها ولقطة تاتكسل واخدة راحتها..

كان كلشي فالدار من غير محمد طه لي ملي ساق لخبار ديال الصدقة وهو غااابر مبانش نهائيا.. كلشي تقريبا كان عارف سبب لغبور ديالو من غير غزلان لي فاش صونات ليه قال ليها راه عندو شي غراض وتاهي ماحكراتش... وجدو كلشي ومشاو يبدلو عليهوم قبل مايجيو النااس...

الصالة التحتانية عامرة بالرجال ومنهوم إسلام اليازيد وباه والحاج السليماني ورؤوف وزين العابدين والبقية كانو الجيران وسفيان ورشيد لي خدامين مع إدريس

جايبين الطلبة طالقين البخور وتيقراو القرآن.. والفوق فالصالة لوسطانية كانو لعيالات منهوم رحمة وسناء وزاينة وطامو وبيسان والجارات تاهوما.. كانو الصواني دأتاي والحلوى محطوطين فالطبلة وكلشي كان ساكت تايسمع لصوت لقرآن لي واصلهوم مع دايرين البوق ولباف كيسمع.. كانت رحيل جالسة مع لعيالات ساكتة وكل مرة طلق تنهيدة.. أما غزلان فكانت تاتصوني على محمد طه لي باقي ماجا وتلفونو طااافي وهي تشطنات عليه معرفااش فين هوو...

فواحد التيران خاوي كان جالس محمد طه مكبط والريح تايضرب فوجهو ونيفو حماار بقوة البرد... كان ساهي كيتفكر دكرياتو مع جيداء لي مايقدرش ينساهوم حيت دوز معاهاا نص من عمرو.. ملي عقل على راسو وهو كيعرفها وتايشوفهاا كيفاش غايقدر ينساهاا؟؟ ليوم فاش عرف بلي ختو دايرة صدقة على قبلها بقا فيه لحااال وماحملش راسو حيت شاف بلي نساهاا ومبقاش متفكرهاا وهو مباغيش هادشي... جاه تأنيب ضمير خلااه يكره راسو.. تنهد بتعب ومسح على وجهو ومع شاف فالساعة ولقى بلي مشى لحال وخص ينوض يمشي وداكشي لي دار ناض غادي جهة الشارع شد طاكسي لحومة وكل مرة يطلق تنهيدة.. كانت الطريقة طويلة رجع راسو لور وغمض عينيه وهي تجي فبالو صورة غزلان.. حل عينيه وجبد تلفونو شعلو ولقا عرام ديال لزابيل منهاا ورجع صونى عليها وهي جوباتو بلهفة:فينك النااس جااو وعمي كيسول فيك

محمد طه:(بتعب)أنا جااي فالطريق

غزلان:صافي رد لبال لراسك وماتعطلش

فطع معاهاا ورجع لوضعيتو كيف كان كايتسنط لعضامو تاسمع صوت مول الطاكسي علمو بلي وصل.. خلصو ونزل كيجر فرجليه تاوصل جهة الدار وهو يسمع صوت القرآن.. حل لباب ودخل ونيشان طلع لفوق غادي لبيتو باش يبدل عليه..

حل لبلاكار تايجبد مايلبس وهو يتحل لباب ودخلات غزلان لي كانت غير بفقطين الدار عاادي جامعة شعرهاا.. قربات جهتو تاوقفات قدامو وقبل ماتنطق حساات بيه جرهاا لعندو ومعنقها بالجهد مخليها مفاهمة والو...

يتبع...