محتوى القصة
كان تيحس بيها مزيرة على عنقو وعلى رجيلاتها لي مضوراهوم على خصرو بالجهد فاش حيد يديه لي كان معنقها بيها وخشاها فالجيب دالسروال.. دخل لعند جد باه لي كان فالصالة ومعاه محمد وريان وإسلام ورؤوف وبعض من ولاد عائلة نوح...محمد طه غير قشع سيدرا وهي معلقة فيه بديك الطريق وهو ينوض بزربة جهتها لاهو لاريان وإسلام...
محمد طه:(بخوف)مالهاا؟؟
زين العابدين:(بصوت باح)كانت تتبكي لهيه
محمد طه:(حط يديه على ضهرها تيلمسها بحنية وقال) روح مودي اجي عندي
حركات سيدرا راسها ببكاء فعنق زين العابدين وزادت زيرات عليه ومحمد طه تايهضر معاها بالخاطر ويطلب باش تجي عندو ساعة والو..
ريان:(نطق تاهو بهدوء) سيدرا اجي عندي أناا يالاه اخنفوسة ديالي
حلفات لامشات عند شي واحد فيهوم وشدات فزين العابدين شدة العمى فالظلمة... وهو داك شوية دالصبر لي عندو قرب يسالي... عيياو معاهاا وكل واحد جرب مامرة مازوج ساعة والو مبغاتش غير تتبكي وصااف ومعارفينش اش وقع ليها... وأصلا فاش وقع لمشكيل نساوها وشكون تفكرها تاشافوها مع زين عاد توگضوو وعاقو...
بعد زين العابدين عليهوم وهي فحظنو شادة فيه لاطيح حيت هو مشادهاش طالق يديه.. عطا لجد باه التلفون وخرج غادي لگليسة لي كاينة تم حدا الخصة وجلس وهي جلسات فوق حجرو... كيحس بعنقو فازگ وهي كل مرة تمسح نيفها فيه وهو كيزيد يجعر...
زين العابدين:(مد يديه باش يفك يديها وقاال بصوت قاصح) زولي يديك وهبطي
سيدرا:(دوات وهي على نفس الوضعية بصوت منغنغ بلبكاا) خنيني "خليني"
زين العابدين:(زير على يديه وقال بصوت بارد) راه غانطوعك لهيه حيدي
سيدرا:(بصوت باكي نطقات) أنا خايفة
سكت زين العابدين ورجع تكى ضهرو وهي بقات ساكتة وعلى نفس وضعيتهاا..
فالصالة كاان لحاج لحسن حاط تلفون على ودنيه كايتسنى ولدو سليمان يجاوبو... دخلات لعندو بيسان وقربات جهتو تاجلسات حداه وقالت بالسوسية:تساولتن سرسن؟ "هضرتي معاهوم"
ح.لحسن:(تنهد ورجع تايصوني مرة خرا) دادام أوراغيتجاوب "عمك مكيجاوبنيش"
بيسان:(حكات جبهتها) زر مبارك ياك إيمان ديدسن "شوف مبارك ياك مشى معاهوم"
ح.لحسن:اييه تغزانت (قاد نضاضرو دالشوف وكحز التلفون عليه وبدا تايقلب على النمرة وهو مكمش عينيه...كان ولد عمة بيسان جالس مقابل ليهوم فبداية الأربعينات ولكن ممزوجش...وأغلبية حياتو وهو فبرا حيت عندو بروجي تم وتافالمغرب راه داير بروجي ديالو ولكن باه هو لي مقابلو ليه...شاف فبيسان لي كان باين فيها متوترة ونطق بصوت غليظ بالسوسية كيف مولفين فاش كايكونو مجموعين: بيسان أدورتيكسيت إن شاء الله أورايوقعو أبلا على خير "ماتخافيش إن شاء الله مغايوقع غير لخير"
بيسان:(تنهدات) المشكيل مقورن أيااد اعصام.. عادل أولى مااس أورادفيسن تزريت ماسناان حكودلي يبان رااد رفعن دعوة فگما نووح "مشكيل كبير هادا اعصام..عادل وماماه مغايسكتوش شفتي شقالو قبيلة باينة غايرفعو دعوة على خويا نوح"
ح.لحسن:ألو مبارك فينكوم؟
مبارك:راه حنا دابا فالكلينيك **** دخلوه لداخل وباقي ماسمعنا تاخبار عليه
ح.لحسن:تانعيط لسليمان ساعة مجاوبنيش
مبارك:راه مشى تيقاد لوراق يمكن مشافووش..
بعد شوية من لبلاصة لي كان فيه فاش بدات زهرة تاتعدد وتبكي وتدعي على نوح ماخلات ماخرجات من فمها وهو مبغاش جدو يسمع داك لكلام عليها بعد عليهوم وقال:ألو لحاج بلاماتجي دابا غير غاتعدب أنا هنا باشما كان غانعلمك بيه
ح.لحسن:لا لا ضروري نجي
قطع لحاج وناض باش يتحرك لعندهوم وناضت تابيسان لي بدات تتسولو شنو قال ليه عاد مشى وبقات بيسان هي وعصام لي نطق بهدوء: نضالب إربي السلامة "نطلبو من الله السلامة"
بيسان:آمين ياربي
عين ريان عليها ملي دخلات وجلسات جنب جدها وفاش دوات معاه بالشلحة مافهم تاحاجة بقا غير كيضور عينيه بناتهوم وخلاص فاش هضر عصام تم عقد الربعة فالعشرة وبقا منتابه ليهوم وكيحاول يلقط شي حاجة خفيفة والصعرة شدااتو كان باغي يفهم عليااش تايهضرو وزيد ماحملش يشوفها تاتهضر معااه...
ريان:(ضار جهة محمد طه ونطق بصوت هادئ)فهمتي شنو قالو؟؟
محمد طه:داكشي لي فهمتي هو لي فهمت
ريان:(نطق مغدد) خصني نتعلم الشلحة
محمد طه:(ناض)نمشي نشوف سيدرا
ريان:سير أنا تابعك
قبل دقائق وعند زين العابدين لي كان على نفس جلستو مضور وجهو لجهة لخرى ساهي تاحس براسها تقال على كتفو ويديها لي كانت مزيراهوم ترخفو...هبط شوفاتو ولقاها ناعسة وزفر النفس هادشي لي بقا ليه...كان تايقلب بعينيه على شي واحد من خوالها باش يهزوها ويديوها ساعة مابان ليه حد..ناض هزها بيد وحدة وهي ميلات راسها تاعواج ليها ومع دلك مقادهاش...طلع بيها لبيتها ودخل غادي بيها جهة النموسية حطهاا فلوسط وضار باش يمشي ساعة رجع ضار جهتها مرة خرى وشاف فيهاا مدة بهدوء قبل مايقرب جهتها ويغطيها عااد خرج من لبيت مخليها ناعسة بهدوء...
متكية على كتف سناء وسادة عينيها وكلام زهرة لي قالت على راجلها تاينهش فيها من لداخل... عمرها شافت شي حد محقاد ومشرار بحالهاا...شركو الطعام وشركو شحال من حوايج وشوف اخرتها شنو دارت ولهضرة لي قالت ولي صعيب تنساهاا..هي عارفة إسماعيل عمرو فحياتو ماتكبر على شي حد اه كان قاصح وصعيب فالطبع ولكن هي كانت عارفة ساروتو...كانت تاتعقل نهار لول تزوجات بيه ومع كانت صغيرة كانت تتخاف منو ولكن شوية بشوية بدات تاتعرف ليه وبدات تاتفهم تركيبة شخصيتو...ولقات راسها متأقلمة مع حياتهاا وهي معاه واخا بعدات من فاس وجات لمراكش...هي عارفاه مغايفوتش خوه وفاش كان خدام معاه عمرو حسسو بلي هو عندو لفلوس وبلي خوه مكيسوى عندو والو بلعكس كان يعطيه واخا راه تاسليمان عندو رزقو ولكن إسماعيل كان ولد لخير وكبر ولادو على نفس الصفة... ودابا فاش قالت ديك لهضرة تصدمات منهاا كيفاش سمح ليها خاطرها دوي عليه هاكا وهو عمرو قربها بلعيب وزيد السيد فقبرو وهي ماحناتش لافيه ولافمرتو أو ولادو ولحاصول بنادم لي نكار الخير واخا تفرش ليه الأرض حرير عمرو مغادي يگر فيه حيت هاداك طبعوو...يبقا ينافق فيك ويضحك فوجهك وفدقيقة يتقلب عليك ويعاير هادي هي ديال زهرة...
سناء:(شدات فيديها وقالت بخفوت) صافي اختي واش باغا يطيح ليك طونسيو ونصدقو فمشكيل اخر
رحمة:(بصوت مألم) كيفاش عطاتها خاطرها تخرج ديك لهضرة من فمهاا عمري فحيااتي ماقللت عيبي عليهاا وربي شاهد هاد سنين كلها وأنا حالة ليها باب داري ودايراها بحال ختي
سناء:هي لي قليلة الأصل وقلبها كحل نتي اختي ماعليك والو عاملينها مزيان ربي غايجازيك من عندو
رحمة:(هزات راسها وبدات تمسح فعينيها) شفتيها هي وعروستهاا ماخلاو ماقاالو وتاولدهاا الله ياخد فيه لحق هو السباب دلكوارت ديما حاسد نوح وديما لايح ليه لهضرة ومع نوح دمو حامي مكيخليهاش فداخل
سناء:أنا بغيت غير نفهم واش ديك خيتي من نيتهاا مسيفطة ليه تصويرة مرات الراااجل وبلاحشمة بلاحياا مخرجة عينيها كيف لكلبة فينا
رحمة:(حركات راسها) راه شفتي تلفون من صباح ربي وهو عند لبرهوش دولدها وزيد هي بفمها قالت وشفتو معطاهش ليها تاطفى غايكون هو لي سيفطهاا
سناء:هو ولاهي بحال بحال واش لي عاطية تلفون لبرهوش وهي فمجلس النساا اش كاتسنى كون تلقاه نشر شي خرياا فشي جايحة خرى وهي جالسة مجمعة مامسوقاش ليه
رحمة:من هادشي كولو أنا خايفة على ولدي ديك لمرا فاش ناض بناتهوم لخصام وضربو كان غايدعيه غير عمي لحسن هو لي دخل ولكن دابا باين غايدير لي فراسو حيت هادشي لي باغي وزيدي مو تاهي غاتزندها
سناء:واهي هادي عولي عليها اختي مباغاش نخلعك ولكن راه مانافقكش
رحمة:(حركات راسها بخوف وبكااء) لا لا لا غاندير لي فجهدي ومانخليش ولدي يدخل لحبس واخا نعرف نمشي نزاوگو باش مايديرهااش
سناء:(بتحدير)وايااك اختي يزغبك الله وديريها راه ولد لحاج لاساق لخبار بلي درتيها مغاينساهاش ليك راه نتي أكتر وحدة عارفة ولدك مكيرضااااش وعمرو هبط الراااس
رحمة:وشنو بغيتيني ندير نتفرج فيه وهو غايدخل لحبببس هااا واش من نيتك اسنااء راه سبق ليا وخسرت ولدي نااصر مانقدرش نخسر تااانوح والله تانموووت فيهاا
سناء:(عنقاتهاا كاطبطب على ضهرها)برا ولباس عليك اختي إن شاء الله غايتحل لمشكيل وزايدون حنا غير داوويين دابا باقي مكاين والو بلاماتخلعي وتخاافي
رحمة:ياااربي توقف معاه وتخليه ليا لاهو ولاخوتو ياربي (شافت فيها) سناء سيري شوفي واش وعرفو شي خبار على رحيل راه بيسان نزلات ومعاود طلعات
سناء:واخا أنا نازلة..
خرجات سناء من عندها نازلة لتحت وفطريقها تلاقات مع محمد طه لي كان باين فيه تايقلب على شي حد...
سناء:محتاج شي حاجة؟؟
محمد طه:كنت تانقلب على زين العابدين حيت كانت معاه سيدرا
سناء:زين غاتلقاه فبيتو راه لفوق على يديك ليسر بابو مصبوغ بالكحل...
محمد طه:(تبسم ليها) شكرا
كملات طريقها وهو طلع متبع النعت لي عاطياه تاوقف قدام باب بيت زين العابدين دق وبقا واقف تاتحل لباب وبان ليه زين العابدين لي كان لابس غير سروال سپور ولفوق عرياان... ولعظلات كيبانو مخدومين...
محمد طه:سيدرا فين هي؟
زين العابدين:بيتها
محمد طه:وفين بيتها؟
زين العابدين:(بملل) لهيه
نعث ليه فين وسد لباب مخلي محمد طه هاز حاجبو فيه... حرك راسو ومشى لبيت سيدرا وفاش دخل لقاها ناعسة...باسهاا وهزها بين يديه وهز واحد لكاشة خفيفة غطاها بيها ونزلهاا حيت غايمشيو ومباغيش يخليها هناا...نزل لتحت ولقى ريان خارج تاهو من الصالة برفقة إسلام كايتسناو لبنات يجيو عندهوم..
ريان:نعسات؟؟
محمد طه:واه فين لبنات خليونا نمشيو
ريان:(ضار شاف فيهوم ومعاهوم بيسان) هاهوما جايين
بيسان:سمحولينا على شنو طرا
أسماء:ماتقوليش هاكاك راه شفنا كلشي بعينينا مهم خلينا ليكوم الراحة وبناتنا التلفون
بيسان:بسلامة
ودعاتهوم قبل مايوصلو عند دراري ورجعات فحالها مخليا ريان غير تيشوف... ماهزاتش فيه لعين هاد نهار نهائيا وتجاهلاتو وهو ماعجبوش لحااال واخا راه الفراق هو قررو وجا منو ولكن فاش طبقاتو مبغاهش وماتقبلوش...
فالكلينيك كانت مامات عادل جالسة وعينيها منفوخين بلبكا وجنبها عروستها... باقي معطاوها خبار على ولدها وهادشي خلعها وخصوصا فاش جابوه كان بحال لميييت... هزات عينيها وشافت فسليمان لي واقف قدامها بنظرة شرانية:صافي تهنيتي هاولدك بين لحياا ولموت بسباب ولد خووك
سليمان:(خنزر فيها) هنينا وراه باقي مانسيت ليك اش درتي
زهرة:گاعلا تنساه نيت أنا مانساش ليك كيف وقفتي مع ولد خوك ورميتي ولدك
سليمان:(حمر فيها الشوفة) زعمة ولدك مايستاهلش اش داه يشوف فتصويرة مرات الراااجل واش بغيتيه يسكت ليه ويبقاا يصفق ليه راه هاداك راااجل دمو حاامي ماشي بحال ولدك لي ماحشمش على عراضو
زهرة:(خرجات تاهي عينيها بلاحشما بلاحيا) بزاااف عليك ولدي مايديرهااش هو راه بمرتو أو ولادو مالو اش خاصو
سليمان:خاصو لعقل وخاص قلبو يولي بيض ماشي كحل (تنهد بحسرة) ولكن لومة علياا أنا لي طلقت ليه لحبل تاولى بحال هاكا
زهرة:(خنزرات) ولدي رااجل وسيد الرجال
سكتات فاش شافت لحاج لحسن جاي مع مبارك وهي تقلب وجهها تاتميق فيه... أما سليمان مشى باس ليه يديه وبقا تيعاود ليه اش طرا تاسالى وجا جهة الكراسى فين جالسة زهرة وحكيمة وجلس لحاج كيتنهد...واخا صحة عيانة ولكن جاا يطمن على ولد ولدو واخا راه يستاهلهاا ولكن مباغيهاش ليه...
خرج عندهوم طبيب لي علمهوم بلي لوبغاسيون سالات وبلي طلعوه لإنعاش وغايبقا تما حيت حالتو خطيرة وعندو كسر فالرقبة وكسر فالكتف وعندو كسور فالأضلع ومن زهرو ماوقعش معاه نزيف داخلي فالراس إيما كون راه ودع ومع دلك باقي حالتو خطيرة وباقي فالشك..زهرة غير سمعات هاد لهضرة وهي تكسيري وتغوت وتجدب ليهوم تم وبعصبية غوتات فوجه لحاج لحسن:الله ياخد الحق فحفيدك لي كان سباب ولدي بغيت ربي يرزيه فصحتو وفلي عزيز عليه الله ينتاقم منوو ويجي نهار ونتشفااو فيه ياااربي...(ضربات صدرها وغوتات) ومغانرتااح تناخد حق ولدي والله ماتبقاا فيه ولامدخلتو لحبس راااني كلبة غااابلااااتي والله تاندموو
تايجر فيهاا سليمان ومبارك وهي غير مطالقة قادوسها وماخلات مقالت ناسية هي شنو طاري وعمات عينيها تشوف الحقيقة وبلي ولدها سباب حالتو...هو لي جبد النحل عليه بكلام مكانش عليه يخرجوو وبفعل مكانش عليه يديرو ولكن بالسيف مغاتجي فولدها وتعمي عينيها على لحق وهي أصلا قلبها كحل... جلس لحاج لحسن وقلبو حس بيه ضرو وتزير عليه وهضرتها راه كيف لخناجر تغرسو فقلبوو بلارحمة...ودعاواتهاا هرسوه ومن قلبو كايتمنى ربي يحفظ ليه حفايدو بزووج بيهوم....
---
شرقات شمس يوم جديد حاملة معاهاا أحدات جديدة...مشافش النعاس الليل كولو وهو معاها فالشومبر تاحس بيهاا قربات تفيق عاد خرج مخلي معاها مها...بدات تاتحل عينيها وهي تاتحاول تستعقل فين هي وشنو وقع معاها...وغير تفكرات شنو طرا وهي تحط يديها على كرشها بزربة وغير حسات بتوينز وهي تزفر النفس براحة وبدات تاتلمسها بحنية...لبارح كانت دايخة واخا حسات بطبيبة تادوز ليها ولكن مكانتش عاقلة على شنو وقع بالضبط وعقلها فيه تشاش..
تانيرت:هوما بخير ابنتي بلاماتخلعي عليهوم
رحيل:(بصوت مبحوح) تخلعت بزاااف
تانيرت:خصك ابنتي تعطي الراحة لراسك على قبلك وقبل داكشي لي فكرشك احبيبة ديالي
رحيل:(تنهدات) ماشي لخاطري اماما (ناضت بتعب) بغيت نخرج من هنا
تانيرت:واخا نعيط لباباك يجي
غير سدات تانيرت لباب ورحيل غمضات عينيها تاتفكر الكارتة دلبارح لي وقعات ولي خلات زغب داتها يوقف عليهاا... قلبها حسات بيه تزير وهي كاتفكر كيف كان عادل طايح بدمو مكايتحركش ونوح كيف كاان بحال شي وحش كايضرب فيه بلارحمة...خافت منو وشوفتو هاكا رعباتهاا وخلات قلبها يتكمش عليه بنفووور من جهتو....تحل لباب وضارت بزربة تاتشوف شكون وغير شافت باها تنهدات ورتاحت حيت خافتو يكون هو...قرب عنقها وباسها فراسها وبدا كيسول فيهاا عاد عاونوها باش تنوض وقادات ليها تانيرت زيفهاا حيت غاتخرج..شادة فيد مهاا وليد التانية حاطاها على كرشهاا وغادة بشوية عليها تاخرجات لبرا وركبات فلور وحداها مهاا... أما إدريس قبل مايركب ضور وجهو جهة نوح لي كان واقف جنب واحد الشجرة كايكمي ومراقبهاا بهدوء... ديك لحالة لي محملش يشوفها فيها وهي بالنسبة ليه حاجة مهمة بزااف مايبغيهاش ضرر ولايبغي يشوف شي حاجة خايبة تقيسهاا...هي ولات مهمة بالنسبة ليه ومايبغي تاشي مخلوق يدوي فيها بلخاايب... واقف تايشوف فيها بخلسة حيت عارف لاشافتو غاثور عليه كيف ديما وهو مباغيش تعصب باركة شنو شافت وعاشت لبارح وهادشي علاش مبقاش معاها وخلاهاا..
هز ليه راسو بمعنى تيسر عالله وإدريس حرك راسو وركب وغير تحركات طوموبيل وهو يتنهد لاح لگارو وعفس عليه وضار جهة الشانطي شد طاكسي غادي لرياض...
جا الفرج ومبعد مكانت حبيسة الدار من نهار طلقات هاهي ليوم خارجة غادة لفااك... كانت خاشية يديها فجياب الجاكيط وغادة على رجليها بحكم الشارع لي فيه الطاكسيات وطوبيسات قريب ليها... وصلات وبدات تسنى نوبتها وهي ساهية تاجات طوبيس وركبات شادة بلاصتهاا... كاتفكر فحياتها لي تبدلات كليا مبعد مكانت فرحانة...اه فرحانة معاه واخا كانت عارفة ديك لعلاقة كيفاش تبنات ولكن صراحتو معاه فالبداية ديال الزواج خلاتها تعيد تاهي منظورها وتفكر فمصلاحتها هي ومصلاحة داك الزواج..استسلمات للأمر الواقع وتقبلات الفكرة وتعاشات معاهاا... ومبغاتش تعكر مزاجها ولاتخلي حياتها تولي فتخبطات داكشي علاش دارت مجهود باش تبدا معااه كيف قال رغم تصرفاتو لي أحيانا تايخليوها تعصب وتنزاعج منو وهي تتحاول تعطيه مبرر وعدر...ولكن فلمرة لخرة هي مقدراتش تجاوز شنو قال وشنو دار كيف كانت تتجاوز لي قبل منهوم حيت هاد لمرة لجرح لي سبب ليها كان غارق وكيدمي...جرح لي باقي لدابا أثارو واضحة على نفسيتها واخا باغا تجاوزو ولكن كلما تفكراتو تاتزيد تألم ويبقا فيها لحاال... تمنات كون مقالش ديك لهضرة وجرحها كون هي داابا باقا مرتو عايشة معاه لحياةة..بعد لمرات تاتقول حمدلله حيت ماحملتش منو ومجبتش ولد ولابنت كون راه دابا تلقاها تاتخمم ليه وهازة همو وزيد فاش كيكون طلاق وفيه لولاد هوما لي كيكون ضحية حيت تايتحرمو من الجو الأسري لي تايخلي لولد يكبر بعقلية سليمة يحس بحنانة مو والأمان دبااه ماشي مو فجيه وباه فجيه وهو واقف فالوسط كل مرة مليوح عند واحد فيهوم... والأسوء هو لاكانو هوما بداو حياة جديدة حيت بطبيعة لحال راه مغايبقااوش واقفين فنفس النقطة وأكيد كل واحد غادي يتزوج وغادي يدير عائلة خرا أو ولاد خرين وشكون لمتضرر لولد لي كان نتيجة الطلاق وهي مباغاش هادشي واخا عارفة راسها مستحيل تفرط فكبدتها ومتأكدة بلي تامحمد طه غايدير نفس الشي ولكن هي مبغاتش رابط لي يجمعها باقي معاه... لي يخليها كل مرة تشوفو ويوقع احتكاكات بيناتهوم هي مبغاتش وباغا تمحيه من حياتها بحال لاعمرو كان فيه وطوي صفحتو وتبدا صفحة جديدة...
وصلات لفاك ونزلات داخلة مبسمة بخفوت فاش شافت وداد كاتسناها حيت ديجا علماتها راه غاتجي..
وداد:على سلامة نورتي لفااك
غزلان:(تاتسلم) صافا عليك
وداد:حمدلله (شدات فيديها) عندي ليك خبااار غاتفرحك؟؟
غزلان:شنو هي؟؟
وداد:(تبسمات بعيون لامعة) أنا حاملة
غزلان:(عنقاتها وهي فرحانة ليها من لقلب وقالت بصوت حماسي) مبروووك ازين فرحت ليك والله هههه هي صافي غاتولي مامي
وداد:إن شاء الله
غزلان:الله يتبت حملك ويرزقك درية الصالحة ياربي ههه زاهية سبوعات هارحيل هانتي هههه
وداد:ههه اتبرعو
غزلان:شحال دابا عندك؟
وداد:شهراين ونص
غزلان:أوو وماعقتيش برااسك هاد لمدة كلها
وداد:لغيگل أصلا كان عندي فيها مشكيل لاعقلتي تاتجي قليلة ومخربقة وقلت راه كيف ديما..
تشادو بزوجات مكملين طريق لونفي تايهضرو وداد كاتعاود بحمااس وغزلان تاتسمع ليها ومبسمة وفرحانة لخبار لحمل...دوزو حصصهوم موراها جلسو فلبوڤيت مكملين حديثهوم تاوقف عليهوم جاد لي كان تيشوف فيهوم مبسمة...
جاد:غزلان صافا عليك؟؟
غزلان:لباس ونتا
جاد:حمدلله على سلامتك بقات بلاصتك
غزلان:الله يسلمك شكرا
خلاهوم ودادا بدات تاتشوف فيه وقالت بضحك:اهياتا ياكما عجبتيه
غزلان:اويلي من نيتك راه السيد غير تيقرا معاياا (ناضت وقالت بهدوء) غايخصني نمشي لمحال نخليك دابا باي...
تفرقو فباب لفاك وكل وحدة شدات اتجاه...غزلان شدات طاكسي غادة لمحال تبدا خدمتها لي هملاتها هاد المدة...دخلات بان ليها عتمان حاضر تايدوي مع لبنات لي جاب جداد بلاصة دوك زوجات لي كانو دابزو... قربات جهة أميمة لي تاتحسب فلاكيس وتمدغ فلمسكة..
أميمة:طل لقمر علينا
غزلان:ههه كاين شي جديد
أميمة:هاد ساعة والو جات شي سلعة ستفناها عرفتي كاين شي بياسات نااضين هبلوني
غزلان:(وقفات جنبها فلاكيس لاخر وقالت بضحك) خودي شي بياسة
جا جهتهوم عتمان لي تبسم باحترام لغزلان وقال: على سلامة كيف بقيتي شوية
غزلان:(تبسمات بخجل) حمدالله
عتمان:اوا خليتي بلاصتك
أميمة طلعات حاجبهاا وحبسات الضحكة وغزلان بقات غير مبسمة بخجل على هضرتو لي عمرو ماتجرأ وقالها ليها قبل... مسح على شعرو ونطق بهدوء:لمهم أنا غادي دابا لمحال أمانة عندكوم لاخصات شي حاجة صوني عليا واخا وردو لباال لبنات لي جااو لاحتاجو شي حاجة وريوهوم صافي
أميمة:صافي واخا
عتمان:يالاه بسلامة عليكوم
مشى وأميمة شافت فيهاا وضحكات:خليتي بلاصتك ههههه السيد كان حاضي
غزلان: أويلي من نيتك ههههه راه السيد غير دوى عادي
أميمة:همم عادي واقيلا تاتعجبيه
غزلان:من نيتك السيد غير سول عادي
أميمة:وشنو فيها لاعجبتيه
غزلان:فنظارك أنا فهاد لحالة غانفكر فهادشي دابا
أميمة:شوفي ندويو صراحة راه نتي طلقتي ماشي متي وأي وحدة طلقات من حقها تبدا من جديد بلاهبال عارفة دابا نتي مجروحة وباقي ماقدرتيش تجاوزي ولكن تال إمتى راه لحياة مكتعاودش لامشات غير ودعيها يعني نتي خصك تستاغليها باش ماتندميش عليها ماتبقايش غير عايشة مدمرة وحاولي تحلي قلبك مرة خرا
غزلان:(تنهدات وبصوت بارد قالت) قلبي تحل مرة وحدة اأميمة ودابا سديتو وعمري غانحلو مرة خراا
وصل لرياض وهو حاس براسو عيان مهدود باغي غير ينعس...مع دخل لقى مو كاتسناه ولي استقبلاتو بقلب ملهوف تاتسول فيه وعلى حالتو وحالة رحيل...جالسين فالصالة وهو جنبها شادة فيديه وبصوت خافت نطقات:جدك عيط لينا هو راه فالإنعاش گالك عندو كسور وحالتو خايبة بزاف
نوح:(ببرود) مزيان الله يزيدو من عندو
رحمة:خايفة عليك اولدي ملي يفيق غايدعيك
نوح:(خنزر فيها)يحمد الله حيت باقي النفس كاطلع وتنزل فيه
رحمة:ولدي نوح خصك تفكر فراسك عصبيتك ماعندها باش تفيدك
نوح:(بانزعاح واضح على ملامح وجهو وبصوت قاصح قال) أناا ماشي ديوثي لي نشووف داك ولد (عض لسانو قبل مايكمل ديك الهضرة) جالس كيتفرج ليا فتصويرة مرتي لي مسيفطاها ليه ديك خيتي راه ملي ماريبتش عليه هاد الريااض لباااس
رحمة:عارف بلي عندك لحق ومن حقك دير هاد التصرف ولكن أنا تانفكر فشنو غايوقع من بعد
نوح:(ببرود)نتي ماتهزيش لهم أناا قاد بهادشي غير نعسي على جنب الراحة
رحمة:جنب الراحة؟؟؟ راه راحتي هوما نتوما اولادي ولاعرفت بلي واحد فيكوم مضرور بقد هاكا (جمعات صبعها بزوج) مغانرتااحش وخاطري مغايتهناااش
نوح:(ناض من بلاصتو ماسح على لحيتو وكمل بهدوء) هادشي لي طرا منادمش عليه ولاعاود شفتو قدامي راه غاندير فيه ماكتر أنا راه مخااايف من تاواحد من غير لي خلقني
رحمة:ولكن أنا خايفة عليكوم مو مغانرتاحش وغاتبقا توسوس ليه تايديرها
نوح:(كمش حجبانو وبخشونة قال) بعدا قبل مانسى ديك مو ومرتو مايعاودوش يعتبوهااا عندي هنااا فالرياض ولافأي بلاصة ولباب لي كنت حال ليهوم غانسد باباه ونتهنى كنت تاندير بحساب العشرة والفاميلا ساعة لكانت بحال هاكا لهلا يقلب جد بوهاا لواحد لي يدوي ليا على عرااضي فوجهي وياكل فلحمي ماعندي ماندير بيه
رحمة:(بتفهم) معاك فكل كلمة قلتيها هي خرجات لبارح هضرة على باك كيف السم عمري نساها ليهاا
نوح:(خنزر) من زهرها صدقات مرا وأنا مكنمدش يدي على النساا (شاف فساعتو وقال) أنا طالع نريح لفوق مانبغي حد يصدعني
حركات راسها باه وهو خلاها ومشى طالع لجناحو يبدل عليه ويريح شوية...خدا دوش وبدل عليه بحوايج مريحة وجابت ليه السعدية لفطور على قبل دواه..كلى وشربو وتخشى بلاصتو نعس باش يرتااح من تعب ليلة دلبارح...
---
وصلو لدار لقاو كلشي كايتسناهوم وتامن أسماء وإسلام لي باتو فدار...كانو جالسين فالصالة ورنيم وأسماء تايحطو لفطور وجنبهوم رحيل لي كان لعيا باقي باين على وجهها شافت فريان وفالت بصوت مبحوح:فين سيدرا؟؟
ريان:باقي ناعسة لفوق
رحيل:(مسحات على وجهها)نمشي نشوفها
تانيرت:خليك تاتفطري وتشربي دواك وطلعي تستارحي اماما
تجمعو على لفطور وكل واحد يحط ليها وهي تتاكل غير بزز حاسة بكرشها مقلوبة عليها باغا ترد وفنفس لوقت باغا تاكل ولكن مقداش....فششوها وجلسو يهضرو وتاحد ماجبد ليلة لبارح وشنو طرا فيها وكانو تايجبدو هضرة ويتلفو لوقت تافطرات رحيل وجلسات شوية شربات دواهاا عاد ناضت طلع لفوق تشوف بنتها... مع حلات لباب بانت ليها سيدرا جالسة فوق فراشها تاتبكي بصمت .. قلبها تهز فاش شافتها هاكا وبسرعة قربات جهتها وجلسات جنبها وقالت بخوف تتقيس فيها:مالكي امامي علاش تتبكي؟
سيدرا:(عنقاتها وقالت بصوت خافت)درت بيبي فحويجاتي مامي
رحيل:(سكتات مدة وبصوت هادئ حنين نطقات) صافي امامي ماوقع باس دابا نمشيو ندوشو ونحيدو لفراش نغسلوه واخا ماتبكيش ابنتي
حيدات عليها لغطا تاتشوف فالطبعة بهدوء عمرها طرات لبنتها وبالت فحوايجها من نهار عقلات ووهي تاتفيق وتمشي لطواليط بنفسها فاش كبرات أما ملي كانت صغير تاتنوضها وتمشي معاهاا...ماغوتاتش عليها حيت الامر يقدر يوقع عادي وزيد هي مخلوعة وغير من بكاها عرفات غاتكون تأترات بشنو طرا لبارح وهو لي خلاها ديرها فحوايجها...داتها لحمام وزولات ليها لبارتي وحويجاتها وسخنات دوش وبدات دوش ليها واخا عيانة وباين فيها ولكن على قبل بنتها كلشي يهون...لواتها فلبنوار وعنقاتها بالجهد تاتبوس فيهاا وبلعناق تتوصل ليها بلي هي معاهاا وماتخليهااش... خرجاتها لبساتها وعطراتها كيف ديما تاسالات عاد خلاتها تنزل وهي زولات لغطا دالنموسية وتنهدات...عيطات لمها لي جاات عندها ونطقات بهدوء:سيدرا فزگات لحوايج
تانيرت:هااء بالت فنعاسها؟
رحيل:غاتكون تخلعات بشنو طرى لبارح وخافت داكشي علاش واخا تجيبي سبيراطور ندوزها على نموسية عاد نشمشهاا
نفدات تانيرت شنو قالت ليها وجابت ليها سبيراتور ورشات شوية دلماا مع معطر ودوزاتهاا ونشفاتها عاد جا ريان هزها وخرجات لبالكو تشمش... أما رحيل خدات دوش ومشات لبيت ريان صلات عاد تسطحات فوق النموسية ومع سدات عينيها رجعات صورة عادل طاحت بين عينيها وهو بدموو... قلبها رجف وناضت تاتمسح عنقها وتاتقرا لقرآن عالله قلبها يتفاجى عليها حيت حاسة بيه مقبووط عليها...
الأيام كادوز بهدوء ونفس الروتين عند لجميع وكل واحد فين ملهي... ربعيام بالضبط لي دازت وعادل باقي فالإنعاش وزهرة باقي تعدد وتدعي على نوووح أما حكيمة كانت صاقلة حيت عرفات بلي كلام نوح على حق وبلي بصح هي سيفطات تصويرة او بالأحرى ولدها هو لي سيفطهاا.. فاش شعل تلفونها شافت لواتساب وشافت تصويرة لي وصلاتو ولي كاانت درحيل وتاهو راه قراهاا ومامسحهااش فاش وصلات بلعكس خلاها وهادشي لي خلاهاا تغدد عليه... ليوم كيف سائر الأيام جالسة فالكراسى وحداها زهرة لي كل مرة تنخصص وسليمان راه شاد راسو معارف شنو يدير من جيه بقا فيه ولدو ومن جيه ماقدرش يحقد على ولد لحاج حيت عارف ولدو شكايسواى وهو يستحيل يجي من صفوو.. بان ليهوم طبيب جاي جهتهوم وكلهوم وقفو بقلب خاايف لايسمعو شي خبار ماهيااش
طبيب: لمريض فاق وراه فحصناه ونقلناه لشومبر عادية تقدرو دخلو عندو تشوفوه الحمدلله على سلامتو
زهرة مع قالها مشات تاتجري تشوفو وموراها حكيمة تاهي... دخلو لبيت فين حاطينو ولقاوه ناعس ولبانضة مضورة على عنقو وكتفو لي مجبر وجهو مخسر كولو لدرجة ملامح وجهو مامفرزينش واكل الدق دبصح.. قربات عندو زهرة تبوس فيه وتسول فيه وهو غير كيشوف بلعين لي بقات ليه صحيحة أما لخرى راه تسدات... دخل باه تاهو لي عيط على لعائلة وطمنهوم..
زهرة:(بحسرة) الله الحبيب ديالي واش هاد لحالة الله ياخد الحق فلي كان السباب
سليمان:زهرة هنينااا
زهرة:ومالي كدبت شوف ولدي كيف ولى وشنو دار فيه داك عدوو الله
سليمان:لاحول ولا قوة إلا بالله العلي العظيم (قرب جهتو وقال بصوت هادئ) على سلامتك اولدي كيف بقيتي؟
عادل:(بصوت متقطع) ه انتا ش وف حا ل تي "هانتا شوف حالتي"
سليمان:الله يجعلها مغفرة الدنوب وهادي دير ليك لعقل اولدي
زهرة:واش نتا ولدي يالاه فايق وراجع ليا من لموت ونتا ساير تقول ليه ديك لهضرة
سليمان: زهرة راه هضرتك وفشوشك هوما لي دارو فيه هاكا واش عارفة اش طرى وشنو دار ولامعرفااش ؟
عادل:(زير على هضرتو) ج يت ي تاا ني من ص فو "جيتي تاني من صفو"
سليمان:أنا كانجي من صف لحق هادشي أنا مراضيش عليه وممتقبلوش شي مرة فحياتك عتارف راك غالط
عادل:(مقادرش يدوي بزاف ولكن ماقدرش يكبح كلامو) ن تا ديما ت تقو ل ها د لك لام را ني أ أ نا ل ي و ل د ك ماش ي هو "نتا ديما تتقول هاد لكلام راني أنا لي ولدك ماشي هو
سليمان:وحيت نتا ولدي كانصح فيك وتانحل ليك عينيك واش مكتجلسش مع راسك وتتقول انا غالط غير تفكر شنو درتي وااش ترضاهاا شي واحد يتفرج ليك فتصويرة مرتك هااا تقبلها على راسك (سكت عادل وكمل باه) لاضربك ودار فيك هاد لحال حيت نتا قللتي حيااك وجبدتي ليه مرتو بهضرة خايبة وراه نتا مزوج ولاحطيتي راسك بلاصتو غادير نفس الشي
زهرة:لواه لواه اش دار گااع فملك الله هو مانواهاش كيف قصد ولد لحاج وزايدون ولدي من حقو يهضر ويدافع على راسو مالو يخاف منو ديك لمرة تعدى عليه وكاان غايقتلو وهاد لمرة تاني نفس الشي ونتا غير جااي فصفو راه اسيدي هادا لي ناعس فهاد لفراش ولدي يانا وأنا لي تعدبت عليه ويجي لاخر يبغي يرزيني فيه بدم بااارد والله لكانت ليه (شافت فعادل) سمع اولدي نتا مغالطش ومدرتيهاش بلعاني هو لي كان باغيها فيك ولقى ليك السبة.. ونتا خصك دعيه ودخلو لحبببس باش مايعاودهااش وباااش يعرف بلي هو غلط
سليمان:انعلي الشيطان اهاد لمراا واش حنا كانصحوه ونخليو الما ملين يدوز ونتي كاتزيدي تزندي لعافية؟؟
زهرة:اسيدي الطريق لي يجيو منها تريكتك ماعندنا مانديرو بيهاا سمعتي وأنا راه والله مغانرتاح تايدعيه
سليمان:(حمر فيها الشوفة) قولي لقيتي السبة فين تبين لحسد لي فيك لاحول ولاقوة إلا بالله (شاف فولدو) جلس نتا وضميرك وشوف شنو الصح ولغلط ماتخليش هضرة نااس تعمر ليك رااسك اولدي
خرج مخليهوم وهو معصب من مرتو لي عافية ياربي السلامة ودابا خلاص مبقات حترماتو ولاحترمات لي كبر منهاا.. وهي مابغاتش تسرط ليها أنه جا من صف نوح وبغات ولدها ياخد حقو بيديه...
جا لحاح لحسن مجرد ماعرف بلي عادل فاق ودخل لعندو شافوو وزهرة غير شافتو بدات تميق وخرجات معجبها حال ومعاها حكيمة لي مدواتش نهائيا معااه...
ماشي غير لحاح لحسن لي وصلاتو لخبار العائلة كلها ومن ظمنهوم نوح لي كاان فديك الأثناء جالس فالميزون دڤواتيغ.. كلشي كان خايف من عادل يدعيه إلا هو لي ماهتمش نهائيا وماتهزات فيه تاشعرة دلخوف.. كمل خدمتو وخرج موصي سعيد ومشى لمحالات شاف لخدمة ومع خوه وعتمان كل واحد مكلف بمحال وصاهوم عاد شد طريق لعند إدريس وفديك الأثناء صونى ليه تلفونو بنمرة جدو.. كمش حجبانو وكان عارف علياش غايعيط ليه..
نوح:لحاج لباس؟؟
ح.لحسن:(براحة نطق) ملي نشوفك بخير ومرتاح غانولي لباس احفيدي
نوح:(تبسم بحنية ونطق بهدوء)الله يطول فعمرك الحاج
ح.لحسن:آمين اولدي راه عيط ليك باش نعلمك بلي عادل مغاديش يدعيك عاد دابا شفتو وقالها ليا بفمو بلي هو مغايرفعش عليك دعوة غير تهنى اولدي وارتاح
نوح:(باستغراب هز حاجبو) وايلي هاد لمحنة لي نزلات عليه ماشي ديالتو؟
ح.لحسن:غايكون اولدي عرف راسو اش دار ومبغاش يكبر لموضوع كتر من هاكا...
مقادرش يتيق بلي عادل مغايدكلاريش وهو عارفو اش كيسوى وأكيد مغايفلتش فرصة بحال هادي فين يرد ليه دقتوو.. شك بلي كاينة شي حاجة وماعرفش اش هي وشنو قاصد عادل من هاد التصرف...واش باغي يبين راسو ضحية ولاشنو ؟؟ أما احتمال أنه بصح مديكلارش حيت ندم مستبعدة عند نوح..
نوح:هادشي الحاج مداخلش ليا لدمااغي
ح.لحسن:الله يهديك اولد لحاج نعل الشيطان ونسى صافي مغايدكلاريش ومغايقربش باقي لساحتك وتانتا نسى هادشي وخليناا مهنين من جهتك
نوح:(بهدوء) واخا الحاج نخليك دابا تال من بعد ونعاود نصوني ليك
ح.لحسن:واخا سير اولدي الله يرضي عليك
قطع معاه لحاح لحسن وتنهد براحة ولكن راحتو ماكملاتش فااش سمع لزهرة وهي تاتنگر وتاتغاوت مع سليمان مدايرة لابعتبارو ولابعتبار العائلة لي بعضها جا يشوفو عادل...
زهرة:(شاعلة ومعصبة)صااافي رتاحيتي هاهو مغايدكلاريش وحق ولدي غايمشي بسبابك نتا
سليمان:(خنزر فيها)الالة لولد دار عقلو وعرف راسو راه غلط ماتبقاايش تسممي ليه دماغو وخليه عليك
زهرة:بالسيف مايدير لي گلتي وهو كيشوفك واقف جهة عدوووه ومخليه وهو مسكين داير ليك خاطرك ونتا واش عمرك درتيه ليه هااا
سليمان:لهضرة معاك راه بحال لاكنكب الما فالرملة هنينا ودخلي سوق راسك ولاكان ولدك قال مغايدعيهش فحيت هو عارف شنو كاين
زهرة:اوا فرح وسير فرح معاك ولد خووك أو ولدي ربي غياخد حقوو بتاني ولمثني فلي كان السباب
سليمان:ربي عارف شنو كاين فالنفوس وعلى نيتكم ترزقون ولي قلبو كحل ومحساد راه عمر ربي يسهل عليه ديريها فبااالك وحشمي على عراضك وعلى كبرك ماخليتي بلاصة ماشوهتيناا فيها ولكن مزياان فاش خليتيني نشوف داكشي لي مشفتوش شحال هادي ونعرف شنو ندير من هنا لقدااام
خلاها كادوي بوحدها ومشى عند باه وهي راه باغا تهباال دخلات عند ولدها لقات حكيمة تاتوكلو فالصوبة نطقات بانفعال:علاش ماغاديكلاريش بيه نسيتي الشوهة لي شوهك قدام لعائلة ماخلى غير لي نسى فيك
عادل:(بهدوء) صا في نساا ي
زهرة:اش غانسى هادشي راه مغايتنسااش ونتا خصك تاخد حقك منو
حكيمة:صافي امرات عمي راه شفتي كلشي على عينيك هو مبغاش ماتبززيش عليه
زهرة:(ميقات فيها) شكون كايدوي نتي سباب لبلاا ودابا جالسة بلاحشما بلاحيا تخرجي فعينيك
حكيمة:ماخرجتش عيني وقلت لي كاين هو مباغيش ماتبززيش عليه
زهرة:اوا بقاو ساكتين وخليو ولد رحمة يدير مابغاا ولمرة الجايا يسيفطك لمقبرة عاد غاتهنى
مجاوبوهاش مزال حكيمة كملات تاتعطيه الصوبة وهو سكت تياكل بينما هي تاتغدد من لداخل على ماصاري..
***
ظلام لحال وغابت الشمس مخليا لگمرة تحل بلاصتها وتربع على عرشهاا.. الجو كان عادي وزوين السما كانت صافية ومنورة بالنجوم.. كانت رحمة جالسة مع سناء وبيسان فلجليسة جنب لخصة وهي مرتاحة وعاد قدرات تنفس فاش عرفات شنو كاين وماشي غير هي تقريبا كلهوم..
سناء:صراحة باقي لدابا ممرتاحاش لداك خونا كيفاش جرا تامدعاهش
رحمة:يجرى لي جرى لمهم ولدي مايضررش
بيسان:بصح تاأنا جاتني بيزااغ صراحة
سناء:ياخوفي لايكون ناوي على شي حاجة كفس
رحمة:سكتي اسنااء يهديك الله واش باغا تخلعيني
بيسان:فين خويا مباانش لياا گااع؟؟
رحمة: غايكون فلمحاال
سكتو فاش بان ليهوم رؤوف داخل تايتفوه.. لاح تقلو جنب بيسان ونطق بصوت عياان:سلام أوعليكوم
رحمة:واعليكوم السلام احبيبي كاتبان ليا عياان
رؤوف:لخدمة كثيرة ليوووم عليها
رحمة:فين خوك مجاش معاك؟؟
رؤوف:ماشفتوش من الصباح فاش جاا لمحاال
بيسان:غايكون واقيلا فلمحال التاني
رؤوف:تت مكاينش يالاه دويت مع عتمان سدو ومشى بحالو
رحمة:نعيط ليه
بدات تاتصوني ولقات تلفونو طافي وحطات تلفون جنبها وعقلها مشوش:يكون مشى لفيرمة؟
رؤوف:مكنظنش حيت لبارح مشى ليها أصلا وشاف لخدمة تم مغايعاودش يمشي ليها تاني لامكانتش شي حاجة مهمة..
بيسان:يقدر يكون مشى عند سي إدريس لگاراج
**
تحط لعشا وطلعات تانيرت لبيتها باش تعيط لإدريس ينزل... دخلات لبيت ولقاتو جالس مهموم وباين فيه ماشي على برجوو..تخلعات وقربات جهتو بلهفة تاجلسات جنبو وقالت بتساؤل:إدريس ماالك معجبتينيش ملي جيتي ونتا مجلستيش معانا وغير ساكت ياك لباااس
إدريس:(تنهد وشاف فيها بهدوء)ولد لحاج
تانيرت:(قلبها ضرب بخوف) مالو
إدريس:(مسح على لحيتو ونطق بصوت خافت)ولد لحاج جا عندي ليووم لگاراج
تانيرت:(قطعاتو بسرعة)ايييه وشنو وقع؟؟
إدريس:(تنهد) وصااني على رحييل وسيدرا قال ليا هوما أمانة عندك رد ليهوم لباال فغيبتي ومشى...
كانو جالسين قدام طبلة دلعشاا كياكلو بهدوء إسلام مخدم التلفازة وكيلوح فيها عينيه مرة مرة عكس أسماء لي كانت ساهية وباين فيها ماشي على برجهاا.. تاتقلب ديك سباگيتي بلفرشيط وتقلب فيها هنا ولهيه وملي جلسو ماحطات ففمها معلقة.. ضار شاف فيها إسلام ونزل عينيه لطبسيلها لقاه كيف هو عكسو هو لي ضرب النص فيه..
إسلام:علاش مكتاكليش؟
أسماء:(شافت فيه) غير مافياش الجوع وصااف
إسلام:(هز حاجبو ونطق بتساؤل)ماعجبتينيش هاد ليامات كلها ونتي ساهية ؟
أسماء:لا غير جاب ليك الله مساهية ماوالو غير لعياا دلخدمة وصاف
إسلام:لاكنتي تاديري إيفور بزاف فلخدمة من الأحسن تجلسي وماتعاوديش تمشي ليهاا
أسماء:(تنهدات)واش غير اجي وجلس الله يهديك اإسلام
إسلام:ومالك لامبقيتيش مرتاحة راه غاتحطي ديميسيون ومريضنا ماعندو باااس راه مغايحطووش سيف على رقبتك بااش تكملي معاهوم
أسماء:(بهدوء) أناا مرتاحة غير تهنى غانوض نمشي نعس عفاك جمع معاك لمواعن واخاا
إسلام:واخاا سيري
خلاتو متبع ليها الشوفة والشك بدا كيتسلل لقلبو...هو عارف أسماء كيف دايرة وهاد لحالة لي ولات فيها هاد الأيام مااشي طبيعية وباينة عندها شي حاجة لي معارفش اش هي ولكن أكيد مغاديش يرتاح تايعرف مالهاا..أما عندها هي لي دخلات لبيت ومشات بدلات عليها ببيجامة دنعااس وتخشات فبلاصتها حاطة راسها على لمخدة وعقلهاا خدام كيخمم...
🔙🔙
كانت كيف عادتها جالسة فالبيرو ديالها خدامة فالبيسي بحالها بحال لي معاها فلاصاال.. تاحسات بنظرات شي حد عليها وهزات عينيها وإذا بيها كاتشوفو واقف مراقبها كيف عادتو الأخيرة...بحال إلاماعندو مايدار من غيرهاا هي لي تأفأفات وهي مرجعة عينيها لشاشة البيسي كاتكمل خدمتهاا وتفكر فحل لي يخليها تهنى من وليد لي رجع بحاال شي لعنة صابتهاا.. ماعرفاتش علاش هاد الزهر معوج عندها لهاد الدرجة...ملي بدات حياة جديدة مع إسلام وقررات تفتح ليه قلبهاا وتزوجوو بانت ميس فحياتهوم مرة خراا ورجع معاهاا لماضي الأليم لي مخبيه إسلام ومتفادي يدوي عليه ومكفاش هادشي كولو رجع وليد لي كاان الشخص لي قلبهاا ارتاح ليه فيامات كانت معاه...ولي خلي راحتها تقلب ويولي مصدر إزعاح بالنسبة ليهاا... معارفااش واش زهرها مكفس لهاد الدرجة وشنو هي هاد الصدفة لغريبة لي خلات وليد يجي لنفس المدينة لي هي فيها بلامايعرفها ويولي شاف عليهاا... تبقا تشوفو كل نهااار وتصبح عليه ويولي يدير تصرفات مفضوحة بااش يقرب منها... بعض لمرات تتقول نسالي الزمر ونخرج من لخدمة وتهني مخها ولكن فااش تاتفكر إسلام تاتقول تاني لا خصني نصبر باش مايشكش فيا ويعيق ويصدق فاهم لموضوع بشي طريقة خرى... هي راه ماشي صعيب عليها تخرج من لخدمة ولكن إصرارها باش تبقاا فلخدمة قبل مايجي وليد ويبان مرة خرى خلاهاا تكنسل الأمر حيت ماايمكنش هي كانت متشبتة بخدمتهاا وبقات فيها باش مايخليهااش إسلام تخرج وتجلس فالدار كيف قال ليها... عارفاه يديرهاا ومايهضر معاه حد وهي مباغاش دير مشاااكيل فبداية زواجهوم لي باقي ماكمل تاعاام يالاه فالشهور الأولى ليهوم... هي عياات من داك شد ليا نقطع ليك باغا تعيش حيااة مهنية مافيها لاصداع لامشاكيل باركة غير لمشاكيل لي عاشو هاد لمدة كلهاا ولي باقي تشاش ديال دوك لمشاكيل كيأتر عليهوم.. كملات خدمتها عااادي تاجات تخرج وهو يوقف ليها حدا لاسونسور مامخليهاش تنزل..بغات تهبط فالدروج ساعة سبقها وشدها من يديها وقال بهدوء:اجي معايا
أسماء:(نترات يديها فاش شافت وحدة من لي خدامين معاها دازت وبقات تاتحنزز فيها ونطقات بانفعال) جمع يديك عندك ابناادم وماتقيسنييش واش مريض فدماغك
وليد:أسمااء خلينا نمشيو لبيرو ونهضرو براحة
أسماء:هاد الساعة مكاين فاش نهضرو الشريف وخليني عليك مرة خرا نشوفك تاضور بجنابي نتفاهم معاك
خلاتو ومشات وهو بقا كيغلي ويتحسر على فين وصلات بيه ليام معاها..داز داك النهار وتبعوه يام خرى لي وليد مادارش بكلامها وبقا فكل مرة تايوقف ليها ويبغي يهضرها وطريقتو كانت باينة طايح فيها وكل مرة يشوفهوم شي حد ويبقا يطلع وينزل فيها مع عارفينهاا مزوجة فالبلان بااين... وكيف عادتو فهاد الأيام واقف ليها على لباب كيتسناها تجي تبانت ليه وقرب جهتها وقاال بسرعة:علاش مكتجاوبينيش ملي صونيت عليك
هادشي لي بقا ليها مكفاهش الشوهة لي تايدير ليها والإزعاج لي كيزعجها زادو التلفون تاهو لي كل دقيقة يصوني عليها تابلوكاتو وماتفكش جاب نمرة خرى وبقا تيصوني بيهاا...
زيرات على يديها وسرطات كلامها بغضب فاش شافت واحد خدام معاها يالاه داخل تاهو كيشول فيهوم وخلاتو ومشات لبيروها وهي واخدة قرار أنها غاتحبس الزمر من الأساس.. الله ينعل بوخدمة لي تجيب ليها لمشاكيل مع راجلهاا.. هزات ورقة بيضا وجبدات من لبيسي واحد لمثال ديال ديميسيون "الاستقالة" وبدات تكتب وتقادها على حساب سيتوياسيون ديالها هي...سالاتها وسنات وناضت غادة تحطها ليه وتوريه بلي هي ماساهلاش ليه.. دخلات وغير شافها تبسم حيت جات عندو ساعة مطالتش التبسيمة فاش حطات ليه ديك الورقة فوق البيرو مخلياه مطلع حاجبو ونطق بهدوء فاش قراها:شنو هادشي؟
شافت فيه وهي هازة حاجبها لسماا وخيخات عليه:من ليوم مغاتعاودش تشوف كمارتي حيت أنا غانمشي بحالي قلت غاتفهم راسك وتجمعو ولكن نتا زدتي فيه أنا أسيدي مزووجة فهمتي مزووجة ومباغاش نخرج على دااري بسبابك نتاا عييت مانشرح ليك ونوريك بلي أنا مابقيتش أسماء لي كاتعرف ويستحيل نرجع كيف كنت معاك حيت أنا نسيتك وبديت حياااة جديدة لي نتا مكاينش فيهاا ولي ختاريت فيها الرااجل لي أناا باغااه يكمل معااياا فهم اوليد بلي داااكشي دشحاال هادشي مبقاااش نتا ضيعتيه بيديك وبكدوووبك
وليد:(ضرب بيديه على لبيرو وقال بانفعاال) وأناا شنو دنبي هااا بغيتك وباقي كانبغيك ونتي لوحيدة لي دخلات قلبي وقفت قدام باا على قبلك وكنت غانسمح فگاااع داكشي لي عندي كون مابنتي لي جاات فطريق وعلى قبلها صبرت (قرب جهتها) علاش ماتسمحيش لياا ونساو مفاات هاا مستااعد ندير أي حاجة اأسماء غير قولي ااااه
أسماء:(ببرود)لا وعمري غانرجع معاك سمعتي نتا صفحة وقطعتهاا (أشارت لديك لورقة) وهادي هي استقالتي
وليد:(زير على يديه مراضيش ونطق ببرود) وأنا مموافقش عليها
أسماء:وافق ولا ماتوافقش شغلك أنا ماسوقيش فيك
عطاتو بالضهر باش تمشي وهو يوقفها صوتو لي قال بحدة: غاتبقاااي هنا اأسمااء ومغاتمشي فين
أسماء:(هزات حاجبها وقالت بسخرية) من نيتك
وليد:(قرب جهتها وقال) نتي مغاتخليش لخدمة
أسماء:وتاايق من راسك
وليد:(بمكر)بزااف
أسماء:وشنو سبب هاد التقة؟
وليد:(حدر راسو وجبد تلفونو كيقلب فشي حاجة تاضورو جهتها ونطق بمكر) عقلتي على هادي ابونبونايتي؟
عينيها على شاشة التلفون كاتشوف فديك التصويرة لي كانت ديال لحفلة لي مشات ليها فاش كانت خدامة عندهوم وكانت لابسة غوب فالغوز.. واقفة فلكولوار وهو معاهاا كيبوسو بعضياتهوم واللقطة مشدودة فيها وباينة مزياان.. خرجات فيه عينيها وهي ممتيقااش بلي هو باقي محتافظ بتصويرة دازت عليها أعواام.. ولمشكيل أن اللقطة كانت ماس.خة ديال بصح وفاش تصورات هي مرداتش ليها لباال وكانت عايشة مع لبوسة ديالو..دوز لصور تانية لي كانت فنفس اللقطة غير مكانوش بايسين بعض إنما قراب من بعض ومكيفصل بناتهوم والو...
وليد:فنظارك راجلك لاشاف هاد التصاور شنو غايكون رأيو وتصرفو همم
أسماء:(طارت على تلفونو باغا تنثرو ليه ساعة كان قوى منهاا وشدهاا من عنقها وفيكسى ليها راسها قدام وجهو ونطق بنفس ساخن وعيونو على ملامحها لي طيحوه فيها ونطق بهدوء) فيا مانسيفطهوم ليه ولكن مادرتهاش حيت باغي تجي منك بخاطرك بونبونايتي وتخليه نتي وتجي عندي.. دابا غانعطيك وقت فين طلبي الطلاق وتخلي راجلك وتجي عندي ونعيشو حياة زوينة بزووج بينا الكرة عندك ابونبونايتي ونتي غاتحددي..
أسماء:(دفعاتو وعطاتو نصرفيقة لوجه تاقلبات وجهو ونطقات بشراسة) الله ياخد فيك الحق الحيواان زااا*مل بغيت ربي يهنيني منك مغاتبقاش فيك اوليد وغاندمك عليها غير بلاتي
خرجات تاترعد وبين عينيها ديك تصويرة دياالهوم بزوج وقلبها غايخرج بلخوف لاطاحت ديك تصويرة فيد إسلام اش غاتكون ردة فعلو...
🔜🔜
فاقت من دكرياتها على صوت أنفاس إسلام لي ناعس جنبها وملوي يديه على كرشها ضامها لعندوو بهدوء..أما هي سدات عينيها وتفكيرها فالحصلة لي هي فيها بصح مادارت والو وبلي راه داكشي دزمان ومامنحقوش يحاسبها عليه حيت هو مكانش فماضيهاا يعني حقها وكل واحد منا عندو ماااضي ولكن هو دابا حالة خاصة سبق ليه وتعرض لخيانة من ميس لي خلاتو يتبدل ويولي إسلام آخر... وهي خايفة يشوف تصاور ويفهم غلاط وخايفة تقولها ليه ومايتيقهااش ويشك فيها وهي مبااغااش تخرج زواجها حاسة براسها طايحة فحفرة صعيب طلع منها.. ضارت جهتو ودفنات راسها فصدرو وهو ضمها ليه وبدا كيدلك فروة راسها تاغفات وسدات عينيها مريحة عقلها لي تهلك بتخمام بدون فايدة...
فبيتو جالس فالظلام لي كسرو نور الگمرة لي داخل من الشرجم لي محلول وخواميه الكوحل الطوال كيطيرهوم الريح.. حاط يديه فوق ركابيه وجامعهوم بزوج ومحني ضهرو لقدااام...ساكت وساهي كيفكر فآخر لقاء مع بااه لي كان ليوم فالصباح وبلهضرة لي قاال ليه...ديك لهضرة لي مكانتش عاادية كيف كل مرة.. هضرة خلاتو يحس بشي حاجة فلداخل ديالو ضراتو وماقدرش ينساهاا..
🔙🔙
خارج من لاصاال مور ماصونى ليه بااه باغيه فشي حاجة ضرورية عليها خرج فوسط تدريباتو.. تايضور راسو يمين وشماال تبانت ليه طوموبيل باه الغنية عن التعريف جيپ كحلة تاتشعل وكاتبان من بعيد..تمشى جهتها بخطوات مزروبة تاوصل جنبها وحل لباب ودخل جلس فالقدام.. لقاه جالس وساهي ومافاق غير على صوت لباب لي تحل وتسد..
زين العابدين:(بصوت هادئ) واش واقعة شي حاجة؟
نوح:(تبسم ليه بحنية وتجاهل سؤالو)ساليتي لونطريما ديالك؟
زين العابدين:(حرك راسو) لا باقي
نوح:مزيان أصلا هاد ليامات ماعندكش دزونگاجمون بزاف حيت المتحانات قراب عليها الكوتش مرخف عليك الحبل ولكن هادشي مكيعنيش ترخف وتكاسل
زين العابدين:لا راه كانطريني فالدار
نوح:(مسح على لحيتو وقال بهدوء) عرفتي علااش قلت ليك باغي ندوي معاك ضروري
زين العابدين:(حرك راسو بلا) الصمت
نوح:(بصوت خشن وهادئ قال) سمع ازين العابدين نتاا مابقيتيش ولد صغير وأكيد نتا غاتفهم كلامي مزيااان (مسح على لحيتو وكمل) نبغيك دير عقلك فراسك وتحاول تنقص من ديك لعصبية دياالك (شاف فيه وتبسم)عارف بلي شابهني فيها وبلي دمك حامي بحالي ولغالب الله
نبغيك ترد لبال لرااسك مزياان وتقرا قرايتك عارف ولدي كبابل وبخصوص القرايا مايحتاجش وصاية ولكن ضروري نوصيك.. وحاجة خرا مانبغيش لمشاكيل ديرهوم فلمدرسة مزااال كيف شحال هادي ونبقاا جاي وغاادي كانهز فوراق الانتقال من هاد لمدرسة لهااادي
زين العابدين:(قاطعو بسرعة)ولكن علاش تتقول هاكا
نوح:(جرو من قرفادتو فلحركة لي مولف يديرها معاه من صغرو وقال بحنية) أناا غاادي معارفش وقتااش غانرجع داكشي علاش باغيك دير عقلك وتخليني هاااني من جيهتك الله يرضي على ولدي
زين العابدين:(بترقب وخوف)فين غاادي؟
نوح:(خربق ليه شعرو وقال بهدوء) كلامي مانبغيش نعاودوو ونبغي ملي نرجع نلقى كلشي هو هداااك واخااا (شاف فساعتو ونطق بخشونة) يالاه سير لونطريما ديالك كملهااا وكيف وصييتك دير واخاا
زين العابدين:(شد فيديه ونطق بخفوت) نمشي معاااك؟
نوح:(جرو معنقو بالجهد وباسو فوق راسو وقال بخفوت) رد لباال لرااسك فغيبتي واخاا (رجع بااسو بالجهد فراسو عاد بعد وقال بخشونة) ياااالاه نزل
بقا زين العابدين كيشوف فيه مدة بدون ماينطق بتاحرف.. حاس بلخنفة وهضرة بااه خلاتو يحس بخاطرو كيتتزير عليه وخصوصا وهو كيوصيه وبحال لاكيودعوو.. عض على شفتو وحل لباب وقبل ماينزل نطق بخفوت وبصوت باح:رد لباال لراسك
خرج زين العابدين وسد لباب أو وقف كيشوف فوجه باه لي باين من الزاح لي مهبطو... تبسم ليه نوح بحنية كيف مولف وحرك طوموييل غادي ومخليه وااقف فبلاصتو وفلداخل ديالو تيقول "ماتمشيش الواليد ماتخلينيش" ولكن هو مشى وطوموبيل غبرات قدام عينيه مخلييياااه يزير على يديه ويعطي بالضهر لشانطي راجع لصاال يهز مسائلو ويرجع لدار حيت مبقا عندو خاطر لونطريماا...
🔜🔜
من ديما هو مولفو معاه ملي حل عينيه عليه وهو فجنبو ولى متعلق بيه بشكل غير طبيعي.. ومكانتو عندو عالية بزاف ويستحيل يوصل ليها شي حد.. باه هو كلشي فحياتو هو الشخص لوحيد فحياتو لي عاطيه قيمة.. هضرتو خلات صدرو يرجع يضيااق وهو معارفوش فين مشى وشحال غايغبر أو وقتااش غايرجع ولكن لي عارف هو غايدير بكلاموو ومغاينزلوش الأرض... كيف وصاه غايدير تايرجع تاني..
***
ملي قال ليها إدريس ديك لهضرة جلسات تاتشوف فيه وهي ساكتة ماعارفة ماتقول خصوصا فاش سولاتو فين مشى وقال ليها ماعرفش.. هزو ليه لهم وماعرفووش فين غايكون مشى وياك ماواقع معاه شي مشكيل.. أما إدريس فهاداك حالة خاصة مافكرش فرحيل حيت عارف بنتو مع لوحم دابا راه غاتكون ناسية شي حاجة سميتها ولد لحاج...إنما هاز لهم لولد لحاج لي عارف بلي هاز فوق جهدو وهادشي فكرو فيه هو فياماتو..
تنهد ودوز ديك الليلة كيفكر تاصبح الصباح وكلشي فاق ومنهوم رحيل لي قررات تحيد عليها لعگز وتنووض لخدمتها تقابلها بنفسها..داك لمحال كان حلم بالنسبة ليه وفاش تحقق خصها دير جهدها.. لبسات عليها ونزلات لتحت فطرات وخرجات شادة طريق لمحال ديالها لقاتهوم حالين...دخلات تاتلقي السلام وطلعات لبيروها وموراه غزلان تاتسول على خبارهاا.. دوزات نهار تم وتغدات تم نيت مع لبنات وفلعشية جاا عتمان كيف عادتو وهو يلقاها وهبط راسو باحترام ونطق:سلام أوعليكوم
رحيل:واعليكوم السلام
عتمان:الأمور دلمحال غادة مزيان والسلعة راه جاات ولد لحاج وصاني قبل مايمشي نتكلف بهاد لمحال
رحيل:(حركات راسها بدون ماتنتابه لكلامو) مكاين لاش أنا راه غانولي نجي بلاماتعدب راسك
دخلات أسماء بوجه باين فيه التعب قربات جهتها وانساحب عتمان ورحيل نطقات بتساؤل:مالك؟؟
أسماء:(بقلة حيلة)واقعة فمشكيل ومالقيت حد من غيرك يعاوني..
شوفتها فهاد لوقت خلاتها تستنتج بلي راه لمشكيل كبير وزيد وجهها لي باين فيه لعيا.. حركات ليها راسها بلاماتهضر وطلعو لفوق بينما عتمان انساحب فاش طمن على لمحال...دخلو لبنات وكل وحدة شدات كرسي ورحيل رجعات شافت فأسماء ونطقات بهدوء:مالكي؟
أسماء:(عضات على شفايفها ممفقوصة)حاسة براسي دايخة وتالفة بزاف أول مرة نحصل فشي مشكيل ومانلقاش ليه لحل ارحيل عييت مانفكر وعييت مانقلب والو
رحيل:(بخوف قربات كرسيها جهتها وشدات فيديها)أسماء ماتخلعينيش عليك اش واقع معاك
أسماء:داك الز*امل دوليد كيهددني
رحيل:(حلات عينيها بتفاجأ) باياش كيهددك؟؟
أسماء:تعقلي فاش كنت خدامة فشركتهوم ياك حضرت لواحد لحفلة(حركات رحيل راسها باه) تما كان هو باسني وأنا مامنعتوش حيت فديك لوقيتة كان همي غير راسي وممسوقة لحد وكنت طامعة داكشي علاش
رحيل:(حركات راسها وبهدوء قالت) ولكن هو علاش هددك دابا وشنو طرا بيناتكوم تابدا يهدد فيك
أسماء:حيت عيق كل مرة تايبغي يهضرني ويتقرب مني وأنا كانحبسو ماتسرطاتش ليه أنني تزوجت داكشي علاش بقا يتقرب وقالك باغي يصلح مافات ساعة مع من عطيتو جوابو وقدمت لاديميسيون ديالي ولكن هو مرضاش وبقا يهددني بتصويرة لي كان ولد لقح*بة خداها ليا فديك لحفلة لي عاودت ليك عليهاا فاش كان تيبوسني تصويرة كانت باينة بزاف
رحيل:(كمشات حجبانها وقالت) وشنو وقع من بعد؟
أسماء:باغيني نتفارق مع إسلام ونكون معاه ولامادرتهاش غايصيفط ليه تصااور ونتي عارفة إسلام لاشافهوم غايقربلهاا
رحيل:(خنزرات فيها وقالت بانفعال)شفتي شنو كنت تانقول ليك شحال هادي النصائح لي كنت نصحك ونتي مكنتيش تسوقي تت نهار لول فاش جيتي قلتي ليا راه هو لي ولى بلاصة لمدير قلت ليك خرجي وخلي الزمر ونتي مكتسمعيش هاهو طغى وضسر وشدك من ليد لي كاتوجعك علااش اش كاتسنااي من تريكة الصفريوي بحالو بحال خوووه(مسحات على وجهها) شوفي نتي خصك تقوليها لإسلام هادا هو لحل لوحيد لي عندك
أسماء:(حركات راسها بالسلب بزربة)لا لا لا واش بغيتيه يقتلني ويقتلو أكيد مغايتيقش واش نسيتي شنو دوز مع ديك لقح*بة دمرتو وتبيديق لي بدقاتو تاولى مشكاك
رحيل:وشنو غاديري متلا تخليه وتمشي مع داك لمريض لي كيهدد فيك؟
أسماء:(تنهدات بتعب)ماعرفتش باغا شي حل لي نسل بيه الشوكة بلادم حل لي يهنيني منو ويخلي إسلام مايعرف والووو
رحيل:مكاين تاشي حل أأسماء حيت كلشي واضح وباين هو نيتو يفرقك على راجلك حيت باغيك وغايدير كلشي باش تكوني معاه لدرجة أنه بقا محتافظ بدوك التصاور لي دازو عليهوم سنين وممسحهومش واخا تفارقتو ونتي بعدتي عليه وهاهو ردهوم نقطة ضعف ليك سمعي اأسماء نتي ماعليك دنب لامشيتي وعاودتي لإسلام حيت داكشي وقع فماضيك وهو مكانش فيه وماعندوش لحق يلومك عليه هو راه عارفك كيف كنتي وعاشرك مدة قبل مايتزوج بيك يعني نتي ماضحكتيش عليه أو وريتيه لوجه ديالك ماشي بحال ديك خيتي لي غدراتو ولكن لاسكتي على هادشي دابا وخليتي لاخر يشدك مزيان وماعلمتيهش وساق لخبار فأكيد غادي ياخد موقف وأي حاجة يديرها ديك ساعة من حقو حيت كاتعتابري خنتيه ماشي بضروري الخيانة تكون جسدددية راه غير هادشي غايتعتابر خيانة وأكيد نتي مغاتبغيش هادشي اأسماء
أسماء:(ناضت من بلاصتها غادة جايا وبصوت خافت قالت) خايفة ارحيل خايفة نمشي نقولها ليه ويصدق فاهم غالط نتي راه كاتشوفي إسلام عادي بالنسبة ليك ولكن أنا لي عارفااه تعقلي نهار جات تريكتو ومعلمونيش فاش دويت وتعصبت عليه راه السيد تسيف...
رحيل:شي طبيعي هو داز من تجربة لي قصحاتو تجربة لي غيرات فيه شحال من حاجة أنا غاندوي عليه حيت عرفتو قبل مايطرا معاه داكشي هو كان حنين ديما ضاحك تيعاون ومسالم بزاف قلبو كبير ولكن هو تبدل بسبابها (تنهدات) تخيلي معايا لمرا لي كاتبغي تعرفها كاتخونك مع صاحبك وماشي غير هادشي بنتو لي هي بنتها قتلاتهاا بدم بارد عطاتها سيرو دنعااس باش ماتعصبهااش وباش تخليها تهضر براحتها مع داك لحيوان ( ناضت تاهي وتمشات جهتها ونطقات بهدوء) إسلام واخا تبدل وكراكيطرو تغير ولكن هو حنين وديك لحنية نتي خصك تعرفي كيفااش تخليها تبقا أسماء راه صعيب شي لي نتي فيه وهادشي عارفاه ولكن ماتحاوليش تسكتي وتخلي الأمور تفاقم وتصدقي فمشكيل كبير
أسماء:(عنقاتها وبلاماتشعر بدات تبكي) أنا كانبغي إسلام ارحيل ومانقدرش نتخيل حياتي بلابيه عارفة بلي شحال هادي كنت طالقاها تسرح ولكن ربي عالم بلي من نهاار قبلت بيه وتزوجت بيه وأنا غادة معاه بنيتي وعمري فكرت نخونو
رحيل:(تنهدات وبدات طبطب عليها) عارفة هادشي علاش خصك تصارحيه باش تفدااي مشكيل كبير شوفي فيا (شافت فوجهها وباستها) نتي ديري لي عليك وخلي لباقي فيد الله
أسماء:(حركات راسها باه) عندك لحق غاانقولها ليه ليوم بليل وغانقطع ساس المشكيل من الراااس واخا عارفاه غايدير شي كارثة فلاخر ولكن ماعندي ماندير
رحيل:نتي غير حيدي لومة عليك وديك الساعة يكون خير
أسماء:(تبسمات ليه)صراحة كنت محتاجة ندوي معاك هاد ليامات كلها لي كنت تانفكر فيها حسيت براسي عييت ولكن غير جيت عندك وهضرت رتاحيت
رحيل:اوا الله يزيد فراحتك
أسماء:(قاست لكريشة لي كبرات ونطقات)اوا عقبال عندك يمشي داك لوحم باش ترجعي لزمانك لي كان غايقتلل على قببلك..
لكالم لي كان فالبيرو مقاطعو غير صوت تنهيداتو لي كانو تيعبرو على التعب النفسي لي كيعاني منو.. كان تيظن بلي لهضرة غاتكون ساهلة ولكن كان غالط...حيت كلما هضر على شي حدث وقع معااه كان تيحس براسو عايشو من أول وجديد...حاس براسو مزير فاش وصل ليوم موتهاا وجاتو خبارهاا..باقي صورة الجث.ة ديالها وهي فداك لكيس الكحل بين عينيه...والطريقة باش تقتتتلات كانت قاصحة وتاحد ماتقبلهاا.. حادر راسو وساكت وطبيبة جالسة قدامو...تاتنوطي كلشي وأي حركة دار تاترد لبها لباال...هز راسو وشاف فيها وعينيه كانو حمرين حيت حابس البكية لي شداتو نطق بصوت مدبدب بلعياء:نقدرو نحبسو هنا
طبيبة:واخا تالحصة الجاايا ونكملو
حرك راسو باه وخرج من لبيرو مبعد ماشكرها أو ودعهاا.. كانت الشتاا والناس واقفة تاتسناها تحبس... وقف تاهو فجنب الطريق تايشوف فقطرات الشتا لي نازلين من السماا... مدة قليلة باش بدا مع الطبيبة وباقي مايقدرش يأكد واش كاين تحسن ولكن لي عارف هو أن لخطوة لي دار نهار جا عندها باش يتعالج خطوة صحيحة... هو عيى ومل من الأغلاط لي تايدير ولي بسبابهوم جرح بزاف ديال الناااس ولكن أكبر نصيب كان ليها هي... هي لي من نهار عقل عليها وهو تايجرح فيها بلا مايحن بحال لاقتلااات ليه شي حد عزيز عليه... عمرها أداتو ولكن هو فلمقابل أداها بزاف...تنهد فاش تفكرها وسرح بعقلو فأيامو لقليلة معاها مور زواج...وتيقول كون ماجرحتهاش بداك لهضرة وهزيت يدي عليها كون راها باقا معايا ومطلقنااش...عارف راسو هو لغالط وعمرو لامها حيت عارف حجم غلطو قداش...تحبسات الشتا وكمل طريقو غادي ومعارفش فين لمهم مباغيش يدخل دابا لدار ومحتاح يشم هوا ويجلس طرونكيل مع راسو...غادي تاالقى راسو واقف قدام محال رحيل من الجهة لخرى...عينو كانو تيشوفو فلمحال وكيسول راسو أنا شنو كندير هنا وعلاش جييت.. لقى بلي ماعندو تاجواااب تكى على واحد الشجرة ومع بدا يظلام الحال تشعل الضو دلمحال وبانت الإنارة ولداخل ديالو كثر من داك الزاج.. كايراقب لمحال خلسة وداخليا كاان تيقلب عليها... مشافهاش من نهار الجلسة اخر شوفة دارت فيه فااش نطق لقاضي لحكم... حدر راسو كيزفر النفس ورجع طلعو وإذا بيه كيلمحها واقفة جهة لاكيس وتاتسربي لكليانة لي قدامهاا... جامعة شعرها كوت شوڤال ولابسة تريكو نواغ كول مونطي وفوقها جاكيط دلخدمة فيها لبادج دلمحال تبسمات لسيدة وعطاتها ساشي ديالها ونزلات راسها تاتقااد الصرف لي تم وتستف كل قطعة نقود فمكانها تاسالات وسداتو وهزات راسها وهو بزربة ضار ورا الشجرة وقف فيها... مبغاش تشوفو واخا راه لمسافة شوية بعيدة ولي لداخل صعيب يلمح لي برا حيت الظلام ديال الزنقة وزيد طوموبيلات تايدوزو عكسو هو لي تيشوفها مزيان بسبب إنارة المحال... رجعات الشتا كاتصب وهي تبسمات وقربات جهة الزاج كاطل وتشوف فالشتيوة تاوقفات حداها أميمة ونطقات: ياختي الشتاا ديال شي جبانية دلحريرة لحامضة مع الشباكية
غزلان:(ضحكات) والله تاهي لي لقيتيني كانفكر فيها هههههه ناري كاتاخدي مني الأفكار
أميمة:مغايقدناش لوقت نصاوبوها حيت غانكونو عيانات شبان ليك ندوزو ناخدوها واجدة معانا
غزلان:ايخصنا كاسرون اصاحبتي هههه فين يديروها لينا ميكة
أميمة:نشربوها تم؟
غزلان:لا باغا نشربها وأنا مغطية بلكاشة هههه
أميمة:( فكرات) ااااه شبان ليك ناخدو داك لكاسرون لي كاين هنا كانطيبو فيه ؟
غزلان:والله تامعلمة نسيتو گاع هههه
أميمة:(شافت فساعتها وقالت)غانسدو شوية بكري رحيل قبل ماتمشي قالتها ليناا نتسناو تال تمنية ونص ونهبطو الريدو
غزلان:صافي واخا مشات
مشات أميمة تكمل شغالها وهي بقات تاتفرج وتتفكر فحياتها لي ولات غادية فريتم عادي من لخدمة لدار وگاع لاجددات تتمشي لفااك... مغاتنكرش بلي توحشات الأجواء دال دار إدريس والجماعة ديالهوم لي تاتحسسك فوسط عائلتك... ضحك ريان وتقشابو وحنانة إدريس واهتمامو ولقلب لكبير دتانيرت ولهبال درنيم...توحشاتهوم بزاف وحاسة بلي هاد الطلاق مافرقهاش غير عليه هو إنما تاگااع العائلة لي ولات عائلتهاا... ولكن مغاتنكرش بلي ربحات معرفتهوم ودابا ولات عندها عائلة لي غاتبقا تزورها وتشوفها ماشي بحال قبل كانت تاتعرف غير أميمة فقط... حكات يديها بزوج ومشات تستف السلعة لي تخربقات ويشيكو على لمحال قبل مايسدو... مخلية محمد طه كايشوف فيها بحسرة وباشتياق واضح من نظرات عينيه... واخا سرد بلماا ماتزعزعش من تم وبقا واقف تابانو ليه كيسدو وكل وحدة شدات طريقها وأميمة وغزلان تشادو غادين تاهوما...دار قب الجاكيط وتبعهوم بلامايعيق لقاهوم غادين ياخدو لحريرة عند واحد السيدة عاد شدو طريق لدار وهي محساش بيه وماشافتوش...تاوصلو قدام باب العمااارة وهي ضور غزلان بخطفة هازة لكاسرون عامر حريرة وأميمة كاتحل باب العمارة... لمحات شخص واقف وعاطيها بالضهر وقلبها ضرب بالجهد وعينيها تعلقو عليه نفس الطولة ونفس الوقفة همسات بين شفايفهاا بخفوت:محمد
أميمة:زيدي راه تگلاصيت بلبرد
غزلان:(شافت فيها ورجعات ضارت شافت فالشخص لقاتو طار) هانا جايا
دخلو لعمارة وهو بقا تايشوف فديك لعمارة جنب واحد لمحال وعلى شوية كان ايتفضح كون مضارش ولكن الأهم أنه عرفها فين ساكنة... مسح على وجهو ورجع شاف فلعمارة قبل مايتحرك ويرجع لدار وعظامو حس بيهوم تگلاصاو عليه...
وصل لدار بستة وستين تكشيفة ودخل نيشان لبيت هز فوطة وحوايج لي غايلبس وحط سبرديلتو وجاكيط ودخل لحمام خدا دوش سخون وخرج لابس حوايجو ونيفو حمر كل مرة يشمر بيه... نزل لتحت ولقى غير باه وتانيرت لي جالسين تايهضرو تاشافوه وهوما يسكتو..
محمد طه:فين لخرين؟
تانيرت:ريان سخرتو ورحيل عياات مشات تكى على مايوجد لعشا ورنيم راه فلكوزينة
إدريس:(نطق مباشرة) واش عارف فين مشى ولد لحاج؟
محمد طه:على هو فين غايمشي؟؟
إدريس:مقال ليكوم والو فلخدمة؟
محمد طه:لا نهار جاا قال لسعيد يتكلف بلخدمة كيف ديما ومشى (بتساؤل)علاش واش واقعة شي حاجة؟
تانيرت:نهار مشى عند باك هو وصاه على رحيل وسيدرا مشى ومن تم وباك تيصوني عليه وتيلقى تلفونو طافي من داك النهار وخفنا لاتكون واقعة ليه شي حاجة...
سمعو صوت سيدرا لي كانت واقفة قدام لباب نطقات بخفوت وصوت باكي:فين هو بابانو
مكانوش متوقعين تسمعهوم سيدرا حيت مباغينهااش تعرف خصوصا تعلقها بيه كبير...
قربات بخطوات صفار جهة جدها تاوقفات قدامو ونطقات:بّاديدي فين هو بابانو؟
إدريس:(بهدوء وبكدب) نخشيشتي باك عندو شي خدمة عليها مشى باش يقضيها
سيدرا:(شافت فيه وشافت فتانيرت ورجعات شافت فيه) وعلاش تانيرت إينو قالت مكيجاوبش فتلفون؟
كان عارف لاسمعات بلي نوح مشى غاتبقا تسول ومغاترتاح تاتعرف فين هو.. وإدريس براسو معارفش فين مشى والسيد معاطي لحد راس لخيط بات ماصبح..
إدريس:تانيرت إينو معارفة والو هو جا عندي وقال ليا بلي عندو خدمة وخصو يمشي ضروري
سيدرا:(دلات شنيفاتها)بغيت نهضر معاه؟
إدريس:هو غايكون دابا ناعس خليه من بعد ونهضرو معاه
سيدرا:(عنقاتو ونطقات بخفوت) مغايخلينيش ابّاديدي يااكا؟
إدريس:لا انخشيشتي بااك مغايخليك
عنقها وتانيرت تاتنهد وناضت مخليا محمد طه مراقبهوم بهدوء... وهاد لكلام مكانش غير فدار سي إدريس إنما فالرياض لي جالسة فيه رحمة والخلعة باينة فوجهها لي مسقوط منو دم... ملي عرفات نوح مشى وعقلها معاه خصوصا مقال ليها والو كيف كيدير بعض لمرات تايهز بگاجو وكيمشي ومكايعلمها تاكيكون وصل لبلاصة لي مشى ليها ولكن هاد لمرة لا مشى وقطع حبل تواصل بيناتهوم... تامن ولدو مقالش ليه فين مشى وخلاهوم تايحمقو راسهوم لدرجة رؤوف طلع لفيرمة باش يشوف واش كاين تما ساعة مالقاهش
بيسان:ماما عافاك تهدني خويا غايكون غير بغا يرتاح عليها بعد
رحمة:يرتاح يعلمني كيف عادتو ماشي يبات مايصبح
بيسان:شوفي خويا راه كبير وبعقلو مايحتاجش تبقاي تابعاه فيما مشى
رؤوف:بيسان عندها لحق هو غايكون باغي يريح دماغو ماتنسايش داك لمشكيل لي طرا دعادل راه لا إله إلا الله السيد من حقو يرتاااح
بيسان:نتي ماتخلعيش اماما هو بخير أنا متأكدة
رحمة:الله يردير تاويل دلخيير غانوض نعس تصبحو على خير
بيسان:مغاتعشايش؟
رحمة:ماعندو ملين يدوز
مشات رحمة بعقل مشطون وقلب خاايف مخليا تابيسان ورؤوف مشطونين واخا طمنوها ولكن تاهوما مغاينكروش بلي مشطونين على خوهوم ساس هاد الدار ولي جامعهوم...
---
عند أسماء ملي وصلات لدار قررات أنه تعلم إسلام ولي ليها ليها ياربحة يادب.حة...بدلات حوايجها ومع مشات توجد لعشا صونى عليها وجاوباتو بسرعة:فينك علاش تعطلتي؟؟
إسلام:(بصوت متوتر) أسماء سمعيني أناا غادي لكازاا و..
أسماء:(قطعاتو بسرعة) اويلي علاش غادي؟
إسلامة(غوت منرفز) سكتي خليني ندوي لواليدة مريضة عاد عيط ليا خويا وغادي نشوفهاا مكانش عندي كيف ندير باش نديك معايا راه من لخدمة خرجت بزربة وشديت طريق لمهم لاكنتي فالدار خليك وغدا سيري باتي فداركوم تانجي ماتبقايش بوحدك
أسماء:نجي عندك غداا مانخليكش بوحدك
إسلام:فين غاااتجي ابنادمة واش هبلتي دوويت معاك أنا غانوصل ونعلمك بلي كاين وغدا سيري لداركوم تانجي ماتخليش عقلي يتشطن معااك
أسماء:(تنهدات)رد لبال لراسك وسوگ بشوية واخا احبيبي
إسلام:واخا اغزالي نخليك شوية ونعاود نعيط ليك وسمعي لكلام واخا
أسماء:طريق السلامة
قطع وهي زفرات النفس وقالت بصوت خافت:زهري خاريين فيه لمشاش ملي عولت ندوي خرج هاد لبلان من جنب اوووف
كتبات مساج لرحيل لي وصاتها باش تعلمها بلي كان ومشات توجد ليها متاكل باش تنعس وهي مقررة غدا ماتمشيش لخدمة..
**
كايفطر ليازيد مع واليديه وهو عينو على مو وكيتفكر تجاهل سناء ليه من داك النهار لي خيراتو يايجي يخطبها ياينساها.. وهو أكيد يستحيل ينساهاا ولحل لوحيد هو يعاود يهضر مع مو ويقنعهاا.. ناض باه غادي لصالة يجلس وهو ستاغل لوقت ونطق:لواليدة ندويو
طامو:اش بغيتي؟
اليازيد:(بجدية)سمعي الواليدة هادشي بدا يطلع ليا فصحتي نتي علاش مقصحة راسك مانعرف أنا عييت من هاد لمرض وباغي نتجمع مع السيدة لي كانبغي ونتي مقصحة راسك علاش ماعرفتش؟
طامو:سمع اولد كرشي بلامانعاودو فلكلام لي عندي قلتو
اليازيد:اهاا واش من نيتك الواليدة راني كانبغي سنااء سمعتي ومانقدرش بلابيهاا
طامو:(سكتات مدة ونطقات بهدوء)واخا نزوجوها ليك
اليازيد:(بحال لاممتيقش شنو سمع)عاودي اش قلتي؟؟
طامو:بغيتي تزوج بسناا نزوجوها ليك ولكن بشرط
اليازيد:(بترقب) أما هو؟
طامو:تزوج قبل منها بلبنت لي غانختار ليك..
بقا تيشوف فيها وكيتأكد واش داكشي لي سمع صحيح ولا ودنيه سمعو غالط..
اليازيد:(نطق بصوت هادئ) عاودي اش قلتي الواليدة؟
طامو:كلامي راه سمعتيه لابغيتي نقبل ليك بزواجك مع سنااا تزوج قبل بلبنت لي نختار أناا
اليازيد:(هنا تأكد بلي مكانش كيتخيل وبلي داكشي لي سمع بصح...ضحك بالفقصة وخنزر فمو) وعند بالك أنا غانوافق؟
طامو:(ميقات فيه) غير لابغيتي تزوج بحبيبة لقلب لي فارع ليا بيها صحتي تگول ساااحرة ليك
اليازيد: (تعصب ونطق بحدة) واش الواليدة أنا هاد لمدة كلهاا ناعل الشيطان وداير ليك خااطرك حيت نتي مي ومباغيش نعصي ربي فيك ونتي غير مزايدة فيه
طامو:(خرجات فيه عينيها ونطقات تاهي بلغوات)لعنة الله واعليك المسخوط وليتي تهز فصوتك علياا تگادو لكتاااف ياااك نوووض ضربني اولد كرشي هي لي بقااات
اليازيد:(ناض بالجهد تاطاح الكرسي ونطق بانفعال) حاشاااا أنا ماشي مسخووط لي نمد يدي على لمرا لي ولداتني وكبراتني حياتي كلها وأنا كانسمع ليك وداير بهضرتك وعمري قلت ليك لا ديمااا كلامك عندي هو لكبيرر ولكن نتي عمرك ماحسيتي بهادشي ولاقدرتيه ولادك كلهوم عمر شي حد حاشاها ليك وكلى يلغي بلغااه شحال من واحد فيهوم تزوج وماخداش شوارك حدو جا علمك بحالك بحال الضيف ونتي عمرررك قلتي ليهوم لا وأناا لي عاطيك قيمة واعتبارر الواليدة وديما واخد رييك فالحااجة وعمري درت شي حاجة من عقلي نهاار جيت نشاورك بلي باااغي نرجع مرتي لحتي ليا لعصا فالرويضة
طامو:(ناضت تاتغوت وتهز فيديها تاكيتسمع صوت الدبالج لي لابسة) حييت خوتك ختارو وعرفو يختاارو واش عمرك سمعتي بشي خصام بين خوتك وعيالاتهوم هاهوما تباركالله والديين ومكبرين لولاد ماشي بحال خيتي لي فارع ليا بيها مخي عاام وماولدات ليك تاولد ونهار غلطتي شوهاتك مع لفاميلا ومرمدااتك وماخلات مقااالت فيك بسبابها بعدتي على عائلتك ومشيتي تغرب فبلادات النااس وهي عاشت حياتها بطول ولعرض ومشات جابت راجل تزوج بيه ونساتك ونتا تاتهتهت بيها كيف لهبيل سنااا سناا هي لي خرجات عليك
اليازيد:نتي شفتي غير هي شنو دارت وأنا نسيتي اش درت رااااه أنااا لي غلطت فحقها وخنتهاا مع صاحبتها بلامانقصد.. واش ترضااايها لبنتك تعرفي بلي راجلها غدرها ونتي تقبلي تبقا معاه برب لاخليتيها وغاطلقيها منو ولكن حيت هي سناااء فاخصها تصبر حيت ولدك هو لفوتيڤ
جاا باه من الصالة كيجري فاش سمع صواتهوم كيشوف فطامو شاعلة تاتغوت واليازيد قال ليها ماعرفتي والو.. بزوج بيهوم شعلو وبداو فعطييني نعطيك اليازيد جعر على فعايل مو لي غير مزايدة فيه وغير ماضسرات..
باه:(قرب جهتهوم ونطق بصوت عالي) امااالناا ياك لبااس
طامو:(خنزرات فيه بفقصة) شووف ولدك تايهز عليا صوتو بسباب ديك خيتي شفتي(بدات تعدد) واحملي نتي وتعدبي ورضعي وراري وسهري تايتقادو لكتااف بااش يجي يخرج فيك عينيه على قبل مراا
اليازيد:(شاداه لفقصة) يااك حيت قلت لحق وليت نخرج فعيني ونتي لي باغا تزوجيني ببنت الناس بااش ضريي بيهاا سنااء عند بالك معرفااش اش باغا ديري امي (شاف فبااه) سمعتيهاا اش قالت بااش تقبل ليا سنااء خصني نتزوج بشي وحدة لي تختااار واش فنظاارك أنا غااالط حيت قلت ليها لا هاا
باه:(شاف فمرتو وخنزر) الله يهديك اطاامو واش تادوي بنيتك واش طفرو مع وحدة تزيديه التانية؟؟
طامو:(جلسات تاتنهج كيف لبگرة) ومالهاا ياك راجل ويگد عليها ماخصو تاخيير عندو فلوسو وبدارو وبخدمتو يجيب تاربعة ماشي غير زوج
اليازيد:(عض على شفتو مفقوص) اوا قولي لرجااال بناتك تاهوما يجيبو الضرة ياااك عندهووم تاهوما خيرهووم
طامو:(خرجات عينيها كيف موكا) برااا ولباااس على بنياااتي رااه قادات بشغالاتهوم وبديورهوم ماشي فنيانات متبعين غير لبس ولخرووج بحال ديك خيتي
اليازيد:أناا الالة باغيهاا هاكاك تكون فنيااانة وتديها غير فلباسها وصاااف واش شكيت عليك؟
طامو:اوا والله لكانت ليك ديك خيتي هي لي مغاترجعش عروستي
اليازيد:(شاف فباه) لواليد
باه:نعلي الشيطان اطاامو لولد باغيها ونتي مالك؟؟
طامو:اوا لي عندي قلتو باغيها يتزوج بعدا بلي نختار ليه وديك ساعة يعوم بحرووو
اليازيد:(شاف فيهاا ونطق بعصبية) اوا تاأنا سمعي اش غانقول ليك بربي لامكانت سنااء لاكانت شي وحدة خرااا درت بلواجب وجيت علمتك وصبرت على قصوحية راسك وقلت ماعليش الواليدة هااادي لي قالتو على الراس والعين ولكن امي نتي قصحتي على قبل سنااء وبغيتي ضربيها بمرا خراا وتهبطي ليها راسهاا وماعرفتش علااش وهي عمرها أدااتك.. قصحتي راسك وماشفتيش ولدك اااش باغي وماتسوقتيش ليه(ضرب على صدرو وقال بصوت مخنوق)الله يرحم لواليدين الواليدة دابا عاد عرفت لمعزة ديالي عندك وعاااد عرفت بلي مكاتهمكش مصلاحتي حيت كون كنت بصح نهمك تقبلي بلي باغي ليا قلبي وخااطري كيف تاديري مع ولادك لخرين لي عمرهوم تسوقو لشنو باغا نتي ولكن انا حيت تانسمع ليك وداير بحساابك مرمدتي بيااا (كمل بغصة) عمري نسااها ليك امي نهار وقفت عليك عطيتيني بالضهر الله يحفظك ولكن ماتنسااايش بلي فهاد النهار نتي راه خسرتي ولدك فرحي ونشطي حيت وصلتي لشنو باغا..
زير على يديه ولغصة واحلة ليه وخرج ملي لاح ليها ديك لهضرة وخاطرو مهرس من قصوحيتها ومن أنانيتها لي ديما كاتبينها ليه..بقا فيه لحاال بزاف حيت مدارتش بخاطرو كيف هو دار بخاطرهاا وكيف مابغاش يكون مسخوط لواليدين وهبط راسو ليها ساعة هي مشافتش هادشي.. عمرها دارت لخوتو بحال هاكا ديما كيحطوها أمام الأمر الواقع وعمرها حلات فمها عليهوم وهو لي عاطيها اعتبار وداير ليها قيمة عفسات عليه بلاماتحن ولاتقول راه ولدي غير حيت مبقاتش باغا سنااء ليه..ركب فطوموبيلتو وهو حاس بلحرقة من تصرفهاا ولي زاد مألمو هضرة سنااء لي كانت صريحة وجاتو من لخر يايقنع مو ويجيو يخطبوها ياينساها ومن حقهاا هادشي..ولكن هو مقادرش ينساها وفنفس لوقت مغايعاودش يدل راسو لموو ويزيد يخليها طغى...باغي يحل لمشكيل وعارف بلي كاين شخص واحد يقدر يعاونو وبلامايتردد دوز لخط ليه ولقى تلفونو طافي وهادي ماشي من عادتو.. حرك طوموبيل غادي لعندو وهو متأكد بلي غايعطيه حل كيف مولف معاه ديما.. حبس قدام لمحال لي شادو رؤوف ودخل تيقلب عليه تابان ليه وهو يقرب جهتو بدون مقدمات نطق:فين ولد لحاج تلفونو طافي وأنا محتاجو ضروري
رؤوف:على مافخباركش بلي خويا نوح مشى
اليازيد:فين؟
رؤوف:ماعرفتش تاحد فينا معارف فين مشى بات ماصبح وماخلى لتاواحد راس لخيط فين غايكون وطافي تلفونو
اليازيد:واش كاين شي مشكيل عليها مشى؟
رؤوف:من مشكيل عادل غبررر ودابا معارفين عليه تاحاجة
اليازيد:ياك مارفعش عليه الدعوة؟؟
رؤوف:قال لينا لحاج لا
اليازيد: لمهم لاعرفتي عليه شي حاجة علمني أنا غادي دابا
خرج من لمحال وهو كيزفر بضيق مشغول بالو على نوح ومن جيه معارفش شنو يدير حاس بيديه مربوطين.. هو واخد قرار أنه مغايعاودش يدوي مع مو وهادي لخرة بناتهوم حيت هي محناتش فيه واخا گاع ديك لقيمة لي كان عاطيها ولي عمر واحد من خوتو عطاها ليها وشوف اش دارت فيه ولكن هادي والتوبة..داك لقلب لي كيحن يقلع مو من جدر كيفما قصحات قلبها تاهو يقصحو راهو من لحم ودم كيحس ماشي روبو لي تبقا تمشيه كيف بغاات وضرب على راسها وهو لهلى يقلب جد بووه.. قلع شاد طريق لرياض واخد قرار يهضر مع سناء... وصل بعد مدة ونزل دق تاحلات ليه السعدية ونطق بهدوء:سناء لداخل؟
السعدية:اه كاينة
اليازيد:(دخل ونطق بتعب) واخا تكلميها لياا
نفدات السعدية هضرتو وهو بقا واقف جنب لباب مدخلش تبانت ليه نازلة لايحة عليها كاب ولابسة بانطوفة..
سناء:(بهدوء)علاش واقف هنا دخل
اليازيد:مرتاح هنا
سناء:(ردات لبال لتعب لي باين فصوتو ونطق باهتمام) مالك بنتي ليا عياان واش كاضرك شي حاجة
اليازيد:(قرب جهتها وعنقها ونطق بخفوت) هادشي علاش باغيك حيت بوحدك لي كاتحسي بياا وكاتعرفي شنو بيا غير من الشوفة (شاف فيها وقال بغصة) رجعت فتحت لموضوع مع لواليدة حاولت نقنعها ولكن هي مبغاتش حطات ليا شرط لادرتو توافق على زواجنا و
سناء:(فطعاتو بترقب)اشمن شرط؟
اليازيد:نتزوج عليك بلبنت لي باغا هي (ضحك بسخرية) عند بالها غانديرهاا ونسمح فيك (شد يديها ونطق بحب)بوحدك لي بغيت تكوني مرتي عارف بلي هي مباغاناش نرجعو حاولت نقنعها مرة وزوج ولكن مبغاتش هادشي علاش جيت باش نقول ليك قراري.. سنااء نتي باغا نرجعو كيفما أنا باغي ولابقينا نتسناو فرضاة الواليدة فكوني على يقين عمرو يكون..نهار طلقنا كلشي بان ونهار بغينا نتجمعو كلشي عطانا بالضهر وماخلاو لينا غير حل واحد نتزوجو أنا وياك ومانتسوقو لحد نعيشو لي بقا فحياتنا بزوج تاواحد فين يدفن التاني
سناء:(نثرات يديها وقال بهدوء) واش عارف اش تتقول اليازيد.. نتزوجو بلاخبار حد؟؟
اليازيد:(زفر النفس) شنو هو لحل فنظارك واش عندك حل عطيه لي وفيديني بيه
سناء:اليازيد أنا براسي مباغاش هاد لحاال نتزوجو بحال لادايرين لحر_ام علاش واش ماشي من حقناا نرجعو ونبداو حياة جديدة واش مكفاهاش شنو عشنا شحال هادي ولفراق لي تفرقنااه علاش ماماك مبغاتنيش أنا وبغات ليك بنت النااس واش بنت ليها بنت الحر_ام ولاشنوو؟؟ (بجدية) ماماك هي دايرة هادشي حيت من لول عطيتيها مجال اليازيد وخليتيها طغى تاضسرات (ضحكات بسخرية) وعمك لي كان ديما واقف فطريقي فاش بغيت نبدا حياة جديدة وعيى معايا نرجع ليك علاش دابا فاش بغينا نرجعو مدار تاخطوة؟ علاش كلهوم أنانييين؟
اليازيد:(بانفعال) واش بنت ليك مربع يدي راه ضربت طريق تالغااس وهضرت معاه الابان ليا شي حل كانمشي نديرو بلاتفكير غير على قبلك وهانتي تاتشوفي بعينيك بقا ليا غير نبوس ليدين وصاااف هادشي لي خصني نديرو علاش تاواحد فيكوم محااس بياا أنا...
سناء:(بمرارة) وعلاش نتا محاسش بياا واش عندك ساهل تجي تقول ليا مي مبغاتكش ليا وبغات تزوجني بنت خرا هاا ومكملهاا ومجملها باغينا نتزوجو بلاخباار حد صاف هي لي بقااات اليازيد هادا ماشي حل وأنا باغاا نتزوج ونخرج من دار ختي وراسي مرفوع عرووسة والعائلة كلها حاضرة ولي تشفى فيا زماان يشوفني ويعرف بلي الدنيا ضاارت بغيت مك تكون واقفة تاهي تحضر وتشوف عروستها لي ياماا سمعاتها هضرة كيف السم نهار تفرقنا.. مك خصها تكون وتهبط خنافرها تحيد من بالها لفكرة ديال أنا مانصلاحش ليك..(تنهدات ونطقات بنبرة حاسمة) لابغيتيني اليازيد غادير لمستحيل باش تنفد هادشي أنا مشايطش عليا راسي باش نتزوح زواح ناايح ومايكونوش حاضرين معايا حبابي..
**
جالسة فالبيرو ديالها لابسة نظاظر دلبروطيكسيون وعينيها على دوك لضوسي ديال لمرضى لي غاتشرف على حالتهوم مور مارجعات من لكونجي لي مكملاتوش كامل بسباب المشاكيل لي طراو معاهوم ولغبرة دخوها لي خلات الأجواء فالرياض تولي كئيبة... هو ملح الرياض لي عاطي ليه النور وغير مشى داك النور غبر معاه وتلاشى... بلاصتو كبيرة عند كل واحد من مالين الرياض ومن الناس لي قراب ليه.. مو لي ولات تاهي كئيبة وغير منعازلة فبيتها وعقلها مشطون مع ولدها لي معرفاتو فين صد..كاتحاول ماتخليش الأفكار الخايبة يطيحو عليها ويشغلو تفكيرها حيت متأكدة غاتحمااق ولي مصبرها هو أن الأخبار الخايبة كاتوصل دغيا... أما رؤوف راه الخدمة تزادت عليه أو ولى هاز مسؤولية فوق مسؤوليتوو.. عمرها شافت رؤوف هاكاك جدي ومتحمل المسؤولية وقاد بيها فرحاات ليه حيت من ديما هادشي لي كانت باغا من خوهاا الصغير.. أما هي فكانت بحال ليتيمة حيت باها وخوهاا لي كينصحها ويوريها شنو دير وشنو ماديرش مشى... ولحاجة لوحيدة لي مخلياها تنسى همها شوية هوو الكابيني ديالها قربات تكمل من التجهيزات لي باقيين وتولي جاهزة مية فلمية... ولكن أكيد مغاتبداش فيها لخدمة تايكون خوها حااضر وتحتافل بالافتتاح معاه حيت هو الشخص لي عندو فضل كبير بااش تحقق لحلم على أرض الواقع... تنهدات وزولات نضاضرها تاتدعك مدمع عينيها وتزفر بتعب وإرهاق نفسي.. سمعات الدقان فلباب لي تحل ودخل منو عمر هاز معاه زوج گوبليات دلقهوة أومبورطي...
عمر:(تبسم ونطق بهدوء) غاتكوني محتاجة لكوفي باش تفيقي شوية؟؟
بيسان:جات فوقتهاا شكرا
عمر:(شاف فالضوسيات)تبغي مساعدة ؟
بيسان:نو مايحتاجش نرتاح ونكمل
عمر:(حرك راسو بهدوء) شنو بان ليك مور لخدمة نمشيو نتعشاو فشي بلاصة
بيسان:(تنهدات وتبسمات تبسيمة صفرا) ماكرهتش مي ماما عيانة ومابغيتش نخليها بزاف باركة غير وقت لخدمة..
عمر:(حرك راسو مراضيش من تهربها وناض شاف فيها بهدوء)داكوغ لي بان ليك نخليك دابا بااي
خرج وهي ساطت النفس بتعب..عارفة بلي هو كيتقرب منها وبلي باغي تعطيه فرصة وهي مباغاش هادشي حيت باقي قلبها عامر بحب ريان لي منساتوش واخا من داك نهار وهي ماهضراتش معاه ولاحاولات مزال شي محاولة من اخر مرة... حسات بلي دلات راسها بزاف ليه وكلامو لجارح مقادراش تنساه فلمرة لولة داارت ليه عدر ولكن لمرة تانية ماقدراتش تسرطهاا.. وزيد كاتقنع راسها بلي هي دارت لي عليها وبلي اعتادرات مامرة مازوج ولكن هو ماقبلش الاعتدار ديالها وعرفات بلي هو مبقاش باغيها وتاهي انساحبات بهدوء مخليااه على راحتو واخا داخليا مراضيااش على هادشي لي وصلات ليه معاه..هزات تلفونها كاتشوف سطوريات لقاتو محاط والو واخا تفارقو تاواحد مابلوكا لاخر ولامسح نمرة لاخر باقي هي مراقباه بخلسة كيفما هو مراقبها دابا وتلفونو فيديه كيشوف سطوري لي حاطة ديال واحد الأغنية إنجليزية.. تيقرا ليها السطوريات وممسوقش واش يطلع عندها واش شاف ولا لا... رجع كبر تصويرتها لي دايرة فالبروفيل تايشوف فملامح وجهها لبشوشة وعويناتها الزرقين لي مكحلاهوم.. ديك التبسيمة لي دايرة خلاتو هايم فيهاا موحشها ولكن كبريائو واقف فطريقوو كحاجز لعلاقتهوم.. تيقنع راسو بلي لقرار لي خدا صائب وبلي هاد هو لحل لعلاقتهوم لي مكانتش مبنية على ساس متين.. واخا هو كانت نيتو يكملو والعلاقة تطور ساعة ماتمشي غير فيما مشاك الله.. باقي كلامها لجارح لي قالت كايتفكرو ومقادرش ينسااها تجرح منهاا وتقلق حيت عمرو توقعها تجي منهاا ولكن شاءت الأقدار...
ريان:(تنهد ولاح تلفونو فوق الطبلة وقال بهمس وعينو على تصويرتها دلبروفيل لي باقا) باغي نسااك ومقادرش عليهاا تگولي ساااحرة ليااا...
حايرة مابين كسيوة طويلة دافية ومابين صاية نواغ بقات تاتحسب من واحد لعشرة تاجات ليها فالصاية وهزاتها تالبسها فوق لكولون السخون لي لابسة ومع شكل الصاية كيجي طالع تال تحت الصدر ولبساتها مع واحد تريكو بيض سامبل.. وجدات مونطوها وجلسات تاتنهج باش تقاد وجهها كيف عادتها بشوية دلعكر نيود مع ماسكارا.. رشات ريحتهاا لخفيفة وشافت فراسها مور ماقدات زيفهاا وعينيها كيشوفو فصبيعاتها ومعرفاتش علاش تشهات تصبغهوم مع مدة مصبغاتش بحكم تاتصلي مي ليوم شهوتها تصبغ هزات لبواطة دصبايغ تاتشوف فيها تاوقع اختيارها فلكحل لون جريء وبدات تاتصبغ ومع بيوضية يديها وضفارها لافوغم ديالهوم طويلة واخا تاتقطعهوم مكيبانوش قصاار.. تسناتها تانشفات وناضت لبسات مونطو وهزات صاكها ونزلات لتحت لقات سيدرا وجدات تاهي لابسة عليها توني أوفر سايز ودايرة شعرها شفينجة مع جاكيط أوفر سايز ستيل بحال دلكوريين.. تبسمات ليها وشافت فمها:كون غير مشيتي معانا
تانيرت:(بعياء) راك عارفة لوجع شنو كايدير فيا اللهم نبقا هناا ونتخشى فلمانطة
رحيل:(باستها فجبهتها) الله يشافيك محتاجة شي حاجة قبل مانمشيو؟؟
تانيرت:لا ابنتي غير سلمي على أسماء وقولي ليها تجي معاك تبقا هنا تايرجع راجلهاا
رحيل: واخا تهلاي وتلفون بناتناا
خرجات رحيل برفقة سيدرا لي هازة معاها نوسيد مخليا إيڤانا ولقطوط التانين فالدار واخدة غير القط لي عويناتو كيشبهو ماي بلو آيز دياالهاا ولي سماتو على سمياتهوم بزوج... ركباتها فطوموبيل وشدات بلاصتها غادة لعند أسماء وفنفس الوقت هزات عويناتها فالمرايا وشافت فسيدرا لي ساكتة وقالت بهدوء:مال مامي مقلقة؟
سيدرا:(هزات كتيفاتها) مامقلقااش مامي
رحيل:متأكدة ياكما شي حد غوت عليك فلكول؟؟
سيدرا:نااءح مكايغوتوش علياا حيت أنا متانخليهومش مامي
رحيل:بغاڤو ماتخلي حد يغوت عليك
مكملة الطريق مجمعة معاها تاوقفات فالسطوب وهي تهز تلفونها سيفطات لرنيم باش تلحق عليها وعيطات تالغزلان دايرين جماعة بناتهوم يقرقبو النااب فيها ونيت يونسو أسماء... هزات تلفونها ودارت فوطو لكريشتها لي كبرات وبانت فالصاية لي لابسة وحاطة عليها يديها وتبسمات تاتشوف فالصورة لي عجباتهاا.. كانت كل مرة تصور راسها وتحتافظ بمراحل لحمل لي باغا تستاغلهوم على حدى.. وصلات لباتيسري ودات شي حاجة معاها وعاد كملات طريقها لعند أسماء لي كانت فانتظارها بحكم ليوم ممشاتش لخدمة.. تعانقو فلباب ولي شافهوم يقول راه مشايفينش بعضياتهوم عاام والسيدة غير لبارح شافتها...
دخلات رحيل وسيدرا تاضور عويناتها:فين إسلامي؟
أسماء:إسلامك مشى لكازا
سيدرا:هااء وعلاش ؟
أسماء:ماماه مريضة
سيدرا:واش ديك لمرا زوينة مامي ؟
رحيل:اه هي
أسماء:سيري لبيت الضياف غاتلقاي لِجوي ديالك لي مخلي ليك إسلام
مشات سيدرا تاتجري مع قطها وبقاو لبنات الراس فالراس..زولات رحيل فولارها وطلقات شعرها مصاوب وقصير خلات أسماء تشهق بصدمة:قطعتيه؟
رحيل:صباح الخير عاد شفتيه
أسماء:علاش قطعتيه الزمرة؟؟
رحيل:عييت بالطويل تايعدبني خلينا من شعري وقولي ليا داك خونا ماعيطش ليك حيت مامشيتيش؟؟
أسماء:لامدارهااش وأصلا كون دارها مغانجاوبش كنت باغا ندوي لبارح مع إسلام ساعة دوماج خرجات لينا التسافيرة من الجنب؟
رحيل:ماعليش المهم راه غاتعلميه نتي غير صبري تايرجع وتقوليها ليه
أسماء:هادشي لي مصبرني وصااف
رحيل:(تكات براحة فوق السداري) كاين ميتكاال عندكوم
أسماء:ههههه كاين اش حبات خاطرك؟؟
رحيل:شنو دايرة؟
أسماء:اممم كاين لحلو ولمالح الالة غير ختاري؟
رحيل:(بللاات شفايفها) لماالح
ناضت أسماء جابت ليها طبسيل فيه لبريوات ولكيش وتخربيق دلمالح ورحيل طاحت فيه عمى.. تتاكل وتستارح بعض لمرات تاتجيها الشهية محلولة بعض لمرات لا وتاتروع خاطرها مي ماشي بحال لبداية دلحمل..
مجمعات بزوج تاسمعو صونيط فلباب وأسماء تبسمات وشافت فرحيل:غايكونو لبنات جااو
رحيل:سيري حلي خليني ناكل
ضحكات أسماء وتمشات جهة لباب كاتمختر فديك لكسيوة ديال الدار والشعر مطلوق مصاوب.. طلات من لعين السحرية وبان ليها ضهر شي حد.. كمشات حجبانها ومع حلات لباب تحلو عينيها وهي كاتشوفو واقف قدامها بكوستوم كلاص مبينة كتافو لعراض مع مونطو.. طلعها بنظرات فاضحة مشتاقة وعينو كيشوفو فتقاسيم جسمها الأنثوي لي مبيناه لكسوة وبقا متبع ليها الشوفة تاوصل لوجهها ونطق بصوت خافت: بونبونايتي عند بالك غانخليك؟؟
عمرها فحياتها شافت بحال هاد لوقاحة لي فهاد السيد.. صدمها وهو استاغل صدمتها واندافع لقدام ساد لباب وراه وهي بحال الا يالاه عاقت وفاقت بلي هو تجرأ وجا تال لدارها لا والأوقح هو داخل وسط الدار بلاحشمة بلاحيااء.. جمعات حجبانها والغضب ترسم على ملامح وجهها وقبل مايحل فمو نطقات بصوت مرتافع:وااااش نتا مريض فك*رك جاااي عندي تال قلب الدااار؟؟
وليد:(كمش حجبانو) نتي لي نسيتي كلامي ودرتي لي قال ليك راااسك شنو ماخفتيش نسيفط لراجلك تصويرة؟؟
أسماء:(خنزراات فيه) ماجيتش حيت محاملاش نشوف كمااارتك وحيييت عمري غانخطي خطوة باقي فديك البلاصة لهلا يقلب جد بوهاا لاكاانت غير هي
وليد:(قرب حهتها وخنزر بعصبية) تاتصعبي الأمور على راااسك اأسمااء
أسماء:اسيدي عطيني بالتساااع (خرجات عينيها فيه) واااش مافيك نفس واااه عيقتي
صوتها وصل لمسامع رحيل لي متكية تتاكل.. تقادات فبلاصتها وناضت تاتلبس زيفها وجرات بانطوفة أسماء فرجليها غادة تشوف شواقع تاكتفاجأ بدورها بداك الشخص لي واقف قبالة أسماء ولي استنتجات بلي هو وليد لي كتعاود عليه.. قربات مخنزرة فيه وهو غير حس بشي حد ضار تيشوف فيها تاوقفات جنب ختها وقالت بصوت جدي:نتااا اش جاابك لهنااا؟؟
وليد:( ببرود) هضرتي مع أسماء ماشي معاك
رحيل:(بسخرية) ههه ياك احنيني اوا أنا هضرتي معاك سمع نقول ليك لاكنتي كاظن بلي ختي حيط قصير تقدر تنقز عليه بالساهل راك غالط حيت أناا واقفة ليك فالطريق ومانخليكش ديرهاا سمعتي فرق عليك السيدة
وليد:ختك عمري نفرقهاا
رحيل:كنت تانقول على آدم لصقة صدقتي نتاا كثر منو كولا سبيسيااال (خرجات عينيها فيه) اسمع الشريف رااه فعايل ولاد الصفريوي عرفااهوم ولاعند باالك انخليك دير لي باغي راك غالط شتي ديك التصويرة لي تاتهددها بيها بخر بيها مع الجاوي وصلبااان ودور داابا حسب خطواااتك وقبل ماتفكر تقيسها ولاضرها تفكر بلي أنا كاينة هناا نوقف ليك فطريق كيف جدارمي (حلات لباب) خرج قبل مانجمع عليك الجيران نقول ليهوم مهجم علياا وشوف واش غايفكك حد...
خنزر وليد فرحيل لي تاهي خنزرات فيه وخرجات عينيها ورجع شاف فأسماء لي هازة راسها بكبرياء وتبسيمة ساخرة على وجهها رحيل وفاات وقالت لي خصو يتقال.. خرج من الدار وهو مزير على يديه ومع خطى لخطوة سدات رحيل لباب بالجهد تاتسمع صدااه فالكولوار لي كان كالم مخلي وليد كيتغدد فداخل ديالو..
أما رحيل نترات زيفها وتمشات جهة الصالون وقالت بانزعاج:اش هاد إيخاان عندو لوجه يجي بلاحشمة بلاحياا
أسماء:صدمني ماتوقعتهااش منو
رحيل:غاتهزي بكاجك وتمشي معايا مانخليكش هنا يقدر يرجع تاني وإسلام مكاينش ونصدقو فمشكيل ماحدك ماقلتيهاش ليه خصك ديري احتيااط
أسماء:واخاا واخاا اوووف
سكتات وهي تاتحمد الله وتتشكرو حيت رحيل كانت معاها وصدراتو.. وصلات رنيم وغزلان وحاولو لينات مايبينو والو وكملو عشيتهوم عادي ضحك ونشاط وفليل جمعات أسماء حويجاتها لي غاتحتاج وشدات طريق مع رحيل وسيدرا ورنيم لدار باها مور ماوصل غزلان لدار...
**
مرو تلتيام لاجديد يدكر فيهوم نفس الروتين عند كل واحد فيهوم.. مور لعشا طلع كل واحد لبيتو ينعس وإدريس انفارد هو وتانيرت فبيتو مجمعين على موضوع لي كل ليلة يجبدوه.. غبور ولد لحاج لمفاجئ ولي ماخلي تاشي أثر وراه..
تانيرت:بعض لمرات تايجيوني أفكار خايبة تانقول ياكما السيد وقعات ليه شي حاجة؟؟
إدريس:(كمش حجبانو بانزعاج) الله يحفظو وينجيه اش هاد لفال
تانيرت:قلت الصح اإدريس ولد لحاج ماشي من عوايدو يديرها وعلى الأقل كان يتواصل معاك باش يعرف خبار رجيل كيف كان تيدير هاد لفترة كلهاا ماشي يغبر غبرة وحدة..
إدريس:السيد راه من حقو يغبر باش يرتاح من المشاكيل لي مكيساليووش نسيتي لمشكيل ديال ولد عمو لي كان غايزهق ليه رووحوو وزيدي لهضرة لي كانت عرفات رحيل على ولد لحاج وبلي هو عارف قصتها وبلاماندويو على لوحم لي خلاهاا تهجر راجلها هاد الشهور كولهاا وبلامسؤولية لخدمة راه السيد من دم ولحم من حقوو يغبر ومايعلم حد باش يرتاح شوفي غير ديك لمرة طااح كومة دالسكر بسبا لمشاكيل وغير ربي كتب ليه حياة جديدة أما كاان غايودع لاقدر الله..
مع قالهاا مع تسمعات خبطة قوية خلاتهوم ينوضو من بلايصهوم بزربة وإدريس حل لباب لي كان مردود ونزل شوفتو لرحيل لي كانت طايحة على جلستها الأرض وحاطة يديها على كرشهاا.. نزل جهتها بزربة وهي طلعات وجهها وملامحها مصدومة ودموع تجمعو فيعينيها لخضرين وبصوت خافت نطقات وهي تاترجى باها بعينيها: كيفااش نوووح غبرر غبرة وحدة؟؟
يتبع...
القصة 70 فالمية داخلين للسبيطار بزاااف فصراحة
ضحكتيني وصراحة مكدبتيش 😂😂