محتوى القصة
بجلسة رجولية متكي ضهرو بأريحية على الكرسي وطاس دلقهوة محطوط قدامو فوق البيرو.. هز يديه شاف فساعتو ورجع قلب عينيه جهة الباب دلبيرو لي تحل ودخل الشاف ومعاه صابر لي قرب جهتو ونطق بضحك:ولد لحاج تهلاو فيك فالضيافة
نوح:(ببرود)طلقنا عندي مايدار
جلس صابر فالكرسي لي قدامو والشاف فلبيرو وربع يديه ونطق بهدوء:مكناش باغيين نسخسوك اولد لحاج ولكن القانون هو القاانون
نوح:(شاف فيه مربع يديه وقال بخشونة) بطبيعة لحال
صابر:ترفعات ضدك شكاية من طرف الوافي إبراهيم قال بلي تهجمتي عليه وضربتيه ودار شواهد طبية بلي عندو كسر فاليد اليسرى وجروح بليغة وهو دابا حاليا فالسبيطار
نوح:(مسح لحيتو ونطق باستفزاز) يحمد الله حيت ماسيفطتوش لقبر نيشان
صابر:(قلب وجهو جنب حابس ضحكتو ونطق) مهم راه السيد مخيخ عليك هو وخووه شنو السبب لي خلاك تهجم عليه
نوح:(كمش حجبانو وتقاد فجلستو ونطق وهو كاعي) حيت قرب لحاجتي (رجع تكى بلاصتو ونطق ببرود) تاأنا غانرفع ضدو شكااية تحرررش اللفظي والجسدي
صابر:على من تحرررش؟
نوح:(خنزر فيه) لمداااام
هبط صابر راسو وبدا يضحك والشاف تاهو غير كيقلب عينو عليهوم بزوج هو كيعرف نوح معرفة سطحية فقط بحكم أنه صاحب صابر وكيشوفو مرة مرة وشحال من حاجة تيقضيها ليه ومن تما وهو كيعرفو..
نوح:(كمش حجبانو ونطق بصوت جوهري) مااااال جدك تاضحك
صابر:(ضحك بالجهد) ههههههههه ماشي صحبة هادي اولد لحاج نكون أناا آخرر واحد عارف بزواااجك
قلب نوح وجهوو مزير على فكو ماعندوش خاطر لضحك أما صابر مسح على وجهو ونطق بجدية: تهنى غانعيط لدري باش يكتب الشكاية ديالك ومن الأحسن تالمدااام تكون حاضرة بااش هاكاا نتبتو بلي هو لي بدا وهاديك ردة فعل طبيعية منك
نوح:(هز حاجبو)ضروري تحضر؟
صابر:وابااش مانخليوش ليه فين يتڤنڤن ويعرف راسك
مسح نوح على لحيتو تيخمم مدة عاد جبد تلفونو ودوز لخط لإدريس..
نوح:سي إدريس لباس عليك
إدريس:الحامدين الشاكرين اولد لحاج ونتا الأمور مزيانة
نوح:ماشي تال لهيه
إدريس:خبار الخير؟؟
نوح:(ناض وغمز لصابر لي حرك ليه راسو ومشى خرج برا لبيرو ونطق بهدوء)لبارح وقع واحد لمشكيل فالعرس (لعب بلسانو ففمو وبدا كيعاود ليه لمشكيل لي طرا مع رحيل وختم كلامو) جيبها لكوميسارية *** باش ترفع عليه الشكاية تاهي
إدريس:(نطق بجدية)نص ساعة ونكونو عندك تم
قطع معاه نوح وسرح عقلو لداكشي لي طرا معاااه..
🔙🔙
كان كلشي نايض ومجموع على لعرسان لي كيقطعو لكيك من غيرو هو لي جالس فالطبلة تيجغم من داك لكاس دلقهوة كحلة.. كان مرة مرة يشوف فساعتو كيتسنى هادشي يسالي يمشي حيت عيى تاوقف عليه واحد السيد وقرب جهتو ونطق: واخا تجي معايا واحد الدقيقة؟؟
نوح:(هز حاجبو فيه غامزو) نعام؟
الراجل:نهضرو برا حسن
ناض نوح معاه خارجين لبرا مبعدين على القاعة شوية فين كان واحد الراجل آخر كيباين فيه قاصح.. وقف جنبهوم نوح ونطق بخشونة:كاين شي مانقضيو
قرب جهتو داك الثاني وهو مقرب جهتو ومخنزر: عند بالك عايشين فالغااابة مكاين مخزززن مكاااين قاااانوون السيبة فلبلااااد
نوح:(تقاد فوقفتو وكمش حجبانو ونطق بصرامة واضحة غير من ملامح وجهو) ياك مكاين باااس شتك تتهز عليا هنا
الراجل:(قرب جهتو ناوي يشنق عليه وكون ماشدوش داك لولاني لي كلم نوح ونطق صاعر) مهجم على خووياا ومسيفطوو لسبيطااار ياك لبااااس عند باااالك هو حيييط قصييرر مكاااين لي يداافع عليه
نوح:(دابا عاد فهم علاش تيهضر.. خنزر فيه نوح ونطق بصوت جوهري) قبل ماتجي تحل عليا فمك سير ربي خوك أو علمو كيفاش يحتارم بنات النااس ومايقربش من حاجة دماليها
الراجل:(تيسب وكشاكشو خارجين) بزااااف عليك خوياا مربي عليك أقليل الأصل والترااابي بغيتي تحگر عليه ولكن أنا غانوووريك والله لبقااات فيك الاماندمتكش مانتسناش زوهييير
كان مكالمي راسو وتيدوي بأداب ولكن غير سمعو اش قال وهو يتسيف وتخنزيرتو غير مزادت باانت وهو مقرب جهة لاخر مخرج فيه عينيه وعطااه كروشي لوجه رجعو لوور ولاخر واقف بناتهوم باغي يفك ونوح تايدفع فيه ونطق بصوت معصب عالي : اجي نوريك قلة الترابي دالمعقوول بشحال كيتقااامو (دفع يد لاخر لي باغي يشدو وخنزر فيه تخنزيرة دلمووووت) يديك ماتحطهاش عليااا لانهرس والديها من الجدر (رجع شاف فخو لاخر وهو بنفس الشوفة وتخنزيرة وقال بصوت صارم) الامشيتي عند لمخزن ماتنساش تعطيهوم السمية وعقل عليهااا مزيااان نووح السليمااني
ساس لاڤيست ديالو وهو باقي كيشوف فخو لاخر لي كان شاد نيفو لي سال ليه بالدم وقلب الضورة جهة الطوموبيل وهو مخنزر محاملش روحو.. تلفونو كيصوني وعرف بلي غاتكون غير بيسان وبالفعل غير وصل جهة الطوموبيلات وبانو ليه واقفين كيتسناوه...
🔜🔜
كانت رحيل تاضفر شعر سيدرا لي جالسة فوق ركابيها مركنة وباغا وقتاش تسالي مها باش تشوف الضفيرة لي دارت ليها.. ورحيل مركزة معاهاا تاسمعات صوت باها لي دخل لصالة وباين كان تيقلب عليها:رحيل سيري ابنتي لبسي حوايجك
رحيل:(مكمشة حجبانها)فين غاديين؟؟
إدريس:دابا تعرفي يالاه ماتعطليش
حطات سيدرا فبلاصتها ومشات لبيت تلبس حوايجها وسيدرا شافت فإدريس ونطقات بترجي:نمشي معاكوم بّا ديدي؟
إدريس:(باسها فجبهتها)لبلاصة لي غاديين ليها كيمشيو ليها غير الناس لكبار ابابا
سكتات سيدرا وإدريس جلس كيتسنى واحد جهد عشرة الدقايق تابانت ليه رحيل جايا لايحة عليها عباية تتجي محلولة ولبساتها مع سروال دجين وسبرديلة وفولار بطريقة عادية مكتفية تلوح الاطراف ديالو فوق كتافها.. خرجو من الدار ورحيل مستغربة ومعرفاش فين غادين فهاد لوقت وشنو واقع.. ومع ملامح باها الجدية ولي خلعاتها ومعرفاتش علااش؟ ركبات جنبو ودارت لاسانتوغ وهو ديمارا مقلع شاد الطريق ورحيل نطقات وعين فالطريق وعين على باها: بابا فين غادييين ؟
إدرس:(شاف فيها)لكوميسارية
رحيل:(حسات بقلبها كيضرب ونطقات بخوف) علاش اش واقع؟
إدريس:(وقف فلفوغوح وضار شاف فيها ونطق) ولد لحاج عاود ليا على لمشكيل لي ناض فالعرس وداك لحمار رفع عليه شكاية ومحتاجين الإفادة ديالك تانتي..خرجات عينيها فباهاا ممتيقاش اش تتسمع وديريكت تفكرات داك الحمار لي كان تيتبسل عليها ولي شدها بزز ونوح لي فكها ودافع عليهاا.. سرطات ريقها ورجعات تتشوف قدامها ومكانتش متوقعة نهائيا أنه غايوصلو لكوميساريااات عند بالها الأمور تفكات تم ولكن هادشي ماشي هو لي طراا.. بقات ساكتة الطريق كولو تتفكر فهضرة باها تاوقفو قدام لكوميسارية ونزلو وإدريس عيط لنوح لي نعت ليه فين يجيو.. كانت داخلة وعينيها كيضورو فالكوميسارية وقلبها حاسة بيه مزير عليها.. ومع تحل لباب عينيها جات على نوح لي كان جالس نفس الجلسة والطاس دلقهوة قدامو.. وغير انتابه ليهوم وهو ينوض سلم على إدريس وشاف فرحيل لي منزلاتش عينيها عليه.. جلسات فالفوطوي ومشى البوليسي يعيط لشاف وهي تركنات فبلاصة وحدة تتسرط ريقها وحاسة بطعم الصداا كينزل مع الريق.. أما نوح فملي شاف فيها بانت ليه ساكتة وباين بلي خايفة وغير جاو تاني لعيون فبعض وهو يغمض عينيه ليهاا بمعنى ماتخافيش وهي بلاماتحس حركات راسها باه وهادشي كولو داز تحت نظرات إدريس لي بقا تاهو ساكت تادخل الشاف باش ياخدو الأقوال ديالهاا.. تنهدات رحيل وبدات تتعاود اش طرا معاهاا ملي خرجات تهضر ولاخر لي وقف عليها وبدا يتبسل.. قالت كلشي بلازيادة ولانقصان..
الشاف:(شاف فرحيل)وقعي هنا
شدات لوراق وبدات تتقرا عاد وقعات عليهوم وإدريس نطق:شنو غايطرا دابا
الشاف:الشكاية ديالكوم غاتوصل لعندهوم وديك الساعة غانشوفو واش غايسحبو الشكاية لي رفعو ضد ولد لحاج ولاغايبقاو مكملين
إدريس:والاكملو
الشاف:(شاف فنوح)غاناخدو الإجراءات القااانونية
إدريس:(شاف تاهو فنوح لي ساكت) واش غايبقا هناا؟
الشاف:لامكاين لاش ولد لحاج راه معرفتناا
نوح:(حرك ليه راسو) الله يكير بيك
تحل لباب ودخل صابر لي ضرب على رحيل وإدريس ومع شافها ضار جهة نوح وغمزوو حيت ديجا كيعرفها وشافها قبل فاش كانو لقاو غزلان.. خنزر فيه نوح وصابر ضحك وقرب جهتو طبطب على كتفو: ولد لحاج ماسخيتيش بينا ولا؟؟
نوح:(شاف فيه وقال بسخرية)كانتسناكوم دوزو لعشاا
صابر:(قهقه بالجهد وضرب على كتف نوح) شي طنجية نعام اسي بلملووج
نوح:(ضحك ضحيكة خفيفة) مع براد دأتاي منعنع
صابر:(تيحك كرشو) ااااح لاتبقاش تشهي فينا اولد
لحاج (رجع قال بجدية) صافي طرقتو لمسمار
الشاف: اه صافي الشكاية لي رفع ولد لحاج ومدامتو غاتسيفط للوافي وتم غانشوف اش كاين
رحيل كانت جالسة تتسمع لهضرتو تاوصلات لديك مدامتو وهي تحس بالصهدة طالعة معاهاا وعند بالها بلي تقالت عفوية خصوصا المشكيل لي نااايض داكشي علاش ماحاولاتش دخلها لدماغهاا..خرجو من لبيرو مجموعين ومعاهوم تانوح وصابر لي تفرقو معاه حدا الطوموبيل ومشى..
إدريس:(شاف فرحيل ومد ليها الكونطاكط) سبقيني
شدات رحيل الساروت ومشات جهة الطوموييل ركبات وعينيها عليها تتشوف فباها كيدوي معاه هو لي مكمش حجبانو ومتكي على طوموبيل..
شي نص ساعة وهوما هاكاك تاتفارقو ورجع إدريس لعند رحيل ونوح ركب طوموبيلتو راجع لرياض غين مخلي العائلة كلها مشطونة عليه... وصل لحومة ونزل لقى الباب دالرياض مردود وغير دخل وهي تبان ليه مو غادة جايا جنب الخصة وباين فيها خايفة وبالها معاه.. وغير شافتو وهي تقرب جهتو تتسول فيه بقلب الأم لملهوف:ولدي شنو طرا معاك وشكون هاداك لي رفع عليك الشكاية؟
تتسول وتادوز يديها على كتافوو ونوح تبسم ليها بحنية جارها عندو معنقهاا وتيبوس ليها على راسها.. تجمعو عليه گاع لعائلة كيسولو وتاجداه لي جرها عندو تاهي معنقهوم بزووج وكل مرة يبوس راس وحدة فيهوم.. بقاو هاكاك واحد لمدة عاد بعدهوم عليه وسمع جدو لي قال:اش وقع اولدي ياك لباس؟
نوح:(نطق بهدوء) بلاماتخممو فهادشي مشكيل بسيط وتحل
رحمة:ولكن اولدي شنو طرا ليك وشكون هاداك؟
نوح:(شدها من كتافها ونطق بصوت هادئ) يمّا ماتخمميش فهادشي واخا (باس جبهتها) غانطلع نرتاح شوية
خلاهوم وطلع لجناحو ورحمة بقات غير تتشوف فيه تاغبر.. حاسة بشي حاجة ماشي هي هاديك وبلي ولدها مخبي شي حاجة؟ ضحكات على نغسها فديك النقطة بالدات هي فين عمرها عرفات ولدها فاش كيفكر.. أصلا نوح من بين خوتو هو الشخص لي مغاتعرفي عليه والو حيت هو هاكا داير من طبعوو.. واخا توصل فيه لعضم مغايشكيش ومغااينطقش.. تنهدات وحمدات الله بلي لمشكيل تحل على حسب هضرتو ومعرفاش بلي سباب المشكيل هو مرا..
فلميزون دوڤواتيغ كان نوح مبكر ليوم وكيف ديما طالق لبخور دلحج وريحة لعود عاطية فالبيرو ومخلطة مع ريحة لقهوة لي فلماشين.. ناض جهتها وخدا طاس كب ليه كويس بلاسكاار ورجع لبيرو جالس باش يفطر جيت خرج بكري من الرياض.. كان قدامو بلاطو فيه خبز الشعيير ولبيض بالفرماج وأملو بأرگان والعسل لحر.. من ديما فطورو كايبغيه يكوون بلدي وصحي.. فطر على خااطر خااطرو تاسالا وجمع لبلاطو وحط فالطبيلة لي قدامو.. ورجع جاب طويس دلقهوة تاني عمرها وجلس باش يشربها ويدوز بيها خدمتو.. مدة طويلة وهو غارق تاصونى تلفونو وكان صابر
نوح:اش تم؟
صابر:(ضحك ببشاشة)الشكاية وصلات لخونا وغير شاف لمعقول قرر يسحب الشكاية ويتنازل عليها واخا خوه مكانش باغي وقال ليك لمحاااااكم بناتنا ولكن داك خونا لاااخر مبغاش
نوح:(ضحك بسخرية) هه كان ولابدا نخرجو لعيييب
صابر:مكانش كيظن بلي غاتوصل لقضية لهنا وبلي تانتا غاتكون ديب وتقلب عليه لگفة لمهم نتا واش غاتسحب الشكاية؟
نوح:(مسح على وجهو) نشوف هي شنو بغات ونرد عليك
صابر:صافي بناتنا تلفون اولد لحاج
قطع على صابر وهز لفيكس دلبيرو طلب رحيل تجي عندو ومكملاتش خمسة الدقايق كان لباب كايدق.. دخلات وهي مبسمة بهدوء ونطقات:وي موسيو السليماني
نوح:اجي ارحيييل جلسي
جلسات رحيل ومخفاتش عليها الجدية لي كانت فصوتو.. شافت فيه بنظرة واتقة ونطقات:وي كانسمعك؟
نوح:(ربع يديه فوق لبيرو ونطق) عيط عليا صابر وقال بلي هو سحب الشكاية فاش وصلاتو شكايتنا وسولني واش تاحنا نسحبوها ولا نكملو..
رحيل:(بدون تفكير) وي نسحبوها
نوح:(بجدية) سمعي ارحيييل ماشي حيت جيت وسولتك هادشي كيعني تسحبيها أنا بغيت ناخد رايك حيت نتي معنية بالأمر ومن حقك تختاري شنو بغيتي الابغيتي نبقاو رافعينهاا فتأكدي بلي أنا غانبقا معاك ومغانخليكش بوحدك
كلامو حسسها بالأمان ولأول مرة حسات بلي واقف جنبها راجل من غير باها وخوتها.. حدرات راسها وبقات تتفكر مدة عاد هزات راسها ونطقات داك السؤال لي كيضور فدماغها:نتا علاش كادير معايا هادشي كامل؟
نوح:(شاف فيها مدة وعاد نطق بهدوء) حيت باقي عند كلمتي وكانتسناك جوابك
رحيل:(فهمات اش قصد) كنظن جوابي قلتو داك النهار
نوح:(حرك راسو) مغانتعابروش جواب نهائي
رحيل:نتا غير كيتعيي رااسك أنا مغانرجعش على قراري
نوح:(قلب وجهو جنب ونطق بهدوء) بلاماندويو على هاد لموضوع دابا ييكون حسن
رحيل:(بإصرار) لاغاندويو باش نسدو هاد لموضوع فخطرة ومانبقاوش كل مرة نجبدوه
نوح:(شاف فيها بجدية) واخا بغيتي ندويو مرحبا وغانسولك دابا علاش رفضتي عطيني سبب لي يقنعني وبلا ديك مانصلاحش ليك حيت مصلاحتي أنا كنعرفهاا
رحيل:(تنهدات وقلبات وجهها بعيد عليه) تجربتي لولة كانت فاشلة ومباغاش ندخل فتجربة خرا وتفشل
نوح:(ناض من بيروه وجلس قدامها فاصلاهوم الطبيلة ونطق بهدوء وفنفس صاررم) وعلاش نتي متأكدة بلي هاد التجربة غاتفشل كيف لي سبق
هي عندها أسباب كثيرة لي مغاتقدرش تقولهوم ليه واش غاتقول أصلا راجلي صدق شمااااتة وضحك عليا بوجهو الرزين لي مخبي بيه خبث دالنية والدين.. ولاتقول ليه راجلي باعننني لعموو لمريض ولي تحرش بيا مامرة مازوج وحاول يتعدى علياا كون ماعتقت راااسي.. ولاتقول ليه رااااجلي كان غايرزيني فبا ومي ومكفاهمش قتتتتل ليا صاااحبتي ومرضني فصحتي وخلاني نكره بنتي لدرجة عيني ماهزيتهاش فيها وحرمتها من حليبي وبيدي حطيتها حدا بركاااسة دالزبل وسمحت فيها.. كانت تتفكر هادشي بلاماتحس عينيها غرغروو وناضت من بلاصتها محاملاش تعري على شنو مخبية ليه.. اه معجبة بيه ويقدر تكون بدات تتبغيه ولكن هادشي مكيعنيش أنها تجي وتقول ليه كلشي.. نطقات بانفعال: أنا عارفة علاااش حيت عشت حوايج لي خلاوني ناخد هاد لقرار مباغاش نتزووج لابيك ولابغيرك أنااا هاكا مرتااااحة
نوح:(ناض وقف قدامها مكمش حجبانو)على من كضحكي بهضرتك (حمر فيها الشوفة) واش نتي تتحسي براسك مرتاااحة داباا فالداخل ديالك عايشة بخييير
رحيل:(تخطاتو باغا تمشي) هادشي كيخصني أناا
شدها من يديها ونطق وهو كارز على سنيه:ياك نتي باغا ندويو نحلو هاد الموضوع إذا غاتبقاي هنا تانسدو هاد لموضوع فخطرة ارحييل
رحيل:(نثرات يديها وأعصابها حسات بيهوم على شفى الإنهيار وغوتات) حيت أنا مباغااكش والاكانت فيك قد هاكا (أشارت بصبعها) دالرجولة غاتفرقني عليك..
بعض لمرات الإنسان كيخرج من فمو شي كلام كيجرح.. وتاباش يعتادر كيكون فات لفوت حيت الهضرة بحال الدفلة فاش تتخرج من لفم متتعاودش ترجع.. كانت معصبة بزاف حيت هضرتو كانت على حق.. وأعدارها فرفض الزواج منو كاان كلها أعدار غير مقنعة عكس السبب لحقيقي لي هي تتخبيه بينها وبين نفسها.. وفاش شافتو بدا كيعري الوراق شوية بشوية خافت لاتفرش قدامو وتنهار.. خافت لاتقول السبب وطيح من عينيه وميبقاش باغيهاا.. سكتات وهي تتنهج وعينيها محلولين على الجهد فاش سرات معاها الكلمة لي خرجااات والإهانة لي هانتو.. مكاين تاشي رااجل على وجه الكرة الأرضية يرضى أن شي حد يقلل من رجولتو فمابالك إلا كان هاد الحد الإنسانة لي كان ناوي معاها لمعقول وكان باغيها تكون مرتو وحلالو.. بؤبؤ عينيها بدا كيرجف وريقها بدات تتسرطو بصعوبة وهي تتشوف فوجهو وديك التخنزيرة لي داير فيهااا.. كانت شوفتو تتخلع ومحسات غير بيديه شادينها من دراعها بزووووج وجارها جهتو تاحسات بانفاسو السخاان كيضربو فوجهها لي قلباتو حيت مقدراش تشوف فعينيه مبعد اش قالت.. غمضات عينيها فاش وصل لمسامعها همسو الخشن لي خلى تبوريشة تسرى فجسمها وهو كينطق جنب ودنيها بهضرتو: حيييييت نوييت معاااك لمعقووول وجيييتك من لباب بلاصة ماندير فعاااايل الزوااا*مل ولييييت مااااشي رااااجل وحييييت واخااا رفضتي الزواااااج عطيييتك فررررص باااش تعطيني السباب وتقوووولي اش ضااااارك وليت ماشي راااجل وحيييييت متسوووووقت لتااااشي حااااجة من غييييييرك نتي وتعاااااملت معاااك مزيااااان صدقت مااااشي راااااجل يااااك (زاد زير على دراعها تاعضات شفايفها بألم وقربها لعندو تاولى صدرها ملاصق مع صدروو وكمل هضرتوو بإنفعااال واااضح) عننننندك الحققق حيت بلاااااصة مانضررررب علييييك ملي رفضتي ونقلب وجهههي ونشوف فجهة خرااا درت لعكس وزددت قرببببت لوحدة بحااااالك مكيهمهااا غييير راااسها وأناااانية بزااااف
رحيل:(نطقات بصوت شبه باكي) قصحتيييني
نوح:(هز حاجبوو وزاااد برك عليها تاطلقات واحد الاه) هاااانتي غاااتقصحي شوووية وغير غاااانطلقك غاااتنسااااي ولكن هضررتك عند باااالك غاتنسى ليااا
رحيل:(نزلو دموعهاا) ماقصدتش أناا مقصدتتتش سمحلياا
نوح:(خنزر فيها وزاد قرب وجهوو لجهتها ونطق وهو كاعي) اشنووو لي مقصدتيييش نتي ماااشي بنت صغيييرة وعااارفة معنى لكلام لي تتخرجيه من فمك
رحيل:(بدات تتحرك راسها بلا وشهقاتها بداو كيتسمعو بصوت عالي) نتاااا معاااارف والووو معااارف تاااشي حاااجة باااش تحكم عليااا
نوح:(طلق منها بالجهد تكانت غاطيح كون مشداتش راسهااا ونطق وهو كارز على سنيه) مبقييييت بااااغي نعرررف وااااالو حيت لكلااام لي قلتي كااافي والله يجعل لبرااااكة
قلب عليهاا وجهوو ويديه بدات تنرعد عليه ورحيل كانت أول مرة تشوفو معصب هاكا وفين يبان لنهااار العررس بعداا داك النهار واخا تخلعات الاانها شافت فعينيه لحنية ماشي بحال الشوفة ديال داباا لي خلاتها تمنى الأرض تشق وتبلعها ولايشوف فيها هاكا.. من طبعها مكتجرحش لواحد فهضرتها وموزونة الا لي غلط فحقهاا هاداك متتسكتش ليه ولكن نووح مغلطش؟ بلعكس عطااهاا قيمة لي حسات بيهاا نهار خدا حقها من سعيد وبهيجة وكيفاااش وفى بكلمتو ليهاا.. ميستاهلش منها أنها تجرحو فرجولتووو.. قربات جهتوو ونطقات بصوت مخنوووق وباين فيها ناادمة: سمحلياا عفاااك أناا والله مكنت قاااصدة هضرررتي لي قلت أناا (حطات يديها على راسها) معرفتتتش
مع كملات هضرتهاا هزز نووح يديه وضربهاا مع الشرجم دالزاااج لي كااان محلول تاتهرس ورحيل غوتات وقفزاااات بلاصتهاا وهي تتشوف يديه تترعد وتتقطر بالدم.. ضار شاااف فيهاا ونطق بصوت عالي معصب:غبرررري علياا كمااااارتك
رحيل:(حركات راسها بلا وعينيها على يديه وإحساس تأنيب الضمير غير مزاد تياكل فيهاا.. قربات جهتو ونطقات) يديك فيها الدم
نوح:(غووت تادفاالو ترشو عليها) غبرررري كمااااارتك لاااانصدق مفووووت فييك شي دقة القلااااا*ي
شهقات رحيل وهي تتشوف فيه كيف تسيف وتخسار لهضرة لي أول مرة تسمعها منو.. أما نوح هاد الساعة مكانش تيقشع قدامو وهادي هي طبيعتوو يكون مكالمي ومبرد ولكن فاش تيتقلب راه متيبقى يعقل على حد داكشي علاش مبغاهااش تبقا حيت عارف بلي غايغلط فيهاا.. أما رحيل قلبها ضرها ومكانتش باغا تخليه بوحدو وقصوحية الرااس يالاه جاتها قربات جهة لبيرو طيراات كلينيكس من لباكية ومفكراااتش وهي غادة جهتو هو لي كان واقف جنب كاينهج بحال شي ثووور.. جرات يديه لي كانت تتقطر وحطات عليها كلينيكس وهو ضار جهتهاا مخننزر فيهاا ونثر يديه.. وهي رجعات قربات وجرات يديه وقااالت بصوت خافت:عفااااك خليني غير نحبس ليك الدم
دغيا كلينيكس عمر بدمو مع كااان سخووون.. جابت تاني كلينيكس وبغات ديرو ليه وهو يحبسها ونطق كاعي: راااني دووويت معااك واقيلاا (قلب وجهو عليه)سيري الله يحفظك راااه مباغيش نغلط فيييييك
بقات رحيل واقفة تتشوف فيه وهي تتبكي وكرهات راسها فهاد اللحظة.. حطات كلينيكس فوق الطبلة ورجعات شافت فيه كان باقي قالب وجهوو عليها ضارت عاطياه بالضهر تاوصلات جهة الباب ومدات يديها لبواني ورجعات شافت فيه مدة قبل ماتحل لباب وتخرج..
جالسة فالحمام تتبكي وقلبها مزير عليهاا.. غلطات فحقو هاد لمرة هي عارفة هادشي مستحيل يشوف فيها باقي مور لهضرة لي قالت ليه.. حدرات راسها تتبكي وحاسة بنفسهاا مخنوووق.. خرجت جهة لاڤابو تتغسل وجهها وتعاااود.. عينيها حمرين باينة باااكية وتانيفهاا وشفايفها لي تيترعدو بلبكية.. رجعات غسلات وجهها ونشفاتو وخرجات من لحمام وهي حادرة راسها وديريكت لبيرو ديالها ومن زهرها مكانش ياسر.. هزات صاكها ودارت نضاضر وخرجات غادة فلكولوار وغير قربات جهة بيروه وهي تحبس.. بقات واقفة تتشوف فلباب وقربات جهتو مدات يديها باش تحلو ساعة كان مسورت.. رجعات تاضور راسهاا يمين وشمال تابانت ليها فام دميناج جايا باش تنقي لبيروات وهي تسولهاا:واش موسيو السليماني كاين؟
فام دميناج:لا راه خرج قبيلة
حركات رحيل راسها باه ومشات عند محمد طه وقفات حدا لباب بلامادخل ونطقات بزربة: أنا غانمشي لدار عيانة شوية
محمد طه:(ناض جهتها بزربة ونطق) مالكي؟
رحيل:عيااانة يالاه باااي
مشات ومحمد طه كيعيط عليهاا:رحيل تسناااي رحيييل
سد البيرو بزربة وخرج تابعها لقاها واقفة تتسنى طاكسي نطق باهتمام:شوقع ليك
رحيل:(قالبة وجهها وعينيها على الشانطي وقالت بصوت مبحوح) واااالو غير عيانة
قرب جهتها محمد طه وحيد ليها النضاضر فغفلة منهاا شاف عينيها لباكين وأصلا كانت باينة عليها غير كان باغي يتأكد.. كمش حجبانو وقال بهدوء:شكون بكااااك؟؟
رحيل:(خدات ليه النضاضر ورجعات لبساتهوم ونطقات بصوت مخنوق)تاااحد امحمد عفاااك خليني بوووحدي
شيرات لطاكسي وركبات ومحمد طه عينو على الطاكسي تاغبرات عاد رجع لداخل وهو مشطون عليهاا..
متكية على الشرجم مكملة بكيتها وكل مرة تشمر نيفها بكلينيكس لي عندهاا.. مغاتقدرش تنسى الشوفة لي شاف فيهاا وشحااال تتحرق فيهاا داباا ومخلياااهاا باغا غير تبكي.. كانت ديما تتلوم أسماء الاقالت شي كلام كيجرح لإسلام ولاشي حد اخر من غيروو.. وليوم هاهي دارت مااااكفس منهااا وجرحات واحد الإنسان لي عمرها شافت منو لعيييب.. وصلات لدار وخلصاتو ونزلات وهي باغا غي امتى دخل لبيتها وتبقا وحدهاا.. حلات ليها سيدرا لباب وتلاحت عليها وهي فرحااانة
سيدرا:مامي جييييتي
رحيل:(حظناتها) اه امامي
هزات عينيها فغزلان لي كانت جايا تابعة سيدرا وحركات ليها راسها ودخلات لداخل لقات مها جالسة فالصالة كيتغداو..
تانيرت: بنتي جيتي بكررري ياك مامريضة
رحيل:(بصوت باين فيه مغيير) راسي كيضرني غانمشي لبيتي نتكى
هربات من عيون مهااا لمتسائلين ومشات ديريكت لبيتها سادة لباب على راسهاا.. جلسات فالأرض جنب النموسية ورجعات تتبكي وهي سادة فمها باش مايسمعووش بكاااهااا.. واخا من لداخل باغا تغوووت وتخرج لي عندهاا ولكن مبغاااش تخلع تاشي حد.. يكفي أنها كانت ديما خلعاهوم عليها فكل مرة كيجيها شي كررريز وطيييح.. جهدها حسات بيه تقاااد ومبقااا عندها فين تزيييد نوووح بصح عندو لحق فهضرتوو هي ممرتاحااش فالداخل ديالهاا حيت باقي كاين واحد لجرررح لدااخل لي معمرررو مغايبرا وغايبقا تينزف دديما حيت هي مدايراااش جهد باااش داوييه.. خمس سنين دازت وفكل مرة كتفتح لهضرة على لمااضي تتلقى راسها تتقصح بحااال غير لباررح طرا لي طرا معاااها وهادشي حيت هي مدارتش خطوووة باااش تبراا وتنسى.. سمعات الدقان فالباب وصوت غزلان تتسولها واش باغا تغدى وبزز جاوباتها بلا.. ناضت بشوية عليها زولات فولارهاا وحوايجها وبدلات ببجامتها وخرجات لحمام توضى بااش تصلي لعلى وعسى ترتاح شوووية..
---
كانت محنية راسها تتخيط ليه يديه لي تفلحات ليه فالجنب مع ملي ضرب الشرجم ضربوو بجنب يديه.. ملي سولاتو لمرة لولة ومجاوبهاش معاوداتش نطقات حيت باين فيه معصب وهي عارفة خوهاا مكيتعصبش بالساهل.. لوات لفوصمون على يديه كلهاا وهزات فيه عينيها لقاتو قالب وجهو لجنب وباين فيه ساهي ومحسش گاع بيها سالات..
بيسان:ساليت احبيبي
تنهد وشاف فيديه بلامايدوي وهي كملات هضرتها: حاول ماتفورصيش بيها باش مايتحلوش لغرارز ملي غايطير لبنج غاتعطيك لحريق شوية
نوح:(حدر عينيها كيشوف فيديه ونطق ببرود) صبرنا لماكثر
بيسان:كيفاش تجرحتي ؟
مجوبهاش وهي نطقات بحنية:ماتبقاش تفورصي على راااسك وتهزها ملين تقااالت احبيبي وتهلاى فصحتك
نوح:(جرها بليد لخرا وباس جبهتها ونطق بصوت أجش) ربي يتهلاى
متكية فالنموسية ساهية بعيد تتسول راسها واش هي مرتاحة دابااا فاش جرحاتو وبعداتو عليها؟ واش هادشي لي كانت باغا ملي رفضاااتو نهار طلبها لزواج؟ ولأهم واش غاتبقا حياتها كلهاا هاكا بوحدها بلامايكون فحياتها شي واحد لي يكون جنبهاا ديما فالمرة قبل لحلوة.. من غير باها وخوتها رااجل لي تبغيه وتعيش معاه لحياة لي باغاا ولي كانت تتمناهاا.. حياة يكون فيها الإستقرار والحب والإحترام والمودة... راجل يخاف عليها ويكون متاقي الله وعارف بينو وبين لي خالقو.. راجل لي ملي يتدكر سميتو فشي مجمع يدكروه بالسيرة الطييب ويقولو عليها هاديك مرت فلااان الله يعمر ليه الداار ولد النااس وماتشوفش منو لعييب.. هادشي كولو موجود فيه هو وهي شافت هادشي.. شافت كيفاش الناس لي كيعرفوه محتارمينوو وعاطينو مكانة لي هوو دارهاا بنفسوو.. شافت تعاملو مع عائلتها وعلاقتو مع باهاا لي ماشي بالساهل لواحد كيقدر يكسبوو ولكن هو دارهاا.. شافت بنتها كيفاش متعلقة بيه وكيفاش هو كيعطيها لخاطر ويحن عليها بحال بنتوو.. شافت وشافت ولكن مكانتش تتبغي تعتارف حيت لخوف كان طاغي.. خوفها أنه يكون كيمثل عليهوم ويكون مبين هاد لوجه ليها باش يصيدهاا.. كانت تتخاف يتكرر ليها نفس السيناريو مع عاصم ورعبهاا كان مخليها تحكم قبلما تعاشر...وأيضا خوفها من أنه توقع ليه شي حاجة وتكون هي سبابهاا.. عارفة بلي گاع الناس لي ضايرين بيهاا حياتهوم مهددة بلخطرر حيت كاين واحد عدووو الله قاطع يديه من الرحمة ممخليهومش فراحتهوم وعارفة أنه ماحدو عاايش كيتنفس حياة حبابها ولي كيهموها فخطر وكيف فقدات صاحبتها وختها تقد تفقد شي حد آخر وهي مباغاش هادشي يوقع يكفي ديك اللومة لي تتلوم نفسها على موت صاحبتها.. ودابا تفضل أنها تموت هي على أن لعزيز عليها يتأدى.. سمعات صوت أسماء وهي تتعيط ليها وهي تنوض تحل ليها وفالحقيقة محتاجة لمن تعاود وأسماء أحسن خياار.. وكيف توقعات غير شافتها أسماء شكاات وطرحات سؤالهاا لي خلى رحيل تفرگع بلبكااا وهي تتعاود ليها كلشي بلاماتنقص تاحرررف..
أسماء:(بجدية) كنتي ديما تتلوميني ملي تنغلط فشي حد وتتقولي ليا عييب وحشومة ماتجرحيش غييرك ونتي درتي نفس الشي ليووم.. فلول ملي كنتي تتعاودي ليا لي طرا بناتكوم كنت تانصحك ولكن دابا غانلومك حيت نتي مادرتي فيها مايصلاااح السيد جا لعند بابا وقصدو وطلبك من عندو ونتي تسنيتي شحاال وقلتي ماموافقاش وحد مابزز عليك حيت عارفينك اش مدوزة قبل وتاهوو عطاك وقتو باش تعاودي ليه علاش رفضتيه ونتي قصحتي راسك قلنا عادي السيد بدا يبين ليك أنك تتعجبيه وبلي واخا رفضتيه بااقي شااريك وعتقك فشحال من مرة ودافع عليك وجاب حقك فداك الزاا*مل لي خدام معاك واخا نتي رفضتيه بقا يتعامل معاك مزياان ونتي اش درتي قللتي من الرجوولة ديالو واش عارفة اش تتعني يعني نتي قلتي ليه بالعربية تاعرابت نتا ماشي راااجل اش بغيتيه يدير يبووووسك مثلا ويعنقك يقول ليك براڤو راه ملي مامرمقهااش معاك حمدي الله شوفي غير إسلام لي عايرتو ماحسيت بيه تاعطاها ليا لوجهي أو ولد لحاج بلاصة مايعطيك تبنديخة جاابهاا فيدوو وغاتلقاي هضرتك تاطلع وتنزل فيه دابااا وعمروو ينساهاا ليك حيت الراجل ملي تتقيسيه فلبوان فيبل ديالو لي هي كرااامتو راه والله لاعقل عليك سوليني أنااا لي عارفة فالرجاال أما نتي يالاه شفتي دوك كمامر النحسس لي بينهوم وبين الرجلةة لخير والإحسان واش عند بالك هو ياسين ولد مووو لي خلاك فنص الطريق ومشى تبع ديك لعاقيسة لي زوجاتو لي بغات ونتي خسر عليك كلمة مي سخطات عليا الاماتزوجتش بلي بغات هااا واش عند بالك هوو عااصم لي مريض فكروو ولي دخلك بلمزيااان باش يطمعك ويطيحك فيه ومع نتي يالاه خرجتي من تجربة فاااشلة وشفتي السيد قلتي هنااا نباات وغير تزوجك عرى على نياابو وصدق شمكار وبزنااز قاطع يديه من الرحمة هممم ولاعند باالك هو داك لحيوان دعمو لي حط عليك لعيين ونتي على ذمة ولد خوه وتحرش بيك ويعلم الله اش دار خرررر واش عند بالك هادو لي تتعرفي رجال سمحيليا ولكن هادو غير شمايت أماا الراجل هووو هاداك لي نهار شفتتو عرفتو ولد الناس ومافيهش الدغل سوليني أنا لي عاااشرت قماقم تاوليت عارفة الشين من الزيين.. نتي ارحيل مابغااش تحيدي الضبابة لي على عينيك وتشوفي لي يصلاح ليك مباغاش تنساي اش دوزتي وتزيدي لگدام باقااا فبلاصتك ليومنا هادا واخا تتمشي عند الطبيبة وتتعيى ماتعطيك النصائح الاأنك عمرك درتي بيهوم.. عارفاك مقصحة وعارفة بلي ماشي ساهل تنسااي ولكن حاااولي مافيها باس تحلي قلبك لي سادااه وتعطي لراسك فرصة ياك نسيتي ياسين لي عطاك بالضهر وضربتي عليه وعلاش ماتنسايش تاداك لمررض تاهو وتنحيه من دماااغك وتشوفي حياتك لي غاتنفعك وتعيشيها علاش ماتقوليش لولد لحاج نتي اش عشتي علاش مصارحتيهش ملي عطاك المجال تهضري ها سمعي ارحيل بصح قبل أنا ويااك مكناش مزيان وكانت علاقتنا ماشي تال لهيه ولكن كلشي تبدل دابا والسبب هو أنني أناا ونتي عطينا لبعض فرصة وتعرفنا على بعضياتنا ولقينا راسنا مشابهين فشي حوايج واخا مكيبانوش ولكن أنا ونتي كنشوفوهوم اوا راه هاكاا غايوقع نهاار تحلي عينيك وقلبك وتشوفي بلي داك السيد هو لي يصلاح ليك ونخافك غير يفوت لفووت وتندمي..
وقف موطورو فالباركينغ دالسبيطار وسدو عاد نزل جابد تلفونو كيشوف فلمساااج لي مسيفطة ليه.. قلب عينيه وتم داخل ديريكت لاسونسور وبحكم عارف الشومبر ولطاج مسولش فلغسيبسيون.. وصل لطاج التالت وخرج وعينو كيقلبو فداك الكولوار على الشومبر ديالهاا تاوصل قدامها وهو يدق لباب ودخل لقاااهاا متكية فوق السرير الطبي أو مضورة على راسها فاصمة ورجليها من الركبة لتحت مگبصة.. كانت صفرااا وباين فيها لمرررض وجنبها كانت مرا كبيرة فالعمر لابسة جلابة مع زيف وملامح وجهها مهمومين.. انتباهو بزوجات ليه ونور غير شافتو وهي تبسم ومدات يديها وقالت:حبيبي جيتي
ريان:(هز حاجبو وشاف فديك لمرا لي كانت تاطلع وتنزل فيه ورجع شاف فنور ونطق) كيبقيتي دابا
نور:(تادوي وتفشش عليه) هانتا تتشوف حالتي رجلي مانقدرش نحركهاا حيت تهرست منها كنت غااانموت غير ربي لطف
ريان:على سلامتك (مد يديه سلم على لمرا باحترام) سلام اوعليكوم الالة
لمرا:وعليكوم السلام
نور:ماما واخا تجيبي لياا شي حاجة ناكلها فيا الجوووع
شافت فيها مها بشوفات نور فهماتهوم ومع دلك ماتسوقاتش.. ناضت مها خرجات وغير تسد لباب وهي تجر نور ريان من يديه مع كان واقف جنبها وتبسمات تادلع:كنت عارفاك غاتجي احبيبي ومغانبقاش مقلق مني
ريان:(بعد عليها وقال ببرود) جيت باش ندير لواجب وصاااف
نور:وصاااافي اريااان مالك هاكا عمري تقلقت منك واخا دير لي درتي فيااا
مجوبهاااش بقا غير ساكت تايشوف فيها وهي كملات هضرتها بانفعال:من نهار لي وقع لمشكيل فلبار ونتاا مبدل علياا ومبقيتيش كيف كنتي حسب شحال من شهر داز على داك النهااار وديما تانقول ماعليييش انوور يقدر يكووون عندو شي شغلل ولايكووون عندو شي مشكيل وتفهمتك ونتاا غير مزااايد فيه تشوفني فلخدمة وتدير راسك متتعرفنيش تاكانجي أنا ونهضررر معاااك اش واقع ليك وشكون بدلك عليااا اريان
ريان:(قلب وجهو مافيه مايتصادع) نجيك من اللخر ماعنديش مع هاااد التمرضيييين وفريييع لك*ر فين غادي فين جاي مالك ماتتجاوبش مع من تادوي علاش شفتي فهاديك بزاااااف گاااااع الخنننقة هي هادي نتي عارفااااني ماعنديش مع ديك لقضييية وديجا دويناا وقلتها ليك ومع دلك تتعاودي نفس الغلاط فكل مرة
نور:(حلات فمها) واش ماشي من حقي ياك أنا وياك فغولاصيون وكنبغيو بعضياتنا ماشي من حقي نعرفك فين كاين ومع من تادوي
ريان:(تعصب عليها)الالة مامنحقكش شبعنااا تصاااحيب تاطلع لينااا فك*رنا وشبعناا بنات عمرهوم دارو كيف تاااديري وزايدااها تتعاودي لصاحبتك أي حاجة وقعات بناتنااا مالنااا مصاحبين معاك ولامع صاحبتك
نور:(بدات تاضور عينيها وقالت بخوف)شكوون قالها ليك؟
ريان:(بسخرية)صاحبتك لي عاطياها نمرتي دوي معاياا باش تجربني واش صدقت ولا لا عند بالك ناعس على ودني
نور:(لهضرة تلفات ليها ونطقات وهي تاضور عينيها) ريان شوف نتا فاهم غالاط
ريان:ماتعاوديش ليا حيت ممساليش ليك جييت نشوفك وندير لي عليا ونقول ليك كلمة وحدة أنا وياك غانحبسو هاد لمرض هنااا حيت مبقيتش تانحس معاك بالرااحة فاللول شتك كوول وبنتي ليا بعقلك ساعة ملي ولاو فيك لفعايل دلبراهش مكاين لاش نكملو ولمرة الجايا متبقايش تيقي فالصحابات وتيقي فراااسك ابنت الناس الله يهنيك
خرج من عندها مبعد مقال لهضرة لي كان مخبيها فداخلو من مدة.. علاقتو مع نور بدات فالخدمة بحكم خدامين أونصومبل فاللول كان تيشوفها عقلية زوينة ومرزنة وباين شخصية عليها زعم ورمى لخطوة وقال علاش ونصدق ناوي معاها لمعقول ولكن غير عاشرها لقى لعكس ولفعايل دالتبرهيش لي فيها كرهووه فديك لعلاقة.. ولي كانت نقطة النهاية بالنسبة ليه هي ملي عطات لصاحبتها النمرة باش تجربو وتعرف واش كيخونها وصاحبتها تاهي صدقات مطورة وبغات الدور بيه ساعة مع من طاحت.. خرج لبرا غادي جهة موطورو وهو تبان ليه واحد الرانج واقفة جنب كمش عينو فهاديك لي واقفة حداها ولي كانت باين فيها معصبة غير من صوتها الرقيوق لي تاتغوت بيه:مشيت نتغدى ورجعت لقيت لبلاصة لي تانسطاسيوني فيها عمرااات وزعمة نتا عارف هادي بلاصتي
الدري لي كايسكاسيوني:مشيت لطواليط اختي وجيت لقيتها عامرة وماعرفتش لمن هاد لموطور
ريان:(ببرود)ديالي هاد لموطور
ضارو عندو بزوج وعين ريان جات فهاديك لي كانت تاتهضر ولي عرفها شكووون هي.. عويناتها الزرقين كان باين فيهوم العصبية أو وجهها حمرر وزغيبات من شعرها كيطيرهوم ليها الرييح ودايرة نضيضرات فوق راسهاا رادة بيهوم لكصيصة لووور.. لابسة شوميز ساتان بلونكاسي مع سروال دجين بيض محلول من لتحت وصندالة بيضاا بالطالون.. طلعها ريان ونزل وتبسم ليها: مون دكتوغ مالكي معصبة؟
هزات حواجبها فيه وهو قرب جهتهوم وغمز داك الدري لي انساحب مافيها مايتصادع مزال باركة غير ديك الوقيتة لي حيحات عليه بيسان ملي لقات لبلاصة فين كاتسطاسيوني عمرااات.. أما ريان وقف قدامها وضحك: رخفي النفس ونتي شوية وطرطقي
بيسان:(فرفات برموشها) نتا اش كادير هنااا؟
ريان:(غمزها وقال وهو عاض على شفتو) توحشتك وجيت نشوووفك
بيسان:(كمشات حجبانها ونطقات تتخنزر فيه) واش شوية لباااس اش هاد لهضرررة لي تتقول
ريان:(تكرشخ بالضحك) ههههه واشوفي روحك لي تتسوليني اش تاندير هنااا
بيسان:زعمة واش شي حد من عائلتك واقعة ليه شي حاجة هادشي لي قصدت
ريان: هاد الساعة كلشي لباس
بيسان:حيد موطورك بغيت نسطاسيوني
ريان:(هز فيها حاجبو) وهاحنا بدينا نخسروو فتجمااعت "لهضرة"
بيسان:(جوباتز بالسوسية) أوريد سرك ياااغ "ممسالياش ليك"
ريان:تتعايريني ياااااك
بيسان:ياك نتا لي بديتي وهضرتي بالشلحة
ريان:وامعارفش بزاف غير شي كليمات وصاف
بيسان:اوا سير تعلمها ودابا هز موطورك سربيني
رجعات ركبات فطوموبيلتها وريان مشى هز موطور وركب فيه وبعد ليها تاسطاسيونات عاد نزلات تاتخشي الكونطاكط فالصاك ومشات دخلات لداخل بلاماتشوف فيه وهو حرك راسو وديماري غادي لدار..
----
شحال زوين فاش تيكون عندك واحد الشخص كينصحك فاش تاتغلط وينبهك.. هضرة أسماء جات فوقت منااسب لرحيل وزادت خلاتها تحل عينيها على بزاف دلحوايج.. يمكن هوما معارفينش تجربتها كيف دازت وشنو دوزااات فيهاا ولكن من ناحية عندهوم لحق حيت هادشي لي هي تاديروو وهاد الطريق لي غادة فيه مغاتخرجهاااش لتاشي بلاصة.. بلعكس غاتبقا دور فنفس الحلقة الفاارغة.. ملي هضرات معاها أسماء وهي فالبيت تتفكر وتبني وتريب غير بوحدهاا.. هزات تلفونها ودخلات لواتس وطلع ليها الستوري دبيسان حطاتو.. دخلات لقاتها حطات لپلا لي تغدات بيه وتصويرة ديال شي حاجة متعلقة بداكشي لي تاتخدم فيه.. جات فبالها فكرة وقررات تنفدها ودخلات عندها لخاص كتبات ليها..
رحيل📩 سلام الزين صافا
طلع ليها زوج شرايط يعني راه أونلاين وتسنات واحد عشرة الدقايق عاد دخلات بيسان وقرات لمساج..
بيسان📩 زيونات حمدلله ونتي؟
رحيل 📩 تاأناا اش تتعاودي راك فالخدمة؟
بيسان 📩 وي مشيت تغديت ورجعت من زهري ليوم خارجة مع التسعود ماعنديش ليل
رحيل 📩 حسن ترتاحي شوية (عضات على شفتها) اش خبار ماماك وخوتك وجدودك؟
بيسان 📩 صافا ماشفتهومش من الصباح هههه قليل فين تانتجمع معاهوم هههه
رحيل 📩 الله يحسن عوااانك صعيبة خدمتك وتتبغي الصبر
بيسان📩 واخا هاكا كنعشقهاا وحمدلله حلمي حققتو وهادشي بفضل الله سبحانه وتعالى وخويا حبيبي
رحيل(قلبها دق فاش جات سيرتو ولقاتها فرصة لازم تستاغلها) 📩 باينة من علاقتكوم بلي مغاهمين نتي وياه؟
بيسان📩 هههه بزاف كنحسبو فمقام بابا الله يرحمو خويا نووح مكاينش بحااالو
رحيل 📩الله يخليه ليك
خرجات من لواتس ورحيل بقات تتشوف فلديسكوسيون وهضرة بيسان لعفوية خلات رحيل تزيد تندم على مقالت ليه وكيف قرناتو فدماغها بداك لحيوووان ولفرق وااضح بناتهوم.. تنهدات ونطقات بهمس:دابا أنا شنو غاندير تت يااااربي
سمعات صوت مساج ولقات بيسان لي مسيفطة ليها 📩 دزولي بب مجاوبتكش حيت صونيت على نووح حيت بالي تشطن معاه
رحيل (جاتها لهضرة من لجنة والناس ودارت راسها معارفة ولو) 📩 علاش شواقع؟
بيسان (تتعاود من نيتها)📩ماعرفتش كيفاش تضرب فيديه وغرزها سبعة دلغرزااات وملي خرج من عندي تشطنت عليه وكنت تانصوني عليه ساعة مجاوبش داكشي علاااش
بقات رحيل تتشوف فلمساج وحاسة بلبكية.. بسبابها ضرب يدو بلاصة مايضربها هي ويفوت فيها الدقة جابها فيدو وغرزهاا سبعة دلغرزات زفرات النفس وجوباتها 📩 واش هو بخير بعدا ياكما كضرو بزااف؟
بيسان 📩 ضروري ماضر ملي يزول لبنج غير ربي لطف إيما الضربة لي ضربها خايبة ملي جاا عندي ملوي لفوطة على يديه لي رجعات كلها دمايات تخلعت والله ويدي ترعدات علياا
رحيل 📩 غايخصو يعطيها الراحة باش تبرا ليه وباش مايتحلوش لغرارز
بيسان 📩 لقيتي لي يرتااح كيف غرزتها ليه ناض فلبلاصة ساگ بيها
رحيل 📩 الله يجيب الشفاا
بيسان 📩 آمين نخليك ازين نمشي لخدمتي بيزووو وسلمي على لفامي
سالاو لهضرة ورحيل سدات لكونكسيون وتكات فوق لمخدة وعينيها على السقف.. منظر يديه لي كانت تاتنزف جات بين عينيها وخلات داتها تبوورش عليها.. تأنيب الضمير غير مزاد هلكهاا وباغا غير وقتاش يجي غدا وتشوفو وتعتادر ليه على مقالت ومغاترتاح تاتخليه يسمح ليهااا..
ملي وصلاتها لخبار من عند بيسان خرجات من جناحها وهي مخلوعة وقلب الأم باغي يشوف كبدتها باش طمن عليه وترتاح.. دقات باب جناحو تاسمعات صوتو عاد دخلات تاضور عينيها فالصالة وعاد قربات جهة باب بيت النعاس دقات تاني ودخلات.. عينيها ماتجي غير فلڤاليييز لي محطوطة فوق والنموسية وبعض من حوايجو لي مستفين فيهاا.. كمشات حجبانها وضارت جهة باب الدريسينغ ملي سمعات حسو وبان ليها خارج هاز علالق فيهوم لشوميز.. ضربات على يديه لي كانت فيها فاصمة كلها من غير صبعانو ونازلة لتحت جهة معصم يديه.. قربات عندو وشدات يديه ونطقات بخوف أمومي: مالك أولدي اش وقع ليك
نوح:(شاف فيها بهدوء) والو ايمّا ماتشطنيش روحك أنا بخير
رحمة:كيفاش مانشطنوووش وختك قالت ليا غرزتي يديك اش وقع ليك؟
نوح:(زفر النفس مباغيش يتفكر اش طرا) ماوقع والو
رجع داخل لدريسينغ يجيب حوايجو ورحمة نطقات وهي تتشوف فديك لڤاليز:واش نتا غادي لشي بلاصة؟
نوح:(رجع وفيديه الحوايج تايستفهوم) اه
رحمة:فين واش لفيرمة؟
نوح:لا
سكتات رحمة فاش شافتو مبغاش ينطق ويقول اش كاين.. عارفاه مكيهضرش ويقول مالو ومامولفش فيما يكون غادي لشي بلاصة يجي ويقولها ليها.. قاعدة لي ولفاتها فيه من زمااان ولكن واخا هاكا قلبها مكيخليهااش ترتاح تاكتسولو وعلى حسب زهرها مرات كيعلمها مرات لا.. تنهدات وعينيها عليه وقلبها حاسة بيه كيضرهاا..
رحمة:واش عارف شي خبار على خوك؟ كانعيط ليه مكيجاوبش وراك شفتي داز رمضااان ولعيد ومجاااش يطل ولايبارك لينا قلبي مشطوون عليه خايفاه يكووون واقعة ليه شي مصيبة
نوح:(جاوبها ببرود) ماشي دري صغير باش تشطني عليه
رحمة:(جاتها لبكية) كيفاش مانتشطنش وهادي كثر من تلت شهور وهو غااابر وخبارو مقطووعة ويعلم الله اش واقع ليه
نوح:(طلع عينو فيه وكمش حجبانو وقال بجدية) راه هوو كيف السبع كيضيع فلوووسوو فالقصاااير وعايش لحياااة وضارب على فاميلتوو ونتي هنا حارقة دمك عليه
رحمة:(جلسات فوق النموسية ودموعها بداو ينزلو) اش غاندير لقلبي لي مهوول عليه ولعقلي لي تيسولني واش واكل ولاشارب ناعس ولافايق ميت ولاحي
نوح:(ضرب بلاشوميز لي هاز وديك لحرقة لي فصوتها شعلات فيه العافية من لداخل) علاااش تتبكي علاااش واش هو تسووق ليك ولاقلبو ضروو عليك وقااال نسول فلي ولداتني ونريح بالها شوووية هااا نتي تاتمرضي راااسك وهو گاعمااا حاس بيك هاااهوو بخييير وماخصوو تاحااجة وااش عمرووو عيط وسول فييك ولاتسووق ليك شتي فشوووشك ليه اش دارو فيه.. وصل لثلاتينات وهو مداير فحياتو تازفتة لي قدوو دارو عائلة ومستقبااال وهو تابع ليا السلاااگط كيكشطووو فيه بالسيف لقاوها باااردة لفلوس لي الناس تاتخدم عليهوم ويفيقو بونبر باش يجيبوهوم هووو عندوو مكاين لاش يضرب تمااارة ياااك (كايشوف فمو حادرة راسها تتبكي وهو غير مكيزيد يخيخ ويتعصب) كون نهار لول حبستيه مكناااش غانوصلو لهاد لمواصل فششتيه وبسلتيه تامبقاا عااارف لعائلة والاحترام وصلة الرررحم ودابا تتبكي عليه وتردي لقلبببك بااااركة ايمّا
سكت وصدرو يطلع وينزل يالاه قال برد من داكشي لي وقع ليوم وزادت كملات عليه موو بهضرتها وبكاهاا.. ولمشكيل هادا لي دايرة عليه هاد لحالة مامسوقش ليها وماعمرو عيط ليها ديما هي لي تتقلب عليه وديما هي لي خصها تعييط وهو ضارب الدنيا بركلة ولي تيزيد يصعررر نوح هو صحااب خووه لي باغيين غير مصلاحتو ولي تيبقااو يحللبو منو لفلووس وهو كيف الدمدومة وشحال من مرة نبهو نوح ولكن رؤوف مكيتسوقش ليه وكيفهم كلامو بلعكس وتيظنو باغي يتحكم فيه..
رحمة:(هزات فيه عينيها ونطقات بصوت مضيوم) عافاااك اولدي لما قلب عليه وشوفو فين هوو وخليه يرجع نتا عارفو طااايش
نوح:(هز حاجبو وساس يديه بزوج ونطق ببرود) ماعندي مانقلب أنا هاداااك غسلت منووو يدي زماااااان مبقيتش غانمرض رووحي وصحتي معاااه واااحد لي تاتنصحوو وتوريه مصلاحتو وهوو گاعما مسوق لجد والديك ماعندي ماندير بيه خليه يضربوه لحيوووط ويتحك شوية وخليه يطرطق فلوووسو ويبقا الله كريم ويشوف ديك الساعة واش غايبقاااو دوك السلاگط تابعييينوو ولاغايسوسوه تاهو حيت مبقا فيه نفع (رجع تايستف حوايجوو وكمل بسخرية) قالك طااايش گاعماا قلتها على زين العابدين لي باقي موصلش لسن القانوني نقولها لواااحد قرب يقفل واحد وثلاتين هه تجماعت إيخوان "هضرة خاوية"
سكتات رحمة ومالقات ماتقول مزال حيت عارفة نوح الاقال هضرة مغايعاودش يرجع فيهاا وبيما أنه خلاه يعوم بحروو فواخا ترغب وتزاوگ مغايسمعش ليها..
----
نزلات رحيل لصالة تجلس مع الدار ونيت تريح دماغها من تفكير حيت حسات براسها شوية وتحماق.. جلسات جنب محمد طه لي وسولها بينو وبينها على كيف بقات وهي طمناتو ورجعات تادوي معاهوم عادي باش ماتبينش بلي كاينة شي حاجة.. بان ليها باها داخل وهو كيشوف فالتلفون وجلس جنب تانيرت لي نطقات:مامشيتيش مزال
رحيل:فين غايمشي؟
إدريس:كنت داير مع ولد لحاج نمشيو لعند واحد السيد معرفتنا ساعة عيط ليا قبيلة وگال ليك مغايمشيش مزال
رحيل:(بلاماتحس نطقات) وعلاش؟
إدريس: حيت مسافر
سكتات رحيل سارطة ديك لغصة لي حسات بيها تكونات فحلقها وقلبات وجهها معاجبها حااال.. كانت نيتها أنها تمشي غدا لخدمة وتقدم ليه اعتدااار ولكن وقع لي مكانتش دايرة لي حساب والسيد سااافر ويعلم الله وقتاش غايرجع.. أسماء هي لوحيدة لي كانت حاسة برحيل حيت هي عارفة لمشكيل وعاودات ليها داكشي علاش فهمات هو علاش غايكون سافر..
أسماء: ياكما كاين شي مشكيل؟
إدريس:ماعرفتش حدو قال ليا غايسافر وفاش سولتو واش غادي لفيرمة قال ليا لا
أسماء:(شافت فرحيل لي حادرة راسها تتلعب بلناپ ديال الطبلة ونطقات) اوا تلقاه عندو شي شغل خرر داكشي علاش مشى واش غايتعطل؟
ريان:(شاف فيهاا ) ونتي علااااش كاتسولي هاد الأسئلة كلهاااا ياك شي باس مكاااين
أسماء:(خنزرات فيه حيت فرطها وعاق بيها) ونتا مالك السالوباااار عااادي كانسول فالسيد حيت كان غادي مع بابا داكشي علاش
ريان:هااااا غادي مع باباااا ماشي معااك
قلبات عليه عينيها وإدريس ناااض غادي لبيت وتبعاتو تانيرت وأسماء غير شافت باها مشى وهي ضووور جهة ريان طلعاتها معاه بواحد لقرصة مع كان لابس غير شووورط معري فخاادو وهو بحرر لقرصة هبببط ليها شعرها ناتفهاا تاغوتااات وزيرات عليه فالقرصة:
طلللق من شعري الخرااا
ريان:(عاض على سنيه) طلقي نطلللق
أسماء:1 2
ريان:3
طلقو من بعضياتهوم وأسماء علاين طير عليه من ديك النتفة لي دار ليها وهو خلاص كيحك بلاصة القرصة مخنزززر فيهااا وسيدرا تاضحك عليهوم وقالت: سومة شعرك طالع لفوق ههههه
أسماء:(حمرات فيها الشوفة) لاش تاضحكي البرهووووشة
سيدرا:(خرجات ليها لسانها) نتي برهوسة أنا كبيرة
بلاعكز على أسماء ناضت قاصدة سيدرا لي غير شافتها وهي تقفز وماتمشي تخبى غير وراا محمد طه وتكمشات ونطقات تتحامى بيه:موووودي
محمد طه:(مد يديه بعد أسماء) بعدي ليا من روووح موودي
أسماء:(تاطل عليه) اجي نوريك شكووون لبرهووشة انص ميتروو ديريها يغرق فيها الجمل وتمشي تخبااااي خرجي لهنا
سيدرا:(تاطل مور ضهر محمد طه وتترمش عويناتها لمبطنين كيف لبابوشة) بعددددي مني نتيااا
أسماء:(دارت ليها كرو فراحة يديها) تاطيحي فيدي ونتفاهم مع ملتك ابلااااتي
محمد طه:(هز فيها حاجبو) تقييسيها نتفاهم معاااك
أسماء: ماشغلكش نتااا بيني وبينهاا
محمد طه:(خنزر فيها)راني دووووويت اأسمااء
أسماء:(شافت فرحيل) شتي بنتك اش قالت ليااا؟
رحيل:(ربعات يديها ماعندها خاطر) وصافي تانتي دايرة عقلها فيهااا وهي باقي صغيرة
سيدرا:(مكمشة حجبانها) أنا كبيرررة مامي
أسماء: اوا الاكبيرة اجي تتفاهمو
سيدرا:هااء وباقي أنا مومو
تبسمات رحيل لهضرة بنتهاا وتاأسماء ضحكاات ونطقات:شبان ليكوم فهاد لويكاند نسافررو
ريان:وايييه نيت نهار السبت جوووغ فغي مكيناش خدمة
رحيل:(حطات راسها على لمخدة وتكسلات فوق السداري) مكرهتش نمشيو لشي بلاااصة نبدلو لجووو
سيدرا:(خرجات من مور ضهر محمد وجلسات فحظنو)مامي نعوووموو
ريان:فين تبغيو نمشيووو؟؟
محمد طه: نطلعو لشماااال؟
أسماء:نشدو الطريق الجمعة فالعشية باش ليل نكونو تم ونربحو السبت والأحد مع ماعندناش لوقت
رحيل:واش كاين غير الشمااال ؟؟ ديك لمرة مشينا ليه
ريان:نشوفو بعدا لواليد واااش غايبغي نمشيو ولا لا
أسماء:بابا مغايقولش لا راك عارفو تاهو يبغي يمشي يبدل لجووو
غمضات رحيل عينيها تاتسمع ليهوم وفنفس الوقت تتفكر فيه هوو وفهضرة بيسان عليه.. وكاتفكر دوك التصرفات ديالو والاهتمام لي بينو ليهاا نهار العررس وكيفاش كانت قريبة ليه بزاااف.. يمكن كون تلاقاتو فظرووف خرااا مغاديش ترفضو من أول مرة طلب يديها وغاتقبل بيه.. ولكن الظروف لي عاشت كانت عندها رأي آخر.. وغيرات فيها شحال من حاجة لخوف لي ولاات عايشاه وعدم التقة فأي شخص كما بغاا يكوون.. نفسيتها لي تزعزعات وأشيااء أخرررى هي لاحظاتهوم..كل ليلة كانت تتمنى أنها تنعس وتفيق تلقى گاااع شي لي عاااشت يكون مجرد كااابوس.. عاصم أثروو كااان قوووي عليها وخلى واحد لبصمة فحياتها لي هي تتحاول تغاضى عليهاا وتنساهاا.. حلات عينيها فاش حسات بسيدرا نعسات فوق منهاا وتبسمات ليهاا وهي معنقاها ونطقات سيدرا:مامي فين غانمشيو مزال؟
رحيل: ماعرفتش امامي نشوفو جدك اش غايقول
عمرو طويل مع دكراتو مع دخل لصالة مور مابدل حوايجو وسيدرا غير شافتو ناضت من عند رحيل تتجري تعاود ليه اش قالو:بّا ديدي غانسافروو
إدريس:(هزها وجلسها عندو) فين غاتمشيو
سيدرا:غانمشيو كلنا نسافروو ياك امامي
رحيل:(حركات راسها) اه هاد السبت مكيناش خدمة وقلنا نمشيو نسافرو لشي بلاصة واخا غير يوماين نبدلو لجو شوية
تانيرت:وقررتو فين؟
أسماء:تت كل واحد واش كيقول باقي ماتافقناش على بلاصة وحدة
تانيرت:تمشيو لتارودانت؟
ريان:(شاف فيهوم) بصح علاش مانمشيو لبلاد لواليدة ونشوفوها عمرنا صراحة مشينا ليهاا
رحيل:(تقادات فبلاصتها) سيدرا باغا تعوم
تانيرت:كاين واحد لواد تماا كيعومو فيه اش بان ليك اإدريس؟
تنهد إدريس فاش تفكر لواد لي هضرات عليه ولبلاصة لي شافها فيها أول مرة ورجع تفكر نهار دارت كسيدة وكانو غايتلاقاو تم.. رجع تنهد ونطق بهدوء:خليونا نمشيو لأگادير حسن تال مرة خرا ونمشيو ليها
تانيرت:نيت نشوف رقية شحال هادي ماشفتهااا
كانت واقفة غزلان حنب لباب تتسمع ليهوم وغير سمعات كلامهوم وهي تسرط ريقهاا
حكات جبهتها ودخلات عندهوم وغير شافتها رحيل وهي تبسم ليه وقالت:زغرتي وأخيرا حددنا فين غانمشيو وقررنا أگادير
غزلان:(حكات ودنيها متوثرة) نتوما غير سيرو أنا مانقدرش نمشي معاكوم حيت لبنت لي كارية معاهاا عيانة شوية وغانمشي نشوفهاا ونبقا معاهاا هاد ليامات
تانيرت:سيري طلي عليها غدا وأصلا ماغانمشيو تال الجمعة يعني باقي لوقت
غزلان:لا اخالتي نتوما غير سيروو أنا بلاماديرو بحسابي
احتارموا قرراها ومبززوش عليها حيت واخا دابا عايشة معاهوم ومستاقرة عندهوم إلا أنهوم عارفين غايجي نهار لي هي تقدر ترجع لدارهوم ولايقدر يجي زمانها وتزوج ولايقدر تلقى خدمة حسن من هادي.. بصح هي باقا تتقرا وباقا تتبني فدروج مستقبالها إلا أنه الوضع مغايبقاش هاكا طول العمر.. تافقو يمشيو لأگادير وسيدرا تتحسب فنهارات باغا وقتاش تجي الجمعة باش يتحركو ويشدو الطريق.. دازت ديك الليلة بخير وعلى خيرر ولغد ليه كانت رحيل فخدمتها كيف عادتها وعقلها ماشي معاهاا.. هادا غير نهار لول وحسات بفرق كبيييير فيه.. على الأقل تتكون جالسة فالبيرو وتتكون عارفاه جنبها يقدر تشوفو فأي لحظة ماشي بحال ليووم لي حاسة بلقنطة وعارفة راسها مغاتشوفوش.. زفرات النفس وحدرات راسها تتحك مدمع عينيهاا وحاسة براسها شحفاات.. هزات لقرعة لي جنبها لقاتها خوات.. شافت فالبيرو دياسر لقاتو تاهو غارق فالخدمة مع رجاء مكيناش داكشي علاش لخدمة مدروكة عندهووم.. ناضت من بلاصتها غادة تجيب قرعة دلماا تاقربات جهة بيروه وهي تفكر داكشي لي طرا لبااارح.. زربات فخطاويها ونزلات لتحت غادة لديك التلاجة لكبيرة لي كانت عامرة بقراعي دلما صغاار.. هزات وحدة وحلاتها شرباتها كولهاا عاد خدات وحدة خراا باش تديهاا لبيرو.. وخرجات باش ترجع وهي تسمع صوت زكرياء لي تيعيط ليها قلبات عينيها ودارت راسها ماسمعاتوش مكملة طريقها وهو تبعها تاوصل حدا الدروج ونطق تيضحك:من الصباح كانعيط واش مسمعتينيش؟؟
رحيل:(تيجيها تقيل على لقلب ومع دلك تبسمات ليه تبسيمة صفرا) واش محتاج شي حاجة؟
زكرياء:كنت باغي غير نسول فيك واخا خدامين فبلاصة وحدة إلا أننا قليل فين تانتشاوفو ونتلاقاااو ههه
رحيل:غايخصني نرجع لخدمتي الله يعاون
بغات تطلع وهو يحبسها ورجع قال:شنو بان ليك نديرو أنا وياك شي كافي ومنها نزيدو نتعارفو على يعضياتنا
رحيل:(هزات فيه حاجبها) وعلاش غانتعارفو أنا وياك ؟ سمع أنا ماعنديش مع هاد لفعااايل وهاد لوقوف لي موقفني هنااا ماشي حيت لمرة لولة تبسمت ليك وهضرة معاك بأدااب ضسر ودير هاااد لفعااايل
زكرياء:(تيبقلق فيها عينيه مرگاتو) ماتفهميينيش غالااط ارحييل أناا مناويش على حاجة خاايبة أنا باغي غير نكونو أنا وياك دزامي مباغي تاحااجة خراا
رحيل:(مباغاش ضسرو وزيد محملاش هاد لوقفة ولغادي ولجاي تيشوف فيهوم ويحنزز عليها نطقات باش تصدرو) ماعليش ازكريااء خلينا هاكا حسن الاكانت شي حاجة عندها علاقة بلخدمة مرحبا نخليك دابا
طلعات بلاماتسناه يجاوبها مخلياه واقف غير تايبلق عينيه فكل مرة كيبغي يدوي معاها ولايفتح معاها شي هضرة تتصدرو وشحال من مرة طلب نمرتها باش يدوي معاهاا ساعة معطاتهاش ليه.. مغاينكرش أنها تتعجبو وباقي لدابا ومعارفش كيف غايدير تايقدر يخليها تعطيه فرصة قلب وجهو تيشوف فالكليان ولي خدامين تاهوما ياكما شي حد شاف الفرطة لي فرطاتو وفاش لقى كل واحد حاضي خدمتو رجع تاهو لبوسط ديالو وفنفس لوقت كيخمم فيها.. أما رحيل نهارها داز عادي لاجديد يدكر فيه وغير سالات خرجات هي ومحمد طه مور ماسالا خدمتو وفضى كلشي مع المسؤولية ولات عندو حيت نوح مكاينش.. واقفين تايتسناو طاكسي وكيهضرو فنفس لوقت ولانقولو محمد طه لي كيهضر ورحيل غير تتجاوبو باه ولا لا وعينيها كيضورو تالمحات واحد لبوجو فالرمادي واقفة جنب الطريق فالصف الثاني بلاماتحس عينيها بقاو تيشوفو فديك البوجو ومعرفاتض علاش عينيها تعلقو فيها تاوصلات طاكسي وركبو وغير قلعات الطاكسي وهي تنهد رحيل
محمد طه:(شاف فيها ونطق بشك) مالكي من الصباح معجبانيش؟
رحيل:(نبسمات ليه بزز)ههه لا والو غير عييت وصاف
محمد طه:نوصلو لدار ورتاحي
حركات راسها ورجعات تقادات فجلستها مباغاش دخل شي حاجة لدماغاها عاود وتمرض نفسيتها وتخلي الشك يسيطر عليها داكشي علاش حاولات ماتخليش شكها يمرضها.. رجعات تاتدوي مع محمد طه متلفين لوقت تاوصلو لحدا سوبر مارشي ونزلات هي لولة تاتسناه يخلص باش يتقداو شي حاجة وهزات راسها جهة الشانطي وبانت ليها نفس البوجوو وقفات تاهي ولكن مبعدة عليهوم شوية كمشات حجبانها ودخلات هي ومحمد طه ياخدو داكشي لي محتاجين وغير سالاو خرجو مقديين ورحيل بلاماتعيق شافت جهة البلاصة فين كانت البوجو لقاتها باقا واقفة وفنفس البلاصة..
هنا تأكدت بلي ديك الطوموبيل تابعاهوم ولانقولو تابعاها هي.. قلبها رجع يضرب فاش طاح فبالهااا شكون تابعها وخوفها بان فعينيها.. ركبو طاكسي ورحيل كل مرة ضور وراها وتتحاول ماتبينش لمحمد طه باش مايشكش فيها.. تاوصلو لدار ونزلو ورحيل قربات جهة لباب تتحلو ودخلات وقبل ماتسد لباب رجعات شافت فالشانطي وهاد لمرة مبانتش ليها لبوجو وهادشي خلاهاا تشك.. سدات لباب وتكات عليه وهي تتنفس بخووف.. وغير كالمات راسها تبعات محمد طه لداخل وحطات التقدية وتحججات ليهوم بلي غاتبدل وتوضى وتصلي.. طلعات لبيت وعقلها كيفكر عوتاني فديك الطومويبل زعمة واش غايكونو بصح رجال بدر الدين تابعينها ولاغير تتخييل.. تمشات لجهة البالكون حلاتو وخرجات تاطل وضور على الطوموبيل مقشعاتهاااش مزال.. حطات يديها على السطارة وبدات تتجبد وملي مبانش ليها والو دخلات وهي تتسد لبالكون وتحيد فالزيف ومشات تبدل حوايجهاا تتنسي راسها اش طراا
---
خارجة من لحمام تتمسح وجهها بلفوطة وشعرها القهوي مطلوق طويل وباين فيه مكرفص ومشنتف.. دخلات لبيت وعينيها جات فالمرايا لي تم وبلاماتشعر بقات واقفة تتشوف فيهاا وهي ساهية.. الضربة لي فوجهها خلات ليها السكتريس وولات تتبان بحال شي وحدة مشمكررة.. حوايجها عاااديين ومبقاتش ديك ميس لي كاانت.. ميس لي تتلبس غير الماركاات ولبسة لي لبسات ليوم لغد ليه ماتعاودش تقيس لحمهااا.. زينها لي كان مزيغهاا ولي كان مخليهاا تحس براسها هاهي فقداتو وبسباب الضربة مبقا حد يديها فيهااا.. جلسات أونفاص لمرايا ساكتة وتتفكر ياماتها كيف كانو ولفرق بيناتهوم فهاد لخمس سنين لي دوزات فلحبس وكون ماربي لي لطف وداك لعفو لملكي لي جاهاا فوقتو كون كانت باقاا فالحبسس تادوز تمارة ومسدود عليها بين ربعة دلحيوط ماعندها تاشي حاجة ديرها.. عينيها تغرغرو بالدموع فاش تفكرات مهاا لي ماتت بلاماتشوفهاا حدرات راسها تتبكي تاجات عندها لي كانت معاها فالحبس وسميتها نورة.. جلسات جنبها ونطقات بصوت مدعدع: لبكا مغايفيدكش اميس
ميس:(هزات فيها راسها وهي تتبكي) وشنو بغيتي ندير انورة الامبكيتش هااا
نورة:(تتمسح على ضهرها) عارفة باش تتحسي تيقي بيا أنا بحالك ولكن ماعندنا مانديرو حنا درناهاا بيديناا وهاحنا كنخلضوو
ميس:(تتشهق) خسرت كلشي گاع داكشي لي كان عندي خسرتو حتى الزين ديالي خسرتو شوفي وجهي كي ولى مبقيتش گاع كنرضى نخرج هاكاا والناس تيشوفو فيا بشوفة نااقصة مبقا عندي لاعائلة لافلوس لادار لا والو وكون مانتي لي عتقتيني كون دابا أنا فالزنقة
نورة: ماتقوليش هاكا وزايدون ياك قلتي عندك عمك فالداخلة وبلي لباس عليه علاش ممشيتيش عندو
ميس:(بسخرية)عمي هههه عمي الاشافني يدوووز عليااا بموووس حااافي وميخلينش حية غير ديك النهار شفت دري لي خدام عندو وقالها لياا نتي معرفااش عمي كيف داااير ومعرفاااش علياااش قادر
نورة: وهادااك لي كنتي معاااه فين هو؟
ميس:(هزات راسها فيها) عدنان ماعرفتش ومبغيتش نعرف
نورة:ياك تتبغيه وعلى قبلو خنتي رااااجلك علاش مباغا تعرفي عليه تاخبااار
ميس:(حركات راسها ورجعات تتبكي) كانبغيه ونهار حتاجيتو تخلى علياا هههه حيت صافي مباغيش لمشاكيل داكشي علاش محشاهاااش ليا وأنا ماشفتش هادشي شحال هادي كنت مكلخة وماشفتش الفرق بينو وبين إسلام لي كان تيبغيني من قلبوو كان دايرني بحال شي أميرة أنا نطلب وهو ينفد عمروو ماغوت عليا ولاقلقني ولكن أنا كنت ديما تاندير باش نعصبوو.. عرفتي گاع بنات عائلتو كانو يحسدوني حيت هو لحنين فعائلتو داكشي علاش وفاش تيزيدو يشوفوه كيف تيتعامل معايا فالعراضات ديالهوم تيزيدو يتفقصو
نورة:(كمشات حجبانهاا) وعلاش خنتيه وقتلتي ليه بنتو؟؟
ميس:(بكاها غير مزاد) مقتلتهااش كنت باغااهاا غير تنعس والله مادرتهاا بلعاني هء هء باركة غير فمنامي تتوقف عليا وتتبكي هء هء قلبي كيضرني فاش تانتفكرهاا (بدات تتمسح وجهها) عارفة راسي غلطت انورة وجرحتو ولكن أنا ندمت والله تاندمت
نورة:سمعي اميس الراجل واخاا يكون تيموت على ترااب رجليك فاش الأمر كيتعلق بلخيانة راه الامقتللكش حمدي الله وشكريه نتي راه غدرتيه مع صاحبو وبيدقتوه وخرجتو ليه على صحتو وخليتيه يفقد بنتووو اميس بصح أنا وياك صحابات من لحبس ولكن مغانقولش نتي ماغلطتيش لا غلطتي ونتي تستاهلي ماجراا معاك وخصك تعتارفي بغالاطك وتحاولي تكملي حيااتك
ميس:(تتحرك راسها بلا) ولكن أناا باغاا نرجعوو عارفة إسلام غير مقلق مني وهو باقي كيبغيني حيت أناا مراتو وغايجي النهار ويسمح لياا نتي متتعرفيش إسلام قلبو كبير بزاف
نورة:أنا قلت ليك لي كاين ونصحتك ونتي ديري لي عجبك غير هوو ماتجيش وتشكي عليا
ميس:(شدات يديها ونطقات مبسمة) كوني هانياا هو اخرتو غايرجع لياا أنا
نورة:(كمشات حجبانها) وزعمة هاد إسلام مكملش حياتو وتزوج خمس سنين كولها دازت وباقي كيف هوو يك قلتي ليا شفتيه مع مرات خوك وكان باين فيهوم قراب لبعضياتهوم
ميس:(ديك التبسيمة لي كانت دايرة تمحات فاش سمعات هضرتها وتغكرات لمنظر لي شافت دإسلام وهو تيلعب مع سيدرا وكيفاش كان مبسم لرحيل وزاد تفكرات هضرة علي كمشات حجباها مخنزرة ونطقات بنبرة حاقدة) مغانخليهاااش تديه ليا كيف دات عائلتي مغانخليهااش..
خارج من لاكويزين هاز طبيسيل ديال ليباط بصوص بلونش ولداند غادي بيه جهة سيدرا لي كانت جالسة فالصالة ديال دارو متفرجة.. تبسم ليها ونطق وهو كيحط ليها طبسيل فوق طبيلة: خنفوستي اجي تاكلي
سيدرا:(قربات جهتو ببجامة وشعرها مطلوق)إسلامي فين عصير
إسلام:(ضرب جبهتو ونطق وهو غادي جهة لاكويزين) أنا غانجيبو نتي بداي تاكلي
جلسات سيدرا فالأرض مع الطابلة كانت حادرة وبدات تتاكل وتفرج تارجع جاب ليها عصير وحطو فوق الطبلة وجلس جنبهاا تيمشط شعرها ونطق بحنية:عجباتك لباط
سيدرا:(حركات راسها وهي تتاكل)همم ولكن مامي تاطيبها حسن
ضحك إسلام وتحنى باسها فحنكهاا وهي تتاكل تاسالات وشافت فيه:إسلامي نلعبووو
إسلام:اش باغا نلعبو؟
سيدرا:(بدات تتفكر وهي حاطة صبعها ففمها عاد نطقات) غماايضة
إسلام:وشنو هي هادي عوتاني
سيدرا:(تتعبر بيديها) اوووف إسلامي هانتا غمض عويناتك وبقا تحسب وأنا نمشي نتخبى ونتا قلب علياا
إسلام:صااافي سيري
غمض عينو متبع هضرتها كيحسب وسيدرا غادة تتجري تاوصلات بيت النعاس وهي تخبى فلبلاكار.. سالى إسلام لحساب وناض تايقلب عليهاا..
إسلام:سيدراااا فينك اديك البخووووشة خرجي
قلب الصالة كلها ومشى جهة الكوزينة تاهي قلب فيهاا مبانتش ليه عاد مشى جهة البيوت.. وسبق لبيت الضياف لي مخليها لموو لي تتجي عندو بعض لمرات ولاشي حد من لعائلة مبانتش ليه.. عاد دخل لبيتو وبقا تيقلب تحت النموسية وهو يسمع صوت السرسار ومشى جهة الباب طل بانو ليه محمد طه وريان حل ليهوم وهو ناطق: كيطرا تاجيتو؟
ريان:(هاز كراطن دلبيتزا وداخل مدرم) جينا نجربو السداري ديال صالتك كيف دايرين فالنعسة (حط لكريطنات فوق الطبيلة وشاف طبسيل دلباط ونطق) مخلي لحب ديالي تعشى بلباااط؟
إسلام:هي لي بغاتها خليوني نقلب عليها داباا
محمد طه:(حل فيه عينيه) علاه فين هي؟
إسلام:كانلعبو غمايضة اسيدي وأنا تانقلب عليهاا
سمعو لحس وضارو جهة سيدرا لي كانت جايا وهازة نونوس ونطقات وهي تتسبل عوينانها:خسرتي إسلامي مالقيتينيش
إسلام:(هزها هي ونونوس وباسها) بسباب هاد لحتارف دخوالك خسرت
محمد طه:(غادي لكوزينة) عندك شي موناضة ولا والو
إسلام:قلب وشوف
سيدرا:(مشات جهة ريان وتلاحت عليه) جبتي ليا بيتزا
ريان:ايييه
جا محمد طه جايب كيسان وقرعة دلموناضة عندو تم.. حطو داكشي فوق الطبلة وجلسو الأرض كيحلو فلكراطن ديال البيتزا.. كانت سيدرا فلوسط بين ريان وإسلام تيمدو ليها وتياكلو ويهضرو تانطق ريان: اجي علاش ماتمشيش معاناا اإسلام؟
إسلام: وقتاش غاتحركو؟
محمد طه: غدا إن شاء الله ولحد الليل غانرجعو
سيدرا:(بحماس) انمشيو بحرر نعومووو
ريان:يالاه معانا وباركة من لعگز اصاحبي
إسلام:هو مكاين مايدار وكنت ناوي نهبط لكازا ولكن تاهادا نضاار
ريان:اوا مع السبعة غانتحركو نلقاوك حدا باب الدار
إسلام:إن شاء الله
كملو عشاهوم وسيدرا بقات تحنقز من عند هادا لهادا تانعساات بين يدين محمد طه وناض غادي بيها لبيت الضياف حطهاا تم ورجعو مكملين قصارتهوم واخا غدا خداميين وغير حسو براسهوم عياو ناض ريان تكسل فالسداري بشورط ولفووق عريان ومحمد طه مشى نعس حدا سيدرا وإسلام فبيتو..
----
لغد ليه كانت رحيل فلبيت تتجمع حوايجها هي وسيدرا وغيي سالاتهوم وحطات لڤاليز فجنب ونزلات لتحت جرات سيدرا لدوش باش دوش ليهاا.. زولات ليها لپااري ودخلاتها لحمام تتغسل ليها مع كانت ناوية دوش ليها لبارح ساعة باتت عند إسلام.. سالات لسيدرا ولبساتها بنوارهاا وشعرها جمعاتو ليها بلفوطة وخرجاتها لبيت لبساتها ونشفات ليها شعرها وتهنات منها عاد مشات لحمام خدات دوووش كمدات فيه عضيماتها وخرجات لبيت دهنات كريمات لداتها وتهلات فراسها كيف بغات عاد لبسات حوايجها ومع الصهد اكتفت غير بكسيوة خفيفة مبردة وصندالة ولاحت فولارها شاداه تحت عنقها والاطراف لاحتهوم على كتافها ورشات ريحتها عاد خرجات وهي هازة صاكهاا فيه مسائلها الشخصية وڤاليز لقات لبنات تاهوما وجدو جالسين وريان مكينش لاهو ولامحمد طه وتاسيدرا..
رحيل:فين سيدرا؟
أسماء:مشات مع الدراري لگاراج عند بابا؟
رحيل:علاه بابا باقي ماجااا؟
رنيم:لا دى الطوموبيل لگاراج يشوفها باش ماتحبسش فالطريق والدراري مشاو عندو حيت تاإسلام دى ليه الطوموبيل
رحيل:اييه وقتاش غانتحركو بالسلامة؟؟
أسماء:ماعرفتش بحالي بحالك
رحيل:غزلان مشات؟
غزلان:لا باقي مامشيت عاونت خالتي وجمعت ليها لحوايج
رحيل:(شافت فساعتها) اش بان ليك تمشي معانا والله ماسخينا نخليوك
أسماء:ياك نتي من أگادير يالاه ونيت تزوري بلادك
رنيم:واييه أصلا مغانتعطلوش يوماين ونرجعوو
غزلان:(حكات جبهتها)نتوما غير سيرو مرة خرا إن شاء الله ونمشي معاكوم
جات عندهوم تانيرت وهي تتنهج وكرشها زادت كبرات شوية ولابسة واحد لكسوة طووويلة مستورة كحلة وطالقة شعرهاا على راحتو ولابسة صندالة.. جلسات جنب أسماء ونطقات: ياربي سخفت فالدروج
رحيل:(تبسمات) بديتي تتقلي اماما
تانيرت:واييه .. بنتي غزلان الاكنتي باغا تمشي معاناا يالاه تبدلي لجو وتفوجي شوية
غزلان:(تنهدات)مرة خرا اخالتي..
مكملاتش ربع ساعة كانو رجعو وإدريس طلع بالحف يدوش يحيد عليه لعرق دالخدمة وبعد مدة نزل هو وتانيرت مبدل حوايجو وهاز الصاك فين جامع حوايجو وقرب لصالة لقاوهوم جالسين مجمعيين تيونسو لوقت.. تبسم ليهوم إدريس ونطق:يالاه نتوكلو عالله
تانيرت:(ضورات عينيها) فين غزلان
رحيل:مشات حيت تعطلات ولبنت كتسناهاا
إدريس:يالاه زيدوو
خرجو لبرا والدراري ركبو مع إسلام ولبنات ركبو مع إدريس شادين الطريق لأگادير.. والجو كان زوين ومبرد.. طريق كلها وهوما مجمعين لبنات يصورو ويحطو فالسطوريات ورحيل تاهي حطات سطوري فلواتس تاسمعات مساج من بيسان جوباتها على السطوري 📩 بصحتك التسافيرة فين غادة؟
رحيل 📩 يعطيك الصحة الزين أگادير
بيسان 📩 بون ڤوياااج بب
تبسمات رحيل وقلبات وجهها جهة الطريق تتفكر فهاد ليامات لي دازو عندها تقاااال بزااف.. ياك هي هادشي لي بغات يبعد عليها وميبقااش تابعهاا علاش دابا مقلقة وحاسة بشي حاجة ناقصاها زعمة فهاد الفترة لقليلة تكوون تعلقات بيه لهاد الدرجة؟ وعلاش ماتعلقش بيه وهي من نهار شافتو وهو كيعاملها مزيان وعمرها مشافت منو شي حاجة دلعيب ماشي بحالها هي لي خرجات كلمة لعيب وغلطات فحقو.. تنهدات ورجعات تتلف راسها بالتصاور ولهضرة مع لبنات تاوصلو لأگادير وكانو ديجا معيطين لواحد السيد كيكري الديور مع الصيف تيكونو السياج والناس بزاف تتسافر داكشي علاش عيطو ليه وكراو الدار باش مايتعدبوش ومشاو ليها ديريكت كانت زوينة وكطل على لبحر ورومية فالديزاين ديالهاا.. وصلو مع الليل وإسلام والدراري مشاو يجيبو لعشاا ولبنات دخلو كيشوفو الدار لي كانت مقادة ونقية وشهوة منهاا.. ومشاو بدلو لحوايج باش يرتاحو وسيدرا مجاهاش النعاس فرحانة بلجو والبلاصة.. تعشاو ومشاو ينعسو باش يرتاحو..
شرقات الشميشة فمدينة أگادير ولجوو دلبحر شحال زوين والناس نازلة دير السپور.. فاق إسلام هو لخر مشى دوش ورجع لسيجور فين كاينة طبيلة لفطور لي شراوه لقى أسماء هي ورحيل لي بقاو تيفطرو إيما لبقية مشاو يوجدو راسهوم..
إسلام:صباح الخير
رحيل:صباح النور رتاحيتي شوية
إسلام: هه شوية وصاااف لجوو صراحة زوين هنا
رحيل:واييه فقت مع الستة واخا نعست معطلة
أسماء:شتي علاش قلت ليكوم نسافرو واخا غاندوزو غير يوماين مهم بدلنا لجو والنفسية تاهي تسگدات
رحيل:بزااف إسلام باغي قهوة ولاأتااي
إسلام:أتاي الله يحفظك
مد يديه وهز طرف دلخبز لي كان قدام أسماء وهي تهز فيه حاجبها ونطقات:معجبتكش راه باقي تناكل
إسلام:(ممسوقش) هالسلة خوديه منها
أسماء:هاويلي طرفي هاداااك أرااه
ناضت باش تحيدو ليه وهي تجرها رحيل وخرجات فيها عينيها:واش هبلتي هاكي لخبر (مدات ليها السلة) هنيناا
أسماء:(خنزرات فيه) بغيتو يوحل ليك
مع كملاتها مع بدا إسلام كيكحب ورحيل مدات ليه كاس دلما وناضت تاضرب ضهرو وأسماء ربعات يديها تتشفى فيه:شفتي دنوووبي
إسلام:(رجع حمر خنزر فيها ونطق بصوت مبحبح) دنوبك ولاعينيك لخايبين
رحيل:(حركات راسها وعارفة عوتاني غايبداو) أسماء نوضي نوجدو راسنااا ونتا اإسلام فطر على خاطرك وملي تسالي جمع الطبلة
إسلام:(حط كاس دأتاي وناض)وحلتوه ليناا
مشى ورحيل تتشوف فيه وضارت جهة أسماء لي نطقات:زااا*مل
جمعو ديك الطبلة عاد ناضو لبيت لي مشاركينها لبنات بدلو حوايجهوم وأسماء لبسات واحد لكسيوة قصييرة فالزرق فاتح مع صندالة وطلقات شعرها وهزات صويك فيه ليكخون وبرودويات ديالهاا ورحيل تاهي لبسات شورط ودباردور عاد كسيوة بيضا خفيفة وفولار بيض وهزات شاپو لبساتو ونضاضر وصويك وصندالتهاا وخرجو لقاو كلشي واجد خرجو تيتمشاو ولجوو مخلي رحيل ترتاح وتصفي خاطرها وعقلهاا.. وصلو لبحر وكراو لبراسولات ولكراسى تجلس فيهوم تانيرت هي وإدريس وجابو معاهوم تقاوت والعواصر وحطو داكشي جنب.. زول ريان التيشورت وبقا غير بشورط كحل وسنيسلة فعنقو صدرو معضل ومبرونزي وشاف فمحمد طه لي تاهو بقا غير بشورط قصير زرق وفوق كتفو داير واحد طاطو شاظ ليه تال جهة عنقو والزغب خفيف فصدرو لمبرونزي.. بدا يرجع فشعرو وتحنى جهة ريان:نعومو غير على براا على قبل سيدرا
سيدرا:(قربات جهة رحيل) مامي زولي ليا هادو (لباراي)
زولاتهوم ليها رحيل مع غاتعوم وشد فيها ريان غادين سابقين وهي تتنقز تتموت على شي حاجة سميتها لبحر ولعومان.. تبعوهوم محمد طه وإسلام لي تاهو لابس غير شورط لعومان ولي طاطو فدراعو بزووج أو واحد ينيسك فالثاني.. وإدريس وتانيرت تيتمشاو وبقاو غير لبنات بتلاتة جالسين فبلايصهوم
رحيل:غانوض نتمشى شوية
أسماء: أنا جايا معاك
رنيم:سيرو أنا غانبقا هناا تاترجع خالتي وعمي ونتبعكوم
تمشات رحيل مع أسماء فالرملة والريح كيدي الكسوة ديالها تاوصلات جهة لما ودخلات هي وأسماء لي نطقات:تعومي
رحيل:لا مافياش
أسماء:(ضرباتها بلما) هههه زيدي نلعبو
بقاو تيتراشو بلما وبعد مدة رجعو لفين جالسين وهي تكمش أسماء حجبانهاا وهي تتشوف جهة الشانطي ونطقات:هاء ماشي طوموبيلة ولد لحاج هاديك؟؟
على دكر سميتو حسات بقلبها قفز وسط صدرهاا والنفس تحبسات فجوفهاا لي نشف فيه الريق.. وعينيها مشاو جهة الطوموبيل لي نعتات ولي بانت ليها تاتسطاسيوني.. زيرات على يديها تتشوف فيها كانت من نوع لBMW فالكحل بحال دنووح.. بقات معلقة عينيها فيه تتحاول تأكد واش هي نيت ولاغير تشابه فالطوموبيلات وصاااف تسمعات صوت إدريس لي نطق بهدوء:ولد لحاج مكاينش هناا غايكون غير تشابهات ليك وصاف
خيبة أمل بانت فعينين رحيل لي حدرات عينيها وتمشات جهة الكرسي فين جالسة مها وجلسات أما أسماء حكات شعرها ونطقات:اه كاتشبه ليهاا
رجعات تاني رحيل تتشوف فالطوموبيل لي تحل بابها ونزل منها زين العابدين لي كان لابس شورط دلقطن فالكحل حد الركبة وفيه السيور من جهة السمطة مع تيشورت نواااغ وشعرو كيف عادتو مخليه على راحتو كورلي..
رحيل:(هضرات بزرية وهي تتشير جهتو) ماشي هاداك ولدو؟
شافو فين تتشير وبان ليهوم ورحيل رجعات تبسمات فاش شافت لباب تحل وعند بالها راه غايكون نوح لي تما ساعة خاب ظنها فاش شافت دري فنفس عمر زين العابدين سميمر لابس شورط تاهو وتيشورت سماطي واسعة.. كمش إدريس عينيه ونطق:غانمشي نشوفو
تمشى جهتو ورحيل متبعاه بعينيها تارجعات شافت فأسماء لي حركات ليها كتافها بمعنى ماعندي ماندير ليك.. رجعو ريان ومحمد طه وإسلام مع سيدرا لي مسخاتش بلمااا وبغات تبقا فيه النهار كامل.. لواتها رحيل ففوطة ومسحات ليها وديناتهاا وركبات ليها لپاراي وسيدرا نطقات وهي تتغبن:فين بّا ديدي؟؟
تانيرت:(شادة فيها) مشى لمراكش
سيدرا:(كمشات حجبانها) لابّا ديدي مغايخليناااش بوحديتنا هناا
تانيرت:لا راه خلى معانا ريان وطه وإسلام
سيدرا:(حركات صبعها لا) تت مغايخليناش بّا ديدي الأسمراني تاع قلبي
حدر محمد طه راسو وسرط ريقوو فاش سمع كلمة سيدرا ورحيل تاهي تنهدات وعينيها على محمد طه.. عارفة باش كيحس محمد حيت تاهي حسات بهاد الشعور قبل وعاشتوو.. فاش كانت رافضة تقبل موتها ماشي بحال داباا واخا بصح لجرح مغايبراش ولكن على الأقل الضرر ديالو خف ولو شوية.. ملي زارت قبرها وخرجات داكشي لي كانت تتحس بيه من نهار عرفاتها ماتت ليومنا هاداا حسااات براسها خفافت وماشي بحال قبل.. دابا تقدر دكرها فكلامهاا وتقدر تفكر دكرياتها وماتمنعش راسها كيف كانت كادير.. وهادشي لي خص محمد طه يديرو تاهو يتقبل ويواجه خصوصا هو حالتو متغيرة عليهاا هي.. داك لحب لي كان تيكنو ليهاا باقي تيعدب فيه وهي عارفة هادشي ماشي لصالح خوهاا.. كون غير كانت تاجيداء تتبغيه وعاشو قصة حب كان ممكن تفهم ولكن محمد طه بقا محتافض بدوك لمشاعر غير فقلبو ومقالهوم لحد من غيرها تاولاو مرضينو ومخلينو يتبدل بزاااااف.. وهي مباغاش خوهاا يعاني كثر من هاكا ويلقى حل لراسو قبل مايفوت لفوت..
تانيرت:(كمشات حجبانها فسيدرا باغا تعصبها) ماتبقايش تگولي عليه الأسمراني تاع قلبي هاداك راه راجلي
سيدرا:(كرزات على سنيها) وهاداااااك بّااا ديدي دياااالي والأسمرااااني ديااالي أنااا
ريان:(مكسل على كرشو تيتبرونزا) الله يجيب لينا لي يدابز على قبلناا اااااااي
ضور وجهو وبانت ليه تانيرت لي هازة حجبانها فيه ونطقات وهي حمرا:كون تحشم اهاد لبرهوش
ريان:(تقاد فالجلسة)هاد الزين كولوو ترديه برهووش واعباد الله راه عندي 29 عام
أسماء:(تتاكل الشيبش وببرود) باقي برهوش السالوبار
ريان:(دفعها برجليه مع جالسة فالأرض) كيتك نتي الشااارفة البايرة
أسماء:برب تاقلبتي عليهااا
ناضت ليه أسماء وهو غير شافها قفز من الكرسي مقفز معاه تانيرت غادي كيجري وأسماء تابعاه بحال الدراري الصغااار وسيدرا تاهي ناضت تتجري وضحك..
محمد طه:(شاف فالناس لي متفرجين ونطق وهو تيزفر)برب تابرااااهش
إسلام:(مغمض عينيه) خوك مسالي قبو داير فيها عقلو
رنيم:اوا هو لي جبدهاا
محمد طه:صافي دوا معاها تنوض تقفز وتجري بحال شي قردة ولي مشاف يتنزه
رنيم:(قلبات عينيها)ناري شحااال معقد
محمد طه:(لاح عليها نضاضر رحيل ونطق مخنزر) راه غانوض لمك البرهوشة
رنيم:(ناضت وشافت فتانيرت) خالتي غانمشي نتمشى شوية لهيه واخا
تانيرت:(تنهدات)سيري ابنتي وردي لبااال
مشات رنيم ورحيل شافت فمحمد طه:مالك مع لبنت كل مرة تخنزر فيها ولاتسمعها شي هضرة
محمد طه:(قلب وجهو) ماعنديش معاهاا ونتي عارفة هادشي تتنقز من لمقلة وضااسرة
رحيل:هادشي كان شحال هادي لبنت كبرات دابا ودارت عقلهاا نسى شنو داز امحمد
إسلام:(شاف فيه مكمش حجبانو من الشمش) رحيل عندها لحق رنيم قلبها بيض من ديماا غير شحال هادي كانت صغيرة ولمراهقة داكشي علاش أما دابا تبدلات
محمد طه:(دار ليزيات ونطق ببرود) مزيان
رحيل:(ناضت) أنا جايااا
مشات رحيل تبعات أسماء وريان لي بانو ليها باقي كيتجاراو وموراهوم سيدرا.. كانو عينيها غير على بنتهاا لي تتجري مع الزحام فالبحر وزيد ريان وأسماء مارادينش ليها لبال داكشي علاش خاااافت.. غادة تتمشى وتاتشوفهوم بعدوو عليها وبدات تتجري وعينيها غير على سيدرا تاحسات براسها دخلات فشي حد ورجعات بلور تاطاحت على قزيبتهاا..
مكمشة حجبانها بسباب الطيحة لي طاحت على قزيبتها وهزات عينيها تتشوف فداك الظل لي كان حاجب عليها الشمش.. وتكميشة حجبانها بدات تتفك شوية بشوية ملي شافت قدامها زين العابدين لي مد ليها يديه باش يعاونها تنوض.. مدات يديها وغير شدات فيه وهو يجرها وقفها بخفة ورحيل تبسمات ليه وسمعاتو نطق بالإنجليزية:كنعتادر
رحيل:(جاوباتو تاهي بالانجليزيه)ماعليش أنا لي دخلت فيك ومكنتش رادة لبال لطريق..
زين العابدين: عادي
رجعات تبسمات فيه وهزات عينيها تتشوف فملامح وجهو لي كانو قرابين ليهاا وكاتشوف لفرق بينو وبين باه... نوح عينيه زرقين وزين العابدين قهويين شعر زين غامق على شعر نوح فاللون ولكن عندهوم نفس البشرة لي مايلة لسمورية بحال جد نووح... وتاتكميشة لحجبان تيشبه ليه فيها.. بعدات عليه رحيل فاش تفكرات سيدرا وضورات عينيها يمين وشمال وهي مخلوعة.. بانو ليها ريان وأسماء تايدافعو جهة لما وسيدرا مكيناش
رحيل:(حطات يديها على قلبها) سيدراا (ضارت فجميع الاتجاهات بحال شي حمقة ورجعات نطقات بخوف) سيدراا
كان تيشوف فيها وخوفهاا وسمية لي تتنطق بيها شي لي خلاه يقرب عندها وينطق بالإنجليزية:مالكي؟
رحيل:(شدات فدراعو وجهها صفار وشفايفها بياضو) بنتي مااعرفتش فين هي كانت لهيه فين مشااات
زين العابدين:(مكمش حجبانو وبصوت مبحوح نطق) شنو لابسة؟
بدات تتوصف ليه اش لابسة وعقلها غايخرج وتفرقو باش يقليو عليها ورحيل مشات جهة ريان وأسماء وقفات عليهوم ونطقات بصوت باكي:فين سيدرا ياك كانت معاكوم هنا
ريان:(مخرج عينو) مكاانتش فين مشاات
رحيل:كانت تابعاكوم تتجري ودابا ماعرفتش فين مشاااات
بدات تتبكي وأسماء عنقاتهاا وتاهي بانت فيها لخلعة.. ضحكهووم دغيا هجرووه وناضو تيقلبوو وأسماء دات رحيل لبلاصة فين كاينين باش ترتاح حيت بانت ليها شوية وطيح وغير شافوها لبقية وهوما يزيدو يتخلعوو خصوصا تانيرت.. ناض إسلام ومحمد طه تاهوما كيقلبو وتانيرت بغات تعيط لإدريس ساعة تلفونو خلاه عندهااا.. بداو يسولو عليها ويقلبو كاملين وزين العابدين عينو غير على لبراهش تالمحها فبعيد دايرة عليها فوطة واقفة جنب إدريس لي كان مخليه مع صاحبوو.. كمش حجبانو وقرب جهتهوم تاوقف عليوم ونطق بعربية مهرسة وعنيو على سيدرا :ماماك يقلب لهيه
إدريس:(كمش حجبانو ونطق) علاش مافخبارهاش راه معايا
زين العابدين:(مخنزر فسيدرا)لا
إدريس:(خنزر فيها تاهو)ياك قلتي لياا علمتي ماماك بلي غاتجي عندي هنا
سيدرا:(تتشرح ليه وهي مدلية شنافتها)اه بّا ديدي أنا مشيت تانجري مع سومة ورياني وملي شفتك هنا قلتها لسومة ورياني وجيت
إدريس:(تنهد ونطق)زيدي غاتكوني خلعتيهوم وخصوصا مك (شاف فزين العابدين)شكرا أولدي لمهم تاتجيو عندنا
حرك ليه زين العابدين راسو باه ومشى وهو شاد يد سيدرا تيخاصم عليها وهي تتبرر ليه.. مع ريان وأسماء مركزوش معاهاا ومداوهاش فيها وهي عند بالها راه وصاتهوم.. كحز صاحب زين العابدين جهتو وحط يديه على كتفو ونطق بلهجتو الجزائرية:ماعلابليش بلي تعرف ناس ملاح كيفهوم
زين العابدين:أنا مايعرفهومش لواليد يعرف
ضحك صاحبو وزول تيشورت وبان صدرو وعضلاتو لي بداو تايتخدمو ونطق بمزاح: نحب نجي لمروك ونشوف الزين لي عندكوم
زين العابدين:(خنزر فيه)تقووود عوم
النفس عاد قدرات تنزلها وتهبطها ملي شافتها مع باهاا.. جراتها معنقاهاا وقلبها كان غايسكت غير فهاد الشوية لي مكانتش جنبها جميع الاحتمالات طاحو فمخهاا والأسوء منهوم هو بدر الدين لقاهاا وداها ليها
رحيل:(غوتات عليها) ياك تانقول ليك ميات مرة متبقايش تمشي لشي بلاصة بوحدك وبلاخباري هاا كون تلفتي دابا فين غانكونو
سيدرا:(نطقات وهي تتغبن) ومامي راه قلتها لسومة ورياني هوماا مسمعونيش وأنا مشيت غير عند بّا ديدي
رحيل:(نهضات فيها)اخر مرة اسيدرا سمعتي نلقاك نضتي من بلاصتك بلاخباري نتفاهم معااك
سمعاتهوم ليهااا بلاماتشعر وخوفها هو لي خلاهاا تصرف هاكاك أما سيدرا رجعات جلسات عند إدريس وعنقاتو حاطة وجهها فعنقو وهو مدرعها تاحس بيها تتبكي وهز عينو فرحيل لي كانت تترجع النفس ونطق بهدوء:دوي معاهاا بلخاطر الله يرضي على بنتي راه لغوات مكينفع بوالو
ريان:حنا السباب مسمعناهااش وهي عند بالها علماتناا
رحيل:ماعرفتوش باش حسيت ملي مشفتهاااش قلبي كان غايسكت غوت عليها غير على قبل مصلاحتهااا...
سكتو كاملين وتاحد مارجع تكلم حيت عارفين بلي من جيهة رجيل عندها لحق وطبيعي تصرف هاكاك ومن جيه سيدرا عارفينها مكتكدبش وعلماتهوم غير هوما مانتابهوش ليهااا..
تانيرت:هضرتي مع ولد ولد لحاج شنو سميتو
إدريس:زين العابدين دويت معاه هو وصاحبو جاو يتبحروو وعرضت عليهوم يجيو عندنا ويباتو هاد الليلة معانا حيت غدا غايشدو الطريق
دوزو باقي لبكنيك فنشاط وشبعو تصاور وتبحاار وغير بدات الشميشة تغرب ناضو جمعو بگاجهوم ورجعو لدار دوشو ولبنات وجدو راسهوم حيت خارجين فالليل مع الدراري يسهرو.. كانت جالسة تانيرت فالصالة ديال الدار تاتستارح تاسمعات الدقان وهي تنوض حلات لباب وبان ليها زين العابدين هو وصاحبو.. تبسمات ليهوم ونطقات:مرحبا دخلو
جات سيدرا وشافت فزين العابدين لي كان واقف وساكت ونطقات وهي تاضور عينيها:هاء راس لكبالة جيتي
طلق صاحبو واحد الضحكة مجهدة خلات زين العابدين يخنزر فيه تاجمعهاا بزربة وتانيرت خرجات عينيها فسيدرا ونطقات بجدية: اديك البخوشة كوني تحشمي وسيري عيطي لجدك
سيدرا:(هزات كتافها ممسوقاش) بّا ديدي ناعس
تانيرت:(بركات على سنيها) سيري فيقيه تحرررركي
مشات سيدرا تاتشتف لبيت فين كان ناعس إدريس وطلعات فوق النموسية تتحرك فيه وتعيط ليه:بّا ديدي وابّا ديدي فيق يالاه
حل عينيه وشاف فيها وهي تبسمات ليه وباستو فحنكو:بّا ديدي راس لكبالة جااا
توگض إدريس ونطق بهدوء:واخا سيري أنا جاي
نزلات راجعة لصالة لقات كلشي جالس ولبنات حاطين لگوطي.. مشات عند رحيل لي كانت مربعة يديها تاتسمع لهضورهوم.. حلات ليها يديها وطلعات جلسات فوق ركابيهاا مقردة عندها وحطات راسها على صدر مها ونطقات بهمس:مامي نخرجوو
رحيل:(تاتلعب فشعرها) تال شوية ونخرجو
سيدرا:(باستها فشفتها ونطقات تتوشوش ليها) مامي علاش مجاش ماي بلو آيز معاه
رحيل:(تنهدات) ماعرفتش
سيدرا:توحشتو أنا
سكتات رحيل وهزات عينيها فزين العابدين لي شاد تلفون كيكتب فيه شي حاجة..
سيدرا:(شافت فصاحب زين ونطقات) شنو سميتك؟
تبسم ليها: أمين ونتي؟
سيدرا:سيدرا التجاني
أسماء:واش نتا جزائري حيت لهجتك ماشي بحال ديالناا
أمين:واه أمي جزائرية
أسماء:(فضولها مامهنيهاش) اه وباك مغربي؟
أمين: لا هو من البرتغال
أسماء:دابا نتا عندك زوج جنسيات جزائري وبرتغالي سعداتك
رنيم:وفين مستاقر دابا
أمين:(ضحك) ههه كنت فأستراليا مع العشير (ضرب فخد زين العابدين وكمل) وملي هو جا لمرووك جيت معاه مانيش نحب نخليه وحدو هههه
جا عندهوم إدريس وانظم ليهوم فالجلسة ودغيا أمين انساجم معاهوم ومن طبعو هاكا نشايطي وضحوكي والجلسة معاه حلوة.. دوزو وقيتة زوينة وريان نايضة فيه لحريگة كل مرة ينغز رحيل باش تهضر وتقول لإدريس يخرجوو ويفوجوو..
رحيل:(خنزرات فيه)طيبتي ليا جناااابي اش كاين
ريان:(بهمس)دوووي خلاااص باش نتحركو
رحيل:(شافت فباها)بابا
إدريس:ابنتي
رحيل:(كلشي صقل كيشوف فيها وهي تبسمات) بغينا نخرجوو..
ريان:(حاط يديه على فمو تيصحح ليها) قولي ليه نمشيو نسهروو مالكي
رحيل:(تبسمات بخبث)فالحقيقة ريان اقتارح علينا نسهرو فشي بلاصة هناا ونبدلو لجو شوية (ضارت جهتو وقالت)اشنو هي لبلاصة لي قلتي لياا
ريان:(خرج عينيه) أنااا
رحيل:اه ياك نتا لي قلتي لينا نخرجوو نسهرو ياكو؟
محمد طه:(بندالة)قال لينا كاينين بلايص زوينين هنا نسهرو فيهوم
بقا غير تيشوف فيهوم كيفاش حطوه بوجهو قدام باه.. رجع شاف فإدريس لي نطق بهدوء: واخا ولكن ماتعطلوش تال نصاصات الليل
سيدرا:نمشي تاأناا بّا ديدي
ريان:لا لبلاصة كيمشيو ليها غير لكبااار
سيدرا:(بعناااد)غانمشي مع ماااااامي
شدات فرحيل لي تاهي عنقاتها وناضت غادة بيها لبيت تبدل ليها حوايجهاا وتبدل تاهي باش توجد راسها ونفس الشي داروه لبنات
محمد طه:(شاف فزين العابدين وأمين) الابغيتو تمشيو معانا تانتوما مرحبا
أمين:(شاف فزين العابدين) نمشيو؟
زين العابدين:(بهدوء)واش تحب نتا؟
أمين:(تحنى جهتو وهمس ليه)نحب نسهر ونشوف الزين هه
بعد مدة كانو لبنات واجدات ورحيل لبسات سروال توب باج طوويل وتوبو مبررد مع شوميز خضر ملكي ستان وفولار باج غامق وصنيديلة لي خدات ليها سيدرا.. وصويك صغير باج ومك اب خفيف فوجهها.. وأسماء كيف لعادة كسوة مقزبة فالباج وطالقة شعرها بوكل مع صباط طالون ومك اب خفيف تاهي مركزة غير على لغوح أليڤغ فالحمر.. ورنيم لبسات دجين بوي فراند مع واحد الدباردور قصيرة ودارت غير چلوس خرجو لعند الدراري لي واجدين حالهوم ساهل.. ودعو إدريس وتانيرت لي بقا فالدار وحدهوم وخرجو كاملين كيتافقو فين غايمشيو وريان خنزر فيهوم: دغيا بيعتوني لعجل ينعل طباااسلكوووم
رحيل:(عنقاتو تاتفشش عليه) الزين ديالي مقلق زعمة هههه
أسماء:صافي السالوبار دابا تشوف الطروفة وتنسى التقليقة
محمد طه:(ضربها لراسها وبعينيه شير ليها على إسلام وزين وأمين لي معاهوم)زيري لجام لداك لسان
أسماء:بعد مني اخويا واه
تافقو على لبلاصة لي غايمشيو ليها وتقاسمو فالطوموبيل دإسلام وزين العابدين..كان الريسطو كبير وكيبان من برا هاي كلاس وزوج فيدورات واقفين على برا دخلو لداخل وخداو طابل جنب الزاج كطل على لبحر وجلسو وريان شاف فيهوم ونطق:كيجاتكوم لبلاصة؟
إسلام:زوين وعامر بالسياج
أسماء:هنيونا وقولو اش غاناكلو
أمين:(مد ليها لموني ونطق ضاحك) ختاري واش تحبي تاكلي
أسماء:تفهمني نتا
أمين:(تحنى عند زين العابدين لي مكونيكطي ونطق بالإنجليزية) من الصباح ونتا خاشي وجهك فتلفون مع من تادوي؟
زين العابدين: الواليد(تبسم بخفة فاش قشع لمساج وشاف فأمين)أنا جاي
ناض غادي خارج ومع كانو جالسين تايدويو مع بعض مانتباهوش ليه وتاأمين رجع شاف فأسماء لي جنبو وبدا يدوي معاها وتاهي غادة معاه فالخط وفالجانب الأخر كانت رحيل جالسة جنب الشرجم وقدامها إسلام لي متكي على الطبلة كيدوي معاها وهي تاتبسم وتجاوبو بعفويتها لي مولفة معااه وتاهو كيلقى معاها راحتو.. رجعات رحيل ضهرها لور ومع هزات عينيها بان ليهاا صاحب دعوتها داخل همسات بخفوت وقلبها حسات بيه تفاجى بشوفتو: نوح
الضواو فالصالة كانو مطفيين من غير ضو التلفازة لي مشعولة.. فالفوطوي لي قدام التلفازة كان متكي إدريس على لمخاد ومتكية عليه تانيرت لي كانت هازة زلافة عامرة بالديسير تتاكل فيها.. كان تيلعب ليها بشعرها وهي مرخية فحظنو وعينيها على التلفازة..
تانيرت:(دوات بشوية) الدراري غايكون عاجبهوم لحااال
إدريس:يفوجوو شوية ويبدلو لجووو
تانيرت:همم إدريس (ضارت جهتو وشافت فيه) لامتى هوما غايبقاو هاكا؟
إدريس:(مكمش حجبانو) مافهمتش اش باغا تقولي؟
تانيرت:(تنهدات وتقادات فالجلسة) مكتشوفش بلي شي حاجة ناقصاهوم واخا ضاحكين ولكن ديك الضحكة مكاتكونش طالعة من القلب كتحس بيهوم مهمومين وكل واحد فيهوم مخبي فقلبو داكشي لي ضارررو
إدريس:(حك حاجبو ونطق بهدوء) ماتنسايش داكشي لي دزنا منو مساهلش على شي واحد ينساه بزربة اتانيرت إينو
تانيرت: عارفة اإدريس ولكن لامتى حالتهوم غاتبقا هاكا؟ خمس سنين دازت اإدريس ماشي بزاااف عليهوم واش حياتهوم كلها غايضيعوها فلي فااات شوف غير أنا وياااك شحال من عام ضيعنا وكل واحد فينا كان بعيد على لاخر واش كنتي مرتاااح فالداخل ديالك هاد لعواام كلهاا.. لا وتاأنا نفس الشي حسيت بيه وتيقني قاااصحة بزااااف تكون عايش وهاز فقلبك كثر من طاقتك.. مباغااش ولادنا يطيحو فنفس المشكيل ويعاودو نفس القصة لي عشناا
إدريس:(تنهد) وعند بالك أنا وياك اش غانقدرو نديرو ليهوووم مثلا هانتي غير رحيل لي جاا ولد لحاج وطلب يديها من عندي على سنة الله ورسوله ورفضااااتو اش بغيتي ندير مثلا
تانيرت:(ضارت كلها عندو ورجعات شعرها لور مخليا عنقهاا لغليوض ولبيبض ولي مزين بسنسلة دهب يبان) وماتنساش اإدريس بلي رحيل هي دوزات لعداب فزواجها من داك عيفة الرجاااال بغيت ربي لهلا يرحم فيه شي عظم راه صعيييب تكون تتشوف شي واحد ضريف معاك والله يعمر ليه الدار ومبين غير لوجه الزوووين لي يخليك تحلف بلي راه هو لي كاااين ومكاين ماحسن منو ياك أناا وياك لي دوزنا فالدنيا لعجب وشفنا فيها شلا ناس منهوم الزوين ولخااايب وتخدعنا فيه فمابالك بديك لبنت لي فاش حلات عينيها عمرها تلاقات بحال داك النوووع.. ونهار عرسها ياحسرة نهار لي تيكون مميز عند أي بنت ولي تتحلم بيه هي تهرسااات فيه وتصدماااات من وجه ديك الجيييفة لي وراها بلامانساااو كيفاش كان تيلوي ليها يديها بينا حنا وهي مسكينة صااابرة غير حنا فاش عرفنا بلي هو سباب العافية لي شعلات فالگاراج ولكسيدة لي درت وتصدمنا وتعصبنا كيف غايكون حالها ملي عرفاااات اإدريس وبلامانساااااو داك عمووو الله يعطيه العمى يعلم الله اش داااار ليها واش عند باااالك داكشي لي عاودات لينا هو لي كااااين (حركات راسها يمين وشمال)تت هاديك بنتي وأنا عارفااااهاا مخبية شي حواااايج علينا ومقلتهووومش لينااا ااإدريس حوااايج لي مقالتهوم لحد من غير طبيبتها
مسح إدريس وجهوو وعصبيتو بانت فملامحو لي كانو مظلمين.. سيرة عاصم وبدر الدين تاتخليه يتعصب على مادوزو عليهوم وديك تمااارة وداك النفااق لي كان تينافقهوم عاصم وكيفاش كان تايكدب فوجههوم.. كمش حجبانو والجدية بانت فصوتو:واش هي قالت ليك شي حاااجة؟؟
تانيرت:لا مقالت والو داكشي لي قالت ليك لي تانعرف وزايدووون أنا ملي قلت هاكا حيت عارفة واحد مريض بحالو يقدر يدير أي حاجة وبيما أنه حاااط عليها لعين راه بااااين بلانو اإدريس (تنهدات وشدات فيديه فاش شافت وجهو تغييير ونطقات بحنية) صافي بلاماتعصب راسك اتسانو داكشي فات ولي كيهمنا دابا هي بنتنا معاناا هي وحفيدتنا ومغانخليو تاحاجة ضرهوووم
إدريس:(حرك راسو باه بلامايدوي)
تانيرت:(عرفات بلي غايبقا بالو مشطوون وهي مباغاش هادشي عليها قربات عندو تادلع ونطقات ضاحكة) دابا خلينا نخممو فالسبوع لي تابعك اسي إدريس هههه
إدريس:(تبسم ليها وباسها فجبهتها)نتي غير ولدي بخير وعلى خير والسبوع ماتخمميش فيه
تانيرت:(ضحكات)هههه وجد راسك تخرق وتراري تاني اتسانو ههه
إدريس:(جرها عندو وغمزها) نسيتي شكون كبر سيدرا وبقا مقابلهاا
تانيرت:هه اه ماعندي مانتسالك بعدا تتعرف لكلشي
إدريس:(غمزها وهو نايض) وكانعرف حوايج خرين تانيرت إينو اجي نوريهوم ليك
تحنى هزها وهي شدات فعنقو تاضحك بالجهد فاش فهمات مقصودو.. غادي بيها لبيت النعاس ودخل حطها فوق النموسية بشوية مكايس عليها ورجع لباب طرقو عاد رجع عندهاا وتانيرت مبسمة ليه وعينيها كيلمعو.. تتبغيه وتتموت عليه هو أول راجل سرق قلبها وخلاها هايمة فيه وغارقة فيه كيف هو غاارق فبحرر غرامهاا.. تحنى جهتها مبسم وطبع بوسة على جبهتها قبل ماينزل لشفايفها ياخدهوم بين شفايفوو ويغرقو مع بعض ويفديو شوق بعضياتهوم على كل ليلة كانت بعيدة عليه..
تانيرت:(همسات ليه بصوت خافت) كنبغيك
إدريس:(بهمس محموم نطق جنب ودنيها وهو دايب فغرامها) وأنا غارق فبحر هووواك تانيرت إينو..
مكانتش نهائيا دايرة فبالها أنها غاتشوفو فهاد البلاصة.. تبسمات بلاماتحس وعينيها عليه هو لي كان داخل برفقة زين العابدين.. كان مبسم وهو مدرع زين العابدين لي كان تيهضر معاااه..لابس سروال توب بلوماغين مع شوميز نواغ الكول ديالها قصير وضارب جناب شعرو شوية ولحية مقادة.. تقادات رحيل فجلستهاا فاش بان ليها قرب جهتهووم..
سيدرا:(كانت تتشرب فالعصير وغير شافتو وهي تخرج عينيها وناضت تتجري عندو) ماي بلو آيز
تلاحت عليه معنقاه من رجليه وهو تبسم وتحدر عندها هازها بين يديه وهي عنقاتو بيديداتها فعنقو وحطات راسها على كتفو مخلياه كيطبطب على ضهرهاا.. قلب زين العابدين وجهوو مزير على فكو تاتطراساا.. نوح:(قرب جهتهوم ونطق بهدوء)السلام أوعليكوم
ناض أمين عنقوو ونوح ضرب على كتفو ونطق بضحك:تهلا فيك عشيرك
أمين:(غمز زين العابدين) واش نقول ليك اعمي تهلا فيا بلمعيور
ضحك أمين وزين العابدين هز فيه حاجبو ونوح تبسم وضار سلم على ريان ومحمد طه ومد يديه سلم على رنيم وأسماء وعاد ضار جهة إسلام ورحيل لي كانو جالسين فالقنت ديال الطبلة.. ناض إسلام سلم عليه وهو تقلب جهة رحيل وشاف فيهاا مدة... تبسمات ليه تبسيمة متوثرة وشافت فيديه لي مدها ليها ولي كانت نفس اليد لمضروبة ولي ملوي عليها فاصمة.. بقات تتشوف فيها وقلبها حسات بيه تزير عليها ورجعات شافت فيه عاد مدات يديها وغير قاست يديه وهو يبعد وقال بهدوء:لباس عليك؟
رحيل:(حركات راسها باه) حمدلله ونتا؟
نوح:الحمدلله
رجع جنب زين العابدين وسيدرا شدات فيه مبغاتش طلقوو.. جاب ليهوم السرباي كرسي جلس فيه نوح فطرف الثاني ديال الطبلة وجا مقابل مع رحيل فالجهة لخراا وسيدرا جلسات فوق ركابيه ونطقات تادلع:فين كنتي؟
نوح:(تيرجع ليها شعرها لور) كنت مسافر
سيدرا:تاحنا مسافرين عرفتي أنا ليوم عمت فلبحرر
نوح:(تبسم ليها) بالصحة هي تبرعتي
سيدرا:ااه شوف مامي لهيه
قلبات ليه وجهو جهة رحيل لي كانت تتشوف فيه بجنب عينيهاا.. ماطولش فيها الشوفة بزااف وقلب وجهو جهة زين العابدين تايهضر معاااه.. حسات بالشوك فحلقها ملي قلب وجهو عليها بديك الطريقة وتاشوفتو مكانتش ديك الشوفة لي مولفااهاا منو.. ناضت هازة صاكها وإسلام شاف فيها ونطق:فين غادة؟
رحيل:(تبسمات ليه)لحمام
بعدات الكرسي ودازت من حدا نوح لي هز عينو وتبعها بشوفتو تاغبرات فالكولوار عاد رجع مكمل حديثو وأسماء تبسمات وناضت تاهي تابعاهاا..
حلات الروبيني وغسلات يديها عاد هزات عينيها فالمراياا تتشوف فملامح وجهها البائسة.. تحل لباب ودخلات أسماء تتقرقب طالونها ونطقات تاضحك: هاحبيب لقلب جا لعندك خصك تكوني فرحانة
رحيل:فرحااانة حيت مشافش فياا وبزز مد يدو وسلم عليا ياك؟؟
أسماء:شوفي باش نكون واضحة معاك نتي طلبتي منو يبعد عليك وهو دابا كيدير غير بهضرتك يعني بلاماتبقااي تغبني عليا هنا وماتنساييش هضرتك لي قلتي ليه
رحيل:(زفرات بغيض)عااارفة مانسيتش باش تفكريني وزايدون ماكنتش قاصدة اااااوووااااه
أسماء:ماتعصبيش دابا ارحيييل حيت لعصاب مغايفيدوك فوالو من غير الفقصة
رحيل:(غادة جايا فالحمام وباين فيها معصبة) أنا أصلا اش كانتسنى منو يدير يتلگاني بالأحضااان مور ماعصبتو وقلت ليه يبعد مني هاهو بعد دابا علاااش مامرتاحاااش أنااا اأسماااء علاش حاسة براسي مخنوووقة وغير فهاد ليامات لي ماشفتوووش توحشتوو فيهووم هااا علاااش؟
أسماء:(تنهدات) حيت لقيتي فيها حاجة لي مكانتش فلي قبل منوو (ربعات يديها وعقلها سرح لبعيد) تاأنا وقع ليا بحالك نهار شفت وليد وتقربت منو حسيت معاه بداكشي لي محسيتوش مع خوووه وعليها عطيتو نيتي ولكن فاللخر صدقت مقولبة فيه ماتانقولش ليك هاد لهضرة باش نخلعك ولكن غير باغا نفهمك وصاف
رحيل:(تكات على لحيط مقابلة أسماء وقالت بهدوء) باقي مانسيتيه؟
أسماء:(هزات كتافها)تانحاول نساه وندير جهدي ولكن نهار عييط ليا شي حاجة فيا تقلبات فالداخل ديالي عاود.. وبالي بقا تيفكر فيه وفداكشي لي عاود ليا خلاني نحن فيه حيت تاهو تعدب
رحيل:الاعاود بان فحياتك غاتسمحي ليه؟
أسماء:لا حيت عمري مغانسى الكدوب لي كدب عليا ومغانساش نيتو لولانية (حركات راسها وضحكات بسخرية) مغانكرش تاأنا مكنسوااش وكنت مع خوه وهو فنفس لوقت ولكن غير حسيت بقلبي مال ليه بعدت على خوه ولكن هو اش دار خداني لعبة مع خوه ولي سبق فيهوم يح*ني هههه تخيلي كون مبغااانيش وكون تقت فيه هههههههه (عينيها لمعو بالدموع) كون كنت دابا كانتحسر على جليدتي لي دا ليا هههه
قربات رحيل جهتها درعاتها بيديها وحطات دقنها على كتف أسماء وشافت فانعكاسهوم فالمراياا كانو بزوج بيهوم فحالة بائسة وغير مخبينها وسط ضحكة مزيفة..
رحيل:(بصوت هامس) عارفاك غاتقدري تنسايه وغاتعاودي تحلي قلبك لشي واحد خر لي غايعوضك
أسماء:(شدات فيديها وتبسمات)وتانتي خصك تنساي ارحيل وتفتحي قلبك وتعيشي حياتك كيف كنتي باغاا ماتحبسيش راسك ارحيل فلي فااات والانتي حاسة بقلبك مااال ليه اعتارفي وقوليهاا ماتبقااايش غير تهزي فقلبك وتحمليه فوق طاقتو حنا عبد والعبد ضعيف واخا يكون لي كان غايجي النهار ويتهد فيه.. وكيف أنا مكملة حياتي وكانحاول نسى وليد تانتي حاولي تنساااي داك وجه لخصيييية ودابا خلينا نرجعو لعندهوم تعطلنا بزااف غايسحاب ليهوم كانولدو هه..
يتبع...
التعليقات
لا توجد تعليقات بعد، كن أول من يعلق.