محتوى القصة
فالرياض كانت رحيل مشهية الرفيسة ونزلات لتحت عند السيدة لي مكلفة بالطياب وطلبات منها طيبها ليها بلامساخن... ونيت داكشي لي كان عاوناتهوم وهي جالسة على لكرسي كاتقطع فالتريد لي طيبوه والريحة دلبلول راه عاطية...دخلات نور الهدى وهي هازة فيديها قريعة دوليبران ونطقات بتبسيمة:الله يعاونك عفاك كأس دالماء لو سمحتي
مدات ليها السعدية لكاس وهي جلسات قدام رحيل لي نطقات بهدوء: واش راسك تايضرك؟
نور الهدى:اه خلي داكشي لي تاديريه أنا نعاونهوم نتي مخصكش تجهدي على راسك
رحيل:لا عادي اصلا جالسة
شربات نور ديك الكينة وناضت غسلات يديها وجات تعاونها ورحيل عاد حلات ليها لهضرة وقالت بفضول: ولفتي جو تطوان ؟
نور الهدى:ولابد ماخصني نولفو
رحيل:واش ماعندكش عائلة هنا فمراكش ؟
نور الهدى:عندي ولكن العلاقة بناتنا شوية ماشي تال لهيه
رحيل:أنا ماعنديش عائلة يادوب كاين دارنا مي عائلتنا مكينااش حيت بابا واليديه ماتو وتا ماما ونتي عارفة فاش كيموتو لواليدين العائلة مكتبقاش تسوق ليك
نور الهدى:فيها خير المهم واليديك معاك وهاداك هو الفضل عند الله سبحانه وتعالى
رحيل:(تبسمات ليها) سمحيليا
نور الهدى:(باستغراب) لماذا؟
رحيل:حيت جبت سيرة لواليدين والعائلة وانا عارفة بلي لموضوع حساس عليك
نور الهدى:(بطيبة)ماتقوليش هاكا بلعكس أنا فرحانة حيت لقيت مع من نهضر ونبدل لجوو قبل مانرجع لوحدة ديالي فمدينة عايشة فيها بوحدي
رحيل:علاش ماترجعيش لهنا
نور الهدى:(سرطات ريقها) هنا فيه دكريات لي مانقدرش نساهوم وهاد المدينة بالضبط خلاتني نفرها واخا تانرجع ليها مرة مرة ولكن العيشة فيها مبقاتش بحلاوتها
رحيل:(بتفهم) من حقك وفيما لقيتي راحتك بقااي لمهم فيما تجي مرحبا بيك هنا
نور الهدى:ترحب بيك الحنة أنا فرحانة حيت أخي نوح رزقو الله زوجة طيبة وحنونة بحالك فضلو من بعد الله تعالى عمري نسااه إنسان خلوق وطيب وقف معايا ومع عائلتي فأضعف فترة فحياتي
رحيل:(تبسمات رحيل بزز وهي حاسة بسهم الغيرة ضرب قلبها من كلامها على نوح... داك لمدح ديالها ليه كان عفوي ولكن هي ماحساتش بيه هاكا) بصح؟
نور الهدى:نعم الله يخليه ليك ويخليك ليه
رحيل:آمين
سكتات رحيل وكملات خدمتها ونور الهدى معاوناها تاسالاو وناضت غادة تبدل عليها ودوش...وداكشي لي كان جرات معاها سيدرا ودخلاتها دوش تاهي...شبعات لعب فلما وضور ضور تبوس لكريشة دمها وبحكم أول مرة تشوفهوم كيتحركو فرحات وبدات تغووات فالحمام بصوت مرتااافع مع محيدة لباراي:مااااامي تحركوو شوفي
تبسمات رحيل وحركات ليها راسها باه وكملات ليها تدوش وخرجاتها تلبس حوايجها عاد كملات هي بزربة وطرفات لحمام ولبسات عليها حوايج.... ونزلات لتحت لقات كلشي مجموع فالصالة من غير نور الهدى ونوح لي باقي ماجا...جلسات رحيل معاهوم وتخشعات فكلامها مع بيسان وسيدرا تتعاود ليهوم على مومويات لي شافت تحركو... تابان ليها نوح وهي تمشي كاطير عندو تاهزها وباسها فحنيكاتها وهي تنطق بصوت حماسي:بابانو عرفتي مومات تحركو فكريشة ماما أنا شفتهوم..
نوح:لعبتي معاهوم؟
سيدرا:اه
جلس جنب رحيل وتحدر باسها فحنكها وهي تبسمات وقالت بخفوت:تعطلتي ؟
نوح:كان عندي شي غراض
حركات راسها بتفهم وكملو حديثهوم تاجات نور الهدى وهو ينوض مع رؤوف غادي يجلسو فالصالة التانية...تحط لعشا ورحيل كبات جنونها فالرفيسة وكلاتها نيت تاشبعات... ملي تعشاو جلسو مجمعين وهي عينيها على رحمة تاتشوف كيفاش تتعامل نور الهدى وتدوي معاها بالخاطر وهي تگول واش حشاتها ليها ولاكبرات بيها وتتگول نميك مي واخا هاكا راه تيبقا فيها الحال مي ماعليش مابقا قدمافات وتمشي تسكن فدارها وكل وحدة تشد تقارهاا... ناضت مخلياهوم مجمعين ومشات لبيتها تنعس أما سيدرا راه سبقاتها لبيت تنعس حيت عيات بلحمام...
دخلات لجناحها وبدلات عليها بحوايج خفاف دالنعاس وتريحات طلقات شعرها وجلسات تسنى فنوح تابان ليها داخل كيزول فلمگانة...غمزها بالخف ودخل لحمام دوش تدويشة خفيفة وخرج لبس عليه سروال توني مع تيشورت نواغ وجا لجهة النموسية زول لغطا وتخشى بلاصتو وقبل مايتأنسطالى حطات راسها على كتفو...
رحيل:اشمن غراض كان عندك واش على لخدمة؟
نوح:تت جا عندي ريان ليوم؟
رحيل:(هزات راسها وقالت بتفاجأ)بصح علاش؟
نوح:(بهدوء) طلب مني بيسان لزواج
رحيل:(صدمها مكانتش متوقعاها تقادات فجلستها وقالت) ماتگولهاااش ؟
نوح:(حط يديه تحت راسو وهز حاجبو وليد التانية تيدوزها على شعرها وقال بصوت جوهري) زعمة راه هاد لخبار الفتنة ديالي غايجيوك عادين بيما أنك عارفاهوم كانو كيدويو مع بعضياتهوممن شحال هادي...
مكسل فبيتو مور ماتعشاو وإحساس الراحة منعش قلبو... الخطوة لي كان هاز ليها الهم دازت بخير وعلى خير... واخا راه مدازت تاغفر ليه الله دنوب ولكن فالأخير خرج بنتيجة مرضية ليه ودابا بقات فجواب بيسان لي غايحدد ليه مصير لعلاقة واش غاتكمل ولا لا...واخا راه جزء منو متأكد كل التأكيد أنها غاتوافق ولكن بحكم داكشي لي طرا بناتهوم خاف أنها ترفضو... سمع الدقان فبيتو وتحل لباب وتم داخل عليه محمد طه لي كان تيتسنى غير لفرصة فين يسولو ويستفسر منو هو علاش مشى عند نوح... جلس جنبو فوق النموسية وشاف فيه بهدوء:يالاه دابا جات نوبة تگر ليا بشنو كاين
ريان:(بضحك)زعمة والو ممفاكش اصاحبي
محمد طه:وتگول مغانوضش من هنا تاتسرسب ليا كلشي
ريان:وهو فالصراحة باقي ماعرفتش اخرة هادشي
محمد طه:مالك على هاد السوسبانس كامل گول لي كاين وهنيناا
ريان:اوا خوك باغي يتزوح ومشيت عند ولد لحاج وطلبت منو يد ختو لزواج
محمد طه:(هز حجبانو مصدوم وبعدم تصديق قال)حلللف
ريان:(متكي وداير يديه ورى راسو وقال بطنز) لحلوف لاش؟
محمد طه:واش كاطنز ولاداوي بنيتك
ريان:واش بنت ليك طانز اصاحبي تت
محمد طه:(ضربو على فخدو بالجهد وقال بضحك)ههههه البرهووش درتي عقلك
ريان:ورااه نتا لي برهووش نسيتي بلي أنا كبر منك
محمد طه:والله مباينة فيك بقوة الطنز لي فيك تتبان باقي صغير
ريان:اوا بصحتي اسيدي
محمد طه:(بفضول)اييه وشنو گال ليك ولد لحاج ؟
ريان:وناااري از*ي بلاماتفكرني حسيت براسي بحال لاكاندوز شي أونطخوتيان راه مايمكنش كيفاش كنت متوتر اصااحبي والسيد كيسول فياا
محمد طه:(ضحك) هههه غير اجي وتزوج
ريان:وراه مبقاتش فهادشي والسيد راه حطني بوجهي وكان عارفني أنا وختو كاندويو
محمد طه:(حل فمو مصدوم)ماتگولهاااش باش عرفها
ريان:شكون عرف عرفتي لاحها فكمارتي خلاني غير تانضور فعيني يحال موكة وتانگول فعقلي دابا ينوض ليا ولكن لكدوب ع الله حرام السيد راه ميمكنش كيفاش تتحس بالهيبة والتقالة والرزانة ونتا تادوي معاه عجبني فهضرتو اصاحبي
محمد طه: والله تناضي السيد كان عارف كيفاش الله وأعلم يعني باينة غايكون عرف بلي تاعوينات الجلبانة عارفة
ريان:(تگاد فجلستو ونطق بتساؤل)ياكما غادي ينوض شي مشكيل بناتهوم لاعرفها خبات عليه؟؟
محمد طه:واهداا علياا الصراحة ماعرفتش
ريان:(تشطن) مباغيش نسبب ليها مشكيل وهي غير مگدمة
محمد طه:رحيل اتعرف كيفاش تصوڤي راسها ماتخافش على عوينات الجلبانة اييه كمل باش ساليتوها؟
ريان:باش غاتسالي دوزني من عين لبرا كيف تيگولو عاد ربي حن وگال ليا بلي لقرار لخر دمولات الري والشوار
محمد طه:اوا هالمهم دزتي منوو وأكيد الدرية غاتقبل
ريان:(حك شعرو) ماعرفتش أصلا أنا وياها تفارقنا ومعاودش هضرنا وماعلمتهاش گاع بشنو كاين مشيت نيشان عند خوها
محمد طه:اوا هادا هو لمهم وأكيد هي غاتوافق واش السيدة تصاحبات معاك وقبلات بهبااالك دارت لخير وغاتكملو كون هاني
ريان:(ركلو فجنب) الله ينعل حسك
محمد طه:(شاد جنبو كيضحك)هههه وشنو كدبت اجي ياكما خورتيها فشي كلمة مع ولد لحاج حيت عارف فمك ملاوط وفيه لڤيرجاات
ريان:(ضحك) تيق بيا والله تالهضرة بقوة لخلعة خرجات مسرسبة ههههه
تكرشخ محمد طه بالضحك على هبال خوه تابدا يبكي بالدموع من قلبو كيضحك وتيتخيل ريان جالس بتبات قدام نوح وتيهضر معاه بعقلو راه مجرد ماتخيل لمنظر زاد ضحك كتر من لول وريان معاونو تاهو كيضحك فيما تيتفكر راسو..
محمد طه:(سكت بزز) اجي بعدا لواليد فخبارو؟
ريان:بالسيف هو لول
سمعو الدقان فلباب لي تحل بزربة ودخلات تانيرت وهي عاقدة حجبانها وموراها إدريس... قربات جهة ريان وهي عاقدة حجبانها وباين فيها كاعية وبسرعة نطقات:ياك اولد كرشي هادا هو لمضمون فيك غادي تخطب بنت الناس ومك مفخبارها والو
ريان:(عرف بلي إدريس گالها ليها نطق بتبرير) راه كنت ناوي نعلمك غير گلت نشوف هاد لحريرة باش غاتسالي
تانيرت:(تفگعات ليه) ايييه وبااك علمتيه جيتي تال مك ونتا تسكت يااك هادا هو خيري فيك
ريان:(ناض شد فيها وهي تاتقلب وجهها مقلقة دبصح ونطق بجدية) والله ماقصدت شي حاجة أنا گلت غير ندوي مع السيد هضرة أولية وديك الساعة راه غانعلمكوم كاملين
تانيرت:وعلاش ماهضرتيش دابا ياك تعشينا فطبلة وحدة بقيتي ساكت (بدات تبكي وتنخصص) تاكانسمع لهضرة من فم بااك تگول أنا عدوتك ماشي مك شنو خفتي مانفرحش ليك
بقا ريان تيضور عينيه ويشوف فإدريس لي حرك ليه راسو بمعنى فكها مع مك ورجع شاف فمحمد طه لي تاهو ساكت وتنهد تنهيدة مسموعة وقرب معنق مو لي كاتبكي هو مكانش أصلا قاصدها هاكا وفاش علم باه باش ياخد رأيو ونيتو كانت باغي يدوي مع ولد لحاج وديك الساعة يعلمهوم كاملين وهوما حاضرين ومنهوم تارحيل وأسماء وهادشي كان باغي يديرو غدا ولكن مو بقا فيها لحال ومن حقها ولد واحد عندها..
ريان:(بجدية) ماقصدتش أنا هادشي لي نتي فهمتيه أنا نيتي كانت نجمعكوم غدا ونعلمكوم نتي ولبنات وتامحمد طه
تانيرت:(شافت فيه وعينيها عامرين دموع ونطقات بصوت خافت) أنا مك من حقي نعرف بحالي بحال باك ولكن نتا ماحسبتينيش بحال لامكاينااش گااع...
زولات يديه وخرجات من لبيت وهي بصح مقلقة من ريان بزاف... أي أم كون كانت بلاصة تانيرت كانت أتصرف نفس الشي حيت شي طبيعي ملي تسيق لخبار بلي ولدها باغي يتزوح ودوا مع ولي أمر لبنت وهي مفراسها مايتعاود راه بحال لاهمش دورها فحياتو... ولي زاد بقا فيها هو تاإدريس كان عارف ويالاه گالها ليها الحاصول تفگعات عليهوم بزووج خلات ريان غير تيبرق فعينيه معارفش كيفاش يحلها والغضبة دمو راه قاصحة وهو ديجا مجربها يامات كندا فاش كان تيدير ليها شي فعلة وتغضب عليه... شاف فباه ونطق:لواليد
إدريس:بينك وبين مك هضر معاها وشرح ليها لي كاين وهي راه غاتفهمك
خلاهوم وريان جلس فوق النموسية كاعي ساط النفس وقال:وهانتا شوف الزهر لمقووود لي عندي
محمد طه: خالتي تانيرت من حقها صراحة تقلق منك راه مك هاديك ولكن قلبها بيض ودغيا غاترطااب دوي معاها كيف گال ليك لواليد وشرح ليها نيتك وديك الساعة يكون خير
حرك ريان راسو ومحمد طه خربق ليه شعرو ونطق بهدوء:اماتغضبش اعريسناا يالاه گلتي بسم الله
ريان:اودي خليني ساكت تت
تبسم ليه وخرج مخليه غارق فتفكيرو وكيفاش غايحلها مع مو ويخليها تنسى تمتم بخفوت:الله يخرج هادشي على خير
---
يديه كانت باقي تاتمشط ليها خصلات شعرها وعينيه على وجهها وعينيها لي خرجات فيه بحاال موكة... اش هاد الصدمة لاح فوجهها تاخلاها معارفة ماتگول...
رحيل:هاااء
نوح:(بسخرية)مال لسانك تسرط الفتنة
رحيل:(بدات تترمش عينيها بحال مونيكة) مافهمتش نتا اش تتگول
نوح:(عاطيها لخاطر) اش مافهمتيش فكلامي نزيد نشرحو ليك (تگاد فجلستو وقرب وجهو تال وجها لدرجة أنفاسو كاتحس بيهوم سخان كيلفحو جلدتها ونطق بصوت خاتر) كنتي عارفة خوك وختي كيهضرو بزوج
رحيل:(كمشات حجبانها) ونتا كيفاش عرفتي؟
نوح:تاحاجة مكاتخفى عليا الفتنة
رحيل:(بتبرير) سمع انوح أنا ماشي خبيت عليك ولكن لموضوع متعلق بيهوم بزوج ومانقدرش ندخل فيه وزيد خفت
نوح:مناش خفتي؟
رحيل:(تنهدات بصدق) خفت لاعرفتي دير شي تصرف وينوض الصداع وأنا مباغاش هادشي
نوح:(هز حاجبو) هي على هاد لحساب معرفانيش الفتنة
رحيل:ماشي معرفاكش ولكن حيت لموضوع فيه ختك وهاكا أنا فكرت
نوح:ختي ماشي بنت صغيرة هي إنسانة واعية وعارفة لحاجة لي خصها دار ولي ماخصهاش دار نهار قررات تكمل قرايتها برا لبلاد راه مامشيتش معاها وبقيت حاضيها حيت تايق فيها وعارف بلي مستحيل دير حاجة لي تخليني ندم حيت عطيتها ديك التقة ونهار عرفت بلي هي وخوك تيدويو ماهضرتش حيت عارف تربية سي إدريس بقيت حاضي معاهوم باش لاخرجو من السطر نرجع باباهوم...وزايدون عارف هضرتهوم كانت أغلبيتها فالتلفون وماتلاقاوش بزااف
وكيفاش عرفتك نتي عارفة نهاار كنتي تادوي مع خوك ملي عرف بيسان مرضاات سمعتك وتما تأكدت حيت كنت شاك مستحيل خوك يدير شي بلان وماتعرفيهش وشكي كان فمحلو
رحيل:صراحة كل مرة كاتزيد تصدمني فيك
نوح:خصك تولفي هادشي وديري فبالك بلي راجلك ماتقدريش دوزيها عليه
رحيل:دابا شنو نعتابر هضرتك
نوح:عتابريه كيفما بغيتي لمهم عندي لمعنى وصل
رحيل:وصل وصل كون هاني
نوح:(غمزها) ودابا مزيان الفتنة ولكن ديري فداك الرااس بلي أعدى حاجة عندي هي لكدوب مكانقبلهومش وكنفضل بنادم يجيني نيشان ويگول لي كاين بلازواق على أنه يدير تنوعيرات ويزيدها بلكدوب... خوك علاش قبلت بيه حيت ماشميتش فيه لغدر وجاني صريح وهادشي لي عجبني فيه وخلاني نتيق فيه ونعرف بلي ختي لقات لي يستاهلها....
أسدل الستار ليله لتشرق شمس ساطعة تعلن على بداية يوم جديد...حلات رحيل عينيها وهي تتكسل بحال لقطة وضارت جهة نوح لي كان ناعس على كرشو وقالب وجهو لجهة لخرا... ليوم الأحد وغايمشيو لفاس وهادشي مفرحها حيت غاتبدل لجو وتسارا شوية ففااس... ناضت بلاعگز تاتسوط وتكسل وحطات يديها على كرشها وناضت غادة لدوش تقضي روتينها الصباحي... خارجة تاتنهج والتقل ولى تيهلكها ومع ليوم صبحو لعسيلات ماشاء الله تيتحركو فكرشها هلكوهاا... قربات جهة نوح وجلسات جنبو ومدات يديها لجهة شعرو وبدات تادوزها عليه ونطقات:نوووحينوو
حرك راسو وضار جهتها حال نص عين مبوق بالنعاس ونطق بصوت مبحوح:شحاال فالساعة؟
رحيل:لحداش يالاه فيق ياك ليوم غانسافرو ومجمعتش لحوايج ديالي وديالك وديال سيدرا
نوح:(نعس على ضهرو ونطق مغمض عينيه)مغانشدوش الطريق تال ليل
رحيل:وعلاش؟
نوح:يبرد لحال شوية
رحيل:نيت مزياان ليوم لحرارة يالاه نوض دوش باش نزلو نفطرو يالاه انوحينوو
ناض تايتكسل وجرها لعندو بايسها فشفايفها ولقاها تاهي على سبة السيدة ساحت بين يديه تابدا كيطلع ليها داكشي لي لابسة وزولو ليها وخدا جرعة صبااحية على الريق خلاتهوم بزوج ناشطين وناضو يدوشو بزوج وهي راه تفششات عليه نيت خلاتو يدوش ليها وماهزاتش يديها گاع... نزلو موراها لقاو كلشي فاق وفطر ولي عندو شي غراض مشى يقضيه فطرو بتلاتة مع سيدرا لي كانت ناشطة حيت غاتسافر...أما نوح مع سالى مشى يشوف المحالات هوما لول قبل مايسافر واخا راه مخلي عتمان ورؤوف يتكلفو ولكن ضروري مايتأكد بنفسو... طلعات رحيل لبيت سيدرا وجمعات ليها حويجاتهاا وخدات ليها ڤاليز صغيرة دارت فيه داكشي لي غاتحتااج... تهنات من جهتها ومشات تجمع حوايجها هي ونوح... ومدوزة أبيل فيديو مع مها لي كانت تتشكي ليها على بلان ريان...
رحيل:(نطقات بصوت عالي وهي جالسة تاتستف الحوايج) وصافي اماما راه عارفة ريان ماقصدهاش وغايكون باغي تايشوف الأمور فين غاتوصل ويعلمك راه يالاه هضرة أولية وفخبارك والله تاباقي نوح مگالهاا لبيسان
تانيرت:(تاتنقي الخضرة ونطقات وهي عاقدة حجبانها) غير يعلمني ويگولها علاش باه گالها ليه
رحيل:(ضحكات)واش اماما تتغيري هههه راه گالها ليه باش يشوف رأيو
تانيرت:ورأي ماشي مهم؟؟؟
رحيل:وناري والله تاغير باغا تقلقي هاكا شوفي راه ريان ماقصدش كيف فهمتي اه غلط ولكن ماتقلقيش منو وهو بلاوالو غايكون مسطريسي هانتي الله يرضي على تانيرت إينو سمعي ليه
تانيرت:مانسمع ليه مايسمع لياا هاباه يسمع ليه مبقيتوش حاسبيني بحال لامكيناش ولدي باغي يتزوح وانا مفخباريش اودي ولدي وربي اتانيرت باش فلخر يديرك بحال الغريبة
بقات تاتشكي وتنگر ورحيل تادخل بخيط بيض وهي عارفة بلي ريان مقصدهاش ولكن تفهمات علاش مها مقلقة...
تانيرت:دي حوايج لبرد راه يقدر لجو يتبدل
رحيل:ديت وأصلا محال نطولو تم
تانيرت:فين الضرة حسها مقطوع؟
رحيل:فبيتها فرحانة حيت غاتسافر
تانيرت:شكون غايمشي؟
رحيل:غير أنا ونوح وزين العابدين وسيدرا ويقدر تمشي خالتي رحمة تاهي
تانيرت:اوا الله يوصلكوم على خير ابنتي
رحيل:نخليك اماما دابا نكمل جميع هادشي تهلاي فراشك وكيف گلت ليك وسعي خاطرك
تانيرت:سيري ابنتي ردي لبال لراسك بسلامة
قطعات رحيل وكملات شنو كاديرر وخلات لڤاليز دنوح محلولة باش يجي يشوف ياك ماخصاتو شي حاجة حيت مولف هو تيجمعها لراسو ولكن جمعاتها ليه... ناضت جبدات اش غاتلبس ومع وصل وقت لغدا طلعاتو ليها السعدية وتغدات هي وسيدرا مافيها لي ينزل حيت عياات والدروج ولاو تيعيوها بزاف... دغيا طار لوقت وصل الليل ورحيل وجدات راسها ولبسات تاسيدرا تهنات فيها وغير جا نوح دوش تدويشة خفيفة ولبس تاهو حوايجو وشيك على لڤاليز لقى كلشي ناضي وخرج عندها لقاها مدابزة مع الصندالة تلبسها...تحدر قفازي وبدا يلبسها ليها وهي تبسم:حاشاك
نوح:عزك الله مزيان ياكما مزيرين
رحيل:لا هو هاداك اجي خالتي رحمة غادة معانا؟
نوح:اه باغا تشوف الحاج
رحيل: مزيان نتحركو دابا
نوح:صافي واخا
هز لڤاليز ونزلو لتحت ورحيل جلسات تاتسنى رحمة تنزل ونوح رجع طلع علم زين العابدين ومشى لبيت سيدرا هبط ليها لڤاليز وهي تاضور بجنابو فرحانة وهو مبسم كيجاوبها بلخاطر
هبطات رحمة مهبطة ڤاليز ديالها وفجنبها نور الهدى لي هازة صويك خفيف فيه حوايجها تاهي باين فيها حشمانة..شافت فيها رحيل وهي مكمشة حجبانها ورحمة شافت فرحيل ورجعات شافت فنوح ونطقات بهدوء: نور الهدى غاتمشي معانا تاهي اولدي...
كان باين على نور الهدى بلي حشمانة وهي منزلة راسها ومزيرة على داك الصاك... إصرار رحمة باش تمشي معاهوم خلاها تحرج بزاف وماقدراتش ترفض ليها طلبها... أما هي كانت نيتها ترجع لتطوان حيت كانت باغية غير تجي تشوفهوم ومنها تزور قبر ناصر وبيما أنها زارتو فكانت باغا ترجع ولكن رحمة مخلاتهاش تمشي دابا...
أما رحيل كانت جالسة تتشوف فرحمة وإحساسها خلاها تعرف نية رحمة خصوصا أنها سمعات هضرتها ديك لمرة وفهمات لي كاين...مغاتنكرش بلي تعصبات على فكرها وشنو باغا دير... ماعرفاتش علاش مكتحملهاش وهي عمرها قربات ليها ولاأداتها من نهار دخلات لهاد الدار وهي عمرها جبدات معاها العيب بلعكس كانت تادير جهدها باش تقرب منها ولكن هي محملاهااش وربي كبير...
هز نوح عينو وشاف فمو مدة قبل ماينطق بهدوء وخشونة:واخا
تبسمات رحمة ونوح ضار شاف فسيدرا وقال:سيري ابابا گولي لزين العابدين راه غانمشيو
رحمة:أنا غانمشي نوصي السعدية على شي حاجة ونجي
مشات رحمة لكوزينة وسيدرا طلعات لفوق عند زين العابدين كيف عادتها حلات لباب بلامادق ودخلات لعندو تتعيط ليه:زينبيدين زينبيدين
وصلات لشومبغ ديالو وبان ليها جالس فوق النموسية ومحني تيربط سيورو قربات جيهتو تتجري وقفات قدامو وقالت بحماس وهي تتحنقز عليه بحال لگلية: زينبيدين گالك بابانو يالاه نمشيو
ماهزش راسو كمل شنو كيدير وهي واقفة فوق راسو بحال قباض الرواح... جمع سيورو عاد هز راسو وشاف فيها هي لي قالت وعينيها على سبرديلتو:تانتا لابس بحالي شووف
تتوريه سبرديلتها لبيضا لي كانت بحال ديالو غير هي ديال دراري وكبيرة وعالية...ساط النفس وناض غادي جهة المرايا الطويلة وبدا كيربط سيور سروالو التوب لي كان ستيلو سپور...قربات تاني عندو أو وقفات حداه وهي تنطق ببرائة:علاش نتا طويل بزاف ازينبيدين شوف
تتوريه انعكاسهوم فالمرايا وهو ضار شاف فيها وتحدر لجهتها هي لي تقدات قدامو ومد يديه لشعرها جرها من خصلة لقدامية دشعرها تاهبط ليها راسها ونطق ببرود:سكتي شوية
طلقها ومشى هز شكارتو وصويك ديالو وخدا ليزيات وتلفونو وخرج سابقها هي لي تابعاه مادة شنافتها مقلقة وغضبانة حيت سكتها...نزلو لتحت فين كانو كيتسناوهوم ونوح شاف فيه مكمش حجبانو وناض شاد لرحيل يديها وخرجو لطوموبيل لي كان ديجا موقفها برا وقاد فيها البگاج...حل لباب لقدامي لرحيل وعاونها تاجلسات ورحمة بدات تميق معجبهاش لحال... جلسات نور الهدى لوسط وجنبها رحمة والجنب التاني جلسات سيدرا عاد زين العابدين لي كان جاي بزز محاملش راسو... شد نوح بلاصتو وشعل الراديو طالق القرآن وتحرك شاد الطريق فسكات...نور الهدى كانت هازة مصحف صغير تاتقرا القرآن منو ورحمة شادة تلفونها تاتمساجى مع سناء وزين العابدين قالب وجهو جهة الطريق وسيدرا تاضور عينيها ساكتة...أما رحيل هاديك عقلها واهلي فين مسافر بيها وعاقدة حجبانها...ضار شاف فيها نوح ورجع مركز مع الطريق... مسافة طويلة ضربوها تاوصلو لواحد الاستراحة تما وقف نوح عمر لسونس عاد بلاصا طوموبيل جنب واحد لغيسطو كافي تم نيت ونطق بهدوء وهو تيزول لاسانتوغ:نزلو نتعشاو
نزلو ورحيل حسات برجليها تبنجوو شدات فيد سيدرا وسبقات غادة لطواليط ولخرين شدو بلاصة وطبعا نور الهدى جالسة فالجنب وغير ساكتة مكتهضرش تاكاتسولها رحمة وتجاوبها على قد السؤال... خرجات رحيل وبان ليها نوح واقف كيتسناهاا...قربات جهتو وتبسمات بزز وهو حط يديه على حنكها ونطق بخشونة:ياكما عيتي؟؟
رحيل:تت عادي فيا الجوع
نوح:شنو باغا تاخدي؟
سيدرا:(نقزات وهي شادة فسروالو) بابانو بغيت لباط بدجيجات وفرمااج بزاف
نوح:(تحدر هزها ونطق بتبسيمة خفيفة) صافي هادشي لي باغا؟
حركات سيدرا راسها باه وخرجو من جهة الطواليطات ومشى هو وسيدرا يطلبو العشا ورحيل جات جلسات جنب رحمة ونور الهدى وعينيها على زين العابدين لي جالس مبعد عليهوم فطبلة خرا...
نور الهدى:برد لجو شوية
رحمة:فالليل ضروري ماكيكون شوية دلبرد
رجع نوح جلس سيدرا جنب رحيل وشاف فمو وبهدوء قال:يمّا اجي معايا واحد الدقيقة
سبقها خارج لبرا وهي ناضت تابعاه ورحيل متبعة ليهوم لعين تاسمعات صوت نور الهدى لي قالت:الجلاس بزاف غايعيك ياكي؟
فبرا كان نوح واقف جنب طوموبيلتو وعينو على مو لي واقفة قدامو وهي مبسمة تانطق بصوت أجش وببرود: لاش باغا توصلي ايمّا بهاد لفعايل؟
رحمة:(باستغراب) اينا فعايل مافهمتش اش باغي تقصد؟
نوح:(هز حاجبو) داكشي لي كيضور فراسك ايمّا نحييه حيت عمرو يكوون سبق وهضرة معاك فداك لموضوع وگلت ليك لي كاين بلاماتخليني نعااود هضرتي تاني...
طالع مع الدروج حيت لاسونسور خاسر ليوم وهو متقل بالسخرة لي جايب معاه...وقف حدا باب لاباخطمون وهو كيسوط حط السخرة وجبد من جيبو الساروت وحل لباب ودخل وهو طالق ودنيه ساعة ماسمعش الحس...مشى نيشان لكوزينة باش يحط السخرة وهو يلقى مو واقفة مگفضة على داك لقميص لي لابسة ودايرة فواطة وزيف حياتي مبين زغبها الشايب لي فنواضرها وكاتگرس فالخبر...عقد حجبانو وقرب جهتها قايل:الواليدة اش كاديري؟؟
مو:(ضارت جهتو وتبسمات) ولدي جيتي على سلامتك
إسلام:علاش تتعجني وعلاش معدبة راسك
مو:مال لعجين ولى عداب راه اولدي هادشي يدي ولفوه من زمان وزايدون اش فيها لاعجنت
إسلام:ماتعدبيش راسك نجيبو لخبر من المخبازة
مو:خرج عليكوم خبز الزنقة مافيه فايدة لفورص ولماا راه اولدي مكاين ماحسن من خبز الدار لي تتعجن بيديك وتتعرف اش فيه
إسلام:واش عجنتي بيديك علاش ماخدمتيش العجانة راه لهيه
مو:لا لا داكشي اولدي ماكبرناش بيه ومعرفتش ليها وزايدون لبنة فليدين
إسلام:أسماء فين هي؟
مو:(قالت بعفوية) راه اولدي ناعسة فلبيت
زادو حجبانو عقادو وقلب الضورة غادي لبيتهوم ومع حل لباب بانت ليه السيدة ناعسة وحالة فمها وباين فيها غارقة فنعاسها قرب جهتها مور ماشعل ضو خفيف وغير وصل حداها وهو يتحدر وبدا كيحركها وتيعيط ليها بسيمتها:أسماااء أسماااء نووضي أسماااء
تاتحرك فجفونهاا تاحلات عويناتها والضبابة دالنعاس باقي فيها وبدات تتشوف فيه وهي مگلوبة بالنعاس...تقاد فوقفتو وقال:علاش مخليا لواليدة تنوض تشقى
تاتشوف فيه وهي معرفاش علياش تيدوي باقي عقلها مفايقش...جلسات فبلاصتها تتحك عينيها وهو واقف عليها كيتسناها تجاوب...ماعجبوش لحال فاش لقى مو تتشقى وهي ناعسة ولاعلى بالها...
أسماء:(شافت فيه مخنزرة)اش تتگوول نتاا ؟؟
إسلام:(مربع يديه) لواليدة داخلة لكوزينة تتشقى ونتي ناعسة هناا
أسماء:واااش نتا شوية لباااس داخل عليا هاد الدخلة اش واااقع
إسلام:(ضارب مية وحداش وقال معاحبو حال) هضرتي راه واضحة علاش مخليا مي نايضة تاتشقى واش هي جايا ياش ترتاح ولاجايا باش ضرب تمارة
أسماء:(ناضت وهي معصبة من هضرتو وقفات قدامو وغوتات) مگااال ليها حد شقااي وزايدون قبل مانعس درت كلشي وخليتها متكية أناا باش غانعرف غاتنوض تشقى هااا
إسلام:بلاغوااات تاندوي معاك ماتبقايش تهزي عليا
أسماء:حيت نتا مكتفهمش بلخاطر وخص ضروري نغوت باش يالاه تفهم راااسك جاي مفيقني وسط النعاااس تاتهز عليا هنا وزايدون مك هي فدار ولدها ولابغات دير لحاجة مغانمنعهااش ونسد عليها باش تگول هاديك مخلاتنيش ناخد راحتي فدار ولدي (بغا يدوي وهي تهز يديها وقالت بانفعاال) أنا ماشي خدامة عندك باش تبقا تغوت عليا ولانعست راه من حقي راني هازة روح فكرشي تانعيى ماشي روبو باش نبقااا واقفة ربعة وعشرين ساعة على ربعة وعشرين باش سياتكووم ماتقلقش ملي تشوف مك داخلة لكوزينة ولكن مزياان هادشي لي تادير خليك هاكا وبقا تحك على الضبرة وخليني نفر منك كتر ماني نافرة
تخطاتو داخلة لحمام رادخة لباب بالجهد منيرڤية وكلها تترعد بالاعصاب...غسلات وجهها وسنانها وخرجات بلاماتشوف فيه غادة لكوزينة لقات مو دايرة لخبر يطيب فلفران ولي بقا مغطياه فالصينية تايخمر وقفات جنبها ونطقات بصوت حاولات ماأمكن يبان هادي: خالتي علاش معدبة راسك خلي هادشي تانفيق ونديرو
مو:ويلي ابنيتي واش نتي مسالية باركة غير تمارة لي كاضربي من الصباح ونتي واحلة فروحك وزايدون راه هادشي مولفة بيه ابنيتي شفتي لمرحوم راه مكانش تياكل خبر الزنقة وديما عاجنة تايدي ولفو لعجينة وتمارتها..
أسماء:واخا هاكا اخالتي نتي جيتي ترتاحي عندنا سيري جلسي وأنا غانكمل
مو:نتي لي ارتاحي راه انا مولفة
أسماء:والله اخالتي مانخليك تعدبي سيري تجلسي أنا نكمل
سكتاتها وملقات ماتگول مشات غسلات يديها وخرجات تاتمسح فلفواطة وأسماء مشات تصاوب لعشا واصلا شرملات الدجاج قبل ماتنعس وقالت مع راسها نمشي نرتااح ليا شوية ومع لحمالة ولات تاتعيى وشي طبيعي ولكن وحلها ليها وداك شوية لي نعسات ندمها عليه...
بقات تتقشر فالخضرة والبكية واحلة ليها فلحلق وبلاماتشعر طلقاتها وبدات تتبكي وتنخصص بالسكات...تتصاوب الخضرة وكطيحهوم حجر وفيما تگول هاهوما غايحبسو تايزيدو ينزلو تاني...دخل إسلام وقشعها عاطياه بالضهر وكتافها يتهزو ويتحطو وسمع تنخصيصها وهو يقرب جهتها تاوقف وراها وبانت ليه تتبكي هنا ماحملش راسو مد يديه وحطها على كتفها ونطق بخفوت:أسماء
أسماء:(بعدات عليه تازول يديه وقالت بلاماتشوف فيه)خليني عليك دابا
سكت وبقا غير تيشوف فيها وتأنيب الضمير داير خدمتو ومخليه يندم على هضرتو لي قال...خرج كيسووط وحاس براسو غايهباال مخليها مكملة شغالها وتنخصيصها وهاد لحالة لي ولات عايشاها مبقاتش عاجباها گالت مع راسها راه محتاجين وقت باش هو ينسى ماطرا وأنا ننسى ماگال ساعة مبانش ليها هادشي حيت لي بان ليها هو العلاقة بيناتهوم ولات واخدة مجرى أخر والبرود ولى تيحوم عليها وهاد لبعاد تاهو ممساعدهومش وهاد لحالة ملاتها لدرجة أنها بعض لمرات تاطيح فكرة الطلاق فبالها...
أما عند إسلام كان جالس فبيتهوم وجامع يديه مزير عليهوم وعقلو ساهي فهضرتها لي قالت وديك لكلمة ديال نفر منك خلات قلبو يتزير عليه...
تاواحد فينا مالقاها كيف بغاهاا... فلوقت لي كانت أسماء كاتنخصص وتفكر فحياتها لي تقلبات سفاها على علاها وزواجها لي واخد مجرى اخر ماشي كيف تخيلات وماشي كيف لبداية وصدق من قال البدايات عمرها كانت بحال النهايات... كانت رنيم
فبيتها جالسة وعايشة الغرام وهي تدوي مع رؤوف لي تاهو مسالي قبو كل مرة يلوح ليها شي كليمة تخليها مزنگة... السيدة ولات أغلبية وقتها وهي مخشية فييتها تادوي معاه وتامن لخدمة كادير ليزيات وتبقا مجمعة معاه...
رنيم:اييه وشنو درتي مزال؟
رؤوف:اش غاندير فكيتها معاه بلاخسران
رنيم:كنتي قبيح فصغرك
رؤوف:اودي فصغري وكبري تاهوو راه يالاه تكالميت دابا
رنيم:ههه معتارف بيها بعدا
رؤوف:اوا شنو لحق يتگال ونتي عاودي ليا شوية على زبايلك فاش كنتي صغيرة
تبسمات رنيم بمرارة وهي تتفكر طفولتها لي خلات باب الدكريات لي كانت سادة عليهوم يتحلو من جديد..اشمن طفولة غاتعاود وهي من نهار عقلات على راسها عايشة وسط من عائلة مامسوقاش وتاواحد مكيحمر لوجه...لامن مها لاختها لاخوها لاعمهاا باها هو الشخص الوحيد لي كان منور وسطهوم ساعة رزاوه فحياتو...اش غاتقول ليه عمي قت.ل بّا ومي كانت عارفة هي وخويا وسكتو عليها... باغا تدوي على حياتها وصغرها وعائلتها ولكن مع الأسف عائلتها مغاترضاش تدوي عليها ولاگاع تجبدها حيت فعايلها تيحشمو...كل مرة يجبد ليها رؤوف سيرة لعائلة تتحاول ماأمكن أنها تبدل ليه السوجي وتجبد حديث اخر حيت بصح مراضيااش أنها تدوي عليها..
رنيم:رؤوف غايخصني نقطع دابا حيت فايقة بكري
رؤوف:اه اوا صافي سيري تنعسي تال غدا بونوي اكبيدة
قطعات معاه وتكات فبلاصتها كاتنهد لامتى غاتبقا تهرب وهي عارفة بلي غايجي نهار ويعرف فيه بحقيقة عائلتها وديك الساعة شنو غاتكون ردة فعلو...مبغاتش تفكر فالأمر وخلاتها لوقت وديك الساعة يكون خير...
----
حسات رحمة بلحشمة وتزيرات من هضرة نوح لي فهماتها...بدات تاضور عينيها ونطقات بخفوت:واش عارف راسك اولدي اش تتگول؟
نوح:(خاشي يديه فجياب السروال) مادويت تاعرفت راسي اش تانخرج من فمي ايمّا زماان فاش مات نااصر وجيتي عندي طلبتي مني نتزوج بيها جوابي كان واااضح ليك ولكن ماعليش نعاودو مرة خرا هاديك أمانة خوياا وعمري نشوف فيها الشوفة الناقصة نهار لمرحوم وصاني عليها درتها فبالي باش نرد ليها لباال وهادشي لي كنت تاندير هاد لمدة كلهاا وليومنا هادا ومعتابرها فمقام ختي أما داكشي لي نتي باغاه راه عمرو يكوون
رحمة:نتا قلتيها هاديك أمانة لمرحوم واش فيها عيب لاجبتها معانا تفوج شوية راك شايفها مسكينة من ورا خوك عمرها فكرات تزوج وليومنا هادا وهي عايشة وفية ليه
نوح:حيت هي بنت الناس ومجاش ناصر الله يرحمو بغاها وختارها هاكاك
رحمة:عارفة وتانتا خصك تعرف بلي نهار طلبت منك تزوج بيها حيت تانحس بلي هي لي بقات ليا من ولدي مغانساش فرحتو فاش جاا لعندي وعلمني بلي باغي يتزوح...باقي صورتو بين عيني وهو لابس كوستوم وفرحان حيت غايتزوج بلبنت لي بغاا وفاش خوك مات أنا كنت بغيتهاا تبقا جنبي
نوح:ماشي ضروري نتزوج بيها باش تبقا جنبك تقدري ملي تبغيها تمشي تشوفيها وهي تجي عندك كيف تادير دابا ولكن باش تبقاي ديري دوك تصرفات قدام مرتي هادشي لي مغانبغيهش ايمّا وعمري نبغي شي حد ينقص منها سوى كنتي نتي ايمّا سوى كان غيرك
رحمة:(نطقات بحزن) نتا كظلمني انوح
نوح:(بهدوء) عمري نظلمك ايمّا أنا مجيتش ودويت تاشفت بعيني من نهار دخلات رحييل لعائلة ونتي مباغاهش ومع دلك بقيت ساكت ومادويتش ودّخلت حيت لمحبة مكاتجيش بزز (كمش حجبانو)شنو لي خلاك ماتبغيهاش وهي عمرها قللات حياها عليك ؟
رحمة:(قلبات وجهها ونطقات بهدوء) حيت من نهار تزوجتيها ونتا مبدل عليا حاسة بلي مابقيتيش كيف كنتي وحاسة بيها كاتديك مني شوية بشوية
نوح:(حك لحيتو وحرك راسو بهدوء) حياتي كلها وأنا كيفما أنا ديري هادشي فباالك ايمّا و هاديك لي نتي مباغاهاش عمرها قللات منك واخا جريتي عليها من الرياض ماحلاتش فمها ومگالت تاكلمة بقات ساكتة وماتشكاتش ليا عليك باش ماتجبدش الصداع بيني وبينك (قرب جهة مو وكمل) بلعكس عطاتك عدر
رحمة:(بقات تتشوف فيه وعينيها تغرغرو بالدموع) فهمني اولدي نتا وخوتك لي بقيتو ليا وأنا خفت نخسرك
نوح:(عض على شفتو بنابو وقال بمرارة) راه فعايلك ايمّا هوما لي غايخليوك تخسريني أما أنا عمري نگلب عليك حياتي كلها وأنا معاك وماشي ولد لحرام لي نسمح فيكوم نهار مات الحاج خلاكوم فرقبتي وعلى قبلكوم نتوما سمحت فداكشي لي باغي (مسح على وجهو وكمل بهدوء) أنا عمري نسمح فيكوم وديك بنت الناس لي واحلة فروحها راه هي الشمعة لي مضوية لي حياتي ايمّا...
كانت كل شوية تشوف جهة لباب دالغيسطو وترجع شوفتها لنور الهدى لي كانت تاتهضر معاها...ماعرفاتش فين مشى نوح وماماه وبانو ليها تعطلو بزاف...جابو ليهوم لعشا وتحط فوق الطبلة بشكال ونواع غير لامبغيتيش تاكل وهوما باقي مجاو..هزات تلفونها باش تعيط ليه ساعة بانت ليها رحمة داخلة وباين من ملامح وجهها بلي مقلقة... كمشات حجبانها بفضول فاش مبانش ليها نوح ومكانتش باغا تسولها عليه...هزات تلفونها وكحزات لكرسي شوية وقبل ماتنوض تحدرات جهة سيدرا وهمسات ليها:كولي أمامي انا جايا واخا
هزات ليها سيدرا راسها باه وهي ناضت خارجة لبرا ومع وصلات لباب وهي تقشعو واقف حدا الطوموبيل تيكمي...قربات جهتو ونطقات بهدوء:نووح
ضار شاف فيها وفلبلاصة لاح لگارو عافس عليه ونطق مكمش حجبانو:اش مخرجك؟
رحيل:شفتك تعطلتي وقلت نجي نشوف فينك واش مغاتعشاش راه حطو لعشا
نوح:لامافياش غير سيري نتي تعشااي
رحيل:(قربات جهتو وحطات يديها على حنكو وقالت بتساؤل)مالك تتبان ليا ماشي هو هداك واش واقع شي مشكيل
نوح:ماواقع والو بلاماتشطني راسك
رحيل:اوا يالاه خلينا ندخلو وخود شي صلاد باش تشرب دواك راه مخصكش تبقا بالجووع
درعها ودخلو لداخل وهي مشات جلسات بلاصتها وهو شد بلاصتو حدا زين العابدين...خدا ليه صلاد خفيفة غير حيت غايخصو يشرب الدواا...تعشاو ولي غايدحل تاني لطواليط راه مشى ورحيل ضروري ماخصها دخل حيت ولات سونسيبل ومكتقدرش تحبسها مع التقل ولحمالة...
شدو تاني بلايصهوم وتحرك نوح مكمل طريقو وكلهوم غمضو عينيهوم ونعسو من غير زين العابدين لي داير ليزيات ومراقب الطريق بهدوء تاحس بتقلها لي لاحت عليه وضار لقى سيدرا حاطة راسها على دراعو وناعسة...كحز شوية وهي زادت مالت جهتو قلب عينيه جهة الطريق وهو يسمع صوت نوح لي نطق بهدوء:قادها
شاف فالمرايا لقدامية لقى نوح راد معاه لبال...زول يديه وقادها تانعسات على جنبو عاد رجع كيف كان... السفر فالليل كان ليه طعم زوين وداك لكالم والجو لمبرد ماخلاهومش يحسو بتمارة ديال الطريق...فاقت رحيل وهي تاتنهد وتگاد فبلاصتها وشافت فنوح قايلة بصوت مبحوح:وقف بغيت نمشي لطواليط
وقف جنب الطريق مبعد ماطلق السينيال وحل لباب نزل وهي تبعاتو شد فيها وشاف فزين:رد معاك البال
حرك ليه زين العابدين راسو باه وهو تمشى معاها تاوصلو لغابة وفداك الظلام مكيبان ليك والو ورحيل بلاماتشعر تفكرات نهار لغابة وشنو دوزات فيها لحمها بورش عليها... دخل شوية لداخل مبعدين على طوموبيلات وشعل نوح لبيل وبدا كيتأكد من لبلاصة ياكما كاين شي حد تم وفالأرض تاهو ياكما كاينة شي بخوشة...فلى البلاصة كلها عاد شاف فيها:يالاه زيدي
رحيل:(مخسرة سيفتها)كيفاش غانقدر نجلس
زولات حوايجها من لتحت وهو شد ليها فيديها تانزلات غير شوية الجهد لي قدات عليه وقضات حاجتهاا وهي كاضور عينيها فلبلاصة تاسالات وقالت:بغيت كلينيكس
نوح:(جبد بكية من جيبو ومدو ليها)هاكي
مسحات وقدات مسائلها وشافت فيه معيفة:بغيت نغسل يدي
نوح:تال طوموبيل ونعطيك لماا يالاه
رحيل:باقي ماوصلناا
نوح:قربنا شوية
رحيل:عييت بلجلاس اوووف رجلي ضروني
نوح:صبري الفتنة
عطاها غسلات يديها ومسحات بكلينيكس عاد ركبو وكملو الطريق ورحيل بقات فايقة تاتشوف فالطريق تااسمعات نوح قال:غانمشيو لأوطيل تال صباح عاد نمشيو لرياض
رحيل:واخا
وصلو بعد مسافة الطريق طويلة وشد نيشان طريق لوطيل حيت كان باقي لحال ومباغيش يمشي فهاد الوقت ويفيقهوم...فاقت رحمة ونور الهدى ونزلو دايخات بالنعاس..
رحمة:علاش اولدي مامشيتيش لرياض نيشان
نوح:غدا فالصباح ونمشيو
هز سيدرا بين يديه وزين العابدين هبط لڤاليز ودخلو لغسيبسيون حجز نوح تلاتة دلبيوت وعطا لمو بيت هي ونور الهدى وبيتو هو ورحيل وسيدرا وبيت زين العابدين...طلع كل واحد لشومبر ديالو ونوح حط سيدرا فوق لفراش وخلى رحيل تبدل ليها باش ترتاح وهو دخل لحمام جار معاه فاليز ديالو.. بدلات ليها وبدلات تاهي لراسها ببيجامة خفيفة وطلقات عرها وتسطحات فوق النموسية تاترتاح من دوك الساعات دلجلاس لي جلساتهوم...تبان ليها خارج مدوش ولابس حوايجو..
رحيل:بصحة وراحة
نوح:الله يعطيك الصحة الفتنة
رحيل:مكرهتش ندوش ولكن عيييت باغا غير نعس وصاف
نوح:ندوش ليك؟
رحيل:تت مافيااش خلي تال غدا نوح (شاف فيها بتساؤل) ملي خرجتي نتا وخالتي رحمة وحالتك معجبانيش شنو وقع
نوح:مكاين والو غير عياان وصاف
رحيل:(بصراحة) واش نور الهدى مولفة تتجي عندكوم ديماا؟
نوح:(ببرود) بعض لمرات
رحيل:كاتبان ليا خالتي رحمة مولفاها بزاف
نوح:(تسطح جنبها وحط راسو على لوسادة) حيت تتشوفها هي لحاجة لوحيدة لي بقات ليها من لمرحوم
رحيل:(ضارت جنب وبدات تادوز يديها على شعرو وقالت بهدوء) واش هي عمرها فكرات تزوج مور موت خووك؟؟
فضول رحيل جهة نور الهدى كان طبيعي بيما أنها كاتشوفها دايرة بلاصتها وسطهوم ورحمة مهتمة بيها وكانت باغا تزوجها لنوح من لكلام لي سمعاتو منها وزيد هي عاطياها قيمة عكسها هي فعادي تبغي تعرف على حياتها كيفاش دوزاتهاا وزيد شحال من حاجة كاتبان ليها غامضة باغا تعرفهاا...
نوح:(بهدوء جاوبها وهو مغمض عينيه) تت لا
رحيل:(ميقات) زعمة مجاوهاش الخطاب وهي باقي صغيرة
نوح:(حل عينو لي كانو معسلين بالنعاس وقال بتقالة) جيني من لخر الفتنة
رحيل:(هزات كتافها وجاتو نيشان) وهو صارحة سمعت ماماك وهي تتگول بلي كانت باغا تزوجها ليك ولكن رفضتو بزوج بيكوم
نوح:فين سمعتيها؟
رحيل:كانت تتهضر فالتلفون وهادشي لي خلاني نن
سكتات تاضور عينيها وهو كمل شنو بغات تگول:لاكنت باغي نتزوجها راه كون تزوجتها زماان بلاماتبقااي تحمقي راسك بقوة الخوا الخاوي هاديك السيدة خلاها خويا أمانة عندي لا خصاتها شي حاجة نحضرها ليها وصاف
رحيل:(بغيرة واضحة من هضرتها) كنتي تاتهضر معاها فالتلفون؟
نوح:(مسد جبهتو وقال بصوت باين فيه لعيا) مكلف لي يوصل ليها رزقها تال عندها شنو بيني وبينها باش نبقا شاد معاها الجموع فتلفون؟
رحيل:وهي گالت صونات على نمرتك ديك لمرة؟
نوح:صونات حيت تلفات ليها نمرة ديمّا هادا مكان
رحيل: أنا غير سولت وصااف حيت جاتني بيزاغ
نوح:(هز راسو من لمخدة وقال بخشونة) داكشي علاش فاش صونات السيدة مسحتي نمرتها؟
رحيل:(خرجات عينيها وبقصوحية الجبهة)أناا
نوح:(هز حاجبو) لا أنا اش هاد لفعايل ارحييل ؟؟
رحيل:ماعرفتهاش سحاب ليا نمرة غلااط ماقصدتش شي حاجة
نوح:واخا ندير راسي تيقة
رحيل:نتا كون كنتي بلاصتي ولقيتي شي نمرة مصونيا عليا وجاوبتي لقيتي راجل اش غادير مثلا؟؟
نوح:(ضار على جنبو ونطق بصوت مبحوح) ونمرتك أصلا اش غادير عند شي قوااااد؟؟
رحيل:لاكانت نمرة غلط هادشي لي قصدت
نوح:غاتخسري عليه زوج كلمات نمرة غلاط وقطعي ولاسخن عليه راسو ديك الساعة نوريوه لعياااقة شحال تتقام
رحيل:أصلا مكنعطيش نوامري لرجال ولكونطاكط ديالي كلهوم من لفامي
نوح:لاغير عطي نمرتك بااش نصدقو فحاجة خرا (خنزر فيها) داكشي لي بقااا
رحيل:(قالت وهي قاصدة تلف ليه لهضرة) ماقلتيش ليا شنو طرا مور ممات خوك انوح؟
تنهد نوح تنهيدة مسموعة وهاد لحديت لي جبدات ليه غايحل تاني مواجع لي هو مباغيهومش ولكن ماعليش هي من حقها تعرف داكشي علاش هو غايعاود ليها..
رحيل:(ملامح وجهو خلاوها تندم علاش سولاتو وبهدوء قالت) لامبغيتيش تعاود ليا غانتفهم
نوح:(بهدوء وسهو) ملي فقت
من لكومة وعرفتو مات ماتقبلتهااش حاولات ولكن ماقدرتش
رحيل:(حطات راسها على راسو ويديها كيحركو لحيتو وبخفوت قالت) عارفة شعورك عرفتي نفس الشي لي حسيتي بيه حسيتو نهار عرفت بموت جيداء مقدرتش نتيق واخا راه كلشي باين ولكن كان عندي واحد الأمل بسيط تكون باقا عايشة وتجي عندي كيف عادتها (نزلات ليها دمعة من عينيها وجات لنوح فوق خدو) تغدرات تاهي ومشات ضحية
نوح:(كمش حجبانو ومد يديه شد فيديها وقال بخشونة) هادي هي الحياة ماشي گاع الناس لي كانبغيو تيبقاو معانا صاحبتك وناصر كان مكتاب ليهوم يموتو واخاا فراقوهوم كان صعيب على كلشي عمري نسى الحاج الله يرحمو تاهو من نهار مات ليه ولدو لبكر وهو مهدود وطاقتو مشات الحاج لي كان فاش يهضر الخلعة تشدنا كاملين بقوة مكان قاصح معاناا كنا تنحتارموه بزاف مكنقدروش نهزو الراس فحضورو واخا فصغري كنت خارج ليه من الجنب ولكن كنت محتارمو.. (تبسم بمرارة) ولكن هادشي كولو تبدل من نهار مات ناصر والحياة فالرياض تبدلات يمّا دخلات فاكتئاب وبيسان واخا كانت صغيرة كانت فاهمة وعارفة لي كاين تاهي ولات غير ساكتة ومكتجمع مع حد والواليد حاول يصبر ولكن ماقدرش ومور موت ناصر بشهور قليلة طااح طيحة وحدة وهو أصلا عندو مشكيل دلقلب وسبق دوز اوبغاسيون وحالتو كانت سونسيبل... طاح داك الساس لي كان جامعنا وراب (دوز يديه على وجهو مكمش حجبانو وساط النفس مخنوووق) كنت باقي محتاجو باقي عاقل على كلامو لياا وكيفاش وصاني نرد لبااال لخوتي وليمّا حطهوم أمانة فعنقي زير على يدي وگال ليا بلحرف "نتا ولد لحاج شابهني وعارفك غاتكون گد هاد لمسؤولية واخا باقي صغير ولكن راجل نعول عليه " وقبل مايدي مول الأمانة أمانتو طلب مني نغسلو ونكفنو بيدي (هز يديه وقال بمرارة) بهاد اليدين أنا غسلت لواليد وهو كسدة روحها مشات لعند خالقها....
أصعب شعور ممكن يعيشو الإنسان هو يفقد شخص عزيز عليه... يتحرم منو وميعاودش يشوفو حياتو كلهاا... واخا الإنسان كيكمل حياتو وتيتناسى ولكن عمرو ينسى... ضروري مكايجي شي حدت يفكرك ولاغير تكون جالس مع راسك راه لابدما ماتفكر دكرياتك كلها مع داك الشخص... ملي سمعات رحيل هضرتو هزات راسها وهي حالة فمها مشوكية...مجرد الهضرة خلات لحمها يتبورش فمابالك لاكنتي عشتي لحدت كما هو... عينيها تضببو بديك البركة ديال الدموع لي نزلو مسرسبين تاتشوف فيه هو لي جلس محني كيشوف غير فيديه... واخا دازو سنوات على موت باه ولكن داك لحدت باقي عاقل عليه بحال الاغير لبارح داز...سهى فيديه وعقلو سرح بيه لبعيييد...
🔙🔙
ناعس الحاج إسماعيل فوق نموسيتو فجناحو وملامح وجهو شاحبين ودغيا ضعااف وبانت فوجهو... كانت جالسة جنبو رحمة كل مرة طلع ليها تنخصيصة وهي تتشوف فزمانها وحالتو لي تدهورات فمرة وحدة...فالجهة لخرا كان جالس نوح لي شاد يديه مزير عليه تاسمع صوت باه لي نطق بتعب وديك الصرامة لي كانت فصوتو مبقااتش تبخرات:رحمة خلينا وحدنا الله يرضي عليك
ناضت رحمة خرجات من الجناح وهو شاف فولدو مدة...كان نوح مهبط راسو مكيشوفش فيه تاسمع باه قال: هز راسك وشوف فيا اولد لحاج
نفد نوح طلبو باحترام وشاف فيه وعينيه حمرين باين فيه حابس البكية بزز...
ح.إسماعيل:(بصوت خافت) ترزيت فولدي لبكر وموتو غدرني مالقيت ليه جهد وضهري حسيت بيه تهرس.. ربي باغيه عندو ومغانعتارضوش على حكمة سيدي ربي ولكن لفراق صعيب.. عارف بلي تانتا باقي ماصحيتي من موت خوك وباقي مقصح ولكن اولدي خصك تعرف بلي الصبر ولابد منو...فاش كاتكون اولدي عندك مسؤولية تاتسمح فراسك وتتسبق ديك لمسؤولية... من نهار عقلت على راسي وأنا هاز مسؤوليتي واخا كنت زوفري ولكن عمري عولت على بّاا تزوجت ودرت داري تاأنا وهزيت مسؤولية خرا تقل من لي كنت هاز ولكن على قبلكوم صبرت فيما نشوفكوم تانسى تمارة واخا تانقصح معاكوم ولكن هادشي درتو باش طلعو رجااال تعولو على راسكوم حيت أنا مدايمش ودايم الله... هاد لخير لي درت وكبرتو ليكوم نتوما باش تلاقاو الساس علياش تبنيو كيفما لگيتو يانا... الحياة اولدي راه صعيبة وقاصحة وخص لي يعيشها يكون گدها حربي ويعرف بقوالبها... مك وخوتك ورزقك ورزقهوم أمانة عندك نتا لي نقدر نأمنك عليهوم وأنا مرتاح حيت نتا ولد لحاج شابهني وعارفك غاتكون گد هاد لمسؤولية واخا باقي صغير ولكن راجل نعول عليه (طبطب على يديه بتعب وقال بتبسيمة متعبة) فرحت حيت ربي خلاني نشوف حفيدي قبل مايدي مول الأمانة أمانتو (نطق بنبرة وصلات لنوح) حفيد الحاج عارفو غايكبر راجل حيت باه سيد الراجل (كحب بتعب وقال وهو مغمض عينو) وصايتي لخرة ليك اولدي ملي يدي مول الأمانة أمانتو تغسلني نتاا وتكفني بيديك
عض نوح على شفتو بنابو مزير من هضرة باه لي كانت باينة وصيتو لخرة...مباغيش يتقبل أن باه على فراش لموت كيوصيه حدر راسو وباسو فيدو وفكتفو وقال بصوت مبحوح:الله يطول فعمرك الحاج نتا غاتبرا بإدن الله وغاتبقى تاج فوق راسنا ياك نتا گلتيها حفيدك محتاج لجدو..
مجاوبوش باه بقا مغمض عينيه ونوح ركز على صدرو تابان ليه كيتنفس عاد ارتاح خرج وخلاه يرتاح وفبالو هضرة باه كاتردد ومخليا قلبو يحس بيه كيتزير وسط صدرو... نوح مافرقش باه وهو لي مقابلو واخا تارحمة دايرة الواجب والرياض عمر بالعائلة والداخل كتر من الخارج... دازت على اخر هضرة بين نوح وباه تلتيام بالضبط وفنهار الرابع فالليل كان الكل مجموع فجناح الحاج إسماعيل لي كانت حالتو تكفسات على كيف كان...مبقاش تيهضر وتالونو ولى فشكل وهادشي كان واضح اش كيعني واخا راه تاحد مبغا يتقبلو ولكن نوح داخليا عارف باه كيودع.. طالقين القرآن ولبخور ونوح جالس جنب باه ومقبلو على القبلة وتيسمع تخرخيروو.. مجمد قلبو وحاطو فلفريگو وهو تيقطر ليه والحاج لحسن جالس جنبو والسكار تاهو هدو خلاه يفشل مساهلش تحضر لولدك وهو كيموت... هز الحاج إسماعيل صبعو ونوح غير شافو وهو يشد يديه وبتبات قال نوح:أشهد
ح.إسماعيل:(صوتو ممفرزش)اش ش
نوح:أن لاإله إلا الله
كان باه غير تيحرك شفايفو واخا مامفهوماش هضرتو مي كمل الشهادة
نوح:وأن محمد رسول الله
مع كمل نوح تسمعات واحد تخرخيرررة عااالية وعين بااه تتفيكسااو على وجهو ويديه لي كان هاز بشوية تيشهد بيها طاحت فوق النموسية كادل بلب يروح خرجات من كسدتها ومشات عند مولاها...
صوت لغوات ولبكا هو لي كان تيتسمع مور ماعلموهوم بلي الحاج إسماعيل مات...رحمة طاحت غيبات وهزوهاا نيشان لواحد لبيت وعيطو على طبيب والعائلة شي يعيط لشي يعلم والروينة ناضت...كلشي مأتر واخا راه كان باين ولكن ضروري مايتقصحو وضروري من حر لفراق... عيطو لطبيب باش يجي يفحصو ويعطيهوم أوطوغيزاسيون بلي مات موتة طبيعية... ونوح كان هو لي واقف على كلشي...جدو راه طلع ليه السكاار وطاح مو راه مغيبة خوتو عاطينها لبكاا وكلشي مدمر... واخا راه هو أكتر واحد واكل الدقة ولكن خصو يبقا صامد هادي وصيت باه وهو خصو يكون قد لوصاية... كان داخل لجناح باه ومو مور ماخواو الصالة حيت غايغسلوه تم...كانو منعسينو فوق الميسان والسيد لي غايغسلو واقف تيقاد داكشي لي غايحتاج...يديه كانت تترجف وهو كايشوف فباه جسد بلاروح...كان السيد كيوريه شنو يدير وهو عقلوو مرفوع
وعينيه عمرو بالدموع وبلامايشعر تفرگع بلبكاا بحال ولد صغير تيبكي ويشهق ودموع كيتخلطو مع الما دلغسيل...إحساس صعيب يترجم ومشاعر نوح فهاد اللحظة باح بيهوم قدام السيد لي كان مولف هاد الخدمة ولكن مغاينكرش بلي بقا فيه نوح...غسلوه وكفنوه مخلين ليه غير راسو باش يدخلو لعائلة يودعوه...جمع نوح لمطريال باش غسلو باه وحطو فأمان وتحدر طبع بوسة على جبهتو مساخيش بيه...حط راسو على راس باه وبكا تاحس بدموعو نشفو وعينيه رجعو حمرين وديك الزروقية ديالهوم كحالة...دخلو لعائلة يتوادعو معاه قبل مايديوه لروضة ورحمة دخلوها وهي فاشلة شداها سناء وعفاف وهي راه مطيحة راسها وغير شافتو بدات تبكي وتشهق تاسخفات تاني... هزو لحاج إسماعيل وداوه لدار البقاء...لبلاصة لي كلنا غانمشيو ليها... دفنوه فنفس المقبرة لي دفنو فيها ولدو ناصر... كلشي رجع لرياض فين كاينة لجنازة من غير نوح لي جلس جنب قبر باه ساكت... كيفاش غايقدر يخليه ويمشي وهو مولفو فحياتو...كيفاش غايدخل لرياض وهو مكاينش فيه... كيفاش غايكمل حياتو وباه مبقااش ماشي ساهل ومغايحس بيه غير لي مجرب هاد الفقدان ديال الواليدين لي مكيعوضهوم تاحد...نهار يخطيوك عول على راسك عمرك غاتلقى لي يعمر بلاصتهوم واخا يجي ألف خلق تتبقا بلاصتهوم خاوية... ناض بعيااء غادي جهة قبر ناصر زارو عاد كمل طريقو لرياض فين كانت لجنازة ..مشى طل على مو وغير دخل وهي تبان ليه ناعسة فوق النموسية لابسة لبيض وزيف بيض... هز راسو وساط النفس وقرب طمن عليها واخا كانت مغيبة عاد خرج من عندها غادي لجناحو...دوش تاني ولبس عليه جلابة ولاح قبها على راسو تاغطى بيه نص وجهو ونزل لتحت باش يوقف على جنازة بااه ويدير معاه واجبو الأخيرر...
🔜🔜
تيعاود ليها ورحيل حاسة بقلبها غايخرج من بلاصتو بقوة البكاا لي بكاااتو... عينيها تنفخو ولاو بحال شي نفاخة وحمرين... ملي تيوقع ليك شي مشكيل تتقول أنا بوحدي لي طاري ليا هادشي وتشكي وتعدد ولكن فاش تتسمع لمشاكيل وشنو دوز غيرك فتتقول حمد لله على كل حال...كاين لي عايش كفس منك ودوز كفس من داكشي لي دوزتي ولكن الصبر هو لي كيختالف فيه بنادم كاين لي صباار وفاش تتشوفو متتقولش دوز داكشي وكاين لي سونسيبل ودغيا كيتهد...نوح كان من النوع الأول صبااار بلاقياااس والحاجة مكيبقاش يشكي بيها تايسكت ويشدها فداخل ديالو وهادشي لي خلاه كتووم ومكيجيش ويگول اش ضارو... شتي توصل فيه لعضم ويبقا ساكت وضاحك... رحيل عز عليها فهاد لحظة وديك الحرقة باش هضر وعاود ليها خلاتها تقرب جهتو وتعنقو بالجهد حاطة ليه راسو على صدرها وتاهو ضور يديه ودفن راسو فصدرها...
رحيل:(بخفوت) باك الله يرحمو غايكون راضي عليك حيت كنتي قد المسؤولية لي عطااك
بقات تاتمسح على شعرو وهو ماهضرش وهي احترمات سكاتو مدة وهوما على ديك الحال تاقالت رحيل:نوحينوو واش نتا بخير؟
نوح:(بصوت مبحوح)عيييت..
كلمة عيييت مقالهاش تابصح حاس بيها ونطقها بلاتفكير... أما رحيل فمكرهاتش تهز عليه شوية دلهم لي هاز وداكشي لي فقلبو تاهي تشاركو فيه... باستو فراسو ويديها كاتلمس لحيتو ونطقات بحنان: وأناا غاندير لي فجهدي باش نريحك
نوح:(بتعب) غير خليك معايا
رحيل:غانبقا معاك ديما انوحينو
تسمع صوت الأدان دالفجر شي لي خلى نوح يبعد على رحيل ويمسح وجهو بتعب وناض باش يتوضى ويصلي مخليها جالسة هازة ليه لهم... غير هادشي لي عاود خلاها تحس بلمرار باقي باغا تعرف حوايج خرين ولكن مباغاش تزيد تسولو وهي شايفاه ماشي على برجوو...گالت ماعليش باقي يامات الله طويلة وشوية بشوية غانعرف كلشي... خرج مور ماتوضى وفرش صلايا وبدا يصلي وهي تتموت بالنعاس ومع دلك مبعاتش تخليه...صلى وجاا لجهتها مهدود بلعياا الجسدي لي سببو ليه الطريق ولعيا النفسي لي سببو ليه دوك الدكريات لي تفكر... تخشى فبلاصتو لوسط وسيدرا ورحيل جاو من الطرف...قاد سيدرا عاد ضار جهة رحيل وجرها لعندو حاط ليها راسها على صدرو ونطق بهدوء:تباتي فراحة الله
غمضو عينيهوم ونعسو بتعب بعد ليلة طوويلة بدكريات الماااضي...
أصبحنا وأصبح الملك لله سبحان لي يبيتها فشان ويصبحها فشاان... صوت تلفون لي تيصوني خلاه يفيق من ديك النعسة لحلوة لي كاتجي مور ليلة دلعيا... حل عينيه وحس براسو مكبل وبالسيف وسيدرا لايحة عليه رجليها ويديها وراسها ورحيل تاهي لايحة رجلها جابوه لوسط هلكوه... قاد سيدرا بلخف وطول يديه هز تلفونو لي حبسات لابيل كان جدو بات رحمة لي سولو فين وصلو..
نوح:(بصوت مبحوح) ماعليش الحاج ملي نفيق ونتوكض نعاود نعيط ليك بلاماتسنانا لفطور واخا يالاه مع السلامة
قطع ورجع سد عينيه مكمل نعاسو تافاق على خاطرو وفيق رحيل... وبمعاناة طويلة فاقت ليهوم سيدرا وهي مبوقة بالنعاس وجدو راسهوم ونزلو لتحت كانت مو ونور الهدى نزلو سبقو تيتسناو وبقا غير زين العابدين لي عييط ليه باه ونزل عندو ضارب سپور وكاسكيط ركبو جميع ومشاو لكافي فطرو هو لول عااد شدو طريق لريااض بات رحمة ولجو فاس كان دافي ورحيل كانت أول مرة تجي لفاس وعجباتها بشوارعها وجوها وارتاحت فيه... وصلو لرياض ونزلو جميع ومع نوح عيط لجدو علمو لقاوهوم فباب الرياض مستقبلينهوم بالحليب والتمر ومع أول مرة رحيل تمشي عندهوم كبرو بيها وهادشي فرحها وعجبها بزاااف...سلمات على عفاف لي حضنانها تتسول فيها وكملات سلام مع باقي نسا العائلة وجد نوح باست ليه راسو وهو تيرضي عليها...دخلات لخاطرو واخا فيه لهضرة بزاف وكيكريتيكي ولكن قلبو بيض... رحبو بيهوم فالصالة وطبلة عامرة بالخير لي تشهات خاطرك تلقاه تم... كانت سيدرا مخشية فنوح تاتشوف فلوجوه لجديدة ساكتة ونفس الشي عند زين العابدين لي كاان جالس مغوبش مشابعااش نعااس...فطرو تاني وجلسو مجمعين تيسولو بعض على احوالهم
عفاف: علاش ماجيتوش لبارح فاش وصلتو؟
نوح:(بهدوء) وصلنا معطلين ومشينا نيشان لوطيل
عفاف:كون جيتوو لهناا الحاج فاش گال ليا غاتجيو وصيت لبنات يوجدو ليكوم بيوتة ديالكوم ويقادوهوم
رحمة:ماعليش تاهاكا مزيان
عفاف:مرحبا بيك ابنتي رحيل عندنا فاس منورة بوجودك
رحيل:ربي يخليك اخالتي فاس منورة بناسها
عفاف:نور الهدى كيف غادة مع الخدمة فدور التحفيظ
نور الهدى:(جالسة وراسها مهزاهش فالرجال) حمدلله اخالتي الأمور كلها بخير
نوح:(ناض وشاف فجدو) لحاج نريحو فالصالة لخرا حسن
جدو:اييه يالاه اولدي
ناضو مخلينهوم على راحتهوم ورحيل فوهات فولارها وجلسات مجمعة مع عفاف ونسا لي صراحة تگال ضريفات وكبرو بيها...
أما عند نوح وجدو فكان الحديت على سبب لمجية ديالو وطلب منو يعيط لعمو باش يجي هو ومرتوو وبالفعل جات طامو وعمو وتغداو مجموعين الرجال بوحدهوم ونسا بوحدهوم... ونوح طلب من طامو تجي معاه لصالة حيت باغي يدوي معاها هي وراجلها وداكشي لي كان دخلو لصالة بوحدهوم وبقاو جالسين مجمعين...
كان زين العابدين حاس براسو قنطان باغي يخرج مي باه گال ليه يخرجو أونصومبل... كان جالس فالكرسي شاد تلفونو وسيدرا تاتلعب تم مع شي بنيتات صغار من لعائلة تاسمعات صوت الزدحة قوية وضارت بان ليها زين العابدين طاح من الكرسي على جلستو بالجنب وبدا كيڤيبري بسب نوبة الصرع لي جاتو ولمشكيل لعويص أنه كان سارط لسانو...
خارجة من بيتها لابسة كيف العادة ومأنتكة بكسيوة نواغ حد الركبة مع جاكيط خفيفة طويلة فالبااج وبوط باج... لكريشة كانت باينة منفوخة وشعر مطلوق على راحتو... هازة صاكها تاتقلب على سوارت وقبل ماتخرج مشات لكوزينة وشربات لماا عاد خرجات من الدار غادة تتسد الباب... لبسات نضاضرها دالشمش وتمشات جهة الشانطي غادة تتقلب على طاكسي تاسمعات صوتو وهو كيعيط ليها بسميتها مكانتش باغا ضور وكملات طريقها تاحسات بيه جاي تايجري وشدها من دراعها وهي تنترها وضارت شافت فيه بنظرات غاضبة: ماتقيسنييش يديك ماتحطهاش علياا
وليد:(تنهد كيشوف فيها بعيون مشتاقة) نقدرو نهضرو
أسماء:مكاين فاش نهضرو أنا وياك سمعتي سير بحال وعطيني شبر التيساااع
وليد:(حرك راسو بتعب وقال بقلة حيلة) أنا ممرتاحش اأسماء مخنوق وماقادرش نزيد نصبر بلابيك فهميني عفااك وحسي بيا
أسماء:(هزات حجبانها بسخرية)نحس بيك علاه نتا حسيتي بياااا؟ نهار قلت ليك أنا بديت حياة جديدة وبلي نتا غاتخرج ليا على حياتي فكرتي فياا لا بكل أنانية مشيتي درتي لي گال ليك راسك خرجتي ليا على زواجي باش نتا تبقا مرتاح فكرتي بأنانية غير فراسك ومافكرتيش فيا شتي كون كنتي بصح تاتقدرني قد هاكا مكنتيش غاتفكر تأديني ولاتخرج ليا على حياتي وزواجي
وليد:راجلك كون كان بصح كيبغيك مكانش غايخلي حاجة بحال هادي تأتر على علاقتكوم بزوج كوووون كنت أنا بلاصتو واخاا نشوفك بعيني مغانتيقش حيت عارفك عمرك ديريها
أسماء:(زيرات على يديها وقالت بخفوت) صافي اوليد دخلها لراسك وبعد مني مابقيتش حاملة نشوف وجهك ومبقيتش باغا نسمع صوتك كرهتيني فيك بفعايلك لي باقي مابغيتي تحبسهوم صافي باركة عطيني بالتيساااع اوليد لاكنت بصح كنهمك ولاكنت عزيزة عليك ماتخلينيش نعاود نشوف وجهك
خلاتو ومشات شدات طاكسي وهو بقا واقف تيتنهد وهضرتها ماحملش يسمعهاا باغيها ومقادرش ينساها تمنى لو يرجع زمان لور ويصلح شحال من حاجة...أما هي ركبات فطاكسي تتنهد وتسوط هو السباب فداكشي لي هي تتعيشو دابا... كون مدارش ديك الخطوة المتهورة كون راه عايشة بخير وفرحات بحمالتها هي وإسلام..حطات راسها على زاج وهي حاسة بلغمة محتاجة لمن تعاود وتشكي ينصحها ويعاونها تشوف لحاجة كيف خصها تشاف...حاسة براسها مخربقة ومحتاجة لي يقاد تفكيرها..وصلات لدار ونزلات مور ماخلصات الطاكسي وبدات تتصوني فسرسار تاتحل لباب من طرف تانيرت لي تبسمات ليها وقالت:بنتي أسمااء مرحبا
قربات جهتها أسماء عنقاتها ونطقات بصوت باين فيه لعياا: ماما تانيرت أنا محتاجاااك بزااف..
**
فالقامرة كان جالس إسلام مع مو فلكراسى كيتسناو الكار لي غادي لكازا يدخل حيت قررات ترجع لدارها..
إسلام:(نطق بهدوء)كون غير بقيتي مزال ماعرفتش لاش زربانة باغا تمشي؟
مو:الله يجعل البراكة ياوليدي جيت شفتك نتا ومرتك ودابا خاصني نرجع تاني لدار
إسلام:تتكوني تما بوحدك كون بقيتي معايا هنا خير أما تما مكاين حد كل واحد راه مخشي فدارو
مو:لواه اوليدي خوتك ديما يجيو يطلو عليا ويشوفوني وبعض لمرات يباتو گاع
إسلام:هانتي گلتيها بعض لمرات دابا لاطرات شي حاجة فالليل لاقدر الله شكون غايجي ويطل وكل واحد مليوح فدارو
مو:لي مكتب ليك اوليدي راه تشوفو(سكتات تاعيات وماقدراتش تزيد تسكت ولاحتها ليه فوجهو)لخصام لي بينك وبين مرتك اوليدي مباغيش تحلو ؟
إسلام:(بتفاجأ)اشمن خصام الواليدة؟
مو:يحساب ليك راني معرفاش بلي نتا وأسماء مغيرين ومكتهضروش مع بعضياتكوم؟؟
إسلام:مكاين والو من هادشي الواليدة غير جاب ليك الله
مو:سمع اوليدي راني مكنرضعش صبعي وكلشي باين گدام عيني ماعرفتشااي سباب لخصام ولكن اوليدي ماتخليهش يطوال راه كلما طوال كلما لعيشة مرارة ومبقات عندها حلاوة ونتوما يالاه باديين وگايلين بسم الله وهامرتك حاملة تبغي التيلاد لي فكرشها يجي ويلگى لغبينة بين مو وباه
إسلام:(تنهد) غير مناقشين الواليدة ماشي شي حاجة ماديريش فبالك
مو:لمناقشة باينة ولخصام باين راك ولدي وهزيتك فكرشي تسع شهور كبرتك وغير من الشوفة عارفة اش بيك عارفة كلامي مغايعجبكش ولكن هاد إسلام لي تانشوف مع أسماء ماشي هو داك إسلام لي كنت تانشوفو مع ديك لكااافرة بالله
إسلام:(قندش من سيرتها) لواليدة
مو:(قطعاتو) لحق يتگال اوليدي واخا مايعجبكش ولكن لابد منو أنا عارفة بلي ماجرى معاك قصح گلبك وشواه ولكن راه اوليدي الحياة هي هادي ماعمرك تلگى لي يعجبك وتبغيه فيها ولابد مايخصك تجرب مرارتها وتكوى نتا جربتي لمرار نهار عرفتي بمادارتو فيك ونهار مشات ليك بنيتك الله يرحمها ويجعلها طير من لجنة راه تاحنا تكوينا فيها وهادشي مكتاب عليك تعيشو وكملتي حياتك وأنا عارف بلي عمرك نسيتي داك لحر دلفراق وعمرك نسيتي مرارة الشمتة وشكون غاينساها أنا لي حسبتها بنتي وربي شاهد عمري فرگتها على خوتاتك واخا عيبها باين ولكن تانگول ماعليش كبري ياتا دماغك وبنات ليوم ماهوماش حنايا لي كنا صبارين ومنهزوشااي الراس فالعگوزة نحتارموها ونعطيوها قيمة منها من واليدينا ولكن هي عمرها عطات لقيمة لحد..
مو:ملي نجي عندكوم ونشوفها كيفاش دير وتعامل كنگول ماعليش ولدك بغاها وماعليك غير تسكتي وماتكونيش سباب فراقهوم... كنتي ياوليدي تشوف عيبها أو واخا هاكا درتي لما ملين يدوز حيت مباغيشاي تخرب دارك بيديك صبرتي تاربي فضحها قدامك وخلاك تشوف حقيقتها شواتك فكبدتك وربي يخلصها من عندوو على مدارت فيك وفينا... كنت هازة ليك لهم وأنا نشوفك غير ساكت مبقيتيشاي كيف كنتي تبدلتي ياوليدي وقلبك قصاح وهادشي شفتو بعيني.. كنت باغا نشوفك ونتا داير دارك ونتهنى من جهتك كيف تهنيت من جهة خوتك كاملين.. باك الله يرحمو تاهو كان هاز ليك لهم وديما يگول ليا تمنيت نشوف ولدي إسلام بادي حياتو تاني ومسكين مشى وهو هاز همك.. شفت تاعييت وكنت باغا ندوي مع تانيرت على قبل رحيل نخطبها ليك حيت عارفاها بنت الأصل وعارفة بلي غاتلگى معاها راحتك بزوح بيكوم عشتو نفس لمرار ولكن مكتابش والله يسهل عليها مع زمانها ويخلي يامهوم كلها عسل حر... ملي اوليدي گلت ليك على أسماء تزوج بيها حيت تاهي بانت ليا بنت لحلال وحيت عارفاها بنت من وملي گلتها ليك نتا قبلتي وبغيتيها وهادشي لي خلاني نرتاح من جيهتك.. زوجتها ليك ولهم لي كنت هزاه مبقاش ودابا لاجات الموت مرحبا بيها
إسلام:(هز يديها وباسها) الله يطول فعمرك الواليدة ماتگوليش هاكا
مو: سمع اولدي أسماء بنت الناس وصبارة السيدة واخا واحلة فروحها عمرها تشكات ولاگالت ااح وتفششات توجد لماكلة وتجمع الدار وعمرها خلاتني نمد يدي لشي حاجة لي بغيتها تجيبها ليا تال عندي وتسول فيا اش خاصني وماشي بزز عليها دير هادشي ولكن هي بنت الأصل اش باقي اولدي باغي خصك تحمد الله حيت ربي جابها فطريقك وخلاها تكون دواك وتنسيك فمافات (شدات يديه) غاتگول مي مرا كبيرة معرفاش اش تگول ولكن اولدي راه هادشي كولو لمصلاحتك مابغيتش تبقا غافل تايجي نهار تندم على هادشي وندامة ماتفيدك ودير فبالك راه لمرا فاش تتكون حاملة راه مكتنسااش لي جرحها بكلمة ولالي دار معاها لعيب ومرتك راه واخا صابرة راه يجي نهار وصبرها يتبخر وديك الساعة ماتلگى معاها فكاك
إسلام:(تنهد)لهضرة ساهلة الواليدة ولكن لفعل صعيب
مو:ماصعيب والو خص غير دير لحاجة فعقلك وديرها وماتخليش الشيطان يدخل بناتكوم ويوسوس فدماغك لاكنتي اوليدي غادير لحاجة فكر فيها مزيان باش متندمشااي فلخر وتگول كون غير درت راه مانگدوش نرجعو الزمان لور ولكن نگدو نصلحو حوايح فينا قبل مايفوت لفوت راه ماجيت ودويت معاك تاشفت بلي خص ندوي راه ماشي عييب لاحنيتي فمرتك وبينتي ليها هادشي ودير اوليدي فبالك راه أسماء ماتستاهلش وماشي هي السباب بااش تشد دنب مدارتوش ولي السباب فيه ربي بعدها عليك وبين عيبهاا وهاهي تتاخد حقها فالدنيا قبل الآخرة..
ختمات مو كلامها فاش بان ليها لكار دخل وإسلام تنهد وناض معاها معاونها فلبگاح ديالها موصلو ليها وماتفرق عليها تاجلسات فبلاصتها وباس راسها عاد نزل وقف تيشوف فيها ويتسنى لكار تاعمر وتحرك وبانت ليه مشات عاد رجع أدراجو وركب فطوموبيلتو وهو كيفكر فهضرتها لي قالت ليه ولي كانت صحيحة.. هو باقي مابراش من داكشي لي دوز فالماضي والدليل هو مجرد ماطاح فنفس المشكيل تنوى والشك دخل لقلبو وخلاه يفكر فحوايج لي نهايتهوم باينة... باغي ينسى داكشي لي شاف وباغي يتيقها ولكن دماغو كل مرة يزنزن ليه بشي حاجة تخليه يتنوى عاود ويضرب كلشي فزيرو.. والمشكيل لكبير هنا فيه هو لي متعالجش من الماضي وبدا حياة خرا على أساس راه نسى ولكن هو عمرو نسى وعمرو مدار شي خطوة باش ينسى ولايصلح علاقتو مع أسماء لي هو بنفسو معتارف بلي غادة فواحد لمنحى مباغيهش.. مدازش شهور على زواجهوم وهاهوما فأول مشكيل ليهوم ماعرفوش يحلوه حيت مدايرينش جهد باش يحلوه وخصوصا هو... حرك طوموبيل وديمارا راجع لدار وتفكيرو فيها هي أسماء لي كانت فديك الأثناء جالسة مع تانيرت تتعاود ليها وخوات لمزيودة ليها كاملة وماخلات تاحاجة ومغاتنكرش بلي حسات بواحد الراحة فاش هضرات وعودات..
تانيرت:(شدات يديها ونطقات بحنية) سمعي ابنتي هادشي لي نتوما كاتعيشوه هو اختبار لي غايخليكوم تعرفو واش زواجكوم مبني على الصح ولاعلى لفرشي.. إسلام داكشي لي دوز مابراش منو وحنا عارفين بلي واخا كمل حياتو إلا وأنه باقي منساش وهاهو البرهان ملي طرا داكشي معاك نتي وداك لمسخوط هو شك وتعصب ودار هاد لحالة كلها وراه من حقو مانكروش ولكن لغلط ديالو هو مدارش جهد باش ينسى وبزوجكوم غلطتو حيت ماجلستوش أطابل وكل واحد گاال لي حاس بيه ولي متقل عليه.. هو سكت ونتي سكتي وبقيتو معولين على بعضياتكوم شكون غايبدا وهدا غلط.. لاماهضرتوش على قبلكوم على الأقل فكرو فولدكوم ولابنتكوم لي باقي مجاش لدنيا واش باغينو يجي ويلقى باه ومو فخصام يعيش وسط جو متوتر ويكبر معقد شوفي غير ريان لي عاش فداك لجو كيف كاان لدرجة أنه مشى لطريق لادروگ باش يهرب من داكشي لي عاش.. جلسي نتي وياه وهضرو وكل واحد يگول شنو عندو باش تلقاو لحل (تبسمات ليها) غانمشي نشوف داكشي لي دايرة فلفران لايتحرق ونرجع..
مشات تانيرت وأسماء تنهدات وفكرات فهضرتها مزيان وفالاخير هزات تلفونها وكتبات ليه مساج فيه ✉️ أنا جيت لدار عند بابا وغانبقا هنا شي يامات بغيت نرتاح ويمكن هاكا حسن نبعدو شوية وكل واحد ياخد وقتو ويفكر براحتو..
مرض الصرع صعيب بزاف حيت الشخص فاش كاتجيه النوبة يقدر يطيح فأي بلاصة... كان كولو تيڤيبري ولسانو تسرط وسيدرا غير شافتو بدات تتجري جهة الصالة فين كاين نوح وفنفس الوقت كانت رحيل خارجة من الطواليط وراجعة لصالة وهو يبان ليها زين العابدين طايح وعرفاتو جاتو نوبة الصرع حيت سبق وشافتو لمرة لي فاتت...جرات عندو شادة كرشها وجلسات بزز ونعساتو على جنبو وماقال ليها دماغها حلات ليه فمو وغير شافتو سرط لسانو بلاتفكير خشات يديها ففمو وجراتو ليه شاداه وهو باقي تايتڤيبراا مدات ليد لخرا وحطاتها تحت راسو باش تهز عليه الدق... بان ليها نوح جاي تيجري وسيدرا وراه وگاع لعائلة تابعينو وجلس قفازي من الجهة لخرا قدام رحيل لي قالت بصوت مخلوع: ماتحركوش راه لقيتو سارط لسانو
تحدر نوح وشد زين العابدين لي بدات النوبة كاتخف عليه شوية بشوية تابدا يهدا ورحيل ماطلقاتش لسانو بقات شداهاا باش مايعاودش يسرطو ومن زهرو أنها جات فنفس لوقت لي طاح وماتعطلاتش حيت كون تعطلات شوية كون مات.. هز نوح راس زين العابدين وحطو على ركابيه ورحيل بقات شادة ليه لسانو وهو تيغمض عينيه ويحلهوم..
رحيل: زين العابدين تاتسمعني؟؟
غير غمض ليها عينيه بمعنى اه وهي طلقات لسانو باش يتنفس ونوح دوز يديه على شعرو وقال باهتمام وحنية:شوية ابابا دابا ؟
حاس بجنبو لي طاح بيه تايضرو مع طاح بالجهد فاش حس براسو توگض وهو ينوض جلس ونوح تايمسح ليه على ضهرو وعينيه تايتساراو على وجهو تايتأكد بنفسو ياك ماتضرب فاش طااح تابان ليه غاينوض وناض معاه شاد فيه مطلعو لبيتو لي موجدين ليه...دخلو وجلسو فوق النموسية وجلس نوح قفازي باغي يزول ليه السبرديلة ساعة زين العابدين جر رجلو ونطق مكمش حجبانو:لا أنا غانحيدهوم
نوح:(خنزر فيه) هنيناا
زولهوم ليه مع تقاشر وعاونو تاتسطح فوق النموسية وجلس جنبو: شوية دابا كاضرك شي بلاصة
زين العابدين:لا أنا بخير
نوح:نعس وارتااح شوية باش لعشية نخرجو ونمشيو نتساراو شوية ففاس ونتعشاو برا واخا احفيد الحاج
تحدر باسو فجبهتو وطبطب على حنكو بحال لاصرفقو عاد ناض وهو تيتنفس بالجهد وتفكر هضرة رحيل فاش قالت ليه سرط لسانو قلبو حس بيه ضرو.. هو عارف ولدو تاتجيه النوبة دالصرع ولكن عمرو سرط لسانو.. مجرد مانفكرها حس براسو فشل وبهدوء جلس فالدرجة وهو كيسوط النفس مباغيش يتخيل كون تعطلت رحيل شوية اش كان غايطرا.. هو عارف بلي مغايبقاش ديما حاضي ولدو فين مشى وفين جاا راه أصلا مدة وزين العابدين ساكن برا وتيقرا برا وهو بعض لمرات تايمشي عندو يدوز معاها أيام ويرجع تاني لهنا حيت الخدمة ولمسؤولية لي تابعاه كاتلزمو أنه يكون حاضر هنا... وفنفس الوقت عارف ولدو بحالو مكيبغيش يكون مقيد بحاجة وحدة وتيبغي يعيش حياتو يسافر يمشي فيما بغاا مايحكموش شي حد ولدو وعارف لكراكتير ديالو داكشي علاش هو مكيبقاش غير تابعو مخلي ليه حوريتو وموريه الصح من الغلط... مخليه يعيش سنو مامقيدوش بقيود لي هو تقيد فيهوم فسن صغيرة.. مخليه يختار اش باغي يقرا وشنو باغي يدير وهو فقط مساندو وعمرو فكر يبزز عليه شي حاجة... حك لحيتو وناض بهدوء نازل لتحت وعينو تيقلبو عليها ساعة مبانتش ليه.. قرب جهة واحد لبرهوش تما كان تيلعب وجرو من يدو تايشوف فيه ويستعقل ولد من تبسم ليه بحنية ونطق:شنو سميتك
نطق الدري لي كان فعمرو حداش لعام:إياد
نوح:(خربق ليه شعرو)إيااد سير لصالة لي فيها النسا وكلم ليا رحييل
إياد:واش هاديك لمرا لي زوينة وعينيها خضرين؟
نوح:(هز حاجبو) همم سير كلمها ابابا سيير (مشى داك لبرهوش ونوح حرك راسو بلاحول وتمتم معاحبو حال) بقاو ليا غير لبراهش يتغزلو ليا فيها..
بانت ليه خرجات من الصالة وغير قربات جهتو قالت بتساؤل:كيبقا زين العابدين؟
نوح:اجي معايا
شدها من دراعها وتمشى بيها بعيد تاوصلو تحت الدروج جاو مدرقين وحط يديه على لحيط مكاليهاا وقال بهدوء:هو بخير دابا
رحيل:(تنهدات) خلعني عليه بزاف فاش لقيتو سارط لسانو
نوح:(تحدر باسها فحنكها وهمس ليها جنب ودنيها بخفوت خشن) شنو كنت ندير أنا بلابيك
رحيل:(ضورات يديها على عنقو ونطقات تاهي بخفوت) درت غير الواجب ديالي وزايدون كون كنتي بلاصتي وشفتي سيدرا لاقدر الله فشي موقف متأكدة غاتعتقها وأنا هادشي لي درت
مجاوبهاش عنقها بالجهد لدرجة حسات بعظامها كيضروها وكرشها تاهي مع زير عليها ولكن ماهضراتش وخلاتو على راحتو وبدلاتو التعنيقة...
طالعة البخوشة فالدروج بلاحس عينيها المبطنين كيضور فبلاصتهوم تاتقلب عليه وماعرفات فين غايكون.. حلات گاع لبيوت لي كانو فداك لكولوار تاوصلات لبيتو وبان ليها مسطح فوق النموسية وهي دخل تتجري مور ماسدات لباب تاقربات جهة النموسية وهي تحدر زولات صباطها وطلعات لعندو من الجهة لخرا وبدات تاتحبو بركيباتها تاوصلات لعندو وهي تجبد تلفونو لي كان طاح ليه وهزاتو وحطاتو جنب وبلامادير لحس مدات يديها وبدات تادوزها على حنكو... مكانش ناعس وغير مغمض عينيه وحاس بلمساتها لي كيف الريشة على حنكو وماتحركش وبقا على نفس الحال مدة وهي تاتقيس حناكو تانزلات طبعات قبلة بريئة على حنكو ونطقات بصوت خافت حلو: الله يشافيك ازينبيدين ديالي..
من طبع سيدرا أنها اجتماعية ودغيا كادير بلاصتها وسط الناس بهضرتها الحلوة وبدوك الأسئلة ديالها لي ديما تتسولهوم ومكترصاش وتهنى تاتعرف كلشي... وحنينة بزاف فاش كايمرض
محمد طه ولاريان ولاأي واحد من الناس لي عزازين عليها تتبقا ديما معاه وترد ليه لبال كيف ولفو ليها فاش كانت صغيرة...تاهي الامرضات تاتلقى كلشي راد ليها لبال ويسولها اش بغات ويفششوها دايرين ليها لخاطر وتاهي دايرة ليهوم داك لخاطر... وزين العابدين تاتعتابرو بحال محمد طه وريان واخا مكيعطيهاش وجه ومكيحاشيهاش ليها وديما مجري عليها ماشي عكس لخرين لي مفششينها ومكيخسروش ليها لخاطر هو لا كيدير لعكس واخا هاكاك عزيز عليها وتيعجبها تبقا تخشى فيه وتشد معاه لعناد وتقرب منو باغاه حيت باغاه يعاملها بحال كلشي... واخا بعض لمرات تيعصبها وتيبقى فيها لحال حيت مكيديرش ليها داكشي لي بغات ولكن عزيز عليها...نطقات بهمستها وهي باقي تتقيس حنكو وهمستها راه وصلات لمسامعو ورغم دلك ماتحركش ولاحل عينيه حيت عارف لاحل عينيه غاتبقا تدوي تاني وتفرع ليه راسو وهو باغيها تمشي... بقات معاه شوية قبل ماتنزل من بلاصتها ولبسات سبيبطاتها وخرجات مخلياه على راحتو...مجرد ماسمع لباب تحل وهو يحل عينو وشاف فالبلاصة لي كانت جالسة فيها وبان ليه تلفونو عرفها غاتكون هي لي جابتو ليه... ضار على جنبو التاني باش ينعس وهو يحس بالضو ضربو فاش حرك دراعو لي طاح بيها... عض على شفتو بنابو وقاد لغطاا عليه ونعس باش يرتااح شوية حيت فلعشية غايخرجو كيف قال ليه باه...
طلعات رحيل لبيت لي موجدين ليها وزولات عليها فولارها تاتهوى وهزات تلفونها سيفطات لمها مساج علماتها بلجديد ومشات لحمام توضات ولبسات عليها الإسدال وصلات بلجلاس... بزز باش كملات وجلسات تاترتاح وماحسات براسها تاغمضات عينيها ونعسات...
فلتحت رجع نوح لصالة فين كان جدو وخوه وطامو وجلس جنبهوم وجدو شاف فيه وقال:كيبقا زين العابدين شوية؟
نوح:شوية الحاج (شاف فطامو ونطق بخشونة)فين خليناها الحاجة؟
طامو:(ربعات يديها ونطقات بهدوء) مانلقاش حسن منك نتا اولد لحاج تگول ليا فين بقينا
نوح:(جمع يديه قدامو وقال بهدوء وتبات) ماگلتي عييب الحاجة نتي عارفة گلستنا هادي سبابها الخصام لي بينك وبين ولدك اليازيد
طامو:(نطقات منفخة وقالبة وجهها) أنا ماعندي تاولد بديك السيمة
نوح:(هز حاجبو) وعلااش ناكرة ولدك ؟ اش دار فملك الله باش نتي تنكريه وتبرااايه
طامو:(شافت فيه وقالت بحرقة) كاين شي ولد يتزوح بلا رضاة مو؟
نوح:(ببرود) وكاينة شي أم ترفض لولدها لحلال؟؟ ولدك نهار نوى يتزوج جاا عندك وگالها ليك ونتي اش درتي قصحتي راسك الحاجة ولحتي ليه لعصا فالرويضة ؟ (تحدر لقدام وكمش حجبانو مكمل بصوت حرش قاصح) ولدك جاا وكبر بيك وداار لي عليه علاش ماسمعتيش ليه وعلاش رفضتيها ليه ياك هو اختارهاا علاش نتي مبغيتيهاش ليه؟؟
طامو:(حسات براسها تزمتات قالت كاتبرگم) حيت هي سبابو فداك لعداب لي دوز
نوح:(باقي عاقد لمية وحداش) تت داكشي لي دوزوه راه دوزوه بزوج بيهوم ماشي غير ولدك لي كلى الدق راه تاديك بنت الناس كلاتو وبقات ساكتة وبلامانجبدو مافات وكلنا عارفين شكون السباب وشكوون لي خلى داك الزواج يفشل ويسالي ولكن ماشي هادي نيتنا فهاد الجلسة حيت داكشي فات السيد ندم وباغي يرجع مرتو وتاهي بغات ترجع معاه فين لمشكيل
طامو:(فمها تياكلها لاحتها فوجهو) لمشكيل فخالتك ماتصلاحش لولدي
ح.الوزاني:اييه ومال بنتي غير هي لي تهز الدقة
نوح:(بدا يطلع ليه الخز فالراس نطق بصوت حرش) هو لقاها تصلاح ليه وبغاهاا ياك هو لي تزوج بيها إوا يعومو بحرهوم نتي علااش مباغاهاش واش هي عمرها أدااتك عمرها قللات حياها عليك راه ماشي حيت هي خت يمّا راه نجي منها أنا راه نجي من لحق بزوج غلطو ودوزو سنين وهوما عايشين معدبين ونهار نواو يرجعو نتي گلتي ليهوم لا باغا ولدك يدير لحرااام ولا يعاود يتغرب وعمرك تشوفي كمارتو باش ترتاااحي لاجيت ليوم باش ندوي معاك حيت ولدك مباغيش هاد لخصام يطول بينو وبين مو أما لاكنتي تتسنايه يتفارق مع ديك السيدة راه عمرها تكوون ليك ونتي لي غاتخسري ولدك وديك الساعة مغاتفيدك الندامة الحاجة...
نزل من الطاكسي وهو هاز لبوكي دلورد فالبيض وفيه وريدة حمرا فلوسط وقرب جهة باب الدار حلو ودخل وعينو تيقلبو على مو تبانت ليه جالسة فالسيجور عاطياه بالضهر خدامة فالبيسي ودايرة نضيضرات دالشوف وخدامة ترونكيل...تنهد وهو كيفكر بلي من نهار ساقت خبار بلي خطب وهي مخاصمة معاه ومكدويش معاه وهادشي خلاه يتقلق ويبقا فيه لحال حيت قصدو مكانش كيف هي فهمات... واخا راه من حقها تقلق وهي تاتشوف ولدها باغي يخطب وهي آخر من يعلم... تقليقتها قاصحة عليه وماصبرش عليها...قرب جهتها وعنقها من لور جايب داك لبوكي دلورد قدامها وقال بهدوء:باقي الزين ديالي غضبااان ؟
معنقها بالجهد وممخليش ليها فين تحرك هي لي كانت تاتشوف فداك لورد وهضرتو خلاتها تنطق ببرود:زعمة راه كيهمك لاكنت غضبانة ولا لا
ريان:(باسها فراسها ونطق بنفس النبرة) معلوم كاتهميني نتي معرفاش مقامك عندي االواليدة
تانيرت:داكشي علاش مشيتي تخطب بلاماتشاور حيد علياا
ريان:(زير عليها كتر ونطق بتبرير) مشيت غير دويت مع ولد لحاج وصاف كنت باغي غير نشوف هو اش غايگول وديك الساعة كنت غانجي نعلمك
تانيرت:(زولات نضاضرها وقالت بتأنيب) مال باك مشيتي علمتيه وجيتي تال عندي وسكتي هااا واش أنا برانية عليك؟؟
ريان:(تايحلف من نيتو) والله ماقصدت هادشي أنا هضرة مع لواليد غير حيت قلت نشوف رأيو
تانيرت:ورأي أنا ماشي مهم
ريان:(جر كرسي وجلس جنبها وشد يديها) مهم بزاف وكنت باغي نهضر معاك فهاد لموضوع ونشوف رأيك ونيت نعاود ليك واش فنظارك أنا غانتزوج بلاخباارك ورضااك ؟؟ أنا علاش مشيت سبقت ودويت مع ولد لحاج وماجيتش عندك حيت كنت خايف نتعطل ونصدق مزرف
تانيرت:(كمشات حجبانها)اشمن تزريفة؟
ريان:هانتي سمعيني أنا وبيسان كنا تانهضرو مع بعضياتنا تقدري تگولي تعارف عجباتني لبنت وبغيتها ورتاحيت ليها ولكن وقعو بيناتنا مشاكيل وخلاونا نتفارقو
تانيرت:اش وقع؟
ريان:سوء تفاهم بيني وبينها وعضبت عليها وقررت نتفارقو وهي حاولات طلب السماحة ولكن مابغيتش حيت حسيت بلي لفراق هو لحل ملي كنت تانطلب منها ندوي مع خوها كانت تترفض وأنا گلت راه مبغاتنيش ولكن هي كانت خايفة حيت سبق وشافت خالتها تفارقات مع راجلها ليازيد وحيت هوما من العائلة خافت لامتفاهمناش يطرا بحال ماطرا ليهوم عقلها ومگال ليها وانا تعصبت منها وصافي قررت نرجع لور ونهار درت كسيدة بلموطور شفتها وهي لي وقفات معايا تادوزت (كمش حجبانو باين فيه تعصب) شفت واحد خونا طبيب تيدوي معاها وأنا تعصبت وخفت صراحة بقيت صابر صابر ولكن صبري تبخر حيت خفت لانبقا مربع يدي ويطيرو ليا بيهاا
تانيرت:(بقات تاتسمع ليه وقالت بهدوء) وهي واش باغاك بعدا راه تصاحيب اولدي ماشي هو زواج باش تكون فبالك تصاحيب ولحرام كيزياان فعين لواحد ولكن زواج حاجة خرا مسؤولية أنا عارفة باك غايكون گايل ليك هادشي ولكن ماعليش نعاودها ليك واش نتا غاتقد تهز لمسؤولية؟ شوف غير تخاصيمة بناتكوم وخلاتك ترجع لور نهار يوقع معاها مشكيل واش غاترجع لور وتخليها تعوم بحرها لا.. نهار تزوجت باك راه كان صغرر منكوم كاملين وتاأنا كنت صغيرة ولكن كنا عارفين اش تابعنا وكنا گدها وكون لمشكيل لي طرا كون عمرنا تفارقنا ولكن لمكتاب ماعندنا ليه هروب ولكن هادشي مكيعنيش أي مشكيل طرا ليك تگول عليه مكتاب وتربع يدك تت خصك دير لي عليك بزوج بيكوم تهزو المسؤولية وتقل عارفة عندك خيرك وبخدمتك وتاهي راه مشاء الله عندها خيرها ولكن عمرك تنسى بلي نتاا تتبقا مسؤول عليها لبنت راه من صغرها وهي تتكون فدار باه وكيكون هو لمسؤول عليها تانهار تزوج وكيجي الراجل بلاصة الأب ويدير واجبو معاهاا.. وبلامانهضرو بلي نتا غاتزوج بخت راجل ختك يعني عييبكوم خص يكون بناتكوم ومايخرجش لبرا وماتخلي حد يعرف اش كاين بينكوم
ريان:(حرك راسو باه) عارف هادشي وتيقيني أنا غاندير جهدي وكلامك وكلام الواليد كولو غانديرو بين عيني
(باس يديها)رضيتي عليا ازين ديالي
تانيرت:(ميقات وعيراتو بالشلحة)والله او الديك إيغداغ تسكرت زوند ختااد أوراسااار سرك ساولغ "والله لوالديك ايلا عاودتي درتي بحاال هاد لفعلة عمري نعاود ندوي معاك"
ريان:هااء علاش لمعيور دابا بالشلحة وأنا معارفش اش گلتي
تانيرت:اوا سير تعلمها ودير فيك النفس سيدرا قد صبع رجليك الصغير عارفة تدوي بيها هي بوحدها لي تتفهمني الضرة توحشتها
ريان:(ضحك)هاديك لبخوشة راه عارفة النملة ملين تتبول..
الراحة لي حس بيها ريان فاش تانيرت سمحات ليه وهضرات معاه ماليها مثيل... كان هاز ليها لهم هاد لمدة كلها فاش غضبات ومكانش مرتاح ولكن دابا غايقدر ينعس مرتاح ويفكر فعلاقتو مع بيسان وردة فعلها ملي تعرف وهادشي لي خلاه يحس بتخوف ولكن مخلاش داك لخوف يسيطر عليه وقرر يخلي كلشي لوقت...ناض طالع لفوق وفطريقو تلاقى أسماء نازلة مور مابدلات حويجاتهاا.. حاسة بالراحة مور ماقررات تعطي مجال لعلاقتها مع إسلام وتاهو ماعاندش فاش طلبات منو يبعدو أو وافقها القرار وهادشي لصالحهوم بزوج... البعاد غايخليهوم يفكرو مزيان فمصلحة علاقتهوم وياخدو لقرار المناسب ليهوم بزوج...
ريان:اش تاديري نتي هنا؟
اسماء:(بسخرية)ياكما جالسة على قلبك؟
ريان:تت غير جاتني بيزاغ نشوفك هنا ؟
أسماء:جيت نبدل لجو عندكوم شي يامات ونيت نرتاح
ريان:على هاد لحساب نتي وإسلام باقي ماتصالحتوش
أسماء:باقي الحالة كيف هي ولي بان ليا أنها عمرها تقاد
ريان:ماتگوليش هاكا متأكد بلي غاتصالحو من بعد أصلا هو غير محتاج وقت بااش يسرط ماوقع
أسماء:اودي أنا لي محتاجة وقت ماشي هو لمهم سمعت شي خبيراات گالو ليا درتي عقلك ونويتي تزوج
ريان:اه باغي ندير النكااح
أسماء:(ضحكات)ههههه الله يمسخك صراحة بقات فياا بيسان من دابا
ريان:سيري تقوودي راه سعداتها بياا حيت غانكون عريسها
أسماء:التقة فالنفس ونتا سير خليني نزل نقصي جبتي ليا الجوع بهضرتك لخاوية
ريان:سيري غاتبقااي تاكلي تاتولي گد لبوطة واش جاا مخرجك من الباب شوفي غير رحيل غادة وتاتنفخ
أسماء:اوا اجي نتا هز شنو هازين حنا وديك الساعة دوي (نزلات تاتبرگم) سحاب ليهوم لحمالة ساهلة غير اجي وهزي روح فكرشك..
***
الجو ففاس زوين وخصوصا الليل...كان مقرر نوح يخرجو يتساراو شوية ويتعشاو برا غير بربعة بيهوم... وجدات رحيل راسها ولبسات تاسيدرا وبقاو جالسين كيتسناو فزين العابدين لي كان واقف فلحمام كيشوف فدراعو لي كانت حمرة ولوسط ديالها شوية زرق...لبس عليه قبيتو وخرج لقا نوح واقف فوسط لبيت لابس عليه وريحة برفانو الرجولية مالية المكان...قرب عندو وحط يديه فدراعو وقال بهدوء:شوية دابا؟
زين العابدين:اه
نوح:لاكنتي واجد خلينا نمشيو
خرجو من لبيت ودازو لعند رحيل وخرجو كاملين مور ماعلمهوم بلي مغايتعشاوش هنا... شادين الطريق فجو زوين ورحيل كل مرة تسول نوح على شي بلاصة ولاتوقف وتصور هي وسيدرا ونوح عاطيها لخاطر أما زين العابدين داير يديه فجياب القبية وغير ساكت... وبحكم رحيل مقادراش تمشى بزاف دغيا مشاو لواحد لغيسطو باش يتعشاو...
فغيسطو كالم وعائلي كانو جالسين مجموعين فجو زوين وحميمي مع بعض...رحيل قبالة نوح وفجنبها سيدرا لي كانت جالسة قبالة زين العابدين... حاطين ليهوم الماكلة تاطبلة عماارت ومالقاو فين يزيدو..
رحيل:(كاتبنن) امم هادشي زوين بزاف
سيدرا:مامي بغيت لباط
نوح:(شاف فيها بهدوء) لباط كليتيها قبيلة ابابا كولي حاجة خرا
سيدرا:(شافت فزين العابدين لي حادر راسو تياكل بهدوء ماتسمعيش صوتو وقالت) وزينبيدين دوقني؟
هز راسو وشاف فيها وهو هاز حجبانو بزوج...داكشي لي كياكل هو لي كاين فديك الطبلة ولكن هي عجباتها ماكلتو هوو... رجع نزل راسو كياكل وهي جرات رحيل وأشارت بيديها لطبسيل زين العابدين:مامي بغيت هاداك
رحيل:كولي من طبسيلك وخلي زين ياكل ماكلتو وباركة من لبسالات
غضبات سيدرا وبدات تتكمل عشاها بنفخة تاصونى تلفون نوح ومع كان فوق الطبلة بانت نمرة عتمان شي لي خلاه يغمز رحيل وناض باش يدوي وتاهي كملات ماكلتها وبدات تاتدوي مع سيدرا لي منفخة ومعاجبها حال...
فلكولوار لي كيدي لحمامات كان واقف نوح ومتكي على لحيط بكتفو وبصوت هادئ قال:اش تم اعتمان؟
عتمان:كيف وصلتو مزيان؟
نوح:حمدلله
عتمان:بااغي ندوي معاك ياكما غانبرزطك
نوح:لا غير دوي؟؟
عتمان:فالحقيقة كنت باغي ندوي معاك قبل ماتسافر ولكن مجابتهاش لوجيبة مي ماعليش تادابا مزيان
نوح:اش كاين اعتمان؟
عتمان:عفا عليا الله ونويت نتزوج وندير تاأنا داري وعائلتي
نوح:(بتبسيمة خفيفة) الله يجعل كلشي مبارك ومسعود(بمزاح) معيط ليا باش تعرضني
عتمان:(ضحك)الله ياودي راه نتا من مالين الدار ماتحتاجش عراضة فالحقيقة عيط ليك حيت العروسة من جيهتك
نوح:(كمش حجبانو بتساؤل)من جيهتي شكون؟
عتمان:الدرية لي خدامة فلمحال دلمدام ديالك...
دازو يوماين ورحيل عجبها الجو ديال فااس ولقات راحتها خصوصا عفاف مكبرة بيها وكل مرة مطيبة ليها شي شهيوات وشادة ليها لخاطر تسول فيها وأغلبية وقتها مدوزاها معاها... تمنات رحيل كون كانت عفاف هي مت نوح وعگوزتها حيت ضريفة بزااف ماشي بحال رحمة لي تتعاملها عادي وديك لعلاقة لي كانت هي باغا تكون بينها وبين عگوزتها مكاينااش نهائيا... أما نور الهدى كانت بحال الأمانة هضرتها قليلة ولاسولتيها تجاوبك قد السؤال مافيهاش قوة الهضرة وداخلة سوق راسها...
فالصالة الكبيرة فالرياض كانو جالسات النسا ومنهوم رحمة وعفاف ورحيل ونور الهدى وعيالات خوت رحمة وشي بنات من لعائلة...شادين الهضرة وعاطينها لضحك وتكركير والصواني دأتاي ولحلوة مع لمكسرات محطوطين فوق الطبلة ولكيكات شكال ونواع...
عفاف:(شافت فرحمة) كاين شي سفوف شي حلوى دالسبوع شي توجاد
رحمة:(بهدوء) هاد الساعة مكاين والو وزايدون الحلوى راه ايتكلف بيه تريتور
نطقات وحدة من عيالات خوتها: حلاوة السبوع وزيادة فهاد التوجاد ايييه عقلتو علي يامات زمان فاش كناا تانوجدو السفوف غربل هادي طحن هادي حمر هادي هز هنا حط لهيه ماشي بحال دابا ولى كولشي تيعول على تريتور
عفاف:واهي صراحة هادشي بحلاوتو ولكن راه فيه تمااارة ولكن فاش تيكون لعوين تيدوز دغيا
م:اوا ابنتي شحاال باقي ليك لولادة؟
رحيل:قربت نكمل السبع شهور وندخل فالتامن
عفاف:اوا باقي ليك شوية وتزيدي تقلي..
م:غاتولدي سيزاغيان؟
رحيل:والله ماعرفت طبيبة باقي مگالت ليا والو راك عارفة باقي لحال تاغاندخل لشهري وديك الساعة يحن مولانا
طامو:(لاحت لهضرة) دابا تولدي وتكبريهوم وتجي مرا تديهوم ليك
عفاف:اوا هادي هي سنة الحياة واش غايبقاو ولادك ديما حداك ياك كيفما كاتبغي تزوجي بناتك غاتبغي تاولادك يتزوجو
م:لاتديشاي عليها اعفاف راه طامو غير لحرگة لي خلاتها دوي
طامو:(ميقات فيها) ومالي كدبت گلت غير لي كاين ونتي زعمة راه مجربة وعارفة لي كاين ماشي سيمحمد جاب ليك يهووودية كبر منو بعشرين عام باغي يتزوج بيها باش دير ليه وراق وتديه لبراا
م:(مارضااتش وجهها كولو حمر) ولدي غادي بكونطراا اشمن مرا تانتي
طامو:ديريها غازوينة لخبار راه تتوصل
كانت رحيل غير تتبرق عينيها وهي تاتشوف كانو هاضرين عادي تاولاو تايحشيو لهضرة لبعضياتهوم...ضربات طم وبقات غير ساكتة بحالها بحال لبقية من غير عفاف لي هزات حاجبها فيهوم وقالت بصرامة:استغفروو مولاكووم واش هاد لكلام يتگال
م:(قلبات وجهها) صدق اطامو گلبك كحل
طامو:اوا شكون جبد لعيب لول
عفاف:لاحول ولاقوة إلا بالله بزوجكوم درتو لعيب وزايدون اش فيها ولدها لاباغي يتزوج الله يسهل عليه وتانتي اخالتي طامو نسااي شوية وديري لما ملين يدوز
طامو:(كانت على سبة مع جبدو لموضوع خوات عليهوم قلبها تشكي وتعدد تقول ميت ليها الراجل) محاسينشااي بياا وبلحرگة لي فگلبي لوكان ولدك لي دارها تقبلي عليها
عفاف:(دوات بلحق) ولدي لاجا عندي وگال ليا باغي نتزوج نوافق ليه وندعي معاه ويعوم بحرو معاهاا هانتي فلخر خسرتي ولدك
سكتو كاملين وطامو تنخصيصة تاطلع وتنزل ليهاا نفس الهضرة گال ليها ولد لحاج ونفس لكلام گالت تاعفاف... تفرتك المجمع وكل واحد قصد شغالو ورحيل طلعات لبيت ترتاح... كان نوح خارج هو وسيدرا وزين العابدين وهي مامشاتش معاهوم حيت كانت عيانة شوية ومقداش على لمشي بزاف داكشي باش بقات هي فالريااض...
كانت متكية ففراشها ومدوزة ليه لخط كاتسنى يجاوبها تاسمعات صوتو لي نطق بخشونة:الفتنة ديالي
رحيل:فينكوم تعطلتو بزاف
نوح:هاحنا جاايين ساليتو گلستكوم؟
رحيل:همم أنا متكية فلبيت وگلت نشوف فينكوم
نوح:تشهيتي شي حاجة نجيبها ليك؟
رحيل:لا غير اجي نتا؟؟
نوح:(بصوت خافت كالفحيح) وجدي راسك ليوم بليل غانتحركو من تم
رحيل:هاء واش صافي غانرجعو لمراكش؟؟
نوح:تت مزال ملي نجي ونعلمك فين غانمشيو
رحيل:(تحمسات وقالت بدلع) واا لمح لياا انوحينووو
نوح:(عض على شفتو بنابو وقال بصوت تقيل) على هاد لقبال خصك تعطيني حلاوتي باش نگول ليك؟؟
رحيل:(ضحكات بخجل) هااء نعطيك بوسة؟
نوح:(بختورية) لاكاين ماكتر مرحبا
رحيل:واخا اسيدي كون على خاطر خاطرك فين غاديين؟
نوح:إفراان
رحيل:(لمعو عينيها) الله فخبارك كنت باغا نمشي ليها
قبل ماتكمل هضرتها سمعات صوت أنتوي نطق بنبرة محلونة:نوووح
حجبان رحيل تكمشو فاش سمعات صوت ديك خيتي لي ماعرفاتها شكوون وزيد عليها معيطة ليه بسميتو يعني تتعرفو...شعور الغيرة لي كاانت تاتحس بيه رحيل فديك اللحظة شهور صعيب يتفسر...داتها كلها تتغلي والعافية شاعلة فيها...ولي زاد خلاها تعصب وتنيرڤى هو فاش طفى ليها تلفون تما صافي السيدة شعلات...ناضت بزز شادة كرشها من لتحت ومشات خدات شرجورها برونشاتو فالضو ودارت تلفون وبقات واقفة تتسناه يشعل وهي باغا تموت بلفقصة لي شداتها... شكون هادي؟ وفين تتعرفو ؟ وفين شافها؟ وهو فين كاين دابا؟ تسرسبو عليها هاد الأسئلة مخلين عقلها باغي يتسوطى...مع بان ليها لباتري فيه واحد فلمية شعلاتو وماتسنااتش والحريگة نايضة فيها...دوزات ليه لخط مجاوبهااش وهنا كملات الباااهية ورحيل تعصباات دوزات تاني لخط وهي تاتعض فشفايفهاا تادماتهوم بلفقصة شوية سمعات لاصونغي دتلفونو ولباب تحل وهي ضور بزربة فاش شافتو لاحت تلفون ممسوقاش ليه ومقطعاتش لابيل وقربات جهتو بغيرة واضحة من معالم وجهها لي كانو متجهمين وقالت باندفاع:شكوووون هاديك لي عيطااات ليك وعلاش مكنتيش تتجاوبني؟؟
نوح:(هز فيها حاجبو ونطق بجدية) صوتك مايعلاااش ارحييل (بتحدير) اخر مرة
رحيل:(تنرفزات)واش بان ليك غير صوتي لي عالي داكشي لي سولتك علاش مجاوبتينيش عليه؟
نوح:سولي بلخااطر ونجاوب (زفر النفس) هاديك بنت خالي تلاقيتها هنا قدام باب الرياض
رحيل:(ربعات يديها)وعلاش تعيط ليك هاكا (بدات تقلدها) نووووح ياك لباااس اش هاد لبسالة وشنو بينك وبينها باش تعيط ليك هاكااااك
نوح:(ببرود)ماشغليش فيهاا ومكتهمنيش (شاف فساعتو) غدا فالصباح غانتحركو وجدي راسك
خلاها ومشى لحمام ورحيل جلسات مفقوصة تاتفكر فشكون هاد بنت خالو لي ضاسرة لهاد الدرجة وتاتحلون عليه...فخضم تفكيرها تحل لباب ودخلات سيدرا تاتجري ونطقات بصوت عالي:مااامي توحشتك أنا
رحيل:(عنقاتهاا بحب)تاأنا توحشتك امامي ديالي فين مشيتو؟
سيدرا:(جلسات تتعاود ليها)مشينا امامي لبارك لعبت بزااف بوحديتي زينبيدين مبغاش يلعب وكلينا گلاص امامي وتصورنا أنا وبابانو وزينبيدين وشرا ليا بابانو حويجات زوينات امامي ومشينا كلينا وشفنا بزاف دلحويجاات وجينا امامي (كمشات حجبانها) عرفتي امامي شفت هاديك لي كانت غوتات علياا وشداتني فودينة امامي
مع كملات سيدرا هضرتها رحيل عرفات بنتها شكون قصدات وبلي هاديك لي سمعات صوتها هي نفسها شيمااء...شدات سيدرا وقالت: فين شفتوها ؟؟
سيدرا:هنا امامي فاش بابانو وقف طوموبيل وهي قالت لبابانو نوح ولكن بابانو گاعما هضر معاها شد فيديدا ديالي ودخلنا هنا مع زينبيدين
جواب سيدرا خلى ديك الفقصة لي كانت شداها تمشي و تطفى وحسات بالراحة ولكن فنفس الوقت ماحملاتش تشوف شيمااء ومنساتش ليها لفعلة لي دارت وزيد لخبار لي عرفات بلي نوح كان خاطبهاا... بقات سيدرا تسرسب ليها كلشي تاخرج نوح لابس حوايج الدار وريحة لباندوش والشومبوان كاتعطعط منو... رش ريحتو وشاف فسيدرا ناطق بهدوء: تاتبيرت إينو سيري عند زين العابدين جيبي ليا شارجور من عندو
لبات سيدرا طلبو بكل سرور ورحيل ناضت جهتو وقفات قدامو وحطات يديها على صدرو وقالت بصوت خافت مدلع:نوحينو مقلق مني؟
نوح:(شدها من خصرها وكمش فيها عينيه وقال بهدوء) علاش شنو درتي؟
رحيل:عارفة بلي غلطت فاش عليت صوتي عليك ولكن خصك تعرف بلي ملي سمعت صوت ديك خيتي تعصبت وعليها درت ديك لغياكسيون
نوح:(حدر وجهو جهتها وحرك نيفو مع نيفها وقال بخشونة) غرتي الفتنة ديالي..
يتبع...
التعليقات
لا توجد تعليقات بعد، كن أول من يعلق.