محتوى القصة
كانت تتحس بيديها شوية وتهرس من ديك التعصيرة لي دار ليها وهو كيدوي مع سيدرا ويتبسم ليها بحنية.. وهي تتوكلو لخبز وتعلق فيه.. جرات أسماء يديها باش تزولها ساعة اش غاتزول وهو شادها بحال لقااط..بلاماتفرط راسها مدات يديها لخرا وغرسات ضفارها فيديه تاطلقها عاد زفرات النفس وهي تتبسم وهزات عينيها وماتجي غير فرحيل لي دوات معاها غير بلعينين "مالكي" سدات أسماء عينيها بمعنى "من بعد ونعاود ليك" هزات رحيل حجبانها "واخا" ورجعات تتاكل وأسماء بزز باش تتسرط ماكلتها.. فجنبهوم فالكرسي كان جالس محمد طه هاز كاس دأتاي وساهي كيخمم ففلوس العملية ملين يجيبهوم.. عندو شي حاجة مي ماشي كثيرة ومايقدش يطلب من باه حيت عارفو هو براسو مزير يالاه شراو دار وغايخصهوم يكملو ليها لفراش وأسماء راه تاهي عندها غير شي حاجة قليلة.. بقا جالس معاهوم ولكسدة لي كانت حاضرة وغير تهزو لمواعن ناض غادي لبيتو.. حل لباب ودخل وأول حاجة دارها زول عليه التيشورت وبقا غير بشورط واصل حد الركبة.. تمشى جهة البلاكار يشوف لفلوس لي حاط تم ويحسبهوم ومع حلو عينيه مشات لداك الديكور لي هرسات غزلان.. كمش حجبانو وجبدو كيشوف فيه كان مصاوب تشوفو تحلف عليه بلي مامهرس ماوالو.. بقا تيقلبو ويضورو فيديه باغي يتأكد واش نيت هو.. هز عينيو كيشوف فالعدم وبلامايشعر تفكر كلامها ملي قالت ليه نصاوبو ليك.. رجع حدر عينيه لديكور ونطق بخفوت: زعمة تكون هي لصاوباتو؟
جاه لفضول وقرر يمشي عندها ويسولها.. حل لباب ونزل لطبقة الوسطانية ومشى لكوزينة لقى غير رنيم هي لي تتغسل المواعن
محمد طه:(واقف حدا لباب متكي عليه)بسسس رنيم فين غزلان؟
رنيم:(هزات حجبانها) طلعات لفوق علاش بغيتي شي حاجة؟
محمد طه:(حك لحيتو ومبغاش تعيق ونطق بهدوء)باغي غير نسولها على واحد التيشورت مالقيتوش فحوايجي
رنيم:لامكانش فلبلاكار شوف السطااح والامالقيتيهش هي باقي موسخ
محمد طه:(حل الثلاجة وخدا قريعة دلما وضار جهتها خربق ليها شعرها) واخا البرهوشة
خرج من لكوزينة مخليها حالة عينيها ومستغربة من تصرفو.. رجعات تاتغسل المواعن ونطقات بصوت خافت:سبحان الله
أما محمد طه طلع لفوق ومشى لبيتها هي ورنيم دق زوج دقات ماسمعش حسها وحل لباب لقاها مكينااش وكمش حجبانو:فين مشات هادي؟
قلب طريقو وطلع لسطاح ومع دخل لباب بانت ليه تتحيد النشير وتحطهوم فالسلة دايرة ليزيات معلابالهاش.. بقا واقف حدا لباب مادخلش وعينيه بلامايشعر بدات تاتسكانيها.. كانت لابسة بيجامة قصيرة بياسة وحدة وخاشية جنابهاا فالسليپ مبينة سيقانها البيضين لي كيف الجبينة وضفارها درجليها مصبوغين بالحمر جات تاتشعل فصبيعاتها برزات لون لحمها لبييض.. طلع عينيه عليها بشوية وماتجي غير فاللقطة لي هي تحنات ومكوزة تاتحط النشير فالسلة.. عينيه زادت تفيكسات على قاعهاا والسليب لي مطراسي وباين.. قلب وجهو فاش عاق براسو وبقا تيحك لحيتو ويلعب بلسانو ففمو معاحبو حال.. محسش براسو وسهى فيها وهادي عمرها كانت فيه.. أما غزلان غير سالات النشير جمعاتو وهي تهز السلة وضارت تمشي وهو يبان ليها واقف حدا الباب قالب وجهو لجهة لخرا.. سرطات ريقها فاش شافتو واقف بصدرو لعريان ولزابدو لي خدم عليهوم ولكتاف عراض.. عمرها شافت شي راجل فهاد المنظر هادا.. هبطات عينيها وتقدمات لعندو وهو غير حس بيها ضار لجهتها وشافها كيفاش وصلات عندو وتخطاتو بلاماتعبرو.. نزلات من الدروج وهو تابعها نازل وراهاا ونطق:غزلان
وقفات غزلان فالدرجة لخرة وضارت جهتو كاتسناه يكمل هضرتو.. وقف قدامها وحك شعرو وبهدوء نطق:نتي لي صاوبتي داك الديكور؟
غزلان:(حطات السلة حداها)اه بسبابي تهرس وأقل حاجة ندير هي نصاوبو ليك
تفكر تصرفو معاها وكلامو لي نطق بيه فلحظة غضب.. زفر النفس ونطق وهو قالب وجهو معاحبو حال:عدبتي راسك ونتمنى تنساي لكلام لي قلت ليك
مزادش معاها الهضرة وخلاها واقفة تاتشوف فيه وهي هازة حاجبها وغير غبر من قدامها وهي تنطق بهمس:ياربي على نفخة فيه تاشكرا مقالهاا تت
دخل محمد طه لبيتو ولقى ريان مكسل ليه فوق النموسية تايخربق فتلفونو..
محمد طه:اش باغي؟
ريان:(تفوه)فين كنتي از*ي شوية وكان النعاس ايديني
محمد طه:(جلس حداه ونطق)كنت غير هنا وصاف
ريان:(تقاد فجلستو) جيت ندوي معاك على قبل لفلوس دلعملية دكلثوم
محمد طه:(شاف فيه بهدوء)مالهوم؟
ريان:قلتي مكاملينش عندك لفلوس دلعملية داكشي علاش فكرت وقلت نعطيك لفلوس لي خاصينك
محمد طه:ونتا ملين غاتجيبهوم؟
ريان:(ضربو على صدرو وتبسم) واش ناسي لغيسطو دكندا لي خلى ليا بابا عبدالله راه دوك لفلوس كيدخلو لكونط عندي
محمد طه:(تنهد) هادوك فلوسك اريان
ريان:(قاطعو بجدية باين فملامح وجهو) حنا خوت والاموقفناش مع بعضنا فوقت لحزة وقتاش غانوقفو؟ هادوك فلوسي وفلوسك تانتا لاحتاجيتي شي حاجة أنا واجب عليا نوقف معاك (حط يديه على كتفو وزير عليه) ملي تسولو على ثمن العملية علمني باش نخرجهوم ليك سمعتي وياااك يسخن عليك راسك وتمشي عند شي حد خر راه برب لاعاوت شت فوجهك إلادرتيها..
مقدرات تنفس أسماء تامشى إسلام عاد تهناات ومشات لبيتها ديريكت تابعاهاا رحيل لي دخلات وسدات لباب وراها وجلسات فوق النموسية ناطقة بهدوء:اش واقع ليك حالتك معجبانيش شنو طرا؟
أسماء:(جلسات قدامها ونطقات بفقصة) كان عندك لحق داك الزا*مل دإسلام ظن بلي أنا طايحة فيه عليها بستو
رحيل:شنو طرا؟
أسماء:(فيما تتفكر اش وقع تاتبغي تاكل جنابها)دخل عندي لبيت وباسني (سربكات ليها گاع لي طرا مانسات حرف ورحيل تاتسمع وهي مصدومة) حسيت بيه زرب عليا زربة خايبة ومخلى ليا لوقت لي نستوعب فيه ونجاوبو وزيدي عليها خلعاتني تسيفتوو مغانكدبش عليك
رحيل:(ضربات يديها بزوج مع بعض) هالي قلنا شتي دابا نتي فتحتي ليه المجال بديك البوسة لي عند بالك شي حاجة عادية مافهمتش اأسماء كيفاش تاتكلختي والله كنتي ديري شي حاجة خرا وتفكي بيها راسك بالحيلة
أسماء:(نطقات بانفعال)واش أنا عارفة غايطرا ليا هادشي وداك لخرا غايلصق فيا داباا
رحيل:صافي تكالماي داباا وبردي الروح فيك وماتعصبيش لي وقع راه وقع غير نتي دابا حاولي أنك ماتعطيهش لمجال كثر وحاولي تبعدي عليه وماتحاكيش معاه بزاف وتبقاي كل مرة تحكي ليه على الضبرة وتفكريه بمرتو وشنو دارت فيه اه إسلام عزيز عليا وبزاف وضريف وحنين سوليني أنا لي عرفتو قبل منك ولكن راه ورى داكشي لي عاش وشاف السيد تقلب ولى على سبة وخلاااص نتي تاتجي تالعندو وتترجعي تفتحي ليه الجروح لي دازو
أسماء:(تنهدات)كون عرفت هادشي غايطرا كون قطعت شنايفي قبل ماندير لي درت
تبسمات رحيل وتنهدات تنهيدة عميقة خلات أسماء تشوف فيها بهدوء وتنطق:خلينا مني وقولي ليا مالك؟
رحيل:(حكات جبهتها) درت بهضرتك ومشيت عندو وعاوت ليه
أسماء:(خرجات عينيها)نو واااي واش قلتي ليه كولشي؟
رحيل:(حضنات المخدة) لا ماشي كلشي مقدرتش نقول كلشي وحاولت نختاصر ليه
أسماء:وشنو قال ليك؟
رحيل:مقال والو (زفرات النفس) بقا غير ساكت كيشوف فيا وصاف وأنا غير قلت لي عندي خليتو وخرجت
أسماء:(حكات شعرها)والاجينا نفكرو بلعقل السيد عطاك وقت لي تعاودي ليه وسمعك فيه
رحيل:وي هادشي لي زاد خلاني نتشجع ونقول لي كاين
أسماء:صافي نتي نساي دابا لي وقع وماتفكريش فيه بزاف وتشغلي راسك معاه نتي درتي لخطوة لي كان عليك ديريها زمان وهادا بالنسبة ليا تقدم زوين فحياتك نتي قبل كلشي.. نتي دابا تصرفي معاه عادي وخلي كلشي لزمان (سكتات أسماء شوية وعاد طلقاتها بضحكة دالشيخات) هههه كل وحدة فينا تتنصح لخرى شنو دير وفمشكيلتها تاتبلوكا ههه
رحيل:(تبسمات)غانمشي ندوش تشهيت نصاوب شعري بوكلي
أسماء:بصحة مسبقا
خرجات رحيل من عندها ومشات لبيتها خدات لبرودويات لي غاتحتاح لحمام وبنوارها ودخلات لحمام فين كاين البنوار عمراتو بالما سخون تاولات الضبابة تتبان فالحمام وستفات لبرودويات حداهاا وبدات تزول حوايجها بياسة ببياسة وكبات لبرودويات تادارو الرغوة ودخلات وسطهوم وتكسلات فيه وهي مغمضة عينيها.. تاترسمات صورتو بين عينيه بدوك الشوفات القاصحين.. تنهدات وحلات عينيها وخدات واحد لگوماج لي واخداه من لكوبغاتيڤ دمها طبيعي بلعشوب والعكر لفاسي.. دراتو على داتها كلها وبدات تتگومي.. فيما تسالي من شي برودي تجبد واحد خر واحدة راحتهاا ومهتمة بأدق تفاصيلها.. مكتحملش تشوف شي حاجة ماهياش فداتها وعزيز عليها النقى وهاد النقطة ربات عليها سيدرا لي شابهة ليها تاهي.. غسلات شعرها تاهو لي كان طويل كيعدبها وكيخلي كتافها يطيحو.. جمعاتو بقراصة وناضت باش تشلل وتوضى.. غير سالات لبسات بنوارها ونقات لحمام وجمعات لبرودويات ديالها عاد رجعات لبيتها سدات البالكون ودوزات الخوامي وجلسات فوق الكرسي وجبدات لگام لي فيها كريم ديال لوكوغ وبدات طلس تاسالات ولبسات حوايجها عاد دازت لشعرها تصاوبو.. شي ساعة وهي مدابزة معاه تاسالات وبوكلاتو وقادات لفخونش ودارت ليه سيروم باش مايتشوكش.. تحل عليها الباب على غفلة تاقفزات من بلاصتها وبانت ليها أسماء جايا جهتها ونطقات رحيل:جابك الله قررت نقطع شعري ط
أسماء:(قاطعاتها) ولد لحاج جاي
رحيل:(خرجات عينيها)علاااش؟
أسماء:غايتعشى عندنا عيط ليه بابا وعرض عليه وتاداك الزا*مل دإسلام غايرجع تاني
رحيل:(قلبها بدا يضرب بالجهد) وقتاش عرفتي
أسماء:قبيلة كنا جالسين تاعيط ليه وهضرو مع بعضياتهوم وبابا قال ليه اجي تعشى معانا واقيلا هو فلول مبغاش ولكن نتي عارفة باك ماخلاه تاقال اه وغير قطع معاه وقال لينا نوضو نوجدو لعشاا كنت باغا نجي نعلمك ساعة لقيتك باقا كادوشي مهم سالي شغالك ونزلي تعاونينا أنا مشيت نكمل شنو تابعني
خلاتها جالسة غير تتشوف فانعكاسها فلمرايا وحنيكاتها مع لحماام تزنگو وزادو تزنگو كثر فاش عرفاتو جااي.. جمعات شعرها شفينجة ولاحت عليها فولار ولبسات إسدال الصلاة طويل فوق من شورط وديباردور لي لابسة وخرجات تنزل لتحت تشوف لبنات فين وصلو..
بعد مدة كانت الجيپ ديال نوح واقفة قدام باب الدار دإدريس حل لباب ونزل بفوقية فالكحل جاتو خطيرة ومفصلة عليه مبينة كتافو لعراض.. حل لباب لوراني وجبد منو واحد لبلاستيكة وسد الطوموبيل عاد تمشى بخطوات تقيلة غادي جهة الباب وضرب السرسار وبقا واقف كيخربق فتلفونو تاتحل لباب وهو يهز عينو فريان لي تبسم ليه وسلم عليه سلام رجولي:مرحبا دخل
نوح:(ضرب على كتفو ونطق بجدية)الله يحفظك
طلعو فوق فين كانو جالسين العائلة وإدريس غير شافو ناض عندو وسلم عليه ونطق بتبسيمة:زارتنا البراكة مرحبا
نوح:(حط يديه على صدرو) الله ينورك
سلم على محمد طه وإسلام ولقى التحية من بعيد على تانيرت وكلثوم ولبنات عاد جلس جنب إدريس حاط يديه فوق المخاد بجلسة رجولية واخد راحتو ونطق بهدوء: ولفتو السكنة هنا؟
إدريس:(تبسم ليه)مخير هناا فيه لكالم ماشي بحال الدار لولة لي جات على الشاريع
نوح:اوا الله يجعلها عتبة مباركة
إدريس:آمين خص غير نكمل ليها الفراش حيت لتحت باقي خاوي
نوح:(شاف فيه بجدية)لاخصاتك شي حاجة دوز لمگازان مانوصيكش
إدريس:الله يحفظك
هزو راسهوم فاش سمعو صوت سيدرا لي جايا تتجري وتاتهضر بالجهد:وااامابغيتش امامي نجمع شعري
دخلات لصالة وهو يبان ليها نوح لي تبسم ليها بحنية ومشات لعندو تاتجري وطلعات فوق ركابيه معنقاه:ماي بلو آيز
كانت واقفة رحيل قدام لعتبة دلباب وعينيها عليه وهو معنق سيدرا وكيتبسم ليها تبسيمة حنينة.. داك لمنظر لي كلما شافتو كيخلي قلبها يخفق بجنون.. حاولت تسيطر على مشاعرها قدامو وقدام الكل.. ودخلات ناطقة بهدوء:السلام أوعليكوم
ردو عليها السلام وهي مشات جهة مها وجلسات جنبها وعينيها عليه هو لي كان محني جهة سيدرا تايدوي معاها بشوية وتاهي تاتجاوبو ماتسمعيش اش تيقولو.. مد ليها الساشية وهي نزلات من عندو ومشات لعند رحيل حطاتها ليها فحجرها ونطقات:مامي خبيها ليا
رحيل:واخا امامي
ناضت رحيل تعمر براد دأتاي وتحطو مع الحلوى على مايوجد لعشا.. أما كلثوم تحنات جهة أسماء ونطقات بهمس:شكون هاد الراجل ابنتي؟
أسماء:ولد لحاج صاحب بابا
كلثوم:اييه عقلت عليه شفتو فالسبيطار يامات خوك دار العملية
أسماء:اه راه كان معانا
كلثوم حركات راسها باه ورجعات سكتات فاش بانت ليها رحيل جايبة الصينية دأتاي وحطاتها ورجعات خرجات تكمل لي بقا..مكانتش رحيل باغا تبقا معاه فنفس البلاصة حيت بلاماتشعر تاتلقى تركيزها وعقلها غادي ليه وهي تتحاول ماأمكن أنها ماتزيدش تعلق بيه كثر.. وخصوصا من الجلسة لي عاودات ليه فيها على زواجها وهو مدار تاشي رد فعل صافي هناك قررات تاهي تعامل عادي وتخلي كلشي لزمان كيف قالت ليها أسماء..كانت باغا تشم لهوا وتبقى وحدها ورجليها قادوها لسطح لي كان مسدود بالزكرون ومع لباب دلحديد كيخصو جهد باش يتحل حيت لباب فيه مشكيل وكيحلوه غير الدراري ولاإدريس فالصباح تال ليل عاد كيعاودو يسدوه..بدات كدابز معاه وهي مكمشة حجبانها وتقاتل وتجبد فيه بالجهد تاتحل ليها ومع مكانتش معولة عليه رجعات اللور وكانت غاتجي طايحة فالدروج كون ماصدرو لي حبسها فاش تزدحات فيه ويديه لي شداتها من جنابها متبتاها وبصوت الرجولي الخشن همس ليها: ردي باالك
فلتحت كانو جميع مجموعين ماعدى رحيل لي ملي حطات ليهوم الصينية وهي غابرة.. كان متكي نوح على لمخاد واخد راحتو وهاز كويس دأتاي كيجغم منو مرة مرة وسيدرا مخشية فيه كيف القملة مبقاتش تتبان تحت باطو.. هازة تلفونو تتلعب فيه وهو ملاهي مع إدريس كيدويو على لخدمة..تاصونى تلفونو فيد سيدرا لي كمشات حجبانها ونطقات وهي تاطل عليه:ماي بلو آيز تيصوني عليك عُثمان
نوح:(ضار جهتها مبسم ونطق بهدوء) اراي نشوف
سيدرا:(مدات ليه التلفون ونطقات بحماس)ياك هو حيت مامي علماتني الحروف وعلماتني تانجمعهوم فكليمات وتاكنعرف نكتب سميتي أنا سيدرا التجاني
نوح:(شاف لابيل وتبسم ليها وهو بايسها فراسها)تباركالله عليك اتاتبيرت إينو
رجع تلفونو كيصوني بنمرة عثمان وهو يضور جهة إدريس لي نطق بهدوء:طلع لسطاح وخود راحتك
حرك ليه راسو باه وناض غادي بخطوات تقيلة جهة السطح وفنفس الوقت حبس لتلفون الصوت تبانت ليه مقاتلة مع الباب وكمل خطواتو بلاحس تاوقف فالدرجة اللخرة ومع بانت ليه حلات لباب ورجعات اللور وهو يتقدم بخطوة حابسها بصدرو لاطيح ويديه تحطات على جنابها متبتاهاا.. ونطق بصوتو الرجولي الخشن:ردي بالك
أنفاسو كانت تتحس بيهوم كيضربو جنب وجهها تاحسات بالحرارة خارجة من حنيكاتهاا عكس التبوريشة لي طلعات معااها من صبع رجليها الصغير تال آخر زغبة فراسها.. وسرب دالنمل طالع معاهاا.. أما قلبها فكاان بحال شي ساحة الحر'ب بقوة الانفجارات لي وقعو فيه.. جمدات بين يديه وفقط أنفاسها العالية هوما لي كانو كيتسمعوو.. مبعداتش عليه حيت رجليها مبقاوش هازينها وحاسة براسها غاطيح الاتحركات.. كان بناتهوم قُرب مهلك لروحها لميتة لي بدات تتحي معاه هو.. هو لي ماتحركش ويديه بقات محطوطة على جنابها وراسو محني شوية جهة ودنيهاا.. كان فرق الطول بناتهوم واااضح وضخامة جسمو غطاااتها هي لي كانت بين يديه بحال شي فلوسة.. حسات بوجهو مااال لجهتها كثر تاضربو أنفاسو فحنكها مخلي البقية المتبقية من صمودها يتلاشى.. وبصوت هامس خشن نطق جنب ودنيها: غاتبقاي واقفة هنا نهار كامل
كلامو كان بحال شي تصرفيقة فيقاتها من مشاعرها لي سيطرات عليها فحضورو.. سرطات ريقها سارطة معاه القمعة لي عطاااهاا وقبل ماتحرك كان هو سبقها وتخطاهاا داخل لسطح مخليها واقفة فبلاصتها متبعة بعينيها طيفو تاغبر.. زفرات النفس مرات عديدة على أمل أنها تخلص من هاد الأحاسيس لي تتسيطر عليها وهي معاه.. مسحات وجهها بيديها وكملات طريقها داخلة لسطح.. ضورات وجهها وبان ليها واقف كيطل من السطارة وهاز التلفون كيدوي ومركز فكلامو.. بعدات عليه غادة لجهة لخرى فين كاينة واحد ليجورة وطلعات فوقها باش يالاه تشوف الزنقة.. حطات يديها فوق السطارة وبلاماتحس لقات ودنيها وتركيزها مشى تاني ليه..
نوح:(بهدوء) عام باش تكملو لانسطالاسيون اصاااحبي ياك داك النهار گال يوماين ويسالي
عثمان:وراه بحالي بحالك تاأنا گلتها ليه قال ليك كاين شي مشكيل داكشي علاش لانسطالاسيون ديال الضو غياخد ليه وقت..
نوح:(حك لحيتو)دابا وقتاااش غايساليو وكان
عثمان:لماكسيموم واحد السيمانة حيت راه غايعااودو لخدمة من لول
نوح:واخا سيمانة مدات مجابت وصحاب الصباغة دويتي معاهوم وعلمتيهوم
عثمان:كون هاني علمتهوم شتي غير الاسالاو صحاب الضو كولشي غايدوز بزربة غير بغيت نعلمك باش يكون
فخبارك
نوح:غدا مغانكونش هناا غادي لفيرمة وغالبا غانبقا تم شي يوماين نتا تكلف بلمحال اعثمان وباشما كان علمني
عثمان:ولمگازان اولد لحاج شكون غايرد ليهوم لبال؟
نوح:ماتخممش فيها نتا غير تكلف بداك لمحال تانسالي من لفيرمة ونتكلف بالباقي
عثمان:صافي واخا مشات يالاه نخليك دابا راه الحاجة تتعيط ليا لعشاا
نوح:اش خبارها بعدا بيني وبينها شحال؟
عثمان:ههه راه مقلقة منك باش تكون فخبارك گالت ليك نسيتيها
نوح:(تبسم بالخف ونطق بالهداوة) ملي نسالي نجي نشوفهاا ونصفيو الخواطر
عثمان:بناتكوم اسيدي غير وجد راسك
نوح:لي جات من عندها سمن وعسل
عثمان:يالاه اولد لحاج تهلا
قطع نوح لابيل وبقا واقف مبسم تبسيمة خفيفة فاش تفكر الحاجة جدات عثمان لي فمقام جداه.. تنهد ورجع شاف فتلفونو لي صونى بنمرة بريڤي.. دوز لخط ونطق بصوتو الخشن:ألو
وصلو صوتها لي نطقات بنبرة أنثوية:نوح هادي أنا شيماء
باقي گاعما كملاتها كان قطع لابيل فوجهها ورجع حبس الصوت لتلفونو قبل مايرجعو لجيبو.. أما رحيل فكانو ودنيها تيلقطو لهضرة لي سمعات وبلا ماتشعر حسات بواحد لفضول وشعور أخر مقدراتش تفسرو ملي سمعاتو كيدوي على شي وحدة.. طريقتو فالهضرة عليها خلاتها تسرط ريقها وعقلها يغيب تتسائل شكون هاديك لي خلاتو يدوي عليها بواحد الحنية غريبة.. بقات واقفة ساهية تاسمعاتو عيط ليها بسميتها لي ناذراً مكايعيط ليهاا بيها.. سمعات سميتها من ناس كثيرة ولكن منو هو كانت فشكل.. ضورات وجهها جهتو لقاتو واقف داير يد فجيب الفوقية كيشوف فيها بهدوء..
رحيل:نعام؟
نوح:(لعب بلسانو ففمو ونطق ببرود)شعرك كيبان
قال كلمتو وعطاها بالضهر نازل لتحت وهي مدات يديها لشعرها لقاتو تحل ليها نصو مع مصاوب كان على سبة.. خرجات عينيها وحلاات فولارها وبدات تتصاوب شعرها ونطقات بصوت هامس:ضروري ماخصني نتشوه معاااه تت تانتا مالقيتي وقتاش تحل..
نزلات غادة لبيتها تجيب قراصة وتبتو بيها باش مايعاودش يتحل.. وفطريقها تلاقات بكلثوم لي كانت خارجة من بيت أسماء جايبة معاها الدوا لي غاتاكل قبل ومور العشا باش ماتنساهش تبسمات ليها رحيل وكملات طريقها لبيتها خدات داكشي لي بغات عاد نزلات لتحت باش تعاون البنات يحطو لعشا.. معاوداتش شافت جهتو وشغلات بالها مع البنات وسيدرا.. تاتعشاو وحطو تاني صينية أتاي مكملين حديثهوم تاوصلات الوقيتة وناض نوح هاز تلفونو وسوارتو وشاف فإدريس:سي إدريس الله يهنيك
إدريس:خليك باقي لحال
نوح:(شاف فساعتو ونطق بهدوء)هادي هي لوقيتة فين نتحرك راك عارف غدا الصباح تبعاني الطريق لفيرمة
إدريس:(ناض با يهبط معاه) اوا اسيدي الله يهنيك
نوح:(نطق وهو غادي) الله يعاونكوم
سيدرا:(شدات فوقيتو ونطقات مكمشة حجبانها) ماي بلو آيز بقا معايا
نوح:(حط يديه على راسها وتبسم ليها بحنية) خصني نمشي اتاتبيرت إينو
سيدرا:(شدات فيه)نمشي معاك
نوح:(تبسم بالخف)يالاه
شدات فيديه وضارت جهة رحيل لي متبعة لمنظر بعينيها ودارت ليها سيدرا باي باي:مامي تانيرت إينو بسلامة
ضحك إدريس وخرجو هو وياه وسيدرا لي شدات فيه غاديين لتحت مخليين رحيل غير تتبلق عينيها ونطقات:لبرهوشة دارتها بصح
خرجات من الصالة غادة لصالة الثانية فين كاين الشرجم لي كيطل على لحومة وبقات كطل عليهوم كان باها واقف هي وياه وسيدرا معلقة فيه مبغاتش تخليه.. تاشوية تحنى عندها وهمس ليها بشي حاجة وسيدرا باستو فحنكوو عاد هزها إدريس وبقات تادير ليه باي باي تاركب فبلاصتو وحرك الطوموييل راجع ماغشاغيغ عاد دخل باها ساد لباب وهي بقات متبعة الطوموييل بعينيها تاغبرات.. سدات الشرجم وضارت شافت فسيدرا لي معنقة إدريس ونطقات بجدية:اجي نتي لهنا كنتي باغا تمشي بصح معاه
سيدرا:(تادوي وهي مخبية وجهها فعنق إدريس) كنت غانمشي أنا وبّاديدي ياك ابّاديدي
إدريس:(تبسم) اييه انخشيشتي
رحيل:(قربات جهتها هزاتها من عندو وباستهاا)زيدي ندوش ليك باش تنعسي راه مشى لحااال
سيدرا:بّا ديدي تيمنسيوين "تصبح على خير"
إدريس:تيمنسيون ههه
مشات رحيل هي وسيدرا وإدريس دخل لصالة ونطق بهدوء: تانيرت إينو يالاه نمشيو نعسو
تانيرت:(ناضت وهي تتنهج)يالاه تصبحو على خير
غير وصلات عندو وهو يشد فيديها خارجين من الصالة غاديين لبيت النعاس وتالبقية كل واحد تاض يمشي لبيتو وإسلام مشى لدارو..
---
أسدل الليل ستاره وليوم كان الجو شوية مغيم على غير لعادة.. وقفات طوموبيل من نوع مرسيدس فالكحل قدام باب الرياض ونزلات منها شيماء بكسيوة دافية قصيرة شوية مع صباط طالون وشعرها الكحل جامعاه كوت شوڤال ودايرة نضيضرات الشمس حاجبة بيهوم عويناتها لي كانو كيشعو بالفرحة.. غادة جهة الكوفر حلاتو وجبدات زوج ڤاليز قد لخلى مع صويك صغير عاد سدات الطوموبيل وتوجهات جهة باب الرياض وهي جارة لڤاليز.. دخلات وعينيها متلهفين باغية تشوفو واخا عارفة فهاد الوقت مكيكونش فالرياض.. بانت ليها رحمة جالسة فالجليسة دالقصب كيف العادة مع كويس دالقهوة والمجلة فيديها ديال البلدي كاتعزل وتخير منها.. غير سمعات لحس وهي تهز عينيها فيها وتبسمات ليها وبدورها شيماء بادلاتها التبسيمة وهي غادة عندها
شيماء:عميتو لحبيبة
رحمة:(معنقاها)مرحبا بيك ابنت خويا نورتي الرياض
شيماء:مغسي ماشيغي (جلسات جنبها حاطة رجل على ختها وزولات نضاضر) بوحدك ؟
رحمة:كاينة سناء (رفعات صوتها)السعدية اااالسعدية
السعدية:(جايا تتجري)نعام الالة
رحمة:سيري عند سناء وعلميها بلي شيماء وصلات
السعدية:واخا الالة
شيماء:(وقفاتها بكبرياء)بلاتي (أشرات ليها لدوك لڤاليز بصبعها وهي هازة نيفها لسما) دي معاك لڤاليز لشومبغ ديالي
ضارت السعدية جهتهوم وبانو ليها كبار ورجعات شافت فيها:واخا الالة
مشات تتقاتل معاهوم وتطلع فيهوم وهي مكمشة حجبانها تبان ليها رؤوف نازل من الدروج بسروال دجين بيض وشوميز فنفس اللون مع سباردي بيضة.. كمش حجبانو فيها ونطق: ردي لبال لاتكربعي
السعدية:(تتنهج)طلعهوم معايا
رؤوف:(هز فيها حاجبو)ديالمن هاد لخرا يطلعهوم لراسو
السعدية:(وشوشات ليه) ديال ديك النعامة دبنت خالك
حرك راسو وهز ليها لڤاليز وهي تكلفات بداك الصاك تاطلعهوم ليها لفوق ونزل تاني كيدردب فالدروج داز حدا مو لي نطقات:رؤوف اجي سلم على شيماء
رؤوف:(ببرود)صافا
شمياء:(نطقات وهي تتميق)صافا ونتا
رؤوف:(ببرود)مزيان المرة الجايا لي تجي فيها طلعي بگاجك لراسك راه لبنت مخداماش حمال عندك ابنت الخال
رحمة:(خرجات فيه عينيها ونطقات بجدية)رؤوف كون تحشم اش هاد لهضرة تاني
شيماء:(تبسمات تبسيمة صفرا)هههه ماعليش اعميتو عارفة رؤوف عزيز ليه لمزاح ياااك
رؤوف:(غمزها) ماعنديش معاه تايجيني مر
نزلات سناء كطقطق بطالونها وترحب بيها من بعيد: أهلا أهلا وأنا نقول مال الرياض منور قولي لفنة ديالنا هي لي نوراتو
رؤوف:(قلب وجهو ونطق بسخرية) قولي الجو تغيم اوكاان
خرج رؤوف مخليهوم مكملين هضرتهوم غادي لجهة الگاراج فين كاينة طوموبيلتو.. ركبها ودمارا شاد الطريق ديريكت لفيرمة فين كان نوح كيتسناه تم.. طريق طويلة مونس راسو بالمزيكة ومطلع الصوت تارجعها بحال الديسكو.. غادي منيير تااوصل لباب وهو كيلاكصوني على العساس لي جا كيجري يحل ليه لباب عاد كمل طريقو تاوصل وهو يحبس قدام لباب وسكت طوموبيل ونزل وعينو كيضورو على لفيرمة لي شحال هادي مجا ليها.. بان ليه الدنيا والجو مختالف على كيف كانت أخر مرة شافها وشحال من حاجة تزادت فيها.. سول لعساس على خوه فين كاين وعلمو بلي هو فالجنان.. كمل طريقو تاوصل عندو وبان ليه واقف هو أو شي حد كيدويو.. قرب جهتو وتنحنح تاضار نوح لي كان داير كاسكيط ولابس السپور.. كمل كلامو مع داك السيد لي مشى عاد قرب جهة رؤوف وهو خاشي يديه فجياب السروال دالتوني لي لابس ونطق بهدوء:تحرك
سبقو ورؤوف غادي وراه والخلعة شاداه حيت عارف اشنو تابعوو.. تاوصلو جهة الشاريج وهو يوقف نوح مخلي رؤوف يوقف أوطوماتيكمو وراه
نوح:(ضار شاف فيه وهو هاز حاجبو ونطق بجدية) هاد ليوماين لي دازو خليتك ترتاح فيهوم ودابا جا لوقت لي تحل معايا فيه داك الراس.. لفلوس دلورث لي بقيتي مصدع بيهوم الدنيا هانتا ضيعتيهوم فالخوى الخاوي وخليتي الشمايت يديروها بيك وهانتا دابا بقيتي لاخدمة مسگدة ولافلوس شتي التبرهيش ديالك فين لاحك.. (خنزر فيه وكمل كلامو بصرامة) لكلام لي غانقولو ليك دابا يبقاا معشش ليك فداك الراس الخاااوي.. من ليوم الاشفت شي حاجة قد هك (جمع صباعو بزوج) فيك اولدي ياارؤوف لي غاندوزو عليك ربي وحدو لي عارفو.. غاتشد معايا الخط وغادير عقلك حيت التبرهيش ديالك طلعي لي فصحتي..
كان واقف قدامو وجامع يديه قدامو مكروازيهوم وحرك راسو باه وهو حادر راسو.. وفالمقابل كان واقف قدامو نوح وعينو عليه مقصح شوفاتو فيه وتاكلامو ونبرتو كانت قاصحة: غاتولي مسؤول على لمگازان والدراري لي خدامين فيها ولخدمة لي كان تايدير عثمان غاتولي نتا ديرها عندك سيمانة غاتبين ليا فيها واش نتا قد لمسؤولية ولا لا (لعب بلسانو ففمو)عثمان غايشرح ليك لطاش ديالو وماعليك نتا غير تحل دماغك وتفيقو وتوگض معايا سمعتيني
رؤوف:اه اخويا
نوح:(قرب جهتو وحط يديه على كتفو وزير عليه مزيان وقال بجدية)ماشي كلشي كاتعطى ليه فرصة خرى بحالك عليها عرف تستاغلها
رؤوف:كون هاني كيف نتا تقتي فيا أنا كانواعدك عمري غانخيب ديك التقة وغانبين ليك بلي أنا تبدلت ومبقيتش رؤوف المستهتر لي تتعرف
نوح:هاحنا غانشوفو سير دابا لمگازان غاتلقا عثمان تم غايشرح ليك لخدمة مزيان يالاه توكل عالله
تبسم ليه رؤوف وقبل مايمشي عنقو تعنيقة مجهدة عاد مشى مخلي نوح واقف فبلاصتو وعقلو ساهي فاش تاحد ماعرف..
يوماين دازت لاجديد يدكر فيها كل واحد متبع مشاغل الحياة لي مكيتقاداوش.. كانت جالسة تانيرت فالبيت مكمشة حجبانها وحاطة يديها على كرشها لي حسات بيهاا فشكل.. مولفة تتحس بالبيبي تيتحرك ويرفسها ولكن هاد النهار ماحسات بوالو شي لي خلاها تحس بالخوف.. ناضت خارجة من البيت وبانت ليها رحيل خارجة من لكوزينة بشورط قصير ودباردور جامعة شعرها. تبسمات ليها ونطقات:ماما مشهية شي حاجة
تانيرت:(مكمشة حجبانها) خصني نمشي عند الطبيب
رحيل:(بخوف)علاش؟
تانيرت: ماعرفتش ابنتي حاسة بكرشي فشكل
رحيل:لبسي حوايجك غانلوح عليا عباية ونجي نديك من زهرنا بابا خلى الطوموبيل
حركات ليها تانيرت راسها باه ومشات تلبس وفنفس الوقت رحيل طلعات لبيت لاحت عليها عباية وفولار وهزات صاكها فيه الفلوس ونزلات جهة تانيرت لي كانت خارجة تاهي بجلابة وجهها صفر مخلوعة.. مع صوت الهضرة نزلات كلثوم وهي تتجمع شعرها او وجهها منفوخ بالنعاس ونطقات بهدوء:مالكوم ياك لباس
رحيل: غانمشيو لعند الطبيب ملي ترجع غزلان علميها وراه سيدرا فالبيت ناعسة واخا
كلثوم:واخا ابنتي
خرجات تانيرت هي ورحيل لي هزات ساروت الطوموبيل مخلين كلثوم كاطل عليهوم ماعارفة اش واقع.. ركبو فالطوموبيل وشدو الطريق عند الطبيبة وغير وصلو مشات رحيل عند السكرتيرة ديالها شرحات ليها بلي أوغجون خصها تشوفها واخا ماشي نهار فحصها وبالفعل دخلاتها وعرات تانيرت على كرشها وهي تترعد ورحيل كانت واقفة جنبها وعينيها على التلفازة لي كانت تادوز ليها الطبيبة.. السكااات طغى عليهوم والطبيبة مركزة فخدمتها تاسمعات تانيرت نطقات بصوت باكي:اش واقع مالها مكتحركش؟
الطبيبة:(شافت فيها بأسف) مع الاسف الجنين مات فكرشك..
شهقة تانيرت لمسموعة كسرات داك الصدمة والسكات لي نزل عليهوم مور اخر كلمة نطقات بيها الطبيبة وهي تتشوف فتانيرت بأسف.. دموعها دارو طريق نازلين على حناكها بزوج بحال شي وديان.. وشوية بشوية بدا صوت البكاا كايتسمع مجهد تاولى نحيب من أم فقدات كبدتها.. دموع رحيل نزلو وهي تتحرك راسها وبصوت خافت نطقات:كاين شي غلط ياك ادكتورة؟؟
الطبيبة:مع الاسف الجنين قلبو ساكت وهادشي علاش مبقاش كيتحرك وكرشها بدات تقصاح..
حطات تانيرت يديها على كرشها وهي سادة عينيها تتبكي.. شعور صعيب تكون هاز طرف منك لشهور تحس بيه فكل مرة تيتحركها وتسمع صوت دقات قلبو لي كاينبض بالحياة.. صعيب على أم أن جنينها يموت فكرشها وهي محساش بيه.. تكون باقي لي شهورة قليلة باش يجي لدنيا وتسمع خبار موتو كاتكون قاصحة.. كانت تانيرت تاتمنى تهزها بين يديها ولكن الله سبحانه وتعالى بغااها وداها عندو.. أنا أريد وأنت تريد والله يفعل مايريد.. مسحات رحيل دموعها باركة غير انهيار تانيرت مخصش تاهي تنهار ضروري من شي وحدة فيهوم تقوى..
رحيل:وشنو المعمول دابا؟
الطبيبة:غايخصها تفتح باش نزولو البيبي من كرشها
رحيل:واخا ادكتورة (تحنات رحيل عند تانيرت لي باقا تتبكي وتشهق وهمسات ليها بحنية) ماما عفاااك قوي راااسك
تانيرت:(تتشهق بالجهد) ماحسيتش بيهااا بنتي ماااتت فكرشي وماحسيتش بيها ارحيل هء هء
رحيل:(نزلات دمعتها) ربي بغاااها تكون طير من طيور الجنة قوي راااسك عفاااك وماتخلعينيش عليك
بقات تاتهدن فيها تاتفكرات باها وهي تخرج لبرا وجبدات تلفونها ويديها تايترعدو عليها دوزات لخط لباها لي جاوب بهدوءو المعتاد:ألو بنتي
رحيل:بابا (غمضات عينيها وسرطات ديك البكية لي فحلقها) حنا فلكابيني ديال الطبيبة دماما واخا تجي
إدريس:(نطق باهتمام وخوف بان فصوتو) شنو واقع واش مك بخير؟
رحيل:(عضات على شفتها ونطقات بهمس)لبيبي مات ابابا
تسمع السكات من طرف إدريس ورحيل غمضات عينيها مخليا دموعها ينزلو تاسمعاتو نطق بنبرة صوت كينخللها الألم:ردي لبال لماماك أنا جاي
قطع عليها مخليها تتبكي على حالة مها وباه لي باين غير من صوتو أنه مأثر.. رجعات عند الطبيبة لي كتبات ليها ورقة وسيفطاتها أوغجون على قبل الفتيح لي غادير.. ومكملاتش ربع ساعة كان إدريس داخل لكابيني سول عليها السكرتيرة لي نعتات ليه فين كاينين ومشى لعندهوم تيجري وقلبو ملهوف على السالباه.. دخل إدريس لشومبر الفحص فين كانت تانيرت.. لقاها متكية فوق لباياص وغير بان ليها وهي تمد يديها ليه ونطقات بصوت باكي:سمحليا اإدريس مارديتش ليها لباااال هء هء مااتت ليا بنتي اإدريس مشاااات
دفن إدريس وجهو فعنق تانيرت لي زيرات عليه فالشدة تتبكي ونطق بهدوء:المهم نتي تكوني ليا بخير وربي يعوضنااا تانيرت إينو
تانيرت:(بصوت خافت)مكنتش بغيتها فاش يالاه حملت بيهاا يمكن هادشي علاش ربي بغااا يعاقبني ياااك
إدريس:(حمر فيها الشوفة)استغفري مولاك اتانيرت وبلاهاد لكلام الخاوي تاواحد فينا مايقدر يوقف قدام حكمة الله عز وجل (تبسم ليها بحنية) باقي لوقت قدامنا فين نديرو وليداتنا مزاااال
تانيرت:(تتشهق) صاااافي مشات ليا بنتي
إدريس:(تنهد تنهيدة عميقة وبااس جبهتهاا ونطق بهدوء)تهدني دابااا وفكرري فصحتك واخاا
شاف فرحيل لي كانت واقفة جنب البياص تتمسح دموعها وحرك ليها راسو بمعنى تبعيني .. رجع شاف فتانيرت ونطق بهدوء:أنا راجع واخا
مشى مخليها تتبكي وتتمسد كرشها لي كانت قاصحة ونطقات بهمس باكي:سمحيليا ابنتي سمحيليا
فبرا كانت رحيل واقفة مع إدريس تتعاود ليه اش طرا وكلام الطبيبة وغير سالات مشى عندها باش يستفسر سبب موت الجنين وكيف خبراتو الطبيبة أن الموت كان طبيعي وقلب الجنين توقف وهادا هو سبب لوفاة.. استفسر منها الحالة كثر وطمناتو بلي غادوز بحال لولادة سيزاغيان وغايجبدو منها التلاد ومن حسن حظ تانيرت عاقت بيها قبل مادوز عليه مدة ويعطي نتائجة سلبية هوما في غنى عنها.. رجع إدريس عند تانيرت باش يعاونها حيت خصهوم يمشيو لكلينيك فين سيفطاتهوم الطبيية ورحيل سبقاتهوم لبرا باش تدماري الطوموبيل ومع نزلات لتحت بانت ليها الجيپ دنوح واقفة قدام الطوموبيل دباها أو هو واقف جنبهاا داير نضاضر دالشمش وحاني راسو فالتلفون لي بين يديه.. كمشات حجبانها مستغربة من وجودو هنااا..ولكن مافكراتش بزاف فالموضوع حيت الشي لي هوما فيه كان شاغل بالها كثر.. ضارت جهة إدريس لي كان نازل من الدروج مسند تانيرت لي كانت حالتهاا عليه ونطق بهدوء: يالاه ارحيل
مشات تتجري جهة الطوموبيل دايزة قدام نوح لي هز عينو فإدريس وتقدم جهتو ناطق بجدية:طلعو أنا نوصلكوم
إدريس:(بالو كان مشطون مع تانيرت)واخا
حل ليه نوح الباب تاطلعها جلسات وجلس جنبها ورحيل بقات واقفة شادة لباب دطوموبيلة باها تتشوف فيهوم.. تبان ليها نوح جاي جهتها ونطق بنبرة جدية: سدي الطوموبيل واجي ركبي
رحيل:(كمشات حجبانها ونطقات بهدوء) ماعليش نتوما سيرو وأنا غانتبعكوم
حلات الباب وركبات فبلاصتها ونوح هز فيها حاجبو ولعب بلسانو ففمو وهو مقرب جهتها حال عليها لباب تاهزات راسها بزربة وقبل ماتهضر نطق بصوت صارم وبنبرة غير قابلة للنقاش ضارب فيها تخنزيرة قاصحة:تحركي..
رمشات عويناتها فيه ونزلات بزز منها فاش شافت ملامح الجدية مرسومة على وجهو شي لي خلاها تسرط ريقها.. سدات الطوموبيل وتمشات وهي تاتجر فصندالتهاا وعبايتها تايديها ريح.. حلاات لباب الطوموبيل لقدامي حيت لور جالس فيه إدريس وتانيرت لي متكية عليه.. وجلسات بزز منها حداه وهي ضاربة الطم.. ركب نوح وهو عاقد حجبانوو وركب السمطة وقبل مايديماري شاف فالمرايات عاد حرك الطوموييل شاد طريق لكلينيك لي غاتفتح فيه تانيرت.. كانت جالسة مربعة يديها وعاقدة حجبانها معجابهاش حيت نهض فيها بديك الطريقة.. جبدات تلفونها وسيفطات مساج لأسماء ومحمد طه وريان علماتهوم بشنو كاين وعطاتهوم لعنوان ديال الكلينيك لي غادين ليه باش يلحقو عليهوم... الخبر كان صادم لبقية لي كانو متشوقين بقدوم العنقود الصغير لي غاينور الدار ولكن قدر الله وماشاء فعل.. ربي بغاها تكون طير من طيور الجنة.. وصلو لكلينيك ودخلو ديريكت أوغجون وإدريس عقلو غير مع تانيرت لي ماسكتاتش من لبكاا.. وأي أم غاتكون فبلاصتها غاتحس بنفس مشاعرها الآن واتعرف هي باش تتحس مشات معاهوم تارحيل لي حالة مها قطعات ليها قلبها.. دارو الإجراءات اللازمة باش دخل لبلوك وفديك الأثناء كانت رحيل معاها فالبيت مور مالبسوها لفرمليات لباس العملية.. بقات رحيل تتقرا فوق راسها القرآن تاتحل لباب ودخل ريان وجهو مخطوف وموراه محمد طه وأسماء.. قرب جهتها وشد ليها يديها باسها وباس ليها حنكها ونطق بهمس:ماما نتي بخير؟
تانيرت:(بزز باش كادوي عينيها منفوخين تامبقاش البؤبؤ كيبان)همم
محمد طه:(باسها فراسها) كلشي غايدوز بخير إن شاء الله
أسماء:(تبسمات بخفوت)حنا معااك
كان كلامهوم بالنسبة ليها بحال لكالمون بالنسبة ليها هي بصح ليوم خسرات جنينها ولكن فالمقابل عندها ولاد راجلها لي كيعتابروها بحال مهوم.. جاو لفرملين باش يديوها وناضو جميع تابعين لبياص تاخرجوه لبرا فين كان إدريس واقف مع نوح.. تبسم ليها وتقدم جهتها بايس راسها ونطق بهدوء:غانتسناك ترجعي لياا تانيرت إينو
داوها وهو مشى معاهوم والبقية واقفين متبعين لبياص لي غادي وغير غبرو وهي ضور رحيل دفنات وجهها فصدر ريان لي عنقها وبزز باش شاد دموع باش مايبكيش على حالة مو.. فهاد الأشهر القليلة هوما رباو الكبدة على ديك الروح لي تزرعات فرحمها.. كل واحد كان تيخطط لكيفاش غاتكون حياتو معاهاا وتعلقو بيها وكانو يتسناو بفارغ الصبر أنها تجي لدنياا ويعيشو معااها كيف عاشو مع سيدرا فصغرها ولكن ربي عندو حكمة وماعمرنا نيأسو من الحكمة ديالو وديما مانساوش بلي ربي مكياخد منا الحاجة تاكيعوضنا بحوايج خراا عمرك تيأس من رحمة الخالق وديما صبر وتأكد بلي ربي غايجازيك على الصبر ديالك..
دازت العملية بخير وعلى خير وطلعو تانيرت لشومبر وهي مبنجة وعطاو لإدريس لبيبي باش يدفنو.. كان واقف تيشوف فيها وهو هازو بين يديه بدا كيتكون اليديدات ورجيلات واخا باقي ممفرزش مزيان.. نزلات دمعة من عينيه ونطق بهمس:الله يرحمك ابنتي (زفر النفس)الحمدلله
دارو فصنديقة وخرج هازها تاوصل لعندهوم ورحيل شافت فيه وفالصندوق ونطقات بصوت باكي:هي
حرك إدريس راسو باه وهي تقرب جهة الصندوق باستو ونطقات بهمس:الله يرحمك اختي
نوح:(قرب جهتو وحط يديه على كتف إدريس ونطق بهدوء)طير من طيور الجنة الله يرحمها راه دويت مع السيد كيتسناونا
حرك ليه إدريس راسو وخرج هو وياه ومعاهوم تاريان ومحمد طه غادين لمقبرة يدفنوهاا.. أما لبنات فمشاو لشومبر عند تانيرت يبقاو معاه تاتفيق..
---
ملي فاقت تانيرت وزال لبنج منها وهي غير ساكتة قليل فين تجاوبك... سيزاغيان كان قاصح وخصوصا فأول وقفة ليه كانت صعيبة بزاف ومع دلك صبرات.. كل نهار يجيو عندها لبنات وتاكلثوم لي تأسفات ليها على شنو طرا معاهاا..وليوم كان النهار الثالت لي غاتخرج فيه كانت معاها رحيل لي ماخلاتها تادقيقة رادة ليها لبال.. خرجات وهي شادة فيها وتتمشى بشوية عليها تاوصلات لبرا فين كان إدريس كيتسناهوم وباين فيه تاهو من الشوفة راه مدمر وغير ساكت وصابر كيف عادتو كيرجعها لداخل ومكيدويش.. تبسم ليها وعاونها تاركبات فلقدام عاد تحركو راجعين لدار.. لقات تانيرت الكل فاستقبالها وتاحد معاود جبد ليها سيرة لبنت باركة غير حزنهوم عليى فقدانها.. عاونها إدريس تاوصلات لبيتها لي كانت غزلان معطراه ومسيقاه تارجع كيشعل وتخشات بلاصتها ومع جا يخرج إدريس شدات فيديه ونطقات بخفوت: مامقلقش مني؟
فبرا كانو لبنات مدابزين مع التقدية لي حابو الدراري حيت إدريس ناوي يدير هاد الليلة صدقة على قبل روح بنتو.. تكلفات كلثوم بالطياب مع عندها مع داكشي لبلدي وحلفات عليهوم بلي هي لي غاطيب واخا عيى معاها محمد طه وأسماء ترتاح ولكن قصحات راسهاا.. كانت ريحة الدجاج مدغمر واللحم تاتشم من بعيد.. بقات سيدرا واقفة قدام لباب تاتشوف فيهوم ومافهمااش شنو طاري.. تاقربات جهة رحيل جراتها من سروال بيجامتهاا تاشافت فيها ونطقات ببرائة: مامي علاش تانيرت إينو جات بوحديتها فين مومو لي عندها فكريشة
تنهدات رحيل وهزاتها مخرجاها من الكوزينة غادة بيها لبيت باش تشرح ليها شنو واقع حيت عارفة بنتها مغاتسكتش من الأسئلة وتباركالله من الصغر قويفزة ولالقطات شي كلمة معرفاهاش مغاترتاح تاتعرف لمعنى ديالها.. تبسمات ليها رحيل ونطقات وهي تادوز يديها على شعرها: سمعي امامي لكلام لي غانقولو ليك هنا مانبغيكش تعاوديه قدام جداك واخا
حركات ليها سيدرا راسها باه ورحيل تنهدات:مومو لي فكريشة مبقاش ابنتي مشى عند الله
سيدرا:وعلاش مامي (شدات يد رحيل) واش مومو تقلق مني حيت مبغيتوش (حركات راسها)صافي مامي أنا بغيتو والله وغانعطيه ألعابي ونبقا نينيه حدايا ونعطيه حلويات امامي
رحيل:(حضناتها عندها) حيت ربي بغاه امامي عليها مشى عندو وهو ممقلقش منك
سيدرا:(عنقاتها تاهي)واش هو كيطير فالسما بحال بابا؟
غمضات رحيل عينيها وبلاماتحس زيرات عليها فالتعنيقة ومجرد دكر اسمو خلى التبوريشة ديال التقزز والخوف تسرى معاهاا.. نطقات ببرود:اه (بعداتها عليها ونطقات بملامح باردة) سيري لعبي مع إيڤانا
سيدرا:واخا مامي
مشات سيدرا مخلياا رحيل باقا جالسة فبلاصتها ولداخل ديالها كان بحال شي موجة هايجة كاضرب مشاعرها وكل مرة فين لايحاهاا.. ملي تجبدات سيرتو على شفاه بنتها حسات بقلبها شاعلة فين نااار گايدة صعيب تطفى.. ماكرهاتش تغوت فوجه بنتها وتقول ليها هاداك بلاصتو جهنااام أما الجنة بزاف عليه على مادار فياا وفالناس لقرابين لياا ولكن ماتقدرش حيت مباغاش بنتها تعقد من صغرها.. تفضل أنها تعدب هي وتحرق هي على أن بنتها تقااااس ليها بنبشة ولانفسيتهاا تأثر.. داكشي علاش تتحاول ماأمكن تنقي ليها طريقها من الشووك واخا تضرب هي وتجرح لمهم عندها بنتها تكون مرتاحة ومافيها تانبشة.. مسحات وجهها بيديها وناضت ببرود غادة تكمل شغالها..
----
"مامقلقش مني"
ديك الهمسة لي خرجات من شفايفها خلات جبل صمود إدريس يتهد قدامها ويقرب جهتها معنقها عندو بالجهد وفنفس الوقت راد لبال لكرشهاا.. كان عنااق محتاجينو هوما بزووج وكل واحد كان تيستامد طاقتو من التاني.. يعد عليها وشد وجهها بين يديه ونطق بصوت تقيل:مقلق منك حيت تتحملي نفسك حاجة فوق طاقتك اتانيرت إينو هادشي مكتب علينا بزوج وحنا مغانعتارضوش على لمكتاب وخصنا نحمدو الله.. مانبغيش نشوف دموعك مزال حيت تيمرضوني.. ديها فصحتك وماتخليش بالي يتشطن عليك
تانيرت:(دموعها نزلو)سمحليا اتسانو سمحليااا أنا
إدريس:(قاطعها)ششش ماتكمليهاش مزااال أنا عمري هزيت فخاطري من جهتك وعمري غانهز ودابا رتاحي تايجيبو ليك لبنات متاكلي غانمشي ندوش ونشوف اش خص على قبل الصدقة لي غادار الليلة
تانيرت:واخا
تكات بلاصتها وهو مشى يدوش ويحيد لعياا ديال هاد ليام لي مرتاحش فيهوم..تاتحل لباب ودخلات سيدرا لي هازة معاها واحد البكية دالشكلاط قربات عند تانيرت لي تبسمات ليها وجلسات جنبها فالنموسية ونطقات بحب:تانيرت إينو جبت ليك شكلاط باش تاكليه وتبراي ليا دغيا
تانيرت:(حطات يديها على حنكها) ناكلو كولو
سيدرا:اه تانيرت إينو ولكن دوقيني أنا وبّا ديدي
تبسمات ليها تانيرت بهدوء وسيدرا قربات عندها بشوية واقفة على ركيباتها وبدات تتمسح ليها دموعها لي على خدودها.. وباستها عليهوم ورجعات شدات وجهها بيديداتها الصغاار ونطقات بصوت طفولي بريء:أنا هنا تانيرت إينو صافي نتي ماتبكيش ليا واخاا..
كلام سيدرا كان نابع من قلبها وحنيتها وصوتها البريء خلى دموع تانيرت تنزل كثر.. حضناتها تانيرت وهي تتعض على شفايفها.. هي بصح فقدات جنينها ولكن ربي عوضها بسيدرا.. هي لي كبراتها وهتمات بيها فتفاصيلها كلهوم برفقة إدريس.. وتاسيدرا متعلقة بيهوم بزاااف حيت حلات عينيها عليهوم وكبرات وسطهوم بزوج.. بقات تانيرت معنقة سيدرا لي ماتحركاتش وسط حضنهاا تاخرج إدريس من لحمام مبدل حوايجو وشعرو الكحل باقي سارد بلماا... تبسم بخفوت على منظرهوم وقرب جهة الطابل دونوي خدا بزطامو وتلفونو والسوارت ورجع شاف فتانيرت:أنا غادي دابا الاحتاجيتي شي حاجة قولي لبنات يعلموني
تانيرت:(تبسمات ليه بتعب)واخا
سيدرا:صافي بّا ديدي غير سير أنا هنا
إدريس:(تبسم على كلامها) واردي لبااال لجداك واخا
سيدرا:(بصوت جدي ممناسبش عمرها)كون هاني بّاديدي
خرج من لبيت غادي لكوزينة يشوف اش خص يجيبو ودراري راه تاواحد ممشى لخدمة ليوم وكل واحد فين مخشي.. تاتعشات العشية وطاح الظلام كانو مستفين فالصالة التحتانية الطوابل بالكراسى ديالهوم وزوج دراري سربايا مكلفين تيقادو لبلاصة.. گاع الناس لي كيعرف إدريس راه جايين وتامن الجيران ملي ساقو لخبار جااو.. بدات الدار كاتعمر ولعيالات داروهوم فالصالة الثانية لتحت والرجال فالصالة الكبيرة.. كان إدريس واقف حدا الباب مگابل الصغيرة والكبيرة.. تابانت ليه الجيپ دنوح تابعاهاا رانج روفر دبيسان داخلين مع لحومة.. ومع باب الدار عامر بالطوموبيلات دمعارف إدريس مكاين فين يبلاصي..نزل نوح الزاج وكان جدو جالس جنبو قرب جهتو إدريس ونطق وهو كيشير ليه لقدام:راه كاين بلايص لقدام فين تبلاصي
حرك ليه نوح راسو باه وكمل لقدام تالقى فين يبلاصي هو وبيسان عاد نزل تيقاد سمطة دالسروال لي لابس.. تحل لباب لوراني ونزلات منو رحمة هي وزاينة جداه.. اما فطوموبيل بيسان فكانت راكبة هي ورؤوف ومعاهوم سناء وشيماء لي لصقات فيهوم.. سبق نوح هو لول مع جدو وتابعو رؤوف سلمو على إدريس لي وصلهوم لداخل وعينو تتقلب على شي وحدة من لبنات باش يوصلو لعيالات تابانت ليه رحيل نازلة بعباية خليجية ولايحة عليها فولار فالغوز بارد.. هزات عينيها وماتجي غير فولد لحاج لي كان واقف جنب باهاا.. سرطات ريقها بتوثر خصوصا فاش شاف فيها بدوك الشوفات لي مكتعرفش معناهوم.. مقلبش عينو عليها وبقا متبعها تاوصلات لعندهوم أو وقفات قدام جداه لي عنقاتها ونطقات بنبرتها الحنينة:استيرحم ربي أيلي يرزقاون صبر نس "الله يرحمها ابنتي ويرزقكوم صبرها"
رحيل:(فهمات شي حاجة داكشي علاش نطقات بهدوء) آمين
رحمة:(سلمات عليها بلابيز) الحمدلله على سلامة ماماك والله يصبرها
رحيل:الله يسلمك شكرا
بيسان:(عنقاتها)ماشيغي الله يرحمها ملي سقت الخبار بقا فيا الحال بزاف الله يصبر ماماك والله يعوضها
تبسمات ليها رحيل بخفوت ومشات معاهوم لعند لعيالات لي مكانوش بزاف بحكم ماعندهومش معارف هنا.. جلسو فطبلة خاصة بيهوم وزاينة شدات فرحيل لي تحدرات جهتها ونطقات: ريغ أدزراغ مام "بغيت نشوف مك"
رحمة:حتى أنا الاكان ممكن؟
رحيل:(بلباقة)واخا اجيو معايا
شدات زاينة فرحيل وموراهوم رحمة لي هازة صاك بوشيط فيديها ولابسة جلابة كحلة مخزانية وشعرها لايحة عليه شال.. دازو جنب نوح لي كان واقف مع إدريس وحرك راسو لمو لي تبسمات ليه وكملو طريقهوم لفوق عند تانيرت لي متكية وجنبها سيدرا لي ماخلاتهااش وحدها نهار كولو وهي معاها.. صوت القرآن تيتسمع لعندها وهي ساكتة تتسمع ليه وتردد فخاطرها "الله يرحمك ابنتي" دخلو عندها وهي غير شافت زاينة تشبتات فيها معنقاه بالجهد..خلاتهوم رحيل وخرجات وهي حاسة براسها عيانة بزاف..مشات لكوزينة لقات كلشي واجد والماكلة تاهي وجدات.. وهادشي مكلفين بيه السرباية وغزلان لي فيما تخصهوم شي حاجة تجبدها ليهوم واقفة على شغالها
رحيل:صافي كلشي هو هاداك؟
غزلان:اه غايعمرو أتاي باش يدوزوه مع الحلوة غانمشي نبدل عليا ونجي واخا
رحيل:سيري
خرجات رحيل لبرا وجلسات فوق الكرسي وهي تتنهد.. تاسمعات لحس وهي تهز راسها وبانت ليها شيماء لي كانت تاضور راسها يمين وشمال باينة فيها تتقلب على شي حاجة.. ناضت جهتها رحيل ونطقات بهدوء:وي ختي محتاجة شي حاجة؟
شيماء:(هازة راسها لسما تتشوف فيها بشوفات ناقصين)بغيت لحمام
رحيل:(هزات فيها حاجبها ببرود)هاهو لهيه
مشات جهة لحمام بلاماتشكرها ورحيل رجعات جلسات بلاصتها تتحرك راسها بلاحول.. تاخرجات عندها سيدرا وهي تهزها جلساتها فحضنها ونطقات بحنية: مامي فيك الجوع
سيدرا:لامامي مافيااش (شافت فيها) مامي شكون كاين لتحت؟
رحيل: كاينين الناس بزاف
سيدرا:نمشي عند مودي حبيبي
رحيل:سيري وماتخرجيش لبراا
السرباي:(جا لعندها)ختي باقي غايجيو الناس ولانفرقو أتاي ولحلوة دابا؟
رحيل:باقي شوية اخويا ملي توصل لوقيتة غانعلمكوم
نزلات رحيل لتحت ودخلات لصالة ومع الصالة فين كاينين الرجال جات فالواجهة وفوسط الطريق.. قلبات راسها وسط الرجال تتقلب على باها مبانش ليها تاقشعات إسلام وهي دير ليها بيديها "اجي" ناض لعندها تاوقفو بعيد ونطقات بهدوء:فين بابا؟
إسلام:غالبا غاتلقايه برا علاش محتاجة شي حاجة؟
رحيل:بغيت نسولو واش غايجي شي حد مزال حيت السربايا بغاو يدوزو أتاي
إسلام:(شاف فساعتو) باقي شوية
كانت رحيل محنية راسها تاتسيفط مساج لمحمد طه تسولو واش عندو سيدرا تاحسات بيد إسلام تحطات على كتفها ونطق بهدوء:نتي غير سيري وأنا غانسولو ونرد عليك..
فالسطح كانت واقفة مور متأكدات بلي تاحد متابعها ومارادش ليها لبال وجبدات من جيب الجلابة لي لابسة تلفونها وغير حلاتو وهي تشوف لزابيل لي وصلوها من نفس النمرة.. دوزات الخط وفنفس الوقت كانت رادة لبال لايجي شي حد وغير تفتح لخط وصلها صوتو لي نطق بنبرة قاصحة:علاش مكتجاوبيش از*بي
نطقات بهمس وعينيها كيضورو هنا ولهيه:ياك تانقول ليك ماتبقاش تصوني عليا والاكانت شي حاجة أنا نعيط ليك ابدر الدين..
بدر الدين:(بنبرة باردة)وماتنسايش علاش نتي تما اكلثوم..
🔙🔙
الشر بعض المرات كيوصل مولاه أنه يتعمى وعقلو يطفى وميبقاش يفكر.. مكيبقاش يفرق بين الصح والغلاط فمابالك الاكان هاد الانسان الشر ماشي ليه فالدم والحسد والغيرة كيغدي بيه روحو.. الحسد لي حاسة بيه كلثوم جهة تانيرت خلاها تبغي دير أي حاجة باش تخرج ليها على حياتها.. سبق نجحات فالماضي ملي فرقاتهوم بخبثها ودابا رجعات باغا تكرر هادشي ولكن بطريقة خرى.. نهار عرفات راسها مريضة بالكونسير فالوالدة حسات بلي الدنيا ضارت بيهاا ومتيقاتش وبلاصة مااتندم وترجع لطريق وتستفغر مولاها على گاع داكشي لي دارت كانت غير مزايدة فيه.. دخلات لبيتها وسدات الباب عليها وبدات تتبكي وتشهق.. تاضرب كرشهاا وتترجع كلام طبيب لي قال ليها بصحيح العبارة "الكونسير عندك فالرحم انتاشر وغايخصنا نستأصلو ليك الرحم قبل ماينتاشر الكونسير" طايحة الأرض والمرارة ديال ديك الهضرة خلاتها باغا تهبااال.. دخلات إيطو عليهاا وبقات تاتشوف فيها ومعرفاش مالها..
إيطو:(متكية على عكازها)تي اش سايرة ديري فراسك
كلثوم:(تتبكي وتشهق)فياا الكونسيرر امي (شهقات بالجهد) فيا الكونسير فالوالدة
إيطو:(خرجات عينيها ومع عندها وحدة ديجا خارجة بانت تاتخلع)تي شكون گالهاا ليك
كلثوم:(عينيها حمرة)دوزت عند الطبيبة على قبل الد'م لي عندي فيها مشكيل وهي تقول لياا اش كاااين (هزات فيها لعين)غايخصني ندير عملية باش يزولو ليا الوالدة امي
حدرات راسها تتبكي ولغصة واقفة فحلقها.. أما إيطو حركات راسها يمين وشمال ونطقات كيف لعادة بكلام كيف السم مدارت لابحساب بنتها ولاتاشي حاجة:اييه هادوك مايكونو غير دنوب الشلحة شفتيها هي مكملة حياتها وحملات ونتي تتخلصي اش درتي يابنيتي..
مشات تتعكز وتقول واش فكرات فهاديك لي طايحة فالارض روحها باغا تخرج.. قالت كلامها وبخات سمها فوجهها مخلياها تزيد تحقد على تانيرت مع العلم هي مدارت ليها تاشي حاجة ولكن كلام مهاا خلاهاا تسهي وتشوف حالتها كيف كانت وكيف ولات وتشوف الشلحة كيف عايشة مكملة حياتها وحاملة وفرحانة.. بقات جالسة فبلاصتها وعينيها حمرين كيلمعو بالشرر.. كلام مها زاد خلى لعافية تشعل كثر وزادت فيخرات عليهوم.. هي مانساتش اش طرا معاها بسباب تانيرت والدهب لي تكساب ولي مشى ليها نهار بغات تس'حر ليها.. ساكتة تاتشوف حياتها لي غادة وتترجع باللور وتخراب عليها وحياة تانيرت لي غادة وكاتزيااان والدنيا تاضحك ليها.. مقارنات تاديرهوم بينها وبين مخها تايزيدو يخليوها تكره تانيرت ونهار لي شافتها فيه.. بقات ساكتة تاسمعات صوت تلفونها وضارت تشوف شكون لقاتو محمد طه.. مسحات دموعها وجوباتو عادي وقطعات.. وبواحد لهداوة طاحت عليها ناضت تتزول جلابتها ودمعة معاوداتش طاحت من عينيها.. يوماين دازت وهي حابسة راسها فبيتها تامن الماكلة مكانتش تاطيح فكرشها وگاع خوتها وعيالاتهوم ساقو لخبار لمرضها وهي محملات تشوف تاحد فيهوم.. هاد ليوماين لي دازو محبساتش فيهوم من التفكير وفأخر لمطاف دوزات الخط لنمرة محمد طه لي جاوبها بعد مدة:الواليدة لباس
كلثوم:(بصوت باين فيه حزين) مالباس والو أولدي
محمد طه:(مكمش حجبانو)مال صوتك ياك لباس شكاين؟
كلثوم:(تنهدات وقالت بصوت مضيوم) نتا فين بغيت نشوفك
محمد طه:(باين فيه مخلوع)اش واااقع مالكي؟؟
كلثوم:(بصوت خافت نطقات)مك اولدي باغا تشوفكوم قبل مايدي مول الأمانة أمانتو
محمد طه:(هضرتها خربقاتو)مافهمتش
كلثوم:(بصوت حزين)مك فيها لكونسييير..
دموعها نزلو وشهقاتها بداو كيتعلاو تاقطعات لخط مكملة بكيتهاا.. هاد ليوماين كلها وهي تتفكر فهاد لخطوة.. كانت عارفة بلي محمد طه ملي يعرف بمرضها غايدير كل مافجهدو باش يعاونها داكشي علاش تقولها ليه حيت عارفة محمد طه مغايسمحش فيها وهي محتاجاه.. وماشي غير هو تاأسماء لي عطيات ليها تسول فيها تاهي.. ومن داك النهار وهوما كيعيطو ليها يومين تيسولو فيها وهنا لاحظات كلثوم الفرق بين قبل ودابا وشافت اهتمامهوم بيها..
كانت راجعة من واحد ليلة لحناا مشات ليها ونقشات فيها لعروسة وهي هازة صويك وغادة فالطريق تابدات تتسمع الكلاكسون مع كانت غادة جنب الشانطي ضارت بانت ليها طوموبيل مرسيديس كحلة وزاجها تاهو كحل مكيبينش شكون لداخل.. طلعات فوق الطروطوار مكملة طريقها وهي تعاود تسمع لكلاكصون طوموبيل لي كانت غادة حنبها بشوية.. خنزرات وضارت وهي ناوية تسب حيت سحاب ليها بلي كيتبسل عليها.. وقفات الطوموبيل ونزل منها إلياس لي كان غادي جهتها ومع وقف قدامها وهي تخنزر فيه ونطقات بغضب:ياك لباااس اش باغي من الصباح تكلاكصوني واش مكتحشمش على عراااضك الشرريف
إلياس:(هز فيها حاجبو) عندي معاك هضرة اكلثوم
كلثوم:(بلعات كلامها لي كانت غاتنطق بيه وكمشات حجبانها باستغراب)نتا ملين كاتعرفني؟ (بخوف) وشكون نتا؟؟
إلياس:(تبسم ليها)ماتخافيش والاجيتي معايا اتعرفي شكون أناا
كلثوم:(رجعات خطوة لور وحركات راسها يمين وشمال) فين كانعرفك أنا باش نمشي معاااك بعد مني اخوياا
إلياس:(هز حاجبو فيها) متتعرفينش أنا ولكن كانظن تتعرفي عاصم الجوهري (وبنضرة دات معنى) وتتعرفيه مزيااان والاجيتي معايا غاتفهمي كلشي
حلات فيه كلثوم عينيها وهي تتشوف فيه بشوفات خايفة وفنفس الوقت فضولية.. شكون هادا وفين كيعرفها وتيعرف عاصم والأهم شنو باغي منها.. بقات تاضور عينيها فالبلاصة قبل ماترجع تشوف فيه وهو سابقها لطوموبيل.. بقات تاضورها فراسها وفاللخر دارتها فيد الله ومشات معاه..
ركبات فالطوموبيل وهي تاضور عينيها وخاشية يديها فالصاك تحسبن لأي مشكيل تقدر تلقا تلفونها جنبها.. وصلو قدام واحد الكافي وكلثوم زادت كمشات حجبانها وغير شافت البشار والهراج رتاحت شوية... نزلات من الطوموبيل تابعة إلياس لي دخل طالع الفوق وهي غير تابعاه وضور فعينيها كي موكة ولي خلاها تزيد تزعم تجي معاه فاش عرفاتو من طرف عاصم... وصلو لفوق لي كان خاوي عكس لتحت وعينيها ماتجي غير عليه هو لي عاطيها بالضهر وسحابة ديال الدخان فوق من راسو.. تمشات تاوقفات قدامو وهو يهز فيها عينو بشوفات باردة.. حرك ليها إلياس الكرسي باش تجلس وغير شدات بلاصتها وهي تسمعو ناطق بنبرتو الباردة:تتسولي راسك شكون أنا ونتي اش كاديري هنا وفين كنعرفك ياك؟ (طفى الگارو فالطفاية وتحنى جهتها ونطق وعينو عليها) أنا عارف عليك حوايج بزاااف ومغانكرش بلي عجبوني
كلثوم:(طريقة الهضرة ديالو زادت فشلات ليها الركابي.. شافت فإلياس ورجعات شافت فيه) نتا شكون؟
بدر الدين:بدر الدين الجوهري عم عاصم (هز فيها حاجبو) غاتكوني عقلتي عليه ياااك؟
داكرة كلثوم فكراتها فنهار سمعات لابيل دعاصم وعرفات نيتو وبقات ساكتة.. أما بدر الدين طلقها بواحد الضحكة وكتافو كيتهزوو.. مانساش نهار عاصم عاود ليه عليها داكشي لي خلاه يجيب ضوسيها كامل ويسول عليها قبل ماتجي تجلس قدامو دابا..
بدر الدين:(سيفتو دغيا تقلبات) عندي بيك غراض
تحنى لقدام كثر وعينو فعينيها وهو كيدوي وهي كاتسمع ليه ساكتة وتاضور عينيها بينو وبين إلياس ومغاتنكرش بلي خايفة وغير الشوفة فيه تتجيب الرعب.. رجع بدر الدين ضهرو لور وهو حاط رجل فوق رجل بجلسة رجولية وعينو على هاديك لي جالسة قدامو وتتشوف فيه بنظرااات خائفة ومتوثرة..تبسم وقال بصوت بارد كالصقيع:غاديري لي قلت عليه بلحرف..
كلثوم:(هزات حجبانها) وكيفاش غاندير ليها واش عارف راسك اش كطلب مني راه مستحيل نقدر ندير لي باغي وزيد أناا اش غانربح من هادشي كامل؟
بدر الدين:(تبسم بالخف وهو عارفها اش تتسوى) لاكنتي دكية غاتعرفي اش غاتربحي وبيما أنك مريضة بالكونسير فغاتلقاااي كيفااش ديري ودخلي وسطهوم (هز فيها حاحبو) أولا كدبت؟
سكتات كلثوم وهي تتشوف فيه وتتسمع كلامو ومغاتنكرش أن هادشي هي كانت فكرات فيه ونوات ديرو.. ولكن لي خالعها هو هادا لي جالس قدامها داكشي لي باغي يدير صعيب والاجاب الله عرفوه غاتمشي فيها ولكن فنفس الوقت داك السم لي فيهاا خلى الفكرة تلمع فدهنهاا والشيطان زينها ليهاا وخصوصا فاش فكرات فتانيرت وبلي هاديك غاتكون دقة اللخرة ليهاا... شافت فيه ونطقات بهدوء:خاصني نفكر وزيد أنا مضامناش بلي نقدر ندخل وسطهوم نتا معارفش إدريس
بدر الدين:ولكن نتي عارفاه وكنظن وحدة عاشت مع واحد هاد السنين كلها غاتكون حفضاتو وغاتعررفي كيفاش تقدري تلعبي عليهوم كيف لعبتي شحال هادي (كحز لكرسي وناض شاف فيها ونطق) فرصة بحال هادي مكتعوضش اكلثوم
عطاها بالضهر ومشى بينما إلياس وقف وحط قدامها ورقة فيها النمرة بلامايدوي تاهو تبع بدر مخلينها تتشوف فديك الورقة وفلخر ناضت مكمشاها فيديها وخرجات من تم شادة الطاكسي وبالها كيفكر فكلامو..
🔜🔜
زفرات النفس فاش سمعات هضرتو ورجعات هازة راسها جهة لباب ورادة البال وبصوت هامس نطقات:مانسيتش وتانتا ماتبقاش كل مرة تعيط لاكانت شي حاجة مهمة راه غانعلمك بيهاا
بدر الدين:(بنبرة تهديدية)واياااك تفكري تلعبي ورا ضهري اكلثوم
كلثوم:(نطقات بسرعة) غايخصني نقطع دابا قبل لايجي شي حد ونصدقو لاديدي لاحب لملوك
قطعات لخط ومشات مسحات لزابيل كاملين لي صونى عليها وتالي دوزات ليه عاد زفرات النفس وهي هازة راسها وعينيه كيشوفو فبعيد.. هي قبلات بخطة بدر الدين وبمساعدتها ليه ودارت يديها فيد الشيطاااان لي سبق وخرب ليهوم حياتهوم.. هادشي كولو ماهمهاش حيت لي همها دابا هي ترد دقتها لتانيرت وماتخليهااش تعيش مرتاحة.. حطات يديها على الصور وتكات عليه وعينيها على إدريس لي كيبان ليها واقف فالزنقة تيدوي مع شي رجال.. من نهار شافتو وهي باغاه ليها اهتمامو لي شافت وحبو لتانيرت لي كيبان فعينيه خلاها تغير منها وتقارن راسها بيهاا.. وحدة عاشت فالعز وكبرات فوسط واليدين لباس عليهوم ولي بغاتو لقاتو وزيد عندها راجل كيموت عليهاا ومستاعد يدير على قبلها كلشي هادشي كولو خلاه تحسدها وتبغي تاخد بلاصتها وبدات تحفر ليها تاطيحاتها فديك لحفرة وهمات راسها بلي هادشي لي كادير فيه هو الصح تعماو عينيها والحسد مخليها دير حوايج لعقل مايتقبلهومش... وحسدها خلاها تستاغل داك لمرض لصالحهاا وأي واحد بعقلو يستحيل يديرها ولكن كلثوم العقل لي يفكر طفاااتو وخلات غير الكره ديالها جهة تانيرت وحبها المعمي لإدريس هو لي يمشيهاا.. استاغلات ولادهاا ولعبات على نقط ضعفهوم دارت راسها ندمات على مادارت باش تزيد تبت ليهوم بلي هي عرفات غلطها.. باش تخليهوم يشفقو عليها وبالغعل وصلات لشنو بغات وهاهي دابا وسطهوم تتلعب على لحبولة بزوج تفرق تانيرت وإدريس على بعض وتعاون بدر الدين يدير مابغى..
رجعات شيماء لبلاصتها ولقات غير بيسان وسناء لي كاينين فالطبلة ورحمة وزاينة باقي مارجعو.. ضورات عينيها على لعيالات تاتشوف فيهوم وهي معاجبها حال شافت بيسان ملهية مع تلفونها وهي تحنى جهة سناء ونطقات بهمس:ماعرفتش لاش جايين لهنا اووف لجوو كيخنق
سناء:(هزات فيها حاجبها) نتي لي جيتي وحد مابزز عليك
شيماء:(فرفرات بعينيها تتميق)اوا شنو بغيتي تخليوني وحدي فالرياض
سناء:اوا لاتشكيشاااي عليناا (شافت تلفونها لي كيصوني بنمرة ختها لكبيرة ونطقات) أنا راجعة
بقات شيماء تتقلب عينيها وتتفكر السبب لي خلاها تجي.. ملي سمعاتهوم غادين لشي صدقة ديال شي حد من معارف نوح بلاماتفكر زوج دلمرات قررات تجي تاهي معاهوم.. خصوصا هاد ليوماين كلهوم وهي مشافتوش مع كان فالفيرمة ويادوب جا يديهوم وغير ديك الشوفة لي شافتو خلات قلبها يضرب وتفرح.. حاولات ماأمكن تلبس أحسن ماعندها باش ملي يشوفها تعجبو ساعة الشوفة هي اللخرة ماهزهاش فيها ومعتابرها بحال الامكينااش.. كمداتها فعضامها ولكن مجرد مشافت الناس لي جايين عندهوم وشافت بالخصوص رحيل عينيها تعمات وتفكرات نهار شافتهوم فالرياض بداك القرب لي عمرها شافت فيه نوح مع شي وحدة حيت عارفاااه كيف داير وبلي ماشي من النوع لي أي وحدة تجدبو وتخليه يقرب منها بلعكس كيقتلك غير بالباااارد وعدم الاهتمام وهادشي لي خلاها تحس بالخطر من رحيل بلاماتشعر.. حطات بيسان تلفونها فوق الطبلة وزفرات بتعب:اوف لخدمة تابعانا تال هناا (قلبات عينيها يمين وشمال) اجي فين خالتو؟
شيماء:كون كنتي عايشة معانا كون رديتي لبال بلي جاتها أبيل
بيسان:(تبسمات ليها تبسيمة صفرا)الامكنتيش غاتحاوبي كيف الناس غير سدي فمك وهنينا
شيماء:(حركات راسها بلبرود) أنا حرة ففمي نقول لي بغيت
بيسان:(هزات تلفونها)ريحة السم لي فيك عطاااات هناا حسن ليا نمشي نشم هوااا نقي حيت لهواا هنا تلوت
مع قالت كلامها خرجات ومخلية شيماء غاتموت فسمها.. من ديما وعلاقتها بيها ماشي تال هيه ودوغيجين مكيتحاملوش.. خرجات بيسان لبرا وعينيها كيقلبو على شي وحدة من لبنات باش توصلها عند تانيرت.. دايرة يديها فجياب السروال التوب لي لابسة فالرمادي وغادة تاوصلات جهة الدروج وهو يبان ليها إسلام وعرفاتو كيجيهوم.. عليها قربات جهتو ونطقات بأدب وتبسيمة خفيفة على شفتها:واخا نسولك
إسلام:(شاف فيها بجدية)وي مرحبا؟
بيسان:بغيت نمشي لعند خالتي تانيرت
إسلام:بيتها لفوق على يديك ليسر
بيسان:شكرا ليك
تبسمات ليه ومشات مكملة طريقهاا تاوصلات لطبقة التانية وغير طلات مع لباب بانو ليها الصالونات وهي تكمل طريقها لفوق عند بالها هاديك الطبقة مافيهاش لبيوت وتاإسلام ماوضحش ليها اشمن طبقة.. دخلات تاضور عينيها على لبيبان تاحل واحد منهوم وخرج منو ريان لي كان على عكس عادتو ساكت وباين فيه مطفي وماشي كيف مولف.. هز فيها عينو وهي بقات واقفة بلاصتها تاتشوف فيه تاقرب جهتها ونطق:شكاديري هنا؟
بيسان:(هزات حجبانها)بغيت نشوف خالتي تانيرت
ريان:بيتها فالطبقة الوسطانية ماشي هنا
بيسان:(بكبرياء)مكنتش عارفة حيت لي نعت ليا ماوضحش اينا طبقة على كلٍ دزولي
ضارت تمشي وهي تحس بيديه شداتها من لكود وضورها جهتو.. هبطات عينيها ليديه وشافت فيه:واش حماقيتي علاش شاد ليا يدي؟
ريان:(خنزر فيها)مالك ابنادمة كلمة زوج تهزي علينا وطرطقي كيف الگلية ياك اودي شباس مكااااين
بيسان:(رجعات شعرها لور وهي معصبة)واش نتا مكتعرفش تهضر بطريقة مأدبة وزايدها شادني ياك لباس
ريان:(بدات تاطلع ليه الزعاف ومع مرشقاش ليه جرها عندو ونطق بصوت بارد وهو مقرب وجهو لوجهها) عندك يسحاب ليك ميت عليك راه غير باغي نقول ليك بلي سروالك فيه طبعة ديال الد'م (وختمها بسخرية)امون دكتوغ
طلق منها وخلاها حالة عينيها من كلامو ومدات يديها جهة السروال.. بان ليها باب الحمام مردود مشات ليه كاطير ومع نزلات السروال بانت الطبعة قدها قدااش خلاتها تولو على الشوهة لي تشوهات والرجال لي دازت حداهوم فالصالة..ديما لغيگل مشوهاها ولكن هاد الشوهة فين تبااان لي سبق..جبدات تليفونها مسيفطة لرحيل مساج..وغير شافتو وهي تنوض غادة عندها لفوق لقاتها جالسة تتبكي وتولو.. شرحات ليها اش كاين ومشات رحيل تجيب ليها عباية وحوايج جداد دلداخل وأولويز باش تبدل..
رحيل: هاكي واش محتاجة حاجة خرا؟؟
بيسان: لا شكرااا بزااف وسمحيليا
رحيل:مرحبا ازين
تنهدات رحيل وهي حاسة براسها ماشي تال هيه مخنوقة وزيد الشقيقة هلكاتهاا.. مشات خدات دوليبران عالله وعسى داك الصداع يحيد... بقات واقفة فالكوزينة كاتزفر النفس وهي حاسة بالضبابة بدات تتبان ليهاا.. ماعرفات مالها وشنو واقع ليها خرجات من الكوزينة وهي حاسة بالصهد وتكات على لحيط تاترد النفس تاجا عندها واحد السرباي ونطق بهدوء:ختي واش لباااس
رحيل:(تتحل عينيها وتسدهوم) وي غير الدوخة حسيت بالدوخة
السرباي:نعاونك تاتجلسي
رحيل:لاشكرا شوية وغاتمشي
خلاها واقفة تاتزفر النفس وغير حسات براسها شوية وهي تمشى جهة بيت تانيرت طل عليهاا وقبل ماتوصل طاحت فالأرض مغبية...
مور مابدلات حوايجها ونقات حالتها وديك الشوهة لي تشوهات ولي عمرها غاتنساها.. هزات حوايجها الموسخين دايراهوم فبلاستيكة وخرجات من لحمام بعباية كحلة جاتها قصيرة شوية بحكم هي طويلة على رحيل وزيد لابسة صندالة عالية.. نازلة لتحت وغير وصلات لطبقة الثانية وهي تبان ليها رحيل لي منشورة فالأرض طايحة سخفانة.. خرجات عينيها وطلقات لبلاستيكة ومشات تتجري وهي مخلوعة عليها.. تحنات حداها وهزات ليها راسها حاطاه على فخدها تاضرب فيه بالخف وتتعيط ليها بسميتها:رحيييل رحييييل (هزات عينيها ونطقات بصوت مجهد) شي حد هناااا عفاااكوم اجي عونوني
مكان حد تما والسربايا نزلو لتحت فديك الساعة.. تحل لباب دبيت تانيرت لي سمعات الصداع وغير شافت رحيل قلبها قفز بالخلعة وشدات على كرشها ونطقات بخوف:مال بنتي
بيسان:ماعرفتش اخالتي جيت لقيتها سخفاااانة ومكاينش شي حد يعاوني نهزهاا
تانيرت:(بلاعقل مافكراتش بلي راها دايرة لفتيح) أنا نعاونك
بيسان:نتي دايرة أوبغاسيون خصك تردي لباال أنا نعيط لخويااا (جبدات تلفونها دوزات لابيل وغير تفتح وهي تنطق) خويا رحيل سخفات
مكملاتش دقيقة تاكان بان ليها إدريس طالع وموراه نوح جايين جهتهوم وتحدر إدريس عند رحيل هزها ودخلها ديريكت لبيت النعاس وتبعو نوح وتانيرت لي مقداش تحرك بزاف ولكن فاش شافت بنتها سخفانة مافكراتش فراسها.. سطحها فوق النموسية ونطق بتساؤل خايف:شنو واقع علاش سخفااات
بيسان:(هزات قرعة دلماا وبدات تتكب فيديها وترشها) ماعرفتش خصنا نفيقوها دابا
نوح:(كمش حجبانو ونطق بجدية) اش كاتسناااي؟
تفعفعات بيسان من كلامو وبدات تاتفيق فيها تابانت ليها رحيل تاتحرك جفونها وبدات شوية بشوية تحل عينيها تارمشات بيهوم وهي باقا حاسة بالضبابة.. جلسات تانيرت بشوية عليها وشدات فيديها:بنتي واش نتي بخير باش كاتحسي؟
رحيل:(شدات راسها) راسي اماما اوووف
بيسان:(شافت فإدريس)عندك لاباغاي ديال الطونسيو؟
إدريس:لا ابنتي كاينة دالسكااار
بيسان:(بجدية)جييها ليا
مشى جهة المجر جبد لباراي دالسكااار وعطاها ليها وهي حلاتها وهزات واحد لعيبة بحال الشوكة شافت فرحيل ونطقات بهدوء:عطيني يديك
مدات ليها رحيل يديها وهي باقا حاسة براسها دايخة.. ضربات ليها فصبعها ديك الشوكة تاخرج الدم وخدات واحد لعيبة دايرة بحال كارط طويلة ورقيقة دارت فيها داك الدم وخشاتها فلبااري وبقات تاتسنى تاطلع ليها بلي السكار عندها طااايح..
بيسان:(شافت فإدريس)واخا تجيب ليها شي حاجة حلوة
إدريس: هي لولة
قرب نوح جهة بيسان لي كانت جالسة جنب النموسية ونطق بهدوء وهو باقي مكمش فيها دوك لحجبان:اتحتاجي لباراي ديال الطونوسيو؟
بيسان:نو بلاش حيت السكار عندها لي طايح وهو السبب ديال السخفة (شافت فرحيل) باش حسيتي قبل ماتسخفي؟
رحيل:(مغمضة عينيها) راسي ضرني والدوخة وفاش تحركت جاتني الضبابة على عيني وماعقلتش على راسي مزال
بيسان:كليتي شي حاجة ليوم؟
رحيل:تت من لفطور
تانيرت:(نطقات بعتاب)وابنتي علاش ماكليتيش واش نهار كولو ونتي بالجوووع بالسيف مايطيح ليك السكااار
رحيل:(بتعب)مكانتش عندي الشهية اماما
رجع إدريس جايب معاه كويس دلما فيه السكر دايب عاونها تاتگعدات وشربو ليها كامل وبقات متكية واحد خمسة الدقايق عاد قدرات تحل عينيها.. مد ليها التمر هزات تمرة بزز باش دارتها ففمها وبدات تاتلويها فيه والشهية وااالو مشااات..
بيسان:ضروري مغادي يخصك تاكلي شي حاجة باقي راسك تايضرك؟
رحيل:شربت دوليبران شوية ويفوتني الحال
ضورات عينيها وجات فنوح لي كان واقف ورا بيسان مربع يديه كيشوف فيها بتخنزيرة قاصحة.. كمشات حجبانها وقلبات شوفتها عليه بحركة مفروشة ونطقات بهدوء:غانطلع لبيتي نرناح شوية
بيسان:أنا نعاونك
شدات فيها وخرجو من لبيت ونوح تبعهوم ونطق موجه كلامو لبيسان بجدية بلامايشوف فيهوم:ردي لبال لتلفونك
قال كلامو ونزل لتحت وهوما كملو لفوق وبيسان معاوناها حيت باقي بانت ليها عيانة.. أما إدريس شاف جهة تانيرت لي عينيها متعلقين فالباب وباين فيها مشغولة لبال ونطق بهدوء:مالكي؟
تانيرت:(تنهدات)هاد لبنت مكتحاولش على صحتهاا إدريس وهي أصلا مريضة بالأعصاب فالمعدة
إدريس:يدير ربي تاويل دلخير نتي غير رتاحي واخا
تانيرت:(حركات راسها بهدوء) رد ليها لبال
إدريس:(باس جبهتهاا)ماتخمميش
خلاها ونزل لتحت عند رجال وغير بقات وحدها وهي تسمح لدموعها ينزلو من جديد وكلشي فهاد الساعة تراكم عليها.. موت لبيبي وحالة بنتها لي تتقهر وتاتخليها مهمومة بحالها بحال أي أم..
دازت ربع ساعة وكان تلفون بيسان كيصوني بنمرة نوح.. هزات عينيها فرحيل لي كانت متكية وخرجات بشوية وجوباتو:وي
نوح:(بنبرة جدية)نزلي
نزلات لتحت ديريكت وهي تشوفو واقف حدا الدروج هاز كيس بلاستيكي غير قربات وهو يمدو ليها ونطق بصرامة:عطيها تاكل
شدات من عندو بيسان مبسمة ليه وبقات متبعة ليه لعين تانزل وهي تشوف تاني فداك لكيس ونطقات بضحك وهي راجعة عند رحيل: شكون بحااالك ارحيل ولد لحاج بنفسو جايب ليك لماكلة هههه
وصلات عندها ونطقات بنفس التبسيمة وهي غادة جهتها:هاكي نوضي تاكلي
رحيل:(بتعب)مافياش
بيسان:(بخبث)هي نرجع لماكلة لي جاب ليك خويا؟
هزات رحيل راسها ملي سمعات كلامها وعينيها مشات لداك لكيس لي فيدين بيسان ورجعات شافت فيها ونطقات بهدوء: شكون خوك؟
بيسان:(طلقاتها بضحكة عالية وعينيها دمعو)جاك الزهاايمر اشمن خويا فنظارك؟
رحيل:(نطقات بصوت خافت)واش نوح؟
بيسان:وي هو هاكي كوليه كولو وماتخلي تاحاجة أنا غانزل لتحت
حطات ليها لكيس فوق النموسية ومشات.. كانت تتشوف فيه بعيونها الخضرااء وقلبها كان تايدق بسرعة عالية من اهتمامو لي بين ليها بطريقة مباشرة.. تبسيمة خفيفة ترسمات على شفاها وهي تاتمد يديها وتتحل لكيس وجبدات منو بواطة لولة حطاتها فوق النموسية والثانية تاهي عاد گوبلي دلعصير فريش والفرشيطة ملوية فسغڤيت ولباايل بكيتو.. حلات لبواطة لولة وشافت لخضرة سوطي ولي ريحتها فتحات ليها الشهية والبواطة الثانية فيها الدجاج مقرمش.. بحماس كحزات تتاكل وكل دغمة كديرها تاتبنن فيهاا وفرحتها كانت باينة على وجهها.. ماخلات تاحاجة فلبواطة مع أصلا مواكلش وزيد الماكلة جاتها من الشخص الغالي عليها كلات تاشبعات وشربات عصير عاد رجعات فيها الروح.. هزات لپوبيل ودارتو فلكيس وخرجات رماتو.. وغسلات فمها عاد نزلات لتحت وفعينيها كان واحد لبريق كيلمع ديال الفرحة.. مطلعاتش راسها ملي دازت من حدا الرجااال ومشات ديريكت لعند لعيالات وغير جات عينيها فعين بيسان وهي تبسم ليها وغمزاتها خلات رحيل تحس بالحرارة فحنوكهاا فاش فهمت قصدهاا.. دازت الصدقة والناس تعشاو ومشاو وبقاو غير رحمة لي شافت فتلفونها لي كان تيصوني ونطقات بهدوء وهي نايضة:خليونا نمشيو نوح كيعيط
ناضو جميع وأولهوم شيماء لي غير سمعات سميتو وهي تفرنس وتوگض.. خرجات هي لولة ماتسناتهومش وعينيها كيقلبو عليه تابان ليها واقف مع رؤوف وجدو وإدريس.. كمشات حجبانها ملي شافتو هاز سيدرا لي كانت حاطة راسها على كتفو ومضورة يديها على عنقو وهو بدورو حاضنها ليه بحنية.. هزات حجبانهاا وقربات جهتهوم وهي كطقطق بطالونها تاوقفات قدامهوم ونطقات بصوت محلون:نوح نمشيو؟
كانت كاظن أنه مغاديش ينخلها قدام الرجال وغايجاوبها ولكن فاش شافتو مهزش گاع فيها لعين وحاشاها ليهاا مرگات وتعصبات ولي عصبها كثر هو جواب رؤوف لي نطق ببرود:غانوصلكوم أنا نوح باقي مطول هنا
داك الشوية ديال الصبر لي فشيماء قرب يسالي.. خنزرات فرؤوف ومشات بواحد الطريقة مفروشة وهي محملاش هاد التعامل لي كيدير معاهاا وقلة الاهتمام والنخااال.. ناسية راسها بلي هو من طبعو هاك داير والاهتمام الاعطاه لشي حد فكيكون غير الشخص لي عندو مكانة عالية وغالية.. ركبات فالطوموبيل دبيسان والبكية شاداهاا وغير تحركات الطوموبيل وهي طلع شوفتها فيه بان ليها دخل مع إدريس لداخل وتسد لباب شي لي خلى العافية تشعل فيها..
---
دخلو لدار وبانو ليهوم السربايا كيجمعو لمطريال ديالهوم والدراري معاونينهوم وهو يتنهد إدريس تنهيدة طالعة من القلب خلات نوح يشوف فيه وينطق بهدوء:سير رتاح ليك اسي إدريس
إدريس:(زفر النفس وشاف فسيدرا)اشمن راحة ونخشيشتي مريضة (طل عليها بانت ليه حالة عينيها لي كانو مدمعين ونطق بحنية) باقي كضرك الضرسة؟
سيدرا:(مسهوتة والحريق هلكها وبصوت باكي همهمات) همم
نوح:(طبطب على ضهرها) قريب يصبح لحال ونمشيو لطبيب
إدريس:(شاف فساعتو كانت الثلاتة ونص) طلع لفوق لبيت ريان ولامحمد طه رتاح فيه
نوح:(حرك راسو)ماعليش غانجلس غير فالصالة
إدريس:(سبقو)زيد معايا ومايكونش راسك قاصح (ضار عندو وتبسم ليه)راني كبر منك كون تسمع لكلام هه
نوح:(تبسم بالخف)الله ياودي
إدريس:(داه لبيت ريان وشاف فيه بجدية)غانمشي نبدل حوايجي ونجي باينة ليلة مكاين نعاس
شاف فيه نوح بهدوء وقرب جهة النموسية جلس وسيدرا باقي فالحظن ديالو.. تنهد وهو كيطبطب عليها وتفكر فاش جات عندو تتبكي وتاتقلب على إدريس وفاش مالقاتوش مشات عند نوح لي بان ليه تشكي عليه الضرسة لي ناضت عليها فهاد الليلة.. وبكاها خلاهاا تهد وتكمش فيه وتاهو عاطيها لخااطر وراد بالو معاااهاا..
خرجات رحيل من بيت تانيرت هازة صينية ديال الماكلة لي نقبات منها غير شوية وتلاقات باها لي تبسم ليها ونطق بهدوء:تعشيتي نتي؟
رحيل:(تبسمات)اه ابابا وتاماما كلات شي حاجة وشربات دواها وراها ناعسة دابا
إدريس:غانبدل حوايجي ونطلع عند ولد لحاج راه كاين لفوق مع سيدرا ناضت عليها الضرسة عاود فهاد الليل
رحيل:(قفز قلبها بخوف أمومي) فين هي؟
إدريس:فبيت ريان
مشات بخطوات سريعة لكوزينة حطات الصينية عاد طلعات تتجري لفوق وقلبها ملهوف على كبدتها لي مرضات ليهاا.. لقات لباب محلول دلبيت وبان ليها نوح لي كان جالس نفس جلستو وقربات جهتو ونطقات وفمها صفر بالخلعة:سيدرا مامي ديالي شوفي فيا؟
بقات تتقيس ضهرها وشعرها باغا طمن عليه وسيدرا حلات عينيها وشافت فيها وهي تاتبكي ومقدراش دوي مسكينة بالضرسة لي غاتخرج ليها لعقل.. حطات رحيل يديها على جبهتها لقاتها تتفور وشافت فنوح لي كان تيشوف فيها بهدوء ونطقات بخوف باين فصوتها:طلعات ليها السخانة
نوح:(بعد سيدرا عليه وهي مسهوتة وحط يدو على جيهتها ونطق بجدية) جيبي ميزان لحرارة لاعندكوم
كانو بزوج بيهوم مهتمين بيهاا وخايفين عليها وهي مريضة.. خوف الأب والأم على بنتهوم..
جابت لميزان دلحرارة وطلع ليها بيجامتها تاحطو ليها تحت باطها وهي تتحرك وتبكي.. فاش كاتكون مريضة لخاطر مكيكونش عندهاا وتتعطيها غير لبكاا.. جالسة رحيل فالأرض شادة يديها وغير تسمعات ديك طيط ديال لميزان وهو يزولو ليها وشاف حرارتها لي كانت طالعة ونطق مكمش حجبانو:غايخص نديوها لسبيطار
رحيل:(غير سمعات كلامو وعينيها تغرغرو ونطقات بصوت باكي) بنتي
جا إدريس لعندهوم مور مابدل حوايجو وقال ليه نوح اش كاين وهزوهاا غاديين بيها لسبيطار ورحيل تابعاهوم وعقلها غايخرج بلاصتو.. وصلو لتحت وعاد لخرين ساقو لخبار بمرض سيدرا وكل واحد يسول وباين اهتمامهوم ليهاا وخوفهوم لي واضح من عينيهوم... مشى غير إدريس ونوح ورحيل لسبيطار ولبقية بقاو وعقلهوم مشطون.. طلعات كلثوم لفوق وغير دخلات لبيت وهي تقلب سيفتها مبينة وجهها الحقيقي لي تتخبيه ورا شوفات التمسكين والندامة.. وتقول واش تهزات فيها شعرة ملي شافت لبنت مريضة بلعكس گاعما تسوقاات ونطقات بصوت باين فيه السم والحسد: تمشي لجايحة إن شاء الله
جبدات التلفون ودوزات لخط لبدر لي جاوبها بصوت بارد:اش كاين؟
كلثوم:(قلبات عينيها ونطقات بهمس)وقتاش غانبداو فلي قلتي عليه ماشي طولناا
بدر الدين:(نطق بهمس الفحيح) ماشي نتي لي غاتعلمني اش ندير وهاد الساعة ركزي غير على لي مطلوب منك وبلافريع لك*ر واخا
كلثوم:(كمشات حجبانها) لي طلبتي مني دايراه ورادة لبال ولي كايوقع هنا راه تانقولو ليك
بدر الدين:(جغم من كاسو ونطق بسخرية) ملي تتقولي لي كاين علاش ماقلتيش بلي عمو ديالي خرجات هي وباها أو ولد لحاج فهاد الليل (كمل بنبرة قاصحة) داك التقح*بين دز*ب ماعنديش معاه اكلثوم سمعتي وماتنسايش بلي عيني عليكوم كلكوم
قطع عليها خلاها تاتبلق فعينيها ونسات علي لي حاط حاضي رحيل وبلي غايكون وصل ليه خبار لخروج.. زفرات النفس ومغاتنكرش بلي بعض لمرات تايجيها لخووف والرهبة ولكن مجرد مكتفكر الهدف ديالها تاتنسى كلشي والطمع تايعمي لعينين وتايخليها دير لي طلب منها ناسية بلي نهار تبان حقيقتهاا هي أول وحدة غاتخسرر هاد لحرب...
----
رجعو من السبيطار مور ماهبطو ليها السخانة وعطاوها كالمون لضرسة على مايصبح الصباح وتمشي لطبيب تزولها.. كانت رحيل هازاها هاد لمرة وخاشياهاا فيهاا وهي خايفة عليها.. ماتقدرش تشوفهاا مريضة تاتمرض هي لولة فخاطرها وبالها لي تيتشطن معاهاا.. طلعاتها لبيت وتخشات معاها فالسرير رادة ليها لبال ولتحت كان نوح جالس فالصالة مع البقية لي تاحد فيهوم مانعس ساكتين وكل واحد فين تيخمم تاطلع الصباااح أو وصلات وقيتة دلخدمة وناض ريان وأسماء ورنيم يوجدو راسهوم أما محمد طه راه عطاه نوح ليوم روبو يرتاح لاهو ولارحيل.. كانت غزلان تتوجد الفطور تاجا عندها ريان ونطق بهدوء: غيزو كاين ميتكال ؟
غزلان:وي صبر ونحط لفطور
ريان:أنا نعاونك راه مشى لحال
بدا تيعاون فيها ويهضرو متلف معاها لوقت وتاهي ولى كيجيها على گانتها خصوصا أن ريان تيخليك تحب لجلسة معاه بكلامو وتقشابو معاك وتافمواقفو تايخليك تعول عليه واخا كيبان لعبد راه ضارب الدنيا بركلة ولكن نهار توقف عليه تلقاااه.. ضحكات غزلان بالجهد من النكتة لي عاود ليها ريان لي كان حادر راسو تايقاد طبسيل دلحلوي وهو مبسم تادخل محمد طه وهو هاز حاجبو وشاف فغزلان وخنزر:ياك لباس ؟
ريان:غير تنعاودو لفيزو النكتة هه
محمد طه:(ضربو فكتفو) واقيلا تابعاك خدمة تهز باركة من الطنز ونتي جمعي راسك شوية
خرج مخليهوم كيبلقو عينيهوم فبعض تانطق ريان بسخرية:كريزي مااان
غزلان:الله يستر
كملو ضحكهوم ممسوقينش وغير سالات بدات تحط فالطبلة دالصالة فين كاان نوح جالس مع إدريس كيتحادتو..فطرو مجموعين لي خدامين ومشاو حيت تعطلو وغير وصلات وقيتة لي كيحلو فيها لكابيني وهو ينوض نوح خرج لبرا كيتسنى إدريس يجيب سيدرا باش يديوها لطبيب.. هاد لمرة ممشاتش رحيل حيت إدريس مخلاهااش خصوصا منعساتش ولعيا باين عليها داكشي علاش وتكلف هو بسيدرا.. بقات تاطل عليهوم تاحرك نوح طووموبيل إدريس غاديين وهي تنهد وبالها بقا مشطون مع سيدرا ومارتاحت تابان ليها إدريس رجع هو وسيدرا لي توگضات شوية مور مازولو ليها الضرسة ومشات لبيت تكمل نعاسها ورحيل وعاد قدرات تاهي تنعس وترتاح..
داز داك النهار بخير وعلى خير ودازو موراه أياام لي كانو بنفس الروتين عليهوم كاملين من غير رحيل لي شدات كونجي من لخدمة على قبل مها باش تبقا معاها وتقابلها حيت لاحظات كيغاش ولات منعازلة عليهوم الامهضرتيهاش ومكتخرجش من لبيت وعرفات بلي مها جاها اكتئاب عليها قررات مانخليش داك الاكتئاب يسيطر عليها وتحاول تموتيڤيها وماتبقاش غير وحدهاا وكلهوم تيحاولو ينسيوهاا وبالهوم معاهاا من غير كلثوم لي تشفات مزيان وفرحات بحالتها.. تأجلات عمليتها حيت الأوضاع حاليا لاتسمح وهي نيت لي طلبات لمحمد طه يصبرو شوية دايرة سبة بتانيرت والحالة لي فيها واخا هو مابغاش ولكن قنعاتو ودمعات عليه وهو بحنانتو دار ليها لخاطر ومعارفش اش تحت راسها وعلياش ناوية..
شهر داز فلمح لبصر والجو بدا كيعتادل والحياة راها مستامرة.. كانت رحيل شادة فيد تانيرت ونازلين من الدروج بشوية عليها تاوصلو قدام لباب دطبقة التحتانية ونطقات رحيل بتبسيمة:يالاه سدي عويناتك
نفدات تانيرت طلبها بطاعة وهي شدات فيها تادخلو لداخل فين كانو لبقية واقفين ونطقات رحيل بحماس:حلي عينيك
فتحااتهوم تانيرت على الصالة لي كانت مفرشة بفرااش يغني ياليل ياعين وباين فيه هماااوي بالطلامط لي كانو فالبااج والذهبي والثريات والطبالي لي هازة وكلشي كان كيف هي بغاتو.. تبسمات تانيرت وعينيها فإدريس لي تبسم ليها ديك التبسمية لحنينة ولي فيها غرام مكايتقرا مكيتكتب.. عقلات نهار كانت هي وياه فبيتهوم تاتفتي عليه كيفاش باغا الصالة تفرش وهو كان مغمض عينو ومركز معاهاا وهاهي دابا تاتشوف ديك الصالة كيف رسماتها فخيالها تحطات قدام عينيها..
تانيرت:(لأول مرة تبان لفرحة فعينيها مور شي لي طرا ليها) وقتاش صاوبتو هادشي كولو
رحيل:هههه هاد الشهر كولو وحنا كانقادو فيه عجباتك
تانيرت:(حطات يديها على حنكها ونطقات بتبسيمة) يخليكووم ليا
أسماء:(قربات حضنات تانيرت)وتانتي الله يخليك لينا
ريان:(باس حنكها) توحشناااك ازينينو
محمد طه:(تبسم ليها بحنية وهو حاط يديه على كتفها) توحشنا حنانتك
رنيم:(تخشات جنب رحيل) هاد الشهر لي داز حسينا بشي حاجة ناقصانا فيه
غزلان:توحشناا جماااعتك معانااا اخالتي
سيدرا:(نقزااات ونطقات بحماس) اه تانيرت إينو تاأنا توحشت طيبي ليا ماكلاتك زوينات
كانت تانيرت مبسمة وعينها عامرين دموع مأثرة بكلامهوم وكيغااش مهتمين بيهاا.. تبسمات وهي تتحمد الله على كل شي.. ربي رزقها بخمسة دلبنات وزوج ولاد مهتمين بيها وخايفين عليها بصح هي ولدات منهوم غير زوح ولكن ربي رزقها لخرين وهو عارف اش فقلبهاا ونالت من صبرها.. عمرك تقول علاش أنا ماعنديش وتبقا تقارن بغيرك حيت ربي عاطي كل واحد داكشي لي يستاهل ولي فنيتو.. كانت مزيرة على يديها وهي تاتشوف كيفاش ولادها مهتمين بتانيرت ومعاملينها مزيان وهي لي مهوم كون مامرضها گاعما يسولو فيها.. كاتزيد تحقد وهي ناسية اش دارت وناسية بلي الله يمهل ولايهمل...
----
جالسة فالبيرو وهي حاسة بالملل رجاء وياسر مشاو يتغداو وهي مكانش فيها الجوع واكتفت غير بعصير طبيعي.. بقات بوحدها تاتلعب فالبيسي ومافيها لي يخدم ولفات الراحة فداك الشهر لي جلسات... تاتنهد وتقلب عينها بملل تاقفزها لفيكس لي صونى قاطع داك السكات.. جرات كرسيها وجوبات بهدوء:وي
وصلها صوتو لي نطق بنبرتو الخشنة الجادة:اجي
قطع مخليها تاتبلق فعينيها وتتسرط ريقها.. مشافتوش شهر كامل وكانت غير تاتسمع خبارو من عند إدريس ولاسيدرا لي كايديها إدريس معاه لگاراح وتتشوفو تما.. زفرات النفس وناضت وهي متوثرة تاتسأل هو اش بغا؟.. دقات لباب ومع حلاتو وصلاتها ريحة البخور لي كانو مطلوقين وممزوجين مع ريحتو الرجولية وصوت القرآن لي كان مطلوق على سورة الكهف بحكم ليوم الجمعة بصوت أحمد علي العجمي. هز فيها عينو مجرد ماتحل لباب وبانت ليه داخلة بجلابتها لي لبسات نهار لعيد فالأزرق ملكي.. ماهبطش عينو عليها حدو حبس صوت القرآن ونطق بجدية:سدي لباب واجي
نبرة الجدية فصوتو خلاتها تزيد توثر.. نفدات كلامو وبهدوء قربات وصوت صندالتها كايتسمع ومع وقفات قدامو أشار ليها بعينه تجلس وهي جلسات وعينيها فعينيه تاتحاول تسيطر على توثرها.. ناض من بلاصتو وقرب بخطوات تقيلة جهتها وهي سامحة لراسها أنها تشوف فيه وفطولو الفارع وهو جاي جهتها تاجلس بجلستو الرجولية قدامها ولكن بعيد عليها
نوح:(نطق بجدية وعينو مزاحهاش عليها) الهضرة لي غاتقال هنا نبغيها دخل لدمااغك توزنيها وتفهميها مزيان..
سرطات ريقها من كلامو لي قال ولي زاد خلاها تحس بالرهبة ومعرفاش علاش ولكن حسات بشي حاجة جايا ورا هاد لكلام..
نوح:(لعب بلسانو ففمو ونطق بصوت كالم وفنفس لوقت باقي لجدية فيه) هاد لهضرة مكانتش غاتگال كون ماجيتيش عندي وعاوتي ليا على زواجك لولاني داكشي علاش لي نطولوه نقصروه بلاكثرة لغى(هزات فيه لعين وسرطات ريقها وهو تحنى لقدام وشبك يديه بزوج ونطق بصوتو الرجولي الخشن وعينو على ملامح وجهها) عن أبي هريرة رضي الله عنه عن النبي صلى الله عليه وسلم قال: "تُنكح لمرأة لأربع, لمالها, ولحَسَبها, ولجمالها, ولدينها , فاظفَرْ بدات الدّين ترِبتْ يداك " (وكمل بهدوء) وهاد الربعة كلهوم شفتهوم فيك داكشي علاش نويت معاك لحلال(سكت كيشوف ملامح وجهها لمصدومة قبل مايختم كلامو بنبرتو الخشنة) نتسنى جوابك يوصلني مع سي إدريس..
ختم كلامو وهو حاط عينو فقلب عينيها لي كايشوفو فيه بنظرات مصدومين.. كانت حاسة بحال الاشي حد كب عليها شي سطل دلماا مثلج مخليها تكوانسى وتجمد بلاصتها.. مكانتش متوقعة منو أنه غايرجع مرة خرى يطلب يديها لزواج مبعد مارفضاتو.. حدرات راسها وشوفاتها ليديها لي كانو مجموعين فحجرها ولي بقوة التوثر محسات براسها وهي تاتحك فيهوم تاولاو حمريين.. وفالمقابل كان هو جالس تيشوف فيها بهدوء.. من طبعو معزيزش عليه داك دخول ولخروج فالهضرة بلعكس تايجي ديريكت ولي كاين تيقولو.. كيف جاااها دابا نيشان بلاتزواق الهضرة ولي كاين حطو ليها قدام وجهها.. ناض من بلاصتو وهو كيقاد كمايم لاشوميز لي لابس وتمشى جهة بيروه وجلس فبلاصتو ونطق بهدوء: تقدري تمشي دابا
غير سمعات كلامو ناضت بلا ماتشوف فيه ولاتهز باقي عينيها جهتو.. وبخطوات سريعة تمشات جهة لباب مخلية صوت صندالتها يكسر داك السكون لي فالبيرو.. وغير خرجات وهي تزفر النفس وتكات على لباب كضبط أنفاسها وتتحاول تكونطرولي دوك المشاعر لهايجة فالداخل ديالها.. مدة وهي على وقفتها تاحسات براسها هدات شوية عاد كملات طريقها نازلة لتحت باغا تاخد شي قرعة دلماا تبرد بيها جوفها.. تمشات جهة ديك الثلاجة وخدات قريعة صغيرة شرباتها كلها وعاودات خدات وحدة خرا ورجعات لفوق تكمل خدمتهاا..
كملات نهارها بعقل مرفوع وكل مرة تسهى فشي لي وقع معاها تاسالات ورجعات لدار وعلى غير لعادة كانت ساكتة وگاعما نزلات دير معاهوم لكاسكرووط.. حابسة راسها فالبيت مبعد مابدلات حوايجها وخدات خلوة بينها وبين نفسها باش تزيد تفكر قبل ماتاخد قرارهاا..
ناعسة فنموسيتها بالعرض ومفرشة شعرها تحت منها بحال شي شلال دلعسل.. وحاضنة بين يديها نونوس سيدرا لي كان عطاها ولد لحاج نهار العيد... كانت ساهية تتشوف فالسقف تاتحل لباب عليها فجأة ودخلات أسماء مدرمة كيف عادتها.. قربات جهتها ونعسات تاهي حداهاا ونطقات بهدوء:حالتك معجبانيش ليوم اش واقع معاك؟
رحيل:(بهدوء غريب) هو رجع طلب مني الزواج
أسماء:(ناضت من بلاصتها بزربة ونطقات وهي مخرجة عينيها) واااش ولد لحاااااج (حركات ليها رحيل راسها باه وأسماء نقزات بلاصتها بحماس فرحانة تقولي طلب منها الزواج هي) عاودي ليا اشنو قاااال ليك
غمضات رحيل عينيها وهي تاتعاود ليها وأسماء كتبتاسم وعينيها على رحيل لي كانت هادية:شكووون بحااالك الموصيبة اااحييه على ولد لحاج والرزانة والتباتة جاك نيشااان ولي عجبني هو داك الطريقة باش طلبك (نغزاتها)وطبعا نتي غاتوافقي؟
رحيل:(شافت فيها وحركات راسها بلا)تت
أسماء:(بدات تقندش ونطقات بعصبية) كيفاااش تت واش من نيتك القوو*حبا غاتعاودي ترفضيه واااش عندك شي عقل تكسابيه ولا لا راه بربي وديريها ياتاتندمي حياتك كلهاا والاعاود شاف فكمارتك اجي دفلي عليااا هااويلي على الزغبية باغااا ترفض عاود
رحيل:(ضحكات من كلامها وشافت فيها بهدوء) نهار سمعت بخطوبتو حسيت بالعافية شاعلة فيا وبحال الاخديتي شي موس وغرستيه فقلبي وبقيتي تاضور فيه بلمهل حسيت بحوايج عمري اأسماء حسيت بيهوم فحياتي
أسماء:هي موافقة؟
رحيل:(هزات راسها بخفوت) اه موافقة ولكن خايفة
أسماء:لخوف ولابد منو (قلبات ليها لهضرة وهي تاضحك)هي صافي نوجد تكشيطتي ومن دابا نشد بلاصتي عند لكوافورة هههه
رحيل:(ضرباتها بنونوس)خرياااا سيري تلاحي خليني نعس
تقلبات رحيل على جنبها معنقة داك نونوس مغمضة عينيها وتتحاول تطفي دماغها وتحبس التفكير باش تقدر ترتاااح..
---
كانت كاتسنى إدريس يجي عندها ويفتح معاها الموضوع دالزواج ولكن مجاش شي لي خلاها تستغرب وتشطن.. تاحد فالدار معارفش بلخبار من غير أسماء لي قالتها ليها رحيل ولي طبعا احتفظات بكلام غير بيناتهوم.. جالسة فبيتها مع سيدرا تتلعب معاها فالطابليط وتتلف راسها تاسمعات الدقان فالباب لي تحل ودخل إدريس وهو مبسم بهدوء:فرحتي لولة مسالية شوية؟
رحيل:(تبسمات ليه)وي بابا دخل
إدريس:(دخل وجلس جنب رحيل وشاف فسيدرا بهدوء) سيري انخشيشتي لتحت عند تانيرت راه بغاتك
سيدرا:(هزات طابليط ديالها)واخا بّا ديدي
كانت رحيل عارفة باها اشنو باغي يقول ليها داكشي علاش حسات بتوثر وهي عارفة راسها دايرة بحال شي كتاب مفتوح قدام باهاا.. شد إدريس يديها ونطق بنبرة هادئة لاتخلو من الجدية: هضر معايا ولد لحاج ودابا أنا جيت باش ندوي معاااك ونعرف جوابك ولكن قبل باغي نگول ليك شي هضرة لي نبغيها ابنتي ماتغيبش على بالك.. نتي عارفة باك عمرو غايبزز عليك شي حاجة لانتي لاخوتك وبلي هو ديما فجنبكووم وعمرو غايخلي شي حاجة خايبة توقع ليكوم..ومصلاحتكوم عندو أهم فهاد الدنيا هادي.. (تبسم ليها) خليتك هاد ليوماين تفكري مزيان باش ملي نسولك تكوني واخدة قرارك لي خصك تكوني مقتانعة بيه (وبجدية) شنو قررتي؟
رحيل:(هبطات راسها ونطقات بخفوت)موافقة
تبسم ليها إدريس وجرها عندو معنقها.. كان عارفها موافقة ولكن كان باغي يسمعها من فمها باش يزيد يرتاح.. وغير خرج من عندها نزل لتحت فين كانو لبقية مجموعين ونطق بهدوء وتبسيمة خفيفة على شفتو: وجدو راسكوم غدا فالليل غايجي ولد لحاج هو وعائلتو باش يطلبو يد رحيل لزواج..
يتبع...
التعليقات
لا توجد تعليقات بعد، كن أول من يعلق.