محتوى القصة
ضحكو جميع عليها هي لي مخنزرة من كلام سومة وتتشوف فيها مقلقة...عقلها الصغير وماگال ليها وعارفين بلي هادشي غير هضرة وصاااف ومكيديوش عليها... تجمعو رجال بوحدهوم وخداو لبنات راحتهوم فلكلام... ومعاهوم تانيرت تاهي...
فبرا كانت واقفة بحال شي قط مجرااب معزولة فواحد لقنيتة مكاتبانش وعينيها غير على دار إدريس...هادشي مبقاش عاجبها وگاع داكشي لي كاتخطط ليه كيفشل ولابقات هاكا هي لي غاتخسر... بقات تتحك يديها ماكرهاتش كون كان عندها شي إيسونس تكبو عليهوم وتشعل فيهوم لعافية بيما أنهم مجموعين جميع تهنى منهوم فخطرة... جلسات فوق الحجرة لي تم بنقابهاا وجبدات داك تلفون تاتشوف فديك النمرة لي طالعة ليها وتاتعض على شفايفهاا...هادا لحل لي عندها باش ضبر على فلوووس لي يخليوها تحرك وتشري تاني طوموبيل...حيت دابا مكاتقدرش تبقا تبعاهوم فيما مشاو وهادشي مبغاتوش خصها تعرف جميع خطواتهوم...دوزات لخط تاسمعات واحد الصوت حرش مدعدع بلگارو نطق:شكون معايا؟
ميس:أنا لي بعت ليك طوموبيل ميس
....(بمكر) مو عوينات تسنيت تصوني داك نهار
ميس:(قلبات عينيها) بغيت نشوفك
....علاش اش كااين؟
ميس:(عضات على شفايفها مكرهة) زعمة معارفش علاش (ببرود) فنظارك لاش عطيتيني النمرة
...(ضحك بداك الصوت لمخرشش بلگارو والجوانات) شتي نهار لول شفتك وعرفتك دكية
ميس:قبل خصنا نتفاهمو على التمااان (بحقارة) كلما طلعتي التمان كلما برعتك
....1000درهم شبان ليك
ميس:(بسخرية) 1000درهم سير بنتي لياا مسالي
....تسناااي خصني نجربك باش نعرفك مالي نعطي فلوس ونترزى
ميس:لفلوس غايتحطو فوق الطبلة 5000 درهم لسعتااين
....سعتااين يالاه ز*ي يولف ط**نك
ميس:اوا نتا تعرف
قطعات عليه وهي تتغزز سنانها تحت النقاب نهار باعت ليه الطوموبيل شافت نظراتو ليها وعرفات بلي عجباتو وفاش عطاها النمرة شداتها وكانت اتلوحها ساعة خلاتها عندها وهاهي حتاجتها... هادي هي الطريقة لي بقات ليهااا تبيع راااسهاا ومنها تجيب فلوس صحيحة بلاصة ماتمشي تخدم عند الناس...شافت صاحبتها لي تاضرب لكرفي شحاال تاتشد ومع هوما سوااابق صعيب يخدمو شي خدمة زوينة وزيد هي مافيها لي يدير لحاجة...
رجع صونى ليها الشخص وتافق معاها على داك التمااان ودارو لبلاصة فين يجي يهزهاا باش تمشي معاه ورجعات شافت بعيون حاقدة فالباب ديال دار إدريس وقالت:مابقا والو ونوصل لداكشي لي بغيت...
ناضت غادة من تم راجعة لدار باااش توجد راسهاا...لقات الدار خاوية مشات سخنات لماا ودوشات وقادات حالتهاا وشافت فوجهها لي مابقاتش تتحملو بسباب الضربة لي فيه... كمشات حجبانها وطلقات شعرها وشافت تلفونها لقاتو تيصوني عليهاا... خرجات من الدار وبعدات على فين ساكنة باش مايعرفش تالقااتو واقف بطوموبيل داسيا فلكحل....قربات لعندو ودخلات جلسات تاتشوف فيه...كان سمر ولحيتو كتيفة وسنانو كيبانو صفرين بلگارو لي تيكمي...لابس تيشورت مبينة دراعو لي كلها مشرطة وفيها سكاتريسات... نطق بداك الصوت لمدعدع عندو: لغزالة توحشناك
ميس:(ببرود عايفة تشوف فيه) خلينا نتحركو من هنا ماخصنيش نتعطل
....غير تهنااي ماتعطليش سعتاين مانفوتوهااش
ميس:5000 درهم ديالي دابا
مدها ليها تاهو وخلاها تتحسب فيهاا تاوصلو لواحد البلاصة خاوية فيها شي ديور قدام شوية....نزلو وهي غادة معاه تاوصلو لواحد الدار مع لحلة دلباب ضرباتها ريحة الخنز ولگارو لقات تم القطعة فوق الطبلة والشراااب تاهو...دخل بيها وعينيها تايضور هنا ولهيه بقوة ماباغا غير تجمع لفلوس باش تنتاقم.... غرقات فالوسخ أو ولات وحدة موسخة لاإحساس لاضمير.. وأصلا سبق ودارتها مع إلياس ماشي شي حاجة جديدة عليها...
....حيدي حوايجك أنا غانجي دابا
مشى وهي بدات تزول حوايجها مولفة بلوسخ بقات بدوبياس وبان ليها جااي هاز معاه لكردة فيديه وتيقيم بشوفاتو جسمها لي كان بيض وعض على شفتو بشهوووة.... زرب عليها زربة خايبة وماعرفات كي دار ليها تالقات راسها مربوطة فوق النموسية بديك الكردة بحال شي حولي.... شادها من عنقهاا ويديها تاهوما رابطهوم مع النموسية ورجليها بحال علامة إكس.... وجهها كان كولو ضرابي وشعرها تخربق وكلها حمرااا وهي تتنهج.... كان فوق منها كيفتارس فيهاا بحال شي حيووان وهي ماقدراتش تحرك...لعب فيها كيف بغى وديك السعتاااين دوز عليها جميع أنواع العد*اب لي رضى فيه شهوووتو المريضة عاد طلقها تخرج من تم بخطوات تقال وحالتها حالة ومن زهرها هزات معاها عبااية سترات بيها ديك الش*وهة....ولكن هادشي كولو ماهمااش قد ماهموهاا لفلوس لي جابت معااهاا...
تحضيرات الخطبة كانت مخلية الكل يدير يديه ويوجد... العائلات بزوج كانو تايوجدو لي خاااص وقررو يديروهااا فلفيرمة... كانت رحيل مقسمة على زوج جيهات ماحيلتها لخوها لي خصها توقف معاه بااش يكون كلشي ناضي وماحيلتهاا لبيسان لي كانت تاتعاونها تاهي بشنو خاص ودايرة معاه دور زوجة الأخ والاخت لي مكانتش عندها...
نازلة من الدروج بزربة هازة صويكها فيديها ولابسة عباية واسعة مع فولار ونضاضر دالشوف فوق الراس...كانت بوحدها فالدار جات تدي لكارت گيشي حيت نساتها وتوينز وسيدرا راه ديجا كاينين عند مهاا... خرجات من الدار وركبات طوموبيلتها شادة لوجهة عند النگافة فين دايرة هي وبيسان يتلاقاو...
مسافة طريق وكانت واقفة قدام لمحال ديال النگافة لي غير من لمحال فبرا كيبان عليها نگافة كلاص ومكايجي عندها غير صحاب لحبة...دخلات لقات تما رحمة وسنااء ورنيم وغزلان وأسماء لي ارتاحت فهاد الأيام فدار باها والاهتمام لي كيهتمو بيهاا كل واحد جايب ليها شي حاجة... ولبنت راه من يد ليد مكيخليوهاش ليهاا گاع من غير لابغات ترضعهاا... وفاش تيكونو توينز خلاص تاتكمل لارحيل لاهي كيوليو دراسهوم وتايرتاحو شوية...
رحيل:تعطلت عليكوم؟
أسماء:لا جبتي لاكارط
رحيل:اه لقيتها فالصاك التاني مع فاش تقديت نسيت نرجعها لبزطاام اوووف سخفت
غزلان:نوضي ختاري اش تلبسي راه كلشي ختااار بقيتي نتي
رحيل:بصح شنو خديتو باش نعرف
أسماء:(شيرات لدوك تكاشط لي معلقين فبلاصة وحدة) لغوزة خداتهاا رنيم ولي حداه فالڤيغ بترولي خديتها وزرقة ديال غيزو
رحيل:زوينين بصحة نشوف اش ناخد تاأناا
ناضت تاتشوف بعيوناتها والنگافة مشغولة مع بيسان لي باقي تتقيس فبيت التبدال ومعاها رحمة لي تتعزل ليهاا... أما سناء راه جالسة تتشوف وتهضر مع لبنات ورحيل عجبوها گاع تكااشط ولكن حبها طاح على وحدة فلموڤ وقررات تجربهاا وتشوفها كيف غاتجي عليهاا... دخلات لبيت لقياس ومعاها لبنت تتعاونها تالبساتها وجاتها هي هاديك وكراتهاا...
أما فبيت لي فيها بيسان كانت حايرة بين زوج وحدة فالخضر بارد وحدة فالباج كلهوم زويناات وديال لعريسات...
رحمة:خوديهوم بزوج وبدلي بيهوم
بيسان:ولخطبة مافيهاش بزاف دناس اماما باش نبدل
رحمة:واخا مافيهاش خودي راه نهارك ماتعصبينيش تاني (شافت فالنگافة) جمعي لينا هادو مع لكسيسوارات ديالهوم لنهار لي غاتكون لخطبة
النگافة:هي لولة الالة قلتو نهار 8 لي هي بعد غدا
رحمة:اييه وبغيت تجيو بكري عفاك باش توجدوها حيت لخطبة غاتكون فالفيرمة وهي بعيدة شوية
النگافة:واخا ولكن راه تمن غايولي طالع شوية
رحمة:(ببرود) مكايهمش المهم عندي بنتي طلع زوينة وكلشي يكون هو هداك
النگافة:إن شاء الله مايكون غير خاطركوم
خرجو من تم لبيرو باش يتفاهمو على التمان ورحمة مكانتش تتشاطر التمان لي قالت قبلات بيه وعطاتها لعربووون ولبنات تاهوماا ومعاهوم رحيل لي بقات هي لخرا مع أسمااء..
رحيل:(شدات يد أسماء وقالت بخفوت)بغيت نكري لماما مسكينة شتيها مشغولة مع لولاد والخطبة ومالقاياش وقت تمشي تكري
أسماء:اه واخا نختارو ليها وأكيد اتجي على قدها حيت خالتي معامرااش بزاف يعني لي لبسات تاتجيهاا زوينة
ضارو على التكاشط وعزلو لتانيرت لون لي يجي معاهاا وكان الكحل سيد الألوان لي متأكدة رحيل غايجي مع بيااض بشرتها مهاا... دفعو عربونو وخرجو لقاو رحمة تاتسنى فالطوموبيل بزز منها وكون مجاتش عيب كون مشات ولكن ماعندها مادير...طلعو لبنات فطوموبيل رحيل وشدو لوجهة لسوق يشوفو اش خاااص باقي يشريوه...
***
ليوم ليلة قبل الخطبة ورحيل باتت فدار باها مبعد ماقنعات نوح بستة وستين تكشيفة باااش خلاهااا...وهو طلع لفيرمة باش يقادو لبلاصة فين غايكوم الضياف حيت قررو يديرو الگلسة فديك الجريدة لكبيرة وديك لخضورية لي تاتريح لخاااطر...
كان التريتور لي مكلفين تيقاد لگيطون لي كان بشكل مستيلي... مغطي غير لفوق وفيه أعمدة تال غدا ويضورو عليهوم لورد.... قربات رحمة جهة نوح لي كان واقف معاهوم ولابانت ليه شي حاجة معاجباهش راه تايبدلهاا...
رحمة:ولدي
نوح:(ضار جهتها مكمش حجبانو وقال بخشونة)اش مخرجك ايمّا هنااا
رحمة:(بتوتر)غير بغيت نهضر معاك وصاف
نوح:(عاقد حجبانو)اش كااين ايمّاا؟
رحمة:شحال من طبلة درتو ؟
نوح:خمسة وأصلا الناس قلال كاين غير لعائلة لمقربة علاش؟؟
رحمة:(بتوتر ماعرفات ملين تبداه)احم مهم اولدي راه عرضت على عيالات خوالك أو ولادهوم عيطو ليا مقلقين حيت عرضت غير على خوتي الرجال وهوما لا وماقدرتش نگول لا وعرضت عليهوم وغايجي غدا...
كيشوف فيها وهو عاقد حجبااانو وبان فيه كاعي دبصح...مع حل فمو ينطق رجع سدو وضار عاطيها بالضهر تايمسح على لحيتو ويستغفر مولاه...كون مكانتش مو وكان شي حد خر كون سمعو خل ودنيه وندمووو...رجع شاف فيها وقال بصوت باين فيه غاضب:وعاد جايا تگوليهااا؟؟ ياك نهار لول قلنا خطبة صغيرة يكونو فيها الأقارب وصااف ولعرس يكون فيه كبير؟؟
رحمة:اوا اولدي راه عارف عائلتي مجاتش نگول ليهوم لا وهوماا يتقلقو مانصيبشاااي
نوح:(خنزر فيها ونطق بصرامة) يمّا راه عاارف راسك اش تيضور فيه بلا ماتخليني نگول شي كلام مايعجبكش تت (مسح على لحيتو)شحااال غايكونوو فلمجموع؟؟؟
رحمة:(بنفخة) شي تلاتين واحد تقريبا
نوح:(جبد تلفونو وعطاها بالضهر)سيري دخلي
شافتو بعد وهي تعصب ودخلات ومنفخة تتگول دابا يجي يطلب السماحة حيت تعصب علياا وماعرفاتش بلي أي واحد بلاصتو كان غايدير نفس الشي...مابقاتش فشحال عرضات بقات فأنها مگالتها تال ليلتهاا وهو راه داير مع تريتوور واخا راه لخير موجود ولكن فاش تتكون عندك مناسبة وتتكون نتا لي مكلف متتبغي تاحاجة تكون ناقصة.... رجع تيصوني على تريتور باش يزيد الماكلة واخاا راه صعيب مي هادا هو لحل وتريتور ديجا تيتعامل معاه فجميع لمناسباات وقاد معاه لبلان وزاد فوق داك لحسااب وهنى راسو... رجع لعند دراري لي تيقادو تم وگال ليهوم بلي غايتزادو طبالي وغايجيبوهوم دابا نيت باش يقادو كلشي ويتهناااو...
بعد عليهوم وجبد گارو تيكميه وفنفس الوقت دوز لخط ليها...حاس براسو مشتاااق يشوفها ويسمع صوتها واخا راه شي نص ساعة باش قطع معاها...
ماحس براسو تاوصل لحدا الشاريج دلماا وهو تيسمع صوتهاا وهي تتعاود ليه اش دارو وصوت لهضرة عندهاا تاتسمع ليه
نوح:(بهدوء والدخان خارج من نيفو وفمو) حنيتي؟
رحيل:باقي ماوصلاتنيش النوبة (ضحكات) فاش جيت نقش ولادك فاقو يبكيو ومشيت نرضعهوم وخليت لبنات يسبقوني ودابا تانتسنى غزلان تسالي باش نقش
نوح:بصحة الحناني الفتنة ديالي
تبسمات رحيل وتفكرتات نهار قال ليها نفس الجملة فعرس رجااء...
رحيل:(بخفوت) نتا فينك دابا
نوح:فلبلاصة لي طحتي فيها نهار عرسنا الفتنة
رحيل:(ضحكات بالجهد فاش تفكراتها وقالت) باقي عاقل
نوح:(بخفوت وهمس اجش)على أنا نسى أي حاجة متعلقة بيك مانساهااش
رحيل:(دوبها بكلامو) نوحينوو
نوح:(كمش حجبانو ودغياا تقلبات نبرة صوتو) دير حسابك ملي تسالي كولشي نجي نجيبك
رحيل:(شهقات بصدمة)ياك قلتي ليا نباات؟؟
نوح:(زطم على لگارو وقال بصوت مبحوح) غاتبااتي بين يدي الفتنة (شاف فالساعة)نخليك دابا تال من بعد
قطع عليها خلاها غير تتشوف صدمها وماعندها مادير... جا ريان جايب معاه لكوستوم لي غايلبس ويالاه جا من عند الحلاق ضارب تحسينة جات مع وجهو وملامحو الرجولية لي كتبان فيهوم لفرحة... ريان:(جبد لكوستوم وبدا يوريه ليهوم)كيف جاكوووم؟
رحيل:بالصحة زوين ياك بعدا قدك
ريان:تت هو هاداك غانطلع نعلقو لفوق وندوش
تانيرت:وهبط تعشى راه قريب نحطو لعشا غير تسالي رحيل نقيش
رحيل:ماما مغاتحنيش
تانيرت:(حركات راسها ومشات)من بعد من بعد
مية فالراس وتانيرت منها كلشي ماباغا تاحاجة تنقص فخطبة ولدهاا... تاتشوف لهدية لي غايديو واش هي هاديك واخا راه لبنات قادوها فالطياافر ولكن ضروري ماتفقد كلشي...
غير سالات رحيل جلسوها بزز باش تنقش حيت النقاشة غاتمشي وتكلفو لبنات لي ديجا سبقو ونشفات ليهوم لحنة بلعشا وداكشي لي باقي...
ماجلسو يتعشاااو تاوصلات تلاتة عاد سالاو ورحيل عيطات لنوح قبل وعلماتو باش يجي وريان كان باغيها تمشي معاااه ولكن ماعندها كيف دير ضروري تكون مع راجلهاا...
رحيل:(باست مها)سيري تنعسي من الصباح ماجلستيش اماما راه غاطيحي لينا
تانيرت:غانعس ابنتي (تنهدات)كون غير بقيتي معانا تانطلعو كاملين
رحيل:ماكرهتش ولكن تاتشوفي كلشي على عينيك قال ليا غانجي ومانقدرش نقول ليه لا
تانيرت:ماعليش أصلا راه من حقو مرتو وباغي تكون معااه لمهم لاوصلتي عيطي لياا راه مغانرتاح تانعرفكوم وصلتو
خرجات معاها لبرا لقاوه واقف مع إدريس كيتعاودو سلم عليهوم ومشاو وإدريس دخل هو وتانيرت ونطق:عاد قال ليا ولد لحاج راه تزادو ليهوم ناااس
تانيرت:وايلي شحااال؟
إدريس:شي تلاتين واحد عائلة مو تقلقو عليها حيت عرضو لشي وشي لا ومالقات مادير
تاانيرت:تت وهادشي لي خايب (تاتحيد فلبنوار لي لابسة وبقات ببيجامة قصيرة مصيفة) دارو حساب وغايخص تاني يزيدو
إدريس:راه داكشي لي گال ليا عاد دابا باش نديرو بحسابنا تاحناا ونعرفو لقضية كيف دايرة
تانيرت:اوا فيها خيير (تكات ونطقات بتعب )طفي ضو خلينا نعسو واحد سعتاين راه غدا تابعنا شلى حوايج
**
وصلو لفيرمة ولقاو كلشي ناعس ورحيل تاهي عيات...طلعو نيشان لجناحهوم وحطو توينز بلايصهوم وسيدرا فبيتها...
قرب جهتهاا بخطوات تقال تايفتح صدايف القميجة جرها خشاها فيه وعنقها من كرشها وحط راسو على كتفها وقال بصوت مرخي:دابا عاد غايديني النعااس الفتنة ديالي..
مع الستة دالصباح كان كلشي فايق ولفطور فوق الطبلة لي جاا يفطر... كانت فلبيت مع بيسان لي دخلات تدوش حيت شوية غاتجي مولات لمك اب باش تصاوب ليهاا وتصاوب لرحمة ورحيل حيت ماعندهوم كيف يديرو يمشيو لصالون حيت بعيد عليهوم...
تتقاد لبيسان حوايجها بحال لاتتقاد لراسهاا تتحاول ماتنسى ليها والو...تحل لباب ودخلات رحمة لي هزات حجبانها وقالت ببرود:اش كاديري هنا فين بيسان
رحيل:(ببرود مشابه) فالحمام تادوش
رحمة:(تاتشوفها اش تاديري وقالت ببرود)غير خلي أنا نقاد حوايج بنتي وزايدون تاخد ماطلب منك ديري هادشي
رحيل:(شافت فيها وقالت بهدوء) كلامك لي غاتگوليه تاني غير خليه عندك اخالتي حيت مافيا لي يتصادع فهاد النهار بنتك بغاتني نعاونها وعلى راسي وعيني
رحمة:(ربعات يديها وقالت بفقصة)وليتي ترادي فلهضرة
رحيل:جربت نسكت مرة وحشمت نجاوب ولكن نتي اخالتي ماعيتيش (بتعب) كل مرة نفس الحاجة مافهمتش واش لهاد الدرجة تتشوفيني خايبة؟؟ عمري قربت ليك ولاأديتك هاد لكره لاش سبابو؟؟
رحمة:(قلبات وجهها) حيت مباغاكش واش نبغيك بزز مني تت (صونى تلفونها وسكتات)
رحيل:ماتبغيني مانبغيك اخالتي (تبسمات وقالت باستفزاز) باركة عليااا ولدك لي كيبغيني ونبغيه
خنزرات فيها رحمة وخرجات بلاماتجاوبها ورحيل حركات راسها ونطقات بسخرية: تستاهلي ماكتر سكت ليك وحشمت حيت نتي عگوزتي ساعة وجهك غير دردان لهضرة تت صباحتو الله
جلسات تتسنى بيسان وفنفس الوقت تتهضر مع لبنات وتسولهوم فين وصلو وشنو دارو... مشات جهة الشرجم تاطل على لبلاصة لي قادو لبارح بليل وبان ليها نوح غادي جااي لابس سروال توني وتيشورت وشمس كطنطن فوق راسو...
صونات ليه وغير جوابها قالت:حيد من الشمس راه غاتولي فيك الشقيقة
نوح:(هز راسو تايقلب عليها تاشيرات ليه وقال بصوت خشن)كاطلي بلاحجااب بغاني نلوحك من داك الشرجم
رحيل:تا واحد مشايفني غير تهنى
نوح:(نطق بصرامة)راني دووويت ماتصعرينيش تانتي ارحييل دخلي الله يرضي عليك وخليني مهنى
رحيل:(دخلات وقالت بحنية)صافي انوحينوو هاني دخلت ماتعصبش لياا راسك كلشي غايدوز مزيااان
نوح:محتاحة شي حاجة ؟؟
رحيل:تت مهم سير كمل شغالك تاتسالي
خرجات بيسان وسر لعريسات طايح عليهاا... لبسات عليهاا حوايج لداخل وبنوار وجلسات تادير كريم ليديها لمحنية...
رحيل:هانتي غانمشي نشوف اش خاص ونتي بقاي هنا تاتجي لمك اب ارتيست ونجيبها لعندك
مشات رحيل تشوف اش خاص وهاكا دوزو دوك الساعات فسير واجي تاكملو كلشي وكل واحد طلع يلبس عليه وأول وحدة سالات كانت رحمة لي خصها تستقبل خوتهاا وكانت لابسة تكشيطة فالبووردو وشعرها جمعاتو نص جمعة تتبان صغيرة وتحلفي ماشي هي مت لعروسة...بدات تستقبل بعض من خوتها لي وصلو مع عيالاتهوم أو ولادهوم وبدات تستقبل فيهوم والسربايا واقفين حدا لحليب والتمر لي حاطين فلبوفياات...
أما لفوق كانت رحيل سالات مك اب ديالها لي كان هادئ وركزات على لفغابوبيغ لي كان مزيج بين الوردي ولموڤ على حساب تكشيطة التليجة لي لبساات ولي كانت من دوق ولد لحاج لي كرا ليهاا بلاماتعرف... ولخرى لي كرات هي غير خلاتها محطوطة ربما تبدل بيهاا...
خرج من لحمام بسروال توب كحل مع شوميز بيضاا طاويهاا من ليدين وجيلي كحلة وگرافااط... شافت فيه بإعجااب وتاهو بادلها نفس النظرة وقرب باسها فجبهتها ونطق:لي لبستيها تاتواتيك الفتنة
رحيل:دوقك هادا انوحينوو
نوح:(طل من لبالكوم لقى طوموبيلات تايدخلو وقال بجدية)خلينا نزلو ناس بدات تجي
رحيل:(شافت فتوينز لي ديجاا نعسو ومبدلين ومرضعين) نهبطهوم؟؟
نوح:خليهوم هنا حسن لتحت الصهد
رحيل:صافي يالاه
شد فيديها ونزلو بزوج لتحت يستقبلو العائلة...كلشي بدا يجي وعمارو الطبالي رجال فجيه ونسا فجيه واخا راه شي مقابل مع شي... الجلسة تما زوينة والجردة وخضوريتهاا حمقاتهوم وعطات لديكور دطبالي واحد لمنظر ناااضي... وتالجلسة كانت رومية بشكل زوووين ومستيلي...
قربات رحيل جهة نوح وهمسات ليه:راه جايين فالطريق شوية ويوصلوو
نوح:صافي مزيان (قلب عينيه ولقى بلي خالو بات شيماء وعائلتو باقي مجاو وهو بوحدو لي بقا) طلعي شوفي وااش بيسان سالات
هزات تكشيطتها ومشات تاتمختر بطالونهاا ونضاضر دالشمس فعينيها...طلعاات لفوق عند بيسان لقاتها مأنقة بتكشيطتها لي جاتها زوينة وكلها على بعضها طاح عليها السر تبسمات ليها رحيل وقالت بحنية:ماشاء الله جيتي فنة
بيسان:بصح (تبسمات بتوتر)واش قربو يجيو؟
رحيل:سي راهوم فالطريق مهم وجدي راسك حيت غير يقربو يجيو غاتنزلي واخاا
حركات ليها راسها باه ورحيل تبسمات رجعات نزلات لتحت ومع هزات راسها وهي تقشع شيماء لي كانت واقفة قدام نوح بتكشيطة فلأزرق وشعر مسرسب ومگادة...مدات ليه يديها باش يسلم عليها وعينيها عليه وهي مبسمة ليه....
ملي سمعات بلخطبة دبيسان وهي تزن لباها باش تمشي معاه ساعة مبغااش ليها ومشات لعند خوالها وبدات تعمر ليهوم الرااس ومع عيالات خوالها على سبة تاهوما كانو مقلقين حيت معرضاتش عليهوم رحمة...مارتاحت تاعرفات راسها غاتمشي عاد زفرات النفس وتهنات...مدات يديها بكل وقاحة وهو مشافش أصلا فيها قلب وجهو وسلم على ولد خالو لي كان يالاه جاا وخلاهاا بيدها لممدودة ورحيل ابتسامة سخرية على شفايفها وهي مقربة جهتهوم ونطقات بصوت هادئ:مرحبا بيكوم
بدات تسلم عليهوم وفاش وصلات جهة شيماء حركات ليها غير راسها مخلياها تتشوى بلاصتهاا...
العريس وصل هو ولعائلة لي كانو متألقين بالبلدي واحد ينسيك فلاخر...
ريان:(بتوتر) شوفو فيا ياكما شعري خسر
محمد طه:(زفر بتعب) من الصباح ونتا تسول نفس السؤال ياك قلنا ليك كلشي هو هاداك تت عيطو لرحيل باش ندخلو راه شمس دوخاتني
علمو رحيل ونوح لي نزل وهبط ختو لي الرعدة شداهاا ومع وصلات لتحت بدات تبسم وهوما تيصليو على النبي...وصلها لفين غاتجلس وقبل مايبعد باسها فجبهتهاا وتبسم ليها أو وقف حداهاا...سمعو صوت الدقايقية عرفو لعريس ولهدية جااات... ورحيل واقفة حدا راجلها وماكرهاتش تكون مع خوها فديك اللحظة... بان ليهوم ريان هو لول جاي هاز بوكي دلورد وتانيرت شادة فيه تاهي لاتقل أناقة عليهوم وجنيها إدريس بلبلدي... والبقية لور تايشطحوو ويتحركو مع الدقايقية... وصلو لفين واقفة لعروسة وبداو يتسالمو عاد وقف ريان جنب بيسان لي تبسمات ليه بخجل وهو عينو غتاكلهااا...لعينين الزرقين مكحلين جابو ليه التمام...مد ليها لبوكي وشد يديها وبقاو واقفين والدقايقية دايرين خدمتهوم مخلين كلشي ينوض شي يشطح شي يصفق ورحيل تتحرك شوية وفيما تاتبغي ديماري تاتحس بيدين نوح لي محاوطينها تايزيرو عليها وتترجع تكالمى
كلشي كان تيشوف فالهدية لي جايب لعريس ويبرگگ ولحق يتقال كبر بيهاا وداكشي لي جاب زوين وعاطي لعين...جلسو لعرسان بلاصتهوم تايوشوشو مع بعض وكل الأعين عليهوم تيبانو مواتيين
بيسان:كيف جيتك؟
ريان:(عض شنافتو) قنبولة شوية وتفرگعي علياا مون دكتوغ
بيسان:(ضحكات) تانتا جيتي غزال
ريان:عارف (غمزها ونطق بهمس)اراي شي بوسة
بيسان:حماقيتي مكاينااش بوسة وزايدون بغيتي خويا يفرتك هادشي
ريان:ابلاتي نعقد عليك وديك الساعة تشوفي اش تابعك
قلبات وجهها تاضحك حشمانة وهو تيشوف فالناس ويشير لعائلتو ويتبسم ليهوم...
السربايا غاديين جايين تايفرقو على الضيااف المقبلات وكلشي مجمع والموسيقى مطلوقة... الجو كان زوين ومبرد شوية ورحيل قررات تنزل توينز يتبردو طلعات معاها رنيم ونزلوهووم مور مالبساتهوم سالوبيت وشوميز... مدات لمهاا إسحاق وإسماعيل عطاتو لنوح لي جاا خداه من عندها...
أسماء:(تاتحرك لبوسيت فين حاطة روفيدا وقالت) سالوبار لفرحة خارجة من ودنيه
رحيل:هههه وأخيرا راه وصل لداكشي لي بغاا
أسماء:الله يكمل عليهوم بلخير ياربي
كلشي كان هو هداك كلاو نااس وشطحو ونشطو أو وصل وقت تركاب لخواتم ولعائلة لمقربة ناضت جنبهوم تايصورو ويصليو على النبي...لبسها خاتمها وتاهي نفس الشي وشربها لحليب أو وكلها تمر وخداو صور ليهوم وموراهاا قطعو لگاطو وتفرق...
واقف نوح فلباب كيسلم على خوالو لي كان لبعض منهوم غايرجع لفاس ولبعض راه باقي تايمشيو لرياض...
كاتمشى بيسان هي وريان فلفيرمة وليد فليد والمصور غادي تايوريهوم فين ياخدو صور تدكارية مع المنظر تما غير ديال التصاور...شبعهوم تصاور وهوما شبعو ضحك تاسالى ورجع خلاهوم بزوج وريان تايتغزل فيها
ريان: ودابا حنا بوحدنا اراي بوسة
بيسان:(باستو فحنكو)يالاه رييح
ريان:خوك أنا واتي بوسيني هنااا (أشار لفمو)
بيسان(ضرباتو لكتفو)والله مكاتحشم تت حيد نمشي نبدل راه النگافة غاتدي تكشيطتهاا..
عيى معاها وتحلف واش عطاتو لبوسة لي بغا وخلاتو تايتحلف عليها وهي تاضحك عليه... داز داك النهار بسلام وتوحدو فيه زوج قلوب دوزو معاناتهوم وهاهوما تجمعو فالحلال...
***
دازو أيام مور لخطبة لي كل واحد رجع فيها لمشاغلو...خارجة رحمة بأناقتها لمعتادة من الرياض شادة طريق لكافي فين دايرة هي وسناء يتلاقاو... وصلات ودخلات شدات بلاصتها وطلبات اش غاتشرب وجلسات تاتسناهاا وتلفون فيديها تاتونس بيه لوقت تاحسات بلكرسي لي قدامها تجر وهي تهز راسها ظنات بلي سناء لي جات ساعة لقاتها واحد لمرا لابسة النقاب..
رحمة:(هازة حاجبها وقالت بجدية)شكووون نتي؟؟ وباشمن حق جايا جالسة هناا؟
هزات لمرا النقاب على وجهها وبانت ضربة لي فيه ولي خلات رحمة تكمش حجبانها وهي تتفحص وجهها لي فيه بعض لكدمات غاديين وتيبراو...
ميس:(تبسمات ليها تبسمية مريضة وقالت)نتي متتعرفينيش ولكن أنا تانعرفك مزيان
رحمة:شكون نتي؟
ميس:(بصوت ماكر)أنا ميس خت طليق عروستك رحيل وخت تارنيم لي عايشة مع سي إدريس
🔙🔙
فهاد لفترة القليلة قدرات تجمع شي فلوس من داك الطريق لي سلكاتو بكامل إرادتها ولي عاجبها واخا فهاد لمدة لقليلة طاحت بين يدين شي وحدين مراض فمخهوم وحيت لقاو فين يفرغو الشه.وة المريضة ديالهوم دارو فيها مابغااو وهي فالمقابل كان همها هو لفلووس...نهار لول شافتها صاحبتها بديك لحالة تخلعات عليها وعياات ماتسول فيها على سباب ولكن هي حلفات لاقالت ليها شي كلمة... وهادشي لي خلى صاحبتها تشك فيها حيت هي ماعطاتهاش طرف لخيط وخلاتها تستنتج لراسها بلي شي حاجة كاينة وشكها كمل فاش كانت تتشوفها تتخرج مقادة ومعطرة وتترجع حالتها تما قدرات تفهم وخلاتها ضبر محاينهاا...
من دوك لفلوس لي جمعات من داك لوسخ وزادت عليهوم فلوس الطوموبيل لي باعت وفلوس كانو عندها مخبياهوم بلاخبار صاحبتهاا قدرات تشري طوموبيل على قدهاا تعدي بيهاا وتحرك بيهاا ولي عاونها باش تشريها هو نفس الشخص لي باعت ليه الطوموبيل ولي نعسااات معاه أول مرة ولي ولى كليانهااا...
جلسات فطوموبيلتها لي كانت قديمة شوية على هاديك لي كانت عندها قبل وشدات طريق لوجهة ديالها... كانت مبلاصية بعيد وعينيها على لعمارة فين كاينة لكابيني ديال دونتيست لي خدامة عندو ختها رنيم وبقات عاسة عليها... ساعة سعتايين تادازت ربعة دالسوايع وهي تبان ليها واحد طوموبيل دلفريع مبلاصياا قدام العمارة ونزل منها رؤوف لي كانت شافتو قبل وعرفاتو...هزات حاجبها وبقات حاضيااه تابانت ليها رنيم نازلة بكسيوة وهازة صاك جنب وطالقة شعرهاا تاضحك...سلمات عليه بلابيز وعنقها خاشيهاا فيه وبقا مدة تايهضر معاها ويقيس حنكهاا ويرجع ليها شعرها ورى ودنيهاا وهي تاتشوف فيه وضحك...
ميس:(بسخرية)تانتي طلعتي مساهلاااش تت (ضحكات)شابهة لختك عينيك كبيرة
بانو ليها بزوج ركبو وتحركو وهي تبعاتهوم تاوصلو لواحد لكافي ودخلو شدو بلاصتهوم وهي دخلات موراهوم بشوية بانو ليها فين جالسين ومشات جلسات فالطبلة لي وراهوم وبالضبط مور رنيم باش ماتشوفهااش وتشك فيها...عطاتها بالضهر وطلبات عصير وفنفس الوقت طلقات ودنيها لعندهوم
رؤوف:كي غادة مع لخدمة
رنيم:مزيان راك عارف نفس الروتين
رؤوف:الصبر وصاف... كاتفكري تكملي لخدمة مور الزواج؟؟
رنيم:معلوم فكرة لجلاس حاليا مكاضورش فبالي
رؤوف:هي لخدمة مزيانة ولكن فيها تمارة خصوصا كاتزاد ليك مسؤوليات
رنيم:واخا يتزادو خص غير تعرف كيفاش توفق بناتهوم (جغمات من عصيرها) دابا فنظارك وحدة قرات وحفات مخهاا باش تبني مستقبلهاا وملي بناتو تجي تهدوو على قبل الزوااج؟
رؤوف:كاين لي مكيفكرش هاكا وغير تيسمع سيرة الزواج تاينسى كلشي وخصوصا لالقاو راجل لي يوفر ليهوم أي حاجة بغاو
رنيم:ولاجاب الله جاا نهار مابقيتيش مفاهمة مع هاد الراجل أو وقفتو على طلاق شنو غادير؟
كانت ميس تتسمع ليها وتشرب لعصير من تحت النقاب وهي مبتاسمة بسخرية ونطقات بينها وبين نفسها:وجه لفقررر وتمااارة
رؤوف:أنا من عندي لي بغيتي نتي قابل بيه ومغاديش نجلسك من خدمتك ولكن مانبغيش هاد لخدمة تشطنك علياا حيت ديك الساعة مغايبقاش عاجبني لحال
رنيم:ماتخافش عارفة كيفااش نضبط أمووري
رؤوف:(حك حاحبو وتبسم) هي صافي نجيب دارنا ونجي نخطب هه
رنيم:(بخجل) واشوف نتااا اش بان ليك
رؤوف:(شد يديها وقال بجدية)أنا راه باغي نجي ليوم قبل غدا ولكن نصبرو شوية على ماتزوج بيسان ونتهناو من جهتها وديك الساعة (غمزها) مغانزگلكش
رنيم:(ضحكات وفجأة شافت فيه وقالت) داركوم فخبارهوم؟
رؤوف:سي كلشي عاارف
رنيم:وماماك (بتردد) هي معارفااش ببلان عائلتي ياك؟؟
رؤوف:(بجدية)قلت ليك قبل نتي لي تتهميني ماشي عائلتك وبالنسبة لواليدة غير تهناي من جهتها معارفة والو ومغاتعرفش هي لي كيهمها هو ولدها باغي يتزوح ولقى بنت الناس
رنيم:(تنهدات)ولكن ضروري مغاتسول على لعائلة راك عارف؟
رؤوف:وعائلتك ماتت هادشي لي تانعرف ولي تاهي خصها تعرفو (شد يديها وقال بحنية)ماتشغليش بالك بهادشي ارنيم وتحمقي راسك حيت لواليدة لاسولات وعرفاتهوم ماتو مغاتبقاش تحكر وتسول غير تهناااي داكوغ
رنيم:داكوغ
رؤوف:(شاف فساعتو)اش بان ليك نمشيو نضورو شوية وموراها نتعشاااو عاد نوصلك لدار
رنيم:ماخصنيش نتعطل بزاف راك عارف
رؤوف:تسعود تكوني فدراكوم غير يالاه
خلص لكونسوماسيو وشد يديها وخروجو بزوج مخلين ميس تاتشوف فيهوم بجنب عينيها تاغبرو وهي تنطق بسخرية:تت تاعائلتك مراضياااش بيهاا ولكن ماعليش ختك كاينة وغادير خدمتها (ببرود كملات وهي مبتاسمة بشر) ونشوفو الالة رنيم عگوزتك واش غاتقبل بيك مزاال...
خارجة من بيتهاا وهازة خنشة فيها نقاب كيف لعادة حيت متتلبسوش هنا باش ماتخلي حد يشك فيها... تلاقات بصاحبتهاا فالباب كانت يالاه دخلات من لخدمة باينة فيها عيااانة...طلعاتها ونزلاتها وقالت ببرود:عندي معاك هضرة اميس
ميس:ممساليااش دابا تانجي ونهضرو
ص:غاندويو دابا (خنزرات) سحاب ليك معرفااش الطريق لي وليتي غادة فيها وهادشي لي بقااا ليك القح*وب
ميس:ماشغلكش (ببرود)هادي حياتي ندير فيها مابغيت
ص:حياتك بزعطة ولكن متنسايش بلي حنا بزوج ساكنين فدار وحدة وأنا اختي مباغاا حد يشوف فيا شوفة ناقصة ولايحل عليا فمو بسبابك
ميس:(ضحكات بسخرية) غير يعرفوك النااس خارجة من لحبس غايهضرو فيك ولانسيتي؟؟
ص:مانسيتش ومندمااش عليها ودابا خرجت وراني ناوية نكمل حياتي عادي بلاصداع وحيت حنا مشاركين السكنة خصك تحتارميني
ميس:(ببرود) لاماعجبكش لحال تقدري تشوفي ليك سكنة خراا وتهني راسك
ص:(شافت فيها مدة طويلة قبل ماتنطق)ايييه ماقلتي عييييب أصلا لعيشة مع وحدة بحالك تاتخنق حسن ليا نكري بيت وكوزينة ونكون مهنية مع مخي ولى نعيش مع حمقة وقتا.لة بحااالك
دفعاتها وكملات طريقها مخلياا ميس تاترعد بالأعصاب ماكرهاتش طير عليهاا تخنقهااا ولكن هاد الساعة عندها حوايج أهم بغات ديرهوم...زدحات وراها لباب ونزلات لتحت ركبات طوموبيلتها وتحركات بيها واحد لمسافة تاوصلات لحدا شي عمارات مافيهومش الناس بزاااف ونزلات لبسات تم النقاب عاد كملات طريقهاا لبلاصة لي دايرة فعلقهاا...
🔜🔜
كانت رحمة تاتشوف فميس باستغراب وبعدم فهم للكلام لي خرجات من فمها...
رحمة:(كمشات حجبانها) كيفااش نتي خت طليق رحييل وخت رنيم اش تتخربقي؟
ميس:(تبسمات ببرود ورجعات النقاب على وجهها)كنت عارفاك مغاتيقيش داكشي علاش جيت باش نحل ليك عينيك ونگول ليك بلي لگفة مقلوبة عليك
رحمة:(خنزرات فيهاا) نتي فين تتعرفيني بعداا وعلاش جاياا عندي (هزات حاجبها) وشكون گال لياا بلي هضرتك صحيحة
ميس:عارفة مغاتيقيش هضرتي مي ماعليش أنا هنا بااش نوضح ليك شحال من حاجة معرفاهااش (هزات حاجبها) ولدك راه ناوي يتزوج بختي رنيم وراه عارف عليها كلشي ولكن هوما غايكدبو عليك بخصوص واليديها وجيت أنا باش نحل ليك عنيك ومانخليش لماا يدوز من تحتك
رحمة:(عصباتها بهاد لمعاني لي تتلوح) جيني من لخر نتي اش باغا مني؟
ميس:رحييل عروستك كانت مزوجة بخوياا (تنهدات بزيف مصطنع) كان تيبغيها ويحماق عليها وماخلى مادار على قبلهاا تزوج بيها وجابها لدارناا ومي تاهي كانت دايراها بنتهاا ولكن هي طلعات لفعة مكاتسواش وكانت ديما تشعل الصداع بين مي وخوياا ومكفاهااش هادشي حطات عينيها على عمي بدر الدين (ضحكات تحت النقاب بسخرية ) عم راجلهاا لي كان ساكن معاهوم فنفس الدار ملي كان راجلها يمشي يخدم ويبني مستقبالهوم هي كانت تاضور بيه وهو عيى مايبعد واستغلات أنه ممزوجش وحيت عندو فلوس كتر من خويا وهو مول الدار فين عايشين گالت مع راسها هادي هوتة ناضية (هبطات راسها وقالت بتردد مزيف)ماعرفتش كيفاش غانكمل هادشي ولكن هي وياه طاحو فلحرراام وحملات منوو وسيدرا راه بنت عمي ماشي بنت خوياا (بدات تنخصص وهي تتشوف ملامح رحمة لمصدومة) بقات على ديك لحاال وخويا مقلوبة عليه لگفة تانهار حصلهوم فبيتو فوق فراشو وتما ماقدرش يتحكم فراسو ومشى جاب جنووووية وق.تل عمي وهي هربات منوو وفلتات بجلدهاا ومي فاش عرفات جاتها سكتة قلبية وماتت (نطقات بصوت ضعيف تسمعيه تحلفي بلي بصح هادي مجروحة وهضرتها صحيحة وهي الضح.ية) من نهار دخلات لحياتنا وعائلتناا وحنا لور كانت بحال السوسة وشتاتنا كاملين وفرقاتني على راجلي إسلام (حركات راسها) اااه إسلام نفسو لي مزوج دابا ختها أسمااء كان راجلي ولكن هي سباب تاشتتات لياا داري الله ياخد فيها لحق ورنيم (شافت فيها وعينيها حمرين بدوك دموع تماسيح لي تاتبكي) رنيم عارفة كلشي وبقات ساكتة عليه ختي لي من لحمي ودمي تاهي غدراتنااا (تنهدات) صدماتني فيهاا وماقدرتش نتقبلهااا وإلى جييت عندك ليوم باش نحل ليك عينيك على لفعة لي مدخلة لدارك تعرفيها اش تتسوى هي كادبة فكلشي ومقالتش الحقيقة لحد وعائلتها تاهوما معارفينش اختارعات سيناريو لي كدبات بيه على كلشي ومع مكاين دليل ضدها وخويا راه مات فلحبببس ومي تاهي ميتة شكون غايدوي أنا (ضحكات بسخرية) عييت مانهضر وحد ماتيقني وشنو ندير وأنا بوحدي درويشة وخايفة على راسي من شرهاا هي تتبين وجه زوين وهو باش كلات دماغ ولدك تاتزوح بيهاا ودار لغلاط ولكن جيت باااش نبهك ونخليك تعاوني ولدك تاني لي ناوي يتزوج برنيم وتمنعي زواجهوم قبل ماااتندمي وماتنفعك ندامة...
خلاتها جالسة بلاصتها وعينيها خارجين بالصدمة من لهضرة لي قالت ليها ولي أي واحد بلاصة رحمة يسمعها تصدمو... ميس معارفااش علاقة رحمة برحيل ولكن من لهضرة لي سمعات من عند رؤوف ورنيم بخصوص مو ومعرفتها بعائلة رنيم خلاتها تلقى خطة جديدة لي منها غاتخلي زواج ختها مايتقبلش وتشوووه صورة رحيل عند عگوزتهاا ونيت تنتاقم منها حيت مبغاتش دير يديها معاهاا وفضلات لبراني عليهااا... روحها لخبيثة فرحات وارتاحت بهاد لخطوة لي دارت وفبالها شلى حاجات باقي باغا ديرهوم ليهوم كاملين وديك الساعة عاد غاتقدر تكمل حياتها وهي مرتاحة...
تخالفات مع سناء لي كانت يالاه جااي زربانة وغير شافت رحمة توجهات عندها وقالت بسرعة:دزولي حيت تعطلت عليك مي طوموبيل ديالي طاحت بيا أومپان وعيطت ليازيد هو لي جابني لهنا (شافتها ساكتة وعينيها مفيكسين على قنت واحد وقالت بتساؤل)رحمة مااالك فين ساهية
رحمة:(شافت فيها وقالت وهي تترعد بالأعصاب) عاد داباا كانت واحد خيتي هناا قالت لياا شي كلاام مقدراش نتيقووو (شدات راسها)مايمكنش يكوون بصح
سناء:اويلي مالكي اش واقع؟
رحمة:(هزات صاكها وناضت) لاكان هادشي بصح مغانسكتش عليه لا لا عمري نقبلووو
ناضت خارجة مخلية سنااء نايضة تتخلص وغادة تابعاهاا تتجري بداك الطالون ومن زهرها لحگاتها وشداتها قبل ما تركب
سناء:مااالكي اش طاااري عاودي ليا
رحمة:(سرطات ريقها) كنت تانتسناك تاجات واحد خيتي وجلسات حدايا وقالت لياا بلي هي خت طليق رحيل ورنيم هاديك لي ناوي يتزوج بيها رؤوف وقالت لياا هضرة صعيب نتقبلها
سناء:اش قالت؟؟
بدات تتعاود رحمة بالأعصاب وسناء تاتسمع ليها تاسالات وخوات لمزيودة
سناء:ونتي ماتقوليش ليا تيقتيهاا؟
رحمة:السيدة تتعرفني جااات قصداتني وقالت لياا عروستك يعني عارفة رحييل مرات ولدي وتارؤوف عرفاتو ناوي يتزوح برنيم وحنا ماقلنا لحد هاد لخبااار فين غاتكون عرفاتهوم
سناء:ماعرفتش ولكن هاد لهضرة مايمكنش نتيقوهاا واش فنظارك ولد لحاج غادوز عليه لاكانت متلا بصح هو مغايكونش عااارف
رحمة:وهاد خيتي راه عارفة سمياتهوم فنظااارك لاكانت تاتكدب فين جابت السميات
سناء:(بتركيز) تقدر تكون بصح خت طليق رحيل ورنيم ولكن داكشي لي قالت على رحيل يكون كدوب (هزات حاجبها) ولد لحاج راه مكاتفلت ليه تاحاجة وكون كان شاف فيها شي حاجة قد هاكا مكانش يدخلها لدارو وتولي لحرمة ديالو
رحمة: وإلا ضحكات عليه راه لخرا قالت لياا بلي حد معارف وتاعائلتهاا مقالتهاش ليهوم لا لا أنا مانقبلش بهادشي وخصني نتأكد بنفسي واش هادشي بصح ولاكان مغانخليهاش تبقا فعائلتنا ونزيد نخلي ولدي تاني يطيح بين يدين هاديك واااش أنا تعدبت عليهوم باش فلخر يجيو قلالات الاصل ويديوهوم لياا ويخرجو على عائلتنا
سناء:اش تتخربقي واش عارفة راسك لامشيتي ودويتي بهادشي او ولد لحاج ساق لخباار مغايدوزهااش ليك واخا تكوني موو راه هاداك شر.ف دمرتوو
رحمة:(خرجات فيها عينيها) وهاداك راه ولدي مصلاحتو أهم عندي من شي حاجة خرااا سمعتي
طلعات فطوموبيلتها مخلياا سناء غير تتشوف وتسوط هي عارفة ختها عندها مشكيل مع رحيل ولكن لامشات تاجبدات هادشي وگالتو راه غاتحل على راسها بواب جهناام وياخوفي تكون هادي هي لخرة بينها وبين ولد لحاج....
***
باقي لهضرة ماقدراش تنساهاا واخا هي مكيتقبلهاش لعقل ولكن شي حوايج راه كاينين بحال سميات ملين غاتعرفهوم هاديك خيتي الامكانتش بصح عندها علاقة برنيم وعلاش أصلا غاتجي عندهاا وتگول ليها هاد لهضرة فين تتعرفهاا وتتعرف ولادهاا يعني بزاف دلحوايج خلاوهاا تشك وباش تقطع شكها قررات تمشي تواجه رحيل وترضي فضولهاا... وصلات لدرا ونزلات تادق لباب بلاصبر تاتحل من طرف رحيل لي مستغربة فاش شافتها من لعين السحرية ورحمة دازت فيها ودخلات مخليا رحيل تزيد تستغرب...تبعاتها ولقاتها واقفة فالصالة وزولات الفولار وقالت بتساؤل:خالتي لباس
رحمة:(بدون مقدمات) شكون ميس؟؟
رحيل:(بتفاجأ) نتي فين شتيهاا؟؟
رحمة:(هزات حجبانها) يعني نتي تتعرفيهااا؟؟
رحيل:(بإصرار)خالتي نتي فين شفتيهاا؟
رحمة:مكايهمش فين ولكن لي كيهم هو نعرف لكلام لي گالت واش صحيح هي خت طليقك يااك؟
رحيل:(زيرات على يديها وهاد السيرة بالدات تاتخلي أعصابها تفور) هي شنو گالت ليك؟ هاديك لمريضة اش خرجات من فمهاا؟
رحمة:(بعصبية) يعني كلامها صحيح نتي كنت مزوجة بخوها ودخلتي لحياتهوم كي السوسة فرقتيهوم وديك خيتي لي عايشة معاكوم رنيم تاهي خت طليقك يااك
رحيل:(بجدية) خالتي كاينين شي حوايج نتي معرفاهومش وهاديك لمريضة ماعرفتش اش خرجات من فمها واش گالت ليك؟
رحمة:بغيتي تعرفي اش گالت لياا (خرجات فيها عينيها) ملي كنتي مزوجة بخوهاا كنتي حاطة عينك على عمها وطحتي معاه فل.حرام وهو بات بنتك سيدرا
تاتهضر وعينيها خارجين ومع هزاتهوم قدامها بان ليها زين العابدين لي كان واقف قبالتها هو ونوح لي هاز سيدرا بين يديه...
داك لغواات والإنفعااال لي كان واضح على وجهها رجع عبارة على صمت وصدمة وعينيها على ولدها وحفيدها ولي واقفين قبالتهاا... نظرات زين العابدين كانو باردين كيف عادتهوم ولكن شوفة ولدهاا كاانت هي لي جابت ليها التماام...بلامايهضر ولايغوت غير بشوفتو قدر يوصل ليها اش كاين... وسيدرا كانت غير تتشوف بعوينات البابوشة وهي معلقة فنوح لي هازهاا...داك لكلام لي سمعات مافهماتش اش كيعني حيت باقي صغيرة وعقلها باقي مفاهمش هاد لحوايج... مدها نوح لزين العابدين لي هزها على مضض ونطق بصوت هادئ:طلعو لفوق ورد لبال لخوتك
شاف زين فبااه ورجع شاف فرحمة لي بقات جامدة فبلاصتها وعينيها قبالتها خارجين وتحرك خارج من الصالة وسيدرا بين يديه مزيرة على عنقو تاتشوف فرحمة تاغبرو وطلعو لفوق فين كانو أصلا جالسين مع توينز لي نعسو.. حطها زين العابدين فالأرض وهي هزات عينيها فيه وقالت بتساؤل بريء:شنو هي طحتي فلحررررام ؟
بقا تيشوف فيها زين العابدين لمدة قبل ماينطق ببرود وهو عاقد فيها حجبانو:هاد لهضرة ماشي دالصغار ماتعاوديش تگوليها ولاغانقطع ليك لسانك ونلوحو لكلاب
شدات سيدار فمها بزربة وبعدات راسها لور فاش شافتو تحنى وحركات راسها خايفة منو وهمهمات تحت يديها:لا مانگولهاش
خنزر فيها ومشى جلس بلاصتو وهز تلفونو وهي سكتات تتشوف فيه بعوينات لببوشة وخايفة لايديرها بصح ويقطع ليها لسانها...
فلتحت كان الجو مكهرب فيه ورحيل مكانتش حاسة بداكشي لي ضاير بيها على قد مكان كلام رحمة بحال شي ساروت حل ليهاا داك لباب دلماضي لي سدات.... اه بصح هي كملات حياتها ولكن داك لماضي كلما تجبدات سيرتو كيأتر عليها حيت لي دوزات فيه مكانش ساهل...واخا يدوزو قروون غاتبقاا عاقلة عليه حيت دار بصمة فحياتها مكاتمحاااش... هي عارفة ميس مريضة وعارفة بلي تقدر دير أي حاجة كيفما بغات تكون واش وحدة قتل.ات بنتها بد.م باااارد على قبل عشيقهااا تجيها صعيب تخرب حياتهوم هوما...ماشي شي حاجة صعيبة عليها
كانو عيون رحمة تايشوفو فنوح لي قرب جهتهاا بخطوات تقيلة وماحدها تاتسمع صوت زطمات ماحد قلبها تايتزير عليهاا وبصوت خافت قالت:ولدي نوح
هزات رحيل راسها ملي سمعات رحمة وشافت فيه وقبل مايهضر نطقات بصوت خافت بااارد:تقدر تخلينا بوحدنا انووح (شافت فيه) عفااااك
شاف فرحيل مطولا قبل مايخرج من تم بلامايعطي نظرة لمو لي كانت تتشوى من لداخل...
رحيل:(هزات راسها وقالت بنفس البرود) من ديما ونتي تتبيني لياا بلي محاملانيش وأنا كنت تانميك وتاندير لماا ملين يدوز تتجرحيني بكلامك وتانقول ماعليش هادي مت راجلك عطيها عدر وليوم اشمن عدر نعطيك ونتي جيتي تاطع.نبني فشرررفي (كمشات حجبانها) واش عند بالك لاكان داك لكلام بصح كان ولدك غايدخلني لدارو ويرجعني مرتوو (ضحكات رحيل بسخرية) أكيد مستحيل الشوفة هي لخرة مغايشوفهاش فياا بقات غير يتزوجني ويولد معاياا (شافت فيها ونطقات بصوت تقيل) هي جات وضحكات عليك بداك لهضرة ونتي تيقتيها حيت أصلا كنتي تتسنايني نغلط ياش تبيني كرهك لياا لابغيت راه مغاديش نبرر ولكن بيما انك جيتي وتاهمتيني فشراافي فمن حقي ندااافع عليه (زيرات على يديها وعينيها خارجين فرحمة) داك خوهاا لي رضااااتو مظلوووم هو أخبث واحد شفتو فحياااتي نهار لول وراني وجه زوين وتحلفي بلي هادا راجل معقول وتعزليه مابين مياات واحد ولكن غير ظمني وتزوج بيا وهو يعري على وجهو وبين لخبث لي فيه... تزوج بياا ونفاااني فمدينة مكانعرف فيهااا حد وبعدني على واليدياا باش يدير فيااا مابغااا داك خوهاا لي عند بالك راه مسكين هو راه شيطاااان ماخلى مادار فحياااتو (بدات تتحسب ليها بيديها) كيف.سد ويسكرررر ويحش.ش ويق تل (ضحكات بسخرية وهي تتشوف فعيون رحمة لي وساعو من ديك لكلمة) تصدمتي ياااك ولكن أنا باقي ماكملت ليك (تبسمات ليها بمرارة) هددني بعائلتي وكان غاااايقتل ليااا بابا فاش شعل لعافية فلگاااارج ديالو وهو كان فيه وبسبابو ماما دارت كسيدة وبقات شهورة فلإنعاااش ومكفاهش هادشي كااامل عرفتي اش دار (عضات على شفتها وقالت بصوت مرتاجف) باعني لعمووو بحال شي كلبة عطااااني ليه وأنااا حاملة ببنتو هوو باعني لعمووو (دموعها بداو ينزلو وصوتها كان مخنوق من هاد الدكريات لي تيهاجمو عقلهاا) عموو لي كان كتر منوو مريض وحبااااس وقاااطع يديه من الرحمة دسيدي ربي واحد لي همو غير راسو بااش نولي ليه ماخلى مااادااار (حركات راسها وصوتها تخنق وبزز باش خرجاتها) ملي داااك الشماتة دخوها عطااني ليه وشد لفلووووس علياا بحال الاراني شي سلعة شدني وبغا يغتااصبني واخاا كنت تانغوووت لداك الشماتة بااااش يعتقني ولكن هوو مدااار والو وخلى داك لوحش يقرب مني (ضربات على صدرهاا) بااش يدير فياا مابغااا ولكن أناا ماخليتوش وعمرررري كنت نخليه واخا يكون فيا عرق واحد كيضرب (هزات يديها بهسترية) وبيديا هادو خشيت فيه موس باش نعتق راااسي ومانخليهش يمسني...
رحيل:(هزات راسها بهسترية ودموعها نازلين) باش نعتق راااسي منو خشيت فيه مووووس أو وسخت يدي بد.مو باااش ندااافع على شرااافي لي نتي شكيتي فيييه... عند بالك هادشي سالى هنا لا مسالااااش حيت هاداك لكلللب عندو سبع رواااح ومكفاهش هادشي كااان باغي يبعدني كتر على عائلتي وفاااش عرفني حاااملة كاان بغااا يطيح ليااا بنتي لي كرهتهااا بسباااب باها واش فخبااارك ديك لبنت لي جيتي وقلتي عليها داك لكلااام نهار تزااادت ماشفتش فوجهها وحليبي حرمتووو ليهاا غير حيت باهااا هو داااك لكلب دخو ديك لمريضة؟؟ خوهااا لي ق.تل لياا صاااحبتي غير حيت كنت بغيتها تعتقني رزاوهااا فشبابهاا وقهرووو واليديها عليهاا وحمقوووني فعقلي ودمرو نفسيتي وخلاووووني كانتعالج عند طبيبة نفسية باااش نقدر نرجع كيف كنننت (مسحات دموعهاا بعنف) ديك لمريضة لي جاات تتكدب عليك فوجهك راه هي لي خاانت راجلهاا مع واحد من عائلتتوو وقتلااات بنتهااا الصغيررة ودخلااات لحبس... وفاش خرجاات ولقات كلشي ضدهاا مرضاااتش وبدات دير ففعايل خوهاا لمريض وداك عمها الشيطاان (خنزرات بحقد) هاديك لي تيقتيهاا رااه كانت باغااا تقتل ليك حفااايدك بدم بااااارد وغير ربي لي لطف وعتقهوووم (حركات ليها راسهاا وقالت ببرود) ااااه كانت باغاا تقتل ليااا ولادي وهي لي ضربااااات أسماء بطوموبيل وكااانت أتقتلهااا هي وبنتهاااا ومكفاهااش هادشي جاااات باش تخرب حياة ختهاا رنيم لي كانت عكسهوم ديك لبنت لي مااتلوتاااتش بديك لعائلة لمريضة ديك لبنت لي ولدك بغااهاا وبغى يتزوج بيهاا حيت لقى فيها لي بغااا وكون كاااانت خايبة كون گاعماا بقات فدارناا وبااابااا رجعها بحااال بنتووو (شافت فيها بنظرة مطولة وصوتها لي كان الانفعال ولغصة واضحة فيه تبدل ورجع بااارد) لاعاودت ليك ماشي باش نبرر ليك حيت انااا عارفة راسي اااش تانسوى وهادشي أصلا متعلق بياا وماشي من حقك تعرفيه ولكن أنا هضرت باااش نخليك تعرفي بلي ماشي لي تانشوفوه ديما كايكون صحيح نتي حكمتي علياا من أول مرة وماعمرك درتي محاولة باااش تعرفيني خديتي فكرة عليا وبقيتي متشبتت بيهاا وفيما يوقع شي مشكيل بسيط كنتي تجي تلوميني وأنا كنت تانسكت وتانقول ماعليش ارحييل عدريها راهاا أم فكل مرة كنت تانسكت وتانهار ولدك بغااناا نجيو نسكنو هناا حاولت نهضر معاه بااش يتراجع ولكن فالأخير أنا لي كنت خااايبة ولعرووسة لي جاات وشتتات شملكووم (هزات كتافها) أنا هضرت وشرحت ليك حيت بكلامك جبدتي سيدراا وحسستيها راه بنت لحرااام وهادشي لي عمري نسمح بيه حيت بنتي خط حمررر ومغانخليييش هاد لمااضي لي مرضني فصحتي يمرضهاا هي وديك خيتي لي خرجااات هاد لكلام عليها نهار توقف قدامي مغانرحمهاااش حيت قربات لولادي وكانت غاتأديهووم غاندمهاا على هادشي ونتي اخالتي (نطقات ببرود) الله يسمح ليك
عطاتها بالضهر وتمشات بخطوات تتبين كمية الإرهاق لي تعرضات ليه فهاد الساعات لقليلة...وهي تتعاود لماضي حسات براسها استنزفاات جل طاقتهاا... مع زطمات برا الصالة باان ليها نوح لي كان واقف جنب لباب وباين عليه سمع گاع هضرتهاا... تخطاتو وكملات طريقها بدون ماتنطق بتاشي كلمة تاوصلات لفوق لقات ولادها ناعسين وسيدرا ساكتة تاضور عينيها وزين العابدين فبلاصتو...غير شافتها سيدرا وهي تنوض لعندها ورحيل هزاتها وعنقاتهاا بالجهد وتمشات بيهاا لبيت نعاسهاا تادخلو وتسطحات هي وبنتهاا فوق النموسية معنقااهاا بالجهد... كانت محتاحة لتعنيقة سيدرا لي بدورهاا تخشات فمهااا ونطقات بصوت حلوو خافت:مامي أنا هناا
ديك لجملة هي لي كانت محتاجة ليها رحيل لي سدات عينيها كابحة دموعهاا وديك لغصة لي فحلقهاا كلما تفكرات كلام رحمة..
**
جلسات فوق السداري وعينيها محلولين على جهدهوم وديك لهضرة لي قالت رحيل تتعاود فودنيها مخلياها تصدم.. أي واحد يكون سمع داك لكلام مغايقدرش يتيقو ويتقبلو فمابالك رحيل لي عاشتو... هادشي علاش عمرنا نحكمو على لكتاب من غلافو وهي حكمات على رحيل بلاماتعرف هاديك السيدة اش دوزات غير عرفاتهاا طلقات وهي تقندش عليها ومبغاتهااش وحسات من جهتها بالغيرة حيت شافت تعامل نوح معاها وهي بوحدها لي مولفة ولدها يعاملها هاكاك وفاش دخلات مرا خرا لحيااتو ماتقبلاتهااش... عليها ماعطاتش مجال لرحيل باش تعرفها وكانت تتصدهاا وفيما تلقى شي فرصة تبين ليها كرهها لي ماعندو تاشي عدر أو سبب... سمعات صوت لخطوات وهزات راسها لقات نوح داخل بهدوء لصالة ومشى جلس فالسداري قبالتهاا ودقائق من الصمت تاكسراتو بصوت خافت:أنا اولدي مكنتش عارفة أناا
نوح:(قاطعها ببرود) شحال من مرة درتي نفس التصرف وكنت نميك عليك ونعطيك أعدار ايمّاا وهضرة معاك مامرة مازوج ونتي اش گلتي؟
رحمة:(بدموع ندم)ولدي
نوح:(تحدر لقدام وكمل بنفس لبرود)دوك لمرات كنت تانميك ولكن هاد لمرة نتي طعن.تي مر.تي فشراافها وهادي هي اللخرة بيناتنا ايمّا..
كلامو الباارد ليها كان بحال شي موس اختااارقهااا فقلبهاا وخلاهاا بين الحيااة ولموووت... كون غوت وزعف عليها كان غااايكون رحم ليها أنه يهضر معااهاا بطريقة باردة... هي أكتر وحدة عارفة ولدها نوح وعارفة بلي هو ماشي من نوع لي فاش تيغضب يبقا يخاصم ويلوم... هو نسخة على باه إسماعيل فهاد القضية هادي بالدات... يمكن ناصر هو لكبير فخوتو وكان تيرافق باه بزااف عكس نوح لي كان ملاهي مع مستقبالو...ناصر لي واخا جدي ولكن فاش تايتقلق منك ويتعصب تايخرجها ليك مكيبقاش ساكت وفاش تايتقلق منك غير يشوفك نادم تايحن ويسامح ولكن نوح لا بلعكس هو تايخليك بحال لحنش لمقطوع ليك الرااس مكيقتللك مكايحيييك... بحال بااه تتعقل ملي كاانت يالاه تزوجات بيه ملي كانت تغلط كاان يندمها غير بسكااااتو وتجاهلو ويخليهاا تعرف حجم غلطهاا باش ماتكرروش مرة خرا... ونوح ولدها شابه ليه... هي عارفة بلي هو عطاها فرص كتيرة غير حيتاااش هي مو أما كون كاان شي حد اخر وغلط داك لغلط يقطع معاه لغى ويخليه يضبر لمحاااينو ولكن حيت هي موو هضر معاهاا بلخااطر فلمرة لولة ملي جرات عليها من الدار وهي واحلة فروحهاا وهو مكاينش... واعداتو أنها مغاتعاودش وهو عطاها فرصة ولكن هي مستاغلاتهااش بلعكس كان فكل مرة تاتزيد تخليه يكفر كلما سمع كلامهاا لمرتوو لي كيشوف أنه ماعندو تاشي مبرر...كون غير كانت رحيل غلطات معاهاا ولادارت ليها شي حاجة لي تستاهل كان غايفهم مو ولكن هي عمرها قربات جهتهاا بلعكس هو شاف كيفااش هي قربات منهاا فاش كانو ساكنين فالريااض واخا مكانش تايهضر ولكن مكانتش تتفلت ليه تاحاجة...
ميك على تصرفات وكلام كتير ولكن مغايقدرش يميك على اتهااام مووو لمرتو والط.عن فشرفهااا بديك الطريقة لي شاف وسمع... والطامة الكبرى أن سيدرا تاهي كانت وسمعاات واخا مافهماتش لمعنى ولكن ديك لهضرة غاتبقى فعقلهاا وهو أكتر واحد عارف تأتير داك الكلام على نفسية طفل حيت سبق أو ولدو عاش نفس لحدت بشكل مغاااير...
ملي قال كلامو لخر حسات براسها تخنقات وزادت فوتيرة بكاهاا وهي تتشهق ومقدراش تخيل راسها عايشة حياتها بلا ولادهاا... من بين الأشياء لي تتخاف منها رحمة هي تحرم من ولادهاا وتبقا بوحدها من نهار مات ناصر وتحرمات منو وهادشي ولى عندها بحال فوبيااا... ملي مات هو وباه كانو معاهاا ولادها وصبروها على فراقهوم وعاشت معاهوم حياتها وكملات عادي...ونهار فكرات تزوج ولدها كانت باغا تشوف ليه شي وحدة لي تتعرفها باش تظمن ولدها يبقا جنبهااا واقتارحات نور الهدى ولكن رفضهاا وموراها اقتارحات شيماء وقالت لي تانعرف حسن من لبراااني... بعدا ولدي غايبقا معاياا لاكانت عروستو تانعرفهاا وأنا لي اختاريتها ولكن نهار جاب ليها رحيل وعرفاتها مطلقة ماتقبلاتهااش وخافت تبعدهاا عليه داكشي علاش معطاتش ليها فرصة باش تقرب منها وتعرفهاا كانت تتشوفها من بعيد وتحكم عليهاا وخلاص فاش تتشوف معاملة ولدهاا ليها كايزيد نسبة عدم تقبلها لرحيل تزيد... ديك لغيرة على ولدها خلاتهاا تصرف تصرفات طائشة نتيجتهاا هاهي دابا تتشوفها قدام عينيها...
مزاد خرج تاكلمة مور اخر كلام نطق بيه وناض مخليها بوحدها فديك الصالة تتبكي تاحسات بقلبها ضرهاا... عارفة بلي واخا تهضر مغاديش تصلح لي دارت...ناضت من بلاصتها هازة صاكهاا وخرجات من الصالة فاتجاه باب الدار ومع حلاتو بان ليها واقف حدا طوموبيلتوو تيكمي وعاقد حجبااانو من الشوفة باين فيه كااعي دبصح... فاش تتجيك الدقة من لقريب تتكون قاصحة داك الاتهام لي تهمااات بيه مرتو راه هو لول جرحوو وهانتوو واحد الإهانة لي صعيب ينساهاا...
قربات جهة طوموبيلتها باش تركب وهي باقي تتشهق وتبكي ومع وصلات سمعات صوتو لي نطق بخشونة ممزوجة ببرود بدون مايشوف فيهاا:طلعي نوصلك
مقالتش لا مشات بهدوء جهة الطوموبيل ديالو حلاتها وجلسات فيها وهي تاتمسح دموعها وتشوف فيه كيفاش حاني راسو ومكمل داك لگارو لي تيكمي تاسالاه ولاحو الأرض عفس عليه ودفل عااد قرب جهة طوموبيل وركب بلاصتو..
فصمت رهيب تحرك مخلي رحمة تاتعض على شفايفها بالندامة قبل ماتسمعو نطق ببرود:فين شفتيها؟
رحمة:(فهماتو اش قصد) فلقهوة كنت غانتلاقى بسنااء وتسنيتهاا تاتجي شوية حسيت بشي حد جر لكرسي وكانت هي
سكت معاودش سولها ورحمة بقات غير تتشوف فيه بجنب عينيها بغات تهضر ولكن حشمانة منو...شافتو شاد طريق الرياض وهي تنطق:غانمشي عند سناء
مقال ليها لا واخا لا لا قلب الطريق فهدوء تاوصل لعمارة فين كاينة لاباخطمون دسناء واليازيد وهو يحبس الطوموبيل وبقا جالس ساكت كيشوف غير قبالتو... ترددات تنزل ولكن فالأخير هزات صاكها وحلات لباب نازلة... مع وصلات باب لعمارة وهي تسمع صوت رواايض لي تحكو مع الأرض بواحد الجهد خلاهاا تنزل دوك دموع لي محبوسين فعينيها وهي تتشوف فطوموبيل ولدها لي الشوفة هي لخرة حرمها منها...
جاية هازة بين يديها كاس دلماا وعينيها على ختها لي ملين دخلات وهي غير تتبكي...شي ساعة تقريبا ماحبساتش من لبكاا لدرجة بقات فيهاا... مدات ليهاا الماا وشداتو رحمة بأيادي مرتاجفة حاسة براسها مخنوقة وباغا غير تبكي وصااف... تنهدات سنااء لحالتها وقالت بصوت هادئ:طيبتي عينيك بلبكااا ارحمة؟
رحمة:(بصوت مبحوح) قلبي لي طاايب اسنااء هناا (حطات يديها على قلبها) كايضرني بزاف
سناء:(زفرات النفس)ففف اش داك تمشي عندها يااك قلت ليك تسناااي وماتزربيش علاش ماسمعتيش كلامي؟
رحمة:لهضرة لي سمعت من عند هاديك ماخلات ليا تاصبر وااش فنظاارك داكشي لي سمعت سااهل
سناء:مساهلش ولكن كان عليك تشوري شوية وتفهمي عاد تهضري
رحمة:هاديك خيتي جات قصداتني وعرفاتني شكون أناا وفاش سمعتها اش قالت وكيفاش كانت تتهضر بديك التقة وتجبد فالسمياات قلت يمكن كلامها بصح
سناء:وماقلتيش مع راسك لكانت هضرتها بصح ولد لحاج مغايعرفهاش؟؟ دابا بيني وبين واش نوح تاتخفى عليه شي حاجة وهو كي النمس تايعرف الكبيرة والصغيرة... يجي تاال السيدة لي تزوج بيهاا ومايعرف عليها والو؟؟
رحمة:(عضات على شفتها بندم) ديك الساعة فكرة غير فمصلاحة ولدي وخوفي غلب
سناء:ولو ارحمة هاد لمرة نتي غلطتي ومغانجيش فصفك نهائيا (بجدية)يمكن هضرتي غاتقصحك ولكن هادي هي الحقيقة نتي غير سمعتي هضرة ديك خيتي فكرتي بتسرع ولانگولو لقيتي فرصة فين تسمميها بهضرتك وتجرحيها... لقيتي فرصة وماضيعتيهااش بلمرة يقدر بصح فكرتي فمصلاحة ولد لحاج ولكن طريقة بااش مشيتي وتهجمتي عليها بلكلام غلط كان ممكن تمشي تسوليها بلخاطر وتقولي ليها ابنت الناس هاشنو گالو عليك ولهضرة لي سمعت ديك الساعة تاحد مغايلومك ولايعاتبك وتاولد لحاج غايفهمك وغايعرف خوفك عليك ولكن نتي مشيتي وتاهمتيها بطريقة غير مباااشرة... (تنهدات) بصح فلول مكانش عندي مع رحييل وكنت متنحملهاش حيت كانت ديك الساعة تتبقا فيا شيمااء ولكن شوية بشوية لاحظت بلي ديك السيدة الله يعمرها دار ماشي خبيثة بلعكس حنينة ونهار سمعت بودني كيفااش هضرات عليا ودفعات عليا فغيبتي كبرات فعيني وندمت حيت گلت عليها هضرة متستاهلهااش... وفاش زدت تقربت منها لقيت بلي هي إنسانة مسالمة مكتحقدش وحقانية أو عرفت لاش ولد لحاج ختارهاا تكون الحرمة ديالو... ودك الطلاق لي حكمنا عليه حنا ماعرفناش سبابوو ولكن دابا نتي عرفتي وسمعتي اش دوزات (بأسف) غير لي عاودتي لياا صدمني وخلى لحمي يتشوك علياا فاش تخيلت بلي عاشت داكشي كااامل ولمعاودة راه ماشي هي فاش تتعيشي بالديطاااي... وحدة بحالها ملي بقات واقفة على رجليها وبعقلها راه خصهاا لبنجور ديالها حيت منتاااحراتش يااك أنا لي قدامك فاش خاني ليازيد وطلقنااا حسيت بلحياة وقفات ولكن هي اش غاتقول ؟؟ تخيلي معايا غير أن راجلك يبيعك لعمو باش يتعدى عليك كيف غاتكون نفسيتك ؟؟ أنا صراحة ماقدرتش نتخيلهاا ولكن هي عاشت ديك التجربة وبقات متشبتة بالحيااة ومستسلماتش وهادشي كافي يبين بلي ديك السيدة نقية وجوهرها حرر (شدات يديها ونطقات بهدوء) نتي ماخصكش تكرهيها ودخلي فكرة أنها بعدات ولد لحاج عليك حيت ولد لحاج راه ماشي صغير باش تبعدو مرا نتي خصك تبقاااي تحمدي الله وتشكريه حيت ولدك طاح فيدين مراا بنت الأصل ماشي قليلة التراابي... مرتاح معااها وعايش معااهاا لحياة لي باغي هادشي بوحدو يخليك تفرحي ارحمة
رحمة:(بصوت خافت باكي) أنا كنت خايفة غير ولادي مايبقاوش معاياا ونبقااا بوحدي خايفة نبقاا فداك الريااض لاحنين لارحيم اسنااء (هبطات راسها وقالت بخنقة) ناصر وإسماعيل مشااو خلاوني ومانقدرش نصبر يخليوني تاولادي لخررين
سناء:نتي ماماهوم وهوما مستحيل يخليوك ارحمة غايبقااو معااك نتي راه ربيتي وعرفتي اش ربيتي
رحمة:(شافت فيهاا بصوت باين فيه الندامة) ولكن هو خلاني صااافي ولدي كرهني ومبقااش حامل يشوف فوجهي ولدي اسناااء الشوفة هي لخرة ماخسرها عليااا وكلشي بسبابي..
تترضع بنتها لي كانت حالة عويناتها لقهويين وتتشوف فيها بالسكات...مهدنة وقلبل فين تايتسمع صوت بكاهاا... من نهار جات لحياتها وهي تتحس بمسؤولية حلوة تزادت على عاتقهاا خلاتهاا تبعد على لمحيط لي كانت عايشة فيه وتنعازل فواحد لعزلة لي محببة على قلبها... رضعاتها تاشبعات وحطاتها فوق النموسية تاتشوف بعويناتهاا ولهاية ففمهاا... تحل لباب ودخل إسلام لي كان جاا يطمن على بنتوو ويشوفهاا هي لي مشتاق ليهاا بحكم أنه من نهار خرجات من السبيطار وهي فدار بااهاا...
إسلام:(خطف قبلة من شفايفها ونطق باشتياق) توحشتك اغزالي
أسماء:(تبسمات) تاأنا وروفيدا توحشناك
تبسم وهبط شوفتو لبنتو وهزها تيبوسهاا ويضمهاا لصدرو ماكرهش يخشيها فيه ويخبيهاا... تكات تتشوف فيه بتبسيمة خفيفة وهو تيفرغ شوقو جهة بنتو تاهز راسو وقال:خصنا نديرو ليها السبوع
أسماء:اه ضروري
إسلام:غانديروه فكازا
أسماء:(باستغراب) علاش؟
إسلام:لواليدة مغاتقدرش تجي لهنا راك عارفة صحتها بدات تقلال
أسماء:علاش ماتجيش تسكن معانا هناا
إسلام:مغاتقدرش تخلي دارها لي عاشت فيها هي ولمرحوم عييت معاهاا ولكن مابغاتش
أسماء:اوا لكان على هاد لقبااال ماعليش نديروه فكازا ونيت روفيداا تزور جداتها وتشوف دار فين كبر باباها
إسلام:(ضحك) ضروري لاكانت جداتها ماتقدرش تجي عندها هي تمشي تشوفهاا ياك اباباتي همم
أسماء:صافي دوي مع بابا وتافقو وشوف لوقت لي يناسب باش نطلعو ودير حساب مغانتعطلوش حيت عرس رياان قريب وخصنا نوجدو ليه
إسلام:تاأنا لخدمة مايصلاحش ليا نشد كتر من سيمانة مهم غانمشي نشوف عمي إدريس ونرجع عندك (باس روفيدا بالجهد) هانا راجع اسكرتي
**
على لمسات أيادي حنينة حلات عينيها وسط الظلام لي فلبيت... صوت أنفااسو لي حداا ودنيها خلاوهاا تنهد وتزيد تخشى فيه كتر مخلية ضهرها يزيد يلامس صدرو... يديه كانت تاتنزل وتهبط على كرشهاا ويوصلها لصدرهاا من تحت التيشورت لي لابسة... كان عارفها فايقة من صوت أنفاسها وتنهيداتها لي تاطلقهوم بسبب لمساتو ليها... ساهية تتفكر حوارها مع رحمة وكيفاش اتهمااتهاا بداك لباطل ولغصة تكونات تاني فحلقهاا... كانت تادوز ليها كلشي وتتعدرهاا ولكن باش تاهمها فشراافها بديك الطريقة وتشك فيهاا وفبنتها ماقدراتش تقبلهاا نهائيا... على قبل دااك الشررف هي كانت غاتولي مجرررمة غير باااش تدافع عليه وماتخلي حد يمسوو ويوسخو ليها
حاسة براسها باغا تبكي وبالفعل زيرات على شفتهاا وخلات دموعها ينزلو وسط داك الظلام بلامادير صوت... ولكن هو كان حاس بيهاا تتبكي غير من كتافهاا لي تايتهزززو بين يديه... ومع دلك ماقال والو وخلاها لاكان لبكا غايريحها تبكي وتخرج اش هازة غير ماتبقااش كاتمة تاطيح ليه كيف مولفة...
مدة ليست بقليلة وهي تتبكي تافشاات خاطرهاا وارتاحت عاد تململات بين يديه وضارت لعندو مخشية فيه وبصوت خافت قالت:فين سيدرا؟
نوح:(همس ليها بحنية) مع خوتها
رحيل:غايكون فيكوم الجوع (بغات تنوض) نمشي نوجد ليكوم لعشاا
نوح:(زير عليها بين يديه مامخليهااش تململ ونطق بخشونة) نكومونديو من برا نتي غير ارتااحي لياا وماتشقيش رااسك
رحيل:(تحسسات وجهوو وهزات عينيها فداك الظلام وقالت بحب) راحتي أصلا معاااك نتا
نوح:(جبهتو على جبهتهاا) وراحتك عندي هي أهم حاجة الفتنة ديالي
بكلامو لبسيط قدر يخليها تنااسى مافات هاد النهار وهادشي لي كان هو باغي...ماجبدش لموضوع ليهاا كيفما هي مادكراتووش وتسد فديك الليلة... ودازو بضع أيام لي تقرر فيهوم سبوع روفيدا لي غادي يدوزوه قبل عرس ريان وبيسان... العائلة فرحات حيت غاتبدل لجوو وتسافر... إسلام كلف خوه يكري ليه قاعة وداكشي لي خاص على مايجي هو ويتكلف بالباقي... أما باقي أفراد العائلة كانو تيوجدو لسفر ويتقداو اش خاصهوم...
ليلة قبل السفر كانت رحيل واقفة فالحمام تاتزول الحنا لي حنات بالشهوة معمرة يديها مع بويض بانت لحنا حمرا فيهوم تتشعل... غسلاتها بلماا باش تزول لبقايا ديال لحناا وشافت فيها بتبسيمة قبل ماتخرج وهي تتمسح يديها بالسغڤيت... شافت فلڤاليز لي وجدات قبل ومشات نازلة لتحت توجد لعشاا حيت قريب نوح يجي وخصو يتعشا باش ينعس بكري ويرتااح بيما أنه تابعهوم سفر غدا...
مجموعين فالصالة وسيدرا تاتوري لباها لحنا لي تاهي دارتو واخا خفيف وتعاود ليه فين مشات هي ومها وشنو دارو...تتحط ليه تقرير ليومي بلامايحتاج يسول... حطات لعشا وعاد جا زين العابدين لي يالاه دخل...جلس حداهوم وبداو يتعشاو تانطق نوح بصوت هادئ:الله يعطيك الصحة الفتنة
رحيل:(تبسمات برقة) بصحتك وراحتك (دارت لهاية لإسحاق وكملات هضرتها) حمدلله وجد فلوقت مع تعطلت عند النقااشة..
سرطات ريقها وقفزات بلاصتها فاش شافت زين العابدين دفع داك الطبسيل لي قدامو بالجهد وناض خارج من الصالة...
ردة فعلو العنيفة خلات رحيل تففز فبلاصتها وتسرط ريقها تتشوف فيه خارج من الصالة وعاقد حجبانو... ماعرفات مالو تاني وشنو طاري ليه وهاد لولد تايجيها حال وحوال...مكاتعرفي علياش مطووي وتتخافي من ردات فعلو لي تتكون بعض لمرات عني.فة... ضارت شافت فنوح تتسائل بعينيها مالو وشنو قالت تااعصباتو...
رحيل:(بخفوت) مالو؟
نوح:(حك لحيتو ونطق بهدوء) كيعيف من لحنا
رحيل:(خرجات عينيها وأوطوماتيكمو شافت فيديها وقالت) تت مكنتش عارفة
نوح:(مكمل كلامو وهو تياكل) ماعليش الفتنة نتي مادرتي والو وزايدون أنا لي نسيت نعلمك
رحيل:تت شكون غايطيب ليه دابا (كمشات حجبانها) عمري شفت شي حد تيعيف لحناا (تبسمات ليه) وزعمة نتا تتحماق عليها
نوح: هاداك راه واحد لعكسي بلاماتعيى راسك وكولي ولاكان على لماكلة راه غايضباني راسو ولاغايكوموندي
تنهدات وبدات تتاكل وسيدرا حداهوم تتخشي فوجهها وضور عينين الببوشة وهي تتسمع لهضرتهوم...
محني على الروبيني دلحمااام تايشلل فموو ويعاود...حجبانو معقودين وباين طالع ليه لخز لدماغ...مكيحملش ريحة الحناا ولايشوف شي وحدة دايراهاا وتيعيف ياكل من يدها... هز لسترين وبدا يشلل فموو تاطيبو عاد خرج تيمسح فمو بلفوطة لي لاحها فوق النموسية بعصبية ونطق بصوت غاضب:قلا*وي
تعصب وماقدرش يتفكر ديكور يديها لي فيهوم لحناا ولي كلى منهوم...حس بمعدتو تروعات عليه ومبقاش گاع باغي ياكل... تكى فبلاصتو تايخربق فتلفونوو تاسمع الدقان فلباب ودخل نوح لعندو بملابس الدار مريحة..
نوح:شوية دابا؟
زين العابدين:(متكي نصو لعلوي فوق النموسية ونطق ببرود) لا
نوح:(جلس حداه وضربو لفخدو تاتسمعات الدقة فلبيت وهادشي غير مزاح بيناتهوم) نتا خرجتي لباك من الجنب كاين شي حد تيكره لحنااا؟؟
زين العابدين:(خسر سيفتو وقال بانزعاج واضح) لواليد تت
نوح:نوض شوف اش غاتاكل ماتبقاش بجوعك لابغيتي طيب طيب لابغيتي كوموندي شي حاجة
زين العابدين:(كمش حجبانو وقال بجدية) ماتبقاش دير بحسابي فلماكلة وماتبقااش تقيس ليا حوايجي
نوح:(هز حاجبو وقال بجدية) راه عارفة مكاتحملش لحنا واخر مرة دير داك التصرف لي درتي لتحت ودفع فلمواعن قدامهاا هاديك راه نعمة دسيدي ربي مكاتدفعش بديك الطريقة سمعتي
مجاوبوش زين العابدين واكتفى غير يحرك ليه راسو باه قبل ماينوض نوح خارج من البيت مخليه جالس كيف كان تيخربق تلفونوو... الصهد لي حس بيه خلاه ينوض يدخل لحمام ويضربها بتدويشة طلق فيها عظاامو... من طبعو منظم بزاف وماشي شي واحد لي فوضوي وماخرج من داك لحمام تانقااه وماخلاش وراه روينتو... معتامد على راسو من الصغر ومامولفش لواحد يدير ليه شي حاجة ولايعول على شي حد... لبس عليه غير شورط وبقا عريان لفوق كيف مولف... شعرو لمخربق سارد بلماا ومخليه هاكاك بلاماينشفوو ونزل لتحت....
كانو ضواو طافين لتحت دخل نيشان لكوزينة وشعل الضو وبقا واقف تيشوف اش غاياكل... حل التلاجة وجبد منها صدر دجاج وحطو يتطلق وبدا تيقلب على لمواعن مع معارفش فين رحيل تتحطهوم... دار لماا يسخن وخدا مقيلة ودار فيها زويتة بلدية وخدا داك صدر دجاج حطو ودار ليه مليحة وإبزار وخلاه يطيب وفاش لماا طاب دار ليباط يتسلقو ومشى يكمل لاصوص ديالهاا...كايخدم بالتاويل وهادشي مولفو فاش كان تيقرا براا أغلبية وقتو هو لي كيطيب لراسو... من هنا لهيه تاكان سالى وحطو لباط فطبسيل واختمها بلفرمااج فلفوق... هز كانيط دلموناظة ومشى غادي لصالة باش يتعشى ويتفرج...مع قرب بان ليه الضو مشعول فالصالة ولباب مردود وصوت تلفازة مشعولة...دفع لباب ودخل بانت ليه سيدرا واقفة فوسط الصالة وهازة تلكوموند وعينيها مخرجاهوم فداك الفيديو كليب ديال إليساا... تتقلدها وتغمض عينيها وتغني بأحاسيس والجميل أن صوتها زوين وفيه واحد لبحة طفولية خطيرة... حرك راسو ببرود وقرب جهة الطبلة حط عشاه وتمشى جهتها خطف ليها داك التلكوموند تاضارت قافزة وقالت: زينبيدين
خلاها ومشى جهة الطبلة جلس وبدل داكشي لي دايرة وهي غير شافتو اش حط فوق الطبلة عينيها خرجو...تتحماق على لبااط والعجائن مشات تتجري وقفات حداه وقالت بعوينات لببوشة:زينبيدين نميمي معاك
مجاوبهااش وكمل عشاه وتاهي متسناتوش يجاوب مشات تاطير لكوزينة جابت فرشيط ورجعات لعندو وقفات حداه وخدات لقمة لولة وهي تتشوف فيه بجنب عينيها وفاش مارفضش وخلاها تاكل تاهي لقاتها من لجنة والنااس بدات تتاكل وحد مكيهضر مع التاني تاسالاو داك الطبسيل وجلس يستارح وهي تشوف فيه بنظراتها الطفولية الماكرة وقربات جهتو مرجعة يديها ورى ظهرها تاطلعات لعندوو... وغير جلسات حداه وهي تخرج يديها من ورى ضهرها وحطاتها ليه على نيفو وقالت تاتكركر:زينبيدين شم حنينة هههه...
خارجة من لحمام بشورط قصير دستاان مع دباردور بلاسوتيان... وشعرها جامعاااه لفوق اوجهها حمر وغير تتسوط بوحدهاا... لقات نوح نعس ليها توينز حيت ديجا رضعاتهوم...جلسات قبالتو وقالت عاقدة حجبانها:اوووووف غانموت بالصهد
نوح:(هز تلكوموند وقاد لكليماا وقال بهدوء) خودي ليك دووش
رحيل:دوشت (غير تتسوط بوحدها) اوووف شووف (تاتوريه عنقهاا) تانقطر بالصهد مايمكنش ليوم لعافية
نوح:(كمش حجبانو وجرها عندو تاجلسات بين رجليه) لجو عادي كيف ديماا الفتنة نتي لي مالك
رحيل:(حكات جبهتها) تانحس بلخنقة ماعرفت علاش
نوح:(باهتمام) كاضرك شي حاجة؟؟
رحيل:(تكات على صدرو لعريان وبدات تاتفشش عليه ودلع)هممم تشهيت نعووم (هزات فيه عويناتها وبدات تسبلهوم) ملي يدوز السبوع نمشيو نعوموو واخا
نوح:إن شاء الله
رحيل:تت ماعرفت واش غاتكون سيدرا طلعات تنعس ولاباقي تاتفرج
نوح:خليها شوية مزال فاش توصل لوقيتة نزل نشوفها
****
داكشي لي بداتو مها بدون قصد كملاتو هي عن قصد وعويناتها المبطنين تايشوفو فيه بمكر طفولي وهو عاقد حجبانو... هي دابا عند بالها تتمازح معاه كيف مولفة تادير ولكن هو راه كفررر وكعى ديال بصح... ديك الريحة لي شم روعات ليه معدتو تاااني وبحركة عن يفة وبزربة دفع ليها يديهاا تااطاحت فوق السداري مع مكانتش شادة توازنها.... ناض مخنزر فيها وهي تكمشات بلاصتهاا وتاضور دوك عوينات الببوشة وتشوف هنا ولهيه...خلعهاا حيت دغياا تسيف وماحدو تايقرب ليها ماحدها كاتزحف فوق السداري تاوصلات لقنت ديالو وهي تخشى فدوك لمخاااد وماكرهاتش تحفرهوم وتخشى وسطهوم وماتباانش ليه ..وقف عليها وعينو شرااانين فيها تاينعل الشيطان وتايدير بوجه باااه فاش تاتصعرو ولكن راه مايمكنش شحال تاتجيه مستفزة وتتلعب ليه على أعصااابو...مكيحملهاااش وحاقد عليهااا وزادت دابا فاش دارت ليه داك لبلاان لي خلاه يتحدر جهتها وهي مع شافتو غوتات ولكن لغوتة ديالها سدها بيديه وخلاها مخرجة عينيها لمبطنين فيه وتاتفركل وهو هازها بين يديه... ماهضرش معاهاا بل تمشى بيهاا خارج من الصالة وطلع بلخف فالدروج وهي راه صافي تتبكي تخلعات وماعرفاتش اش غايدير ليها تاني... دخل بيها لبيتو وعقلو فيه حاجة وحدة يلوحها من الشرررجم ويهني رااسو من صداعها...قربها جهة الشرجم وحلو بيد وليد لخرى راه باقي على فمهاا...مع تحل الشرجم داك الريح لخفيف طير ليه بعض زغيبات كانو ساردين وطاييحين ليه على جبهتو...
زين العابدين:(قربها لعندو وهسهس ليها فودنيها بفحيح) نلووح مك من الشرجم ونتهنى من صداعك
سيدرا:(تاتحرك راسها بلا ودموعها نازلين بحال شلال) هممم
ماهضرش مزال بقا شادها من فمهاا وخرجها من الشرجم وهي غير شافت القضية بدات ترعد ليه وتبكي ولكن تگول واش حن فيهاا... خرج نصهاا ودلاها فالشرجم وفنفس لوقت ساد ليها فمها حيت عارف غير غايحيد يديه غاتغوت وغايجي باه ويفكها من بين يديه وهو حلف تايربيهاا باش ماتعاودش ضور بساحتو وتبرهش معاه...
دم تدفق فراسها وهي مقلوبة بلعكس وعينيها خارجين...هي عزيز عليها بحال هاد اللعب ولكن داباا هي عارفااه ماشي لعب...لبولة شداتها بقوة الخلعة وماحسات براسها تاطلقاااتهاا ومع كان شادهاا من نصها التحتاااني حس بشي حاجة ساردة فداك الشورط وغير عرف شنو هي وهو يطلعهاا بزربة وطلقها بحال لافيها الجدااام وهي تحررات بين يديه وطلقاتهاا ببكية وخرجات من لبيت تتجري معاودش ضارت وراها نيشان لبيتها... أما هو بقا واقف تيشوف فيديه وهو عايف محاملش لمنظر ومشى لحمام تايغسلها بالجهااالة واخا غسلها تايحس بيها باقي موسخة وبعصبية ضرب الزاااجة ديال لحمام تادخلات ليه فيديه ودم بدا يتقطر منهااا عاد ارتاح وخرج بكل برود...
أما عند سيدرا فدخلات تاهي لحمام وحيدات عليها حويجاتها تاهي من طبعها مكاتحملش توسخ شعلات لما كيف مولفة تشوف رحيل تتشعلو وغير كباتو عليهاا فلتحت ومسحات بفوطة وخرجات لبسات سليب ومشات تتجري تخبات تحت لغطاا فاش حسات بصوت لخطوات عند بالهاا راه هو رجع ليهاا... تحل لباب وطل نوح لي مجرد مالمحهاا ناعسة رجع سد لباب مخليهاا تاتقفقف تحت من لغطااا...
الليل كولو مشافتش النعاس وكل مرة تقفز وتقفقف بلاصتهاا... ندمها علاش تمازحات معااه وغير طلع الصباح وسمعات حس مهاا وهي تنوض لايحة لغطااا وخرجات بديك الدباردور والسليب نازلة لتحت لقات رحيل تتوجد فلفطور...
سيدرا:(بعيون منفوخة)مامي
رحيل:(ضارت جهتها ونطقات وهي مكمشة حجبانها) سيدرا يااك تانقول ليك ماتبقايش تنزلي بالسليب هنا حشومة راك كبرتي
مدات سيدار يديها ونطقات وهي مدلية شفتهاا:مامي أنا خايفة
هزاتها رحيل وهي مكمشة حجبانها معرفااش مالها على الصبااح... طفات على داكشي لي فوق لبوطة وخرجات من لكوزينة غادة بيها لبيتهاا... مع جلسات فوق النموسية وجلساتها وهي تخشى فيها سيدرا وبدات تتبكي وتتعاود ليها اش دار ليها زين العابدين وهي غير تتسمع مامتيقااش...
رحيل:(شافت فيها بجدية) ياك تانگول ليك بعدي منو ماتبقاايش تجبديه اش داك توريه لحنااا (كمشات حجبانها) وكون لاحك من شي قنت فين كنا غانوليوو تت
سيدرا:(بتبرير) كنت غير تانلعب معاه
رحيل:(خرجات فيها عينيها بجدية) ماشي لعب سمعتي بابا قالك مكيحملش لحنا ومشيتي بلعاني درتيها راه تانتي باسلة تتقلبي عليه تت (ماقدراتش تيق بلي بصح دلاها من الشرجم) ماتگولي لحد هاد لهضرة سمعتي وتاباباك
سيدرا:(حركات راسها باه وتخشات فمها) هو خلعني بزاف
حركات رحيل راسها بلا حول وبقات معاهاا شوية عاد نزلات لتحت تكمل لفطور وهي مهمومة... فكرة أنه يكون دار داك تصرف مابغاتش دخل لراسها حيت مكاينش شي واحد بعقلو لي يقدر يديرهاا ولكن هي معرفااش بلي زين العابدين راه يدير أي حاجة مكيتسوقش... فضلات أنها تحبس الموضوع تم ومايسيقش ليه نوح لخبار باش مايكونش شي مشكيل بسبابها..هي عارفة زين العابدين مكيحملهااش ومبغاتش تزيد تكبر ديك لفجوة لي بناتهوم... سمعات لحس وضارت لقاتو هو لي نازل شافت فيه وغير وصلات ليديه وهي تعقد حجبانها وقالت باهتمام واضح:مالك فيديك؟؟
تخطاها غادي يصاوب ليه عصير وهي تبعاتو ومع مد يديه شداتها ليه وهو يضور شاف فيها وبغا ينثر يديه من بين يديه وقال:هييي
رحيل:(بصرامة)زگى نشوووف مالك
زين العابدين:(خنزر فيها)ماشي سوقك
رحيل:لاسوقي واااش نتا مكاتحسش ارااا نشوف مالك
زين العابدين:(يديها لي فيهوم لحناا محاملش يشوفهوم ولايقيسوه) ماتقيسينيش
رحيل:(تفكرات بلان لحناا ونطقات بتنهيدة) تسنى ندير ليگات
هزات ليگات لي مولفة تاديروهوم لاكانت غايطيب ولاتشرمل شي حاجة ومكاتبغيش ضفارها يتوسخوو ليها لبساتهوم ورجعات عندو شدات يديه وبدات تحل لفاصمة وهو تيسوط... مايقدرش يدير شي تصرف جهتها حيت عارف باه ايعلقو من شفاار عينيه... حدو عقد حجباانو وبقا تيشوف فيها مع كانت قصر منو وهو طويل وعامر عليها تحلفي راه كبر منهاا... مع شافت داك الدم لي كان يابس وزاج لي باقي ماحيدوش... حدو لوى على ديك اليد فاصمة ونعس.. ماكلفش راسو يعقمو وهي تكمش حجبانها وقالت بجدية:جلس نجيب دواا نديرو ليك جرحتي راسك وماحيدتي تاازاج لي فيه
مشات جابت لبواطة ديال دوا وبدات تعقم ليه وتحيد داك الزاج لي فيه عاد دارت ليه دواا ولوات فاصمة جديدة وشافت فيه بتبسيمة:صافي ساليت (هزات حاجبها) راني عارفة اش درتي لسيدرا لباارح وايااك تعاودهاا وتخلعها لاكانت هي قربات ليك فغير حيت نتا عزيز عليها بحال ريان ومحمد طه ماتبقاش ضربها وتعدى عليها سمعتي هي راه بحال ختك وماتخافش مغانقولهااش لبااك
زين العابدين:(باستفزاز)ماشي ختتتتي ولابغيتي تگوليها ليه گوليها جومونفو فيك
ماخسرش عليها شكرا هي لخرة وتاهي ماتسناتش منو يشكرهااا مشى تايدير عصير ديالو تارجع نوح جايب لفطور واجد وتجمعو عليه وسيدرا راه رجعات تنعس حيت مانعساتش فلليل مزياان...
نوح:مالك فيديك؟
زين العابدين:ماشي شي حاجة؟
نوح:بسباب لونطريما
رحيل:ماتشغلش بالك راه عقمتها ليه (تبسمات باستفزاز لزين العابدين باغا تفقصو وتخليه يدير شي ردة فعل بلاصة داك لبرود لي تايمرضها) ياك ازين
قلب زين وجهو عليها ونوح تبسم ليها وغمزهاا مخليها تاتشوف فزين وتفقص من لبرود ديالو لي تيخليك معارفاهش علاش مطوي...
دوزو نهار غير فالدار تيجمعو لي خاص ويوجدوو حيت فالليل شاديين طريق لكازاا... وسيدرا غير فاقت كلات وتكمشات جنب مهاا ومعاودااتش ضارت جهة زين العابدين حدها تتشوف فيه بدوك لعوينات المبطنين وغير يضور جهتها ويشوف فيها بصدفة تخنزر فيه وتقلب وجهها زعمة مخاصمة معاااك وهو أصلا گاعما داها فيهااا..
فاش عرفات بلي السبوع فگازا وبلي ماتقدرش تمشي وهي غير تتنهد ماكرهاتش تاهي تبدل لجوو ساعة مسؤولية لمحال عليها هي واخا رحيل قالت ليها تسد ساعة مجاتش... ولكن من زهرها رجعات أميمة من السفر يوماين قبل... كانت فلول تتقول لامالقيت كيفاش مغاديش نمشي لسبوع فكازا حيت لمحال ماعندها لمن تخليه ولكن دابا كااين لمن... داك نهار لي قبل السفار كاانت مخصصاه لراسها تقدى شنو خاصها وضور بحالتها شوية... ماخلات ماشرات تكسات ومشات لصالون عاودات قادات التقطيعة ودارت لاسيغ لداتها وقادات ضفران ولحواجب وحيدات دوڤي تحلفي راه السيدة كاتوجد راسها ليلتها لولة مع زمانها ساعة هي ماتتوجد لحد بل تاتجدد طاقتهاا فهاد الأمور البسيطة... هادا هو حال معظم لبنات لي غير تايشريو لبسة جديدة وتتحس بهرمون السعااادة طالع لبلافون فمابالك لااهتمات براسها ودللات راسهاا شوية وأصلا لفلوس تيمشيو ويجيو وهي عايشة بخير ولله لحمد مامخصوصاش...
كانت مشات غير بوحدها لصالون حيت لبنات مشاو قبل منهاا وجدو راسهوم وهاد لمرحلة داروها قبل... ملي رجعات تعشات وضرباتها بنعسة ترتاح وتجدد طاقتها لي خسراتها فالخدمة...
وفلغد ليه راه دار تتنغل وكل واحد وشنو تاييدير كاين لي يالاه تايجمع حوايجو وكاين لي عاد غايمشي يجيب اش خاصو لحاصول شي خارج شي داخل...
خرجات من لبيت مدابزة مع ديك لڤاليز لي جاتها تقيلة واخا صغيرة وماكتراتش فيها لحوايج بزاف حيت غايبقاو غير سيمانة وصاف... وصلاات لدروج باغا تنزلها ساعة ماقداتش وقالت تخليها تاتشوف ريان يجي ينزلها ومن زهرها تلاقات بمحمد طه هو لي كان طالع من الدروج وباين فيه عياان وجهو حمر وعينيه غارقين بحال الامريض...
هز فيها شوفتو وبلاماتهضر هز ليها ديك لڤاليز ونزلها لتحت وهي وراه تاتشوف فيه كيفااش ساكت وهي لي مولفة فيه لهضرة ولغزل لي ولى كيغرقها فيه هاد الأيام...
نزلها ليها لتحت وطلع لفوق مخليها تزيد تستغرب وتشك بلي السيد ماشي نوغمال وبلي شي حاجة بيه...
باغا تبعو وطمن عليه ولكن كرامتها ماخلاتهاش ديرهاا وفضلات تجلس مركنة بلاصتها...
مع التسعود دليل كلشي كان واجد باش يشدو طريق لكازاا منها غاديين على قبل السبوع ومنها يفوجو شوية... كان ريان باغي تمشي معاه بيسان ولكن خدامة وماعندها كيف دير... أما إسلام راه سبقهوم بليلة باش يوجد وخلى أسماء تجي مع دارهوم... تلاقاو بنوح ورحيل وشدو الطريق فداك الليل ولجو لي كان مبرد شوية...
طريق كانت طويلة وفنفس لوقت دوزوها غير نشاط فنشااط من غير محمد طه لي ساكت ومرة يعطس باين ضاربو البرد
ريان:(بمزاح) تت زهرك مكفس الخاوة مالقى لبرد وقتاش يضربك
محمد طه:(بصوت مبحوح) الزهر
ريان:خديتي شي دواا باش تصح لغدا (غمزو) راه كاين تيتيز
محمد طه:تت ماشربتش
غزلان:(خنزرات من كلام ريان وقالت) دابا نگولها لبيسان
ريان:تشعلي ليا الصداع مع لمدام اغيزو
غزلان:اوا جمع راسك
رنيم:مشيتي فيها
غزلان:(خلات صاكها فيه خنيشة ديال الرواح جابتها معاها ومداتها لمحمد طه) ديرها فلماا وشربها
هزها وشاف فيها بلامايهضر وتاهي سكتات وغير تتشوف فيه... شربها ورجع راسو وغير شد فيه وهو ينعس ومبقاش حس بالطريق...
تاوصلو لدار لي كاريين فكازا مع مبغاوش يمشيو عند إسلام واخا راه عيى معاهوم ولكن فضلو يبقاو فدار بوحدهوم منها مايتقلوش عليهوم ومنها ياخدو راحتهوم كتر...
كانت دار كبيرة ومتيسعة نوح وإدريس راه شدو بيوتة كباار أما لبنات راه شدو بيوت مع بعض...
كلشي كان ناعس من غير لبنات لي مجاهومش النعاس ويالاه بانت ليهوم يجمعو ورحيل غير تأكدات بلي نوح نعس وهي تسلت بين يديه لابسة بنوار طويل فوق ديك لبيجامة وقبل ماتخرج من لبيت شافت فضهرو لعرياان عاد سدات لباب ومشات عند لبنااات يديرو السهرة...
ضحك والنشااط وقولها وضحك عليهاا وكل وحدة توري اش غادير فلمك اب وأسماء تتعاود ليهوم اش غايكون حيت عندها تسريبات دالسبوع...
رحيل:غانلبس لغوز لي وريتكوم وغاندير حاجة خفيفة ونركز على لغوج أليڤغ
غزلان:تاأنا مغانكترش وخصوصا عيني تاضرني مغاديش ندير شي حاجة فلداخل ديالها
رنيم:ديري تقطيرة؟؟
غزلان:غانمشي نجيب صاكي خليتو لهيه
خرجات غزلان غادة لصالة تجيب صاك ومع جات ترجع تزادحات مع محمد طه لي كان غادي لطواليط عينيه حمرين والسخانة خارجة منو تايفور وهي حسات بيه...قربات جهتو بلاشعور وحطات يديها على جبهتو وقالت:سخوون بزااف تت
محمد طه:(حط راسو على كتفها مهدود وقال ببحة صوتو مخنوق) فياا لبرد
غزلان:(عنقاتو وقالت بحنية)خصك دوش باش تحيد منك السخانة
محمد طه:(ضور يديه على خصرها وزاد زير عليها وقال بخفوت)عنقيني
حسات بيه لاح تقلو عليهاا والعافية خارجة منوو والسيد صافي سد عينيه... تخلعات عليه وبقات شادااه وباش تحرك ماتقدرش حيت غاطيح وهي بزز باش شادة توازن... بدات تتيعط على لبنات وريان تاخرج عندها ريان هو لول مبوق بالنعاس ورحيل لي جات تتجري...غير شافوه هاكاك تخلعو وتعاونو تاداوه لفوطوي تم ونعسوه وهو حمر حمر بقوة ماسخانة طلعات ليه...
تجمعو عليه وكلشي فااق ومنهوم نوح لي خارج تايلبس فالتيشورت عاقد حجبانو ومع بانت ليه رحيل جايا تتجري شدها وقال وهو عاقد حجبانو:شواقع؟
رحيل:محمد طه طالعة ليه السخااانة (بخوف)
خلاتو ومشات لبيت وهو كمل طريقو تاوصل لعندهوم لقاوه مگجگجين عليه... عبرو ليه السخانة لقاوها طالعة 40 ومع شافوها تخلعو وتحاماو عليه ريان ونوح وداوه لحمام طلقو عليه لمااا بارد وهو باغي يخرج كولو تايترعد... لحاصول ديك الليلة دوزوها خلعة على محمد طه لي سهرو عليه بلكمدات رادين ليه لبااال...
**
عائلة إسلام تاهي كبيرة لامن جهة مو لامن جهة لمرحوم دبااه والقاعة كانت تتنغل بالنااس لي حضرو منهوم لعائلة ومنهوم صحاب ومنهوم تاجيران... لقاعة كانت كبيرة يجري فيها لخييل..
واقف إسلام لابس كوستوم فالكحل ومنقص لحيتو وتاشعرو ومبتاسم لضياف لي تايجيو يباركو ليه العقيقة دلالة روفيداا... كانت لفرحة باينة على عينيه فيما يسولو شي واحد من لعائلة ولالمعارف على سميتها يجابو بتبسيمة:روفيداا
فلبيت لي فلقاعة كانو لبنات واجدات وتاأسماء لي لابسة تكشيطة فالبوردو همااوية وكلها عقيق ودايرة تاج مع مشيطة كلاص مبيناهاا كاتفتن... معاها تانيرت لي لبسات روفيدا ورادة ليها لبال وقايمة بدور الأم لي ماحساتش أسماء بلفارغ من جهتهاا حيت تانيرت عوضاتها بحنانتهاا... ومامات إسلام كل مرة تجي طل على مرات ولدها وحفيدتها وترجع لعند ضيافهاا بابتسامتها لبشوشة تاترحب بيهوم...
لبنات نأنقو بلبلدي لي كيطيح السر ورنيم اختارت هاد لمرة لون الازرق بااارد مع تسريحة شعر عادية ومك اب سموكي وغزلان لبسات لبااج وشعرها خلاتو مطلوق حيت أصلا قصير ومك اب عادي... أما رحيل فلبسات تكشيطة فلغوز وكيف قالت لبنات مك اب خفيف وعكر شوية باين... ملي سالاو نزلو لتحت مخلين تانيرت مع توينز وروفيداا حاضيااهوم ومعاهاا تاأسماء...
شدو لبنات بلايصهوم تايشوفو بعويناتهوم ومرة مرة يتجمعو على شي بلان...أغلبية عائلة إسلام من مو فيهوم لعيااقة وهادشي واضح غير من لباسهوم وتصرفاتهوم لي كانو مفضوحيين...
ملي نزلات وعينيه عليهاا جدباااتو ليه من بين لبنات وبلامايشعر لقى راسو حاضيهاا... ومرة مرة يضور عند رجال لي معاه فالطبلة ويجمع معاهوم ويرجع يشوف فيها تاني... مكانش عارف اش تاتجيهوم ولكن عجباااتو وقرر يشوف زهرو معاهااا فهاد الليلة...
السبوع كان هماوي وزوين كلشي كان هو هداك والماكلة على الجهد والموسيقى منشطيين الطرح... ناضت رحيل طلعات لفوق تشوف مهاا ونيت تشد شوية توينز وروفيدا باش مها تنزل تاهي وتشوف الاجواء مجاتش تبقا حابسة تماا...
بزز باش نزلاتهاا وبقات مع ولادهاا أما تاأسماء نزلات لتحت... رضعاتهوم وجلسات تتلعب معاهوم شوية طلعات ليها الردة تاكمشات حجبانها وتگرعات مداق لكروفيت لي كلات فدوك المقبلات...
شدات تلفونها وعيطات لنوح تشوفو فين كاين حيت مبانش ليهاا گاع..
رحيل:نوحينوو فينك ؟
نوح:أنا برا علاش محتاجة شي حاجة؟
رحيل:نو غير مابنتيش ليا وصاف اه سيدرا معاك؟
نوح:سي معايا (كمل بجدية) بقاي جالسة بلاصتك ماتحركيش منها سمعتي
رحيل:أنا اصلا فلبيت مع إسحاق وإسماعيل وروفيدا
نوح:مزياان (رجع كرر كلامو بجدية ممزوجة بخشونة) بلامايزغبك راسك وتنوضي من بلاصتك
رحيل:ومغادخلش؟
نوح:غاندخل من بعد
قطعات معاه وجلسات مع ولادها تارجعات مها ونزلات وقبل ماترجع لبلاصتها مشات لطواليط ومع خرجات لقات قدامها نفس الشخص لي كان حاضيهاا واقف تايتسناها...تبسم فاش شافها عن قرب ومع هزات عينيها رجعات حدراتهوم وبغات دوز وهو يقول بسرعة:نقدر نسولك
خنزرات فيه رحيل وقالت ببرود:لا
خلاتو وهي عارفة الدخلة لي داير اش تابعهاا أما هو فاش شافها فاص عجباتو كتر وقرر يسول عليها ومايلقى ماحسن من إسلام صاحبو... تبعها تاشافها جلسات بلاصتهاا وهي غير شافتو تايحنزز فيها وهي تقلب وجهها وخنزرات... بدا كيقلب على إسلام ومالقاهش وهو يخرج لبرا لقى إسلام مجمع مع إدريس ونوح لي كانو تيكميو وريان ومحمد وزين لي غير واقفين معاهوم... قرب جهتهوم ولقى السلام أو جر إسلام غير شوية ونطق:بغيت نسولك على وحدة فالسبوع شفتها وعجباتني وماعرفتش شكون هاديك
إسلام:(بجدية) تفلية مكيناش مع العائلة ونتا عارف؟ اجي شكون هادي بعدا؟
حميد:(نطق بدون مايفكر وبصوت عالي شوية وصل لبقية) هي محجبة جوبونص من عائلتكوم لابسة لغوز وعينيها خضرين...
صوت الموسيقى تايكسر الودنين وبعض العيالات ناضو يشطحوو وشي ناض يتصور مع أسماء لي كانت هازة بنتها بين يديها... فالطبلة دلبنات كانت كل وحدة وشنو تادير...غزلان تاتصور سيلفي وتاتعزل اشمن تصويرة دير فالسطوري دلواتسااب تالقات لي عجباتها وهي ديرهاا وحطات تلفونها وبدات تتمايل مع الموسيقى...أما رنيم فكانت شادة أبيل فيديو مع رؤوف ودايرة ليزياتهاا ومخشعة معاه فالهضرة ومرة مرة توريه الأجواء لي تم.... كل وحدة وشنو تادير وباش مونسة راسهاا من غير رحيل لي عاقدة حجبانها وفيما تفكر ديكور لي طرا مع داك خونا تقندش... عطا الله نوح مكانش ومشافش الديكور إيما كان غادي ينوض شي مشكيل تاني... ضارت تاتقلب فالقاعة عليه مبانش ليهاا گاع ملي جااو وتفارقو فباب القاعة وهي مشافتوش حدها تاتهضر معاه فالتلفون...عرفاتو مغايدخل تايبغيو ياكلو وتاهي خلاتو على راحتو...
غزلان:مالكي ساهية؟؟
رحيل:لا والو عرفتي اش طرا معاياا فااش كنت لفوق (ضحكات بسخرية) وقفني وااحد وقال ليك بغا يسولني وأنا خليتو وزدت
غزلان:غايكون شي حد باغي يتعارف باينة هاديك هي الدخلة لي تايديرو
رحيل:مع هضر مع قلت ليه لا وزدت ماعرفتش شكون هادا
غزلان:يقدر يكون شي حد من فاميلة إسلام
رحيل:باينة تت ماعرفت سيدرا فين هي
غزلان:راهاا لهيه مع لبنات تتجري
رحيل:صافي مزياان ناري داك لبريوات دلكروڤيط لي كليت مداقها ففمي ماكرهتش نزيد
غزلان:ههه زيدي شكون حبسك
ناضت رحيل لعند أسماء جلسات جنبها وتحنات على ودنيها وشوشات ليها وأسماء مكانتش من لعاگزين عيطات على سرباي جاا عندها وقالت:جيب ليا لبريوات عفاك
حرك راسو ومشى ورحيل تبسمات:يخليك ليلي
أسماء:هههه حشمتي طلبيها
رحيل:ناس تيشوفو اراي ديك لبخوشة نهزها
مدات ليها روفيدا وغير جا سرباي وجاب طبسيل فيه لبريوات وهي تهزو رحيل وناضت طالعة لفوق بلبنت وبطبسيل تاكلو على خاطرها مخليااا أسمااء تاتمايل مع لموسيقى...
***
ملي شافهاا عجباتو وباش يسول عليها مكاين ماحسن من إسلام هو لي غايوريه شكون هاديك ولكن المشكيل مبقااش هنا لمشكيل فهاديك لي شافهاا ولي عطاا نعتهاا بالتفصيل ومكفااهش هادشي كمل كلاموو بغمزة لإسلام:كنت باغي ندوي معاهاا ساعة ماخلاتنيش وماعطاتنيش فرصة ودغيا مشات.. اجي اش كاتجيكوم؟؟.
كان مكونسونطري على داك لگااارو تيكميه وفجنبو إدريس تايهضرو على السبوع ولقاعة بكلامهوم لعادي تاالقطو ودنيه هضرة حميد لي نطق بصوت كان شوية مجهد مع مابعيدش عليهوم...
مع سمع اش گال وكيفاااش وصفهااا الجنون بداو يلعبو فوق راسو من فكرة أنه كيدوي على مرتووو وكيوصفهاا بكل وقااحة...هي لي لابسة لغوووز ومحجبة وعويناتها خضرين هاد لوصف وصفهاا هي... اندافع لجهتو وحميد مع كاان عاطيه بالضهر مكانش عوااال تادعقو فاش جرو من لاشوميز ديااالو وقبل مايفقه ويعرف اش واقع وشنو طاري كاان نوح شانق عليه وطفى ليه داك لگااارو لي كاان تيكميه ففمو مخلي حميد مخرج عينيه تايفركل من داك لحررر لي حس بيه...
خرج إسلام عينيه وهو عارف بلي مغادوزش لصاحبو طريفة مجرد ماوصف ليه شنو لابسة وعينيها لخضرين عرفو على من تايهضر وماقدرش يحبس صاحبو ولايضور فيه حيت كان نوح تصرف.... سبق وجرب غضب نووح بسبب المشكيل لي كان طراا وكيفااش ماتعاتقش معاه وهو من لعائلة فمابالك هادا لي مكيجيه تاحاجة... تجمعو عليه باااغين يبعدووه عليه ساعة شد فيه وعينو خااارجيين تيبخ العافية من فكرة أنه شاف ليه مرتو وهضرهااا... هضرتو باقي كاتزنزن ليه فالراس مخلياااه بحال شي ثور هااايج وعروقة لي فعنقو وجبهتو بانو منفوخين كيزدحوووو... هز يديه وجمعها كروشي وعطااهاا ليه لعين تارجع لاخر لور تايتوجع ماحيلتو لفمو لي طفااا ليه فيه لگارو ماحيلتوو لعينوو لي ضربو فيها الضووو...مكفاش هادشي وزادو كروشيات خرين لوجه ومحمد طه وريان تايجرو فنوووح ومعاهوم تاإدريس وإسلام تايجر حمييد باش يبعدوه عليه وهو مامخليهومش لدرجة دفع رياان من عليه وخنزر فيه قبل مايرجع لحميد لي بعدو إسلام وهو تايحاول يتوگض...
نوح:(خنزر ونطق بصوت مبحبح خشن) مرتي اولد لقح*بة نعمي ليك عينيك لي شفتي فيهااا
حميد:(خنزر فيه شاد عينو ونطق بعصبية وفمو منمل عليه ولحريق هلكوو) واش مريض فكرررك صحاب ليك السيبة فلبلاااد بربي لاتفكيت معاااك
نوح:(قرب جهتو ناوي يفرسو) لاكنتي راااجل اجي وگف گدامي ونتا مخبي كيف لولية
إسلام:(تايدخل بخيط بيض) ولد لحاج الله يرحم الوالدين تهدن
نوح:(خنزر فيه ونطق كاعي) نتا دخل سوووق كررررك (تايحيد لاڤيست باقي مابرد ناااوي على خزيت) ليوم نعمي لز*امل بووك دوك لعينين لي حطيتي على مرتي...
فلداخل كانو ناس محيحين وناشطين وحد مسايق خبااار اش طاري برا من غير هادوك لي كانو تم... صوت لغوات ماسمعوش ليه حيت لموسيقى عالية... حميد مكانش عارف شكون هادا لي تسلط عليه ولكن من هضرتو فهم بلي هاديك مرتو ولكن مبغااش يبين راسو غالط ودفع الجبهة تاهو... عادي لغلط وقع مكيحتاجش هاد الانفعال هادشي لي گال مع راسو ولكن نوح كان ليه رأي خرر... وبالنسبة ليه هاد لموقف استفزوو بزاااف وخلاه شاعل كولو تايغلي من لدااخل وأي راجل غايتصرف نفس تصرفوو... تشادو تااني وتاحميد مبغااش يخلي حقو تاهو صحيح وعامر ولكن الكفة تاتميل لداك الثور الهايج ولي خلاتو لغيرة يتجنن عليه... زين العابدين كان مبعد وعينو غير على باه فاش شاف داك حميد تاهو كيدابز نفسو ضرباتو على باه وتم داخل وسطهوم ومع بعدو نوح عليه وشدوه جاهوم زين العابدين وعطاه بوكس ويديه تقيلة وبالسيف وهو كيتريني حياتو كلها تا لحمو قصااح وصحاح... طيحو الأرض وبدا يكيل ليه فالكروشياات بحال لاراهو فكومبا تايضرب فيه تااحس بيديه ضراتو وماتفكش معاه تاشافو تهد عاد ناااض ومشى عند باه ونطق بعصبية:لواليد نزيدوو؟
نوح:(مخنزر وحجبانو معقودين شاف فولدو) بعد نتا على هادشي أناا نتفااهم مع زااا*امل بوووه
إدريس:(تايبرد فيه) ولد لحاااج تهدن وبرّد
نوح:(محاملش راسو ومعصب بزااف) اش غانبرّد وهاد لمرررض حط عينو على مرتي وجاااي تيعااود عليهاا (غير عاود تفكر هضرة حميد ورجع تاااني يمشي ليه يفرسوو) ليوم بيا ولابيه
إدريس:(شدو وجروو غادي كيهضر معاااه بلهداوة وباس ليه راسو ) راني فاهمك ومن حقك اولد لحاج ولكن ماديرش شي حاجة لي ندمو عليها
جرو مبعدو على تم مخلي لخرين تايعاونو فحميد ينووض ويمسح حالتو لي عمرات بالدم وغير توگض وهو يبعد كينثر عليهوم ويسب وزين العابدين راه ضرب تاني تخنزيرة كان ناوي تاني يمشي ليه ساعة جرو ريان لي نطق بجدية:خلي لكلب ينبح ماتديهااش فيه راه هادشي لي بااغي
حميد:(سمعو وجاوبو وإسلام شادو) لكلب هو لي حطك اولد لقح*بة
هنا ريان قلب لفيستة وتسيف تسيفة خااايبة فاش سمعو عاير ليه باااه وصدق هو لي غادي ليه وتاداك حميد ماتهدش تاهو باغي يضرب ويرد دقتو مراضيش حيت كلاهاا من عند نوح وشافهوم محاميين عليه وتاصحابو لداخل باش يتحماو معاااه... شبكات بينو وبين رياان والحيحة ناضت ومع ضار إدريس يشوف لبلان وبانو ليه وجاا يجري هو نووح...
ريان:(تايغوت ودفالو تاتيرشو) ولد لقح*بة بربي تاااانح**ك واااطلق لخرااا (ضار فمحمد طه تايتجبد) نورريه يسب ليااا لواااليد بربي تااانقتلووو
كلشي ترووون وإسلام غير تايطلب السلاك وصاف... تعصب على صاحبو وماحملش تصرفوو وعارفو غالط وباقي دافع الجبهة ويسب فيهوم ويعايير وبالسيف مااينوضو ليه وهوما دمهوم حااامي ومكيرضاااوش...جر حميد تايغوت عليه وخلاو ريان تايمسح نيفو لي فيه الد'م...
إسلام:(دفعو وخرج فيه عينيه) واااش مريض فكرررك بااغي تجبد ليا مشكيل مع النسااب
حميد:(خنزر فيه أو وجهو حالتو خريطة بالضرب) هوماا كيتحماااو ولكن بربي لاتفكيت معاهوم
إسلام:راه نتااا مقودهااا معاهوم وباقي تاتحل فمك اش داك تشوف فالسيدة واش أنا عارض عليك لسبوع بنتي ولادير الصداااع
حميد:ومالها لاشفناا فيهاا شكون هي فملك الله لي يجي داك بنادم ويمد يدو عليااا السيبة هناا
إسلام:(خنزر فيه) من حقوو ولاكنت بلاصتو ندير فيك ماكتر (قصح معاه لهضرة) ودابااا تقووود عليا من هنااا بلامادير شي مشكيل حيت بربي لاعقلت عليك وجيت من جهتك
حميد:ياااك هادي هي هضرتك
إسلام:دوووويت داباا ولابغيتي تمشي ديكلاري سير مغانشدكش ولكن راااه غانهضر فالحق وديك الساعة شوووف شغايطراا..
خلاه وزاد جهة لخرين غادي يشوف اش واقع محملش هادشي لي طاااري وكون عرف غاينوض صدااع كوون راه گاعما عرض عليه...
تفكات الجوقة بزز ودخلو من لباب لوراني ومشاو لحمام يگادو حالتهوم ومن زهرهوم ماتقاسوش فلوجه بزااف وريان نيفو لي تنفخ راه دارو ليه تلج وسيطرو على لوضع...
واقف زين العابدين تايحرك فيديه لي حس بيها ضراتو مع فورصا فالضرب بيهاا تاجاا لعندو نوح جرهاا ليه وشاف ليه دوك الجراحي لي عندو فيديه ولي تزادو لضرابي ديال الزااجة لي هرس...
نوح:زيد دخل تجلس
زين العابدين:بغيت نمشي
نوح:(خنزر طالع ليه الدم) رييح بلاماتصعرني تانتااا
سبقو ودخلو غاديين لبلايصهوم وقبل مايجلس ضور عينيه على لقاعة وشاف رحيل واقفة مع لبنات تاتصفق مع لموسيقى وتبسم هز تلفونوو وسيفط ليها مساج ورجع ربع يديه عاقد حجبانو..
واقفة تاتصفق وتغني مع الموسيقى تاسمعات تلفونها صونى وهي تشوف الشاشة لقاتو نوح...دخلات بزربة تشوف اش كاتب ليهاا ومع قراتو كمشات حجبانهاا "ريحي بلاااصتك وماتنوووضيش منهاا " وصلها مساج اخر فيه "وماتبقااايش تعوووجي عليا تم وماضحكييييش بزاااف"
يتبع...
التعليقات
لا توجد تعليقات بعد، كن أول من يعلق.