الجوهر الحر الجزء 53

الهمسة ديالو ليها والشدة لي شدها خلات القشعريرة تسرى فجسمها بحال شي سرب دالنمل طالع معاها.. حبسات داكشي لي كانت تادير وجمدات بين يديه وقلبها كان تايدق بسرعة رهيبة..أما هو فغير وصل جهتها وجيوبو الأنفية لتاقطات ريحتها لخفيفة لي كانت مخلطة مع لباندوش باش دوشات.. وشعرها فيه واحد الريحة بحال لورد خلاتو بلاهواه يدفن وجهو وسط الخصلات دشعرها ويدو باقي شداها فكرشها مامخلي ليها فين تحرك.. ديك لكلمة لي خرجات من فمو كان قاصدها بلقول ولفعل.. بصح زواجهوم كانت بدايتو فشكل ولكن راه مغايبقاوش حياتهوم عايشينها مع بعض تحت سقف واحد وكل واحد يدير مابغى.. هو غايعطيها حقوقها وهي فالمقابل غاتعطيه واجباتو.. ضورها جهتو وهي حادرة راسها ومغمضة عينيها مقدراش تشوف فيه حيت بلاوالو هي متوثرة وعقلها دابا راه تيرجع ليها أحداث الليلة لولة ليهوم بتفاصيلهاا.. لغلطة لي دارو ولي كانت هي السبب الرئيسي فيها حيت فنظرها هي لي مشات عندو برجليها وهو سكران وبكلمة منو دوبهاا وشكون كان عارف واش ديك لكلمة طالعة من قلبو ولاغير كلمة تقالت وصاف.. ديك الساعة هي سدات عقلها والشيطان حضر وزين ليها لحظة والسيد كان سكران وشهوتو هي لي تاتغلب عليه بحال كيف طرا معاه ديك الليلة.. ولكن من بعد ماجلسات مع راسها ودارت حوار بينها وبين نفسها لقات بلي تصرفاتو متناقضة مع ديك لكلمة اه بصح نهار بغا يخطبها اليازيد دار واحد ردة فعل تتبين أنه غاير عليها ولكن هادشي مكافيش حيت هو أصلا فيما يهضر معاها ولايدخلو فنقاش ولابدما كيتعصب عليها ويجرحها بكلامو وتيخرجو من داك لحوار وهوما جارحين بعض...

محمد طه:(كمل كلامو ليها بهدوء ويديه على دقنها هزو ليها تاشافت فيه) ديري فبالك بلي هاد الزواج كل واحد فينا غايدير فيه واجباتو وفالمقابل غياخد حقوقو..

كلام بسيط مفهومو باين أو واضح لغزلان لي فهمات بلي هو تيقول ليها بصريح العبارة أن زواجنا حقيقي.. من ناحية حسات بالراحة حيت عرفاتو ناوي يكمل الزواج ومن ناحية متخوفة من لعلاقة كيف غاتكون بناتهوم.. سكتات ومجاوباتوش حيت ماعندها باش تجاوب وكلامو لي قال مافيه تاعييب ليها وماقللش منها بلعكس جاها نيشان وهناها من بزاف دالتساؤلات تايطرحهوم دماغها.. هزات فيه لعين فاش بان ليها تايقرب وجهو جهتها بالعرض البطيئ وأنفاسو كيضربو فوجهها تاحسات بنيغو بعز ليها نيفها وشفايفو تحطو على شغتها مخليها تغمض عينيها وتكمش فنفسها معارفة مادير... عكسو هو لي غير حس بملمس شفايفها بين شفايفو غرق وترفع.. كيبوسها بلهفة مخليها بزز تستاجب معاه وتخلي أحاسيسها يستاجبو معاه.. ديك اللهفة ديالو حسات بيها غزلان وهي بين يديه عكس المرة لولة فاش كان سكران وشهوتو هي لي تغلبات وتحكمات فيه.. يديه بداو يحلو ليها لبنوار وفنفس الوقت صوت البوسة مسموع فالسويت.. بالخف زول ليها لبنوار تاطيحو تحت رجليها.. بعد تايشوف فيها بعيون منيمة وعينو على درعانها لعريانين أو وجهها لي حمر.. مد يديه تايقيس حنكها وهي تاتلعق شفايفها تاسمعاتو نطق بهمس:ماتخافيش

غزلان:(شافت فيه وقالت بنفس الهمس)مخايفااش

حط يدو على خصرها وجرها ليه وهي بلاماتحس حطات يديها على صدرو العريان.. مكانش باغي يتفكر شي حاجة عندها علاقة بديك الليلة وباغي يتصرف كأنها أول ليلة ليهوم بزوج حيت بالنسبة ليه بصح هادي ليلتهوم لول لي باغي يمحي بيها أي حاجة دازت قبل.. يديه مغروسة وسط شعرها وشفايفو فصراع مع شفايفها فقبلة فرنسية مخلي الريق يمتازج.. معرفاتش غزلان وقتاش تهزات بين يديه وسطحها على النموسية حيت كانت غايبة وعايشة حلاوة اللحظة.. وهو مكانش قل منها وهاد لمرة هي بين يديه وعاقل وعارف اش كيوقع.. تسمعات تشريگة ديال الشوميز من جهة الصدر مع دونتيل خلاتها تحل عينيها فاش عرفاتو قطع ليها داك شوميز دونوي من نص مبين صدرها لواقف مع مكانتش لابسة حمالات..كان باغي يكمل ليها عليه ساعة تعكس ليه واضطر يزولو ليها من كتيفاتها تاعراها قدامو مخليها غير بسترينگ.. تحدر جهتها مامخلي ليها فين تحرك ولاتفقه مدوبها تاني ومعيشها دوك الأحاسيس لي خلاو غزلان تتوه معاه.. صدرها حساتو تخدر بقوة ممارس عليه طقوسو.. هز راسو وشاف فيها كيفاش مغمضة عينيها وشعرها مفرش تحت منها أو وجهها حمر وكلها عرقانة.. منظرها زاد حرك رجولتو عليها وخلاه ينغامس مرة خرى معاهاا فعلاقة كاملة فرغو فيها بزوج بيهوم مشاعرهوم الدفينة..

كانت رحيل جالسة اللور فطوموبيل نوح وهازة فحجرها سيدرا لي نعسات بقوة العيا والسهير..وجنبها تانيرت ورنيم وفلقدام باها لي كان مجمع مع نوح..

تانيرت:(تنهدات)خوك ريان عييت مانعيط ليه مكايجاوبش

رحيل:(بتعب)غايكون عياا وسبق لدار

تانيرت:اوا غير يعلم مايخلينيش مشوشة عليه تت

سكتو فاش وصلو لدار وتوادعو معاهوم عاد شد نوح طريق لرياض وهز عينو فالمرايا بانت ليه رحيل مغمضة عينيها..

نوح:(بصوت هادئ)رحييل

رحيل:(حلات عينيها وشافت فيه)وصلنا

نوح:تت باقي شوية

رحيل:بغيت نعس تانحس بعضامي كايضروني اووف عييت

نوح:(تبسم ليها بحنية) ماتبقايش تعيى ليا راسك الفتنة ديالي

تبسمات ليه ورجعات غمضات عينيها تاوصلو لرياض ولقاو طوموبيل درؤوف واليازيد واقفين قدام لباب ديال الدار.. نزل نوح هاز لمونطو فيديه وحل عليها لباب وقبل مايهز سيدرا عليها غطاها بمونطوه حيت عرقانة وخايف يضربها لبرد.. أما رحيل راه تلوات فداك الكاب وهزات صاكها وتبعاتو وهي تايبان ليها غير النموسية ولمخدة تنعس.. لقات كلشي جالس فالصالة والسعدية تاتحط لفطور مع طلع الصباح وقالو يفطرو عاد ديك الساعة لي بغا يمشي ينعس يمشي..

رحيل:(تبسمات ليه بتعب) أنا غانطلع لفوق نتكى شوية عييت

زاينة:(جوباتها بالسوسية كيف ديما) زايد اتسنفوت أيلي "سيري ترتاحي ابنتي"

نوح:(شاف فرحمة وقال بهدوء)يمّا بلاماتسناونا غير فطرو

رحمة:واخا المرضي ديالي

طلع نوح لبيت سيدرا ولقى رحيل تما كتوجد ليها لبيجامة باش تبدل ليها.. حطها فوق النموسية وحيد لمونطو ديالو وخرج مخليها تاتبدل ليها باش تنعس مرتاحة.. غير سالات معاها مشات لجناح لقات نوح دوش وسالى ودخلات تاهي طرفات حالتها ومسحات لمكياج بدماكيو عاد خرجات وهي تاتجمع شعرها وتفوه مبانش ليها نوح فلبيت ومشات نيشان تخشات فلفراش وكيف حطات راسها نعسات.. أما هو فكان جالس فالصالة تايهضر على لخدمة شي نص ساعة تاسالى عاد ناض دخل لبيت وقشعها وهي ناعسة فبلاصتها تبسم بحنية وقرب جهتها قادها فبلاصتها عاد تخشى جنبها وجرها لعندو ونعس معنقهاا..

---

فبيت بيسان مور مافطرو جميع ناضت لبيتها خدات دوش ولبسات بيجامة مريحة وجلسات هازة تلفونها تاتصوني على ريان لي مكانش تيجاوب.. مرة وزوج وفالتالتة تلفون طفى شي لي خلاها تكمش حجبانها وتعرف بلي هو مباغيش يدوي معاهاا.. زفرات النفس وبدات تاتعض فشفايفها وبين عينيها الشوفة لي دار فيها ريان قبل مايخرج من لبيت.. عارفة بلي معجبوش لحال على هضرتها ولكن فديك الساعة مالقات مادير ولكلام خرج ليها من فمها بزربة باغا غير ترقع لوضع ساعة مع من وسناء حطات عليها تاعرفات لي بغات.. هزات تلفونها ودخلات لواتساب وقررات تخلي ليه أوديو وبالغعل دخلات لقاتو شي خمسة دالسوايع باش ساد..

بيسان:(طلقات لوديو) ريان عارفة بلي مباغيش تجاوبني حيت مقلق مني على لكلام لي قلتو قبيلة ولكن تيق بيا ملي شفتها قدامي مالقيت مانقول تت أنا ماقصدتش نعصبك صراحة (تنهدات) مهم لاشفتي لأوديو ديالي جاوبني واخا

سيفطاتو ورجعات تكات فبلاصتها تاتفكر فهاد العلاقة لي تاتعيش معاه.. هو لي باغي يعطيها السمية لديك العلاقة ويمشيو بعيد ويديرو مستقبل خاص بيهوم بزوج وهي لي باقا لدابا معرفاش راسها اشنو باغاا..

خايفة تزعم وتوافق وفلخر مايتافقوش بحكم أن هي باقا معشراتوش مزيان باش تعرف عقليتو كيف دايرة.. وزيد الفرق دلاج لي بيناتهوم خافت يشكل ليهوم مشكيل.. وزيد هوما كاتجمعهوم العائلة مباغاش طرا ليها كيف سناء واليازيد لي فاش طلقو ناضت حساسية بين واليديه وبينها.. هي هاكا شافت الموضوع وهاكا عقلها فسرو..

وفالجهة لخرى كان ريان مكسل فبيتو وباقي لدابا معصب ومبغاش يبرد وكلما بغى ينسى ويشغل بالو تاترجع ديك كلمة خويا تزن فدماغو دايرة ليها التعديييب البطيء.. زفر النفس وناض جالس تايشوف فتلفونو لي طفاه ملي صونات عليه حيت بالصح اخر حاجة يبغي دابا يسمعها هي صوتها.. هو هاكا داير نهار يتعصب يخلط الزمر ومتيبقاش يعقل على راسو.. اه بصح هو ماشي من شخصية المعصبة لي كلمة زوج تفرگع عليك ولكن نهار يكعى كينسى كلشي وهاد الصفة واخدها من باها...معرفش دابا اش غايدير واش غايحبس كلشي ماحدهوم يالاه فالبداية ويرجع بلور يخليها ولاشنو.. هي عمرها بينات ليه راه باغاه ديما تاتصرف تصرفات تايخليوه يشوفو بلي هي ممتعلقاش بيه بحالو هو.. مغاينكرش بلي عندو تخوف أنه يبقا متعلق بيها وفلخر يكتاشف بلي هي مكتبادلوش نفس المشاعر.. داكشي علاش هو خصو يدير حل ونيت يشوف هي اش باغا حيت لابقاو على هاد لحال راه مغايزيدوش فعلاقتهوم وغايبقاو فبلاصتهوم.. ونيت باغي يعرف واش هاد العلاقة وهاد المشاعر لي حاس بيهوم واش تاهي كاتبادلهوم ليه ولا غير من طرف واحد.. ولاكان من طرف واحد شنو غايكون مصيرو هو..

حلات رحيل عويناتها على لمسات يد سيدرا لي واقفة فوق راسها فالنموسية وشعرها طويل مخربق وباين فيها تاهي يالاه فايقة غير من عينيها لمبطنين المنفوخين..

سيدرا:(ملامحها مكتاسيهوم الملل)مامي فيقي

رحيل:سيدرا (تكات على لكادر دالنموسية تاتمسح عينيها) شحال فالساعة (هزات تلفونها وشافت فالساعة لي كانت الربعة دلعشية) تت نعست بزااف

سيدرا:مامي فيا جويعاات

رحيل:واخا امامي نزلي لتحت سبقيني أنا جايا

نزلات سيدرا وهي دخلات لمساج لي جاها من عند نوح 📩 " أنا مشيت نقضي شي غراض ملي تفيقي صوني عليا الفتنة"

دوزات ليه لخط وناضت فنفس الوقت تاتجمع ناموسيتها تاتحل الخط وسمعات صوتو الخشن لي فرزاتو وسط داك الصداع ملي قال: يالاه فقتي

رحيل:اه (دخلات لحمام وحطات تلفون فوق من الرخامة دايرة سبيكر ونطقات وهي تتغسل وجهها بلغاسول)وي فيقاتني غير سيدرا أما كنت غانكون باقي ناعسة

نوح:ماعليش ترتاحي شوية (شاف فساعتو)راني سيفطت ليك شي حاجة فالواتساب دخلي شوفيها

رحيل:(نطقات بصوت مامفرزش حيت تاتغسل سنانها) امم واخا

قطعات معاه لابيل وكملات شنو كانت تادير عاد دخلات لواتس على خاطرها لقاتو مسيفط ليها تصويرة.. كمشات حجبانها وسرعان ما تلشارجات ديك التصويرة وفمها تحل بصدمة وعينيها ممتيقياش اش تتشوف.. بدات تتزوميهاا وتاطرطرق فيها عينيها والضحكة ترسمات على شفايفها.. كان مسيفط ليها تصويرة ديال واحد لمانكان ملبسينها واحد العباية فالباج كانت نفسها العباية لي رسمات.. واحد لفرحة حسات بيها وهي تاتشوف داك الحلم لي كان فالورقة ولى ملموس شي حاجة لي ماتقدرش توصف.. صونى ليها أبيل فيديو وجوباتو فلبلاصة ناطقة بصوت فرحان:زوينة بزاااف ههه

نوح:(كان مكواني فواحد لبلاصة تيشوف فيها وعينو عليها وعلى ضحكتها وفرحتها لي لمسها من صوتها) هاداك غير الشونتيو سيفطتو ليك باش تشوفيه باقي السلعة راه تيكملوهاا

رحيل:(نطقات بحماس)وجدوهوم دغياا ماتعطلوش بزاف

نوح: السيد لي كلفتو كبابل ولاعطيتيه لحاجة تيقضيها بزربة تسناي شوية

بان ليها حط تلفون فالأرض وتاتسمع غير صوت تحركاتو تاشوية هز التلفون وشافتو حاط لگارو ففمو تيكمي..

رحيل:(كمشات حجبانها) وليتي تاتكمي بزاااف انوح داك لمرض راه مغايفيدك بوالو

نوح:الساعة لله

رحيل:(مبغاتش تحكر عليه ونطقات مغيرة هضرتها)اه دابا غايخصني نشوف المحال ونقيوه باش لاجات السلعة تستف

نوح:لمحال نقي نهار سالاو فيه لخدامة كلفت لي ينقيه دابا خص غير تستف فيه السلعة (هز حاجبو)وراه لكمالة دالسلعة فالديوانة يعني ديري فبالك فهاد اليامات غانديك تشوفي لمحال ونيت تشوفي فين غاتحطي داكشي

رحيل:غايخصني نشوف لبنات لي يخدمو معايا يالاه كاينة غزلان وهي عطيتها لاكيس ودابا راه غاتسافر يعني غايخصني نقلب على لي يخدم

نوح:مكاتعرفيش شي بنات كبابل باغين لخدمة؟

رحيل:تت (بدات تتفكر)كاينة صاحبة غزلان أميمة نشوف لابغات تخدم حيت أصلا غير مسوڤيا تاهي راسها

نوح:(شاف فساعتو)أنا غانشوف لي يتكلف بلبلان حيت الخدمة راه ماشي لعب وغايخص لي يكون باغي يخدم ماشي يتفلى والاخليتيه فلمحال تطمن وماتبقاش هاز لهم

رحيل:(تبسمات بحب) عدبتك معايا كلشي نتا لي درتيه

نوح:(عض على شفتو بنابو) ملي نجي وخلصيني راه مغانتعاتقش معاك ارحييل إينو

ضحكات رحيل وقالت بتدكير:اه نسيت نسولك لوگو ديال لمحال شنو درتي فيه مزااال وعلاش مبغيتيش تقول ليا السمية لي درتو

نوح:سيدرا هي لي اختارتو ملي نديك لمحال راه غاتشوفيه نيشان وديك الساعة غاتعرفيه

رحيل:(سمعات الدقان فلباب) نوح نخليك دابا شي حد تيدق لباب

نوح:(بصوت حاد نطق)ماتقطعيش سيري لبسي حوايجك وغطي سالفك عاد شوفي شكوون

درات بهضرتو ومشات لاحت عليها بنوار طويل فوق بيحامتها لي كانت بسروال وقدات الزيف عاد مشات تشوف شكون ولقاتها السعدية لي تبسمات ليها ونطقات:ختي رحيل سيدرا من الصباح وهي تاتسناك تنزلي طيبي ليها متاكل واخا عييت معاها تقول ليا اش بغات وهي تقول واش نطقات بشي حاجة

رحيل:واخا أنا جايا (شافت فتلفونها لقاتو واقف طالق ودنيه) نكملو من بعد واخا

حرك ليها راسو وهي سدات باب جناحها ونزلات لتحت لقات سيدرا جالسة وهازة إيڤانا لي غلاظت وتنفخاات على كيف كانت..

رحيل:(كمشات حجبانها) مالكي نتي مقصحة راسك ومامخلياش السعدية توجد ليك متاكلي

سيدرا:(مدلية شنيفاتها)حيت بيت إندومي مامي

رحيل:(شافت فيها بجدية)غانعاود تاني نفس الكاسيط ياك قلت ليك داك الزمر مغاتبقايش تاكليها

سيدرا:(تاتدوي وهي مكمشة حجبانها وتاتعبر بيديها ببرائة) وبّاديدي راه تيخليني ناكلها هو وتانيرت إينو

رحيل:(غادة توجد ليها شي حاجة تنفعها)جدك وجداك راه ضسروك لفشوش لخاوي إندومي على الريق وكون غير كان فيها شي نفع

سيدرا:(بإصرار وعناد ممناسبش سنها)وأنا بغيتها

رحيل:(ضارت شافت فيها مخرجة عينيها)مغاتاكليهاااش هي مغاتاكليهااش سمعتي ماتخلينيش نتعصب عليك اسيدرا

ضربات سيدرا برجليهاا فالأرض ومشات تاتجري خارجة من لكوزينة مخلية لقطة وراها ورحيل عاقدة حجبانها تاتشوف فيهاا وتاتشوف جهة كرشها لي منفوخة.. جاها الشك وتحدرات جهتها تاتقيسها من ضهرها وغير قربات ليها مزيان عرفات بلي إيڤانا حاملة ماشي غليظة..

جاتها الضحكة وبدات تاضحك كيف لهبيلة تابانت ليها بيسان داخلة وكمشات حجبانها وهي تاتشوف فرحيل تاضحك وتقيس فضهر إيڤانا لي تاتحك راسها فركبة رحيل

بيسان:رحيل مالكي ؟

رحيل:اجي تشوفي ههه (شيرات ليها لكرش لقطة) خصنا نوجدو السبوع ههه

بيسان:(تحدرات تاهي تاتشوف جهة لقطة وضحكات)وايلي هههه كيدارت ليها وهي قطة ديال الدار متتخرجش

رحيل:شكون من غيرو القط لي جاب زين العابدين نسيتيه أصلا واحد النهار حصلاتهوم سيدرا وقالتها ليا

بيسان:ويلي ويلي هههههه لمنكار دخل عندنا لرياااض هههههه

رحيل:(تبسمات) فلول سحاب ليا غلاظت مع عارفة سيدرا تاتعلفها بزاف وعاد دابا رديت لبال بلي راه حاملة

بيسان:خاص تديوها عند لڤيطغينيغ باش تشوفو صحتهاا

رحيل:ضروري تايجي نوح نقولها ليه هههههههه واربي فشلت

بيسان:ههههه

ناضت رحيل وهي باقا تاضحك غسلات يديها ومشات وجدات لسيدرا متاكل ونيت تاهي تاكل معاهاا.. وبيسان كانت مونساها فالكوزينة تايهضرو بناتهوم تاصونى تلفون رحيل بنمرة ريان..

رحيل:اهلين فين غاطس؟

ريان:(بصوت مبحوح باين ضاربو لبرد) كنت ناعس يالاه فقت صافا

رحيل: مزيان ونتا كتبان ليا مبحبح واش ضربك لبرد؟

ريان:واقيلا (حك عينيه) مسالية ندوي معاك؟

رحيل:ياك لباس اريان خلعتيني

بيسان غار سمعات سميتو ودنيها تقلشو وانتباهها كامل خداتو رحيل..

ريان:تت متخلعيش غير باغي نقول ليك شي كلام وصاف ملي تسالي عيطي ليا واخا اعوينات الجلبانة

رحيل:واخا سلم على ماما وبابا ورنيم تانعاود نعيط ليك وسمع خود ليك لحامض مع العسل لحر لاكان حلقك تايضرك

ريان:خطيني داكشي ماعنديش معاه

رحيل:اوا خود ليك دوك لخنيشات دالرواح فاش تبغي تنعس راه داك الرواح خايب خصوصا الجو برد دابا

ريان:يكون خير يالاه مانطولش عليك نمشي نعيط لمحمد طه ونسول فيه

رحيل:ههه خلي عليك السيد تايعيط ليك هو واه

ريان:(ضحك)ههه نحرموهاا عليه شوية هههه لاهو ولاديك الحشايشية

رحيل:الله يمسخك سير تلاح

قطعات عليه وبيسان نطقات بدون شعور:احم واش هاداك خوك

رحيل:(شافت فيها)اه ريان راه تيسلم عليكوم

تبسمات ليها بيسان وهزات تلفونها ديريكت داخلة لواتس تشوف واش مكونكطي لقاتو قرا لأوديو ديالها ولكن مجاوبهاش.. كمشات لحجبان ودخلات تاتشوف واش حال ساعة سد شي ربع ساعة هادي..

بيسان:(سيفطات ليه مساج) 📩 كوكو

طلعو ليها زوج شرطات يعني راه حال لويفي.. بقات تاتسناه يجاوبها وجالسة على لقرص.. رحيل تادوي وعقل بيسان غايب وممعاهاش وغير طلع ليها أونلاين وهي تقفز وكاتسنى يجاوب ساعة نفس الشي طلع ليها vu ومجاوبش وهنا تأكدات بلي بصح خدا موقف منهاا..

رحيل:هيهووو فين سارحة

بيسان:هااا غير كنت تانقرا واحد لمساج ديال واحد الطبيبة معايا احم سمحيليا ايخصني نجاوبها

رحيل:واخا

مشات بيسان ورحيل بقات تاتشوف فبلاصتها بسهو.. حسات بلي شي حاجة ماهيااش فبيسان وتاصوت خوها جاها مغير وزيد غواتو على سيدرا وداكشي لي عاود ليها أمين خلاها تاخد فكرة مبدأية بلي غايكونو تناقشو مع بعض.. هزات كتافهاا وهي تاتنهد ومعرفاش هاد لحريرة ديالهوم فين غاتوصل مغاتنكرش بلي خايفة نوح يسيق لخبار حيت عارفة بلي مغايكونش خير لاعليها ولاعليهوم..

رحيل:ياربي دير ليهوم تاويل دلخير

عند سيدرا لي جالسة منغخة معاجبها حال حيت مها مبغاتش طيب ليها لإندومي لي تاتموت عليها وحيت إدريس طالق ليها لعب تايخليها مرة مرة تاكلها عكس رحيل لي مكانتش تاتبغيها دخل داكشي لكرشها وتتحاول تعطيها أكلات صحية.. بان ليها زين العابدين داخل لصالة فين جالسة بوحدها وبلامايعبرها جلس فالسداري لي قدامها وخدا التلكوموند مبدل القناة لي كانت دايرة تاتفرج فيها دالرسوم..

سيدرا:(شافت فيه وهي مكمشة حجبانها)خلي ليا رسومي

مجاوبهاش وبدا كيطلع فالقنوات وهي تنطق تاني:خلي ليااا مكياااتي

هي أصلا معصبة ومع دابا كملات.. ناضت جهتو باغا تخطف ليه التلكوموند وهو يدفعها بشوية ونطق بصوت باح مخنزر فيها:ريحي

سيدرا:(خنزرات فيه)دير ليا مكيات أنا تانتفرح فيهوم

قلب شوفتو وهي تجننات علاش يبدل ليها لقناة وهي متفرجة وعلاش دابا كاتهضرو مكيجاوبهاش.. مدات يديها باش تاخد تاني التكلوموند وهو شدها وحلف لاخلاها ليهاا وهي تاتجدب وتجر ساعة اش غاتجر واش جهدها هو جهدو؟.. ملي ماصدقاتش ليها تحدرات جهة يديه وعضاتهاا جهة الإبهام بالجهد ملاقية دوك سنان الفاارة فجلدو.. ملامح وجهو مبانش فيهوم تاشي تعبير واش تقصح ولا لا.. كان غير تيشوف فيها ببرود وتاهي شداتو بحال لقاض.. شحال وهو كينعل الشيطان وتيقول دابا تحييد دابا تريح بلاصتها ساعة مع من وديك لبخوشة لقالت لكلام خصو يتنفد..

سيدرا:(هزات راسها تاترد شعرها والعضة مخلية ليه لاطراس) حمااار يالاه تفوووو

دفلات عليه وهو بحال لاشعلتيه ماحس براسو غير وهو هاز يديه ضاربها بواحد لبوكس جهة نيفها مخليها ترجع بلور وطيح ونيغها يتفرگع بدم بحال شي شلال..

الدم نازل من نيفها بحال شي شلال تايقطر ليها على لبيجامة لي لابسة وهي بقصوحية الدقة وداك الدم تخلعات وحماتها لغوات والبكا..لغوات لي سمعات ليه رحيل لي كانت فالكوزينة تاتوجد ليها متاكل ولي خلاها طلق لي فيديها وتمشي تاتجري بلاعقل جهة الصالة ومع دخلات تصدمات فاش شافت كمية الدم لي نازل منها.. رجلين رحيل فشلو عليهاا ولخلعة لعبات عليهاا وخلاتها بلاعقل.. مشات تاتجري جهتها شادة ليها وجهها وتاتشوف نيفها تنفخ وحماار وداك دم حلف لاحبس وسيدرا غير تاتبكي..

رحيل:(بخوف تاتقلب فيها)سيدرا ماالك شنو وقع ليك

شكون لي يجاوب ولبنت تاتبكي وتاهي تلفات ماعرفات مادير تضهشرات كون مابيسان لي جات لعندها بزربة ملي سمعات لبكا ولغوات ولقات لمنظر لي تاهي خلعهاا..

بيسان:(تاتشوف فنيفها لي تنفخ وقالت موجهة هضرتها لرحيل)واش تضربات مع شي بلاصة؟

رحيل:(بخوف وتضهشير)ماعرفتش مااااعرفتش

بيسات:(نزلات لسيدرا راسها شوية ونطقات بهدوء) سيدرا حاولي تخرجي نفس ودخليه من فمك احبيبة ماشي نيفك واخا

حلات سيدرا فمهاا تاتنفس منو حيت نيفها مكتقدرش دخل منو لهوا وحسات براسها تخنقات وبيسان ناضت تاتجري باش تجيب ليها فوطة تحبس ليها دم وفطريقها تلاقات بنوح لي جابو الله بحال درهم دلحلال.. كان راجع عياان من لخدمة باغي غير يدوش ويتكى شوية مع سهير فالعرس عيااه تاتصادف مع بيسان تاتجري وصوت سيدرا لي واصل لعندو خلاه يكمش حجبانو ويزرب فمشيتو تادخل ولقى سيدرا فداك لمنظر ورحيل جنبها فشلانة معرفات ماتقدم ولاتوخر حدها تاتشوف فسيدرا وتاتبكي معاهاا..

نوح:(تحدر هز راس سيدرا بشوية وغير شاف نيفها وهو ينطق بصوت قوي وهو هازها بين يديها) بيساااان

جات بيسان جايبة فوطة وقالت بجدية:نعام اخويا

نوح:طلعي جيبي لرحيل عباية بزربة

مدات ليه لفوطة وهو حطها على نيف سيدرا بلطف وهي نفدات هضرتو ومشات جابت ليها عباية من عندها لاحتها على حوايجها ومشاو بزربة لطوموبيل لي كان مخلي قدام باب الدار ركب سيدرا لور ورحيل جنبها وركب هو فبلاصتو وبيسان جنبو.. مخلين زين العابدين لي كان جالس فبلاصتو ومزير على يديه..

تحركو لكلينيك ومرة مرة يشوف فلمرايا ويلقى رحيل شادة لفوطة لسيدرا لي تهدات وغير كتنين وحالة فمها.. عفطة وحدة وماوقف تاقدام لكلينيك ونزل بزربة هاز سيدرا مدخلها لداخل وهوما غير شافو حالتها جابو لبياص ونعسوها فيه مدخلينها لداخل ورحيل تبعاهاا باغا دخل معاهاا تاشدها نوح من يديها وهي شافت فيه وتفرگعات بلبكااا.. خشى ليها وجهها فصدرو وغطاهاا بدراعو مباغي حد يشوفها وفنفس الوقت كانت تايهضر معاها فودنيها وتيهمس ليها باش يطمنهاا..

مدة طويلة دازت وهوما يتسناو ورحيل جالسة فالكراسى ولايحة راسها على كتف نوح لي جالس جنبهاا مدرعهاا وتلفون فيديه تايهضر مع إدريس لي جاي هو وتانيرت فالطريق.. أما بيسان فراه تاهي جالسة معاهوم تايتسناو شي خبار على سيدرا لي ملي دخلوها معاودو شافوها..

رحيل:(شافت فنوح وعينيها تنفخو بالدموع وبصوت باح)علاش تعطلو بزاف علاش مارجعوش ليا بنتي؟

نوح:(شاف فيها مكمش حجبانو ونطق بخشونة)شش هوما كيديرو خدمتهوم شوية ويجي الطبيب ارحييل

رحيل:(دمعتها طاحت)شنو طرا ليها كانت جالسة صحة سلام

بيسان:غاتكون تضربات مع شي حاجة حيت نيفها تنفخ بزربة ماشي غير ترعفات..

سكتو كاملين وكل واحد وفين تيخمم تابان ليهوم إدريس جاي وموراه تانيرت لي تاتجري باش تقاد معاه فالخطوة ومعاهوم تارنيم وريان كلهوم جاو فاش ساقو لخبار..

إدريس:(نطق بزربة وصوتو باين فيه لخوف) فين سيدرا؟ شنو وقع ليها؟

نوح:(وقف وحط يديه على كتفو ونطق بصوت هادئ)

راه لداخل طبيب باقي ماخرج باش يعلمنا شنو كاين

تانيرت:(جلسات جنب رحيل عنقاتهاا) مغايوقع ليها والو بلاماتخلعي ابنتي..

رحيل:(صوتها مبقاش يتسمع بقوة لبكا) كان نازل دم من نيفها بزاف اماما

ريان:واش غير رعفات ولاشنو؟

بيسان:(نطقات بهدوء) لامكنظنش غاتكون تضربات حيت نيفها تنفخ

شاف فيها ريان بنظرة باردة ومجاوبهاش حدو بعد شوية أو وقف مربع يديه ساكت.. وماشي غير هو لي سكت كلهوم حيت قوة لهضرة دابا مغاتفيد بوالو وهوما معارفينش البنت مالها شنو طاري معاها وزيد الطبيب تعطل بزااف وهادشي غير مزاد مخليهوم يتخلعو ويخافو لاتكون واقعة ليها شي حاجة خايبة.. قربات رنيم جهة ريان أو وقفات قدامو ونطقات بصوت هامس:قبيلة عيطات ليا أسماء وبلامانقصد قلتها ليها وراها جايا هي وإسلام

ريان:(كمش حجبانو)تت شداك تگوليها ليها ارنيم لواليد مغايعجبوش لحال

رنيم:ماحسيتش والله ماقصدت تت قلت ليها بلاماتجي مي هي قصحات راسها

ريان:ففف صاف ماعليش (حط يديه على كتفها) سيري ريحي حدا رحيل لهيه ماتبقايش غير واقفة غاتعيااي

حركات راسها ومشات لكرسي جنب رحيل جلسات وبيسان كانت من الصباح تاتشوف فيهوم بزوج ومعجبهاش لحال..

بعد لحظات طويلة من الانتظار عفى عليهوم الله وجا الطبيب جهتهوم ورحيل غير شافتو ناضت بزربة ونوح شد فيها وتبعوه لخرين كلشي تگجگج على طبيب

نوح:(قال بجدية) أمدرا ادكتور؟

ط:قدرنا نحبسو ليها النزيف وحاليا غاتبقا عندنا هنا تايخف التورم لي عندها فنيفها ومنها نتأكدو واش عندها كسر فالأنف ديالها لي يستدعي لجراحة..

رحيل غير سمعاتو قال جراحة ورجليها فشلات عليها وكانت غاطيح كون مايدين نوح لي سندوهاا أو كالاها معاه..

إدريس:(وجه كلامو لطبيب)كيفااش جراحة ادكتور واش لهاد الدرجة

ط:(تبسم ليهوم بعملية) ممتأكدينش واش الجراحة ضروريةحيت التورم لي فنيفها عرقل لينا الأمر داكشي علاش قلت غاتبقا تايقل التورم وديك الساعة غانشوفو شكاين وفحالة مكانت جراحة فمغاتكونش خطيرة بزاف مكاين لاش تخافو اسيدي

رحيل:بغيت نشوف بنتي

ط:غاتجي لفغميمغ وغاتوصلكوم لشومبر ديالها الله يجيب الشيفا

خلاهوم مع لفميغ لي جات باش تديهوم يشوفو سيدرا ونوح مشى لغسبسيون يقاد لوراق ديالها ومعاه إدريس..

بقلب أم ملهوف دخلات رحيل لشومبر وعينيها مجرد مالمحات سيدرا لي ناعسة على لبياص الطبي ولفاصمة على نيفها لي باقي متورم وتاتحت عينيها تورم ودارو ليها لقطن فتقيبة نيفها وتيو دالأوكسيجين ففمها باش تنفس منو.. كان منظرها تيبكي وداك لبياص گاعما كتبان فيه ورحيل غير شافتها راه دموعها نزلو ومشات جلسات فالكرسي تاتلمس ليها شعرها وتبوس يديها بلهفة.. ماشي غير رحيل لي خاطرها ضرها گاع لي تم بقات فيهوم وكيفاش ماتبقاش فيهوم وهي لعسيلة ديال الدار لي سبحان الله دارت بلاصتها فقلوبهوم بدون مجهود.. من نهار دخلات لحياتهوم وكل واحد متعلق بيهاا وكيبغيها بحال بنتو.. تجمعو فالبيت عليها هي لي كانت ناعسة مور ماعطاوها كالمون..

صونى تلفون رنيم وكانت أسماء لي سولات على شومبر مع وصلو عطاتها ليهوم ومادازش بزاف دلوقت تاكان الباب تحل ودخلات أسماء وموراها إسلام لي كانو تاهوما مخلوعين وغير ساقو لخبار سمحو فالسفر..

أسماء:(قربات جهة رحيل وعينيها على سيدرا)مال لحبيبة ديالي شنو وقع ليها

تانيرت:ماعرفناش ابنتي كيف جرى ليها

رحيل:(شافت فيهوم بخفوت)واش مسافرتوش؟

أسماء:اشمن سفر الله يهديك فين لخاطر نسافرو وسيدرا فالسبيطار

تانيرت:شكون قالها ليكوم؟

أسماء:رنيم هي لي قالتها لينا

تانيرت:(شافت فرنيم) علاش ابنتي قلتيها ليهوم وخلعتيهوم

أسماء:ومالكوم كنتو ناويين تخبيو

إسلام:هادشي مكيتخباش اخالتي وكيف قالت أسماء السفر ماشي مهم لامامشينااش ليوم راه عطا الله ليام...

دخل نوح برفقة إدريس وسلمو على إسلام ونوح مشى جهة رحيل باس راس سيدرا وتحدر شاف فرحيل ناطق بهمس:شوية دابا؟

رحيل:(عينيها كيف جغمة الدم) تت ماحدي ماطمنتش عليها عمري غانكون بخير

نوح:(بجدية) سمعتي طبيب اش قال مكاين لاش تخلعي وتخلعيها معاك ارحيل سيدرا باقي صغيرة وخص لي يقويها ماشي يزيد على مابيها

رحيل:(مسحات وجهها) دابا وقتاش غاتفيق واش غاتقصح؟

نوح:ضروري شوية مي غاتبراا دغيا (حط يديه وقاس شعر سيدرا)تاتبيرت إينو قوية

بقات تاتشوف فيها رحيل بسهو وكلمة قوية تاترد فدماغهاا.. اه عندو لحق هي قوية حيت ملي كانت فكرشها وهي متشبتة بلحيااة رغم الظروف لي مرات منهوم والضرب لي كلات وهي حاملة بيها الاأنها بقات متشبتة بمهاا وربي مكتب ليها عمر جديد.. بنتها قوية رغم الظروف لي عاشت وهادشي كافي يخليها طمن قلبها وتعرف بلي هادي أزمة وغاتفوت..

لخبار وصلات تالمحمد طه لي كان هو وغزلان ناويين يشدو الطريق لوجدة ساعة غير عرف سمح فكلشي وهز بگاجو ومرتو ومشاو لكلينيك تاهوما.. أما بيسان فكانت جالسة فبرا ساكتة وعقلها مع ريان لي متجاهلها تماماً بحال لامكيعرفهاش وهادشي معجبهااش.. داكشي لي كتفكر فيه هي والطريقة باش كاتشوف العلاقة ماشي بحالو وهادشي سبب مشكيل بناتهوم باغا دوي معاه ولكن هذا ماشي لوقت المناسب وهادشي غير مزاد خلاها تشطن.. تحل لباب وخرج هو ورنيم وأسماء وإسلام حيت الشومبر عمرات عليها قررو يجلسو فالكافيتيريا تاتفيق سيدرا ويطلعو يشوفوهاا.. غير شافتو تقدات فوقفتهاا وكون مكانش غادي معاهوم كون وقفاتو ساعة مكانش بوحدو..

أسماء:بيسان حنا غانزلو لكافي لي لتحت يالاه معانا

ريان:(شاف فأسماء)احنا سبقناكوم (قال مخاطب رنيم) يالاه

جرها وكملو الطريق وبيسان حسات من تصرفو أنه مباغيش تمشي معاهوم وسرطات لقمعة وقالت بضحك:غير سيرو أنا غانبقا هنا

أسماء:واخا باشما كان علميني

شدات فإسلام ومشاو وبيسان جلسات والبكية شداهاا علاش معرفاتش.. شافت فلباسها كانت لابسة غير بانطوفة وتوني وناضت باش تعلم نوح بلي غاتمشي لدار تبدل ساعة تلقات معاه فلباب وكان خارج..

بيسان:خويا

نوح:(بجدية) اجي باغي ندوي معاك

درعها وتحركو فلكولوار وبيسان حسات بلي لموضوع مهم وجدي..

نوح:(بدون مقدمات)شنو طرا مع سيدرا؟

بيسان:ماعرفتش كنت جايا لصالة وسمعات لغوات ديالها وغير دخلت لقيتها فديك لحالة ورحيل حداها مخلوعة

نوح:(شاف فعينيها مباشرة)مكان تاشي حد آخر ؟

بيسان:(بتفكير)هااا اااه كااان تازين العابدين..

مجرد ماتدكرات سمية زين العابدين نوح كمش حجبانو وبحال لافهم لموضوع.. فاش دخل ولقى سيدرا فديك لحالة ماردش لبال لشكون كااان حيت ديك الساعة كانت تتبان ليه غير سيدرا يجيبها لكلينيك.. أما بيسان فكانت غير واقفة تاتشوف فيه معرفاش هو علاش سول.. بصح فاش شافت حالة سيدرا عرفات بلي غاتكون تضربات ولكن مجاتش فبالها نهائيا أن شي حد ضربها ديك الضربة ماشي بحال نوح لي عارف ولدو وحساسيتو فموضوع زواج وموضوع سيدرا بالخصوص.. تحبس السوجي تما ومعطاهاش باقي راس لخيط ولاقال شي كلمة خرى..

بيسان:خويا غانمشي لدار نبدل حوايجي ونرجع واخا

نوح:(مد ليها لكونطاكط ونطق بهدوء)ردي لبال لراسك وملي ترجعي جيبي معاك زين العابدين

بيسان:مكنظنش غايبغي يجي

نوح:ديري لي قلت وصاف

حركات راسها ومشات وهو بقا واقف بلاصتو جبد تلفونو ودوز لخط نيشان لزين العابدين.. كانت تلفون كيصوني مدة عاد تفتح لخط..

نوح:(بجدية)فينك؟؟

زين العابدين:دار

نوح:(بصوت حاد وبنبرة لانقاش فيها) وجد راسك ملي تجي بيسان أجي معاها

زين العابدين:واخ

قطع نوح ومسح وجهو وهو كيستغفر موولاه.. غير شاف نيف سيدرا لي تنفخ عرفها تضربات ماشي غير ترعفات والطبيب زاد أكد ليه داكشي لي كان تيفكر فيه ودابا فاش هضر مع بيسان تما كونفيرما بلي ولدو هو مول لفعلة..أكثر واحد عارف كراكتير زين العابدين هو نوح بحكم هو لقريب ليه مابين گاع الناس لي كيعرف زين.. ناس معدودين على رؤوس الأصابع حيت هو منغالق على نفسو وممخلي حد يزعم عليه من غير أمين لي بعض لمرات صحابو فبرا فين كانو تيقراو كانو تيقولو ليه كيفاااش تاعاشرتي داك لمعقد مع هداك هو لقب لي عايطينو فلكلاس..

دخل نوح لشومبر لقى رحيل على نفس جلستها ومعاها غير تانيرت وإدريس أما لخرين راه فلكافيتريا لتحت.. وقف على رحيل لقاها صفرا بحال ورقة الاستدعاء ولعينين داخلين تقول فيها لموت..

نوح:(تحدر جهتها ونطق بهمس) خلينا نزلو لتحت تاكلي شي حاجة

رحيل:(بتعب واضح على ملامحها)تت مافياش الجوع غير خليني

نوح:(بجدية)مكنتشاورش معاك نوضي يالاه

رحيل:عفااك انوح غير خليني هنا

نوح:(كان باقي حادر جهتها ودغيا تسيف وعقد دوك لحجبان ونطق بهمس قاصح) غاتحركي يابلخاطر يابزز

مسحات على وجهها وشافت فسيدرا لي باقي على حالتها وناضت غادة لجهة الباب وهو موراهاا ناطق بهدوء:سي إدريس تبغيو شي حاجة من لتحت؟

إدريس:شي قرعة دلما اولد لحاج

حرك ليه راسو وخرج ورحيل غادة سبقاااه.. عارف غاتكون تقلقات حيت دوى معاها هاكا ولكن لمصلاحتهاا حيت بصح السيدة باينة فيها حالتها نهار كولو مواكلاش طيح ليه هناا ماحيلتهوم لسيدرا يزيدوها تاهي.. وصل لعندها وحط يدو على دراعها مخليها تخشى فيه وهي ماهضراتش حيت بصح لخاطر معندهاش وهي عقلها غير مع بنتهاا باغا تفيق وتحل عويناتها وطمن عليها.. مولف ليها كادخل لسبيطارات لاطلعات ليها السخانة ولكن مرة فشحااال وداكشي طبيعي عند لوليدات صغار فعمرهاا ولكن ماشي بحال دابا..

وصلو لتحت وبانو ليهوم لخرين جالسين وكل واحد قدامو طاس دلقهوة.. قربات رحيل لجهتهوم وخدات طبيلة خرى قريبة ليهوم جلسات وحطات راسها عليهاا ونوح مشى ياخد ليها متاكل.. قربات جهتها أسماء وحطات يديها على ضهرها تاهزات رحيل راسها..

أسماء:كاتباني صفراا

رحيل:(بللات شفايفها لي قصاحو ليها)كيف بغيتيني نكوون وبنتي ناعسة فالسبيطار وماعرفت واش مهرس ليها نيفها ولا لا (جاتها البكية)وقال ليك طبيب يقدر تكون عملية وهي باقي صفيرة

أسماء:راه ممتأكدينش حيت نيفها لي تنفخ مخلاهومش يعرفو واش مهرس ليها ولا لا بلاماتهزي لهم لشي حاجة ممتأكداش منها وتصعبيها على راسك واش شفتي حالتك كيف دايرة ملي تفيق هي راه غاتبغي مها معاهاا لي توقف جنبها ماشي تباااكى عليهاا هنا وتزيدي تخلعي لبنت

رحيل:أنا بغيت غير نعرف كيف تاتضربااات واش دخلات فلباب ولاشنو تت اوووف مكتزگاااش هاد لبنت عندي

أسماء:عادي لوليدات الصغاار هاكا دايرين تايبغيو يتحركو ويلعبو راه سنهاا هدااك

رحيل:(شافت فيها بهدوء)تت سمحوليا مبقيتوش مشيتو لشهر لعسل لانتوما لامحمد وغزلان

أسماء:تانتي اشمن شهر راه غير سيمانة لي كاينة إسلام غايرجع لخدمة مور سيمانة وأنا غانبقا فالدار ههه

رحيل:فخبارك لقرايا غاتبدا الإثنين وسيدرا غايخصني ندفع ليها شهادة طبية تاتبرا

سكتاتو فاش شافو نوح راجع جايب معاه لماكلة لرحيل وناضت أسماء مخلياها معاه ورجعات عندهوم.. أما هو حط ليها داكشي لي جاب ليها وقال بهدوء:لابفيتي حاجة خرى نجيبها ليك

رحيل:لا صاف تاهادشي مزيان

بقات تاتنقب من داكشي غير بزز وهو جالس قدامها تايشرب فلقهوة كحلة وخدام بتلفونو.. كلات داكشي لي قدات عليه وجمعات يديها تاتشرب من لقرعة دلماا.. ضرب شوفة لماكلتها لقاها غير دارت صواب وصاف وماهضرش حيت مبغاش يحكر عليها وعارفها مخلوعة على سيدرا ولخاطر مكاينش..

رحيل:خلينا نرجعو يقدر تكون فاقت

ناض هز قراعي دلماا ومشاو مخلين الكليكة مجمعين مع بعض.. كانو راجعين بزوج لشومبر تاسمعو صوت بيسان لي تاتعيط لنوح ومع ضارو بانت ليهوم جايا ومعاها زين العابدين لي كان موخر المشية.. غير قربو جهتهوم وهو ينطق..

نوح:(مد لقراعي دلما لرحيل ونطق بجدية)سيرو سبقونا أحنا جاايين

مشاو لبنات بزوح وهو ضار شاف فزين العابدين وربع يدو ناطق بجدية:علاش ضربتي لبنت؟؟

سؤالو كان مباشر حيت نوح كان عارف ولد هو لي دارها يعني مكاين لاش يطول لهضرة معاه وجاه نيشااان.. أما زين العابدين فمجرد ماعيط ليه باه وقال ليها اجي تاهو عرف بلي باه غايكون عرفو هو لي دارها..بزوج بيهوم حافضين بعضياتهوم..

زين العابدين:(قال بنبرة هادئة بالإنجليزية) هي غلطات فلكلام معايا وعصباتني

نوح:(هز فيها حاحبو)غلطات معاك فلكلام (ربع يديه)اش قالت بالسلامة تاغلطات ونتا ضاربها ديك الضربة لي يقدر تكووون هرستي فيهاا نيفهاا (حمر فيه الشوفة وقال بحدة) واش عند بالك راك تاتلعب شي كومبة نسيتي راااسك ونسيتي بلي هاديك بنت صغيرة وااااش أنااا هادشي علاش ربيتك تحگر ازين العابدين على غيرك؟؟

كان واقف زين العابدين ساكت وحدر راسو ونوح واقف قدامو تيشوف فيه.. زين العابدين من صغرو كان طفل سكوتي ولكن ع.نيف.. وداك العن.ف لي كان فيه سبب من الأسباب باش يدخلو لصااال.. وشوية بشوية ولى تيتحكم فداك لعنف ومبقاش زين العابدين كيف كان فالصغر...

نوح:(كمل كلامو بحدة مخرج فيه عينيه)علاااش ساكت دابااا شوووف فيااا (برك عليهاا)شوووووف فياااا ازين (هز زين العابدين راسو وشاف فيه ونوح كمل) شنو ستافدتي دابا ملي ضربتيهاا وحگرتي عليها هاااا جاوب

زين العابدين:(بهدوء)والو

نوح:والو (قرب جهتو محمر فيه الشوفة)ياك الشريف وعلاش ضاربهاا يديك شايطين عليييك واااش أناا عمري ضررربتك فحياااتك واخا كنتي تاتغلط عمرررري هزيت يدي عليك ؟؟؟ ياااك ملي تاتكون غالط تانجرك بوحدك ونشرح ليك وندوي معاااك بلخاااطر تانتااا كنتي تاتعصبني ولكن عمري ضربتك حيت الضرررب عمرووو كان حل... ملي غلطات معاااك جي عندي وقول ليا اش دارت ديك الساعة أنا نهضر معاااها واش هادي هي تربيتي ليك احفيد لحاااج واااش أنا مربيك على لحگرة

زين العابدين:(هبط راسو)لا

نوح:لا وعلاش درتيهااا (غوت عليه تاضارو النااس لي فبكولوار تيشوف فيهوم)ملي نكون ندوي معاااك شوف فياااا هاديك لبنت راه فمقااام ختك خصك تحتارمهاا وتحميهااا ماشي ضربها وتحگرهااا خصك تجيب حقهااا لاظلمها شي حد ماشي تكووون الظالم وماااشي غير مع سيدرا مع كلشي اااه ماخصكش تسكت على حقك ولكن ماتكوونش واحد همجي لي لقاه يضربو لاش أنا مدخلك لاصااال ودايرو ليك يااك ديما تانقول لك لاحسيتي براااسك معصب سير تريني درت ليك گاع لاصاااال فالرياااض باااش تاخد فيه راحتك غير باااش مانطيحوووش فهاد المشكيل لي طيحتينا فيه

زين العابدين:(بصوت هادئ نطق وهو كيشوف فباه)سمحليا الواليد

نوح:(مسح على وجهو وحط يديه على سمطة دسروال وضار تايزفر النفس ويستغفر مولاه وغير حس براسو تكالمى ضار جهتو ونطق بهدوء)هاد سمحليا غاطلبها من لبنت ماشي مني أنااا وهادي آخر مرة يوقع بحال هاد لبلان مع سيدرا حيت لمرة الجايا تصرفي غايكون خايب معاااك ومغايعجبكش ودير فباالك ديك لبنت راها ختك ازين

زين العابدين:(زير على يديه وقال مكمش حجبانو) ماشي ختي والاكنت غانطلب السماحة غانطلبها ولكن هي ماشي ختي وعمرها غاتكون ختي حيت هي ماشي بنتك

نوح:(حرك راسو بلاحول وقال بجدية) هي بنتي ورحيل مراتي هاد لهضرة دخلها داك الراس لي قصح من لحجر (حط يديه على كتف زين العابدين وبرك عليه)غدا غاتمشي فالصباح لصااال راه دويت مع لكوتش ديالك غايدير ليك تديريبات ومغاتسالي تال الليل وهاد التلتيام لي بقات فلعطلة كلها غادوزهاا فالصااال بااااش داك لقصوحية دالرااس وداك لعصااب تخرجهوم على خاطر خاطرك اولدي...

نوح فتربيتو مكيضربش حيت بالنسبة ليه الضرب عمرو مكان حل وخصوصا وليدات الصغار حيت مع مدة فاش تيولفو الضرب لحمهوم تايبرد عليهوم ومكيبقاوش يتسوقو وتالادارو شي حاجة ماخصهاش دار راه تيكون واخد فكرة أن باه غايضربو وكيزيد يضسر وهادشي نوح مأڤيتيه مع زين العابدين وتامع خوتو فاش كانو صغار.. هو من طبعو تايهضر ويتحاور ولاقااال ليك لا على لحاجة راه طير تنزل غاتبقا لا صااارم فالأمور لي خصها تكون الصرامة فيها وحنين فالأمور لي خص الحنية تحضر فيهوم.. بحال دابا فاش هضر معاه واخا غوت وقصح ولكن عارف أن ديك لهضرة لي قال اتخلي ولدو يحس بتأنيب الضمير هو عارف زين العابدين وحافض كراكتيرو.. فضل أنه يعاقبو داك لعقاب ديال لونتريما ديك التلتيام ومنها نيت يخليه يشغل بالو ويحيد الغضب ديالو ويفرغو فلونتريماا.. وتازين العابدين ممعارضوش نهائيا واخا عارف بلي هاد التلتيام غادوز متعبة ولكن لحمو ولف التعب والإرهاااق او ولف الدق تامبقات تاحاجة تقضي فيه...

تسالى لكلام تم وتحركو لشومبر ومنها نيت يخليه يشوفها ويشوف لحالة لي دار ليهااا باش يزيد يحس بتأنيب الضمير ويعرف راسو بلي غلط.. دخلو لقاوها باقا ناعسة وبلامايبين شاف فزين العابدين بجنب عينيه لقى تايشوف فسيدرا مكمش حجبانو وشوية قلبو وجهو وباين فيه ماعجبوش لحااال.. جلسو تما شوية مجمعين ومع ليل كلشي مشى وبقات غير رحيل ونوح وتامن زين العابدين سيفطو نوح مع عمتو بيسان...

ماملاتش من ديك لجلسة حدى بنتها وكاتسناهاا غير تفيق وبلفعل حلات عويناتهاا ونوح عيط على الطبيب لي جا مع لنفغميغ وغير حلات عويناتها لي تحتهوم تنفخ وبدات تاتقلب على رحيل غير بعويناتها وبغات تمد يديها باش تقيس وجهها مع حاسة بشي حاجة غريبة فيه وهو يحبسها الطبيب لي تبسم ببشاشة ليها باش مايخلعاهاش بحكم بنت صغيرة..

طبيب:(بابتسامة بشوشة) سيدرا على سلامة انعاسة ملي فقتي ههه تايضرك نيفك

سيدرا:(تيو ففمها كاتنفس منو ونيفها مسدود غير تاتحرك عينيها باه)

طبيب:هانتي اسيدرا ماماك وباباك قالو ليا نتي بنت دكية وكاتسمعي لهضرة شوفي فيا أنا دابا غانحيد ليك هادي لي ففمك ونتي غايخصك تنفسي منو ابابا ديري بحال هاكا (كيوريها بتطبيق باش تفهم) هاكا من فمك ماشي نيفك حيت فيه واحد جريحة صغيورة خصها تبرى والادرتي لي قلت ليك غاتبرا بزربة وغاترجعي لدار وتلعبي تاااني (شاف فنوح وتبسم ليه)شنو سمية لقطة ديالهاا

نوح:(كان واقف حدا رحيل وقال بتبسيمة تاهو)إيڤانا

طبيب:(شاف فسيدرا)تلعبي مع إيڤانا واخا اسيدرا غاديري لي قلت ليك ياكي؟

حركات ليه راسها بشوية بمعنى اه ورحيل شادة يديها كطمنها بلي هي واقفة معاهاا.. زولو ليها داك تيو لي كان بصح قاصح والشخص لي كبير راه مكيصبرش ليه.. بركات على يدين رحيل وعويناتها دمعو تازولو ليهاا

طبيب:برافو سيدراا ودابا تنفسي من فمك كيف وريتك قبيلة يالاه

بدات تاديرها وطلع التفس ولانفغميغ طلعات ليها البياص فين ناعسة تاجات تقريبا جالسة حيت لانعسات اتخنق.. بقاو معاهاا شوية تايهضرو معاهاا وطبيب تيضحكها باش ماتخلعش وتولف ونيت كاين واحد نوع لي تيخدم بضمير بحالو.. مشى طبيب ولانفغميغ وبقات غير رحيل لي تاتبوس ليها يديها ونطقات بصوت حنين:مامي ديالي خلعتيني عليك

نوح:(باسها فجبهتها وقال بتبسيمة حنينة)تاتبيرت إينو بطلة هانتي شفتي گاعما بكات

تحدر باسها فجبهتها وجرها لعندو تايقيس شعرها وهي غير ساكتة حيت ماتقدرش تهضر ولغم لي كايهضرو بيه الناس راه كاتنفس منو..

رحيل:غايخصني نعيط لبابا ونعلمو بلي فاقت

نوح:أنا نهضر معاه خليك مع سيدرا

خرج نوح لبرا علم إدريس لي كان باغي يرجع مي نوح ماخلاهش حيت مشى لحال وعلم معاه تاإسلام ومحمد طه عاد رجع لقى رحيل مجمعة مع سيدرا لي غير ساكتة وبابن فيها باقا مخلوعة...

دازت ديك الليلة وغير طلع الصباح جا إدريس وتانيرت أما ريان ورنيم راه خدامين.. دوزو معاهوم الصباح وطمنو على سيدرا لي يالاه فاقت مع مانعساتش مزيان فالليل حيت مكتقدرش تنفس...

محمد طه:(باس سيدرا ونطق بحنية)روح مودي مريضة ليا

سيدرا:(حطات يديها على وجهو وعينيها مدمعين)

محمد طه:(باس يديها)لبكا لا اروح مودي دابا تبرااي ونديك فيما بغيتي غير بوحدك

أسماء:(وقفات حداهوم)فاش مجمعين نتا وسيدرا بلابينا

محمد كه:بيني وبينها ونتي اش دخلك

أسماء:غزلااااان اجي

جات غزلان على نيتها وقفات حداهوم:نعام؟

أسماء:راجلك تيخونك من صباح وهو يتغزل فسيدرا

غزلان:(ضحكات)ههه لاكانت غير سيدرا هانيا نتغزلو فيها جميع

محمد طه:صافي هاهي قمعاتك ورتاحي

أسماء:سيرو بعدو مني نمشي عند راجلي نتوما متسواوش

محمد طه:(شاف فغزلان بهدوء)جيبي ليا تلفوني راه كيتشارجى لهيه..

فبرا حدا لباب الخارجي دلكلينيك كانت بيسان واقفة هي ونوح لي باقي بحوايج لبارح..

بيسان:(قالت بهدوء كتعاود ليه)لبارح ملي مشى دخل لبيت متعشاش(تنهدات) واش مقالش ليك زين علاش ضربها؟

نوح:(حرك راسو)تت

بيسان:نتا عرفو كيف داير بلاماتعصب عليه عفاك اخويا واخا

تسمع صوت رحيل لي قالت من وراهوم بنبرة حادة:واش ولدك هو لي ضرب ليا بنتي؟؟

أخر حاجة كان نوح باغيها توقع دابا وهي رحيل تعرف شنو كاين.. كان مأجل لموضوع تاتبرا سيدرا وتخرج من لكلينيك باااش يعلمها ويصارحها ساعة تمشي الرياح بما لاتشتهي السفن..

كانت واقفة تاتشوف فيه وهي عاقدة حجبانها ومن وجهها باين فيها راه معصبة.. كانت خارجة تقلب عليه باش طلب منو يجيب حوايج لسيدرا باش تبدل ليها وهي تسمع لي مكانش غايطيح ليها على لبااال.. أما بيسان غير شافت لوضع وهي تنساحب مخلياهوم واقفين بزوج قدام بعضياتهوم ورحيل تاتشوف فيه وهي عاقدة حجبانها..

رحيل:(قربات جهتو وقالت بحدة) بنتي دخلات لكلينيك بسباااب ولدك؟؟

نوح:(بجدية ونظرات صارمة) طلعي لطوموبيل نتحركو لشي بلاصة وندويو على خاطرنا ارحييل

رحيل:(خرجاات عينيها)مغادة فين قبل ماتجاوبني وااااش داكشي لي سمعت بصح انوووح؟

نوح:(مسح على وجهو وقاال بحدة) اه زين العابدين هو لي ضرب سيدرا

رحيل:(نطقاات بعصبية) وعلاااااش ضربهااااا هي اااش دارت ليه باااش يضربها ديك الضربة لي دخلاتها لكلينيك

كانت تاتغوت وهادشي أثار انتباه الناس لي كيدوزو من تم ونوح معجبوش لحال ومبغاش هاد لبلان عليها قرب شدها من دراعها بلطف ونطق:زيدي تحركي من هنا نهضرو فطوموبيل

رحيل:(نثرات يديها بعصبية محاملاش داكشي لي سمعات وقالت) غانبقااا هنا ومغانمشي معاااك فين

نوح:(برك على سنيه مباغيش يقصح معاهاا حيت عاطيها عدر وعارف ردة فعلها طبيعية ولكن مجاتش يتغاوتو قدام عباااد الله وكلشي يتفرح فيهوم) رحيييل زيدي قدامي لطوموبيل بلاماتعصبيني

رحيل:نعصبك؟ هه واش من نيتك تاتهضر انووح نعصبك واش محااسش بداكشي لي حاسة بيه أناا لي بنتي كلات ديك الدقة لي مكنتش عارفة سبابها وعند بالي راه غاتكوون تاتلعب وبقوة التنقاز دخلات فشي حيط ولاشي حاجة تاطرا ليها هادشي ساعة ولدك هو مول لفعلة..

نوح:(قصح معاه الهضرة ومن ملامح وجهو باين فيه راه معصب وبزز باش مكونطرولي راسو) غاطلعي قدامي فطوموبيل وديك ساعة نكملو كلامناا (شافها حلات فمها ناوية تدوي وهو يهز يديه)مانعاودش لهضرررة ارحييل

جبد لكونطاكط وتمشى لجهة فين مبلاصي طوموبيلتو وهي وراه كلها تاتغزل.. معصبة بزااف وعصبيتها راه باينة فوجهها لي كان حمر كي مطيشة..طلعو وغير تسد لباب وهي ضور جهتو وشافت فيه قايلة بصوت جاد:علاش ضربها شنو دارت ليه؟

نوح:(مسح على وجهو ونطق بجدية وهو ضاير جهتهاا) مقالش السبب وعارفة واخا يكون السبب ماعندوش لحق يقيسهاا ويمد يدو عليهاا هو غالط وأنا مغانعطيه تاعدر وراه دويت معاااه وخليتو يعرف الغلط لي دااار وتفاهمت معاه وهو عمرو غايمد يدو عليها باقي

رحيل:(ضحكات بسخرية وقالت) هه مكاين تاشي سبب يخليه يدير داك التصرف الهمجي انووح واااش هو ضارب صاحبو ولاضارب حيط رااااه بنتي هاااديك بنت صغيرة فعمرها ست سنين باااقي عضامها مزاگينش شفتي فين وصلهاا

نوح:كلامك معقول وأنا براسي مابغيتش تصرفو ومتقبلتوووش ارحييل سيدرا راه بنتي ومغانبغي حد يمد يدو عليهااا وزين لي دارها راني تفاهمت معاااه

رحيل:(كانت معصبة وكلامو وداك لهدوء حسسها بحال لاممسوقش ونطقات بصوت حاد) وعلاش ماقلتيهاااش لياا علاش خبيتي بحال هاد لموضوع وماقلتيهش هااا (هزات حجبانها وخرجات عينيها فيه)خبيتيه حيت مباغيش ولدك يضرر وبغيتي تحميه كووون بصح سيدرا كاتهمك كنتي قلتيها لياااا انوووح (عينيها دمعوو وصوتها تخنق) هي صغيرة وغاتكون تخلعاااات وتقصحااات ولدك علاش يضربهاا لياا علاااش (مسحات دموعها ومدات يديها باش تحل لباب ولكن قبل ماتنزل نطقات ببرود) لابنتي غلطات ودارت شي حاجة ماهياااش أنا نعاقبهاا ونغوووت عليها ولكن ولدك مامنحقوش يمد يديه عليهاااا

نزلاات وسدات لباب بالجهد غادة جهة الباب دلكلينيك وهو بقا جالس بلاصتو وعينو ساهين فيها تاغبرات... وهضرتها ضراتو فخاطرو وخصوصا ديك بنتك أو ولدك لي مامرة مازوج عاوداتها خلاتو يتقلق ويبقا فيه لحااال حيت كلامها بين ليه بلي هي باقا دايرة واحد لحاجز بيناتهوم عكسو هو لي كيعتابر سيدرا بنتو من نهار تزوج بيها وهو كيحاول يعوضها على فراغ باها ومامخصصها من تاحاجة.. هادشي دارو مع سيدرا حيت عزيزة عليه وقبل گاعما يفكر فمها تقرب منها حيت تاتعجبو بكلامها ودغيا تادير بلاصتهاا فقلب الناس وفاش تزوج برحيل دارها بنتو حيت بصح كيعتابرها بنتو بحالها بحال زين العابدين.. هو فاش مقالهااش حيت الضروف مكتسمحش وخلاها تايكونو راس فراس ويرجعو لدار ويگولها ماشي باش يخبي على ولدو ويحميه.. كون كان باغي يحميه كون گاعما جرو ودوى معااه ودار ليه تأنيب الضمير وخلاه يعرف غلاطو وداه لعندها باش يشوفهاا ويشوف نتيجة غلطوو فين وصلات.. عارف بلي زين مكيجيش بلعناد ولغوات والضرب تايجي بلحوار ولهضرة وهو هادشي لي دار معاه وراه دابا نيت عارف بلي ولدو غايدوز أكفس تلتيام فحياتو حيت وصى عليه لكوتش بعقاااب لي يخليه يعرف حجم غلطو قداش..

صونى تلفونو لي خرجو من سهوة ديالو لقاه عثمان

قطع عليه وخشى تلفونو فجيب المونطو وجبد گارو كماه وسط الطوموبيل مخلي الدخان فيهاا وريحة وزاد الثاني عاد نزل باش يمشي لداخل وفبالو كاضور غير هضرة رحيل وديك بنتي أو ولدك لي مبغاااتش تهبط ليه..

ملي دخلات لكلينيك مشات نيشان لحمام لقات لفام دميناج تاتسيقو وغير خرجات وهي تفرگع رحيل بلبكاا.. حسات براسها تخنقات وباغا غير تبكي وفديك الساعة كانت باقي معصبة من داكشي لي عرفات.. بقات تاتبكي تافشات قلبها وهي تحدر تاتغسل وجهها ساعة حسات بمعدتها تقلبات عليهاا ومشات ردات غير لمرار.. رجعات تاتشلل فمها وتنهدات حيت عارفة لمعدة ناضت عليها تاني خصوصا فاش تاتعصب.. بقات تماا تاارتاحت عاد رجعات لشومبر وقبل ماتوصل بان ليها نوح جالس هو وإدريس وإسلام تايهضرو أو بالأحرى دوك زوج لي كيهضرو وهو ساكت تايسمع ليهوم تاهز عينو وشاف فيها جايا جهتهوم ومشافتش فيه باقي دخلات نيشان لبيت عند سيدرا وهو بقا برا..

دازت ليلة خرى وتبعوها زوج ليالي لي تفش فيه تورم نيف سيدرا وملي دوزو ليها تاني تبين أنه ماعندهاش كسر وهادشي خلى رحيل ترتاح شوية.. كانت سيدرا تاتقدر تنفس شوية من نيفهاا وقدرات تهضر..محنية رحيل تاتلبس ليها سبرديلة وسيدرا جالسة تادوي مع مهاا..

سيدرا:(نطقات وهي مكمشة حجبانها ببرائة) فين ماي بلو آيز مامي؟؟

هزات رحيل راسها وشافت فسيدرا بسهو.. هاد ليوماين كلها ماهضروش فيها كيف الناس حيت نهار كولو والشومبر تتعمر وفالليل كاتلاهي مع سيدرا..

رحيل:هاهو دابا يجي

سيدرا:(هزات كتيفاتها)عرفتي مامي مبقاش زينبيدين عزيز علياا

رحيل:(شافت فيها بجدية) ماتبقايش تقربي ليه وديري ليه لبسالات سمعتي

سيدرا:(نطقات ببرائة)تاأنا عضيتو مامي فيديه

رحيل: آخر مرة تعاوديها لادار ليك شي حاجة اجي عندي

سكتات سيدرا ورحيل كملات ليها لباسهاا عاد ناضت هزات تلفونها باش تعيط ليه ساعة تحل لباب ودخل.. تبسم لسيدرا لي هزات يديها باش يهزها وتاهو فلبلاصة هزها وباسها فحنكها وعينو على عينيها لي تحتهوم باقي منفوخ شوية هو ونيف لي دايرين ليه فاصمة:زيدي نمشيو لدار راه جدك سبقنا هو وجداك

سيدرا:اه نمشيو عند بّاديدي (شافت فرحيل) يالاه مامي..

هزات رحيل صويك دلحوايج ومع قربات جهتو خداه ليها وكمل طريق وهو هاز سيدرا مجمع ليها وهي تاتشكي ليه على زين العابدين وشنو دار فيها ورحيل وراهوم تاتسنط.. ركبها لور وقاد ليها بلاصتها وكل واحد شد بلاصتو وتحركو لرياض فسكات من غير صوت سيدرا لي مرة مرة تهضر معاهووم وشي واحد فيهوم تيجاوبها.. وصلو لرياض لي كان فيه إدريس وتانيرت أو ولادو وعريساتو كيتسناو سيدرا ونيت باش يتغداو تماا.. دخلو لصالة فين كانو مجموعين حيت كانو غير لمقربين فقط حط نوح سيدرا لي مشات جهة إدريس تاتعنقو وتاهو كيجمع معاهاا.. ضوروها كاملين وسطهوم ومعاهوم تاعائلة نوح لي طبعا مشاو وشافوها فالكلينيك.. مقالتش ليهوم سيدرا شكون ضربها حيت رحيل قالت ليها ماتگولها لحد باش مايجبدش مشكيل وصاف ونيت يبقا داكشي بيناتهوم بزووج وماشي كلشي خصو يجيب لخباار..

رحيل:(ناضت وتبسمات ليه بهدوء)غانمشي نبدل عليا ونرجع

طلعات لفوق وزولات زيف لي حساتو خنقهاا ودخلات لحماام دوشات هو لول وحيدات داك لعيا وريحة السبيطار وخرجات دير روتينهاا ورى لحمام.. خدات لوقت حيت كانت عاطية لخاطر وعيانة مع النعااس مكانتش تاتنعسو مزيان ولكن ماعليش كلشي على قبل بنتها يهون.. لبسات واحد عباية طويلة خفيفة فوق الشورط ودباردور واخا لبرد ولكن هي صهدات.. لاحت زيفها وخرجات من لجناح غادة تنزل لتحت.. ومع وصلات لدروج تحل باب الرياض ودخل زين العابدين لي غير شافتو رحيل وهي تكمش حجبانها وبقات مراقبااه وهو داخل لابس قبية وسروال توني فلكحل وداير لقب دلقبية على راسو ومهبط وجهو.. قربات جهتو وكانت ناوية تدوي معاه وتعطيه واحد زوج كلمات ولكن غير هز وجهو وهي تخرج عينيها فاش شافت وجهو عبارة على خريييطة.. عينو منفوووخة ولداخل ديالها حمر بحاااال الاطرطق فيها شي عرق بالدم لدرجة لون لبؤبؤ كيبان غاامق وداير فاصمة على نيفو لي تيبان مجروح وحنكو تاهو زرااق ليه.. أما شفتو جنبهاا كيبان دم ياابس وفيها طبعة بدات تاهي تزااق لحاصول وجهو حالتوو وفاش خرج يديه من جيب لقبية بانت ليها فاصمة مضورة على يديه كلهااا.. وقف قدامها وتاهي حبسات مشيتها وقبل ماتهضر سمعات صوتو لي قال بهدوء:مكنتش قاصد نضربها سمحيليا

قالها وحدر راسو ومشى طالع لبيتو وهي تبعاتو بشوفتها مشيتو كانت تقيلة بزاااف.. ماعرفاتش مالو ولكن وجهو وحالتو خلاتها يبقا فيهاا.. تنهدات وكملات لداخل بينما هو كمل لجناحو وغير دخل وهو يزول لقبية تابقا بصوفيطمة سميطات وتما بانت لخريطة فداتو لي تاهي فيها طبايع ديال الدق لي دم مزرق فبهوم.. مشى نيشان لفوق النموسية ونعس وهو كينهج.. هاد الثلتيام لي دوز كانت أقصح تلتيام فحياتو شاف فيها لعداب واحد التدريب دارهم معاه لكوتش ديالو ودوز واحد لكومبة مع كوتش آخر لي تكرفص عليه بالعربية تاعرابت كان تيفيق مع الخمسة دصباح وست خصو يكون فلصال ومكيسالي تال طناش يادوب كيرتاح شوية وياكل ويزيد يكمل تدريبات لي عارف بلي باه هو لوسيط وهاد العقااب لي دار ليه باش يوريه كيفااش تيكون شعورك فاش تايحگر عليك لواحد كيفما هو حگر على سيدرا تالكوتش حگر عليه هوو..

دازت ديك لعراضة زوينة وسيدرا مبقاتش بزاف وطلعاتها رحيل لبيتها باش تاخد دواها وتنعس ترتاح حيت باقي عيانة.. أما نوح غير تغداو ومشاو نسابو ناض خرج تاهو حيت عندو شغلاتو.. ورحيل جلسات شوية مع رحمة وزاينة وموراها مشات تنعس..

وقف نوح طوموبيل ديالو قدام المحال درحيل ونزل دخل.. لقى عثمان واقف مع ربعة دلبنات تايوريهوم كيفاش يستفو السلعة لي جات من الديوانة والسلعة لي جابو من لوزين عند السيد لي كيعرفو نوح ولي كلفو باش يخيط ليه داك التصميمات لي عطاتو رحيل منهوم هادوك لي رسمات ومنهوم شكيلات كانت شافتهوم فتلفون.. كانو تاشي دراري جابهوم من لمحاال ديالو مع مولفين التستاف ولبيع والشراا بدعو فالتستاف وقادو لمانكاانات لي شرا ليها ولعلاقات وأي حاجة لي يحتاجوها باش السلعة تستف.. ضرب ضورة شاملة على لمحاال وأي حاجة بانت ليه ماشي هي هاديك تيقولها لدراري باش يقادوهاا.. أما لبنات فكان عثمان تيوريهوم تاهو يستفو وكيفاش يخدمو حيت هادو لي غادي يبداو مع رحيل حاليا وديك الساعة لابغات تزيد لبنات تزيدهوم المهم جاب بنات لي كبابل وباغيين الخدمة وعارفهوم غايعطيو فالخدمة وغايبيعو باحترافية..

عثمان:(شاف فيه)أمضرا كيف جااك لمحاال ناضي

نوح:مزيان هو هداك سير شوف ياكما خاصهوم شي حاجة

عثمان:كون هاني اولد لحاج

خرج لطوموبيلتو هز واحد الصويك صغير دايرو فالكراسى لور ورجع نوح جهة لاكيسات لي كانو جهة لباب.. وقف فبلاصتو وحل لاكيس بالساروت وهو يلقاه خاوي.. حل داك الصاك وهز واحد لبريكة زرقة حسبهاا وستفها فلاكيس وهز بريكة خرى قرفية (مية درهم) وتاهي ستفها فجهتها ونفس الشي دار مع الخمسين درهم والعشرين والصرف.. قاد لاكيس لولاني وداز لثاني تاهو قادو وستفو كلشي هو هاداك وتالكاميرات لي داير ليها خدامين.. مشى هز واحد للبياسة ديجا قادو ليها تيكي ديالها ودوزها فلاكيس تيجرب واش خدامة ديك الماشين ديال التيكي وهو يلاقى داكشي ناضي.. أصلا السيد لي مولف تيخدم معاه فلمحالات هو لي جاب ومن طبعو مكيبدلش الناس لي تيخدمو معاه.. ريگلى الأمور تم وخرج مخلي عثمان يكمل ويخلص لدراري ولبنات لي خدمو.. وهو رجع لدار حيت باش يبدل عليه حيت ولد عمو عارض على رجال وهو معاهوم.. واخا اعتادر ليه بلي مغايجيش ولكن أصر عليه ومبغاش يحشمو..

وصل لرياض ونيشان مشى لجناحو يبدل عليه.. بانت ليه رحيل ناعسة دخل بلاحس باش مايفيقهاش خدا دوش سريع وخرج يلبس عليه.. بدات تاتحل عينيها فاش سمعات الحس وحكاتهوم وشافت فالساعة لقاتها تسعود.. مشات لحمام غسلات وجهها وخرجات لقات نوح واقف قدام لمرايا تايمشط شعرو.. رش ريحتو ودوز يديه على لحيتو وضار شاف فيها..

نوح:(بهدوء)بلاماتسناوني لعشا عارض عليا ولد عمي

رحيل:(بنفس الهدوء)واخا غاتعطل؟

نوح:على حساب

هز مسائلو لي محطوطة فوق الطبلة وخرج مخليها تاتنهد وتخمم.. مشات لشرجم تاطل عليه بان ليها ركب طوموبيلتو ومشى..وهي رجعات جلسات فوق نموسيتها تاتفكر فالمشكيل لي طرا بينها وبينو.. حاسة براسها تالفة ومعرفااش شنو دير باغا مع من تهضر ولكن شكون؟ أسماء هي يالاه تزوجات وزيد غاتكون شدات طريق ليوم حيت سافرات هي وراجلها.. هي لوحيدة لي تاتقدر رحيل تعاود ليها وعارفة أنها غاتعطيها حل لي يعاونهاا.. فكرات مزيان وفالأخير خلات ليها مساج 📩 مسالية؟؟

**

الصواني دأتاي محطوطين فالمجمع وصوت هضرة الرجال والضحك ديالهوم كيتسمع ملين وملين.. گاع رجال السليماني تجمعو عند ولد سليمان عمو لي عارض عليهوم لعشا.. جالس نوح وسطهوم وهوما مجمعين على لبلاد والخدمة ويهضرو هنا ولهيه لمهم مساكتينش.. وبعض المرات يشدو فشي واحد والحوار كولو بالشلحة قليل فين تايهضر شي واحد بلعربية حيت أصلا أصلهوم هاداك ومعتارفين بيه..

تحط ليهوم لعشا وتعشاو كاملين موراها جابو تاني صينية دأتاي كيف مولفين مورة لماكلة والفاكية محطوطة فوق الطبلة..

خرج نوح من لحمام كيمسح يديه بلفوطة وتلاقى مع عادل ولد عمو جاي جهتو ونطق بنبرة حاقدة:قالو ليا شريتي شي أرض مبروك

نوح:(بهدوء)الله يحفظك

عادل:(بحسد واضح من كلامو)صراحة ديما كانسول فين تاتجيب هاد لفلوس اولد لعم حيت التجارة مكافيااش

نوح:(ببرود)لاخدمتي عقلك فالتجارة غاتربح لملاير ماشي غير لملاين اولد لعم

عادل:(بسخرية)ولا واقيلة غايكون رزق جدي هو لي تاتمشي بيه راسك داكشي علاش ديما غادي وراه

نوح:(ماعندوش لخاطر دالمعاطية معاه وهو عارفو من ديما حاسدو وماشي غير هو حاسد گاع ولاد لعائلة لي نجحو فحياتهوم وفاتوه.. حك لحيتو) الانتا كنتي تاتشوف لبلان هاكا مغانجاحتكش حيت آخر حاجة تتهمني هي نتا شنو كاتشوف عليا وشنو فاهم

تخطاه باش يمشي وهو ينطق عادل بصوت ساخر ونبرة دات معنى:اوا كلشي نتوقعو منك أولد لحاج ماشي جديدة عليك باركة غير داك ولد لحر.ام لي مدخلو لعائلتنا وخليتيه يهز دمناا لي وسختوه..

ملي خرج نوح وهي جالسة فالبيت غير تاتفكر فالنقاش لي وقع بناتهوم آخر مرة.. وكتحاول تسترجع الكلام لي قالت باش تعرف راسها واش غلطات فحقو ولا لا.. تقليقتو لي لاحظاتها من داك النهار مخفاتش عليها.. تاهي مقلقة منو بزاف حيت خبى عليها وجا فصف ولدو.. صونى تلفونها لي خرجها من عمق تفكيرها وكانت أسماء هي لي تاتعيط ليهاا..

رحيل:(جاوباتها بهدوء)ألو ياكما ناعسة

أسماء:نو باقي فطريق يالاه وقفنا فواحد الاستراحة ناكلو ونرتاحو شوية

رحيل: مزيان الله يوصلكوم على خير

أسماء:مالك صوتك معجبنيش وأصلا هاد الأيام كلها حسيت بيك ماشي تال تم شواقع معاك؟

رحيل:اووف قولي شنو لي مواقعش تت ماعرفت ملي نبدا ليك صراحة

أسماء:(بجدية)بداي من لول باش نفهم

بدات تتعاود ليها رحيل شي لي طرا بينها وبين نوح وداك النقاش لي ناقشوه ومانقصات ولازادت تاحرف وختمات كلامها بشوفتها لزين العابدين واعتدارو ليها..

رحيل:(حكات جبهتها)دابا نتي عارفة كلشي قولي ليا واش أنا غالطة؟؟

أسماء:هو مقالش علاش ضربهاا وزايدون علاش يمد يديه عليهاا بديك الهمجية اوو واش يديه شايطين عليه

رحيل:مقالش هو ولكن سيدرا قالت ليا شنو طرا وبلي كانت تاتفرج وهو بدل ليها التلفازة وملي قالت ليه يرجعها مارجعهاش وناضت الالة تجيب حقها بيديها وفاش معبرهاش ناضت لبرهوشة عضاه فيديه ودفلات عليه وقالت ليه حمار وهو ضربها

كانت سيدرا ديجا عاودات لرحيل كلشي وماخبات عليها والو وهي من طبعها واخا تادير لفعايل مكتكدبش تاتقول لي كااين..

أسماء:تت مشاكيل تابنتك متتهداش اش داها تعضو تمشي عندك تقولها ليك ولاطلع لييتها تفرج وتاهو مدار فيها مايصلاح واش اعبادالله الرياض كولو فيه تلفازة وحدة بانت ليه غير هاديك تت هاد زوج راه خص لي يعطي لباباهوم لعصاا على هاد لفعاايل لي نوضو مشكيل بينك وبين راجلك

رحيل:(تنهدات) نتي عارفة سيدرا كادير لي قال ليها راسها ولعناد تاتعطيه صلية

أسماء:نساي عليا سيدرا وزين العابدين دابا ونجيو لموضوعك نتي وراجلك صراحة ارحييل داكشي لي عاودتي لياا ولهضرة لي قلتي من حقك تقوليها نتي أم كبدتك تشوات ولمنظر لي لقيتي فيه بنتك الصغيرة راه يخلي عقلك يطير من بلاصتو وغير أنا فاش شغتها قلبي تزعزع والبكية جاتني عسااك نتي لي ماماهاا ولكن هادشي مكيعنيش بلي راكي مغالطاااش

رحيل:(تقدات فجلستها)غالطة فاياااش حيت بغيت نجيب حق بنتي؟؟

أسماء:لا (بجدية)سمعي ارحيل كلنا شايفين تصرفات ولد لحاج مع بنتك وكيفاش عاطيها لخاطر وكيبغيها قبل گاعما تزوجو فيما يجي يجيب ليها كادو وتاهي ولات تاتبغيه حيت قدر يكسبها بحنيتو ليهاا عقلتي نهار جاب ليها سنسلة كادو ونهار لي تقتلات القطة ديالها وشافتها قدام عينيها كيف كانت حالتها هو شنو دار مشى جاب ليها قطة تاتشبه ليها وتامن السنسلة لي كانت تاديرها إيڤانا دارها ليها باش ماتشكش وخلاها ظن بلي هاديك القطة ماشي ديالها حيت مبغاش نفسيتها تزعزع واش كاين شي واحد فينا لي فكر يدير داك لجيست لا بصح كنا غانجيبو قطة ليها ولكن مكناش غانفكرو بديك الطريقة لي فكر فيها هو وهادشي غايخليك تعرفي بلي هو سبق نفسية البنت وراحتها.. وزيدي نهار مرضات سيدرا وضراتها ضرستها شفتيه كيفاش سهر معاهاا واش كاتجيه شي حاجة باش يسهر معاها بنتوو لا يعني هنا غاتشوفي بلي داك السيد كانت تيعطي الحنية والحب لبنتك بدون مقابل ومنساوش نهار جاب ليها فلكادو ديالها دااك المهر الصغير عرفتي شحال ساوي ديال الثمااان كاين لي غايخسرو على شي برهووش موالدوش لا (تنهدات) هادو غير حوايح بساط أنا حضرت ليهوم بلامانساو لحوايح لي نتي تاتشوفيهوم يوميا ولي متأكدة كتفكيرهوم دابا واحد مور واحد ارحيل.. هو نهار تزوج بيك دار بنتك بنتو وحنا عارفين بلي قليل فين غاتلقاااي راجل لمرا لي يبغي ولادها ويعاملهوم بحال ولادو ومايفرقش بيناتهوم دابا راه ولينا كانسمعو شي حوايج راه كيصدموك شي راجل طامع فربيبتو ولاقاااتلها وبزاف دلمصااايب.. هادشي لي قلت دابا باش نوضح ليك غلطك فداكشي لي عاودتي ليا ولي خلاتي نلاحظ بلي بقيتي تتأنسيسطي على كلمة بنتي أو ولدك بزااف يقدر ديك الساعة جاتك عادية حيت كنتي معصبة ولكن ارحيل راه غلطتي فيها بزااف ملي هو كيهضر معاك فشي موضوع متعلق بسيدرا واش هو عمرو قال ليك بنتك لا حيت كون كانت نتي أول وحدة مغايعجبكش حاال وغادي تقلقي من هضرتو لي نطق بيها.. غانسولك سؤال ارحيل وجاوبيني بصراحة واش ولد لحاج عمرو هضر ليك على ولدو وقال ليك مثلا حاولي معاه وعامليه مزيان وحني فيه؟

رحيل:لا

أسماء:هااا لي قلنا يعني هو مارغمش عليك ولدو بلعكس عمرو بززو عليك حيت بالنسبة ليه نتي مرتو ماشي مربية ولاخدامة لولدو واخا هو كبير ماشاء الله ولكن راه الابغا يقول ليك عامليه مزيان وماديريش ليه وماتفعليش ليه من حقوو كيفما نتي من حقك تهضري على بنتك.. شوفي ارحيل هاد لهضرة لي قلت ليك ناتجة من لكلام لي عاودتي ليا نتي..

أسماء: هضرتو فاش سمعتها لقيتها منطقية مية فلمية مبغاش يقولها ليك حيت حالتك مكتسمحش ومتافقة معاه ولكن حيت نتي كنتي معصبة قلتي سكت على قبل ولدو ومن حقك تفكري هاكا عوتاني يعني هنا لاجينا نشوفو من الجهات بزوج كلكوم عندكوم لحق.. فهضرتكوم هو وضح ليك ونتي هضرتي على حق بنتك ولكن كيف قلت لهضرة لي ممتافقاش عليها هي ديك بنتي أو ولدك بينتي ليه بحال لا هو مكيعني والو لسيدرا كيفما نتي مكتعني والو لزين العابدين..

رحيل:(نطقات بسرعة وبتبرير) لا لا ماقصدتش هاكا اأسماء

أسماء:ولكن هو غايسحاب ليه قصدتي هاكا شفتي شنو بغيت نوصل ليك بلي بعض المرات فاش كانكونو معصبين الهضرة تاتخرج مدربزة ونتي ارحيل فاش تتعصبي مكتعرفيش اش تاتقولي وماشي غير نتي تاأناا بحالك ومن بعد كانبقااو جالسين وتانتفكرو ماقلنا وتانحسو بالندامة.. راه لهضرة بحال الدفلة لاخرجات مكترجعش وديك الكلمة لي قلتي كوني متأكدة ماعجباااتوش ومن حقو حيت تانتي مغاتعجبكش كون قالها ليك

رحيل:(حكات حاجبها)ملي سمعت ديك لهضرة تعصبت اأسماء فاش شفت بنتي فديك الحالة وعرفت شنو سبابها حسيت بالعافية شاعلة فيا وخصوصا ملي كنا تاندويو هو كان مكالمي وأنا تعصبت كثر

أسماء:(ضحكات)ههه وشنو تاهو يتعصب راه لاتعصبتو بزوج مشاكيل شوفي غير أنا وإسلام قبل فاش كنا كنتجادلو بزوج كانكونو شاعلين عقلتي اش طرا صرفقني الله يعطيه الهرس مغانساهاش ليه ههه

رحيل:(تكات بتعب على لكادر دالنموسية)لهلا يوريك نوح فاش كيتعصب راه تيتسيف وكيخلعني

أسماء:هادشي علاش هو برد ماشي حيت لموضوع مهموش إنما حيت هو عارف راسو لاتعصب غايدير شي حاجة ولايقول ليك شي كلام قاااصح وسير عوتاني شكون يفكهاا (بتدكير)قلتي لياا بلي اعتادر منك زين العابدين مزيان ملي عرف لغلط ديالو بعدا

رحيل:كون شفتي وجهو كيف كان تت ماعرفت اش طاري معاااه داك لولد كيجيني فشكل ماعرفتش مكنقدرش نزعم عليه اأسماء واخا نبغي داك نهار مشيت لبيتو سد عليا لباب ماعبرنيش گاع

أسماء: ديما كانبغي نسول وكانحشم ماماه فين هي؟؟

رحيل:(نطقات بتفكير)ماعرفتش عمري سولت عليها صراحة

أسماء:اويلي على عمرك سولتي واااش تادوي من نيتك؟

رحيل:عمر الموضوع ماتجبد وتاأنا مازعمتش نسول نوح

أسماء: ولكن من حقك تعرفي واش مو ميتة ولاعايشة وشكون هي؟

رحيل:عمر سيرتها تجبدات لاعلى فم نوح ولاتاولدو وتاهنا فالرياض معمرهوم هضرو عليها

أسماء:عجب صراحة (نطقات بسرعة)نخليك دابا إسلام كيعيط ليا نتعشاو من بعد ونكملو واخا

رحيل:شكرا بزاف اأسماء كنت محتاجة صراحة مع من ندوي ونعاود ليه ومالقيت من غيرك

أسماء:نحن فالخدمة المهم تاتسيفطي ليا ثمن ديال الحصة فالكونط ديالي هههه سيري تلاحي باااي

قطعات معاها رحيل وهي مرتاحة شوية حيت خوات داكشي لي كانت هازة فالداخل ديالها ونيت هضرة أسماء خلاتها تشوف تاني الموضوع من منظور آخر لي خلاها تحل عينيها على غلط مكانتش غاتعيق بيه.. غلط لي خلاها تفهم وتعرف حجمو باش تصححو.. بصح لمشكيل ناض مابين ولادهوم ولكن هادشي مكيعنيش بلي رحيل غاتعطي لفرصة لديك الفجوة تكبر بينها وبينو.. خص ضروري يهضرو بزوج ويوضحو سوء التفاهم لي بيناتهوم..

ماشي أول مرة عادل يلوح ليه شي هضرة لي تعصبو ولايبين سمو ولحسد لي فيه.. مولف فكل مرة يتجمعو يبينو ليه سوى قدام العائلة سوى بناتهوم.. العائلة ولاو عارفين كراكطير عادل وأغلبية ديال ولاد العائلة مگرفين منو بسباب فعايلو وداك لحسد.. كلشي عندو خيرو وكلشي خدام وتاعادل راه بخدمتو ولكن معارفش كيفااش يطور من راسو وفيما يسمع شي واحد تزادت عندو شي حاجة تجيه لغيرة.. كيف طرا ليه نهار ساق لخبار بلي نوح شرى محال جديد وعمرو وموراها شرى الأرض تاهي وقال مع راسو هذا ملين كيجيب لفلووس ناسي بلي التجارة راه بحر ولي عندو لعقل وعارف كيفاش يستثمر فيها راه غايدير لبااس من وراها كيف داير نوح لي فيما يسمع بشي هوتة يغامر ويخدم عقلو تاربي يسر ليه.. وعادل مباغيش هادشي مباغي حد يكون حسن منو باغي هوو لي يكون ديما لفوق..

نطق بهضرتو المسمومة وهو عارف بلي ضرب نوح فالصميم وبقا واقف تيتبسم بسخرية ويتشفى فيه.. أما نوح فمكانش عندو لونڤي دلهضرة معاه هاد النهار وكان باغي غير يصدرو لكن غير سمع هضرتو داك لبرود لي كان لابسو تبخر وديك الرزانة لي معروف بيها نوح مشات فمهب الريح مع كلام عادل لي كان كيف لفتيلة شعلوو من لداخل وخلى أعصابو كلها تغلي.. ضار بالجهد جهتو وشنق عليه ودفعو لحيط لي وراااه وهو باقي شانق عليه وعينيه خارجين من بلاصتهوم حمرين ولعروقة لي فجنب جبهتو تنفخوو وبانو تيزدحوو.. ملامحو الهادية والباردة تحولات لملامح همجية تاتخلع..

نوح:(نطق بصوت خشن قااصح) شكون نتا القواااد لي تهضر على ولدي وتجبدو بفمك المووووسخ

عادل:(كيتقاتل معااه حيت خنقو ونطق باستفزاز)مالي كدبت قلت لي كااين وأنا ونتا عارف هادشي اولد لحاج

نوح:(صدرو كيطلع وينزل وبصوت كالفحيح قال) أناا غانوريك لي كاااين القواااد (زدح ليه راسو مع الحيط)ولدي خط حمرررر القوااااد

دخل فيه براسو تارجع لاخر لور ضارب راسو مع الحيط ونيفو تفرگع بالدم.. هز بوكس وعطاه لوجه وزادو الثاني والتالت ومع صوت غوات عادل جااو رجال العائلة ولقاو داك المنظر لي خلاهوم يتصدمو حيت بصح عمرهوم كانو يتخيلو غايجي نهار لي يشوفو نوح فهاد المنظر.. اه عارفينو الله يعمر ليه الدار وفاش ماحتاجيتيه تلقااه عمرو يخوي بيك ولكن فنفس الوقت خاايب بزاف الاجبتيه غاتشوف لوجه الثاني لي گاع لعائلة كيتفاداوه..

قربو رجال العائلة باش يفرقوهوم وجرو نوح لي كان تينهج بحال شي ثور والعرق نازل على جبهتو وجهو حمر وعينيه بحال الجمر..

طلقو نوح وتحدرو يشوف عادل لي تيجمع الوقفة مراضيش بشنو طرا.. أما نوح زول داك الجاكيط لاحها بالنثرة الأرض وحل صدايف لفوقانين ديال القاميجة نااوي ليه على الشر... وهوما عند بالهوم راه صافي فكوهوم ومعارفينش بلي غير تيوجد ليه راسو باااش يوريه ديك لكلمة بشحال تتقام..

لحاج لحسن:(تايهضر بجدية)اش هادشي تاديرو نعلو الشيطاان اولادي راكوم ولاد لعمام وخووت

عادل:(نطق بحقد)شيطان هو حفيدك لي عاطيه حقناا ومخليه يدير فيه مابغا ويعيطه لولاد لحراااام وحنااا ساكتين لاكنتووو نتومااا خايفين منووو أناا مخااايفش هوو يدير مابغااا مكاااين لي يجبد سيرتو فالعائلة وحنااا لابغينا نديرو شي حاااجة تگولو ليناا حشومة والعائلة وااااش هو فكر فالعائلة نهار جاااب داك ولد لحراااام ودخلو لعائلتناااا..

فهاد اللحظة ماعرفوش كيف دار نوح تاوصل ليه بقوة ماغفلهوم واخا واقفين قدامو.. وصل ليه وضربو بركلة لكرشو تازواه ولاخر طاح الأرض مخرج عينيه بحر الدقة لي كلى فجنبو بصباط نوح القاصح.. نزل لجهتو وشدو تايعطيه هادي تنفع هادي ضر وجدو تايجر فيه ويرغبو ومعاه عمو تاهو وتقول واش سمع ليهوم تصمكو ودنيه وبدات تتعاود ليه غير ديك ولد لحراااام لي قال عادل ولي كانت بحال ليصونص تاتزيد فالعافية وتاتشعلو لداخل.. يدوز ليه كلشي ولكن هادي والله لادوزها ليه واخا يعرف يدخل عليها لحب.س.. رجال لعائلة راه تايبغيو يجرو فيه وهو ميت عليه خصوصا فاش شنق ليه على عنقو وخلاه حمر تايشهق وحال فمووو.. والرجال كيجبدو فيه كاملين وتاحد ماقدر يفكوو حيت بصح يديه ميتين عليه ديال لمعقوول..

لحاج لحسن:(تابغوووت)ووولد لحااااج نعل الشيطااان راه غاتقتلووو وغاضيييع راااسك اولدي (تايغوت لحفايدو لخرين) واااعتقوووه اش كاتسناوو

نوح:(نطق بصوت قاااصح تايخلع وعينو فوجه عادل) عااااطيك التساااااع القواااااد واخاا فعااايل لقح*اااب لي تااادير مخليك ونتااا حااالف ماااتوب اليوووووم غاااانتوبك وغااانورريك كيفاااش تحل فمك المووسخ على ولدي..

عينين عادل تقلبو وبقا تيبان فيهوم غير داااك البياااض ديالهوم وفمو محلول كامل أما لون وجهو رجع حمر مااايل لزروقية.. ونووح عينوو ظلاموو مبقااش عارف اش كيدير ومحااسش براااسو وبلي روووح عاادل قريب تزهق بين يديه..

لغوات ديال جدوو لي كان محني تايزول ليه يديه وهضرة عمو ورجال لعائلة مكانش تيسمعهاا.. صافي لبصيرة ديالو تعمات وهو فاش كيتعصب كيولي خايب ويقدر يطييح الرووح بلامايشعر.. واخا عينو على عادل لي قريب روحو تزهق الاأنه ماهتمش ليه حيت الكلام دعادل شعلو وخلاه يفقد أعصابو.. أما جدو صافي السكاار قريب يطيح ليه كولو تيترعد وهو كيشوف الروح لي قربات طيح ليهوم وتاحد ماقدر يفكهوم حيت نوح يديه ماتت على عنق عادل.. تايشوف زوج من حفايدو غايخسرهوم واحد غايمشي لقببر والثاني غايمشي لحبببس وهو يستحيل يخلي هادشي يوقع.. طاح على ركابيه جنبهوم وهز يدو تال سماا عطااها لنوح فوجهو وزادو الثانية والثالتة وبدا كيضرب فيه تاأخيرا نوح طلق عادل لي مجرد ماتحرر وهو يشهق واحد الشهقة مجهدة.. عينيه خارجين وفمو محلول تايشهق بيه ويتنفس ممتيقش بلي على بونت كان غايمشي فيها.. أما لحاج لحسن حط راسو على كتف نوح لي فديك الساعة ترفع بقا غير تيشوف قدامو ويديه بزوج كيترعدوو عليه.. الأصوات دالرجال كانت تاتجيه غارقة وصوت جدو لي كيعاتبو ولي حاط راسو على كتفو مكانش تيوصلوو.. كان تيسمع غير داك طنين المزعج فودنيه.. هز لحاج لحسن راسو وشاف فيه بنظرة خوف وصرامة فنفس الوقت:واش كنتي باغي ضييع رااسك واش مافككرتيش فمراتك ومك وخوتك أو ولادك هاا (ضور ليه وجهو وشدو بيديه ونطق بغصة فحلقو)مشى خوووك ومشى باااك واش بغيتي تانتا تبعهوووم وتخلي فقلبي كية اولد لحاج

نوح:(قرب جهة جبهة جدو باسها ونطق بصوت غارق يادوب كيتسمع)سمح ليا الحاج

ناض من بلاصتو ماتسوق لتاشي واحد واخا تيهضرو معاه ويسولو فيه إلا أنه ماعبر تاشي واحد من غير جدو.. هز جاكيط وخرج من تم وهو منادمش على داكشي لي دار بلعكس لو تكرر الأمر معاه مرة خرى يديرها ويفوتها لهيه حيت عادل لي قلب عليها وهو لي جبد عليه المشاكيل..خرج لبرا والشتا كانت تاتطيح مجهدة سرداتو كامل والبرد كيدخل مع لعضام وهو تقول واش حس حيت داك العافية لي فداخل خلات داتو تسخن عليه.. حل لباب دطوموبيل وجلس بلامايدماري.. كان تيشوف فيديه ليسرية لي باقي تاترعد عليه مبغاتش تزگاا.. خدا جاكيط وبدا تيقلب فيها بالنثرة وجبد باكية دلگارو لي عندو وجر واحد دارو ففمو وبدا تيكميه ويدخل لصدرو داك الدخاان..كمى داك الگارو عاد حرك طوموبيل راجع لرياض بهدوء عكس الصداع والروينة لي نايضة فلداخل ديالو.. الطريق كانت خاوية وحس لبشار مكاينش كلشي مخشي فدارو ومدفي بفراشو.. كانت الثلاتة ديال الليل والشتا محابسااش... وصل لحومة ودخل مسكت طوموبيل قدام باب الرياض نزل هاز جاكيط وحل لباب داخل بخطوات تقال وشد طريقو نيشان لجناح ولدو.. حل لباب ودخل وعينو تيقلبو عليه بان ليه ناعس فوق النموسية ومغطي بلكاشة.. ليوم مشافوش نهائيا وعرف خبارو غير من لكوتش ديالو.. وقف قدامو وعينو تيجوبو فدوك الضرابي لي كانو على وجهو.. جلس نوح قفازي وعينيه حمرين وباين فيهوم العيا واخا هاكا كانو تيلمعو بواحد الحنية ضاهرة عليهوم.. مد يدو وغير حطها على وجهو وهو يكمش حجبانو فاش حس بديك الحرارة لي جايا من وجهو.. مد يدو تايقيس حناكو وعنقو ولقى السيد كيفور بالسخاانة.. زول عليه الكاشة بزربة وحط يديه على حنكو ونطق بصوت هادئ حنين:زين العابدين ولددي نوووض ابابا يالااه

حل زين العابدين عينو بتعب هاديك لي منفوخة تسدات ليه بمرة ولخرى تاتبان حمرة... عاونو نوح تاجلس وزول ليه ديك القبية لي لابس وبانو ليه دوك الضرابي لي خلاوه يكمش حجبانو.. هو عارف سبابهوم ولكن واخا هاكاكا ماحملش يشوفهوم.. كان زين العابدين كولو تيقطر بالعرق بدل ليه نوح لقبية بوحدة خرى ونوضو تاوقف وسندو عليه غادي بيه لكلينيك حيت من شوفتو كيبان مريض وزيد السخانة لي طالعة ليه.. كانو خارجين من البيت ونوح غادي معاه بشوية حيت لايح عليه التقل وكيجر رجليه وداتو كلها كاضرو..

فالجناح درحيل لي كانت باقي فايقة تاتسنى نوح يرجع..كان سبق وخدات حمام خفيفة وبدلات حوايجها ببيجامة دافية شوية... سمعات لحس برا وهي تكمش حجبانها ولاحت عليها فولار وبنوار مستور عاد مشات تشوف شكاين ومع حلات لباب بان ليها نوح منزل زين العابدين فالدروج.. قربات جهتهوم بزربة ونطقات بصوت متسائل:مااالو؟

نوح:(مشافش فيها وبهدوء قال) غانديه لسبيطار غير رجعي لبيتك

رحيل:(عينيها على زين لي كيبان ليها بصح عياان) بلاتي غانمشي معاك تسنى نلوح علياا عباااية ونجي

نوح:(بنبرة باردة نطق)مكاين لاش أناا غاندي ولدي بوحدي نتي غير بقااي هنا لاتفيق سيدرا وتحتاجك..

وقفات فالدرجة كاتشوف فيه نازل ومعاون زين العابدن وكلمة ولدي تاتعاود ليها فالدماغ مخلياها تفهم بلي هو هاز من جهتها لدرجة الشوفة مشاافهاش فيها.. وهادشي غير ماخلى كلام أسماء يتعاود فدماغهاا وتأكد من شكوكها.. حركات راسها وطلعات بزربة لفوق لاحت عليها عباية بزربة ومشات لبيت بيسان تاتجري دقات عليها مفيقاها فعز نعاسها..حلات عليها وهي تاتفوه ولعينين مسدودين..

بيسان:رحيل مالكي شواقع

رحيل:(بزربة)ردي معاك لبال لسيدرا أنا خارجة

بيسان:(توكضات)هاااء خارجة بوحدك

متسناتهااش رحيل كانت غادة تاتجري فلكولوار باش تلحق عليهوم وبيسان واقفة تاتشوف فيها مفاهمة والو.. من زهرها لقاتو يالاه تايقادو فلكراسى لور.. كان لبرد مع الرياض سخون وغير خرجات وهي ترعد فبلاصتها.. حلات لباب لقدامي وجلسات ونوح معاودش هضر معاها.. قاد ولدو لور ورجع شد بلاصتو غادي لكلينيك ورحيل مكمشة حجبانها من ريحة لگارو لي خنقاتهاا.. ضارت جهة زين العابدين وبان ليها مرجع راسو لور وحال فمو كيتنفس منو وتايتسمع صوت نيفو لي مخنوق..

رحيل:(شافت فنوح)واش ضربو لبررد؟

نوح:(بنفس النبرة الباردة)ماعرفتش

سكتات رحيل وماحكراتش عليه وتاهو مافيه لي يهضر فهاد الساعة.. هز عينو تايشوف فالمرايا زين لي كان على نعستوو تايطلع النفس غير بزز.. وصلو لكلينيك ونزل مخلي الكونطاكط باقي فالطوموبيل ماحيدهومش حدو سكتها.. حل عليه لباب وعاونو تاني مسندو عليه ودخلو ورحيل سدات طوموبيل وتبعاتهوم بزربة وغير دخلوه وبقاو بزوج بيهوم راس فالراس.. وقف نوح جنب الحيط تكى عليه وحط راسو عليه ورحيل تاتشوف فيه وفحالتو.. كانت لاشوميز لي لابس ساردة عليه وبدات تنشف وشعرو مخربق هو ولحيتو لي فيما يضور يبقا يحك فيهاا.. عينيه حمرين وباين فيه ماشي على برجوو..شي حاجة طارية ليه معرفاتش اش هي؟ نزلات عينيها ليديه بانو ليها مجروحين جهة لعضمات وهي تكمش حجبانهاا كتأكد من شنو كاتشوف..

رحيل:(قربات جهتو وشدات يديه تاشاف فيها وقالت)مالك فيديك؟

نوح:(بهدوء جاوبها بعد مازول يديه)ماواقع والو ماتخمميش

رحيل:(شافت فيه وقالت بتأنيب)علاش كاتهضر معايا هاكا؟

نوح:(شاف فيها مزيان وقال) كيفاش هاكا؟؟

رحيل:(تاتشرح بيديها وعينيها عليه)تادوي معايا بالبارد محاملش تشوف فوجهي ومعصب مني

نوح:(مسح على وجهو)غير كيبان ليك وصاف

رحيل:(بإصرار)لامكيبانش حيت هادشي بصح كاين نتا مقلق مني على لكلام لي قلتو ليك داك النهار أنا عارفة راسي غلطت ملي تعصبت ولكن خصك تفهمني انوح فاش شفت سيدرا فديك الحالة وعرفت شكون سبابها تعصبت وكنظن أي أم كون كانت بلاصتي غادير نفس ردة الفعل لي درت

نوح:(لعب بلسانو ففمو مافيه لي يتجادل معاهاا حيت بصح فهاد الساعة محاملش راسو ولخاطر لي يهضر ويشرح بيه مكاينش) ماقلتي عييب حقك هذاك وأنا ماقلت ليك والو دابا ارحييل (رجع حط راسو على لحيط)سيري ريحي لهيه ماتبقايش واقفة

رحيل:(حسات بخيبة أمل من جوابو) مبقيتيش حامل تهضر معايا

نوح:(شاف فيها بنفاد صبر وقال بحدة)رحييل بدلي الساعة بخرى الله يرحم بيها الواليدين ملي نكوون مهني فمخي ديك الساعة نهضرو بالخاطر ونكونو بوحدنا ماشي قدام لعباد لي داز يدي خبارنااا...

مجاوباتوش خلاتو ومشات جلسات فالكراسى وهي تاترعد رجليها محملاتش طريقتو معاها فالهضرة.. مولفة فيه يسمع ليها ويعطي لخااطر ويتناقش معاها وعمرو ماقمعهاا.. ودابا جاها فشكل ومعرفاش هو أصلا باش كيحس دابا وبلي قبل شوية كاان غايقتللل روح غير بالأعصااب ومعرفااش بلي دابا باغي شي حاجة فين يزيد يخوي عصبيتو حيت باقي مااابرد على عااادل.. وزيد ولدو مريض وحالتو لي وصل ليها بلامشكيلو مع رحيل راه ميا فالرااس وعقل واحد لي عندو راه كيخمم بيه ورحيل معرفااش هادشي.. هي نيتها باغا تصالحو وتزول سوء تفاهم باش ترجع لمياه لمجاريهاا.. حسات تاني براسها باغا ترد وراسها كيزدح عليها ناضت من بلاصتها غادة لحمام وهي تسمعو نطق بصوت جاد:فين غادة؟

رحيل:(بلاماتشوف فيه)لحمام

خلاتو متبع ليها لعين ومشات لحمام لي كانو فيه شي نسا.. لقات السلام ودخلات تاتغسل وجهها باش تزول ديك الدوخة والخمول لي حسات بيه.. وغير خوى لحمام دخلات ردات تاحسات بمعدتها تاتحك وشللات فمها عاد خرجات راجعة لعندو.. كانت تاتمشى وفجأة حسات برجليها بحال شي بونج تيخواو بيها والهضرة دالناس جاياها بعيدة وممفرزاش.. وقفات متكية على لحيط تاتحل عينيها وتسدهوم وهي تاتشوف الضبابة قدام وقبل ماترمي خطوة خرى كانت طايحة على طولتها فالأرض بالجهد تاتسمعات زدحة ديال لكسدة ديالها فالأرض..

كان باقي على وقفتو كل شوية يشوف فساعتو تابانت ليه طبيبة خارجة من داك شومبر لي دخلو ليها زين العابدين وجايا جهتو ونطقات بهدوء:مكاين لاش تخافو عليه حنا راه خفضنا ليه الحرارة ودرنا ليه سيروم لي يقويه حيت تيبان ليا بلي الجسم ديالو ضعيف (نطقات بتساؤل)واش هو كيتعرض لعنف جسدي حيت فيه دطاش فداتو بزاف

نوح:لا هو كيلعب لكيك بوكسينغ

طبيبة:أبووون سي ساا المهم اسيدي كيف قلت ليك هو ليوم غايبقا عندنا هنا نزيدو نطمنو على صحتو وغانكتب ليه شي ڤيتامينات ياخدهوم فهاد لفترة على مايرجع صحتو

مشات الطبيبة ونوح شاف فساعتو وجهة الكولوار لي مشات منها رحيل عاد دخل عند زين العابدين لي كان ناعس فوق البياص تيبان فوجهو معالم التعب والأرق.. تحدر شد وجهو بين يديه واخا ناعس وباس ليه جبهتو مرات عديدة وتحدر باسو تافحنكو وفراسو..

نوح:(همس ليه بصوت باح حدى ودنيه)هادي ماشي ديالك احفيد الحاج

فالكولوار فين كانت طايحة رحيل لي من زهرها كانو شي ناس دايزين شافوهاا وقربو جهتها باش يعاونوهاا.. سنداتها لمرا عليهاا ومخليها تكى فحظنها اوجهات كلامها لراجلها:سير عيط لفرملية يجيو

الراجل:خليك هناا

مشى تايجري وبقات لمرة جالسة مسندة عليها رحيل وتاضرب بيديها على حنكها بلطف باغا تفيقهاا.. وفنفس الوقت تاتسنى راجلها يجيب شي حد..

ملي طمن نوح على زين العابدين خرج يشوف رحيل لي تعطلات عليه.. غادي فلكولوار ومع قرب بانت ليه شي سيدة جالسة الأرض مسندة عليها شي حد مادققش فاللول وغير رمى الشوفة ولكن مجرد ماعيونو لمحو رجلها لي مفرشة ولبيجامة لي باينة عرفها ومشى بزربة جهتهاا عاقد حجبانو وغير قرب بانت ليه السيدة مغيبة وجهها صفر نوح:(تحدر جهتها وجرها من حظن المرا حاط ليها راسها على صدرو وبصوت خشن نطق سميتها) رحييل (كيطبطب على وجهها وفنفس الوقت تايعيط ليها) رحييل (شاف فالسيدة لي معاها ونطق بحدة) مالها

المرا:كنت غادية أنا وراجلي تابانت لينا طايحة الأرض وسيفطتو يجيب شي فرملية وأنت بقيت معاهاا

حرك راسو وهزها بين يديه كيف الريشة وقبل مايتحرك نطق بصوت جاد:الله يرحم الواليدين الشريفة

تحرك بيها من تما وهي باقي مغيبة ومغاينكرش بلي خلعاتو كانت صحة سلام.. فطريقو تلاقى مع راجل ديك السيدة جاي مع لفرملية وجايبين بياص حطوها فيه وتحركو بيها وهو تابعهاا تادخلوها يفحصوها وبقا على برا شاد راسو بين يديه.. هاد النهار داز عندو كارتي خلاه غير يتنهد ويدعي الله مايكونش عندها شي حاجة گغاڤ.. نص ساعة بالضبط وتحل لباب وخرجات منو الفرملية لي نطقات بهدوء:نتا راجلها

نوح:وي

لانفغميع:تقدر دخل عندها

دخل بزربة لقاها توگضات وجالسة فوق البياص تاتشوف قدامها بسهو تاوقف قدامها وشد وجهها باسها فجبهتها بالجهد ونطق بحنية: باش تتحسي

شافت فيه رحيل بدون ماتقول تاكلمة غير ساهية تاسمع صوت الطبيبة لي قالت بتبسيمة:مكاين لاش تخاف اسيدي الدوخة لي جاتها شي طبيعي فهاد الفترة

نوح:(هز حاجبو) مافهمتش؟

طبيبة:دوخة لي جاتها سبابها لحمل (تبسمات ليه)لمدام حاملة وغاتكون فبداية حملهاا حيت هي براسها محساتش بلحمل هذا مجرد فحص أولي وضروري مايخصكك تديها لعند جنيكو باش تأكدو من صحة لحمل وتعرفو بالضبط شحال عندهاا

ضور نوح عينو جهة رحيل لي شافت فيه ورجع شاف فالطبيب ناطق بهدوء:وهي دابا بخير؟

طبيبة:وي راه بخير وهاد الأمور عادية فلحمل

خرجات طبيبة مخلياهوم بزوج فديك الشومبر فسكات غريب ورحيل باقي كاتحاول تستوعب هضرة طبيبة..

رحيل:(بصوت خافت)واش مافرحانش

نوح:(شاف فيها بتفاجأ ونطق بجدية)شكون قالها ليك؟

رحيل:حيت فاش سمعتي لخبار مبانتش فوجهك لفرحة

نوح:(كمش حجبانو) فرحتي بلخباار ربي وحدو لي عالم بيها (شدها فوجهها ونطق بصوت بهمس ساخن) كنت تانتسنى هاد النهار الفتنة ديالي نهار لي تهزي فيه ولدي لي من دمي فكرشك

باسها فجبهتها بالجهد وهي دمعتها نزلاات.. فلول خافت فاش شافتو سكت وتعامل عادي مع الطبيبة ومعرفاش بلي هو هاكا داير وفرحتو ماشي ضروري يبينها لشي حد.. خرجو من الشومبر وعيط نوح لرؤوف باش يديها لدار ترتاح وطلب منها ماتقولها لحد تادوز غدا عند لجنيكو.. مشات رحيل مع رؤوف وهو بقا مع زين العابدين مدوز ليلة فالكلينيك..

فالصباح مبعد ماخرج زين العابدين من لكلينيك داه نوح نيشان لرياض ولقى رحيل كاتسناه حيت سبق وعلمها توجد راسها.. شدو الطريق عند واحد لجنيكو مرا طبعا ورحيل قلبها غايخرج بلفرحة ليل كولو مانعساتش وكل مرة تحط يديها على كرشها تتأكد واش بصح حاملة من روح راحتها ولا لا.. خداو نوبتهوم وجلسو تايتسناو ومع صباح مكانش لمرضى بزاف.. غير وصلات نوبتها دخلو لعند الطبيبة لي كانت باقي صغيرة ومسرارة تبسمات ليهوم واستقبلاتهوم وبعد أسئلتها الروتينة على آخر دورة جاتها وماإلى آخره داتها باش دوز ليها الإيكو.. عيطات على نوح لي دخل لعندها ولقى رحيل ناعسة مغطية بليزار وصورة رحمها مصورة فديك ليكو كاتموج وتارحيل تاتشوف فهاديك لي معلقة فالحيط... كان السكات تيتسمع والتوثر غالب على رحيل أما نوح واقف كيف شي عسكري عينو مفيكسين على داك الإيكو لي تايشوف وتيحاول يركز ويشوف واش غيبان ليه شي حاجة..

طبيبة:(عينيها على التلفازة وأشارة بصبعها)وي كاااين حمل هاهو مبرووك عليكوم (أشارت ليهوم لإيكو) هاهوما الأجنة تيبانو ليا بوضوح..

كانت رحيل ناعسة فوق البياص وملامح الصدمة باينة على وجهها وهي تاتسمع كلام الطبيبة لي كانت مركزة فداك الإيكو.. ضورات راسها بزربة جهة نوح باغا تأكد منو واش بصح سمعاتها قالت الأجنة ولاغير بقوة الفرحة تخالطات ليها لهضرة فودنيها..

رحيل:(شدات يديه وزيرات عليه ونطقات بصوت خافت)نوح

نوح:(بصوت هادئ مبحوح قال)الأجنة؟ واش هي حاملة بتوام؟

الطبيبة:(تبسمات ليه)اه عندكوم توأم زوووج هاهوما شفتوهوم

أشارت لداك الإيكو تاتوريهوم ورحيل حاطة يديها على فمها ممتيقااش.. ونوح عينو ركزو كثر على داك الإيكوو وبالخصوص دوك النقيطة لي تيبانو فيه ولي خلاو لمعة تبان فعينيه..

الطبيبة:عندك 6 دسيمانات والحمل حاليا كيبان كلشي هو هداك والحجم ديال الأجنة طبيعي تاهو..مي غاايخصنا نديرو شي تحاليل باش نزيدو نتأكدو من صحة لمامون...

خرجات ليهوم الإيكو ومداتها لنوح لي شدها وحدر راسو كيشوف فيها بسهو...أما رحيل ناضت تتقاد حوايجها والطبيبة سبقاتهوم لبيرو..كانت رحيل باقي ممتيقاش وممستوعبااش بلي هي هازة زوج رواح فكرشها... نزلات من فوق البياص تتقاد حوايجها تاسمعات صوت نوح لي قال بهدوء وهو مقرب جهتها:صافا

رحيل:(حركات راسها بهدوء تاهي)اه طبيبة كاتسناناا يالاه

شدها نوح من يديها تاوقفات وضارت شافت فيه وقبل ماتسولو جرها من يديها تاتزدحات مع صدور ويديه شدوها من خصرها بالجهد تاحسات بصباعو شوية ويتقبو لحمها...مع هزات راسها انقض على شفايفها بقبلة جااامحة خلاتها تغمض عينيها كاتلدد وهو شوية ويسرط ليها شفايفها ومابعد تاحس بيديها على صدرو كادفعو بشوية.. بعد كينهج وهي ولات حمرة وعينيها مدمعين بقوة ماستحلات اللحظة وماسخاتش بيها..

نوح:(نطق بصوت خشن)أنا سابقك

خلاها تاترجع النفس وتقاد حوايجها لي تخسرو ليها وتمسح شفايفها لي حسات بيهوم تيوزوز.. تبعاتو وهي تتعض على شفايفها وجلسات جنبو

الطبيبة:بيما أنه ماشي أول حمالة ليك فغاتكون عندك تجربة قبل وسبق جربتي لوحم والعيا دلحمالة..

حركات رحيل يديها بتوتر وهضرة طبيبة خلاتها تفكر حوايج هي مباغاهومش..

نوح:(تنحنح وقال بجدية)قلتي غاتعيطها دڤيتامين؟

الطبيبة:وي ڤيتامينات ضرورية غايعاونوها شوية (شافت فرحيل)كاتحسي بالدوخة وردان ؟

رحيل:عندي أصلا الأعصاب فالمعدة عليها فاش كان تيجيني الردان كنت تانقول راه بسباب المعدة والدوخة قليل فين كانحس بيها

نوح:(متكي على الكرسي براحة والجدية ضاهرة على ملامح وجهو)مأخرا كانت حسات بواحد الوجع فالحوض ديالها وقت الجماع

خشات رحيل راسها بين كتافها وهي كلها حمرة مرگات من قصوحية وجهو واخا هادشي عادي يتدكر ولكن هي حشمات..

الطبيبة:الحمل باقي فالبداية ديالو وأي إيفور كثيرة راه غاتشكل ليها مشكيل داكشي علاش غايخصها الراحة هاد الشهورة لولة باش يستاقر الحمل..التقل ممنوع وتالدروج لاعندكوم فالدار نقصي منهوم على قد ماتحاولي وتالمشي بزااااف فهاد البداية لا..حاولي فالماكلة تاكلي لبيو والخٌضر بزاف...

بدات الطبيبة تاتعطيها النصائح ونوح طالق ودنيه كيقيد عندو.. عطاتها دير شي تحاليل لفقر دم وعطاتها شي ڤيتامينات عاد خرجو من عندها ورحيل حاطة يديها على كرشها مبسمة بحنية.. خلصو وقادو ليها الضوسي حيت اتبع عندها عاد خرجو بزوج واليد فاليد..

رحيل:(تتقاد لسانتوغ وبصوت فرحان قالت)باقي لدابا ممتيقااش بلي أنا حاملة بتوينز هههه

نوح:(هز يديها باسها من لداخل وشاف فيها بتبسيمة)مالنا كانلعبو هنا الفتنة

رحيل:(تبسمات وقالت بحب)عجبك لحال انوح

نوح:(حط يديه على كرشها تحسسها وقال بحنية وصوت دافئ)لولاد رزق من عند الله شكون فنظارك مايبغيش رزق الله؟

كلامو خلاها تحس بواحد الراحة والفرحة ماليها مثيل...كلامو ليها تيخليها تزيد تعشقو نهار ورى نهار واخا بعض المرات تايتناقشو ولكن مغاتنكرش بلي داك النقاشات هوما حلاوة الزواج...تفكرات الخصام لي كانو عليه البارح وتبسمات فالداخل ديالها تتقول سبحان الله لبارح كنت مقلقة منو وهو كدلك وليوم هاحنا فرحانين بخبار الحمل لي خلاهوم ينساو كلشي فهاد اللحظة.. يديه لي كانت على كرشها كانت تاتلمسها بواحد الحنية خلات تبوريشة تسرى معاهاا..

رحيل:(بصوت خافت)ونعم بالله

نوح:(حك لحيتو ونطق بصوت جدي) خبار لحمل ماتقوليها لحد دابا ارحييل

رحيل:(باستغراب)علاش؟؟

نوح:حيت قبل مانقولوها لعائلة غايخصنا نسبقو سيدرا وزين العابدين هوما لولين ونعلموهوم بلي فالقريب غايوليو عندهوم خوتهوم

سكتات رحيل وهضرتو خلاتها نيشان تفكر تصرف سيدرا نهار عرفات بحمل تانيرت وكيفاش مبغاتوش وجاتها الغيرة...تنهدات من القلب وهي تاتفكر فالحريرة دبنتها لي تابعاها عاود...

نوح:(مد يديه وهز ليها راسها تاشافت فيه ونطق بصوت أجش) ماتهزي لهم لوالو أنا غانتكلف بكلشي واخا

رحيل:سيدرا صعيب تقبل نهار ماما حملات دارت جنازة ومبغاتش ودابا ماعرفتش كيفاش غاتكون ردة فعلهاا هي مولفة تكون بوحدها المفششة وبوحدها لي صغيرة ولاجاا شي بيبي اخر مغايعجبهاش الحال حيت غياخد اهتمامناا وعند بالها غانبغيوه كثر منها

نوح:(حك لحيتو وقال بجدية)من حقها تكون مفششة ولكن ارحييل لفشوش بزاف راه غايخرجو عليها وسبق لاحظت بلي فيما كاتبغي لحاجة كاديروها ليها وهذا غلط كبير اااه غانفششها ولكن فلحدود وغانعطيها لي بغات مي نعلمها بلي بعض لمرات مايمكنش نعطيها ديك لحاجة سيدرا بنت دكية بزاف وتاتفهم لكلام وهادشي لي خصنا نديرو معاهاا

رحيل:(تنهدات وهي عارفة هضرتو على حق وبتساؤل قالت)وشنو لحل

نوح:لحل موجود وساهل غير هو خص يكون عندك الصبر الفتنة راه تابعك باقي زوج رواح تربيهوم (قرصها فحنكها ونطق بتبسيمة خفيفة)وباقي لخير لقدام إن شاء الله

رحيل:(ضحكات من قلبهاا فاش فهماتو اش قصد)هههههه الله يجعل لبراكة انوح واش مكفاوكش زوووج بغيتي تزيد وباقي كاينة سيدرا وزين العابدين

نوح:(كمش حجباانو وقال وهو كيدماري طوموبيل) تيساااع عطاه الله والخااطر كااين الفتنة شنو خص مزال

رحيل:(تقادات فالجلسة ونطقات بتساؤل) واش كادوي بصح باقي باغي لولاد؟

نوح:(يد فالگيدون وليد لخرى فوق الڤيتيس وبجدية قال)بنت ليك كانضحك ارحييل

رحيل:لا ولكن زعمة قلت زوج باركة وأصلا كاينة سيدرا وزين العابدين

نوح:(شاف فيهاا وقال هاز حاجبو)كل ولد وبلاصتو ارحييل سيدرا راه مغاتعمرش بلاصة زين وهو كدلك يعني ديك الفكرة غير حيديها من داك الدمااغ.. دابا نتي غير فكري ليا فراسك وديها فدوك العسيلات هاد الساعة

رحيل:(ضحكات)هههه سميتيهوم عسيلات ههه

نوح:(شاف فيها ونطق ببحة)حيت مهوم نحلة كاتعطي غير العسل لحر...

يتبع...