محتوى القصة
هزات الطبيبة عينيها فلانفغميغ وغير بلعينين هضرو وفديك الساعة مشات لانفغميغ ودوزات داك الريدو على زاج حاجبة عليهوم الرؤية... وهوما غير شافوها تخلعو معرفوش اش واقع... أما نوح نساحب شوية وجبد تلفونو ودوز لخط لرحيل لي كانت فديك الأتنااء تتبدل لتوينز حويجاتهوم ومعاها سيدرا... تتبسم ليهوم وهوما قد لكميشة وبداو لملامح يبانو ولعينين زرقين تگولي باهوم محطوط ومع ديجا شافت تصاورو فاش كان صغير راه تيشبهو ليه... لبسات إسحاق وخلاتو لسيدرا تبوس فيه وتلهي معاه بيما لبسات إسماعيل. وهو يصوني تلفونها بنمرة نوح... فلبلاصة جاوباتو بلهفة:ألو نووح
نوح:بيسان فاقت
طلقات واحد النفس دالراحة لي وصل لمسامع نوح... فرحات حيت بيسان فاقت وكانت هازة لهم ليها ولراجلها ولخوها تاهو...
رحيل:امدرا شفتوها؟؟
نوح:باقي طبيبة عندها
رحيل:الحمدلله على سلامتها نوحينو باشما كاان علمني واخاا
نوح:واخا الولاد فايقين ولانعسو؟
رحيل:تانبدل ليهوم تانسيفط ليك تصاور وهوما فاايقين
نوح:واخا نخليك دابا ردي لبال لراسك الفتنة
قطعات معاه وزفرات بالراحة وسيدرا شافت فيها وقالت:شكون لي فاقت امامي؟
رحيل:لفااارة دمامي بوسيني
تلفات ليها لهضرة وبدات توريها فإسحاق باش تنسى وماتسولش حيت مگالو ليها والو... أما فلكلينيك كانو كيتسناو الطبيبة تخرج على أحر من الجمر... مع بانت ليهوم خرجات كلشي تجمع عليها تيسول وهي تبسمات ليه كطمنهوم:لمريضة بخير وشوية غانقلوها لشومبغ عادية وتقدرو تشوفوهاا (شافت فنوح لي واقف لور) موسيو السليماني واخا تجي معايا واحد الدقيقة؟
حرك ليها راسو وهي سبقاتو لبيرو مخليا رياان متبعهوم وقلبو مهانيش...
شوية بانو ليه لزانفغميغ مخرجين السرير فين ناعسة بيسان لي كانت حالة عينيها وتتحس بعضامها ضارينها ورجليها مقدراش تحركهوم...غير شافتها رحمة وهي تقرب جهتها بدموع:بنتي لحبيبة دياالي على سلامتك
حدها سدات بيسان عينيهاا ماقادراش تهضر بزااف حاسة بلسانها تقيل عليها... كلشي قرب جهتهاا وريان كان واقف بعيد كيشوف فيها بعيون مشتاقة وقلبو عاد ارتاح ملي شافها حلات عينيها... داوها ورحمة ماطلقاتش من يديها تاوصلوها لشومبر عاد خلاتها باش يقادوهاا وغير سالاو وهي دخل تاني مباغاش تخليهاا...
فبرا جبد ريان تلفونو وعيط لمو لي ديجا رحيل علماتهاا بلي بيسان فاقت كانت جايا فطريق هي وإدريس... كلشي لعائلة دخلو عندهاا وهو بوحدو لي بقا برا تابان ليه نوح لي رجع... وقف ريان گدامو وقال:طبيبة اش گالت ليك واش بيسان ولات بخير ؟
نوح:(شاف فيه مدة ونطق بهدوء) مغاتقدرش هاد لفترة تمشى على رجليهاا وغايخصها ترويض
ريان:كيفاااش زعمة؟؟
نوح:(عقد غوباشتو) مداويش بالشنوية لكلام لي كاين گلتو
تخطاه وهو باين فيه معصب مخلي ريان غير تايضور فعينيه قبل مايتبعو لداخل...
كانت تتسمع لكلام مها وخولاتها بهدوء ومرة تبسم بشوية وغير تغمض عينيها تقفز رحمة وتعيط بسميتها خايفة ترجع تغيب عقلها ومگااال ليها... غير شافت بيسان خوها داخل وهي تبسم وعينيها عمرو بالدموع...
نوح:(تبسم ليها بحنية) بنتي (تحدر باسها فجبهتها) خلعتيني عليك
هزات بيسان يدها بزز وحطاتها على دراعوو وهو معنقهاا وكلشي تيشوف وعينو مدمعين...ديك بنتي لي نطق بيها توحشات تسمعها منو حيت مولف يگولها ليهاا... وراه نيت بنتو لي مربي على يديه مور موت باهوم...
نوح:(تبسم ليها) مزيان دابا تتحسي بشي حاجة تاضرك؟
بيسان:رجلي (بخفوت وصوتها تايتقطع ) گال ت ليا طبي بة مغانقد رش نحر كها د اب ا وخ صني ترو يض
نوح:(تبسم ليها بحنية) وغانديرو ترويض وغاترجعي تمشااي عادي مكايناش شي حاجة لي تخلعك واخا
حركات راسها باه وهو بعد شي لي خلاها تلمح ريان لي عاد دابا كتااب ليها تشوفو... نظراتو ليها مبينة كمية الندم لي تايحس بيها من جهتهاا وهي فلمقابل تتشوف فيه بلووم وعتااب كبير... شافت رحمة فلبلاصة فين تتشوف بينتها ومع شافتو خنزرات وقالت:بنتي لغزالة عرفتي ملي كنتي فالانعاش كان واحد طبيب الله يجازيه بلخير كيخليني ندخل عندك ديماا
نوح:(شاف فمو بتخنزيرة ونطق بصوت قوي قفزها) يمّاا هنيناا واجي بغيت ندوي معاك
سبقهاا وهي تبعاتو معارفاش مالو وبقات سناء لي شافت فريان ورجعات شافت فعفاف:عفاف رؤوف اجي نمشيو نشربو قهوة راسي ضارني
رؤوف:لا غير خليني مع بيسان
سناء:(جراتو)زيد خلاص شكون ايخلص عليناا
جراتو بزز مخلياا ريان ياخد راحتو معااهاا بيما أن رحمة ونوح مكينينش وزيد هي شافت هاد لمدة كلها مفارقهااش داكشي علاش عوناتو...مع خرجو وتسد لباب بقاو بزوج والسكات هو سيد الموقف قبل مايكسرو صوت خطوات ريان لي تيقرب جهتها وهي باقي عينيها عليه... مع وصل حداهاا تحدر على غفلة منهاا واخد شفايفهاا فبووسة عميقة خلاتها تخرج عينيها من لغفلة لي دار ليها...
غفلها وخلاها غير مخرجة عينيها تتشوف فالسقف وتتحس بشفايفو تيطحنو شفايفها مبقات عارفة مادير... وهو داك لوحش لي توحشها فهاد ليامات كولو ترجمو على شكل قبلة... مابعد عليها تاحس بيها قربات تخنق... عاد شاف فوجها لمدمغ لي كان حمر وعينيها لخارجين ونطق بخفوت:توحشتك مون دكتوغ (تحدر قاس حنكها وقال باشتياق واضح) ماتعاوديهااش وتخلعيني عليك
مجاوباتوش لسانها تشل عليها وعينيها غير على وجهو وعقلها كيفكر فشنو طرا بناتهوم اخر مرة... تحل لباب ودخلات تانيرت مع إدريس شي لي خلى ريان يبعد شوية عليها مخلي مو وباه يقربو منها...
العائلة كلها جات تشوفهاا من صغيرها لكبيرها والشومبر مكاتخواش عندهاا ومنهوم تاارحيل لي جاات طل عليها وداك لجيست عند بيسان عنى ليها بزاف وزاد خلى مكانة رحيل تكبر فعينيها...
بيسان حسات بلملل فالكلينيك ومباغاش تبقا عليها أصرات أنهاا تخرج مور ما هضرات مع الطبيبة لي سمحات ليها بلخروج... ولكن غاتولي تستعمل الكرسي لمتحرك على مادير الترويض... فلول ماقدراتش تقبلها بيسان واخا عارفة بلي هادشي مؤقت ولكن ماقدراتش وهي لي مولفة لحركة... ولكن مكان عندها مادير من غير تقبل هادشي وأكيد غاترجع تمشى غير خصها دير ترويض...
تاحد فالعائلة ماجبد ليها لهضرة وخصوصا مها حيت نوح سمعهوم ليهاا وخلاهاا تجمع وطوي... خرجوها من السبيطار وهي فوق داك لكرسي وجهها باقي ماازالوش فيه لطراس مي قلالو على نهار لول... وصلو لرياض وتلاقاوها بالحليب والتمر والزغارت مخلينها تبسم... داوها لشومبر ديالها تنعس وترتاح ونوح يالاه غايتكونسونطرا ويفكر فالسبوع ديال التوينز...
قررو يكون نهار الدبي حة ويديروها فالفيرمة وگاع ديك لغبينة لي كانو عايشين فيها لفترة لي كانت بيسان فلاكلينيك ولات فرحة وأولهوم رحيل لي فرحتهاا مايمكنش ليها توصف... وصلو لفيرمة ولقاو بّاسالم ومرتو كايتسناوهوم وموجدين الفيرمة... نزلات رحيل هازة بين يديها إسحاق ورحمة هازة إسماعيل... مدات ليها مرات بّاسالم التمر ولحليب ورحيل مبسمة وفرحانة... دخلات نيشان لجناحهاا باش تحط وليداتها ولقات لكونة موجدها ليها نوح... حطات فيها إسحاق وقربات رحمة حطات ليها إسماعيل ورحيل تاتزول ففولارها والصهد قهرها...
رحمة:(تاتهضر بالنفخة) ردي لباال لايتقيا إسماعيل مع عطيتو لابيبغون قبيلة
رحيل:(بنفس لبرود) واخا
خلاتها مزادتش معاها الهضرة وتارحييل ماحمقاتش راسها معاها... دخل نوح لي قرب جهتها مبسم وهي نطقات باشتياق:نوحينو (تعلقات فيه وهو عنقها تاحسات بعضامها غايتهرسو وباسها فشفتها بالجهد) هممم عييت بزاف
نوح:اوا نعسي ماحدهوم نعسو وارتاحي
رحيل:اه داكشي لي غاندير غانمشي نطرف حالتي ونعس (تفوهات) وقتاش الدبي حة؟
نوح:غدا فالصباح إن شاء الله
خلاتو ومشات لحمام وهو طل على ولادو وخرج يشوف اش تابعو...
ليوم الدبييحة وكان كلشي فاايق وطبعا كانو غير لمقرييين فقط..موجدين راسهوم بلبلدي ومنهوم رحيل لي تأنقات بقفطان فالبيض مع فولار نفس اللون... ومك اب هادئ بين عويناتها لخضرين لي كانو كيبريو... وملبسة لي توينز تاهوما لبيسات بيضين بطرابشهوم... واقفة فلبالكو دجناحها هازة إسماعيل وفلمقابل تانيرت كانت هازة إسحاق تاهي بقفطان جوهارة وشعرها دايرة ليه بروشينگ ومكحلة عويناتها... عينيهوم على البلاصة فين كان واقف نوح بجلابة سوسدية فلگرونة وجبادور بيضاا ونضاضر دالشمش فعينيه وبلغة تگولي عليه عريس... واقف جنبو إدريس كان تاهو بجلابتو وداير تاهو نضاضرو دالشمش... والبقية كلشي لابس لبلدي سوى رجال سوى نساا...
واقفين بزوج وعين كل واحد فيهوم على لي ملكات قلبو... محمد طه كان حاضي غزلان لي جالسة فوق الكراسى بقفطان كريب فلبلوسياال وشعرها تيلعب مع الريح لخفيف ودايرة نضيضرات دشمش... باقي مناسي كلامها وانهيارها داك نهار وكيفاش سدات عليه لباب لي كان بدا يتحل بسبب تصرفو لي تصرف فلحظة ضعف واشتياق... ملي جات مشافت جهتو ولاحشاتها ليه بحال الامكاينش... قلب وجهو وكمش حجبانو تاسمع صوت ريان لي قال: ماعرفتش واش هادا نحس ولاسحووور ولااش تاحد فينا مالگاها كيف بغاهاا
محمد طه:اودي زهرنا خاريين فيه لمشاش
ريان:تااماشي غير لمشاش وفيما كان شي حيوان خراا فيه (ضحك محمد طه وريان تبسم وكمل هضرتو) ولكن حنا درناها لراسنا ونستااهلو ماجرا فينا
محمد طه:نتا بعدا ماتقبتيش معاها لورقة بحاالي
ريان:(حرك راسو) اودي زيد زيد الدبييحة غاتبداا
قربو جهة البلاصة فين كاين نوح وجاو زوج رجال صحاح جارين لحولي لول ومدو ليه مووس باش يدبح... وتحت الزغارت والصلاة على نبي تدبحووو لحوالى دالسبوع ورحيل مراقباهوم من لبالكو ديالها بتبسيمة...
سيدرا:(قربات جهة نوح لي تيمسح يديه لي ترش ليها شوية د م) بابانو واش هاد لحاوليات ديال إيسو وسوسّة؟
نوح:(تبسم ليها) اييه ديالهوم
سيدرا:(كمشات حجبانها بزعل طفولي) وفين هو حاولياا أنا وزينبيدين؟؟
جلس قفازي وجرها عندو وهي مكمشة داك لفيم وعاقدة حجبانها ومخرجة دوك لعوينات دلبابوشة زعمة راه مقلقة حيت مااادب حش عليهاا تاهي حاولي...
نوح:(صوت كالم) لحوالى كيد بحوهوم فاش تيكون لوليدات صغار باش يسميوهوم ابابا
سيدرا:(ببرائة) واش أنا صافي دبوحوو حاولياا
نوح:اه وتازين العابدين
سيدرا:(عنقاتو) صافي بابانو مابقيتش بيتو
عنقها وهزها بين يديه غادي بيها لفين جالس الكل متبادلين أطراف لحديت... ولبنات همهوم فشنو يلبسو لسبوع ومعاهوم بيسان لي كانت تادوي بهدوء مشركاهوم لحديت...
***
نهار العقيقة ديال التوينز لي غاتقاام فأفخم قاعة متواجدة فمراكش... كانت رحيل مخلية توينز لمها ومشات ضرباتها بتحمحيمة فاعلة تاركة واخا راه باقي ماتنقاتش مي شهوتها فلحمام ودير تبريمة وداكشي لي دارت... خرجات مزنگة ومشات لدريسينغ لبسات حوايج لداخل ولبسات جلابة حيت غاتمشي لقاعة دابا باش توجد راسهاا... هزات داكشي لي غاتحتااج لتوينز وتحركات هي وتانيرت ومعاهوم سيدرا وبيسان... وصلو لقاعة لي كانو لخدامة باديين فيها تيقادو الديكور لي ختارو وكانت مقسمة على زوج جهات جهة النسا وجهة الرجال لي عندها دخلة خاصة بيها... شدات بلاصتها فالبيت لي لفوق وحطات ولادها ومها مافرقاتهاش هي لي حاضية ليها لولاد... ولمك اب ارتيست وبدات توجدها بحال شي عروسة... جاو لبنات تاهوما حيت غايقادو مع رحيل...ولبنات لي مع المك اب ارتيست كل وحدة تكلفات بشي وحدة تصاوب ليها...
تانيرت:رحيل بنتي قربتي راه إسحاق تيبكي
لمرة التالتة حبسات لمك اب ارتيست وناضت ترضع ولدهاا... وماعندها مادير هادي هي ضريبة الأمومة... رضعاتو ورضعات تاخوه بااش مايفيقش تاهو ومشات تكمل... وبعد سعتاين كانت واجدة بمك اب تقيل بارز ملامحهاا وبغوج أليڤغ حمر جااها ناضي... تبدلات كليا وعينيها مكحلين ومبينين ديك لخضورية تاتلمع... خلات تكشيطتها تال لخر حيت مع الرضاعة مبغاتش تحيد وتلبس... تامن لبنات كلهوم وجدو ولبسو تكاشط هماويين وكل وحدة تگول لتانية أنا زوينة عليك بقوة ماطاح عليهوم السر...
القاعة مقادة بأفخم أنواع الديكورات ولورد البيض والأوركيسترا طالقين أغاني هاديين... الضياف بداو يحضرو والرجال فجيه مستقبلهوم نوح لي كان بلكلاس بكوستوم فنواغ مع شوميز بيضاا واستغنى على لكراڤاط... معاه إدريس كيستقبلو الرجال دلعائلة والمعاريف دنوح... أما نساا راه رحمة وعفاف مكلفين باستقبالهوم حيت تانيرت مع رحيل لي كانت تتلبس تكشيطتها البلونكاسي لي كانت كلها منبتة بالعقيق والجوهر الحر وجامعة شعرها باتشاا ودايرة تاج حيت مكاينش رجال فالسيدة بغات تفرح براسهاا وداكشي لي مدارتش فلعرس ديرو فسبوع ولادها...
هازة تلفونها وتتشوف فمساح نوح لي سيفط ليها علمها بلي باغي يشوفهاا... بقات جالسة تتسناه تاتحل لباب ودخل نوح لي تحطو عينيه عليها قبل گاعما تهز راسها تايشوف فتكشيطتها وشعرها لي كان مجموع وغير هزات عينيها كمالت صورتها لي فتناتو... حجبانو تكمشو وهو كيقرب جهتها تاوقف حداهاا وهي مبسمة ليه وقالت بخفوت:نوحينوو كيف جيتك؟
نوح:(بصوت خشن) غاتنزلي هاكا؟
رحيل:اه علاش؟
نوح:(هز حاحبو)دوك لعينين لي مكحلين ودوك الشنايف لي صابغة عند بالك انخليك تنزلي بيهوم (طبطب على حنكهاا) بلامانبقا نعاود مسحي داكشي يالاه
زفرات بغيض ومشات تتنقص داكشي بلاماتجابه معاه وعلى مضض سمح ليها تنزل...
كانت واقفة فبرا دلقاعة بنقابها وعينيها على لباب لي تيدخلو منو النسا ولي فيه السكوريتي بقات جالسة تتعض شفايفها تاتحل باب طوموبيل وجلسات ديك خيتي لي معاها وقالت:كاين باب اخر تيدخلو منو السرباايا من لور شدي يديك ليمن وغاتخرجي لقاعة دالنساا وفيها الدروج فالجنب كيطلعو لفوق جايين مدرگين ودروج فلوسط ولفوق ماعندي كي ندير نجيب ليك خبارو حيت ماطلعتش ليه..
ميس: خليك هنا وردي لبال لتلفونك واخا أنا مشيت
خرجات ميس وهي مقادة نقابها ومشات تابعة نعت لي عطاتها تالقات لباب لي تيدخلو منو السربايا وبانو ليها زوج كيتكيفو واستغلات لوضع دخلات وراسها يضور هنا ولهيه وفيما تسمع الهضرة تخبى تاوصلات لداخل لقاعة وبالضبط عند النسا وهي تعض شفايفها بحقد وعينيها على رحيل لي نازلة بحال شي عروسة ولكاميرا والأنضار عليها... استغلات ميس ديك لحظة وطلعات من الجيهة لخرا لفوق وقلبها تايزدح خايفة تحصل...غير وصلات لفوق وبدات تاني ضور راسها كيف طرومبياا لقات تلاتة دلبيوت تم حلات لولاني بان ليها خاوي ومشات جهة لاخر ومع حلاتو سمعات لحس ومشات تخبات تابانت ليها تانيرت خارجة وهازة لابيبغون ونزلات لتحت... ديك الساعة دخلات ميس وقربات جهة لكونة ديال التوينز ونظراتها كلها شر وحقد ومرض... هزات ديك لميكة لي كانت جايبة فيها واحد لغبرة وخشات فيها صباعها تاولى بيض بديك الغبرة وقربات صبعها جهة فم إسحاق بتبسيمة مريضة...
نازلة من الدروج والتبسيمة على شفتها والسر طايح عليها تگولي عروسة... كانو النسا كاملين دلعائلة حاضرات باستثناء حكيمة ومت عادل لي ماعرضوش عليهوم... التلفونات كانو ممنوعين وتاوحدة ماجبداتو باش تصور من غير أسماء لي كانت تتصور بتلفون رحيل... القاعة دالنسا مافيهاش حس راجل تايضور من السربايا لأوركيسترا لمصورة كلشي نساا... وقفات رحيل لوسط مبسمة وتاتصور عاد مشات لبرزة وجلسات فيها وعاد قربو جهتها النسا تايباركو ليهاا العقيقة...
قربات جهتها أسماء بتكشيطتها الحمرة وكرشها قدامها وشعرها جامعااه نص جمعة... زادت زيانت واتاها لحمل... تبسمات وجلسات جنبها وقالت بمزاح:نتي لي طلع ليك الجوكير دايرة زوج عراسيات هههه
رحيل:(تبسمات)اوا شنو الواحد هو لي يفرح بروحو
أسماء:(عضات على شفتها)تاانا غانديرها ملي نولد إن شاء الله غانلصق داك بوراس دإسلام باش يدير ليا سبوع كبير لبنتي وندير فيها حجة وزيارة ههههه
رحيل:هههه صافي الالة ديريهاا على لكتكوتة ديالنا رخيصة عندنا
أسماء:اوا كانتسناا نشوف لبخوشة ديالك اش غاتسميهاا
رحيل:(بضحك)ههه هو السمية غاتجبد ليك شي وحدة زوينة وقليل فين تتسمع مي زعمة إسلام ماعندوش مشكيل؟
أسماء:راه لبنت بنتي وأنا لي تعدبت عليهاا ماشي هو نسميها لي بيت
رحيل:اوا نتي تعرفي (ضورات عينيها على النسا مبسمة وعينيها تايقلبو على سيدرا) ماعرفتش بنتي فين هي؟
قبل لحظات كانت سيدرا تاضور بتكشيطتهاا الصغيرة والتاج على راسها فالقاعة وحاسة بلملل مع مولفة تتمشي عند جدها وباها ولكن دابا بقات غير مع العيالات وجابو ليها لقنط... خلاتهوم فلتحت وهزات تكشيطتها باش ماتعكلش طالعة لفوق عند جداهاا ومنها تشوف خوتها وتلعب معاهوم شوية...وصلات لفوق ومشات جهة لبيت تتجري بالزربة حلات لباب...
كانت ميس واقفة ونظراتها لمراضين مفيكسين على توينز لي ناعسين جنب بعض بلكومبين ديالهوم لي فلبيض والزرق ودايرين ليهوم طرابش ومغطينهوم وناعسين... شافت فديك الميكة لي فيها ديك لغبرة البيضا وهي مبتاسمة وقربات صبعها جهة إسحاق ناوية تخليه يلحس داك الغبرة تااتحل لباب على غفلة منها قفزها وخلاها طلق لديك الميكة لي فيديها تاتكبات ديك لغبرة الأرض مخرجة عينيها تاسمعات صوت سيدرا لي قالت ببرائة:شكون نتياا ؟
بقات ميس مفيكسية فبلاصتها بدون حراك مزيرة على يديها وتاتفكر فحل لهاد لحصلة لي حصلات وهي لي كانت ضاربة حساب لكلشي...من نهار عرفات السبوع غايدار هنا وهي خيطي بيطي لقاعة وفلواجهة حطات صاحبتها هي لي تمشي تشوف القاعة ودرسها مزياان باش تجيب ليها لخبار وتخلي لخطة لي فبالها تمشي كيف بغات ملي شافت نوح ماهتمش لدوك التصاور وموقعش الفراق بناتهوم ماعجبهاش لحال... كرهها لرحيل ماشي منطقي حيت مدارت ليها والو ولكن ميس فنظرها وفمعتقدها هي أن رحيل هي سبب گاع مشاكيلها حيت من نهار تزوجها خوها عاصم ولمشاكيل دخلو لحياة عائلتها وبسبابها فقدات خوها ومهاا أما تاعمها مابقاش فيها بدك الدرجة ديال خوها ومها... ومن جيه ختها لي وقفات فوجهها على قبل رحيل...مانساتش نهار خيراتها وختارت رحيل وهي ماتسوقاتش ليها عواض مادير يديها فيدها وينتاقمو لعائلة هي سمحات فيها وخلاتها تعوم بحرها... هي مباغاش تشوف لفرحة فحياة رحيل ديك لفرحة لي هجراتها والاستقرار لي ميس خرباتو بيديها وحد ماضربها عليه...
ضارت بشوية وعينيها على سيدرا لي قربات بشجاعة وهي تتشوف فديك لمرا لي لابسة الكحل ودايرة فولار على شعرها... شافت فملامح سيدرا لي كانت مكمشة حجبانها معرفاش شكون هادي لي قدامها وشنو تادير هنا وميس راه بقاات جامدة تتشوف فسيدرا عن قرب ومغاتنكرش بلي ملامحها تيشبهو شوية لعاصم وهادشي لاحظاتو من نظرتها الأولية...
ميس:(تبسمات ببرود)سيدرا
سيدرا:(ببرائة) شكون گال ليك سميتي
ميس:(زادت تبسيمتها وساعت) ماعرفتيش شكون أنا (ضحكات بمرض) أنا عمتك خت باباك اسيدرا باباك لي مات بسباب ماماك
سيدرا:(كمشات حجبانها وقالت مقلقة وبغضب طفولي) لا نتي كدابة مامي زوووينة
ميس:(هزات حاجبها) بصح تتشبهي ليه فوجهو شوية ولكن بحالك بحال مك سلعة وحدة
ضارت ميس جهة توينز وهي ناوية تكمل مابدات ومع قربات يديها ليه بغتاتها سيدرا فلبلاصة شداتهاا ليها وعضات فيهاا وميس طلقات صرخة مكتومة وبدات تادابز مع سيدرا لي شدات يديها وعضاتها وحلفات لاطلقاتهاا... كيگولو لوليدات الصغار تيحسو بلي قدامهوم لافيه الدغل ومكيرتاحوش ليه وهي مرتاحتش ليها نهائيا... بقات شداهاا وميس تاترطى ودفعها بيديها فوجهها تاعصباتها وهزات يديها عطاتها ليها لجهة لودن تاطاحت لسيدرا لباراي دالسمع وشداتها دفعاتها بكل قوتهاا تاتضربات مع لكرسي وطاح عليهاا...
كانت بحال شي وحش وهي كلها حمرا تتشوف فسيدرا لي طايح مسكينة عليها لكرسي ومغمضة عينيها ماعرفاتهاش واش سخفات ولاشنو طرا ليها... بقات تاضور هنا ولهيه وشافت فديك لغبرة لي طاحت وتهرقات ليها كلها وعضات على شفتهاا... ماتقدرش دير شي حاجة مزال حيت يقدر يجي شي حد اخر ولالقات السلاك مع سيدرا فهادشي مكيعنيش راه غاتلقاه مع كلشي... عضات شفتها مفقوصة حيت لخطة منجحاتش وفشلات بسباب سيدرا... شافت فيها مخنزرة باغا طير عليها وتلوحها من الشرجم كرهاتهاا وتاتشوفها شبه مهاا تاهي تتقلب على لمشاكيل... أما سيدرا كانت مسكينة تتوجع من الضربة لي عطاتها لوجه مصمكة ودنيها وداك لكرسي تاهو لي قصحها فعضيماتها... حلات عينيها تاتشوف فميس لي قربات جهتها وهي طلقها بغوتة مجهدة:مااااااامي
ميس حبسات فبلاصتها ودفلات بفقصة وخرجات منزلة النقاب تتجري قبل لاتحصل...سلكات نفس الطريق لي جات منها بشوية بلامادير لحس وتاضور هنا ولهيه لقات كلشي جالس... بانت ليها قرعة دلماا خداتها وخرجات من داك لباب لوراني وغير ضرب فيها الهوا وهي تزفر النفس وهزات نقابها وبدات تشرب لماا كيف لهيشة وضور هنا ولهيه وتشوف النواحي...
خرج من عند الرجال بملامح منزعجة باغي غير يسالي هادشي ويرجع لدار...كان مجبور أنه يحضر حيت مايكنش يقلق باااه وهادا سبوع خوتو...سرح عينو فديك القاعة وهو خارج لبرا تيسرح رجليه تاسمع تلفونو تيصوني كان أمين...هضر معاها زوج دقايق بلحساب وأمين لي هضر هو غير تيجاوب باه لا... تاقطع فوجهو وعينو تيشوفو فميس لي كانو حركاتها تيلفتو الانتباه وهادشي لي طرا معاه... بانت ليه جبدات تلفوناها ونطقات بصوت وصل لمسامعو:اجي عندي راني خرجت وسربي قبل مايحصلني شي حد..
هضرتها زادت خلاتو يتأكد ويقرب منها ناطق بصوت قوي زعزعها:شكون نتي؟
سرطات ريقها وزيرات على لقرعة وبلافرطة هزات جلايل لعباية وعطات رجليها لريح وهو غير شافها تتجري تبعهاا كان قريب ليهاا ومد يدو يشدها ساعة شد غير لفولار محيدو ليها مع نقاب لي أصلا كانت محيداه على وجهها فاش كانت تتشرب...تطلق شعرها الزعر وضارت شافت فيه على غفلة كبات عليه لماا لي فلقرعة تاضروه فعينو واضطر يوقف تايسمحهوم وهي كملات جري تاجات طوموبيل لي ركبات فيها وزين العابدين محتاجش وقت وكان تبعها ساعة طلعات فطوموبيل ومع دلك تبع الطوموبيل تيجري وضرب الباب ديالها باغي يحلو ساعة كسيرات مخلياه واقف تيسب... وفديك الساعة هز تلفونو تيصوني لباه وفنفس الوقت رجع لقاعة..
**
كانت باغا تصاوب تانيرت الرضاعة لتوينز ولقات لماا المعدني مكاينش وغير شافتهوم ساكتين گالت اجي نزل نجيب قرعة ونجي بزربة ماحد مفاقوش...نزلات وغير جابت لقرعة وبغات ترجع وهي تعيط ليها رحمة باش تمشي تسلم على شي نسااا... شدوها تيسولو فيها وهي عطاتهوم صوابهاا وشوية ناضت باش تمشي طل على توينز... مع وصلات لفوق لقات سيدرا بلاصتها مسكينة تتبكي بلحريق لي ضرها فضهرها...مشات تتجري هزات عليها لكرسي وهزاتها مجلساها تاتمسح على وجهها وبخوف نطقات:مالكي اسيدرا اشنو وقع ليك
سيدرا:(ببكاء) تانيرت إينو واحد لمرا كانت هناا واقفة هيه عند إيسو وسوسّة
تانيرت:(قلبها دق بخوف)شكوون (ناضت طلات على توينز كانو ناعسين وتيتحركو شوية زفرات براحة ورجعات لعند سيدرا لي كملات كلامها ببكاء) گالت ليا هي عمتي خت بابا وبلي مامي هي لي خلات بابا يموت هي كدابة تانيرت إينو خلعاتني وضرباتني هنا (وراتها ودنها لي مزولة فيها لباراي) ودفعاتني
عرفاتها تاتيرت مجرد ماكملات سيدرا هضرتها عنقاتها وقالت بصوت حنين:هي كدابة ابنتي وخايبة ماتيقيهااش
سيدرا:(تعلقات فيها) أنا عضيتها فيديداتها تانيرت إينو ومخليتهاااش تدي إيسو وسوسّة...
صونى تلفون تانيرت بنمرة إدريس وغير جوبات بألو وهو يوصلها صوتو لي باين فيه قاصح وماشي كيف مولفة يدوي معاها:فينك واش نتي مع الولاد؟؟
تانيرت:اه اجي ضروري نتا ولد لحاج
إدريس:أصلا حنا جااييين
قطع وماكملات عشرة دقايق كانو داخلين بتلاتة إدريس ونوح وزين العابدين...قرب نوح بزربة جهة سيدرا لي كانت باقي تتبكي وهزهاا وهي تعلقات فيه وبدات تتسرسب ليه كلشي وتعاود وتبكي وتشكي عليه وهو تيسمع ويگرن فحجباانو...
نوح:(عنقها بحنية) صافي اباابا أناا هنااا
قبل شوية عاود ليه زين العابدين على داكشي لي طرا معاه وفاش وصف ليه السيدة گال ليه فيها سكاتريس فوجهها وعينيها خضرين وعرفوهاا ميس خت عاصم... طل على التونيز تاهوما وسيدرا بين حظنوو مخبية فيه تالمح ديك لغبرة لبيضااا لي مليوحة جنب كونة لتوينز...
مد سيدرا لإدريس لي هزها وهي مخشية فيه باقي مخلوعة من شنو طرا ولكلام لي سمعات من ميس وتصرفاتها لمريضة لي عمرها شافتهوم... نزل قفازي ومد يدو قاس ديك لغبرة بصبعو وشمها مافيها لاريحة لاوالو شك فيها عليها هز ديك لميكة ودار فيها شي حاجة من ديك لغبرة وجمعهاا وخدا كلينيكس لواه على ديك لميكة مزياااان وخرج لبرا....
تانيرت:(شافت فزين العابدين وبتسمات ليه)عفاك اولدي واخا تدي معاك سيدرا بغيت نهضر مع إدريس بوحدنا
شاف فيها زين مطلع حاجبو ببرود وتمشى جهة لباب خارج وإدريس حط سيدرا ومسح على شعرها:سيري بقاي مع زين العابدين انخشيشتي
حركات راسها باه ومشات وغير بقاو بزوج وهي تنطق تانيرت:ديك لحمقة شنو بغات منااا هي رجعات ومناوياااش على خير يعلم الله اش كانت باغا دير لدراري كون ماسيدرا لي جات
إدريس:(بانزعاج) فين كنتي ياك بقيتي مع دراري لاش خليتيهوم؟
تانيرت:(ماعجبهاش كلامو)مشيت نجيب لما باش نصاوب ليهوم رضاعة قبل لايفيقو وشداتني وحدة من عائلة رحمة ومجاتش نخليها وغير ساليت جييت ماتعطلتش بزااف
إدريس:(مسح على وجهو) دابا خصنا نردو لبال كتر ديك خيتي جات تاال هناا بلاماتخاف وماحدها قريبة لينا ماحدها ناوية على شر
تانيرت:بحالها بحال خوها وعمها لمراض مكفاهاش هادشي بغات تسمم لينا تاسيدرا بكلامها لمريض عطا الله ماتيقاتهاش
إدريس:واخا ماتيقاتهاش غاتبقاا تسول وتفكر نتي عارفة سيدرا مكتزكاش تتعرف كلشي وبمشكيل هو لي لارحيل ساقت لخبار
دخل نوح قاطع كلامهوم وغير شافو إدريس قال:أمضرا؟
نوح:(بخشونة) مشيت شفت لكاميرات دبرا ولي فقاعة النساا جات من لباب لوراني وطلعات من الدروح التانين باش مايشوفها حد
إدريس:زين العابدين گال لينا بلي هي كانت دايرة نقاب داكشي علاش
نوح:وتاطوموبيل لي مشات فيها مكاينش فيها لماطريكول باش ماتحصلش وهي ماشي بوحدهاا كانت معاها مرا خراا (مسح على وجهو بنرفزة)داك لمريص ماعندوش شي حد فلعائلة تيعاونها متلا؟؟
إدريس:مكنظنش يكون من لعائلة ديك التريكة لي عندها راه ماتت وبقات غير رنيم
تانيرت:نسولو ربما كانت عارفة شكون لي كان معاهاا
بكاو توينز وتانيرت مشات لعندهوم تاتسكت فيهوم ونوح غادي جااي فلبيت تايخمم... وتاإدريس مكانش قل منو دابا ديك لفرحة تقلبات ليهوم دغيا بلهم وكون ماربي لطف وسيدرا جات كون يعلم الله اش كان غايطرا ونوح عارف بلي ديك لغبرة باينة سم وجات باش تسمم ولادو...
***
بقات تابعااه وهو غادي فداك لكولوار ديال الطبقة التانية ولموسيقى لي طالقين النساا درونجاتو فدماغو وعقلو تيفكر غير فداك لبلان لي طرا معاه وهاديك خيتي شكوون... ضار متكي مع الحيط وبانت ليه سيدرا لي واقفة تاهي قدامو ومكمشة شنافتها وجهة ودنها شوية حمرا ومديراش فيها لباراي... هزات عينيها وشافت فيه وقالت بزعل: زينبيدين هاديك لمرا ضرباتني شوف (تتوريه ودنها) وتيضرني هناا (وراتو تاجهة الكتف فين طاح على لكرسي) وأنا عضيتها فيديهاا باش متديش لياا إيسو وسوسّة حبيباتي
بقا غير تيشوف فيها ساكت قبل مايگلب وجهو وهي جلسات فالارض مسكينة وتكشيطتها تاتجرجر وبدات تتحك جهة ودنيهاا... شاف فيها بجنب عينيه ولمح ديك لحمورية لي فيها ورجع قلب وجهو... تفوهات سيدرا وعياات باغا تنعس قربات بجلساتها جهة رجليه فين واقف مربع يديه كيتسنى فباه تاحس بتقل على رجليه ومع هبط عينو لقاها ناعسة على جلستها ومسندة راسها مع رجليه...
بقا تيشوف فيها وهي متكية عليه ومغمضة عينيها ناعسة بلعياا وبلبكاا وزيد تاداتها لي كاضرهاا... كحز شوية باغي يبعدها عليه وهي تزيد تميل لجهتو... ساط يإنزعاج واضح على ملامح وجهو وبلامايتسوق ليها بعد تاطاحت مسكينة وتضرب راسها مع الأرض وهي تحل عويناتها السود بزربة وبقات تتحك راسهاا وتاضور عينيها فلبلاصة لي هي فيها... أما هو بعد عليها أو وقف فالجهة لمقابلة ليها وجبد تلفونو كيخربق فيه ومدوز لوقت على مايخرج باه من لداخل... جمعات رجيلاتهاا وحطات يديها فوق ركابيها وبقات ساكتة تاتشوف قدامها ومرة تشوف فيه وتجمع شنايفها تاعيات وضرها البرد وهي تنوض غادة لبيت تتقلب على جداهاا...
سيدرا:(دخلات عليهوم على غفلة ) تانيرت إينو
(مشات تتجري لعندها تاهزاتها وتخشات فيها حاطة راسها على كتفها وقالت بخفوت)فيا النعاس
تانيرت:اجي ابنتي نعسي نحيد ليك تكشيطة؟
سيدرا:(حركات راسها باه) همم فيا الصهودات
نوح:(قرب جهتها وقاسها فراسها بهدوء) فين لباراي ديالك ابابا
سيدرا:(نطقات مغبنة)طاحت ليااا فاش ضرباتني هاديك هي خايبة
تانيرت:(بلاماتحس قالت بالسوسية)أداس إيفك ربي ترزي غيفااس نس "الله يعطيها لهرس فيديها"
خرجات من فمها بلاماتشعر ومعاقتش براسها اش گالت تااسمعات نووح لي جاوبهاا بهدوء:آمين
عاد حلات عينيها تتشوف قدامهاا حشماانة أما هو مشى لبلاصة فين كانت طاحت سيدرا تيقلب على لباراي تالقاها مخشية تحت طابلة وهزها ومشى ركبها ليهاا وشاف فيهاا:مزيانة ابابا دابا
حركات راسها باه وتانيرت عطاتهوم بالضهر وجابت سيدرا قدامهاا باش تبدل ليها...حيدات ليها تكشيطة وكانت لابسة غير شورط ودباردور لبساتها كسيوة مبردة وقصيرة تتجي على شكل دوبيااس لفوق ميني ڤونطغ ولبغوطي ديالها كبار وعنقها مربع ولتحت صاية حد الركبة... حيدات ليها التاج ومشطات ليها شعرها مطلعاه لفوق مخلية ليها غير لافخونش وصافي...
صونى تلفون نوح كان جدو تيسولو فين غبر وبلي الرجال تيسولو عليه واضطر هو وإدريس يرجعوو...ومع خرج لقى زين كيتسنى فيه درعو ونزلو من الدروج لي طلعو منهوم وتاواحد فيهوم ماضار جهة النساا والموسيقى تتزدح الودنين...
وأسماء هي لي قشعاتهوم مع رجعات من طواليط ودازت من حدا الدروج لخرين عليها لمحاتهوم فاش نزلو...كمشات حجبانهاا ورجعات لوسط لقاعة محيحة تاتحرك بشوية عليها وتصفق بيديهاا...
كانت جالسة فوق الكرسي ديالها وعينيها على لبنات لي تيشطحو وماكرهاتش تاهي تنوض وتشطح ولكن ماتقدرش باقي مقادراش تحرك رجليها كيف كانت حركتها باقي بطيئة حيت باقي مسالاتش الترويض... حسات براسها مخنوقة فيما ضور تشوف عيون النسا دالعائلة لي لبعض منهوم كيشوف فيها بشفقة واضحة... بركات على لبوطون ديال لكرسي لي كان أوطوماتيك وتحرك بيها خارج لقاعة وفطريقها سمعات وشوشات بنات خوال مهاا...
م1:شفتيها مبقاتش تتمشى
م2:مسكينة بقات فيا من زيناتهاا بنت درويشة ومافيهاش الصداع
م3:اوا الصحة مدايمااش على ماسمعت گالو راه كادير ترويض
م1:تانتي تيقتي راه غير هضرة تيگولوها باااش مايخليو لحد فين يهضر نتي عارفة رحمة أو ولد لحاج منفخين بزاااف
م2:اوا راه صعيب تگال واش نتي لبنت ولات معاقة وتتگولي مايخبيوهاش هانتي دابا شكون يقبل يتزوج بيهاا لاخدمة بقات ولارجلين تاهوما
م1:دابا يجيب ليها ولد لحاج شي واحد من لمعارف ديالو يتزوجها بحال داك نوع لاتخافيش عليه
م3:سكتو غايمسعنا شي حد ويوصلها لرحمة ونتي عرفاهاا كيف دايرة شوفي غير مرات لوسها لي گطعت معاها لكلام
مزيرة على شفتها ودموع تجمعو فعينيها مع كل كلمة نطقو بيهاا وكسرو بيهاا قلبها...كملات طريقهاا وحد منتابه ليها حيت كلشي راد لبال لرحيل وشي عاطيها لتبرگيگ... خرجات لبرا بكرسيهاا وهي حاسة براسها مخنوقة... هي ماشي مشلولة هي غير متتقدرش تحرك رجليها كيف كانت فلول مي مع الترويض غاترجع كيف كانت وراه كاين تحسن بين فاش فاقت وليوم...تتقدر توقف شوية وبلعگاز تقدر تخطي زوج خطوات غير كاتعيى ولكن بنادم مكيرحمش ولقاو السبة فين يخويو اش هازين... بقات تتبكي بحزن وداك لكلام لي سمعات بقا فيها حيت هي من نوع لحساس ودغيا كتهز فخاطرهاا... عضات على شفتها ومدات يديها حطاها على يدين لكرسي وبكل قوتها ناضت تاوقفات حطات رجلها فالأرض ومع جات تحط التانية حيت لابسة الطالون والتكشيطة تعكلات وكانت اتجي على فمها كون ماشدوهاش يدين قويية مخلينهاا تشبت بيهوم بلاماتحس...
شهقاات فاش كانت أطيح ولكن دوك ليدين لي شدوهاا خلاتهاا تشبت بيهوم بلاماتحس وقلبها كيضرب بالجهد...هزات راسهاا وهي تلقى محمد طه لي كان تيشوف فيها وهو مكمش حجبانو وبهدوء نطق:واش نتي بخير؟؟
بيسان:(بحركات راسها) اه اه بخير
عاونها تارجعات جلسات بلاصتها فداك لكرسي وشاف فيها وفملامح وجهها لي كيبانو ليه باكيين ونطق بتساؤل:واش كنتي محتاجة شي حاجة علاش خرجتي لهناا وتاحد مكاين؟
بيسان:(بتوتر) غير تخنقت فلداخل وصااف
محمد طه:ابون (تبسم ملطف لجو) ههه كلنا (بمزاح) نتوما بعدا عندكوم النشااط ماشي بحالنا ههه
بيسان:(تبسمات)ههه واييه مي واخا هاكا تقدر تمل
محمد طه:سي عندك لحق
سكتو بزوج وكل واحد تيشوف فجيه ومحمد طه عقلو تيگول ليه يسيفط مساج لريان باش يخرج بلفن ويشوفهاا ولكن خافها تعيق ولاولد لحاج يخرج...ولكن دارها فيد الله وسيفطو ليه بتخبية على بيسان لي أصلا كانت ساهية...
محمد طه:"خرج لعندي لبرا وفاش تشوفني دير راسك كنتي تقلب عليا وبلافرطة"
وصل لمساج ومحمد طه بقا واقف تايتسنى خوه مع لباب دالرجال بعيد على ديال النساا... وعلى نيتكم ترزقون كان باغي يلاقي خوه ببيسان صدق هو لي تلاقى مع غزلان لي خرجات تتقلب على بيسو فاش مالقاتهاش لافلحمام ولافلقاعة وگالت تشوف هنا ربما كانت وبالفعل بانت ليها برا وفجنبها واقف شي حد لي فلوهلة لولة ماعرفاتو ولكن مجرد ماقربات وعينيها لمحوه عرفاتو وقلبها دق بالجهد متدكرة اخر لقاء بناتهوم وانهيارها قدامو بديك الطريقة... ومع دلك تجاهلاتو ونطقات:بيسان
ضار محمد طه بزربة غير سمع صوتها تيشوف فيهاا وهو مبهوض من الطلة ديالها الانيقة والبسيطة فنفس لوقت....تكشيطة فالنوااغ مع مك اب تقيل شوية فلعينين وشعرها خلاتو مطلوق مبعد مادارت ليه بابيليز...قربات جهة بيسان متجاهلاه تماما بحال لامكاينش ونطقات بتبسيمة: عييييت مانقلب عليك رحيل بغات تاخد تصاور معانا قبل ماطلع تبدل لبستها
بيسان:كنت غير هنا تانشم شوية دلهواا
غزلان:داكوغ ندخلو دابا
بيسان:واخاا
جاو يمشيو وهو ينطق محمد طه بزربة:غزلااان بلاتي واحد دقيقة
وقفات غزلان وشافت فيه مطلعة حاجبهاا:نعاام اخوياا اش بغيتي
محمد طه:(بسخرية)باغي نهضر معاك اختي
بيسان:(بهدوء)صافي أنا غانسبقك
محمد طه:لاغير خليك تسناايها ودخلو بزوج
قرب محمد طه جر غزلان لي عقدات غوباشتهاا مبعدين على بيساان لي كانت تتشوف فيهوم بهدوء قبل ماترجع تسهى...
غزلان:(نترات يديها) هيييي طلق مني باشمن حق تقيس فياا
محمد طه: غزلان واش هادشي معياااكش؟؟
غزلان:لمعنى
محمد طه:نتي مقصحة راسك بزاف معارفش شنو ندير معاك باش تنسااي ونرجعوو بزوج
غزلان:شكون لي گال ليك أنا باغا نرجع معاك نتااا؟
محمد طه:(خنزر فيها) مگالها لياا حد هادشي درتو لراسي أنا غانرجع معاااك بغيتي ولاكرهتي
غزلان:بزز ؟
محمد طه:اه بزز ولكن لاكان بلخاطر حسن (تنهد) واخا نعيى مانطلب السماحة مغانقدرش نسيك فلي فات حيت عارف راسي تقلت معاك لحساب كلامك داك نهار عمرو خطاني وديما نتفكرو أنااا باغيك اغزلان وباغي نرجع نصلح لغلطة لي درت فحقك نهار ضيعتك بين يدي بسباب حاجة كنت موهم راسي بيها من زمااان...
غزلان:هاد لكلام مبقااش تينفع معايا حيت لي درتيه ماعندو تاعدر
محمد طه:من حقك ولكن اش بان ليك أنا وياك نعاودو من لول بحال لاعمرنا شفنا بعضياتنااا قبل (بحمااس من لفكرة) عتابريني يالاه شفتك فسبوع ولاد ختي وعجبتيني وبغيت ناخد النمرة ديالك
غزلان:(حركات راسها بانزعاج) واش هبلتي اش تتخربق عاود؟
محمد طه:(قرب جهتها عااض على شفتو) ماكدبوش ملي گالو لگمرة تاضوي سماها وملي لمحتك نتي عرفت بلي سمايا غاتنور بيك اجبينة ديالي
مشافش لمساج فاش سيفطو ليه محمد طه فداك لوقت حيت كان مجمع مع شي رجال داير صواب معاهوم وهو راه مكرهش يمشي يزهى مع النسا لي عارف عندهوم لومبيونص من الفيديو لي سيفطات ليه اسماء.. تابدا يقلب على محمد طه لي شافو ملي ناض مارجعش...هز تلفون يصوني ليه وهو يلقى داك لمساج لي مافهمش المغزى ديالو... ورغم دلك نفد هضرتو وخرج السيد تايقلب عليه تابان ليه خوه واقف مع غزلاان تايهضرو وحرك راسو باغي يرجع ساعة قشع بيسان لي كانت جالسة فداك لكرسي وساكتة وكيبان فيها حزينة ماشي كيف مولفهاا... قرب جهتها تاوصل وراها وتحدر بشوية جهة ودنها وقال بخفوت:مال مون دكتوغ ساهية ومقلقة؟
بيسان:(ضورات راسها ونطقات بخفوت) بحال لاهادشي غايهمك
ريان:(تنهد) معلوم غايهمني نتي معرفاش بلاصتك عندي قداش
بيسان:(بلوم وسخرية)داكشي علاش فاش جيت عندك ماسمعتيش ليا وعطيتيني بالضهر
ريان:(عض على شفتو وزاد تكره فاش سمعها من شفايفها واخا مگالتهاش بطريقة مباشرة إلا أنها تتلومو على لكسيدة لي وقعات معاهاا) اه من حقك تگولي هاد لكلام وتسبيني وأي حاجة گلتيها مغاديش نكرها أنا سباب كلشي وكون يرجع بيا الزمان لور كون ماخليتكش تمشي ديك الليلة
بيسان:(بخفوت) ولكن خليتيني (عينيها تغرغرو)
ريان:(جا قدامها ونزل على ركابيه تيشوف فيها وفدموعها لي فعينيها) مغانبررش ليك حيت عارف راسي درت لافوط معاك ولكن نتي عارفة أنا اش هاز هنا (حط يديه على قلبو) من جهتك
بيسان:هادشي مبقاش تيفيد أصلا طريقنا من لول كانت غلاط وأنا ونتاا مصالحينش لبعضياتنا شحال من حاجة طرات وبينات لينا هادشي وحناا تعمينا عليهاا
ريان:(مسح على وجهو) من نيتك أشمن مصالحينش أناا راه مانفرطش فيك مزال شفتي واخاا تگولي لي گلتيه عمري مغانسمح فيك غير بلا ماتعاودي تگوليها
بيسان:مبغيتش الشفقة ديالك
ريان:اشمن شفقة ولاز*ي وراني باغيك سمعتي داكشي لي تتفكري فيه بالله مكاينش ودابا بلاماتبقاااي هنااا ويخرج شي قمقوم يشوفك لياا بلموڤ دخلي امون دكتووغ لداخل وخلي هاد ليلة دوز بخير الله يرضي عليك وملي نعيط ليك فليل جاوبيني بااش نطمن عليك كيف وصلتي (وقف وتحدر باسها فراسها) كوني تسمعي لهضرة
ضار جهة محمد طه وغزلان ونطق بصوت عالي:غيزو (شافو فيه بزوج وهو كمل ) اجي دخليها معاك
بيسان:ماشي بنت صغيرة باش تگول ليها دخلني
ريان:شووو ملي يكونو لكبار يدويو الصغار يسقلو
جات غزلان مخليا محمد طه واقف مخنزر فخوه باغي يطير عليه...دخلو بزوجات وغير غبرو وهو يحس ريان براسو مجرور من لكول دشوميز ونطق بصوت عالي:اتقطعها ويالاه شريتها اصاحبي
محمد طه:أنا مسيفط ليك مساج باش تخرج تشوف بيسان ونتا مخلي غزلان دخل وبعديتها عليااا شنو ندير فجد بوك
ريان:هانتاا فوت ليا غير وجهي وفيما جات مرحبااا
محمد طه:(طلقو) يالاه گلت تاتسمع ليا وباين فيها قتنعات ونتا ضرب ليا كلشي فالزيرو
مشى محمد طه وهو كاعي مخلي ريان تايضحك على هاد الشلاظة لي عايش هو وخوه...
**
ساقت لخبار بكلشي ومقدراتش تيق بلي ختها كانت ناوية تقتل توينز... سرسبات ليها تانيرت لي وقع ونيت بغات تعرف منها واش كاينة شي وحدة من لعائلة لي تقدر تعاون ميس ساعة مكاين حد... تخنقات وخرجات لبرا وتبعاتها أسماء لي حسات بيها ماشي طبيعية
أسماء:رنيم مالك ملي نزلتي من لفوق أو وجهك مقلوب اش تم
رنيم:(ضارت شافت فيها ونطقات بصوت خافت) ميس جات لهنا وكانت بغات تقتل ولاد رحيل
أسماء:(شهقات) هاويلي واااش هادي مريضة كيفاش جات وحنا مشفناهاااش؟؟
رنيم:(عودات ليها)
ميس:ينت لقح*بة (غوتات بجنون) واش هاديك بغاتني نقتللها بيدي واقيلة عاد تهنى ماخلات مدارت ومزال زايدة فيهاا
رنيم:(حركات راسها ونطقات بلوم) عند بالي غير تتهضر وماقصداتش داكشي لي گالت ليا ساعة هي كانت قاصدة وبصح هي مناوياش تحبس
أسماء:اش تتقصدي؟
رنيم:هي سبق وجات عندي وبغاتني ندير يدي فيديها باش نتاقمو من عائلتكوم كلكوم وأنا غوت عليها وجريت عليها ساعة هي دارت لي فبالها
أسماء:(خنزرات فيها) وعاد تادوي علاش سكتي ومگلتيهاش على الأقل نديرو احتياطنا ونتي سكتي وخليتي لكلبة دير مبغات وكون ماسيدرا لي وصلات عند خوتها كون يعلم الله اش غايطرا ورحيل لاعرفات غاتحمااق علاش سكتي ارنيم علااش
رنيم:(غوتات ببكاء) حيت مكنتش عرفااها سكت حيت خفت لاجبت سميتها يتجبدو معاها لمشاكيل لي نسيناا واش عند بالك أنا فرحاانة وعاحبني لحااال نعرف ختي لي من دمي بغات تق تل ولاد رحيل وتكمل مبدااه عمي لمريض وخوياا لي مراضياش تانسبهوم لياا وتبريتهوم...
مسحات رنيم دموعها لي نزلو ومع ضارت لجنب عينيها جاو فعيون رؤوف لي كان واقف وباين سمع لكلام كامل غير من وجهو لي جامد
جمدات رنيم بلاصتها وهي تتشوف فملامح وجه رؤوف لي باين عليهوم الجمود... سرطات ريقهاا ومازولاتش عينيها من عليه كيف دار هو... وأسماء عينيها عليهوم بزوج هي عارفة بلي رنيم ورؤوف مصاحبين وعارفة بلي رنيم عمرها دوات ليه على عائلتها وغير من خلال داك النظرات والجو لمكهرب لي ضاير بيناتهم عرفات بلي خصها تنساحب... وداكشي لي دارت هزات جلايل تكشيطتها ودخلات لداخل وفطريقها صونى تلفونها بنمرة إسلام لي كان باغي يطمن عليهاا... جوباتو بهدوء:ألو
إسلام:صافا ياكما عيييتي
أسماء:لا أنا بخير (تتفكر واش تگولها ليه ولا لا وفلخر نطقات) إسلام ميس كانت هناا
إسلام:(بعدم تصديق)كيفااااش؟؟ بلاتي بلاتي خليك معايا(سمعات صوت الهضرة وشوية بدات تتسمع صوت لكالم قبل مايرجع ينطق بتساؤل ) عاودي اش گلتي؟؟
أسماء:ديك خيتي جات لهنا وكانت نااوية على شر غير ربي حفظ
إسلام:كيفااش عرفتو واش شتو ديك لقح*بة
تايدوي معصب وعينو خارجين باغي ياكل ريتو على ماسمع ومجرد ماتجبد حسها تسيف باقي شمتهاا مباغاش دوز ليه وينساهاا وتيشوف بلي داك لحب س لي دخلات ليه مكافيش لداكشي لي دارت كان خصو هو يتهنى منهاا وياخد حقوو بيديه واخاا يمشي عليهاا لحب س لمهم يرتاح فداخل ديالو ماشي بحال دابا فاش عرفهاا خارجة السيدة وعاايشة حياتها وكتر من هادشي مبغاتش تووب وباقي زايدة فيه...
أسماء:سيدرا شافتها كانت باغا تأدي توينز ماعرفتش ولكن سيدرا عتقات خوتها فاخر لحظة وضرباتهاا وزين العابدين تاهو شافها وكان غايشدها ساعة بنت لحرااام كبات عليه لماا وغفلااتو وكانت معاها شي وحدة عوناتهاا ماعرفتش شكون هي وملي ولد لحاج رجع شاف لكاميرات بانت ليه ملين دخلات وملي خرجات
إسلام:(تيعض شواربو مفقوص ومجنن) هاديك مغاترتااح تانحد لمهاا ياماهاا غير بلااتي عليهاا
أسماء:(خافت من كلامو وقالت) شنو غادير؟
إسلام:نق.تل مها ونتهنى أنا گااع منها ونهني الشعب حيت ديك لقح*بة هادا هو سرهاا مبغاتش توب وتمشي تقووود وأنا غانوريهاا
أسماء:واش هبلتي اش غاتوريها وهي ممسوقاش وماعندها ماتخسر ماشي بحااالك نتا واش نسيتي بنتك باغي تخليها تعيش بلا باها ياك گلتي غاتبدل على قبلها ولاهادشي غير هضرة خاوية
إسلام:(مسح على وجهو) بنتي ندير على قبلها كلشي اأسمااء ومانخلي تاحاجة ضرها غير تهناااي ولكن ديك خيتي باقي بيني وبينها حساااب ماخلصاتوووش..
***
مكانتش بغاتو يسمع هادشي ويعرف داك لماضي لي هي حاولات تخبيه بكل ماأمكن ماشي حيت خايفة يخليها نو هي مبغاتش تهضر فيه حيت مراضيااش على نفسها أن العائلة ديالها موسخة ومريضة... مكيشرفهاش تگولها وكون جا شي حد من غير رؤوف وسولها غادير نفس الشي وراه أغلب الناس لي تتعرف معارفينش ماضيها وتتگول ليهوم أنا من عائلة إدريس وسدات عليهوم لمجال فين يزيدو يطروحو الأسئلة ولكن رؤوف كان كل مرة يسولها وهي تهرب ليه وهو تفهم وماحكرش عليه ولكن كان عندو واحد لفضول علاش هي تتهرب بديك الطريقة؟؟
رؤوف:(قرب جهتها ونطق ببرود) هادشي علاش فيما تنسولك تتهربي
رنيم:(عضات على شفتها) رؤوف
رؤوف:(حرك راسو ونطق بنفس لبرود) من حقك ماتگوليهاش مغانلومكش حيت هاديك حياتك ومن حقك ماتيقيش فياا وتعاودي لياا
رنيم:رؤوف لا ماتگولش هاكا أنا تنتيق فيك والله
رؤوف:تتيقي ههه؟؟ نگولو فلول ماگلتيهاش حيت نتي مكنتيش عرفاني مزياان وكنا يالاه تانتعارفو ولكن من بعد فاش عرفتي نيتي وقصدي علاش ماهضرتيش؟
رنيم:(ببكاء) حيت مكنتش راضية نهضر عليهوم وهوما مادارو تاحاجة فحياتهوم كان صعيب علياا ندوي ارؤوف
رؤوف:وراه تاأنا مكنتش راضي على حيااااتي كيف كانت ومع دلك جيت وعاودت ليك وگلت ليك بلي كنت واحد ولد لحرااام باغي غير حاجتو ولفلوس وبلي بسبابهوم درت لافوط مع خوياا ونكرتو ماخبيت عليك والو باش ماتعرفيش من لبراني هاد لهضرة ويبقا فيك لحاال وتگولي هو معاودش لياا ومتاقش فيااا نتي عارفة بلي لعلاقة ديالنا جدية وماشي ضحك وتفلية حيت نهار لول جيتك وگلت ليك اش كاااين
رنيم:(حركات راسها بانزعاج ودموعها مسرسبين) حط راسك بلاصتي واش غاترضى تگول بلي عمك قت.ل بااك وومك وخوك وختك عارفين وساكتين على قبل لفلوووس واش غاترضى تگول بلي خووك هو وعمك خدامين فلحر ام وعايشين فيه ودارو شلى حوايج فحق بزاف دالنااس أداوهوم عائلة مريضة ماحنات فتاواحد ومنهوم أناا لي ضروني واخا من دمهوم
رؤوف:(غوت فوجهها) لامكنتيش باغا تگوليها متگوليهااش على الأقل ملي نكون كل مرة نسول فيك جيني من لخر وگولي ليا رؤوف متعاودش تجبد معايا سيرة دلعائلة ديالي حيت مباغاش نسمع عليهوم تاحاجة وأنا غانفهم بلي كاينة شي حاجة ونجمع كرررري مانبقاش نسول ماشي نتي كل مرة تهربي وتخليني تنگول مالها علاش تتهرب مني (كمش حجبانو) ولكن نتي عرفتي علاش ماهضرتيش حيت گلتي هادا لاعرف غايسمح فياا ونتي من لخر متيقاش فيااا داكشي علاش سكتي ارنيم...
گال داك لكلام حيت هاكا فسر تصرفها من جهتو... هو راه مكيلومهاش حيت معاوداتش ليه هادشي ولكن لي كان باغي يوصل ليها أنها ماتگولش ليه بالديطاي اش طرا ولكن على الأقل تبين وتوضح أنها عندها مشكيل مع عائلتها ومباغاش تهضر وتجبد سيرتهوم وهو ديك الساعة ايفهم بلي طارية شي حاجة وغايسكت مغايعاودش يجبد لموضوع تاتجي منها وتگول ليه وديك الساعة عادي... أما هي راه الحق معاها تماما لاماهضراتش وجبدات الماضي حيت هي تقصحات بداكشي لي عاشت ولي عرفات... غير موت باها لي قت.لو عمها لي عرفاتو بالصدفة خلى قلبها يتحرق ومقدراتش تقبلها وزيد ملي عارفات مها سكتات هاديك كانت هي الضربة لي هرساتها...نگوولو عاصم وميس يقدرو يديروهاا ولكن مهاا متوقعاتهاش منهاا...
رنيم:(شافت فيه وقالت بهدوء وصوتها منغنغ بلبكاا) مغانلومكش فأي كلمة خرجتيها من فمك ولكن خصك تحط راسك بلاصتي وديك الساعة تقدر تحس بشنو تانحس بيه دابا راه ماشي ساهل عليا ربي عارف شنو داوزت فحياتي.... أنا براسي بعض لمرات تنگول كون غير كنت بنت لحراام ولاكانت هاديك عائلتي...
**
فلقاعة عند رحيل لي شبعات تصاور مع لعائلة وقررات أنها طلع لفوق تبدل عليها بلبسة التانية حيت غاطلع فلعمارية دابا.... طلعات وطلعو معاها النگافات تاوصلات لبيت فين كاينة مها لي معاوداتش تحركات من حدا التوينز خافت لايطرا شي مشكيل تاني... تبسمات ليها رحيل ونطقات: بقيتي بوحدك هناا ماگلستيش گاع معاهوم وحضرتي لسبوع
تانيرت:ماعليش ابنتي تاهنا مزياان وحفايدي أهم من السبوع
رحيل:(شافت فسيدرا لي كانت ناعسة فوق لفوطوي لي تم وقالت بحنية) نعسات لحبيبة ديالي
تانيرت:يااه عياات وبدلت ليها ونعسات نيت حسن ترتاح وسهير بزاف راه خااايب
رحيل:غانبدل دابا حيت غانطلع فلعمارية
تانيرت:شحال من لبسة بقات ليك؟
رحيل:هادي ديال دابا وديال لعشا وصاف ياكما فاقو باغيين يرضعو؟
تانيرت:اه رضعتهوم ورجعو نعسو دابا عطيهوم يرضعو باش مايبكيوش تاني
دخلو النگافات وعاونوها تازولات ديك تكشيطة لي كانت لابسة مع لزاكسيسوار ولاحت عليها بينوار وسبقات ولادها هوما لوليين رضعاتهوم مزيااان تاشبعو هزاتهوم شوية تتبوس فيهوم وتشم ريحتهوم وضحك ليهوم وتانيرت تتبسم ليها وتنهد.. وتتمنى هاد ليلة تكمل على خير ومبغاتش فرحة بنتها بولادها طفى... عطات وقت لولادها عاد ناضت تلبس لبسة تانية لي كانت تكشيطة دلموبرا فالبلوماغين... كانت التكشيطة هماوية وكلها منبتة بلجوهر تتبري... دارو ليها لزاكسيسوار ديالها وجات لبنت لي عاودات ليها لمك اب وحيت نوح مكاينش عكرات واحد تعكيرة بلحمر بردات فيها غدايدهاا وتدعي ربي مايجيش يشوفها دابا لمهم دوز هاد ليلة وديك الساعة يوقع لي يوقع... أصلا كاينين غير النساا يعني ماشي شي حاجة لي غاتعصبوو... تبسمات لمهاا لي بقات تتقرا عليها لقرآن وترقيهاا وجات لمصورة خدات ليهوم تصيورات بزوجاات وخدات ليها تصاور مع توينز تاهوما عاد نزلات وصوت نگافات مسموع على الجهد...
كانت مبسمة وهي تتشوف فلعيالات واقفين والوسط دايرين العمارية لي غاتركب فيهاا والنسا لي غايهزوها بلباسهوم لموحد... وقفات حدا لعمارية تتصور وكلشي حاضيها كينممو وشي يهضر مع شي معجب من هاد السبوع لي بحال لعرس...
كيتسمعو لوشوشات دالنساا " كولنا ولدنا ومادرناش هاد الحالة" "اوا بصحتها السيدة راه راجلها عندو لي مايتحرق بالسيف ماتخسرهوم فهادشي" " اوا راه غير الضياع دلفلوس كون دارت السبوع فالرياض وهنات راسها" "ربي كيعطي لفول لي ماعندو ضرااس" "شوفي شوفي كيف طلعات فنة ولحق يتگال ولد الحاج واخد الزين"
وشلى كلام تگال بين النساا لي حاسدين ولي غايرين ولي عاجبو هادشي... ورحيل ممسوقة لحد عايشة نهارها وفرحانة بولادها...ركبات فلعمارية وبدا الأوركيستراا تيحيح الطرح وهي مبسم تاتشير...
🎶
او هادي ساعة مباركة ماتشراشي بلمااال فيها لالة النفيسة زينة النساا
الالف مبروك الالة الزياادة هادي الساعة لي كنت تانتمنى لهاا
اسوط ياريح بنت بلادي والدة لمليح اسوط ياريح المغربية والدة لمليح
هادي دار الشرفة عمرها ماتخوى جينا نشربو أتاي ونعاودو بلقهوة
هادي الشرفة عمرها ماتخوى جينا نشربو أتاي ونعاودو بلقهوة... 🎶
مكاينش شي واحد لي منايضش تايشطح وتامن تانيرت كانت تاطل من لفوق وفنفس لوقت رادة لبال لبيت لي فيها توينز...
ولكاميرا مركزة على رحيل لي كاتباان فلبلازمااات لي فلقاعة دالنساا وهي ضاحكة تبان صف سنانها... ضربو بيها ضورة فلعمارية قبل ماتنزل وتمشي لبلاصة فين غاتجلس مخلية لعيون حاضيااهاا...
جالسين بزوج فالطوموبيل ديالو وساكتين مكيهضروش من غير صوت شهقات رنيم لي تيطلعو مرة مرة... هادشي لي طرا ليوم وكلامها مع رؤوف خلاها تعاود تفكر ماجرى ليها فحياتها من نهار وعات وداكشي لي كانت عايشة شحال هادي...
حطات راسها على زاج ونطقات بصوت خافت:كنت باقي برهوشة عاجبني راسي ولحياة لي عايشة ولي عمري حسيت براسي خصاتني فيها شي حاجة لي بغيتو كان يحضر لبااس اخر مكاين تلفون لبيسي كلشي كان عندي كنت ديما تنفوح على صحاباتي بخويا جااب ليا وخويا داني وخويا دار ليااا... عايشة حياتي ممسوقاش لتاشي حد..كنت عايشة غير مع خويا وماما وختي ولكن تزوجات وعمي (ضحكات بسخرية)هه هاداك لي حاشا واش يستاهل هاد لكلمة مكنتش تانشوفو بزاف حيت أغلب وقتو تايكون برا ولا فلحب س ههه اه لحب س كان تيدخل ليه شي شهورة قلال ويخرج يكمل حياتو ويرجع يدخل عادي بحال لامشى غير لشي بلاصة وسافر وكل مرة يخرج يستقبلوه بلحليب واالتمر بحال لاجاي من لعمرة ... عشت فهاد الحياة سبعطاش لعام تانهار لي غادير يتبدل فيه كلشي ( تنهدات ومبغاتش تجبد سيرة رحيل وشنو داز عليها حيت داكشي مامنحقهاش تگولو ليه هو) شفت ظلمهوم بعيني فحق نااس مدارت والو بحال لاگلتي عيني تحلو على داكشي لي كنت معمية عليه وممسوقاااش ليه... ولكن لي كان تيقصح ولي هلكني كتر هوو نهار سمعت بلي باااباا لي تحرمت منو فحيااتي ولي ماعشتش معااه مااات بسباااب هادااك لي سميتوو عمي...قتتلوو حيت مكانش باغيه يوقف ليه فطريقو تخيل معاياا باش حسيت ملي سمعت هاداك لكلام وملي عرفت بلي لي ولداتني كانت عارفة ومع دلك سكتات وقبلات تعيش مع لي قتللل راجلها فدار وحدة أو ولدها لي هو خوياا كان عارف تاهو وبقاا ساكت ومن لفوق خدام معااه فخدمتو لحراااام ولي تاحد مغايرضى عليهاا... مكانش هادشي سااهل عليا ولي زاد صدمني فاش شفت قصوحية قلبهوم مع شحال من حد أداووه بدم بااارد وخرجو على حياة شحال من واااحد وختي لي من دمي خاااانت راجلهاا وقتلاات بنتها بيديهاا... هادشي مكنتش قابلاه واخا كنت بنتهوم ومن دمهوم ولكن مكنتش باغاا هادشي ومرضيااش بيه ونهار جاتني لفرصة نخرج من عندهوم درتها ومافكرت فتاحد... عطيت بالضهر لكلشي وكملت حياااتي كيف أنا باغاا حياة نقية بلحلااال وعمي إدريس حل ليا دارو وضايفني عندو ودارني بنتو تصور معايا ديك لعائلة لي متاتجيني تاحاجة دارو فيا لخير وبغاوني كتر من هادوك لي من دمي... معاهوم حسيت براسي راه عايشة وسط من لعائلة دبصح مترابطة وباغا لخير لبعضياتها وملي شي واحد فيهوم يضر يتقصحو هوما ويوقفو معاك ويساندوك وينصحووك (شافت فيه ونطقات بصوت باكي) أنا ماعنديش عائلة وهي ماتت ولكن لاسولتيني على شكون عائلتك غانجاوبك بلي هي عائلة التجاني
نطقات بكلامها لخر وحلات لباب خارجة من الطوموبيل مخليااه جالس فبلاصتو وعينو ماتبعينها وهي داخلة لقاعة وهضرتها لي نطقات بيها ولمرارة باش دوات ماغفلش عليهاا...
***
وصل وقت لعشاا وكلشي تقاد فبلاصتو ورحيل هازة تكشيطتها الگرونة وطالقة شعرها مع تاج ومك اب نفسو مبدلاتوش...كاضور بين الطوابل وترحب بالنساا ودير الصواب معاهوم تاكملات داك لعدد ديال الطوابل عاد مشات تجلس مع لبنات فطبلة خاصة بيهوم...كانت كل وحدة ساكتة ومهمومة وغير شافوها تبسمو وحيدو داك الطاقة السلبية ورنيم مبعد معاودات لرؤوف رتاحت مغاتنكرش بلي حسات براسها زولات واحد الجبل تقيل فوق كتافهاا... السرباايات جايبين لعشاا بساطل دلحوت ودجاج ونص حولي مشوي... كلشي كلى وشبع ولخير مدفگ... وفاش وصل لوقت كلشي ناض غادي ورحيل طلعات لبيت باش تبدل عليهاا...كانت تتموت بالنعااس وماكرهاتش طيح وتنعس ولكن عارفة راسها غاتسهر مع توينز تاني لي شبعو نعاس داباا... لبسات عليها عباية فلبلونكاسي وصندالة أو وجهها ممسحاتوش خلاتو كيف هو ماعندهاش لوقت حيت نوح تيصوني عليها باش يمشيو...برا عامر بطوموبيلات ولي عندو شي مرا وشي عائلة راه داهوم...تابقاا غير نوح وعائلتو وعائلة إدريس...
قربات بيسان لطوموبيل رؤوف بكرسيها وجا نوح حل ليها لباب وهزها وقال بمزاح:ماشي تقاليتي على لبارح
بيسان:(ضحكات)هههه لبسطيلة واللحم دارو خدمتهوم
قادها وركبو لعائلة شي عندو شي عند نوح تاشافها خارجة ومشات سلمات مع باهاا وخوتها وقربات جهتو هزات عينيها ولقاتو تيشوف فيها بعيون كيف النسر... عارفة راسها اش دارت ومع دلك فرفرات عويناتها وقربات جهتو ناطقة بهمس:نوحينو كيف جيتك؟
نوح:(تحدر جهة ودنها وهمس ليها بصوت بااح خااتر) واحد لكريدي غاتخلصيه بعداا ليووم
رحيل:(ضحكات بخفوت) ههه وكانو غير النسا أويلي (كملات بدلع) وزايدون ياك كاندير ليك خاطرك ديما وعمري كترت المكيااج انوحينوو واش مانستاهلش ليوم دير ليا خاطري زعمة
نوح:(حاصرها بنظرات عيونو لي كيغليو عليها وقال بصوت أجش) نديرو ليك لخاطر ليوم الفتنة ديالي واخا نبقاو حنا بلاخاطر...
تبسمات من كلامو لي نطق بيه وكيفاش دار ليها
لخاطر واخا راه عارفاه فهاد الأمور مكيبقااش يتساهل فيهوم... ولكن حيت لبوم مميز خلاها ودار عين ميكة... رجع تحدر جهتها ونطق بصوت خافت جدي:طلعي لبلاصتك وماتنزليش مزال يالاه وهاد لمرة دوزتها لمرة الجاياا مغادوزش الفتنة
حركات راسها باه ومشات طلعات نيشان لبلاصتها جلسات مبعد مامدات ليه إسحاق باش يأنسطاليه هو وخوه وداكشي لي كان...
كلشي شد بلاصتو وتانيرت دات معاها سيدرا باش تبات معاها مور ماهضرات مع رحيل...كل واحد شد طريقو لدارو وهاد النهار مغايتنساش لبزاف منهوم... حيت كل واحد وشنو طرا ليه فيه غزلان لي كلام محمد طه وتغيرو الجدري معاها خلاهاا تستغرب وتسائل علاش هو عاد تبدل وعاد عرف يدوي...ملي هي كانت بين يديه وكانت معاه علاش مكانش عارف قيمتهاا... هو السبب لي خلى هاد لعلاقة تسالي قبل ماتبدا حيت كون ماغلطش فحقها بداك لكلام وجرحها كانت الحياة ديالهوم غاتكون غير... اه بصح غلطو بزوج ولكن قررو يصلحو داك لغلط وينساو اش طرا... بقا فيها لحال حيت ماخرجش داك لاكلام لي هي كانت باغا تسمعو تافات لفوت وهي وياه تفارقو... ماعرفاتش ولكن واخا داك لهضرة والتصرفات لمسو قلبها ولكن مغاتنكرش بلي مفرحاناش بيهوم... وفجيهة لخرى رنيم لي كاتفكر فشنو غادير ميس وعليااش ناوية وهي عارفة بلي مغاتحبسش هنا وغاتزيد تكمل ودير ماكفس...أما موضوع رؤوف فماعمراتش بيه عقلها بزاف حيت تتشوف راسها ماغلطاتش فحقو حيت هي ماخباتش عليه لحقاش مكتيقش فيه كيف گالهاا بلعكس هي مراضياش وراه وضحات ليه كلشي وعاودات ليه وهو دابا لي غايقرر لابغاو يكملو مرحبا لامبغاوش الله يعاون واخا من قلبها غايضرها لحااال حيت تتبغيه وتعلقات بيه ولقات داك لعوض والنقص لي كان خاصها فحياتها فيه ولكن مغاتفرضش راسها عليه وهو مباغيهااش صافي لامشى مغاتبكيش عليه وغاتكمل حياتها عادي...ولكن قبل خصها تعرف ميس عليااش مطوية وشنو فبالها دير باش ماتخليهاش تأدي باقي حد واخا تجي هي فيها الدقة لمهم تاحد مايتأدى بسبابها...
وصلو لدار ونزلات معاهوم غزلان لي غاتبات حيت مشى لحال ومبغاوش يخليوها تمشي بوحدها فهاد لوقت واخا هي أصرت ولكن ماخلاهاش إدريس... نزل محمد طه هاز سيدرا ودخل نيشان طالع لبيتو يحطها تم... ولبنات بزوجات طلعو لبيت رنيم وغزلان تفكرات يامات كانت هي وياها مشاركين لبيت وعايشة هنا توحشات دوك لياام وماكرهاتش يرجعوو ومغاتكدبش ولكن حسات بقيمتهوم ملي سكنات بوحدها لاحنين لارحيم...
بدلو عليهوم ورنيم هزات تلفونها تتشوف ماصونااش وماسيفطش مسااج تنهدات واخا داك لهضرة لي گالت مع راسها وكيفاش قنعات راسها بلي مغايبقاش فيها لحال وغاتكمل عادي ولكن دابا فاش تحطات قدام الامر لواقع بقا فيها لحال...
غزلان:واش تخاصمتي مع رؤوف؟
رنيم:(بهدوء) هوو عرف كلشي (تنهدات)عاودت ليه على عائلتي وعلى كلشي اغزلان حيت سمعني فاش كنت نهضر مع أسماء(عاودات ليها)
غزلان:(حلات عينيها) ياربي تحفظ حيت دازت سالمة وماطرا والو اجي واش رحيل عارفة
رنيم:لا معارفااش ولد لحاج گال لخبار مايوصلوهاش حيت مباغيش فرحتها بولادها تهرس وتخااف عليهوم
غزلان:بصح ديك لفرحة كلها لي شفت فوجهها ليوم غاتهرس لاعرفات ولكن راه ختك زادت فيه سمحيليا ولكن خص يديرو ليها حل
رنيم:علاش انسمح ليك راه گلتي لي كاين وزايدون أنا براسي مراضيااش هاديك تكون ختي مافهمتش كيفااش تتفكر بلاصة ماتندم وترجع لطريق باقا زايدة فيه رحيل بااش أداتها راه تريكتنا لي أداوهاا وإلا كان شي حد من حقو ينتاقم هو رحيل وإسلام لي تقصحو بسباب تريكة الجوهري
سمعو دقان فلباب وناضت غزلان حلاتو مع كانت ساداه بالساروت لقاتها أسماء لي تاهي طار عليها النعاس...
أسماء:عاودتي ليها
غزلان:دابا شنو غاديرو
رنيم:شكون عرف الله يخرج هادشي على خير
أسماء:كون غير طاحت بين يدي كون وريتهاا
رنيم:(تكات بلاصتها وقالت بتعب) نهار لي غانتهناو منها هو نهار لي غاتموت فيه
أسماء:(تبسمات وقربات هي وغزلان) اش درتي مع بوركابيك
رنيم:يمكن تفارقناا
أسماء:وايلي واش ساليتو؟
رنيم:مگالهاش بفمو ولكن ماعيط ليا وماسيفط تامسااج وراه لمعنى بااين
أسماء:مايبقاش فيك لحال الرجااال كاملين ولااد لقح*اب
بقاو لبنات معاها تايموتيڤيوها شوية باش مايبقاش فيها لحال تاعياو ومشاات أسماء تنعس وغزلان تاهي نعسات جنبهاا وبقات غير رنيم لي حالة عينيها فالظلام ومع جات تغمض عينيها سمعات صوت نغمة لمساج لي وصلها وهي ضور قافزة وهزاتو فوق طابل دونوي مع شعلاتو طلع ليها مساج من عندو فيه
"أنا باغيك نتي ماشي عائلتك"
ملي دخلو وهي تاتنتر وتغوت بحال المسعورة كاع لمخاد ديال ديك الصالة روناتهوم وماكرهاتش تريب ديك الدار بقوة لفقصة لي شداتها...ولخرى جالسة تاتسمع ليها وتشوف فيها وفحالتها بلاماتقرب منهاا... عياات ترطى وتغوت وفلخر جلسات تتنهج وتسوط بحال شي لفعة وعينيها حمرين تاخضوريتهوم مبقاتش تباان عضات على شفتها وقالت بصوت هاز كمية كبيرة من لحقد: كنت قريبة نوصل لداكشي لي بغيت ولي كنت نتسنااه ولكن ديك لبرهوشة خسرات ليا كلشي اااااااع
ص:غاتكون دابا لخبار وصلاتهوم وتاهاداك لي كان تابعك على شوية كان غايشدنا
ميس:(خسرات سيفتها) هادااك ولد راجل ديك لقح*بة اووووف ديما عندها الزهر فلول سيفطت ليه تصاور باش يشك ويطلقهاا وماوقعش داكشي لي بغيت ودابا فاش كنت باغا نقتل ليها ولادها حصلتني بنتهااا
ص:ميس هادشي لي راك تاديري فيه مصالحش زوج مرات فلتات ليك لمرة الجايا راه تقدري تشدي ونتشد معاااك تاأنا
ميس:(خنزرات فيها) لاماكنتيش غاتعاونيني غير گوليها وسيري أنا مغانحبسش لي فراسي غانديرو ولاكان على لحب.س ندخل ليه وماعنديش مشكيل حيت ديجا جربتو ومبقاش يخلعني لمهم هو نشتت ليهوم الشمل ومانمشي تانديرهاا ونخليهوم يعرفو اش كانسوى لاعند بالهوم تهناو من عائلة الجوهرى أنا باقي كاينة ومغايتهناوش مني
ص:وطليقك؟
ميس:(بقات تتحرك رجليها بهسترية) تاهو مغانتهنى تانرجعو لياا (بجنون ومرض) هو باقي تايبغيني إسلام عمرو نساني وعمرو غايقدر يلقى شي وحدة تنسيني فيه ههه سينين وهو تابع رضايا وماخلى مادار معايا باش نشوف فيه ونسمح ليه ( بغرور وجنون تبسمات تبسيمة مريضة وقالت) عارفااه مقلق مني أو واخد موقف على داكشي لي طرا ولكن غير يشوفني غاينسى كلشي اااه غاينسى كلشي
ص:ياك هو مزوج بخت رحيل ؟
ميس:هاديك خيتي غير ضايرة بيه وزايدون هوما أصلا مفارقين من شحال هادي وهو عايش بوحدو من نهار حصلها تتخونو مع واحد اخر ضرب عليها وهادشي باين بلي هو مكيبغيهااش وغير مدوز بيها لوقت
سكتات صاحبتها تتشوف فيها وهي ناضت غادة لبيت وعقلها متيق هادشي لي وهمات بيه راسهاا... كدبات لكدبة وتيقاتها وباقي عند بالها راه إسلام هو نفسو لي كانت مزوجة بيه... تيقات راه باقي يبغيهاا ومعرفاش بلي لاوقفات قدامو دابا يحفر ليها قبرها ومايحنش فيهاا... جلسات فوق نموسيتها وبقات تتحرك راسها بهسترية وهي تتفكر فهادشي لي طرا وداكشي لي باغا ديرو هي دابا ماعندها ماتخسر... تتشوف بلي كلشي كمل حياتو إسلام لي واخا خانتو وقتلاات ليه بنتو راه دابا تزوج وأسماء حاملة ورحيل لي تاهي بدات حياة جديدة مع ولد لحاج أو ولدات وعايشة معززة مكرمة گاع لي تبغيه راه عندها... وهادشي ميس مبغاتوش واخا راه منطقياا رحيل مدارت ليها والو ولكن هي تتشوفها السبب فداكشي لي طرا معاها وبلي من نهار دخلات لعائلتها وهي تروون وبلي تارنيم بعدات عليها بسباب رحيل...
ميس مريضة ومرضها وهوسها ممخليهاش تشوف الحقيقة والواقع لي هي عايشاه وبلي أي حاجة طرات ليها هي سبابها وبيديها دارتها وتاحد ماغصبها عليها تغرات بزينها وباهتمام إسلام ولحب ديالو وعند بالها راه غايبقى كيف عرفاتو نهار لول... ونهار دخلات لحب.س وعااااشت ديك لفترة لكحلة فيه وشافت شلى حوايج خلاوها تصدم تكرفصو عليها لي معاهاا ورجعوها بحال لخدامة ورزاوها فزينها ملي خسرات ليها وحدة فيهوم وجهها والضربة باقي لدابا تابعاها وفيما تشوف راسها فلمرايا تبان ليها قدها قداش خلاتها تبان بحال شي وحدة موسخة وگاع داكشي لي كانت عايشة فيه من عز ودلل مشى ومبقاش وتحكات وهادشي بلاصة مايخليها تحل عينيها وتعرف بقيمة اش خسرات غير مزادت فيه وزدو عينيها تعماااو... حطات فبالها أنها غاترجع حقها منهوم كاملين وخصوصا رحيل لي حقدها من جهتها ماعندو تامبرر منطقي...
ميس:(بحقد) أنا غانرجع حقي منكووم (قاست وجهها وعينيها فلمرايا معوجة راسها ونطقات بنبرة خافت) أنا زوينة وغانبقا ديما زوينة
صباح جديد وشميسة سطعات فسماها...حلات رحيل عينيها وهي حاسة بداتها مدگدگة من سبوع لبارح لي بردات فيه جنونها بالشطيح وبگاع لي تبغيه خاطرك... وغير جاات ضرباتها بنعسة واخا توينز تيفيقو مرة مرة غير تترضعهوم وترجع تنعس... ضارت تتبسم فاش بانو ليها ناعسين فوق النموسية جنبهاا...عيات لبارح بنوض هز حط ونعساتهوم بينها وبين نوح لي فاش حط راسو ماعاودش فاق وعرفاتو عيى حيت هو لي تكلف بكلشي وهاد ليامات كان يمشي مع بيسان لترويض ويشوف اش خص فالسبوع... ناضت تنجمع شعرها وتفوه وبزز مشات طرفات حالتها وخرجات بعيون منفوخة تتجر بانطوفتها غادة تفيق نوح لي باقي ناعس على ضهرو ولغطا مغطي غير نصو تحتاني مبين ضهرو لعريض...تبسمات ومشات هزات إسماعيل لي ملبساه غير سروال لداخل مع ليكوش وتيشورت صافي... حطاتو ليه فوق ضهرو مكمش فيه بحال لقميلة وهزات تلفونها تتصور وضحك...
رحيل:(تحدرات تتبوس فحنكو) نووحينووو (تتقيس شعرو وترجع تبوس فيه) لحبيب ديالي ماي بلو آيز يالاه فييق راه مشى لحال (حل عينو نص حلة تيحس بشي حاجة تقيلة على ضهرو...تبسمات ليه رحيل وكملات هضرتها) عنداك ضور وتفلعص ولادك راه إسماعيل ناعس فوق ضهرك
نوح:(ببحة رجولية) شحال فالساعة؟
رحيل:لحداش ونص (هزات إسماعيل تتبوس فيه وتمسح على شعرو لقهوي) يالاه نوض دوش وخلينا نزلو لتحت نفطرو راه فياا لموت دالجووع
ناض تايطرطق فعضامو غادي بلحفى جهة الحمام خدا دوش صحصح بيه ولبس عليه شورط فوق منو فوقية فلكحل وخرج تيرش فريحتو لقاها لابسة عباية دار طويلة مع زيف حيت باقي كاينين شي وحدين من عائلة رحمة...خلات لولاد ناعسين حيت مرضعاهوم ونزلات هي وياه لتحت...
جالسة هي وسناء تيشربو لقهوة وباين على سناء ماشي فبرجها غير ساكتة وتتنهد تانطقات رحمة بهدوء:مالكي واش تخاصمتي نتي واليازيد؟
سناء:تت هاد الشهر درت تاني تيست وطلع سلبي
رحمة:(حطات يديها على يد ختها وقالت بحنية) بلاماتبقاي هازة لهم بزاف راه باقي صغيرة وإن شاء الله غاتحملي
سناء:أنا خايفة ارحمة لوقت تيفوت ومبقاش بزاف ويقدر مانحملش (عضات على شفتها)
رحمة:ماتگوليش هاد لهضرة اسناء ودخلي لراسك بحال هاد الأفكار وتمرضي صحتك ونفسيتك ياك فاش دوزتي الطبيية قالت ليك ماعندك تامشكيل وتقدري تحملي عادي
سناء:(حطات يديها على راسها تالفة) ماعرفتش فاش تانمشي عند الطبيبة تتعطيني أمل ولكن فاش تاندير تيست كل مرة وتانلقى نفس الحاجة تاتشدني لخنقة ارحمة وكنحس بليازيد تاهو باغي نحمل واخا مكيگولهااش ولكن فاش تانگول ليه غاندير تيست ونجربو تانشوف لفرحة فعينيه ولكن مؤخرا مابقيتش تانگولها ليه وتانفضل أنني نديرو بيني وبين نفسي مباغاش نعطيه تاهو أمل وفلخر مايكون والو...
رحمة:وايكون خير إن شاء الله يكون خير
سكتات سناء وغير تتنهد خايفة أنه يفوتها لوقت وماتبقاش قادرة تحمل وهي فأبواب الربعينات... واخا راه الطبيبة قالت ليها بلي كلشي عندها طبيعي ولكن نفسيا عندها تخوف..وكل مرة تعطل ليها ليغيگل تاتفرح وتگول راني حاملة وغير تادير تيست ويخرج نيگاتيف تما گاع أماالها تيتهرسو وخاطرها تايتزير عليها...
***
دوزو داك النهار لي قررات فيه عائلة رحمة ترجع لفااس بحكم السبوع سالى وماعندهوم مايديرو مازال هنا وشي تابعاه لقرايا وشي لخدمة من غير عفاف وباها لي غايبقاو مع رحمة يدوزو شي يامات يبدلو لجوو... ودازت ديك ليلة وتبعوها يوماين خرى لي كل واحد رجع لروتينو وسيدرا باقي عند جدها تتهضر مع رحيل غير فتلفون... جلس معاها إدريس وقراها مزيان أو وصاها ماتگول لمها والو على شنو طرا باش ماتخلعهااش وتاهي سمعات لهضرة وماحكراتش كيف مولفة...
ليوم كانت لحركة فالرياض غير وهادشي بيسان لحظاتو وهي غادة مع رؤوف لترويض حيت هو لي غايوصلها ليوم... هزها تاركبات وهي مبسمة:غاتفششوني نتا ونوح وغاتوحلو فيا
رؤوف:(تبسم ليها وباسها فحنكها) على شحال من بيسو عندنا
بيسان:وحيدة هي أنا ههه اجي غاتسناني تانكمل الترويض ولاغاتمشي لخدمة وترجع ليا
رؤوف:لانتسناك خوك وصاني مانفرقكش رجلي على رجلك
ضحكات بيسان وطلقات موسيقى من تلفون رؤوف لي كسيرا تاهو ناشط ومرتاح وباينة فيه غير من وجهو لمبسم...
دق لباب دجناح رحمة ودخل نوح بخطوات هاديين ورحمة غير شافتو تبسمات وحطات تليفونها فوق الفوطوي ودارت رجل على رجل وقالت بتبسيمة:نهار كبير هادا ملي جيتي عندي المرضي
نوح:(باس راسها)يمّا لباس
رحمة:لحمدلله ماخدامش ليوم
نوح:مامشيتش (حك لحيتو وقال بهدوء) باغي نهضر معاك فواحد لموضوع
رحمة:الله يسمعنا خبار الخير
نوح:كل خير كل خير ايمّا هاد لكلام عندو علاقة ببيسان
رحمة:(بخوف) ياك لباس مال ختك؟
نوح:(بخشونة) ختي ليوم غايجيو شي ناس باش يدويو فيها
رحمة:(بفضول) وشكون هادو وفين تتعرفهوم؟
نوح:(شاف فيها وقال بصوت خشن) تانتي ايمّا تتعرفيهوم ومزياان (كمشات حجبانها وهو سترسل كلامو) ولد سي إدريس رياان...
~~شوفتها وهي فديك لحالة ولحزن باين فوجهها خلى قلبو يضرو عليها... ملي رجع لقاعة دالرجال وفبالو حاجة وحدة حلف تايديرها ومايتهنى هاد ليلة تاياخد لجواب لي باااغي... بان ليه ولد لحاج واقف مع السرباي حيت قرب يتسربى لعشا....تمشى عندو بخطوات موزونة تاوصل لحداه وتنحنح تااضار نوح جهتو وشاف فيه بنظرة متسائلة..
ريان: ولد لحاج نقدرو ندويو أنا ويااك
نوح:ياك لباس؟
ريان:(حك جبهتو) عارف بلي يقدر ماشي وقتها ولكن مبقيتش قادر نصبر (بجدية) أنا باغي نعاود نطلب يد ختك من عندك عارف بلي ترفضت فلمرة لولة ولكن هادشي مغاديش يحبسني ويخليني نتراجع أنا باغي ختك ومن بين گاع بنات االناس هي لي بغيتها تكون مرتي...
نوح:(خشى يديه فجياب سروالو ونطق بهدوء) لاباغي لمعقول مرحبا من هنا ربعيام جيب داركوم واجي~~
حلات عينيها على جهدهوم مجرد ماسمعاتو نطق بسمية ريان ممتيقااش... فمها نشف ولكلام مابغاش يخرج ليها... بقات غير تتشوف فيه كيفاش مبرد وكيفاش لاح كلامو ليها وتتگول مع راسها راه واقيلا ماسمعتش مزيان السمية..
رحمة:(نطقات بصوت متسائل) شكون قلتي؟؟
نوح:ريان خوو رحييل
ضورات وجهها وعضات شفايفها مغددة ملي زاد أكد ليها بلي داكشي لي سمعات هو لي كاين... رجعات شافت فيه وهي مخنزرة وقالت: وأنا اخر وحدة نعرف؟
نوح:(هز حاجبو) يمّا اش هاد لكلام؟
رحمة:(بان فيها تعصبات ومقدراتش تحكم فأعصابهاا) مالي كدبت نهار بغيتي تزوج درتي نفس الحاجة جيتي وحطيتيني قدام الأمر الواقع وگلتي ليا راني غانخطب ودابا درتي نفس الشي مع ختك (بدات دمع وقالت بحرقة) واش أنا ماشي مكوم ومكنستاهلش تجيو تشاوروني؟
نوح:(مسح على وجهو وضار لجهة لخرى وتمتم) أستغفر الله (شاف فيها ونبرة صوتو بانت فيها الجدية) مگلتش ليك جاااين يديوهاا راه غايجيو غير يهضرو هضرة أولية السيد جاا قصدني نيشان وطلبها من عندي
رحمة:وصافي غير طلبها گلتي بسم الله وخليتيه يجي
نوح:(جمع لوقفة على غفلة تاقفزهاا ورجعات تكات لور وهو نطق بانزعاج) واش عند بالك معارفش مصلاحة ختي فين كاينة؟؟ راه كون ماشفتوش ولد الناس ويستاهلها مكنتش غانخليه يجي هاد لمجية وزايدون نتي خصك تفرحي حيت بنتك جا رزقهاا
رحمة:(ربعات يديها وقالت وهي معاجبها حال) نتا معارفش أنا باش كانحس نتوما ولادي لي عندي نتا وختك وخوك وبحالي بحال أي أم باغا تفرح بولادها وتكون هي الري والشوار ماشي بحال شي رجل كرسي منافعة بوالو (مسحات دموعها لي نزلو) بنت وحدة لي عندي ونهار يجيو لخطاب أنا اخر وحدة نعرف
نوح:(حط يديه فوق السمطة دالسروال وتيحك سنانو بلسانو) داكشي لي تيضور فبالك غير نحيه وماتبقاايش تمرضي بيه صحتك ايمّاا وبلاماتخليني نجبد شي حوايح مايعجبوناش لاأنا لانتي ولهضرة لي عندي راه گلتها السيد قصدني ولمقصود الله وجاني من الباب وبغاا بنتك وأنا قبلت يجي هو ودارهم زعمة راه حنا عائلة وغاتكوني عارفة عائلتو الله يعمر ليهوم الدار نااس ملاح ومافيهومش الدغل وتخرشيش
رحمة:اييه ماكدبنااش وعائلتو الله يعمر ليهوم الدار ومتحتاجش تگولها ليا ولكن هو واش يصلاح لبنتي واش فنظارك غايكون ليهاا الراجل لي نأمن ليه بنتي يصونها ويتهلى فيها ويوفر ليها گاع لي باغا بنتي كبرات فلعز ومابغيتهاش تكرفص
نوح:(شاف فيهاا بنظرة مطولة قبل مايقول بهدوء ممزوج ببرود) واحد لي من نهار بنتك دخلات لسبيطار عمرو خطااها وبقاا معاهاا تاحلات عينيها اش كاتسنااي منو مزاااال يدير راه تيگولو الناس لقدام فالشدة يبانو ولاد لحلال ولعز لي هازة ليه لهم راه كابرين فيه..
رحمة:(بفقصة) وتاداك الطبييب لي گلت ليك راه باين فيه ولد الناس واخا گلتي لياا مانبقااش نجبد سيرتو گدام بيسان ومانجبدهاش گاع قدامك ونهضتي فيااا
نوح:(عض على شفتو بفقصة) ديك لمرة هضرة على هاد لموضوع ولكن نعاودها نيت دابا ايمّا داك خوناا لي فارعة بيه مخناا ولي عند بالك يصلاح لبنتك ماخلى ماگال عليهاا وطعنها فشرفهاااا (خرجات عينيها مصدومة وهو كمل بعصبية واضحة من ملامح وجهو) ماگلتش هادشي ديك لمرة باش مانفقصكش وهزيت ليك لهم ولكن نتي تتحكي على الضبرة ايمّاا (استغفر فنفسو وشاف فيها ببرود دغياا تقلب كيف الزمان) كلام واحد عندي راه گلتو ليوم فليل غايجيو الناس لعشاا مانبغيش شي بلان ماهوااش ايمّاا نزلي شوفي اش خاص وأنا غانوصيهوم يجيبو التقدية وطلقي لبشاارة راه فرح بنتك هادا...
خرج من عندها مخليها باغا طرطق من لخبار لي عرفات ولي مكانش يطيح ليها على لبال...هزات تلفونها ودوزات لخط لسناء تشكي عليها حيت هي لوحيدة لي غاتسمع ليها وتفهمها...مع تحل لخط وهي تبدا رحمة تشكي:عتقيني اسناء لي كنت خايفة منو طحت فيه وليوم جايين لخطاب وعرفتي شكون داك الشمكاار لي مبغيتوش ليها خوو رحيل
سناء:(بهدوء) وهادي راه خبااار زوينة خصك تفرحي ليها ماشي تغضبي وتقلقي وزايدون نتي اش مشى ليك والسيد راه ولد الناس والله يعمر ليه الدار
رحمة:(بفقصة) واااش أنا كانشكي ليك بلعگر ونتي تتگولي ليا اش خبار الدراري
سناء:والله تابغا تمرضي راسك اشمن شمكار راه السيد نقي وداك تخسار لهضرة كلشي تيقولو غير نتي مبغيتيش تقبليه وصاف
رحمة:لا لا لا نتي بان ليا لكلام معاك ماينفع زعمة بغيت نشكي عليك ساعة غير تتزيديني اعصاب وفقصة قطعي قطعي
قطعات عليها وبدات تسوط وتنفخ قبل ماتنوض وتنزل لتحت تشوف اش غاتوجد وشنو خاص...واخا فلداخل ديالها مباغاش هادشي ومقابلاش بيه ولكن مستحيل تبينهاا ليهوم وضروري تكبر بيهوم كيف مولفة...
رجعات بيسان من الترويض وحد مقال ليها شنو كاين والجديد من هاد لحصة هو أنها مبقاتش غاتستعمل الكرسي وغاتحيدو وغاتستعمل العكاز... سمعات الدقان فلباب ودخلات رحيل مبسمة بلخبار لي عرفات...
رحيل:كيف دازت حصة الترويض ليوم؟
بيسان:سوبير وحيدو ليا الكرسي وغانستعمل لعكاز
رحيل:خبار زينة هادي ليوم جاايين شي ضياف لعشاا
بيسان:(بتسائل) شكون؟
رحيل:شي ناس كيعرفهوم نوح (ضورات عينيها) لمهم خصنا نوجدو راسنا انا غانلبس قفطاني لي خيط ليا خوك فالعيد ونتي اش غاتلبسي ؟
بيسان:ماعرفتش انشوف شي كسيوة ولايمكن مانزلش گااع لاكانو من معارف خويا اش غاندير بيهوم وزيدي عيييت بزاف بالترويض باغا نعس
رحيل:ااحيه على تنعسي وماتنزليش حشوما راه خوك وصانا نزلو حيت غايجيو معاهوم النساا مهم نتي ارتاحي دابا تايقربو يجيو ونجي نعاونك تلبسي واخا
خلاتها رحيل ومشات تشوف اش تقضي تاهي بيما أن ولادها ناعسين... نزلات لتحت ولقات رحمة واقفة عليهوم فلكوزينة دير هادي قادي هادي لاهادي معجباتنيش لاهاد لكاس فيه الريحة مهم خلاتهوم غير تيشوفو فيها ويدعيو هاد النهار يدوز على خير... شافت فيها رحيل وقالت بهدوء:كاين فاش نعاون؟
رحمة:(ببرود) لا كلشي واجد
ماحكراتش رحيل مشات تشوف اش وجدو ورحمة غير عقداهوم تاقربات جهة رحيل وقالت ببرود وفقصة:كنتي عارفة؟
رحيل:(شافت فيها وتنهدات) ليوم گالها ليا نوح
رحمة:(هزات حاجبها)زعمة بغيتي نتيقك وخوك وعائلتك مگالو ليك والو
رحيل:وعلاش انكدب متلا لي كاين راني گلتو
رحمة:خوك مصالحش لبنتي
رحيل:هي عارفة لي يصلاح ليها وبلاماتحكمي على لحاجة اخالتي ونتي معارفاهاش وممتأكداش منها ماعرفتش اش خلاك تاخدي موقف مسبق على خويا ولكن ليام ايبينو ليك معدنو نخليك دابا نمشي نشوف ولادي
خلاتها تاتسوط وتگلب فعينيها وديك لفكرة ديال ريان مصالحش لبيسان تحفرات فدماغها وملي خلاص سمعاتو كيفاش خسر معاها لهضرة وطريقتو فلكلام ماحملاتوش...
***
خارجة رحمة من الدار وهازة بلاطو تمر معمر بلگرگاع ومغطي بالشكلاط بيض ونواغ... ركبات لقدام بجلابتها المخزانية وعينيها على إدريس لي مخرج كرطون دالسكار وتيقادو فلكوفر...ورنيم وأسماء لي تيستفو لكادوات لي داو ليها فلكوفر دإسلام لي معاونهوم... مبسمة وفرحانة لولدها وتدعي ربي يسهل عليه وينقي طريقو من الشوك... أنسطالاو لي غاياخدو معاهوم وكل واحد ركب بلاصتو وتحركو غاديين فاتجاه الرياض...فين كانو لعائلة كيتسناوهوم منهوم سناء واليازيد لي حضرو تاهوما لهاد النهار... فبيت بيسان كانت معاها رحيل وغير بالفن تتوجدها وتقادها ويديرو لمك اب وبيسان مادات ماجابت حيت مولفين يجيو عندهوم الضياف ويلبسو قفاطن دار عادي...
رحيل:جينا زوينات هههه
بيسان:(بضحك)تگولي جايين فينا لخطاب هههه
رحيل:(فنفسها)وراه نيت جاايين (سمعات صوت مساج وصلها من تلفونها بنمرة ريان علمها بلي وصلو لتحت) مهم أنا نزل نشوف فين وصلو ملي يجيو نجي نعلمك
نزلات رحيل تستقبل خوها وهي فرحانة بهاد الحدت لي كانت تسنى فيه من زمان... واقفين فلباب تايسلمو معاهوم ورحيل تاهي تاترحب بيهوم...وقف ريان گدام رحمة مبسم ليها تبسيمة صفرا ومد يديه باش تسلم معاه وغير مدات يديها وهو ينطق بمزاح:مغاترحبيش بنسيبك اخالتي...
ميقاتو وفنفسها قالت ليه "يخوي ليك الجناب"... استقبلوهوم فصالة وحدة حاطين دوك لكادوات لي جابو فوق الطبلة وجلسات تانيرت تاتسول فعفاف ورحمة تاهي لي تتبسم وتجاوب مرة مرة بلاماتفرط راسها قدامهوم...دخلات السعدية هازة صينية دلحليب مع التمر دوزوها عليهوم وريان عينو يضورو هنا ولهيه تايقلب عليها مبانتش ليه سيفط لرحيل مساج "فين مرتي؟"
رحيل:(بضحك) "دغيا رديتيها مرتك"
ريان: "وشنو لواحد هو لي يعرف لي ليه ولي عليه"
رحيل "تباركالله على مول لعقل"
ريان "دابا گولي ليا فين هي مرتي؟"
رحيل "فجيبي"
شاف فيها وبدا تايتحلف عليها غير بلفن وهي تاتقلي ليه السم...
تانيرت:رتاحيتو مور السبوع شوية؟
رحمة:واضروري واخا شوية دلعيا باقي
تانيرت:اييه بصح ماكدبتيش (شافت فرحيل) فين حفايدي واش ناعسين
رحيل:اه غانشوف واش فاقو ونهبطهوم ليكوم رنيم اجي عاونيني
مشات هي ورحيل جابو توينز لي باقي ناعسين باش يشوفوهوم جدهوم وجداهوم... من يد ليد ويبوسوهوم ويلعبو معاهوم ملي فاقو...
رحيل:(مجلسة سيدرا فوق ركابيها) باقي امامي كضرك كريشة؟
سيدرا:(عينيها دخلو بلمرض ونطقات بخفوت) اه مامي بغيت نعس
رحيل:(فاست جبهتها) مافيكش السخانة (شافت فتانيرت) ماما عطيتيها دواا ليوم؟
تانيرت:واه عطيتو ليها وراه هو لي خلاها شوية توگض على الصباح
رحيل:(ناضت هزاها) غانديها تنعس فبيتها
نوح:(شاف فزين العابدين) نوض هزها عليها راه ماتقدرش طلعها لفوق
ناض زين العابدين عاقدهوم وقرب جهة رحيل لي كانت ساكتة هز عليها سيدرا لي كانت تتسد عينيها وتحلهوم مريضة ومهلوكة... وخرج من الصالة وهي تابعاه تاوصل لبيتها وحطها ليها فوق النموسية وخرج بلاكلمة بلازوج ورحيل بدلات ليها حوايجها وبقات معاها شوية تانعسات عاد غطاتها وخرجات راجعة عندهوم لتحت...
لكلام فالصالة مقسم على زوج نسا لي يدويو فأمور الدار وتربية دراري ورجال لي همهوم لخدمة...
رحيل:(تحدرات عند اسماء وقالت بهمس) فين غزلان شتها تعطلات؟
أسماء:كنا غاندوزو عليها نجيبوها معانا ساعة گالت لينا نسبقوها تاتبعنا فالطاكسي..
رحيل:واشتها تعطلات بزاف ومشى لحال (هزات تلفونها) اطط نصوني عليها ( تفتح لخط ونطقات رحيل بهمس) ألو غزلان فينك؟
غزلان:شوية ونجي نسيت بزطامي ورجعت نجيبو
رحيل:واخا ماتعطليش
قبل ساعة كانت غزلان فدارها تتوجد راسها باش تمشي معاهوم...لبسات جلابة وشعرها خلاتو سامبل وتاوجها من غير گلوس تايلمع وصاف... هزات صاكها وسدات لباب ونزلات من لعمارة غادة لشاريع لكبير باش تشد طاكسي وناس كانو باقيين تايتمشاو مع الصيف لحركة تتكون مروجة فالليل...ركبات وعطاتو لادريس وضرب بيها نص طريق تابغات تجبد تلفونها وهي تعيق بلي البزطام نسات ماهزاتو..
غزلان:(شافت فمول الطاكسي) خويا عفاك سمحليا واخا ترجع ل*** نسيت بزطامي فالدار وسمحلياا
رجعها مول الطاكسي لحومة وهي تنزل مور ماطلباتو يتسناها... كان واقف حدا مول لحانوت لي كان ساد ومع نزلات بدا كايشوف فيها وهي بديك الجلابة ويحك لحيتو باغي ياكلها بعينيه تاغبرات وهو يعض شفايفوو بش.هوة... وجبد داك طريف دلحشي.ش لي عندو وبدا كيقادو ويبرم الجوان ويفكر فيها... من نهار شافها فلحومة وعينو عليها حاضيها فالدخلة والخرجة وخلاص ملي عرفها جارتو وساكنة فنفس العمارة بوحدها لي هو فيهاا تماا ولى يشد ليها لوقت...قطع الشانطي وهو كينثر اخر نثرة من داك الجوان وتم داخل لعمارة وطلع منقز زوج درجات تاوصل لجهة بابها وحك لحيتو لي نابتة بعشوائية فوجهوو الضعيف بقوة الگارو ولحش.يش لي تايظل يحش.شو نهار ومطال وشعرو فيه الشيب كولو أو وجهو ولى محروگ بالشمش... مع جا يدق تحل لباب من طرف غزلان لي مع طلعات بدات تقلب على البزطام تالقاتو حاطاه فلكوزينة ونساتو تم فاش تقدات ونيت صونات ليها رحيل وعلماتها بشنو كاين ... شافت فوجهو ونظراتو لي ماعجبوهااش وقرات لمكر فيهوم وبحركة سريعة رجعات لباب باش تسدو عليه ساعة السيد مد يديه وحبسها وهي بدات تعافر معاه باش تسدو ساعة دفعها فغفلة تارجعات لور وقتاحم دارها بدون استأدن وعينو غياكلوها...
باقي جالسة فبيتها وشادة تلفونهاا تتخربق فيه... مافيها لي ينزل لتحت وتشوف شي ضياف...ولات تتفادى تلاقى بناس لي تتعرف وتالي مكتعرفش حيت تتشوف فعيونهوم بلي تيشفقو عليهاا وداك لكلام لي سمعات فالسبوع تحفر ليها فالدماغ... بصح مبقاتش غاتستعمل لكرسي وغاتولي تعتامد على لعكاز تاترجع كيف كانت ولكن صافي هي خدات حكم مسبق بلي الناس كلها غاتبقا تشفق عليها... داكشي علاش باغا تبعد من الناس تااترجع صحتها ونفسيتها ترجع حسن من قبل... كمشات حجبانها فاش بان ليها ريان حاط ستوري فلواتساب وبلاماتشعر صباعها مشاو ليه وكليكات عليه...طلع ليها تصويرتو هو ورنيم مصورين نيت فالدار السيد ضارب سروال توب كحل مع شوميز كحلة وجيلي فالرمادي ورنيم لابسة كسيوة فالبيض وفيها ورديات...مدرعها بيديه وضاحكين فالسيلفي...ماعرفاتش علاش ولكن شعور حارق حسات بيه فاش شافت صورتهوم بزوج... كيبانو مفاهمين ومواتين مع بعضياتهوم...تنهدات ودوزات لتصويرة تانية كانت صورتو فالطوموبيل وكاتب تحتها "الحمدلله الدي بنعمته تتم الصالحات" مع شافتها قلبها قفز وسط ضلوعها ويديها رجفو تاطاح تلفون من يديهاا وعينيها عمرو بالدموع وخوفها من الاحتمال لي طاح فبالها خلى الغبينة طيح عليها وبلاماتحس دموعها نزلو... ماشي هادي هي هضرتو فاخر مرة شافها ياك قال ليها بلي مغايسمحش فيهاا وبلي غايبقا ديما معاها وهي بنات عليه أمل وفرحات حيت شافتو متشبت بيها وتهنات من هاد الجيهة ولكن هاد الصورة حطمات ليها گاع توقعاتها وأحلامها لي بنات وحسات بخيبة أمل منو...
فلتحت كانو الأجواء عاديين ولمواضيع لي تفتحو كاملين ماعندهوم علاقة بسباب مجيتهوم... ريان ومحمد طه جالسين مع رؤوف مواضيعهوم شبابية وديال لوقت عكس نوح وإدريس وجدودو لي هضرتهوم رزينة وعندها معنى... أما لبنات كانو شادين الحديت على السبوع وكل وحدة شافت شي فلاش عاوداتو ومقشبين بناتهوم..
رحيل:اجي ديك لي كانت لابسة تكشيطة بلونكاسي من عائلة خالتي رحمة شفتيها كانت غدابز مع وحدة على لبلاصة
أسماء:فين شتيها نتي؟
رحيل:هههه من لبرزة فين جلست راه سكانيتكووم جملة ونتي براسك واحد لفترة شفتك ماشي على برجك لانتي ولارنيم
شافو لبنات فبعضياتهوم وضحكو ضحكة صفرا باش مايعيقوش وقالت أسماء:وراه هاد لقح*بة تخاصمات مع لوسك وأنا كنت نصحها ههه
رنيم:سي وشكيت عليها وهي سمعات لي وبدات توصي فيا راك عارفة أسمااء ونصائحها
رحيل:كيفيدو مع كلشي إلا معاها هي هههه
أسماء:هاهي بدات تجبد لعيب واشفتي بنادم خاااااايب
رحيل:ومالي كدبت اربي گولي ليا اش كاتسنااي نتي وداك كحل لعفطة ديالك واش غاتبقاو مخاصمين تاتولدي؟؟
أسماء:هو لي منو كلشي إلا تبدل وزول شلى حاجة فكراكتيرو المزفت نرجع ليه أما لابقا هاكا لاصق ليا فنفس الحاجة والله لاشاف كمارتي
رحيل:اوا جلستو سوغ طابل وهضرتو
أسماء:درناهاا وگال ليك بلي غايتبدل اوا راه تانتسناوه يتبدل
رنيم:ومتنسااايش تگولي ليها بلي كايعيط ليك ربعة وعشرين ساعة ويشد لكلام معااك وتافلليل تادوزي حدا بيتها وتسمعي صوت توشويشهاا
رحيل:اوا مالكوم على حالتكوم لاكنتي تتهضري معاه غير رجعي لدارك أسماء شوفي عارفة لمشكيل لي ناض مكانش بسيط ولكن نصيحة فكيه ونتي فدارك معاه وماتنساايش بلي العمر كيفوت ااه قال غايتبدل اوا شوفيه بعينيك وبقاااي مقابلاه واااش بصح كيتبدل ولا لا حيت ماحدك ماعشتيش معاه راه مغاتقدريش تعرفي اش كاااين يقدر يگول ليك اه تبدلت وديك الساعة تلقايه باقي كيف هو(جلسات جنب ونطقات بخفوت) الراجل ماحدك بعيدة عليه ماحدو هو غايبقا عليك براه توحشتك وتبدلت ورجعي عليها تانصحك نصيحة ونتي شوفي لي بان ليك
رنيم:رحيل عندها لحق لامارجعتيش معاه مغاتقدريش تحكمي واش تبدل ولا لا
أسماء:(ساطت وعينيها على إسلام) مابغيتش نضسرو ويگول هادي نسات دغيا ويشدها قاعيدة عندو ويبقا فيما يغلط يگول وراه غاتنسى دغياا
رحيل:ماگلنااش ليك ضسريه ولكن ضربي وقيسي ونتي تعرفي راجلك وكراكتيرو كتر مني أنا لي كاندوي ونصح فيك راه والله تاعندي رااجل بالله تاتبغي تفهميه وماتفهمي تاخرية بعدا إسلام نواور اااجي تشوفي ولد لحاج (لوات شفايفها) لغضبة ديالو تخليك تلوحي حوايجك من السطح بقوة الفقصة
أسماء:(ضحكات) هههه اوا ديري الحيلة معاه ياك تيگولو لحيلة حسن من لعار هههه
رحيل:(شداتها الضحكة فاش تفكرات غضبتو) اودي خلي الجمل راگد راه الحيلات ديال الدنيا والدين تجربيهوم كاملين معاه والله لاصدقو راجلي وزماني وأنا عارفاااه عكسي..
رنيم:(شافت فساعتها) لبنات غيزو تعطلات بزاف
رحيل:عيط ليها وگالت بلي نسات بزطامها وغاترجع تهزو اتكون فالطريق
ضارو لبنات جهة تانيرت لي نطقات بصوت مبتاسم: اوا فين هي بيسان
رحمة:(بتبسيمة صفرا) هاهي فبيتها
ريان:(بلامايحس نطق بصوت عالي) اوا گولو ليها تنزل نشوفها..
ضور عينو فاش لقى كلشي يشوف فيه وإدريس كيحمر فيه عينيه ويحرك راسو بلاحول وتانيرت تاتغمز فيه وتحلف ليه بعينيها وهو فديك الساع عرف راسو زبلها كيف ديما ولكن اش يدير توحشها ومالقى راسو تانطق بشي لي فقلبو... ميقات رحمة من ديك لخفة والضسارة على قولتها لي فيه وهادشي غير مكيزيد يخليها ماتحملووش...
مشات سناء تنزلها وهي تاضحك وغير دخلات لقات السيدة طايح عليها الضيم وعقلها الزغبي ولد لحرام دار ليها سيناريو وتيقاتو وباش تشوف بلي الشيطان عمى ليها لعين ومقالتش مع راسها راه لاخطب ختو رحيل خصها تكون معاه وتحضر فنهار بحال هادا نسات هادشي وبقات شادة غير فتصاور وديك لجملة لي عنات بزاف دلحوايج...
سناء:(كمشات حجبانها) هيهوو افين سارحة عجول عيييت مانعيط ليك
بيسان:(بنفس مخنوقة) اشنو بغيتي اسنااء
سناء:نزلي الضياف جااو
بيسان:مرشقااش لياا خليني بغيت نعس
ناضت تاتعكز بلعكاز وتمشى مشية تقيلة باغا تبدل عليها وسناء تبعاتها وشدات يديها وقالت بجدية:ولد لحاج گال ليا نعيط ليك حشومة اصاحبتي راه تاحنا مارشقاش لينا مي ضروري نكبرو بالضيف
بيسان:(ساطت النفس ماحملاش تنزل مزاجها تعكر) اوووف واش ضروري ياك ضياف خويا ومعاه مرتو وماما أنا بلاش مني غير عفيوني
سناء:عيطي لخوك وگوليها ليه بفمك
سبقاتها سناء وهي بزز باش بركات على راسها وشافت فوجهها فلمرايا وقادات لغوح أليفغ قبل ماتنزل... مشيتها تقيلة شوية ولكن حسن من قبل وتحسن كبير بان فحالتهاا... وصلات لجنب الصالة والأصوات لي تسمعو ليها ماغرابينش عليها ومع حطات رجلها فباب الصالة لمحات تانيرت تاتشوف فيها مبسمة ومع ضورات عينيها قشعات السالوبار جالس مبسم وغمزهاا بمكر وهي ممتيقااش بحال لاراها تحلم... كملات الطريق تاتسلم عليهوم وجلسات وهي باقي ماحساااش بشنو واقع وممتيقااش اش تتعيش...
***
قلبها كيضرب عند فمها وهي تتشوف فداك لكمارة لي تهجم عليها على غفلة...ماعرفاتو ملين بعت عليها وشوفتو راه خلاتها تاترعد أما هو عينو تاينزلوها ويهبطووها بشوفات ماكرين من نهار حطات رجليها فهاد لحومة وهو عاس عليها كيف شي كلب مرة وحدة لي تلاقاو فالعمارة ولكن هي مادات مجابت حيت شحال قدهاا تعقل وزيد مرة وحدة ومشافتش گاع فوجهو حدها تخالفات معاه فالباب وكملات طريقها ماشي بحالو لي حط لعسة عليها ليل وصباح ومع ماعندو مايدار تايبقا غير مگابلهااا... ونهار جاا عندها محمد طه شافو ملي دخل عندها وبقا عاس عليه تايشوف وقتاش يخرج وسمع الصداع لي ناض بناتهوم مع غوات غزلان كان مسموع تاخرج محمد ومشى بحالو... ماحسات غزلان غير بيه مقدم جهتها وشدها بيد من عنقها ويد حطها على فمها سادو ليها وهي تخنقات بريحتو لخاانزة بلحشيش وريحة العرق ديالو تتكوخ... خرجات عينيها وبدات تعافر معاه وهو يحل فمو مخلي الريحة تزيد تخنقها وگال بصوت خافت:بلاماديري فيها راسك شريفة ونتي مولفة دخلي الرجااال عندك
تتحرك راسها بهسترية وتتدفع فيه وهو حكمهاا وكمل كلامو:هانتي الزين خليناا ندوزو سويعة ناضية نبرعك فيهاا ومتخافيش راني نعجبك ونااضي
هضرتو وشوفاتو ومنظرو غير ماخلاو داك لخوف يتغلغل لقلبها وتتگول مع راسها يستحيل نسمح ليه يدير فيا لي بغاا وداكشي لي كيضور فبالو واخا نموت والله لاخليتو يديرو... وبداك السعرة لي شداتها من كلامو ماشعرات تالقات سنانها فراحة يديه على غفلة قفزاتو وخلاتو يهرب يديه وهي فديك الساعة دفعاتو وهربات لجهة الشرجم دالصالة لمحلول وغوتات لربي لي خلقهااا وعينيها خارجين:عقتووووووووني واعباد الله عتقووووني باغي يتكرفص عليااا...
طلقات حلوقها تتغوت والجيران والناس لي فالزنقة مع سمعوها كلشي خرج تيشوف اش واقع وتبرگيگ فلبشار على جهد أما داك خونا غير شافها غوتات وهو يخااف ومشى تيجري لباب حلو وخرج تايدردب فالدروج تاوصل لطبقة لتحت وحل لباب ويديه تايرجفو ودخل بزربة لدارو عاتق راسو قبل مايشوفوه الجيران وتجبد ليه مونتيف مع الناس...أما هي بقات تغوت تاصوتها تبح واخا مشى خافتو يرجع والجيران دخلو عندها وشي نسا قربو جهتها شدوها وهي وجهها صفار والخلعة شداتها تافشلات وطاحت على السداري...كانت غاتمشي فيها كون ماربي لطف وتفكات منو وغوتات جامعة الناس لي تيسولوها اش طاري وحدة منهوم جابت ليها لما دالسكار تشربو باش توگض وهي بدات تعاود ليهوم وتترجف...معارفاهش راه معاها فنفس العمارة وجارها وهادي هي لمشكيلة كون عرفاتو اتنعتو ليهوم وهوما يديرو خدمتهوم ساعة فلت منها...بقاو معاها النسا تاحلات عينيها وديك الساع هزات بزطامها وخرجات معاونينها تالبرا ولقات طاكسي باقي يتسنى فيها...ركبات مور ماشكرات دوك الجيران والناس لي عاونوها وحطات راسها فوق الزاج وهي تاتنفس بالجهد صدرها يطلع وينزل والبكية شداها... فيما تفكر شوفتو وريحتو ويديه لي شدهاا بيها تاتحس براسها غاتقيى بقوى معافتو.. وصلها لحومة وبقوة الخوف وداكشي لي طرا معاها طلباتو يزيد تالحدا باب الرياض عاد يوقف...نزلات مور ماخلصاتو ودقات فلباب وهي تاضور عينيها فجنابها خايفة يوقف عليها هو نيت ولاشي حد اخر وماتهنات تاتحل لباب دالرياض ودخلات غزلان وبصوت غارق نطقات:كلمي ليا رحيل
مشات السعدية لصالة وعيطات لرحيل لي جات مبسمة وغير شافت غزلان لي وجهها صفر وهي تخلع وقربات ليها شداها وغزلان عنقاتها تتبكي وبدات تعاود ليها وفشات قلبها تاحسات بروحها شوية وتخرج بقوة لبكاا لي بكاتو... جلساتها رحيل فالكوزينة وعطاتها لماا والسكار وقالت:اويلي شكون هاد ولد لحرام مكتعرفيهش؟
غزلان:لا عمري شفتو مع جيت نحل لباب ديال الدار وأنت نلقاه فوجهي وتهجم علياا
رحيل:(كمشات حجبانها)شفتي السكنة بوحدك راه مصالحاش اغزلان ولاد لكلاب عطاهوم الله يشوفو وحدة ساكنة بوحدها وداخلة سوق راسها يطمعو فيهااا تت ربي لطف ودازت على خير (حطات يديها على كتفها)صافا شوية ياكماا دار ليك شي حاجة
حركات غزلان راسها بلا وبقات رحيل معاها تاتوگضات شوية عاد رجعات رحيل لصالة مخليا غزلان غادة لحمام تگاد شوية حالتها باش مايعيقوش بيهاا... قادات عكر وعينيها كانو شوية منفوخين وحمرين ونيفها كدلك...خرجات غادة لصالة ورسمات تبسيمة دبزز على فمها ونطقات بالسلام ودخلات ومحمد طه كان جالس مركن غير بانت ليه وهو يتقاد فلجلسة مكانش معول يشوفهاا ومكانش عارف بلي غاتجي حيت تاواحد ماعلموو والبنات أصلا لي عيطو ليها بناتهوم... بقا تيشوف فيها وغير جات عينيها فعينو وهو يكمش حجبانو وحس بلي كاينة شي حاجة...
إدريس:(برزانة)اوا اولد لحاج ندويو فلمعقول وسباب زيارتنا هاد ليلة عندكوم طبعا راه حنا راه ولينا عائلة وسبق وتناسبناا ونسوبيتكوم تتشرف هادشي علاش جينا ليوم باش نطلبو يد بنتكوم بيسان لولدناا ريان على سنة الله ورسوله
نوح:(بهدوء) الله يكبر بيك اسي إدريس وكيف گلتي راه حنا عائلة وختي مغاديش نلقى ليها شي واحد حسن من ولدكوم وكيف تيگولو فوقت الشدة تيبانو لمعادن (شاف فبيسان لي كانت جالسة تتشوف فيهوم باقي مضهشرة وممتيقااش ونطق بجدية) البنت هاهي قدامكوم هي لمعنية بالأمر (طرح عليها السؤال ولكل عينو عليهاا تيشوفو فيها) اش بان ليك ابيساان ؟
كاتشوف فيهوم وهي مضهشرة وتاضور عينيها على خوها لي تيشوف فيها بجدية وتشوف فريان لي تاهو فديك اللحظة توتر ولكن ملامح الهدوء مرسومين على وجهو وترجع تشوف فمها لي كان باين فيها معجبهاش هادشي ومحاملاهش وغير جالسة بزز عاطياهوم صوابهوم أما لاجات عليها من لول غاتگول ليه ماعنديش بنات لزواج وتسد عليه لباب فوجهو ساعة ولدها واقف ليها فطريقها ومغاديش يخليها ديرها واخا تحلم بيها...
سكاتها طال وفالأخير نطقات بصوت خافت وعينيها فعينو خوها:لي بان ليك اخويا
نوح:(هز حاجبو)لمعنى؟
بيسان:(بتوتر) موافقة
مع قالتها طلقات رحيل بلاماتشعر واحد تزغريتة صمكاتهوم وغفلاتهوم وخلات نوح يقلب عينو جهتها ويشوف فيها بشوفة قاصحة مخنزر فيهاا وهي ضورات عينيها هنا ولهيه متوترة... بداو كيباركو ليهوم ورحيل معاوداتش ضارت شافت فيه تاسمعات صوت مساج وصلها ومع دخلات ليه لقاتو كاتب ليهاا
" تبعيني"
سرطات ريقها فاش شافتو ناض وتبعاتو فلبلاصة باش مايزيدش يتعصب لقاتو تايتسناها حدا بيروه مع وصلات عندو خنزر فيها وجرها تاقنتها وهي قالت باندفاع:زلقات والله تازلقات مادرتهاش بلعاااني
نوح:(بنبرة صارمة وبدون نقاش) خرجي لسانك
بقات تتشوف فيه مفاهماش اش قصد ومع دلك خرجات لسانها ومحسات بيه غير شادو بين سنانو وعاضها منو بالجهد...
يتبع...
التعليقات
لا توجد تعليقات بعد، كن أول من يعلق.