قصة الأوصو الجزء الأول

الدب ، هو الوحيد الذي يستطيع تحمل البرد والحرارة في آنٍ واحد .

الدب هو الوحيد القادر على منحك المرح و الرعب في آن واحد .

هو الوحيد القادر على جعلك تكرهينه وتحيبنه في آن واحد .

فمرحبا بمن أحبت دبًا في مدينة الجحيم🤟🏾

فتح الرواية :

★جزر مجهولة على المحيط الهندي★ :

.... كانوا اربعة دالاقفاص حديدية مرتفعين على الشط داخل كل واحد فيهم رهينة معصوبة العينين ، ومربوطين اليدين والرجلين ، غير كايحركو راسهم ويحاولو يعرفو فين هوما واش واقع ، بعد ماكانوا كايعيشو حياة عادية كايلقاو راسهم وسط كابوس مدايرينش بحسابو .

مزالين فمحاولة الفهم و التركيز على حاسة السمع لي فهمو من خلالها انهم فالبحر بسبب صوت الامواج ، الاقفاص كانو ممدودين من واحد الكوبطير كتحلق فوقهم عندها مشدودين ، كايغوتو ويحاولو يستنجدو بدون جدوى ولا مجيب لاستنجاداتهم ، حتى بداو كايحسو بشي وحدين دخلو عليهم للاقفاص! ، قلبهم كايضرب بسرعة والبعض منهم بال فسروالو من شدة الخوف من المجهول!! ، علاش جابوهم لهنا ؟ علاش اختطفوهم ؟ اشنو بغاو منهم ، حسو بدوك الاشخاص كايحيدو ليهم العصابة دعينيهم عاد بداو يرمشو وضارو بزربة يشوفو شكون حيد ليهم ، كانوا رجال ملتمين كلهم بالاسود ، مجرد ما حيدو ليهم العصابة خرجو من القفص ورجعو سدوه وتسلقو فالاشرطة ديالهم طلعو للإلكوبطير لي فيهم ،

بداو كايشوفو مع جنابهم لقاو راسهم قدام جزيرة ولكن كتبان صغيرة حيت بعيدة مزال ،و تحت منهم المحيط كايلعب بالماء ديالو بشراسة و لا شيء آخر ! علاو راسهم بانت ليهم الكوبطير كاتحلق هي لي شاداهم باش مايطيحوش الاقفاص فالما ، كانوا ربعة دالاشخاص فربعة دالاقفاص ، جوج كيبانو اسيوين ، و بنت شقراء و رجل من ملامحو واضح انه عربي ، البعض منهم بدا كايسب و يلعن ، والبعض تايبكي من غير شخص واحد صاحب الملامح العربية لي شاد فقضبان القفص كايحاول يفهم اش واقع ؟ حتى تسمع ليهم صوت فالبوق جاي من الكوبطير لي فوقهم والصوت كان بالانجليزية البريطانية :

- مين جون ، ( الاسيوي الكوري طلع راسو ) إيلينا رودريك ( الشقراء الامريكية تاهي طلعات راسها مخلوعة ) ، فانگ جيلو ( الصيني تاهو شاف للفوق ) ، أدهم صبري ( التونسي ايضا علا عينو ) كنرحبو بيكم وسط ادغال منظمة الرعايا الخمس ، بلا شك نتوما كتسائلو اش كاديرو هنا .. نتوما تختاريو من لائحة العباقرة لهاد السنة ، ولسوء حظكم كنتو نتوما الاوائل ، مين جون كأقوى واحد فالحساب الذهني ، فانگ وادهم عمالقة القتال الحر ، و إيلينا عبقريتنا فالمعلوميات ، ذنبكم الوحيد انكم عطيتو فواحد الشيء كتر من اللازم ، شيء لي خلاكم تلفتو انتباهنا ! المنظمة كترحب بكم وكتوفر ليكم العيش الكريم مدى حياتكم ، المال والجاه السلطة كلهم غاتلقاوهم الى تخطيتو المحيط ووصلتو للبر ودخلتو لداك الجزيرة لي قدامكم ، فالمقابل كنطلبو منكم تخدمو المنظمة بتفاني ووفاء وتنساو العالم ديالكم و تقدمو كل ماعندكم للمنظمة الكفيلة بكم ، غاتلقاو تما ازواج و اولاد تتبناوهم و عاهرات و كل ماطلبات خاطركم ، يكفي دوزو الاختبار و توصلو للشط سالمين ، وإلا داك القفص غايتحل بيكم وسط المحيط وغاتوصلو للشط جثث مشوهة بأنياب القروش المتوحشة ( كلهم كاترعدو مافاهمين والو ) مين جون !

مين جون علا راسو مافاهمش وميت بالخوف : ي ياس ! يااس !!

- شنو هي ديا•نتك ؟

مين جون : مسي•حي ، أ انا مسي•حي

- إيلينا ( إلينا علات فيهم راسها من شباك القفص ) شنو ديا•نتك

- إيلينا : ( بتوتر والبكا ) يهو•دية

- فرانگ .. ( بصوت مرتفع ) فرااانگ !!!

- فرانگ : ببو•ذي بووو•ذي

- أدهم

ادهم : ( بعدم ارتياح ) مس•لم

- ( كايسمعو اصواتهم فالبواق عندهم حيت كلهم ضايرين بالخيوط ) مزيان ، عندكم جوج ديال الدقائق ، 120 ثانية ، توادعو مع ديا•نتكم ووتخلاو على جميع عقا•ئدكم باش دخلو لبر الامان وإلا القفص غاتحل ، المنظمة غير تابعة لاي طائفة او د•ين و السكان ديالها لازم حتى هوما يكونو متجردين من الطوائف ، 120 ثانية تعتارفو انكم ابناء الطبيعة و راجعين للطبيعة غاتدوزو لبر الامان ، والا القفص غاتحل ونقدمو للاسماك وجبة شهية

فرانگ : ( بالغوات) واش نتوماااا بلاا قلب !!! اش درنا ليكم اش بغيتو عندناا

- وصولك لهنا وسمعاك اسم المنظمة و كاع هادشي لي شفتوه كايحتم عليكم ضروري دخلو وسط المنظمة وتحميو سرها ، والا ، الموت ... شفتو بعينيكم هذا هو ذنبكم

الينا : كنترااجكم ( كتبكي ) كنتراجكم طلقونا حنا مادايرين والو

- حتى حنا مامتاهمينكمش .. العرض مغري ، بغيتو الحياة السعيدة المليئة بالترف وتدخلو لعالم لي غايقدر مواهبكم وعبقريتكم تخلاو على اديا•نكم ، رفضتو الموت كايتسناكم ( اسمع صوت ) العداد بدا ، بقات ليكم 110 للثواني ، قررو بسرعة

الكل بدا يغوت ويترعد حتى سمعو صوت العداد قرب يسالي ، كلهم اصرو على الحياة ، بمجرد ما سكت صوت العداد تكلمو بهستيرية

فرانگ : ( كايترعد ) انا ولد الطبييي•عة انا ولد الطبي•عة طلقووووني نمشي انا ولد الطبي•عة

الكل بقا كايشوف ليه كيفاش تخلا دغيا على دي•نو ، يلاه فمحاولة استيعاب الامر هو يتحل بيهم القفص كولو هوما يشدو فالحديدات لي فجنب كايترعدو والقفص كايديه الريح والبحر بالشراسة ديالو تحتهم الا فرانگ لي مامفتوحش بيه القفص

الينا : ( بالغوات ) انا بنت الطبييي•عة بنت الطبي•عة كنترجااكم خرجوني من هنا انا بنت الطبيييعة مكنآمن بحتى دي•ن

يلاه كملاتها تسد بها القفص هو يغوت مين جون

مين جون : كنتخلى ، ككنتخلى انا ولد الطبييي•عة

تسد بيه القفص وبقى فقط ادهم لي شاد فالحديدات مغمض عينيه كايدعي فالداخل ديالو الله ينجيه

- راه واخا تشد فالحديدة القفص غايتطلق فالما ...

ادهم : انا مس•لم

- تلانة تواني لي غانزيدوك فحياتك تتراجع

ادهم : انا مس•لم وغاانبقى مس•لم وغااانموت مس•لم

- واحد .... جووج ....

بانليهم مغايتراجعش ومصمم على قرارو هو يتسد بيه القفص ، الكل كايشوف لعندو ، يلاه غايتسائلو كانوا الاقفاص ديالهم تطلقات ليهم السلسة وطاحو فالمحيط وادهم الوحيد لي بقى ناجي كايشوف مصدوم

- مرحبا بك معانا ، منظمتنا كتحترم جميع الاد•يان وطوائف ، عندنا مسا•جد وكنا•ئس ومعا•بد ، الاختبار كان هو لي خان دي•نو يخونا حتى حنا ، مرحبا بيك وسطنا ... وسط بلدك وهويتك و وطنك جداد ... العسكري رقم 4009

EL OSO⚡

🥀RØSA🖋️

★ مطار غرناطه ★

٭الساعة 17:30٭

من بعد رحلة دامت نصف ساعة ، حطات الطائرة فالأراضي الإسبانية والتربة الغرناطية ... من بعد نزولها قادات جميع إجراءات الوصول ، حولات الفلوس لي عندها للاورو مستعنة بلارشادات و خدات ايضا رقم جديد .... بقات تابعة الإرشادات حتى قربات من مخرج المطار و هي تحبس ....

بقات واقفة فمكانها بلا حركة و شادة فيد الشانطة ديالها مزييرة عليها فحالا اتهرب ، من حركة طلوع و نزول صدرها باينة صعوبتها فالتنفس ... ومحاولتها الزجرية للتأقلم و استدعاء القوة ، التوشويش ديال الناس و صوت روايض لي ڤاليز خلا جسمها يتبورش ، صوت المضيفات وإعلانهم على الرحلات الجويه لي داخلين و خارجين كان كفيل انه يفيَّق التوتر لي كانت خازناه طيلة هاذ الوقت .

غمضات عينيها و دقات قلبها بدات كتباطئ ، حاسة سمعها نعادمات الشئ لي خلا دماغها يقدر يركز ... خدات نفس عميييق و زفراتو ، مدة وهي على ديك الحال حتى حلات عينيها و بان الهدوء التام على ملامحها الفاتنة البريئة ...

ضورات عينيها العسليات على المكان و تاجهات بخطوات موزونة للمقاعد لي على جنبها اليمين وجلسات ... بدات كتشوف فالأرجاء و الناس لي ضايرين بيها و لمحات بنت شابة ممكن فنفس العمر ديالها مع الأم ديالها ، من البكاء ديالهم و عناقهم الحار باين شوقهم لبعض .... ترسمات ابتسامة مكسورة على شفايفها بمجرد ماتفكرات ماماها ! ، تمنات لو كانت متواجدة معاها فهاذ اللحضة .... ولكن للأسف علاقتها معاها مختالفة كليا ... الام لي بحال كاينة بحال مكايناش !!

سرحات فيهم وعقلها رجع بيها للماضي ، رجع بيها لطفولتها لي دوزاتها و معرفاتش فيها معنى "العائلة" .

"التشتت الأسري" لي عاشتو وهي فسن صغييرة خلاها تحس ببزاف ديال النواقص ....

كان من امنياتها البسييطة انها تعيش بين أم و أب وتكون هي محور إهتمامهم و اول اولوياتهم ، ولكن كل واحد فيهم ملهي مع حياتو الجديدة بعد ما طلقو ، ماماها تزوجات ودارت ولاد اخرين و باباها تاهو نفس شيء ، وهي بقات فالوسط ، تمشي لدار ماماها تحس براسها ضيفة وتمشي لدار باباها تحس تاني انها ضيفة ، طيلة الخمس عشر سنة لي عاشتها فهاد التشتت الاسري وهي ماحاساش بمعنى الاستقرار ، شيء لي خلاها تهاجر باش تبحث على الاستقرار و تلقى ذاتها .

معاملة واليديها ليها لي كيف كرة التنس خلاتها عمرها تحس بطعم العائلة ... حتى من هجرتها وتوديعها لبلادها جاها ساهل ، لانها متأكدة ماخلات موراها تاحد كايبكي عليها !!

فاقت من سهوتها ولقاتهم اختافاو من قدامها ، شافت فالشخص لي جالس قبالتها هاز الفون فيديه ودغيا تفكرات تلفونها...

حيدات الكارطابل ديالها من على ضهرها و بدات كتقلب ... جبدات منها التلفون وخدمات فيه الرقم الجديد و اول رقم ركبات هو ديال ماماها ... كاتصال تقليدي توهم به راسها انه عندها لي مشطون عليها تعلمو انها وصلات ! وخا تاواحد فيهم ماكلف راسو يوصلها حتى للمطار .

زوج مرات وهو كيصوني و كيقطع حتال لمرة الثالثة عاد تشد

يَاسَمِين : الووو ... مامااا ... !!

خديجة : الوو!!

يَاسَمِين : الوو ماماا كتسمعينيني؟؟

خديجة : ايه ايه كنسمع .... شكوون معاياا؟؟

يَاسَمِين : هذي انااا يااسميين

خديجة : اااه يااسميين ... كيدايرا ابنتيي ... لباس علييك؟؟ رقم ديال الخاريج هذا مشيتي ؟ صاافي خدمتيي ابنتي ؟؟؟

يَاسَمِين : يهديك الله آماما راه يلاه راني فالمطار اشمن خدمة

خديجة : ياك عمك لقا ليك الكونطرا علاش مزال ماخدمتيش ؟

يَاسَمين : ماما ! كانقوليك راني فالمطار ، نخرج من المطار ويحن الله ، بغيت غير نعلمك راني وصلت

خديجة : ايييه اييه على سلامتك احبيبة ديالي ... و امتااش اتبداي الخدمة ؟؟؟ اعنداك تشوفي لفلوس والگور وتنساينا

يَاسمين : ماتنساونيش غير نتوما ، انا مناسياكمش غير تهناي

خديجة : عنداك تبقاي عاطياها لدوران ! .... جمعيي فلييساات علاش ترجعيي ...و ... وقلبي على شيي ولد النااس يطلع ليك لوريقات كي هجر بنت خالك وحضي راسك ، يلاه ابنتي نخليك نوض نحط لخوك ماياكل مسكين يالاه وصل من المدرسة جيعان

ياسمين : آه مسكين ! واسيري سيري تلهاي مع ولدك سيري

خديجة : وابسلامة ابنتي لاتغبريش الله يكون معاك والله يرضي عليك ، هانا جااية اريان صبر ، تهلاي فراسك ابنتي الله يرضي عليك

قطعات الاتصال وهي مبتسمة ابتسامة باردة كأنه وجه جليدي ، شافت قدامها للاراضي لاسبانية وغمضات عينيها كتستنشق هاد العبير و تتمنى لراسها حياة جديدة و تحمد الله لي قدرات تبعد من دور كرة التنس فداك العائلة بين الاب والام .

شافت فالساعة لقاتها 18:00 الوقت دغيا طار ، حلات الماپس فالتيليفون و اول اوطيل بان ليها عقلات على سميتو .... متاجهة لمخرج المطار وجارة لي ڤاليز ديالها موراها ، مع اول خطوة خطاتها على برا ضربها ريح قوييي فيقها !

ضورات عينيها على الارجاء كتبتاسم عالم جديد قدام عينيها و حياة جديدة كتسناها !! حياة مستقلة هي اتبنيها بيديها !! فكرة انه فاصلها غير يوم واحد على خدمتها واستقرارها المادي والذاتي خلات التوتر يختافي فمرة و حماسهاا بان فعينيها ... واصرارها زاد قواها وماضيها كازيد يدفعها للقدام ...

شافت صف ديال الطاكسيات حدا باب المطار ، بان ليها واحد خاوي ومشات حلات لباب لور وركبات ، ونفضات الغبرة على داك اللغة الاسبانية لي قرات فالسونطر قبل ماتجي :

الحوار بالإسبانية

السائق : (شاف فيها من الزاجة) Buenas noches señora ... a dónde vamos ???

(مساء الخير ... لفين متاجهين / لفين اتمشي)

يَاسَمِين : (شافت فيه وعاودات شافت فالماپس ) اوطييل أطيناس

السائق : vale¡ (اوكييي)

ديمارا الطاكسي متاجه لعنوان الفندق و هي كطل من السرجم حالة فمها فالبنايات والناس لي دايزين ، طريقة لبسهم ، هدرتهم و تعبيرهم بيديههم غيير .... الجو مختاالف بزااف على لي عاشت فيه ، حتى من رائحة الجو مختلفة ، خداات نفس عمييييق مسخااتش تخرجو ... هواء و ريحة إسبانيا رفعوا من هرمون السعادة فدمها ... الشيفور كيطل عليها و كيضحك عرف انه اول زيارة ليها ، و قف فالفوروج و نطق

السائق :(مبتاسم ليها) اول مرة لإسبانيا؟؟

يَاسَمِين : (شافت فيه و رجعات كطل من السرجم) ههه ... سيي !

السائق : زيارة خفيفة ولا إستقرار؟؟

يَاسَمِين : نو إستقرار

السائق : اووه ! ... غرناطة كترحب بيك !! باين ايكون صعيب عليك بلا عائلتك؟؟

يَاسَمِين : (حركات كتافها بلا مبالات) حياتي كلها وانا بعيدة على عائلتي ... يعني مكاينش فرق ...

السائق بقا ساكت معرفش باش يجاوبها ... تطلق الضوء الاخضر و كمل طريقو ...

مسافة الطريق و وصلو قدام الفندق ، خلصاتو وهو يعطيها كارط فيها الرقم ديالو الى شي مرة حصلات فشي بلاصة او حتاجت توصيلة طارئة ...

هبطات من الطاكسي و ضارت كتشوف فسمية الاوتيل " ATENAS " و كطل من الباب الزجاجي

دخلات مشات نيشان للإستقبال ، حجزات غرفة لشخص واحد ... خلصاتو ووقعات على الاوراق ، عطاها الموظف الكارط و وراها الاسانسير لي طلع منو .

وصلات للطابق الثاني ، قدام الغرفة رقم 127 حلاتها و دخلات ... كانت غرفة جد بسيطة وراقية و نقيقية ، سرير لشخص وحداه طبيلة صغيرة ، سرجم كيطل على الزنقة و باب اخر ديال الحمام ... وفخيجيديغ صغير و صال اومنجي دكرسي واحد ، سدات الباب و عينيها مركزين غير مع الفراش .

حطات لي ڤاليز و كارطابها فالقنت ، حيدات الإسبادري ديالها والتلاحت فوق السرير ، ثواني و غفااات ....

★الساعة 9:30 صباحا★

.... كتفيق على صوت دقات متتالية على باب غرفتها ... هزات راسها من فوق المخدة مخسرة ملامحها ، كتجبّد و تفوه على خاطرها بعد مادوزات ليلة ملكية وسط هاد الغرفة المريحة لي نساتها فكولشي وولداتها من جديد ... تقادات فالجلسة كتحك عينيها و شافت فالباب . ناضت بشوية عليها حلاتو ... الشخص ياله كان ايعاود يدق غير شافها و حبس

واقفة حاطة راسها على الباب كتشوف فيه وتفوه حتى نطق

الموظف : Buenos dias !

يَاسَمِين : Buenos diaaaas (حطات يديها على فمها كتفوه) احمم ... buenos dias

(تقادات فالوقفة و كتوسع عينيها باش تفيق)

الموظف : سينيورا الى كان ممكن تتفضلي معايا للإستقبال ... موضوع كيخص الحجز

يَاسَمِين : الحجز؟؟ vale¡ (شافت فرجليها حفيانين رجعات لبسات كلاكيطتها و خرجات )

هابطة مع الدروج وهو موراها

وصلو قدام الاستقبال كان مول الاوتيل كيتسناهم ولقات تما وحدين خرين ماشي غير هي ربما كاع النزلاء ...

***** : (لإبتسامة عرييضة) صباااح الخييير سنيورا !!! ياكما فيقناك

يَاسَمِين : نو ... نو كنت فايقة

***** : احمم كنظن الموظف (شاف فيه) خبرك بخصوص الحجز !

يَاسَمِين : مال الحجز ؟؟

***** : هههه ... احمم ، غير درنا واحد الزيادة لانه فاتح اكتوبر (دار حركة بصباعة) بسييييطة فثمن الغرف لليلة

يَاسَمِين :(طلعات حاجبها فيه) اااه و بشحال ولات الغرفة؟

***** : (شاف فالموظف و عاود شاف فيها ) احمم ... غييير 50€

يَاسَمِين : (خرجات فيه عينيها ) غيير 50€!!؟ لبارح حجزت ب 30 تولي بخمسيين ! ( غير مبتسمين فيها بمعنى هادشي لي كاين )

شافت فيهم واحد بواحد

يَاسَمِين : (إبتاسمات ليه ) esta bien !!! ههه ، واخاا تسناوني واحد زووج دقايق و نرجع ؟؟ (عاودات شافت فيهم) vale¡ ??

عطاتهم بالضهر طالعة فالدروج خلاتهم فرحانين حيت ماتعكساتش معاهم

دخلات للبيت وسدات الباب ، وبقات متكية عليه شحال عشرين اورو زايدة فيها ! الزهر واقلة بدا يتعكس من نهارو الول !! مشات للحمام قادات حالتها و خرجات ... دارت ساكادوها فضهرها و هزات لي فاليز ديالها هابطة مع الدروج ...

غير بانت ليهم هازا حوايجها تكوانسوا ، حتى وصلات لباب ورجعات شافت فيهم ... جبدات كارط البيت من جيبها و وعطاتها ليهم

ياسمين : Buenos diaaaas

وكملات طريقها .... مبتسمة وضاحكة كتحاول تبان انها هادئة مواقع والو ، مشا اوطيل يجي اوطيل مغاتقلقش ومغاتعصبش ومغاتلعنش زهرها حيت يلاه كانت كتمدح فيه !

غادية فطريق محافظة على داك الابتسامة لي مكتبان واش ابتسامة ولا تخنزيرة... اول حاجة خسرو ليها نعاسها و عااد موضوع الحجز

يَاسَمِين : غيييير 50€ ... على انا كنولد الفلوس ...

(وقفات كتشوف فجنابها) وااايااالاه فين انلقا اوطيل آخر دابا!!!؟ كالما كالما اياسمين غاتلقاي اوطيل وغاتلقاي كولشي غير تكالماي ( علات عينيها للسما ) شوفي الجو شحال زوين ... تنفسي وتكالماي

كملات طريقها وشوانطها مجرورين حداها دوزات معاهم الحرب ... ماشي وكل مرة توقف تحنى على تيليفونها مالقات حتى اوطيل قريب ، وحتى لبعاد خاص الحجز يكون قبل ، كولشي عامر ... حتى قربات تبكي وتفقد الامل كايبان ليها اوطيل قريب منها ولكن للاسف ، مشترك ! طمن قلبها ملي شافت كاينين غرف للبنات وغرف للاولاد الى مابغاتش الميكست واتجهات ليه تابعة النعت تاطابت بالمشي عاد وصلات كولها كتنهج بقات واقفة شحال فلباب كترد انفاسها عاد دخلات وبانت ليها مرا كبيرة فالسن جالسة فالإستقبال ... غليضة ، دايرا النظاظر ديال الشوف و كتصايب نابات ديال الكروشي ... سمعات الجرس لي فوق الباب تحرك ، طلعات راسها شافت فيها و عاودات حدراتو

يَاسَمِين :(قربات و وقفات قدامها) عفااك بغيت نحجز بلاصة فغرفة دالبنات عافاك ...مايكونوش فايتين جوج بنات ياك

***** : (حادرة راسها) مكاينش غرفة لتلاتة ...

يَاسَمِين : باردوون ؟؟

***** : (تنهدات) ماكاينش غرف لتلاتة !!

يَاسَمِين بقات كتشوف فيها بغات تمشي فحالها ولكن كتحس بلعيااا بغات غير ترتاح وتوجد راسها للغد

يَاسَمِين : مشي مشكل ... عطيني غرفة دربعة دالناس

***** : (شافت فيها من تحت النظاظر) حتى هي ماكايناش !

يَاسَمِين : (بدا دمها كيفور ونبرة صوتها رتافعات) اهااه وشنو كااين؟؟؟

***** : ( عاودات تنهدات و كتهدر ببرود) كاين غرف مشتركة 8 بيكم (شافت فيها من تحت النظاظر) 19€ لليلة !

ياسمين بقات غير كتحك فشعرها هادي غاتكون سويقة ماشي شومبرا ، بلا ماتجاوبها دغيا جبدات بزطامها وحطات قدامها الفلوس واخا ماعرفاتش كفاش دايرين هاذ الغرف ولكن همها هو تلقا فين تحط راسها والسعر رخيص ...

المرا حلات واحد المجر وعطاتها كارطة فيها حرف ( D ) , وسوارت صغار ماعرفاتش ديالاش ، قالت ليها رقم الغرفة و اشارت ليها للمصعد بابتسامة صفراء .... و رجعات كملات شغلها ....

طالعة فالدروج حتى بان ليها رقم البيت ديالها ، الباب كان مردود شوية وزادت دفعاتو حتى بان ليها كامل ... شكل البيت خلاها تحس انها فداخلية ، فراش فوق فراش و مغطيين بريدوات

دخلات حطات ڤاليزتها فواحد القنت و تسارات على خطرها حيت البيت كان خاوي ومزال هي لي دخلات ، كان باب واحد اخر تما محلول ديال الحمامات ... كلشي نقي و مقاد بلاصتو رجعات . للشومبر و حلات الخمية ديال الفراش (D)

يَاسَمِين : الله على راحة بعدا هذو لي من حقهم يطلبو 50€!! ياربي مايجي حد هاد نهار ونبقى بوحدي ياربي

جلسات فوق الناموسية وجرات ڤاليزتها حداها ، جبدات صندالتها ، طغوس فيها لوازم الحمام وحوايج باش تبدل و معاهم فوطة ... حطات الڤاليز فوق الفراش ، جرات عليها الخامية و دخلات للحمام.

ماكاملاش 20 دقيقة و خرجات من الدوش ... واقفة قدام المرايات لابسة سيرڤيت فالرمادي و فوطة صغيرة غوزية على شعرها ، قربات اكثر من المراية كتحقق فراسها ... عوينات مشفريين، قهويين كبار شوية و مجبدين ، حجبان كثاف و نويف صغير و مستقيم ، شفايف ورديين منفوخين كيخليوها تبان فحالا مبتاسمة بالجنب ... كدوَّز الكريم على وجهها بشرتها بييضة و صافية .

حيدات الفوطة من على راسها و بان شعرها المارون طوييل واصل لضهرها ، مشطاتو غير بصباعها و خلاتو على راحتو ... جمعات روينتها و رجعات للبيت لقاتو باقي خاوي زادت خدات راحتها ، تكات بلاصتها كتحاول تعنس ماابغااش يجي ..

.....

مربعة رجليها فوق الفراش هازة تلفونها كتفرج و جارة عليها الخامية ... الڤيديوز كاملين لي فيوتيوب دازت عليهم ، الملل قتلها ماعرفات باش تلهي راسها ... الغربة هي هادي وغاتخلص ثمنها و تميردا وتتحك تاهي

رمات التلفون من يديها و دماغها بدا كيفكر فكلشي!!!

يَاسَمِين : (كتشوف فالسقف لي فوق منها و الحيوط) الصراحة كون صبغو هاذ البيوت بالخضر كانوا ايطلعو حسن (شافت فالخوامي و قاصتهم بيديها) بففف كون داروهم مطرزين ايجيو واعرين .... دايرين فحال ديال السبيطارات و تقوووول واش عندهم الدوق

فوسط هضرتها سمعات صوت ڤاليز مجرورة !! طلعات عينيها بشوية بانتليها بنت اخرى داخلة تبسمات ليها بالخف وردات الريدو ديالها وتكمشات فبلاصتها ، لقات راسها فيها جوع وسنعات داك لبنت دخلات للحمام ، ناضت لفاليزتها بدلات حوايجها و رجعات شداتها بالكود وحطاتها فسريرها و هزات محفظة ددضهر دارت فيها لوازمها و رردات ريدو وخرجات ، حاولات تعطي برجليها للريح كتقلب على بلاصة فين تفطر ، تبان ليها ريسطو صغير و دخلات كان البيفي مشكل ، هزات بلاطو وبدات كتحط لي بغات وكلسات كتاكل بهدوء ، كتلعب بفرشيطتها فطبسيل ودماغها ساهي ، الفضول قاتلها كيفاش غاتعيش هاد ليام فاوروبا بوحدها ! لا حنين لا كريم لا صاحب لا والدين ! حاولات تقوي راسها وتكون هي العمود ديال راسها وان هدا غير النهار للول مزال تابعها بزاف ، كتشوف ظع لارجاء قوة الهاراج والضجيج و لغة غريبة عليها ولباس غريب عليها وثقافة غريبة عليها كتحس براسها لعلا غريبة ، قالت وهي كاتشوف فالناس بدون ماتشعر

ياسمين : هاد سبنيول تاهوما شحال فيهم دالهضرة والصداع

كملات ماكلتها خلصاات وخرجات كتقلب على سوبر ماركت مستعنة بالمابس ، خدات الما و بعض البيسكويات تسد بيهم جوعها و بعض العصائر و رجعات للفندق كتحس براسها باقا محتاجة للنعاس مزال ماعندهاش القوة لي تخرج ضور وتكتشف المكان ،

كانت التلاتة دالعشية وهي كتوصل لاوطيل ، غير قربات لشومبر بدات تسمع قوة لهضرة ، لبيت دغيا عمر ! شوية وهي تكمش ملامحها كتسمع !

يَاسَمِين : اوييليي !!! صوت ديال راجل هذا ولا كدبت ؟

دغيا حلات الباب هو يبان ليها ولد رقيق شوية و طوييييل عاطيها بالضهر كايهضر مع دوك البنات بالاسبانية ويضحكو ، هبطات كتجري قصيرة شوية و كتزرب فالمشية كتبان فحال شي بطريق ....وصلات لااستقبال بانت ليها دنياا مطرطقااا ، والمرا لي كانت تما مرومبلاصيها غير واحد الولد لي جالس ... المرا لي عطاتها الكارط غبرات

يَاسَمِين : (حاطة يديها على جنبها) يااالاه فين هي هاذ الشارفة دااباا

بقات كتشوف فيه مترددة حتى تحركات و وقفات قدامو ... بقا كيشوف فيها كيتسناها تهدر وهي ماعرفات منين تبدا

يَاسَمِين : (مربعة يديها فوق الكونطوار) ههه ... سلاام ! ... اممم ... قبيلة حجزت فشومبر ديال البنات ياك ... و ... ودابا دخل علينا ولد !!!!

***** : (بقا كيشوف فيها مدة عاد نطق مبتاسم) سيي كنعتاذو سنيورا ... كاين حفل فالارجاء والناس جاو بزاف نزلو فهاذ الاوتيل و قررنا نردو الغرف كلهم مخلطين !

يَاسَمِين : ههه ! كفاش مخلطين؟؟؟ كضحك معايا ياك ؟

***** : يعني بنات و ولاد فشومبر وحدة

يَاسَمِين : مااكاينش شي بيت فيه غير البنات؟؟

***** : مع الاسف ... نوو

ياسمين : اويلي !

**** : عفوا !

ياسمين : م .. ماقلت والو ماقلت والو

ماعرفات باش تجاوبو ... وضارت عاكياه بظهرها ماشية ببطي جيهة المصعد ، فين غاتلقى دابا اوطيل تاني ؟ مال هاد الزهر تعكس ليها على النهار لول جاتها البكية مافيها لي يخرج يقلب على فنذق اخر زائد عجبها البيت و رتااحت فيه وهي طلع راسو للفوق

ياسمين : ياك هو مخلص ونا مخلصة ، صافي اش فيها كاع ... اصلا راني فاروبا هادو عندهم عادي .. اصلا جوج مغانكلسش هنا بزاف غانقلب على الكرا .. واصلا تلاتة يقرب ليا نجمع عليه النصارى وتاليهود

طلعات فسانسور وتكات على المراية

يَاسَمِين : وااايالااه ... هانا بديت تاقواديت من دابا ؟؟ درنا المستقبل بكري

.....

دخلات حادرة راسها حتى سمعات هولااا "holà = السلاام" و قفزات

كانوا زوج بنات ، وحدة زعرة شعرها كيرلي و طويلة شوية و الاخرى تاهي زعرة وشعرها قصير فنفس طول ياسمين ... واقفين مع الولد لي دخل قبيلة

يَاسَمِين : (شافت فيهم واحد بواحد و ابتاسمات) holà !

غير كملاتها دخلات لبلاصتها وجرات خاميتها ، ماخلاتش ليهم الفرصة فين يجاوبو ...

يَاسَمِين : (كطل عليهم من التقيبات ديال الريدو) اففف ... ماقدهم فيل زادوه فيلة .... شوف شووف كي مقزبييين ... داك عورااج لقا فين يخضر عينيه ... يااربي ياربي نلقى لكرا دغيا

كان الحوار ديالهم كلو بالإسبانية و مرة مرة البنات كينطقو كلمات بلوغتهم و الولد متجاوب معاهم بطلااااقة .

يَاسَمِين : تباارك الله على سي ويكيبيديا شاااد گاع اللوغات ..

بدا كيقيس فشعر البنت و هي كضحااااك عاجبها الحال ، شدات ليه فدراعو و هوما يخرجو و البنت الاخرى بقات كتقاد حوايجا و دخلات للدوش

يَاسَمِين :(حلات الريدو) هاي هاااي ، برتوش هدا واقلة ماشي اوطيل !!! واهيا العالي فين انا ؟ (شافت الساعة فالتلفون لقاتها 18h) ناااري هاد نهار مغايساليش ... يخخ كوون خرجتيهم معاك بزووج لاش مخلي ليا وحدة هنا ... خرج الزمر كامل لهلا يرجعكوم

رجعات جرات الخامية و تكات بلاستها ... كديييها غميضة غير كتسمع شي تخرشيش و كتحل عينيها كطل مخلوعة غير مع راسها ...

بقات على ديك الحال وكل مرة تدخل بنت جديدة حتى بدات الألاغم ديال التلفون كتصوني على 21h ، حسات بجوع وناضت جبدات داك الميكة لي جابت وكلسات تخرشش فبيسكوايتها و عصيرها ، شبعات ومشات بروصات سنانها ماحد هاداك مكاينش ، ورجعات لفراشها تتكمش تاداها نعاس بسبب العيا وناضت على الالاغم لقاتها ( 7:00 ) ديال الصباح ناضت مخطوفة كيف عادتها كتسد عينيها وتعاود تحلهم تتأكد واش هي بصح فسبانيا ولا كتحلم ، اول حاجة دارت هي دوزات الريدو طلات على البيت ... بانت ليها غير البنت لي بقات لبارح ناعسة ورجليها خارجة من التحت الخامية و لي دخلو لبارح تاهوما مجبدات ، اما لاخرين باقيين غايبين .

ناضت بلا حس هزات لاطغوز ديالها و حوايجا من الشنطة و دخلات للدوش .... دقائق و خرجات مخلوعة غير مع راسها ، كانت لابسة شوميز فالأسود خاشياها فسروال ديال الثوب فنفس اللون و فوق منهم ڤيست فالأخضر مغلوق مع حذاء أسود كيلمع ... مايك اب خفييييف و الأي لاينر فوق عينيها مستحيل تستغني عليه ، شعرها مجموع ديل حصان و مخرجة الگصة ....

ملهية مع فاليزتها كتجبد منها وراقها حتى سمعات الباب تحل و هي طل ... قبل مايدخلو ريحتهم سابقاهم كتكسر الدنيا ، يد معنق بيها البنت لي غايبة فوق كتفو و يد شاد بيها كانيط ديال البيرة .... بقا غادي بيها حطهاا ففراشها و هي متبعا ليهم العين كتنكر بصوت مرتفع بحكم مغايفهمها حد

يَاسَمِين : يالاااه ها تقحبين على صباح ! كنا كنفيقو على صوت مول الحوت ومول لافيراي ماحمدناش الله هاحنا كنصبحو هنا على القحوب ، اوديي يااوديي بقاات فاللحية ! ... ونتا غرناطة كلها شافت ليك طرمتك ، ياودي هز غير سروالك بعدا عاد هزها هي .... اففف قلبتو ليا راسي بريحتكم ....الجيفة

الولد سمع صوتها و ضار لعندها بالعرض البطيئ ... هي غير شافت راسو كيتحرك ورجعات كتشوف قدامها بزربة ...

بقاا حااضيها كيضحك وهي تخشات فناموسيتها تاكل باش مضربها الشمس ، ردات عليها الريدو و جبدات عصير ومادلين ، دارت الضغمة قد راسها يلاه كتمضغ وهي تسمع شي حد حل ليها الريدو وضارت عندو فمها عامر لقاتو كايطل عليها

****** : راني نفهم شوية داريجة ، نفهم نفهم

طرطقات قيه عينيها وفمها باقي عامر تابدات تكحب داك المادلين كولو وهي كتفكر اش كانت كاتقول ...

ياسمين : ( الهضرة هربات ) ك .. ك .. م .. مزيان مزيان ، مزيان تفهم داريجة

**** : انا دزايري نتي يضهر ليا مروكية !

ياسمين : ( غير مطرطقة فيه عينيها ) ا ااه .. اه

خلاها ومشا وهي بقا فنفس وضعيتها حابسة الضغمة ففمها ، وهي تهبط شفايفها جاتها البكية على هاد الزهر العوج ولسانها لي ديما خارج عليها .

ناضت دغيا مسخات فمها وهزات صاكها وخرجات غير تهرب من داك التحشيمة ، غير وصلات لشارع تنفسات وخدات نفس عميق جدا و حاولات تتبسم ... مزال عندها جرعة أمل ان زهرها باقي فيها شوية دالضو يوقف معاها ليوم وكتحاول تخلي راسها إيجابية .

بان ليها طاكسي شيرات ليه و وقف ليها .... ركبات عطاتو عنوان الوجهة و ديمارا .

حلات الملف لي فيه السيڤي و الديبلوم ديالها كتقراه .... رجليها كتحركهم يتوتر و شفايفها كلاااتهم ، مرة كتشوف فالطريق ومرة كتشوف فالساعة . حاسة بالطاكسي كيرجع للور ماشي كيزيد للقدام ، دقات قلبها بداو كيتخربقو و كرشها تزيرات عليها ... معرفاتش منين نزلات عليها الخلعة .

السيارة وقفات و هي ملهية مع يديها كتفركهم ، سمعات التحنحينة ديال مول الطاكسي عاد فاقت .... طلات من السرجم و تنهدات بصعووبة ، خلصاتو و هبطات .

طلعات عينيها فبناية كبييرة و فوق المدخل الرئيسي مكتوب "Hospital Materno Infantil" "مستشفى الأم و الطفل" .

معنقة الملف ديالها حتى كتبغي تزيد خطوة باش دخل و كترجع لور

يَاسَمِين : ياالاه اياسمين ... تشجعييي ... بينك وبين الحلم ديالك غير داك الباب .... ماتكونيش غبية وتخلي التردد يلعب عليه ....

خدات نفس عمييق و زفرتو و تاجهاات للباب ... غير قربات ليه و هو يتحل ....

مع الدخلة كيبان ليها كولوار طوييييل ارضيتو بيضاء ناصعة ، جدران فنفس اللون ... زادت بخطوات للقدام وضرباتها ريحة التعقيم مجهدة ، صوت بكاء لي بايبي .... أطباء كيتجاراو متاجهين للمستعجلات .... صوت الأمهات كيغوتو من حر وجع الولادة .... الهدرة ديال الناس .... الاباء شي كايمشي وكايجي بالخلعة وشي جالس فالمقاعد شاد على راسو كيتسنى مرتو تخرج ....

هدشي كلو طاح عليها فحال سطل ديال الما بارد .... وجهها ولا صفررر و الدنيا ضارت بيها و التساؤلات و شكوك على راسها بداو كيطيحو عليها .... وااش اناا انقد على هدشيي ؟؟؟ وااش انا انقدر نخرج بايبي من رحم مرأة اخرى؟؟؟ كفااش انقدر نتحمل هاذ الغوات كامل ؟؟؟ فالسطاج مكانش كيبان هدشي بهاذ الصعوبة !!! واش انا قد هاذ الخدمة ؟؟ ولا غير دخّلت ليها راسي باش نهرب من المغرب ؟؟؟ ...واش انا فعلا قد هاد المسؤوليات !

كتشوف فالكولوار و كتشوف فالملف لي فيديها ... لمحات گروب ديال الممرضات خارجين من غرفة التوليد متاجهين للڤيستييغ ، باين على ملامحهم العياء ولكن شفايفهم مبتسمين . بعدات من الطريق تكات على الحيط ، قربو حداها و سمعات هضرتهم ...

الممرضة ١ :(كتهدر وتعبر بيديها) شفتوو البيبي شحالل زوييين ... راسو صغيييور و يديداتو صغيييورين حمقنييي ...

الممرضة ٢ :(شافت فالبنات لخرين وبداو كيضحكو عليها) سي و عينيه صغييورين و نيفو صغيييور كلشي فيه صغيير ههه

الممرضة ١ : حرام عليكم كضحكو عليا راه اول مرة ليا

الممرضة ٢ : واخاا اول مرة ولكن براڤو عليك درتي خدمة زوينة ....

كملو طريقهم و ياسمين بقات متبعة ليهم العين ... فوسط خوفها و ترددها بغات حتى هي تعيش نفس شعورهم ، ناسيين العيا والخدمة وتركيزهم غير على البيبي لي تزاد ، وعاد تشجيعهم لبعض فيق شوية من حماسها...

كملات طريقها فالكولوار حتى وقفات قدام خريطة المشفى ، بدات كتقلب على قسم الموارد البشرية كان فطابق الثالت ... طلعات فالأسانسير متاجة ليه ، ثواني و هو يتحل خرجات من المصعد وكل باب دازت قدامو كتقرا الافتة لي معلقة فيه حتى وصلات ل "recursos humanos" الموارد البشرية.

قضات شغلها بالخف و امورها دازت كلها ميسرة خبروها بالقسم لي اتخدم فيه و إسم الماجور ديال القسم ....

بالفرحة هبطات فالدروج كتجري و شعرها طاير موراها ، لي دازت من حداه كيتعجب فيها ... وصلات للطابق التحتاني كتنهج ، تاجهات ل recepción "الإستقبال"

كانت بنت بملابس مناسبين خدمتها ، جيب فوق الركبة فالاسود ، شوميز فالماغون و شال محزوم على شكل وردة فالكول ديال القميجة ... شعرها مجموع مشيطة للور بمقبط مع مايك اب خفيف .

الفيكس على ودينها كتهدر و كتقلب فصفحات واحد الملف قدامها ... طلعات عينيها شافت فيها مبتاسمة ، دارت ليها حركة بيديها بمعنى تتسنى واحد الدقيقة .

ياسمين ربعات يديها فوق الكونطوار و عينيها كيضورو على المكان كتحفظو باين عليها الحماس و الفرحة

ثواني قطعات الإتصال و ركزات معاها

(الحوار بالإسبانية)

لِندا (البنت لي فالاستقبال) : hola señiora,¿cómo puedo ayudarte ?

(سلام ... فاش نقدر نعاونك)

يَاسَمِين : (نبرة صوتها باين فيها الحماس) سلاام .... أنا ياسمين ، الموَّلدة الجديدة فهاذ القِسم عفاك فين جا مكتب سنيور أدريان ؟؟

ياله لِندا كانت اتجاوبها و ياسمين سمعات شي واحد كيطرطق المسكة حدى ودنيها !! تلفتات موراها لقاتها بنت باللباس الموحد ديال الممرضات باللون الوردي ... طوييلة بيبضة و زعرة ... شعرها مجموع سفنجة مهملة بقلم رصاص .... ملامح وجهها كيوت ومن عينيها كتبان شيطانة

مبتاسمة كتشوف فيها و دازت وقفات حداها كضرب صباعها مع الكونطوار

***** : (غمزاتها) هولاا !!! علاش كتسولي على أدريان؟

ياسمين بقات غير كتشوف فيها معجباتهاش طريقة هدرتها و نطقات لِندا

لِندا : (إبتاسمات ليها) احم ... مرحبا بيك ! مكتب سنيور ادريان هو اخر واحد فالكولوار على يديك ليمن

يَاسَمِين : gracias (شكراً)

عطاتهم بالضهر متاجهة للبيرو وخلاتهم متبعين ليها العين

***** : (شافت فلِندا) شكون هذي؟؟

لِندا : المولِّدة الجديدة ... يعني فالفريق ديالك

***** : اووو madre mia !!! (ضارت شافت فيها كانت قربات من البيرو ... نفخاات مسكتها وكرطقاتها) كنتمنى ليك الحظ اجاسميين حيت اتحتاااجي ليه للداخل !!!

••••••

واقفة قدام الغرفة مترددة ... خدات نفس عمييق زفراتو و دارت زوج دقات فالباب ، سمعاات صوت من الداخل عطاها الإذن ...

دخلات و سدات الباب وراها ، ضورات عينيها على المكان مابان ليها حتى واحد ... تبعات صوت تخرشيش الاوراق وشافت على اليسار ديالها . كان واقف شخص طويييل و غليييض ، كرشو كبييرة حتى من صدايف القاميجة لي لابس ايطرطقو .... الضوء ديال اللمبة لي معلقة خلا صلعتو كتبري ... الطابلة لي قدامو مرونة بالملفات ... كيهز ورقة يقراها ، يلوحها من يديه ويعاود يهز لخرى .

حبساتها الضحكة من المنظر ديالو فاش سمعات سمية "ادريان" تخايلات شخص ااخر مشي هذا لي قبالتها ... زادت بخطوات حتى وقفات قدامو ، هز راسو شاف فيها من تحت النظاظر لي كيف قاع لكاس ... طلعها و هبطها مزيااان عاد نطق

أدريان : Sí !!?

يَاسَمِين : احم... كنعتاذر على الإزعاج سنيور ... انا المولدة الجديدة فالقِسم و ...

أدريان : (قاطعها قبل ماتكمل هدرتها) ولكن مامحتاجينش مولدات هنا !!!

يَاسَمِين : (حساتو سرفقها من حناكها بزوج) نعاام؟؟؟

أدريان : كيفما سمعتي مامحتاجينش لمولدة !

يَاسَمِين : (كتجبد النسخ ديال وراقها من الكارطابل) ولكن ... ولكن هوما سيفطوني لهنا ... لعندك ... لهاذ القسم ... بصفتي المولدة الجديدة !!!

أدريان قرب و خطف الاوراق من يديها كيقراهم ، اول حاجة شافها هي سميتها ... كيقرا جملة و يطلع عينيه يشوف فيها ، ياسمين ولات صفرة و ركابيها فشلو ... يديها ولاو كلهم مقموشين بكثرت التوتر لي داز عليها من نهار وصلات

أدريان : "جاسمين" ! (لاح الاوراق فوق البيرو) الممولدات فالقسم كافيين يعني معندنا مانديرو بالزيادة .... ولكن !

كانو عينيها على وراقها لي مليوحين غير سمعات ولكن" طلعات عينيها بلهفة" ...

أدريان : ولكن ... (كيحك جنب كرشو) غادي نعطيك خدمة لي تناسبك !

يَاسَمِين : (طلعات فيه حاجبها) خدمة لي تناسبني !!! شنو هي ؟؟؟

ادريان : غادي تتكلفي

بغرفة الارشيڤ !

يَاسَمِين : (معرفاتش كفاش تعبر على الاعصاب لي ركَّب فيها وضحكات ) ههه بيردون ؟؟؟ ... سنيور ! انا عندي كونطرا فهاذ السبيطار على اساس صاج فام ! يعني مولدة ... ماعندي حتى علاقة بالأرشيف و الملفات ! مشي المهمة ديالي هديك !!

أدريان : vale¡ ... السوارت ديال الغرفة لي غادي تتكلفي بيها عند لِندا اتكوني عرفتيها ... البنت لي فالاستقبال ... قبلتي بالخدمة مزيان ماقبلتيش تقدري تمشي ترجعي لبلادك esta bien??!

عطاها بالضهر مامسوقش ليها ... خلاها كتغلي من الداخل لسانها تربط ، هزات وراقها من البيرو وخرجات من الغرفة خلات ليه الباب محلول .

كتمشا فالكولوار بلا روح ... داك الحظ لي كانت كتحس بيه فالصباح والحماس كلشيي تبخر!!! ، دازت من قدام البنات ومشات جلسات فالمقاعد لي قراب منهم .

حادرة راسها كتشوف فوراقها و دموعها هابطين عليهم ... حسات بشي واحد جلس حداها غير من صوت المسكة عرفاتها ...

إيسا : (دايرة رجل على رجل وكتشوف فيها) شنو وقع الداخل ؟؟ مال الزين مغوبش

يَاسَمِين : (بصوت باكي) قاليا اتخدمي فالأرشيڤ

إيسا : قاليك اتخدمي تما وجيتي لهنا كتبكي؟؟ مسكييينة

يَاسَمِين :(طلعات فيها حجبانها و تفرگعات عليها) وشنو بغيتيني ندير مثلا؟؟؟ جيت لهنا على قبل الخدمة لي ثلث سنين وانا كنقرا عليها وفاللخر يقوليا هبطي قادي الوراق فلارشيف !!! كفاش اتكون ردة فعلك نتي الى تحطيتي فنفس الموقف ديالي ؟؟؟ ماغاتحسيش بيا حيت (شافت فحوايج إيسا) نتي ديجا ضامنة خدمتك

إيسا : (ضحكات بالجنب و طرطقات مسكتها) Cariño (حبيبتي) كالما كالما ميامور ، هذا راه سبيطار ... مستشفى كبييير مشي المدرسة لي كنتي كتقراي فيها ، يعني الى مكنتيش ذكية و شخصيتك قوية ماغاديش تكملي شهر هنا ... والى كنت نعجة غياكلوك دياب ، كتباني ليا اجنبية و جاية غريبة ، حاولي ضبطي راسك واعصابك الى بغيتي مترجعيش لبلادك ، الأرشيڤ كيعطيه لأي وحدة باغي يتهنا منها ! حيت عارف ماغاديش تصبر عليه ... ونتي عندك زوج ديال الاختيارات يا إما ترضاي بالواقع و تبدليه بيديك او رجعي منين جيتي وتخليه هو يربحك ! وكنتمنى تختاري الحل الأول !! ( ابتسمات ليها ) سميتي ايسابيل .. تقدري تعيطلي غير ايسا

غمزاتها ومشات وخلاتها ...

ياسمين فعلاً حسات براسها فاشلة ! بقات كضوّر هدرة إيسا فدماغها و فهمات قصدها ... البكا ماعندو فاش ينفعها و معندهاش حل من غير انها تقبل ... رجعات وريقاتها للكارطابل ، مسحات دموعها ، قادات شعرها و ناضت متاجهة لعند لِندا طلبات منها السوارت ديال الأرشيف وعطاتهم ليها ...

إيسا كانت خارجة من غرفة واحد المريضة و بانت ليها هابطة للطابق التحتاني و ضحكات ....

••••••••

وصلات لآخر درجة وبان ليها باب كبيير ديال الحديد .... دارت السوارت فالباب شحال و هي معافرة معاه ... غير تحل وطلعات معاها ريحت الغمولة ! بدات كتنش بيديها و تكحب ... كانت الغرفة مضلمة ، كيدخل ضوء خفييف من واحد السرجم صغيير ديال الشبيك ... جبدات تلفونها شعلات البيل و هي تصدم !

الغبرة مغطية كلشي!!! رفووف طوااال ديال الحديد مغطيين بخيوط العنكبوت ، ملفات مليوحين فالارض لي الزليج ديالها ولا كيبان كحلل بكثرت الوسخ !! سراق الزيت غير بان ليه الضوء بدا كبتحرك لحمها تشوك عليها ... كتمشي بشويية خايفة لاتعفط على شي حاجة ، بانت ليها آلة ديال فوطوكوبي بوحدها لي نقيا تما!!! و تعجبات

يَاسَمِين : واايااالااه !!! كيهبطو حتال لهنا يطبعو وراقهم و عگزو يدوزو جفاف كل نهار ...

طلعات عينيها للسقف كتقلّب واش كاين اللامبات و حسات بشي حاجة طاحت فوق راسها وشدات ليها فشعرها من اللور !!! بالخلعة تكوانسات ... بدا دكشي كيتمشا مع ضهرها و بقا هابط حتال رجليها !! نزلّات البيل بشويييية كتشوف فسبرديتلها و بان ليها فار صغير كيشوف فيها !!!

دغيا نفضاتو من رجليها و طلقات غوتة كتصمك بججهد وهي كتنقز وتحك فداتها وتكحب جاتها التقية !!! بقات كتنقز بلاصتها كتڤيبري اكثر حاجة كتكرها هي الفيران .... هنا داك الدموع كاع لي كانت حابساهم نزلاتهم كتبكي بجهد كيف شي بيبي صغير ، واش هاد الزهر مغاايتقادش

ماعرفاتش منين اتبدا ديك الروينة الضلمة كتخلع و زاد الفار كمل عليها طاح عليها الضيم ديال بصح ... بقات غير كدور بلاصتها حتى كتبغي تمشي فحالها و كتنعل الشيطان

••••••••••••••

★مطبخ المستشفى★

دفعات الباب و دخلات كتقلب عليها ... بانت ليها عاطياها بالضهر بلباس الموحد ديال لي كويزينيي كتقاد لي بلا ديال الغذاء ، قربات عندها بالحس و عنقاتها من اللور خلعاتها!!

***** : (عرفاتها هي حيت ولفات بسالتها) اففف إيساااا شحال من مرة كنقوليك متبقايش تجي تعنقيني بالحس !!! شي نهاار يطييح فيا النص

إيسا : (قربات باستها من حمكها) وشنووو انديير ونتي دبدوبة كلك حنااان ... ماتخافييش واخا يطيح النص غادي تعوضييه فيومتااين

***** : (صغرات فيها عينيها ،حطات الموس و ربعات يديها) شنو بغيتي عوتاني !!! انا عارفااك كتجيي لعندي لهنا غير فاش كديري شي موصيبة

إيسا : نوو نوو Cariño مااشي موصيبة بالعكس ... جييت لعندك ... حييت عارفاك نتيي واحد الإنسانة عضيمة و عزييز علييك خييير و ماغاترضيش هاذ الطلب فوجهي !

***** : هضريي سربيي راه باقي تابعاني الخدمة

إيسا : جات واحد الممرضة جديدة و أدريان صيفطها للأرشيڤ!! (حزنات ملامحها) والبنت مسكينة زويونة وكيوووت ماتقدش على داك العذاب بوحدها و عااد زيد اجنبية ... كانت كتبكييي بقات فيااا ، بغيت نعاونها ولكن خاصني نكون فغرفة التوليد من دابا ل (شافت فالساعة لي فمعصمها) خمسة الدقائق ... وداكشي علاش جيت نطلبك نتي .... Por favooor (بلييز) سماندرا هبطيي عاونيها!

سماندرا : (بدورها معجبهاش الحال) و علااش ايصيفطها للأرشيف ماالو حمااق؟؟؟ الاطباء ديال القسم هوما لي ضسروووه كيسحاب لراسو مدير علينا ولا شنو ؟؟؟

إيساا :(شافت فالخدامة لي حداهم) شووت لايسمعك شي واحد و يوصلوها ليه ... شنو قلتيي دابا؟؟ وااش اتهبطي عندها؟؟

سماندرا : سي ... سي ... غنعبط غير نسالي هادشي ! اففف ... مسكينة اتكون اتحماق التحت

إيسا : (طارت عليها عنقاتها) te quieroo ... انمشي نقابل خدمتي مرة مرة انطل عليكم

(هزات تفاحة من السلة لي قدامها غمزاتها و مشات)

•••••••••••

★عند ياسمين★

جالسة فوق واحد الطبيلة و كتشوف فالروينة لي خاصها تجمعها ... من قبيلة وهي كتبلاني و معرفاتش منين تبدا ، ريحت الغمولة قتلاتها ...

يَاسَمِين :(ضربات فخذها) وااياالاااه !!! جيييت لهنا باش نخرج البعالك من كرش مهم وصدقنا فالتجفاف !!! اشداااك لشي سبليوون اياسمين اشداااك ... كوون بقييتي فبلادك وحليتي شي حانوت ديال الجلالب فإنزگااان !

سمعات شي حس و تخرشيش كيقرب وناضت من بلاستها مستعدة للهجوم ، سمعات الهدرة ديال العيالات و بدات كتقرب من الباب ، تشعل الضوء فالغرفة وبانو ليها . كانت مرأة غليوضة بشرتها داكنة شعرها مجموعة سفنجة ...(سماندرا) ملامحها هادئة كيخليوك تحس بالراحة ، ياسمين غير شافتها ابتاسمات ليها تلقائيا ... وكانت مرأة اخرى اسبانية من عمال الميناج فالسبيطار ...

جارين كروصة فيها اي حاجة ممكن يحتاجوها باش ينقيو الغرفة ...

سماندرا : holàaa (سلاام) جينا باش نعونووك !!

يَاسَمِين : (كتشوف فيهم وفداكشي لي جارين) هاا؟؟

سماندرا : (قربات عندها و دوزات يديها على شعرها ) ادريان ... و بشهادة الجميع ... حيوان ! من الاحسن ماتشديش معاه الضد !! ولكن لقاي حل فأقرب وقت باش متبقايش محبوسة فلاكاڤ! (شافت فالروينة و عاودات شافت فيها) انتعاونو على هدشي باش تساليه دغيا... والى بقات شي حاجة نكملوها غدا vale¡

يَاسَمِين : (زربات عليها بقات مصدومة) ش...شكون نتي؟؟و باش عرفتيني كاينا هنا؟

سماندرا : ههه انا سماندرا خدامة فالكوزينة الفوق ... إيسا لي صيفطاتني عندك ...

ياسمين ومات ليها براسها و ابتاسمات ... داك الشوييية ديال الزهر لي بقا عندها حسات بيه هو لي صيفطهم ليها يعاونوها

تحاماو على ديك الغرفة رجعات كتشعل !! الارض عاد بان اللون ديالها ، الخملة كلها تحيدات و الغبرة تمسحات ، رشو الدوا على قبل الفيران والحشرات لي تما ... الرفوف مسحوهم ولكن الدوصيات ماقدروش يقادوهم عياو ... ولاو حالتهم بالغبرة و قتلاتهم الحساسية ...

ياسمين رتااحت بزااف لسماندرا لقات راسها عاودات ليها على حياتها كلها من هار تزادت حتى اليوم لي هوما فيه و سماندرا بدورها كانت مستمتعة بالهدرة معاها و مستمعة جيدة ليها ، حسو كانهم كيعرفو بعضياتهم من زمااان ....

البنت لي عاوناتهم مشات و بقاو هوما جالسيين كيتعاودو ...

سماندرا : و داباا فين جالسة؟؟عندك شي واحد من العائلة هنا؟

يَاسَمِين : نوو جالسة فواحد الاوتيل مشترك ... يخخ و ماحاملاااش نرجع لييه و ماعنديش الوجه باش نرجع لييييه ...

(سمعو صوت إيسا و ضارو شافو فيها)

إيسا : Cariñooo الى مابغيتبش تبقاي تما اجيي سكني معانا ... ديجا انا و ساميي كنقلبو على بنت تشاركنا الكراء

(جلسات فوق البيرو و حطات قدام كل وحدة طبسيل ديال الغذاء مغلف)

سماندرا : طاحت عليا نفس الفكرة !!! ماجاتش تبقاي من فندق لفندق ماتعرفي شنو يصادفك

يَاسَمِين : (الفرحة بانت على وجهها) بصح !!! الصراحة حتى انا كنت كنقلب على الكراا ... ماغانتقلش عليكم ؟؟؟

إيسا : نووو حبيبتيي و نزيدك الطياب ديال سماندرا حسن من ديالل الاوتيلات و القهاوي يعني غتانمي الفرصة (غمزاتها)

سماندرا : (كتنقب من طبسيلها) طياابي كاامل لي كتاكلي و مابان فييك حتى كيلو

إيسا : هههه باراكا غير كيبان فيك نتيي ا دبدووبتييي (قربات جراتها من حنكها)

يَاسَمِين :(عينيها لمعو بالحماس) هههه صاافيي يعنيي من غدا نجي؟؟

سماندرا : علاش اتسناي حتال غدا؟؟؟ نعطيوك العنوان جيبي حوايج من الاوتيل واجي

إيسا :(شافت فياسمين) و بالمناسبة انا صاحبت الفكرة يعني خاصك تشكرينيي

يَاسَمِين : (تفكرات الهدرة لي قالت ليها و حشمات) إيسا ... باردون على قبيلة ... كنت منفاعلة وخرجت اعصابي فيك مكنتش حاسة بشنو كنقول

إيسا : ههه مشي مشكل المهم هو الهدرة لي قلت ليك انا فيقاتك ... ياك؟؟

سماندرا : (شافت فالساعة كانت قريبة 17:00) اووه مشا الحال خاصني نكوم فالدار من دابا شوية ... (ناضت من بلاستها) إيسا صيفطي العنوان لجاسمين و ياله نمشيو

تبادلو إيسا و ياسمين النوامر و صيفطات ليها العنوان ... و قالت ليها انا طابق و الرقم ديال الدار ...

سدو الباب ديال الأرشيڤ و طلعو للطابق الفوقاني ... بقات كتسناهم حتى بدلو حوايجهم و جمعو لوازمهم و خرجو مجموعين ...

سماندرا و إيسابيل لقاو الطوبيس كيتسناهم و مشاو اما ياسمين خدات طاكسي وتاجهات للفندق ......

٭الساعة 18:25٭

... طالعة فالدروج و كطلب فخاطرها مايكون حتى واحد فالبيت . باب لاشومبر كان مسدود حطات ودنيها عليه مامسموع حتى حس !!!

يَاسَمِين : يااربي يكون غبر هو والموصيبات لي معاه

حلات الباب بشوييية كطل فحال شي قطة ، بانو ليها الخوامي كلهم محلولين من غير ديالها و لي ڤاليز ديالهم ماكاينينش... فرحاات!! ، دفعات الباب على وسعو وهي دخل

يَاسَمِين : اللله على راحة !!! ، اففف فحالا كانوا جالسين ليا على قلبييي ... (سدات الباب برجليها طلع ليها الموراال) واللهيلا قاليك (غلضات صوتها كتعيبو) نفهم الداريجة نفهم نفهم ... ااسيدي فهمها ولاا تفهمك غطيي غير طرمتك لي فرجتي فيها الناس ....

اول حاجة فكرات فيها هي الدوش ، تكرفصات بالغبرة ولات حالتها ... جبدات حوايجها ولا طغوزتها ، دخلات خدات حمامها بالخف و خرجات لاوية عليها فوطة ...

واقفة قدام المرايات كتنشف شعرها و عقلها كيفكر فداكشي لي وقع ليها هاذ النهار ...

يَاسَمِين : مااشي مشكل اياسمين ... الامور كلها غادي تقاد ...و دااك الصلع ايعرف الغلط لي دار ... و ماخرجتيش بيديك خاويين!!! ربحتي صحابات ... هذي اول مرة ايكونو عندك صحابات لي اتشاركي معاهم السكن اياسمين ... اففف غيير شوية ديال الصبر و كلشي ايتقاد ... حتى حااجة ماكاتكون ساهلة من الاول ضروووري التكرفييص ا ياسمين ... ضروريي ...

طولات الشوفة فراسها و ابتاسمات لراسها بزز منها و صبرات خاطرها لي اتنفاجر بهاذ زوج كلمات ... جمعات شعرها سفينجة و لبسات حوايجها ، اكثر حاجة كترتاح فيها هي السيرڤيت ، جمعات لوازمها و خرجات ...

كلات بالخف من لي بيسكوي و ناضت تجمع ڤاليزاتها ، قاداتهم قلبها مرتاح ... اول مرة ترتاح لشي واحد من اول لقاء ، حسات بإيسابيل و سماندرا قراب منها كثر من عائلتها غير من داك الحوار القصيير لي داز بناتهم ...

شافت الساعة بغات توصل قبل مايضلام الحال ولكن تعطلات ، لبسات جيلي فالكحل على قبل البرد و إسبادري ديالها ، هزات كارطابلها ، جرات ڤاليزتها و

ضورات عينيها على الشومبر لآخر مرة مبتااسمة ،

شعلات الكاميرا ديال الفون و صورات البيت كتدكار للمغامرة لي عاشت فيه ...

هبطات للإستقبال لقات غير الولد عطاتو السوارت ديال البيت ، حتى بسلامة ماقالتهاش خرجات شدات طاكسي و عطاتو العنوان ...

•••••••••

★:حي santa Ana★

الطاكسي حطها قدام الدار نيشان ... كانت بناية من ربعة ديال الطوابق تحت منها سناك للوجبات السريعة و بار ... ضورات عينيها على الشارع كان كااالم ، والطريق لي جات منها بانت ليها تيرمينوس ديال الطوبيس يعني كلشي قريب ليها .

دخلات مع الباب الكبير و بانو ليها زوج بيبان اخرين .... تفكرات هدرة إيسا و دازت من لي على ليسر ، ماحبسات حتال الطابق الثاني قدام الدار "C" .

دارت زوج دقات فالباب و رجعات للور ... متوترة و متحمسة فنفس الوقت لبداية حياتها فإسبانيا ، اي خطوة اديرها اتكون كتجربها لأول مرة فحياتها .

تحل الباب و بان ليها ولد تقرييا فعمرو 15 عام بسروال حينز ازرق و تيشرت مصور فيه گامبول ، بشرتو سمراء شوية فحال الكراميل ، شعرو اسود فيه شويييية ديال الزعورية مجموع للور على شكل زوج ظفيرات قصار ، اكثر حاجة مثيرة فيه هي عينيه السود كتبان فيهم الحدة و التحدي عكس ماماه تماما ...

ياسمين شافتو دغيا ابتاسمات ليه و هو بملامح جادة

يَاسَمِين : ههه holà niño !!!

**** : holà

يَاسَمِين : إيسا و سماندرا كاينين؟؟

**** : سيي كاينين

يَاسَمِين : (عينييه حمقوها بقات سااهية فيه و نطقات) شنوو سميتك؟؟

**** : أنخيل

يَاسَمِين : متشرفيين و انا يااسمين

أنخيل : (ابتسم ليها ) متشرفين !!

(ياله كانت اتجاوبو و قاطعم صوت إيسا)

إيسا : جااااسمييييين وصلتي !!!(قربات سلمات عليها) ... دخليي ماتبقايش واقفة (دخلو و شافت فأنخيل) يااله سير عيط لسماندرا قولييها جاسمين جات ...

مشا لبيت ماماه و ياسمين تابعة إيسا لي كتوريها الدار ... كانت سامبل من جميع الجوانب ، وراتها البيت لي غادي تبقا فيه عجبها بزاف كان متيسع ومريح . حطات شانطاتها و كارطابلها و مشاو للصالة ... جلسو فالكانابي لي متوسط الغرفة وباقي كضور عينيها كتحفظ لمكان

إيسا : كييف جاتك الدار ؟؟ عجباتك ؟

يَاسَمِين : سيي زوينة بزااف حسيت فيها بالراحة النفسية (قربات عندها و هدرات بشوية) واش أنخيل ولد سماندرا؟؟

إيسا :(حتى هي هدرات بشوية) سي ولدها

يَاسَمِين : و باباه كاين هنا؟؟؟؟

ياله إيسا بغات تجاوب وسمعو خطوات سماندرا دخلات

سماندرا : جااسميين هولااا ... مرحبا بييك فدارك !!

يَاسَمِين : (قربات سلمات عليها) ههه شكراا

إيسا : داباا وليناا ثلاثة ديال الصحاباات ... يعنيي ممنووع الأسرار بيناتناا

سماندرا : اه و اليوم نوبتك طيبي العشا

إيساا : نووو حراام علييك ... ماقادراااش اليوم عييت بزااف ...

سماندرا : على غير نتي لي كنتي خدامة ؟؟؟ حتى انا و جاسمين تسخسنا اليووم

إيسا : اوووف ... امتاااش يباان فارس احلامي ... ماااي شوگر داديي لي يدير ليا الخدامات فالدار (هزات يديها كتشوف فيهم) داباا هاذ الصبيعات يقطعوو مطييشة؟؟ نوو نووو

سماندرا : (شافت فياسمين) غيير وجديي رااسك كلمة "شوگر دادي" اتولي تسمعيها كثر من سميتك ... الى عولنا على إيسا انموتو بالجوع ... انوض انا نطيب ... كيف العادة !!

يَاسَمِين : ههه الى بغيتيي نقدر نعاوك!

إيسا : ههه شتيي هاهي جات شي وحدة اتفاهمي نتي وياها فالكوزينة اما انا ماشي ديال دكشي حيت ماي ..

سماندرا / يَاسَمِين : (قاطعوها قبل ماتكمل هدرتها ) شوگر دادي ايدير ليا الخدامات فالدااار

ناضو بزوج للمطبخ و خلاوها كتموت بالضحك

إيسا : ههه اواا شتووو هاحنا حفظنا بعضياتنااا دغيااا

•••••••

داز اسبوع على استقرار ياسمين مع البنات ولفو بعضياتهم بزربة و بدات كتطلق معاهم ... إيسابيل قتلاتها غير بالضحك و التشيطين ديالها كلمة و طعم الملل مابقاوش كيدورو بيها اما سماندرا فكانت الاخت الكبيرة لي فمتابة الام الحنون كل مرة كتحتاج فيها صدر حنون و ادن مستمعة كتلقاها فجنبها ...

و اكثر واحد قريب لقلبها هو انخيل واخا لقات صعوبة باش تقرب منو حيت شخصيتو حدووودية بزاااف ولكن رتاح ليهاا وقت فراغها كلو كدوزو معاه و حتى هو بدورو تعلق بيها بزاف وحتى من ماماه عجباتها صداقتو بيها

... وضعها فالسبيطار باقي كيفما هو نهارها كلو كيدوز بين الأرشيڤات ولات حافظة الرفوف و الدوصيات لي فيهم ... اكثر حاجة كتفاداها هي ادريان ماحدها باقي مالقاتش حل لي يخرجها من لاكاڤ ماعندهاش إستعداد تواجهو .

★الجمعة 10 اكتوبر★

جالسة فبيروها كتلعب بالستيلو فيديها و كتشوف فالحيط لي قدامها ... الملل قتلها قرب يخرج ليها العقل بين ربعة الحيوط ، شافت حتى عيات وجمعات الوقفة

يَاسَمِين : لااا لااا ... نزييد دقيقة وحدة هنا نحماق

هزات تلفونها و خرجات متاجهة لعند لِندا لي ولفات تجمّع معاها هاذ الأيام غيير شافتها و هي ضحك ليها

لِندا : جاسميين !! تعطلتي حتى سحابلي ماغاطلعيش عندي اليوم

يَاسَمِين : (ربعات يديها فوق الكونطوار) اففف مايمكنش رااه بقا ليا شويييية و نحماق ... مستحيل نقدر نكمل هكذا

لِندا : حبيبتي ... ماعرفتش انا شنو المشكل ديالو معاك ... ولكن غير صبري ، ماتعرفي يبدل الرأي ديالوو

يَاسَمِين : صاافيي ... نسايه علياا سيرتوو كنجيب ليا التبوريشة

لِندا : ههه vale¡ ... ااه تفكرت ! اليوم فالليل كنتجمعو فواحد ريسطو ، ايكونو قالوها ليك لبنات ... خااصك تجيي ضروووري

يَاسَمِين : نوو غيير عفيوني ... انا وليت باغا غير نرتاح

لِندا : por favooor ... ايعجبك الحال بزااف و نيت اتبدليي الجو و تنسااي الأرشيڤ و الورااق و الخدمة

يَاسَمِين : امم ماعرفتش حتى نشوف

لِندا : امم ماشي مشكل ... كاينا إيسا غادي تجيبك بزز منك ...

غيير جبدات سميتها و بانت ليها جاية لعندهم كتجري ... بلباسها ديال الخدمة و البوني مغطي شعرها

لِندا : إيسا !!! ماالها كتجري

ياسمين بالخف ضارت كتشوف حتى وقفاات إيسابيل كتنهج شادة فدراع ياسمين

إيسا : (الهدرة كتخرج ليها بزز) جااسمييين ... جااسمييين ...

يَاسَمِين : إيسا !!! مااالكييي اشش واقع ؟؟؟

إيسا : اتمشي معاياا ... خاصك تمشي معايااا

يَاسَمِين : فيين انشي معاك ؟؟؟ هدريي سربييي قطعتي فيا النفس !!!

إيسا : (وقفاات كترجع النفس عاد نطقات) غادي دخلي معانا لقاعة الولادة ... اليوم ... و دااابااا !

يَاسَمِين : إيسا واش كضحكي عليا؟؟؟

إيسا : شووفيي فحاالتي !! واش كنبان ليك كنضحك ... ياله راه كنضيعو غيير فالوقت !!

يَاسَمِين : إيساا رااه ماعندي فيين نمشي معااك ادريان ...

إيسا : (قاطعاتها) يمشي يتقود ادرياان !!! هو غيير ماجور ماشي مديير علينا و ماشي طبييب ... يعني الى كنتيي بااغة تخدمي الخدمة لي جيتي على قبلها لإسبانيا وتخرجي من داك بيت الفيران تبعينيي دااابااا !!

ياسمين بقات كتشوف ليها فعينيها حتى بدات الابتسامة كتبان على وجوههم بزوج و تحولات لضحكات ...

إيسابيل جراات ياسمين من يديها كتجري بيها للڤيستييغ فين اتبدل حوايجها

ولِندا بقات غير واقفة بلاصتها مافاهمة والووو!

.... حلات إيسا البلاكار ديالها و جبدات منو نفس لباسها الموحد و عطاتها لياسمين ... لبساتها بلاعقل و خرجو كيجريو عوتاني فالكولوارات حتى وصلو لوجهتهم ... إيسا دفعات الباب و دخلات و ياسمين بقات واقفة كتقرى ف salas de parto "قاعات الولاداة" ماعرفاتش علاش عينيها دمعو حسات بالدروس و الامتحانات و المعلومات لي شدات فثلث سنين ديال القراية بداو كيتعاودو ليها فعقلها حرف بحرف ...

الفرحة لي حسات بيها فاش شافت غير باب لي فاصل بينها و بين حلمها لا توصف ... فيقها صوت إيسا فاش مالقاتهاش موراها رجعات كتقلب عليها

إيسا : جاااسمييين يااله حتىى دخلي و تولدي لمراة لي داخل عاد بكي و فرحيي يااله سربييي ...

مسحات دميعاتها بالخف و لحقات عليها . مع الدخلة كتسمع الغوات ديال العيالات كيولدو جاي من لي بوكص ديال الولادة قفزها و دقات قلبها بدات كتجهد ... كضور عينيها على المكان كان طاغي اللون الابيض و الكريمي .... دخلو للبيرو ديال الماجورة لي كان على الليمن و خداو اللوازم لي ايحتاجو ... حداه كانت جليسة صغيرة ديال الممرضات كيتجمعو فيها

كانوا زوج بنات خدامين مع إيسا فنفس السربيس جالسين ... غير بانت ليهم ياسمين دخلات ! وحدة شافت الاخرى و طلعو حاجبهم فيها ... بكثرت ما كيقضيو الوقت كلو مع بعضياتهم ولاو كيتشابهو قلبا و قالبا ...

جلسات إيسا فواحد من الكانابيات الصغار لي تما فاش شافت البنات عرفات بلي باقي ماطلعات حتى وحدة من غرفة الانتظار و ياسمين بقات واقفة بلاستها ، الحاجة الوحيدة لي مركزة معاها هي الغوات لي كتسمع ...

وحدة من البنات شافت فإيسا و نطقات

ميلينا : شكوون هذي؟؟؟

لِيلى : هذي ماشي لي كتخدم فالأرشيف آش جابها لهنا ؟؟ إمتاش بالسلامة ولات فالگروب ديالنا؟؟

ميلينا : هادشي فخبار سنيور ادريان ؟؟؟

لِيلى : لقيتو سنيور ادريان عطلة هاذ النهار و درتو لي بغيتو ؟؟؟ راه hospital هذاا ماشي كاازينو!!!

ميلينا : انا بعدا غيير يجي غادي نقولها ليه!!! (طلعات و هبطات فياسمين لي ماهياش هنا اصلاّ) كون كانت اتعرف دير خدمتها

مايسيفطهاش تمسح الغبرة و تخدم فجحر الفيران

لِيلى : (ضحكات بإستهزاء) ههه ولهيلا فحالها فحال لي سبقوها اتبقا حتى تعيا و تقدم إستقالتها ... سنيور ادريان كلمتو ماكاتنزلش للارض

إيسا مربعة يديها كتشوف فيهم وحدة بوحدة حتىى سالاو هدرتهم عاد نطقات

إيسا : احمم ... بغيت نسولكم ... سنيووركم ادرياان شحاال كيخلصكم باش تقولو عليه هاذ الامداح و تبقاو تابعينو فحال الكلاب؟؟؟ كيخلصكم فلووس و لاا بشي حاجة اخرى!! (غمزاتهم)

ميليناا : (ولاات حمرة اطرطق) اييه !!! احسن ليييك جمعييي فمكك !!

إيسا : ههه و الى ما جمعتوش شنو اديري؟؟ اتشكيني عند (رققات صوتها كتعيبها)سنيوور ادريان ؟؟

لِيلى ضربات الطم ماكاتعرفش تتجابد مع الناس ماشي فحال صاحبتها

ميلينا : مااغادييش نهبط للمستوى السواقي ديالك ... (خنزرات فياسمين) لا نتي لاهاذي لي معاك اطولو معانا غيير صبري

إيسا : اااه و واحد السؤال اخر ... واش كيخلصكم بزوج فدقة وحدة ولا كل وحدة بوحدها ؟؟؟

لِيلى : (تقرصات و ناضت من براستها) لاا ماغانبقاش مع وحدة فحالك فبلاصة وحدة

(ضربات ياسمين بكتفها فيقاتها من سهوتها بقات متبعة ليها العين المستغربة حتى خرجات )

ميلينا : (حتى هي تقرصات ولكن مابيناتش) من الاحسن تبداي تجمعي البلاكار ديالك حيت كيبان ليا حتى نتي اتهبطي للأرشيڤ مع أمثالك

إيسابيل بقات غير كضحك بنصر و كتشوف فيها عرفاات بلي هدرتها سمماتها ، وتهديداتها ليها ماحركو فيها حتى ساكن

يَاسَمِين : (شافت فإيسا) مال هاذي؟؟؟

قبل ماتجاوبها تسمع صوت الباب الكبير تحل دازو زوج ممرضات جارين شاريو عليه مرأة قربات تولد و موراهم لِيلى ... ولي خلا يَاسَمِين تستغرب ان المرا رغم الوجع والالم لي باين على وجهها مكتغوتش فمرة !!

إيسابيل ناضت وقفات حدى ياسمين وشدات ليها فدراعها

إيسا : جاسمين هذي فرصتك !!

يَاسَمِين : (كتفرك يديها بتوتر) ولكن .... ولكن ... مالها ساكتة !!!

إيسا : وحنا مالنا !!!! تغوت ولا تسكت دخلي عندها و تعرفي

ياسمين شافت إيسا و شافت فالبوكس لي فيه المرا ... خدات نفس عميق و زفراتو رغم الخلعة لي فيها الا ان الرغبة لي عندها باش تبدل الوضع لي هيا فيه فالسبيطار غلبات ... رجليها تحكمو فيها و ساقوها و إيسا موراها

ميلينا غير شافتهم مشاو كيجريو ناضت حتى هي تابعاهم كتغزل بالسم

لقاو الممرضات لآخرين عند راسها وحدة شادة ليها فيديها و الاخرى كتمسح ليها العرق لي على جبهتها كانت بنت فأواخر العشرينات شعر أشقر مجموع للفوق و خصلات لسقو على جبينها من العرق ، عينين الزرقة ديالهم طغا عليها اللون الاحمر من بكاها الصامت ...

انتابهو الممرضات لياسمين و إيسابيل فاش دخلو وابتاسمو ليهم

الممرضة ¹ : ههه اليوم المريضة ديالكم ماغاديش تعدبكم

يَاسَمِين : شنو الوضع ديالها!؟

الممرضة(مدات الدوصيي كانت لِيلى اتشدو و خطفاتو ياسمين كتقراه) : كيفما كتشوفي حالتها مستقرة ! ضغط الدم و دقات القلب ديالها و ديال البيبي مزيانين ... و الطفل مستاعد للخروج

قربات ياسمين لعند البنت هزات ليها رجليها فوضعية لي اتوضاح ليها الصورة ولقاتها فعلا مستاعدة ...

بغات تفتح معاها حوار باش ترتاح ليها و تقدر تواصل معاها بإمبتاسمة على شفايفها كتحاول ما امكن تبت راسها

(الحوار بالإسبانية)

يَاسَمِين : انا ياسمين المولدة لي اتكلف بيك ... باش كتحسي؟؟

(ميلينا بغات طرطق دغيا زربات عيهم)

**** : (كتنطق بصعوبة) الوجع ... الوجع كيقطعنيي

يَاسَمِين : اوكيي طبيعي جدا ... هذي ولادتك الاولى ؟

***** : (مدة وهي مزيرة على عينيها و عاضة على شفايفها عاد نطقات بصوت متقطع) اه ... اه الاولى

يَاسَمِين : كلشي غادي يدوز مزيان ... ولكن حاولي تخرجي الوجع لي فييك باش تسهال عليك و علينا الولادة vale¡

الممرضات لي طلعو البنت انساحبو انساحبو و بقاو غير المولدات

ياسمين من بعد مالبسات القفازات الطبية و البرتيكسيون لي عبارة على طابلية بلاستيكية شفافة نسات المحيط لي ضاير بيها و الممرضات لي مساعدينها و بقات مركزة غير مع البنت لي اول ولادة ليها و اول توليد لياسمين .... يعني اتكون صعيبة عليهم بزوج ولكن حاولات تهدئ راسها ...

خاطرها وساعت الأقصى درجة التواصل لي كان بينها وبين البنت لي قدامها و البيبي لي بدا كيبان الرأس ديالو لا يصدق ... قدرات تشارك و تحس بشوييييية من الوجع غير من خلال الشدة لي دارت ليها البنت ليديها و الغوتة الاخيرة لي طلقات قبل ميخرج البايبي كاامل !!!

اول بايبي تهزو ياسمين بين يديها ! صوت صراخو حساتو نجاح ليها و صوت بداية مسيرتها المهنية و من زهرها اول توليد ليها داز قدام عينين الطبيبة لي بقات غير مراقباهم من خلف بلا مايحسو بيها و انساحبات و هي راضية على الخدمة لي دار الفريق ...

فرحة ياسو بانت فملامحها و حركاتها ... عطات البايبي لإيسا باش تنظفو و رجعاتو الأم ديالو باش ترضعو ... البنت بدورها فرحتها بانت فباكئها و طريقة احتضانها لطفلتها اول قطعة منها ...

دوك زوج لفعات بغاو ياكلوها بعينيهم ماحملوش ياسمين بلااا سبب ... إيسابيل انتابهات ليهم و نطقات

إيسا : احمم ... حنا غادي نهبطو كيفما كتشوفو المولدة (وركاات على "ل" كتسممهم) ديال عيات ... و نتوما تكلفو بالام و المولود ديالها (غمزاتهم)

مشات حدى ياسمين لي كتغسل يديها غير كضحك مرفوعة

إيسا : اوااا سنيورا جاسمين شنو إحساسك ؟؟؟ ههه دابا عرفتيها علاش مكتغوتش؟؟

ياسمين بقات غير كتشوف فيها و كضحك حتى طارت عنقاتها و إيسا بدورها بادلاتها العناق

طلقات من إيسا و عنيها عامريين بدموع الفرحة ... اول حاجة فكرات فيها هي تشارك فرحتها من ماماها ! خرجات كتجري متاجها للڤيستييغ ... حلات البلاكار ديال إيسابيل و جبدات منو تلفونها ، ركبات الرقم ديال ماماها و يديها كيترعدو إبتسامتها زادتها جمال على جمال ... التلفون كيصوني و كتسنى الخط يتفتح بلهفة ...

تقطع المرة الاولى و عاودات عيطات ليها مدة و هو كيصوني حتى عاود تقطع !! بغات تعاود تتصل ولكن حبسات ، ابتسامتها بدات كتختافي شوية بشوية و جلسات على واحد من الكراسي لي تما كتشوف فالرقم لي مسجل بإسم "MAMA❤️"

و عينيها عامرين بنظرات كلهم خيبة أمل ...

دخلات إيسا شافت فرحتها طفات و جلسات حداها شافت فالفون و تنهدات عرفات شنو وقع ... حيت ماشي اول تتصل بيها و ماتجاوبهاش ... خطفات ليها التلفون و شدات ليها فيديها

إيسا : ماشي مشكل ... هي الخاسرة !!! ضيعات عليها اجمل خبر ممكن تسمعو فحياتها ... و لي هو نجاح بنتها و وردتها جاااسمين ... اصلا كاينا مامانا سماندرا هههه ... نمشيو نصدعوها شوية

(وقفات وجراتها من يديها حتى وقفات معاها و باااين طلعوليها الزعف ولكن ضحكاتها بزز منها) و نقولو ليها بلي و أخيراً جاسمين اتخرج من داك القبر

يَاسَمِين : ههه الى هبطنا عندها دابا اتشير علينا بشي مقلة ديال الزيت سخونة

إيسا : ههه لاا ماتسخاش بيك و ولدها كيموت عليك ... ولكن انا احتماال كبير تقتلنيي

خرجو من الڤيستييغ نيشان لعند سماندرا ...

حلو الباب بالحس و دخلو كان كلشي ملهي مع خدمتو شي كيقطع الخضرة و شي كيغسل الماعن و شي كيقاد الماكلة فالاطباق كيتسمع غير صوت الماس و الماكلة كطيب ...

بانت ليهم كيف العادة عاطية بالضهر ملهية مع شغلها و تمشاو على صباع رجليهم حتى وقفو موراها و عنقوها بزوج فدقة وحدة حتى قفزات!!دغيا بعدو مشاو وقفو قدامها فاصلهم كونطوار

سماندرا : (هازة موس فيديها موجهاه ليهم) ادوك زوج قحبات !!!! شحال مرة انقوليكم ماتبقاوش تجيو عندي لهناا؟؟

يَاسَمِين : ههه حطي الموس من يديك و نتفاهمو !!

إيسا : ههه جينا نشاركو معاك فرحتنااا (غمزاتها باش تنتابه لياسمين)

سماندرا : (بقات مدة وهي كتشوف حتى انتابها لحوايجها ... حطات الموس من يديها و شهقات ) جااسمييين !!! شنو هادشي لابسة ؟؟ واش ... (شافت فإيسا) واش صافيي!!!!

يَاسَمِين حركات راسها بالايجاب و سماندرا حلات يديها بمعنى اجييي نعنقك ... ياسمين ماعطلاتهاش دغيا تلاحت فحظنهاا و عنقاتها مزيييرة عليهاا و فاخطرها كتحمد الله و تشكرو لي لاقاها مع هاذ البنات لي عوضوها على شحاال من نقص فحياتها

إيسا حتى هيي تلاحت عليهم ياسمين مابقاتش كتبان

إيسا : ههه يعنيي اليوووم انخرجوو نحتاافلوو ياك ا سماندرا

(فصلو العناق)

سماندرا : اليووم نوو مانقدرش نمشي معاكم خاصني نبقا مع انخييل ولكن نتوما ضروووري اتخرجو

يَاسَمِين : ننووو حتى انا بغيت نبقا مع انخيل

إيسا : (رققات صوتها كتعيبها) نووو حتى انا بغيت نبقا مع انخيييل ...(جرات ياسمين من حنكها) اليوم غادي تخرجي و معايااا ، السواغيي كدوز زويناا و ديجا بلاصة كااالم كيفما كيعجبك اتمشيي بزز منك

سماندرا : ويي بزز منك اتمشي ديما حابسة راسك فالدار خرجيي نشطي شوية

إيسا : (شافت فجاسمين) سيي و ماتعرفي اليوم نلقا الشوگر دادي ديالي و يكون معاه صاحبو لي حتى هو شوگر دادي و خوديه نتي (غمزاتها)

سماندرا : اففف شوگر دادي عوتانييي ... صافيي سيرو خرجو علي من هنااا يااااله

يَاسَمِين : (شافت فإيسا) وااايااالااه هاانتي عصبتي لينا مامي سماندرا

سماندرا : ياااله سربييو ياله تلحقو ترتاحو و توجدو راسكم لليل انا انتعطل شوية غير سبقوني

إيسا / يَاسَمِين : (كل وحدة باستها من حنك) esta bieeeen ماامييي

و إنساحبو من المطبخ

من بعد خروجهم من السبيطار تاجهو نيشان للدار ... تغدااو بزوج و من بعد كل وحدة خدات دوش و بداو كيوجدو راسهم للسواغي

لاوية عليها فوطتها و شعرها مطلووق كيقطر واقفة قدام ماريوها كتسوف فحوايجها حتى حاجة ما عجباتها

يَاسَمِين : (كدوز الحوايج بيديها ) اوووف حتى حاجة ماكاتحمر الوجه !!(لوات شفايفها) اش غالبس انا دابااا

بان ليها طوب فالابيض صميطات قصير من جيهة الكرش شراتو غير مؤخراً فاش خرجات مع البنات و هزاتو و معاه سروال جينز فالازرق فااتح فيه تقيطعات ... دهنات لحمها هو الاول بمرطب ديال اللوز خلا بشرتها فحال ديال البيبي دارت ديودورونت و لبسات حوايجها بالخف ... نشفات شعرها ، خلاتو على راحتو و لبسات كونڤيرص فالابيض ...

قربات من المراية لي لاسقة فالضهر ديال باب البيت كتشفو فراسها حتى كترجع للور مخطوفة!!

إيسا حلات الباب كانت اتخبطها دخلات فحال العجاجة ... حتى هي كانت بلوك سيكسي ... جيب قصيرة كاروات فالرمادي والاسود مع تريكو بالكول ديال الدونطيل شفاف فالاسود كيبانو السوتيان من التحت و فوق منهم جاكيط كويير مع دي بوط قصاار و صويك فالاحمر ... و جهها كان مخدوم بإتقان و كيف عادتها عكار فالگرونة مااط فشفليفها و شعرها مجموع ديل حصان.

ياسمين بقات غير كتشوف فيها و مرة مرة عينيها كيهبطو لصدرها

إيسا : مالكي كاتشوفي فيا !؟؟؟ (سدات الباب كتشوف راسها فالمراية وكضحك) جييت زوينة يااك

يَاسَمِين : مافيكش البرد ؟؟

إيسا : (شافت فكرش ياسمين لي باينا ) و نتي مافيكش ؟؟؟ ههه عادي انا معريا صدري ونتي معرية كرشك ... (انتابهات لوجهها صفر مافيه حتى نقطة ديال المايك اب) شنوو اتخرجي هكذا فحال الزومبي؟؟

جراتها من يديها وجلساتها فوق الفراش ... حلات الماريو و جبدات منو طغوز فيها مايك اب

إيسا : vale¡ منيين غادي نبداااوك ... ماتحتاجيش ل فون دو طان ... ولكن اتحتاجي لمرطب

يَاسَمِين : نوو ... ماعنديش الخاط..

إيسا : شوووت!!! خليني ندير خدمتي

جبدات من لاطغوز اي حاجة اتحتاجها ، قادات ليها حجبانها و رسمات الآي لاينر بإتقان مع مايك اب خفيف شوية و احمر شفاه فشفايفها مناسب بشرتها ما طلقاتها غير بزز

إيسا : Cariñooo جيتي كتحمقييي

يَاسَمِين : عرفتي ويكون هادشي اوڤر غادي نمسحوو

ناضت وقفات قدام المراية عجبها راسها بزاااف ماكياج ماكانش معيق بزاف حافظ على براءة ملامحها

إيسا : (شفاتها كتبتاسم و ضحكات حتى هي) اواا شتيي هاكذا حسن ماتخرجي صفرة فحال limones(حامضة)

سمعو الدقان فالباب و هو يتحل كان أنخيل بلباس ديال السبور و عرقاات باين كان لاعب كورا

يَاسَمِين : (عنقاتو) انخيليتووووو مي اموور توحشتككك (طلقاتو) عااد جيتيي؟

أنخيل : سيي ... فين ماما ؟؟

إيسا : اليوم اتعطل شوية و لكن قربات تجي ... و حناا غادي نخرجوو

أنخيل : (شاف فياسمين) اتعطلو ؟؟ يعني ماغانتفرجوش فالحلقات الجداد ديال ladybug???

يَاسَمِين : (حزنات ملامحها) اوووه ... perdoname bebé ... كنوااعدك انحااول نرجع بكريي يااك و نسهروو بلا ماتسوفنا سماندرا و نتفرجو vale¡ Niño ??

أنخيل : (من ملامحو باين تقلق) esta bien

إيسا : جااسمييين رااه انتعطلووو يااله

انخيل انساحب بلا كلمة بلا زوج و ياسمين حسات بتقليقتو و عاارفة بليي صعييت ترجع تراضيه

يَاسَمِين : اوووف هاهو تقلق ... يااله نمشييو

باش نرجعو دغياا شووفيي مغانفوتوش 11

إيسا : ههه سيي Cariño ... شنو بان ليك نتي گاع غير نخرجو قدام الباب و نعاودو نطلعو فحالنا ؟؟؟ زييديي قدااميي قبل مانطيير علييك بشيي عضةة زيييدييي ...

مشات ياسمين هزات مونطو فالازرق فااتح و صاك صغيير فالاسود فيها لوازمها و انساحبو ...

ايسا كانت ديجا طلبات طاكسي غير خرجو لقاوه واقف قدام الباب عطاتو عنوان و ديمارا

وصلو للوجهة ديالهم كانت الساعة كتشير ل 20:25 ... كان مطعم و بار فنفس الوقت ، دخلو و كان شبه مكتظ ... ياسمين بدات كدور عينيها على المكان طاغي عليه اللون البنيي و الاضواء كتبين كلشيي بوضوح .

مع الدخلة على اليمين كاين بار بكراسة عاليين بقات كتشوف فالڤيترين الكبييرة لي تما فيها اشكاال و انواع ديال الشراب مستفين و مقادين بواحد الطريقة خلاتها تقول واو ، على الجانب الاخر كانوا طبالي واغلب الزبائن لي عليهم دي كوبل ...

وصلو للوسط كانوا طاولات مستطيلة مع كراسي ديال المجموعات ... و فوحدة فيهم كانت جالسة لِندا و الگروب لي مولفين كيخرجو معاهم ... غير شافتهم و ناضت لعندهم كتجري و حتى هي بدورها كانت بلوك مختااالف على لي كتكون بيه فالخدمة

لِندا : (مشات نيشان عند ياسمين عنقاتها) جااسميين جييتيي (فصلات العناق و شداتها من يديها) مبررروك علييك اول ولادة !!! فرحت لييك بزااف

يَاسَمِين : ههه راه لحد الآن باقي مامتيقاش كنحس براسي كنحلم كلشي دااز بواحد السرعة لي وااو

إيسا : و هادشي كلو بالفضل ديالي طبعا ماتنسايش

لِندا : (عنقات إيسا حتى هي) ههه طبعاا بالفضل دياالك ... كيف درتي حتى قنعتيها تجيي ؟؟

إيسا : يااله نجلسو بعدا !!

جرات لِندا ياسمين و ايسا من يديهم لناحية الطاولة لي حاجزين كان عليها 4 ديال الاشخاص (ستيڤ - لِيلى - فابيان - ميلينا)وكل واحد فيهم قدامو الطلبية ديالو ... إيسا غيير شافت ميلينا و صاحبتها طلعات فيها حاجبها كانوا رامقينهم بنظرات كلها سم ...

حيدات ياسو المونطو ديالها و جلسو قبالتهم الاعين كاملها كانت عليها شي مبتاسم ليها و شي ماحاملهاش ولكن شخص واحد نظراتو ليها كانوا مختاااالفيين

لِندا : valeeee¡ ...كنقدم ليكم جااسمييين المولدة الجدييدة فالقسم ديالنا (شافت فياسمين لي مبتاسمة ليها) لِيلى و ميلينا اتكوني كتعرفيهم (ياسمين ماشافت فيهم حتى الشوفة) و كنقدم ليك ستيڤ (كان كيبان الكبير فالمجموعة ، شعرو زر بتحسينة عاادية ، لحية و ذقن خفاااف ، عينين خضرين نايمين و ابتسامة فاتنة و من القميجة كتبان بنيتو المفتولة ) و فابيان من قسم المستعجلات

يَاسَمِين : (شافت فيهم مباتسمة) Holà !!

ستيڤ : كيف جاك السبيطار ولفتي شوية ولا باقيي؟؟

فابيان : ههه شنو غادي تولف فيه مثلا الغوات ديال البعالك ولا ديال ماواتهم؟؟

يَاسَمِين : هههه نوو بالعكس البكا ديال لي بايبي كيتسمع فحال السمفونية فودنيي

فابيان : (ضرب يد بيد و شاف فصاحبو ) ههه اووبااا ها مهووسة اخرى تزادت فالمجموعة

ستيڤ : (مركز فعينيها ) ههه ... التوليد كان الحلم ديالك؟؟ حيت ماشي كلشي يمكن ليه يقول نفس الجواب ديالك

يَاسَمِين : الصراحة ماشي حلم ... ولكن مهنة التوليد كانت طريق نشق بيه مستقبلي لي كان مُبهم و حل فنفس الوقت ...

ستيڤ : (بغا يطول معاها الحوار لاطول مدة ممكنة) حل لشنو؟؟

يَاسَمِين : ههه مسائل شخصية

إيسا : جاسمين كلها اسرار و كلها مسائل شخصية و مستحييل تبوح بأسرارها ... انا و سماندرا لي صحاباتها و مكتبغييش تعاود ليناا

ميلينا : بغات تكهرب الجو بأي طريقة) جااسميين ... وجدتي شنو اتقولي لسنيور ادريان و لا حتى هدشي سر؟؟

يَاسَمِين : (صغرات فيها عينيها) باردون ولكن شكون نتي؟؟؟

ميلينا ماارضااتش فاش كلهم ضحكو من جوابها ياسو و حتى لِيلى ... غير خنزرات فيها صاحبتها و هي تجمع الضحكة

إيسا : ههههه هذيي من المخلصيين ديال ادريان

يَاسَمِين طلعااتها و هبطاتها مابغاتش تعطيها وقت ... الحاجة الوحيدة لي بغات تفكر فيها فهاذ اللحظة هي الفرحة ديالها و السبب فالفرحة ديالها ...

جا عندهم السرباي و إيسا لي دارت الطلبية دقائق و رجع عندهم بطباسل فيهم دي بيرگر صغار و اخرين فيهم ناتشوز مع صوص فرماج و مرافقينهم مشروبات كُحُولية و مشروب غازي لياسمين ....

ياسمين غير شافت الماكلة نساتهم ديجا كان فيها الجوع بزااف و بدات كتاكل مامسوقاش ليهم و لمواضيعهم

إيسا : (انتابهات لستيڤ لي عينيه ماهبطوش من على ياسمين و قربات لعندها هدرات بشوية) هانتي اجاسمين لقيتي معجب من النهار اللول طيحتيه على زنافرو

يَاسَمِين : (عينيها على رابع البرگر اتاكلو) هاادشي بنيين واخا ماعرفناه حلال ولا لحم طرمت الحلوف

إيسا : حلال حلال ... منين جلستي و هو كيشوف فيك ... شوفي فيه اصاحبتي حتى نتي راه طبييب فطابق الجهاز التناسلي

يَاسَمِين : (دغيا دارت شافت فيها) هههههه طبيب ديالاش؟؟

إيسا : هههههه الاعضاء التناسلية ...يعني ماتخافيش حافظ الوِجهة للكنز

يَاسَمِين : (شافت فيه بنص عين لقاتو حتى هو كيشوف فيها و دغيا حدراتهم) هههه فين كان عقلو فاش ختار هاذ التخصص ... و طبييب اش كيدير معانا هنا؟؟؟

إيسا : الزهر جا حتى لبين يديك وكتسولي علاش جا ... (ضرباتها ليديها حتى طاح ليها البيرگر)

يَاسَمِين : اييي !! غيير بالشويية المصعورة

إيسا : شووفيي الفرووتة لي قداامك .... شوفيي شوفييي الضحيييكة و السنينااات

يَاسَمِين :(شافت فيه كان كيهدر و يضحك مع الكليكة) على ماالوو هو بووحدوو لي كيضحك و عندو السناان ؟؟ اصلاا جانيي رطبب بزااف

إيساا : اويليي علىى رطبب!!! راه نتي لي حولة . شووفي اصاحبتيي اللحياا و الكتاااف و الصدرر و زيد عليهاا طبيب ديال التناسلي ايكون مهلي فقشاوشو و منساوش اهم حااجة لي هي الفلووووس

إيسا كتهدر و ياسمين كتشوف فكل جهة وصفاتها ليه حتى عينيها تفيكساو على صدرو .... ستيڤ ضار بغا يخطف شوفة كيف العادة حتى لقاها كتبحلق ليه فصدرو دهشراتو و دغيا قلب عينيه باش مايحرجهاش .

إيسا بانت ليها صاحبتها سهات و دغيا قرصاتها ففخدها تجمع راسها

يَاسَمِين : (كتحك فخدها) اييي .... بشويةة اصاحبتيي لحمي دغيا كيزراق

إيسا : (كتهدر و ضحك باش ماتعيقش) هههه عجبك صدرو ياااك

(بان ليهم ناضت متاجه للحمامات )

إيسا : شوفي شوفييييي

يَاسَمِين :(بان ليها داكشي منفوخ) اويليييي (شافت فإيسا) إبلييييييس شبعت معاك ذنوووب (هزات صاكها و جبدات تلفونها كانت (11:30)صاافيي انمشيي فحاالي الى بقييت معاك انصدقو فشي مصيبة ... كون بقيت مع انخيل حسن لياا

ناضت هزات مونطوها و لبساتو

إيسا : جاسمييين por favooor بقاااي كنواعدك انسكت

لِندا : (نتابعات ليها) جاسميين !!! فين غاداا؟

يَاسَمِين : صاافي تعطل الحال خاصني نمشيي

لِندا : (حزنات ملامحها) اووه !! كنت بغيتكم تباتو معايا اليووم و نكملو السواغي عندي فالداار ياك غدا ماخدامينش ؟!

إيسا : (دارت راسها تقلقات) صافي بغات تمشي خليها

يَاسَمِين : (مشات عنقاتها ) ماتقلقييش Cariñooo (باستها من حنكها و شافت فلِندا) كنواعدم غاديي نعوضكم ... شي نهاار !

توادعات معاهم بالطبع من غير ميلينا و صاحبتها و ستيڤ كان باقي فلي طواليط

و بزز إيسا خلاتها تمشي

انساحبات من الريسطو ... كان الجو جد رومانسي ... السمااء كانت صافية و نجومها ساطعين مع ريح خفيييف . عجبها الجو بزااف و قالت علاش لاا تتمشى شوية و فالطريق ممكن تتصادف مع طاكسيي .

عقلات على الطريق لي جاو منها و تمشات لناحيتها ...

كتسارا بكل حرية و عينيها كيشوفو فاي حاجة من حولها ... البنايات ، لي ماركيت لي باقيين حالين ، السيارات لي كيدوزو و الناس القلاال لي حتى هوما بدورهم غير هاذ الجو الزويين لي مخرجهم ....

لحقات لواحد الشارع و بانت ليها طوااالة !! بدات كتعيا و رجليها ضروها مع الكونڤيرس

يَاسَمِين : نااري والمحطة ديال الطوبييس بعييدة من هناا ... (كتشوف فالطريق) اويلي انا انضرب ديك الطريق كلها على رجليي!!!واخاا نكون عويطة !

فوسط نگريها حسات بشي حاجة باردة نزلات على جبهتها ! هزات يديها و مسحات كانت قطرة ديال الشتاء ... تبعها ريح قوييي كان ايطيرها ! طلعات راسها شافت فالسماء فرمشة عين تغيمات و نجومها غبرو

يَاسَمِين : (شداتها البكية) لااا نتيي غيير غلطو و سماوك يااسميين كاان خاصهم يسميوك المنحووووسة ... (بدات كتشوف فجنابها مالقات فين تتدرق) تفووو عليييك ازهري المكووز ... تفوووو حتىى كانقول صافي تقاديتي و كتبين ليا العكس ...

الشتا بدات كتجهد الحل الوحيد لي عندها هو تكمل على رجليها و الطاكسي اتلقاه فطريقها اتلقاه ...

عنقات صاكها و كتزرب كتبان فداك الشارع فحال شي سنفور هربان ، شعرها و حوايجها كلهم سردو بالشتاء ... الناس كاين لي حتى هو بدورو كيزرب يلحق لدارو و كاين لي مامسوقش كيتمشى على خاطرو مستمتع بالشتا

(دقائق و الشتاء بدات كتقلال)

يَاسَمِين :(وقفات كتشوف فحوايجها) فاخر يامك اياسمين وليتي فحال الجرو لي مجريين علييه ... ولكن اناااا لي درتها لراسييي كون بقيتيي فدااركم تفرجيي فالدعسوقة اشدااك لشي ريسطوو ولا كااباري اشدااااك....

كيقاطعها صوت طوموبيل دازت من حداهاا فحال البرق و رشاتها!!! ولات كلها مغطية بالغييس لي كان فالارض !!! تعصبات ديال بصح و بدات كترعرع بالداريجة ...

يَاسَمِين : واااا الحيوااان !!! واااش مكتشوووفش ... تفووووو (كتشوف فمونطوها كلو ولا مطبع) اللله ياااخد فييك الحققق

مول الطوموبيل كان حال السرجم سمع الغوات موراه واخاا مافهمهااش شاف الطريق خاوية و هو يضرب الدورة راجع لعندها ... يَاسَمِين واخا تفافات ولكن جبهة ... بقات واقفة بلاصتها و يديها على جنبها بمعنى راني مااخاايفااش منك ....

وقفات الطوموبيل كان فاصلهم طريطوار هبط الزاجة ديال السرجم و هو يخرج الدخان ... طلعات معاها ريحت الحشيش دوخاتها و بدات كتنش بيديها... كانوا زوج صحاب و هداك لي سايق هو لي نطق

***** : ( هدرتو تقييلة) ماالكي كتغوتيي الق**حبة ؟؟ ماابغييتيش تترشي بالما بقاي فدااركم لاش خارجة!!! ولا كتقلبي على الكليان

(شاف فصاحبو وطلقو ضحكة تقيييلة)

يَاسَمِين : (الكلمة الوحيدة لي شداتها من هدرتو هي "الق**حبة" ودنيها بدا كيخرج منهم الدخان) اللقحبببةة هييي مككك!!!

صاحبو لي حداه بدا كيضحك ولاخر مارضاش ... حل الباب ياله حط رجليه فالارض و تسمع صوت طوموبيل مكسيييريااا جاية لناحيتو من على ليسر ماحبسات حتى دخلاات فييه و تسد الباب على رجليه !!!! الدم ترش فكل مكاان تخلط مع الشتاء و الأخير كيغوت من حرر رجلييه لي تقسمات!!! اما صاحبو مع النشوة ديال الحشيش كيحس براسو فحالا كيحلم

ياسمييين طلقاات غوتة من الاعماااق ... داتها بردات عليها من داكشي لي كتشوف قدامها ، بالفشلة ماقدراتش تتحرك .... رجعات الطوموبيل السوداء للور و عاودات دخلات فييهم طلعاتهم فوق طروطواار ياسميين دغياا حيداات من الطريق حتى تعكلات و طاحت ..... عينيها باقيين مفيكسيين على المنظر لي كتشوف بلا ماترمش ...السيارة بقات غااادة بييهم حتى لسقاتهم مع دي باريار ديال الحدييد ...

مكسييري باقصىى سرعتوو كيتسمع غيير صوت الرواايض محكووك مع الارض ....

لي باريار تهرسوو!! و الطوموبيل لي فيها دوك الزوج طاحت للجهة الاخرى لي فيها غيير الجرف ....

الطوموبيل الكحلة رجعات للور كأن شيئ لم يكن و كملات طريقها بسرعة خيااالية

يتبع...