الأوصو الجزء الثاني

مصدومة شادة صاكها معنقاه عند صدرها وحالة عينيها على وسعهم ... الدم ترش على الطوب ديالها البيض و كاتشوف فرجلو مقطعة ومليوحة والسيد لي ضرب و مشا بدم بارد ..... الرؤية ضببات ليها قدام عينيها ... حاجة وحدة لي فكرات ديرها هي تعطي رجليها للريح !

الخلعة ماخلاتها تفكر فحتى حاجة من غير انها تهرب من تماا !!! عطات رجليها للريح همها الوحيد هو عينيها مايعاودوش يشوفو داك المنظر و الدم لي تزلع فالارض بحال الواد ، و دنيها كيتردد فيهم غير صوت روايض الطوموبيل والصرخة ديالو ....

كتجري بحالا شي حد تابعها و الشتا كطيح عليها مامسسوقاش ليها، من زهرها غير هي وصلات للپاراذا " محطة الطوبيس " ، الطوبيس كان جا ... طلعاات و اول مكان بان ليها خاوي جلسات فيه معنقة صاكها تخبي بيه قطرات الدم لي فحوايجها وشعرها سااارد طايح على كتافها ، كلها كتقطر وعينيها باقين مصدومين... محاولتها انها تبان طبيعية خلات الناس القلاال لي راكبين ينتابهو ليها كتر ،كتمسح وجهها لي المايك اب ولا مجخلط بالشتاء والماسكارا ساحت ليها ....

ماحسات حتى وقف الطوبيس !!! هبطات كتزززرب فالمشية خلات الاسانسير و طلعات فالدروج بلا عقل كتجري .... بزز باش قدرات دوّر السوارت فالباب و دخلات سدات الصاقطات كامليين و تكات بضهرها على الباب كتنهج ...

النفس لي كانت حابسة هاذ المدة كااااملة خرجاتها على شكل تنهيدة هازة معاها گاع المشاعر المتضاربة لي فالداخل ديالها ، حاسة بالهلع والرعب وكولشي بحالا تفرجات ففيلم الخليع مباشرة ... سماندرا غيير سمعات الزدحة ديال الباب و خرجات من بيتها مخلووعة و ولدها موراها!!! كانوا بزوج بالبيجامات ، شعلات الضوء و هي تبان ليها ياسمين متكية على الباب كلها كترعد وهي قربات لعندها...

سماندرا :(كدوز يديها على شعرها و وجهها لي ملامحو مخطوفيين) جااسميين ااشش وااقع ؟؟؟ ماالكي فهااذ الحالة ؟؟؟ عيطات ليا إيسا و قالت ليا اتبقا مع لِندا و نتي فالطريق للدار!! علااش تعطلتيي ... (بانت ليها اتبدا تبكيي) جااسمييين شنوو واااقع

انخيل بقا غير واقف كيسمع و مخلووع

يَاسَمِين : (مدةة و هي كتحااول تخرج الهدرة و تنفس جاوباتها بصوت باكي غالب عليه نبرة الخوف و كتهضر بهيستيرية) ك ... كنت جااية فالطرييق ... و ... وقعات حادثة ... و(وراتها المونطو) ترشش عليا ... الد ... الدم ... وقع داكشي بسرعة مااعرفتشش ... مافهمتش كفاش ... طوموبيل كحلة دخلات فيهم و كملات طريقها ... غادي ... غادي يكونو ماتوو يااك ؟؟؟؟ ت .. تقطعات رجلو ... تقكعات تلاحت قدامي

سماندرا : (غير عنقاتها لعندها خوفها كلو تحول لبكااء و كطبطب على ضهرها تهدنها ) madree miaaaa ... ماشيي مشكللل .... هاادشيي كيوقعع ... الحمدلله نتي ماصرى ليك واالوو ... شوووت ... ماوقع واالوو ، تهدني ، تهدني (فصلات العناق و كتمسح ليها دموعها ) داابا غادي دخلي تاخدي دووش و تبدليي حوايجك ... غيير اتنعسي و ترتاحي كلشيي غايفوت ، دغيا غايضربك البرد شعرك سارد (حاولات تبتاسم ليها واخا حتى هي تخلعات) vale¡??

ياسمين حركات راسها بالايجاب و تاجهات للدوش جسدها كيتحرك بلا رووح ...

حيدات حوايجها و ماقادراش تشوف فيهم وفداك الدم ... دخلات تحت الرشاشة و طلقات عليها ماء دافي ، كيهبط على جسدها وهي كتحس غيير بالبرد واطرافها كايتهزو ... حاولات تشد فراسها ولكن هادشي لي عاشت هاذ الليلة جاها فوق طاقتها بكائها صاامت و قلبها اينفاجر بالرعب لي ركب فيها ... والمنظر لي شافت قدام عينيها ، ايه هي ممرضة ومولفة تشوف الدم ، ولكن حداثة بشعة بحال هاديك لي كتبان متعمدة و ان مول السيارة مكتافاش غير برجل لي قطع عليه بل رجع لاحهم للجرف .... كان وحشي بطريقة مكتصورش .

سالات حمامها بالخف و خرجات لابسة بينوارها نيشان لبيتها ، ختارت بيجامة فالاسود مقطنة سخووونة لبساتها و شعرها خلات فيه فوطة ، معندهاش الخاطر تنشفو و تخشات فبلاصتها كتحاول تخوي راسها و تنعس ولكن غير كتغمض عينيها الحاجة الوحيدة لي كتبان ليها هي الدم والداك الرجل المفصولة على الجسد ....

الشتاء غير مزادت تجهدات ، والجو عاصف حامل مع رعدو صوت قوي ، والبرق مكمل ليه الصورة ...كان جو مرعب و شرس كتحس بالغيوم غضبانة داك الليلة وباغا دمر كولشي ....

وصلات هامر كحلة وتحلو ليها البيبان اطوماتيك كايتسمع صوتها القوي مع صوت الشتا والرعد .... زاد بسرعة حتى للباركينغ ، يلاه سكت الطموبيل تم واحد جاي كايجري لعندو بالمظل و لابس لباس بلاستيكي من الشتا فوق حوايجو الرسميين .....

نزل من الطموبيل لي فاش وقف بان بضخامتها ! ضخم البنية وواسع الكتفين والطول حدِّث ولا حرج .... والنفس كايزفرها سخونة كانه شي دب عايش فالقطب ...

كان الظلام و الشخص لابس الاسود شي لي ماخلاهش يبان بمرة ....

لاح السوارت على داك الشخص واشار ليه بيدو بمعنى بلاش المظل ...

داك الشخص شد السوارت وشاف لطموبيل لي كتبان شوية فضلام انها مشخشة من القدام ....

زاد الشخص كايتمشى و علا يديه رخا ربطة شعرو الطويل ولا كولو ساااارد بالشتا وبينتو الضخمة كانه جبل كايتمشى ...

تاوصل للدروج ديال الدخلة ديال الدار هو يتلاح عليهم وجلس ... طالق رجليه بگاط كحل سيورو محلولين وسروال عسكري كحل فيه جياب مع الجناب ... رخف السنسلة دجيلي وحيد سلاحو لي معنكشو و لاحو .. دفن راسو بين يديه كينهج والشتا كتصب عليه بغزارة .... مامكترتش لشراستها ولا لصوت الرعد و لا البرق لي كيخطف ليه فوجهو باسلاك زرقاء كتبين شوية من ملامحو السمراء الخشنة .... خشا يدو فجيب سروال وجبد گارو .. دوزو على شفايفو ببطئ من بعد رصاه فجنب فمو ....عاض عليه ، وخشا تاني يدو كيقلب على البريكة .. مالقاهاش هو يلوحو دغيا من فمو بعصبية داير بناقص ، ورجع دافن راسو بين يديه ....

تسمعو ليه خطوات بزربة جايين لعندو وماعلاش راسو عارفو غير من مشيتو شكون ...

تاوقف حداه هاز المظل .... كان شاب فالثلاثينات ، بعض الكدمات فوجهو وسلاح مور ظهرو بلباس رياضي ...

- بان ليا رجعو كيقلبو علينا ... توحشو الحرب ! شكينا ان رايُّوس لي مصيفطهم .. مكاينش لي كيعرف نقط ضعفنا بحالو ... مكاينش لي عارف ديبوياتنا من غيرو ، خاصنا نتحركو بلا منزيدو نخسرو كتر من هاكا ، راه جوج من عندنا ماتو الصباح ، يا نتحركو نديرو شرع يدينا نفديو دمايات الرجال لي ماتو الصباح ، ولا نعلمو المنظمة دير شغلها ، ( الشخص غير كايسمع بحالا كايزنزن ليه عند ودنيه) ومن الاحسن بلا مندخلوها ، الى شكات تاهي فرايوس غايبحثو فعلاقتك مع مراتك وحنا ماقادين على جبيد الضواسا هاد الساعة ويعرفو اش راك مخبي ، ( سكت مدة كيشوف فيه ورجع هضر تاني ) شفت الطموبيل مضروبة ! اش واقع ! واش هوما ولا شي مشكل جديد !

طلع راسو شاف فيه واخا مكيبانش ليه بالظلام ...ولكن تخيل الشوفة لي غايكون داير فيه دابا ، هو يهبط راسو قدامو وسكت كأنه معتذر .... الشخص ناض وقف ، نفت تنهيييدة طوييييييلة كلها هم ومشاكيل لي فوق راسو منهار مات باه ، وحل لباب ودخل يقلب على شي سرير يحط راسو والا غايتفركع ....

.... يد هازة فيها لي ساشي ديال التقدية و اليد الاخرى فيها مضل مغطيها من الشتاء ...

الجو كان ممطر و السحاب مشحونين كلهم بطاقة سلبية!! طلعات راسها كتشوف فالسماء مستغربة من المنظر لي كتشوف جاها غرييييب و لحمها تشوك عليها ...

حاولات ماتكتارتش ليه و كملات طريقها كيف عادتها كتمنظر حتى لحقات للبلاصة لي مستحييل تنساها ولا تخرج ليها من بالها بقات كتشوف و علامة استفهام فوق راسها

يَاسَمِين : اووو هاذو كفاش قدرو يصايبو هدشي بهاذ السرعة ؟؟؟

قربات بخطوات بطييئة و طلات باان ليها جرف غاااارق و غير الحجر ليي تماا ... حسات بالدوخة كونما الحواجز لي تماا كوون طاحت ...

الشتاء بدات كتساقط بغزارة و معاها ريح قويييي ، شافت فالسماء كان البرق ايعميها .... تكوانسات بلاصتها بمجرد ما سمعات صوت محرك سيارة جاها مؤلوووف ضارت بالعرض البطيييئ و دغيا الحال تظلَّم!! ... من السرعة لي جاية بيها الطوموبيل لعندها باين ان الشخص لي سايقها مووورك على الكسيراتور بكللل جهدووو قاصدها... بغااات تحرك من بلاصتهاا ماقدرااتش!! حساات برجيها لسقوو مع الارض، قلبها ايخرج من بلاستو و دقاتو ولاو مسموووعيين ...

ماكاتحس غيير بالطوموبيل دخلات فيها ماخلاتش ليها الفرصة فين تغوت ... لي باريار تهرسوو ، لي ساشي و المظل طارو من يديها

طاحت للوراء و عينيها كيشوفو غيير فالسماء و القطرات ديال الشتا كينزلو على وجهها ...

تخبطات مع الارض بسرعة غير ممكنة

الشيئ لي خلاها تنووض قااافزة من الفرااش!!! كلهااا عرقانة و كتنهجج فحالا كانت فشي بئر غاارق و طلعات منو ... عينيها محجرين فيهم الدموع كيبان ليها ضوء البروجيكتور لي داخل من سرجمها مضبب والشتاء خباطة ... حلقها نشف عليها ،

كتمسح على جبهتها و يديها كلهم كيترعدو ... عاد كاتوعا براسها انها كتحلم

يَاسَمِين : اعود بالله من الشيطان الرجيم ، يااربيي شنوو هادشيي لي كنعييش فييه ... كون بقيت مع إيسا و لِندا ماكانش هادشي ايوقعع ... كون ماخرجتش من دارناا من الاول ماكانش ايوقع ليا هدشييي من اولوو.

حيدات عليها الغطا و خرجات من بيتها متاجهة لعند سماندرا لي حتى هي مشا النعاس من عينيها ... غير سمعات الدقان خفييف فباب بيتها شعلات الاباجور لي عند راسها و ناضت بشويية باش ماتفيقش ولدها لي ناموسيتو حداها .... حلات الباب و بانت ليها ياسمين غيير من وجهها عرفاتها شافت شي كابوس

يَاسَمِين : (شدات فيدين سماندرا) وااخاا نعس حداكم ؟؟ ماغانقدرش نبقا فالبيت بوحديي غير كنسد عيني كتبان ليا غير الاكسيدون

سماندرا : سيي دخليي (دخلاتها و سدات الباب) ماغانقدرش نحس بالخوف لي فيك ولكن متأكدة كلشيي غادي يفووت و غتنساي فحالا ماوقعات حتى حاجة

يَاسَمِين : اففف كنتمنىى

سماندرا : يااله نعسي دابا مشا الحاال مابقا والو ويصبح الصباح

ياسمين ابتاسمات ليها و مشات للطرف الاخر و تخشات فالفراش و سماندرا كذلك و انخيل فسااابع نومة ... و سماندرا كتلعب بخصلات شعرها حتى داتها عينيها ...

الليل كلو و سماندرا كضربها الفيقة كطل عليها حتى صبح الصباح .

جا الويك اند و ياسمين دوزاتو كلووو معزولة على كلشي ... جات ايسابيل و عاودات ليها سماندرا شنو وقع كيحاولو ما امكن ينسيوها ولكن هي ديك الليلة بقات معششة ليها فدماغها ... كتمشي للخدمة مكتقدرش دوز من داك الطريق

الكوابيس بقاو ملاحقينها و نفس الحلمة كتبقا تعاود كل ليلة ، بغات شي شخص لي تشارك معاه خوفها و يحس بيها ولو غير شوييية ولكن مالقاتش ... حتى كتهز تلفونها تتاصل بماماها تعاود ليها وكتقول مع راسها ممكن الى عرفات شنو وقع ليا حنانها ايبان ولكن كتعاود تحطو من يديها حيت عارفة غير اتجاوبها اتبدا تشكي عليها بالمصروف و ماغاتسولش فيها هي واش عايشا مزيان واش مرتاحة ....

بيتها مبقاتش كتخرج منو ماكلتها قلالت و حتى نعاسها وجهها شااحب و جسمها كيبين العياء لي كتحس بيه من الداخل .... البنات خلاوها على راحتها واخا تشوشهم على حالتها ولكن علاقتهم لي باقا تقريبا سطحية ماتسمحش ليهم يحكرو عليها كثر

.....

كتفيق على صوت طير كيغرد عند سرجمها ... تغريدات كلها امل و إيجابية ، بدات كتجبّد و عينيها باقيين مسدودين وتركيزها مع صوت الطير لي مالي الغرفة ، بدات كتباتاسم و حلات عويناتها ، نظرات الخوف لي كانوا طاغيين عليهم هاذ ثلاث اياام شبه ختافاو ... مدة وهي كتشوف فالسقف تسترجع وعيها و مدات يديها

هزات الفون تشوف الساعة كانت 7:30 .

ناضت حلات الريدو ديال السرجم و بانت ليها سماء زرقتها صااافية و ماكاينة حتى غيمة ، شميسة اشعتها باقيين باردين و هواء نقيي استنشقاتوو وكان كترياق لروحها ....

حلات ماريوها و هزات لاطغوزتها ديال الحمام و خرجات من البيت كل تحركاتها هادئين باش ماتفيقهمش ... خدات حمام خفيف حيد ليها گاع المرض و الكأبة لي دوزات فالويكاند ، سالات دوشتها و تاجهات لبيتها مخشية فبينوارها . كتشوف فالمراية حنيكات و نويف حمريين واخا باقي باين على ملامحها العياء ولكن ابتسامتها كفيلة انها تمحيهم ... ابتاسمات لراسها حتى بانو سنيناتها ، طولات الشوفة فراسها و كتحاول ما امكن نظراتها لنفسها يكونو ليجابيين و ماتخلي حتى ذكرى مشأومة تشوش عليها .

كيقاطع تأملها البرد لي بدات كتحس بيه فرجليها و مشات تشوف شنو تلبس ... ختارت دوبييس هوما الاولين فالسومون مورديين لبساتهم ، رطبات لحمها بكريمها المعتاد .... مدة وهي غير كتشوف فالحوايج لي تما و هزات تريكو سخون شوية فالأخضر الملكي كول مونطي و سروال جينز اسود لبساتهم و كتشوف راسها فالمراية كيف جات السروال رسم ليها فورمتها ... شعرها نسفاتو غير بالفوطة و جمعاتو ديل حصان من بعد مادارت ليه الصيروم ... رسمات ايلاينر ديالها و رطبات و جهها و گلوص بلون فغومبواز فشفايفها كيلمع ....

هزات تلفونها ، لبسات بانطوفتها متاجهة للكوزينة ... حلات التلاجة جبدات منها اي حاجة ممكن تحتاجها ، دارت الحليب يفيض و البيض يتسلق ... وهزات تلفونها ضرب طليلة على انستغرام ، كطلع فتصاور المودلز لي كيبريو من راسهم لرجليهم و الحياة المزيفة لي تما نغامسااات مع دوك التصاور و الڤيدوات و بدات كتخايل راسها فجزيرتهاا بوحدها بدو بيااس و كتجري فالرملة شعرها مطلوووق كيضرب فيه الريح ، الشمس كضرب فالامواج ديال البحر لي كيبان صاااافي غمضاات عينيها عااايشة الدور و جات لنيفها ريحت الحراق !! دغيااا حلاات عينيها بان ليها الحليب كيبقبق و فاض فوق البوطة !! لاحت التلفون من يديها و طفاتها بالخففف

يَاسَمِين : وااايااالااه !!! غييير زوج دقائق تحلمييي فيهم كيف بغييتي ماتستاهليهمش ايااسمييين ... (هزات طوشرون كتمسح بيه الروينة) يخخخ امتااش هاذ العكس يتفك علياا امتاااش

دخلات سماندرا للكوزينة كانت باقة ببيجامتها لقاتها كتنگر غير بوحدها و استغربات فاش شافتها حيت مولفة هي الاولى كتفيق

سماندرا : جاسمين buenos dias!! كيف صبحتيي؟؟

يَاسَمِين : (شافت فيها محزنة ملامحها) فقتي!!! كنت بغيت نوجد الفطور قبل ماتفيقو ولكن زهريي و انا عاارفااه

سماندرا : ههه غير بشوية علييك ... فيقنيي غيير شخيير إيساا

يَاسَمِين : هههه فاش اول مرة سمعتوو سحاب ليا غير شي رموك دااير من الحييي ولكن داابا ولفتت

سماندرا : ولفتي ؟؟ اناا لي قرن وساكنة معاهاا كل صباح كنسمعو كتشدنيي نفس الخلعة ههه

يَاسَمِين : لي يشوفهاا مايقولش داك الشخيير كامل ديالهاا

سماندرا : بعدا هي و الشوگر دادي ديالها ايتفاهمو فحاجة و حدة

يَاسَمِين : هههههه

فوسط هدرتهم إيسا دفعات الباب ديال كوزينة بشوييية و دخلات عليهم ... شعرها مجموع سفنجة سخفانة ، عينيها معمشين منفوخين بالنعاس ، سروالها شاد الاتجاه المعاكس ورجل فيها تقشيرة والاخرى لا ... دغيا جمعو الضحة و وحدة كتشوف فالاخرى

إيسا : (صوتها بااح بالنعاس) كيفاش زعما كتهدرو عليا ولا شنو ؟؟

يَاسَمِين : صبااح النووور (عطاتهم بالضهر كتنفقي فالبيض و حابسة الضحكة)

سماندرا : إيسااا فقتييي

إيسا : لااا باقيي نااعسة (بدات كتشمشم) شهااذ الريحة

سماندرا : جاسميين فالكوزينة و ماتشميش ريحت الحراق !! مستحييل ههه

يَاسَمِين : (ضارت عندهم بالعرض البطيئ) ياااك ؟؟ سيروو وجدوو راسكم رااه مشاا الحاال ... سيروو خليونيي نكمل ليكم الفطوور

إيسا : اناا انمشيي ندوشش ياله نفييق البارح مانعستش مزياان

(ياله اتخرج غادة لدوش و شداتها سماندرا من تيشورت البيجامة)

سماندرا : اجيي لهناا فيين غاداا ؟؟؟ انااا فقت قبل منك و اناا الاولى لي خاصني ندخل للحمام

إيسا : (كتحاول تهرب ليها ) اوااا نتيي بقييتي شاادة فياا النمييمة ... طلقييي خليني نمشييي

هوما معاافريين شكوون اللولة دخل و ياسمين غيير كتفرج فييهم

فوسط تعافيرهم داز انخيل و دخل للحمام مامسوق لحتى واحدة فيهم بقاو كيشوفو فبعضياتهم وبدات وحدة كضحك على الاخرى ....

فطورهم داز فجو صباحي هااادئ تعاونو على الطبلة جمعوها بالخف من غير إيسا طبعا ... انخيل مشا لمدرستو مع صحابو لي فالحي نيت ، اما البنات كل وحدة جمعات لوازمها و قادات حالتها و خرجو متاجهين للطوبيس ..

تصادفو مع الطوبيس و طلعو ... ياسمين غير تحرك بيهم حسات لحمها تبورش عليها لقطات من ديك الليلة بداو كيتعاودو ليها فراسها غمضات عينيها و يديها مزيرة بيهم على اطراف جاكيط الدجين لي لابسة ... كتحاول تاخد نفس و تفكر فأي حاجة من غير داكشي لي فراسها حالياا

بمجرد ماتفكرات فين هي و فين غادة و شنو ممكن يوقع حلات عينيها التردد و الفرحة طاحو عليها دقة و حدة شافت فسماندرا لي جالسة حداها و عاودات شافت قدامها و نطقات بينها و بين راسها

يَاسَمِين : ناري قفارت !!!(كطرطق صباعها ) عاندااك داك الصلع يدير ليا شي مشكلل ... ناري مشيتي فيها اياسميين ...(انفاعلات) يمشييي يعاودهاا لراسوو اصلا مادرت حتى حاجة مخالفة للقانون درت غيير خدمتيي لي من المفروض نكون كنديرها من نهار وصلت ماشي مخشية فداك القبر ليدوز هاذ الصباح على خيير و صاافييي ....

سماندرا كانت ملهية مع التلفون و الكيت فودنيها متبعة الاخبار ماداتهاش فيها ...

مسافة الطريق و وصلوو للسبيطار ... توادعو و كل وحدة مشات تقابل شغلها ، إيسا تاجهات للڤيستيير تبدل حوايجها و سماندرا مشات نيشان للمطبخ و المتعوسة متاجهة للارشيڤ فطريقها صبحات على لِندا و كملات طريقها لاوية شفايفها حابسة البكية بزز

•••••••

جالس فالمقعد ما قبل اللخراني فالصف حادر راسو على دفتار كيخطط فيه القسم كامل و الاستاذة مركزين مع البنت لي كتقرى الواجب المنزلي لي تعطى ليهم يخدموه من غيرو هو ... ماكرهش يدير الكيت فودنيه ولا يخرج من الحصة غيير مايسمعش الهدرة لي كتقال نفس الشعور كيحس بيهم كل مرة فاش كيكون هاذا هو الموضوع . سالات البنت التقديم ديالها و الصف تيصفقو على ادائها ... سمع صوت المعلمة كتعيط بإسمو و غمض عينيه كاره ... طلع راسو بشوية و شاف فيها

الاستاذة : (مبتاسمة ليه) انخييل ! ياله الدور ديالك اولدي

انخيل : (كيهدر بشوية ) ماخدمتش الواجب

الاستاذة : واخا ترفع صوتك اكثر ياش نقدر نسمعك؟؟

دغيا نقز واحد من التلاميذ و جاوبها

***** : قااليك ماخدمش الوااجب

الاستاذة : (شافت فأنخيل) وعلاش ؟؟ عطيتكم مهلة كاافية باش تخدمو على راحتكم !! و كنظن الواجب سااهل او لا؟؟

انخيل بقا غير حادر راسو و نفس التلميذ نقز عوتاني و جاوبها

***** : حييت ما عندووش بابااه داكشي علاش مالقا مايكتب

(شاف فصاحبو جالس فجنبو و بدا كيضحكوو)

انخيل واخا ديك الهدرة لي سمع عارفها و لكن بروڤوكاتو !! يدييه تحركو بلا مايشعر هز القلم و شير بيه على لاخر و جرحو فعنقوو حتى بانو قطرات ديال الدم!!!

ماخلاش ليهم الفرصة فين يهدرو ولا للمعلمة تعاتبو!! جمع لوازمو بالنترة فشكارتو و انساحب من الفصل مخلي الروينة موراه ....

هبط فالدروج كيجريي عينيه مضببين بالدموع ماحبس حتى وصل للساحة لي فالجهة الخلفية ديال المدرسة ... لاح شكارتوو فالارض و كيعفط عليها برجلييه بكللل قوتووو كيخويي فيها اعصابووو و دموعو بداو كيهبطو بوحدهم ... مشحوون لواحد الدرجة ماكتصورش ، باغيي يغووت و يخويي قلبوو ولكن ماعرفش كفااش تعبيروو كلو كيتحول لعصبية ... حس بشي يدين شدووه من كتافو دغيا تنتر منهم و طاح الشخص فالارض

....

ضار شاف موراه كانت بنت طايحة فالارض و شكارتها على ضهرها ... غلييوضة حيناكتها مطيبزيين حمرين ، شعرهاا زعر قويي موجموع ظفيرة مع فيليلات على شكل فراشة فالجناب ... لابسة سالوبيت فالغوز و تحت منو تيشورت ابيض مع اسبادري بيضة بزواقات ورديين ... عوينات عسليين كيلمعو مع الشمس من ملامحها كتبان مقسحة.

انخيل بقا غير كيشوف فيها كتبان فحال شي فكرون طايح على ضهروو كتحاول تنووض ماقدرااتش

مينا :(نطقات بصوت رقييت و مادة يدييه ليه) وااا عااونيي نوووض اتبقاا غير تشوف فياا ولاا شنووو ؟؟؟!

دغيا مد ليها يديه كيحاول يهزها جاتو تقييلة! بقا معافر معاها بيديه بزوج حتى وقفات على رجليها جاتو السخفة ...

كتسوس حوايجها من اللور ، حيدات كارطابلها لقاتها حتى عي توسخات بغات تبكيي

مينا : ناااري ماما اتاكلنييي ... (طلعات راسها شافت فيه و شافت فشكارتو لي طايحا) حتى نتى ماماك اتاكلك ... شو كي رضيتي شكارتك شنو دارت ليك باش ترجعها فديك الحالة؟؟

أنخيل : ماشي سوقك!

مشا هز شكارتوو ساسها و لبسها مكمل طريقو مبعد عليها

مينا غير شافتو غادي مبعد و هي تبعوو

مينا : اجيي فييين غاديي؟؟ ... خاصك تكوون فالقسم دابا شنو كدير هنا؟؟ ... علاش كنتي كتبكيي ...؟؟

أنخيل : (ضار شاف فيها بتخنزيرة كيوووت) مااكنتش كنبكيي!!!

مينا حبسات الهدرة خلاتو حتى عطاها بالضهر مكمل المشي و عاودات نطقات

مينا : واش تعطلتيي على الحصص؟؟ .... ههه اناا دييماا معطلة حييت فاش كنبدا الفطوور مكنقدر نحبسس ماما بزز كتنوضنيي من الطبلة! خصووصاا الى كانوا بان كيك و فوق منهم شوكولاااا و فريييز (غمضات عينيها كتخايلهم قدامها ريگها كيسيلو) امممم ... و حلييب بنيسكوييك احسننن فطووور فالعاالم

انخييل ماينكرش انها جابت ليه الضحك ولكن مابغاش يبين

مينا : و نت باش كيعجبك تفطر ؟؟ باين مكاتاكلش بزااف حيت رقييق ... كورن فليكس حتى هوما زوينين ... ماما كتقول لياا خاصني نقص الماكلة حيت انولي غليضة بزاف ولكن مكنقدرررششش ... هيي ديماا كطيب ليناا داكشي بنييين و كتقول لياا ماتاكلييش بزااف كضحك علياا ياااك

أنخيل : (ودنيه بداو كيصونيو بكثرت الهدرة ) واخااا تسكتييييي شويييية رااااك ضريتيينيي فودنييييي

مينا : (جمعات شفايفها فحالا اتبكيي و حاوباتو بنفس النبرة) مااااا تغوووتشش عليااااااا ....

مشاا مبعد علييها و جلس على واحد من الكراسا لي تماا جبد دفتاارو بغا يرسم مالقاش القلم و تفكر بلي شير بيه على لاخر

مينا بقات واقفة بلاستها كتشوف فجنابها شافت حتى عيات و مشات لعندو جلسات حداه

مينا : الجو اليوم زين ياك ؟؟ وااخا كانت صبات الشتاا ... اناا ماكنحملش الشتاء و نت؟؟؟

(انخيل شد على راسو بغا يهرب مالقا فين)

بقات كتشوف فخصلات شعرو كان مجموع للفوق) شعرك زويين واش سبغتيه ؟؟ حتى انا بغيت نسبغ شعريي غيير من التحت بالموڤ ولكن ماما مابغاتش .... اففف فيا جوع !!!

حلات شكارتها و جبدات منها لانش بوكس حلاتو كانوا 4 ديال لي ساندويتش طوسط ديال سلامي و فرماج مغلفين و زوج عصيرات

هزات ساندويتش و عصير و مداتهم ليهم ... شافتو مغمض عينيه و هي تنغزوو

مينا : هااك قبل مانبدل الرأي دياليي

حل عينيه شاف فيديها و شاف فلانش بوكس لقا 3 من فحال هاذاك لي مادا ليه و قال مع راسو اوو هاذي اتاكل داكشي كاامل!!!

انخيل : (خدا من عندها) gracias (شكرا)

مينا :(إبتسامة عريضة) ماشيييي مشكل ... (كتاكل و كتهدر) المااكلة دياال المدرسة خاااايبة ماافيهاا حتىى بناااا .... كون غير جابو ماما تبقا طيب ليهم

انخيل : (وحلاتها ليه) ههههه

مينا : (كتشوف فيه مبتاسمة) شتييييي هانااا ضحكتككك ... واخاا غوتيي علياااا

كضور بين الرفووف و كدوز يديها على الارشيڤات ... هزات واحد كتقرا فييه كان دوصيي ديال مرأة ولدات 3 ديال لي بايبي زوج بنات و ولد متابعين ماشي توأم !!! قراات حالتها من الاول ولادتها كانت مستعصية و من بعد بزااف ديال المحاولات فالاخيير كان جزاء صبرها هوما دوك ثلاثة ديال لي بايبي ... بقات كتقرا فالدوصيي و كتخايل ردة فعل الام و فرحتها و كذلك الاب ...

(ثلاثة ديال لي بايبي متابعين ماشي توام يعني des faux jumeaux - التوأم المختلف كيكونو مفاوتين فالولادة ب 10 دقائق ....)

كيقاطعها الڤيبرور ديال التلفون جبداتو من الجيب الجاكيط كان مساج من عند لِندا غير قراتو حسات بجسمها عرقت

"سنيور ادريان بغا يشوفك"

كتقرا المساج و تعاود و كتمنا تكون غير ماقراتوش مزيان

يَاسَمِين : ناااري اياسمين مشيتي فييهااا ... باااين غير دوك زوج لفعااات لي وصلوو ليه الخباااار .... يقول لي بغا يقوول درت غيير خدمتيي ، ليلة يردك ريفولي لبلادك ابنتي ....

طلعات معاها الصهدة و بدات كتنش على راسها ... متاجهة للطابق الفوقاني و كتلعب بالتلفون فيديها مخلوعة ، دازت عند لِندا تجيب من عندها الخبار لقاتها ماعارفة واالوو و كملات طريقا للبيرو عندوو .... من بعد صرااع طوييل دقاات فالباب و دخلات تمشات حتىى المكتب ديالو ، كان جالس محيد نظاظرو كيمسحهم سمع حس خطواتها و طلع راسو شاف فيها عيينيه خااارجين دغيا حدرات راسها حيت الى طولات فيه الشوفة اضحك ليه فوجهو

يَاسَمِين : سنيور قالت ليا لِندا طلبتيني

... لبس نظاظرو بالخف و عاود شاف فيها بنظرات مامفرزيينش

أدريان : سي ... سي ... (حل واحد الملف كيقرا فيه و مرة مرة كيشوف فيها وترها) جاانيي اتصاال من الادارة يعني من المدير (شاف فيها) جاني اتصال من الادارة بخصوصك نتيي!! (عاود شاف فالملف) اتصال كيقول انه خاص الممرضة الأجنبية الجدييدة (شاف فيها) لي هي نتيي جاااسميين ... تزاول المهنة ديالها لي هي التوليد !!! و الغريب فالامر أن وحدة من الدكاترة ديال القسم و المدير بنفسو كيوصيو عليك!!! ... (شاف فالملف) vale¡ ...من اليوم يعني منها الساعة وليتي مولدة ...

ياسمين ماعرفات راسها واش كتحلم و لا بصح كتبتاسم فحال شي حمقة مالقات حتى شي ردة فعل مناسبة لي تعبر بيها على فرحتها و دهشتها كتحاول ماا امكن ثيق ان اخيييرا زهرهاا تقاااد

أدريان : (لاح البادج ديالها لي كان من المفروض تاخدو من اول نهار وصلات فيه) هاذا البادج ديالك و ممكن تسولي لِندا و لا ميلينا على اي حاجة ممكن تحتاجيها

يَاسَمِين : (هزات البادج كتشوف فيه سميتها و كنيتها و مهنة مولدة و اسم المسفى بغات طير بالفرحة) يعنييي ... يعنييي صاافيي ولييت مولدة ؟؟؟ نقدر نخدم مع الگروب و ... و ندخل لصالة التوليد ؟؟؟

أدريان : سي تقدريي دخليي فيين بغييتيي (ناض من الكرسيي كيحك جنب كرشو) ولكنن!!!

يَاسَمِين غير سمعات "ولكن" ماكرهاتش الزمن يحبس و يطيير ادريان من قدامها و يخليها تكمل فرحتها

أدريان :(مبتاسم ببرود) ولكن ... اتبقاي مكلفة بالارشيف

ياسمين : واش نت حمق !!

أدريان : (مافهمهاش) بيردون ؟؟

يَاسَمِين : علاش غادي نبقا مكلفة بالأرشيف ؟؟ ياالاه نتكافا مع خدمتي

أدريان : (جاوبها ونفس الابتسامة باقا مرسومة على وجهو) كيبقى الاختيار ديالك (حنى راسو كيقاد الدوصياات لي فوق البيرو) ساهل تخرج مولدة و ندخلو مولدة اخرى بلاستها ...

بقات غير كتشوف فيه مكرهاتش تخنقو بيديها ولكن عنقو كيساوي الضوبل ديال يديداتها بزووج

غمضات عينيها خداات نفس عمييق و زفراتو و فكراات غير فالنص الزويين ديال الخبر لي سمعاات ... ترسمات ضحكة على ثغرها و عطاتو بالضهر خرجات من البيرو و كيف العادة خلات الباب محلول موراها و نظرات ادريان لو كانوا قرطاس كون ختارقو الجدار و قتلووها ...

الدنياا و لات كتبان ليها وردية و ريحت الامل و السعادة عاطية فالجو !!! وصلاات عند لِندا بقات كتشوف فيها و كضحك خلعاتها

لِندا : جاسمين نتي بيخير؟؟ شنوو وقع الداخل؟؟

يَاسَمِين : (حطات يديها على خدها و باقي نفس الابتسامة مرسومة) هااذ النهاار زويين يااك (خداات نفس عمييق) اممم ... بدلوو المنظف ولا شنووو

لِندا : (نظراتها كلهم استغراب) جااسميين متأكدة انك بييخيير ؟؟ شنو قاليك ادريان؟؟

يَاسَمِين : سيي سيي بيييخييير (شافت فيها ) الڤيست لي لابسة جاتك زوينة ... بقااي تلبسيهاا دييمااا

لِندا : شكرااا !!

ياسميين دارت ليها باي باي متاجهة للڤيستييغ و كدوز يديها على كل حيط دازت من حداه

لِندا : اتكون حماقت ... طبيعيي تحماق و هي غيير مخشية فداك الغار ... بفف مسكينة !

كرشها ولات كتبان كيف شي بالون ... ضربات لي ساندويتش كااملين ترخات ولات باغة غير تنعس

مينا : افف فياا النعااس (بدات كتغبن) و بااقيي فياا الجوع!!!

انخيل دغيا ضار شاف فيها مصدوم

أنخيل : (هز شكارتو وناض) نمشي حسن ، قبل ماتاكليني حتى انا

(مشا عاطيها بالضهر حتى سمع صوتها و هو يوقف)

مينا : اجيييي عااونيي رااه ماقدرتش نووض .... ايييه ... شنوو سمييتك بعداا ؟؟؟

بقا واقف بلاستو مدة و رجع عندها مد ليها يديه عاوتاني زادت تقالت بززز باش قدرات توقف

انخيل : فييلة

مينا : هههه حتىى ماما كتقولها ليااا ... فيين اتمشيي داباا ؟؟ شنوو سمييتك؟؟

أنخيل : ماشي سوقك

مشا و خلاها موراه

مينا :(هزات شكارتها تبعاتو كتمسى بزز) ماالك ماالك دااير هكذاا ... رااه قسمت معااك الغدا ديااليي

انخيل : (جاوبها و هو باقيي عاطيها بالضهر) كلييتيي ثلاثة و كملتي بالنص لي خلييت ... شكراا حيت قسمتي معاياا

مينا : هههه اواا نت كتاكل بشوية

انخيل : هدرتك كلهااا غيير على الماكلة ضريتيني فراسيييي

مينا : الماكلة هي اكثر حاااجة كنبغيييها فحيااااتييي ... و نت شو هي الحاجة لي كتبغيها بزااف ؟؟؟ ... ممكن الرسم حيت شفت الدفتار ديالك .... شنوو سمييتك؟؟ اناا سمييتيي مينا و نت ؟؟

(تسمع الجرس )

مينا : نووو ماابغييتش ندخلل للحصة فياا النعاااس ...(نبرة الحماس فصوتها) شنو بان ليك نهربو !!!!!

انخيل : بعديييي منييييي (بداا كيزرب فالمشية حتى دخل للمدرسة)

مينا : (واخا عاطيها بالضهر كدير ليه باي باي فوسط حشد التلاميذ لي خارجين من اقسامهم) نتلااقاو غدااااا

انخيل : (جاوبها بينو وبين راسو) سي حتى نكون حمق و نعاود نهدر معاك ...

•••••••

حلات باب الڤيستييغ كان خاويي .... خزانات فاللون الازرق ، جدران فالابيض و مقعد طوييل فالوسط فنفس لون الخزانات ... بقات كتسارا على خاطرها و عينيها كيلمعو بالفرحة ... شحاال من مرة تخايلات اللحظات لي اتعيش فهاذ الڤيستيير مع المولدات لي خدامين معاها و هدرتهم على المرة لي و لدات على البايبي على اداء كل وحدة فيهم و تخيلاتها قربو يوليو حقيقة

يَاسَمِين : صاافي اياسميين الدنيا بدات كضحك ليك و زهرك هاهو غادي و كيتقاد ... الارشيڤ ماشي مشكل نهرب ليه مرة مرة الى بغيت نرتاح ... هههه .... بغييت نعرف غيير شكوون هيا هاذ الطبيييبة ندعي معاها نهار و لييل

تحل الباب و هي ضور تشوف شكون دخل كانت ميلينا و صاحبتها

يَاسَمِين (قلبات عينيها للجيهة الاخرى) هااا ياجوج و ماجوج شرفوونااااا

ميلينا : اوووه جااسمييين !! اش كادييري هناا؟

لِيلى : ههه ثيقات راسها ... سحاب ليها صافي ولات مولدة

ميلينا : (قربات لعندها) مااشيي مشكل الواحد يحلم شويةة ولكن غيير مايسحابش ليك الحلم ايوليي حقيقة

يَاسَمِين : (تخطاتها متاجهة للباب) نمشي من هنا حسن ليا ريحت السم بدات كتعطيي

لِيلى : غيير خليهاا تمشيي ... ايكون سنيوور ادريان سمعهاا الهدرة لي اتفيقها

يَاسَمِين : (حتى كانت خارجة و حبسات ضارت عندهم) الصراحة وقع العكس (شافت فيهم وحدة بوحدة مبتاسمة ليهم) سنيوركم لي سمع هدرة فيقاتو وانا وليت مولدة بزز عليكم و عليه ... سيروو عندو واسيوه و حاولو تنسيوه ، هذي هي الخدمة ديالكم ياك ؟؟

خرجاات خلات و حدة كتشوف الاخرى مافاهمين والووو ...

طلات على الساعة كانت قريبة 3:30 يعني قريب وقت خروجها و حتى البناات هبطاات كتجري تجمع لوازمها و كتفكر كفاش تقول ليهم هاذ الخبار

......

نازلة كتجرييي فالدروج ماقاداها فرحة ماكرهاتش تشارك فرحتها مع غرناطة كااملة ... حلات باب و عينيها كيضورو على الرفوف

يَاسَمِين : كيبان ليا اتبقاو تابعيني حياتي كاملة ... ولكن ماشي مشكل ربييت عليكم الكبدة واخا دوزتوها علياا ...

مشات لبيروها جمعات لوازمها فصاكها ، سدات باب الارشيڤ متاجهة للطابق الفوقاني ... كتلعب بالبادج فيديها كتشوف فسميتها فحالا اول مرة تقراها ... ماحسات حتى خرجات من سبيطاار ... شافت فالجيهة لي مولفين كيتسناو فيها بعضياتهم لقاتهم واقفين ، ماحدها كتقرب و ماحد كيوضاحو ليها ملامح سماندرا لي كيبانو مغيرين!!! و جمعات حجبانها متسائلة ... قربات لعندهم و سمعات هدرت إيسا ...

إيسا : اففف حتى نتي ماتزيديش فييه!!! راه كيبقا ولد صغير طبيعيي يداابز ... بعدا كيعرف يدافع على راسو ...

يَاسَمِين : البنات !!! اش واقع ؟؟؟ شكون لي دابز ؟؟

سماندرا : (كتهدر معصبة و مخلوعة فنفس الوقت) انااا مكانصيفطووش باش يدابز!!! كنصيفطو باش يقراا .... كااين الاستاذ و كاين الادارة الى دار ليه شي واحد شي حاجة يمشي لعندهم صاافيي!

إيسا : (شافت فياسمين) عيطو ليها من المدرسة و قالو ليها انخيل ضرب شي واحد

يَاسَمِين : اناااري!!!! وعلااش ... ماشي غير ايجي و يضربوو ... باين دار ليه شي حاجة (شافت فسماندرا ) مااتعصبييش و ماتخلعييش باين ايكون الولد لاخر لي دار ليه شي حاجة يااك ؟ راك كتعرفيه كثر مناا

سماندرا : (مسحات بالخف دمعة طاحت على خدها ) و باش كملهاا خرج من الحصة ... مااابقيت عارفة مانديير ولا كفاش نتصرف معااه ... عصبيتو اتخرج علييييه

إيسا و ياسمين شافو فبعضياتهم و ملامحهم حازنين كل وحدة عنقاتها من جهة كيدوزو يديهم على ضهرها كيحاولو يكالميوها

إيسا : وااصااافييي ماديريش لينااا فيلم دراامي فيه سااعتااين ... راك عارفة فاش كتكوني مقلقة طيابك مكيجيش بنييين

يَاسَمِين : وييه ... و كنت جاية نعاود ليكم واحد الخبر ولكن مااشي مشكل

سماندرا : (بعداتهم عليها كمسحات دموعها و شمرات على نيفها ) اشمن خبار؟؟؟

إيسا : هههه ياكما لقيتي ليا شوگر داادي !!!؟

سماندرا/يَاسَمِين : اففففف!!!

إيسا : ههه صااافيييي هااناا سااكتة

يَاسَمِين : (هزات البادج و كتلعب بيه فعنقها) صاافي ماشي شي موضوع مهم ... مرة اخرى و نقوليكم

سماندرا : الى خباار زوينة غيير عاودي ننسا هاذ الهم لي انا فيه

إيسا : (صغرات عينيها) جااسميين !! اش داكشي فيدييك؟؟

يَاسَمِين : (كتنش على وجهها بالبادج) يدي انااا؟؟؟ نوو ماافيهاا وااالوو

سماندرا : (خطفاتو ليها) ارييي لهناا نشوووف

بدات كتقرااه و قربات عندها حتى إيسا و ياسمين كتشووف فيهم و كضحك كتسنىى ردة فعلهم

إيسا : جاسمين هاذ البادج فحال لي عندي!!!

يَاسَمِين : هههه سييي

سماندرا : مكتوب فيه سميتك و مولدة !!

يَاسَمِين : سيييي

إيسا : (قربات عندها لإبتسامة عرييضة و شدات ليها فيديها) عطااه ليك ادريان !!!

ياسمين حركات راسها بالايجاب مبادلاها نفس الابتسامة

سماندرا : (مصدومة) يعطاه ليك غيير هكذااك؟؟؟

يَاسَمِين : هههه جاه اتصال من الادارة و قالو ليه يخليني نخدم على خاطري .... هههه تخاايلووو عيطوو لييه من الادارة علىى قبلييي انااا !!!

سماندرا : جاااسمييين !!! هاذ الخبااار كتفرح !!! ماتصورييش شحال فرحت ليييك ... اخييرا امورك تقااداات

إيسا : صاافيي ولات عنديي شرييكتيي فالجرائم ... نلقا مع من نبرگگ ... انبقاااو نسلتوو بزوووج (وجهات ليها سبابتها) عااانداك ديري ليا فيها المولدة المتفااانية (عنقاتها) carinioooooo فرحت ليييك (فصلات العناق)

يَاسَمِين : حتىىى اناا ماتصورووش فرحتىىى واااخا قالياا انبقاا خدامة حتىىى فالارشييڤ ولكن مااشي مشكلل

سماندرا : و كيي غاديري تخدمي فيهم بزوح؟؟

يَاسَمِين : مااكايهمشش المهم خدييت البادج دياالييي و انديير خدمتيي لي انا باغاهاا

إيسا : valeeee¡ اليوم انزهااااو !! و نتي اسماندرا اطيبي لينا شي حاجة بنيينة و زوينة فحاالك !!

سماندرا :(شافت موراها ) ياااله نمشييو راه الطوبيس وصل نوصلوو للدار و نشوفو الزهو ... و نتفاهم مع داك الولد لي عنديي

يَاسَمِين/ إيسا : valeee¡ ماميييي

★الساعة 20:00★

من بعد وصولهم للدار سماندرا مالقاتش انخيل فالدار عرفاتو هربان منها ... البنات طمنوها وقالو ليها بلي ممكن يكون غير مع صاحبو لي فالدار لي حداهم ... كل وحدة طرفات حالتها حيدو عليهم العيا ديال النهار و تخشاو فبيجاماتهم ... سماندرا حلات التلاجة لقات داكشي لي فيها يخرّج ليهم غير صوبة و اقتارحات عليهم أيسا يطلبو بيتزات من السناك لي تحت منهم ....

•••••

حاط و دنيه على الباب عاارف بلي المدرسة ايكونو عيطو لماماه و قالو ليها كلشيي ... خاايف من ردة فعلها و نفسيتو ماقادراش تتحمل توبيخها ليه ... حل الباب بشويييية شاف فالكوزينة اونفاص معاه كانت خاوية ، دخل و سد الباب بالحس داير القب ديال الكابيشو و شكارة فضهرو كيبان فحال شي شفار ... كيسمع الهدرة جاية من الصالون عرف البيت ايكون خاويي ... ياله ايضوّر البوانيي و هو يقفز مخلوع

يَاسَمِين : (كتهدر بالهمس) جيتييي !!! ناري ماماك مخلوعة علييك فيين كنتيي

انخيل : شوووت اتسمعك !!

يَاسَمِين : فين تعطلتيي ... شنو اتقول ليها دابا

أنخيل : عيطو ليها ؟؟

يَاسَمِين : (حركات راسها بالايجاب) علاش دابزتيي ... ياكماا ضربك؟؟

انخييل :(قلب عينيه للجيهة لاخرى) ماادابزتش ...

(تسمع الجرس ديال الباب ... البيتزا وصلات يااله بغا يدخل للبيت و يسد الباب و خرجات سماندرا من الصالون و قشعاتو)

سماندرا : انخييل !!!!

دغيا دخل و سد عليه البااب سماندرا من عينيها بااين تعصبااات ... النهار كلوو وهي مخلوعة عليه و دابا جا و سد ليها الباب فوجها .... جات بغات تحل الباب ناوية ليه على خزيت و شداتها ياسمين من دراعها

يَاسَمِين : سماندرا ... عافاك بلاا ماتغوتي علييه ... راه ديجا كايبان مقلق ... خليي حتى تبردو بزووج عاد هدرو

سماندرا ماجاوباتهاش دخلات عليه و سدات الباب موراها

(عاود تسمع الجرز ديال الباب قرب يطييروو )

يَاسَمِين : وااااا غيييير بشويييةةة اووو راااه كنسمعووو

•••••••

اخيل جالس فوق الناموسة كيقاد الكيت فالتلفون ماسوقش ليها

سماندرا : نهااار كلووو وانا مخلوعة علييك قلت انجي للدار انلقاات ولكن مالقيتكش و جاايني فهاذ الوقت !!! كون بقيتي فالزنقة علاش جاي

(بان ليها كيدير الكيت فودنييه وهي طيرهم ليه حتى تقطعو)

حيييد علياا هااذ الزبل و فاش نكون كنهدر معااك شووف فيااا .... مع من دابزتيي عاوتاانيي ... جرحتيي الولد ا انخييل واش انا ربيتك فحاال هكذا ؟؟ جااوبنيي ... لمننن خرجتيي كتشبه فهااذ الاعصاااب لمننن

انخيل : (غير حادر راسو و الدمووع فعينيه) يمكن خرجت كنشبه لبابا لي عمرني شفتو و ماعارفوش شكون هوا !!!

يَاسَمِين هازاا البيتزاات فيديها و حداها إيسا غير سمعو الجواب ديالو و حدة شافت فالاخرى ملامحهم مامفرزينش

.....

سماندرا بقات واقفة بلاستها شهقات فصمت جوابو قسم ليها الضهر ! النقص و الالم لي حساتهم فنبرة صوتو دخلو لقلبها فحال الخناجر ... ماعرفاتش باش تجاوبو و كفاش تتصرف . منظرو و هو جالس حاني راسو و دميعاتو نازلين لي خدو سالاو معاها ... جلسات حداها بغات دوز يديها على شعرو و تجرو تخشييه فحضنها و هو يبعد منها دغيا حمعات يديها .

ناضت من حداه قالت تخليه على خاطرو شوية ...

حلات الباب ولقات لبنات واقفين كيشوفو فيها ملامحها عيااانييين تخطاتهم غادا للصالون و نطقات

سماندرا : ياله تاكلو ... مشا الحال و غدا فايقين بكري عوتاني

تبعوها البنات بلا كلمة بلا زوج طحات ياسمين البيتزات ... جلسو على الطبلة لي ديجا كانوا عليها زوج كانيطات بيبسي لياسمين و انخيل و زوج كانيطات عصير الكوليك ديال التوت لسماندرا و إيسا ... كل وحدة شدات كرسيها ياسمين حدا إيسا و مقابلة معاهم سماندرا لي حلات وحدة من الكارطونات بانت ليها ديال شومبينيو ديال ولدها و هي تتنهد ... البنات و خصوصاً ياسمين كيشوفو فيها حالتها كتحصر بغاو يواسيوها ولكن ماعرفو مايقولو ماعندهم حتى فكرة على الموضوع خافو يخرجو شي كلمة يزيدو يكملو عليها ...

إيسا : سماندرا Cariño مكايبانش ليك انخيل خاصو يعرف شي حاجة على باباه !! انا متأكدة المشكل لي وقع ليه فالمدرسة ايكون غير بسباب هاذ الموضوع !

يَاسَمِين : انا ماعارفاش شنو المشكل ولكن إيسا عندها الحق ... ممكن هذشي لي مشكل ليه عقدة مخليه ديما معزول و صعييب ينفاتح و عصبي كثر من القياس الى عرف غير معلومة صغييرة تقدر تريحو !

إيسا : هدري معاه فاتحيه فالموضوع انا ممكن نسولك و ماتجاوبينيش و نسكت !!! ولكن هو راه ولدك ا سماندرا ! و راه كايكبر ... خااصو يعرف ولو غيير اصلو !!

سماندرا بقات غير كتشوف فيهم و نظراتها كيقولو كلشيي ... تنهدات ، ناضت و هزات بيتزا و الكانيط ديال ولدها

سماندرا : غير كولو نتوما ... و الى كنتو اتسهرو بلا ماتسناوني ... تصبحوو على خيير (و انساحبات)

يَاسَمِين (متبعاها بعينيها) : vale¡ ... تصبحي على خيير

إيسابيل غير حركات راسها يمين و شمال و بدات ماكلتها

يَاسَمِين : (شافت فإيسا) دابا واش ماعارفش باباه؟؟ واش مطلقين؟؟

إيسا : (شربات من كانيطتها و شافت فيها) واش ماعارفش باباه سي ... واش مطلقين (لوات شفايفها بمعنى ماعرفتش) عرفتيي نتي و سامي كتشافبهو فبزااف ديال الحوايج ... و منها انكم ماكاتبغيوش تشاركو اسراركم مدة طوييييلة و انا معاها و عمرها عاودات لياا على بابات انخيل ...

(عاودات شربات من كانيطتها و ياسمين غير مطلعة فيها حاجبها)

وحتى نتيي!!! ماشي فحالي اناا كتاااب مفتووح و واااضح اي حاجة وقعات ليا كنعاودها ليكم بلا ماتحتاجو تسولوني

(خلات بيتزتها ماكملاتهاش و هزات كانيطتها و كانيطت سماندرا و ناضت متاجهة للباب )

تصبحيي على خييير Cariño

مشات لبيتها وتسمعات الزدحة ديال الباب و يَاسَمِين غيير كتشوف ونطقات بالداريجة

يَاسَمِين : (كتاكل و تنگر) وااايااالااه !!! الىى نتيي كااطييريي اناا لااا !! اييه جامعانا خدماااا و جامعاناا هاذ الدوييرةة و جامعنااا الكرااا ...و رتااحييت ليكم ظرييفات كتفرحو لياا و نفرح لييكوووم ... اماا الاسرااار اوووهووو اداا حمااد ... نخاااف تجمعوونيي بنصصص ... هدشي دصحابااات مااانعرفش ليه (حلات بيبسي و شربات) الااسرااارر علىىى اناا عنديي اسرااار ... ليي دازت فحيااتيي كدووز مرور الكراام و كنسااهاا ... ايييه ا ياسميين ولاو يزدحو عليك فالبيباان ... ضربيي البيبسيي و فرحي بخدمتك راااسك (شافت فالبيتزات) و اللهيلاا خلاوهم ... نااكلهم حتى هومااا ... حراام يضيعووو ...

باقي بحوايجو ديال المدرسة ... شاد البيسي ديالو بااقيي عاقد غوباشتوو ، ماطلعش فيها العين منين جلسات حداه ...

سماندرا : انخييل ... يااله اولديي رااني شحفتت ... حيد داك البيسي و نوض غسل يديك باش تاكل .... راه البتزا لي كتعجبك ... شوف حتى حوايجك باقي مابدلتيهم ... مشا الحال ا ماما و خاصك تنعس بكري ..

أنخيل : (باقي حادر عينيه) مافياش الجوع!!

سماندرا : بلااا ماتشد معايا الضد ... باين اتكون بقيتي بالجوع من الغذا !! ماتقصحش راسك اولدي ...

انخيل : (شاف فيها بنص عين) فيها شومبينيو ؟؟

سماندرا : (ضحكات ليه و حلات الكارطون) Si bebé (وراتو لكانيط) و كاين حتي هذيي !!

سد البيسي و قرب لعندها كرشوو كتلوواا بالجوووع و الريحة كتشهييي ماقدرش يزيد يقاوم ... بغاا يمد يديه ياكل و حبساتوو

سماندرا : نوو .... انا انوكلك مااغسلتيش يدييك و نخاف تمرض ليا مااما ...

هزاات مورصو و مداتو ليه داار عضة كبييرة من الجوع لي فيه و بدات كضحك ... كتشوف فملامحوو تغوبيشتوو نيفو خصلات شعرو الملونين كلهم كيفكروها غير فيه ...

كتحححصررر على حالتو كتخااف تعاود ليه وتزيد تكمل عليه ... و ماعارفاش حتى شنو تعاود لييه .

سااهية فكبدتها مبتاسمة ليه ... وعات و لقاتو كيشوف فيها سالا المورصو من يديها .

بعدات الكارطون و قرباتو لعندها حضناتو و هو بدورو مزييير عليها كان محتاااج لدفئ صدرها و محتااااج يحس بحنانها ..

كدوز صباعها على لي بوكل ديال شعرو و كتنهد

سماندرا : حتى انا ماكرهتش لو كان كلشي مختاالف و كيفما بغييتي اولدي ... ماكرهتش لو كان باباك معاك ... ونعيشو مجموعين ... ولكن ... ولكن ماشي بيدي ا ماما ... ختار يعيش فحياة حنا ماكاينينش فيها

أنخيل : (مخشي فصدرها و مزيير على عينيه) باقي عايش؟؟

سماندرا : (تنهدات) ماعرفتش اولدي

أنخيل : يعني مشا و خلانا و ماسولش فينا ؟؟؟ (سماندرا بقات ساااكتة و عضات على شفتها التحتانية و غمضات عينيها) صاافيي مابغيتوش و مامحتاجووش ! عندي نتي ... فيك ماما و حتى بابا ..

ماعرفات باش تجااوبوو!!! هزاات راسها كتشوف فالسقف معافرة مع دموعها مايهبطوش ... كتحااول تبقا قوية و عمرها تبين ضعفها غيير على قبل ولدها ... زااد تخشاا فحضنها و حسات بيديها مزيير بييهم على اطراف التريكو ديال بيجامتها ... بكاه صااامت غيير دموعي ليهابطيين ، يديها كيدوزو على ضهروو كتهدّيه

سماندرا : (فصلات العناق و كتمسح ليه الدموع لي على خدودو) صاافيي ماماا ... تعطل الحاال خااصك تنعسس ... نووض طرف حالتك و بروصي سيناتك ... و غداا خاصنيي نمشيي معاك المديير بغاا يشوفنيي (جرات ليه ودنييه و كضحك) حييت ولديي كيداابز فالاقسااام

انخيل : ههه هوو ليي جبدنيي ... شنوو انبقاا ساكت لييه !!!

سماندرا : لاااا حااشاا ماتسكتش لييه ولكن ماتخدش يدييك اولديي

انخيل : يعنيي واخا نسبوو ؟؟؟

سماندرا : نووض من حداياا (بغات تشدو من شعرو و هو يهرب) نووض من حداااياا قبل ما نتفككك نوووض

انخييل خرج من بيت كيضحك و هي متبعااه بعينيها ... غيير غبر ابتسامتها تمحات و الدموع لي كانت حابسة بدااو كينزلوو بوووحدهوم....

عيااااات بزااف و كيبقا فيها غيير ولدها تعياا ماتوفر لييه اي حاجة حل عليها فمو كتقطع من لحمها و تحظرها لييه غيير باش ماتشوفش تقليقتوو ... مااكاتبخلش علييه بحنانها هو حياتهاا و عينيها و لكن تعياا ماتعوض اتبقا بلاست الاب فاارغة و مايعوضها غيير حضورو ...

السقييل فالداار كيتسمع غير صوت قطرات الشتاء الخفيييف ... كلشي فبيتو مخشي ففراشو . وحدة سكرااات نسات همها و دخلات فساابع نومة و وحدة غيير كتقلّب فالفراش مع نفس الكابوس لي مدااوم على زيارتها و الاخرى نعسات متحصرة على حالة ولدها لي فحضنها ...

صباح جديد بجو مختاالف تمااما على لي كان فالليل شميييسة داافية اشعتها كلهم طاقة ايجابية ...

البنات فاقو بكري غير عادتهم حتى من إيسا !! روتينهم الصباحي داز بالخف و خرجو من الدار مجموعين سماندرا مشات مع انخيل للمدرسة و ياسمين و إيسا تاجهو لخدمتهم ...

حماس ياسمين لهاذ النهار غيير خلاها تنسا ليلتها كيف دازت ... هاذ النهار اتمشي على اساس ممرضة ... على اساس مولدة فالسبيطار ماشي غير وحدة كتبقى ساعات فالارشيف كطبع ليهم فالوراق و تقاد الملفات ... فرحتها باااينة على ملامحها وعلى اللوك لي لابسة اليوم

وجهها كيف العادة مكاتفية غيير باي لاينر ديالها و الگلوص حنيكات موردين غير ب حدهم .... شعرها مجموع ظفيرة للجنب و گصيصة طايحة على جبهتها .... لابسة كسيوة طويلة فالباج بالصدايف جيهت الصدر رسماتها ... مع مي بوط فالكحل و جاكيط فالماغون ...

مسافة الطريق و وصلو لسبيطاار تاجهو نيشان للڤيستييغ و إيسا من صباحها فاقت مغيرة ياسمين بفرحتها مانتابهاتش ليها ...

اللباس الموحد قدات غير بلي عطاتها إيسا ديك المرة حتى تشري واحد على قياسها ... الفلوس لي عندها فهاذ الساعة يكفيوها غير لمصروف هاذ الايام على ماتخلص لبسات بالخف و إيسبادري بيضا فرجليها كتشوف فراسها اطيير بالفرحة .... ضارت موراها لقات إيسا ملهية مع تلفونها ماهياش هنا عاد وعات وحسات بتقليقتها

يَاسَمِين : (قربات لعندها) إيسا ؟؟ صاڤا؟؟

إيسا : (شافت فيها و دارت التلفون فجيب الطابلية) سيي Cariño صاافيي وااجدة ؟؟

يَاسَمِين : يااك مامقلقاش؟؟

إيسا : ههه و علااش غادي نتقلق ؟؟؟ (شداتها من يديها وخرجو من تم) ياااله نديك تشوفي الگروب لي اتخدمي معاهم .... ايعجبووك ... من غيير دوك الزوجاات (شافت فيها) مييلييناا و لِيييلى ... اففف غير سميااهم كدير ليا التبوريشة

يَاسَمِين : نااريي حتى انا ماااحملتهمش خصوووصااا دييك الطوييلة لي سنانها مراكبين (ميلي)

إيسا : ههه غير رتاحي ماشي غير بوحدك ... مكروهة عند كلشيي

غاادين فالكولواار حتى وصلو قدام صال دغوبو ديال المولدات حلات إيسا الباب بلا مادق فحاال العجااجة و ياسمين موراها

غرفة طاغي عليها اللون الابيض و الزرق ... مع الدخلة كاتبان ليها طبلة متوسطة بالكراسة فالابيض ... فالجنب ليمن كاين فوتوي كبير فنفس اللون و موراه خزانة متوسطة فيها كتب خاصين بالمجال ديالهم ... على جنبها ليسار كانت طبيلة عليها ماشين ديال القهوة و ميكروييڤ صغير ... كانت ساامبل كتشوف فيها بعيينين مبتاسميين ... كانوا 6 ديال البنات من الگروب ... تعارفهم كان عاديي رحبو بيها بناتهم و اغلب الاسئلة إيسا لي جاوبات عليهم ...

...الگروب متكون من 11 مولدة بيها هي و إيسا كيخدمو الصباح و كاين گروب اخر ديال الليل

و كيتبدلو على خساب البروگرام ...

عرفات الخدمة كفاش كتمشى و حتى اوقات العمل ... الى كانت وحدة فيهم اتغيب و لا تعطل كيغطيو عليها و كتعوضهم

هوما كيعاودو ليها و عقلها كيسجل عينيها مبينين حماسهاا و حاسة بلي خدمتها ايكون داخل فيها حتى المرح !

النهار دوزاتو غير مع إيسا ... ضارت معاها على الغرف لي مكلفة بيهم ، طلوا على الامهات لي عاد ولدوا و لي بايبي ديالهم . قاعات الولادة كانت مجموعة أخرى لي مكلفة بيهم .

وصلات وقت الغدا و هبطو cafetería (كافيتيريا) ديال الموظفين لي فالسبيطار ياخدو شي حاجة خفيفة ...

كانت عامرة بالاطباء و الممرضين كلشي لابس بلوزات بيضين و فكرة انها وحدة منهم خلاتها تبتاسم تلقائيا عينيها كيشوفو فالارجاء حيت اول مرة دخل ليها و إيسا كيف عادتها عينيها كيقلبو على شي فريسة .

كانت كافتيريا سامبل جدران بالبيض و الزرق فااتح طبالي و كراسى فالابيض شفافين و كاين جليسات بدي فوتوي على الجنب ديكورات سامبل موزعين فالارجاء ...

خداو بلاطو ديال الغداء سامبل متكون من شلادة ديال الخضرة والأخرى ديال فواكه ، سوندويش و قرعة الماء ...

غاديين و كيقلبو على شي بلاصة يجلسو فيها ونطقات إيسا

إيسا : اوووف ... علااش ختارييت نكون مولدة علاااش ... كوون درت مضيفة طيران حسنن ... شوگر دادي فالذهااب و شوگر دادي فالإياااب (ضورات عينيها على الطبالي) اما هنااا يخخخ غيير البراهش ... وحتى واحد ماكايحمر الوجه

يَاسَمِين : انا بغيت غير نعرف منين جبتي هاذ البلية ديال شوگر دادي

إيسا : البلية ديال الفلووس Cariño الفلووووس

يَاسَمِين : نااري انا هاذ الساعة بغيت غير ناكل ... كرشيي كتغوت بالجوووع

كيقاطعهم صوت... إيسا دغيا ضارت حيت عرفات شكون و ياسَمِين كتقلب غير فين تحط طرمتها تاكل

كان ستيڤ بشوميز و سروال كلاس فالازرق و حذاء بالسيور فالكحل كيلمع فوق منهم بلووز بيضاء ... عينيه على ياسمين لي عاطياه بالضهر

ستيڤ : holà !

إيسا : (كتشوف فيه فين كيشوف) ستيييڤ هولااا ... (نغزات ياسمين و ضارت لعندها) جااسمييين ... ستيييڤ عقلتيي علييه يااك

ياسمين ضارت شافت فييه وجهها صفار!! بدات كتحس بلحمها برد و تشوك معرفاتش علاش ولكن غير شافتو و تفكرات السواغي لي تلاقاو فيها و شنو وقع فديك الليل ...

ابتسامتو بشووشة كيتسناها غير تنطق شي كلمة يسمع صوتها شافها ساكتة و فحالا مصدومة دغيا جمع ضحكتو ... ضارت إيسا شافت فيها و شداتها من دراعها حيت بانت ليها بدات كتمييل

إيسا : جااسميين شنوو وااقع مالكيي ؟؟؟

ستيڤ : (قرب عندها خدا من عندها البلاطو و شدها من كتفها) جاسمين باش كتحسي ؟؟؟ ياكما مريضة؟؟؟

يَاسَمِين : (كتنطق بلسانها تقييل) بيخيير بييخيير ... غير الدوخة

ستيڤ حاوطها باليد الاخرى كانت طابلة خاويا فالقنت و بقا غادي إيسا موراهم كتفرنس و البرگاگات كيتغامزو و يوشوشو ...

جلسها على الفوتوي و حل ليها قرعة ديال الما و عطاها تشرب ... نزلات عليها دقة وحدة كيشوف فيها حركاتها كلهم كيووت

ستيڤ : دابا شوية ؟؟؟ وجهك صفر !!

ياسمين سرطات الجغمة اللخرة و حيدات القرعة من فمها ... طلعاات عينيها فيه بشويية فحال شي قطة و حركات راسها بالايجاب و هو يبتاسم ليها ... شافت فإيسا لي جالسة قبالتهم دايرة رجل على رجل و كتفرج فيهم ...

إيسا : جاب الله كان ستيڤ اما كون طحتي فالارض ا جاسميين !

يَاسَمِين : (شافت فيه و ابتاسمات دغيا و جمعاتها) شكرا !

ستيڤ : ماشي مشكل ... المهم نتي بيخير دابا ... (قرب ليها البلاطو) خاصك تاكلي !

يَاسَمِين : نو نو ما عنديش الخاطر

إيسا : جااسميين !!! سمعي هدرة الطبيب و كولي راك ديجا الصباح مافطرتيش مزيان !!

ستيڤ : (عينيه اصلا ماهبطوش عليها ) علااش مافطرتييش !! الفطور اهم وجبة فاليوم ... كفاش اتخدمي ونتي ماواكلاش؟؟

ياسمين حسات بيه تقييييل على قلبها ماكتقدر حتى تجاوبو و مكاتحملش لي يبقا يحكر عليها ، راسها كيطنطن بالصداع بدات كتنقب من الفواكه غير باش يسكت ... هي كتاكل و هو حاضيها و إيسا حاضياهم ...

إيسا : valeee¡ انااا غادي نووض ناكل فلاصال ديالنا حسن (ياسمين طلعات راسها كتشوف فيها بترجي باش تبقا) نتوماا كوولوو و هضرووو ... باااي

(دارت ليهم بااي بيديها و غبرات)

ياسمين كتشوف فيها مشات بغات تبكي ... ضارت بالعرض البطيئ فرشيطتها ففمها لقاتو قريب منها وباقي حاضيها و دغيا تحنات على البلاطو ...

ستيڤ : ديك المرة فالسواغي رجعت مالقيتكش قالو ليا مشيتي !

يَاسَمِين : (شافت فيه جاوباتو و دغيا حنات راسها) سيي مشيت بكري كان خاصني نرتاح

ستيڤ : (نتابه لراسو كيفاش مقرب منها و حسها تزيرات و بعد تقاد فجلستو) قالو لياا كان عندك مشكل مع الماجور ديالكم ... الى كانت شي حاجة نقدر نعاونك فيها !!

يَاسَمِين : (حساات بلطافتو فهاد الجملة وطلعات راسها شافت فيه بابتسامة خفييفة) نو صافي تحل المشكل ... كاان شاد معايا العكس على والوو ... شكرا !!

ستيڤ : بالعكس هاذا واجب !! ... الى حتاجيتيني فشي حاجة ماتتردديش تقوليها ليا ... ادريان ماشي شي واحد لي ساهل ! كلشي عارفو شنو كيسوا

يَاسَمِين : هذاااك راه ماكايسوا مكايصلاح خااصوو ليي يعاود ليه التراابي (شافتو تصدم من انفعالها و هي ضحك لييه ) ههه بغيت نقول ... شكرا ... شكرا سنيور

ستيف : ههه بلااش سنيور غير ستيڤ ... امم جااسمين !!

يَاسَمِين : (كتشوف فيه و فخاطرها كتقول اش بغا هاذااا ) سيي؟!

ستيڤ : امم ... الى كان ممكن ... وكنتي كتحسي براسك صاڤاا ...(صوتو باين فيه الحماس) شنو بان ليك نتعشاو بزوج هاذ الليلة !! فأي مطعم بغيتيي ... و ماشي ضروري عشا ... نمشي اي بلاصة كتعجبك ؟؟

يَاسَمِين : ها؟

ستيڤ : ماكرهتش نتعرف عليك اكثر و صداقتنا تقواا ... الصراحة كنحس بواحد التفاهم بيناتنا ... كنواعدك غيير عشااء خفييف نعرفو فيه بعضياتنا

نظراتها لَو كانوا كيهدرو كون قالو ليه واش من نيتك مدة وهي غيير كتشوف فيه و فإبتسامتو وعينيه لي بااين عليهم الحمااس و كيتسناو الجواب ديالها

يَاسَمِين : بيردون ... مانقدرشش ... عندي ديجا مخطط لليلة مع البناات ... و راك عارف ... غداا خدااميين ... يعني خاصنا نعسووا بكرييي و نفيقوا بكرييي ... وراك شفتيني كنت انسخففف ... خاصني نعس مزيااان و نرتاااح ... راك عارف الخدمة ديال مولدة ماشي ساهلة ... ههه فحالا حتى نتا كتولد معاهم ... مااشيي نتاا !!! زعماا انااا !!!

(شافت فالساعة الفضية لي فمعصمها)

اوووه تعطلت إيسا اتكون كتسنانيي الفوق ... اممم ... يااله (ناضت من بلاستها) باااي ... نشوفك من بعددد ...

إبتاسمات ليه و مشات كتزرب فالمشية وكتلعب بظفيرتها ... بقا كيشوف فيها دوخاتو بالهدرة دغيا زربات عليه ... ماخلات ليه حتى الفرصة لي يهدر فيها ... بقا كيشوف فالبلاطو لي خلات و كيشوف فيها حتى غبرات من قدامو

ستيڤ : vale¡ مااشيي مشكل ... هاذي غير المحاولة الاولى ... ماااشيي مشكللل ... افف عينيها شحاال زويينيين ...

•••••

كتزرب فالكولوار وكتنگر

يَاسَمِين : مااكرهتش نتعرف علييك كثر و صداقتنا تقواا .... اشمن صدااقة اسيي و اناا سميتك كتهرب لياا ... واادخلاا سخوونة هذييي ... فيين يبانو العنابة ديال دربنااا ... السيد رطب من الزبدة و قااليك نتعاارفوو ... واهي الى جينا لصراحة السيد ظريييف ولكنن رطبببب رطبببب

وصلات للاصال حلات الباب بانت ليها غير إيسا متكية على الفوتوي و شادة تليفونها غير شافتها تقادات فالجلسة

إيسا : اوووه جااسمييين! صاافي دغيا وقفتي على رجلييك ... يااكماا شيي قبلة سححرية

يَاسَمِين : (جلسات حداها و ربعات رجليها ) قنبووولة سحريية ماشيي قبلة ... مشييتيي و خليتيينيي معااه حراام علييك

إيسا :(كتهدر و تعبر بيديها) ههه مااشفتيهش كيفاش كان حااضييك و مخلوووع علييك فحاال شيي فرااشة اتهرب من بين يديه

يَاسَمِين : لوااه جراانة ... نااري غير شفتو وانا نسخف باش تعرفي و جهو مااكايبشرش بالخيير

إيساا : هههه رااه نتيي لي بااردة ... انا بلاستك يكوون شي شوگر داادي انزيييد نسخف و نطييح عليه فحاال هكذاا (تكاات عليها يديها ملاوحين موراها وكل رجل فجييه) و نقولييه ... خااصنيي ڤييلااا و فيييراااارييي ... و ساااعة دايموند ... و شيي مليوون اورو نشمهم بااش نفييق ...

يَاسَمِين : ههههه ... فييقيي فييقييي رااك بدييتي كتحلميي عوتانيي

إيسا : اففف ماي شوگر داادييي امتاااش اتبااان تهنينييي من ريحت الفقرررر ...

اسبووع كان كااافي يخلييها تنساجم مع جو العمل و مع الممرضات لي معاها واخا بعض الاخطاء البسييطة دارت ولكن البنات و إيسا كانوا معاها و وجهوها و تعلمات من الاخطاء ...

★ليلة السبت ★

٭الساعة 18:25٭

فالسوبر ماركت لي قريب من الحي جارة كروسة قدامها و تلفون على ودنيها كانت بسيرڤيت رمادية سامبل فوق منو كويرة فالاسود ، و سبادري بيضة و شعرها مجموع شينيون للفوق ... الليوم قررات هي و البنات يدوزوو سامدي سوااغ مع بعضياتهم التلفون على ودنيها كتهدر مع البناات كيقولو ليها شنو تجيب معاها

يَاسَمِين : واااقوولو لياا شنو نجيييب رااه ضرت زووج مرات هاذ السوبر ضرونيي رجليي

البنات حاطين التلفون فوق الطبلة و دايرين هوت باغلوغ باش تسمعهم

إيسا : (مدابزة مع نيتفليكس كتقلب على الفيلم لي ايدوزو بيهم الليل ) جيييبيي معااك شييبسس ... ديااال الفرمااج ... جيبيي زووج ولاا ثلاثة

سماندرا : اااه و جيبي وحدة ديال الحاار

يَاسَمِين : (هزات شيبسات و حطاتهم) اهااه و شنوو اخر ...

حساات فحالا بشي واحد موراهاا ضاارت تشووف مالقات حتى واحد

سماندرا : اااه جااسميين عندااك تنسااي اكااجوو و داكشي لاخرر

يَاسَمِين : نوو نوو هزييتو هوو الاول ...

(كتحسس بشيي وااحد و خطواات قرااب منها وضارت عاوتاني دغياا و مابان ليها والوو ) نااريي البناات صاافي حماقيت

سماندرا / إيسا : علاااش مالكيي؟؟

يَاسَمِين : كنحسس بشيي واحد تابعنيي ( كتشوف موراها و فالارجاء) ولكن ماكانلقاا حتى وااحد

سماندرا : عااادي كتوقعع

إيسا : جاااسمييين رجعيي دغياا صاافي لقيييت الفيلم

يَاسَمِين : (بقات موسوسة كتشوف مور ضهرها) اففف صاافي انا شوية و نجييي

قطعات الاتصال و تاجهات لاكيس عينيها باقي كيشوفو فجنابها و لي داز من حداها كتبقا حاضياه خلصات المجموع و خرجات من السوبر

المسافة بين تما و الداار كانت قرييبة و كملات غير على رجليهااا

كانت الشمس بداات كتغرب ولون السماء كاان سااحر غادية فالطريق و عينيها على السحاب لي كيدوزو بالريح ...

بدات كتحس بالتبرزييط عاوتانيي و صوت الخطواات موراها كيتسمعوو قراااب تقلات المشية و ضارت شافت ماالقاات والو!!

يَاسَمِين :(ركباتها الخلعة) وااايااالااه ... نااري اياسمين اش هادشيي

رجعات كملات مسافة و بدات كتسمع المشيي ....

قلبها بدا كيزدح بالخعة ... مابقاتش قادرة تزعم تشوف موراها ... الخطوات كانوا متوازنين مع خطواتها حساتو فحال الظل ديالها كتحاول تشوف واش موراها خياال ماكيبان ليها والو ... كتسمع غير صوت النفس ... خافت لايكون شفار و زيرات بيديها على التلفون لي فجيبها و بدات كتزرررب فالمشييي الى تسرق ليها باش تشريه خاصها تسنا واحد الشهرين ولا كثر عاد تجمع ليه ...

بان ليها واحد الگروب قدامها مخلطيين ولاد و بنات بداات تزرررب و دخلات بيناتهم ... كلهم شافو فييهاا من ملامحها عرفوو بلي خايفاا ولا تابعها شي واحد ... كملوو المشيي دياالهم و تصرفوو عااديي كأنها وحدة منهم ... بقات غادية معاهم و كل مرة كضور تشوف مورااها ماباان ليهاا حتىى وااحد

تفرقات على الگروب ، شكراتهم و كملات طريقها

يَاسَمِين :(جااتها البكية) شنوو هاذ الرعب كاامل لي وليتي عاايشة فييه اياسميين !!! ماايمكنش هدشيي ...

كتهدر مع راسها فحاال الحمقة حتى كتوقف على صوت جاي من طوموبيل كيعيط بسميتها

شافت شكوون كان ستيڤ ... مخلوعة و منيرڤياا غيير بوحدها و ايزييد يكمل عليها بالتحكاار دياالو

ستيڤ : (زااد هبط الزاج ديال السرجم ) جااسميين !!

يَاسَمِين : (قربات لعندو كتهدر بزز منها ) ستييڤ !! هولاا!!

ستيڤ : بنتيي لياا متقلة !! يااله نوصلك فطريقي

يَاسَمِين : نوو ... مااشي موشكل ... قربت نوصل بلاا منعدبكك

ستيف : لااا مايمكنش ... و عاد ضلام الحاال ... غير طلعيي مااكاين حتى عدااب

يَاسَمِين : (فخاطرها : وااالااينيييي علكةة هااذ السيييد) لااا والله بغييت نتمشاا

بلا عگز علييه خرج من الطوموبيل جاي لعندها مااكرهااتش الارض تنشق و تبلعهاا ... مااافييهاا لي يهدر معاه و ماقادرااش على تقالتوو

ستيڤ : vale¡ ماابغيتيش طلعي هانا هبطتت ... كنت بغيت غيير نهدرو شوية ... ديما فالسبيطار مكنلقاكش !!...

يَاسَمِين : ها ؟ اااه كنكوون مشغوولة مع الخدمة دااكشيي علااش

ستيڤ : ههه ولاا كتهربيي مني ؟؟

يَاسَمِين :(طلعات فيه حاجبها) و علاااش غادي نهرب؟؟

ستيف : (خدا نفس عمييق و زفرو ... كيهدر و عينيها على عينيها ) جااسميين ... دييما كنبغيي نهدر يا إما كتصديني و لا كتخليني فوسط هدرتي و كتمشي ... من النهار الاول لي شفتك عجبتيينيي !! و بزااف ... زوينة و معقوولة !! و حتى اناا ماشي شي واحد ليي عزييز علييه التفلية ... الصراحة ماكرهتش لو كانت بناتنا شي علاقة ...

يَاسَمِين : (بقاات كتشوف فييه و هبطات عينيها للارض مدة و عاودات شافت فيه مااعندهااش مع الضوراان فالهدرة و لسقاتها لييه نيشان ) ستيف ... اناا تغربت على بلادنا و على دارنا و جيت لهنا ... غيير حطيت رجلي فإسبانيا تكرفصت بزاااف و خدمتيي ماتيسرااتش لياا من الاول ... جيت لهنا باش نخدم باش نلقا حياتي اخر اهتماماتي هو ندخل فعلاقة !! سمح لياا ماشيي نت السبب ولكن عندي اولويات و عندي مخططات مانقدر نخلي حتى حاجة تشوش علياا (إبتاسمات ليه من قلبها) سمح ليا بزااف ....

إنساحبات رجعات كملات طريقها و خلاتو واقف كيف كل مرة كتزرب عليه فهضرتها ماكايلقا باش يجاوبها ... بداا كيوعا بالقمعة لي عطاتو و الابتسامة لي كانت على وجهو بدات كتمحى شوية بشوية ولا كلوو عرقاان حتى بينو وبين راسو ماعرف مايقول ... ضار شاف فيها لقاها بعدات علييه .

القمعة بقاات كطلع و تنزل فييه ولكن حااول يتفهمها ...

رجع لطوموبيلتو باغي يهررب من دييك البلاصة باغيي يهرب حتى من راسو ... ضور السوارت و ديماراا الطوموبييل ... كيبغيي يزييد بالطوموبيل كيحس بشي حاجة كتبومبا !!! عاود ضورهاا نفس الشئ وقع !!!

نزل زدح الباب طل على الرواايض لقاهم مفشوووشيين !!!

ستيف : (ضرب الرواايض برجلييه كاااره) مزيااااان ... هدشيي ليي كااان ناااقص ... تفووو علىىى زهررر

جبدد التلفون من جيبو يعيط لديباناج و هو يطلع ليه ايمايل من المشفى !!!! دغيا دخل لييه ... كيقرا ويعااود حال فمووو ... صدمة مور صدمة بغا يضرب راسو مع الارض ... وصلو ايمايل فيه انه جااه انتقال من السبيطار لي هو فيه لواحد اخر !!!! ماقايلينش ليه لااا علااش لا كيفاااش

.....

وصلات للدار ماقدراتش طلع فالدروج ... الخلعة و السخفة كتحس بركابيها باقين كايڤيبريو ، طلعات فالاسانسير و تفكيرها كلو مع هاذ بزااف دالاحداث لي وقعو معاها فساعة ماكاملاش ... عقلها ولا كيتخربق ، تركيزها ولا مشتت كتقلب على تحليل منطقي لهادشي لي كيوقع ماعاها ماكاتلقا حتى جواب ، دماغها كيعطيها غير علامات الاستفهام ... و كتسول راسها واش هدشي كلو نحس ؟؟؟ .

تحل بيها المصعد و دخلات للدار كتلاقا مع سماندرا

سماندرا : جااسميين !! تعطلتيي!!!

يَاسَمِين :(حيدات جاكيتها وعلقاتها فالعلاقة لي فجنب الباب) اففف ... تلااييقيت مع ستيييڤ

إيسا : (سمعات الهدرة و جات كتجري خارجة لعندهم) ستييڤ؟؟ شنوو قلتوو؟ كوون جبتيه معاك اصاحبتيي

سماندرا : اوييلييي فيين غايجيي ... تحمستييي ا إيسااا

يَاسَمِين : (تخطاتهم داخلة للكوزينة) ماتسولوونييييش ماتسولونيييش

تبعاتها سماندرا تعاونها و إيسا طبعا ماكادخلش للكوزينة ، كيجبدو التقدية من لي ساشيي ... و قادو كل حاجة فبلاستها دارو لي شيبس فدي مول و المكسرات قادوهم فطيبيسلات و تاجهو للصالون ... النهار كان عندهم خاويي و ياسمين فاقت بكري تسارات فالارجاء شرات شي نواقص كانت محتاجاهم و فطريقها لقات سوبر صغيير كيبيع كلشي حلال و تقدات منووو ...

فرحااانة بخلصتها الاولىى خبات النص و النص الاخر سيفطات منو لماماها لي گاااع لي ابيل ديالها كتسولها فيهم غير واش تخلصات ولا باقي.... بداات كتصرف بيه بلا عقل .... صايبات مملحات منوعين كيشبعو العين قبل الكرش و الريحة كتشهييي ... و هي و سماندرا قادو طبيلة كتفتح الشهية ... زوج بلاطويات خشبيين فيهم فرماج احمر كاشير زليفات صغااار ديال الجبن ... زينون منوع ... طوماط سوغيز ...خيار مقطع دوائر صغااار ..... و الاخر فيه فواكه و عااد حدى إيسا محطوط زوج قرعات وحدة vodka والاخرى tequila و و طبسيل ديال الحامض .... طياب ياسمين كان متييول و عاد صايبات داكشي و هي مرتاحة و فرحانة بنهار عطلتها مع البنات ...

حطو الشيبساات فوق الطبلة و إيسا دغياا طارت على ديالهاا ... جلسوو على الفوتوي الكبيير كيتحل و كيولي فحلا الفراش مقابلين مع التلفازة

سماندرا جمعات حق ولدها لي كان جالس بعيد عليهم ملهي مع بيسيه

سماندرا : انخييل ياااله ا مامااا دخل لبيتك مع البيسي ديالك ... اليووم ايسهروو غير البنات

سد بيسيه وناض خدا من يديها و دخل لبيتو

و رجعات جلسات حدى البنات ياسمين فالوسط و فجنبها البنات ...

إيسا : valeeeeee¡ داابااا تبدااا السهرةةةة

يَاسَمِين : (فيديها زريعة كتاكل منها) اشمن فيلم ختاريتيي زويين ولا ؟؟

إيسا : هاذاا بااقيي جديييد فييه راين رينولدز اححح ممثلي المفضلللل

سماندرا : انااا عاارفة الافلاام دياالك ياااكماا شيي فيفتي شاايدسس (fifty shades)

يَاسَمِين : لاااا ماقادين لااعلى فيفتي شايدس ولا غيرو فهاذ البرد

إيسا : هههه كااالمااا هاذاا اكشننن

كان فيلم سميتو "Red notice"

هزات إيسا وحدة من القرعات لي كانو محطوطين وحلاتها فرحااانة بيها حيت شراتهم بفلوسها .... هزات كاس و كبات فيها عمرات النص ديالو و عطاتو لسماندرا لي شربات منو كتبنن و ياسمين غير كتشوف فيهم ... و كتقول مع راسها هاذ الحرام ماعرف كي داير مداقو...

و خوات لاخر ليها و عطات لياسمين كانيطتها دبال كوكا

إيسا : ههه هاكيي بايبي نتي سكري بموناضة

شداات كانيطتهاا و بدات السهرة كيتفرجوو فالفييلم و مرة يركزو معاه و مرة يبدااو يهدرو فمليووون موضوع فدقيقة وحدة . ياسميين حااولااات تنساجم معاهم تنسا عزلتها و تنسى حتى خوفها و رعبهاا . إيسابيل و سامي بقاو كاس مور كاس حتى سالاو القرعة اللولة و دخلوو فالثانية و ياسمين ضربات دوك البلاطوياات و كدوز ب بيبسيي و كتسمع لهدرتهم لي تقااالت بلاا ميهدروو غيير الشوفة فيهم و هوما كيتمايلو كتقتل بالضحك ...

★الساعة 2:30★

الفيلم الاول سالاا و خدم الفيلم الثانيي و هوما ماجايبين ليه خباار ... الطبلة ولا فوق منها غير الطباسل خااويين و شي زويتينات ... ماكاتسمعهش هدرتهم غيير الضحك ، إيسا و سماندرا عينيهم تعسلوو و السكرة بدات كتشد فيهم .... ولات لي جات على فمهم كيطلقوها بلا مايفكروو إيسا تزنگاات طلعات معاها الصهدة ونصلات الكابيش لي لابساا بقاات غيير بالسووتيان ...

إيسا : ههههه ... صااافييي انااا جاااوبت علىى كلشييي و عرفتوو ليي شوگر داديي لي دوزتت ... داابااا جاااسمييين

يَاسَمِين : نووو اناا غيرر عفييونيي ... شوفوو حالتكم البناات راه وليتو فحالا راشين عليكم فليطوكس

سماندرا :(شربات الجغمة اللخرة من كاسها) ههههه شنوو هو فلييطووكس

يَاسَمِين : اشداااني لشي سهييير اشدانييي

إيسا : شووووت ... شووووت ... صاافيي (كتقاد ملامح وجهها باش تبان جدية) جاسميين ... من قبييلة وحناا كنرغبووك ... بور فافوور شنوو قااليك ستييڤ فاش تلاقيتوو

سماندرا : سييي عاااودي ليينااا

يَاسَمِين : (شافت فيهم و حدة وحدة) دااباا مامفاكينش ياكوو

إيسا / سماندرا : نووووو

يَاسَمِين : ااففف valeeee¡ (ربعات رجليها فوق الكانابيي) قاالييك كنعجبووو بزاااف و مااكرهش نكونو بزوج فعلاقة !

إيسا : كنتتتت عاارفااااا ... و بااش جاوبتييه؟؟؟

سماندرا : بااين اتكون قاالت ليه بلاااتيي حتىى نفكر و نجاوبك ...

يَاسَمِين : هاا؟؟ و فااش انفكر بالسلاامة جيتو نيشاان وقلت ليه (ضربات يد بيد) نوووو

إيسا و سماندرا بقاو كيشوفوو فيهاا و هوما يطرطقوو بالضحك!!! وحدة تكات على وحدة كيضحكو حتى دمعو عينيهم و ياسمين غيير كتشوفيهم ... مخهم سكر اي حاجة سمعوها ولات كتجيهم كضحك .

إيسا : (كتمسح دموعها) ههههه قلتيي لااا للدوكتوور دياالناا

سماندرا : ههههه جاااسمييين رااه ستييڤ !!! ستييييڤ ... الجينتل ماااان ستيييڤ

إيسا : مااشفتييهش كفااش كان كيشووفيك نهار سخفتيي ... عيينييه كانوا كيخرجو الحببب و الحنااان ...

سماندرا : الصراااحة إنساان مزياان و تتمناه اي وحدة ... بخدمتوو بداارووو ولد الناااس ظريييف !! ونتيي قلتيي ليه لااا

يَاسَمِين : هااء والى عجبكم خوودووه نتوماا

سماندرا : ولكنن هوو بغااك نتييي ... بغاا جااسمييين

إيسا : كوون كاان شوگر دااديي كوون خديتوو ليك هههه

يَاسَمِين : نووو ... ماعرفتش علااش مااارتاحيتش لييه ... وعااد اناا مسلمة و خااصنيي نتزوج بواحد مسلم فحااليي

إيسا : زواااج ؟؟؟ اشمن زوااج ؟؟

سماندرا : اااش بغيتي ديري بشي زوااج ونتي بااقة صغيرة؟؟

إيساا : مااشيي ضروري زواااج ... غيير تصااحبووو (هزات القرعة عنقاتها) و تحاابووو ... اتكونوو كوبل زوييين ... مااعندك مااديري بالزوااج عييشيي الحببب رااه البرد جاااي تلقااي شكوون يسخنكك ..

يَاسَمِين : ههههه الله يخلف على المانطاات دايرين معاياا بيييخيير ... و عاد زيد عليها السيد رطبب ... رطب بزااااف ماايجينييش اناا... حنااا المغربياات عزييز علييناا الحرووشية يقوولييك وقفيي توقفييي!! اما هاذا مسكين كنحس بيه فحالي فحالو...

سماندرا : valeee نتييي عزييز علييك النوع العنيييف ههههه

إيسا : ههههه النووع ليي شدها من شعرهااا ...ضيَّعتيي احلىى فرييزةة فالسبيطاار اجااسميين

يَاسَمِين : هههه انااا ماعندييش مع الفريييز كيعجبنيي الأنانااااس اححح حرشة من برة و حلووووة من من الداخل

.....

إيسا : (شربات من القرعة نييشاان) اناااا بغييتو شوووگر داادي .... لي يعيشنيي برانسييسا اي حاجة تحضر قبل مانحل عليها فميي ... نشبع سااعات رولييكس و يديي عاامررين خواتم دايموند... زووج فييراريي مااشي غيير وحدة و يكوونوو فالحمرر و كل وحدة بالشيفوور ديالها ... ڤيلاا ديالي بوووحديي ... فييهاا جااكووزيي و بييسين كبيير ... قاعة ديال البووليينغ و خداماات ضايرين بياا ... كل ويكاند نمشي لنيويورك ندوزوو غيير شوبينگ

(ياسمين و سماندرا كيسمعو لهدرتها و كل وحدة كتخايل الواقع لي كتمناه لراسها)

ههه و ماغانساكووومش بليي كادووو ... انااا بغييت نتمتع فهااذ الحياااة و نلعبب بالفلووس كيييف بغيت ... بغييت نشريي حواايج و ننساا انني شرييتهم بغييت نشريي حوايج ونهزهم بلاا منحتاج نشووف التمن (عاودات شربات من قرعتها) بغييت نغررق فلوووس

يَاسَمِين : انا بغييت غير حياة ساامبل مع راجل يكون كنبغييه و كيبغيني نعيشوو الحمااق نلقا فييه الاب لي كنت محتاجة حياتيي كااملة

سماندرا :(تنهدات) اناا بغييت غييير ولدي يقرااا و يكون عندو مستقبل حسنن من الواقع لي هو فييه

إيسا : دااابااا هااهو قراا و كبرر و دااار مستقبلل زوييين ... الى تزوج ايعقل عليك ؟؟ اتجيي شيي وحدة اديي لييك ولدك ونتي اتبقاي جالسة هناا يبقا يجي يطل عليك غير فكريسماس ... لقااي حتى نتي شي شوگر دادي هههه

يَاسَمِين : اختيييي ماعرفت اش عاجبك فهاذ الشرَّاااف (شافت فسماندرا) لاا عنداا انخييل عمرو ينسااك واخا يتزوج ... راك نتيي لي ربيتييه و كبرتييه و كنتي ماماه و باباه و راه شاف كلشي على عينيه كيلقاك غيير نتي فجنبوو

سماندرا : الىى كاان ايبعد علياا و هو مرتااح فحياتو وكلشي موفر لييه غيير يمشيي المهم عندي هو يكون مرتاااح

إيسا : سماندرا مامي ... يااك حناا صحااباات من شحاال هذيي ياااك ... و عشرة طويييلة ... و صحاباااات مادوزنااش قلييل ... و هااا جاسمين حتى هيي تزادت علينا و ولينا ثلااثييي ... يااك

سماندرا :(شربات من كاسها) سيييي و نتووماا احسنن صحااباات فالكَووون

يَاسَمِين : (تأثرات) اوووه ... هاانتوماا اتبكيوني عاوتانيييي

إيسا : نوو بب ماشيي وقت البكاا ... سماااندرااا ... يااك دييماا كنسولك علىى بابات انخيلل و ماكاتبغييش تجاوبينيي ... بور فاڤوور قولي ليينا ... الىى مااعاودتييش لينا اليووم صاافييي ... انتخااصم معااك !!!

سماندرا : اووووف هااذ القصة غيير كضرني فقلبيي ا إيساا

يَاسَمِين : غيير عاوديي ليناا ... حناا هناا معااك

إيسا : هههه غيير عاوديي مع السكرة قلبك ماغايضركش بزااف

سماندرا : (مدة وهي مغطية وجهها بيديها عاد نطقات) اففف ... علااش بغيتو تفكروني فييه علااش ... valee¡ ... باباات انخييل كاان كلياان وفي فواحد البار كنت خدامة فييه ... كان من المستييحيل اي وحدة شافتو مايثيرهاش ، شخصية كااريزماتيك و جداابة و كان كيباان لاااباااس علييه ... فالاول كانت غير علاقة زبوون و بارميطة يعنيي كيبقاا سواايع طوااال وهو فالكوان ديالو الخااص شوية ولا كيطلب مني كيطلب منيي نجلس معااه و نونسوو (كتهدر و تبتاسم) حتىى تطوراات الاموور بيناتناا ... (شافت فالبنات لي متبعييين معاها) مانكدبش عليكم البنااات معاه كنت كنحس براسيي فعاالم آخر واخاا كاان عربيي ولكن عشت معااه فوووق السحااب

يَاسَمِين : مغريبي؟؟؟

سماندرا : نووو ... ماشي مغريبي (غمضات عينيها كتفكر) توونسييي

إيسا : (معنقا قرعتها ) كمليييي لينااا شنوو وقع

سماندرا : بقييناا مع بعض لمدة 3 سنين ثلث سنييين ديال الحب و الرومانسيه ... ولكن ... ولكن حيااتوو كاانت غااامضة ديييك المدة كااملة ماكنت كنعرف عليه والووو ... حتى من سميتوو مااعرفتش وااش حقييقية ولا لااا ... كنت كنسولو على عائلتو واش عندو خووت ... هههه كانت غير بوسة وحدة كدوخنيي و كنساا على شنوو سولتوو ... كانت كتجيه اتصالات من ارقاام مجهوولة ... و حتى الرقم لي كان عطاني كيكون ديسبونيبل غيير فشي اوقاات... الصرااحة بدييت كنخااف و بدييت كنرد البال

يَاسَمِين : شنوو زعما كاان مافيووزي؟؟

سماندرا : ماااعرفتششش !!

إيسا : اوووف واااكملييليي

سماندرا : صاافييي فواحد النهاار كنتابه بلي لي غيگل تعطلوو علياا ... شكيت وشريت التيست و درتو و طلعت حااملة ... اففف فدييك الليلة نييت تااصلت بييه ... و جااا لعندي و قلت لييه انا وياه ايولي عندنا بايبي ...

يَاسَمِين : (قربات تبكي) اهاه و باش جاوبك ؟؟

سماندرا : قاال لياا نزلييه ! بهاذ البساطة قاليا نزلييه ... خدمتو و حياتو مايسمحوش ليه انه يكون عندو ولد !! والى بغييت نبقاا معااه خاصني نطيح الولد!!

إيسا / يَاسَمِين : حيواااااان !!!

سماندرا : و اناا طبعااا رفضت و ختارييت ولديي و نعييش مع ولدي ... بقييت من باار لبااار حتىى خدمت فالسبيطار و هاانا دااباا معاكم (مسحات دمعة نزلات على خدها) الصراحةة كنت كنبغييه بزاااف و كنت كنحلمم بمستقبليي معااه و حتىى هو كنت كنحس انه كيبغينيي

يَاسَمِين : كوون كااان كيبغييييك مايقولش لييك طيحيي لي فكرشك

إيسا : و من تماا ماعاودش سول فييك ؟؟ والا حتى فولدو؟؟

سماندرا : نوووو

يَاسَمِين : تفووو ... خلااتهاا جداتييي الرجااال كلهم مسگيين من مغرفة وحدة كلهم گنس وااحد

إيسا :هادشي علاش انا ختاريت نبغي الفلووس بلاست الرجاال ... الفلوس غيير كيفرحوك و يدلعوك و يوفرو ليك احتياجاتك ...

سماندرا : صاافيي سدوو علياا هااذ الموضووع ... جريتوو putas ليا لساانيي

إيسا :(كتشوف قدامها) هههه البنااات ... علاااش الحييط لي قداامناا كيتحررك

سماندرا : (شافت فالحييط) نااريييي ... عاااندااك يطييح علينا

ياسمين كتشوف فيهم عينيهم تجبدوووو و ولاو حمرييين هدرتهم زااادت تقالت

يَاسَمِين : صاافي البناات جبتوو الكاو ... نوووضو نوضو تنعسوو (هزات تلفونها لقاتها قريبة الربعة) نووضوو رااه شركناا الليل مع النهاار

إيسا : (عنقاتها من دراعها) نووو مااسخييتش بييكم

سماندرا : (كتحاول تنوض ) اناا خااصنيي نعسس صاافيي وليت كنشوف شي حوايج ماكاينينش .... بااااي

وقفات كدير خطوة كتستاراح و دير خطوة اخرىى ... بقاات غادة مكالياا مع الحيط حتى خرجات من الصالون .

ياسمين بقات متبعاها بالعين حتى سمعات باب ديال بيتها تسد

ضارت تشوف فإيسا لقاتها تكورات نعسات فوق الفوتوي نيت قاداتها فبلاستها و غطاتها ...

.....

حتى هي دااخت بالنعاس ولكن شافت الروينة لي فوق الطبلة اتبقا مبرزطة معاها ... جمعاتها غسلات الماعن و قادات كل حاجة بلاستها و مشات لبيتها غيير تلاحت فوق الفراش دغيا دخلات فساابع نومة ....

٭اليوم الموالي٭

وصلاات الوحدة ديال النهار وهي عاااد كتحل عينيها ... معنكشة فالنعسة و شعرها مغطي ليها وجهها ...بدات كتنيين راسها كيحرقهاا و ضهرها عاطيها الصدااع . تقلبات على جنبها كتقلب عللى تلفونها فوق الكومودينو مالقاتوش ... حتى كتحس بشي حاجة حدى رجليها باردة عرفاتو التلفون وبدات كدفعو غيير برجليها حتى وصلات ليديها شعلاتو شافت الساعة و رماتو من يديها .

يَاسَمِين : (صوتها مدعدع بالنعاس) واااميمتي راسييي ... فحالاا اناا لي ضاربة دوك زووج قراعيي ... (تقادات فجلستها و كتحيد خصلات شعرها من على وجهها كتشوف فالمراية لي مقابلة معاها) اففف على حالة

ناضت من فراشها خارجة من بيتها كتجر فرجليها ... السهاااات فالدار حتى من انخيل فاق و مشا عند صاحبو ... مشات للدوش نصلات حوايجها و دخلات تحت الرشاشة بلا ماتشوف طلقات عليها الما بااارد و هيي تقفززز كون ما تكالاتش مع الباب كانت اتجيب الربحة

يَاسَمِين : واااهيااا سيديي حمادا موسىىىىى كنت انجيي على ك*ريييي ... تفوووو صبااحتتوو الله

دغياا سداات الماء بدات كترعد تبورشاات ... طلقات الماء دااافي طولااات فالدوش خدااات راحتهاا و فركاات راسها بالكييس توحشاات الحمامات والسخونية ديال البرمة ... خرجاات كتشعل لوات عليها فوطة فالموڤ وفحالها صغيورة على راسها ... رجعات لبيتها هزات بيجامة فالبيج فيها نجيمات فالقهوي بالقب سخيخنة شوية ... دهنات لحمهاا و تعطراات كدلع راسها ولات فحال البايبي ... هزاات مشطتها و تقابلات مع المراية ...

كتمشط فشعرها الطوييل ليي هملاتو ... من نهار وصلات مابقاتش كتهتم براسها كيف الاول

يَاسَمِين : غييير سمح لياا اشعرييي مابقييتش كانديها فييك ... بففف خااصني نقطع لي بوانت شعريي ولاا كلووو مگرض ...(حبسات المشيط و بدات كتقيس فحناكها) حتىى نت اوجهيي غيير سمح لياا ... نااري ايااسميين ضعافيتييي (عطات للمراية بالضهر وبدات كتشوف) الحمدلله نتيي اطرمتي باقة بلاصتك ... ليخلف على عماتي ورتنا منكم غير النحس وبانكة تنسيك فختها ....

رجعات هزات صيروم دهنات بيه شعرها و نشفاتو بسيشوار رجع كيلمعع و مسبسب و واخا هاكذااك ما قنعهاش ... جمعاتو ديل حصان للتحت مرخووفة ... رطبات وجهها و دارت گلوص ديالها ... جمعات روينتها و بقات كتشوف فجنابها ... كرشها كتغوت بالجوع عااد وعات معاها ... تشهات رغيفاات و بطبووط معسليين مالقات ليهم جهد ... توحشات الفطوور المغربي اتااي مششحر بالنعناع و مرة بالشييبة كان كيسخنها فهاذ البرد توحشات خبز ديال الدار مصايب من يد جداتها ... تتنهداات و مشات الكوزينة توجد فطور الزوافرية ......

صايبات نيسكافي و طوصط فيه فرمااج كتفطر و كيف العادة التلفون فيديها كتقلب على شي مسلسل دوز بيه النهاار ماالقااتش ... الداار بااقي فيها السهات البنات باقيين طايحين دودة البارح دارو سكرة عااالمية

رجعات لبيتها كتأفأف اطرطق بالقنط

يَاسَمِين : (كطل من السرجم كانت الزنقة كتصفرررر الأحد مااكاين حد كلشي مخشي فدارو كيرتاح ) نااري علىى قنططط ... شنوو زعما نخرج نضرب دويرة ؟؟ لااا اياسميين فيين اتخرجيي بووحدك يمشيي يتبعك شيي وااحد عاوتانيي ...

عمرها كانت تخاف انها تخرج بوحدها حتال داباا ... كانت كتخرج فالليل و ضرب مسافات غير بوحدها و هي مرتااحة ، اماا دابا ولا الرعب كيتحكم فيها .... حتى من صوت الطوموبيلاات مكسيريين ولات كتكرهو . ابسط الحاجات ولاو كيفزعوها و ولات كدير اطونسون من اي واحد و من اي حاجة .

★الساعة 16:00★

مربعة رجليها فوق فراشها ... فجنبها بلاطو فيه طبسيل موكول منو ديال ماقارونية بالبيشامييل و الطون و بيبسي ... البنات فاقو كيضربوهم الحيوط راسهم ايتفرق عليهم ، حتى هوما تغداو شربو كينة و عاودو رجعو نعسو . مرركزة مع ظفارها كتسبغهم و ليكيت فودنيها كتسمع لسعد المجرد و كدندن معااه ....

كتقطع الأغنية و تلفونها بدا كيصوني شافت شكون لقاتها ماماها ... سدات الفيرني و دوزات الخط ...

يَاسَمِين : ااالوو ماماا

خديجة : ياااسميين ... االوو

يَاسَمِين :(كتسوط على الظفارها) وااه ماما لاابااس علييك ؟؟

خديجة : لااابااس لاابااس ... مااخداماش اليووم ؟؟

يَاسَمِين : لااا اليووم رااحة ... نتي بيخيير ... صحيحتك مزيانة؟؟

خديجة : بييخيير غيير هو خووك مسكيين ...

يَاسَمِين : (تنهدات) مااالوو مسكيين ماااالووو يااكماا خااصو شيي سبرديلة اخرى ولاا تيليفون؟؟

خديجة : واارااك عاارفة البرد ... ترووَّح مسكيين ... شداتوو سخاانة صعيييبة و تنفخوو ليه الحلااقم و كرشوو جرااات علييه وخااص ندييه للطبييب و نشريي لييه الدواا

يَاسَمِين : مسكيين الله يشافييه ... بااه مااكاينش ليي يدييه للطبيب ؟؟

خديجة : واارااه عاارفة حماد الحركة عياانة عندو فالحانووت

يَاسَمِين : وااا الله يهدييك اماما الله يهدييك ... رااني غييير يااسمين الفرملية مااشي منيي المااليييك ... واراه عاد سيفطت ليك البارح ... اماماا رااه يقدووكم !!

خديجة : الله يرضيي علييك ابنتيي رااه خووك مسكيين هاانتيي سمعيي ... سمعيي هاهو كيحكب قرجوطتوو تحردات لييه مسكيين

يَاسَمِين : واارااه اناا ليي جييبي تحرد اماماا !!! ... الفلوس لي عندي ياله نكمل بيهم هاذ الشهر و عااد زيد الكراا وافهمينيي ..!

خديجة : اايييه ... بنت خاالتك سناء ... عرفتييهاا ... هاذيك ليي فبلجيكة ... كللل شهرر كتسيفط لمها المصرووف ديالل التقديااا و الكسوة ديال مها و باهاا و خووتهاا الله يحجبها لواليديها وصاف

يَاسَمِين : (تصدمات) هاا؟؟ اواا هاذييك راه محاااميةة اما اناا غيير كنخرج البعالك من حشاشن ماواتهم

خديجة : هاا؟؟

يَاسَمِين : بدليي ساعة اخرى اماما ... حتى نشووف كيندير الى لقيت شي حاجة نسيفطها لييك

خديجة : سييريي الله يرضيي علييك ابنتيي ... الله يسگمم سعدككك

قطعاات عليهاا نترات الكيت من ودنييهاا و هاذ الابيل فكرااتها فالماضي ديالها لي عمرها حسات بيه بحب ماماها و خوف ماماها عليها فاش كتمرض جداتها هي الوحيييدة لي كانت كترد ليها البال و تهلا فيها ....

ديماا من بعد كل ابيل معاها كتسالي بقلبها محروووق ... وااخا عاارفة طبعها و حفضات تصرفاتها معاها ولكن كل مرة كتقول هااهي اتسوول فياا و فأحواليي ولكنن غيير كتصدمهاا ... ماشي رافضة فكرة انها تصيفط لفلوس باش يداوا خوها او غيرانة منو حيت لقا الاهتمام لي مالقاش هي بالعكس ... المشكل هو ان ديماا سميتها لاسقة حداها كلمة المصروف .... اما باباها منهار جاات ماتاصلش بيها فمرة و حتى هي مازعماتش تعيط ليه .

يَاسَمِين : وااخاا ديري ليي درتيي ويدوز عليك لي عمرو داز على شي واحد اياسميين عمرهم يحنوو ....

ملامحها دغيا غطا عليهم الحزن ولات فحال وردة اليَاسَمِين دابلة ... عينيها تجمعو فيهم الدموع ولكن رااافضة تنزلهم ، شافت فالبلاطو لي حداها شاهيتها مشااات ... شافت فظفارها مسبوغين بالگرونة جااها مع لون بشرتها البيضة كيحمقق ولكن مااحلاش ليها !! فجأة كلشي ولا كيبان ليها رمادي ...

ناضت هزات البلاطو للكوزينة ... حتى من السكات لي فالدار اليوم زاد كمل عليها ، الملل ديال نهار الاحد و زادت كملات عليها الآبيل ... هزات شيبس من لي بقاو البارح و رجعات لبيتها تجبدات فبلاستها ... كتاكل و تفكر فالسينتة ديال حياتها كااملة حتى داتها عينيها ...

يتبع...