جزاء وعد الجزء العاشر

الدنيا دارت بيها وهي كاتشوف فحياة كيفاش كاتهضر عادي بحالا مدايراهاش قد راسها... زعما راه عارفة مزيان حوايج باها شحال غاليين عليها و شحال من حاجة مافرطاتش فيها حيت كاتشم فيها ريحتو و تتفكرو بيها...

قلبها ضرب بالجهد كاتحس بالصهدة طالعة معاها مابقات تسوقات لا لنبيل لا لمو لي غادي يديو خبارهم و يحضرو لخصامهم....

وعد (غوتات بدون شعور) : كيفاااااااش بعتيييه علاااش بعتيه"عروق عنقها تنفخو بالغوات" معااااااامن تشاورتي

حياة (مارضاتش قدام النساب ماكرهاتش الأرض تشق و تبلعها.... قسحات الشوفة فوعد و ردات بحدة) : نزلييييي صوتك البرهوووشة راااه مك هادي لي كاتغوتي عليييها

وعد (ماتسوقاتش لكلامها) : وااااااا جاااااوبيني جااااوبي اش وصلك لموطور باااا حتى تبيعيه

نبيل (شدها من دراعها مني شافها كلها كاترعد ) :وعد تهدني و براكة من لغوات گلسو و هضرو بالعقل

وعد (تنترات منو و نطقات باستهزاء) : لعقل اشمن عقل بقى ليااااا مني نجي ماااانلقاش موطور بااااا بلاااااصتو

حياة (بانفعال) : قجقاااااااالة معمرة علياااااا الدروج اش غاتبقى دير تما وقتما نبغي نسيق نبدا نحوول فييه من بلاصة لبلاصة "ضربات يدها مع بعضياتهم" بعتوووو صافي مابقى موطور غوااااتك دابا مغاديش يردو كيييييماااا بكااااك مااردش....

سكتات حابسة لكلام فحلقها مني حسات بيه فين غادي يديها ساعة فات لفوت وعد فهمات لمعنى و جاوباتها بعيون محقونين فيهم الدموع...

وعد : كملي علاش سكتي قوولي ليا بكاك مااردش بااااك و غوااااتك مغاديش يرد لموطور "ضربات على صدرها بحرقة و نزلو دموعها" بكيييت على با بااااش نبرد قلبي لي مابردش لدابا ماااشي باااش نردو و غوووت على قبل الموطور حييت ماعندكش الحق تبيعيه ولا تقربي ليه، ذكرى منو ماااتحاديهااااش "بشهقة" مني متقل علييك عيطي ليا نجي نديه و مات قر بيش ل يه

ماقدراتش تكمل كلامها بسبب شهقاتها و دموعها لي نزلو كايتسابقو على خدها خلات نبيل و لطيفة يشوفو فيها بأسى و حياة كاتعض على فمها مراضياش و مغددة....

لطيفة (قربات عند حياة قبل ماتقول شي كلمة أخرى ) : تهدني احياة البنت مزال صغيرة و ربي لي عالم بيها

حياة (گلسات فوق السداري محاملاش راسها) : مافيها باس مافيها باس

نبيل (عنق وعد من كتفها) : شششش وعد

وعد (حدرات راسها كاتمسح دموعها بيدين كايرجفو) : بغيت نمشي لدار

نبيل (تنهد و هز راسو فمو) : لواليدة ياله نمشيو

لطيفة (برفض) : مانخرجوش و نخليو لخواطر خاسرة... بنتي وعد هادي كاتبقى مك تهدنو و تفاهمو بالعقل

سكتات وعد حادرة راسها كاتبكي و نبيل كايطبطب عليها ماباغيش يدخل و يضغط على وعد تبقى بزز حتى تصفي خاطرها مع مها حيت بانت ليه حالتها ماتسمحش وهي كلها كاترعد و تبكي... زيد عليها طاير ليه من جهة حياة من نهار لپيلول لي باقة مابغات تسرط ليه...

نبيل(شاف فمو و نطق بجدية) : من الاحسن نبدلو ساعة بأخرى حتى يتهدنو بجوج و يهضرو

لطيفة :ولكن

حياة(قاطعاتها) : غير سيرو الالة لطيفة مافيها باس نتلاقاو فساعة أخرى ديال الخير

لطيفة (ناضت كاتستغفر الله هازة معاها صاك وعد و سلمات على حياة) : ماتقلقيش عليها كاتبقى كبدتك ، ديري نهار ولا يومين وجي عندنا تصالحو و تصفيو لخواطر

حياة : ان شاء الله

نزلات معاها حتى لتحت كاتشوف فوعد راكبة حدا نبيل و حادرة راسها باينة باقة كاتبكي.. هاد الأخيرة مني نزلات مع الدروج عاودات شافة فالجهة فين كان الموطور و نزلاتهم على خدودها حااريين كاتبكي بحالا عاد دفنات باها....

ركبات معاهم لطيفة و نطالقو بصمت كايتسمعو غير شهقات وعد مرة مرة.. خلاوها على خاطرها حتى وصلو لدار ، مع حل نبيل لباب طلعات كاطير فالدروج خلاتهم غير كاايشوفو..

لطيفة : استغفر الله العظيم... كاتقطع فالقلب مسكينة النهار كامل وهي فرحانة فاللخر هجراتو

نبيل (زفر طالع ليه الدم) : هاد مها فيها الخفة

لطيفة : حتى هي ماعليها لوومة أولدي يقدر يكون الموطور بالصح عنكشها تما و حيداتو ،دابا راه كتر من عام وهو محطوط فالدروج غايكون صدى " حطات يدها على دراعو" سير دابا هدن مراتك، مسكينة مكاتصبرش على لحاجة ديال باها

نبيل : اش غاتصبر الواليدة وهي جايبة معاها شي حوايج ديالو دايراهم فميكة و حاطاهم عندنا فالماريو قالت ليا كانشم فيهم ريحتو...

لطيفة(تنهدات) : اييه اوليدي البنت مني كاتلقى باها حنين فيها نهار كايفارقها ربي بوحدو لي كايكون عالم بيها

نبيل : الله يرحمو... انا غانطلع عندها

لطيفة : سير أولدي سير الله يهدي ما خلق

طلع عندها كايمسح على وجهو حتى وصل قدام لبيت... ما جا فين يحل لباب كانت سبقاتو و حلاتو مبدلة حوايجها و حادرة راسها باينة فيها مزال كاتبكي... بغات تخطاه بلا ماتنطق وهو يحبسها

نبيل : فين غادية

وعد (بصوت مخنوق) : نطلع لسطح نتنفس شوية

نبيل : بلاتي نبدل عليا و نطلعو بجوج

وعد ( هزات فيه عينيها الحمرين و نطقات شفايفها كايرجفو) : نبيل بغيت نبقى بوحدي شوية

مني كانفقدو شي واحد خصوصا من لواليدين راه كانبغيو اي حاجة نشمو فيها ريحتهم و مانتخلاوش عليها ، مابغيتش نقول نتفكروهم بيها حيت هما اصلا مكايحيدوش من بالنا و كانخممو فيهم ليل و نهار و كايزورونا حتى فأحلامنا... هادشي يقدر مايفهموش شخص عمرو جرب الفقد و طاح فنفس الموقف ولكن لي فقد العزيز عليه اكيد غادي تكون عندو حاجة ولا حوايج يلمسهم و يشمهم بحالا كاايشم ففقيدو....

وعد بكثرة تعلقها بباها بعض لحوايج خاصين بيه ماقدراتش تفرط فيهم، لحوايج لي كان كايلبس بزاف جمعاتهم و داتهم معاها لدارها و داكشي لي بقى صدقوه... و بالنسبة لموطور كانت حياة شحال هادي باغة تخرجو تبيعو مني كانو محتاجين و وعد رفضات و نوضاتها معاها هذاك النهار حتى خلاتو بزز منها.... و دابا خلاتها حتى غبرات و مشات باعتو بلا شوارها.. هادشي لي كايطلع و ينزل فوعد مابغاش يتسرط ليها كون غير مفايتش ليهم هضرو فموضوع لموطور كون بردات شوية، دابا جاتها حياة بحالا دارتها ليها بلعاني...

لي شاف حالة وعد دابا يقول زادت فيه و كبرات الموضوع وهي الله بوحدو لي عالم بحالها و اشنو فقلبها.. داك الموطور كان عزيز عند باها، ما شراه حتى خرجو عينيه و دوز عندو سنين كثيرة مني كبرات وهي عاقلة عليه عندو... شحال ركبها فوقو و تسارة بيها ، كان كايوصلها بيه شي مرات لمدرسة... واحد الحاجة كانت عزيزة عند باها كيفاش ماتعزازش عليها حتى هي... بكات حتى تنفخو عينيها و الريح كايطير شعرها لي كانت طالقاه باش يدفيها...

ستغفرات الله فسرها و نزلات من السطح بعد ما دخل معاها لبرد مع آذان المغرب، هبطات لبيت توضات و صلاة عاد نزلات لتحت لقات نبيل گالس قدام الطاجين لي كانت طيبات ليه كياكل و يتبنن، غير دخلات عندو بتاسم ليها و طبطب حداه...

نبيل : اجي حدايا اجي... هاد الطاجين جا بنين بحال ديما.. غير طليت عليه شهاني ماقدرتش نصبر حتى ليل عاد ناكلو

وعد (بابتسامة دابلة) : بالصحة والراحة

لطيفة : يدها بنينة فالطياب تبارك الله عليها

وعد : لهلا يخطيك اخالتي

جلسو كايجبدوها بالهضرة باش تفك التغوبيشة شوية... ماجبدوش ليها حياة بالمرة هاد الأخيرة غير خرجو ناضت كاتجمع فالطبلة و تسووط حتى سمعات الدقان تاني وهي تنطق بتذمر....

حياة : نسااااات شي معيوورة مقالتهاش لياااا "طلات من الشرجم" هادي نتي بلاتي نلوح ليك الساروت

لاحت الساروت لنعيمة لي كانت واقفة لتحت، حلات لباب و طلعات لقاتها كاتحول لماعن من لبيت لكوزينة.... دخلات كاتعاون فيها و نطقات بقلق

نعيمة : اش وقع گبيلة؟؟ تميت جاية نسلم على وعد أتا سمعت غواتها.. ياك شي باس مكاين

حياة (قالبة وجهها) : باااينة علاش طلقات عليا حلوقها مشوهاني مع ناسها

نعيمة (شهقات) : عرفااااتك بعتي لموتور؟؟

حياة : اممم

نعيمة : اش اتا گلت ليك؟ ياك گلت ليك خليه راه بنتك مغاتبيش تبيعيه

حياة (دارت يديها على جنابها) : اش غايبقى يدير عندي هنااااا غير قولي ليا محطوط فالدرووج بااااطييلة ماعندو حتى منفعة غير موسخ الدنيا..

نعيمة : واخا احياة نتي عارفة بنتك

حياة : بنتي زااادت فيييه غا حشمت گدام راجلها اما كون جريت بوها من شعرها نوريها لغوات بشحال كايطلع شكووون لي والد لاخر انا ولا هي

نعيمة : نتي نتي هي بردي صافي

حياة (بعصبية) : واااش مول لموطور و مات دفناه تحت التراب لموطور ديالو اش غايزيدنا يبقى مقلز ليا تما بلا فايدة

نعيمة : لا حول ولا قوة الا بالله

حياة : شوهاتني معاهم ماعرفاتش تخلي حتى نكونو بيناتنا عاد تهضر داااو عيبنا

نعيمة : لمصارن فالكرش و تايضاربو.. هاديك بنتك ونتي مها بيتو تقلقو نهار يومين و ترجعو دويو ان شاء الله غير بردي السوق و ديري لما منين يدوز

حياة (هزات الطبسيل بالنترة) : اودي ندمت لاش عرضت عليهم كون مشيت انا عندهم ماتشوف والو

نعيمة : كانت غا تشوفو غا تشوفو إلى ماشي اليوم راه نهار خور.. زيدي نجمعو هادشي و غسلي لماعن و نزلي عندي راني دايرة الحريرة دفي بيها عظيماتك

دارت اشنو قالت ليها نعيمة و نزلات عندها تعشى معاهم حسن ماتبقى بوحدها...

نفس الشيء كان عند وعد لي گلسات مع نبيل ومو كايتعشاو مجمعين وهي غير كاتنقب ماعندها خاطر، صافي ضاع ليها النهار و مابقات حاملة دير حتى حاجة.. خاطرها مزير و قلبها حزين، دارت غير بحالا كتاكل حتى سالاو و ناضت جمعات الطبلة مع سعاد ومن تما طلعات لبيتها مخلية نبيل مزال گالس مع مو.... غسلات سنانها و دخلات ففراشها عاطية لبلاصتو بالظهر كل شوية تنهد حتى سمعاتو دخل كايدور فالبيت حتى دخل وراها فالفراش... بدون ما ينطق بكلمة مد يدو لخصرها بعد ما لصق عليها من اللور كايتحسس جسمها حتى وصل لصدرها وهو يزير عليه حتى قفزات و نطقات

وعد(بتوتر) : ن ب ي ل

نبيل (خشا راسو فعنقها) : حبيبة ديالي

وعد (ضارت عندو عينيها مغرغرين) : مافياش والله ماعندي لخاطر لحتى حاجة

نبيل (دوز يدو على خدها) : نجيبو دابا هاد لخاطر احبيبة

وعد (تنهدات) : ماقدرتش نسا اشنو طرا اليوم

نبيل ( كايشوف فشفايفها) : أنا نسيك

وعد (حدرات عينيها) : خليها حتى لغدا

هز ليها راسها ياله غادي تكمل كلامها كان سكتها بفمو لي تحط على فمها ياله بااغي يغرق فالبوسة و هي تبعد عليها و ناضت گلسات متكية على كادر الناموسية كاتسوط

وعد : نبيل فهمني

نبيل (زفر) : واخا اوعد كلشي بالخاطر "طفا الضو من حداه" نعسي رتاحي تصبحي على خير

شافت فيه فالظلام و مجاوباتوش شافتو عطاها بالظهر و غمض عينيه، بقات على نفس وضعيتها كاتبقشش فتليفونها طايح عليها الضيم... دخلات لفيديوات على فقدان الاب منهم لي كايعاودو على باواتهم و منهم لي فيهم الشعر و منهم اغاني.... كادوز من فيديو لفيديو و دموعها مسيقين وجهها دارت يديها على فمها باش تكتم شهقاتها و ماتفيقوش، فاللخر ناضت لدوش بردات قلبها فالبكا و غسلات وجهها راسها كايزدح عاد رجعات لفراشها كاتحل فعينيها و تسدهم سخااان حتى داها النعاس....

أصبحنا وأصبح الملك لله 🌞

فاقت معطلة مالقاتش نبيل حداها هزات التليفون تشوف الساعة وهي تلقى ميساج منو 📨 " حبيبة راني مشيت لخدمة مابغيتش نفيقك باش ترتاحي شوية... غير تشوفي الميساج ديالي جاوبيني"

تنهدات براحة عند بالها غايكون مقلق منها على لبارح، جاوباتو على ميساجو و ناضت كاتفوه تصلي الصبح قبل ما يأذن الظهر...

دارت روتينها الصباحي و نزلات لتحت لقات لطيفة فالصالون كاتفرج فالتلفازة ،صبحات عليها و دازت لكوزينة سخنات اتاي و هزات كرواصة و رجعات لصالون...

لطيفة (شافتها اشنو حطات) : هادشي لي غتاكلي ابنتي صافي؟؟

وعد : قرب لغدا اخالتي مابغيتش ناكل بزاف باش نتغدا

لطيفة : كولي بالصحة و الراحة

وعد (تنهدات) : الله يعطيك الصحة

لطيفة (عقدات حجبانها بأسى) : مالك ابنتي على ديك التنهيدة "ناضت جلسات حداها" و لعوينات دابلين

وعد (مافيهاش لي يجبد موضوع لبارح) : والو اخالتي غير قنطت

لطيفة (حسات بيها كاتقلب الموضوع و نطقات مسايراها) : ايوا بالسيف ابنتي ما تقنطي راه كاظلي النهار كامل فالدار كون غير درتي شي حاجة تلاهي بيها راسك

وعد : بحالاش

لطيفة : عطا الله، انا دابا راه كانمشي لجمعية نقرا القرآن و شحال هادي كنت كانمشي نتعلم لخياطة غير باش مانبقاش فالدار "بتساؤل" نشوفو ليك شي جمعية ديال لخياطة قريبة لدار لهيه دخلي ليها

وعد :ولكن انا ماعنديش مع الخياطة

لطيفة : وا عطا الله مايدار ماشي غير لخياطة نتي شوفي اش كايعجبك و ديريه غير باش وقتك مايبقاش خاوي نبيل كايظل فالخدمة حتى لعشية ونتي كاتبقاي بوحدك النهار كامل كون غير كنتي قريبة ليا نتوانسو

وعد (بحيرة) : ماعرفتش اشنو ندير

لطيفة (سكتات كاتفكر وهي تنطق) : إلى بغيتي تبعيني ابنتي نقوليك اش كايبان ليا يجي معاك

وعد (بفضول) : قولي اخالتي

لطيفة : الطبخ ابنتي هو لي يجي معاك.. ما شاء الله يديك كايخرجو غير البنة و خفيفة تبارك الله

وعد (عجبها لحال) : بالصح اخالتي ؟؟

لطيفة : اييه ابنتي علاه انا غانكدب عليك راه دقت و شفت بعيني و كايبان ليا كايعجبك طيبي حيت كون مكانش عاجبك مايخرجش طيابك بنين

وعد (بحماس) :اه كايعجبني الطياب بزاف من صغري كانتفرج فشوميشة و كانبقى ندير و انا كانلعب...

لطيفة(فرحات مني خرجاتها من لمود) : ايوا هاحنا لقينا ليك الطريق

وعد (بتساؤل) : كااينة شي جمعية كاتعلم الطبخ؟؟

لطيفة : عندي واحد صاحبتي فالجمعية ديال القرآن حالة مدرسة ديال لفلوس هي و راجلها كايعلمو الطبخ.. الله يعمرها دار ديك السيدة، خاصك غير تفكري مزيان و تشاوري مع نبيل والى بغيتي راه من غدا ندوي معاها

وعد (بتاسمات) : صافي اخالتي نشوف و نرد عليك

لطيفة (دوزات يدها على شعرها) : هاهي التبسيمة لي بغيت نشوف من قبيلة ضحكي ابنتي و قلبي على لي ترمي فيه همك و تنسايه إلى بقيتي دايرة يدك على خدك غادي ياااكلك من لداخل و تلقاي راسك شبتي و هرمتي ونتي مزال وريدة عاد كاتفتح...

الفكرة لي طرحات عليها لطيفة عجباتها ، النهار كامل وهي كاتفكر و تعاود تحمسات للموضوع و تحلو ليها العينين، حيت عمرها عرفات اشنو كايعجبها و اشنو دير أو بالأحرى عمرها فكرات فالموضوع ديما كاتسبق السلبية و تقول انا مانعرف ندير والو و انا مانصلاح لوالو غير لماكلة و النعاس و تمارة.. معارفاش بلي مكاينش شي واحد على وجه الكرة الأرضية مكايعرف يدير والو ... الفرق هو كاين لي لقى طريقو و باش كايتميز و فاياش ممكن يبدع... و كاين لي باقي تايه فمتاهة مالقى ليها باب، ممكن يجي لي يفقهو و يحل ليه عينيه و ممكن يبقى هكاك حياتو كاملة منافع لوالو غير حيت مدارش مجهود باش يشق طريقو...

نسات الهم شوية و تلهات فحاجة أخرى، تغدات هي و لطيفة و گلسو كايهضرو غير فموضوع الطبخ، كاتسول على المدرسة و اشنو فيها و لطيفة كاتجاوبها عاطياها لخاطر حتى دخل نبيل من الخدمة سلم عليهم و طلع مع الدروج وهو يعيط لوعد لي تبعاتو عارفة اشنو غادي يكون باغي و داكشي نيت لي كان فبالها وقع، غير دخلات مع لباب قنتها مع الحيط كايبوس فيها... بعد مدة فصل القبلة ناطق بهمس

نبيل : مشات التقليقة

وعد (بابتسامة متوترة) : اممم مشات

داعب بصباعو غمازاتها لي دخلو مع تبسيمتها و رجع لتقبيلو وهو كايحيد حوايجو و حوايجها... بيتاتو جيعان الليلة لي فاتت و جا دابا يبرد فيها لهوايش لي خلات فيه....

بعد مدة كانت گالسة فوق الناموسية كاتنشف فشعرها باش ماتهبطش بيه فازگ قدام حماتها وهو خارج من الدوش لابس پينوار، ما جا فين يلبس حوايجو كانت سالات و ناضت عندو...

وعد : نبيل

نبيل (بغمزة) :الزين ديالو

وعد (كاتلعب فصباعها) : عقلتي مني سوليني على لقراية

نبيل : اييه مالها

وعد : أنا فكرت

نبيل (قاطعها قبل ما تكمل) : بغيتي ترجعي تقراي ؟؟

وعد : لا لا دوات معايا خالتي ليوم و لقيت حاجة أخرى

نبيل (بفضول) : اشنو هي

وعد (جراتو من يدو) : اجي لتحت حدا خالتي و نقوليك

نزل معاها مسايرها حتى لعند مو و عاودو ليه الحوار لي دار بيناتهم وهو ساكت كايتصنط..

لطيفة : راك عارف مليكة لي معايا فالجمعية عندهم مدرسة فعلال لفاسي راه تقدر تمشي ليها على رجليها من الدار عندكم

نبيل : شحال لمدة ديال التعلام؟؟

لطيفة : مانعرف أولدي نعيط لمرا و نسولها

نبيل (شاف فوعد ونطق بجدية) : واش غاتقدري توفقي بين الدار و المدرسة؟؟

لطيفة (عقدات حجبانها) : ومالها لي ماتقدر عطا الله لعيالات كايقراو ولا خدامين و مزوجين و عارفين كيفاش يمشيو الشغل

نبيل : عارف الواليدة انا غير مابغيتهاش تزير راسها حيت مامولفاش هذا ما كان

وعد (هزات فيه عينيه) : بغيت نجرب و ان شاء الله غادي نقدر

نبيل : حتى انا مغاديش نمنعك "شاف فمو" عيطي لمرا سوليها على التفاصيل ولا قولي لينا فين جات مني يكون عندي شي وقت نمشيو عندها لمدرسة....

دازو يومين وهي متحمسة ايمتى تمشي لهاد المدرسة و تشوفها... من بعد ما كانت ماعندها حتى هدف فحياتها تولد عندها واحد الشغف و الفضول بسبب جماعة عادية مع حماتها خرجات بيها لنتيجة مكانت على بالها... شي مرات كانكونو كانهضرو مع شي ناس ف مواضيع تافهة و كاتبقى هضرة تجبد هضرة حتى كانكتاشفو شي حوايج و شي معلومات كنا محتاجين ليهم... هادوك الناس كايكون مسخرهم لينا ربي باش يحلو لينا العينين على شي حوايج كنا جاهلينهم و عمرهم جاو فالبال...

لطيفة جابت ليهم معلومات على المدرسة و كيفاش دايرة طريقتهم فالتعلام و هادشي مازاد غير حمس وعد باش تمشي اليوم قبل غدا غير كاتسنى نبيل يكون متفرغ باش يديها بنفسو كي قال...

گالسة هي و لطيفة بعد ما تغداو هاد الأخيرة حتى كاتبغي تنطق و كاتعاود تسكت فاللخر شافت حتى عيات وهي تقاد فالگلسة و نطقات

لطيفة : بنتي وعد اجي گلسي حدايا نهضر معاك

وعد (ناضت عندها) : هانا اخالتي

لطيفة (حدات يدها على فخضها) : ماقدرتش نسكت و نخليها حتى دق فالباب عاد نقولها ليك اللهم نقولها ليك دابا و نصفيو لخواطر قبل گاع ماتجي

وعد (باستغراب) : علامن كاتهضري ؟؟

لطيفة : ماماك ابنتي راه عيطت ليها تجي اليوم فالعشية تهضرو نتي وياها و ماتبقاوش قاطعين لكلام راه حرام هادشي مايبغيه لا ربي لا عبدو

وعد (حدرات راسها و نطقات بصدق) : كنت غادي نمشي عندها اخالتي كانتسنى غير دوز لعراضة لي عارض علينا صاحب نبيل.. اما انا مانقدرش نقطع الهضرة مع ماما واخا نتقلق منها

لطيفة (بابتسامة) : كنت عارفاك مرضية ابنيتي.. ميمتك غير نتي لي بقيتي ليها و غير هي لي بقات ليك ماعندكم لاين على بعضياتكم و لواليدين وصى عليهم ربي..

وعد : عندك الحق اخالتي و احسن حاجة درتي هي عيطتي ليها تجي "ناضت" نوض نوجد شي حاجة

لطيفة (حبساتها) :غير گلسي سعاد غادي توجد كلشي

جلسات مولات القلب البيض لي مافيها لا سم لا حقد، بقد ما بقى فيها لحال من مها و ضرها فخاطرها داكشي لي دارت ماقدراتش تخاصم معاها بمرة ولا تقلب عليها... مكاتعرفش تشد فقلبها، كاتبغي غير مساحة خاصة حتى تفش و تهدن و ترجع تعامل عادي بحالا ماوقع والو واخا اي حاجة متعلقة بباها كاتخلي فيها اثر عميق ولكن كيف قالت ليها حياة نيت" غواتك على الموطور مغاديش يردو كيما بكاك مااردش باك" ...

ودن لعصر و طلعات تصلي فبيتها و فهاد الأثناء سرسرات حياة فالصونيط، حلات ليها سعاد و دخلاتها عند لطيفة حتى نزلات وعد لقاتها تما... سلمات عليها عادي و جلسو مجمعين بحالا حتى حاجة مواقعة حياة حتى هي ميكات على غوات وعد قدام ناسها زيد عليها عارفة راسها دايراها يغرق فيها جمل... هضرة تجبد هضرة حتى تحط اتاي و دوازو، شوية صونا تليفون لطيفة وهي تنوض كاتهضر خلاتهم بجوج وهنا استغلات وعد الفرصة و نطقات مخاطبة مها...

وعد : غير قولي ليا لمن بعتي الموطور

حياة (لعنات زهرها لعوج فخاطرها حتى قالت فلتات من هاد السؤال) : بعتو لمول لافيراي

وعد (جغمات من اتاي تبلع بيه لفقصة) : اممم مزيان

حياة ( قربات عندها كادور فعينيها) : خاصاني واحد ربعالاف نخلص لما و الضو

وعد (تنهدات) : واخا حتى تبغي تمشي و نطلع نجيب ليك داكشي لي عندي

حياة (عنقاتها كاتبوسها فخدها) : المرضية ديالي

لطيفة (دخلات عليهم) : ايوا هكاك هادشي لي بغيت نشووووف الله يخليكم ديما مجموعين و يبعد عليكم الشيطان الرجيم

حياة : امين الالة لطيفة لهلا يخطيك

الگلسة هاد المرة خرجات على خير بعد ما مشات حياة ناشطة مني دورات معاها وعد عاطياها كتر من اشنو طلبات.... هاد الأخيرة داز يومها روتيني بحال الايام لي قبلو لا جديدة فيه من غير مجيء حياة...

**********

وصل لويكاند و العراضة ديال صاحب نبيل جا وقتها... بجلالة منبتة جاية مفصلة عليها فالفوشية، راكبة جنب نبيل شعرها مطلوق و مكحلة لعوينات و رافعة شفارها بماسكارا مع گلوص لامع فشفايفها المنفوخين.... مشابكة يدو مع يدها و مجمعين حتى وصلو لدار و نزلو كايقادو حوايجهم هو وقف كايسد لڤيست وهي حلات لباب اللور هزات لكادو ، جبد تليفونو صونا على صاحبو وهو يحل عليها هو و مراتو راجل باينة فيه كبر من نبيل بسنوات قليلة و زوجتو فنفس سنو دايرة فولار فوق راسها و لابسة قفطان خفيف... سلمات على وعد و رحبات بيها ببشاشة مدخلاها لصالون فين كاينين لعيالات و الراجل جر معاه نبيل طالعين لفوق...

نبيل : فين غادي بيا ياك قلتي ليا راك جامع الدراري لتحت

صاحبو : زيد نعرفك بالناس لمهمين اش بغيتي شي دراري دابا

نبيل(باستغراب) : اشمن ناس مهمين ؟؟

صاحبو : وكيل الملك

نبيل (باستغراب) : شكون وكيل الملك ء عبد الإله؟؟

عبد الإله : خالي اصاحبي لي كنت عاودت ليك عليه

نبيل (تفكر) : اااااه عقلت عقلت داك لي قلتي ليا غادي تعرفني عليه باش إلى حتاجيت شي بلان يوقف معايا فيه

عبد الإله : اييه هو رااه عندو معارف بزاف ينفعك فلي بغيتي

نبيل (عجبو لحال) : معرفة زييينة هادي

دخلو لبيت فين كانو مجموعين الأقارب ديال عبد الإله لي كان اغلبيتهم كايعرفو نبيل حيت ماشي اول مرة يجي عندهم لدار ولا يتعرفو عليه بحكم أنه صداقتو مع عبد الإله قديمة... هاد الأخير بدا كايعرفو على الناس لي مكايعرفش حتى وصل عند خالو الوكيل لي كان گالس بجلابة هماوية ، قرع من وسط راسو و عندو شوية ديال الشعر شايب من الجناب، كانت باينة عليه انه متقدم فالسن... سلم عليه نبيل و گلس حداه بيناتهم غير صاحبو... تبادلو أطراف الحديث كايتعرفو على بعضياتهم وهو ينطق نبيل

نبيل : سي مصطفى تشرفت بمعرفتك

مصطفى(حط يدو على صدرو) : الشرف ليا... كان قال ليا عبد الإله راك خدام ف**** لي فالسونطر

نبيل : اه تما

مصطفى : راني حال كونط عندكم

نبيل ( تفاجئ) : بالصح؟؟ ايوا اسيدي صدفة زوينة هادي إلى حتاجيتي شي حاجة مرحبا دخل عطيهم سميتي يجيبوك حتى لعندي "هز راسو فالناس لي تما" حتى نتوما إلى بغيتو تحلو شي كونط ولا تاخدو شي كريدي مرحبا نيسر ليكم الأمور دغيا

عبد الإله : ايوا صافي قضي ليه و يقضي ليك هههه

مصطفى (شاف فنبيل) : بالصح اي غرض عندك فشي إدارة ولا عندنا فالمحكمة خود نمرتي من عند عبد الإله و عيط ليا انا نوصي عليك

نبيل (بابتسامة) : الله يحفظك

بعد هاد التعارف دخلو فمواضيع عديدة ناقشوهم و تحط العشا و كيف معروف على المغاربة فكل مناسبة كايبدعو فالاطباق الشهية...

تعشاو الرجال و كلاو الديسير و ناض نبيل باش يمشي بحالو حيت تعطل لحال، نزل معاه عبد الإله كايعيط لمراتو باش تكلم وعد لي خرجات من الصالون كاتسلم على مولات الدار

مرات عبد الإله : بسلامة احبيبة "شافت فنبيل" تهلا فهاد لفنكوشة

نبيل (شدها من يدها) : ماتحتاجيش توصي

عبد الإله(بمزاح) : هاد الشلاهبي لقى الصغر و طاح على زنافرو

نبيل (كايضحك) : لي حسدني يدير بحالي

مراتو : حربوووووش هو قرب يزوج ولادو بقى ليه غير يجيبها صغيرة

عبد الإله (عنقها من كتفها) : نتي لي كاينة غير بردي "شاف وعد واقفة كاضحك على كلامهم مادواتش، غمز نبيل و نطق باغي يفقصو" الله يصلح

نبيل (دار بحالا غايمشي ليه) : ينعل...

عبد الإله : اهيا غير ضاحكين

خرجو من تما كايضحكو و ركبو فالطموبيل راجعين لدار...

نبيل (جر يدها عندو) : عجبك لحال

وعد (بابتسامة) : اه مرات صاحبك ظريفة

نبيل (قرص خدها) : نتي لي ظريفة الزين ديالي.... وجدي راسك غدا

وعد : علاش فين غانمشيو؟؟

نبيل (نطق بمزاح) : غانمشيو لمدرسة ديال الطبخ لي طبختو ليا بيها راسي... حبيبة ديالي بغات تولي طبااخة

وعد ( بابتسامة) : الصراحة كايعجبني الطبخ بزاف كانلقى فيه راحتي و مكانعگزش ولكن عمري فكرت نزيد نتعلمو و نتعمق فيه كون ما خالتي

نبيل : خالتك ماعندهاش مع الگلاس فالدار داكشي علاش بقات كاتقلب ليك فاش تلاهاي

وعد (بحب) : الله يخليها لينا و يطول فعمرها

نبيل (عوج راسو كايشوف فيها) : وانا؟؟

وعد (بخجل) : مالك نتا

نبيل :شوفي نتي مالي

وعد : حتى نتا الله يخليك ليا

هز يدها باسها و كمل طريقو لدار، مزال گالسين مع لطيفة حتى تجي حبيبة من السفر... دخلو لقاو الظلام عرف مو غاتكون نعسات، طلعو نيشان لبيتهم بدلو حوايجهم و ضربوها بنعسة......

أصبحنا وأصبح الملك لله 🌞

وقفات طموبيلة نبيل قدام واحد العمارة و نزل هو و وعد و مو، هاد الأخيرة هزات تليفونها كاتهضر فيه و بعد مدة خرجات عندهم مرا تكون ف الخمسينات من عمرها

لطيفة (قربات عندها) : لالة مليكة ساعة مبروكة

مليكة (ردات ببشاشة وهي كاتسلم عليهم) : مرحبا بلالة لطيفة زارتنا البركة

لطيفة : لهلا يخطيك"شافت فوعد" هاهي مرات ولدي لي قلت ليك عليها

مليكة :غزالة تبارك الله "بتاسمات ليها وعد" زيدو دخلو تشوفو لمدرسة و نهضرو فالتفاصيل

طلعو فالسانسور لطابق الثاني و دخلو للمدرسة لي كانت كبيرة وفيها 3 ديال لي صال عاد لبيرو ديال مليكة... لقاو تما راجل كبير كاسيه الشيب جالس ورا لبيرو، غير شافهم دخلو بتاسم ليهم و نطق

.... : مرحبا

مليكة : هذا راجلي عبد الرحمان

ناض سلم عليهم كايرحب بيهم و رجع گلس بلاصتو و مراتو جرات كرسي حطاتو حداه و جلسات وهما جلسو قدام لبيرو فالكراسة لي تما....سولو بعضياتهم على الأحوال عاد دخلو فالموضوع لي جايين على قبلو...

عبد الرحمان (بجدية) : التكوين ديالنا فيه عام و 6 شهور كل 6 شهور كايتعلمو فيها حاجة على حساب باش باغين يبداو 6 شهور ديال الطياب البلدي ديالنا ومن بعد 6 شهور ديال الحلويات و بعدو كايدوزو لمملحات .. و الديپلوم ديالنا معترف به من طرف الدولة

نبيل : و بالنسبة للثمن؟؟

عبد الرحمان : فاللول كايخصك تخلص *** ديال لاصيرونص و التسجيل عاد من بعد كاتحط ***** لشهر

نبيل : داكوغ و التوقيت؟

عبد الرحمان : هنا تختار صباح ولا العشية من 9 ل 11 ولا من 3 ل 6

نبيل (شاف فوعد) : اش بان ليك؟؟

وعد : لعشية حسن

نبيل : سي بون نخليوها لعشية.. اشنو الوراق المطلوبة؟؟

عبد الرحمان (شرح ليه اشنو خاصها تجيب و أضاف بتوضيح) : و واحد لحاجة دابا راكم عارفين لعام بدا و لي شد شي كروب راه شدو ولكن قريبا غادي يدخل كروب جديد ديال المملحات إلى بغات تبدا معاهم

وعد (بحماس) : نيت المملحات باش بغيت نبدا حتى انا

مليكة : ايوا صااافي تافقنا... جمعي لوريقات هاد السيمانة و اجي دفعيهم و ان شاء الله التنين الجاي تبداي

لطيفة : ان شاء الله

رصاو أمورهم معاهم و قبل مايخرجو ضربو بيهم دورة فالمدرسة شافوها كيفاش دايرة و خرجو من تما راجعين أدراجهم لدار... وعد الفرحة غادي تنقز من عينيها عجباتها المدرسة و كيفاش مجهزة و نقية وحتى تعامل عبد الرحمان و مليكة زوين كايبانو دراوش ماشي داك النوع المنفخ و المكنزز....

غاديين فالطريق وهو يصوني تليفون نبيل دار لكيت و جاوب...

نبيل : الو... ولاهيلا بخير... الله يسلمك حيدت عليا داك لكريدي ديال الطموبيل ههه غا سكت بانت ليا فواحد الدار فالشمال تستاهل شي كريدي مضخم

هو مجمع مع صاحبو و لطيفة طالقة ودنيها معاه غير سمعات سيرة لكريدي تنهدات و تقلبو ملامحها لحزن... خلاتو حتى سالا كلامو وهي تنطق بعصبية

لطيفة : وااااش باقي ما بغيتي تفوت عليك لكريدي و لحراااام.. براكة غير الخدمة فالبنكة تزيد تغرق راسك أولدي فالربى

نبيل (وقف قدام الدار و نطق بحالا مادواتش) : وصلنا

لطيفة : كاتلف ليا الهضرة دابا ولا اشنو؟؟

نبيل (سااااط) : لواااليدة

نزلات خابطة باب الطموبيل و نزل وراها تابعها اما واحد وعد زي الأطرش في الزفة مافهمات والو، اول مرة تشوف لطيفة معصبة هكا .... تبعاتهم لدار لقاتها جالسة وسط الدار كاتسوط و نبيل واقف عليها يديه على جنابو...

لطيفة : مكااااتسمعش ليا اولدي مكاتسمعش ليا "بدات كاتحسب بصباعها" قلت لييك شد فصلاتك ماسمعتيش ليا قلت ليك ماتخدمش فهاد لبنكة درتي لي فراسك و خدمتي قلت مافيها بااش شديتي كريدي جوج مرات بعد ما وصيتك بحالا زايدة ناقصة دعيت ربي يغفر لييك و يهديك و نتا غييير مزايد فييه "بحدة" فيييين غادي بهااااادشي فيييين غا قوووول ليا وااااش باغي تقتلني بالفقصة....

كااادوي بحرقة و عصبية حاطة ليه كلشي فالطبلة ماتسوقاتش لوجود وعد ولا لخدامة لي كانت فالكوزينة و خرجات كاتجري مني سمعات لغوات... نبيل ماحملش راسو كايحك فلحيتو مغدد عدوه تبدا توبخ فيه هكا كي الدري الصغير

نبيل : اش بغيتيني ندير الواليدة نبقى بلا خدمة نااااعس حدااك

لطيفة(ناضت وقفات مخرجة فيه عينيها) : مقاااليك حد گلس بلا خدمة نتا مشيتي لساهلة كون قلبتي كون لقيتي خدمة نقية حسن من هاد لحراااام

نبيل(بغا ينتف لحيتو بالفقصة) : رااااه لمغريييب هذا غيير اجي و خدم و شد بوووسط إلى مااشحفتي و تجرجرتي

لطيفة : نقولو هاد لخدمة مالقيتي غيرها ايوا و لكريدي حتى هو درتيه بزز منك... تهز فالكريديات و تشجع الناس يهزوه حتى هما واش عارف فين غايديك هااادشي واااش عارف اشناهي دير حاجة محرمها ربي، راه عمرك ترتاح فحياتك الى بقيتي هاكا كووون غير ماكنتيش عاارف هادشي"عينيها تغرغرو" دوينا و عاودنا سنين هادي و ما مرة ما جوج ولكن نتا ديما كادير لي فراسك اولدي"بدات كاترعد و رجعات گلسات الدنيا كادور بيها كملات كلامها بزز" تقادة ليا الجهد معاك ولاهيلا تقادة

وعد (قربات عندها كاطير) : خاااالتي مااالكي

نبيل (بخوف) : لواااليدة" شاف فسعاد " طيري جيبي ليها لما و السكر طاح ليها الطونسيون

الربا من الموبيقات العظيمة و كبيرة من الكبائر لي حرمها الله سبحانه وتعالى وهادشي كاين و واضح فالقرآن الكريم، قال تعالى : {الَّذِينَ يَأْكُلُونَ الرِّبَا لَا يَقُومُونَ إِلَّا كَمَا يَقُومُ الَّذِي يَتَخَبَّطُهُ الشَّيْطَانُ مِنَ الْمَسِّ ذَلِكَ بِأَنَّهُمْ قَالُوا إِنَّمَا الْبَيْعُ مِثْلُ الرِّبَا وَأَحَلَّ اللَّهُ الْبَيْعَ وَحَرَّمَ الرِّبَا فَمَنْ جَاءَهُ مَوْعِظَةٌ مِنْ رَبِّهِ فَانْتَهَى فَلَهُ مَا سَلَفَ وَأَمْرُهُ إِلَى اللَّهِ وَمَنْ عَادَ فَأُولَئِكَ أَصْحَابُ النَّارِ هُمْ فِيهَا خَالِدُونَ} [البقرة/275]

جزاء الربا خااايب و خااايب بزاف و مع ذلك كاينين ناس كايبغيو يغطيو الشمس بالغربال بحال نبيل بتمياكهم على بحال هاد لحوايج عند بالهم غادي دوز ليهم طريفة ناسيين بلي المحرمات كايعاقب عليهم ربي فالدنيا قبل الآخرة... قدما كنتي كادير شي حاجة محرمة كون متأكد غادي تجيك شي دقة من حيث لا تحتسب واخا تعيش مرتاح فاللول وتقول ماطرا ليا والو واخا درت و درت و درت ماتنساش قول الله سبحانه و تعالى في سورة لقمان {وَمَن كَفَرَ فَلَا يَحۡزُنكَ كُفۡرُهُۥٓۚ إِلَيۡنَا مَرۡجِعُهُمۡ فَنُنَبِّئُهُم بِمَا عَمِلُوٓاْۚ إِنَّ ٱللَّهَ عَلِيمُۢ بِذَاتِ ٱلصُّدُورِ (23) نُمَتِّعُهُمۡ قَلِيلٗا ثُمَّ نَضۡطَرُّهُمۡ إِلَىٰ عَذَابٍ غَلِيظٖ (24)}...

بحال هاد النوع لي شاريين الدنيا و بايعين الآخرة وهما عارفين داكشي لي كايديرو حرام فحرام و نبيل من هاد النوع عارف بلي راكبو الغلط من ساسو لراسو ولكن مستمر و مامسوقش كياخد كريدي و يشجع الناس عليه على حساب خدمتو كايهز ذنبو و ذنوب عباد الله على ظهرو معارفش بلي راه دخل فح.رب من الله... غير كاتسمع هاد الكلمة كاتشدك التبوريشة حيت حنا كبشر إلى دخلنا فح.رب مع بنادم بحالو بحالنا كانمرضو و كاتخسر حياتنا فما بالك ندخلو فحر*ب من الله و رسوله صلى الله عليه وسلم... هادشي يمكن مكايعرفوهش بزاف ديال الناس ولا غافلين عليه بحكم مكايقراوش القرآن بزاف و يدبرو فيه حيت كلشي واضح و باين فالكتاب الكريم و هاد حرب من الله مذكورة فالقرآن

قال الله تعالى ﴿یَـٰۤأَیُّهَا ٱلَّذِینَ ءَامَنُوا۟ ٱتَّقُوا۟ ٱللَّهَ وَذَرُوا۟ مَا بَقِیَ مِنَ ٱلرِّبَوٰۤا۟ إِن كُنتُم مُّؤۡمِنِینَ ۝٢٧٨ فَإِن لَّمۡ تَفۡعَلُوا۟ فَأۡذَنُوا۟ بِحَرۡبࣲ مِّنَ ٱللَّهِ وَرَسُولِهِۦۖ وَإِن تُبۡتُمۡ فَلَكُمۡ رُءُوسُ أَمۡوَ ٰ⁠لِكُمۡ لَا تَظۡلِمُونَ وَلَا تُظۡلَمُونَ ۝٢٧٩﴾ [البقرة ٢٧٨-٢٧٩]

راه الى گلسنا مع راسنا و تأملنا فهاد الآية مزيان و تخيلنا عظمة الذنب لي ممكن يخلي ربي يغضب علينا حتى لهاد الدرجة راه حتى واحد مغادي يقدر يقرب مزال للربا ولكن بزاف منا كايتعاماو على هادشي.... يا ما ناس مرضو و مداقوش الراحة فحياتهم بسبابها ياما ناس تشتت ليهم الشمل و نزلو عليه كوارث ماعرفوها منين بعتات معاهم كايبقاو يسولو علاش كايوقع ليا هادشي اشنو الذنب لي درت حتى نتعاقب هكا... فهاد لحالة خاص لواحد يعيد النظر فحياتو يخرج من الدائرة لي باني على راسو و يشوف من بعيد اشنو كايدير و اشنو هما ذنوبو و يعيد حساباتو من اول و جديد و فالاخير يتوب إلى الله و ربي راه غفور رحيم....

هادشي لي بغات توصل لطيفة الأم الحنونة لي خايفة على ولدها لوحيد كأي أم باغة تشوفو فأحسن حال فحياتو الزوجية و العملية و الأهم من هادشي لي قبل فعلاقتو مع ربي... شحال من مرة كاتلوم راسها بقول انها ماعرفاتش تربيه من اللول ولكن هي كبراتو على القيم و الأخلاق علاش خرج ليها هكا كايدير غير لي فراسو.. وهادي حاجة موجودة فالمجتمع ديالنا كاتلقى الواليدين الله يعمرها دار شادين طريق الله و ولادهم گاااع المحرمات دازو عليهم و العكس صحيح... حيت التربية ماشي هي كلشي الإنسان خاصو يبحث و يتعمق فدينو، حنا راه كانوصلو لواحد السن كانوليو عارفين الصح من الغلط و الطريق النقية من الطريق المسخة و هنا كل واحد فينا كايختار الطريق لي بغا على حساب القيم و المبادئ ديالو...

جابو لما و السكر ل لطيفة لي الدموع دازو ليها من عيونها ربي بوحدو لي عالم بالحرقة لي فقلبها من جهة ولدها كاتشوفو غادي لتهلكة برجليه وهي مقادرة دير والو.... هاد الاخير عاونها هو و وعد حتى مشات لبيتها، نزل عندها بغا يبوس ليها راسها وهي تقلب عليه وجهها

نبيل ( تنهد و شاف فوعد) : بقاي معاها هنا انا عندي واحد الاجتماع غير نساليه نجي

وعد : واخا كون هاني...

خرج نبيل و بقات وعد مع لطيفة حتى رتاحت شوية و عاوناتها تبدل حوايجها عاد طلعات هي لبيتها بدلات و عاودات رجعات عندها كاتشوف فيها مغمضة عينيها وهي تجبد تليفونها مشات ل Google نيشان كاتقلب على الربا و الحكم ديالها حيت كانت غافلة على هاد الموضوع لي جاها فضول ناحيتو من بعد الحوار لي سمعات بين لطيفة و نبيل... طلعو ليها الآيات القرآنية و الأحاديث النبوية بالشرح المفصل الشيء لي خلاها تفهم علاش لطيفة تقلبات فجأة بهاديك الطريقة و نفاعلات.... ضرها قلبها على نبيل لي مبعد على ربو بزاف وهي معارفاش كيفاش تردو لطريق...

جا نبيل من بعد ساعتين لقاهم غادي يحطو لغدا، ناضت لطيفة مكاتشوفش فيه كاتهضر غير مع وعد، تغدات معاهم و ناضت تكات من بعد ما علمات وعد بلي حبيبة غادي تجي لغد ليه....

وعد (شافت فنبيل) : غانرجعو لدار غدا ؟؟

نبيل(ماعندو خاطر) : ماعرفتش

وعد : غدا فالصباح دوزني لدار قبل ما تمشي لخدمة

نبيل : حتى نشوف

ساطت و ناضت كاتجمع فالطبلة مباغاش تلاقى مع حبيبة ولا تگلس معاها مدة طويلة حيت غادي تصبر حتى تعيى و تصدق ساباها اللهم التيقار.... داز نهارهم كئيب كل واحد گالس فقنت وعد طلعات لبيتها تكات و نبيل گلس قدام التلفازة و لطيفة بقات فبيتها كاتسبح... حتى وصل الليل و تجمعو باش يتعشاو، غير سالاو تاني بغات تنوض لطيفة وهو يشد ليها نبيل فيدها باسها

نبيل : لواليدة ماتنعسيش ونتي غاضبة عليا "ناض عنقها كايبوس فراسها" دعي معايا ربي يهديني و رضاي عليا راه برضاك باش عايش

لطيفة (بتنهيدة من القلب) : الله يهديك أولدي على راسك الله يهديك

مشات لبيتها و هو معنقها كايطيب خاطرها عاد رتاح بالو و رجع ليه شوية الخاطر... طلع نعس و لحقات عليه وعد ، شدها قنتها تاني ينسى بيها همو عاد نعس معنقها عندو....

أصبحنا وأصبح الملك لله 🌞

مع الصباح بكري ناضت وعد جمعات حوايجها لي جابت من دارها و ركبات مع نبيل بعد ما ودعو لطيفة راجعين لدارهم، غير وصلها وهو يشد الطريق لخدمتو مخليها كادير روتينها اليومي....

و هكا دازت السيمانة بحال رمشة العين... واقفة قدام المايو كاتوجد اشنو تلبس حيت غدا عندها اول يوم فالمدرسة، نبيل گالس فوق الناموسية كايشوف فيها حجبانو معقودين مطلعها من رجليها لراسها.. كانت لابسة پيجامة بسروالها ديال الساتان مطلوقة ،هادو هما لپيجامات لي كاتميل ليهم و ديما لابساهم مستورين مكايبينو منها والو...

وعد (هزات تريكو ديال الصوف كاتوريه ليه) : نلبس هذا ؟؟

نبيل (ببرود) : لبسي لي بغيتي

وعد (حطات التريكو و شافت فيه باستغراب) : مالك؟؟

نبيل : والو

وعد (قربات عندو) : لا بيك شي حاجة هاد الايام حسيت بييك ماشي هو هذاك

بهاد الجملة حلات عليه و خلاتو يتفرگع عليها فدقة مخليها مفاهمة والو بحالا كان خاص غير لي يسولو

نبيل (بعصبية) : كاااتفلاي عليا ولا على راااسك؟؟ مكاتشوفيش فعااايلك ؟؟؟

أغلب المشاكل الزوجية كايكونو بسبب لفراش شي مرات كايقولوها الأزواج بصريح العبارة و شي مرات كايبردو سمهم فحاجة أخرى، مثلا تقدر غير غير لمرا تحط ليه لغدا و تنسى السربيتة ينوض عليها الصعرة و سبب هاد الصعرة عندها خلفيات أخرى... باش لواحد يجي گود و يتحاور و يلقى حل كايبدا يدير مشاكل من حوايج تافهة... نبيل ماشي من هاد النوع هو كاايصبر و يميك ولكن مني وصلات بيه لعظم شعل معاها حيت عيى يسايس و يشد لخاطر وهي غير ما زايدة فيه ماينكرش انها فالفراش كاتنساجم معاه و تعيش اللحظة بحكم انها حتى هي عندها شهو'ة و مشاعر و أحاسيس ولكن باش تلبس ليه و تحلون لا....

واقفة قدامو مصدومة وهو كايهلل عليها حاقد على الوضعية، بغات غير تفهم منو اشنو هو المشكل

وعد (بلعات ريقها و رجعات جوج خطوات اللور ) : علاش اشنو درت ليك؟؟

نبيل (ناض عندها) : سووولي راااسك اش درتي... عيييت نهضر و عييت نمعني ونتي هي نتي "جرها من پيجامتها" اش هااااد لخراااا لابسة فييين لي شووميييز دونوي لي نظل نجيب ليييك؟؟؟ لابسهم لمااااريو ياااك... إلى ماقلت ليك لبسيهم مكاتحطيهمش على لحمك و إلى ما قربت ليييك انا ماتشوفيش جيييهتي "كشاكشو خارجة" و مني كانبغي نقيسك زايداها ليااا بطفي الضو "زير عليها من دراعها" هاد *وا الواليدين ماعندي مااااندير بيه كاتسمعييييييي

الدموع نزلو من عينيها كي لباطل، بقى فيها لحال حيت عارفة انها مكاديرش هكاك عن قصد، هي هكا دايرة ماتقدرش دير هادشي لي باغي هو....

وعد (نترات دراعها من يدو) : ماااادرتهاش ليك بلعاني انبيل "شفايفها كايرجفو " علاش كادير ليا هكا "بتنخصيص" ياااااك كانت عاجباك هاد الحشمة فاللول اشنو تبدل دابا

نبيل (قرب مخرج عينيه فيها حتى خلعها) :هاااااانتي قلتيها بفمك فاللول ماااشي بعد شهووور ديال الزواااج عيييييقتي بالرب حتى عيييييقتي "توجه لدوش كايخبط رجليه مع لارض ، قبل مايردخ لباب نطق" تفوووووو

مع الردخة ديال لباب گلسات هي فوق الناموسية كاتبكي و تنخصص مامولفاهش يغوت عليها و يغضب عليها بهاد الطريقة ولفاتو ديما ظريف و هاز ليها هبالها... ماعرفات اشنو دير و كيفاش تصرف واش لمشكل منها ولا منو هو لي مابغاش يتفهمها، بدات كاتمسح دموعها و كلها كاترعد عاد كانو مزيانين و كايهضرو عادي ماعرفات كيفاش تقلب عليها فجأة و بدا يهلل.....

خرج من الدوش بعد مدة و داز لناموسية مكايشوفش فيها هز تليفونو وهي تشدو من يدو كاترعد خايفاه يخرج فهاد الليل وهو مقلقل

وعد : نبيل فييين غادي ؟؟

جر يدو بالنترة مادورش وجهو جيهتها و خرج من لبيت فاتجاه بيت النعاس لاخر لي كانت فيه ناموسية ديال شخص واحد و پلاكار فيه لفراش هز منو مانطة و تلاح فوق الناموسية داير يدو على عينو.... تبعاتو وعد فالبلاصة كاتشوف اش كايدير خلاتو حتى تسرح وهي تقرب عندو بحذر و الدموع فعينيها

وعد : نبيل علاش جيتي هنا "حطات يدها على دراعو" رجع لبيت نهضرو "برجاء" ماتقلقش مني عافاك

نبيل (نطق بلا مايبعد يدو من فوق راسو) : وعد بدلي ساعة بأخرى خليني نتسنط لعظامي غدا خدامة بكري

وعد : واخا وغير رجع بلاصتك و نخليك على خاطرك

نبيل (حيد يدو و شاف فيها بتخنزيرة حارة) : نووووضي تنعسي بحالك يااااله

رجفو شفايفها بحسرة و ناضت بكسرة خاطر، راسها محدور و كتافها طايحين.... طفات عليه الضو و رجعات لبيت سدات لماريو بلا ماتجبد لحوايج لي كانت باغة تلبسهم غدا و لي كانت باغة يختارهم معاها واخا مغادي تقرا حتى لعشية ولكن الحماس خلاها توجد على تيساع ولكن هاد الحماس طفى عندها فرمشة عين... تخشات فالناموسية طافية الضو و هزات تليفونها كاتبقشش فيه مترددة من داكشي لي فبالها ، عينيها حمرين و الدموع مزال محبوسين فيهم باغين ينزلو من جديد... بعد مدة غلبها النعاس و حطاتو من يدها و ستسلمات لنعاسها بعد ما زوجها هجر فراشها هاد الليلة....

أصبحنا وأصبح الملك لله 🌞

فاقت على صوت لالاغم كاتقلب فبلاصتها شافت الساعة لقاتها التمنية و ناضت كاتفوه غسلات وجهها و توجهات لكوزينة توجد ليه لفطور، بدات كاتقرقب حتى سمعاتو فاق وهي تنهد كاتكمل فشغلها مقادة ليه صينية على حقها و طريقها ولكن فجأة سمعات باب الدار تسد، خرجات عينيها و جمدات فبلاصتها مامتيقاش انه مشى و خلاها كاتوجد ليه ف الفطور .... مشات كاتجري طلات من الشرجم وهو يبان ليها مخرج الطموبيل و كسيرا غادي لخدمتو.... طارت لتليفونها بدات كاتصوني عليه و والو واش جاوب شي ربعة لمرات و فالخامسة قطع عليها بحالا كايقول ليها بصريحة العبارة مابغيتش ندوي معاك.... ضرها خاطرها من هاد التعامل القاسي ديالو و بدات كاتبكي....تسدات ليها الشهية و مافطراتش بقات صابرة حتى لغدا و حيت عارفاه مغاديش يجي خربقات حاجة خفيفة لراسها و كلات بزز عليها كادور الدغمة ففمها عاد كاتسرطها ،الحزن طاغي على ملامحها الذابلين...

داز عندها الصباح مكفس ملاهية غير بالتليفون و كل شوية تنهد حتى وصل وقت المدرسة وهي تلبس حوايجها كاتصوني ليه حيت كان ديجا قاليها غادي نجي نديك بنفسي ولكن ماعبرهاش و حلف لا جاوبها حتى كايوصلها منو ميساج مفاده 📨 " سيري فطاكسي انا مامساليش".

الصدمات شللات ليها اليدين باش تجاوبو، حطات التليفون من يدها مخلية vu على لميساج ديالو و ناضت بخاطر مكسور كاتجمع مسائلها فصاكها و هزات ساشية فيها لماطيريال باش غادي تخدم و خرجات من الدار نيشان لشارع كاتقلب على طاكسي، بقات ربع ساعة وهي كايسوط فيها البرد عاد لقات طاكسي وصلها لمدرسة....

كانت متشوقة لهاد النهار و تسناتو بفارغ الصبر من نهار جات شافت المدرسة ولكن هادشي نداثر بعد خصامها معاه لي خلا فرحتها ماتكملش... طلعات فالسانسور و دخلات لمدرسة كادور فراسها تالفة حتى وقفات عليها مليكة...

مليكة (بابتسامة بشوشة) : اهلا وعد "سلمات عليها" واجدة لنهارك اللول معانا

وعد (بضحكة صفرة) : واجدة ان شاء الله

مليكة (جراتها) : ياله اجي نعطيك اللبسة ديالك لبسيها و تبعيني لكلاص

وعد : واخا

مشات معاها لواحد لبيت مقادينو بحال لڤيستيير فيه پلاكارات صغار كل واحد و ديالو و بلاصة فين يگلسو يبدلو... لبسات اونصومبل خاص بالطبخ باش مايتوسخوش حوايجها باش جات ودارت بوني فوق راسها جامعة فيه شعرها كامل عاد لحقات على مليكة لكلاص لي كانو دايرين ليهم فيه كل واحد و الطبلة ديالو يحطو فوقها لماطريال ديالهم.. شدات بلاصتها بحال التلاميذ لي معاها و فهاد الأثناء دخلات الأستاذة لي غادي تعلمهم..

بعد كلام و تعارف بدات كاتشرح ليهم اشنو غادي يديرو و دازو لتطبيقي ، ماحساتش لوقت كيفاش داز وهي منغامسة و فاشنو كادير واخا عقلها كايسرح مرة مرة فاشنو طرا بينها و بين نبيل ولكن حاولات تركز فشغلها حتى وصلات الستة ديال العشية... مشات بدلات حوايجها و قلبات تليفونها لعل و عسى يكون صيفط شي حاجة ولكن والو مواصلها منو حتى ميساج ، تنهدات و صيفطات ليه هي 📨 "نبيل انا غادي نخرج دابا من لمدرسة نشد طاكسي لدار" صيفطاتو و گلسات كاتسنى الرد ديالو حتى وصلها بعد دقيقة خاسر عليها كلمة وحدة 📨 " اوك"... لاحت التليفون فالصاك و ناضت على سعدها ووعدها رجعات أدراجها لدار و عقلها خدام كايخمم فشلا حوايج...

دخلات لدار كاتمنى يكون رجع ساعة لقات الدار خاوية، صونات ليها لطيفة كاتسولها على أول نهار كي داز عطاتها وقتها و جمعات معاها عاد قطعات و صونات لمها تسول فيها...

وعد :الو ماما

حياة : الوو وعد ياله كنت غادي نصوني ليك

وعد (خدمات سپيكر و بدات كاتبدل حوايجها) : لاباس عليك

حياة : لاباس ونتي اش خبارك كي دوزتي نهارك فالمدرسة تعلمتي شي؟؟؟

وعد : عاد بدينا شوية بالشوية نتعلمو

حياة : ايوا مزيان تعلمي تعلمي باش تشبعينا شهيوات من يديك

وعد : ان شاء الله

شدات معاها لحتيت شوية و التليفون فيدها كاتبقشش فيه حتى قطعات معاها و گلسات كاتفرج فالتليفون حتى فات لمغرب و قرب لعشا عاد ناضت صلات صلاتها أذن عليها العشا فوق الصلاية، صلاتو حتى هو عاد ناضت كادور فالبيت بحال لهبيلة كاتفتف كاتمشي تحل لماريو و تعاود تسدو كاتعض فشفايفها حتى طيباتهم... قاطعها صوت التليفون واصلها ميساج و هي طير عندو لقاتو من نبيل كايسولها واش خاصها شي حاجة حيت بقاليه نص ساعة و يجي لدار، جاوباتو بالزربة و مشات لماريو كاتقلب فليشوميز دونوي و يديها كايعرقو غير بوحدهم بسبب التوتر... لبسات وحدة فالشيبي حد لفخاض و دارت فوق منها پينوار سخون هابط حتى لتحت، مشطات شعرها و جمعاتو بلاستيك شدة مرخوفة عاد خرجات لكوزينة كاتسخن فگراتان كان شاط عليهم النهار لي قبل... سمعات السوارت ضارو فالباب وهو يزدح قلبها وسط صدرها و بداو رجليها كايترعدو ، خرجات باش طل عليه وهو تصادف معاه فباب لكوزينة جاي عندها راخف ملامح وجهو غير جات عينو عليها طلعها و هبطها اشنو لابسة وهو وهو يعقد حجبانو باغي ياكل ريتو بالفقصة.... قلب وجهو بلا مايدويها و مشا لبيت يبدل، حطات هي لعشا وجلسات كاتسناه حتى تم جاي بحوايج الدار، جلس كياكل بدون ماينطق بكلمة ولا يشوف فيها وحتى هي خلاتو هكاك حتى بان ليها سالا ماكلتو عاد ناضت وقفات مقابلة معاه كاترعد الشيء لي خلاه يهز فيها راسو باستغراب اما هي ربي لي عالم بيها رجليها فاشلين و يديها كايرجفو مداتهم بزز لحزام لپينوار حلاتو و نزلاتو بالزربة حتى طاح فلارض و بانت بالشوميز دونوي لي لبسات ،ماخلاتوش يستوعب جلسات على رجليه حنوكها بحال ماطيشة و نطقات وهي حادرة راسها

وعد : سمح ليا

فلاشباك 🔙

فالوقت لي خرج فيه نبيل من لبيت وهي رجعات تخشات فبلاصتها ،هزات تليفونها داخلة لفايسبوك لي صايبو ليها هو نيت شحال هادي و بقات كاتعلم ليه شوية بالشوية... دخلات لواحد لكروب ديال لبنات غير هاد الشهر، كايحطو فيه لعجب لمتعجب ها لي كاتهضر على صاحبها ها لي كاتهضر على راجلها و كايديرو لي تشالنج بيناتهم خالقين السعادة... و هي غير كاتفرج و ضحك عمرها دارت تعليق ولا جيم، كاتستغرب لجرأة لي عندهم فداكشي لي كايحطو و المواضيع لي كايناقشو ماعرفاتش بلي غادي يجي وقتها و تدخل حتى هي تكتب لمشكل ديالها... زعمات راسها و حطات مشكلتها مع نبيل عاودات ليهم على حشمتها و على تقليقتو عليها، حطات لبوسط و نعسات قبل ما تصدق ماسحاه..

لغد ليه فاقت مبوقة ماشي من بالها اش دارت ماتفكرات حتى خرج نبيل و خلاها منشورة هي و فطورها و مشات لتليفون دخلات بالزربة لگروب لقات عرام ديال التعاليق فبوسطها كلشي كاايندب عليها و رادين اللومة ليها مكاين غير " اويلي راه راجلك مالو خوك تستري قدامو" وحدة أخرى كتبات ليها " نهار يمشي عند وحدة أخرى جي بكي علينا" و لاخرة كتبات " وا تعراي عليه راه حلالك" "شحال و نتوما مزوجين تي ايمتى غاتولفي حتى دوزو 30 عام ديال الزواج و تجلدي كلك" بقات هابطة فالتعاليق كاتقرا حتى لقات تعليق عليه بزاف ديال لي جيم البنت لي حاطاه مكتوبة حدا سميتها ادمن كانت كاتبة ليها" كايتعطى لفول غير لي ماعندو ضراس ماتعرفو تق'ح'بنو ماتعرفو تحلونو واش انا غانبقى غير نصح فيكم... فقصتيني اختي غاندير لايف على ودك مع 8 إلى بغيتي تعرفي ماديري دخلي تفرجي فييه راه شحفتوووني"

ضحكات على التعليق و حطات التليفون و هكا بقات النهار كامل وهي كاتسنى ديك التمنية توصل تربعات فوق الناموسية و جلسات عاسة فالكروب حتى بانت ليها الادمن طلعات لايف دخلات ل لايف و هما يتحلو عينيها فالبنت لي كانت خلف الشاشة جالسة مربعة يديها فوق المخدة و مايلة جهة التليفون لي باينة حاطاه فوق الطبلة حتى بانت لفرقة ديال صدرها من لپيجامة لي لابسة، شعرها كحل نازل على صدرها من لقدام كل شوية تخلل فيه صباعها.. بنت جمالها طبيعي بعيون سوداء و بشرة بيضاء صافية باينة مهلية فراسها و نقية، بقات كاتسنى لمشاهدات يطلعو وهي تنطق بصوت رنان

..... : فيناهي هاديك لي حطات بوسط لبارح تبان عندي دابا باش نهضر راه سناني لوبيا عليها "طلع ليها تعليق من وعد كاتبة ليها هاني" هاهي جااات زينة البنات لي مزوجة شهور هادي و باقة تلبس ليا پيجامات جدة و غا قولي ليا واش هذاك وجهك ولا گفاك داك الراجل لاش مزوج بيك باش طيبي ليه و تصبني لييه ؟؟؟ ها دوي ؟؟ إلى بغا الطياب و الشقى يجيب خدامة دير هادشي و تفوتو لديك الجيه... اييه مانساوش خاصك تكوني حادگة و تكوني متولة و نقية ولكن من قبل هااادشي كامل كوووني ق'حب' ة فالفراش اختي راه حلالك هذاك مراكيش كاتفسدي ولا كاديري شي حاجة حرام.. الحشمة راه عندها ايامها و خاصها طير راه كواك و عراك ما مرة ما جوج باقة مابغيتي طيري لبلاكة ولا كاتسناي حتى يطيروه ليك لق'حا'ب... نوضي تحزمي و كوني مرا ماتبقايش گالسة تغبني كي لبرهوشة..... كون غير كان راجلك شي واحد خايب ولا جلاخة نتي راه شكرتيه لينا يعني السيد مافيه مايتعاب نتي لي صگعة باغة تحرمي راسك و تحرميه معاك "بدات قاطقطق بصباعها فوق الطبلة" اليوم اليوم تلبسي شي شووميز مقزب ديلمو و طلقي ليا الشعور و تريحي و سيري حزري زمانك ماتخليهش يبات هاد الليلة حتى هي مقلق... وركي على راسك و حاولي تبادري نتي هاد المرة راه واعرة غير البداية مني تولفي انها تجي منك و انك تلبسي شوميزات بلا ما يقولها ليك هو راه غاتبقاي ديري هكا ديما... كون غير كان راجلك شي واحد خايب ولا جلاخة نتي راه شكرتيه لينا يعني السيد مافيه مايتعاب نتي لي صگعة باغة تحرمي راسك و تحرميه معاك "ضحكات كاتقرا التعاليق " هههه ناااري لي يسمعني يقول هادي پاطرونة ولا فايت فيها الزواج عشرة المرات... ياله دوزو بخير ماما كاتعيط اااه و عنداك ماتقوليش لينا اش درتي "بغمزة"

"نهاية الفلاشباك"

الطريقة باش دوات و گلسات فوق رجليه جابت ليه الضحكة، عارفها باغة تحزرو و عرفات غلطها واخا لحشمة قاتلاها... مايقدرش يقمعها دابا ولا يكسر خاطرها وهي لابسة و مقادة على ودو، حمقو الشوميز لي لبسات على جسمها الفتي... هز ليها راسها من ذقنها حتى شافت فيه وهو ينطق بابتسامة بعد ما وصل لمرادو من التخاصيمة لي تخاصم معاها...

نبيل : بدينا كانزعمو

وعد (بلعات ريقها و نطقات بتبرير) : مادرتهاش بلعاني انا...

نبيل (حط يدو على فمها) : شششش صافي لي فات مات، دابا غير جاوبيني واش غادي تزعمي غير ليوم ولا هادشي غادي يبقى ديما؟؟

وعد (بتوتر) : د ي ما

دور يدو على خصرها النحيف و ستوطن شفايفها فقبلة شغوفة مشاركين فيها الريق، دورات يدها على عنقو مبادلاه القبلة حتى نتهى بيهم المطاف فوق فراشهم اهاتهم مسموعة فالبيت...

من هذاك النهار بدات كاتزعم شوية ،واخا ماشي لدرجة داكشي لي باغي ولكن على الاقل مابقاتش بحال قبل وهادشي كامل بفضل الكروب لي ولات عاطياها فيه لجماعة مع البنات، كاتفاعل و تعلق مستافدة من تجاربهم و نصائحهم و فنفس الوقت مقشبة و شابعة ضحك معاهم... دوزات 3 شهور تعرفات فيها على بنات جداد لا فالكروب لا فالمدرسة لي دخلات ليها ، كتاسبات أصدقاء و تعلمات شلا شهيوات كل مرة تجي تجرب حاجة فالدار... فهاد 3 شهور علاقتها كانت مستقرة مع نبيل ولات كادير الخطوة الأولى وهو كايزعمها بكلامو و أفعالو...

هاد الويكاند عيطات عليهم ليطفة يدوزوه عندها باش تشبع من كلامهم و شوفتهم لباو ليها طلبها و جاو واخا وعد جات بزز منها بحكم انها عيانة زيد عليها حبيبة كاينة، معارضاتش نبيل غير حيت كاتعز لطيفة بزاف و مابغاتش تخسر ليها خاطرها.... بعد يوم كامل وهما عاطينها غير لجماعة و وعد جالسة معاهم كاتجاوب غير ب اه ولا لا ماعندها خاطر تهضر حتى وصل ليل، تعشاو فجو عائلي و كل واحد قصد بيتو... دخلات لبيت كاتسوط و نبيل وراها ، قرب عندها و دور يدو على خصرها وهي تنتر منو مخسرة سيفتها....

نبيل (عقد حجبانو) : مالكي تاني ؟؟؟

وعد (متوجهة لسرير) : والو غير عيانة باغة نعس

نبيل (ماعجبوش لحال) : قوليها بلا ماتنتري

وعد (تنهدات) :نبيل والله مقادرة نهضر

نبيل (قرب عندها شدها من دراعها بالشوية) : اشنو واااقع قالت ليك عمتي شي حاجة؟؟؟

وعد (دورات وجهها قاطعة النفس ناطقة بزز): لا

نبيل : وماااالك هضريييي

وعد (بلا ما تشعر تنترات منو و نطقات) : ما دوا معايا حد رييييحتك خنقااااتني مقادراش نگلس حداك ولا نشوف فييييك

نبيل (خرج عينيه مامتيقش اش كايسمع) :عاااودي اش قلتي

تزنگات و وجهها تقلب مقادراتش تسمع حتى صوتو كاتحسو كايزنزن ليها فودنيها بحال الدبانة، بلا ماتجاوبو توجهات لباب لبيت باغة تخرج وهو يتبعها...

نبيل : فيييين غادية الشريييفة واااش انا مكااانهضرش

وعد (ضارت عندو) : غانمشي نعس فالصالون هاد لبيت خنقني

نبيل (بالغوات) : وااااااش حماقتي ولا بغيتي تحمقي ديلمي فهااااد الليل ، اش هاااااد لخرااا كاديري تاني حتى قلت تقاااااديتي ونتي تعوااااجي

دارت هابطة فالدرووج مجاوباتوش وهو كايهلل من وراها حتى خرجات لطيفة و حبيبة من بيوتهم يشوفو اش واااقع...

لطيفة : اش واااقع ياك لاباس

وعد(عينيها مغرغرين) :خالتي عطيني شي فراش نعس فالصالون

لطيفة (بخوف) :علاش ابنتي مال بيتكم "شافت فنبيل" اش درتي لبنت

نبيل (بعصبية) : ماااادرت ليها والو هي لي كاتقلب كي الزمان

وعد (نطقات بالدموع و قالت اشنو فخاطرها) : مابغيتش نعس حداه اخالتي ريييحتو خااايبة و صوتو كاايضرني فراسي

لطيفة (سكتات كاتستوعب كلامها و قبل ماينطق نبيل سبقاتو بعد ما عنقات وعد عندها) : صافي ابنتي صافي ما تبكيش اجي نعسي معايا فالبيت ماتنعسيش فالصالون زيدي

نبيل ( عروقو غايطرطقو بالفقصة) : اش كااااتخربقي حتى نتي الواليدة "جر وعد عندو" زيدي نتي نتفاهمو

حبيبة (ميقات) : لفشوش لخاوي

لطيفة (خنزات فيها و شافت فولدها) : طلق لبنت غادي تبات عندي هاد الليل، سير تگلس فالصالون انا لاحقة علييك ياله سير

جارتها منو داتها لبيتها خلاتها مسرحة فوق الناموسية و خرجات عندو لقاتو گالس فالصالون كايهز فرجليه بعصبية...

لطيفة : مالك على ديك الجعرة كااااملة غير قول ليا

نبيل : واش مااشفتيهاش اش كادير الواليدة

لطيفة : رااااه نتا لي مايفتيهاش اش كادير أولد كرشي البنت عايشة معاك فدار وحدة ماقدرتيش تلاحظ بلي تبدلات انا كنت عندكم غير السيمانة لي فاتت نهار جيت انا و حياة شفتها ماشي هي هاديك لي طيباتو متاكلوش كلات غير داكشي لي جبتو من المخبزة اما ماكلة يديها ماقرباتش ليها... انا شكيت ولكن ميكت كانقول كون كانت شي حاجة كون بانت كتر من هكا ولكن اليوم تأكدت

نبيل (باستغراب) : علاياش كاتهضري الواليدة مافهمت والو كادوي بالالغاز

لطيفة (بابتسامة و عيون كايلمعو) : مراتك كاتوحم أولدي و وحمها جا عليك

يتبع...