محتوى القصة
جا وقت العشا و قالت مع راسها نمشي نكلمهم ينوض ياكلو حتى لمن بعد و يكملو كلامهم...... ماتوقعاتش بتاتا تلقاهم فداك الوضع، قالت مع راسها غادي نلقاهم غير كايهضرو و صافي.... تلفات ليها الهضرة ماعرفات تخرج ولا تبقى، كاتشوف فوعد عاطياها بالظهر حشمانة و نبيل كايشوف فيها مطمر
حياة (نطقات كاتفتف معارفة ماتقول) : ما ماصحابش ليا احم ما احم جيت نقوليكم راه غانحطو لعشا
نبيل (بهدوء) : واخا هاحنا جايين
حياة ( ضارت باش تخرج) : صافي "خرجات من لبيت وهي تنطق بصوت هامس" هانتي ليك على الراجل داخل سخون
توجهات لكوزينة تعمر الطباسل اما لداخل راه وعد مرگات بالجهد و بقات غادية جاية فالبيت بالحشمة من مها و من لوضع لي هي فيه مع نبيل لي كايزرب عليها حتى مكاتلقاش الفرصة فين تصدو، اصلا كاتحشم منو بزاف وغير كايقرب جيهتها كايتلجم ليها اللسان وهادشي مخليه واخد راحتو على الآخر ناسي أنه فالحالة العادية إلى جينا ل الدين ماعندوش الحق يقيسها حتى بصبعو حتى تلباس لخواتم و يقيس يدها باش يركب ليها الخاتم و هي ماشي على ذمتو راه حرااام فالدين ديالنا ولكن ولات حاجة عادية عندنا بحيث نهار الخطبة لخطيب كايركب لخطيبتو لخاتم و يوكلو و يشربو بعضياتهم التمر و الحليب.... حاجة ولات من التقاليد ولكن إلى رجعنا فيها ل الدين راه لا يجوز فما بالك التعناق و البوسان ولو فالحنك كايبقى بوسان و هو مزال محرم عليها ماشي حلالها... ولو هي مافكراتش فهادشي و دعقات راه هو عارف كلشي و الحلال بيِّن و الحرام بيِّن غير لواحد كايبغي يغطي الشمس بالغربال....
شاف فيها عاطياه بالظهر وهو ينوض يوقف عينيه ضاحكين كايطلع فيها و ينزل حتى قرب عندها و دورها عندو
نبيل : مانبغيش نشوف دموعك مزال "جرها من يدها" ياله نخرجو عندهم
خرجو هو وياها عندهم لقاو حياة بدات كاتحط فالعشا هي و نعيمة... جلسو فالبلاصة فين كانو و بداو كياكلو و كايهضرو فأمور مختلفة حتى سالاو عاد نطق راجل سعيدة بفضول
خالد : غاتكونو تافقتو اسي نبيل
نبيل (بجدية) : تافقنا ان شاء الله قبل العيد ب 15 يوم نديرو العقد و حفلة بيناتنا بحكم ان وعد مابغاتش العرس و انا حتارمت قرارها دابا عندنا شهر نجمعو فيه الوراق و نقضيو الغرض ان شاء الله
لطيفة : كنا بغينا نديرو العرس أولدي باش نفرحو بيكم
نبيل : حتى دابا فرحي بينا اميمتي حفلة بيناتنا كافية و وافية
حبيبة (عوجات فمها و نغزات لطيفة كاتوشوش ليها) : هاهي بدات تحكمو من دابا البرهوشة
لطيفة (بصوت منخفض) : سكتي شوية
حياة (بصدمة) : شهر ماشي زربتو
نبيل : شهر كافي و واافي نديرو فيه كلشي
هزات عينيها فبنتها كاتصيفط ليها القرطاااس على هاد القرارات لي كتاخد منها لراسها بلا ماتشاااور معاها.... وعد غير شافت مها كي كاتشوف فيها دورات عينيها عارفة بلي تابعها موال طويل عريض مني يمشيو الناس....
خالو (تدخل) : مادام هما تافقو حنا ماعلينا غير نقولو الله يكمل بخير والله يجعل كلشي مبارك و مسعود
لطيفة (باستسلام) : داكشي لي كاين "شافت فحياة" سمعينا شي تزغريتة الالة حياة
زغرتات بهلا يطريه ليها و الفقصة طالعة نازلة فييها... تافقو على كلشي و حطو النقط على الحروف عاد ناضو باش كل واحد يمشي بحالو، خرج نبيل و عائلتو و تبعوهم خالات مها بقات غير نعيمة باش تعاون حياة فالماعن لي بقاو.. هاد الأخيرة غير سدات لباب ديال الدار نطقات بصوت حاااد كاتعيط على وعد لي بقات لفوق كاتبدل فحوايجها
حياة : واااااااااعد واااا موصيبة كرشي خرجي عندي لهنا
نعيمة : حياة خلي لبنت دير لي بات لاش بيتي تنكديها عليها
حياة (بعصبية) : هي لي منكداها عليا البرهوشة غاطرطق ليا مرارتي "توجهات عندها لبيت مني ماخرجاتش لقاتها ياله حطات القفطان من يدها وهي تبدا كاتهلل" كيييفااااش مابغيتيش العرس هااااا وليتي ديري كلشي من رااسك ماعندك معامن تشاوري
وعد ( عقدات عجبانها) : زعما معارفاش علاش مااايغيتش العرس
حياة (كاتغوت) : لا الالة معاااارفاش باااغة تحرمي راااسك من العرس لي غادي نسدو بيه الفام و نفقصو بيه العدياااان
وعد (تعصبات ) : واااش نتي معارفاش بلي راااجلك باقي موتو مداز عليه عام كامل و
حياة (قاطعاتها) : واش غانتي لي مات ليك باك گااااع هادو لي تزوجو فهاد الدنيا و دارو لعراسات ماماتوش ليهم لواليدين
اللسان القاصح هو لي معروفة بيه حياة لي جا على لسانها تقولو و ماتحنش فالشخص لي قدامها عارفة علاقة بنتها مع باها وبلي فرحتها غاتكون ناقصة بلا بيه ولكن همها هي فهاد اللحظة هو تفوح و تبان على الناس المشاعر و الأحاسيس اخر حاجة تفكر فيهم... شافت فيها وعد بعتاب و ضارت عطاتها بالظهر بلا ماتجاوبها بحالا مادوات ،هنا تدخلات نعيمة كاتجر فحياة لي باقة مخرجة عينيها فبنتها حتى خرجاتها من البيت ...
نعيمة : زيدي زيدي و نعلي الشيطان دابا تافقو ولي عطا الله عطاه هي كاضيعي الحجرة و تفقصي بنتك فنهارها
حياة : فقصااااتني فقصااااتني
مشات لكوزينة كاتبرد غدايدها فالماعن و نعيمة مشات هزات لكادوات لي جابو لوعد ولي مزال مشافتهم حدها بانو ليها من بعيد فوق الطبلة مني ركبو لخواتم من بعد مابقاتش شافتهم....
نعيمة (دخلات عندها) : شدي ايلي اتكوني بيتي تشوفي كادواتك "حطات داكشي فوق الناموسية" الحنة خليتها فالبيت "دوزات ليها على شعرها" الله يتبت الغرس ان شاء الله
وعد : آمين ياربي
خرجات خلاتها كاتقلب فيهم فرحانة ناسية كلام مها نسبيا كاتشوف اشنو جابو ليها وعينيها كايلمعو....لقاتهم جايبين ليها جوج ثواب واحد ديال جلابة و واحد ديال قفطان و پاك فيه ريحة و جيل دوش و مرطب الجسم و طالك حلاتهم كاتشم فروايحهم لي حمقوها عاد مدات يدها لصنيديلة طالونها قصير كاتلمع بصاكها... وصلات لاخر حاجة وهما يتزنگو حنوكها مني جبدات جوج ديال دوپياس واحد بيض واحد حمر مع پيجامة فالغوز....
غطسات تما وسط كادواتها في حين نعيمة مشات عند حياة لقاتها كاتغسل لماعن وهي تبدا كاتمسح فيهم حتى سالاو عاد مشات لدارها و حياة مشات تكسلات فوق السداري مابقاتش طلات على وعد... هاد الأخيرة كانت جمعات داكشي و شادة الجماعة فالتليفون مع نبيل لي كان حتى هو دخل بلاصتو مخلي مو و عمتو لتحت دايرين الجلسة لمشهورة لي كايديروها جميع العائلات المغربية مني كايرجعو من شي خطبة ضروري خاص يحللو و يناقشو كلشي....
حبيبة (كادور فراسها) :اش ديييييك الداااار الطيفة واش الناس كايزيدو لقدام و ياخدو بنت الشان و المرشان و ولدك مشى لدار مافيها حتى راجل يحكمها مها دايرة رجل فوق رجل كي القايدة و كاتشرط... والله كون ماخفت ولدي نبيل يتقلق مني كون عطيتها جوابها
لطيفة (تنهدات) : علاش هاد الهدرة دابا هو غايتزوج بالبنت ولا ب مها و زايدون الفقر ماشي عيب... البنت درويشة و داخلة سوق راسها مافيها خفة مافيها تفرفير و داكشي لي بغيت لولدي انا باش يدير دارو و وليداتو كي گرانو
حبيبة (باستهزاء) : امممم درويشة كتاكل من الخنشوش وهي دغيا قلباتو علينا حتى العرس مابغاش يديرو
لطيفة : يا لالة يضبرو راااسهم و زايدون ماقلبو حد علينا بغا يديو لخاطر لخطيبتو الله يسهل عليهم "ناضت" انا ضرني رااسي نمشي نعس "بتحذير" بلا ماتقولي ليه هاد الهضرة غدا يصدق دااير فيك
حبيبة (ضربات فمها) : هاك افمي، بغيت مصلاحة ولد خويا ولكن انا ديما كلامي مكااايعجب حد
خلاتها كاتمسكن بوحدها و دخلات لبيتها تنعس، مكاتبغيش تشاد معاها فالهضرة ولا تقمعها حيت عارفاها دغيا كاتحسس و تمرض غا بوحدها بحكم انها عمرها تزوجات رزقها مجاهاش و بقات عايشة مع واليديها حتى ماتو و سكنات مع خوها حتى مات و بقات مع مرتو و ولدو.... فينما يدور فيها شي واحد كاتبدا تبكي و تشكي و تقوليهم حاگرييني حيت مجاش رزقي و كلما تسمع شي وحدة تزوجات كاتبدا تفقص و تغدد غير بوحدها نسات بلي داكشي أرزاق و الأرزاق بيد الله عز وجل لي مكايبعد علينا لحاجة حتى كايكون فيها ضرر لينا و اي حاجة عطاها لينا خاص نحمدو عليها الله حيت اكيد فيها شي حكمة....
******
أصبحنا وأصبح الملك لله 🌞
حلات عينيها فوق الناموسية و كادواتها ضايرين بيها غير جات فيهم عينيها و هي تبتاسم وناضت من بلاصتها مشات لطواليط و رجعات جمعات لفراش و خرجات كاتقلب على حياة لي سمعات حسها فالكوزينة و دخلات عندها ناعلة الشيطان كاتحاول تبلع داك الكلام لي قالت ليها بالليل واخا حز فقلبها بزاف ولكن مابغاتش شي حاجة لي تنكدها عليها فهاد الايام براكة موت باها حارق قلبها و مامخليهاش تفرح بخاطرها...
وعد(عنقاتها من اللور) : صباح الخير
حياة (ضارت عندها باقة مغوبشة) : صباح الخير
وعد (مابغاتش تجبد موضوع لبارح) : شفتي لكادوات لي جابو ليا
حياة(منفخة) : مالحقتش نشوفهم مزيان
وعد (جراتها) : اجي نوريهم لييك "دخلاتها لبيت كاتوريها كل حاجة بوحدها و حياة عاطياها اهتمامها واخا وجهها باقي مقلوب حتى هزات وعد داك المرطب مداتو ليها" هاكي هذا خوديه رطبي بيه يديك عرفتهم كايمشگو ليك مع الماعن
حياة(حلاتو شمات ريحتو وهي تبتاسم) : ريحتو غزااالة "تفشات دغيا و بدات كاتفتي عليها اشنو دير فالثواب باش تخيطهم و اشنو دير ليهم عاد ناضو لكوزينة يفطرو وهي تنطق بتمسكين " انا بغيتك ديري لعرس باش نفرح بيك و نشوفك عروسة راك عارفاني خضرة و مكانعرفش ندوي نقول لي قلت راك كاتبقاي بنتي و باغة ليك غير مصلاحتك
وعد (تنهدات) : عارفة اماما عارفة راه حتى دابا غادي تشوفيني عروسة لعرس دابا تافقنا عليه مانقدرش نرجع فكلامي
حياة : هاد لمرة تشااوري معايا اللول عاد هضري
وعد (دايرة ليها خاطرها) : واخا
حياة(بقات ساكتة شحال عاد نطقات) : اجي نقوليك
وعد : اشنو
حياة (صغرات عينيها) :لبارح شفت السيد خاشيك فيه ياكما كان كايشلقم فيك؟؟
خرجات فيها وعد عينيها بصدمة و جميع ألوان الطيف دازو فوجهها توقعاتها تسولها ولكن ماشي بهاد الطريقة...
وعد : اش كاتقولي اماما
حياة : قلت غا داكشي لي شااافت عيني ابنت كرشي
وعد (ناضت بغات تخرج) : كنت غير كانبكي و بغا احم " باحراج" يسكتني
حياة : دوزي رجعي لبلاصتك ندوي معاك رجعي
وعد (رجعات گلسات حشمانة) : هاني
حياة : دابا ماعرت اش كنتو لبارح كاديرو فالبيت ولكن لي نوصيك ماتخليهش يقرب ليك باش مايقولش هادي خفيفة و يزيد و يخليك شحال من وحدة طرا ليها هكاك كايبغي الراجل غير يجربها واش تخليه ولا تحشم و تبعدو... راه الرجال خطاااااار سمعنا العجب على هادشي، حشمي و تبتي و رزني مني تزوجو ديرو ما بغيتو نيت راه كايبان ليا داك الراجل عندك زربان على رزقو
خايفة غير لا يهرب و يخليها نسات بلي داكشي حرام... فبلاصة ماتفقه بنتها و تنصحها بالدين و الشرع اش كايقولو بحال الأمهات لي بعقلهم و عارفين بينهم و بين الله كل همها الراجل غايهرب يعني كون مكانتش هاد الفكرة فبالها عندها عادي يبوس و يعنق فبنتها....
ناضو كايجمعو لماعن و مجمعين فنفس الوقت حتى كاتسمع وعد تليفونها كايصوني مشات كاطير لبيت لقاتو نبيل
وعد : الو
نبيل : الو حبيبة
سقلات مجاوباتوش وعينيها كايدورو وسط راسها اي حاجة كاتجربها معاه فهي جديدة وهادشي لي كايقدم ليها من نهار دخل ل حياتها ماتنكرش انها كانت محتاجاه و باغاه حيت كان عندها فراغ كبير و مفتاقدة الحنان و الأمان وهادشي عطاه ليها نبيل فمدة قصيرة....
نبيل ( ضحك بخشونة) : ههه شكون كلا ليك لسانك تاني
وعد : احم
نبيل : دابا تولفي الزين ديالي و نحيدو هاد الحشمة شوية بالشوية "شافها باقة ساكتة و هو يكمل كلامو" عيطت باش نشوفك كي صبحتي و نعلمك على تيساع باش ديري بحسابك غدا فالعشية تخرجي نتي و ماماك مع لواليدة و عمتي باش تشريو داكشي لي غايخصك لدفوع
وعد : واخا صافي انا غانقولها لماما
كملات معاه الهضرة وهي تمشي عند حياة لقاتها كاطيب لغدا وقفات حداها و بدات كاتعاود ليها اشنو قال ليها حتى شافتها لاحت لموس من يدها بنرفزة...
حياة : علاش ماااايخرجش هو يتقدا معاك الراس فالراس جار معاه دوك الجوجات "عوجات فمها" الناس عندهم عدوزة وحدة ونتي عندك جوج
وعد : واقيلة ماعندوش مع السواق اماما واصلا داكشي ديال لعيالات
حياة : سيري تزمري اش تعرفي غايكونو هما لي قالوها ليه باغين يديرو عليك الرجل من دابا ونتي حالة فمك كي لبهيمة
وعد : دابا اش وصلنا لهاد الهضرة واش شفتي منهم شي عيب؟؟؟ الناس شفناهم جوج مرات رديتيهم مايسواو مايصلاحو
حياة (ضارت تكمل شغالها) : ايوا نهار يوصلك منهم الصهد لاتجيش تشكي و تبكي عليا
بقات غير كاتشوف فيها ماعرفات باش تجاوبها فالاخير خرجات من لكوزينة كاتسمع لميساجات كايوصلوها فالواتساب ،دخلات لقات نبيل مصيفط ليها التصاور لي صوروهم لبارح.... جلسات كاتفرج فييهم و قلبها كايضرب متملكها احساس غريب ماعرفاتو فرحة ولا خلعة ولا رهبة من داكشي لي جاااي....
الخاتم فيديها كل شوية تشوف فيه و تلعب بيه بين صباعها و فجأة جا بين عينيها منظر نهيلة و راجلها نهار جاو شراو من عندها الخبز ... تخيلات راسها بلاصة نهيلة و نبيل بلاصة راجلها حتى لقات راسها مبتاسمة بلا هواها لمجرد التفكير فهاد اللحظة....
النهار و ما طال وهي كاتفكر غير فالحياة الجديدة لي كاتسناها كيفاش غادي تكون... نبيل صونا ليها فالپوز ديال الغدا ديالو حتى هو كايحاول يتواصل معاها كتر باش يزيدو يتعرفو على بعضياتهم قبل الزواج... وهكا داز النهار عند الطرفين بجوج و جا يوم جديد فين غادي يمشيو باش يبداو يتقداو لدهاز...
واقفة قدام لماريو كاتشوف اشنو تلبس حتى حاجة مكاتحمر الوجه عندها....
حياة (واقفة كاتلبس جلابتها) : ساعة ونتي واگفة تما بغيتي داك الماريو يولد ليييك راه داكشي لي تكسااابي هو لي تما
وعد (بتذمر) : كلشي كااااشف مافيهم مااايتلبق
حياة : ايوا گووليها لراسك فين كنتي ماقلتي ليه يكسيك
وعد (خرجات عينيها) : واااش منيتك نقوليه كسيني برااكة هادشي لي دار معانا كامل نزيدها بكسيني
حياة : و مالها اش فييها راك غادي تولي مراتو واقيلة اشمن حالة هادي مني تركبي حداه مبهدلة وهو لابس و محلق على حالتو ريحتو كانشموها من الدروج
وعد (سكتات كاتخمم وهي تنطق) : غانشوف وئام بنت خالتي نعيمة تسلفني شي لبسة حتى نشري من بعد
حياة : حيدتيها ليا من فمي عاد كنت غادي نقولها ليك نيت هي فورمتها بحالك
نزلات فالبلاصة كاطير فالدرووج باش تلحق تلبس قبل مايجيو.. دقات على نعيمة لقات بنتها عاد جات من الخدمة طلباتها على شي لبسة وهي تجبد ليها واحد الكسوة سامپل بالكمام و طويلة حتى لتحت مع بوندو ديالها
وئام : هاكي راه لبستها هي مرة وحدة باقة جديدة
وعد (بفرحة) :يحفظك ليا الزين
وئام : هانية حنا خواتات
هزاتها و طلعات كاطير فالدرووج لبساتها و طلقات شعرها حيت مزال مصايب من الخطبة كايبان مسبسب و دارت البوندو فوق راااسها ولات كاتبان وحدة أخرى... مشات لصندوق لي كايديرو فيه الصبابط حطاتو كامل فلارض عاد لقات واحد الصنيديلة كانت خداتها من لبال و صدقات ليها زوينة...
حياة (شافتها اش جبدات) : كنت غادي نسولك على هاد الصندالة فين غبرتيها
وعد : مكانش عندي فين نلبسها "رجعات داكشي و ناضت" نمشي نمسحها
مسحاتها و لبساتها فرجليها عاد رجعات لبيت رشات من الريحة لي جابو ليها و دارت لحياة حتى هي وهو يصوني تليفونها برقم نبيل
وعد : الو
نبيل : وي وعد هاحنا واقفين لتحت.. واجدين ؟؟
وعد(بتوتر) : اه هاحنا نازلين
نزلات هي و خلات حياة وراها عاد نازلة لقات نبيل خارج من الطموبيل كايهضر فالتليفون كان لابس قاميجة فالباج مع سروال دجين غير نزلات ركز عينيه عليها متكي على طموبيلتو ماحيدش نظرو عليها حتى وترها و حدرات عينيها حمدات الله كايهضر فالتليفون اما كون حشمها بكلامو تاني...
بانت ليها لبلاصة لقدام خاوية وهي تحل لباب اللور باش تسلم على مو و عمتو... من بعد السلام و السؤال على الأحوال نطقات بهدوء
وعد : خالتي هبطي ركبي لقدام غير خليني انا هنا
لطيفة(بابتسامة) : نزلت من تما ابنتي على ودك دابا هاديك ولات بلاصتك جلسي حدا راجلك
وعد : ولكن
لطيفة : مكاين ما ولكن سمعي الكلام، الله يرضي عليك
بتاسمات ليها و خرجات من الطموبيل بلا ماتزيد لهضرة ، سدات لباب كاتشوف وراها لقات حياة عاد كاتسد باب الدار تسناتها حتى قربات و حلات ليها لباب باش تركب هاد الأخيرة مع حلات وعد لباب جا كلام حبيبة نيشان لودنها
حبيبة(عند بالها كادوي بالشوية) : مااحكراتش عليك تنزلي ولا تقول ليا انا نزل نركب حداه دايرة فيها مصوابة وهي باغة طيييير
حياة (ركبات حداها و نطقات بضحكة) : ويلي اخالتي حبيبة دايرة رااسك فوحدة تجي قد حفيدتك... بنت صغيرة بغات تفرح براسها و تركب حدا خطيبها فيناهو الطيراااان
لطيفة بغات تندب على التحشيمة لي دارت ليها لوستها اما حبيبة وجهها زراااگ بالمرگة لي مرگاتها حياة بدات كادور عينيها وهي تنطق بحالا مدارت والو مابغاتش تبين....
حبيبة : ماقلت عيب كان خاصها ت...
لطيفة (قاطعاتها بضحكة صفرة) : لالة حياة ماتديش على حبيبة كاتبغي تضحك و تقشب شي مرات و الناس كايفهموها غلط
حياة : ايوا إلى هكا مافيها باااس تضحك معاها راها بحال حفيدتها "ضرباتها على كتفها بالضحك" ههه ياله اخالتي حبيبة
عاودات ليها تاني حفيدتك و خالتي بلعاني حيت طلعاتها بلي مارضاتش... فهاد الأثناء طلع نبيل لطموبيل وهما يسكتو حياة تقادات فالكلسة و حبيبة جمعات فمها بحال النقطة فگعانة حداها لطيفة كادعي الله تخرج هاد الخرجة على خير....
وعد لقدام جامعة يديها عندها كاتشوف فنبيل بنص عين لقاتو كايشوف فيها وهو كايديماري مع جات عينها فعينو غمزها كاايضحك حتى حدرات عينيها عاد هز عينو فالمراية لقى حياة حاضية معاهم... حمحم كااايركب فالصمطة وهو ينطق
نبيل : مشينا
لطيفة : سير عالله اولدي
شد بيهم الطريق طالق الراديو بصوت منخفض، لطيفة كاتحاول تجبد شي موضوع مع حياة باش تلطف الجو... شدو الجماعة و حبيبة وسطهم مربعة يديها و كاتشوف فاص ليها مادواتهمش حتى وصلو لمدينة فين وقف نبيل الطموبيل و شاف فمو من المراية
نبيل : لواليدة مني ترجعو غادي تلقاوني هنا نيت
لطيفة : واخا اولدي
حياة ( لي فيها مامهنيها) : علاه انسيبي مغاديش تمشي معانا تختار مع عروستك
نبيل (بهدوء) : غير تكلفو نتوما حتى نرجع ليكم "نزلات مو وهي تبعها حبيبة و حياة، حلات وعد الطموبيل وهو يشدها من يدها" بلاتي فين غادة زربانة
وعد (بشافت فيه) : احم لا مازرباناش
نبيل (داعب ظهر يدها بابهامو حتى تبورشات) : ماقلتش ليك جيتي زوينة "نزل عينو لكسوة" جاتك الكسوة قتالة
وعد ( بارتباك) : ش ش شكر ر ا
نبيل (هز خصلة من شعرها) : ياله سيري الزين ديالي تقداي ليك مع راسك انا غادي نمشي نتقهوى مع واحد صاحبي حتى تساليو و نجي ليكم نمشيو نتعشاو...
وعد : واخا
نزلات من الطموبيل مزنگة مقادراش تشوف فحياة حيت عارفاها كنت حاضياها من برا... قربات عندها لطيفة و دورات يدها على دراعها
لطيفة : أنا غادي نشد فعروستي نقرقب انا وياها الناب
حياة (بابتسامة) : خودي راحتك راه ولات بنتك دابا الالة لطيفة "لصقات حدا حبيبة باغة طرطق ليها المرارة فهاد النهار" انا نقرقب الناب مع خالتي حبيبة...
حبيبة (قلبات وجهها كاتسوط) : لا إله إلا الله
حياة : محمد رسول الله
ميقات فيها و مشات حدا وعد مخلاياها غادية جهة لطيفة من الجهة لاخرة.... غاديين فجامع لفنا كايشوفو فالحلاقي و القرودة و الحنوشة من بعيد، الدنيا كانت عامرة ها النصارة ها المغاربة شي غادي شي جاي...
دخلو مع واحد الزنقة وهما يبانو ليهم لمحلات ديال الجلالب و القفطان و التكاشط مخييطين مصايبين و كااينين حتى الثواب الألوان و الأشكال....
لطيفة (شافت فوعد) : بغيتي تشري الثواب ابنتي تخيطيهم ولا تاخدي داكشي طالع
وعد ( بحيرة) : إلى خدينا الثواب واش غايتعطلو فالخياطة
حياة (نقزات) : معلوم غادي يتعطلو راه الخياطة كاتكون عندهم الخدمة مغاديش يوجدو ليك كلشي فالوقت اللهم تاخدهم طالعين "كملات بفضول باغة تقلقل السوق" شحال ناويين تشريو ليها من لبسة
لطيفة (حسات بحبيبة كاتنغز فيها شافت فيها وهي تميق زعما سمعي على ودنيك) : هاحنا فيد الله ندخلو لمحل و نشوفو"شافت فوعد" اش قلتي ابنتي، نمشيو عند مول الثواب ولا لاخر لي عندو داكشي مخيط مصاوب
وعد : صافي اخالتي نمشيو عند مول الطالع
لطيفة : خير مادرتي ابنتي
توجهو للمحل لي الشوفة فيه من بعيد كاتخلي العيون يلمعو مع دوك الثواب و الألوان و التنبات لي كايجلب العين... دخلو لداخل گاع بان ليهم راجل فمتوسط العمر جالس ورا واحد الكونطوار و المتعلمية كايدورو تما خدامين مع الكليان
حبيبة (قربات عندو) : ها واحد السلام عليكم اسي ميلود
ميلود (هز فيهم راسو ببشاشة) : وعليكم السلام الالة حبيبة "شاف فلطيفة" لالة لطيفة زارتنا البركة مرحبا بيكم
لطيفة : ترحب بيك الجنة اولدي "حطات يدها على كتف وعد" جيتك اليوم بعروستي تجبد ليها احسن ماعندك مانحتاجش نوصيك
ميلود(بابتسامة) : هي نبيل نوا صافي
لطيفة : نوااا الحمد لله
ميلود : الله يجعل كلشي مبارك و مسعود... اش بغيتو تشوفو، نبداو بالقفاطن ولا التكاشط؟؟
لطيفة (شافت فوعد و نطقات ) : شحال من لبسة غاديري فنهارك ابنتي
وعد (سكتات كاتفكر ) : غانديرو غير فالدار اخالتي نلبس غير تكشيطة وحدة تكون بيضة براكة
حياة ( خرجات فيها عينيها ماكرهاتش طير عليها) : فين نسيتي الحنة غادي تخصك تكشيطة خضرة حتى هي
حبيبة (نقزات كاتميق) : الحنة غير قفطان خفيف قاضي فيها الغراض
حياة (هزات فيها حاجبها) : لا اخالتي "وركات على الكلمة" البنت مغاديرش العرس ايوا تلبس بعدا شي حاجة عليها القيمة
لطيفة (بتدخل خافتهم يتشانقو ليها تما) : حتى انا بغيت نكبر بعروستي احياة لحاجة المخيرة تكوون ليييها "شافت فميلود" جيب لينا تكاشط لعروسة فالبيض و ديال الحنة
ميلود : هي لي ماتعاود "نعت ليهم فالكراسة " جلسو رتاحو على مانجي
مشى يجيب ليهم اش طلبو وهما يجلسو، حبيبة و حياة قالبين وجاههم على بعضياتهم كل وحدة صادة فجهة اما وعد بقات كاتشوف فحياة والابتسامة مخفية على شفايفها... ماتنكرش انه عجبها لحال و بزاف گاع مني شافتها كدافع علييها حيت حتى هي مارتاحتش لحبيبة هاد النهار بحكم ان الخرجة بينات ليها شحال من حاجة وأولها راه بان فباب دارهم... لطيفة وسطهم كاتحاول تساااوي و تلطف الجو وهي حاسة بالعافية وليصانص مجموعين حداها يقدرو فاي وقت يشعلو.... قربات كرسيها عند حبيبة و گلسات كاتهضر بصوت منخفض
لطيفة : هااااا لعار احبيبة لاما سكتي ميكي مخاااصني بو صداع بغيت نفرح بولدي مكاين لاش تنكديها علينا
حبيبة (بقى فيها لحال) :يااااك امرات خويا وليت كانكدها عليك "قلبات وجهها" كااان خاصني لعقل خرجت معاكم مابغيتش يديروك وسطهم و يفتخوك كي بغاو ولكن معامن انا ندير لي درت نبان خايبة
ياله كانت غادي تجاوبها وهو يرجع ميلود و تابعو لمتعلم ديالو هازين التكاشط فيديهم...
ميلود (فرش اللولة فوق الكونطوار ) : هانا الالة لطيفة لحاجة الخيرة جبتها ليك
لطيفة : الله يكتر خيرك "شافت فوعد" اجي تختاري ابنتي
قربات عندها وعد عينيها كايلمعو ماعرفات اش تختار و اش تخلي حطو قدامها تكشيطة خضرة فيها الطرز من جهة الصدر وشوية التنبات و حداها وحدة ثليجة ولا الثالثة كانت منبتة كاملة من جهة الصدر... عينيها لصقو على هاديك المنبتة ماقدراتش تبعدهم حتى داك العقيق ولا كايبان كايلمع فعينيها...
وعد (شافت فحياة باغة تاخد رأيها و تكبر بيها قدامهم) : ماما شوفي هاديك لي من لهيه هي لي عحباااتني
حياة ( حمقاتها حتى هي) : غزااالة "دوزات يدها على كتفها" ذوااااقة بحال مك.
حبيبة (عوجات فمها ناطقة فخاطرها) :شكار راااسو خزييت
لطيفة : ذوقك زوين ابنتي غادي تجيك كاتحمق ان شاء الله
عزلوها لقنت و بدا كايوريها التكاشط البيضين لي كانو حتى هما وحدة تنسيك فلاخرة حارت وعد اينا وحدة لي تختار فييهم بزز استقرات على وحدة هماوية و عاطية لعين مشات قيساتها بانت فيها بحال الاميرة خلات لطيفة كاتقول تبارك الله و تعاود
لطيفة : ما شاء الله جيتي بحال لحمامة
حياة(شافت فحبيبة لي ما نطقات حتى حرف بنص عين) : الله يحفظ من العين ابنتي
وقفات قدام المراية الضحكة مرسومة على وجهها ماقدراتش تخبيها، عيونها البريئة كاايلمعو بفرحة بحال شي طفلة صغيرة عطاوها شكلاطة...
عاوناتها حياة ترجع تحيدها و بقات لطيفة مع ميلود كادور عينيها فالمحل و حبيبة جلسات فالكرسي بحالا جالسة على الشوك مقلقة و باغة غير ايمتى تمشي بحالها....
لطيفة : جبد ليا القفاطن نشوفهم و جيب ليا قياسها من اللول باش ماتبقاش تقلب عليه من بعد
جبد ليها اش بغات و فنفس الوقت خرجات وعد لابسة كسوتها... بدات كاتختار تاني حتى عزلات 3 القفاطن واحد جوهرة فالغوز و واحد موبرة بلومارين و واحد كريپ فالشيبي كلهم فيهم الطرز و التنبات من غير الجوهرة كان سامبل و مخدوم بالراندة....
لطيفة (طبطبات عليها) :بصحتك ابنتي
وعد (غاطير بالفرحة) :الله يعطيك الصحة اخالتي
لطيفة (شافت فحبيبة) : نوضي ختاري اش غتاخدي
حبيبة (ناضت منفخة) :غانمشي لهيه نختار
توجهات عند واحد المتعلم مشى معاها لجهة لاخرة من المحل خلاتهم غير كايشوفو....
لطيفة(ستغفرات الله فسرها و شافت فحياة) : لالة حياة ختاري اش بغيتي
حياة (بصدمة) : نعام
لطيفة (بابتسامة) : مامات لعروسة ضروري ناخدو ليها كادو ديالها حتى هي باش تحضري و تفرحي مع بنتك
هنا حياة تحلو عينيها و الفرحة بغات تخرج من ودنيها، مني دخلات لمحل عينيها حوالو فالقفاطن و التكاشط ماكرهاتش كون عندها لفلوس تشري حتى هي لدرجة ضرها خاطرها بسباب الفقر و الكحط لي راها فيه ولكن كلام لطيفة رد فيها الروح.... ولكن مابغاتش تبين وهي راه شوية و طير تعنقها بالفرحة
حياة (كاتحاول تخبي فرحتها) :بلا مانشقيك الالة لطيفة تبارك الله خديتو لوعد لحاجة لمخيرة ماتفكروش فيا انا
لطيفة : ايوا لاواه راه غانوليو عائلة وحدة مابيناتناش هادشي "باصرار" لكادو مكايرجعش الالة حياة حشومة تقولي لا
حياة : تء ولاهيلا حشمتيني اا لالة لطيفة ماعرفت مانقول
لطيفة : دوزي ختاري ما تلبسي الله يرضي عليك باش ندوزو لماتلبس عروستنا فرجليها
حياة (زعما راه قبلات بزز) :واخا لي بغيتي
مشات لواحد لقفطان معلق مني دخلات وهي كادور دور و تشوف فيه، موبرا فالكرونة و مطروز بالذهبي من الصدر حمقها... نعتات لدري لي كان تما و جبدو ليها دخلات قيساتو جاها على فصالتها..
وعد (دخلات معاها فبلاصة التقياس) :جاك زويين اماما
حياة(كادور قدام لمراية) : رجعني عشر سنين اللور هههه.... زيدي نحيدو باش نخرجو نشوفو اش خداو هما
حيداتو و لبسات جلابتها ،مني خرجو لقاو لطيفة خدات اش غتاخد و بدات كاتحاسب مع السيد.... مدات ليهم القفطان و وقفات بعيد هي و وعد مخلين لطيفة كاتخلص عاد خرجو من تما مخليين عندو داكشي حتى يرجعو عندو من مول الصنادل لي مشاو خدات وعد جوج صنيديلات دومي طالون و جوج بلغات وحدة عالية و وحدة پلا عاد رجعو عند مول التكاشط هزو من عندو داكشي و صيفط معاهم واحد الدري من هادوك لي عندو هز معاهم حيت كليان ديالو و معرفة قديمة وصل معاهم كلشي حتى ل الطموبيل فين كان كايتسناهم نبيل كان ظلام الحال.....
نبيل (قرب عند الدري خدا منو داكشي من بعد ما حل الكوفر وشاف فمو) : قضيتو الغرض
لطيفة : حيدنا علينا الربع ديال الدهاز
حط كلشي فالكوفر و فهاد الأثناء كانو ركبو كاملين فالطموبيل بقات غير مو واقفة حداه
نبيل : ياك خديتو حتى ل راسكم و مها ؟؟
لطيفة : كون هاني اوليدي كلشي خدا مها مكانتش باغة فاللول قلت ليها هذا راه كادو و كدا عاد بغات
نبيل : مزيان
نبيل دار فبالو بلي مها اكيد مغاديش يكون عندها باش تشري لحوايج لي تحضر بيهم مع بنتها و باش وعد تكون مرتاحة فنهارها ويدوز كيفما بغا فكر حتى فمها و وصى مو بينو و بينها باش تاخد ليها شي حاجة ولكن بلا ماتحسسها بلي كاتنقص منها ولا تخليها تفهمها غلط....
سالا الهضرة مع مو و حل ليها لباب ركبات عاد طلع هو حدا وعد بتاسم ليها و رجعات ليه الابتسامة الفرحة باينة فعينيها الشيء لي لاحظو و خلاه يحس بالرضى... ديمارا الطموبيل من بعد مانطق مخاطبهم
نبيل : نمشيو نتعشاو عاد نرجعو لدار
توجه لگيليز نيشان لبحرية مطعم معروف تما كايقدم غير المأكولات البحرية... دخلو شدو بلايصهم جا عندهم السرباي عطاوه طلباتهم و جلسو مجمعين فجو هادئ بعدما حبيبة ضربات الطم مني خرجو من المحل مانطقات بكلمة....
نبيل (شابك يدو مع الطبلة) :ماحدنا مجموعين بغينا نتافقو على واحد الحاجة
حياة : الله يسمعنا خيير
لطيفة : مكاين غير الخير ان شاء الله... بغينا غير نقولو ليكم الحفلة لي غادي نديرو من ورا العقد تكون عندنا فالدار حيت...
حبيبة (نقزات وسط الهضرة فمها واكلها ماقدراتش تسدو) : حيت عندنا عائلة كثيرة مغاديش يقدو فداركم
حبيبة من النوع لي واصلة بيه لعظم و فبلاصة ما يحمد الله على داكشي لي مكتب ليه و يستغفر ربي و يديها فصلاتو، كايقابل عباد الله و يبرد فيهم سمو و الفقصة لي عندو لداخل... فمها ماتقدرش تشدو عندها إلى مابخاتش سمها مكاترتاحش..
هز فيها نبيل راااسو بشوفات ديال القرطاس عارف عمتو سامة و عيى يوصي مو باش تدوي معاها تلجم فمها حيت إلى دوا هو معاها غايصدق خاسر معاها و تجيب عليه سبتها.... هاز راسو فوعد لقاها حادرة رااسها كاتلعب بيديها باااينة ماعجبهاش لحال من كلام حبيبة و طريقتها عاد حول عينيه لحياة لي كاتعض على فمها باش تحبس لسانها لي واكلها يعطي لحبيبة علاش تقلب ولكن خافت تزبلها و تفرتك الجوقة قبل مايديرو فالطاجين ما يتحرق.... آخر حاجة تبغيها حياة فهاد الساعة هي هاد الزواج مايكملش ،هي عاد تحلو ليها العينين و بدات تشوف لحياة و تخرج الدور و تركب فطموبيل عليها القيمة و تشري تكشيطة ما شراتها حتى فعرسها مع عبد السلام....
عم الصمت شي كايشوف فشي و كل واحد شاد فمو لايقول شي حاجة يندم عليها حتى نطقات لطيفة حشمانة من الموقف...
لطيفة : لالة حياة حاشة واش يكون هذا هو كلامنا ولا مقصودنا... حنا مابغيناكمش تمحنو مع تمارة و الروينة انا عندي لمرا فالدار هازة عليا كلشي و كاتجيب معاها ختها تعاونها مني كايكونو عندنا الضياف حسن ماتمحني نتي و تبقى ليك الدار مرونة
حياة عارفة مزيان بلي سبب هادشي هو داكشي لي قالت حبيبة حيت بالصح ماعندهاش فين تستقبل بزاف ديال الناس وهي اصلا مباغاش الحفلة تكون عندها فالدار، الخطبة و قبلات على عينيها كون ما وعد لي حكرات و لصقات فالهضرة...
حياة : عارفة لي كاااين الالة لطيفة و لي درتوها انا معاكم فيها غير هو الدفوع خاصو يجي لدار لعروسة
وعد (نطقات بعد صمت طويل) : الحنة غادي نديرها فدارنا يجيبو الدفوع نهار الحنة نيت
لطيفة (برحابة صدر) : مزيانة ابنتي حنتك ديريها فداركم و لغد ليه ان شاء الله ديري حفلتك و تروحي لدارك
حياة (بابتسامة) : ان شاء الله
نبيل (بان ليه السيرڤور جايب لي پلا ديالهم) :مادام تافقنا و حطينا النقط على الحروف نتعشاو دابا على خاطرنا
لطيفة : باسم الله
بداو كايتعشاو و كايتبادلو أطراف الحديث و گاع هضرتهم على الزواج و اشنو مزال تابعهم يشريو و اشنو غادي يديرو....وعد كاتسنط ليهم و ساااكت كلما كاتجي سيرة الزواج و تفكر بلي مابقى والو كاتكمش عليها معدتها و الخلعة كاتشدها من صبعها الصغير...
سالات ماكلتها و رجعات اللور كاتمسح فيديها و هما مزال كياكلو حتى بان ليها نبيل حتى هو رجع اللور و شاف فيها...
نبيل : نوضي نغسلو يدينا
وعد : واخا
ناضت معاه فصمت توجه بيها لطواليطات هو دخل جهة الرجال و هي جهة لعيالات، غسلات يدها و خرجات كاتسنى فيه حتى بان ليها خارج كايبتاسم ليها قرب عندها مدوز يدو على كتفها و نطق بحنان
نبيل : تقلقتي؟ ؟
وعد : علاش
نبيل : من كلام عمتي
وعد ( بهدوء) : ماعرفتش الصراحة هي عندها الحق ولكن هاديك ماشي طريقة
نبيل : هي هكاك دايرة مكاتعرفش تهضر تجنبي انك تحتكي معاها و انا غادي نكون حريص على أنها ماتوصلك بحتى كلمة ممكن تقلقك "داعب ذقنها بابهامو" هاد الوجه مكاتجيش معاه التقليقة
وعد (تزنگات) : احم
نبيل : ياله نمشيو عندهم غايكونو سالاو لماكلة "مشاو لقاوهم عاد نايضين يغسلو حتى هما ،شاف فمو و نطق" لواليدة حتى تلحقو علينا لطموبيل
لطيفة : واخا أولدي
جر معاه وعد و مشى يخلص عاد توجه بيها لطموبيل وهي كاتعرق و تنشف كاتحس بيدو محطوطة على كتفها مرة مرة كايحركها وهو كايهضر وهي كاتجاوبو غير ب اه ولا لا حتى وصلو لطموبيل حل ليها لباب باش تركب عاد داز هو لجيهتو ركب كايشوف فيها كاتقاد فالكسوة و تنزل فيها على رجليها حتى هبط شعرها الكحل على كتافها حاجب عليه رأيت وجهها وهو يدو رجعو ليها ورا ظهرها حتى شافت فيه...
نبيل : جبت ليك معايا شي حاجة
وعد (بتاسمات) : اشنو هي ؟؟
نبيل (مد يدو لبواط أكون حلها و جبد ساشية من تما حطها ليها فوق ركابيها) : قلبي اش تما
حلاتها بفضوول و هما يبانو ليها باكيات ديال الشكلاط و الحلوة و شي بيموات حتى هما ديال الشكلاط... بتاسمات بفرحة بنت صغيرة شراو ليها السقاطة و هزات فيه راسها
وعد : شكرا بزاااف
نبيل ( داعب خدها) : هاد شكرا مانبقاش نسمعها صافي مشاو الرسميات بيناتنا حاجتنا وحدة
وعد (بحياء) : اممم
نبيل (ضحك) : اممم كايتقاداو ليك مني كاتحشمي ههه "هز راسو بانو ليه قربو لطموبيل" هاهما جايين
ركبو اللور بثلاثة و وعد جمعات هاديك الساشية حتى لدار و تحلها... مسافة الطريق كانو قدام باب الدار نزلات وعد و مها و نزلو معاهم نبيل و مو باش يسلمو عليهم... لطيفة شدات فالباب و نطقات مخاطبة حياة بصوت منخفض
لطيفة : لالة حياة ماتديش على حبيبة و مسحيها فيا بغيتك تمشي و خاطرك صافي من جهتنا
حياة ( بتاسمات و نطقات بصوت مسموع كاتسمع الهضرة لحبيبة) : ماااشي موشكيل الله ياودي الخواطر صاافية خااالتي حبيبة بحال مي مانتقلقش منها راني عارفة الناس لكبار مساكن جيب يا فم و قول مافيها باس...
سلمات على لطيفة لي جاتها الضحكة و هنا عرفات و تأكدات بلي حياة مساهلاش ولي جبدها كايلقاها.... ركبات لقدام كاتشوف فحبيبة من المراية بان ليها وجهها زاد تكمش بالفقصة.... مادواتش معاها و حولات نظرها لنبيل لي كان كايهضر مع وعد حتى بان ليهم حل لكوفر مد ليها ميكة من المياكي لي تما عاد طلعات لدارهم تابعة مها و رجع هو لطموبيلتو مع ركب و ديمارا غادي من تما نطق بجدية
نبيل (كايشوف فعمتو من المراية) : شوفي اعمتي انا ماعندي ماندير بالمشاكيل و المعاطية ديال لعيالات فوتي عليك بنت الناس وخلينا نعيشو طرونكيل
حبيبة (مارضاتش) : عطيني أولد خويا عطيني مني عارف راسك غاتصبني بلا ماتقول ليا عمتي غير قول ليا حبيبة نيشان "بتمسكين" شحال راريت بيك و ركبتك فوق ظهري مني كنتي صغير و شحال ديتك لمدراااسة فاللخر دير ليا هاد لحالة على وحدة عرفتيها غير لبارح
نبيل (ساط) : أنا قلت ليك جوج كلمات عارف راسي ماقللت عليك الآداب معايرتك طلبت غا التيقاو و راحة لبال
حبيبة (بدات تبكي) : ايييه ايييه عندك الحق انا غا عمتك وهاديك غاتولي مراتك ماشي موشكيل أولد المرحوم
لطيفة (طبطبات على ولدها) : ماتعصبش أولدي راك كاتصوگ "ضارت عندها" قولي أعوذ بالله من الشيطان الرجيم احبيبة مقالش كلمة العيب خلينا نفرحو بيه شحال و حنا كانتسناو هاد النهار فاللخر نبداو نبشو على المشاكيل
الطريق كاملة وهما على هاد الحال هما كايهضرو وهي كاتغبن عليهم و تمسكن و ديما هذا هو حالها كادير الزبلة قد راسها و ترجع هي المظلومة و المحگورة، عصباااات نبيل بهاد التصرفات خلاتو غير كايسوط و مو كاتبرد فيه....
اما وعد طلعات لدار لقات حياة جلسات فالبيت محيدة لفولار و كاتنش بيه على وجهها وهي دوز لبيت حطات فوق منو الساشي ديال السقاطة و هزات الميكة لي جبد ليها من الكوفر جبدات منها تكشيطتها الخضرة لي غادوز بيها الحنة و سرحاتها فوق الناموسية.. تفكراتها مني كان كايدوي معاها ،مدام غادي دوز الحنة فدارهم تاخدها معاها من دابا و الشي لاخر راه بقى عندهم حتى يجيبوه فالدفوع... دخلات عليها حياة هازة كاس ديال لما كاتشرب فيه مع شافت التكشيطة دفلات لما من فمها و بدات كاااتكحكح
وعد (طارت عندها مخلوعة) :اويلي ماااالك كيفاش وحلات ليييك
حياة (كحات حتى خرجو عينيها و حمااارو عاد قدرات تنطق و تجاوب) : اوييييييلي نسييت قفطاني فالطموبيل
وعد (تنهدات) :ناري خلعتيني اماما صحاب ليا ماعرت اش وقع غدا نعيط لنبيل نقوليه يجيبو ليك
حياة (خرجات عينيها) : لا لا عيطي لييه دابا باش تهزو مو تخبيه عندها حتى لغدا باش ماطيرش عليه ديك العقروشة ديال عمتو و تمشي تحرگو ليا ولا تشرگو.. المسمومات لي بحالها حافضاهم ما
وعد (بقلة حيلة) : واااخا انا غانعيط ليه دابا نيت "هزات تليفونها عيطات ليه علماتو و قطعات معاه دغيا حيت كان مزال صايگ" هاني قلتها ليه و سمعت خالتي لطيفة كاتقول لحبيبة مديه ليا من حداك
حياة : راه كنت حاطاه حدايا زعما ماحطيتوش فالصندوق ديال الطموبيل غير باش مانساهش
وعد : عادي كاتوقع
حياة(شافت فالتكشيطة كاتحيد فجلابتها) : ايوا بعدا نتي تفكرتي تكشيطتك ديال الحنة، هزيتي الصندالة لي غاتلبسي معاها؟؟
وعد (ضربات جبهتها) : تء نسييييتها
حياة : حتى نتي كتر من مك
وعد : صافي حتى يعيط و نقولها ليه "مشات لساشي ديال السقاطة هزات باكية ديال الشكلاط و شي بيموات و مداتهم ليها" هاكي راني عارفاك كاتعجبك الحلاوة
حياة : منين جاك هادشي
وعد ( بابتسامة خجولة) : جابهم ليا نبيل
حياة (ضحكات) : ايوا هانتي ليك شووفي اش كنتي غاضيعي من يديك
وعد : وصافي اماما ياك دابا قبلت
حياة (شداتهم) :ايييه صافي صافي، أنا غانمشي نشد شي فيلم هاديك التكشيطة ديري ليها ديك العلاقة لي ف الماريو و علقيها مع لباب وخليها بميكتها باش ماتغبرش ليك
وعد : واخا
دارت اشنو قالت ليها عاد بدلات حوايجها لبسات پيجامة من لي عندها و طوات لكسوة مخلياها فوق السداري باش تصبنها فالصباح عاد تردها لمولاتها نقية.... قادات كل حاجة بلاصتها عاد گلسات لديك السقاطة معارفة منين تبدا كلشي كايشهي شي حوايج عمرها داقتهم كانت غير كاتشوفهم عند مول لحانوت و شي حوايج كان كايجيبهم ليها باها.. غير هزاتهم بين يديها جا فبالها وهي تنهد تنهيدة من القلب هو لوحيد لي كان كايتفكرها بهادشي و يشري ليها السقاطة على قد جيبو كانت فتاقدات هاد لبلان من بعد موتو حتى جا نبيل دابا حياه من جديد....بدات كادوق فالحلوة و تبنن حتى سمعات الصونيط ديال تليفون حياة كانت خلاتو عندها فالبيت... حطات داكشي من يدها و مشات هزاتو لقات خالتها لي معيطة وهي تمشي كاتجري عطاتو ليها
وعد : ماما هاكي
حياة (هزات فيها راسها) : شكون
وعد : خالتي سعيدة
حياة (قلبات راسها لتلفازة) : خليها تصوني حتى تعيى و تقطع
وعد (حطات التليفون من يدها باستغراب) : اويلي علاش
حياة : بغيييت صافي سالينا
وعد (جلسات فوق الطبلة قدامها) : كيفاش ساليتو مافهمتش وااش تخاصمتو ؟؟ ماقلتي ليا والو
حياة : ماتخاصمناش ولكن انا باااغة راحة البال هاد الساعة "عقدات حجبانها" حتى لمن بعد و سيري شري ليا نمرة جديدة نبدل عليا هادي
وعد: اويلي شفتك بغيتي تقطعي معاهم فخطرة فين غادي تعرضي عليهم لحفلة لي دايرين خصوصا خالتي خديجة لي بعيدة مزال خالتي عزيزة و سعيدة حدانا
حياة (بحدة) :الالة معارضة على حد سيري تكمشي
وعد : علاش هادشي كنتو سمن على عسل زعما
حياة(ناضت گلسات) : فيييين عمرهم عرضووو عليا هوووما لشي فرح هااا قولي فييين عمرهم تفكروني و وقفو معايا كي كايديرو الخواتات مع خواتاتهم ماشي كانو مكايرضاوش بيا لا انا لا نتي لا باااااك ديما منقصين مني "بحرقة" شحااال ميكت و سكت و قلت ماااافيها بااااس ولكن شي فوق شي فوق شي راااااه الكااااس غايفيض و انا كاسي فاض ماعندي ماندير بخواتات حتى شافوني غادي نتناسب مع ناس مسّك عليهم الله عاد ولاو بااغيني.... معارفاش بلي كون كان غادي يخطبك شي مكحط مكانتش خالتك سعيدة تقولك اجيو ديرو عندي كلشي هادي ماكنتيش عارفاها يمكن اييوا راه انا عارفة هادشي و حااافضة داك الگنس.... و دابا سالات ساااعتهم مابقيتش محتاجاهم ولا باغة نشوف كمامرهم
كاتهضر بحرقة باااينة فيها مقصحة بزاف و قلبها عامر من جيهتهم عينيه عامرين دموع رافضة تنزلهم .. گااع داكشي لي قالت داز عليها بالحرف و هادشي غير شوية من بزاف...خواتاتها كايعرفو غير راسهم و مكايرضاوش بيها من ديما و إلى دارو معاها شي خير راه كايندموها عليه... و مادام دابا جاتها لفرصة فراه مغاديش تردد ولا لحظة انها دوقهم من نفس الكأس ...ممكن وحدة فبلاصتها تكون متسامحة و تقول الدم عمرو يولي ما و الخاوة حدها الدنيا ولكن حياة غييير... انسانة كاتشد فقلبها والى جاتها لفرصة ترد ليك الدقة مغاديش ترحمك وغادي تردها ليك بالثاني و المثني...
وصلات لداكشي لي بغات.. بنتها غادي تزوج براجل ميسور و سخي خييرو بان عليها حتى قبل مايتزوجو فما بالك مني تولي مراتو... عارفة مزيان وعد مغاديش تفوتها غادي تعيش و تعيشها حتى هي.... هاد الأخيرة مالقات ماتقول حيت كلام مها صحيح و هي براسها ماعندهاش مشكل كي بقاو خالاتها كي مشاو حيت ماعندهاش معاهم شي علاقة كبيرة بحال الناس العاديين لي كايكونو مجموعين عائلة وحدة... حتى هي عاقلة شحال حگروهم و شحال ديال الهضرة سمعات على باها الله يرحمو من فمهم هادشي خلاها تنفرهم و يوليو عندها زايدين ناقصين...
وعد (بقات فيها مها) : صافي تهدني غدا نجيب ليك نمرة جديدة
حياة (كلها كاترعد) :ايوا هاكاك و مني يسولوك نااااسك قولي ليهم سافرو عند خالتي لخرا مكاينينش فمراكش هما مع الوقت غادي يفهمو بلي فضينا بلا مانقولوها ليهم نيشان... براكة عليا عندي بنتي تكون بيا و تهلا فيا شي حد آخر مكايهمنيش
وعد : كوني هانية "عنقاتها" انا معاك
باست ليها راسها و ناضت جابت سقاطتها من البيت و جات گلسات حداها كايتفرجو و يجمعو حتى طاب نعاسهم و ناضت وعد لبلاصتها تنعس.....
********
أصبحنا وأصبح الملك لله 🌞
صباح اليوم ماشي بحال گاع الصباحات لي فاتو حيت فهاد النهار غادي دير أهم خطوة فحياتها، غادي تودع العزوبية و تولي على ذمة رجل... ماعرفاتش كيفاش طارو الايام حتى داااز الشهر لي كان عامر بالأحداث، ماگلسات فيه حتى نهار هاهي مع مو ومها خارجين يشريو الدهاز هاهي معاه كاتجمع وراق العقد و شي ايام خصصوهم باش تمشي تشوف دارها اشنو تزيد فيها و اشنو تنقص هنا مكانتش مو حيت بغا يمشي غير هو وياها حتى كايتصدم بحياة جاية معاها كاتوشوش ليها.....
حياة :ايوا هانتي وجهو صفار مني شافني باغي يعزلك يدير ما بغا و يصدق هربان ورا العرس والله لا كانت ليه مني يعقد عليك عاد يتهنى مني
وعد (بهمس) :سكتي دابا يسمعك
لصقات فيهم لصقة وحدة مباغاش تخليهم ينفاردو فالدار عارفة بنتها كاتحشم و عمرها جربات هادشي و نبيل راه من عمرو لي وصل ليه وهو باقي عزري راه باين كيفاش دوز حياتو....
مشات معاهم شافت الدار لي كانو فيها جوج صالونات و 2 بيوت، البني ديالها جديد و الكوزينة عصرية مافيهاش ماعن بزاف و وواحد الصالون خاوي مافيهش لفراش غير واحد لي مفرش ب ليفوتوي... شافو اشنو غادي يزيدو و اشنو غادي يبدلو و اش غادي يخليو، و وعد مكبرة بمها كل شوية تسولها على رأيها حتى طرقو مسمار الدار و حيدوها عليهم.....
يوم بعد يوم ومع المشاغل و الاحداث ماعرفاتش ايمتى وصل اليوم الموعود وهاهي كاتلبس فجلابتها لي جابو ليها ثوبها فالخطبة خيطاتها فهاد الشهر على قبل هاد النهار.... لبساتها مع بليغة و لاحت شال على راسها مخلية شعرها مطلوق تحت منو عاد مصايباه الليلة لي قبل مني مشات لحمام...
دخلات عليها حياة بجلابتها حتى هي باينة فيها جديدة وقربات عندها باستها من حنوكها بجوج...
حياة: ياله اكبيدتي راجلك كايتسنانا لتحت قولي باسم الله وتوكلي على الله...
بلعات ريقها كاتحس بلسانها تقيل باش تجاوب ولا تهضر و تعبر على الأحاسيس المختلطة لي عندها لداخل... عينيها مغرغرين و وجهها حمر باين عليها بلي ماشي على بعضها التوتر و الخلعة لاعبين عليها... دارتها فيد الله و شدات فمها هابطين فالدروج خطوة ورا خطوة، غاتخرج من باب دارهم عزباء و غادي ترجع متزوجة... معارفاش اشنو مخبي ليها هاد الزواج واش صافي ضحكات ليها الدنيا وغادي تهنى و تعيش مرتاحة ولا باقة الحياة مخبية ليها مفاجآت ممكن تكون حلوة و ممكن تكون مُرة؟؟؟؟
خرجات برا وجات عينها عليه متكي على طموبيلتو كايتسنى فيها و الجيران كايطلو من الشراجم يبرگو....قرب عندها سلم عليها و على مها وحل ليها لباب اللور تركب حدا مو حيت القدام راكب حداه خالو... لقات السلام على خالو و ركبات حدا لطيفة لي غير شافتها ماحيداتش تبارك الله من فمها.... بتاسمات ليها بحياء و هزات عينها فنبيل لي ديمارا الطموبيل فاتجاه العدول لي دايرين معاه ،تأملاتو بعينيها وهو ملاهي مع الطريق و مجمع مع خالو، كان لابس كومپلي كحل بقاميجة بيضة...محلق على لحالة و ريحتو طاغية فالطموبيل، راجل مقبول من ناحية المظهر كايبان بعقلو و مرزن ،و من ناحية التعامل بالنسبة لوعد هو احسن رجل ممكن تعرفو فحياتها يمكن لقلة تجربتها فالحياة يمكن لصغر سنها و يمكن حيت لقات فيه الحنان و السند و الأمان لي دخل لحياتها فأصعب فترة ممكن دوز منها اي بنت وهي فقدان الاب...
فهاد المدة لي دازت من نهار خطبها زادت تعرفات عليه و تقربات منو واخا مكايهضروش بزاف مني كايتلاقاو حيت كايكونو معاهم ماواتهم ولكن فالتليفون راه غير كايخرج من لخدمة كايصوني ليها و قبل ما ينعس ضروري ساعة ديال المكالمة تجمعهم عاد ينعسو... حاجة طبيعية بين جوج ديال الناس تزوجو زواج تقليدي خاصهم يتعرفو و يولفو على بعضياتهم واخا غير من بعيد لمهم هو يتعود انه كاينة انسانة فحياتو غادي يكمل معاها للحلال و هي نفس الشيء.... وهادشي نيت لي طرا مع وعد ولفاتو بزاف و ولا شخص مهم فحياتها إلى غبر عليها غير نص نهار ماعيطش كاتفتاقدو و كاتحس بفراغ بحيث انه الكلام معاه ولا جزء من روتينها اليومي واخا كاتحشم منو و مزال ماطلقاتش معاه ولكن كاتوحشو و ولات عندو مكانة خاصة فقلبها.... و نفس الشيء بالنسبة لنبيل، البنت لي جات فجأة بانت فحياتو بسبب صدفة جمعاتها مع مو هاهو لقى راسو كايفكر فييها ليل و نهار شاغلة بالو محمقاه بجمالها البريء و ببساطتها و عفويتها و أهم شيء عندو هو عدم خبرتها فالعلاقات بسبب صغر سنها و بسبب انها عمرها دخلات فعلاقة وكان هو اول رجل يدخل لحياتها...
من صدف، ل لقاء، لخطوبة و هاهما وصلو دابا للزواج لي غادي يجمعهم حلالا طيبا....
وصلو قدام مكتب العدول و نزلو من الطموبيل وعد شاداها الرعد طارت شدات فحياة يديها عرقاني و قلبها كايزدح وسط صدرها كادور عينيها بحال القطة و راسها خاشياه فلارض.... تقدم نبيل و خالو دخلو و تبعوهم العيالات حتى دخلو عند العدول لي استقبلهم بابتسامة بشوشة مرحب بيهم حتى جلس كل واحد بلاصتو وهو يبدا فالاجراءات و الكلام الروتيني للزواج...
العدول : وعد بنت عبد السلام واش قابلة الزواج من نبيل ولد عبد الله على سنة الله ورسوله
وعد بنت عبد السلام ربط سميتها بسمية باها بهاد الشكل حسساتها بالأمان حسات بيه حاميها و حاضن عليها مجرد ذكر اسمو بعد اسمها و فنفس تجمعو الدموع فعينيها و الغصة لي كانت فحلقها زادت خنقاتها ،كاتفتاقدو فجميع الاحداث لي كاتعيشهم خصوصا اهم ايام حياتها.... نزلو الدموع من عينيها مسحاتهم بالزربة و لطيفة كاطبطب عليها بحنان عاد نطقات بصوت منخفض
وعد : قابلة
العدول : نبيل و عبد الله واش قابل الزواج من وعد بنت عبد السلام على سنة الله ورسوله
نبيل (بهدوء) : قابل
عاود سولهم على الصداق وهو يجبد نبيل واحد الجوا من الفيستة ديالو حطها لوعد فوق ركابيها من بعد ما قرب عند العدول و قاليه شحال تما و ودنين حياة معاهم ساعة ماسمعات والو عينيها فالجوا تعرف شحال فيه ولكن ماعندها مادير تصبر حتى يوصلو لدار...
ثواني قليلة غادي يتربط اسمها باسمو و تولي مراتو و على ذمتو.... كمل العدول الإجراءات و ناضو عندو باش يسنيو، سنا نبيل هو اللول عاد جات وعد كاتفتف شاداها لفشلة سنات و هزات راسها فنبيل لي كان مراقبها مع تقادات فالوقفة ديالها قرب عندها باس راسها ونطق بدفىء
نبيل : مبروك علينا
وعد (بهمس) : احم الله يبارك فيك
"و بهذا ولاو زوج و زوجة"
حياة الفرحة غادي تخرج من عينيها ماكرهاتش طلقها بتزغريتة وسط المكتب ديال العدول غير حشمات و شدات فمها عندها....واقفة ورا لطيفة لي كانت معنقة وعد كاتبارك ليها ومع طلقات منها جراتها حياة لحظنها....
حياة (بحنان) : الله يكمل عليك بالخير ونشوف وليداتك يااااربي "شدات وجهها بين يديها و باست خدودها" الله يفرحك بهاد الزواج و ينور طريقك ياربي
وعد (عاودات عنقاتها) : آميييين ياااارب
بعد المباركات خرجو من عند العدول مشادين اليدين و وعد حشمانة قدامهم بغاتو غير يطلق منها... مارحمها حتى وصلو لباب الطموبيل عاد طلق منها حال ليها لباب ركبات و تبعوها لاخرين.... الطريق كاملة وهو حاضيها من لمراية و ابتسامة عريضة مرسومة على شفايفو كاتهز فيه عينيها تشوف واش باقي كايشوف فيها حتى كايضربها ليها بغمزة و تعاود تحدرهم مامتيقاش انها ولات مرات هاد الشخص لي كاتشوف قدامها ولي دخل ل حياتها فمدة قصيرة.....ما وصلو لدار حتى ولات مطيشة كاتحس بالحرارة فحنوكها....
مع وقفات الطموبيل شدات حياة فكرسيه و نطقات بالزربة
حياة: كلاكصوني كلاكصوني الله يعطيك الستر
لبى ليها طلبها باستغراب وهي نزلات من الطموبيل و بدات كاتصلي على النبي ما جا فين يكلاكصوني حتى تحل باب دار نعيمة و خرجات منها هي و بنتها هازين الحليب و التمر... نعيمة الجارة لي لقاو فيها الخير على عائلتهم كايلقاوها واقفة معاهم فالقرح قبل الفرح مايمكنش مايتقاسموش معاها هاد الفرحة و يحسبوها وحدة منهم....
قربو وعد و نبيل وسط الزغاريت خداو الحليب و التمر عاد طلعو لدار ورا حياة و لطيفة و من وراهم كان خالو كايطلع شوية بالشوية بحكم كبر سنو..... جلسو فالبيت لي فرشو فيه تاني صالون نعيمة و فالقنت مقادين گليسة لي غادي تنقش فيها وعد فالليل... حطو ليهم اتاي و الحلوة، گلسو معاهم شوية عاد مشاو لدار حتى يرجعو بالليل مع الدفوع....
خرجو الناس من الدار وهي طير حياة عند وعد لبيت لقاتها كاتحيد جلابتها و الجوا ديال الصداق محطوط فوق الناموسية...
حياة : اويلي قلبك ميت مجاتش لفضول تعرفي شحال تما
وعد (ضحكاتها) :هههه راه قال ليا شحال تما مكاين لاش نحسب
حياة : شحال شحال ؟؟
وعد ( بفرحة ) :مليون
حياة (عينيها ولا كايبان فيهم الدولار بحالا قالت ليها مليار و نطقات بعدم تصديق) : مليووووووووووون
مليون واحد المبلغ لي ماعمرو دخل لدارهم ولا هزوه فيديهم ولا شافوه بعينيهم كيفاش داير و شحال من زرقة فيه... حاجة بديهية يجيهم شي حاجة خارقة للعادة ويخليهم فرحانين و مصدومين بهاد الطريقة...
حياة (جلسات كاتحل فالجوا و جبدات الفلوس كاتلعب بيهم فييديها) : تبارك الله تبااارك الله اجي حسبيهم تأكدي
وعد : اويلي اماما مالو غايكدب
حياة(باصرار) : وا غا زيدي حسبيهم و كوني تسمعي لهضرة دغيا قبل ماطلع نعيمة
دارت ليها خاطرها و جلسات حداها كاتحسب كل الف درهم بوحدها حتى سالات وهي هز خمسالاف درهم رجعاتها لجوا و خمسالاف درهم مداتها لحياة...
وعد : هاكي باش تعدي هاد الايام لي جايين
حياة (فمها ترع بابتسامة عريييضة و شداتهم بين يديها) : سيري الله يرضي عليييك " عنقاتها" بنتي مرضية الله يخليها ليا ديما مفكراااني بغيت ليك الرضى
وعد (بابتسامة) : امييين اماما كون غير جيتي سكنتي معايا بلا مانبقاو كل واحد فجيه الدار كبير و غير انا وياه تعيشي معانا حسن
حياة( بجدية) : واش هاد الزابور غادي نعاودوه بزاف صافي قلت ليك مكاين لاش هاني فدويرتي و نتي فدويرتك عارفاك مغاديش تنسااايني و تعيشي و تعيشيني معاك كي ساكنة معاك كي لا
وعد (ناضت وقفات) : هادي حاجة باااينة ولكن كون خليتيني نقولها ليه بعدا
حياة(باصرار) : واخا تقوليها ليه و يبغي مغاديش نمشي " جراتها من يدها تگلس" يا هاد لهبيلة راك عاد تزوجتي و راجلك غا يبغي يبقى معاك الراس فالراس اش غايدير بالنسيبة تلصق فيه وهو عينه كايبغيو ياااكلوك ماكلة غا من بعيد بقى غير مني يدوقك راه مااايطلقكش باينة من عينيه الحارين
وعد (خرجات عينيها مزنگة من الجرأة ديال مها) : اويلي اماما اش كاتقولي حشووومة
حياة(كادور فراسها) : ايييه حشووومة غدا تشوفي حشومة كي دايرة مني يقنت حسك
طارت من حداها كاتولول وجهها ماطيشة عارفة حياة مكاتحشمش ولكن ماظناتهاش توصل لهاد الدرجة هادي..... ندمات علاش جبدات ليها موضوع السكنة معاها لي جا فبالها من نهار تخطبات، و طرحاتو عليها شحال من مرا مابغاتش تخليها بوحدها فالدار غير الى طاحت ولا طرات ليها شي حاجة ماتلقى لي يعتقها.. غادي يبقى بالها ديما مشغول معاها خصوصا انها ولات عندها عقدة بعد الطريقة لي مات بيها باها على غفلة كون مكانو معاه موحال يسيق ليه شي حد لخبار... رفض حياة ماتوقعاتوش ظناتها غادي تقبل حتى كاتصدمها هاد الأخيرة لي ماطمعاتش تعيش مع بنتها بالعكس بغاتها تنفارد براجلها و يعيشو بخير غير يصرفو عليها و يعيشوها وهي تاكل و تنعس صافي داكشي لي بغات وهذاك هو همها....
جمعات لفلوس لي عطاتها وعد دفناتهم فالماريو جهة حوايجها عاد خرجات كاتعيط على نعيمة باش تسولها على لغدا ساعة لقاتها هازة الطبسيل و بنتها تابعاها بالخبز حلفات عليها حتى دير هي الغدا على حسابها هاد النهار....
تغداو و ناضو لشغالهم عارفين لوقت كايطير بقاو من هادي لهادي حتى وصل الليل و بداو الجارات لي عرضات عليهم حياة كايدخلو.... و فهاد الأثناء كانت وعد لابسة و ماكية و مقادة جابت لكوافورة لدار يدها خفيفة دغيا سرباتها حيت الوقت ضياق عليهم و الناس قربو يجيو...
خرجوها بالصلاة على النبي و الزغاريت حتى وصلوها لگليسة لي مقادين... جلسات كاتشوف من تحت لفوال النقاشة لي جلسات جنبها باش تنقش ليها، مسحات يديها لي عرقو مع قفطانها عاد مدات ليها يديها و بدات كاتنقش ليها.. مجات فين تسالي حتى سمعو الدقايقية حدا لباب الشيء لي خلا قلبها يدق بالجهد كاتشوف فالجارات ناضو لشرجم باغين يطلو كلهم دقة وحدة و حياة طارت هي و نعيمة فالدرووج باش يستقبلوهم...
وقفات حياة حدا لباب بانو ليها الدقايقية منشطين القضية و الدراري لابسين السلهام هازين الطيافر كل واحد يا واحد
نعيمة (وشوشات ليها ف ودنها) :هاد الطيافر كبار راه مغايقدوش يطلعوهم مع الدروج حيت مديقين
حياة : بلاتي بلاتي "قربات عندهم" عافاك أولدي الله يرضي عليك خويوهم و طلعوهم لفوق عاد عاودو عمروهم راه مغاتقدروش دخلوهم كي هازينهم...
خلاتهم كايديرو اش قالت ليهم و قربات لطموبيل لي نزل منها نبيل بجلابة و بلغة كايبان واحد آخر سلمات عليه و دازت كاتسلم على لطيفة و شي بنات معاها...
لطيفة (جرات وحدة منهم) : هادي هي بنتي هيبة احياة
حياة (عاودات سلمات عليها) : اهلا اهلا مرحبا مرحبا "طلات فالطموبيل" ويلي فيناهي خالتي حبيبة
هيبة (بابتسامة) :ماقدراتش تجي اخالتي بقات مقابلة ليا ولدي
حياة : مافيها باس مافيها باااس زيدو مرحبا بيكم....
يتبع...
التعليقات
لا توجد تعليقات بعد، كن أول من يعلق.