جزاء وعد الجزء الرابع

الأيام دايزة طاااايرة عند الجميع إلا عندها هي لي دازت عليها هاد 40 يوم بعد وفاة الأب ديالها بحال 40 عام كل نهار كايدوز عليها ثقيل و كئيب مافيه حتى حاجة تفرحها ولا تبرد على قلبها... كانت كاظن بلي مع الوقت جرحها غادي يبدا يبرا ولكن كتاشفات حقيقة مُرة مني لقات الجرح مزال طري بحالا باها مات غير لبارح.... دازو أيامها حزن و بكا كل يوم كاتفزگ المخدة بدموعها اليتيمة علاش لا وهي ذاقت اليتم بأبشع حالاته...

اليوم الربعينية ديال باها العيالات ديال الدرب دارو گصاعي ديال كسكسو و دخلو عندهم واخا فالربعينية عائلة الميت لي كايديرو الصدقة ولكن فهاد لحالة مايقدروش حيت ببساطة ماعندهمش.... فلوس لعزو لي عطاو المحسنين و الحباب قربو يتقاداو ويگلسو الله كريم عاوتاني.....

خارجة من بيت باها لي مابقاتش كاتخويه من نهار مات كاتنعس تما فوق وسادتو و كاتغطى بالمانطة ديالو البالية... تلاقات مع حياة جاية عندها بلباسها البيض و الطابلية ملوية على خصرها....

حياة : عاد كنت جاية عندك راه لعيالات بداو كايدخلو سيري گلسي معاهم

وعد (كاتشخر بنيوفها و شادة خرقة فيدها كاتمسح بيها) :مقادة نگلس مع حد راسي غادي يتشق عليا

حياة (بدات فالموال ديالها) : بالسيف مااايتشق حيت كون كنتي كاتسمعي الهضرة كون لاباس عليك جالسة ليا فالسطاح حتى لفجر و الزفزوفي ديال البرد بالسيف ماايسووط فييك مزيان و تروحي

وعد (عطسات) : الحمد لله.... احم صافي دابا لي عطا الله عطاه

حياة : هادشي لي كاتعرفي ليه نتي

وعد (تنهدات) : عيطيني شي كينة نشربها نرجع نتكا

حياة : صبري تجي خالتك راه وصيتها تجيب معاها دوليبران إلى عندها فالدار "شافتها عطاتها بالظهر راجعة لبيت" داك البيت عششتي فيه

وتقول واش جاوباتها كملات طريقها ماعندهاش الجهد تبقى تراد فالهضرة ولا تجابه مع شي حد باغة غير تكى و تبكي و تنخصص و تنعس على عكس حياة لي الجهد و النگير لي فيها ماگرات فيه الموت دوزات السيمانة اللولة كاتبكي و تخنن مع دخلات السيمانة الثانية بدا بكاها كاينقص و الجهد كايرجع ماتنكرش انها حزنات على عبد السلام ولكن مافتاقداتوش حيت اصلا مكانتش كاتكن ليه شي مشاعر الحاجة لي بدات كاتفتاقد هاد الايام الاخيرة هي الگفة لي كان كايدخل عليها كل مرة واخة داكشي قليل ولكن حسن من والو.....

******

العيالات تجمعو على جوج قصريات ديال كسكسو باش يتغداو حتى جات حياة فيدها طبسيل و معيلقة هزات لوعد شوية وقالت ليهم بلي مروحة ماتقدرش تگلس معاهم، دات ليها لماكلة لبيت و رجعات عندهم دخلو طول وعرض فالگصاعي و غير سالاو بداو فتقرقيب الناب وكيفما معروف فبلادنا مشيتي لعزو تهضر على لميتين مشيتي عند شي واحد مريض تبقى تعاود على گاع لي عرفتيهم مراض وهاهي غادة.... بقاو گالسين تما حتى ودن العصر عاد تكركبو بقاو غير خواتات حياة بجوج....

عزيزة (هزات عينيها فالسقف لي كايقطر) : صبات الشتا نيت السقف عندك شرب لما

حياة (قلبات عينيها) : ايوا الله يرحمنا من عندو، الشتا زينة

عزيزة : ماقلناشاي غير هو راه غادي يفزگ ليك السداري

حياة ( عارفاها مكاتقولش هادشي بنية حسنة باغة غير لفرصة فين تحشي ليها الهضرة... دارت يدها على خصرها و نطقات بنرفزة) : ياك السداري ديالي ايوا خلي بوه يفزگ

سعيدة (قاطعاتهم وهي كاتشوف فعزيزة) : واااااش وقت هاد الهضرة نتي "حولات نظرها لحياة و كملات بجدية" اش غادي ديري من هنا لقدام

حياة (بعدم فهم) : فاش؟؟؟

سعيدة :فالصير.. دابا الحمد لله الدار راه ديالكم و عبد السلام ماعندو حد لي يجي يورث معاكم فيها ولكن الصير كي غاديري ليه

حياة :الحمد لله عندي باش نقضي دابا ومني غادي يخصني غادي نخرج نخدم انا و وعد

سعيدة : كي غاديري ونتي شادة حق الله

حياة : ايوا راه بزز مني مالو لخاطري لي غادي ندير هو لمغرب يلقاني فالدار "تنهدات" عالله غير نلقى شي حاجة

عزيزة(بفضول) : اجي بعدا وعد قلتي ليها على الخدمة؟؟ هي عمرها خدمات

حياة (ببرود) : ومالي انا عمري خدمت و زايدون بلا مانقولها ليها خاصها تكون دايراها فبالها اصلااا هادشي كنا دوينا فيه مني جلسات من لقراية كان باها مزال حي بقى غير دابا مني مات و مابقى لي يدخل علينا القفة

عزيزة: الصراحة خاصها تخرج تخدم لا قراية لا والو اش غاتبقى دير هذاك لي كان مفششها راه مشى دابا وقت المعقول خاص تعول على راسها

فهاد الأثناء وعد كانت غادية لكوزينة تشرب و داز حوارهم على مسمعها بقات واقفة جامدة فبلاصتها بحالا ضربتيها بتصرفيقة....

الوضع .. بعد رحيل الأب .. ليس كما يظن البعض ..

ثقوا بي ..

إنه جرحٌ داخلي عميق .. لا يمكن أن يُشفى ..

كل ما تعلمه عن الحياة بعد رحيله .. أنّ ألمَك سيزداد يوماً بعد يوم ..

تريد معانقة أبيك .. و لا تجده

ستفقد لذة الحياة ، و تدخل دوّامة الاكتئاب والتعب المزمن ..

ستشعر أنّك وحيد ..و أنّ الجميع انقلبوا عليك

و قتها ستدرك حقاً معنى أنّ الحياة قاسيةٌ جداً و غير مُنصِفة ..

ستتظاهر أنّك قوي ..

و تنهار بداخلك عندما ترى أباً يعانق ابنه ..

ستَشيخُ فجأةً…

و نسيتُ أن أخبرك ..

أنّ لا أحدَ سيتفهّم وضعك !!

كلامهم كان بحال الصفعة لي فيقاتها و حلات ليها عينيها على اشنو تابعها.... دوزات أيامهم غير فالبكا و الاشتياق لباها و لبلاصتو لي خوات فالدار و لحنانو لي توحشات مافكراتش فالأمور المادية لي كان مكالي عليها هي و مها و بكلامهم فهاد اللحظة زادو كملو عليها.... حسات بالجرح لي فقلبها زااااد فالعمق ديالو عمرها فحياتها هزات الهم لفلوس اصلا مطالبها ماشي كثيرة داكشي لي كايجيب باها كتاكل منو و تلبس على قدها ولكن باش تفكر منين جاو دوك لفلوس و تمارة لي تضربات عليهم هادشي مكانتش على لبال بتاتا....

صعيب بزاف يمشي الشخص لي كان مكالي عليك الصهد وهاز عليك شحال من حاجة كاينين بنات كايموت ليهم الاب كايتقهرو و يبكيو و كايتزرع جرح فقلوبهم عمرو يبرا ولكن كايكونو مرتاحين من الناحية المادية ولكن مني كاينعادم كلشي مع موت الاب الحياة كاتولي قاااسية وهادشي لي كاتعيشو وعد فهاد اللحظة.....

رجعات أدراجها لبيت وتكمشات وسط لفراش الدموع محقونين فعينيها مع خرجات شهقة من شفايفها نزلو كاايتسااابقو على خدودها....

بقات معتاكفة تما النهار كامل مشاو خالاتها و جات عندها حياة عيات فيها تنوض تجلس معاها فالبيت و والو خاشية راسها تحت لمانطة كاتشخر بنيفها ماتعرفها كاتبكي ولا غير الرواح....

خلاتها و مشات لبيت فين كانت جالسة هي و خواتاتها جرات السداري و الحصيرة من لبلاصة فين كايقطر لما و دارت سطل تما كلما نزلات شي قطرة كاتسمع طاق... عاد توجهات لكوزينة دارت كسكسو لي شاط عليهم فالغدا فطبسيل ديال القزدير و حطاتو يسخن يتعشاو بيه....

حياة (شعلات الضو على وعد) : نوضي راه درت كسكسو يسخن مغاديش ناكل بوحدي كي الجنية

وعد (لاحت لغطا عينيها منفوخين و حمرين بالمرض و البكا... نطقات بصوت مخنوق) : نصلي و نجي

مشات لطواليط راسها ثقيل بقات كاتخوي بما على وجهها حتى صحصحات شوية عاد توضات و مشات تصلي....

كملات صلاتها و مشات لبيت لقات حياة حاطة الطبسيل فوق الطبلة و شاعلة التلفازة لي مرة تبان الصورة مرة يبقى غير الدشاش بسبب البرد و الشتا....

حياة ( بدات كاتلگم) : يخ هاد التلفازة كاتفقصني فالشتا

وعد (شافت فييها شحااال وهي تنطق) : عندك لخاطر تفرجي فالتلفازة؟ ؟؟

حياة (فهماتها لاياش كاتلمح) : كولي كوولي

بدات كتاكل معاها بغير نفس نقبات غير شوية و ناضت غسلات يدها و رجعات كاتشوف فحياة لي كتاكل عادي خلاتها حتى سالات وهي تنطق بتساؤل

وعد (بدون مقدمات) : با عاد 40 يوم باش مات " بلعات ريقها عينيها تحجرو فيهم الدموع من جديد و شحال صعيبة عليها تقول كلمة ميت على باها... طلعات تنهيدة من الاعماق و كملات كلامها" و رجعتي كاتعيشي حياتك عادي

حياة (بتاسمات باستهزاء) : كنت عارفاك غاتسولي هاد السؤال.... اش بغيتيني ندير ؟؟؟ البكا و بكينا حتى طبنا واااش رجع ؟؟؟ هضري رجع ؟" شافتها بدات كاتبكي " البكا ورا الميت خسارة ابنتي

وعد (بشهقة) : هذااااك با لي مات عرفتي أشنو هي بااااا هءهءه ... نبكي عليه حياتي كاملة و مانبردش

حياة : هانتي قلتيها باك خلا ليك حوااايج زوينين باش تفكريه و تبكي عليه حيت كان حنين فيييك وهازك على رموش عينيه

وعد (دارت وجهها بين يديها كاتنخصص روحها غاتخرج) : هءهءهء

حياة (بعينين مغرغرين) : حمدي الله خلا ليك حوايج زوينين باش تفكريه اما انا با مني مات بكيت عليه اييه ولكن ماااحزنتش بحالك حيت عمرو حن فيا ولا تسوق ليا فين حاطة رمااااني لزواج انا مباغاهش غير باش يتهنى مني

وعد (بصراخ) : و با اشنو ذنبو من هادشي باش ماااتحزنيييش عليييه عمرك بغيتيه ديييما كنت كانلاحظها فيييك ديييما وهو كااان كايدير ليك كي لما لقليل

حياة (غوتات كثر منها) : شكوووون قاااليك محااازناش علييييه هاااا غا حيت مكانظلش نتنخصص و ندير مندبة.... حزااانت عليه حيت بيناتنا عشرة مانساهاش"كاتورك على كلامها" بييناتنا العشرة ولكن الحب ابنت كرشي كااانشوفو غير فالمسلسلات "هزات طبسيلها خارجة من لبيت و كملات كلامها" عمري عشتو لا مع باك لا مع غيرو

خرجات مخلية وعد غارقة فدموعها كاتشوف باها انسان يستاهل أنه يتحب و يحزن عليه العالم كامل فما بالك مها..... عارفة الطريقة باش تزوجو واليديها و لكن معارفاش حياتهم كيفاش كانت و اشنو عاشت حياة مع عبد السلام الراجل لي كبر منها بسنوات كثيييرة و الحرمان لي عانات منو معاه... الحنان ديالو ماكفاهاش باش تبغيه عمرها غادي تنسى انها تزوجاتو بزز منها و عمرها غاتنسى حقها الشرعي لي تحرمات منو بعد سنوات قليلة من زواجها.....

دفعات الطابلة بالزعفة و ناضت لبيت تخشات فالفراش و جرات لمخدة لي كان كايتوسد باها عنقاتها بكل قوتها و نطقات بصوت مبحوح

وعد : توووحشتك ابا هءهءهء توحشت تعنيقتك بزاااااااف

بقات على نفس وضعيتها كلام حياة و كلام خالاتها كايتردد فدماغها حتى داها النعاس.... مدازش بزاف ديال الوقت حتى كاتلقى راسها واقفة وسط دار ماشي دارهم وهاد الدار زوينة و مشمشة بزااف داخل ليها الضو بواحد الدرجة كبيرة حتى ضرها فعينيها... و ريحة الدار غزااالة كاتريح الخاااطر بقات كادور فراسها مفاهمة والو شوية وهي توقف جامدة فبلاصتها مني سمعات الصوت لي فتاقداتو فهاد 40 يوم لي دازو.... بلا هواها تبعات مصدر الصوت حتى وقفات فباب واحد البيت وهي تشهق مخرجة عينيها و نطقات بلا ماتحس

وعد : باااا مامتيش ؟؟؟؟ "برجفة" واااش باقي حي بااقي حي ابا؟؟

كان عبد السلام قدامها متكي على كادر واحد الناموسية زوينة بفراش نقي، لابس حتى هو مزيان و وجهو منور

عبد السلام (بابتسامة واااسعة) : لا ابنتي مامتش "مد ليها يدو" قربي عندي الحنينة ديالي

يااااه و شحال توحشاات تسمع منو هاد الكلمة، قلبها تهز من بلاصتو و بدون سابق إنذار طااارت عندو كاتجري تلاحت جنبو

وعد (كاتبكي) : توووحشتك ابا هءهءهء توووحشتك هءهءهءه "تمخشات فصدرو مزيرة عليه" عنقني ابا توحشت تعنيقتك

عنقها بكل حب بلا ماااينطق والابتسامة مزالة مزينة وجهووو... غمضات عينيها وهي فحضنوووو حتى كاااتحلهم فالظلام غير شوية ديال الضو داخل من الشرجم بين ليها فين هي و رجعها للواقع الأليم.... الدموع فعينيها لقات راسها كانت كاتبكي بالصح بدات كاتقيس فيديها و صدرها كاتحس مزال بالدفئ ديال هاديك التعنيقة لي حسات بيها حقيقية ماشي حلم..... عضات على شفايفها حاابسة الشهقة مني شافت حياة ناعسة حداها ، ياله غادي تنوض من بلاصتها كاتسمع آذان الفجر.... ناضت بالشوية حتى شعلات الضو ديال لمراح و توجهات لطواليط كاتبكي و توضى و نفس الشيء دارتو فالصلاة ماقدراتش تحبس دموعها حيت مااااسخاتش بالحلمة لي كانت بحال الحقيقة.... بكات حتى عيات و دعات مع باها بالرحمة و مع راسها بالصبر باش تقدر تعايش مع الوضع و تكمل حياتها.... و بعد فترة رجعات لبلاصتها حدا مها حالة عينيها فالظلام كاتخمم فشلا حوايج حتى داها النعاس عاوتاني....

أصبحنا وأصبح الملك لله 🌞

فاقت على صوت حياة كاتحل فالشرجم ديال البيت و كاتفيق فيها

حياة : نوضي إلى وليتي شوية سيري جيبي جوج خبزات راه مكاين باش نفطرو

وعد (تكمشات فالمانطة) : صيفطي شي برهوش من الزنقة

حياة ( دارت يدها على خصرها) :براهش الزنقة والداهم من كرشي؟؟ و زاايدون راهم فالمدرسة الزنقة سااقلة نوضي تحركي

ساطت و حيدات المانطة من فوق منها كاتحس براسها مابقاش كاايضرها بزاف ولكن حلقها مزال مجروح و نيوفها مسدودين... غسلات وجهها و طلقات شعرها و عاودات جمعاتو سفنجة ماعندهاش لخاطر لي يدوز فيه المشطة...

مدات ليها حياة جوج دراهم و خرجات حادرة راااسها و الحلمة مزالة بين عينيها، خدات الخبز و رجعات لدار حتى كاتصادف مع نعيمة كاتشطب حدا بابها...

وعد : صباح الخير اخالتي

نعيمة: صباح الخير أيلي..كي ضليتي؟؟

وعد(بتنهيدة) :الحمد لله

نعيمة (بأسى) : مالكي ايلي على هاد التنهيدة..نعلي الشيطان

وعد (تفكرات شي حاجة) : خالتي تسنايني هنا نطلع لخبز و نجي عندك بغيت نسولك

نعيمة : واخا

طلعات دغيا حطات الخبز لحياة و نزلات مخلياها كاتعيط عليها

وعد (قربات حداها و نطقات بصوت منخفض) : بغيت نسولك على ختك لي عندها گاراج ف**** كاتبيع الخبز و المسمن

نعيمة : ربيعة مالها؟؟

وعد : واش معاها شي وحدة تعاونها تما؟؟

نعيمة : كانت معاها بنتها ولايني عطاتها زوجاتها موحال تبقى معاها "سكتات شوية مني فهماتها لاياش كاتلمح" واااش بيتي تخدمي معاها اوعد؟؟؟

وعد (حركات راسها بالايجاب) : اه إلى بغيتي تعاونيني

نعيمة : واااش فراس حياة ؟؟

وعد :اممم فخبارها.. واش تقدري تقوليها ليها ؟؟

نعيمة (بابتسامة) : نقولها ليها علاه مالها اش فيها

وعد (تنهدات براحة) : صافي مني تهضري معاها ردي عليا

نعيمة : واخا ايلي واخا

طلعات لدار خلات نعيمة متحسرة على حالتها وفنفس الوقت فرحانة حيت لجآت ليها باش تعاونها من ديما وعد عزيزة عندها....

دخلات لدار لقات حياة حاطة اتاي و الزيت العود شافت فيها وهما يغرغرو عينيها مني تفكرات باها لي كان كايجيب ليها الفرماج حيت عارفها مكاتحملش الزيت... كبحات دموعها و جلسات كاتغمس مع حياة بغير نفس حتى نطقات هاد الأخيرة

حياة :اش كنتي كاتوشوشي نتي و نعيمة

وعد (ببرود) : قلت ليها ضبر ليا على خدمة عند ختها

حياة (ياله غاتشرب اتاي وهي ترجع تحطو) : كييفاش ؟؟ منين جاتك نتي هاد لفكرة

وعد (هزات فيها عينيها) : سمعتك لبارح نتي و خواتاتك كاتهضرو

حياة : اممم ايوا مزيان "بجدية" نتعاونو على الزمان راه مابقى لينا غير بعضياتنا حتى انا غادي نقلب على خدمة

وعد ( بجدية) : مكاين لاش نتي شادة حق الله شكون غادي يبغي يخدمك و اصلا مامولفاش تخدمي

حياة (هزات حواجبها) : بحالا نتي مولفة

وعد (بصوت منغنغ جاتها البكية) : الولف غااااادي نولف ونتي مغاديش تخدمي خلاك با فالدار بقاي فالدار صافي انا غانخدم اصلا مكاندير والو فحيااااتي اللهم نخدم

ناضت بالزعفة مخلية حياة غير كاتبرق فعينيها و دخلات لبيت تاني معتاكفة فيه حتى ودن الظهر ناضت تصلي وهي تشم ريحة لبيصارة مجات فين تكمل حتى عيطات ليها حياة يتغداو وهي تنوض عندها..

حياة (قسمات ليها الخبز وهي تشوف السطل لي دايرة تحت السقف قرب يعمر تاني) : هاد الزمر خويتو غير الصباح

وعد : كون درتي سطل كبير

حياة : داكشي لي غاندير هاد الزمر ديال السقف شي نهار ينزل علينا فدقة وحدة لبارح ماخلانيش صوت التقطار نعس و جيت حداك

وعد (مافيها لي يهضر) : اممم

حياة : لبارح قالو ليا لعيالات فتيحة خت نهيلة تخطبات حتى هي

وعد : مزيان

حياة : صراحة دوك لبنات فيهم الخير واخا تخاصمتي مع نهيلة جاو عزاو كلهم

وعد : ماعقلت گاع على شكون جا و شكون ماجاش

حياة : لا انا عقلت عليهم

بدات كاتحسب ليها شكون جا و شكون مجاش و وعد غير كاتحرك راسها... حياة بغات تجمع وهي ماعندها خاطر كاتجاوبها غير بكلمة ولا جوج و تسكت حتى سالاو غداهم كانت باغة تنوض وعد تغسل لماعن ساعة ماخلاتهاش حياة حيت مريضة وهي تگلس فالبيت ساااهية فالأرض و حياة تكسلات حداها من بعد ما غسلات لماعن حتى وصلات لعشية وهي تسمع الدقان و صوت نعيمة كاتعيط....

وعد (طلات عليها) : نعام اخالتي

نعيمة : نزلي عندي

وعد (نزلات حلات ليها) : طلعي

نعيمة : غير خلينا نهضرو هنا

وعد : طلعي اخالتي نگلسو لفوق حسن

حياة (عيطات من لفوق) : طلعي الالة نعيمة

طلعات مع وعد و جلسوها فالبيت ديال لگلاس....

نعيمة (شافت فوعد) :جيت نرد عليك ايلي

حياة : الله يسمعنا خير

نعيمة : دويت مع اولتما ربيعة و قالت ليا مرحبا بيها تخدم معايا و تونسني

وعد (بدون تعبير) : الحمد لله

نعيمة : ولايني بيتي تصبري واحد العشرين يوم على مايدوز عرس بنتها حيت باتسد تا يفوت العرس

حياة : مافيها باس

وعد : ماشي موشكيل نتسنى

نعيمة (حطات يدها على يد حياة) : واش عندكم باش تقضيو ولا نضبر ليكم؟؟ راه حنا عايلة وحدة لاتحشموش

حياة (طبطبات عليها) : عارفة لي كاييين..... الحمد لله مزال عندي شي بركة ندوزو بيها هاد الايام

نعيمة : ايوا الحمد لله "شافت فوعد لقاتها ساهية" وعد شفتك مافرحتيش بالخدمة

وعد (نطقات بعد تنهيدة من الاعماق) : الفرحة مابقاتش كاتلقى لقلبي طريق "بغصة" ماتت فرحتي اخالتي

حدث واحد ممكن يقلب حياتنا رأسا على عقب ومن هذاك الحدث عمر حياتنا ترجع كيف كانت من قبل.... كانكونو گالسين ماعلينا مابينا حتى كاتنزل علينا واحد الحاجة كاتبدل حياتنا.... بزاف ديال الأحلام كايموتو و بزاف ديال الافكار كايتبدلو و حتى نمط العيش مكايبقاش نفسو....

وعد لي ماعمرها هزات الهم للريال منين كايجي ولا كيفاش كايدمرو عليه، كاتعرف غير تاكل و تشرب و تنعس عايشة بداكشي لي موجود و مولاها ربي... هاهي اليوم نايضة مع التمنية باش تبدا الخدمة لي تسنات هادي عشرين يوم، لبسات عليها كبوط من عهد المرابطين سنين وهي كاتلبس فيه حتى مابقى فيه مايتلبق مع سروال كيطمة و سبرديلة قاعها طااايب...

وعد (خرجات من لبيت وهي تصادف مع حياة) : كون بقيتي ناعسة علاش فقتي من دابا

حياة : نوجد ليك لفطور ماتمشيش بجوعك " شافت فشعرها" دوري نظفرو ليك باش مايبرزطكش هاد السفنجة كل مرة تطلق ليك

وعد (دارت) : عطيني شي زيف حياتي من عندك نديه معايا نديرو تما، هذاك لي عندي ماعرفتش فيناهو

حياة (سالات ليها الظفيرة) : واخا هي اللول

دخلات جابتو ليها فميكة و جلسات حداها حتى فطرات بالخبز و الزيت كيف لعادة، داك الزيت لي مكاتحملش ولات كتاكلو بزز منها غير باش ماتبقاش بالجوع

وعد (ناضت) : هاني مشيتي

حياة (جراتها عنقاتها و بدات فالتوصيات) : سيري ابنتي و ردي لبال لراسك فالطريق و سمعي من ربيعة راه درويشة كي كاتعاود عليها نعيمة ماتلقايش معاها موشكيل و ماضسري عليك حتى واحد من دوك لي خدامين حداك مكاين تيقة هاد الوقت

وعد (حركات راسها) : واااخا اماما واخا

هبطات فالدرووج و حياة كادعي معاها حتى خرجات من باب الدار و طلقات تنهيدة من الاعماق حتى خرج الدخان من فمها بسباب البرد... دارت يديها فجيابها و شدات الطريق لفين كاين المحل حتى وصلات، جات عينيها على بلاكة مكتوب فيها خبز الدار وهي تبان ليها ربيعة خدامة مع لكليان مدورة عليها طابلية و عكسة فوق راسها،. هزات عينيها وهي تبان ليها وعد....

ربيعة : وعد أبنيتي "دفعات لباب ديال لگاراج منين دوز" زيدي دخلي

دخلات و سلمات عليها كاتسولها على الأحوال و فنفس الوقت كاتعطي للناس اش بغاو و فهاد الأثناء وعد جبدات الزيف عكساتو على راسها و ركبات الطابلية حتى هي

وعد : اش غادي ندير اخالتي

ربيعة : گابلي ليا هي داك الخبز فالفران بنمشي نجيب الزيت ونجي" كاتنعت ليها" راه البالة فوق الضالا..حطيه هي هنا وغطيه باش ميقساحش والى جا شي حد راه خبزة بجوج دراهم والمطلوع "البطبوط" بدرهم ونص

خرجات خلاتها كاطل على لخبز لقات شي خبزات طابو وهي تخرجهم و دارت اشنو قالت ليها حتى رجعات

ربيعة : ما جا تاواحد ؟؟

وعد : لا

ربيعة (حيدات ليها لبالة من يدها) : دابا نهضرو ..الوقت لي بتعودي تجي فيه هو هذاا حيت بعيدة عليا...انا تنجي مع صبيحة ربي حيت داري كاينة هي هنا...تنعجن الخبز والمطلوع تاع الناس لي تيكونو غاديين للمدارس ولا للخدمة..تيجيو يديوه باش يفطرو بيه ونتي بيتي تعودي تعجني تاع الغدا بتعجني ****** خبزة دابا نوريك القياس وفالعشية تنزيدو المسمن على الخبز بنعود نطرحو انا وياك "حطات يديها على كتف وعد" عارفاك خادكة وغادي تبردي ليا الگلب

وعد : كوني هانية اخالتي "بتساؤل" و الخلاص؟؟ خالتي نعيمة قالت ليا غادي نتخلص للسيمانة

ربيعة : انا بندير معاك ***** والى كانت شي كوموند حيت تيجيو العيالات تيبيو المسمن للتريد ولا شي لعيبة راه ديك ساعة الفلوس زايدة

وعد ( عجبها لحال) : صافي اخالتي باسم الله

بدات الخدمة ديالها بحماس كملات طياب الخبز لي فالفران و بدات الخدمة مع الكليان و ربيعة حاضياها اش كادير و كيفاش كاتعامل... وصلات العشرة و نص وهي تبدا كاتعجن فالخبز و ربيعة كاتعطيها فالتعليمات حتى سالات....

ربيعة : مني يخمر وتگرصيه ضربي معاك شي جفاف للحانون انا بنمشي نطل على داري ونجي

وعد : واخا وريني غير الجفاف و السطل فين كاينين

جبداتهم ليها و خرجات خلاتها خدامة ، تعطلات فدارها بالعاني تشوف واش غادي تلقاها دارت اشنو قالت ليها ولا لا ساعة مني رجعات لقات الحانوت مسيق و الخبز طايب و جالسة كاتبيع فيه للناس

ربيعة : إلى بيتي سيري تغداي فالدار و جي

وعد : لا بلاش غناخد غير شي نص فيه الطون من لحانوت

ربيعة (مشات لصندوقة لي فيها الصرف هزات شي دراهم و مداتهم ليها ) : شدي باش تاخديه

شدات من عندها لفلوس و مشات لحانوت لي قدامهم خداتو مع قرعة صغيرة ديال لمونادة و رجعات لحانوت كلات و ناضت لشغلها تاني ، من هادي لهادي ها لمسمن ها لبطبوط ها الخبز..... قزيبتها ماتحطاتش ل لارض مني مشات وهي واقفة و مع ربيعة عندها لكليان كثير شي غادي شي جاي مكايتقاداوش....

مع آذان العشاء راجعة لدارهم مهدودة كاتحس برجليها كايزدحو ، عمرها وقفات هاد المدة كاملة... كاتحسس بصباعها الحرقة لي تحرقات وهي كاطيب المسمن تنهدات هازة راسها لسما وهما يقطرو عليها نقيطات من الشتا لي بدات كاتصب فاللول بالشوية فاللخر تجهدات خلاتها كاااتجري فالزناقي باش توصل لدار لي ماوصلات ليها حتى كانت تسرسطات.... مع حلات لباب سمعات صوت حياة من لفوق..

حياة : وعد جيتيييي

وعد : ااااه جيت

حياة (وقفات فراس الدروج) : فزگتي بالشتااا ؟؟

وعد (طلعات بالزربة) : قولي غرقت فالشتا

حياة : صبري صبري نجيب ليك الصندالة وشي فوطة

لبسات الصندالة بانو ليها رجليها زرقين بالبرد و لوات عليها لفوطة و دخلات لبيت كاتحيد حوايجها فالباب و كاترعد...

حياة(دارت يدها على جنابها) : علاش ماعلمتينيش بلي غاتبقاي تما مغاتجيش لغدا ، مخلياني مخلوعة عليييك كون ما نعيمة عندها التعبيئة صونات لختها و علماتها

وعد : مابغيتش ندي الطريق و نجيبها و نضيع لوقت و نعيي راسي اللهم نبقى تما وهادشي لي غادي نبقى ندير باش ماتخلعيش

حياة : ايوا صافي حسن نيت "ضارت باش تمشي" بدلي انا غانحط ليك الما فالطواليط إلى بغيتي توضاي تجمعات عليك الصلى ديال النهار كامل

وعد : لا بقى ليا غير لعشى الشي لاخر صليتو تما عطاتني خالتي ربيعة جلابتها

حياة : مزيان

مسحات شعرها بالفوطة و لبسات حوايجها عاد مشات توضات و صلات... مجات فين تسالي لقات حياة حطات العشا دايرة الحسوة يدفاو بيها....

حياة : جلسي تاكلي غادي تسخنك الحسوة

وعد (هزات المعلقة) : جات فوقتها

جلسو كياكلو ومرة مرة كايتبادلو أطراف الحديث شحال غاتخلصك اش قالت ليك اش قلتي ليها حتى سالاو عشاهم وهي تمد وعد يديها لزلايف تهزهم لكوزينة

حياة (هزات فيها راسها) : اش كاديري

وعد : بغيت نجمع الطبلة نمشي ندوز هاد لماعن باش نمشي نتكا

حياة (حيداتهم ليها من يدها) : نهار كامل و نتي فتمارة تزيديها بالماعن.. غا خليهم انا نغسلهم غير سيري ترتاحي

وعد (لقاتها من الجنة و الناس) : ولاهيلا عييت بالجهد ظهري عواج و رجليا كايزدحو

حياة : انا نسخن ليك لما و جي ديه ديري فيه رجليك

وعد :واخا "شافتها قربات تهز المعلقة لي حداها وهي تشد ليها يدها باستها" لهلا يخطيك عليا اماما

حياة (حطات اشنو فيدها و قربات عنقاتها وباست راسها) :ماكدبش باك الله يرحمو مني سمى عليك الحنينة

طلعات تنهيدة من القلب على ذكر سيرة باها لي توحشات تسمع منو هاد الكلمة..... توحشات منو بزاف ديال لحوايج ما هو ديما فبالها مكايغيبش بتاتا ، بحال دابا مني ناضت دارت رجليها فالما سخون تفكرات مني كانت كادير ليه هو هكا و تبدا تمسد ليه رجليه عاد بدات كاتحس بشوية من الحريق لي كان كايجيه كل نهار مني كايرجع لدار عاد هو راجل كبير دابا هي شابة و ضروها رجليها و ظهرها كيفاش كان شعورو هو.... عضات على شفايفها محاولة تحبس دموعها ولكن نزلو بدون إذنها ماتقدرش تفكر تمارة لي دازت عليه و ما تبكيش خصوصا مني جربات اليوم اشنو هي تحمل المسؤولية و تخرج تخدم باش تقور اشنو تاكل و باش تعيش......

الإنسان بطبعو كايآمن بالتجربة، شفتي إلى ماطحتيش فالموقف و عشتيه بتفاااصيلو مايمكنش تقول لشي حد راني حاسة بيك هادي كاتبقى غير كلمة باش تواسي الطرف الآخر ولكن مكاتحس بصح حتى كاتجرب وهادشي لي وقع مع وعد دابا بعدما عاشت الروتين ديال تمشي لخدمة و تجي و ضرب تمارة و تحك بهاد المفهوم لمدة 3 شهور.... فهاد المدة حفظات الروتين ديال الخدمة و حاولات تولف و تحمل المسؤولية واخا لقات صعوبات كثيرة فاللول باش تفيق مع الصباح و ماترجع حتى لعشا هي لي ولفات غير النعاس و لحاجة تجيها حتى ل وجهها مكانتش عارفة الدرهم منين كايجي ولكن دابا ولات عارفة بقيمة الخدمة و بقيمة الريال و اش ساوي...

بحال گاع الايام راجعة لدارهم من بعد ما دوزات نهار طويل فالخدمة.. دخلات لقات حياة كاتوجد لعشى بدلات عليها و صلات صلاتها و مشات لبيت لقاتها حطاتو...

حياة : ظليتي تاني ف الماحال بوحدك

وعد : اه ربيعة مزال عيانة شوية

حياة (عوجات فمها) : اممم دايرة فيها عيانة و رامية عليك كلشي

وعد (هزات فيها عينيها) :الله يهديك اماما السيدة حالتها ضاربها لبرد انا نيت قلت ليها بقاي فدارك مكاين لاش تعاديني نمرض حتى انا

حياة : امممم "حطات لخبز" عندي ليك واحد لخبار

وعد : الله يسمعنا خير

حياة(بابتسامة) : لقيت خدمة

وعد (باستغراب) : اشمن خدمة

حياة : ميناج عند واحد لمرا ضبرات ليا فيها واحد السيدة "شافت وعد بغات تنطق وهي تحبسها" شوفي راه كنت كانتسنى غير نحيد البيض و نضبر على راسي حتى انا ايوا دابا جاب ليا الله هاد لخديمة ولا قولي غير تجربة حيت غادي نمشي نخمل ليها غير نهار واحد هي عندها الخدامة و بغاتني نعاونها فالتخمال تخلصني فنهاري و نجي

وعد (هزات كتافها) : لي بان ليك

حياة (خرجات عينيها) : مغاتقولي والو

وعد : أنا قلت ليك النهار اللول ماتفكريش فالخدمة انا دابا خدامة الحمد لله و عايشين بلي قسم الله ولكن الى بغيتي تخدمي باش نعيشو حسن من هكا قولي باسم الله

حياة : هانتي فهمتيني دابا "مدات ليها يديها" عطيني باش نركب غدا

وعد (باستغراب) : ياك عطيتك غير لبارح

حياة : تقديت بيهم مابقى عندي حتى ريال

شافت فيها مطولة و ناضت لبيت هزات عشرة الدراهم و رجعات مداتها ليها

وعد : هاكي

حياة : اويلي على عشرة الدراهم

وعد : هي لي عندي سيري فالطوبيس

حياة (عوجات فمها ) : شفتك بديتي تنفخي عليا بهاد جوج دريال ديالك غدا نخدم و نردها ليك

وعد (قلبات عينيها) :مغانجاوبكش

حياة : لا غير جاوبيني نيت "ناضت وقفات" نوضي هزي هاد لماعن غسليهم انا غانمشي نعس غدا غانصبح خدامة

مشات خلات وعد غير كاتشوف فهاد الأم لي مابغاتش تبدل و عمرها غادي تبدل نگيرها مكايتقاداش و يدها متقوبة كيف كايقولو كاظل عليها عطيني نجيب هادي عطيني نجيب هاديك والى مكانش عند وعد ما تعطيها تبدا تاني فالنگير..... ولكن بالرغم من هادشي ماتقدرش تفوتها ماهي مها و بنادم مكايختارش واليديه و زيد عليها هي لي بقات ليها فهاد الدنيا و حياة نفس الشيء فالأخير كاتبقى أم تنگر و تعاير ولكن راه ماتفوتش بنتها....

أصبحنا وأصبح الملك لله 🌞

اليوم غير كل الايام لي فاتو ناضو وعد وحياة فنفس الوقت فطرو و خرجو قد قد كل وحدة شدات الوجهة ديالها.... حياة خرجات من الحومة لي عايشة فيها و توجهات لشاريع شدات طاكسي كبير بخمسة الدراهم من حسن حظها لقاتو دايز على السيكتور فين كاينة الدار ديال السيدة لي غادية عندها...

وصلات تما كاتسول حتى وصلات ، صونات فالباب حلات ليها واحد السيدة مدورة طابلية على نصها عرفاتها بلي هي الخدامة ديال مالين الدار.... دخلاتها لإيطاج اللول لي كانو فيه الصالونات وهي تنطق

الخدامة : هانتي اختي غادي نتعاونو انا وياك نخملو هاد جوج صالونات نحيدو ليهم دابا الطلامط نطلعوهم يتصبنو عاد نهبطو التسييقة من الكوزينة لهنا

حياة (بفضول كادور عينيها) : هاد صالونات شفتكم مامفرشين ليهم والو فلارض هكا دايرين؟؟

الخدامة :لا راه الزرابي داوهم لبارح لاڤاج يتغسلو

حياة (بعد فهم) :اشناهي هادي ؟؟

الخدامة : بلاصة كايغسلو فيها الطموبيلات وهادشي "تحركات من حداها قبل ماتسولها سؤال آخر" زيدي نبداو حيدي جلابتك حطيها لهيه فوق الكرسي وهاكي صندالة لبسيها فرجليك

حياة (حيدات جلابتها و زيفها خلات غير زيف حياتي و لبسات الصندالة... قربات عند الخدامة و نطقات تاني ) : فيناهي مولات الدار

الخدامة (ساطت) :ناااعسة واااش غادي نبداو ولا لا

حياة(هزات حواجبها) :هاحنا غانبداو مالنا غانهربو راه غير سولناك

بداو خدمتهم حيدو الطلامط و الخوامي طلعوهم لماكينة يتصبنو و توجهو لكوزينة جبدو الركاني كايسيقو و يمسحو لحيوط مسالاو من تما حتى ولات حياة كاتبرگم و تسوط و مزال ليهم الصالونات....

الخدامة(كانت بدات كاتوجد فالغدا و سمعات الصونيط وهي تمشي ل لانتيرفون) : شكون ؟؟ واخا واخا "شافت فحياة" اجي قلبي هاد لحوت نهبط نجيب شي سخرة و نجي

حياة (مني جات وهي عندها فضول تشوف اشنو كاين لتحت... ناضت فالبلاصة و مشات لدروج باش تنزل) : غير خليك انا نمشي نجيبو راه عمري قليت هاد لحوت مانعرفش ليه

الخدامة(ما دات ما جابت) : صافي راه غادي يعطيك 4 لفرارج كنت وصيتو عليهم

جاوباتها بواخة و نزلات كاتمنظر فالحيوط ديال تادلاكت كاتقيس فيهم بيديها رطبين و كاتفكر حيوط دارها لي گاع مقشرين و محببين.... وصلات لتحت خدات من عند السيد السخرة حطاتها فالدرووج وهي تقلب الدورة لدار السفلية مشات مع الكولوار و دخلات كاتشوف فجوج بيوتة مسدودين باينة عليهم بيوت النعاس و واحد مردود كايتسمع منو صوت التوشويش مع قربات بانت ليها مراية كبيرة فالپلاكار كاتبين الناموسية لي كانت ناعسة فيها مولات الدار و راجلها لي كايبانو فالثلاثينات من عمرهم ... هي عاطياه بالظهر و هو معنقها من اللور كايتودد ليها، كان عريان من لفوق و مغطي نصو وهي بشوميز كايبانو غير خيوطو من كتافها... كايشوش ليها فودنها و يبوس عنقها وهي كاتفرنس ليه و حياة كاتفرنس كتر منها و ساااهية فالمنظر لي كايشوفوه عينيها....

خيالها سرح لبعيد وهي كاتخيل راسها بلاصة هاديك المرا مافيقها من سهوتها و أحلامها الوردية غير صوت الخدامة لي كاتعيط عليها... قفزات و بعدات من تما بالزربة قبل مايحصلوها و توجهات لدروج هزات السخرة و طلعات كاتسوط و كاتنش على وجهها مزنگة....

الخدامة(واقفة ليها فالدرووج لفوق) : تعطلتي اش بقيتي كاديري

حياة : حصراتني لبولة و دزت لطواليط

الخدامة (خرجات عينيها) : ماتقوليش ليا دخلتي لتحت

حياة : اش قربني لتحت انا دخلت لطواليط لي لوسط

الخدامة : امممم المهم ماتقربيش لتحت كاينين بيوت النعاس لالة مكاتبغيش لبراني يوصل تما

حياة (عينيها كايدورو) : علاه مغاديش نسيقو و نخملو تما

الخدامة : لا انا لي كانخمل ديك لبلاصة اصلا غير السيمانة لي فاتت خملت تما... دابا انا وياك حدنا الصالونات و نخرجو التسييقة للزنقة

حركات حياة راسها و توجهات كاتحط لغدا مع الخدامة.....جلسو تغداو بجوج و حياة كتاكل انواع السمك لي عمرها ذاقتهم غير كاتخشي فوجهها مارضاتش تسول السيدة اشنو سمية هادي و هادي... مجاو فين يكملو غداهم حتى دخلات عليهم مولات الدار لابسة پيجامة مع پينوار دافي و فوطة فوق راسها دليل على أنها عاد مدوشة، سلمات على حياة و عيطات على الخدامة ديالها لي كاتيق فيها عطاتها لفلوس لي غادي تعطي لحياة مني تمشي و رجعات نزلات بحالها....

حياة بقات غير حاضياها مني دخلات من راسها لرجليها كاتشوف الزين و النقى السيدة مهلية فراسها و كاتحسر على حياتها و شبابها لي ضاع...... هادشي غير ما زاد فقصتها نيييت، حتى بردات غدايدها فالتخمال ديك العشية كاااملة حتى وصل المغرب لي ماوصل حتى تهدات ديال بالصح..... خدات خلصتها و مشات بحالها من تما و النعيم لي شافت خلا حرقة فقلبها، الدار متولة و الماكلة موجودة وأهم حاجة الفراش داافي وهادشي كامل عمرها داقتو فحياتها غير كاتسمع بيه و اليوم شافتو بعينيها.....

***********

واقفة فالحانوت مع المغرب كانت ربيعة مشات لدارها و خلات ليها الساروت تسد مني يوصل لوقت وتمشي...

فهاد الأثناء وهي كادوز التيد و جاڤيل على لپوطاجي لي كايگرصو فوقو المسمن سمعات الهضرة موراها وهي دور بان ليها واحد الراجل ومعاه بنتو تكون عندها 10 سنين....

الرجل : عافاك ابنتي عطيني تمنية الخبزات

وعد : واخا الشريف

شللات يديها و بدات كاتقلب على لمياكي باش دير ليه فيهم الخبز و كاتسمع حوارو مع بنتو...

البنت : بابا غاتشري ليا ميلكا ياااك ؟؟؟

الرجل ( كان شاد فيديها لي تحدر حتى باسها ليها و نطق) : غانشري لبنتي ميلكا

البنت (عينيها لمعو) : يااااااااي "عوجات فيه راسها و كملات بصوت طفولي" و غدا غانخرجو لجردة انا و ياك و ماما

الرجل : اييه

البنت (بالفرحة بدات كاتجرو من يدو باش ينزل عندها) : انبوسك انبوسك

بتاسم الاب و نزل عند بنتو باستو فحنكو و تعلقات فيه حتى هزها بين يديه عاد شاف فوعد لي مدات ليه الخبز مبتاسمة و الدموع محبوسين فعينيها.... ما دا ما جاب مد ليها الفلوس و مشى هو و بنتو مخليين وعد اليتيمة كاتسترجع ذكرياتها مع النعمة العظيمة لي كانت عندها و مشات عند الله و الدموع شلال من عينيها.... تقلبات كاتحاول تكمل شغلها و التنخصيصة كاطلعها من القلب، عضات شفايفها و نطقات بصوت ضعيف

وعد : ياااربي تخليه ليييها ياربي لهلا دوقها من هادشي لي دقت

🍂🍂🍂

"بعد وفاة أبي، أنظر لـ الآباء نظرة حب عظيمة كما لو أنني أود أن أخبر العالم أن الأب هو مصدر القوة، هو القدوة، الأمان، الحب، الرحمة"

بعد فقدان الاب كاتولي اي حاجة متعلقة بالاباء ممكن تبكيك... تقراي خاطرة تسمعي اغنية تشوفي فيديو ولا تحضري لشي موقف بحال هذا .... كاين منا لي كايتحكم فدموعو و مشاعرو و يكتم الكية فقلبو و يسكت و كاين لي كلشي كايبان عليه بحال وعد لي ماقدراتش تخبي دموعها اليتيمة و بكات بقهرة و حزن مزال لحد الان مامتقبلاش موت باها و التغيير لي طرا فحياتها بعد فقدانو......

راجعة ادراجها للدار كاتجر فرجليها و راسها محني فالأرض و هموم الدنيا فوق كتافها، دوزات يديها على عيونها المتورمين بسبب البكا لي بكاتو و تنهدات كاتحس براسها عاطيها الصداع..... بعد مسافة الطريق وصلات لدار بان ليها الضو شااعل من السرجم عرفات بلي مها رجعات ، طلعات بالشوية عليها و توجهات لبيت حتى كاتبان ليها حياة مسرحة فوق السداري و دايرة جوج مخاد تحت رجليها معلياهم....

وعد : السلام عليكم

حياة (كاتسوط) : و عليكم السلام.. اربي رجليا مابقى فيهم مايتلبق تهديت

وعد(بتساؤل) : مالكي ياك لاباس ؟؟

حياة (هزات حاجبها) : منيتك كاتسوليني مالي واقيلة ماشي انا لي ظليت فتامارة النهار كامل

وعد (ببرود) : قلت ليك ماتخدميش نتي لي بغيتي تخرجي تخدمي

حياة : ندمت ندمت حتى مابغيت اويلي مالني على حالتي لعيالات جالسين كي القايدات فديورهم وانا نخرج ندمر

وعد (بتاسمات باستهزاء و نطقات مبدلة الموضوع) : كاين شي عشا؟؟

حياة : اويلي على لعشى بقى ليا غير لعشا نطييبو وانا رجليا طااابو بالشقى عند عباد الله... سيري وجديه ولا شوفي اش ديري

شافت فيها مطولة و خرجات من لبيت نيشان لدروج خرجات لحانوت جابت طاسة ديال الطون و خبزة... رجعات عمرات اتاي و دارت جوج نصاص فيهم الطون و هزاتهم لبيت عند حياة لي شافتها هازة الصينية و ناضت گلسات

حياة (شافت فداك الخبز) : هادشي لي قدرك عليه الله دايرة ليا نص خبزة فيها الطون كي الشماكرية

وعد : الشماكرية حتى هما بشر و حتى حنا ماشي مرة ماشي جوج كليناه و زايدون حتى انا كنت خدامة و جاية عيانة حتى حوايجي مابدلتهم

حياة ( خبطات الطبلة) :هاي هاي تحل ليك الفم مابقيتيش عارفة شكون قدامك "شافتها ساكتة مجاوباتهاش وهي تهز الخبز عضات فيه و نطقات بتذمر" العيالات ياكلو شكال و نواع الحوت و يعيشو فديور كي القصور غير الصالون قد هاد الخربة و انا نمشي نضرب عندهم لكرفي... هما يديهم يبقاو يشعلو و انا يدي يمشگو و يحراشو باش نقي ليهم زبلهم لهلا يحييهم

وعد عاد فهماتها علاش شاعلة بحال هكا و باغة غير فيمن تشد، تفكرات فهاد اللحظة نهار كاتمشي عند شي وحدة من خواتاتها و ترجع كاتحرر العيشة عليها و على باها بديك الغيرة و الحسد و المقارنة لي كاتقارن راسها معاهم كاتبردها بالسبان و النگير لي مكايساليش...

خلاتها داوية غير بوحدها فاللخر خسرات عليها جوج كلمات

وعد : جلسي فدارك معززة مكرمة فلوس الصير راني كاندخلهم مغاديش نعيشو كتر من قياسنا

حياة (ببرود) : مانتسناكش نتي تقوليها ليا... مغاديش نضيع صحتي على وحدة باغة غير تاكل و تخرا وتحلون على راجلها و زايدون انا هجالة غايطمعو فيا الرجال ويلي مني خرجت وهما ينگو عليا يخليهم بالخلا "ناضت وقفات شادة فظهرها" اميمتي ظهري تقسم على جوج فرنك مادوز ليا حتى سيمانة

خرجات من البيت كاتوحوح و تنگر مخلية وعد واقفة ليها اللقمة فحلقها، شافت حتى عيات و ناضت هزات الصينية داتها لكوزينة غسلات لماعن عاد مشات بدلات حوايجها و توضات و صلات و تخشات فبلاصتها كاتسمع حياة شاعلة التلفازة كاتفرج وهي بقات سارحة فالسقف و كاتخمم....

بدات كادير مقارنات بين مها لي خرجات نهار واحد تخدم و دارت فضيحة و بين باها لي كان بلا صحة و بلا جهد و كايخرج يخدم و مني يرجع كايضحك فوجهها و ماعمرو تشكى ولا بين ليها شي حاجة ...... هي دابا مني خرجات و خدمات عرفات بحق تمارة و اشنو كاتسوى ايه حياة مامولفاش ولكن راه حتى هي مكانتش مولفة اول مرة، حتى هي ولفات يخدم عليها باها و هي تسرح رجليها و مهازة لا هم لا والو كتاكل و تشرب و تنعس و بعدما مشى الحيط لي كان مكاليها طاحت و ناضت بلهلا يطيره ليها باش تجيب متاكل و تعرف بحق الريال ومنين كايجي و تمارة لي كاتضرب عليه....هزات يديها قدام عينيها كاتشوف لي طراس ديال الحرقات بسباب الفران و المقلة لي كايطيبو بيها لمسمن من غير المشگ و الزروقية فصباعها المنفوخين بسباب الما لي كايكون بارد فالأيام الشتوية.... بالرغم من هادشي كامل عمرها شكات ولا بكات كلشي كاتكتمو داخلها حتى لنهاية يومها عاد كاتشكي و تبكي على وسادتها لي كون كانت فيها الروح كون حضناتها....

أصبحنا وأصبح الملك لله 🌞

ناعسة مكمشة فالمانطة ديالها و شعرها مليوح على وجهها، هاد اليومين عندها راحة بحكم ان ربيعة مسافرة و قررات تسد منها نيت ترتاح وعد شوية....

دخلات عليها حياة و حلات الشرجم حتى دخل الضو من برا الشيء لي خلاها تكمش عينيها بإنزعاج.....

حياة (قربات عندها) : نوضي راه العشرة هادي

وعد (عطاتها بالظهر) : خليني نعس باقي لحال

حياة : لا نوضي دابا راه خالتك عيطات بغاتك

وعد (دورات راسها حالة عين و سادة عين) : شكون فيهم و اشنو بغاتني؟؟

حياة : سعيدة

وعد (دفعات لمانطة شوية و وقفات لمخدة تكات عليها كاتمسح فعينيها) : ايوا اش بغاتني؟؟

حياة (كادور فعينيها) : امم اليوم جايين ناسها ظالين عندها حتى لغدا... غادي يديرو كاسكروط و يتعشاو و بغاتك تجي تعاونيها قالت ليا جيو بجوج ولكن انا مافيا لي يتلاقة مع شي كمارة "بغات وعد تنطق و حبساتها" نتي إلى مشيتي راه تدويرتك موجودة انا قلت ليها لا فاللول ولكن مني قالت ليا راه لي دارتو تخلص عليه قلت ليها واخا

وعد (ساطت) : واش انا النهار لي بغيت نرتاح فيه خرجات ليا تمارة

حياة (دارت يدها على جنبها) : وعلاش ماتقوليش ربي جاب ليك هاد الرزق حسن مايمشي نهارك خاوي بلا فااايدة

وعد : واااا بغيت نرتاح ما باغة فلوس 3 شهور وانا كاندمر

حياة (خرجات فيها عينيها) : كايهزو عليك الملحة و انا مافراسيش.. نوضي إلى غاتنوضي من لفشوش لخاااوي حياتك كاملة و نتي غا ناعسة... خالتك قلت ليييها تفطر و تجي عندك تگعدي من تما و سيري ضبري على راسك

خرجات من لبيت مخلية وراها وعد متبعاها بعينيها المغرغرين بالدموع، غير خرجات من لبيت طلقاتهم على خدها.... تفكرات شحال هادي مني كان باها حي و كايعيطو خالاتها باش تمشي عندهم تعاونهم كايوقف عبد السلام فوجه حياة رااافض الفكرة و كايقوليها "بنتي ماتمشيش ضرب تمارة عند عباد الله و تشقى عليهم" كانو كاينوضوها وهو كايحلف بحلوفو ماتمشي، كاديرها تحت باطو و كايدخلها معاه لبيت يجلس يجمع هو وياها.... دابا فيناهو باش يطاكي عليها و يدير ليها قيمة بين الناس...

هي عارفة بلي مها قاسحة و أنانية و كاتموت على الريال داكشي علاش هي كانت كاتميل لباها بزاف حيت هو لي حنين فيها و مفششها و بالرغم من هادشي كاتحاول تقرب من حياة حيت فالاخير كاتبقى مها و دابا مابقاش ليها شي حد فالدنيا من غيرها....

ناضت من فراشها كاتمسح فدموعها و مشات نيشان لطواليط توضات و صلات الصبح عاد توجهات لكوزينة لقات حياة حاطة براد ديال اتاي و المسمن لي كاتجيبو معاها من لحانوت مني كايشيط عليهم فنهاية اليوم ...فطرات بلا ماتشوف فمها والا تدوي معاها وحتى حياة مادواتهاش... مع كملات فطورها مشات بدلات حوايجها و هزات ميكة دارت فيها پيجامتها و سليپ جديد مع الصلاة كاتخافو يتوسخ ليها و ماتلقى باش تبدل.... خرجات من الدار نيشان للبلاكة ديال الطوبيس شافت النمرة لي كاتدي قريبة لسيدي عباد وهي تطلع فيه....

مسافة الطريق و كانت قدام دار خالتها مع دقات حلات عليها بحالا كانت عند لباب

سعيدة (بتاسمات ليها و جراتها كاتسلم عليها ) : اهلا وعد كي دايرة لاباس عليك

وعد :الحمد لله ونتي لاباس؟؟

سعيدة : الحمد لله ابنتي"شافت من وراها" علاش مجاتش معاك ماماك؟؟

وعد : عيانة خدمات لبارح و جات مسخسخة لدار

سعيدة (دخلاتها ) : اااه قالتها ليا و شحال شكات..... هي ماعندها دراع لخدمة و مامولفاش اش داها تمشي هي گاع

وعد (بتاسمات باستهزاء) : وييه عندك الحق

توجهو لكوزينة كايتبادلو أطراف الحديث كانت سعيدة بوحدها فالدار، لقاتها جابدة شي مقادير حاطاهم فوق الطبلة....

سعيدة : جاييني عائلة راجلي على غفلة و مكاين لي يعاوني راك عارفة البنات كل وحدة و دارها... مابغيتش نجيب شي وحدة برانية تعاوني و نخلصها قلت اللهم فوعد بعدا

وعد (بغير نفس) :اشنو بغيتي ديري

سعيدة : نتي عجني لمسمن غاتكوني دابا مع الخدمة يدك خفافت فيه... و انا غادي نرد لغدا يطيب و ندير شي كيكة حتى نساليو هادشي و ندوزو لحاجة أخرى...

بدات كاتعجن و تگرص وخالتها حتى هي كاتقضي شغلها ما جا فين يطيب لغدا كان لمسمن و الكيكة واجدين ....

قلبات سعيدة لمسمن لقاتو مورق من لداخل على حقو و طريقو، كل مسمنة كاتشبه لختها

سعيدة : وا تبارك الله عليك اوعد هكا يكون لمسمن حمدت الله بلي فكرت فيك تجي تعاونيني و ماخديتوش من الزنقة اما كون حطيت ليهم لاستيك ماشي مسمن

ياله غادي تجاوبها وعد وهو يدخل راجل خالتها هاز شي تقدية سلمات عليه عادي و مشات كاتحط الغدا مع سعيدة.... علاقتها برجال خالاتها سطحية غير السلام السلام وصافي و حتى مع خالاتها مكاتگلسش تجمع معاهم ولا تقرقب معاهم الناب و دابا كون مكانت سعيدة غادي تخلصها مغاديش تجي تعاونها غير هكاك....

حطو لغدا و جلسو كايتغداو هما مجمعين وهي ساكتة و كتاكل حتى سالاو و مشى راجل خالتها يتكى و رجعو هما كايكملو شغالهم وعد دارت الحرشة و البغرير و خالتها دارت بسبوسة و مشات كاتقاد فالصالون حتى وصلات لعشية و جاو ناسها.... كانت عگوزتها و ثلاثة اللويسات مع جوج بناتهم گلسو على تقرقيب الناب مدوزين الهضرة بأتاي و داكشي لي معاه حتى نطقات وحدة فاللويسات وهي كاتشوف فسعيدة

اللوسة1 : من ديما كنت كانقوليك سمية بنت ختك كاتعجبني اسعيدة مني كنتي كاتعاودي عليها و دابا مني شفت مولات السمية صدقات غزالة بحال سميتها

وعد (بابتسامة) : شكرا ربي يخليك

سعيدة : باها الله يرحمو مسكين لي كان سماها

اللوسة 2(بفضول) : منين طاحت عليه

سعيدة : كان كايتصنط للراديو و كانت واحد المذيعة فلسطينية سميتها وعد كاتعطي الأخبار كايعجبو يسمع ليها ايوا نهار عطاه ربي لبنية سماها عليها

اللوسة 1 : الله يرحمو مسكين "حطات يدها على دراع وعد" و الله يصبرك ابنتي

وعد مع تذكرات سيرة باها حدرات راسها محاولة منها انها تكبح دموعها باقة مكاتقدرش تسمع عليه كلمة الله يرحمو... هي براسها مني كاتدعي معاه بالرحمة كايتمزق قلبها وهي كاتنطق بيها... صعيب عليها تجاوز هاد المحنة بسهولة و هي جرحها مزال طري بحالا غير لبارح مات وهي راه دازت 5 شهور....

وعد (بصوت خافت) :آميييين يارب

ناضت من حداهم دايرة السبة بالطواليط خلاتهم متبعين ليها العين بقات فيهم....

دوزو ديك العشية حتى وصل الليل كانت واقفة فالكوزينة مع خالتها لي كاطيب لعشى وهي كاتعاونها

سعيدة : وعد هزي هاديك الگفة لي حدا البوطاجي راه فيها الديسير غسليه معاك وخليه يتسقطر بينما طاب لعشى

هزات الگفة لي قالت ليها حطاتها فوق لپوطاجي و بدات كاتجبد المياكي ، الميكة لي جبدات حتى كاتحط الديسير لي فيها فالبانيو تغسلو عاد كاتجبد لاخرة ، ها لبنان ها التفاح ها الليمون ها لفريز ها لكيوي كاتغسل و تحط حتى وصلات لاخر ميكة وهي تنطق باستغراب

وعد: راجلك جاب حتى ماطيشة مع الديسير

سعيدة : واايلي على مطيشة "قربات عندها و حلات لميكة وهي تبدا كاضحك" هههه ضحكتيني اوعد يعطيك الخير

وعد (مافهمات والو) : علاش

سعيدة : هذا راه الكاكي حتى هو ديسير

وعد (بصراحة) : اول مرة نشوفو صحاب ليا شي نوع جديد ديال مطيشة

سعيدة : لا لا هذا فاكهة حتى نتعشاو و دوقيها غادي تعجبك "ضارت شافت الشبكات لي وراها فيهم الديسير " وا هانتي عرفتي الكيوي و الفريز و ماعرفتيش لكاكي

وعد : لفريز و كيوي مولفة نشوفهم فالتلفازة عند شوميشة و فايت ليا دقتهم ولكن هاد لكاكي عمري شفتو

سعيدة : ايوا هاهي جاتك الفرصة تشوفيه

خوات الميكة فالبانيو كاتغسل و تقلب فيه باستغراب حاجة اول مرة تشوفها و جاتها الفرصة باش دوقها.....

ماعندهاش مشكل تسول إلى ماعرفاتش لحاجة مكايهمهاش رأي بنادم... ماشي من النوع لي كايتصنع و كايبغي يعيش فمستوى كبر من ديالو، راضية بهادشي لي مقسم ليها الله... وحدة أخرى بلاصتها بعقلية أخرى مغاديش ترضى تسول غادي تغسلها و تحطها و ممكن مني يبداو ياكلوها تقوليهم مكاتعجبنيش غير باش ماتحرجش و تبان بلي عمرها داقتها.....

تحط العشا كلاو فجو زوين مجمعين و ضاحكين، ناس خالتها ماشي من النوع المسموم لي ماتحمليش تگلسي معاه بالعكس ناس عاديين.... بقاو كايتحتتو و هضرة تجبد هضرة حتى نطقات سعيدة

سعيدة (كاتشوف فلوستها) : فين وصلات بنتك شفتها غبرات

اللوسة : هاهي مسيكينة مقاتلة مع داك الماستر عندها امتحانات هاد الايام مكاتنعس مكاتشوفو

سعيدة : ايوا الله يسهل عليها لقراية مساهلاش

اللوسة : امين اختي

بنت لوسة سعيدة (شافت فوعد) : وعد نتي فاش هاد لعام

وعد (تزنگات) : احم لباك "باحراج" ولكن خرجت

القراية كاااتعلي شاانك و تخلي راسك مرفوع بين الناس خصوصا فهاد الوقت ديالنا قبل ماايسولوك على أي حاجة كايسولوك على الديپلومات لي عندك و اللغات لي كاتقني.... ومن غير الناس لي كايسولو و يحرجو لواحد راه الإنسان كايقرا لراسو بدرجة أولى بحيث الإنسان كايولي مثقف و راسو عامر و كايعرف كيفاش يناقش و يحلل المواضيع.... و فحالة ما ماتوفقش انه يشد شي ديبلوم تكون عندو شي لغة تفيدو، بحال دابا وعد كون كان عندها مع لفرونسي كون راها دارت ليكوغ لدراري صغار و دخل لفلوس حسن ليها من صهد لمسمن و ريحة زيوتات....

كاينين ناس ماتعطاتهمش فرصة هادوك معذورين يقدر يبان رزقهم فحاجة أخرى ولكن كاين لي كانت الفرصة بين يديه و مانتاهزهاش و حتى كايفوت لفوت عاد كايندم و يتحسر.... و فوقتنا هذا الطبقات الاجتماعية ماشي حاجز لي ممكن يخلي الإنسان مايقراش حيت تخرجو ناس مكانو لاقيين حتى عشى ليلة ولكن تقاتلو حتى وصلو....

أهمية القراية كبيرة بزاف فحياة الإنسان واخا تكون عندو صنعة كايتقنها و عايش بيها يحاول فنفس الوقت يقرا و يعمر راسو ولو غير باللغات يقرا بيهم الروايات و يفهم بيهم شحال من حاجة....

مني بداو الهضرة على القراية وهي قلبها كااايضرب خاايفاهم يسولوها وهي ماعندها ماتقول و فاللخر داكشي لي خافت منو طاحت فيه ولات كاتقلب غير فين تخبى و قبل ما يكترو عليها الهضرة و الأسئلة ناضت كاتجمع فالطباسل بالزربة باش تخوي لبيت.....

دخلات لكوزينة كاتسوط مراضياش هي صريحة اه ولكن موضوع القراية مكاتحملش لي يجبدو ليها ، مابقاتش رجعات عندهم بدات كاتغسل فالماعن لي جابت معاها حتى لحگات ليها خالتها لماعن لاخرين حتى الديسير ماكلاتو معاهم حتى جابت ليها خالتها حقها لكوزينة مشات لكاكي نيشان قشراتو و بدات كتاكل فيه و تبنن....

سعيدة (قربات عندها) : غادي نمشي نفرش ليهم.. تنعسي معاهم فالبيت ولا تنعسي فالبيت لاخر

وعد : غانعس فالبيت لاخر حتى نسالي و نجي نفرش لراسي غير خلي ليا الفراش تما....

سالات الماعن فالغسيل و مشات توضات صلات العشا هو لي كان بقى ليها و فرشات بلاصتها، شحال وهي حالة عينيها فالظلام عقلها سااارح لبعيييد عند الصدر الحنين لي مفارقها.... بكات على الوسادة بحال كل ليلة و ماحسات حتى داها النعاس

أصبحنا وأصبح الملك لله 🌞

واقفة فالكوزينة كاتوجد لفطور مع سعيدة حتى دخلات عليهم عگوزتها بواحد العكاز، اول كرسي لقاتو قدامها جلسات عليه....

العگوزة : الله ياااربي الله "شدات على ركابيها" الصحة مشات ابنيتي

سعيدة : علاش نضتي الحاجة راه غانحطو لفطور دابا

الحاجة : جيت نسولك واش تمشي معايا لحمام كي شتي الدريات غادي يفطرو و يمشيو بحالهم وانا غادي نزيد معاكم شي يامات و هاد الحمام لي حداكم نقي كايعجبني نغسل فيه

سعيدة : نمشي معاك الحاجة ولكن فيا حق الشهر مانقدرش نغسل فالحمام "شافت فوعد" وعد نتي غاتبقاي حتى تغداي معانا ولا تمشي

وعد : علاش؟؟؟

سعيدة : إلى بغيتي تمشي مع لحاجة لحمام منها تونسيها منها تغسلي

وعد (بدات كادور فعينيها) : ولكن راه ماجبتش معايا حوايجي

سعيدة : أنا نعطيك شي حاجة من حوايج بناتي لي كايخليو هنا راه يجيو قدك

وعد (حشمات تقول لا قدام لمرا) : واخا صافي

الحاجة (بابتسامة) : الله يرضي عليك ابنتي

سعيدة(بغات طمنها) : راه الحاجة كاتشد كسالة نتي غير ونسيها و ردي ليها لبال لا يمشي يطيح ليها الطونسيون

تافقو بلي يفطرو و يجلسو شوية على مايتهظم داك الفطور و يمشيو لحمام حيت مامزيانش الدوش ولا الحمام ورا لماكلة..... وعد عطاتها خالتها حوايج من عند بناتها و السليب راه كانت جايباه معاها باقي نقي... جمعو الرزمات و هزو سطولة و وصلهم راجل خالتها بالطموبيل حتى لباب لحمام لي كان قريب ولكن مباغيش مو تكرفص....

شدات الحاجة الكسالة لي سبقات شدات ليهم بلاصة و عمرات السطولة عاد دخلو هما بعدما حيدو حوايجهم لقاو الحمام معامرش بزاف بحكم أنه وسط السيمانة و وقت القراية الحمام مكايعمر حتى لويكاند.... شدو بلايصهم و بداو كايحكو ، وعد كاتحك و تعاود حارة فحكانها كاتبقى تفرك فراسها حتى كايحمار لحمها... خوا ليها السطل و ناضت باش تعمرو مخلية الكسالة ملاهية مع الحاجة، دارتو تحت الروبيني وهي تسمع واحد المرا كاتعيط ليها من اللور

المرا : وااا بنيتي واابنيتي

وعد (ضارت عندها) : واش عيطتي عليا ؟؟

المرا :اييه الله يرضي عليك اجي دوزي ليا على ظهري إلى بيتي

وعد (بكل رحابة صدر) : واخا بلاتي يعمر ليا غير السطل

تسنات سطلها حتى عمر عاد مشات حكات ليها ظهرها نييييت و ديك المرا كاتشكر فيها و تعاود مع سالات معاها بانت ليها واحد المرا شارفة غير بوحدها كاتعنكش باش تحك ظهرها بقات فيها وهي تقرب عندها قالت ليها واش نحك ليك... مقالتش ليها لا جاتها من الجنة و الناس، حكات ليها حتى هي عاد مشات گلسات بلاصتها كاتكمل غسيلها.... هذا هو حالها نهار كاتمشي لحمام كاتحك لنص فيه و ماتقولش لا لشي حد....

فهاد الأثناء واحد المرا كانت جالسة فالقنت كاتشوف فيها مني ناضت حكات لمرا اللولة حتى هي كانت الكسالة كاتعاونها بحكم انها كبيرة شوية فالعمر.... لاحظات الخفة لي فيها ماشي من النوع المرخي تحك شوية و تسهى ساعة بالعكس حكات لراسها مزيان و الكسالة ديال الحاجة دوزات ليها على ظهرها وهي تطلق شعرها غسلاتو و دوزات الصابون فهاد الوقت كانت الحاجة سالات و خرجات بقات بوحدها كاتجمع الدنيا و مخلية سطلها يعمر باش توضى و تشلل.... غسلات الجلدة و لصقاتها مع الحيط تقطر و المرا لي كانت حاضياها مزال حاطة عليها العين غير شافتها غادي تخرج وهي تنطق

المرا : عفا بنتي اجي دوزي ليا الصابون على ظهري

وعد (قربات عندها) : واخا ا خالتي

المرا ( عطاتها الكيس ديال الصابون ) : هاكي الله يرضي عليييك كانتسنى الكسالة ترجع عندي ساعة غبرات "شافتها سالات وهي تعمر غراف ديال الما عطاتها تشلل يديها و نطقات بلا هواها " اش سماك الله؟؟

وعد(بابتسامة بشوشة) : وعد

المرا : الله يرضي عليك اوعد

وعد : اميين لخالتي

هادي آخر كلمة قالت ليها و مشات توضات و شللات، خرجات لاوية فوطة على جسمها لقات الحاجة مزال كاتساراح غير بالبينوار.... لبساتها حوايجها دغيا و بدات كاتعاون فيها حتى لبساتها عاد عيطو لراجل خالتها من تليفون الحاجة نوكيا بيل كاتعرف تقول فيه غير الو... جلسو كايتسناوه و المرا لي دوزات ليها وعد الصابون خرجات تلبس حتى هي كلما تهز وعد عينيها كاتلقاها كاتشوف فيها و كاتبتاسم ليها و ترد ليها الابتسامة حتى جا راجل خالتها و ناضو خرجو....

المرا (ناضت عند الطيابة) : لالة الزوهرة هاد البنية عندمن جات

الزوهرة : اشمن بنية؟؟

المرا : هادي لي عندها حفيرات الزين " الزوهرة بقات كاتشوف فيها" ايوا خلاص لي عاد خرجات مع المرا لكبيرة

الزوهرة : ااااه هاديك جات عند سعيدة مرات البوليسي

المرا : امممم

الزوهرة (بفضول) :علاش اتا تاتسولي ؟؟

المرا : غير سولت وصافي... المهم مني يجي ولدي علميني نخرج عندو

الزوهرة : واخا...

يتبع...