جزاء وعد الجزء الثاني

وصلو لدار فطرو و طلعو عند الحولي مقابلينو، كااايتسناو الگزار يجي و فهاد الأثناء صونا تليفون حياة برقم ختها.... قربات حدا الحولي باش يتسمع تبعبيعو مزياااان مع فتحات الخط تسمع صوت عزيزة

عزيزة : الووووو حياة وا مبروك العيد

حياة : الله يبارك فيك علينا وعليك اش خبار دراري و مول الدار كلشي مزيان؟

عزيزة : كلشي بخير الحمد لله "سمعات صوت الحولي و نطقات بلا ما تشعر" شريتو الحولي؟

حياة (ضحكات) : ويلي ياكما ضارباك الشمس عاد قبيلة باركتي ليا العيد.... صباح العيد هذا و نكونو مزال ما شريناه معلوووم شريناه

عزيزة(صدماتها): امممم ايوا بالصحة والراحة

حياة : الله يعطيك الصحة

عزيزة : نخليك مول الدار كايعيط

حياة (ميقات) : اممم حتى انا نخليك سمعت الدقان واقيلة الگزار جا "قطعات كاتعوج ففمها" غا نتي لي كاتعرفي تفوحي

وعد : ناااري على خالتي عزيزة

حياة :مكاتقاداش " سمعات دقان و تعياط" عبد السلام هذا لگزار يمكن كايعيط ليك

حضر الگزار باش يذ*بح الأضحية و جاب معاه لي يعاونو حيت عارف عبد السلام مغاديش يقدر..... مجات فين تكمل ساعة ديال المگانة كان الحولي تذ**بح و تسلخ و تعلق، نزل معاهم عبد السلام باش يخلصهم يمشيو بحالهم و لفوق بقات حياة و وعد كايشقاو....

حياة : وعد اري هاديك لكبدة ندوزها فوق المجمر شوية باش نگرضها

وعد (جابت ليها لبانيو لي فيه الكبدة) : هاكي

حياة : ياله هزي ديك الدوراة سيري غسليها فطواليط لتحت و حكي طواليط مني تسالي

وعد (شهقات) : اويلي على نغسلها فطواليط راه غادي تخنقني الريحة تما مضيق خليني نغسلها هنا السطح منفس

حياة (برفض) : لا لا القرقارة هنا كاتسد و زايدون غادي يولي ليا السطح مطلي بالخرا نبداو نحكو فيه تاني

وعد (نفخات شفايفها) : تء "هزات البانيو و هبطات مع الدروج لقات باها طالع تاني هاز خنشة خاوية فيدو" علاش هاديك ابا

عبد السلام : باغي ندير فيها الراس و الكرعين نديهم يتشوطو

وعد : بلا ماتمحن انا نغسل هاد الدوارة ونديهم راه دراري غير فراس الدرب

عبد السلام (بتاسم و باس ليها راسها) : الله يرضي عليك" شاف فالبانيو " الحادگة ديالي

وعد (ضحكات) : ههه مابقيتش لحنينة وليت لحادگة

عبد السلام : حنينة و حادگة و بلارة بنتي

وعد (كاتفرح مني كايمدحها) : لهلا يخطيك عليا

كملات طريقها لتحت مشات نيشان حطات لبانيو فالطواليط عاد مشات لماريو فبيت واليديها واقف غير لكادر لا بيبان لا والو رااااشي و تفرتيت ديال الخشب معمر لحوايج كايسوسوهم عاد يلبسو لحاجة... بدات كاتقلب على زيف حياتي وسط الربوج حتى لقاتو.... طلقات شعرها الكحل و عاودات جمعاتو بالبانظة و عقدات الزيف على راسها.... رجعات لطواليط مع وقفات وهي تنطق

وعد : هاد لبولة بغيت غير نعرف باش عرفاتني دخلت لطواليط قبيلة مكانتش فيا....

عاودات خرجات لبانيو حتى قضات حاجتها و عاودات دخلاتو.... و بدات كاتغسل فالدوارة باحترافية بحكم انها من صغرها كاتعاون مها يد بيد حارة فشقاها و حادگة....

كملات شغلها و خرجات من تما هازة لبانيو فيه شبكة دايرة فيها الكرشة تقطر...لقات حياة جالسة كاتشوي فالكبدة...

حياة (هزات فيها راسها) : حطي داكشي و سيري غسلي يديك و طلعي لخبز من لتحت نسخنو باش ناكلو....

وعد (يتساؤل) : فين با

حياة : نزل لتحت قالك يا لالة انا نعمر ليكم اتاي

وعد: وفين الراس و الكرعين

حياة :نزلهم معاه

نزلات كادردك فالدروج لقاتو فالكوزينة وريحة اتاي بالنعناع عاااطية...

وعد (مع دخلات من باب الكوزينة نطقات) : بااا ماتقولش ليا ديتي الراس يتشوط بوحدك

عبد السلام : لا ابنتي جا ولد لمعطي داهم هو لي كايشوط هاد المرة فالدرب دق عليا و طلع هزهم من هنا

وعد : ايوا مزيان من بعد نمشي نجيبهم

طلعو اتاي لفوق لقاو حياة عازلة ربعة ديال القطبان جوج لنعيمة و جوج لجارتها لاخرة مداتهم لوعد وصلاتهم ليهم..... و هذا هو جو الأحياء الشعبية شي كايدوق شي حتى هما لقاتهم موجدين ليها حقها خداتو و رجعات لدار كرشها كاتغرغر كلات قطيب فالدروج عاد دخلات عندهم.... جلسو كياكلو فجو اسري بسيط حتى سالاو و ناضو جمعو لماعن غسلوهم و نقاو الكرشة و قلبو لمصارن عاد ضربوها بتسييقة و عاودات خرجات وعد جابت الراس و الكرعين مشوطين غسلاتهم و حكاتهم من لحموم كيف طلبات منها حياة عاد مشات دوشات و طاحت كااااو فوق السداري بالعيا ....

بعد مدة وهي غارقة فنعاسها حتى كاتسمع صوت مها كاتفيق فيييها...

حياة : واااا نوضي راك خمرتي و شركتي الليل مع النهااااار نوووضي

وعد (بصوت ناعس) : خليني راه مني نعست كان فات لعصر

حياة : ايوا راه قرب لعشا نوووووضي

هزات راسها من فوق سداري بزز حتى لمخدة مالحقات تكى عليها بالعيا.... مسحات فمها وهي تلمح طبعة فازگة فالسداري فين كانت حاطة وجهها....

وعد : اووووف وقتما نعست عيانة كانريگ بحال بوبي

حياة (شافت الطبعة) : طبعتي الطلميطة هزيها صبنيها غدا جايين خالاتك مكاين لاش يشمو ريحة الريوگ براكة لفهامة لي فيهم

وعد (كاتفوه) : ناري ذكرنا السمن والعسل

حياة: نوضي نوضي خلاص خليني نقلب هاد السدادر ماعرفت ايمتى يوقفو عليا غدا

مشات غسلات و جهها و طلعات نيشان لسطح مافكرات لا فظهر لا عصر لا مغرب و الهضرة لي قال لفقيه و باها فالصباح مشااات مع الواد.....

صبنات الطلميطة و نشراتها و نزلات لتحت نيشان لكوزينة كاتقلب متاكل لقات كسكسو كاايطيب فوق لبوطة...

حياة (دخلات عليها) : علاياش كاتبقشي الفارة

وعد : فيا الجوع

حياة : ديري شي فرماجة فالخبز يجي باك من الجامع و نتعشاو

وعد (حلات الثلاجة تهز لفرماج وهي تنطق) : الثلاجة عمرات ما تاني غايكون لفريگو ثلَّجْ

حياة (بتذمر) : هاديك ثلاجة هاديك دوزات قرن و زمارة عند خالتك و عطاتها لينا دوزات عندنا قرن آخر مرة تخدم مرة تسكت... هاهو دابا اللحم عطاه الله مالقيت فين نديرو باك جاب لگزار گرض لحم طلبت غير نعيمة و سعاد دارو ليا شوية عندهم و شوية غادي نديرو هنا و لي بقى غانگددو

وعد : كون خليتو لحم حتى لغدا بعدا ينشف من الدم

حياة : تي فين غانحطو فهاد الصهودات يصبح ليا زرگ و ريحتو عاطية و غدا جايين خالاتك اش نحط ليهم... "تنهدات" جاب الله هاديك البركة لي عندنا كاينة اما كون تحاشمت معاهم ما نلقى باش نقوم اللحم

بقاو شادين الجماعة فالكوزينة حتى دخل عبد السلام من برا وهي تسگي حياة كسكسو و حطات ليهم القصرية دخلو فيها طول و عرض....عبد السلام من بعد ماشبع رجع اللور ناطق الحمد لله و حاظيهم كيفاش فرحانين و باينة الراحة فوجوههم وهما لي غير لبارح كانو حازنين و معارفين كيفاش غايدوز عيدهم....

ناض غسل يديه و توجه لبيتو يرتاح تكا فوق الناموسية لي هلكات ليه عظامو ولكن ماعندو مايدير من غير الصبر.... بقى متكي كايشوف فالسقف ساااهي حتى دخلات عندو حياة متوجهة لماريو...

حياة : مزال مانعستي "ياله غادي يجاوبها وهي تقاطعو بسؤال آخر" شربتي دواك؟؟

عبد السلام (بقى ساكت شحال عاد نطق) : قطعتو

حياة (ضارت عندو) : كنت عااارفة هاد الايام لي دازو كاااملين و نتا قاااطعو واااش بغيتي تموت ولا تگلس فالركنة

عبد السلام : ماطرا ليا والو هاني بخير

حياة : اااه بخير كل مرة دااايخ فالدروج بسباب الطانسيو نطل عليك فالدروج نلقاك طلعتي درجة و گلستي بلا ماندوي على لعاصاب نتناقش معاك فحاجة عادية كاتبدا ترعد

عبد السلام (دور وجهو مراضيش) : نتي عارفة علاش قطعتهم

حياة (بابتسامة استهزاء) : هه داكشي لي تبدل سنين هادي غادي يتبدل دابا وااا صافي لي عطا الله عطااااه

عبد السلام(ماحملش راسو) : نتي عارفة ماشي لخاطري دارها لمرض و ماعقت براسي حتى فات لفوت

حياة : إلى وقفتي الدوا غادي تجيبها غير فصحتك اما حاجة أخرى مغاديش تبدل "تخشات حداه فالفراش و عطاتو بالظهر و كملات بقهرة" ولفت نعيش انا وياك كي لخوت أعبد السلام ماهو عام ولا عامين راه سنين هادي

أغلب المشاكل الزوجية أو نقولو جميع المشاكل الزوجية أساسها هو الفراش من تما كاااايبداو المشاحنات و شد ليا نقطع لييك شي مرات ممكن الراجل يغوت على شي حاجة تافهة مثلا علاش حطيتي هاد لكاس هنا و ماحطيتيهش لهيه ولكن هو فالاساس غواتو على لمرا لي نعسات حداه مثلا ريحة العرق مع ريحة الطياب عاطين منها حتى خنقاتو و ماقدرش يقرب ليها .... او المرا لي كاتبقى نهار كامل قالبة وجهها على راجلها وهو معارفش السبب وهي فالاساس واخدة فخااطرها حيت خدا غرضو منها فالعلاقة الجن**سية و ماضربش ليها حساب بلي حتى هي عندها ش**هوة و مشاعر و أحاسيس قضا الغرض و عطاها بالظهر....

فما بالك لي منعدمة بيناتهم العلاقة بحال حياة و عبد السلام لي دوزو سنين قليلة من ورا ولادة وعد و بدات العلاقة كاتبرد بيناتهم شوية بالشوية بسبب تأثير الدوا على عبد السلام وهادشي وصل بيهم حتى لهاد الوقت و تزاد عليه الأمراض الجسدية لي فيه و عامل السن حتى هو.... واحد ستيني مزوج وحدة بقى ليها عام على الربعين اكيد هو غادي يكون عيا وهي مزال فيها ما يتزوج من جديد و ما أكثرهم العيالات لي مكايجي نصيبهم حتى يوصلو لهاد السن و ممكن تولد و تعيش بخير مع راجلها..... و حتى الرجال فسنو ممكن يولدو و يعيشو علاقة ج*نسية سليمة ولكن الى كانت صحتهم سليمة و مافيهم بلية و رياضيين ماشي بحال عبد السلام....

عبد السلام خرج عليه دوا الطونسيون مع دوا الاعصاب لي ركبوه ورا موت واليديه لي ماتو متابعين و على غفلة الصدمة لعبات عليه.... هاديك الفترة حاول يخرج من هادشي و يعاون راسو بداكشي لي ورث من باه شرا الدار لي ساكن فيها دابا و مشى خطب حياة لي عطاها ليه باها فالبلاصة حتى من التكاليف كانو على حسابو بحالا باغي غير يصيفطها.... من ورا زواجهم لقى منها البرود واحد كبر منها ب 21 عام ماقدراتش تقبل زواجها بيه هي مزال شاااابة عاد غادي دخل لعشرين وهو اربعيني كيفاش غادي تفاهم معاه كيفاش غادي تقبلو وهو مكاينش شي حاجة فيه تخليها تميك على حاجة أخرى كبر منها و مكحط عندو غير ديك الدار لي سكنها فيها و لخدمة كل نهار و نهارو مكايناش شي حاجة مضمونة واخا هاديك الوقت كان كايدخل لفلوس كتر من دابا.... نفور حياة منو أثر عليه حتى هو و زيد عليها قلة الشي و لخدمة لي ماعندوش فيها استقرار و زادوها مني تزادت وعد لي بالرغم من أنها نورات حياااتو ولكن كان كايتعدب مني كايشوفها ملابساش مزيان ولا مشابعاش فكرشها ولا ناقصاها شي حاجة.... فهاديك الفترة كانو كايعاونوهم غير عائلة حياة خواتاتها كل مرة مصدقين عليها حاجة من اشنو كبر على بناتهم وهو راه ماعندو لا خوت لا عمام يوقفو معاه واليديه لي كانو عندو ماتو....

هاد الضغط كااامل و زيد عليها المشاكل لي كايلقى برا مني كايبغي يخدم و هضرة الناس السامة و المجتمع لي مكايرحمش وهو كايجمع فخاطرو حتى مرض ولا كايدوخ بسباب الطونسيون لدرجة انه ولا كايطيح شي مرات.... حتى لواحد النهار كانت عندو 200 درهم و مشى عند طبيب عام دوز لقى عندو الطونسيون و الاعصاب واصلين ليه لعظم....خرج ليه دوا فيه زبالة فلوس ماعندو منين يشريه شاف حتى عيى مشى لسبيطار لحومة قاليهم عندي الاعصاب و الطونسيون عطاوه دوا بلا تحاليل بلا والو غير لبقو ليه دوا و صيفطوه.... و من تما وهو عاطيها لدويان حتى بدا عندو البرود الج نسي شوية بالشوية الانت صاب كانت فيه صعوبة من بعد نعادم فمرة ومن ديك الوقت وهو عايش مع حياة كي لخوت....

فالصباح بكري مصبحة حياة على لكوزينة ردات لحم يطيب من بعد ماتسلفات لفورنو من عند جارتها و جابت بوطة كبيرة .... خلات اللحم كايطيب و طلعات لسطح عند وعد لي باتت الليل كامل كاتحسب فالنجوم حتى داها النعاس تما... حياة غير مالقاتهاش فالبيت عرفاتها طلعات تاني لسطح.. دفعات لباب ديال الحديد دااااار زييييط حتى تخبط مع الحيط، على إثر هاد الصوت ناضت وعد قافزة شعرها طالع و السفنجة عوووجة وعينيها معمشين كاتحلهم بزز فحياة لي واقفة عليها كي قباض الرواح.....

حياة (بعصبية) :واااااااش لبووووووك بغيتيني نولي نربطك عاااااد نمشي نعس ولا كيفاش

وعد (كاتبلع فريقها باش تقدر تهضر) : راه ماحسيتش براسي حتى داتني عيني

حياة : هاد الزابور هو لي عندك تبقاي تعاودي لينا فيييه شوفي ليك شي حاجة جديدة

وعد : وا صافي اماما "حيدات لاستيك من شعرها و عاودات جمعاتو" تء تخبل لبارح غير غسلتو و لويتو.. فين المشطة ؟؟

حياة : راها فوق الثلاجة سيري مشطي بيها و حطيها فلبيت و قولي لباك يعطيك باش تجيبي الموناظة و الخبز

وعد (بتذمر) : ناااااري لحسين سد سير حتى لشهر جاي عاد يحل دابا غايخصني نطلع لحانوت لي لفوق

حياة (غوتات حتى قفزاتها) : يااااااتي نوضي و نتي من قبيلة ونتي تصوطي عليا كي اللفعة

ناضت هبطات بالزربة قبل ماطير عليها بشي قرصة عارفاها دغيا كاطلع ليها النقشة خصوصا اليوم خالاتها جايين غاتكون متوترة...

وصلات لتحت مشات هزات لمشطة من فوق الثلاجة.... مشات لطواليط غسلات وجهها و شلات فمها و خرجات تقابلات مع ديك الشقفة ديال المراية لي تما مشطات شعرها و جمعاتو عاد مشات عند باها لبيت لقاتو فايق و متكي بلاصتو....

وعد (بوجه بشوش) : صباح لخير ابا

عبد السلام(ناض تكا على الحيط بظهرو) : صباح النور اكبيدتي كي صبحتي؟ ؟

وعد : بخير الحمد لله نتا لي كي صبحتي شفتك باقي متكي "بحزن" عييتي لبارح يااااك ؟؟؟

عبد السلام (بابتسامة اطمئنان) : اش غادي يعييني الحنينة مالي انا لي ذا**بح و سالخ مادرت وااالو غير نعست معذب فالليل و رجلي ضراتني شوية

وعد (عرفاتها غاتكون الرجل لي كايعرج بيها) : انا نمشي نتسخر و نجي نمسدها ليك شوية

عبد السلام : واخا ابنتي الله يرضي عليك "بتساؤل" اش غاتجيبي من لحانوت

وعد :لموناظة و الخبز

عبد السلام : مدي ليا داك السروال

مدات ليه سروالو عطاها لفلوس و خرجات مع الباب مخلياه كاايحسب فداكشي لي بقى و كاايشوف شحال غادي يبقى ليه باش يخرج يقلب على راسو من جديد... أما وعد مشات جابت السخرة حطاتها فالكوزينة و سخنات اتاي و خدات فرماجة ليها و زيت لعود لباها قادتهم فصينية مع خبزة من لي جابت و حطاتهم فالبيت و عيطات على عبد السلام باش يفطرو هي وياه.... مع سالاو فطورهم مسدات ليه رجلو عاد مشات غسلات لماعن و بدات كاتعاون حياة....

حياة (سمعات الظهر كايودن) :ها الظهر دابا تسمعيهم كاايدقو طيري عند سعاد قوليها تعطيك طبسيل الطاوس ديالها

مشات خدات الطبسيل من عند الجارة وهي راجعة لقاتهم حدا لباب واااقفين 3 بيهم لابسين جلالب ها ديال الراندة ها ديال الطرز رباطي مسكسفين على لحالة، مع بغاو يدفعو لباب يدخلو وهي توقف عليهم.... بابتسامة صفراء كاتسلم عليهم و توسل على بناتهم و ولادهم من فوق نيفها حتى نطقات عزيزة من بعد ماقشعات الطبسيل فيد وعد

عزيزة : مك باقة كاتسلف لماعن من عند الجيران

وعد (ببرود) : الجيران مع بعضياتهم عائلة و هدا هو الفرق في هضرتك

ماعطاتهاش فرصة تجاوبها دفعات لباب و طلعات مخلياهم وراها.... عزيزة ماحملاتش راسها شافت فختها و نطقات

عزيزة : واش حشات ليا الهضرة ولا غير كانتخايل

سعيدة : زيدي زيدي هاد الجيل مابقى يحشم

عزيزة : هانتي تشوووفي

طلعو مع الدروج لقاو حياة فاستقبالهم لابسة قميص عاقل على المرابطين السفيفة ديالو مشنتفة و مدورة طابلية على خصرها و زيف حياتي على راسها...

حياة : مرحبا مرحبا "بدات كاتسلم" اش خباركم كي دايرين؟؟؟ مبروك عيدكم

عزيزة : الله يبارك فيييك كي دوزتي عيييدك و كي خرجات دوارتكم؟

حياة : تبااااارك الله على الدوارة قداااش محنات بنتي وعد مسكينة.... كي شتي الحولي كبير تبارك الله لا الدوارة لا لكبدة كلشي كلشي كبير فيه يااااختي

عزيزة : اممممم ايوا مزيان

وعد كانت واقفة حدا مها غير بداو لفوحان قلبات عينيها و مشات لكوزينة كاتبرگم... اعدى حاجة عندها هي نهار تجمع مها مع خواتاتها وحدة تفوح على لأخرى ومنهم مها نيت... مني يجلسو و هما على المعاني لي يشوفهم من بعيد يقول هادو هما لخواتات و هما راه شي حاسد شي و شي كايتشفى فشي الا من رحم ربي.....

جلسو فالبيت كايدورو عينيهم مع لحيوط لي گاع مقشرين و مشققين و واحد الجهة من السقف طايح منها شوية....

عزيزة (نغزات ختها) : هاد الدار واقفة غير بالدعاء

خديجة : سكتي شوية ونتي فينما جيتي هنا تقولي نفس الهضرة

عزيزة (ماتسوقاتش ليها خلات حياة حتى دخلات ونطقات) : قولي ليا احياة هاد السقف مزال مقاديتوه راه شي نهار يريب عليكم الله يحفظ

حياة (كانت كاتمسح فالطبلة وهي تهز فيها راسها) : ولاهيلا مني دويتي فكرتيني.... ديما كانبغي نسولك واش مزال ما عفى عليكم الله من ديور لكرا؟

عزيزة (مارضاتش ولكن مابيناتش) : ياااختي راجلي كااايعجبو يبدل عامين 3 سنين كانبدلو دار مانقدروش نبقاو فدار وحدة سنين دغيا كانملو

حياة (عطاتهم بالظهر غادية لكوزينة و نطقات بصوت شبه مسموع) : انا بعدا هادي داري كيما بغات تكون كيت لي من دار لدار

عزيزة (شافت فخواتاتها) : سمعتوووووها اش قالت

سعيدة : هادي جمعاتنا كاااملين

خديجة : وااااش نتوما جايين معروضين ولا جايين ضاربو اويلي نعلو الشيطان و سكتووونا

خواتات حياة منهم لي ميسورين نيييت و منهم لي متوسطين ماعندهمش الأملاك ولكن عايشين بخير ماشي بحالها هي لي نهار واكلة نهار كاتخمم ماتلبق باش يشبعو فكرشهم....

مييييكو باش يدوز النهار على خير وهي مشات عمرات الطبسيل و حطاتو ليهم... اللحم بالبرقوق غير الشوفة فيه كاتشهي ، تبعاتها وعد بالخبز و تجمعو على الطبلة كياكلو و مجمعين مرة يهضرو عادي مرة يبدا تاني فالمعاني حتى نطقات خديجة...

خديجة : فينو عبد السلام خارج؟؟

حياة :لا راه فالبيت متكي

عزيزة: و مغايتغداش... مااالو مريض؟؟؟

وعد (نطقات بالزربة) : برا و الباس علييه.. غير مافاقش بكري وعاد فطر قبيلة

سعيدة : شتو مجاش يسلم

حياة : كان جاي قلت ليه خليهم حتى يتغداو "حيدات الزيف من راسها" الصهد

عزيزة (ضربات على شعرها) : شعرك مزال كايتبوكلا ليك

حياة (ضحكات) : مالك بغيتيه يولي مسرح راه هكا دااااير

عزيزة من ديما كاتغير من حياة حيت هي الزوينة فيييهم وهي الصغيرة شعرها مبوكلي من عند الله و كحل عاطي لعين ولكن الزهر الله يجيب على قولتها هي....

كملو ماكلتهم...و ناضت حياة كاتجمع لماعن و وعد مشات جابت مقراج فيه ما دافي و بانيو باش يغسلو يديهم حيت ماعندهمش الطاس ديال الغسيل والى نوضاتهم يغسلو فالطواليط ولا لكوزينة غادي يبداو تاني فالفهامة و الملاحظات الخاوية.... مني غسلو و سالاو ناض عبد السلام سلم عليهم و تاجه لكوزينة ياااكل مخليهم متبعين ليه العين....

خديجة (بحسرة) : عبد السلام مسكين بانت فيه تمارة

عزيزة: راه شرف بالسيف يبان ليك هكا

سعيدة : ويلي راني شااايفة گرانو مزال يعاودو الزواج تي 60 عام سهلتيها غير هو رشاااه الزمان و تمارة

سعيدة : ماعندو صحة من نهارو

حياة (دخلات عليييهم من بعد ماسمعاتهم اشنو كانو كايقولو) : هانتي قلتيها ياااختي من نهارو بلا صحة و كبير عليا بقرن و زمارة "بحرقة" سير ابا الله يسمح لييييك

عزيزة : ياويلي ترحمي على باك هادي هضرة تقوليها

حياة(قلبات عينيها) : الهضرة ساهلة

سعيدة (بتدخل) : هذا هو نصيبك اختي اول واحد جا خطبك هو عبد السلام ونتي عارفة با الله يرحمو اول واحد كايجي يخطب كايعطيه لمرا

حياة : قولي كاايلوح ليه لمرا

حياة كاتعيى تخبي و تميك و تخرج فعينيها فخواتاتها ولكن حرقة زواجها بعبد السلام عمرها تبرد.... باها الله يرحمو ربي رزقو 8 البنات و ماعندوش لولد بقى كايقلب على الولد حتى مراتو تهدات بالولادة شي يطيح ليها شي كايتزاد حتى ولدات 8 كلهم بنات وهادشي خلا معاملتو معاهم تكووون قاسية و بعقلية الناس القدام حلف بحلوفو اول وااحد يجي يخطب اي وحدة فيهم يعطيها ليه واخا ماعرت كيفاش يكون هاد الراجل حيت خايف يبقاو ليه تما يوحل فيهم على قولتو هو.... بداو الخطاب كاايدقو بابو و بدا هو كايصيفط فيهم وحدة ورا وحدة حتى زوجهم كاااملين عاد مات و تبعاتو مراتو بعد سنوات قليلة.... و البنات كل وحدة و كيفاش كان نصيبها جوجات تزوجو برا المغرب و مابقاوش دخلو ليه و كاينة لي تزوجات فالشمال كاينة لي مشات عند صحراوة منهم خديجة نيت لي جات غير تعيد فدارها فمراكش و ترجع... و كاينين لي بقاو قراب بحال عزيزة و سعيدة و حياة و كلهم المستوى المعيشي ديالهم حسن من حياة وهادشي لي مخليها حاقدة كتر و حتى هما مكايرضاوش بيها قدام الناس بسبب مستواها المعيشي..... الأخوة عندهم غير بالسمية من يوم يومهم ما بيناتهم خاااوة قبل گاع مايتزوجو كانو يظلو يتسابو و يتناتفو فدار باهم... ماتربااااوش على الأخوة و المحنة على بعضياتهم كل وحدة كاتنافق لاخرة وهاهي غادية ....

سالات لعراضة و كل وحدة قصدات دارها و بقاات حياة كاتحسر على راسها....

دازو الايام و فات العيد الكبير و الحولي تقادى و تبعاتو لفلوس لي كانو عند عبد السلام و رجع من جديد يقلب على خدمة باش يدخل الگفة لدارو... حدو خبا واحد البركة باش تشري وعد الدفاتر و الأدوات لمدرسة اما حتى الكتوبة كاتعطيهم ليها بنت جيرانهم لي فايتاها بعام.... فهاد المدة شرات وعد الحوااايج من لبال و حياة طرطقات الف درهم لي عطاها عبد السلام و جلسو الله كريم عاوتاني.....

بعد ما قيدات استعمال الزمن و تقيدات اليوم عندها اول يوم فالمدرسة اكيد ماشي اول يوم عند كلشي حيت الناس بداو 15 يوم هادي غير هي و نهيلة لي عاد غادي تبدا عندهم القراية.... ناضت حياة كاتعقد الزيف على راسها و تفوه باش تفيق وعد لي ظلات تاني فالسطح حتى لنص الليل ما هبطات حتى فاقت حياة على غفلة باش تمشي لطواليط.... مالقاتهاش فبلاصتها وطلعات تاني هبطاتها بالقريص......

حياة (كاتحرك فيها) : وعد نووووضي راه قرب الوقت

وعد (بصوت ناعس) : انننن خليني

حياة : اويلي على خليني نووووضي لمدرسة رااااه حماضت بووولتك ماااقدك نعااااس الصيف كاااامل "شافتها بغات تقلب لجهة لاخرة وهي تحيد ليها المخدة من تحت راسها و رفعات صوتها" ياااااا نووووضي ولا نلييييع حسك قريييييص

وعد (غا سمعات لقريص ناضت جلسات عينيها مغمضين) : واااا ماما حشووومة عليييك

حياة : نوضي تگعدي "تمات خارجة من لبيت" ماتبعينيش نرجع ليييك

وعد (بدات كاتحك فعينيها) : صافي صافي هاهي نااايضة

خرجات حياة و تبعاتها وعد كاتخبط مع الحيوط بحال السكااايري حتى وصلات لطواليط دخلات قضات حاجتها و غسلات وجهها و خرجات فاتجاه البيت لقات باها مزال ناعس وهي تخرج عند مها لكوزينة

وعد : ماما شفت با مزال ناااعس واش مريض؟؟؟

حياة : لبارح بقات رجلو كاااتعطيه الصداااع مانعسش الليل كامل

وعد : تء كون غير عيطتي ليا نمسدها ليه

حياة : قلتها ليه قاليا خليها تنعس وانا عارفاني مانقدرش نمسدها ليه كاايضروني يدي

وعد (تنهدات) : اممم عارفاك

حياة : ياله سيري تلبسي خلاص باش تفطري.. الفرماج راه تقادة كولي شفنج لي دوقاتنا منو لبارح نعيمة

وعد : علاه شاط منو؟

حياة :بقاو جوج ياله سيري

رجعات لبيت كاتقلب فالماريو محاولة ماديرش الصوت باااش ماتفيقش باها.... جبدات التريكو لي كانت مبلانية تلبس، مع طلقاتو عينيها خرجو من بلاصتهم مني شااافتو موكول من جهة الكمام و لتحت و تفرتيت ديالو بقى فالماريو.... عضااات فيه بالفقصة مالحقاتش تفرح بيه شراتو من لبال نهار كانت عندها 20 درهم و من تما وهي مخبياه.... هزات واحد آخر مع سروال دجين و الطابلية و خرجات من لبيت لبسات فالبيت لي كاتنعس فيه و توجهات لواحد الصندوق ديال لبطاطا حاطين فيه الصنادل و صبابط.... هزات من تما سبرديلة لبساتها عاد مشات لكوزينة....

وعد (لاحت التريكو من يدها) : هاكي ديريه جفاف

حياة : اويلي مالو ياك شريتيه غير ديك المرة

وعد (بعصبية) : شوووفيه ماالووو گاااع كلاه ليا لفاااار

حياة (هزاتو كاتقلب فيه) : قلت لباك يجيب اللصقة باقي مجاب والو قهرونا لفيييران

وعد : بلا ماندويو على الطوبة لي خرجات ليا داك النهار من القرقارة ديال السطح

حياة : هاديك بغيتها فيييك باش ياله تردعي بقاو غير الجنون ماخرجو ليك فداك السطح و مابغيتي تحشمي

مجاوباتهاش و جلسات كااتفطر كلات سفنجة بالزربة و ناضت هزات المشطة من فوق الثلاجة خرجات كاتمشط وسط الدار مني سالات حطات المشطة فالصندوق لي فيه الصبابط و نزلات مع الدروج كاتجمع فشعرها و محفاظتها فوق ظهرها... دازت طرگات نهيلة و توجهو لمدرسة مكاين غير قولها و ضحك عليها حتى دخلو لقسم آخر طاااولة فالصف لي حدا لباب هي لي جلسو فييها فانتظار الأستاذ ديال اللغة العربية يدخل...

وعد : تفوووو جا فيينا داك الزمر ديال لعام لي فات

نهيلة:متفكرينيش بتلقايه باقي مكنزز علينا بحالا مشاركين معاه الرزق

وعد (ضحكات) : الصراحة حتى حنا مساهلاتش هههه

نهيلة(شافتو داخل) :جبد الك*لب و وجد الهراوة..كون هي ذكرنا شي مية مليون

دخل الأستاذ دار لاپيل و حيت فالشهر الاول ديال الدخول المدرسي مكايحكروش على الغياب مالقاش وعد و نهيلة مقييدين وهو كان باغي غير منين يدوز ليهم..... كتب ليهم عنوان الدرس فالسبورة و جلس فبيروه كاايشرح و يحك فصلعيتو....

نهيلة جالسة كاتبقشش فصاااكها حتى جبدات واااحد العكر گرونة ماط..

نهيلة(نطقات بالشوية) : ناااري شحال و انا كانقلب عليه

وعد (شداتو من عندها) : ديالمن هاد العكر

نهيلة : شفرتو هذاك النهار لفتيحة و نسيت فين درتو

وعد : ويلي على سرقتيه ليها اصاحبتي

نهيلة: واهي براسها شافراه من الصالون

وعد : بلاتي نجربو ، عندك شي مراية؟؟

نهيلة : بلاتي نشوف " خشات راسها تاني فالمحفظة حتى جبدات ليها واحد المراية صغيرة گاع مشققة" شدي

حدرات راااسها تحت الطاولة كاتعكر مجات فين تهز راااسها حتى سمعات الأستاذ نطق

الأستاذ(كان حاظيهم من اللول و تسناهم حتى سالاو عاد نطق) : وعد المحفوظي قراي النص

وعد (خرجات عينيها و بالدعقة هزات راسها و يدها على فمها... نطقات بصوت سمعاتو غير نهيلة) :اشمن نص اويلي

الأستاذ (قرب عندها) : حيدي يدك على فمك و قراااي النص "بقات على نفس الوضعية و كاتشوف فييه" حااااااايدي يديك على فمك يااااله

حيدات يدها على فمها و بانت التعكيرة ديال الشيييخات ارااااااك من بعيد مع هي بيضة الگرونة عكس بياااض بشرتها....

وعد (نطقات مطمرة بحالا مدايرة والو) :شحال الصفحة؟

الأستاذ (غوت حتى خرجو عينيه) : وليييييييت كااااانقري هنااااا الشييييخات "وحلات لييييه" كح كح خرجيييييييي عليا نتي وياااااها

نهيلة (ببراءة) : أنا اش درت أ وستاذ

الأستاذ(مزال كايكح) : كح كح براااااااا"شاف فالمكلفة ديال القسم" سيري عيطي لحارس العام

وعد : صافي صافي هاحنا خارجين

الأستاذ : جلسي تم حتى يجي الحارس لعام

نهيلة و وعد بداو كاايولولو و هاد الأخيرة هزات طااابليتها و مسحات بيها العكر حتى طبعات كاااملة.... فهاد الأثناء جا الحارس العام عاود لييه الأستاذ اشنو وقع و طبعا صحاب الحسنات قالو ليه بلي نهيلة هي مولات العكر... وهو يخرجهم من تما كااايوبخ فيييهم وهما حادرين راااسهم...

الحارس العام :ماااترجعو حتى تجيبو أولياء أموركم

خرجو من المدرسة ساااقلين حتى خرجو برا وغير شافو فبعضياتهم طرطقو بالضحك....

نهيلة: ههههههه كلشي على شحال الصفحة

وعد : ههههه اش بغيتيني نقوووليه تفووو على زهر "جبدات لعكر من جيبها مداتو ليها" شدي عليا عكرك منحوووس

نهيلة : يالمسرطة كون هي كنتي بعدا تتديريه هي تريطتي

وعد : باش تعرفي زهري مكوز

نهيلة :كون هي مسحتيه قبل ما يوصلك

وعد : و راه دعقني داك لخرا خلا ليا شي فرصة نفكر" لاحت محفاظتها على واحد الضسيسة" اجي نگلسو هنا

شدو واحد الكوان و جلسو فيه حتى وصل وقت الخروج ديالهم عاد نااااضو باش يمشيو لدار مكاينينش فهاد لعالم.... مولفين يجريو عليهم الاساااتذة و الحارس العام يقوليهم جيبو أولياء أموركم لي عمرهم جابوهم فاللخر كاااايسنيو إلتزام و يدخلو تاني

الشهر اللول من القارية داز ، وعد و نهيلة لقاو ليها تخريجة من بعد ماسناو التزام و رجعو لقسم عاوتاني.... يوم الأحد فاقت وعد على التصبين ديال لمانط لقات حياة جامعة ليها شي مانط فالسطح باش تصبنهم

وعد (بتذمر) : الناس كاايصبنو المانط مني كايدخل الصيف ماشي مني كايخرج

حياة : شتفي إلى غاااتشتفي مني خرج الصيف كانت عندنا لفلوس ديال تيد لمانط ياااربي نصبنو غير شراوطنا هاديك الساعة... حتى دابا كون ما خبيت هاديك جوج دريال باش شرينا التيد غادي نتغطاو بيهم خانزين

وعد(كاتسوط) : غاتجيني تاني ليغيگل بالوجع مابقى ليها والو

حياة (حيدات الصندالة من رجلها) : غاتصبني ولا مغاتصبنيش

وعد (طلعات فوق لمانط كاتشتف) : هاهي كاااتزمر

حياة كاتخوي فالتيد و كاتعمر فالما وهي كاتشتف حتى صبنوهم و بداو كاااينشرو فالمانط لي رشااااو بكثرة ما قدام و زاد كمل عليهم لما و الشمس ديال مراكش لي كاترشي بنادم بقى غير لمانط....غير كملو وهي تخوي حياة داك لما لي صبنو فيه من الدروج ديال السطح و مدات الشطابة لوعد

حياة : دوزي على الدروج انا غادي نهبط نسيق الدار

داكشي لي كان كل وحدة باش تكلفات مع سالاو لقاو وقت لغدا وصل.. دارو لبيض و ماطيشة و جلسو تغداو من بعد ماخلاو لعبد السلام حقو حيت مجاش...

وعد (كاتجمع الطبلة) : انا غانغسل لماعن و نمشي عند نهيلة نقدرو ندوزو لجردة بحال ديما

حياة : عيقتي بهاد نهيلة كل شوية

وعد : وا صافي اماما صاحبتي وحدة لي عندي إلى مامشيت عندها عندمن نمشي؟

حياة : ضبري راااااسك انا غانمشي نتكا

خرجات حياة مشات لبيتها و وعد هزات لماعن لكوزينة غسلاتهم بالزربة و نزلات مع الدروج تريكوها فازگ بالما ديال لماعن لي ترش عليها غادية و كاتعصر فيه....

وصلات حدا دار نهيلة لقات لباب محلول عيطات جوج مرات وهي تخرج عندها فاتحة..

فاتحة : وعد هااادي

وعد : ياختي شحال كاتعجبني هاد اللهجة ديالكم

فاتحة : ايوا تزاديتي هنا زعما ماديتي من عندنا والو

وعد : ايوا با و مي ماشي مراكشيين عليها

فاتحة : كلشي على داركم مدام متايهضروش بيها غاتكوني بحالهم " قربات كاتشوف ليها و شداتها من ذقنها" لي پوان نواغ دارو فيك حاااالة تاني

وعد(دوزات صبعها على نيفها) : وييه شفتي نيفي حالتو و زيد عليها لحبوب ديال ليغيگل بداو يبانو

فاتحة : دخلي نحيد ليك هي دوك ليپوان نواااغ بعدا ماحدي ماخدامة حتى لعشية

وعد(دخلات معاها) :فيناهي نهيلة بعدا

فاتحة :نهيلة تغدات وهي تكمخ (تنعس)

دخلات معاها لقات مها عاد خارجة من لكوزينة سلمات عليها عاد دخلات مع فاتحة لبيت فين ناعسة نهيلة... مشات فاتحة لكوزينة طبخات لما و رمات فيه نص حامضة مقسومة و وراق النعناع هادشي لي متوفر عندها حاليا.... خلاتو حتى طبخ مزيان عاد داتو عند وعد و حطاتو فوق الطبلة

فاتحة (بقات كاتبقشش فواحد الصاك حتى جبدات واحد لكريم) : قربي ندهن ليك هاد لكريم

وعد (قربات عندها عاطياها وجهها) :ريحتو زوينة بشحال شريتيه

فاتحة : مااشريتوش جبتو من الصالون مني تايقرب يتقادة اي پرودوي كانجيبو معايا "دهناتو ليها و مدات ليها فوطة" ديريها فوق راسك و تحدري على الكاسرونة

دارت داكشي لي قالت ليها حتى عرق وجهها و تحلو المسامات عاد تكات فوق السداري و فاتحة عند راسها ملوية كلينيكس على صباعها و كاتعصر ليها فنيفها...

نهيلة بدات كاضربها لفيقة مع صوت وعد كاتوحوح مني كاتورك ليها فاتحة على نيفها بالجهد...

نهيلة (حلات فيهم عينيها المبوقين بالنعاس) : لي سمعك كاتحوحي يقول هي تانكويو فيييك

وعد : ههههههه الله يمسخك ازمر راه قسحاتني

فاتحة : هاحنا كملنا على سلامتك

قاطعهم دخول أم نهيلة لي دوات بالشلحة و خرجات الشيء لي خلا نهيلة تنوض توقف فالبلاصة...

وعد ( شافت ففاتحة) : اش قالت مك

نهيلة (قاطعات ختها قبل مااتنطق) : والو والو

وعد(ميكات) : غانديرو شي ماسك دابا

نهيلة : مكاين بو ماسك تريكة لواليد جايين راك عارفة فيهم لفهامة خاصني نجمع لبيت و فتيحة خاصها تعاون ماما فالكوزينة

وعد جاتها بحالا كاتصدر فيها ولكن دغيا نفضات هاد لفكرة من بالها حيت عارفة عائلة باها ماعندهاش معاهم و عادي تقول هاد لهضرة و تبغيها تمشي حيت غاتلاقى غير مع صحاب لفهامات

وعد (بتساؤل) : هي مغاديش نمشيو لجردة ليوم

نهيلة : لا الزين خليها لحد الجاي راك عارفة لي كاين

ودعاتهم و ناضت خرجات مخلية فاتحة كاتشوف فختها حتى سمعات لباب تسد وهي تنطق

فاتحة : ايوا الله يمسخك...

وعد مشات لدارهم نيفها منفووخ و حمر بالبجيغ... دخلات لقات حياة مزال ناعسة مشات هزات ميكة ديال الربيع من الفريگو گاع مثلجة حطاتها على نيفها حتى برد عليها و مشات تكسلات فوق السداري مقابلة التلفازة...

دازت لعشية و مع آذان المغرب دخل عبد السلام مسخسخ و حوايجو مغبرين وعد غير سمعات حسو تلقات ليه فالدروج باست ليه راسو و شافت فالميكة لي فيدو

وعد : اش داكشي ابا

عبد السلام (حلها و جبد منها محفظة فالگرونة كاشفة شوية) : شاطو ليا شي فلوس و دزت لبال جبت ليك محفاظة هاديك لي عندك بانت ليا مشرگة

وعد (تلاحت عليه بتعنيقة) : لهلا يخطيك عليا

عبد السلام (بابتسامة تعبانة) : و عليا الكبيدة

هزات لمحفظة كاتقلب فيها وهو كمل طريقو داخل لبيت دخل توضى و بدل حوايجو مشى لبيت لقاها حاطة لمحفظة حداها و كاتفرج فالتلفازة وهذا حالها مني بدات لمدرسة عمرو شاافها هزات شي كتاب...

عبد السلام (بهدوء) : واش ماعندكش لحفاظة ابنتي عندك لباك هاد لعام سمعت بلي عندكم شي متحان كبير فاللخر

وعد(حطات التليكوموند من يدها) : اه لوطني

عبد السلام : هذااااك.. ايوا خاصك تراجعي شوية ابنتي

ناضت هزات اول مقرر لقاتو قدامها كان ديال العربية.... ربعات رجليها فوق السداري و بدات كاتقلب فالصفحات بحالا كاتقرا وحيت هو مقاريش و معارفش عند بالو بالصح ناضت تحفظ.....

حياة (حطات اتاي ) : كليتي شي حاجة ف الغدا

عبد السلام : خديت نص ديال الطون

حياة (شافت فوعد) : نوضي لطبلة ناكلو

وعد : غير كولو و خلي ليا حقي حتى نسالي قرايتي و نوض ناكل

خلات ليها حقها و جلسات كتاكل هي و عبد السلام هاد الاخير كايبغي ياكل بكري باش يصلي لعشا و يتكا يتصنط لعظامو....

بقات وعد كاتمثل انها كاتقرا وهي سااهية فداك الكتاب حتى جمعات حياة الطبلة و دخل عبد السلام لبيت وهي تلوح الكتاب من يدها و هزات التليكوموند كاتقلب فالاذاعات كل شوية تخسر الصورة و تنوض تبدا تخبط فظهر التلفازة حتى تقاد و ترجع تگلس....

كاين واحد النوع ديال الناس ماعندهمش هدف فالحياة باغين غير ياكلو و يشربو و ينعسو صافي لا زيادة والا نقصان... عمرهم فكرو فالدور ديالهم فالحياة اشنو هو و اشنو هي الرسالة لي خاص يوصلو... و وعد من هاد النوع، ضاربة الدنيا بركلة عمرها داتها فقراايتها والا قلبات على شي حاجة لي ممكن تعطي فيها و تنفعها فمستقبلها... خصوصا انهم مخصوصين و بزااااف، كان ممكن الحالة المادية ديالهم تعطيها حافز باش تقرا ولا تقلب على شي صنعة تهز بيها راسها.. كاتشوف باها ماعندوش و كايقلب باش يشري ليها لكتوبة و الدفاتر شي مرات كايبقى يجمع فيهم الصيف كامل باش ياله يوجد ليها لفلوس لي غادي تشري بيهم الأدوات و الكتوبة ماشي تجيه نيشان تقوليه ابا انا ماشي ديال القراية خلي هادوك لفلوس نستافدو بيهم لحاجة أخرى و تمشي تعلم شي صنعة ولا تزير راااسها فالقراية نيت تنجح فيها و تشوف مستقبلها ولكن هي كادير العكس تماما كايبقى فيها باها اه و كاتهز ليه الهم ولكن باااش تحس بالمسؤولية ولا يأنبها ضميرها حيت كاتمثل قدامو انها كاتقرا و غير كايغيب كاتلوح كلشي بحكم انه مقاريش يعني مغاديش يعرف واش كاتقرا بالصح ولا كاتفلى حتى يسالي هاد لعام و ماتكونش سميتها فقائمة الناجحين....

بحال هاد النوع المستهتر كايتقسم على جوج كاين لي كايبقى حياااتو كاملة هكا حتى يفوت لفوت و يبدا يندم على الوقت لي ضيع و الفرص لي ماستاغلش و كااااين النوع لي كاتجيه شي صفعة قوية من الحياة كاتخليه يعيد حساباتو و يعرف بحق الدنيا و مسؤوليتها...

*******

اصبحنا واصبح الملك لله

فاقت وعد على صوت التقرقيب مشقلبة بالنعاس حيت سهرات مع التلفازة لي بقات شاعلة الليل كامل حتى لفجر عاد طفاها عبد السلام مني ناض يصلي... هاد الاخير كان واقف عند راسها ياله ناوي يفيقها حتى حلات فيه عينيها المعمشين....

وعد (بصوت باح) : با

عبد السلام : صباح الخير الكبيدة

وعد (كاتكسل) : صباح النور "جلسات و جرات يدو بااستها" الصباح الزين هو مني كانصبح عليييك

عبد السلام (ضحك حتى تكمشو عينيه و زادو وضاحو التجاعيد فوجهو) : دابا تسمعك مك و تغضب عليينا

وعد (غمزاتو) : ششش خليها بيناتنا

عبد السلام (دوز يدو على حنكها و جرها من عنقها باسها فراسها) : ياله نوضي الله يرضي عليك تفطري باش تمشي لمدرسة

وعد (ناضت وقفات) : هي اللولة

خرجات من لبيت مخلياه متبع ليها العين و الابتسامة على وجهو حتى غبرات عاد هز ليزار لي كان محطوط عند رجليها مطوي ماتغطاتش بيه... بغا يديه لبيت و هو يتصادف معاها راجعة..

وعد (شافت ليزار فيدو) : گاعما تغطيت بيه داني نعاس ماعقلتش

عبد السلام : فكرتيني ابنتي لبارح داتك عينك و خليتي التلفازة شااعلة " بهدوء" هاد لمرة غير تحسي بالنعاس بدا يشدك طفيها حيت الضو كايجي غالي

وعد : صافي آخر مرة

عبد السلام : الله يرضي عليك

حياة (دخلات عليهم بالموال ديالها) : دااااك التليكوموند غانغبر بوووووه باش نتهناوو حنا گاااع كل ليلة ناعسة و مخلية الشقفة مشعووولة مالنا كاانطبعوهم ياربي نقورو غير مناكلو نزيد الغلا ديال الضو على همنا

وعد ( اعدى حاجة عندها هو نگير حياة... تنهدات و نطقات) : صافي اماما راااه قلت مغاديش نبقى نعاااود

حياة : دابا نشوفو هاد مابقيتش نعاود ديالك

عبد السلام (بهدوء) : حياة صافي دوينا معاها غادي تسمع الهضرة بلا مانكبرو الموضوع

حياة (حطات يدها على فمها) : هاهي ساااكتة

خلاتهم و تاجهات لكوزينة باش تفطر، لقات حياة حاطة ليها طرف ديال لخبز مع طبيسيل ديال زيت العود.... خسرات سيفتها و مشات كاتقلب فالثلاجة و فالقنات على الفرماج ساعة مالقات والو.. خبطات رجليها مع لارض و خرجات من الكوزينة دايرة بناقص من شي فطور.. مشات لبسات حوايجها فبيت مها و باها هاد الاخير تصادفات معاه وهي خارجة من البيت...

عبد السلام (دار يدو فجيبو و مدها ليها) :هاكي هاد جوج دراهم خليها فجيبك إلى حتاجيتي شي حاجة

وعد (شداتها عندو بفرحة وطارت باستو فحنكو) : لهلا يخطيك عليا ابا

عبد السلام : و عليا ازينة لبنات

تبع ليها العين مبتاسم و فرحان لفرحتها.. كان عارفها غادية بلا فطور حيت دخل وراها لكوزينة لقى كلشي كيفما هو... ماقدرش يخليها تمشي لمدرسة بالجوع واخا هاديك جوج دراهم لوحيدة لي كانت باقة ليه فجيبو فضل يعطيها ليها و يبقى هو بلاش وهذا هو الاب لي كاايحيد لراااسو و يعطي لكبدتو.... و هادشي مكايقتاصرش فالفلوس و صافي هادشي كايبان فشحال من حاجة... غير لماكلة إلى كانو كياكلو و شافها كتاكل بلهفة و باااينة فيها الجوع كايرجع اللور و يخليها تاكل باش تشبع واخا هو ماشبعش... مني كايدخل لبرد كاااايشوف لمانطة لمخيرة لي مراااشياش بزااف كاايعطيها لوعد... أب حنون و عاشق لطفلتو الوحيدة لي من نهار جات لدنيا وهي بحال النجمة لي مزينة سماه و مخلية حياتو مضوية بالرغم من الفقر و الميزيرية لي عايشين فيها....

*************

مني خرجات من الدار مشات نيشان عند مول لحانوت دارت نص خبزة فيها فرماجة و خدات بعشرة دريال لي بقات مسكة تلاهي بيها فمها و هي راجعة مع طناش..... غادية فالزنقة و كااتنهش فالخبز حتى وصلات لدار نهيلة و بدات كاتعيط فمها عامر...

وعد : نهييييييلة "بلعات الخبز و بدات كادق" نهييييلة

نهيلة (خرجات عندها بپيجامة و زيف حياتي مبرقع زيوتات فوق راسها....سلمات عليها و نطقات) : صباح الخير

وعد (طلعاتها و نزلاتها) : مغادياش؟؟؟

نهيلة : لا غانمشيو لحمام

وعد (بحزن) : بفففف غانبقى بوحدي اليوم

نهيلة :ايوا خاصك تولفي

وعد(قاطعاتها باستغراب) : اش غانولف

نهيلة (بتوتر) : خاصك تولفي زعما هاد الايام بلا بيا حيت مغاديش نمشي هاد السيمانة لمدرسة كاين عرس بنت عمي و غادي نمشيو لبلاد نحضرو راك عارفة

وعد : ماااقلتي ليا والو

نهيلة : حتى حنا مكان فراسنا والو حتى لبارح عيطو لينا علمونا

وعد (بتفهم) : اااه "شدات ليها فيدها" هانية نصبر هاد السيمانة مغادي نخلي حتى وحدة تگلس فبلاصتك

نهيلة (عنقاتها) : عارفة صحيبتي ماتبدلنيش

بادلاتها العناق بحب و توجهات لمدرستها، كانت عندها حصة ديال لماط دخلات شدات بلاصتها فآخر طاولة و جبدات دفتر كاتخربق فيييه حتى دخل الأستاذ لي كان فالثلاثينات من عمرو، سميمر بلحية خشنة و حسانة ميليتيغ لابس كاجوال مع ساعة كحلة فيديه المزغبين عاطياه رونق خاص.... شي بنات تما غير شافوه داخل ريحتو سابقاه عينيهم لمعووو ...

الأستاذ (حط لكارطابل ديالو و تكا على لبيرو مربع يديه ) : صباح الخير

التلاميذ : صباح النور استاذ

الأستاذ : صايبتو التمارين لي عطيتكم الأسبوع لي فات؟

فالبلاصة نطقو شي بنات جالسين لقدام وهما كاايجبدو وراق التخراج و شي بنات و دراري من الصفوفة لاخرين حتى هما....

الأستاذ (شاف وحدة بغات تنوض عندو) : غير خليك بلاصتك انا غادي ندور عليكم كاملين

وعد (قلبات وجهها) : صبحنا عالله

بدا كايدور عليهم صف بصف شي مصايب التمارين شي لا ولكن اغلب البنات مصايبين على عكس الدراري.. حيت مارضاوش يبانو كسولات قدام الأستاذ لي مزعوط فيه النص ديال الليسي هاد الاخير واخا جمالو عادي و بسيط إلا أن حضورو قوي و عندو كاريزما و هادشي لي خلا لبنات يتقاتلو باش يجيبو هذاك التمرين مخرج....

وصل عند وعد لي كانت فآخر صف و آخر طاولة، غطاها بظلو وهي ماهزاتش فيييه الراااس حتى نطق بصوتو الخشن

الأستاذ : وعد "هزات فيه عينيها بتوتر بلا ماتنطق وهو يتكا على الطاولة بيديه بجوج" فين التمارين

وعد (زيرات على فمها حتى تبرزو غمازاتها و نطقات بصوت غير مسموع) : ماخرجتهمش

الأستاذ (عقد حجبانو) : ماااسمعتش!!!

وعد (رفعات صوتها شوية باش يسمعها و راسها بغا يتخشى فلارض) : احم ماخرجتهمش

طول فيها الشوفة بلا مااينطق و رجع لبيروه گلس مربع يديه، بانت ليه واحد خيتي قدامو كاتبربص هازة التخراج فيديها و توجهات عندو باغة تعطيه ليه....

الأستاذ (بصرامة) : گلسي بلاصتك "شاف فواحد الدري" نوض جمع ليا الوراق من عند لي مخرجين "ناض الدري وهو كمل كلامو" غادي نسولكم سؤال واااحد علاش كاتجيو لمدرسة ؟؟ "قبل ما يجاوب شي حد كمل هو" باااش تقرااااو ياااك ؟ "حركو ليه راسهم بالايجاب ، دار ابتسامة جانبية و حرك راسو بالسلب" لا لا ماشي كلشي جاي باش يقرا، منكم لي باغي يقرا و عندو مايقول فالقراية و منكم لي فهامتو ثقيلة ولكن كايدير محاااولات و كاااينجح فاللخر و منكم لي مايقدرش يعطي فالقراااية ولكن الى توجه لمجاال اخر ممكن يبدع فييه و كااااين" ورك على الحروف " لي ماعندو غرض لا فالقراية لا فحاجة أخرى غادي جاي فالطريق غير هكاك "وجه نظراتو لوعد" هاد النوع بالضبط لي غادي نهضر عليه حيت لي ممكن يعطيو فمجالات أخرى عارفاهم كايتسناو هاد لعام يسالي ياخدو النيڤو و يمشيو يقلبو على راسهم ولكن لي ماعندهم حتى هدف اشنو نقولو عليهم... واش غادي تخليو حياتكم ضااايعة هكا؟؟ وااليديكم كااايتكرفصو باش يشريو ليكم الكتوبة و يقريوكم و نتوما مامسوقينش.. واش مكايبقاوش فيكم وااليديكم مكاتهزوش ليهم الهم كيفما هما كايهزو ليكم الهم.... "تكا على لكرسي و ربع يديه" كانقول هاد الهضرة دابا حيت كانشوف فيكم خوووتي الصغار وحيت ما بغيتكمش ضيييعو... لي مكايشوفش رااسو فالقراية يقلب على حاجة أخرى عطااااا الله مااايدار و لي قادر يعطي ولو غير شوية فقرااايتو يحاااول و يدير مجهوووود و اكيد غادي تكون نتيجة

كلام الأستاذ حرك فيها الضمير المدفوووون عندها لداااخل... جلسات الحصة كاملة كاتفكر فباها و اشنو كايدير عليها و كيفاش ديما موفر ليها دفاتر و كتوب المدرسة لي كايبقى يجمع ليهم لعام كامل.... الأستاذ بدا الدرس وهي سااارحة كاتخمم حتى سالات الحصة و تبعوها حصص اخرين، صونات 12 و خرجات راجعة لدارهم بوحدها بحكم أنها مامصاحباش مع البنات بزاف فالمدرسة و أكثر وحدة قريبة ليها هي نهيلة حيت من نفس لحومة....

وصلات لدار لقات حياة محيدة لغلوفة لمخاد و الطلامط لسدادر لبيت لي كاتنعس فيه وعد

حياة (شافتها داخلة) : حطي هاديك المحفظة و هزي هادشي طلعيه لسطح صبنيه

وعد (خرجات عينيها) : اويلي على نصبنو وااااش لبارح لمانط و اليوم الطلامط

حياة (زفات عليها بغلاف ) :شدي شمي ريحة ريوگك كاااع ريگتي على هاد لمخاد سيري صبنيهم قلت ليك

وعد :اش فيهم مااايتصبن راااه كشفوو و رشاو بكثرة ما جابداهم كل مرة يتصبنو

حياة : لا واقيلة نخليو فيهم ريحة الخنز باش تفرحي

لاحت هاديك المحفظة بالفقصة و مشات بدلات حوايجها عاد رجعات هزاتهم و طلعات لسطح صبناتهم و نشراتهم عاد هبطات مزنگة بالشمس لدار تنشرات فوق السداري حتى حطات حياة لغدا و دخل باها من برا... كلات داكشي لي قسم الله و جبدات عليه بنعسة حيت مقارياش فالعشية حتى فات العصر عاد ناضت مشقلبة بالنعاس على صوت حياة لي كاتفيق فيها..... لقاتها لابسة جلابة و دايرة زيف مرخوف على راسها گاع شعرها باين

وعد (كاتحك فعينيها) : فين غادية اماما

حياة : نوضي راه غانمشيو عند لغالية دايرة السبوع لولدها و عرضات علينا

وعد (ناضت طايرة) : بلاتي نغسل وجهي و نلبس "بفرحة" احححححح غناكلو الدجاج محمر

حياة (حتى هي مشهياه) : قااالو ليا دايرة حتى اللحم بالبرقوق راجلها كان ورت شي فليسات على باه و دار بيها السبوع لولدو

غسلات وجهها و دوزات المشطة على راسها لقات شعرها مامفكوكش مزيان قسماتو على 3 و ظفراتو جنب عاد مشات لبسات حوايجها لي كانت بيهم فالمدرسة و خرجات.....

مشاو عند الناس نشطو مع اللعابات و ناضت حياة تحزمات بالفولار لي كان فوق راسها و ناضت تلوز بخيرها اما وعد غير كاتصفق لمها بينها و بين الشطيح غير لخير و الإحسان.... حطو ليهم الدجاج مدغمر اول حاجة دارتها وعد قسمات نص خبزة عمراتها بالدجاج و حطاتها حداها عاد بدات كتاكل

حياة (نغزاتها) : اش كاديري

وعد : حق با

كلاو حتى شبعو و تهز دجاج و تحط اللحم نفس الشيء دارتو مع اللحم عمرات نص خبزة مخلية لباها حقو..... هادشي جاري بيه العمل فمناسبات الأحياء الشعبية لعيالات ديما كايقسمو نصوصة لولادهم لي بقاو فالدار ولا لرجالهم و يخبيو فالمياااكي....

رجعو لدار لقاو عبد السلام جالس فبيتو متكي دات ليه وعد حقو و شحال فرح و بقى كااايرضي علييها و يعنق فييها فرحان بنواارتو لي عمرها نساااتو فينما كلات شي حاجة مامولفينش ياكلوها بزاف كاتقسم معاه.... هاديك الليلة مداروش لعشا حيت كلاو فالزردة و الكرش فرحات و غنات.... شدات وعد التلفازة عاوتاني بالليل حتى داتها عينها مااااشي من بالها كلام الاستاذ و الضمير لي أنبها هاديك الساعة و غير خرجات من المدرسة رجع للسبات ديالو نفس الشيء طرا نهار مشاو لمصلى و الفقيه دوا على الصلاة و تحرك ضميرها و غير رجعو لدار رجع نعس بحالا عمرو فاق....

وعد من النوع لي كايقوليك غدا غادي نتبدل غدا غادي ندير لخطوة لفلانية باش نبدل حياتي ولكن غير كاتنعس كاتفيق رامية داكشي كااامل ورا ظهرها ناااسية الوعود لي عطات لراسها.....

دوزات اسبوعين غادية جاية لمدرسة بووحدها كاتخيط فالطريق بلا فااايدة... دازت السيمانة اللولة لي قالت ليها فيها نهيلة مغاديش نكون و جات السيمانة الثانية، كاتمشي تطرگها كاتقوليها مافياش لي يمشي جايين عندنا الناس با لي غايشد ليا ورقة مكاينش و غيرها من الأعذار...

حتى لواحد النهار و بحال كل يوم أحد من الأسبوع خارجة من دارهم جارة كلاكيطة فرجلها فاتجاه دار نهيلة باش يمشيو يجلسو فالجردة ياكلو الزريعة و يحضيو لغادي و الجاي موحشة هاد الخرجة بزاف حيت جوج سيمانات مامشاو وهما لي مولفين ديما غاديين جايين .... ضارت مع الزنقة فين ساكنة نهيلة و بدا كايوصلها صوت الشيخات و الشطيح و الرديح جاي من بعيد.. كلما كاتقرب لدار كلما الصوت كايتجهد حتى قربات توصل حدا الدار و تاضح ليها ان الصوت جاي من جهة دار نهيلة ...

وعد (نطقات فخاطرها باستغراب ) : وااايلي بنت الخضار تزوجات

قالت هكا بحكم ان صاحبتها ساكنة تحت دار الخضار هاد الاخير عندو بنت مزال عزبة....

مع قربات لدار بانو ليها لبيبان لفوق و لتحت محلولين و مكاين غير الاغاني الشعبية... ياله غادي دق فالباب و تبدا تعيط بانت ليها فاتحة خارجة من الدار بالقفطان و الزيف فوق راسها هاد الاخيرة مع هزات عينيها و شافت وعد تبدلو فيها الألوان

وعد : فتيحة كلمي ليا نهيلة

فاتحة (بلعات ريقها) : اش بيتيها

وعد : ويلي راه بغيتها باش نخرجو راك عارفة شحال ما خرجنا

فاتحة (مسحات العرق من جبهتها) : احم واخا بلاتي

خرجات من دارهم و طلعات لدار لفوق مخلية وعد كاتسنى فيها.. مدازش بزاف ديال الوقت حتى بانت ليها هابطة هي و ماماها و ما معاهمش نهيلة

وعد (لاحظات وجههم لي صفار وهي تعقد حجبانها ) : خالتي فين نهيلة ؟؟

الأم (تنهدات) :واخا ابنيتي اجي معايا نوريها ليك...دوزي

وعد (باستغراب) : غير قولي ليها تنزل عندي مانقدرش ندخل لعرس بهاد لحالة و اصلا معارضينش علينا راك عارفة بنت الخضار ماعندهاش معايا "بتساؤل" بيمن تزوجات؟؟

الأم (تبادلات النظرات هي و بنتها وهي تنطق) : واغي زيدي مكاين لي بيتسوق ليك

وعد (بتساؤل) : واش حتى نهيلة حاضرة لعرس مقالت ليا والو معولين نمشيو انا وياها اليوم لجردة

الأم (دوزات يديها على شعر وعد) : طلعي ابنيتي طلعي ودابا تعرفي اش كاين "بصوت شبه مسموع" الله يهديك انهيلة الله يهديك

طلعات معاهم و الجملة الأخيرة لي قالت الأم سمعاتها و بدات كاتربط تصرفات الأم و بنتها مع كلامهم و نهيلة لي مانزلاتش عندها... قلبها دق بالجهد من الفكرة لي جات فبالها ولكن دغيا لغاتها من دماغها كاتقول مستحيييييل صاحبتي دير معايا هكا....

فجأة كلشي هادشي تبخر مني دخلات من باب السطح و هزات راسها كاتشوف الناس لي معروضين و كاتقلب بينهم على صاحبتها حتى شافت جهة البرزة بالصدفة وهنا حسات بالارض مشات بيها و جات كانت غادي تفقد التوازن كون ماشداتها مامات نهيلة

الام ( بحزن) : سمحي لينا ابنتي سمحي لينا

ما سمعاتها گاااع اش قالت ودنيها كاايصفرو و عينيها مركزين غير على صاحبتها و عشيرتها لي عمرها تفارقات هي وياها من نهار عقلات على راسها .... بقات كاتشوف فيها مامتيقاش عينيها كاتقول مايمكنش صاحبتي دير فيا هكا وعلاش غادي دير فيا هكا باش اذيتها فين عمري ضريتها واش لهاد الدرجة هانت عليها العشرة.....صدمتها مااتوقفاتش هنا فقط زاااادت تصدمات مني شافت شكون العريس لي مشابك يدو مع يد نهيلة و مبتاااسم كااايتصور.... استاذهم ديال لماط لي ما عمر نهيلة جبداتو ولا قالت كاايعجبها كانت كاتصرف عندو عادي و مكاتبين والو وحتى هو نفس الشيء......

صدمة ورا صدمة مقادراش تيق اشنو كاتشوف هادشي كتير عليها دقة وحدة، الدموع محبوسين فعينيها ماحرراتهم حتى هزات فيها نيهلة عينيها و تلاقاو نظراتهم ولكن دغيا قلبات وجهها بحالا مكاتعرفهاش.... هاد اللقطة زادت قهراتها وخلات الدموع ينزلو مسرسبين من عينيها، رجعات باللور بغات تشد فيها فاتحة ولكن بعدات ليها يديها و خرجات كاتجري من تما...... نازلة فالدروج و يدها على فمها كاااتمة شهقاتها و الصدمة لي عاشت اليوم عمرها جرباتها....

يتبع...