جزاء وعد الجزء الخامس

مني خرجات من لحمام مشات تغدات عند خالتها عاد شدات الطريق لدارهم، الطوبيس لي داها هو لي ردها وصلات لدار لقات حياة ناعسة و التلفازة مشعولة قدامها ، مشات طفاتها و دازت لبيت سدات الشرجم و تخشات فالفراش ضرباتها بنعسة حتى هي .....

و هكا توالت الايام حتى دازت شهرين أخرى بدون جديد..من غير أنه جا شعبان و تبعو رمضان و نفس الروتين غير هو وعد مابقاتش كاتنوض بكري حتى كايقرب العصر عاد كاتمشي لخدمة كاتبقى حتى لمغرب ترجع تفطر و تصلي و تمشي تاني لخدمة و كاتبقى حتى ليل..... اما حياة راه فهاد الفترة مقابلة الدار تسيق و تجفف و طيب و تنعس نفس الروتين لي كان عندها من قبل موت عبد السلام هو نفسو لي باقي الفرق دابا هو أن وعد لي خرجات تخدم ماشي عبد السلام.... من نهار خملات لهاديك المرا معاودات فكرات تجرب شي خدمة أخرى ولا تقلب على راسها باش تقاسم هي و بنتها الحمل كاتخسر عليها كلمة وحدة نتي خدامة فالزنقة و انا خدامة فالدار واخا وعد مكاتقول ليها والو مخلياها على راحتها ياربي غير تنقص النگير وتخليها تسنط لعظامها.....

صباح عيد الفطر، اول عيد بدون العزيز الغالي... ماقدراتش تمشي تصلي صلاة العيد كي مولفة كل عام صبح عندها الجو كئيب كاتحاول ما أمكن انها تميك ولكن ماقدراتش هاديك الغصة فحلقها خانقاها خلات تبكي و تنخصص على قلبها حتى بردات و ناضت..... صلاة غير فالدار و مشات جلسات مع العيالات ديال الدرب لي دخلو عليهم كلها و طبسيلها و اشنو فيه باغين يعمرو عليهم و يواسيوهم...

حياة (حطات ليهم طبسيل ديال الحلوة) : دوقو و ردو عليا الخبار

الجارة 1(هزات وحدة ذاقتها) : هادشي بنين نتي لي صايبتيه

حياة(بابتسامة) : لا وعد لي صايباتو... قاداتو مع ربيعة فالمحل و جابت معاها شوية

نعيمة : ولاهيلا عطاتني منو ربيعة لبارح شهوا منو "شافت فوعد" تبارك الله عليك

وعد(مدات يديها تهز اتاي و بانو شي سيكاطريس ديال حرقات فيديها) : ربي يخليك ا خالتي

الجارة 2 (شافت ليها يديها) : الله يا بنيتي يديك كلاو لعصا مع الفران

حياة (ميقات فيها) : ايوا لخدمة هي هادي طرف ديال الخبز مساهلش

الجارة 2 : وييه مساهلش اختي الله يحسن لعوان....

وعد سكتات بعد كلام مها غير كاتسمع ليهم اش كايقولو إلى مخاطبوها مكاتشاركش معاهم الهضرة حتى فطرو و سالاو و دردبو لديورهم و بقاو هي و حياة الراس فالراس...

نصبو غداهم و جلسو تغداو و طاحو نعسو مكايفيقو غير على تليفون حياة كايصوني حلات عينيها بزز و ناضت كاتقلب عليه فيناهو...

حياة (لقاتو وهي تجاوب) : الو

سعيدة : الو حياة معاك سعيدة صونيت ليك من عند راجلي

حياة : كي دايرة لاباس

سعيدة : لاباس لاباس عيطت ليك نقوليك راه جاية عندك انا و عزيزة و خديجة

حياة (مسحات على وجهها) :مرحبا بيكم

سعيدة : غاتزيدي ترحبي بينا مني تعرفي لخبار لي جايبة ليك

حياة (باستغراب) : اشمن خبار

سعيدة :حتى نجيو و تعرفي ياله شي ساعة ونص بحال هكا نكونو عندك

قطعات عليها خلاتها غير كاتشوف و الفضول غادي ياكلها على هاد الخبار لي جايبة ليها... دورات راسها وهي تبان ليها وعد فايقة و كاتشوف فيها قبل ماتنطق سبقاتها

وعد : اشمن خبار داويين عليها

حياة : ماعرت ليها كاتقول ليا خبار ما خبار حتى تجي نشوفو اش جايبين .... نوضي نوضي جيبي شوية الشفنج من عند هذاك لي فالشاريع عندو زوين

وعد : واش كايحل نهار العيد

حياة : هذاك ديما حال غير سيري

ناضت غسلات وجهها و خرجات عند مول السفنج شراتو و رجعات لقات حياة كاتعمر فأتاي و حاطة لمسمن تسخنو...

حياة :حطي من ديك الكيكة لي جابت سعاد و قادي ديك الحلوة فالطبسيل

وعد : واخا...

قادو كلشي و خلاوه فالكوزينة ، مجاو فين يساليو حتى سمعو الدقان فالباب هبطات وعد حلات عليهم تسالمو معاها و باركو ليها العيد و طلعو عند حياة لي مع گلساتهم فالبيت نطقات بفضول مقادراش تصبر مزال

حياة: ايوا اشنو الخبار لي قلتي ليا

سعيدة (ضحكات) : ههههه صبري على خبزتك اختي مالكي زربانة

عزيزة : حطي لينا بعدا شي براد ديال اتاي عاد نهضرو

حياة (شافت فوعد) : سيري جيبي ديك الصينية "مشات وعد جابت الصينية حطاتها و رجعات تجيب داكشي لي وجدو " ايوا ها اتاي

سعيدة (بغات تشد فيها عارفاها فضولية) : خلينا نردو النفس بعدا اويلي

خديجة (خنزرات فيهم) :براكة من التفلية و قولو ليها اش كاين ولا نقوليك انا نيت.... "شافت فحياة" بنتك اختي جاو فيها الخطاب

كانت جاية هازة جوج طباسل فيديها مع سمعات اش قالت خالتها قلبها قفز و وقفات مصمرة كاتشوف فييهم....

وعد ( بعدم استيعاب) : خطااااااب؟ ؟؟

خديجة ( ناضت خدات منها الطباسل) : اجي گلسي و نتي صفاريتي

حياة (ربعات يديها فوق الطبلة) : شكون هادو و فين شافوها؟؟؟

سعيدة : عقلتي نهار جات عندي تعاوني مني كانو جاو عندي ناسي

حياة : ايه عقلت ولكن هادشي راه دازت عليه شهرين

سعيدة : خليني نكمل باش تفهمي ... مني مشات لحمام مع عدوزتي شافتها واحد لمرا تما ايوا يالالة هاد لمرا جات عندي لبارح و بدات كاتوصف ليا فوعد قالت ليا راه قالو ليا بنت ختك و جات عندك انا شفتها و عجباتني و بغيتها لولدي

حياة (بابتسامة) :وا شوف ليك سبحان الله... كملي

سعيدة :صافي هادشي لي كاين قالت ليا دوي مع ختك حيت قلت ليها البنت ماعندهاش باها عندها غير مها و دابا بغات شي وقيت باش تجي هي و ولدها يتعرفو عليكم و تهضرو باش إلى تافقتو يضربو لكحل فالبيض

عزيزة : أنا إلى جيتو عليا التعارف ديروه فدار سعيدة مكاين فين تجيبيهم هنا

حياة (دارت براسها ماسمعاتهاش و كملات اسئلتها باغة تعرف كلشي فدقة) :هاد لمرا ساكنة حداك؟؟

سعيدة : ساكنة ف سيدي عباد نيت ولكن ماشي حدايا

حياة(عينيها لمعو) :سيدي عباد فيه الديور زوينين باينة عندهم لفلوس.... مقالتش ليك ولدها فاش خدام؟؟

سعيدة :هداي عليا ماسولتهاش مابغيتش نكتر عليها الأسئلة تصدق طاجة هههه

جالسة وسطهم مصدومة كادور عينيها عليهم و كاتسمع فكلامهم كااايفصلو و يخيطو بدون مايعطيوها اي اهتمام بحالا ماشي هي المعنية بالأمر و الهضرة كاملة دايرة عليها... تسنات شي وحدة تشوف فيها و تقوليها افلانة اش بان ليك و والو، كايديو و يجيبو فالهضرة حتى من العرس دواو فيه وهي بحال شي كرسي حداهم.... شافت حتى عيات وهي تهز الكاس ديال اتاي و عاودات حطاتو بالجهد حتى تخبط مع الطابلة وهما يسقلو و شافو فيها كاملين فدقة....

وعد (ناضت وقفات و نطقات بدون مقدمات) : مابغيتش نتزوج

حياة (شافتها خارجة من لبيت) : رجعي لهنا و سمعيني التخوار لي خورتي دابا

وعد (ضارت عندها) : ماابغيتش نتزوج فين العيب فكلامي

خديجة (بتدخل) : ماتجريش على رزقك ابنتي ونتي مزال ما شفتيه ماعرفتيه

وعد: وا مابغيتش نتزوج و مابغيت نعرف حد انا مزال صغيرة على هاد التخربيق

حياة( بعصبية) : صغيييرة على فم السبع منين جاك الصغر و نتي گاع گراناتك تزوجو

وعد (بعناد) :گاراناتي تزوجو وانا ماابغيتش نتزوج... "غوتات" إلى نضت تزوجت شكون غادي يخدم عليك هااااا شكووون و زيييييد عليييها با عااااد مااااات بقى ليا غير الزواج

حياة (بغات تنوض ليها) :شو لخاااانزة كاتغوت عليا ولينا قد القب قد السطل

خديجة (شداتها) : جلسي احياة نعلي الشيطان ماشي هكا الهضرة

حياة (رجعات جلسات و خرجات فيها عينيها) : غبري عليا كمارتك قبل ماندير فيك يدي ياله

خرجات من لبيت و طلقات دموعها على خدها حااااسة بالحگرة و كيف كل موقف كاطيح فيه كاتستحضر باها قدام عينيها و الجملة المعتادة كاتردد فبالها "كون كان با حي مايطراش ليا هكا".... دخلات لبيتو كاتبكي و تنخصص مخلية حياة كاترعد بالاعصاب وسط خواتاتها....

خديجة : مكاتعرفيش تهضري احياة هانتي نفرتي البنت من الزواج

حياة (خبطات الطبلة) : وا والله حتى نتلاقاو مع الناس و نتعرفو عليهم ونشوفو شكون كايحكم فهاد الدار انا ولا هي

عزيزة (بدات كادور فراسها) : ولفااااات الخنات ديال عبد السلام مابقات گاع كاتسوق ليك

خديجة (بعصبية) : سكتينا اعزيزة و براكة من شعيل العواااافي

عزيزة (عوجات فمها) :هاهي ساكتة كلامي مكايعجب حد

حياة (شافت فسعيدة) :قولي ليا كي دايرة هاد لمرا

سعيدة : ايوا اش غادي نقوليك مرا كاتبان فيها راحة البال و

حياة (قاطعاتها) : وااا خليني من راحة البال وااش باينين عليها شي فلوس

بدات سعيدة كاتوصف فالمرا لي فلاتها من راسها لرجليها و حياة كاتسول واش دايرة شي ذهب واش جلابتها كاتبان غالية واش هادي واش هاديك كل همها هو الفلوس وااش كاينين بكثرة ما تحرمات وعاشت الفقر المذقع ولات كاتعبد الريال وهذاك هو همهاا الوحيد ....

بقاو شادين الهضرة العشية كاملة غير فوعد و فالناس لي جاوها و اشنو غادي يديرو معاهم...

ناضو باش يمشيو وهي تنزل معاهم حياة حتى لتحت كاتافق مع سعيدة

حياة : صافي غدا نصوني ليك نقوليك ايمتى تقولي لمرا تجي

سعيدة : صافي راه عطاتني نمرتها باش نرد عليها

حياة : عطاتك نمرتها ايوا أريها ليا نعمر التليفون و نعيط ليها انا نيت

عزيزة(دارت يدها على خدها) : اويلي على تعيطي ليها نتي باغة تبيني ليها بلي ملهوفة تعطي بنتك

خديجة(نغزاتها تسكت) : صافي احياة عطات النمرة لسعيدة سعيدة لي ترد عليها... حتى تناسبو و خودي نمرتها

حياة (قنعوها) : ايوا صافي لي بان ليكم "ودعاتهم و سدات لباب و هي تنطق" هاد خواتاتي اول مرة تخرج منهم شي حاجة زينة...

طلعات لدار وبدات كاتعيط بسمية وعد و مالقات حتى جواب... مشات لبيت طلات مالقات والو وهي تمشي لسطح نيشان خاصها غاتقلق و طلع للسطح باش يضرب فيها الهوا... دخلات عليها لقاتها جالسة فوق السداري جامعة رجليها عندها و متكية عليهم براسها عينيها حمرين و ريح خفيفة كداعب خصلات شعرها بحكم ان الجو بدا كايدفى....

كاتفكر فهاد الزواج لي ماعرفات منين خرج ليها الفكرة لي ماعمرها جاتها لبالها... من ديما هي عايشة فعالمها بوحدو مافيهش ريحة الجنس الخشن، المراهقات فسنها كانو عاطيينها لتصاحيب و الحب و الغرام كايتمعشقو وهي مكايناش فهاد العالم... كاتدي طريق المدرسة و تجيبها و ترجع لدار تگلس مع باها يجمعو ولا تخرج للجردة هي و نهيلة يحضيو ليكوپل و ينممو فعباد الله و ترجع لدار.... و حتى دابا مني مابقى والو من هادشي ولات هازة لهم غير لخدمة و الصير زيد عليها الحزن لي مستحوذ عليها بعد موت باها......

فيقها من سهوتها صوت خطوات حياة لي داخلة من باب السطح حتى قربات عندها

حياة (جلسات حداها بحالا حتى حاجة ماوقعات) : مالكي جيتي گلستي هنا تاني بحالا قت°لناك

وعد: (بدون جواب)

حياة (خربقات ليها شعرها) : وا راه كانهضر معاك زعما

وعد (شافت فيها و نطقات بعصبية) : واش نتي سبيتيني قدام خواتاتك ماخليتي فيا غير لي نسيتي و كاتقولي ليا بحالا قت°لناك... ايوا لهلا يزيد كتر

حياة : اه اه اه قلبك عامرة

وعد : اه قلبي عامر و فااايض

حياة (شدات ليها فيدها) : راني باغة ليك مصلاحتك يا لهبيلة واش انا غانديك للهلاك ؟؟

شافت فيها وعد الشوفة ديال منيتك ،السيدة شوية ماتسلخها و دابا جاية كاتهضر بالهداوة مبردة السوق.... هاد الڤيس فيها كااايفقص وعد حيت هي الى مشات حتى تعصبات صعيب تبرد و تكالما على عكس حياة لي تغوت هنا و تبرد هنا و تجي تهضر بحالا مدارت والو ولكن الحاجة لي مكاتخطاش لسانها هي النگير... ولكن فهاد اللحظة كاتحاول تحكم فلسانها باش ماتبداش فنگيرها حيت عارفة انها غادي تنفر وعد كتر ماهي نافرة من هاد الفكرة....

حياة (بهدوء) :دابا غير بيني و بينك شحال قدك تبقاي خدامة عند ربيعة

وعد : نخدم عندها حتى يجيب الله ماحسن "ضارت عندها" ماتعرفي نلقى شي خدمة نص نهار و نتعلم الصنعة حتى هي

حياة (باستغراب) : الصنعة؟؟ منين جا هادشي تاني

وعد : حدا المحل ديال ربيعة كاينة واحد الجمعية كاتعلم الخياطة و داكشي... فيها بنات صغر مني تعلمو الصنعة و ولاو كايدخلو لفلوس

حياة (مسايراها) : ايوا راه الصنعة تقدري تزوجي و تعلمي ليها شكون قاليك لا

وعد (ساطت) :علاش وليتي كادخلي ليا الزواج فاي حاجة

حياة : حيت هو لي دااااايم، شحال ما گلستي غادي تزوجي ديري دارك و ولادك وااااش باغة تبقاي بااايرة حياتك كاملة

وعد (بعناد) : عطا الله العيالات ماتزوجوش و عايشين عادي

حياة (غاتقطع حوايجها) : اويلي حاااااي البنت تسطات تي راه هادوك ماجاش رزقهم ولكن نتي راه جا حتى لبين يديك و بغيتي ترديه "بغات تنطق وعد و حبساتها" هانتي سكتي دابا و سمعي مني راني مك و عارفة حسن منك

وعد (ربعات يديها) : ياله قولي نسمع

حياة : خلي الناس يجيو نشوفوهم و نهضرو معاهم و ديك الساعة قولي لي بغيتي....ماتعرفي يعجبك و تصدقي واخداه

وعد (باغة غير شي سبب باش تهرب) : ايوا إلى تزوجت راه يقدر مايخلينيش مع ربيعة نتي اش غاديري

حياة (ببساطة) : ويلي راه يعيشني انا وياك مالي غادي نعطيك لمزلوط راه غا مو مزرزرة دهوبات كي غايكون هو "ناضت وقفات" انا مشيت نتي فكري مع راسك"هزات يديها" و ياااربي ياااربي ماتفقصينيش

خرجات و خلاتها غارقة فتفكيرها معارفة اشنو دير فهاد لحريرة لي بغاو يغرقوها فيها.... دوزات العشية و الليل كامل غير تخمام، مبلقة عينيها فالسقف كاتفصل و تخيط غير بوحدها، هي عارفة مزيان إلى قالت لا غادي تلصقها حياة و ماتبغيش تفوتها خصوصا إلى ماعطاتش فرصة لهاد التعارف داكشي علاش فكرات تقصر الطريق على راسها و خرجات بقرار واحد و هاهي دابا بعد ليلة طويلة واقفة قدام حياة لي متلهفة تسمعو....

وعد : عيطي لسعيدة قوليها تقول لمرا يجيو

حياة (طارت عليها عنقاتها فرحانة) : الله يرضي عليك الله يرضي عليك "باستها فحنكها" يا راه ولدت و عرفت اش ولدت.... طيري دابا جيبي ليا التعبيئة نعمر التليفون باش نعيط لسعيدة

مشات جابت ليها التعبئة و دخلاتها ليها وهي تعيط لختها و الفرحة غادي تخرج من ودنيها.... هذاك النهار ماجلسات ماكلات فخاطرها كل مرة مصونية لختها امضرا عيطتي لمرا امضرا اش قالت ليك مابردات حتى قالت ليها سعيدة راه دويت معاها و ها اشنو قالت و اشنو قالت

حياة (قطعات معاها و دخلات عند وعد لكوزينة) : حطي دوووك لماعن من يدك واجي نقوليك دغيا

وعد (شللات يديها) : هاني هاني "تبعاتها لبيت"

حياة (طبطبات حداها) : زيدي تگلسي زيدي "دوزات يدها على شعرها" لمرا دوات مع خالتك و قالت ليها واش نجيو نهار السبت

وعد (بلعات ريقها) : ايوا

حياة(بحماس) :ايوا صافي تافقات معاها على الحد خاصنا نوجدو راسنا راه كلشي غايكون عند خالتك

وعد (هزات حاجبها) : علاش لي مايجيوش هنا ؟؟؟

حياة : فين غادي يجيو هنا واااش منيتك بغيتيهم يطجو

وعد : و يطجوووو مالنا حايرين فيهم راه هنا فين كبرت و فين عايشة اش هاد تخربيق

حياة : سكتي سكتي اش كاتعرفي نتي حتى الطلامط كي الناس ماعندها و السدادر مكاملينش فالبيت فين غادخليهم

وعد (بعصبية) :غير كاتخربقي والله

حياة : خليني نخربق الالة نوضي غير سيري لحمام فركي راااسك و جبدي هاديك الفلوس لي كنت كاتجمعي غادي نحتاجوها

وعد (صدماتها) : باش عرفتيني كانجمع

حياة : مالكي تخفاي عليا راني عارفاك كاتجمعي لفلوس علاش الله اعلم

وعد (قلبات وجهها) : كانجمعهم باغة نشري تليفون و زايدون راه عندي تما غير ستالاف ريال اش غاديري لينا

حياة : اش بغيتي شي تليفون دابا تزوجي و يشريه ليك هو....سيري لحمام و غدا دوزي لصالون صايبي شعرك و كري شي قميص عليه القيمة و كري ليا معاك شي واحد راني مك خاصني نبان حتى انا

كاتفصل و تخيط بكل برود ضربات ليها خططها فالزيرو... الفلوس ظلات كاتجمع فيها بالعشق ريال فوق ريال باغة تشري تليفون بحال گراناتها دغيا جات حياة دارت ليهم فين غايمشيو...

وعد (بطنز) : واش غاديين لشي عرس وانا مافخباريش

حياة (خرجات فيها عينيها) : غادي تنوضي ديري اش قلت ليك ولا غانوض ليك راه عيقتي... واقيلة توحشتي لعصا

ناضت كاتنتر و تصووووط بالاعصاب ولكن ماعندها ما دير تساااايرها حتى تشوف هادشي فين غايخرج... مشات لحمام كي قالت ليها و الغد ليه مشات لصالون صايبات شعرها و دارت السوان لوجهها و دوك لفلوس لي جمعات جاتها البكية و هي كاتصرف فيهم...

********

ماعرفاتش كيفاش دازو هاد اليومين حتى لقات راسها فدار خالتها واقفة كاتلبس القميص ديال جوهرة لي كرات و مها كادور بيها لابسة قميص ديال الساتان مخدوم بالكروتشي....

حياة : جلسي خلي بنت خالتك تقاد ليك شوية داك الوجه

وعد : مابغيتش اويلي خليني غير هكا

بنت خالتها : غير جلسي ندير ليك غير شوية باش يطيح عليك السر قبل ماينوض ولدي من النعاس

سعيدة(بتدخل) :هانتي اسلوى ديري ليها غير الريسيل و عكر خفيف صافي

سلوى : داكشي نيت لي بغيت ندير ليها اماما

قنعوها بزز بديك لماسكارا و العكر عاد حياة بردات و جرات ختها خارجين من لبيت كايوشوشو......

حياة : قولي لخالد الله يكتر خييرك عمري نساها ليه وقف مع بنتي فهاد النهار

سعيدة : ماشي موشكيل حتى نتي نهار قلت ليه غادي يجيو الناس عندنا قال ليا واش عندهم باش يقومو النهار قلت ليه لا ايوا منو لراسو قال ليا صافي انا نتكلف لبنت يتيمة نربحو معاها لاجر

حياة (قلبات عينيها) : ايوا الله يرحم بيها الواليدين

حياة تقرصات ولكن ماعليها غير تصبر هي عارفة هاد لخير غادي يبقاو يعاودو فيه سنين و منين عاقلة مزيان نهار كانو كايصدقو عليها شي حاجة كايظلو يفكروها كل نهار ماشي يديرو لحاجة و يسكتو باش الأجر يتحسب عند الله وهو مستور.... لا خاص لعالم يسيق لخبار و يحسسو لواحد بالاحتياج ديالو و النقص لي عندو....

مشاو لكوزينة يشوفو الماكلة فين وصلات فالطياب، حياة كاطل على الطنجرة بحكم هي لي طيبات و ختها كاتقاد الصينية ديال اتاي حتى كاايسمعو الصونيط فالباب

سعيدة : واقيلة جااااو

خرجات من لكوزينة و حياة تابعاها كاطل من بعيد غير بانو ليها جوج عيالات داخلين و وراهم راجل وهي طير لبيت فين كااينة وعد عينيها كاايبرقو....

حياة : هاهما جااااااو

ب بوكيه ديال لورد و عمتو هازة صاك عامر تقدية مخلطة مجاتش يدخلو بايدهم خاوين واخا غير تعارف بينو بهاد التصرف بأنهم ناس الجود و الكرم.... صونا فالصونيط معاه عمتو او موو المرا لي شافتها وعد فلحمام

الام:زيد انبيل الله يسهل عليك اولدي حتى دير دارك ونشوف وليداتك

نبيل واقف بسروال توب كحل و قميجة بيضة طاوي ليها الكمام شوية حتى بانو يديه المزغبين مزيناهم ساعة رجولية فالكحل...

نبيل (شاف فمو و نحنح بصوت غليض وقال) :على بركة الله "كمل بمزاح" نوشفو الزين لي ختارت لينا الوليدة

تبسم حتى بانو سنانو البيضين وسط اللحية الخفيفة لي مزينة وجهو و عاطياه رونق خاااص...

دقات الام فالباب كايتسناو و ماهي الا ثوانيي وتحل لباب بابتسامة من طرف خالد مرحب بييهم

خالد :مرحبااا ...مرحبا اسيدي

نبيل : ترحب بيك الجنة اسي؟

خالد(عرفو كايسولو على سميتو) : خالد اولدي

نبيل (مد ليه يدو) : نبيل

خالد : مرحبا بسي نبيل مرحبااا تفضلوو ...نهار كبير هدا

سلموو علييه العيالات بادب عاد دازو عند سعيدة كايسلمو عليها هاد الأخيرة كانت فاستقبالهم بضحكة حتى وقفات عليهاا حياة بتفرنيسة كبيرة كتعبر فالناس من رجليهم لوجههم وحوايجهم

سعيدة(سلمات بوجها على ام نبيل ) :ختي لطيفة كيدايرة بخير

لطيفة : لابااس الحمد لله نتي ولوليدات

سعيدة(كتسلم على عمتو): كلشي بخير.... مرحباااا بيكم "خوات الطريق لحياة باش تقرب تسلم" هادي راه حياة ختي ام لعروسة الى كتااب هههه

حياة : نهار كبير هدا مرحباا

لطيفة (شافت فيها بتعجب كتشوف فيها مزال شباب متوقعتهاش تكون أم بنت في سن الزواج ): الله اكبر بيييك احبيبتيي

حياة(مدات ايدها لنبيل لي بادلها السلام مع ابتساام): زيدو مرحبا منبقاوش فلباب ههه

دخلو لصالون شي مقابل مع شي نبيل كالس حدا موو مشابك ايديه قدامو مقابلة معاه حياة لي كتفلي فييه ...كيفاش كالس وكيفاش كيتحاور مع خالد

حياة(بهمس لختها سعيدة) : الهيبة فيييه على الله يتيسر هاد زواج

سعيدة(بابتساامة وهمس): ان شاء الله

لطيفة(موجها كلامها لحياة) : سمعت بلي راجلك ماشي بزاف باش توفى ...الله ارحمو

حياة (حدرات راسها) : ممم ماتشوفي بااس اوا قضاء الله

العمة "حبيبة" : وبلا شك راكم عارفين علاش جيناا غير على الخير ان شاء الله

لطيفة : هادي شهراين الحبيبة وانا باغة نجي ولكن جاتني مع الولادة تاع بنتي ملقيت كيف ندير ولكن غير لقيت الفرصة جيت نجري مابغيتش نضيع لوقت كتر

حياة (بالصواب) : ايوا هدا هوا النهار لي كتااب نتجمعو فيه مبروك على البنية

لطيفة :الله اباارك فييك...اوى زوجنا البنت وشفنا وليداتها ...وبغيت ربي يطول ليا فلعمر ونشوف وليدات ولديي

نبيل(بهدوء) :الله يطول فعمرك الواليدة

لطيفة(طبطبات على ركبتو و كملات) : شفت بنتك ...تبارك الله زينة ومتبتة ومربية عشقتها لولدي ...حتى هوا مرضي وكلمة العيب متسمعيناش منوو

خالد : إلى فالرزق الحاجة مانزيدوهم غير الخير

حبيبة: منحتاجوش نشكروو ليكم ولدنااا سولو عليييه راه سمعتو سابقاه

خالد (بابتسامة) : تبارك الله غير الشوفة تورييك

نبيل(حط ايدو على صدرو) : بارك الله فييك

لطيفة(كدور فعينيها بغات غير ايمتى تشوف وعد) : اوا فين العرووسة !

حياة (ضحكات) :حشمااانة هههه نعيط عليهاا "خرجات عاجبينها النااس وهضرتهم شحال حلوة باينين من لباسهمم ميسوريين" الله يسخر هاد زواج وترقعي تانتي يا حيااة وتشوفي دنياا لي ظلموها علييك "حلات لباب على وعد كالسة مع بنت خالتها وساهية" وعد ...وااا البنت

وعد(هزات عينيها): نعام شنو

حياة: نوووضي نوضيي تشوفيي على راجل جا يخطبك كي مبشوور ونتيي غير مقندشة

وعد(عوجات فمها كتسوط): ماعرت فين كان عقلي ملي قلت واخة

حياة(خرجات فيها عينيها) : انوضي هاه متشعلينييش تكعدي بغيتي ترجعيني ضحكة وسط الناس؟ ؟"قربات عندها وقفاتها كتقاد فيها وفشعرها وكملات" ضحكيي وتبسميي يبانو دوك لحفيرااات

سلوى ( ضحكات) :باش يطيح فيهم سي لعريس هههه

حياة(باست بنتها محاولة ترطبها) : انا راه والدة الزييين واخة راسها قااسح ...وزيدي عفا بنتيي

سلمات أمرها لله وزادت ورا مهاا لي عطاتها طبسيل ديال الحلوة في حين سعيدة تكلفات بالصينية

رجليها فشلو عليها وهي داخلة للصالون... أنك تكوني محط الانظار راه كايركب فيك الرعب قلبها غيطيح بين رجليها مقداتش تهز عينيهاا حطات الطبسيل فوق الطبلة كتسمع تبارك الله كتعاود من فم لطيفة ...هزات عينيها تالفيين باش تعرف علامن تسلم لقات راسها نيشان مع نبيل تلاقاو عيونها مع عيونو البنية و مدات ايدها كيرجفو و دغيا هبطات عينيها تالفة مع ابتسامة تالفة على شفايفها، مع تلاقات يدها مع خشونة يدو خطفاتها بالزربة و رمات السلام بنبرة خافتة تحركو شفايفها لا غير ...و توجهات عند حبيبة و لطيفة سلمات عليهم بلوجه...

بغات تخرج ورجعاتها حياة غير بالريط مع بغات تگلس حداها نطقات لطيفة بابتسامة

لطيفة : اجي جلسي حدايا ابنيتي الله يرضي عليك

جلسات حداها مشابكة يديها قدامها كاتلعب بصباعها بتوتر، حادرة عينيها ماهزاتهمش مازال.. أشياء جديدة كاتعيشها ماعمرها جاو فيها الخطاب ولا تحطات فموقف بحال هذا ماعرفاتش كيفاش تصرف و اشنو تقول و اشنو دير..... حدها هزات عينيها بابتسامة كاتشوف فحبيبة مني سمعاتها اش قالت....

حبيبة:تبارك الله ههه لطيفة اوا عرفتي تختاري لولدك

لطيفة(دوزات يدها على شعر وعد) : ما شاء الله ...الله اكمل كلشي بخير الى قبلات علينا لالة العروسة

حياة (خاص غير ينطقو و طير تجاوبهم قبل ماتهضر وعد و تعورها عارفاها تالفة و معارفة ماتقول) : ان شاء الله مايكون غير الخير

غمضات وعد عينيهاا مزيرة على ايديهاا لي مشابكاهم مني سمعات صوتو الخشن مخاطب خالد بهدوء

نبيل : كيفما كتشوف اسي خالد جيت انا و الواليدة و عمتي حيت لواليد الله يرحمو دابا انا هو الراجل ديال الدار، كبار العائلة كل واحد فمدينة ماصلاحش ليهم يجيو

خالد (بتفهم) : مافيها باس اولدي نتا فيك الكفاية

نبيل : الله يحفظك اسي خالد "سكت شوية و كمل" راكم عارفين علاش جينا اليوم، الواليدة شافت بنتكم و عجباتها جات طرحات عليا الفكرة و رحبت بيها حيت شحال وانا داير فكرة الزواج فبالي باغي بنت الناس لي تعمر داري

كايهضر بهدوء صوتو خشن كايدخل مع مسامعها، بلا هواها ركزات معاه فأشنو كايقول انسان واثق من نفسو و كايعرف يهضر كل كلمة عارف فين يحطها.... خالد شاف فيه بابتسامة كايسمع فكلامو حتى سالا

خالد : مرحبا اولدي

نبيل ( تكا على لوسادة و ربع يديها واخد راحتو) : تفضلو إلى عندكم شي سؤال قبل ما نسمعو رأي بنتكم

خالد (كان كايتسنى هاد الفرصة حيت حياة ركزات عليه يسول على خدمتو) : سؤال واحد راه معروف نسولوه فالبداية هههه هو فاش خدام وسمحلياا "شاف فوعد لي ماهزاتش فيهم راسها" حتى حنا بنتنا بغينا نعرفو فين نحطوهاا

نبيل: الله اودي سول علاش ما بغيتي ... انا شاف داجونص ف بنك ***

خالد(بتساؤل) : لي فالسونطر ؟

نبيل: ايييه هاديك

خالد(بانبهار) :تبارك الله تبارك الله

حياة فهادشي فهمات غير لبانكة عينيهاا ولاو كيشوفوو الحياة ولفلوس والراحة لي تمنات فشبابهاا ماعليش تعيشهم على ظهر بنتها المهم حتى هي دوق لفلوس ...عينيها مشااو ل لطيفة لابسة جلابة مطروزة من الصدر مناسبة لسنها مع ذلك رااقية وحبيبة كذلك السرتلة باينة و الدهوبات كيبانو من تحت الزيف ...مكرهاتش دابا تشد الصداق وتزغرت وتقول زوجت بنتي لواحد خدام فالبانكة....

حياة(نطقات عينيها كايخرجو القلوبة):انا بغيت غير بنتييي تكون مرتااحة فدارها وصافي...لالة لطيفة نتي عارفة هيا لي عندي وباها عاد مات خلاها ليا امانة ومانحطها غير عند لي يصونها ويتهلا فيهاا

وعد من الصدمة خرجو عينيها وهيا مهبطاهم كتقول فراسها هادي لي كدوي واش ماما ولا كدبت....

لطيفة: من هاد الناحية ماتحتاجيش توصي احبيبتي لي عندو البناات يحس بييك وبنتك لحاجة لخايبة متوصلهااش يديرها فعينيه اولا نبيل

نبيل : هادشي الالة تعرفيه مع الوقت ...حنا ولاد الاصل والحاجة الخايبة متوصلهااش ...

سكتو بعد كلامو وهي تنطق لطيفة من بعد ماحطات يدها على فخض وعد...

لطيفة: وعد بنتيي شحال فعمرك

وعد (بصوت شبه مسموع) :19

حبيبة: تبارك الله

حياة(بفضول) :و مولاي العريس ؟

لطيفة: نبيل الالة حياة عندو 41

حياة(بتبسيمة مصدومة): هااه !

حبيبة(عرفاتها تصدمات) : واخة 41 العمر راه غير ارقاام ....ونبيل تبارك الله صغر من عمروو

حياة( بدات كادور عينيها خايفة من وعد لا دير شي فضيحة حيت حافضاها خصوصا دابا مني سمعات العمر) : داكشي هههه نعطيه 30 تبارك الله ههه

سعيدة :حنا غير يتهلا لينا فبنتنا راه درويشة وحااادݣة

لطيفة: حنا بينا شقا الالة سعيدة ! حنا بغينا لي دير معاه لوليدات ويدير وليداتو باش حتى لا مت نموت وانا مرتااحة ...حتى هوا راه يتييم "شافت ف وحد لي هزات فيها عينيهاا" بحالك ابنيتي ....تهزي همو ويهز همك وتحنو فبعضيااتكم ... حنا غير دايزين فهاد الدنيا الحبيبة كلها كيدوز لي قسم ليه الله

حياة: وسنة الحياة هيا هادي اختي لطيفة

41 عام كيفااش كيهدرو ويضحكوو عاديي هزات وعد عينيها ف حياة بعتاب لديك الضحكة لي خارجة وهيا لي زعما جربات الزواج بواحد فارق لعمر بينو و بينها كبير كيفاش داير... وداباا كضحك وتقول الله اكمل بخيير وكيبان صغير .... نبيل فالطرف الآخر ساكت مخلي العيالات يهضرو بيناتهم كاايتصنط هو و خالد حتى سمع مو نطقات بالسؤال لي باغي يسمع جوابو...

لطيفة: اوا داباا كانتسنااو غير ري لالة العروسة ...شنو قلتي ابنتي؟؟؟

وعد :حم "شافت فمها كتخرج فعينيها" حم ن نفكر اخالتيي ....نفكر ويكون خير

حبيبة: مقلتي عيب ابنتي من حقك شوار شوارك ونتي المعنية بييه

نطق من ورا مو برزانة موجه الكلام لوعد لي ماكرهش كون كانت مقابلة معاه يشوف فيها كيف بغا ولكن مو عوراتها و جلساتها حداها... جات مو بيناتهم هو من جهة و وعد من جهة ماعندو كي يدير يشوف فيها....

نبيل : اكيد الزواج خاصو تفكير مايمكنش تاخدي قرار بحال هذا بالزربة ليك كل لوقت حتى تقرري على خاطرك

حياة(بابتسامة صفرة مفقوصة من كلام بنتها) :ان شاء الله مايكون غير الخيير "غمزات ختها باش ينوضو يحطو لغدا"

ناضو و ناضت معاهم حتى وعد لي مجات فين توصل لكوزينة حسات بقرصة ف جنبهاا و دفعة من حياة دخلاتها لكوزينة وقالت بحدة

حياة : يخرجو ونتفاهمو على ديك التقنديشة تهرب لميت ماشي غير الحي

وعد(بتحدي) :نتفااهمو علاش لاا

سعيدة(بغات تندب) :شششش زيدو نحطو الغداا حشومة النااس غتسمع

فعلا حطوو الغدا كايشهي الدجاج محمر و اللحم بالبرقوق على حقو و طريقو... حياة خاصها غير ما طيب وتعطي بنة ايدهاا ...لي كلا دغمة يشكر ويعاود وتبارك الله على لي طيبوو... تكلفو غير هي و سعيدة فالحطان، وعد مشات لبيت جلسات هي و بنت خالتها تغداو تما بوحدهم....

كلاو النااس لي قسم الله وسلاوها بكاس ديال اتاي مع لفاكية هاد المرة كاين لي داق وكاين لي لاا المهيم طبلة الضياف تبقى عامرة....

نبيل (حط كاسو فوق الطبلة و شاف فمو) : الواليدة

لطيفة(حطات لكاس): ايوا الله يجعل خطواتنا مباركة مسعودة

خالد:ان شاء الله الحاجة

لطيفة(شافت فسعيدة) : بيناتنا التيليفون ان شاء الله والى فالرزق مرحبا والف مرحباا

حياة: لي بغاها الله هيا لي كااينة

نبيل (سلم على خالد) : خليناكم على خير

سعيدة : الخير عندكم

خرجو متاابعين معاهم خالد وحياة طلات من قنت السرجم حتى ركبوو ونطقات

حياة :بخيرهم وخميرهم اختي سعيدة

سعيدة : خبزة كاملة مكمولة لبنتك وعد تهزك وتهز راسهاا

حياة (تنهدات) :معامن كادوي مع وحدة راسها قاصح"توجهات لبيت" وعد ...وعد

سعيدة(جراتها) :صبري الناس تمشي باقي بلاصتهم مابردات صبري

خالد : هاني خارج نقضي شي غراض الناس راه مشات ...حياة الدري خدام وبعقلوو او ميسوريين تبارك الله ضربو الحديد ماحدو سخوون

سعيدة : يكون خير

حسو بلباب تسد وعيطات حياة على وعد مرة وجوج حتى تمات جاية كتنفخ كانت مبدلة حوايجها بالحوايج لي جات بيهم من دارهم...

وعد: شنوو ساليتيي؟

حياة(خرجات فيها عينيها) : اش ساليييت ....شتك وليتي كتنفخي علياا اش كااين ؟ ولينا قد قد

وعد (تغرغرو عينيهاا ) : ملي عقلت على راسي كنسمع كلمة وحدة منك ...غصبوني فشبابي براجل كبر مني "بحرقة"شنو كاديري نتي دابااا باغة تزوجيني برااجل كبر منييي ب 22 عااام كون ولد يولد كبر منييي

حياة (دارت يديها على جنابها) :41 عام جاتك كبيرة ؟ ايوا باااز اش بغيتيه برهوووش ولد عشرين عام ولد باابا وماما هاااه جاك راجل شاارب عقلو بخدمتو وطموبيلتوو بدااروو اما بااااك كان غير مزلووط مايكسااب مايعلاام

وعد(هاجت عليهاا كاتغوت ودموعها كحلين بلماسكاراا): سكتيييي سكتييي ماخليتيه براحتو فالدنيااا ...ماخليتيه براحتو فقبروو ....نتي انانية وكتبغي غير راسك والله ماتستاااهلي باااا حشومة علييك بغيت غير شي نهار نسمعك كتقولي كلمة زوينة فحقوو

حياة(بنفس النبرة القاسحة): كون عشتي لي عشت مع بااك 19 العاام تحسي بيااا ولايني نتيي بنتووو شنو غتݣولي عليييه ...انا درووك باك الله ارحمو الدرهم اللخرة ماخلاها لينا واش حياتك كلها ابنت لحرام بغيتي ضربيي لكرفييي "جراتهاا بنتير كتوريها فيدها" شوفي ايديييك نهار ومطال تسمني لعبااد الله حتى التيليفون ماقديتي تشرييه ...جاتك خبزة كاملة مكمولة تهزك وتهزني من هاد لويل ومن ديك لخربة لي شي نهاار تريب على جد بوووك

وعد (تنترات منها كاتغوت و تمسح فدموعها): انا مابغيتش نتزوج وماشغلاااااكش نضرب لكرفيي ولاا نتحرگ ولا طيح علييا ديك لخربة هاديك خربة باااا لي كان كيحن فيااا بااا لي كان كيجيبها من عرق كتاافوو ويحطها فايدك ونتي معاجبك حاال "بشهقة" ماااشغلكش

حياة(باستهزاء كاتغوت حتى هي) :اش كاااايحط عشا ليلة وبزاااف ...وجه القهرة بحالك بحال بااااك ! باغين تعيشو فالفقر وتماارة

وعد(بتخصيص ): نعيش كيفما بغييت مشغلكش وبااا مبقيتيش تجبديييه على فمك حشومة وعيب علييييك ....ومبغييتش نتزوج سمعتيي "بلغوات كضرب فحناكها"واااااا مابغييييتش

حياة: نتي وجهك غير ديال شي طلاااب حدا الجامع ماشي ديال الداار والعز بزاااف علييك وجه القهرة وتماارة

وعد (طرطقات فيها عينيها حمرييين و عروقهم بارزين) :اه اه وبصحتي والى بغيتي لعز تزوجيييي بييييييه نتي

مجات فين تكملها طارت عليهاا حياة بطرشة وجراتها من شعرها حتى غوتات سعيدة وبنتها لي بداو كايفكو

حياة:ناري لجد بووك نتزوج بييه قدي قدك ابنت لحرااام

وعد (فمها مايسكتش واخا كتاكل لعصا) : رااااه كبر منك نتي لي مي سيري خوووووديه ايييييييي

حياة(نزلات عليهاا بخبطة لظهرها): خرجتي تخدمي ضسرتييييي وليتي ترادي معايا فالهدرة ...لاليااتك تزوجوو بالرجاال كي دايرين ونتي جات النعمة تالفمك كي لبهيمة و بغيتي ترديها

سعيدة: حيااااة اويليي اش كديري

وعد: خليها ضرب "بالدموع" خليها تبرد سمها فياااا

بعدوها عليها غير بزز كتشهق وحنكها حمر بتصرفيقة حياة

حياة:بعدي كمااارتك علياا السلگووطة

خرجات من دار خالتها هازة لميكة ديال لقميص فيدها و كلها كاترعد بالاعصاب و حنكها مزنگ ... نزلو جوج دمعات من عينها و مسحاتهم بالنترة كرهات لبكا و الهم و الغم لي مرافقينها من نهار دارت لحنين تحت التراب.. حتى كاتقول بلي حياة حنات فيها كاتزيد تقصاح و تجرحها بكلامها و أفعالها.... غادية مكاتشوفش وراها معصبة و حاقدة و كارهة، الرأي ديالها ماداروش ليه اعتبار و بغاو يبززو عليها حاجة مصيرية هي مابغاتهاش.....

توجهات لبلاكة ديال الطوبيس كاتسنى فالنمرة لي غادي تقربها لحومتهم ، لقات واحد القمقوم تما كل شوية يلوح ليها كلمة.... ميكات عليه مجاوباتوش ملاهية غير مع شعرها لي كايديه الريح ديال العشية كانت جامعاه بالبانضة اللور حتى حسات بيه ترخف... ندمات على النهار لي صايباتو فيه ولات تجمعو و يتطلق على ظهرها حيدات ليه البانضة و ياله بغات تعاود تجمعو سمعات سميتها بصوت رجولي.... هزات راسها وهو يبان ليها عريس الغفلة على قولتها هي... جالس فطموبيلتو و حاط مرفقو على الشرجم، نظارات شمسية على عينيه حاجبين نظراتو المعجبة ليها وهي بداك الشعر المطلوق لي كايداعبو الريح بحرية....

وعد (قربات لطموبيل و نطقات ) : نعام اخويا

نبيل (حيد نظاظرو و نطق ) : طلعي نوصلك فين غادة

وعد (رجعات خطوة اللور) : لا شكرا دابا يجي الطوبيس

نبيل : غير طلعي نديك فين بغيتي حسن ليك من الطوبيس "ضيق عينيه بعد ما لاحظ حنكها حمر" مالك فحنكك ؟

وعد (بهدوء) : ما مالي والو ... و الطوبيس راني مولفة نمشي فيه

نبيل(الطرشة كانت باينة ولكن مابغاش يحرجها ) : مال راسك قاصح

وعد (بان ليها الطوبيس جاي و نطقات متجاهلة كلامو ) : بلا مانعذبك هاهو الطوبيس جا " ضارت غادية" بسلامة

ماخلاتش ليه الفرصة فين يهضر ولا ينطق بكلمة، عطاتو بالظهر كاتجمع فشعرها حتى ركبات فالطوبيس خلاتو يرجع النظاظر لعينو و ينطالق حتى هو من تما.....

أما هي ركبات فالطوبيس لقاتو عامر مكاين فين تگلس، بقات واقفة وكل شوية كاتمشي وتجي مني كايوقف ولا مني كايدور... سهات فالطريق و دماغها خدام حتى وصلات لشارع لي قريب لحومتها وهي تنزل نيشان عند لمرا لي كرات من عندها القميص حطاتو ليها عاد توجهات لدارهم.....

غادية حادرة راسها و يديها فجيابها هزات راسها وهي تبان ليها نعيمة فباب الدار كاتبتاسم ليها حتى وصلات عندها.....

وعد : السلام عليكم

نعيمة : وعليكم السلام ايلي... واش مكايناش يناك ظليت ندق مجاوبني حد

وعد عارفة حياة مقالت حتى حاجة لشي حد على الخطاب لي جاااو واخا نعيمة ظل عندهم و يظلو مجمعين مقالتهاش ليها و حتى وعد مابغاتش تفرشها فهاد اللحظة

وعد : لا كنا عند خالتي جيت انا وهي بغات تبقى شوية

نعيمة : اااه ايوا مزيان... المهم كنت باغاك نتي "جبدات سوارت من جيب الطابلية" هادو الضوبل ديال سوارت المحل كاتخليهم ربيعة عندي سوكور ايوا اليوم دورات ليا قالت ليا قولي لوعد تمشي تحل غدا هي شي يامات وتجي من عند بنتها

وعد (شداتهم من عندها) : صافي شكرا اخالتي

طلعات لدار توجهات لمراية نيشان كاتشوف حنكها لقات الحمورية مشات منو حيت اصلا الطرشة مكانتش مجهدة باش تخلي فيها الطابع لمدة طويلة .... مشات توضات صلات لي فاتها و جلسات فالبيت كاتزعزع رجليها بتوتر كلام مها كايدور فراسها و صورة نبيل مزال فبالها لا مني كان فالدار عند خالتها لا مني وقفها باش يوصلها.... السيد مافيه مايتعاب كايبان هماوي و ولد الناس ولكن كبر منها بزاف، الحاجة لي معقداها فحياتها ومن نهار تزادت وهي كاتسمعها من مها " با لاحني لراجل كبر مني بقرن و زمارة" هادشي كرهها فالزواج و مايجي منو كبرات لاغية الفكرة من بالها....

وهي فعز تفكيرها حسات بشي حاجة نزلات منها وهي تنوض لطواليط كاتجري لقاتها ليغيگل ، مشات لبيت هزات الويز لي من نهار خدمات غير كاتشد لفلوس كاتاخد جوج باكيات وحدة ليها وحدة لحياة يبقاو سوكور مني تجيهم... دارت وحدة وهي تكمش فوق السداري لايحة عليها مانطة خفيفة و كاتشوف فالتلفازة ساهية حتى ولات التلفازة هي لي كاتشوف فيها... الوجع بدا كايدير خدمتو وهي كاتقلب من جنب لجنب حتى سمعات لباب تحل و حياة طالعة مع الدروج.. غمضات عينيها كاتسمع تحركاتها فالدار حتى دخلات عندها لبيت، حسات بيها دوزات ليها على شعرها بيدها و نطقات بهدوء...

حياة : عارفاك مناعساش ، نوضي الله يرضي عليك نهضرو

ضارت عطاتها بالظهر بدون ماتجاوبها خلات حياة غير كاتشوف هي بردات و تهدنات صحاب ليها وعد بحالها... غير قبل ساعات سمعات السبان و تجرحات بالكلام قبل الفعل صعيب تهضر معاها كأن شيئا لم يكن راها دم و لحم حتى هي كاتحس و تقلق.... شافت حتى عيات وهي تنوض من تما توجهات لكوزينة بانت ليها لميكة ديال اولويز فالزبل عرفاتها جاتها ليغيگل ، مشات لجلابتها لبساتها و نزلات جابت ليها الحليب فيضاتو و دارت معاه القرفة... لي يشوفها دابا مايقولش هي نفسها لي ضربات و عايرات و عربطات على بنتها... ماتنكرش انها ندمات على الكلام لي قالت و الغوات لي غوتات عارفة راسها جلاخة مني كاتعصب جيب يا فم و قول مكاتحكمش فلسانها السليط لي كايجرح بلا حساب ولكن كاترجع تقول مع راسها هادشي كامل على قبل مصلحتها... كاتشوف بلي بنتها جاها راجل كامل الأوصاف" و الكمال لله عز وجل" و باغة ترفضو راه يمكن مايجيهاش بحالو مزال داكشي علاش مابغاتهاش طيرو من يديها...

دخلات عليها لبيت لقاتها موقفة المخدة متكية عليها بظهرها و دايرة دراعها على وجهها، حطات ليها الكاس ديال الحليب فوق الطبلة و نطقات

حياة : هاهو لحليب شربيه باش يهمد عليك الوجع

مجاوباتهاش عاوتاني و ماهزاتش فيها الراس خلاتها على خاطرها و مشات لكوزينة كاتلاهي راسها حتى أذن المغرب و تبعو لعشى... طيبات لي قسم الله و مشات باش تحطو فوق الطبلة لقات داك الكاس باقي فبلاصتو مقاستوش وعد بالمرة، تنهدات و هزاتو و دفعات ليها الطبلة باش تاكل... ناضت كلات فصمت و ناضت لبيت تكمشات نعسات شارية راحتها ماعندها لا الجهد لا لخاطر لي تجاوب فيه حياة و يدخلو فشي حوار هي في غنى عليه....

أصبحنا وأصبح الملك لله 🌞

فاقت بكري كاتحمد الله حيت فاقت لقات لوجع فاتها بعدما محنها فالليل... ناضت كاتلبس حوايجها بالشوية باش ماتفيقش حياة و هزات سوارت المحل و توجهات لخدمتها، خدات نص كوميرة فيها الفرماج و كاشير مع رايبي فطريقها غادية و كتاكل حتى وصلات فاطرة.... حلات المحل و باشرات فخدمتها لي مع الوقت ولات خفيفة فيها دغيا كاتعجن بخفة و تگرص و طيب الخبز يدها مطلوقة...

فهاد الأثناء حياة فاقت من النعاس لقات حس وعد مقطووع قبل ما تغسل وجهها بدات كاتقلب عليها من لبيت لكوزينة للسطح و مالقاتهاش هي لي عارفة هو أنها مزال ماترجع تخدم تخلعات و ماعرفاتها فين زادت مشات لشرجم كاتعيط بسميتها باش إلى كانت فالزنقة تجاااوب حتى كاتبان ليها نعيمة خرجات من دارها و هزات راسها فالشرجم

نعيمة : حياة واش تاتقلبي على وعد

حياة : اه ماشفتيهاش

نعيمة (باستغراب) : ياك لبارح عطيتها السوارت لي خلات ليا ربيعة و قلت ليها تحل المحل راه غادي تكون تما مشات.... واش مقالتهاش ليييك ؟

حياة (مالقات ماتقول من غير تكدب) : لا قالتها ليا و نسيت

دخلات قبل ماتجاوبها نعيمة خلاتها هكاك بلاكة و سدات الشرجم كاتسوط.... طاح منها النص مني مالقاتش ليها الأثر قالت صافي البنت طجات و خوات الدار بعد داكشي لي وقع، هادشي يبين انها عارفة حجم غلطها و هذا هو حالها ديرها يغرق فيها جمل عاد تندم...

بقات النهار كامل بوحدها كادور بين البيت و الكوزينة حتى قرب يوصل وقت رجوع وعد وهو يصوني تليفونها برقم سعيدة

حياة : الو سعيدة ختي

سعيدة : الو حياة كي ظليتي اليوم لاباس؟؟

حياة : نحمدو الله و نشكروه ونتي؟

سعيدة : لاباس لاباس.. ايوا امضرا لالة لعروسة فكرات ولا مزال

حياة : هاهي كاتفكر راك عارفاها راسها قاااسح

سعيدة :نتي رطبيه ليها اختي غا بالهداوة جيها بالهضرة ماشي بالغوات و المضاربة راه مكاتجيبش معاها نتيجة غادي غير تنفريها كتر راني شفتها اش دارت وهي عندها

حياة (تنهدات) : ايوا نحاول نحاول

سعيدة : مخاصهاش ضيع هاد السيد من يدها راه بخيرو و خميرو راه سول عليه راجلي قالو ليه الله يعمرها دار مو عندها دارها قريبة ليا معاها لوستها لي جات معاها راه باقية بلا زواج و داير ليها خدامة ايوا وهو عندو دار فالداوديات كايمشي ليها مرة مرة يعني بنتك غادي تكون بدارها معزولة مهنية...

حياة (برقو عينيها) : عااااندك الحق هذا مخاصوش يطير ياااختي نحاااول معاها عاوتاني يااااربي ياااااربي يرطاب راااسها "سمعات لباب تحل" ياله نخليك دابا حتى نرد عليك من بعد

قطعات معاها و وقفات فباب الكوزينة كاتسنى وعد تطلع هاد الأخيرة طالعة بالشوية عليها حتى دخلات لدار، لاحظات حياة واقفة كاتشوف فيها و نخلاتها حتى سمعاتها نطقات

حياة : غادي تبقاي قاطعة هضرتي ولا شنو

وعد(دارت عندها غير براسها بلا مادور كاملة) : اشمن هضرة ونتي بغيتي تلوحيني لحاجة نتي كارهاها و كرهتيني فيها معاك

حياة (تنهدات) : راه ماشي بحال بحال يا هاد البنت

وعد (هزات فيها عينيها نظراتها حادين) : باااا ماتجبديهش تااااني

حياة (دارت يدها على فمها) : هاني مجااابداهش غير تهدني وخليني نكمل غير كلامي... ماتقارنيش حياتي بحياتك راه يقدر يكون زهرك حسن من زهري

وعد (باستهزاء) : يقدر هانتي قلتيها "ماخلاتش ليها مجال فين تجاوبها و كملات بعياء كتافها طايحين و عينيها ذابلين" الله يرحم مك و باك فقبرهم سدي عليا هاد الموضوع دابا ماعنديش ليك الجهد ظليت خدامة بوحدي النهار كامل

حياة (ضارت راجعة لكوزينة و نطقات بصوت غير مسموع) : ايوا نتي لي بغيتي تمارة لراسك

خلاتها على خاطرها مادواتهاش عارفاها مع لوجع ديال الدم مكايكونش عندها الخاطر زيد عليها داكشي لي طرا مكانش ساهل و الكلام لي سمعات من فم مها ضرها فخاطرها....

بقاو على نفس الحال لمدة خمس ايام، نهار تابع خوه وهما قاطعين الهضرة أو بالأحرى وعد لي ولا كلامها قليل مع حياة كاتجاوبها ولا تهضر معاها غير للضرورة القصوى... مخلياها كاتفقص و تحرگ غير بوحدها ،باغية تسولها واش فكرات و اشنو قرارها ولكن مابغاتش تشعل لعافية تاني و تنوض الروينة... كل نهار كاتعيط ليها ختها تسولها اش كااين و كل مرة كاتلقى ليها عذر ، هاد الأخيرة جالسة فالصالون ديال دارها مع عزيزة حاطين قدامهم براد ديال اتاي مع حليوات و مدوزينهم بالهضرة على وعد...

عزيزة (ميقات) : ايوا هانتي ليك على بنت عبد السلام حتى هي ولات تشرط كيفاش بغات الراجل

سعيدة : اش غادي نقوليك راه لي عاش مع حياة راه بالسيف يكره الزواج من راجل كبير وهي كاطلعها و تهبطها بأنا صغر من باك بقرن و زمارة

عزيزة : كي شتي حنا تزوجناهم صغر منا راه غير كاتزيد فيه هاديك و بنتها كتر منها مخلية السيد بشلاغمو كايتسنى جوابها خايبة حتى لتعاويدة

سعيدة : كون تشوفيه ياااختي يبان ليك غا هو مابين الرجال

عزيزة : وييه غاوصفتيه ليا قلت كون غير جيت نحضر و نشوفو و نشوف مو

سعيدة : هاديك مو درويشة والله عيطات ليا نيت لبارح مالقيت مانقول ليها بقيت غير كانتمتم... زيدي عليها راجلي كاينگر و يعاود قالك خسرنا لفلوس بااااطل على داك الغدا و شي زواج مكاين

عزيزة : ايوا وعد عطاتها ليام كاتكبر على راجل خدام فالبانكة بدارو بطموبيلتو وهي حتى لباك ماعندها....

ماحدك ناقصة فقرايتك إلى معايروك بيها فوجهك راه يعايروك ورا ظهرك وحيت البشر كايقلب غير على الفرصة راه مغاديش يضيعها فالحالات بجوج..... وهادشي لي كاطيح فيه وعد ديما، ورا ظهرها داويين و فوجهها داويين غادي تبقى هاد العقدة ديال القراية تابعاها حياتها كاملة إلى مدارتش حل لراسها.....

فهاد الوقت لي هما جالسين كياكلو فلحمها هي كانت وسط صهودات الفران و ريحة الزيوتات ،تهلكات هاد الايام فالمحل بحكم أنه يدها بوحدها مكاينش العوين... جاو عليها شي لحظات فهاد الايام بكثرة العيى كاتجلس تبكي تبكي حتى تبرد و تنوض تكمل تاني بعينين حمرين و وجه مزنگ بالبكا...

خدامة ماعليها مابيها حتى كاتسمع سميتها من صوت مألوف عندها، عقدات حجبانها وهي تلفت مع جات عينيها فعينين نهيلة قلبات وجهها كاتسوط عاد قربات لكونطوار وهنا تزادت صدمتها مني بانت ليها كرش نهيلة بارزة دليل على حملها..... حاولات تحكم فتعابير وجهها و نطقات

وعد (بدون تعبير) : اش بغيتي اختي؟؟

نهيلة (هزات فيها راسها) : وعد ءء

وعد (قاطعاتها قبل ما تكمل، كاتهضر ببرود بحالا عمرها عرفاتها) : بغيتي لخبز ولا المسمن ولا البطبوط؟؟؟

نهيلة (تنهدات) : عطيني 10 الخبزات

حدرات راسها كاتعمر ليها الميكة بالخبز وهي تسمع صوت رجولي عارفاه مزيان

زوج نهيلة : حبيبة كنتِ باغة غير الشكلاط و شيپس ياااك ؟؟

نهيلة (شافت فيه بابتسامة) : اه غير هادشي

وعد (هزات فيهم راسها و مدات لنهيلة الخبز) : عندك عشرين درهم اختي

زوج نهيلة ( نطق بابتسامة) : وعد اش خبارك "جبد لفلوس مدها ليها"

وعد (بتجاهل) : بالصحة و الراحة

شدات من عندو الفلوس و ضارت لپوطاجي مخلياهم بلاكة كايشوفو فبعضياتهم ، مشافت جهتهم حتى سمعات خطواتهم غاديين من تما... كاتشوف فيه كيفاش معنق نهيلة و غادي بالشوية عليه على حساب خطواتها حيت مثقلة، كاتبان فيهم السعادة و الهناء و حتى نهيلة وجهها تبشر و نوّر منعاكسة عليه الراحة لي عايشة فيها.... شوفتها لوعد يمكن خلاتها تندم على اشنو دارت يمكن بقات فيها مني شافتها فهاديك الحالة يمكن توحشات ايامها معاها و الضحك لي ضحكو و الأسرار لي تشاااركو ولكن الندم مكاينفع فوالو مني كايفوت لفوووت داكشي علاش الإنسان يدير الف حساب قبل مايدير شي تصرف اتجاه اي شخص كيفما بغا يكون باش مايندمش مع الوقت....

اليوم رجعات ربيعة من السفر و عطات لوعد راحة يومين هاد الأخيرة شبعات نعاس مناضت حتى للظهر جمعات غدا و فطور... فهاد اليومين رجعات علاقتها بحال اللول مع حياة كاتبقى مها و ماتقدرش تقطع معاها الهضرة مدة طويلة ولكن مابقاوش جبدو موضوع الزواج...

لبسات حوايجها ديال لخروج و ظفرات شعرها جنب معولة تخرج حتى كاتوقف عليها حياة..

حياة : فين غادية ؟ مغاتمشيش معايا عند فوزية

وعد :اش غادي ندير وسط لعيالات

حياة : مولفة نديك معايا ديما ماشي حتى لليوم السيدة فاتحة غانمشيو نطلو عليها مع العيالات راه سمعت بلي غادير لينا الرفيسة ياك كاتعجبك

وعد :مافيا لي ياكل بغيت نمشي لجردة نسرح رجليا شوية شحال هادي ما خرجت

حياة : ايوا على خاطرك المهم دي معاك الساروت راه تقدري ماتلقاينيش فالدار...

مشات هزات ساروتها كانت نساتو و خرجات من الدار، شداتها على رجليها حتى لجردة واخا بعيدة شوية ولكن فضلات تمشى على انها تخسر لفلوس على طاكسي ولا طوبيس... وصلات تما و رجعو ليها ذكريات كثيرة منهم مع نهيلة و منهم مع باها لي كانت كاتجي هي وياه شي مرات... تنهدات كاتشوف كيفاش الدنيا كاتبدل وحتى حاجة مكاتبقى على حالها فظرف عام حياتها تقلبات رأسا على عقب فالاخير كاتشوف حتى تعيى و تحمد الله....

جلسات تما شوية حاضية الغادي و الجاي كتاكل الزريعة بعدما خداتها من عند واحد تما، وبعد مدة ناضت باش ترجع بحالها خرجات لواحد الشارع كبير... غادية و كاتلعب فالظفيرة ديالها حتى كايبان ليها نبيل نازل من واحد الدروج قلبها ضرب و هزات راسها كاتبان ليها

البلاك ديال البنكة و السمية مكتوبة كبيرة لفوق ، هاد الاخير كان لابس الكلاص و كايهضر فالتليفون مع بغات تحدر راسها و دير بحالا مكاتعرفوش جاو عيونها فعينيه تلفات و ماعرفات ماتقدم و ماتأخر خصوصا مني شافتو قطع التليفون و وقف كايتسناها توصل عندو....

تمنات الطريق تزيد تطوال و ماتوصلش عندو جاها واحد الارتباك غريب و قلبها كاتحس بيه غادي يسكت يمكن من غرابة الموقف و يمكن خايفاه يسولها على جوابها و ما تلقى اشنو تقول ليه.... أما هو بقى شاد تليفونو فيدو و كايشوف فيها كيفاش كاتجر فرجليها باش ماتوصل عندو ولكن فآخر المطاف وصلات و وقفات قدامو معارفة ماتقدم و ما تأخر... بابتسامة بشوشة على شفايفو مد ليها يديه ونطق

نبيل : اهلا وعد صافا؟

وعد (مدات يدها سلمات عليه) : الحمد لله و نتا؟؟

نبيل : بخير.. صدفة زوينة هادي

وعد (بارتباك كادخل و تخرج فالهضرة) : ءء اه كنت ف الجردة و دزت من هنا راجعة لدار ماصحابش ليا غانشوفك

نبيل (عوج فيها راسو) : كون عرفتي غادي تشوفيني گاعما دوزي من هنا ياك

وعد (حسات بيه قرا أفكارها) : هااا "بلعات ريقها" احم لا ماشي هكاك غير ماتوقعتهاش و صافي

نبيل : ايوا الالة هادي هي لبنكة فاش خدام داكشي علاش شفتيني هنا

واقفة قدامو الارتباك واضح عليها بحال شي تلميذة واقفة قدام المدير ديالها... كاتلعب بصباعها و عينيها كايدورو كاتشوف فگاع لقنات إلا فوجهو... فهاد الأثناء نبيل كان كايحلل تصرفاتها عرفها حشمانة منو غير من التزنيگة لي بانت على خدودها... فجأة

نطق بالسؤال لي مني جات عينها فعينيه من بعيد تمناتو مايسولوش ليها...

نبيل : لبارح سولت لواليدة قالت ليا جوابك مزال ماوصلهاش...

وعد (حدرات راسها) : اممم

نبيل : مغاديش تجاوبيني انا دابا و تقصري على راسك الطريق

الصمت هو لي كان جوااابها باغة تقول لا و مابغاتش تخرج ليها من فمها ...نصها باغي يرفض و النصف الآخر باغي يقبل و كلام مها كايدور فراسها بحال الضمير عارفة راسها غادي تبقى حياتها كاملة فتمارة و لقراية ماعندهاش ليها الدماغ لماط و لفيزيك بينها و بينهم غير الخير و الإحسان مافكراتش تبدل الشعبة و دير آداب و تحاول تسلك راسها مكاينش لي يفقها و يوريها الطريق الصحيح... تشبتات بفكرة انها ماشي ديال لقراية و صعيب هاد لفكرة تحيد من راسها.... وحدة بحالها يا تصبر لتمارة يا تزوج و تگلس فدار الراجل يصرف عليها مدى الحياة....

تفكيرها سرح لبعييد و نبيل واقف كايشوف لغادي و الجاي كايشوف فيهم و وعد مترددة معارفة باش تجاوبو... كسر الصمت وهو كايخشي التليفون فجيبو

نبيل : بان ليا خاصنا شي گلسة نهضرو على خاطرنا " باقتراح" اشنو بان ليك نگلسو فشي كافي نهضرو على خاطرنا حسن من هاد لوقفة

وعد (بتردد) : فييين ؟؟

نبيل (نعت ليها لواحد لقهوة مقابلة مع البنكة) : نگلسو فهاديك إلى مابغيتيش تبعدي سينو نمشيو لشي كافي أخرى

وعد : نگلسو غير فهادي

ماعرفاتش كيفاش دارت وافقات حتى لقات راسها غادية جنبو باش يقطعو الشانطي قفزات ملي حسات بيدو على ظهرها بلا مايقرب منها ممشيها معاه فالطريق حتى وصلو لقهوة و خداو بلاصتهم.... جا عندهم السرباي حط ليهم lmenu وهو ينطق نبيل

نبيل : اشنو تاخدي ؟

وعد :عصير الليمون

نبيل (عيط على السرباي) : واحد نص نص و jus d'orange "خدا السرباي طلباتهم وهو تكا بيديه على الطبلة و نطق بدون مقدمات" اشنو السبب لي خلاك مترددة تقبلي

وعد (بصراحة) : نتا كبير عليا بزاف

الصراحة هي عنوانها تسولها تعطيك الجواب فوجهك بلا ماتحشم واخا ماعرت كيفاش يكون الجواب... مني جاها بسؤال مباشر نيشان نيشان صارحاتو حيت بالصح هذا هو السبب لي خلاها مترددة يقدر كون كان واحد أصغر كون قبلات بالزربة.....

نبيل ماقدرش يخفي اعجابو بصراحتها لي عطاتها ليه فالوجه نيشان، بتاسم بلا هواه كايحك فلحيتو الخفيفة وهي كاتشوف فيه مستنية تعليقو على جوابها...

نبيل : واليديك شحال ديال لفرق بيناتهم فالعمر

وعد : قد الفرق لي بيني و بينك

نبيل : ايوا شفتي

وعد (حدرات راسها) : ولكن زواجهم مكانش ناجح... ماما ديما كاتشوف راسها مظلومة مابغيتش نكون بحالها

نبيل (فهم لبلان) : يعني تزوجات بلا إرادتها

وعد : امممم

نبيل : ولكن نتي وضعك غيير حتى واحد مغادي يفرض عليك هاد الزواج "بقات ساكتة ،وهو يتفكر الطرشة لي شاف فوجهها مني شافها حدا الطوبيس" واش حاولات ماماك تفرض عليك هاد الزواج؟؟

وعد(بدون تردد) : اه

نبيل (تنهد) : الزواج مكايكونش بالغصب حيت حاجة ديال الدوام ماشي نهار ولا يومين و زيد عليها مابقيناش فالتمانينات راه الوقت تبدلات دابا" ركز عيونو على عيونها " دابا نتي بغينا يكون كلشي برضاك

وعد (هربات عينيها منو و نطقات بتساؤل) : علاش بغيتي تزوج بيا؟؟ احم شفتك كاتحاول تقنعني نقبل

يتبع...